قصة عندما يحب الامبراطور

من تأليف Meryam Lili
2018قصة كاملة بدون سفالة

محتوى القصة

رواية عندما يحب الإمبراطور

هو جرب العشق حد الجنووون .حد المرض.حد الهووس .فاات جميع مراحل الحب.تعدی العشق والوله .حب كيقطع الانفاس ديولو .كيتعدب كل تااانية . محبوبتو قريبة وبعيدة .هي السهل الممتنع .كيعشق تفاااصيلها .كيعشق عبيرها .كل انش فيها هو عارفو حافضو عابرو .حب سنين .تخطی الحدود .الكلمات ميعبروش عليه .هو أخر واحد يتوقع منو العالم هاد المشاعر .مشاعر هزااات رجولتو .هزااات كيانو .هزااات اسمو اللي كيرعب الناس .هو ضحية احساااس معرفش ليه حل . وطفلتو البريئة محاساش بيه .وهو مقادرش يبوح بسرو .سوی تحكمو الزااائد .و سيطرتو عليها .هي كيبان ليها كيف الوحش .هو كتبان ليه الجنة ديالو هي قريبة ليه وفنفس الوقت بعيدة عليه .ميقدرش يبوح بحبو باش ميخسرش اغلی انسانة وهي الام ديالو (مفهمتو والو ياك )
قبل 10 سنين .عائلة من اغنی العائلات .المتكونة من الام والاب والابن الوحيد .اللي هو سيف الجوهري .خليفة الاب ديالو فالمملكة اللي خلا ليه . هو العنيد القاسي .عمرو 20 سنة .ملامح روجلية .تقة بالنفس .حب للدات .غرور كل كلمات الأنا فيه . جسد متالي .الا تفصلات الوسامة .فهو خدا حقو وزيااادة مزال.معجبااتو كتار .وهو زير نسااء بالدرجة الاولی .مكينش شي بنت وخلاها وهو كيجو حتال عندو .هدا هو سيف 
توفی الواليد ديالو فحادتة وهو وشريكو .شريكو احمد صادق .كانت عندو بنت وحيدة .الام ديالها ميتة وخلاتها ليه .هي نور عينيه .اصلن كان مريض مرض خايب .ووصا صديقو اللي هو اب سيف باش الا مات يتكفل ببنتو .وبطبيعة الحال زوجتو فريدة اللي هي ام سيف فخبارها ومرحبة بالفكرة .
ماتو الاصدقاء فالحادت . أحمد صادق . خلا املاكو كلها لملاكو .اللي هي بنت صغيورة يلاه كتكاشف الحياة بنت زوووينة بزااااف .بشرة بيضة .عيون كبار وكحلين .رمووش طوال وكتاف .فم ممتلئ مغري .خدود مشدودة و انف جميل مرسوومة بكل المعاااير .نهی صادق .فقدات احساس العائلة من بعد الاب ديالها وليني عوضها الله بمدام فريدة اللي عاملتها بحال بنتها وكتر .كانت هي عينيها .كل اموالها فأسمها بقات متمساتش .هي تكفلات بمصاريف قرايتها ولباسها وكلشي .
سيف خدا مكان باه وطور الشركات ديولهم فعالم الاعمال .صنع لنفسو اسم .هو رجل اعمال مهم وجدير بالدكر فجميع الاماكن . هو ملقب بالامبراطور
أول مرة دخلات حياتهم او بالاحری حياتو . شافها داخلا كتبكي .شادة للام ديالو فرجلها و مخبيا وجهها كان حالس فوق الفوطويو .والعزايا كيخرجو .كان شعرها مطلوق علی وجهها شعرها الاسود كالليل .عيونها الكبيرة اللي سالين دمووع .فمها اللي كتورك عليه بسنانها .كانت مخشية فرجل الام دسالو باغة تخبا من الناس .حزن فعينها وهي طفلة . شاف انتي ماشي طفلة .خس بيها ملكو ماشي كتعنيه ولا ساكنة معاه 
من بعد العزو مشا لامريكا وبقا مكمل سلسلة النجاح ديالو . ومخلي اللي ينوب عليه فالمغرب وكمل دراساتو فأمريكا .ومرة مرة كتجي عندو الام ديالو .دازت 4 سنين .رجع للمغرب .تبدلااات نهی .نضجات شوية .كانت انتی في طور النمو .شعرها الطويل تحركاتها العفوية .حركات يدها ضحكتها وغمازاتها . دق قلبو ليها .كتر من اللول .
كمل استتماراتو فالمغرب .وكمل نجاحاتو حتی وصل 30 سنة ونهی كبرات قدام عينيه وحبو كيزيد ليها كل نهار .كان بيناتهم الصداع ديما .لانو كيتحكم فيها بزاف .هي مكتحملوووش .كتكرهو بمعنی الكلمة .حنت كتسمع عليه الهضرة د الشراب والعيالات .وزايدها كيتحكم فيها فلباسها وفشعرها فوجهها .كيتبعها حتال الجامعة ويجرها من يديها ويدخلها بزز يوصلها .كيبقا يصوني ليها فالتلفون حتی يطرقطق التلفون الا تعطلات 2 دقايق علی وقتها المعتاد .كيتبعها كيف خيالها .كيتحكم فصحاباتها ومعامن تهضر ومعامن متهضرش .وياااويلو اللي يحاول يتبسل عليها .متعرفو منين خرج حتی يبان ليها ضربو ولا هرسو ولا فلعصو .ولات كتخاف علی الناس منها .كتفسر هدشي حب أخ لاختو وليني كتحس بالحكرة من جيهتو .ممخليهاش تتنفس .حياتها كاملة وهو متحكم فيها 
سيف ديما كيبغي يوقف قدام غرفتها ويدخل يعتاارف ليها .ولين حابسو سبب واحد الام ديالو .قبل 10 السنين .تكلمات معاه الام ديالو
فريدة؛ ولدي بنت صاحب باك جاية .وليني غتواعدني بوحد الحاجة اولدي 
سيف: نعام اماما عينيا ليك نتي اللي بقيتي ليا 
فريدة؛ انا معمري تدخلت فالبنات اللي كتعرف ولا اش كدير وليني هاد البنت بغيتك تعاملها بحال ختك .لا ماشي بحال .هي ختك من دابة 
سيف: صافي اماما راها بحال ختي اش بغيت بيها 
فريدة؛ لا واعدني .معمرك تشوف فيها شي شوفة ماشي تالهيه .راها أمانة فرقبتي .وانا مبغيتش نضيعها و غدا نقابل باك يلومني 
سيف؛ كنواعدك اماما هاد البنت راها ختي ومعمري غنشوف فيها شي شوف 
فريدة؛ عنقاتو (الله يرضي عليك اولدي)
وليني فريدة معرفااتش .دمرات ولدها .حطمااتو .من نهار تزرعو مشاعر لنهی فقلبو .تبدل .ولا انسان اخور .البنات والشراب .وولا قااسي فالتعامل ديالو .ولا شخص اخور .الخدمة عندو هي كلشي .كيقصر كيسهر كيشرب .كيلعب بالبنات كيف بغا .فهو الامبراطور 

 وليني فالليل كيجي لحدا باب غرفتها كيمسو بيديه ويبوسو .كيحس بريحتها من الباب د بيتها .كيستنشقو ويمشي .هي كل نقطة فدمو كتلعن اسمها اللي ولا مهوووس بيه . مكفيه انها تكون فنفس السقف ومفارقهم غير حيط .ختار غرفة حدا غرفتها باش يبقا قريب ليها .تصورو معاناة هاد العاشق .
********************
نهی؛فقت الصباااح كنتكسل كيما العادة دوشت وكنطلب ميوقع لي شي مشكل مع مشكلة حياتي اللي هو سيف.معمري محسيت باحساس الاخوة من جيهتو .يمكن حنت بصح ماشي خويا ولا يمكن حنت كيتعامل معاية خايب .كرهتووو وكرهت صحاباتي اللي يضلو يهتهتو بيه وكرهت البنات فالجامعة اللي غير يشوفوه يسيلو ريوقهم .كرهت راسي حنت ساكنة مع زير نساء بحالو .اللي مصبراني هي خالتي حبيبتي نور عينيا .معمري نرفض ليها شي كلمة .كانت الام والاب ليا .وخا سيف كافي وموفي .داير كالخيال ديالي بحالة مكينش البنات من غيري فهاد الدنيا .
نضت دوشت .لبست دجين وشوميز وصندالة وطلقت شعري ومدرتش المكياج كما كيوصي سي سيف .هزيت صاكي درت فيه كتاب وهبطت مع الدروج نفطر .غادة للجامعة اخر سنة عندي. 
هبطت بان ليا سيف كيشوف فالساعة و فالدروج اكيد كيحسب ليا الدقايق .وخالتي جالسة فالطبلة كتقرا فمجلة 
انا: صباح الخير
فريدة:صباح الخير حبيبة 
سيف: كيطلع ويهبط فيا(صباح الخير)
فطرت مزيان وكنحس بسيف كيحسب ليا الدغمات . الا مكليت مزيان غيجي يخشي ليا راسي فالطبسيل اللهم ناكل 
سيف: وهو كيشوف فالساعة(نوضي نوصلك تعطلتي)
انا:لا بلاش غيديني شيفور 
سيف؛ بلا متعطلي هانة فالطموبيل وبلا كترة الهضرة 
انا: خالتي هضري معاه
فريدة؛ ابنتي عيييت اللي فيه ميهنيه خاايف عليك .
انا؛وبزااف علی الخوف .راه كلشي فالجامعة كيخاف يهضر معاية 
فريدة؛ متديش عليه دابة يتبدل .راه هو اللي هازنا ابنتي ومعمر علينا هو راجل د الدار .وماشي اي راجل الناس كلها دايرة ليه الف اعتبار .هدشي لاش ميبغي اللي يتعرض ليك 
انا: بستها فحنكها وجريت رجليا لعندو للطومبيل 
طلعت وكسيرا هو .كنحس بيه مرة مرة كيشوف فيا .معمري فهمت فاش كيفكر ولا باغة نفكر .دابة كنفكر فلمياء كيفاش غتصرف .كتحمااااق عليه .تصاحبت معاية علی قبل تشوفو كيوصلني وتجي تسلم عليا وعليه .معرفت البنات اش كيشوفو فيه 
هزيت التلفون بقيت كنسيفط مساجات للمياء و كنضحك .حتی خطف ليا التلفون من يدي 
سيف؛ وهو كيخنزر فالتلفون .حتی قرا المساجات .بلا كتهضر مع صحبتها ورجع ليها التلفون 
انا؛ سيييف . نزلني 
سيف؛ خنزر فيا مزياااان ( حماقيتي لا)
انا: كترررتي فيه . واش بغيتي نقولك حتی شنو كنلبس للتحت
سيف؛ وقف الطموبيل ودور وجهو ليا وهو معصب(فين تعلمتي هاد الهضرة .دوووي .من صحااباتك ياك . منين جبتي هاد الاسلوب . )
انا: وركت بيديا علی الصاك وحدرت وجهي و تزنكت حتی وليت كي ماطيشة .حتی حسيت بيدو كتمس فوجهي ومتردد .كيقرب صبعو ويحيدو 
انا؛ عفاك وصلني .غنتعطل 
سيف؛ جمع يديه و كسيیرا بالطموبيل .حتی وصلها قدام الباب د الجامعة 
هبطت من الطموبيل ومخنزرة .تقهرت من هاد العيشة معاه كرهني فالحياة معنديش شي حاجة سميتها حرية .معاطينيش فين نتنفس .ديما تابعني ومقابل ليا تحركاتي .هبط هو كشي ملاكم خارج من الحلبة .معرفت هاد البنات اش كيعجبهم فيه .ولا راه بصح زوين وفااات زين لهيه وليني تصرفاتو مكتخليني نشوف شي زين .بانت ليا لميا جاية كتجري كيف العادة باش تلاقة بيه وتسلم عليه 
لمياء؛ وكتنهج ( حبيبة نهی صباحوو .)شافت في سيف وعينيهت تقلبو كيشي مراهقة بقا ليها غتبوس رجليه .ممختالفة كاع علی البنات هنا اللي كلهم كيهتهتو بيه حنت ديما كيشوفوه ملي كيوصلني 
سيف؛ سلام( وهو كيشوف فنهی وكيهضر معاها بالعينين باش تجمع راسها من الصحابات )
نهی؛ لمياء يلاه
سيف؛ جر نهی من يدها وتبعاتهم لميا وهو يخنزر فيها .جر نهی بعيد وهي كتخنزر فيه( شوفي باقي تزيدي شي صاحبة علی هادي متلومي غا راسك)
مشات نهی وخلاتو وشدات فصاحبتها ومشاو والبنات كلهم دارو الصف مقابلين سيف وهو مركز مع نهی حتی دخلات سيفط ليها مساج وكسيرا الطموبيل للخدمة 
ياربي امتی غنتهنی من هاد العداب ويبعد عليا .ياربي يتزوج شي وحدة من دوك المونيكات ديولو ويتلها بيها 
بقيت غادة انا ولميا حتی وصلني مساج من عندو 
)حدري راسك ومتشوفي فحتی برهوش من دوك البراهش )
انا؛ اووووف ا سيف 
لميا؛ مالكي 
انا؛ والو يلاه نمشيو غنتعطلو 
لميا؛ نهی نتي صحبتي وعزيزة عليا وليني راني كنحماااق علی خوك 
انا؛ واااا ماشي خوية 
لميا؛ بحال خوك ياك مربين بجوج
انا؛ ممربين كاااع راه كان فامريكا وملي جا ولا داير بحال خيالي اوووف.معمري حسيت بيه خوية .كنحس بيه بحال شي وحش 
لميا؛ حطات يدها علی قلبها بطريقة درامية( ووووحش .هداااااك وحششش واش تسطيتي حماااقيتي .انا بغيتو يفلعصني غير يقيسني بيدو .)
انا؛ زيدي زيدي قدامي راك حماقيتي 
سالينا الحصة وخرجت وبطبيعة الحال كنشوف نضرات الاعجاب فالدراري وليني من طبيعة الحال حتی حد ميقدر يهضر معاية

طبعا بفضل سيد الكون .امبراطور الكرة الارضية .بغيت ليه الحكة وقلة الضفار .حتی من دراري د الجامعة يخافو يهضرو حنت كيشوفوه كيخافو منو .وخايفين علی ريوسهم . كنحس بيه تابعني وخا كنكون غا بوحدي وعينيه مقابلاني وخا مكين حتی حد حداية 
وصلني الشيفور للفيلا هبطت كيف العادة .خالتي فالنادي ديالها كتلاها ووجدات لي الخدامة الغدا .تغديت ومشيت لبيتي .دوشت ولبست كسيوة مقزبة و شعري مطلوق فازك شوية .بقيت كنتكونيكطا مع لمياء. حتی سمعت الضحك للتحت يمكن الخدامات . حتی هبطت نشوف اش واقع للتحت غير طليت بوجهي حتی تصدمت بان ليا سيف وخالتي ووحد السيد فنفس عمر سيف كيضحكو .شفتهم كلهم تلفتو ليا .خالتي تبسمات هداك الدري معرفت مالو كيشوف فيا فشكل ودورت وجهي لسيف ويااااريتني مدورتو .وجهو فيه جهنم الكحلة مصورة .محسيت حتی وقف حداية حيد الكوستيم ديالو ودارها علی كتافي ودفعني قدامو .انا فهمت والو 
انا؛ سيف اش كاين 
سيف؛ ورك علی كتفي حتی بغا يتفلعص( عااجبك لحمك .هابطة لهنا بهاد الحالة ) وهو مخنزر وكيهضر من تحت سنانو 
انا؛ راه معرفتش شكون يسحابلي الخدامات 
سيف؛ وقف قدامي وبقا كيشوووف فيا وففمي وفشعري و فصدري( وخا تفرقع الدار .بقاي فبلاصتك .فهمتي)
انا؛ سيف بزااف راني غير فالدار مناخدش راحتي.تقهرت منك والله)
سيف؛ شدني من يدي حتی وقف لي الدم فيها ( انتي دابة تقهرتي .ممخلي النسمة تجي جيهتك وتقهرتي .واش نقووول انا .اش نقووول اللي هاز حمل سنين فقلبي)
انا؛ مفهمتش علاش كيهضر( اش كتخربق .بغيتي تقول انا حمل عليك ) وحدرت راسي وبغاو يخرجو لي الدموع وجهي سخن وحمار يديت كنبعد بشوية علی يديه.شوية حسيت بيدو ترخااات .وهو يعنقني .اول مرة فحياااتي سيف كيعنقني .ديما كان داير حدود بيناتنا .ميمكنش نوصف علاقتنا حنت كنشوفو ومكنشوفو اغلبية الوقت يشوفني يمشي لشي بلاصة ولا يتحكم من بعيد وليني ديما واقف قدامي كيبعد عليا الناس ويتحكم فتصرفاتي .حسيت بيه حنين دابة .كان كيتنهد .كيضربني النفس ديالو بطيييئ فوق راسي .حسيت بيده كتزير عليا . انا وقفت فبلاصتي مفهمت والو .
انا؛ سيف مالك خلعتيني 
سيف؛ بحالة رجع للواقع بعد مني شوية وبقا كيشوووف فيا وعينيه مبدلين فيهم شي حاجة( سيري لبيتك دابة بلا هضرة) 
مشيت وخليتو واقف .بان ليا مشا بشوية 
طلعع لبيتي وجلست وانا نهز الكوستيم ديالو .معرفتش علاش شميتها غير حطيتها علی نيفي وانا نغيب فريحتو .ريحة رجووووووليا كتسلب الواحد .بصح البنات ميحماااقو عليه غير ريحتو كدااايرة .وانا نلوح الكوستيم علی الكرسي ومشيت نكمل الهضرة مع لمياء اللي تقول جوج كلمات وتلسق فيهم سيف .ولفتها فينما قالت شي حاجة تجبدو وهدا حال البنات اللي مزعوطين فيه وهو كازانوفا ممديها فيهم كيشد هادي ويطلق هادي شحال من مرة كنشم فيه ريحة البنات و لا حنكو فيه العكر ولا قوامجو فاش كنلاقاه فالدروج ولا فالباب حنت بيتو حدا بيتي .شوية كنسمع صونيت ديال التلفون .بقيت كنتلفت منين جاية حنت ماشي ديالي .
تلفتت الصوت جاي من الكوستيم مشيت كتجري هزيتها وهزيت التلفون من الجيب.طلعاتلي وحد ملكة الجمال فالصورة . حطيت التلفون ورجعت لبلاصتي وعاود صونا وعاود صونا وعاااود صونا ومشيت نطفيه لقيت شحال من وحدة معيطی ليه من غير ديك البنت وبانو ليا المساجات بزاف وانا نطفيه وحطيتو .ااااي شحال ديول البنات فين تبان صحيبتي لمياء مسيكينة .علاه واحظ بحالو يبقا بلاش .اااي شحال من وحدة .وهوووما اللي كيعيطو .الله ايلا طلع هاد سيف مساااهلش .
داز النهار عادي مبقيتش هبطت حتال العشا جمعت شوية مع خالتي حنت سيف خرج مع صاحبو 
طلعت لبيتي درت كريم لوجهي ويديا و جمعت شعري شفنجة بقيت بديك الكسوة و تلاحيت ننعس حتی كنسمع الدقان .نضت بشوية وانا فيا النعاس .حليت الباب وانا نشوف سيف متكي بيدو علی الباب بطريقة زوينة 
سيف؛ طلعني وهبطني وبقااا شحال ساكت عاد هضر( الكوستيم )
انا؛ شفت فيه ببراءة( ااه واخا راه صدعني وطفيتو)
سيف؛ شاف فيا وتبسم ( جيبيه ولا ندخل )
انا؛ واخا دخل هزو راهم فالكرسي وسد معاك الباب .ومشيت وتلاحيت فوق الناموسية .
سيف ؛ دخل وهز الكوستيم وهو يهزو عينو فيها .قلبو كيضرررب النفس تحبس ليه .نااااعسة بحال الاميرة .ممسوقاااش ليه .داك البرود اللي فيها كيقتلو .كون غير تعرف شحال كيبغيها ومستاااعد يبعد علی الدنيا كاملة علی قبلها
فقت الصباح .ليوما مكيناش الجامعة .بغيت نخرج نتسارا وليني خاصني الادن يااربي يا سيدي عندي 21 سنة وممتحكمة فحياتي 
هبطت نفطر بانت ليا خالتي بوحدها سلمت عليها وجلست 
انا؛ صباح الخير خااالتو 
فريدة؛ صباح الخير بنتي 
انا؛ خالتي وخا نسالي الفطور ونخرج مع لمياء راه ليوم مقارياش 
فريدة؛ بنتي خرجي مالكي مناش خايفة 
انا؛ فخاطري( راك معارفة والو ) صافي اخالتي لهلا يخطيك 
مشيت بزربة قاديت شعري ودرت شوية الريسيل و شوية غلوس مبااينينش ياربي منتلاقا بسيف ضروري غتقوليه خالتي راه خلاتني نخرج 
لبست دجين مقطع شوية من الرجلين و ديباردو

هبطت ومشيت عند الشيفور يوصلني عند لمياء .صافي متلاقيتش بداك الوحش .يمكن مشا للخدمة .
تلاقيت بلمياء ومشينا للوحد الكافي جالسين كنشربو العصير لمياء؛ حبي الزين ديالي راه غيجو عندنا شي اصدقاء كنعرفهم يلاه هضرنا وقالو لي جايين حنت قراي لينا
انا؛ وي ماشي مشكل واش بنات ولا ولاد 
لمياء؛ وكضحك؛ولاد هههه مالكي؟
انا؛ بصدمة(اصحبتي راك عارفة مكنعرف منين كيخرج ليا سيف يخلطني انا وياك وهوما معانة)
لمياء؛ وعينيها كيضحكو( بصح بصح غيجي الا جاو دراري .يختس كون قلتيها شحال هدا نديرها باش نشوفو وخا يضربني )
انا؛ والحمقی الا جبتيهم معمرك باقي تحلمي تكوني صحبتي 
لمياء: وعلاااش اصحبتي 
انا؛ ايوة هضري معاهم قوليهم بلا ميجو 
لميا يلاه بغات تهز التلفون تعيط ليهم حتی وقفو علينا وواحد فيهم بقا كيشووف فيا شي شوفات جاوني فشكل انا تزيرت 
لمياء؛ الدراري غير سيرو حنا غادي نمشيو صافي 
انا: بغيت نوض حتی شد ليا هداك الولد فيدي .
الولد؛ جلسي معانة شوية نتي 
انا؛ تلق مني ولا ميعجبك حال 
الولد؛ اش بغا يوقع كاع واش عرفتي شكون انا 
انا؛ مسوقيش .راه من هنا 3 دقايق غتلقا وجهك عامر بالدم .اللهم بعدي مني وحيد يدك 
الولد ؛ هههه زعمة نتي بهاد اللويدات البيوضين الرطيبين الصغيورين غتضربين 
مجيت نجااااوبو حتی حسيت بالسخوووونية ورايا وشي يد قاااسحة شادة ليا من ورا عنقي 
عرفتو بلا منتلفا ليووووما اللخرة ليا معمرو شافني مع شي حد ويلي قفارت

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.