عندما يحب الامبراطور الجزء الثالث

 فقت فبيتي وخالتي حداية وسيف كيمشي ويجي . راسي كيضرني بزاااف 

انا؛ اش وقع 

فريدة؛ علی سلامتك ابنتي اش وقع ليك 

انا؛ حليت عينيا وبقيت كنشوووف وتفكرت كلشي وانا نشوف سيف واقف عليا ومخنزر مكينش فعينيه ولو شوية د الندم .استنتجت خالتي معندها علم باشنو وقع 

سيف؛ شوية دابة 

انا؛ نزلو ليا الدموع من عيني فاش تفكرت اش دار ليا وقلبي بقا كيضرني .مقدرتش نقول لخالتي ولدك ضربني حتی غيبت خفت عليها تعصب .حنت وحد المرة ضربني وتخاصمت معاه وخرج من الدار وهي بقات مهموما حتی تصالحو وما هو والله ميتصالح معاها .كيمشي يغبر بحالة هو المضلوم 

فريدة؛ غنوض ابنتي نجيب ليك متاكلي راكي شحال من ساعة ونتي مغيبة غيكون فيك الجوع والعطش 

انا؛ حدرت راسي 

خرجات خالتي ووقف عليا سيف 

سيف؛ ميسحابلك نسيت اش وقع شتي وخا نشرب دمو مغيبرد ليا قلبي 

انا؛ مجوبتوش مخلياه كيهضر .مفيا اللي يهضر معاه 

سيف؛ ونتي غنبدل معاك النضام .ضساريتي بزاف وليتي تقولي هضرة ماشي ديالك وتلاقاي بالدراري وزايداها وليتي تجمعي مع الناس ويعاونوك تركبي ويشدو ليك فاحمك .

غير قال ديك الكلمة وهو يزير علي يدي حتی بغات تقطع وانا نغوت بشوية باش متسمعني خالتي 

انا؛ كنبكي ومكنشوفش فيه مضورة وجهي للجهة لاخرا 

سيف ؛ دور ليا وجهي بيديه لعندو( علاش كتبكي .ياك مبقا فيك)

انا؛ كنشوف فيه وعينيا عامرين دموع .شوية بان ليا وجهو تبدل مبقاااش مخنزر . بقا مركز مع عينيا والدموع اللي هابطين .عينيه كيمشيو مع الدمعة حتی كتهبط 

سيف؛ ششش (متبكيش راك كتقتليني)

انا؛ وخا مكنفهم اش كيقول بعد المرات .كنحس بيه كيعني هضرتو وليني زاد فيه بزاف هاد المرة مقدرت نخرج حتی كلمة من غير( اشنو درتي للدري؟)

سيف؛ تبدلو فيه اللوان ووقف( غنمشي نصفيها ليه دابة .وليتي كتهضري عليه بلا قياس)

انا؛ شديت ليه فيدو( عفاك باااركاة من الاعصاب ومن العنف . واش مكنبقاش فيك واش ماشي بحال ختك)

غير سمعني قلت ختك تلفت ليا بالزربة وطلق من يدي وهبط لعندي ( انتي ماشي ختي ومعمرك كنتي ختي )

انا؛ بديت كنبكي (عرفت غير مربيني .انا جالسة هنا علا قبل خالتي .والا خالتي مبغاتنيش غنخرج من حياتكم )

سيف؛ تعصب مزيان .هو كيهضر فالشرق وهي فالغرب .جلس فطرف الناموسية اللي هي متكية فيها وشد ليها يديها باااسهم بكل حب وكيشوووف فيها بشووفات ديول شي واحد واصلا بيه حتال العضم 

مفهمتش دابة كيبوس ليا يدي وكيشووف فيا شي شوفات مكنفهمهومش . يدو وشفايفو كانو حنااان .تمنيت يبقا ديما هاااكة .ميتبدلش .علاش كيكون دقيقة زوين واغلبية الوقت معصب و مخنزر 

انا؛ علاش منتفاهموش اسيف والله حتی عييت 

سيف؛ معمرك غتفهميني .

انا؛ جربني والله حتی نتناقشو بالعقل و حتی واحد ميبقا يعصب لاخور .قوليا اشنو ندير باش منبقاش نتعرض لهدشي 

سيف؛ قرب حداها وشد ليها يديها بجوج ودخلهم فيديه .نهی حسات بغرابة الموقف وليني مكتبقاش تحكر لانو اي فكرة تقدر تجمعها بيه مكيناش فدماغها نهااائيا 

سيف؛ صعيب 

انا؛ شنو اللي صعيب 

سيف؛ تفهميني 

انا؛ غير جرب 

سيف؛ معمرك حسيتي براسك حدا قمة شي جبل وكتطيحي وتحسي بالدقة بحالة عضامك كلهم تهرسو و كتألمي بزاااف وتحلي عينيك تلقاي راسك فوق داك الحبل تاني وكتبقاي تطيحي كل دقيقة كل تانية كل نهار كل اسبوع كل سنة .والنفس ديالك كتقطع . قلبك كيخرج من بلاصتو يديك كيرجفو عقلك كيغيب .وفوق هدشي كامل .لحل والدوا لهدشي كااامل حداك وليني صغيب تهزيه ولا تحطي يدك عليه وحتی الا حطيتيها كيضربك الضو .عضامك كيتزعزعو دمك كيغلي .كتحكمي فراسك بزز .واااش جربتي هدشي باش تفهميني 

انا؛ سيف اش هدشي كتقول مفهمت والو 

سيف؛ ايوة معمرك تفهميني 

انا؛ انا كنهضر علينا حنا بجوج .وهدشي معندو حتی علاقة 

سيف؛ ناض ووقف ( بصح معندو حتی علاقة .غكنخربق)

مشا وضرب الباب .حتی دخلت خالتي وجابتلي الماكلة وشي مهدئات 

دازو يوماين ووليت شوية لاباس . خرجت انا وخالتي كنتساراو فالشحر تما سولتها علی الولد .قالت ليا بلا مشا لدارهم وسيف مشا لشي حاجة مهمة عندو غدا يرجع 

عجبني الحال تما الطبيعة والخضورة .مبقيتش كنحس براسي كيضرني غير شوية الحروح ديول الشجر دايرا ليهم الفاصمة والبواماض باش ميخليو لاطراس 

الغد ليه فقت مع الصباح دوشت وداويت الجراح ولبست صاية واصلة للركابي فالحمر وشوميز فالبيض و صندالة بلا ديال الجلد زوينة طلقت شعري وفطرت وخرجت نتنزه كانت خالتي كتهضر فالتلفون خليتها وخرجت نتسارة بوحدي بقيت غادة حتی وصلت للباب د برا وانا نبقا غادة فداك للطريق الطويل و دايرة الكيت فودنيا وكنستمتع بالمنضر 

حتی وقفات شي طموبيل .كان سيف .وقف الطموبيل وهو كيطلع فيا ويهبط .حتی وقف عليا خبر عليا الشمس بطولو وبعضلاتو 

سيف؛ فين غادة بوحد 

انا؛ سلام بعدا 

سيف؛ جاوبي 

انا؛ كنتسارا ممطولاش ومغنبعدش 

سيف؛ اجي معاية 

انا؛ مبغيتش نرجع بغيت نتسرا فهاد الطبيعة 

سيف؛ مغنديكش للدار .غنتسارو فبلاصة زوينة معمرك شتيها فهاد المنطقة 

حل الطومو حتی طلعت وسد 

ركب حداية

 وقبل ميديماري هضر وهو كيشوف قدامو مكيشوفش فيا 

سيف؛ هاديك الصاية ماشي قصيرة شوية 

انا؛ لا هابطة شوية 

سيف؛ متلبسيهاش مرة خرا 

انا؛ واخا 

ديمارا سيف الطومو ومشينا شد وحظ الطريق بعيدة علی الفيلا بشي 20 دقيقة فالطومو 

وخرج وحل ليا الباب .

كااان بحال شي جبل كتشوووف كنو الجبااال كاملين وكتبان الفيلا بعيدة وصغير و شي فيلات حداها و شي ديور مكيبانوووش .وكتبان بحال لوحة ديال فنان .كان كيضرب وحد البرد تمااا زوين .ضرب فشعري وخلاه يرجع اللو وحوايجي لصقو علی جسمي بينو تقاسيم جسمي كاميلين 

انا؛ وااااااو احسن منضر شفتو فحياتي 

سيف وهو كيشووووف فيها وكيفاش واقفة والشعر ضاربو البرد اللور و حوايجها لصقو عليها ووقفتها الطفوليا والبريق فعينيها 

سيف؛ بصح احسن منضر شفتو فحياتي 

انا؛ تلفت ليه .وهو كان كيشوف فيا ( وليني انت كاعمة كتشوف فيه؟)

سيف؛ ماشي مهم كل وشنو المنضر اللي كيعجبو .اامهم عجباتك هاد البلاصة 

انا؛ واااو واااعرة .علاش مورتيها ليا شحال هادي 

سيف؛ مكانتش الفرصة 

جا حداية وشد فيديا وجلسنا علی الارض .حسيت بدراعو علی كتفي وعنقني بدراع وحدة .انا حطيت راسي علی كتفو .كنت كنخس بقلبو كيضررررب بزااااف وخا محاطة ودني عليه 

حسيت بالامان .قلاااال هاد اللحضات بيني وبين سيف .معمرو عنقني حتال اخر مرة وهادي تاني مرة .شحال هادي كنت كنفيق شي مرات وكتلقاه فبيتي جالس حداية كيشووف فيا وكيقولي سمعتك كتغوتي .حنحس بالامان معاه وخا بعد المران كيخلعني .هو الناس كلهم كيحتارموه .فالخدمة فالعائلة فكلشي .كلشي العائلة ديال عمي وخالتي كيجبدوه فجماعتهم وهضرتهم كعضو من عائلتهم وشحال مفتاخرين بيه .وكاه الكبار ديول العائلة كيعطوه اعتبار فوق القياس .والبنات فينما مشينا كتبعو نضرات الاعجاب .كتتخيل هاد البنت اللي غيبغيها كيغتكون خصها تكون معبووورة مفيهاش شي غلطة . وتلقاها تبوس ليه رجليه .خاصو غيبغي شي وحدة .واش ممكن يبغي شي وحدة وهو اللي بغاها باشارة منو تدوب تحت يديه .فينااااهيا هاد البنت اللي غتطيحو .كنتمنا نعيش نشوف هاد اللحضة .ويلي وانا مالي .وليني والله حتی قضية .بغيت نشوف هاد سعيدة الحض اللي ولداتها مها باش تطيح هاد المغرور 

بقينا شحال هكاك .سيف مكيهضرش غير مقابل الجو تما . شوية هبط راسو بشوية لعندي 

سيف؛ نعستي 

انا؛ لا غير ترخيت 

سيف؛ مفيك اللي ينوض 

انا؛ لا غنوض يلاه 

سيف؛ عحبك الحال 

انا؛ بزااااف بزاااف انا سمحت ليك علی كلشي 

نضنا ومشينا للطومو وديمارا للدار .وقفنا قدام ودخلنا بجوج كانت خالتي موجدة الغدا وكتسنا فينا حنت سيفط ليها سيف مساج راني معاه باش متخلع .تغدينا ومرة مرة كنهز راسي كنلقا سيف مقابلني بنص عين 

ساليت وطلعت للفوق وتكيت فبلاصتي و بقيت كنفكر فهاد النهار شحال داز زوين 

فالعشيا تعشينا مجموعين . وسيف مجلسش معانا بزاف كان كيهضر فالتلفون 

طلعت للفوق ودوشت ولبست كسوة د النعاس وتكيت فبلاصتي حتی سمعت شي غوتة نضت كنجري حفااينة من بلاصتي الغوتة جاية غير من الفوق ياك مخالتي مشيت كنجري لبيت خالتي حتی وقف حداية سيف كان لابس سروال كيطمة رطب مبين ليه عضلات یجليه وتيشرت حتی هو مبين عضلات صدرو ودرعانو . بقااا شحال وهو كيشوف عاد دق علی خالتي مكتجوبش وهو يفرع الباب دخلنا بجوج .حتی شهقت كانت خالتي طايحة والدم هبط من راسها .وطايح شي كرسي حداها يمكن كانت كتعلق تجبد شي خاجة من الفوق د البلاكار 

انا بديت كنبكي .سيف هزها للناموسية وعيط للطبيب .حتی طلع عندنا الطبيب للبيت وبغا يدخل حتی وقفو سيف .

سيف؛ وقف تما بلاتي .يلاه عاق بنهی اش لابسة ناض بزربة لاح عليها ليزار تستر 

انا؛ بان ليا لاح عليا ليزار قبل ميدخل الطبيب ( بغيت نبقا عفاك راني مخلوعة علی خاليتي)

سيف؛ سيري للبيت دابة حتی نجي عندك 

مشيت وانا معنقا داك الليزار علی لحمي .بقيت كنمشي ونجي حتی تحل الباب كان سيف 

انا؛ كيبقات خالتي مالها اش وقع ليها 

سيف؛ مزال ملبستي 

انا؛ قوليا مال خالتي 

سيف؛ معندها والو غير طاحت 

انا؛ ودابة كيبقات 

سيف ؛ راها ناعسة عطاها مهدئ .نعسي نتي دابة 

انا؛ واش تبقی معاية شوية خايفة 

سيف؛ وقف فبلاصتو وسرط ريقو ( مناش خايفة)

انا؛ معرفتش .شفت خالتي هكاك وتخلعت 

سيف؛ تكاي هانة حداك حتی تنعسي 

انا؛ اجي تكا حداية ماشي مشكل الناموسية كبيرة 

سيف تزير .باغي ينعس حداها وليني مكيتيقش فراسو .مشاعرو كتحكم فيه .كيتطلب منو كل قوتو والزيادة باش يتحكم فراسو 

انا؛ حسيت بيه تقرس يمكن باغي يهضر مع شي بنت ولا ياخد راحتو( صافي ماشي مشكل .غنبقا شاعلة الضو .غير سير ارتاح )

سيف؛ جلس فالطرف د الناموسية ( تكاي هنا حداك )

انا؛ فرحت( واخا ) نعست وخليت ليه بلاصة حداية الا بغا ينعس 

سيف؛ كيشوف فيها كيفاش ناعسة وحطات عليها الغطا بقاو كيبانو درعانها بيضين و شعرها كحل فالفراش البيض كيف شي ملاك .وجهو عرق ويديه عرقو .

بقا شحال وهو مضارب مع راسو كيفاش هي ناعسة حداه بكل هاد الانوتة والجادبية اللي فيها وباغاه ينعس حداها .واش الله كيمتاحن صبرو حنت عيا وقلبو استسلم . حس بيها نعسات وهو مقابلها .ناض من جنب الناموسية ومشا حدا الباب وبغا يحلو سمعها كتهضر في نعاسها 

نهی ؛ دم خاالتي .لا دم دم دم لا خااالتي 

سيف؛ جا كيجري حداها وبقا كيشوف فوجها كيبانو فيه علامات الخوف و عرقااانة .حط يدو علی خدها وبقا كيتحسسو كيحس بقلبو غيخرج من بلاصتو .يمكن هي ناعسة فيمكن ليديه يمسو البلاصة اللي بغا وليني هو كان كيتحسس وجههت بحال كيتحسس كنز .وحط صبعو علی شفايفها وصبعو كيرجف .كانت تجربة فريدة من نوعها وعلاش لا وقلبو كيتوووق لهاد اللمسات ليها ومنها.كان فصراع مبين قلبو وعقلو.هاد الطفلة كتستنزف كل جزء من جسمو واحساسو ومعارفاش الاعصار اللي كتحرك فالداخل ديالو .يمكن صعيب يحسسها بحبو ليها من غير خوفو وسيطرتو الكبيرة عليها 

كانت نهی كتهدي فالليل وهو مقابل تقاسيم وجهها ومرة مرة كتزير بيديها علی الغضا حتی يبياضو مفاصل يديها 

بدون شعور حط يدو علی يدها وشبكهم فبعضياتهم علی وعسی تهدن شوية.كانت ردة الفعل ديالهها قوية .كتزير ليه علی يدو وهي كتردد كلمة وحدة الدم .كانت صادقة معاه فاش طلباتو يجلس معاها حنت خايفة.هدشي اللي فكر فيه سيف .

محسش براسو وهو كيبعدها شوية باش ينعس حداها .توقع منها كلشي الا تعنقو داك العناق كان كفيل باش يحي دوك البراكين والاعاصير اللي فقلبو . سيف من الرجال اللي كيلعبو بالبنات .وهاد البنية الصغيرة قادرة تعجنو كيف بغات .وهي معنقاها كان فقمة السعادة .هي اللي كتعنقو .صدرها حدا صدرو بالنسبة ليه الكون ومافيه هادا النعيم .نهی قادرة تخليه يحس باسمی الاحاسيس .هي بوحدها اللي كتفيق الطفل الصغير اللي فيه .هاد الجسم المتير وهاد العيني الكبيرة الناعسة والخايفة وهاد الفم الممتلئ وهاد اللويدات الصغيورين اللي شادين فعنقو بالنسبة ليه ملاذو وحبو وقلبو وسعادتو .كلشي هدشي كيضور فعقل وقلب سيف . خليط من الاحاسيس فقلبو .بحال ديك الحلوة المحرمة عليه دابة شادها بين يديه وليني مستحيل ياكلها .وليني نهی محرامش عليه .هومة مبينهم حتی قرابة دم .علاااش الواليدة علااااش 

سيف كيتضارب مع راسو كيلوم الام ديالو فصميم قلبو حنت خلاتو يواعدها داك الوعد اللي دمر حياتو ودمر سكينتها 

سيف؛هي ناعسة ومرتاحة بين يديا ومعااارفاش العااافية اللي فيا .علاااش الواليدة علااااش 

*******************

فقت كنحل فعينيا وكنحس بشي يدين كيضمووني مزيرين .يدين رجووولين قبضة رجوووولية .ريحة مغريباش عليا .سيييف بقيت كنشوف فيه .سيييف هدا سيف .شحااال زوين لا لا مزوينش فايت زين لهيه .علاه اللي ميبغوه البنات .ريحتو دخلات ليا مع نيفي 

هزيت عينيا بان ليا ناعس حداية ويديه مزيرين عليا .اه البارح قلت ليه يبقا معاية حنت خفت .بعدت منحداه بشوية ويديه مبغاوش يطلقوني اول مرة كنعس حداه . كنحس بالامان صراااحة 

سيف؛ حل عينيه بشوية .وشافها( صباح الخير)

انا؛ صباح الخير .سمح ليا عدبتك 

سيف؛ نعستي مزيان 

انا؛ اه نعست مزيان 

سيف؛ كيشوف فيها وساكت 

انا؛ غنمشي للدوش وانت 

سيف؛فهم راسو(هانة غادي )

انا؛ لا مقصدت والو 

سيف؛ تبسم شوية ( وعلاه غنبقی حداك خصني نشوف خالتك لا)

انا؛ اااه خالتي 

خرج سيف من البيت وانا مشيت للدوش دوشت ومشيت كنشف فراسي جلست فوق الناموسية وهبطت راسي للمخدة اللي كان ناعس عليها .محسيت براسي غير كنتبسم لريحتو كانت .معرفتش كيف كانت كانت ريحة ديالو بحال تصوبااات ليه بوحدو 

ساليت ومشيت عند خالتي نشوفها كيبقات وانا وليت كيف الهبيلة .

دخلت عندها للبيت كان معاها سيف 

انا؛ صباح الخير خالتي كيبقيتي 

فريدة؛ بخير ابنتي .ماشي شي حاجة 

انا؛اويلي خالتي خلعيتينا البارح 

فريدة؛ متخلعي والو راني بخير 

ناض سيف بغا يمشي وهي توقفو خالتي

فريدة؛ ولدي سيف فين غادي 

سيف؛ غادي نمشي نبدل شوية الجو .یاني طمنت عليك دابة 

فريدة؛ خود معاك نهی غتقنط بوحدها وانا غير ناعسة كيما قال الطبيب 

سيف؛ شاف فنهی .كيقول مع راسو .مقادو فيل زادوه فيلة 

حتی دخل داك صاحبو اللي كان كيضحك معاه داك النهار .وسلم عليه وكيشوف فخالتي شوية ضور عينو ليا كيشوووف فيا 

سيف لاحض شوفات صاحبو لنهی و هو يحبسو فالباب قبل ميسلم علی الام ديالو 

فريدة؛ مالك اولدي خليه نسلم عليه راه جاي علی قلبلس واقيلة 

سيف؛ خنزر فنهی وهي مفاهمة والو 

معرفتش مال سيف كيخنزر فيا واااه اش درت تاني .وشفتو شاد فصاحبو من دراعو باغي يخرجو حتی تنطر من صاحبو 

سيف؛ بالغوات خررررج دابة

فريدة؛ مالك اولدي 

سيف: وقف قدامي (نهی خرجي )

بغيت نخرج وهو يجرني من يدي بالجهد وخلا صاحبو مع خالتي 

بقا غادي بيا حتی وصلني للبيت ديالي .

سيف؛ دخلي لبيتك وشوية ونمشيو 

انا؛ واخا 

دخلت لبيتي وجابت ليا الخدامة الفطور.ولبست كسوة زوينة مزيرة من الفوق وهابطة علی الجسم ديالي بطريقة زوينة .طلقت شعري ودرت شوية كلوص 

خرجت وانا فرحانة غنتسارة شوية فهاد الطبيعة . ومع سيف يعني مغنخاف لنبعد ولا نقرب مكين اللي يهضر معاية حنت بطبيعة الحال اللي مكلف بدكشي هو اللي غادي معاية

بقيت جالسة للتحت كنتسنا فسيف .شفتو خارج هو وصاحبو ومشاو فالطموبيل .بجوج .بقاااا فيا الحاااال بزااااف .هبطو ليا دموووعي معرفتش علااااش .بقيت جالسة وكنشوف فيه كيديماري الطموبيل حتی خرج .علاش يواعدني و ميوفيش بوعدو ليا .علاش مخليني نلبس ومعولة عليه .

والله منجلس هنا هو فالح غير يتحكم فيا ومخليني نتسنا فيه هاكة .مشيت خرجت من الدار وانا طالع ليا الدم معصبة من سيف ومن راسي اللي جالسة نتسنا فيه 

خرجت وغاااادة .هازة تلفوني وكنتسنط بعدت علی الدااار بزاف .بقيت غادة ومعاارفة كاع فين كنمشي .غير مقابلة الاشجار والورد والطريق ديال هاد البلاد شحال زوينة .معمري بعدت حتال هاد الدرجة .معرفتش شحال ضربت ديال الطريق . كنضن دابة وقت الغدا وانا مزال دايعة .تلفت للبلاصة اللي انا فيها معرفتش انا فين .ويلي هادي تاني مرة نتوضر مرة بالخيل ومرة بوحدي .ويلي قفارت عليا 

هزيت التلفون بغيت نعيط .مكينش الريزو .صااافي كملات .بقيت غادة مع شي طريق يسحابلي طريق الرجعة ساااع يمكن غا ما زايدة نتوضر 

جاني الجوع والعطش والدنيا كلها كالخلا مكين لا شكون نسول ولا معامن نهضر .

جلست فوق وحد الحجرة وانا مقابلة الشمس كتغرب .معرفتش اشنو ندير .حتی قرب يضلام الحال .عينيا فيهم الضبابة بالخوف والجوع والعطش و الخلعة والشمس اللي ضرباتني فراسي .حتی بان ليا الضو ديال شي طموبيل .قلت كلمی وحدة .عفاااااااااكم .وانا نحس برجليا فشلو .طحت علی ديك الحجرة وتلوات ليا رجلي . معقلتش مزيان عقلت علی شي كلمات كنضن مع الدوخة سمعتهم .سمعت صوت سيف 

كان شدني من خصري وهزني بين يديه .(قلبي غيسكت احبيبتي .نتي غتقتليني شي نهار) .يمكن مع الدوخی سمعت هاد الهضرة وتهيأ ليا هدشي.ومن بعد صافي الضلماااااا وراسي تقااااال 

فقت فبلاصتي والدنيا كتضووور بيا . 

انا؛ وفيا الدخا( نشرب .نشرب)

سيف؛ كان جالس حدا راسها وكيبوس فيه .جاب ليها كاس الما وشربها .

انا؛ شكون جابني هنا 

سيف؛ الصمت 

انا؛ تقاديت فبلاصتي وهضرت وانا راسي كيضرني( شكون جابني؟)

سيف؛ ناض وهو كيخنزر فيها( فقتي دابة مزياااانة .قااادرة علی هدشي اللي غنقول ليك .حنت مبقيتش غنعاودو )

انا؛ خنزرت فيه حنت تفكرت الصباح اش وقع وليني وجهو كيخلعني .عاوتاني معصب عليا وباغي يخرج جنونو فيا 

انا؛ انت اللي جبتيني 

سيف؛ غادي نهضر وسمعيني مزيان حنت الا زدت وحد الشوية غندير فيك شي حوايج مغيعجبوكش.اولا ممنوووووع ممنووووع تخرجي بوووحدك .تاااانيا متخرجي حتی تستأدني 

واااش انهی كيعجبك تعصبيني واش انتي عارفة اش كديري فيا بهادشي اللي كديري .واااش حاسة بيا .كان باقي شوية نقتل هادو اللي فالبيت .واش انتي معندكش حس المسؤولية .لا انا لا خالتك واش مكتفكيرش فينا كتديري غير اللي قاليك راسك .نهااائيا واش باقي نعاود هضرتي معاك .تمشي تخالفي هدشي .غنوووريك شي وجه معمرك شفتيه حنت انا بصح كنعاملك غير الناس كاملين .حتی الام ديالي مسبقك عليها 

انا؛ وخا كيهضر مكنفهم علاااش هدشي كيقولو .كنبقا حالة عينيا وودنيا كيفكرو غير كيفاش نهز شي حاجة ونبقا نضربو بيها للراس ( واخا)

سيف؛ جا جلس حداية ( غنسيغط ليك الماكلة وغدا غنمشو من هنا سالات العطلة)

انا؛ واخا .حدرت راسي و دورت وجهي للجيهة لاخرة.

خرج سيف من عندي وشوية جابت ليا الخدامة الماكلة كليت ونعست .

الغد ليه كنا كنجمعو فحوايجنا حتی وقفات علينا مرت خو خالتي .

المراأة؛ واش غاادين .راه كاين عرس بنتي وعرضت علی فريدة وقالت لي غتجيبك معاها .راه كنا نتسناوها غير هي تولي لاباس

فريدة؛ هابطة من الدروج( اااه نسيت والله .صافي غنمشو للعرس ومن تما نسافرو 

سيف؛ دخل من برا وسمع كلشي ( غنمشي انا ونهی حتی تلحقي صافي )

فريدة؛ لا اولدي ضروري نديها معاية مسكينة مفوجاااتش بزاف .ضروري نديها معاية 

انا؛ جيت عنقت خالتي(اه اخالتي بغيت نمشي )

سيف؛ خنزززر مزيان (صافي حتی انا غنوصلكم ونبقا شوية حتی ندي معاية نهی )

فريدة؛ اولدي غير سير الا كنتي مشغول .راه انجيبها معاية

سيف؛ حرجاتو الام ديالو ( وخا )

انا؛ مشيت كنحط صاكي فالبيت باش نجبد شي حاجة من الباليزة باش نحضر للعرس حتی دخل شي حد وسد الباب 

تلفت بان ليا سيف واقف ورايا ومربع يديه .حتی جر ليا يديا عندو وقربني حداه 

سيف؛بغضب( تشطحي نقطع ليك رجليك)

انا؛ ومالها اش فيها 

سيف؛ معندكش واخا فالقاموس 

انا؛ العرس كلشي كيشطح فيه 

سيف؛ تشطحي نقطعهم ليك مفاهمين

يتبع