صورة مصغرة لـقصة أنا أحترق

قصة أنا أحترق

qisat 9isat ana a7tari9 ahtariq
بقلم Ghazal trust
قصة مرتبطة بـقصة حبيبي مفيوزي

رواية أنا أحترق

الحياة كتقسم لطبقات ، وكل طبقة كيفاش عايشة ، كاينة الطبقة البلوريتاريا وما تسمى بالطبقة الكادحة مقاتلين مع المعيشة و مشكلهم هوا الفلوس ولاكن كاتلقا قلوبهم على بعضياتهم و سعاداء حيت كاينعسو مرتاحين وما عندهم ورت ولا حتى حاجة علاياش يهزو الهم. وكاينة الطبقة المتوسطة اللي ماعندهومش وماخاصهمش ولاكن البعض منهم كايشوف لفوق وكيحلم يوصل وهاز الهم وكايتعاند مع اللي فوق منو، وفجهة اخرى كاينة الطبقة الرأسمالية هي الطبقة البرجوازية اللي ماعارفينش اشنو واقع تحت منهم وعايشين الدنيا بطولها وعرضها وكاين اللي مالك ثروات لا تعد و لا تحصى ومايقدرش العقل يتخيلها ولاكن اغلبيتهم كاتلقاهم ممرتاحينش نفسيا و مالاقينش الراحة لانه بالنسبة ليهم كلشي ممل وطالع ليهم كلشي فالراس .., ماعندهمش طموح اللي يخليهم يحلمو ويوصلو ليه كونهم كيملكو كلشي واي حاجة كيوصلو ليها بسهولة بلا مايديرو مجهود . هاد الناس كايتزادو كايلقاو كلشي واجد قدامهم وثرواتهم كتوارت ابا عن جد وماحدها كتوارث من جيل لجيل وهيا كتزيد تكبر وتضاعف اكثر واكثر ،وبعاد بزاف على الطبقات الاخرين وقليل فين كايتصادفو لان ماشي نفس الاماكن كتجمعهم ، كل واحد عايش العالم ديالو فلبلاصة اللي تناسبو فجميع انحاء العالم بطل القصة من هاد الطبقة الرأسمالية جا لدنيا لقى كلشي واجد و لاكن بطلتنا غير شكل من مدينة تطوان الاب شمالي والام كازاوية وهي من الطبقة المتوسطة ماعندهاش وماخصهاش ، ولاكن هيا لا عينيها كيشوفو لفوق وبغات تولي منهم وفكل مرة كاتشوف حياتهم فالمواقع الالكترونية وعلى التلفازة وكيفاش عايشين كتمرض ونفسيتها كتحطم وكتبغي تولي بحالهم ومن مستواهم وكتحارب وتجاهد باش توصل باي طريقة ...

...: زيدك شي كاس ديال اتاي ...شحاال ماجلسنا دردشنا انا وياك اصحبتي ههه 
...: نتي اللي مابقيناشي كنشدوك ، مابقيتيشي كتجي تخيطي عندي ، مالكي غبرتي فمرة 
-...: اودي غير خليني ساكتة ...هزي ليك حليوة (مدات ليها الطبسيل) راني واحلة مع مع ديك الموصيبة اللي عطاني الله ، ردات ليا هادا لهنا (حطات يدها جبهتها) كنضل تابعاها و الفلوس كاملة كنخسرهم عليها غير باش ماتحسش بالنقص قدام صحاباتها ، ومع دالك كتعلق فين تفلق وانا ماعنديش الجهد ديال دوك ليمارك اللي كتبغي هيا
...: الله يهديك أ ملاك (مليكة كيعيطو ليها ملاك ) بنات الوقت هما هادو ، هاد الجيل كايطييير كابري معاها دابا تكبر وتعمل عقلها... شحال عندها دابا؟
ملاك: عندها 16 سنة داخلة ف 17 وبغات تبان وتلبس وتخرج وتسافر بوحدها ، ولات هي وباها كي المش مع الفار هوا يقول شا وهي تقول را ، وكتشد معاه الضدد، اما أنا راه شادا معاها الخاطر شوية و كنقول نتصاحب معاها باش تبدا تعاود ليا كلشي ..هه ساعة هي مريكلة و كلتعاود ليا غير داكشي اللي بغات وكل مرة نحصل عليها شي حاجة ...حتى كتقول ليا اخر مرة وكترجع تكفسها كفس وكفس وباها قبيييح ...راكي عارفة العسكر كي دايرين ماكايتفاهموش لا مع ولادهم لا مع عيالاتهم ...انا راسي كتشريها ليا معاه تا كيبغي يسد ليا الصالون فالجرة ديالها هيا ، ويبا مشا حتا سدو ليا ماعنها منين تشد شي رسال ديك الساعة وهوا ماكيعتقها حتى ب ربعة دريال ، وانا دلكشي اللي كيدخلو ليا الصالون كنخصرو عليها على الله تبت وتحس بيا 
...: هادا هوا السن اللي صعيب ...بنتك جاتها المراهقة صعيبة ، سايسي معاها راه غير هي اللي عندك
ملاك: اااححح (تنهدات) المراهقة ماشي جاتها صعيبة ...جاتها سخونة وكتبغي تعرى وتقزب وطلق الشعور ...كل شهر تلسقني وتقول ليا صبغيه ليا ، وكل نهار تم نازلة عندي لصالون تقاد وتجبد وتقولي كحبي ...اري فلوس دوك صحاباتها خطار وكبار عليها وهيا كتعاند معاهم وباغا تكبر دغيا 
...: هههه مع هيا تبارك الله غزالة و عاطة للعين ، كن غير كان خدام عندي داك الجن كن زوجتها ليه
ملاك : داكشي علاش كنخاف عليها، عاطا للعين وكاتزيدها بدوك السوالف وديك المشية وتقزاب ...كاطييير يا ختي كاطيييير، وكايجيب ليها راسها غير هيا اللي كتفهم و حنا كاااملين مكلخييين ..غا عيا بوحدها اللي مطورة زعما، والله ماكرهت نزوجها ونتهنى ، الزواج هوا للي يبرد ليها الدودة... (هزات عينيها) هاهيا لا للة لعروسة جايا ...بدلي الموضوع الى سمعاتني كانعاود غاتردني عدوتها وغانوليو فشد ليا نقطع ليك 
...: اهلااا بنتي غيثة صباااح النور (12h00 )
غيثة: (جات كتسلم) كيف نتينا خالتو ...لاباس؟ ...توحشناااك فاين غبرتي ؟
...: ايوا نتينا اللي غبرتي ...كيف عاملة مع القراية؟
غيثة: الحمد الله 
ملاك: كاتقرى غير نص نهار دالعشية، مالها هي هبيلة تفيق مع 8 وتمشي تقرى هه
غيثة: اصلا مع 8 كاينين غير المواد اللي كنكره ، الفيزيك والماط والاساتدة ديالهم خايبين ...ماما خاصك تمشي معايا ، قالي الحارس العام جيبي ولي امرك
ملاك: دي باك ...انا تشوهت داك الملف دالغياب كايبدلوه بسبابك كل نهار ...كيعمر غير بالغياب ديالك ...ديك المرة سنيت ليك التزام 
غيثة: غتمشي معايا ولا دني معايا شي واحد من الشارع نقولهم بابا...نتينا اصلا معرفا عندهم فالادارة ويلا ديتلهم شي شمكار من الزنقة عايضحكو عليك نتينا يقولو مزوجة بشمكار، اما انا عانشري ليه باكية دلكارو ويتبعني كيجري يسيني ليا...
ملاك: سيري لبسي راه البرد ونتي جايا عندي هاكا ...راه داخلة مع الجوج وانا اللي غنمشي نشوف هاد الروينة واشمن كارتة دايرة عاوتاني
مشات غيثة للكوزينة جمعات فطور وغدا ..شركات كلشي وعمرات كرشها و مشات للدوش دوشات وسالات وخرجات لقات مها وباها كيتغداو ...ودخلات لبيتها هزات شكارتها خشات فيها الحوايج اللي غتلبس حيت باباها ماكيخليهاش تلبس المقزب ودير الماكياج وداير ليها الفولار ، جمعات حوايجعا ولبسات حوايج عاديين ودارت الفولار وخرجات حاملة شكارتها
غيثة: ماما ...انا هبطت للصالون 😉
ملاك: (حركات راسها) 
باباها بقا غير كايشوف وطالع ليه الدم ماكيضحكش وغير كيطلع فيها ويهبط ديما منوي فيها ، ماماها كتستر عليها وكتخبي زبايلها ، نزلات للصالون ديال ماماها للي تحت دارهم على الشارع لقات البنات خدامين ودخلات نيشان لاصال دليستيتيك بدلات حوايجها تما ، لبسات كسوة فالبوردو قصيرة مع طربوش ديالها وطلقات شعرها ولبسات كاط فالاسود وبوليرو اسود من الفوق خشات الشكارة فالبلاكار لفوق ركناتها تما وهزات ساك كحل وخرجات عند البنات مشات نيشان هزات صباغة ديال الدفار 
غيثة : (كتبعكك) هاد الصبايغ عاد جبتوهم جداد؟(كتصبغ دفارها)
...: اه هادوك؟ اااه عاد جابتهم ماماك ، راه حلفات علينا ايلا لقات شي وحدة كتصبغ بيهم تقجها، سربي قبل مادخل تلقاك كتصبغي بها.
بدات غيثة كتزرب قبل ماتنزل مها وصبغات الضفار ودارت الماكياج وجلسات فوق واحد الفطوي عاجبها راسها وكيعجبها يبقاو الناس يشوفو فيها، كل شوية تشوف فالمرايا وضحك غير بوحدها كتجرب اينا ضحكة تجي معاها تا دخلات مها هازة كارطونة ديال المجلات جداد ...غير شافتها بدات تعض فشنايفها وتولول وجات شداتها من دراعها ودخلاتها لبيت
ملاك: 😱 واش غادا تقراي ولا تسلكطي؟ فين الشكارة؟ ويلي ويلي علاش حيدتي الفولار !!! (كطلع وتهبط فيها) هاي هاي هاي هادا شي رونديفو ؟ بدلي عليا هاد الحالة راه الى شافك باك غادي يدبحك ...محيدة الفولار وزايداها بالتقزاب واش ماكتعرفيش باك كي داير؟؟ عاد كان غيقتلك ديك المرة فاش حصلك كادوري بلا فولار وحلف ليك قاليك الى شافك معرسة شعرك غايجلسك من فالدار وعمرك تزطمي فديك الليسي
غيثة: والله مانمشي هايداك مبهدلة لليسي يضحكو عليا ، انا ماكنحملشي السبنية وما غانعملاشي ، بغا السبنية يعملها هوا...هايدا غانمشي 😠 والله مانبدلهم
ملاك: اويلي وحدي ...انا شريتهم ليك باش تلبسهم مستورين ونتي حيدتي لباباها السروال ولبستيها هاكاك 😡
غيثة: شني دابا غانمشيو ولا مانمشيوشي ؟؟ انا والله مانبدلهم (كتشوف فراسها) عجبوني هايدا 😠
ملاك: زيدي الله يلgيها ونتهنا منك ، انا شحال ما بقيت غايطلقني باك بسبابك، الى شافني معاك ونتي هاكا غايقوليا كتقوديها ونتي قحبة بحالها


غيثة: ااااففف 😠غنستر حدي نركب معاك فالطونوبيل ونحيد هاد العباية ديالك ..نتينا اصلا حاسة بيك عاملة ديك السبنية بزز منك وماكرهتيشي تا تينا تزولها 
ملاك: سوقك فيا ...ماحاملاهاش ودايراها بزز مني المهم دايراها .تحركي قدامي ..
لبسات غيثة عاباية دماماها كانت معلقة مور الباب ودارت الشال غطات شعرها وتمات خارجة دازت على المجلات هزات وحدة باش تبركك شنو الجديد فالموضة ومها تا بعاها وشادة راسها بالفقصة ، ركبو فالطوموبيل دماماها كيا بيكانطو ومشاو ، حيدات غيثة العاباية والشال وجلسات كتقاد فالمرايا ومعا حداها سايكة الطوموبيل وكتسوط بالغدايد ، طلقات الموسيقى وجهدات فيها وهبطات الزاج 
ملاك: الله يعفو عليك ابنتي ...شنو زعما كانقولس للناس شوفوني راكبة فالطوموبيل!!! نقصي عليا داك الويل فؤعتي ليا راسي 
غيثة: كتر فيك النكير 😠 واش مانتموسقوشي؟ 
نقسات شوية وحلات المجلة كتفرج وهيا تبان ليها فالصفحة الاولى ..
غيثة: (تعصبات) تفوو شووف هاد ملكة الجمال ديال فرنسا ..قالك ملكة جمال وهي زرقة بحال كي الزبل ، وانا ضايعة هنا ...انا اللي نستاهل نكون فبلاصتها (كتقرى) هاي هاي قالك دارت علاقة مع شي واحد ملقب ب ملك كولومبيا !!! عهد سقراط اللي اول مرة كيسمع لاعلام يكتب عليه ...ههه ايوا ملكة جمال بسيف مايسمح للإعلام يكتب عليه ، ماخلاهمشي يعملو الصورة ديالو ! 
ملاك: بقاي متبعة داكشي والله حتى تسطاي ، هاديك راه ماجاتش و داروها ملكة جمال ...راه حتى لقاوها قارية و واعية عاد شافو الزين ، اما نتي ماحافضة تا جدول الضرب ديال 3 وباغا تولي ملكة جمال 
غيثة: ومالي مانوليشي ..شنو زعما كتنقص مني؟ غانولي عارضة ازياء 
ملاك: باش باك يمشي عليك للحبس هه ...قراي قؤايتك اللي تنفعك وباراكا من ماتحلمي 
غيثة:( قلبات الصفحة) ها واحدة اخرى قالك..وعد سقراط عتكمل 28 سنة قريبا ستحتفل بعيد ميلادها في المغرب و سولوها علاش مزال مزوجتشي قتلهم..انا لا افكر في الزواج ولم اجد فارس احلامي بعد ...ههه سعداتك عندك كلشي بقا ليك غير الراجل تا هوا تقدر تشريه بالفلوس ، هاد وعد وداك عهد عندهم نفس الكنية! واقيلا من نفس العاءلة ؟
ملاك: نزلي تكعدي راكي وصلتي وها الليسي ديالك، ويدي نشوفو اشمن خبيزة خبزتي عاوتاتي ...شي نهار يعيطو ليا نخدم معاهم فديك الادارة بكترة ماكل نهار كايشوفو وجهي .
نزلات غيثة كتكسول عاجبها رسها والليسي كاملة كتشوفو فيها ودخلات مع امها للادارة لقاتها مغرقاها غياب هيا وصحاباتها كاملين حتى هما جايبين مواتهم ، شبع فيهم الحارس العام سبان ...
الحارس العام: اخر مرة نعطيكم ورقة ديال الدخول ، واش ماكتحشموش كل مؤة مجرجرسن واليديكم لهنا 
ملاك: المرة الجايا عيط على باها ، انا اخر مرة نجي معاها ، هاك ها النمرة ديال باها
قيدات ليه النمرة غالطة بلعاني غير باش تخلع غيثة وماتعاودش تغيب ، خداو الورقة ومشات هي ومريم وهند صحاباتها ، يالاه خرجو وهي تقوليهم غيثة
غيثة: واش غاندخلو عند داك المعواق عاوتاني 4 دسوايع كاااملة وماعندنا تا ساعة متقوبة نخرجو نسلتو فيها
مريم: واييه انا غندخل غنعس 
هند: انا غاندخل الى قاليا شي كلمة نوض لديلمو ندير بيه السبة ونخرج
غيثة: انا غنعيط ل لحمزة يجي يخرجني ...ماغندخلشي ، يديني لقهوة دالشيشا نشيشو ههه 
لبنات سمعو لبلان ودارو بناقص من الدخول للقسم وتبعوها خلاو ماواتهم خارجين مع الباب كيهضرو وهما مشاو نقزو من الصور ديال الليسي من اللور...
نقزو من الصور ومشاو كيطيرو لتيليبوتيك حيت تا وحدة ماعندها الصولد وفراس مالهم بتلاتة غير درهم هيا باش يعيطو ، دخلات غيثة لاحت درهم ودوزات النمرة
هند: عنداك تشدك بواط بوقال ههه (boit vocal ) راه ديك الدرهم هيا اللي عندنا 
مريم:اه ويلا جاوبك هضري بزربة بلا تبعكيك قبل ماتسالي درهم 
غيثة :ههه كيتكم🖕...الو حمزة عيط ليا داااابا ضروووري ... (تقطع)...هههه هاهوا غيعيط ونعضر علا خاطري 
هند: ويلاااا عيط ليك بعدا ههه
غيثة: هانتي غاتشوفي ، غانقوليه اجي يجي كيطيير ، ماكيخسرش ليا خاطري (كادير ليهم باي باي بالتيلي) هاهوا كيعيط ...شتو ههه...الو حمزة 
...فين الزين مانشوفوكش؟
هند: واسير تقود ياالمعنب لاخر تفو
غيثة : الو ...راه غير واحد الزبل داز حدايا بسل عليا و زبلات فيه صاحيبتي (زبلات فيه: عايراتو)...فين تينا؟ ...انا مع البنات ادا بغيتي نخرجو ؟...واخا . (قطعات وهيا ضور لهاداك اللي بسل عليها كات باقي كيتعاطا مع صحاباتها بالمعيور) شعند اصل ديمااااك يا البيزعاوي المعنب ، باقي شي واحيد كيتبسل على البنات فالزنقة؟
...: احححح كلك زبدة ومنين نبداااا هههه
مريم: واااسير الله يحرق الزامل بوك يا الكيدار سير سير عند مك تلحسك هههه 
...: وانتي مااالك جاتك الغيرة منها؟ انا هضرت معاها هيا وتينا مالك كادنقز بواااحد 
غيثة: وامشي دخرى على راسك، كمااارة كي عامل تفووو ...يالاه البنات وماتجاوبوهشي ...خاليوه ينبح تما تا يعيا 
مشاو وخلاوه كيسب فيهم من السمجة لتحت وزادو مع الشارع 
هند:اشنو قالك حمزة؟ غايجي
غيثة: شني يسحابلك ؟ كانلعبو حنا او لا!!! طبعا غايجي يا الصحبة مايقدرشي يقولي لا
مريم: عالله مايخرجش لينا هاد البلان فالصو ويخرج لينا باك من شي جيهة
غيثة: بابا خليتو فالدار، نتي اللي حضي مع خوك لا يخرج لينا يسمطنا كاملين كي المرة الفايتة ، ولا نمشي نلقاوه مبند لينا فالقهوة د الشيشة ويلقانا داخلين يعطينا شي صبغة دالدق تا نرطابو 
تيييت تييييت
غيتة: ها حمزة جا ، طلعو دغيا قبل ما يقشعنا شي واحد 
طلعو كيطيرو تركنو هند ومريم اللور و غيثة لقدام سلمو عليه وزادو
حمزة: ههه وافين امسخوووطة ؟ سالتة عاوتاني ...فين بغيتي نمشيو؟
غيثة: لكافي دالشيشية هههه فمارتيل 
حمزة: هههه كنت جالس تما دابا قبل مانجي انا واحد صاحبي وقلت ليه نمشي نجيب شي بنات ونجي
غيثة: شكون هاد صاحبك؟ (ضارت عند مريم) عنداك يكون خوك 😨
حمزة: (هز عينو فالمرايا) خوك سميتو احمد شوقي ؟ هههه
غيثة: شنو ؟ 
حمزة: كنت دابا مع رضوان و احمد ...رضوان مشا وبقيت انا واحمد
غيثة: من نيتك ؟ واش رضوان الملحن؟
حمزة: ههه لا رضوان الشوافة😅طبعا رضوان الملحن 
وصلو قدام القهوة ونزلو كيشوفو فبعضيتهم عةجبهم الحال ودخلو كيضورو فعينيهم لا يلقاو خو مريم تما ومشا تابعين حمزة تا لقاو احمد شوقي جالس وجلسو فرحانين كيفرنسو و دومونضا ليهم حمزة على الشيشة و المشروبات وبقاو مجمعين كيضحكو تا هضر حمزة
حمزة: ايوا ...كنتي قلتي عندك شي عيد ميلاد غاتغني فيه ياك؟
احمد: اه فطنجة السيمانة جايا ف اوتيل العهد تمشي ههههه
حمزة: اش غانمشي اصاحبي هههه بلا عراضة؟ 
غيثة كتنخزو يمشي باش تلسق فيه
احمد: ههه عرفتي ديالمن بعدا ههههه
حمزة: ديالمن
البنات شادين شيشية بحال الرضاعة وطالقين ودنيهم
احمد: ديال واحد البنت هي وخوها توام ...سمعت اول مرة تعمل عيد ميلاد فالمغرب ، راه كايكتبو عليها فالمجلات سميتعا وعد ...تيتيييزة كتبان فالتصاور ، خوها اللي عمرو مابان وماكيبغيش يبان 
غيثة سمعاتو اش قال وبالصدمة جرات التيو تا تقلبات شيشة وبقات حالة فمها نسات راسها وسهاااات كلهم وقفو مللي زلعات الشيشة الا عيا اللي بقات جالسة وشادة تيو فمها وسااهيا
حمزة: وااااا البنت ....وااااا العايلة قلبتي الشيشة هههههه وااااا غيثة (دار ليها باي باي قدام عينيها)
غيثة: ها؟ (ضورات وجها) شكون زلع هادي؟ شكون طيحها؟ 
احمد: ههههععع ...شحال فعمرك شحال ؟ 
حمزة: ههههههههه 😂😂😂 يالاه داخلة ف 17 سنة ، واااغيثة راكي نتي اللي زلعتيها 
احمد: صافي ماشي مشكيل ههههه البنت باقا صغيرة
غيثة: (مارضاتش ولات حمرة) هما اللي جروها تا طاحت 😢 (جاتها البكية)
هند و مريم : هههههههه صافي حنا اللي جريناها ماشي مشكيل
غيثة: اهىءاهةء😢 (مارضاتش) غانمشي بحالي
ناضت وهوا يشدها حمزة جلسها كيسكت فيها وكيسايسو معاها تا بردات وبقات جالسة كضور فعينيها وناضو بدلو البلاصة باش ينقيو السرباية الروينة اللي دارت ، جلسات شوية وتبدل الموضوع اللي كانو كيهضرو عليه وهيا ساكتة فيها الدودة بغاتهم يجبدو الموضوع ولاكن والو ماجبدهوش؛ عيات تصبر وهيا تهضر تجبد تيلي طلقات لويفي د القهوة وسيفطات لحمزة مسج فالولتساب 
💬غيثة: قوليه على لانيف بليييز ، قوليه يدينا معاه 
حمزة وصلو المساج جبد التيلي شاف المساج ديالها وضار شاف فيها مستغرب ودخل قراه وجاتو الضحكة 
💬حمزة: هههه عليها من الصباح ونتي تبربصي حدايا هههه...اوك انا نسولو
شافت المساج وبدات تفرنس وكاتسناه يهضر وهوا كيشوف فيها ويفقصها بلعاني مابغاش يهضر تا شاف وجها كيصفار عاد هضر
حمزة: ايوا هيا قولي شي انيف واعر غاتمشي تغني فيه
احمد: اااه نسيت ماكملت ليك، ماشي غير انا اللي غانغني فيه ، بزااف ديال المغنين عرب واجانب 
حمزة: مزيان هي هاد لانيف ديال شي واحد ملعق 
احمد: واايلي تا نتا ، ماشي غير ملعقين ، شي حاجة فوق ملعقين ههه نضبر ليك اخاي على لانفيت الى بغيتي 
حمزة: (شاف ف فيثة) وعلاش لا ههه 
غيثة غير حاللة فمها وكتحلم وتخايل 
احمد: غانشوف كيفاش نضبر ليك فيها حيت بحال هادو كايكونو مانعين شي حد يدخل وكيفرقو ليزانفيت غير على المعارف ديالهم ...اجي علاش مانديروش قاضية 
تمشي على اساس مساعد ديالي ؟
غيثة: اه يمشي 
حمزة: ههههههههه نديك معايا؟
احمد: ديها يلا بغات ، نديكم بجوج على اساس مساعدين ديالي ودخلو تكتاشفو داك العالم 
غيثة بقات كتفرنس تا بانت ليها الخوية ديال الضرسة دالعقل حيت مزال ماكبرو ليها ضروس العقل 
احمد: مهم نخليك، تا لتما ونتقاشعو، (يالاه بغا يمشي وهوا يضور عندها) خاصك تياني كبيرة شوية ، حاولي تباني كبيبرة باش مايخرجوكش 😉
غيثة: واخا 😍 (داكشي اللي بغيت تا انا)
مشا رضوان وجلسو كيتجمعو تاوصلات الستة وناضو ...
حمزة: زيدي نوصلك لداركم راه الستة هادي 
ناضو وصل كل وحدة لحدا دارهم حيت ساكنين فحومة وحط غيثة فواحد القنت بعيد على الدار 
غيثة : عطيني نعيط فالتيلي 
حمزة: هههه عاوتاني نفس الفيلم 
غيثة: ههه الو سارة، جيبي ليا العباية اللي اما فالصالون والشال راني فالبلاصة المعلومة ...يالاه سربي وعنداك يشوفك بابا ...حسن نيت هه
حمزة: خدامة معاك عاد البنت هاصك تبداي تخلصيها على هاد البليزير اللي كادير فيك ديما 
غيثة: راه خدامة عند ماما فالصالون ...ضريفة.
جات سارة هازة صطل دالزبل دايرة بيه السبة وميكة كحلة عطاتها لغيثة من الزاج ديال الطونوبيل و مشات ، لبسات غيثة العباية والشال مع الكاط هيا هاديك وخرجات من الطونوبيل كتسلت وحمزة كيضحك عليها مولف بيها كتبدل عندو فالطونوبيل وعزيزة عليه مشات نيشان للصالون لقاتو عامر بالكليان ، وقبل ما دخل تقلبات مور الباب حيدات الشال والعابايا ودخلات كتبوزة عليهم عاجبها راسها و هيا دخل سارة موراها هازة سطل خاوي 
غيثة: فاين هيا ماما؟ 
سارة: غاتكون طلعات للدار، انا فاش خرجت عندك خليتها فالصالون ودرت السبة بالسطل
غيثة: ااه ههه شكرا
دخلات لاصال دلستيتيك بدلات تما وخشات الحوايج فالشكارة ودارت الفولار وطلعات للدار كأن شيء لم يكن ، لقات باباها كيتفرج فالتلفازة و مها فالكوزينة كتخلط وصفة طبيغية للوجه باش تهبطها للصالون تخدم بيها ، دخلات نيشان لبيتها ماهضرات مع تا واحد بدلات فيه ، لبسات بيجامة و خوات الشكرة من الحوايج رجعات كل حاجة بلاصتها و خرجات هبطات للصالون هزات مجلة اللي كانت كتقرى ودازت عند مول الحانوت خدات روشارج ديال 10 دراهم كونيكسيون ورجعات بحالها للدار لقات مها نازلة
ملاك: سيري طيبي العشا انا مامسالياش نطيب دابا 
غيثة: عطيني داكشي نمشي نخدمو انا فالصالون ونتينا مشي طيب العشا 
ملاك: غاتحركي و نعيط ليه يجي يفرشخ مك مع الدروج، راه عندك على سبة 
غيثة: صافي هانا طالعة
طلعات للكوزينة روناتها جبدات كاع الماعن طيبات فيهم خربقات كلشي وخلات الروينة ومشات البيت تقرى المجلة ؛ بقات محنية على المجلة كتقرى وتعاود تا حفضاتها و شدات تيلي كتقلب على الفايسبوك ديال وعد باش تبركك وتشوف فين عايشة ، عيات تقلب تا عيات وهيا طيح ف...
غيثة:اااه هادا هوا الفايس ديال داك عهد اللي مصاحب مع ملكة جمال فرنسا ، (دخلات كتقلب فبروفايلو) ماحاط حتى تصويرة !!! اوعدي بغينا نشوفو غير واش كيشبه لختو ولا لا! (سيفطات ليه انفيتاسيون) بلاتي نزل شي تصويرة مزيونة يكون بااين فيها وجهي مزيان 
ناضت كاطير قادات راسها باش تبان بعقلها فالصورة وطلقات الشعر وخدات سيلفي حطاتو فوطو دبروفيل وبقات عساسة عليه ي اكسيبطيها
بقات عساسة عليه كاتسنى يقبل طلب الصداقة اللي سيفطات ليه تا عيات ونعسات هاكاك ، دخلات مها عندها لقاتها مكسلة عوجة والمجلة تحت وجها والتيلي فيدها وبدات كتفيق فيها بعصبية
ملاك: انوضي تكعدي الله يمسخك ...نووضي تهزي جمعي ديك الكوزينة اللي رونتي 😡
غيثة: (فايقة مضهشرة) اففف 😠 مابغيتش نتعشا غير فرقوني بعدو مني 
ملاك: (كيدفعها) نوضي جمعي الكوزينة اما العشى راه ماكاينش ، قلت ليك طيبيه ماشي حرقيه ، يالااه نوضي😡 ولا نعيط عليه يجي يزطم فيك
غيثة: عيطي عليه 😠 (رجعات تنعس )
ملاك: (كتعيط بالجهد) عبد المااالك وااا عبد المالك ...اجي عند هادي شوف لي شي حل معاها 😡
عبد المالك(الاب): (كيهضر من الصالة ) غيييثة 😡 غاتنوضي ولا نوض ليك بالسمطة حتى نرض ليك ضهرك رطب من كرشك 
غيثة غير سمعات باها كيغوت ناضت كاطير بقات مها كتغدد وجراتها داتها للكوزينة ، وهي دايزا حدا باها بدا كينكر ..
عبد المالك : بقاي كتلواي عليا وديري علينا ديك تابهلا ديالك، راه نشدك مانطلقك حتى يزيد عند عزراين...راه عييت نجمع ليك، من نهار تزادتي ونتي مشيبانا ، عالله يبان شي مسخوط الوالدين نعطيوك ليه ونتهناو 
ملاك: وا صافي بلا ماطلق علينا داك السيدي ...راه ماشي شايطة عليا، نقص من النكير راه ديك الهضرة كتسمم القلب دبنادم، نوض ضربها وماتبقاش تقولها ديك الهضرة 
غيثة كتجمع الكوزينة وكتبكي من الهضرة اللي كايقولها باها و كيسمعها غير القاصح تا ولات كتحقد عليه ، وهي فهاد السن حساسة وكتشد فقلبها والهضرة الخايبة اللي كيقول ليها باها ركبات فيها الاعصاب ولات كتجنن غير بوحدها حيت مكتقدرش ترد عليه وكتبقى جامعة فقلبها تا شدو فيها الاعصاب وكتغدد وتشد الضدد وكضربو بالبارد ديما وكادير الفعايل اللي كيمرضوه بسباب المعيور اللي كيعطيها.
جمعات الكوزينة بالبكا و مها حداها كطيب العشى وكتشوف فيها وكتحن عليها وهي الوحيدة اللي قريبة ليها وكدير ليها الخاطر ، سالاو وحطو العشا و بغات غيثة تمشي لبيتها وشدها باها بزز ومخرج عينيه
عبد المالك: دوزي تعشاي ، ماشي ديريها قد راسك وتغضبي، ماغدخلي لداك اللبيت حتى تكملي ماكلتك وتجمعي الطبلة عاد تنوضي
غيثة: (الدموع محجرين فعينيها) شنو عملت عاوتاني ياك ماعملت والو ...غير خليني نمشي نعس 😢
عبد المالك: (مخرج عينيه) ديما كاديري ماشي عاد غاديري ، الهبال ديالك طلع ليا فراسي ، ماعرفتك فين باغا توصلي ...باغا الطيري ، مالك شنو كيسحاب ليك راسك؟ راكي واالو ...ولالياتك كيقراو وكيجيو هما لوالا ونتي زرقة لا قرايا لا سعايا 
غيتة كتاكل بزز وقاطعة البكية وكتشهق من لداخل وباها كينكر و هي كتغدد وساكتة ومها كاتشوف فيها بقات فيها
ملاك: خلي البنت تعشى ، واش جلستيها تعشى غير باش تسمعها هاد السم ؟ 
عبد المالك: (كيغوت ) نتي اللي ضسرتيها ، خليني نربيها راه ناقصة ترابي
ملاك: هادو هما هما ترابي عندك؟ تشدها تقلها عصى وتزيد ليها بالهضرة السامة وتنقص منها ؟ ماشي هاكا كايربيو ناس ولادهم، ماشي بالمعيور والسبان وتخليها تحس براسها ماتسوى والو وماعندها قيمة، راك غاتجيبها فراسك وفيا 
غيثة ساكتة وكتسمع وكتجمع تا ناضت بزعفة كاتجري دخلات لبيتها وتركنات فواحد القنت ونفاجرات بكا تا تجيفات وبدات كتكحب وتعض فيديها وتجر فحوايجها بحال الى كاتخرج ديك الهضرة اللي كايقوليها بديك الطريقة ، بقات هاكاك تا دخل عندها باها زعفان حل عليها الباب بجهالة وهي قطعات الحس وتكمشات خايفة
عبد المالك: والله ياباباك ومانضتي جلستي فين كنتي جالسة تا نشبعك عصى ونوريك الزعغة اللي كاتعفي قدامي وهاد التفرعين ديالك ، الى فيك الجنون انا غانحيدهم ليك 😡 يالاه تحركي ...
ناضت كترعد وترجف وقاطعة الحس ودايزة قدامو خايفة ، يالاه عطاتو بالضهر وهوا يجمع معاها بركلة جابها ليها فبلاصت الكلاوي تا تزوات وطاحت على ركابيها
شدات فجنبها وبقات طايحة على ركابيها ويدخا فالارض كطلع النفس بزز وباها سحاب ليه كاديرها بلعاني شدها من يدها بغا يوقفها وماقدارتش وهوا كينكر ، جات مها كتجري عندها شداتها باش توقف ..
ملاك: اسيدي بعد منها ، واش باغي تقتلها؟ واش نتا كاتشوف فيها يبسات ماقادراش تحرك وكدفع فيها؟ ماشي هادو هما الترابي ، الى أثر عليك العسكر و داك التعامل الخايب ديالهم ماتجيش تخرجو ليا فالبنت وتعقدها ، شنو دارت ليك دابا شنو؟ كتقلب ليها غير على السبة 😡 ندمت اللي قلت هضر معاها كااااع...نوض ابنتي نوضي (كتنوضها وهي كارمة عينيها خارجين ماقاداش تحرك)
عبد المالك: راه غانشركك نتي وياها ونوريك الترابي كي دايرين، ماشي نتي اللي غتعلميني نربي بنتي ونتي اصلا مازال مامربياش؛ انا الراجل دهاد الدار وانا اللي هازكوم وكنصرف عليكم، يا اما تحتارموني يا اما خرجو عليا ، ماشي غانيقا مقابل مشاكيلكم تا تحمقوني وتكلسو ضحكو عليا، راه عندي نص عقل ..والله تا نزيد خلفة ونخليكم ، شوهتوني مع العاءلة ، كولشي عايشين هانيين الا حنا...فين ما يعيطو يسولو فينا كي دايرين مايقولو لي كي داير مع بنتك ؟ كلشي ولا عارف هاد المصيبة شكادير وبقا ايهم غير يقولو ليا ماربيتي فيها والو، نخيلها انا دير ما بغات تا تجيب ليا شي كرش شي نهار وديك الساعة عاد الفضيحة الكبيرة
غيثة كتبكي مارضاتش ومالاك ماعجبهاش الحال وناضت ليه
ملاك: سمع ...بغيتي تمشي سير ها الباب ، هاد الهضرة اللي كتقول للبنت وهي كتسمع فيك راه حشومة ، واش اعباد الله البنت مراهقة ..وا مراااهقة مزال تا ماكملات 17 عام نيشان وجالسة كتسمع فهادشي ..ومن عند من؟ من عند باها ، راه هادشي اللي كتقول فيه خطااار وكيتخيلو العقل والبنت عقلها صغير وكتشد وكتخزن فيه هادشي ؛ راه فاش كتسمع يحال هادشي كتبدا تخيلو وغادي تعقد وهي يالاه كتبني شخصيتها من هاد المرحلة اللي هيا فيها، هنا فين كايبلنو ليها الطرقان وخصعا تشد الطريق المزيانة ونتا اول واحد خاصك تكون حداها وكاع الافكار السلبية ماخصهاش تفكر فيهم وماخصكش تحط ليها هاد الافكار فراسها ...شحال قدني نشرح ليك عيت مانفهمك 😡
عبد المالك: شوفي بلا ماتبقاي تخربقي عليا ، اترو عليكم الافلام والمسلسالات تا وليتو بغيتو ديرو بحالهم، اشمن شخصية ولا الزمر، يا اما تشد طريق نيشان يا اما نقتلها وندخل على باباها للحبس ، تقولي ليا المراهقة ولا الزبل😡 مالها غير هيا اللي مراهقة ، هاهما بنات عمها قدها فالسن وكيجيو هما لوالا و واليديهم هانيين الا هادي هي اللي ماعرفتها فين بغات توصل 😡 اللي مربي مربي واللي مسخوط راه مسخوط 
مالاك: اودي الهضرة معاك زايدة ناقصة، تفكيركم هوا اللي خلا النص فبنات المغرب يخرجو الطريق بسباب العقلية العوجة ديالكم ...بناتكم راه ماشي عبيد عندكم وماشي بالعصى والمعيور باش كيترباو ...وهاد البنت الى وقعات ليها شي حاجة رااه مانسمحش ليك سمعتي 
هزات مالاك غيثة حطاتها على الناموسية وباها غير كايسوط وينكر كيف ديما وماكايخلي مايقول ، مشات مالاك سخنات شوسة دزيت بلدية وجابتها مسدات بيها لغيثة جنبها وهي كتحصر عليها ورجالها مازال مابغا يسكت من النكير ؛ غير كايبدا ما كيساليش، وغيثة كتسمع وكتبكي تا سكت ياها ومشا ينعس وخلاها هي ومها فالبيت ناعسة حداها وكطبطب عليها تا نعسو
صونا ليها التيلي فالصباح مع 8 باش تمشي تقرى و هي تفيق مها هي اللولة اللي حداها ونوضاتها باش تمشي تقرى ، ناضت ليها غيثة بزز مضهشرة بالنعاس وغسلات وجها ولبسات حوايجها توني صبور و دارت الفولار خيت باها فارضو عليها ديرو بزز منها ، عيات معاها مها باش تجلس تفطر متبغاتش وخرجات مشات نيشان حتى لباب دالليسي والصباح مضبب حيت البرد والجو مقناط وههي كتكره الجو المكهرب كيدير ليها اكتأب وقفات حدا الليسي بعيدة حيت ماكتبغيش يشوفوها مكشترة ودايرة الفولار وهي تقلب الطريق للتيليبوتيك كتعيط فالتيلي ، بقات كاتصوني وتعاود 4 دالمرات عاد ...
غيثة: الو حمزة ...علاش ماكاتجاوبش؟ 
حمزة: ناااعس اغيثة راه 8 ، شكون هاد نسخوط الواليدين اللي يقدر يفيق مع هاد الوقت وهاد الجو المريض؟
غيثة: انا .. (كتهضر بصوت حزين) 
حمزة: مالكي ؟ واش باغا تجي؟ 
غيثة : اه😢
حمزة: يالاه اجي ،شدي طاكسي يجيبك تا لدار وانا غنخلصو، والله مافيا ماينوض فهاد البرد و عارفك زاوية ومعيطة ليا مع هاد الوقت ومافيك مايقرى 
غيثة: واخا انا جايا
قطعات غيثة ومشات شدات طاكسي نيشان لدار حمزة اللي ساكن ف ابارطومو وخدام موضف فالبنك الشعبي مي حاليا شاد كونجي، وصلات للعمارة وعيطات ليه فالانطيرفون هبط عندها بكيطمة كحلة وطاكية ،خلص الطاكسي وطلعها معاه للدار ، دخلات لاحت الشكارة والشال وتجبدات فوق الناموسية ديالو ، هوا كيهضر كتشخر ، خلاها وتلاح حداها فالفوطوي كمل نعاسو ومافاقو تا ل 11h عاد ناض كيفيق فيها 
حمزة: وا غييثة ، نوضي يالاه تفطري راه 11 هادي (كيحركها) وانوضي عاودي ليا مالكي مع داك باك عاوتاني؟
غيثة: اننننن (ميتة بالنعاس) هانا انوووض..
ناضت كتلوى دايخة مشات غسلات وجها و رجعات عندو
حمزة: مالكي باك؟ ...يالاه بعدا نخرجو نفطرو عند زعزع وعاودي ليا مالكي معاه
غيثة: راك عارف نفس الفيلم كيتعاود ، انا عييت والله .
هزات شكارتها وطلقات شعرها وتحنات تلبس سبرديلتها وعيتغوت 
غيثة: ااااااي (شدات فجنبها)
حمزة: بشوية عليك مالكي؟(جا عندها شد فيها)
غيثة: ااااي يما جنبي😭😭 اهىءاهىء ماقدرتشي نتحنى ماقدرتشي ...احح
حمزة: مالكي شنو وقع ؟ مال جنبك؟
غيثة: ضربني بابا وماكنقدرشي نهبط ولا نتحرك بيه بزاف 😭
حمزة: واااع هاد باك شي نهار غيقتلك، كايدير ليك الضرب دالعسكر ، حيدي نعقد ليك دوك السيور 
عقد ليها حمزة السيور و خرجات من باب الدار وهيا تشوفها واحد الجارة كانت نتزلة مع الدروج هازة الشبكة د النشير خارجة من عندو وبدات نازلة وكتهضر
الجارة: هاد العمارة كثر فيها الفساد؛ مابقاوشي يوقرونا والا يحتارمو الجيران ، الله ينعلها تربية
غيثة: الله ينعلها قاعدة فيكم ...التبركيك هوا شغلكم تفو 
الجارة:سمع نقولك ، نهار نجبرك فهاد العمارة نجيب ليك البوليس سمعتي (خرج حمزة)
حمزة:الاللة ...اش وصلنا لهادشي؟ هادي بحال ختي، وزايدون ماشي سوقك ،داري وندير فيها اللي بغيت ماجاش راجلك ولا باك شراها ليا 😡 بشار كيداير
سد الباب وجر غيثة ونزلو خلاو الجارة مخرجة عينيها ، ومشاو هما عند زعزع يفطرو ، دخلو جلسو وطلبو الفطور 
غيثة: يغيت بريوات بكالامار وكامبة (كروفيط) و واحد زعزع (زعزع هوا عبارة على عصير متنوع فيه كلشي حتى لفلان والفواكه الجافة ومهلبية وفواكه مخلطة مطحونة جامعهم كاس واحد ومعروف ف مدينة تطوان باسم زعزع)
حمزة:تا انا بحالها...ايوا عاودي ليا مالك ..شنو وقع
غيثة: ابارح على والو ناض ليا بابا ... (عاودات ليه كلشي )
حمزة: واااع بزااف عاد باك ، كاع العسكر هاكا، معصبين ومراض 
غيثة: شي نهار نهرب والله ما يلقاوني ، عييت والله ..كنكره ندخل للدار ، كايعجبني نبقةطى فالزنقة ،كنضحك ونسى كلشي، غير كنبغي ندخل للدار كنتفكر الصداع والنكير كنكره ندخل والله 😔
حمزة: بفففف...دابا كن غير خلاك تسافري كن شافرنا انا وياك لشي بلاصة قبل ما يسالي ليا الكونجي، شي قراية ماكاتقرايها اللهم ديري شهادة طبية و نسافرو نبدلو الجو
غيثة: (كتفطر) يالاه نمشيو (ضارت ليها فالخوى)
حمزة: هههه كولي كولي ، اش غاتقولي لياك؟ غادا مع حمزة؟ هههه باش يجمعني انا وياك ، نهار يحصلك معايا تمشي فيها
غيثة: نمشيو مسافرو وفاش نرجعو ناكلها ونكمدها، المهم نسافرو 
حمزة: هههه عالااام نتي ، واش باك ماكايخليك تا تخرج بوحد للشارع مع البنات بقا ليك غير السفر!...اجي بعدا ... الى كنا غاديين لعيد الميلاد كي غاديري تخرجي بلليل؟ وتسهري ونتي عمرك فتي 7 دالعشية فالزنقة؟
غيثة: مهم نمشي ، واخا نعرف نهرب ، المهم نمشي ونشوف المشاهير مباشرة ونشطو ههه ماعرفت اش غانلبس؟ ماعنديش الكساوي والصبابط العالين ديال السهرات؟
حمزة: هههههههه😂😂 وا كي غاديري تخرجي وتسهري ؟؟؟ شوفي بعدا كي ديري عاد فكري فاللبس ! وااله تا نتي بزاااف
غيثة: سلفني نشري كسوة وصباط ، حتى نرجعهم ليك 
حمزة: غاتحمقي ديلمي نتي، بديتي تحلمي عاوتاني فشنو تلبسي !!! حريرتك حرييرة و خاصك تشوفي راسك بعدا واش غاتخرجي عاد نشوفو اللبش
غيثة: (ماسسوقاش) دابا هما غايكونو لابسين داااكشي واااعر ومعري ، خاصني بحال داكشي ولاكن غالي ، ماعرفت كي غاندير نضبر على شي لبسة واااعرة بحالهم !!!

يتبع


قصص جديدة
قصة افتقدك من تأليف مريامة العروصي
قصة افتقدك مريامة العروصي
قصة الحب الصامت من تأليف سلوى شتيوي
قصة الحب الصامت سلوى شتيوي