أنا أحترق الجزء 40

من تأليف Ghazal trust
2017

محتوى القصة

رواية أنا احترق ل Ghazal trust الفصل الثالث

وقف عهد مربع يديه كيشوف فيه عاقد حجبانو الشىء اللي أكد لمحمد ان عهد مخبي شي حاجة ، بعد لحضات النضر فعيون بعض بجرءة كاملة من عهد تنهد و قال...
عهد: عندي مشكل مع المدام اللي كنت مزوج بيها 
محمد: ؟؟ بحالاش هاد المشكل؟ 
عهد: الى قلت ليك المشكل تقدر تفهمني 
محمد: وعلاش لا ، وعلاش حنا صحاب 
عهد: اوك...يالاه نترحكو من هنا 
محمد: اوك 
داءما الحوار اللي كيدور بين عهد ومحمد وعاءلتو كيكون بالانجليزية وحتى بين العاءلة دعهد مع بعضياتهم ومع غيرهم كيكون باللغو الانجليزية مخلطة بالفرنسية وكلمات من الدارجة.
ركب محمد حدا عهد وانطلقو لمقهى كبيرة وراقية بمدينة مراكش ودخلو بجوج تحت انضار وغمزات البنات ، جلسو فبلاصة بعيدة على الناس فوق كراسة كبار مريحين ديال الجلد 
محمد: اش كاين اصاحبي خلعتيني
جلس عهد كيتنهد داير رجل على رجل وكيهضر ببرودة 
عهد: المدام اللي والد معاها دايرة ليا عقدة ، بغات تجرني عندها بأي طريقة ومأخرا لتاجأت للسحر والشعودة ، وشوف شنو قال ليها راسها وفاش بغات تشعود ليا
محمد: اعوذ بالله من الشيطان الرجيم ...اش هادشي ؟؟؟
عهد: هادشي باش تشدني وتلعب بيا كيما بغات...فضحاتها غدير وفضحات ليها داكشي اللي بغات دير ليا ، ماعجبنيش لحال ومابقيتش كنتيق فيها ومستحيل نرجع نتيق فيها وتلعب بالمساءل ديالي و...كمل من عندك
محمد: من حقك ...حتا انا منتيقش فوحدة فكرات تسحر ليا
عهد: دونك حنا متافقين على هاد النقطة ...نتا عارفني عقلي غربي كنهضر نيشان بلا زواق ........سمع، مرتي اناااا..بغات تسحر ليا فالمني 
محمد حمار وجهو بقا ساكت مصدوم مالقى باش يجاوب وعهد كيهضر وكيأكد على كل كلمة كيقولها 
عهد: انا داابا مستحيييييل نعاشرها ولا نعس مرتاح حداها ، كن ما غدير اللي فرشاتها وقالت بللي كانت بغات تاخد داكشي وتديه لشي مشعودة وتلعب فيه....دابا فآخر ايااامي يوليو ولادي كيلعبو بيهم المشعودين وينتقالو من يد ليد 
محمد (تنهد) هادشي بزااف
عهد رتاح فهضرتو ورجع لور تكى وربع يديه وقال
عهد: اشنو بان ليك فهادشي؟ باش تقدر تنصحني ، وحط راسك فهاد الموقف اللي فيه انا 
محمد: لو انا فبلاصتك كنت نطلقها
عهد: واخا تنادم معاها الحال وتكون كتبغيك وتموت عليك
محمد: واخا تبغي تنتاحر منقدرش نبقى معاها
عهد: هاااا...دابا تفاهمنا ، هضرتي منطقيا بلا ماتجي لا من جيهتها ولا من جهتي ياك
محمد: وي ..عادي ، وحدة مافيهاش تيقة وانا بلاصتك واخا نسامحها مي التقة كتبخر ومنقدرش نعاشرها
عهد: واسمع مزيااااان دابا ....هادشي كاامل اللي قلت ليك غتقلبو للعكس...وغتولي غدير هي اللي بغات تسحر ليا والمدام القديمة هي اللي فكاتني و فضحاتك ختك...اشنو رأيك فهادشي؟
محمد بقا ساكت مصدوم ومامستوعبش 
عهد : انا قبل منقول ليك شنو واقع ، بغيت نسمع رأيك بلا ماتناففني وعكست ليه الاحداث غير باش نعرف رأيك بلا متجي من جيهت ختك ولا من جيهت مرتي اللولة ، ودابا سمعني رأيك عاوتاني من بعد ماعرفتي ان غدير هي اللي بغات تشعود ماشي المدام اللولة ، وحيت كونها ختك وغتبقا فيك فضلت نعاود ليك هاد الحجاية بطريقتي باش نحيدو العواطف ونهضرو نيشان ونوضحو الصح من الغلط ونتا قلتي بللي مكايناش التقة فيها ...يعني دابا غدير منتيقش فيها وكن قلت ليك بللي ختك هي اللي دارت هادشي موحال واش كنتي غتقول ليا نطلق و منتيقش ، وكنتي تقدر تجي من جيهتها ودافع عليها اولا لا ،

وتقدر ترجعني انا اللي غالط وهنا غنبداو انا وياك كنجبدو فالموضوع ومغنوصلو لحتى نتيجة ، مي فاش عكست ليك القصة هضرتي ولقينا حل بلا صدع بلا مشاكل كاينة ولا لا.محمد سكت متوقعش تعكس الامور وهضرتو تنطابق على ختو ويحكم عليها بالحكام اللي حكمو على غيثة فاللول كونها هيا اللي بغات تسحر . مالقا مايقول وبقات ساهي كيفكر وعهد كيخمم ويشوف فيه كيتسناه يقول شي حاجة وشاد سوارت الطوموبيل فيدو كيدقدق بيهم فوق الطبلة بصوت بطيء وكيفكر تا هز محمد راسو في حيرة
محمد: واا ..شغانقوليك، صدمتيني ومتوقعتش من غدير تفكر بهاد الطريقة بتاتا ...او يمكن حبها ليك اللي دفعها دير هادشي باش ترجع تبغيها
عهد: بسخرية)هه من نيتك اصاحبي...واش كاين شي واحد كيبغي شي واحد وكآديه...ويدير شي حوايج اللي يضروه ، يهز واحد المادة حساسة ويديها لناس غراب يلعبو فيها كيبغاو ...واش كتفكر بعقلك ولا شنو !!! جينا نهضرو بلاتي هي احسن ونشوفو شي حل بلا متجي لا من جيهت ختك ولا انا نجي من جيهت مرتي ...الى بديتي عليا اه حقا كتبغيك وكدا ...تا انا غنقول ليك مرتي اللولة اولا منها وشافت الويل وخصها تعويض على العذاب اللي شافتو ، اما ختك راه كبرات فالدفىء وجات عندي معززة مكرمة وكلشي ضارب ليها الحساب عكس مرتي اللي تا واحد ما حاملها وانا الوحيد اللي مضرق عليها ومغطيها حيت مكاينش حتى اللي يسول فيها واش كلات ولا ناعسة بالجوع، مي ختك لا ...كلشي داير بيها وكلشي داير ليها بحال الماء القليل وهادشي خلاها تحقد وتبغي تجرني بزز مني ، مرتي الى تخليت عليها حتى انا راه غيمسحو بيها الارض وديجا تخليت عليها ومسحو بيها الارض مي ختك لا ...واخا كنغفل عليها راه كلشي داير بيها وكلشي مهللي فيها وكيدعموها والمساند الرسمي ديالها الكبير هو الواليدة ، مي مرتي ماعندها فداك القصر غير الله وانا ومن غيري اللي يدعمها مكاااااينش باااح من غيري انا رااااه والوووو غير الريح غيطرها 
محمد: تنهد) شنو دابا بغيتي تقول اعهد؟
عهد: ماقلت والو اصلا...نتا اللي غتقول ، ختك بقا فيها الحال وغوت عليها على داكشي اللي بغات دير وعتارفات و لحسن حضها ماضربتهاش حيت حاملة ، مي الفشوش والحبل اللي رخيت ليها ها هيا خرجات ركبات ودارت اكسيدون وجابتها فراسها وطيحات البيبي ومتحلمش مرة اخرى نعارشرها اولا تحمل مني حيت تقتي فيها مشات فمرة وكيما فكرات تسحر ليا المرة اللولة تفكر فيها المرة التانية ودير المستحيل باش تشدني ليها وكتفكر فراسها قبل ماتفكر فيها ومكتفكرش فشنو يقدر يوقع ليا من مور داكشي اللي كتبلاني ليه.
محمد ساكت حاط يدو على جبهتو وكيتنهد ويفكر وعهد قدامو كيهضر 
محمد: هز راسو فعهد) عهد ....فهمتك ، عندك الحق وهي غلطات ماكانش خاصها تفكر دير داكشي وهاهيا خدات عقوبتها وتجازات على داكشي وخسرات البيبي ، المشاكل كيوقعو بين الراجل والمرأة وهادشي عادي ...
عهد: اه كيوقعو ومكنضنش كاين شي راجل على وجه الارض اللي داز من المشاكل اللي دزت منهم انا مع مرتي ...دابا بقات مسألة الثقة ، مبقيتش كنتيق فغدير امحمد ....بغات تبقى مرتي تبقى ونرجع نهضر معاها عادي اما شي حاجة اخرى مغديش نقدر نديرها معاها .
محمد: غدير كتبغيك اعهد
عهد: حتى انا ماقلت ليها والو ...بغات تبقى حتى ترجع تيقتي فيها مع المدة مرحبا ولاكن حاليا متسناش مني شي حاجة ، غير باش نقول ليك واحد الحاجة ...كن ماكانتش ختك مكنتش غنعقل عليها واخا تكون بنت ماعرفت شكون ، المشكل انها خت صاحبي ...بغيتي دابا تهضر معاها نتا هضر ، ماقدرتيش غنهضر معاها انا ، حيت كتبغيني مغنطلقهاش حتى طلب الطلاق راسها 
محمد: عهد...نتا باغي طلق غدير غير قولها 
عهد: الى مابغاتش مغنطلقهاش ، ويلا دارت شي غلط اخر بحال هادا غنطلقها والى فكرات تآديني ولا تآدي شي واحد اخر راك عارف ...الصحبة ديالنا تقدر تولي عداوة ، وانا مابغيتش نوليو اعداء ومن الاحسن هضر مع ختك بلا منهضر معاها انا ونزيد نكدها عليها 
محمد: وقف) عهد ...طلق غدير غنديها معايا ، والصداقة ديالنا تبقى جانبا ، غنهضر معاها ليوم
عهد وقف كيتنهد رتب على كتف محمد ومحمد بادلو ابتسامة وحرك راسو بالايجاب وخرجو فاتجاه الكلينيك

وصلو للكلينيك دخلو لقاو واليديها معاها وهي كتبكي وكيصبروها على البيبي اللي طاح ، جلسو شوية من بعد خرج باها ومها وموراه الوفد ديالو المرافق ليه من باب خاص ومشاو ، وقف عهد متكي على الحيط حاط رجل فوق رجل ومربع يديه ، مكفض كمام القميجة الزرقاء اللي لابس وفاتح ليها صدايف الكول كتبين ليه سنيلة رقيقة فلون فضي كتبري ولابس دجين ازرق وحداء رياضي طالع شوية فوق السروال ، عينيه فالارض وحجبانو معقودين كيتسنى محمد بدخل فالموضوع، غدير كتشوف فيه بنص عين بنضرة كلها اعجاب لحركاتو وسهوات نضراتو وريحتو الفايحة فارجاء الغرفة ، بقات ساهية فيه وهوا ساهي فالارض حتى حجبات ليها النضر وقفة دمحمد قدامها ، هزات عينيها ببطىء شافت فيه بحزن من بعد باحضات ملامح وجهو مغايرة وبقات كتشول بعينيها محمد: اححم...غدير كي بفيتي دابا شوية؟
حركات ليه راسها بالايجاب ورمشات عينيها 
محمد: الحمد لله...غدير عندي ليك شي هضرة بغيت نقولها ليك
غدير: بارتباك) انا عيانة ...مافادراش نهضر دابا وو وومافيا ميسمع شي حاجة اللي تحطمني 
محمد: غدير خاصك تسمعيني...
قطعاتو بصوت حزين والدموع فعينيها
غدير: شفتي صورة دولدي للي ضاع ليا...شفتي شحال كان صغيييور ، كان غيشبه لباباه 
عهد هز عينو تنهد وشاف فاتجاه اخر كيتنهد بحال الى هاز الجبال على ضهرو ، شافت فيه واقف على اعصابو ماباغيش يشوف جيهتها وهي تعيط ليه وهزات يديها فاتجاهو
غدير: عهد...
شاف فيها مادة ليه يدها ورجع تنهد واتاجه بخطوات بطيىءة فاتجاها في حيرة و وقف شاف فمحمد بنص عين ومد يدو ليها ، شداتها زيرات عليه كتبكي وهوا عينو فمحمد كييتحاورو بالعينين ، حس بسخونية فيدو وتلفات لقاها كتبوسها وكتبكي ، بقات فيه وبغا يخطف يدو وشداتها كتبكي ومحمد كيدوز يدو على شعرو وعهد كيسوط وكيحك لحيتو ، شاف فيها بنضرة شفقة ومسح ليها دموعها 
عهد: ششووو صافي ...صافي رتاحي
غدير: واعدني عمرك تخلى عليا
عهد: شوو قلت ليك رتاحي دابا ...من بعد ونهضرو
غدير: الا واعدني ...كيما انا كنواعدك عمرني نتخلى على حبي ليك حتى لنهار نموت 
عهد: الصمت
غدير: عهد واعدني...وانا غنواعدك عمرني ندير شي حاجة اللي تقلقك ولا نغدرك...غلط رتاكبتو و وعد مني ليك عمرو يتعاود ، وحبي ليك كبر مللي كتخيل و نتا هوايا باش كنتنفس ونهار تسمح فيا غنموت ، قولو للي بغيتو ..ماعندي كرامة ما عندي نفس ولاكن عندي حب على قبلو عايشة
بقا كيشوف فيها في حيرة وبقات فيه وهي غارقة فدموعها ومزيرة ليه على يدو كتبكي وتشوف فيه
غدير: تواعدني؟

عهد: بجدية) لا...منقدرش نواعدك...متلززيش عليا نواعدك وماشي ساهل داكشي اللي فكرتي فيه...واللي غادي نقوليك اني ماشي ماعنديش القلب باش نقصى عليك اهاد الدرجة ، غنعطيك اخر فرصة اغادير ، الا فكرتي تآديني ولا تآدي شي واحد اااخر ...كنهضر على اي واحد كيعني ليا فغدي تلقايني فدامك بوجه اخر غير هادا اللي عرفتيني بيه ...علاقاتنا غتبقى مفتوحة حتى تقاد راسها . (تنهد) مهم غنخليك ترتاحي من بعد نرجع دوز يدو بلطف على راسعا وشاف فمحمد وخرج .محمد بقا كيشوف فيها بغا يطرطق عليها و وجهو معصب تا بغا يهضر وهي تغمض عينها وهزات يدها
غدير: عارفاك شنو بغيتي تقول ..بليييز مبغيت نسمع والو
محمد: كتخربقي والله ، غادي تزيدي تعقدي الامور و اخر المطاف غتنوض شي روينة وغتكوني نتي السبب ، من الاحسن رجعي معانا بكرمتك والف واحد يتمناك
غدير: بغضب ) الف واااحد اااه ولاكن بحال عهد مكاين تا وااحد ، قلبي ختارو هوا ماختارش دوك الالف ...بعدوو مني خليييوني ، ماشي سوق حتى وااحد فيااا ، مابغيت ارلء ديال حتى واحد...عهد راجلي ...رااااجلي واش كتسمع ، فهموها وبعدو مني 
محمد شاف فيها وغمض عينيه وتنهد وخرج خلاها تقلبات على جنبها كتنهج .
الطريق كاملة وعهد كيراجع داكشي الوقاءع والحديث كامل وكيتذكر الصورة د غدير وهي كتبكي تا وصل للقصر ، دخل وعقلو مرفوع طلع لفوق وداز لبيت ذهب سمع الغوات وخل الباب لقا الحرب نايضة وذهب كتبكي ورياض ميغوت ومشادين كيتكورو كل واحد منين كيجر ، نقز فكهم وشد كل واحد فجهة وذهب كتعلق فيه كتبكي ورياض واقف كيشوف وكيتنخصص بقا فيه الحال ، شدو عهد عنقو تا هوا وباسو وهي تصعر ذهب كتغوت حتى حمار وجها 
ذهب: ااااااااااااااعععهىءاهىءاهىء دادي..دايديي اهىءاهىءاهىء 
عهد : وصافي راه خوك هاداك علاش كضربيه مسكين ومابغيتيش تخليني نعنقو
رياض: ديا داني دنوا (كيشكي)
عهد: صافي بابا ماتخافش (شاف فذهب) شششش صافي 
.وصافي دادي رياض خوك حشومة 
جلس كل واحد فرجل معنقهم تا سكتات ذهب ورياض معلق بيدو فعنق عهد كيشوف فذهب كتبكي 
عهد: بوس ختيتو 
رياض قرب ببراءة يبوسها وهي دفعو وخلات وجها فعهد ، دمع رياض و مكيرضاش فاش كدفعو واخا كيدابزو كيسمع الهضرة ودغيا كيحن فيها عكسها هي مسميمة وحاجتها مكتحملش اللي يقرب ليها وديما كتلاح ليه لالعابو وكتقاتل باش تركب فطوموبيلتو واخا مكتقدرش تركب كيبفى يدفع فيها تا كيطلعها وشحال من مرة تفلقات وبقات ساكتة كتكمدها غير باش تركب ويسوق بيها ، حتى كتنزل علد كتفكر الدقة و تبدى تبكي بوحدها وغير كيقرب يسكتها كتنزل عليه بشي عضة حتى كيضربها يصمكها ويبكيها نيشان.
عهد: صافي اصاحبي هادي مجنونة هههه بلا متبوسها
ذهب: اعععععننن (فهمات شونو قال)
عهد: ياك هادي ختيتو ديالك 
رياض: امم (حرك راسو بالايجاب)
عهد: يالاه عاود بوسها 
رياض: (كيشير بيدو وكيشرح) دينو داني لين وطااح
عهد: (شاف فذهب) اش داك لشي بيكالة باغا تركبي ؟؟ هههه واش باغا تجي على راسك !! 
عهد فهم رياض شبغاكيقول وفهم الصدع جاي من البيكالة اللي فيها ربعة دروايض بغات تركب ومابغاش يدفعها وجرتو وهي جالسة تا طاح على راسو وشدها من شعرها تا دخل عهد لقاهم مشانقين .
بقا معاهم حتى صالحهم وقلب الجرح ديال ذهب كي بقا اللي فجبهتها ورجع حطها وبعد عليهم البيكالة والطوموبيل وكاع داكشي اللي يقدرو يدابزو عليه وناض بغا يخرج وهوا يتلاقى مع المربية داخلة هازة رضاعة كتخرك فيها ، سمعها خل ودنيها تا تمو جايين المربيات كيطيرو وقفو تاهما فدامو غسل ليهم ودنيهم مزيان ومشا خلاهم كيشطحو بالخلعة ، دخل لبيتو وهي تبان ليه غيثة واقفة فوق الكرسي على صبعان رجليها كتعلق فالبلاكار ، بقا واقف كيشوف فيها شنو بغات تصنع وكيشوف شنو بغات تجبد تا نزلات بشوية عليها وعي دور لقاتو موراها واقف ، نقزات بالخلعة وخبات يديها موراها وبدات كتفتف
عهد شنو داكشي مخبية موراك
غيثة: وو والو 
عهد: اري نشوف يديك
غيثة: بخوف) والو وو

قرب منها كيخزر فيها وهي كترجف وكترجع بللور تا جرها من دراعها وهي كتغانن معاه ، عاض على سنانو باغي يعرف شنو مخبية وهي خاشية راسها بين كتافها وكتمشي وتحي بريجيلاتها فبلاصتها والكسبوة قصيرة كتهز مع مؤخرتها فاي حركة دارتها عهد: ااااريي لهنا نشوف شنو مخبية 
حليها يديها وهي مخبية وجها بدراعها خايفة ينزل عليه ، حل ليها يديها وهوا يتعجب بقا كيشوف 
عهد: طباشير؟؟؟؟.....شكاديري بالطباشير
غيثة: قلت ليك والو (مخبية وجها)
شد عهد الطباشير واحد اخضر واحد بيض فيدو كيشوف وكيقلب على استفسار بينو وبين راسو ، وهي مكمشة مع البلاكار جامعة رجليها كتقفقف وهزا دراعها مدرقا بيه وجها 
عهد: بهدوء)شنو هادشي؟؟؟ شنو كديري بهادشي؟ وعلاش معلقة فالبلاكار ؟(حيدها من قدامو ) حيدي نشوف شنو كديري هنا!
تجبد على اصابع رجليه كيطل على البلاكار ومجبد يديو كيقلب ، وقف على لحركة كأنه لقى شي حاجة وجرها بيدو جبدها وبقا مصدوم ، كلنت علبة ديال الطباشير حلها لقا فيها الالوان وشاف فغيثة زادت نواتو بالخلعة اللي فيها، جرها عندو مستغرب
عهد: شنو كدير بالطباشير؟ ومالكي مخبياه لفوق وكتعلقي ؟ ماخفتيش طيحي؟
هزات راسها كتهضر وتشوف فيه مرعودة
غيثة: وراه كنتكتب بيه
حدها هضرات بان لون خضر بين سنانها وهوا يجرها حل ليها فمها وهي كترطى مخلوعة 
عهد: بعصبية)حلي نشوف شنو واكلة
حليها فمها بزز منها لقا فيه الطباشير لخضر للي لقا فيدها وهي كتجمعو بلسانها باش ميبانش 
عهد: مصدوم) كتاكلي الطباشييييير!!!!!!!
غيثة: وراه غير طباشير ومالو الطباشير مالو ماشي ...ماشي ؟؟ مالو هوا ماشي زوين؟؟ زوييين !
جرها من يدها ولاح العلبة فالارض تشتات وتخلطو الالوان وغيثة كتشوف فيهم وكتغوت وتنقز ، هوا كيغوت فجيه وهي كتغوت فجيه وتا واحد مكيسمع للاخر
عهد: كتاكلي الطباشير لمك هااا؟؟؟ جاك الهيمري ولا بغا طيحي البيبي عاوتاني (شادها من دراعها تا هزها على صبعان رجليها كتلوى)
غيثة: وعلااااش رميتيهاااااا اهىءاهىءاهىء خليييني ناكلو كيعجبني اااااااي اهىءاهىءاهىء زول مني الهيماجي عطيني طباشيري ماشي شغلك
عهد: زاد ورك ليها على يديها) اش كيعجبك فيييه واش كاين شي بنادم طبيعي مياكل الطباشيييير وباغا نقتل مووووك اغيييثاااا ولا شنووو واش كتقلبي عليا نفضي معاك فخطرااا
غيثة: اااااااععععععععوو (طلقات حلوقها كتغوت وكتبكي وكتبغي تحني تجمع طباشيرها وهوا كيجرها تا بغات تسطى بالبكا
عهد: ها الطباشير (زطم ليها عليه) انوري حسك تاكلي طباشير بقا ليك المداد تا هوا تمصيه وكولي السبورة نتي كااااع
غيثة: اااي اهىءاهىءاهىء خليييني علاش ضيعتيه لي ديالي اهىءاهىءاهىء احمااااااار الكلب يالاه(سمتات مخرجا عينيها وكتنهج)
مقدرش يضربها وسكت عض شنايفو وجرها لطواليط خشا ليها وجها فلافابو وتما عليها باش متحركش وجمع ليها شعرها اللي مدلي خشاه ليها مور ضهرها فبيجامتها وطلق الماء 
عهد: تقياي داكشي ينعل موك الحمااارة باغا تقتليني بالفقصة همم؟ تقياي داااابا والله متحركي تا تقياي داكشي اللي واكلة
غيثة: كتبكي) ومنقدرشي نتقيا دابا اهىءاهىءاهىء 
عهد: وهنا غنبقا انا وياك تا ترضي الطباشير ويعلم الله اش واكلة عاوتاني ... (غوت) يالاااه خرجي ليا مسارنك نشوفهم 
بقات مقوسة وهوا شادها من رقبتها مهبط ليها وجها ، خشات صبعها فمها تا خرجو عينيها ودمعو وبدات كترض وهوا كيشوف الالوان ها الحمر ها الخضر والازرق و مخلطين عطاو لون موف وهي كترض وعهد كارز على سنانو وكيغسل ليها وجها وهي كتقيا
عهد: الوان الطيف واكلة ليا يا حطب جهنم ...... زيدي تقياي لموك خرجي داك قوس قزح اللي سارطة 
غيثة: مقجوحة) عييييت.قح قح
غسل ليها وجها وهي سخفانة ومسحو ليها بالزربة وهزها كي الكمشة بين يديه خرجها حطها فوق الفراش وسرح ليها رجليها وهي عينيها فالطباشير اللي مزلع حدى البلاكار مابغاتش تحدي عينيها عليه، بينما هوا كيقاد ليها الجلسة وجبد ليها شعرها طلقو شافها كتشوف فالطباشير ورجع شاف فيها مغدد
عهد: عرفتي وتوقع ليه شي حاجة تا نحر موك بلاصتك الحوالة دالعيد الكبير سمعتي ...يالاه نعسي ولا غنننن... (هز يدو عليها) شي نهار نردم لموك سنانك .
جلس حداها فجنب وجبد تيليفون عيط الادارة دالقصر يسيفطو ليه الطبيبة بزربة وقطع شاف فيها لقاها مخرجة عينيها فالطباشير ، دورات وجها لقاتو كيخزر بغا يضرب وهي تهز يديها تخبات

دخلات الطبيبة كتكشف عليها وعهد واقف مخرج عينيه فيهم ومربع يديه كيشوف فكرشها عريانة والطبيبة مدير ليها الصناطات و كتقلب ليها صدرها بيديها لقاتو منفوخ ومزير وسخون ، عهد كيشوف فيها مغرية ليها صدرها وكتقلبها وغيثة مغوبشة ناعسة على ضهرها وقالبة وجها للجهة الاخرى مكتشوفش جيهت عهد وكتحرك غير بالسمع بلا مادور تشوف ، غطاتها الطبيبة و كملات الكشف ديالها وناضت وقفات وغيثة تقلبات مقلقة على جنبها عطاتهم بالضهر 
الطبيبة: مزيانة معندها حتى مشاكل 
عهد عينو فغيثة ممرتاحاش لحالتها وهيا قلبها وجها ، بقا مربع يديه وكيرحك وخدة مرة مرة مع الهضرة
عهد: بجدية)احم ...واش عادي الطباشير اللي كلات؟
الطبيبة واقفة مستاقمة كتهضر باحترام 
الطبيبة: عادي جدا ، هادي فترة الوحم تقدر توحم على شي حوايج غراب بالنسبة لينا حنا مي هيا كيجيها داكشي بنين
عهد: امم ... (حرك راسو) عندها شي مشكل فصدرها؟
الطبيبة: لا علاش واش كيضرها؟
عهد: ماعرفتش غير شفتك كتقلبه سيتو
الطبيبة: لالا عادي كلشي طبيعي فيها وغير صدرها منتافخ وطايب هاد الفترة وصافي من بعد الولادة غترجع عادية ، المزاج عند الحامل كيتغير فجأة والى بغات تاكل الطلاشير غير خليها تاكلو ومتكترش منو ، انا خرجت ليها بعض الفيتامينات ، فيتامين باش ميبقاش يطيح ليها شعرها او يخفاف ليها فهاد الفترة
عهد: وي وي مزيان و حتى لضفارها وبشرتها لانو مكتشبرش الحليب 
الطبيبة : ابتاسمات) وي ضروري غنعطيها واحد المجموعة ديال الفيتامينات عبارة على حبوب تبقا تشربهم بانتضام وهاكا غتبقى ديما منورة و وجها صافي 
عهد: داكوغ ...تبداهم ليوم 
الطبيبة: واخا ، كاين بعض الفيتامينات اللي مكايناش فالمغرب وغنطلبوها من برى وغدا نجيبهم ليها ونوقف على صحتها كل باش متعياش و تزيد تكسب صحتها مزيان ومنخليوش الوحم يأثر عليها من ناحية داكشي اللي كتشهاه 
عهد: تنهد) اوك
ستأدنات الطبيبة ومشات وعهد باقا واقف كيتنهد وتكى حداها كيحزرها وهي قالبة وجها مخبياه مابغاتش تشوف فيه، عنقها من كرشها ورجع ليها شعرها لور وباسها فعنقها وهي مكدير تا حركة و مغمضة عينيها 
عهد: غيثااا
غيثة: لا رد
عهد: انا نجيب لحبيبة ديالي طباشير صافي 
غيثة: لا رد
عهد: وصافي احبيبة ماحسابش ليا الحمل اللي كيدير ليك هاكا 
غيثة: بصوت خافت حزين
غيثة: نتينا زلعتي لي كاع الطباشير ديالي فالارض
عهد: انا غنجيب ليك حسن من داك الطباشير اللي كان عندك....مي علاش مخبياها فوق البلاكار وكتاكلي بالتخبية!
غيثة: حيت عادي تخاصم عليا
عهد: وهاني خاصمت عليك دابا حيت نويتيني ودخلتي ليا الشك حساب ليا باغا تعاودي نفس داكشي اللي كنتي درتي........وايلاه افي دوري عندي
دورها عندو حناكها حومر وضمها لصدرو بحنية وعينيها ناعسين ، بقا كيلعب ليها فشعرها تا نعسات ولاح صبرديلتو برجليه ودخل فالفراش معنقها وهي ناعسة على صدرو وكيدوز يدو على خصرها وهي ناعسة وكيهرها بصبعانو فكتفها تا غفا

دازت 15 يوم وغيثة تحت العناية ديال الاطباء وكيعطيها عهد الطباشير بالقياس كتاكلو وكتعزل اللون اللي بغات وكتخليه تا يكون ناعس وتنوض تهز الطباشير من البلاكار وهوا عايق بيها ومخليها تقولبو على خاطرها وكيسمعها كتغزز فيه و تخبيه تحت المخدة ، رجعات وعد عند راجلها و وعاءلت غدير رجعو فحالهم من بعد مابدات صحتها كتقاد وكانو جالسين فقصر باها فمراكش مادازوش لقصر نضال وكانو كيتلاقاو غير فالكلينيك ، عهد منع على غيثة تحط رجلها فشي طوموبيل حتى تعرض عليه جدول الضرب كامل ، الاسبوع كامل وهي معنقة جدول الضرب كتحفظ فيه وساد عليها فالبيت من الحفاضة للماكلة للنعاس وكيرجع يقريها القرآن تا بدات كتصحاح والفيتامينات اللي كتشرب زادو صفاو ليها وجها وزيانت و صحاحت وطاح عليها السر و جات معاه الحمالة وكبر الصدر و عمرو كتافها و وزادت وقفات مؤخرتها وبياض لحمها بقوت الكيرمات اليومية والفشوش اللي مفششينها تا مابقاتش كتحرك يديها ، دارو ليها مساعدات كيقابلوها ومها حاضيا بنتها فغيبت عهد وخايفة يضحكو عليها و تمشي ضيع دلكشي اللي فكرشها ، عهد كل ليلة كيتهلى فيها مكيزكلهاش وحتى هيا دور دور وتمشي تبلحس عليه ومغرقها خنات وفشوش 
🌼صباح جديد ...
حل عينيه على وجها وحنيكاتها المطبزين وهي ناعسة حداه عريانة فكامل انوثها مناقصها حتى حاجة ، تقلب على جنبو كيشوف فيها بعينيه مجبدين وكيتأمل جسمها اللي كيبري بالنقاوة و ورطب بحال الحرير وسط فراش فاللون البوردو رطب ومخاد رطبين ومزغبين بحال الريش ، دوز يدو على صدرها ونسا وورك عليها تا فاقت مخلوعة شافت فيه
عهد: شووو غير انا 
غيثة : بدلع) اننن...ااي خليني نعس
تقلبات على جنبها وجرات الغطاء تغطات وخلات ليه السلف موراها مدلي عليها ، كحز عندها تالسق معاها عريان جسمها مع جسمو وعنقها وعجباتو مللي ربات صحتها ومابقاتش ضعيفة وزادت عطات للعين وبان عليها اهتمامو بيها والفشوش اللي مفششها حتى مابقاش كيجي قدها الخاتم اللي جاب ليها 
عهد: غيثااا....ماعييتيش من النعاس
غيثة: لا رد
عهد: هه واخا لاللة ...شبعي نعاس مع راسك 
باسها فعنقها ونا عريان دخل للدوش دوش وخرج لبس لابس بينوار كحل وداير القب وقف قدام البلاكار كولو مراية كيبين الناموسية اللي ناعسة فيها غيثة مقابلة معاه ، جبد حوايجو كيلبس وكيشوف فغيثة فالمراية ناعسة بحال شي حورية البحر ، لبس دجين وتيشورط بيضاء وجبد حداء رياضي من البلاكار جديد لبسو و دار بارفان وسد البلاكار وهي تبان ليه فالمراية حالة عينيها ببراءة كتشوف فيه ، ابتاسم ليها ودار عندها كيضحك ومشا بسها 
عهد: فاش تنوضي حفضي واخا
غيثة: كتجر شعرها بصبعانها) عيييت...بغيت نخرج شوية قنطت فهاد البيت شحال وانا مخشية فيييه
عهد: واخا...نرجع نخرج الاميرة الصغيرة ديالي فين ما بغات...مي نلقاك حافضة و وكالة مزيان و شاربة الدواء (مد ليها الطباشير) وها الطباشير ديالك هههه نرجع نعطيك واحد اخر بلا متمشي تقلبي عليه وطيحي صافي
غيثة: بدلع)واخااا
باسها وخرج خلاها ناعسة وتلاقى مع معا هازة ذهب ، غير شافتو تمات غادا عند بنتها لبيت النعاس ، تلاقى عهد مع نضال فالدروج و وقفو
نضال: فين غادي؟؟ فين غيثة مابقاتش كتبان؟
عهد: راها فالبيت ...حسن ليها تبقا فالبيت انا مانع عليها تخرج هاد الفترة باش ماظيرش شي حاجة ضر راسها ، مهم غنجيب غدير من الكلينيك ونرجع قبل الغدا
نضال: واخا
مشا عهد جوج خلفات ورجع كيعيط
عهد: الواليييد ..واحد الدقيقة
رجع نضال كيشوف فيه متساءل
عهد: الله يحفضك ...شوف مع الواليدة ماتبقاش هازة من فخاطرها من جيهت غيثة ، انا نهضر مع غيثة ونتا هضر مع الواليدة باش نتهناو من دوك الشوفات د والو وكل واحد حاقد على لاخر
نضال: اممم....صافي تهنى انا غنشوف معاها....بلا متبقى حابس البنت فالبيت خليها تخرج شوية
عهد: اللهم سلامة ولا ندامة ....خليها تما مهنيا ومهني تا انا من جيهتها حسن ما تخرج دير شي كارتة وهي مكتعرف الصح من الغلط ...يالاه الواليد الله يهنيك هانا جاي وغنخرجها دور تا تعيا

خرج عهد وبقات غيثة متكية فناموسيتها كتقلب وتشقلب تا سمعات الباب تحل وهي تغطي راسها تا لعنقها لانها عريانة ومالابسة حتى حاجة ، مها داخلة هازة ذهب فيدها وغيثة كتجر سيلبها بيض مشبك لاسق فيه البروطيج برجلها بقا باين فوق النموسية ، جراتو بشوية بلا متعيق وجرات سوتيامات تا هما كانو حدا المخدة للي ناعس عليها عهد تاهما خباتهم باش متحشمش راسها قدام مها ، جلسات مها تنشرات فوق واحد الفوطوي كتراري لذهب وغيثة حاصلة بغات تنوض ومالقات كي دير ومها غتشوفها عريانة غتفهم الفيلم ، بقات كدور عينيها وهي تقشع البوكسر ابيض ديال عهد طايح فالارض وتزنكات، شافت فمها لقاتها ملهية كتبوس فذهب ، ماصلاحش ليها كي دير تمد يديها وهي دفع المخدة ديالو طاحت فوق البوكسر خباتو عاد تهنات وبدات كتلبس السليب وسوتيان تحت الفراش بالتخبية 
ملاك: يااا الحبيبببة ويا الكبييييدة دماماتي (كتغنق ذهب) يالزيييين...يا الغزااالة ...يا الحب والفننوووون ديالييي
غيثة: ماما...ديها ترضع مسكينة 
ملاك: فرحانة) رضعااااات وشبعااات الكريشة ...ياك الكبيييدة ديالي العمر
ذهب فرحانة كتنقز وتسفق بيدها وملاك مسرحة راشقة ليها لابسة قفطان مفضفض وطالقة الشعر صبغاتو بالاسود ودايرة كولي فعنقها بخاتمو وحوالقو وبراسلي ديالو كامل دهب وفيه حجر دالدياموند ونقصات فالوزن بكثرت الرياضة اللي كتقيل دير وتجري فالغابة دالقصر تا حيدات الكرش ولات بحال مروى ومعاندة معاها
غيثة: ماما مشي دفطر شو كي رجعتي ضعيفة (بغات تصردها)
ملاك: اوييلي يا ختي لالا...دايرة الريجيم و ماعندي ماندير بالسمنة والغلض الزايد....بنتي يالاه عندها 18 عام وانا تبان عليا بحال الى والدة ربعة ومروى اللي الكبير فولادها عندو 30 عام تباارك مشاء الله عليه وكتبان بحال الى عندها 28 عام ، شوفي لك كي مجبدة ومقادة وخفيفة وحس التجاعيد مافيهاش ...نغلط فيها يانا كن ماعرفتهاش مو نقول عليها ختو 
غيثة: وا صافي مشي شوف شني تعمل انا باغا نعيس
ملاك: نوضي دوري براسك راه الضرة جايا ليوم ....بغيتيها طير ليك الراجل وتخلي ليك غير تصاور ؟
غيثة خرجو عينيها وتعصبات وعضات سنانها وشافت فمها مصدونة
غيثة: شنننووو؟ كيفاش راجعة ! 
ملاك: ههههاااي ...علاه الحبيبة مافراسكشيييي!!! راه مشا يجيبها من الكلينيك gاليك ، ونتي كولي وشربي ونعسي وساد عليك هنايا ومجايبا للدنيا خبار
غيثة بقات مطرطقة عينيها وكتغدد فبلاصتها وكتحلف ، ناضت ساخطة ملوية عليها الغطاء ودخلات للدوش عيطات لمساعداتها فالانتيرفون ديال الدوش وطلعو كيجريو غسلو ليها وهي كتشوف فكرشها وساهية وصدرها مبندر قدامها ، تقالت فالمشية بسبب الوزن اللي تزادت وكرشها اللي بدات كتبان شوية مابقات داخلة ولات كتبان بحال الى واكلة بزاف ، مشطو ليها شعرها ودهنوه ودار ليها ليسوان ومساج وسط الجاكوزي وتعطرات وخرجات كضوي لابسة بينوار فالصفر وفوطة فشعرها فالصفر، لقات فطورها اليومي محطوط وجلسات مقلقة مابغاتش تاكل ، طلقات رجليها وبداو كيماسيو ليها ومها جالسة حداها تا هيا ولا عنها تيليفون قد الخبزة كتقيل شاداه ، بقات غيثة ساهية تا سمعات تيليفونها كيصوني وشيرات لوحدة من من المساعدات تمدو ليها، شافت تيلي لقات عهد اللي كيصوني وهي تقطع عليه ، صونا ليها فتيليفون اخر وعاودات قطعات عليه ، بقات كتقطع عليه وهوا يسيفط ليها مسج 
💬عهد: بب مالكي ؟ علاش ماباغاش تهضري معايا ؟
حطات التيليفون ماجاوباتوش ورجع صونا عليها للمرة الثانية وقطعات عليه من تمت ماعاودش عيط، بقات جالسة ساهية و مها كتشوف فيها 
ملاك: مالكي ؟؟ عاد كنتي بيخيير ! من الصباح وداك تيلي كيصوني ونتي ماباغاش تجاوبي! شكون كيصوني عليك؟
غيثة: تا واحد (قلبات وجها)

ملاك: غا بلا ما تقلبي برادتك علينا...راه والله جبداتك ديك الزرgة تا نشطب بيها هاد الفصر ونعاود بيها لمراكش كاااملة ....جات من طرف الدنيا ولسقات فالرجال كي دبانة دالحمار ومسميها راسها اميييرة ....غابلاتي تجي والى سميتها نييت اميرة تجي تهضر ليا انا مع بنتي 
غيثة اممم...عاد وليت بنتك
ملاك: راه قلت ليك ماعرفتك فين صديتي نتي وياه من نهار لحق عليك لكولومبيا من تما وانا بالي مهني حيت رجعتي راجلك ...راك شفتي اش وقع ليا فاش ضربتيها بغبرة وماعرفتك اشمن ارض سرطاتك وبقيت انا فالركنة كنموت تا جيتي نتي ....راه فرق بين انكي مع واحد باغيك وشاريك وبات بنتك وفرق بين انكي محلية ماعارفينك معامن
غيثة: وصااافي صافي كل مرة تجبدي هاد الهضرة دابولساعة كيخصك تعاودهااا!!
الدقان...
خرجات الخدامة تشوف شكون لقات الطبيبة فالباب ودخلات كالعادة توقف على غيثة وعلى الدواء والماكلة ديالها 
الطبيبة: عاد دابا هضرت مع مسيو سقراط كيوصي باش تاكلي وكيأكد على صحتك و النضام الغداءي ديالك
بقات غيثة ساكتة وكلات وشربات الدواء وفيتامينات ولبسات كسيوة مفضفضة حتى لركبة بلدية بالعقاد من العنق وصدرها كيبان ونشفو ليها شعرها وجلسات تا وصلات الاستاذة دالفرنسة وبدات كتشرح ليها وهي عقلها مرفوع .
رجع عهد ومعاه غدير والفرمليات شادين فيها وتستقبلوها وطلعوها لبيتها وهو يقلب عهد الدورة نيشان لبيت غيثة دخل لقاهم مجمعين حداها حيت مانع عليها تعتب باب دبيت النعاس واللي بغاها يدخل عندها ، خرجو كاملين وسدو البال وبقات هيا جالسة قالبة وجها ، قرب منها بخطوات بطيءة وهي تنوض بغات دخل لطواليط باش تهرب من النقاش معاه كونها ولات ميزاجية وعلى سبة وبكاية دغيا كتبكي بزربة ، شدها من يدها وجها عندو ودور يدو على خصرها وهز ليها وجها شاف فعينيها المدمعين 
عهد: مالكي؟
غيثة: لا رد (قلبات وجها)
عهد: غير جبتها ماشي سكنت حداها ...راكي عارفة راسك اش كتسواي بالنسبة ليا دورها وعنقها من اللور وحط يدو على كرشها و باسها فعنقها وهمس ليها فودنها
عهد: نتي هي كلشي ...نتي الحياة ......والروح .....وحبيبة دقلبي ....واميرتي الصغيورة وغتجيب ليا بيبي كيشبه ليها ياك ...شعرو رطب بحالك وعوينات بحال ديالك وشفايف بحال ديالك (حط صبعو على شفيفها) وعنييد بحالك 
بقات ساكتة كتسمع وكترطاب وبدات كتبتاسم تدريجيا تا ضحكات وهوا يدورها عندو 
عهد: يالاه لبسي حوايجك نخرجو 
غيثة: واخا (بتاسمات وعنقاتو وتعلقات فيه على صبعان رجليها)
عهد: اييييوا واقيلا غنديرو بناااقص من هاد الخرووووج
غيثة: ههه 
عهد: كيضحك)نديرو بناقص؟
غيثة : ههه لا
عهد : ويالاه اكبيدة لبسي حوايجك وغطي هادشي مكاين لاش يتفرجو فيه الشمايت (حط ليدو على صدرها)
غيثة : واخا....وفوقاش حتى انا نسوق الطموبير
عهد: تا تولدي وترتاحي وانا اللي غنعلمك تسوقي صافي؟ (تيلي كيصوني) بلاتي نشوف الواليد ونرجع 
غيثة: واخا
خرج من البيت كيهضر فالتيليفون وخلاها هي واقفة كتخلم بالبيبي اللي كيشبه ليها وكتقلب على ماتلبس باش تخرج معاه.
هبط هوا لقا نضال واقف هاز الاوراق فيديه ومعصب دمو كيغلي 
نضال: اش هاااادشي هادااا؟ كيفااااش وقع؟
تمهد عهد وقلب عينيه فالسماء 
نضال: جاااوبني كيفاش وقع ؟؟ ميمكنش هااادشي اللي كنشوووف 
عهد : شحال من مرة الواليد كنقوليك ماتبقاش تقلب من مورايا ...هانتا جبدتي الحنش دابا
نضال: بعصبية) عهد...جاوبني وقولي ليا اشهادشي 
عهد : شغلي هاداك الواليد ...وعارف راسي اش كندير 
نضال: بعصبية)واااش عااارف راسك اشنووو درتي ....واش بعقلك ؟ واش هادا هوا عهد ؟ مستحييييييل ماشي هادا ولدي اللي كنعرف دمر كلشي
عهد: هادا قراري وانا متحمل مسؤوليتو وعارف راسي فين كنحط رجلي وعراف راسي اش كندير
نضال: كن كنتي عارف راسك اش كدير مغتفكرش تا دقيقة فهادشي اللي درتي ....وضرب حسابك راه هادشي الحمق مكيديروش
عهد: هه ... خرج راسك من هادشي وخليني نعوم بحري كيما راني كنعومو من شحال هادي بوحدي ومشاكيلي قاد بيها ومكاين لاش تصدع راسك ...مازال مشفتي والو وحسن ماتبقاش تقلب وتبحث على شنو كندير حسن وخليني نضبر راسي
نضال: مللي ماتكووونش ولدي وكنياك سقراط عاد نهليك ضبر راسك...مستحيل نوافق على هادشي
عهد: ببرودة) فات الفوت ، وراني عارف اش كندير .
مشا عهد تلاقى مع نور هابط كيجري سمع الصدع ونضال هز داك الملف اللي فيدو ضربو مع الفوطوي 
نور: مالكم اش واقع؟
نضال : بعصبية) شوف هادشي وقول ليا واش عادا بعقلو ولا اتا اللي تسطيييييت ولا باغي يسطيني ولا شنو باغي يديييير هاد الخرااااا غيحمقني
هز نور الوراق كيشوف وهوا يتصدم نور: لااااااا....ميمكنش 
نضال : دونك انا ماشي مسطي 
نور : لا هادشي مينكنش ....اش كيدير هادا واش تسطااا !!!

نور: لااا...هادشي ميمكنش ، واش باغي يدير فاييت؟؟
نضال: هادشي اللي غيحمقني ...بغيت غيير نعرف علااش وهوا كان ديما هوا اللول وحافظ صواريه ودابا شنو!! ...حاط كااااع الاراضي ديالو اللي فكولومبيا فالمزااد! واش هادا عندو العقل؟
نور: (كيقرى الاوراق) وسحب كاع الاموال اللي فالبنك وسد الحسابات اللي فالبنوك 
نضال: ففف....شنو باغي يدير هادا بغيت نفهم ، مكاينش ي وااحد اللي كيدير الافلاس راسو بيديه قد هادا ، ماخلا تا ارض من الاراضي دكلومبيا وماشراها ودابا حاطهم فالمزاد كاملين دقة وحدة ...وعلاش سد الحسابات فالبنوك ولاياش باغي يوصل
نور: خرج من المنضمة ووقف الفلوس اللي كدوز ليه من المنضمة
نضال: ارى نشوف! ...حيت شفت الاراضي اللي دخت ومكملتش
شد نضال الاوراق بدا كيشوف هو ونور تا سالا وناض
نضال: فهمت هادا اش بغا يدير ....عقلتي نهار قالك ماباغيناش نبقاو فالمنضمة....هاهوا نساحب مي علاش بالضبط حط الاراضي دكلوموبيا كاملين وماحطش الاراضي لخرين اللي فالدول اللاخرى
نور: مافهمتش
نضال: طلع شوف اش تحت راسو ...انا عصبني فاش شفتو كيرون وكيبيع وهوا ماعمرو باع شي حاجة ومولف غير كيشري
نور: واخا انا نشوف
طلع نور كيقلب على عهد لقاه فالبيت مع رياض وذهب جالس كيتفرج فيهم 
نور: واخا تشرح ليا هادشي اللي درتي
عهد: اش درت؟
نور: علاش تنازلتي عى الاراضي و وقفتي لحساب ونساحبتي من المنضمة؟
عهد: هاكاك...مابغيت حتى سنتيم من المنضمة وكاع دوك الاراضي بفلوس المنضمة شريتهم ولنا دابا غنبيعهم 
نور: والفلوس اللي سحبتي؟
عهد: فرقتهم كاملين على الدول الفقيرة وسديت الحسابات باش ميعاود يوصلني تا ريال وهزيت يدي من المنضمة...اما الاراضي الاخرى والاملاك ماشي بفلوس المنضمة....كاع الفلوس اللي كتجيني من المنضمة كنت كنحطها فالاراضي والحدود اللي دايرة بكولومبياومكنتش كنصرف منهم ...وكاع الحرام حيدتو دابا وماخصنيش بيه
نور: بسخرية) شتي الى جيتي تشوف غتلقى كااع داكشي اللي عند حرام الى فكرتي هاكا....علاش نتا باش بديتي فاش شديتي طريق الالماس ؟ ماشي بفلوس المنضمة درتي الساس؟؟
عهد : هه لا....بفلوس الواليدة اللي فرقات علينا فاش كنا صغار وحطات الثروة ديالها كاملة اللي خلا ليها جدي وباعت كاع الشركات اللي كانو عندو و الاسهم ديالها فرقاتهم علينا نسيتي ...وبيهم انا بديت الطريق عاااد دخلت للمنضمة والحساب ديالها بوحدو واي حاجة شريتها بفلوس المنضمة غنسمح فيها واخا يكون عندي فيها شك صغيير .اما الميدان ديالي بديتو باسهم اللي خلات ليا الواليدة وبعتهم وكملت تا كبرت المشاريع وخديت الجزيرة والباطوات والاراضي اللي فالبلدان الاخرى والقصور والديور وداكشي ...اما حساب المنضمة فكانو كيتجمعو بوحدهم فالبنوك اللي خاصة بيهم و كنت كنحطهم فالاراضي دكولومبيا لا غير ...ودابا بعت كلشي فهمتي
نور: كيفااااش؟
عهد: انا حطيتهم فالمزاد باش نبيعهم وفلوسهم غنصدقها ياك.. حيت حرام مي فاش غيكونو فالمزاد غنعاود غنشريهم بفلوسي انا من جديد على سميت غيثة وغنرجعهم حلال والفلوس اللي غنعطي فيهم غيرجعو ليا وغنصدقهم ويبقاو عندي الاراضي وسالينا بحال الى غيثة اللي غتشري مني وغتعطيني الفلوس ونصدقها فهمتي
نور: اممم...دابا صافي صفيتي حسابك
عهد: صفيتو واللي كيقول انا غنفلس ومكاين لا افلاس لا والو .دوك الممتالاكات اللي شريت بالحرام غنبيعهم فالمزاد وغتشريهم غيثة بفلوس حلال اللي غندوز ليها فالكونت وفاش نشد فلوس الاراضي اللي تشري بيهم غيثة غنصدقهم ها حنا سالينا. وغيثة غتشريهم بفلوس حلال من المداخل ديال الالماس اللي عندي واخا غيمتمشيو ليا مبالغ طااءلة على دوك الاراضي مي هااانية صدقة فالمحتاجين

نور: والواليد حساب ليه نتا كتبيع فممتلكاتك وباغي تخرج على راسك
عهد: صافي خليه تا يبرد ونهضر معاه...عارفو مغيعجبوش الحال علاش قطعت مع المنضمة مي هاكا مرتاح...انا كنت مهووس بيها وبداكشي قبل ولاكن دابا لا ماباغيش .
نور: عنداك ضيع كلشي راه الملاير ديال الدولارات واراضي قد السخط اللي باغي تبيع
عهد: هه واهانا كااع ضيعتهم! من بعد ...راه الثروة اللي درت بلا فلوس المنضمة كبر من الثروة اللي شريت بفلوس المنضمة ...جاب الله دوك الفلوس كانو بحال شي رويضة كيدورو فبلاصتهم وفين ما نتوصل بشي مبلغ من المنضمة كنحطو فالبلاصة فالاراضي .
نور: بلاتي....قلتي بديتي بأسهم الواليدة ياك...مي كنضن كان كاتب ليها الواليد شي حاجة ونتا عارف الثروة ديالو كاملة اساسها من المنضمة 
عهد: اه عارف مي الواليدة هضرت معاها فهادشي سولتها وقالت بللي جدي كان حاج ومكانش عندو مع الواليد بصفة نهاءية ومكيتشاركوش المشاريع وجدي كانت عندو تروة بوحدو والواليد شق طريقو فالمنضمة وفاش مات جدي وخلا دالتروة كاملة ...الواليد كتبها بسميت الواليدة كلها والواليدة فرقاتها علينا ...يعني جدي مكانش راضي على الخدمة دالواليد ومات وخلى ثروة لا يستهان بيها وكان متدين وفاش الواليدة قسمات بديت بدوك الاسهم اللي عطاتني حتى هانتا كتشوف دابا ..بلا المنضمة فلوسها راه درت ثروة مضوبلة غير من دوك الاسهم اللي بعت والحمد الله ماخاصني تا خير ...ودابا لقيت مغارة مطرطقة الماس ...راه غير هادي بوحدها غتخليها على المنضمة بللي فيها وماتبقا المنضمة ساوية والو قدام جزيرة تحتها مغارة كتولد العجب . وانا قلت ليك...الى لقيت غير شك فالثروة ديالي انها حرام مغنتردد تا دقيقة باش نخليها . وسبحان الله كنت ديما كنفرق بين الحسابات ومكنخلطش ومكنعولش على المنضمة واخا كنتوص بحقي فيها ماكنتش كنصرفو وكنحطو فالاراضي مي دابا اخاي والله قنعت ومابغيت والو من ديك المنضمة ماعندها ماتزيدني ...الا كنتو تا نتوما تقدرو ديرو بحال نتعاون معاكم 
نور: اودي....الى جيتي تشوف كاع فلوسي انا والواليد راه حرام من الديبار ناشي بحالك ستاغليتي الاسهم اللي عطاتك الوليدة وبديتي منهم
عهد: بجدية) الى كنتو مستاعدين ...حطو كولشي خليوه يتباع وانا نشريه منكم والفلوس اللي نعطيكم صدقوها كاملة ...بهاكا كتسناو صدقتو التروة ديالكم ...من بعد نعطيكم ديالكم بلل متشريو مني ونبداو فالمناجم ديال الالماس والمنضمة سواء خليوها للدولة ضبر راسها ولا طرقوها وجمعو وطويو ...انا مستاعد نشري داكشي اللي غتحجو فالمزاد ومنهلي تا حد يديه من بعد نرجع يكم كلشي بلا متعاودو شريو مني اش بان ليك؟
نور: مراوغة كبيييرة هادي....ويلا مقدرتيش تشري ...راك عارف الثروة قداش
عهد: حتى انا منبغيش ليكم شي حاجة خايبة وعارف الثروة قداش وكن ماكنتش قادر عليها مانقولش ليك هاد الهضرة . 
نور: غنهبط نشوف مع الوليد ونشرح ليه من بعد نجلسو وناقشو هادشي 
عهد: (حط يدو على كتف نور) تيق فيا ...راه غنموتو ونخليو كلشي فوق الارض ...لا تروة غتنفعنا ولا مال ولا جاه...دير هادشي نتا بعدا اللول وشوف على راحة غتحس بيها مللي تحيد عليك الحرام...غيبقى الواليد ديك الساعة نبقاو نقنعوه شوية بشوية حتى يدير بحالنا
بقا نور واقف كيشوف ويدورها فعقلو وحرك راسو بالايجاب 
نور: نشوف ونرد عليك....هادشي خصو تخيط
عهد: فاش يوقف عليك ملك المو قوليه بلاتي مزال مخططت...ماحدي انا واقف معاك وكل على الله وغيبارك ليك الله فهادشي ويزيدك فالرزق . ويضاعفو ليك خاصك غير تزعم

بقا نور كيقكر ومشا ورجع عهد جلس مع ذهب ورياض كيتقرج فيهم وهما كيلعبو تا عيا وناض مشا عند مو دخل لقاها نا عسة على كرشها فوق خشبة مصطحة خاصة بالمساج ومعاها مدلكة كدلك ليها ضهرها ومغطياها وكتماسي ليها كتافها ، شاف فيها ودخل جلس فوق الكرسي مقابل معاها وهي مغمضة عينيها مشافتوش ومادارش الحس باش ميفيقهاش، بقا كيشوف فيها بابتسامة تا حلات عينيها شافتو جالس داير رجل على رجل شاد واحد السنسلة فيدو كيدورها مروى: بابتسامة) عهد
عهد: وي (ابتاسم)
مروى:صافي براكة جيبي ليا بينواري
عهد: نونو غير خليك ... كملي على خاطرك تا تسالي
مروى بتشكيك) واش بغيتي شيحاجة
عهد: تنهد) اااااه....كنت بغيت نعضر معاك بخصوص غيثة 
مروى سمعات غيثة وهي تغوبش وتلمدلمة كدلك ليها ضهرها وعهد كيهضر بجدية
عهد: اححم...غوقاش غتسالي هاد الحرب؟
مروى: باغدون!؟؟
عهد : هاد الصراعات اللي بيناتكم مكاين لاش تبقاو مخاصمين ، ياك كانت عزيزة عليك فاللول وهي اللي كنتي باغا وكتمدحيها ليا ، ودابا كرهتيها!
مروى: (مغمضة عينيها باسترخاء) كنت...مي دابا نو ، مابقيتش باغاها ، كلن كيحساب ليا غنربيها على يدي وتحتارمني مي كنت غالطة
عهد: لا ...ماغالطاش ، باقا صغيرة يالاه عندها 18 عام وعقلها صغييير كثر مللي كتصوريه ودغيا كتسمع الهضرة (ساهي بابتسامة) برييءة ...ضريفة و نية (شاف فمو) جربي هضري معاها سي سيوغ غدخل لخاطرك من جديد
مروى: لا رد
عهد: اييوا شنو قلتي
مروى: خاطري هرب ليا منها 
عهد: هه غادي يرجع ليك فاش تهري معاها ؛ وماديريش عقلك بنت صغيرة يالاه كتعلم ومكتعرفش شنو كدير ...مي نتي بعقلك ونتي اللي تعلميها وتوريها
مروى: بتردد) تطلب مني السماحة على قلت الاحترام اللي محتارماتنيش ...مم بعد نشوف
عهد: طلع حاجبو ) حتى نتي قصحتي معاها
مروى: بسابها تضهورات عاقلاتنا
عهد: حيت نتي محنتيها وتكرفستي عليها و مرحمتيهاش مسكينة وهي ماعارفة والو...راه كلشي فخباري وحتى حاجة مكتخفى الواليدة
مروى: مهم تعتادر ويكون خير
عهد: اوك...فالعشا غنتعشاو مجموعين وتما تعتاذر ليك وحتى نتي تعتاذري راه بنتك هاديك (تبتاسم وناض خلاها وخرج فاتجاه غدير يطل عليها.
غيثة بقات جالسة فبيتها كتقرا وتسوط وتنهد ماحاملاش القراية وحداها الماء كل مرة تشرب و كتسخف دغيا وعينيها كيتلسقو . بقات مخشية فبيتها تا تعاشات العشية ودخل عندها عهد لقاها جالسة كتسنط لعضاهمها وكتفرج فالتلفازة قنطانة ، هزات عينيها فيه شافتو وهي تنوض عندو بعينيها كيبريو عنقاتو وتعلقات فيه وهوا هاز فيديه جوج كارطونات مربعين وحدة فوق وحدة مغلفين بالاحمر ، حطهم وعنقها 
عهد: بابتسامة ) توحشتيني ههه
غيثة: ههه
عهد: كن شفتي انا (عطاها علبة حمراء) هاكي...هادي ديالك 
شداتها فرحانة كتشوف فيها وفالديكور ديالها كيفاش مغلفة ، دارت هازاها كتمشى وتشوف فيها فرحانة وحطاتها قدامها وحلاتها وهي فرحانو وهوا معنقها من اللور كيشوف فيها كتحل العلبة ، هزات الغطاء ديال العلبة لي كانت على شكل داءري وعمرة بالعقيق تا للفم ، دورات وجها شافت فيه بلستغراب وفرحة 
عهد: خشي يدك وسطها
دخلات يدها وسط العقيق الاحمر كتقلب وهي تجبد مكعب بحال مكعبات الثلج والفوسط ديالو نسخة منها مصغرة وهي ناعسة وشعرها مطلوق ديالها وهي ناعسة وكتبان وسط المعب بحال الى بصح هي ومخشية وسطو كتبري من لداخل والمكعب من الاخجار الكريمة سميتو الاوبال كيلمع وشفاف . بقات كتشوف فالمكعب وكدورو بيديها كتشوف كيفاش صغرو نسهة منها ودخلوها وسط المكعب كتبان بحال بصح ، عيات تفهم و تشوف وهوا فيديها كيلمع ، هزات راسها فيه فرحانو ولمح ليها بعينيه باش دخل يدها ودخلاتها فالعلبة اللي عامرة عقيق وهي تجبد مصحف صغير اوراقو ذهبية وشكلو راءع بقات كتشوف ، رجعات خشات يدها بالفرحة كتقلب وجبدات جوهرة على شكل قلب فالاحمر ، بقات كتشوف فيها كتلمع وهيا يدمد يديه حلها ليها بحال شي كتاب لقات فيها صورتها هيا وياه معنقها كيهضر ليها فودنها وهي كضحك وماعارفاش امتى خدا ليها دوك التصاور، رجعات كتقلب بيدها وجبدات وردة حمرة وبدات كضحك وجبدات من موراها سنسلة رقيقة عندها عمارة على شكل ريشة صغيرة ديال الذهب الابيض والاصفر ، شدها ركبها ليها فعنقها ديك الساعة وباسها فرقبتها بدات كتحبد وهي تلقى ساعة يدوية زوينة دارها ليها فيدها وباسها ، بدات كتجبد كل مرة شنو كيطلع ليها تا سالات وهي دور عندو عنقاتو وباستو فحنكو
غيثة: فوقاش صورتيني؟
عهد: وحدة كنتي فيها ناعسة ومنها خرجو ليك جسم كيبان حقيقي وسط المكعب ونتي ناعسة والاخرى صوراتنا وعد وسيفطاتها لي وانا ...عجبوك؟
غيثة: اه...مزيونين
عهد: (شدها من خصرها) تا نتي زوينة (باسها) وجدي راسك تهبطي تعشاي معنا ...غندخل للدوش ونرجع 
غيثة: لمحات الهدية الثانية) ديالمن هاديك؟
عهد: ديال الواليدة...نتي اللي غتعطيها ليها فالعشا
غيثة: شنو؟
عهد: ندوش ونرجع نقوليك شنو كاين 
باشها وخربش ليها فكرشها بالضحك وهي كتهر وضحك وتخبيها بيديها ودخل للدوش.

دخل للدوش وغيثة جلسات كتشوف فالهدايا اللي جاب ليها و وستفاتهم فالبلاكار ديالها وجبدات كسوة ايفازي حتى للارض فالاسود بلا يدين معرية وسامبل مافيها لازواق ا حتى حاجة، وجبدات ليها الفوقاني ديالها على شكل عباية مفتوحة توبها بارد فصالتها واسعة وعندها يدين واسعين بحال شي فراشة محلولة من القدام ولونها رمادي مفتوح ومنبتة بالعقيق اسود من الضهر وفالدورة ديال اليدين و ونازالة بالاحجار مع الفتحة الامامية حتى للارض ، جاتها انيقة وغطات ليها يديها المعريين والستيل ديال اللبسة مودضيرن وجذاب وتناسق الاوان بين الاسود والرمادي والاحجار السوداء عطاها جمالية . وقفات حدا المراية مسحات وجها بالقطن ودارت كريم مرطب خاص بالبشرة ديالها نشف فالبلاصة ومابقاش كيبان و دارت ريسيل جبد ليها شفارها وكحلات عينيها ومشطات شفارها من بعد زادت مرطب الشفاه ورشات من الريحة ديالها المعتادة ، من عادتي مكديرش المكياج بزاف والفيتامينات اللي كتشرب والعناية بجمالها هلاو ليها بشرة نضرة مافيها حتى عيوب ومشرقة كتبري وخدود وردية و شفاه وردية منتفخة ، مشطات شعرها قدامها وطلقاتو للور يالاه بغات تجمعو وهوا يخرج عهد من الدوش شافها جالسة قدام المراية كتمشط ومشا وقف موراها كيضحك عهد: جاتك هاد الكسوة زوينة 
غيثة: ههه شكرا
عهد: تبقاي تلبسي بحال هادو كيجيوك زوينين (دوز يدو على شعرها)
غيثة: بابتسامة) واخا....بغيت نقطع شعري 
عهد: علاش؟ 
غيثة: طواال بزااف وماعندوشي حتى فورمة 
عهد: فخبارك هوا اللي عاطيك انوثة كثر ...سيختو فاش كتبداي تلعبي فيه و واحلة معاه فالنعاس وكل مرة يبرزطك كتبقاي تلعبي براسك ...كتبداي ديري حركات زيوينين ..ونتي كتمشاي وهوا موراك نازل مع ضهرك و كتحركي كيتحرك معاك ...فاش كتبداي تلعبي كيبدا يطير فالسما ويغيطيك بعد المرات ...فاش تقطعيه مغنبقاش انا كنشوف ديك الحراكات ديالك معاه و كل مرة تقولي ليا اي شعري ههه اي نعستي عليه اييي طلق مني 
غيقة كتسمع وساهي فالمراية كدوز يدها على شعرها وضحك 
عهد: الى قطعتيه مغتبقاش عندك شي حاجة ميزاك على باقي البنات
غيثة: ادا قطعتو معتبقاشي تبغيني؟
عهد: لا ماشي منبقاش نبغيك ...مي الشعر كيجدب كثر ونتي شعرك زوين ورطب 
شافت فيه فرحانة 
غيثة: صافي منقطعوشي هه
عهد: ايوا هاكاك...نتي باغا تقطعي هاد الشعر هادا كامل ...الى نتي سخيتي بيه انا بعدا منسخاش بيه ومنخليكش تقطعيه
جمعاتو قدامها كامل وشدات اطرافو وراتهم ليه
غيثة: نقطع غير هادو ...حيت ادا قطعت منهم عادي يزيد يطوال كثر ومايبقاوشي عندي ليبوانت
عهد: اري نقطعهم ليك انا 
غيثة: هههه بصح
عهد: سي...اري شي مقص نقطعو ليك 
غيثة: واخا

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.