المشرحة الجزء الخامس

من تأليف مختار بومليك
2018

محتوى القصة


ركزت مزيان فالمراية باش نشووف مزيان مشفت والووو يلاه شفت فالطريق وعاودت شفت فالمراية تاني وهي تبان ليا الحركة البلاستيكة كتحرك !!
وجوج صحابي لي معيا في سيارة الاسعاف سمير و امين مشافو والوو كيهضرو فداك شي لي وقع وانا فيا الموت ديال الخلعة مقدرتش نهضر ولا نقوليهم شي حاجة !!
بقيت نفكر انا شنو غادي ندير دابا !!
خدمت القرآن فالراديو وشوية الراديو سكت بوحدو !!! بقيت نخبط فيه باش يخدم ونعاود نضرب ووالو مبغاش يخدم !!
هي سبب ؟؟؟ 
وانا نهز عيني فالمراية ونا نلقاها في وجي !!!!!
صورتها فالمراية بحال لا كانت جالسة حداية !!
العينين و الوجه لي كانو فالمراية كلو محروق وكلو دم وشعرها لي شبه مسلووخ من على راسها في لحظة تلفت نشوف شنو كاين ما لقيت والووو كلشي هو هداك هي ممدودة على البياص والسمير و امين كيتكلمو على داك شي لي وقع كلشي عادي !!!
يعني داك شي لي شفت فالمراية ماشي حقيقي ولا كاينة شي حاجة انا مقدرتش نستوعبها !!
وبقيت طول الطريق على نفس الحال وبعد وقييت ماشي قليل وصلنا عندك المشرحة.
انا غير وصلت عندك المشرحة وبحال لا حيدت عليا شي تقل كان على ضهري.
انت سولتيني وانا مقدرتش نعاود ليك حيت بغيت نحط داك العجب ونزيد بحالي بالخف .
وماشي من الصح باش نعاود ليك على داك شي خليتها ليك ورجعت لداري هنا وداك نهار كنت عيان مقدرتش نحييد صورتها ولا صورت دوك ناس لي ماتوو !!
وباش تعرف الفضول لي فيا قررت نعرف شكوون هاد المرا !! 
من باب الفضول وصافي حيت راسي درني بخالك دابا انت جيتي كتسول شكون هي !!
مشيت عند الناس لي ساكنبن جنب ديك العمارة وسولتهم بلي انا باغي نعرف شكون ديك المرا ؟؟؟
قلت ليهم بلي انا مع البوليس وبغيت شي بيانات وصدقوني مساكن.
خديت بيانات سكان العمارة معدا وحدة !!
قالو ليا بلي هادي ساكنة بحدها ومعارفين عليا والووو وبلي حنا مسمين عليا المرا الكحلة !!
قلت ليهم كيفاش دابا هادي سميتها المرا الكحلة ؟؟
معرفتش
معرفتش مهم قالو بلي واليديها سماوها هاد الاسم ( الكحلة) ومن نهار تولدات كانت عي سباب نحس عليهم.
وقالو بلي هي من واحد القرية وجات المدينة هادي سنين وبقات هنا ومعارفينش عليها شي حاجة مزال !!
انا بالنسبة ليا هاد المعلومات لي عرفت عليها كانت كافية وخا مشبعاتش ليا الفضول ديالي مزيان.
ولكن انا قررت نبقا نسول تاني وثالث حتى نعرف شنو حكايتها.
هدا هو القرار ديالي بصراحة ، ولكن بعد هاد المعلومات لي وصلوني حتى انا ولاو يوقعو ليا شي حوايج غريبة.
بغيت نتوضا نسخن الماء فالكوزينة وانا نلقا الفورنو شاعل بحدو والعافية وصلات السقف كتحس بحال شي نافورة ديال النار خارجة من الفورنو كلشي عينين الفورنو شاعلين وانا نغوت طبعا حاجة عادية !!!
وانا نجري وصلت الفورنو وقطعت الغاز على العافية ولكن العافية محبساااتش هنا فين غادي نعيق بلي شي حاجة ماشي طبيعية كتوقع !!!
والغريب فالامر هو صوت كيغر من العافية بحال شي حد كيغوت ولا كيتعذب !! صوت غريب طالع مع صوت العافية لي خارجة من الفورنووو !!
بقيت نستاعد بالله من الشيطان الرجيم وكنقوول يارب الطف بيا يارب الطف بيا.
حتى العافية طفات بحدها.
بقيت واقف وكنقول اش مزال واقف

كتسنى يطرى تاني ؟؟
بعد هاد شي لي شفتي اش كتسنا مزال ؟
مشيت مزال دخلت الحمام نتوضا وانا داخل حاس بلي شي واحد وراية كيتنفس وسامع دقات قلبي !!!
خايف نهز راسي نشوووف فالمراية وكنت عارف راسي شنو غادؤ نشووووف !!!!
شفت نفس الوجه نفس الوجه لي شفتو فالسيارة !!
غوت وخرجت كنجري بالخلعة مشيت عند جاري كندق عليه..
عبد المجيد عبد المجيد ،لي هو صاحبي من زمان وكان عايش بوحدو.
خرج عندي وقلت ليه الله يخليك اجي بات معيا هاد الليلة .
قالي انت مالك وجهك مخطوف و صفر بحال هاكا ؟؟؟
قلت ليه انا عيان وحاس غادي طرى ليا شي حاجة هاد الليلة عفاك اجي بات عندي.
انا خايف نبات بحدي انا حاس بلي غادي نموت !!
وافق عبد المجيد وجا باش يبات عندي .
قلت ليه دخل بات فالبيت ديالي..
قالي لا غير سير لبيتك انا غادي نعس غير هنا فوق السداري.
وفنص الليل بديت نحس بشي حاجة غريبة !!!
فقت على ألم قوي فضهري بحال شي حاجة كتحرقني في ضهري ألم صعيب تصبر ليه !!
بغيت نوض نشوف شنو واقع ليا فضهري ما قدرتش ،حسيت بحال مكتف ومشلول وما قادش نتحرك فوق النموسية وما قادرش نتنفس ، ولا حتى قادر نغوت على عبد المجيد !!
شي حاجة مكتفاني فوق النموسية وشي حاجة كتقطع ليا فضهري !! 
ضفار كيقطعوو ليا فضهري !!!!
خاولت نصرخ مرة وجوج وثلاتة ،مقدرتش حتى لواحد اللحظة صرخت بحر جهدي وانا نشووف عبد المجيد حل الباب ديال البيت ودخل عندي.
كان مخلووع عبد المجيد غير شافني وهو يغوووت !!

هزني من فوق النموسية وكيقول اعوذ بالله من الشيطان الرجيم وهو كيشوف فالناموسية لي انا كنت ناعس فيها وانا نضور شفت النموسية لقيتها عامرة كلها بالدم !!!!
وضهري !! ضهري كان مشرح بحال شي ظفار شرطوني وكلاو ليا لحمي !!
عبد المجيد هزني داني لاقرب مستشفى معرفناش نقولو ليهم هاد شي لي وقع ليا مناش من غير اني نقول ليهم بلي انا كنت غادي فالشارع وخرجو ليا مجموعة كلاب ودارو فيا هاد الحالة !!
واخا ما تاقووش فيا ولكن دوزوها وصافي بغاو غير يتهناو مني.
وملي رجعنا البيت قالي عبد المجيد انا غادي نبقا معاك.
قلت ليه عفاك سير بحالك انا ما عرفتش شنو هاد شي !!
قالي لا لا خليني انا غادي نبقا معاك.
انا معرفتش هو فاش كيفكر !!
نعس عبد المجيد وانا خديت الدواء ديالي والمسكنات لي عطاوني ونعست مزيان ما وقع والو مزال فديك الليلة.
تاني يوم عبد المجيد قالي انا مغاديش نمشي انا غادي نبقا معاك.
وشوية جا عندي كايدق عليا الباب !!
حليت عليه وهو يقولي واش انت عندك شي مشاش فالدار ؟؟؟
قلت ليه لا !!!!
وهو يقولي وهاد شي لي عندك فالدار شنو هو ؟
قلت ليه شنو ؟؟ 
قالي اجي تشووف !!
داني ولقيت كويرات صغار كحلين ديال الشعر !!!!
بحال شعر المشاش كحل بزاف ، ومكبوب عليهم شي حاجة بحال الماء وثلاتة ديال الفيران مقتولين يمكن هاد شي لي خلاه يقوليا واش عندك المشاش فالدار !!
قلت ليه شوف عبد المجيد انا بعد المرات كنخلي الشراجم محلولين يمكن شي مشة دخلات تبعات هاد الفيران قتلاتهم وخلات شعرها هنا !!
قالي وهاد الكويرات !!
قوليا شنو كاين ؟؟؟
عبد المجيد كون انا كنت عارف شنو كاين كون قلت ليك قبيلة.
ياك انا قلت ليك سير بحالك انت لي مبغيتيش اعبد المجيد تمشي.
الله يحفظك غير سير لا بغيتي انا كنقولك سير.
قالي لا انا مغاديش نمشي .
قلت ليه خود راحتك انت حر .
داز هاد النهار على خير، لحد النهار الثالث !!!!

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.