قصة أنا غير هبيلة

من تأليف نهيلة احسني
2018قصة كاملة بدون سفالة

محتوى القصة

رواية أنا غير هبيلة بالدارجة

حيدت.. وأنا خايفة 
حمزة: اجي اش كاديري هنا.. 
أنا:‏معرفتش‬ ..أنا غير هبيلة 
حمزة : ‏اجي‬ اختي نمشيو للدار 
انا ‫:‏لا‬ .. خديجة تاضرب الهبيلة.. وبا حتى هو تايضرب الهبيلة.. وحمزة تاهو غوت على الهبيلة.. ومول الطاكسي تاهو. غوت على الهبيلة
حمزة ‫:عنقها‬ وجرها معاه.. ومشاو للدار
السلام عليكم ورحمة الله وبركاته.. هادي براءة ..عندها 18 العام فتاة جد جد جميلة.. عينيها زورق وكبار.. فم غوز ومطراسي.. حناك حمرين والشفار والحجبان والشعر كوحل..واخا هي مكرفصة فحالتها إلا أنه ماكاينش لي تاينكر زينها ..ولكن كيف ماقالت هي غير هبيلة.. هبيلة حيت موت مها الحنينة جعلاتها هبيلة.. هبيلة حيت الحيوان لي اغتصابها. جعلها هبيلة.. هبيلة حيت باها ساندهم وبغاها تكون هبيلة.. هبيلة حيت مرات باها هبلاتها بالعصى.. هبيلة حيت المجتمع الحgار..بغاها تكون هبيلة ..هبيلة حيت لي بعقلو فهاد الوقت وفهاد المجتمع وحقاني تايرجعوه هبيل..هادي هي براءة الهبيلة وهاداك حمزة الأخ د براءة .. حتى هو زوين فوجهو.. عندو 20 عام.. تايقرا فالاكادمية العسكرية..دخل ليها حيت جاب النقطة الأولى فالباك.. دابا العام الثاني ديالو هادا.. مسكين ملي تاتجي تايتهلا فبراءة.. فالصيف تايخدم باش يشري الكتب.. واخا بأه عندو الفلوس.. ولكن ماتايعتقوش.. رجع حمزة براءة للدار.. غسل ليها وجهها وعنقها وهز صاكو وزاد (حيت هو تايجي السبت العشية ويمشي نهار الأحد.. هاداك القانون دالاكاديمية )
تلاقى مع مرت باه فالباب
كانت جايا من الحمام : السلام اخالتي.. بالصحة والراحة.. عافاك تهلاي فبراءة عارفاك مكرفصة معاها
خديجة : اممممه.. وهي هازة حاجب الفوق
يعطيك الصحة.. اوا راني تاندير علاش قديت.. ولكن ديك الهبيلة راه غايخرج ليا العقل
حمزة # سمحيلينا بزاف.. عطاها شوي دالفلوس.. حيت هادشي باش كتمشى.. (عطاها من الفلوس دالمنحة.. واخا هو تايجمعهوم على حساب براءة باش يدير ليها حصص عند شي طبيب نفساني.. داكشي باش كيضطر يخدم فالصيف باش يشري الكتب ومايقيسش دالمنحة )..اوا بسلامة اخالتي
خديجة : بسلامة.. دخلات للدار لقات براءة جالسة.. وهازة الصورة دمها وتاتبكي.. اديك الهبيلة نوضي خرجي عليا.. حررتي عليا العيشة الله يتبعك لمك.. واش هي تهنات منك وانا نحصل فيك ..
براءة غير تاتشوف فالتصويرة وتاتبكي..
خديجة: مابغيتيش.. جراتها من يديها وطلعاتها للسطح حيداتلها الصورة.. وقسماتها على 2 ورماتها عليها .. وسدات الباب دالسطح..
براءة بقات تاتغوت مي مي..
هزات النص الفوقاني دالصورة.لي فيه الوجه د أمها .. وبقات كاتبكي وتقول.. علاش أمي خليتي الهبيلة بوحدها.. علاش
مي.. خديجة تاضرب الهبيلة بزاف.. وبا تاهو تايضرب الهبيلة..رجعي عندي.. وديني معاك امي..مي علاش خليتي الهبيلة.. عافاك امي غير رجعي و..مي.. مي.. مي.. رجعي امي قولي لبا مايبقاش يضرب الهبيلة.. مي.. واااامي.. واااامي..
هي بصح كيف كايقولو عليها هبيلة ولكن واش لي هبيل ماتايحسش 
بقات تاتبكي وتعيط. مي.. حتى طلعات عندها خديجة بالعصا.. زوقاتها وهبطاتها..خرجتها للزنقة وسدات عليها الباب.. كان سي سلام بات براءة جالس تايتغدا..خديجة اجي كملي غداك.. وخلي ديك المسخوطة الهبيلة تغوت..
خديجة # راه سديت عليها الباب.. كون درتي ليا بالراي.. كون رحلنا انا وياك من هنا وخليها تجلس تدور.. مانخليوش الأثر ديالنا هنا
سلام # اوا يكون خير
*فالزنقة 
براءة جالسة تاتبكي.. حتى جات عندها فرح لي كانت صاحبتها من الصغر..وخا فرح كبيرة على براءة بعامين يعني قدها قد حمزة ..
فرح عزيزة عليها براءة وكتشفق عليها..  حيت حتى هي ميتة ليها مها.. وعايشة فالجحيم مع باها ماشي مع مرتو.. باها لي كيظل يمنن عليها.. وخرجها من القراية وعطاها تخدم فالديور.. هي وبراءة ماكانوش تايتفارقو.. ولكن نهار تعرضات براءة للاغتصاب.. مابقاوش تايخليوها تجلس معاها أولا تقرب ليها.. وحتى إلى دارتها.. غير بالخزنة
فرح: براءة اجي معايا
براءة : خديجة ضربات الهبيلة.. حيت مي خلات لهبيلة بوحدها.. وفرح حتى هي ماتاتجيش تشوف الهبيلة.. وحمزة مشا وخلا الهبيلة.. بقات كاتبكي
شداتها فرح وداتها معاها لفين خدامة.. أول مرة تديها معاها.. حيت هاد الناس 3 أشهر باش خدمات عندهم وهما الله يعمرها دار.. وصلوا.. دخلو..داتها فرح للكوزينة.. غسلات ليها يديها ووجها وحطات ليها تاكل.. # هانتي كولي هاني جاية دغيا
خرجات فرح لعند مراد.. السائق
هي وياه بغاو يتزوجو.. ولكن بات فرح مابغاش يزوجها ليه.. حيت بغاها تخدم عليه.. ولكن قررو يتزوجو بلا خبار العائلة
فرح # مراد ومراد.. هانتا هاني
جبت النسخ ولاكارط.. وهاهوما حتى التصاور
مراد# صافي غدا نمشي نكمل داكشي لي خاص ونشوف الشهود ونمشيو نتكاتبو
فرح # واخا.. يالاه غانمشي راه خليت صاحبتي فالكوزينة
*فالكوزينة
مولات الدار دخلات للكوزينة لقات براءة
تخلعاات.. سولاتها # شكون نتي
براءة وهي خايفة # ماعرفتش انا غير هبيلة
مولات الدار # زوينة هاد انا غير هبيلة.. واش تقولي شكون نتي وشكون جابك ولا نعيط للبوليس
براءة # أنا غير هبيلة.. فرح جابت الهبيلة.. البوليس ضربو الهبيلة.. البوليس خايبين
دخلات فرح # لالة سمحيليا راه انا لي جبتها معايا.. راه مرت باها خرجاتها وسدات عليها الباب وجبتها معايا
مولات الدار # وفينا هي مها وباها
فرح # مها ماتت.. شي أ ربع سنين ولا خمس سنين.. وباها راه كاع مامسوقش ليها.. كون داها غير لطبيب نفساني كوراه هي دابا مزيانة
مولات الدار # مسكينة.. إلى ماكانش تدير ليك المشاكل
بقاي تجيبيها
فرح # آه شكرا الالة
ماتخافيش..ماغادير والو
.. فالليل جابت فرح براءة تال دارهم#
احبيبتي هانتي دقي الباب ودخلي راه إلى شافني باك غايقولها لبا وغا يقتلني
..ومشات بحالها..
براءة بقات كادق.. والو ماجاوبها حد
براءة بقات فالباب وتاتبكي.. وصلات 10 وصلات 12 وصلات 2 والو تاواحد ماحليها الباب
بقات كاتبكي وهي مكمشة..فحوايجها.. بقات براءة فالباب تال الفجر.. والبرد وخا ماكانتش الشتاء ولكن البرد كان كايدخل العظام.. حتى من الشماكرية ماتايضوروش.. وبراءة مسكينة غير كاتسمع شي تقرقيب
وتنقز بالخوف

يتبع ..

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.