جيهان و المعفر الجزء الرابع و الأخير

قاليا جيهان تزوجي بيا .. قتليه لا لا لا .. واش نتا مريض ولا شنو هادي يومين ونتا كتعنق فوحدة و جاي دابا كتقولي تزوجي بيا .. قالي كنتي تما ؟ .. آه كنت تما جيت نشوف هاد الحفلات دياولك كيدايرين .. شوف أغالي شغلك هداك وحياتك هاديك غي متجيش و تقولي تزوجي بيا .. نساني و نسا نهار عرفتيني .. وأنا ندمت على نهار لي شفتك .. كيف قلت ليك غلطنا فالعنوان بجوج .. بسلامة عليك .. ودرت وخليتو ومشيت حسيت براسي كنت قاسية عليه .. ولكن هاكة أحسن لينا بجوج .. رجعت المغرب .. وأنا وحدة أخرى .. معاودتش فكرت فيه .. رجعت داز واحد الشهر وبدات القرايا .. ونسيت كلشي وتشغلت بقرايتي .. وليت كنتفادى نتلاقا بأمال باش متجبدش معايا موضوع غالي .. دازت 6 أشهر و سميت غالي مكنجبدهاش .. حتال واحد النهار .. كنت فالدار .. شدني وجع فجنبي كنغوت ربي لي خلقني .. عيطو على الإسعاف جات داتني .. جيت داخلة للكلينيك حتا كنشوف أمين خطيب أمال .. حيت هوا طبيب تما .. شافني جا كيجري ..دخلوني قلبوني دارو ليا الراديو لقاو عندي المسرانة الزايدة .. وخاصني عملية هداكسع .. دخلوني دارو ليا العملية .. دازت مزيان .. دوزت النهار كامل فالطبيب .. قلت للدار غير سيرو بلا متكرفسو و تباتو هنا .. بغات تبقا ماما ولكن قلت ليه غير سيري .. حيت كنت بخير .. مشاو الدار وغمضت عيني واحد الشوية .. حتا فيقاتني واحد الريحة سبقات لنيفي .. حليت عيني لقيت غالي واقف عند راسي .. شنو كدير هنا .. شووووت راك عيانة .. شكون قاليك راني هنا .. أنا كنهدر حتا كيبان ليا أمين داخل .. وعرفت بيلا أمين لي قالها ليه .. جا عندي أمين .. قالي سمحي ليا أجيهان ولكن كنت مواعدو بيلا فينما نسمع عليك شي خبار نقولها ليه مهيم نخليكم دابا .. قالي غالي كيبقيتي .. قتليه مزيان وبخير ودابا يمكن ليك تمشي .. قالي واخا على راحتك .. و دار وجا غادي .. و صل للباب ودار عندي و قالي .. عمري منقدر ننساك أجيهان .. ومشا وخرج .. بديت كنبكي .. ومكنتش عارفة علاش كنبكي .. دوزت 3 أيام فالكلينيك .. خرجت ومشيت للدار بقيت سيمانة مكنخرجش .. نهار خرجت تلاقيت بأمال .. يالاه بغات تهدر و أنا نقول ليها هدري فأي حاجة غير غالي لي متجبديهش .. قاتليا لا أصلا مبقيتش غادي نجبدو .. حيت أصلا راه خطب .. قتليها كيفاااااش  .. قاتلي كيف سمعتي راه مشا خطب .. بلا منحس بديت كنهدر بجهد .. بديت كنقول ليها لا لا لا لا ميمكنش .. ميمكنش غالي يديرها .. وقاتلي علاش ميديرهاش ونتي جا طلب منك الزواج ورفضتي .. قتليها أنا رفضت باش يتبدل باش يتغير .. شوية أنا كنهدر وهي كتفرنس وكتشوف فشي حاجة ورايا .. درت نشوف فاش كتشوف لقيتو غالي .. عرفتها كانت غي كتكدب .. قتليها أمال عمرك دوري بساحتي ..ونتا باركة من هاد الفعايل .. وزدت قالي غي سمعي آش غادي نقول .. وقفت قتلو مغادي نسمع من عندك حتا حاجة و زدت .. جا من ورايا وجرني من يدي بعنف باراكة من هاد العناد .. جريت يدي بجهد .. معا هديك الجرة لي جرني فاللول و معا هديك الجرة لي جريت أنا .. الجرح كان باقي كيضرني راه يالاه درت عملية .. دراتني و بدات كتسيل بالدم .. أنا شفت الدم تخلعت و رجلي فشلو عليا .. معقلتش حتا طحت و حسيت بيه هزني .. محليت عيني حتال الطبيب .. لقيتو جالس حدايا ... غي حليت عيني .. قالي سمحي ليا بزاف أنا سبب .. وصافي مغاديش تعاودي تشوفيني .. وغادي نخرج من حياتك و نخليك .. ولكن عمري غادي نساك .. بسلامة عليك .. أنا منطقت بحتا كلمة و هو مشا .. خرجت من الطبيب و مشيت للدار و جات عندي أمال .. قاتليا جيهان لآخر مرة غادي نهدر معاك فهاد الموضوع و ديري لي بغيتي .. غالي كيبغيك .. وفعلا بدا كيتبدل على قبلك .. ولكن نتي مبغيتيش تعطيه فرصة غي يكون قريب منك .. معرفتكش علاش كتقلبي .. أمال حتا أنا كنبغيه و كنتعذب بزاااف بسبابو .. ولكن راه ديما غادي نبقاو فالمشاكيل .. جيهان عطيه فرصة و أنا أكيدة غالي عمرو غادي يخيب ظنك .. فكري مزيان أو وياك تسرعي فشي قرار غادي تندمي عليه من بعد أنا مشيت .. بقييييت كنفكر .. ولقيت راسي ضالماه و قلت نعطيه فرصة وحدة و نشوف واش غادي يتبدل .. دازت سيمانة بقيت كنتسنا على منرتاح و نبرا .. بريت وأول حاجة غادي ندير .. قلت نمشي عند غالي .. هزيت الطونوبيل .. ومشيت حدا دارهم .. يالاه وقفت .. حتا كيبان ليا خارج من الدار هو وشي وحدة .. مصدقتش خرجت من الطونوبيل و بقيت كنشوف .. هي طلعات الطونوبيل هو يلاه جا يطلع و هو يشوفني .. تصدم .. أنا ركبت و زدت .. شفت فالمراية بان ليا نزل هديك لي معاه .. و جا تابعني أنا .. بقيت غادة محبستش و هو كيكلاكسوني ورايا باش نحبس .. مبغيتش نحبس .. بقيت غادة بسرعة و حتا هو من ورايا غادي بسرعة .. خفت عليه طرا شي كسيدة و قفت فجنب الطريق .. و حتا هو وقف .. وجا جاي لعندي .. غي وقف قدامي هو يقولي متفهميش غلط .. كلشي غادي نشرحو ليك .. قتليه شنو غادي تشرح .. نتا عمرك غادي تبدل .. قاليا غي فهميني الله يخليك .. السيد كيهدر وكينهج النفس غادي تقطع فيه .. وأنا وتقول واش رحمتو .. نتا ممزيانش و مكتسواش و كنت جايا نقول ليك أنا غادي نتزوج .. قاليا لا ميمكنش كتكدبي غي خليني نشرح ليك .. قتليه سكت .. السيد كان واقف قدامي حتا كيبان ليا طاح و سخف ..معرفت مندير .. عيطت للإسعاف .. بقيت حداه .. جات الإسعاف داتو .. أنا مشيت بلاصيت مزيان طونوبيلتو وسديتها .. وهزيت طونوبيلتي و مشيت الكلينيك .. مشيت كنجري نسول آشنو عندو .. قالولي انهيار عصبي سبابو أنو تعرض لضغوطات كثيرة مؤخرا .. وحيت غالبا كان كيعيش فواحد الضغط نفسي مستمر و جو قلق .. بقيت كنقول أنا سبب .. ولكن أنا مضلمتوش هو لي كيديرها قد راسو .. عيطت لأمال عاودت ليها شنو طرا .. و جات عندي هي و أمين .. غي دخلات و هي تقولي آش طرا بيناتكم .. عاودت ليها من اللحظة لي جيت حدا دارو .. منين عاودت ليهم و سكت بان ليا أمين ضرب يدو فالحيط و دار و أمال شدات فراسها و جلسات .. مفهمت والو .. مالكم شنو طرا .. وهي تقولي أمال نتي لي آش طرا لمخك .. هداكسع فهمي منو طاري و خليه يشرح ليك شكون هديك .. و أنا نقول ليها مكيهمنيش هادشي .. قاتليا هاديك راها واحد خيتي جات كتقول ل غالي راني حاملة منك .. وراه كنا كاملين عندو فالدار .. هادي 4 يام و هي مصدعة ليه راسو كتقوليه نتا بابات ولدي .. وهو كيحلف مقاسها ولا قرب ليها .. وهاد العشية كنا جالسين و عيطنا ليها باش نفكرو فشي حل .. و كان خارج هو وياها باش يمشيو الطبيب يديرو شي تحاليل باش يعرف واش دري ولدو .. وهو متأكد بيلا غي كتكذب عليه .. الكلام ديال أمال نزل عليا كي الصاعقة .. عاوتاني ضلمت غالي .. جا عندي أمين وقالي .. جيهان غالي كيبغيك و بلا متضيعيه من يديك .. مشيت كنسول الطبيب واش يمكن لي نشوفو .. قالي مزال شوية .. بقيت كنتسنى .. حتا قالي يمكن ليك دخلي .. مشيت دخلت و أنا دموعي فعينيا .. لقيتو ناعس .. قربت ليه .. وقلت ليه .. سمح ليا أغالي .. زدتك بهمي فوق همك .. أنا كنبغيك .. ولكن باغاك تبدل .. مبغيتش نبقاو فالمشاكيل شكون هديك و مالك تعطلتي .. بغيتك تقدرني .. وخايفة إيلا متبدلش .. كنبغيك و كنموت عليك .. و أنا كنت كندوز من حدا داركم عن قصد غي باش نشوفك .. و من نهار شفتك فالندوة و أنا كنفكر فيك .. و دابا منقدرش نبعد عليك كنبغيك ..و نضت جيت خارجة .. و صلت الباب وأنا نسمعو كيقول .. جيهان تزوجي بيا .. درت و قلت ليه و أنا كنبكي وكنشهق بالبكا آه قابلة نتزوج بيك .. مهيم غالي برا و خرج من الطبيب .. حلينا مشكيل ديال هديك خيتي لي كانت لاصقة فيه .. وفعلا غي كتكذب .. تقدم لدارنا و قبلو بيه .. و تسنينا حتا عاودت شديت العطلة و تزوجنا .. بقا معاوني فقرايتي وواقف بجنبي .. كل يوم كنت كنحس أني تولدت من جديد .. ولدنا 2 وليدات و 3 جاي فالطريق .. كيعاملني بحال الأميرة .. مغاديش نقوليكم gاع أيامنا عسل .. ولكن عيشين فسعادة .. غالي تبدل على قبلي .. و قدر مسؤولية الزواج و الحب .. والحب كيحتاج لتضحيات و تنازلات .. كيحتاج لقلوب صافية .. و لعقول نضيفة .. الحب شي حاجة كبيرة لي مكتجي غي مرة وحدة فالعمر .. فخليكم تعرفو تختارو معامن تشاركو هاد الحب ..