مشات كلثوم مع داك الدري ورجعات كلسات قلت ليها : شكون هو داك الدري فين كاتعرفيه .. مكانعرفوش غا جا كلس فالطبلة قدامنا جبت الكارو شعلت قاليا شعيلة عطيطو بريكة شعل و بقينا شادين لهضرة .. تفووو الله إنعلها قاعدة فيك، فيك لهضرة بزاااف واش مكاتنعسيش .. أمالك أزبي غادير ليا طيارة واش ليكما عشرة د الكوارو غا ينعس وزايدون دري تفكيرو نقي و أوال مرة غانتلقا مع شي واحد ونهصر معاه بلا مايبقى إحشي ليا فالهضرة وزيادة على ذالك ماتنساش بلي راك فمركش ماشي فسلا مكاين هنا لا حاجة لا تورية لا نعيمة لا أستاذة ليلة اليوما غاتقلب تاني فين تبات، ها هو جابو الله بعدا عاطينا نمرة ديال القهوة فاش خدام قاليا إلى حتاجيتوني فشي حاجة عييطو عليا هدا هو الراجل ماشي هد الزامل لي خلانا فقهوة و مشى إنعس فلوطيل .. علاه هذا خدام فقهوة؟ .. و العجب و بالمعطي مشى لوطيل بوحدو حيت خايف لان طبو فالفلوس ونتحنسرو ديك السلاعة ديال بصاح، طليت على الساعة لقيت ستة ونص ديال صباح قلت ليها: كلثوم واقيلة بالمعطي غدرو نعاس ستة ونص هادي مزال مابانش .. هداك مكايغدروش نعاس سبعة لي قاليك راه غايوقف عليك هنا أرا ديك لبرة بعدة نشوفو فين غانقصدو إلى جا .. قالت كلثوم لبرا وضرب قلبي ضربة مقودة تفووو لبرة نسيتها نعيمة هي لخرا قراتها وخشاتها فصاكها .. قلت ليها كلثوم تفووو لبرة نسيتها .. كيفاش القلاوي نسيتها ناري واش عندك العقل فراس ولا فترمتك ناري ويعرف هد القود و الله تا يزيد وإخلينا .. صافي صافي راه بقيت عقل على الصبيطار وسمييت الجمعية يقدرو يعاونونا، جا بالمعطي قلت ليه: صباح الخير بالمعطي .. قاليا: صباح الويل يالله فين غاتمشيو دابا فين غاتقلب على هد عمتك فاشمن الصبيطار .. قالو ليا ف لبرا أبا لمعطي بلي مستشفى بن طفيل و بلي الجمعية سمييتها جمعية الامال للرعاية الاجتماعية .. صافي صافي هدشي لي كاين و فين هي لبرا؟ .. لبرا؟ لبرا؟ عند كلثوم أبا لمعطي .. كلثوم شعلات حيت أنا ماقدرتس نقوليه نسيتها بالمعطي كلشي قريب منو يقدر إجمع معايا بشي تسرفيقة .. كلثوم تفركعات : بالمعطي لبرا راه نساها هد الكربوز عند نعيمة .. مزيان، هاك هاك البرهوش هاهي براتك راه عطاتها ليا نعيمة ملي خليتونا وعرفتك نسيتها لي تسحر مع البراهش والقحاب كايصبح فاطر، يالله يالله نقلبو دابا على هد بن طفيل فين جاي .. مشينا سولنا على الطوبيس ليكايدي لبن طفيل لقيناه شدينا الطوبيس و تمينا غاديين والغريب فأمر المغاربة وهو كايقدسو المضاهر ملي كانكن أنا وكلثوم وبالمعطي كايحترمونا الناس كايقولو عائلة ولكن بداخل كل واحد فينا قصة قحبونية مكاين لا عائلة لا زبي، شفت ملي غا كانكون أنا وكلثوم بوحدنا و لا أنا ونعيمة كايسمعهم مساكن خل ودنيهم. وصلنا لسبيطار السبيطار كبير بزاااف شكون غاتسول؟ شكون مسوق ليك؟ بقات ليهم غا عمتي ولا خالتي إعرفوها فين كاينة؟ ولكن با المعطي نفعو داك شوية لي دوز فالتدريس قال لكلثوم: نتي غا بقاي هنا تسناينا ها حنا غانرجعو .. كلسات كلثوم على شي كراسة على برة ودخلنا أنا وياه مشا ديريكت لداك لبيرو ديال الاستقبالات لقينا واحد الصفريتة هي لي كالسة تمة .. قاليها: سلام أبنتي وخا نسولك؟ .. قالت ليه: مرحبا أسيدي؟ .. قاليها: الله إرضي عليك أبنتي شوفي ليا هد السيدة راه كانت ناعسة عندكم هنا وراه جابوها هد جمعية المدكورة فالرسالة .. شدات ديك الصفريتة البرة بقات كاتقرا فيها تا كملتها قالت ليه: سمح ليا أسيدي مانقدرش نفيدك بوااالو .. قاليها بالمعطي : وعلاش؟ .. قالت ليه: حيت هد الرسالة بصاح فيها الكاشي ديال الجمعية و صحيحة ولكن راه دازت عليها دابا كثر من حضاش اليوم .. عجبني فيها بالمعطي سمعها خل ودنيها .. و خا أبنتي دابا حنا عائلة ديال هد السيدة ونافتريض أنه قدر الله ومات و بغينا نعرفو غا قبرها مغانعرفوهش وخا دازت عليها تا عشر سنين إلى نسيتي نتي داك الصندوق لي قدامك مكانضنش بلي غاينسى .. لا أسيدي مكاين لاش نوصلو لهدشي كامل أنا غا سطاج و مانقدرش ندخل لسيستيم نرون فيه كاينة شي حاجة على ربعة وعشرين ساعة نقدر نفيدك فيها .. ولكن أبنتي ملي نتي سطاج بلاصتك ماشي هنا فالاستقبالات .. صفريتة يالله قالت لبا المعطي: شوف أشريف شدينا ليك خاطرك ماشي نتا لي غاتوريني فين خاصني نكن .. تا وقفات واحد الشارفة قالت ليه : مالك أسيدي ياك لاباس .. عطاها لبرا دخلات لسبير قالت ليه : أه نتما من عائلتها؟ .. قالها : أه ألالة .. قالت ليه : وفين كنت هد الوقت كامل يالله البارح رسلنا الجمعية لي لاحوها هنا باش إخرجوها مهم السيدة فشومبر 123 فالطابق لول إلى كنتي نتا راجلها ملي تبغيو تمشيو طركني ضروري .. قاليها: وخا الالة شكرا .. قاليا: سير عييط على كلثوم تشوف عمتك .. مشيت عند كلثوم فرحان قلت ليها: كلثوم لقيت عمتي يالله يالله معايا تشوفيها .. طلعنا عند عمتي لقيتها ناعسة بوحدها مسكينة تا قرعات الماء مكايناش حداها، بالمعطي غاشاف فيها وخرج مزال مافاقتش قلت ليها لكلثوم : هذا مالو؟ .. قالت ليا : ماعرت .. مشيت فييقت عمتي عمتي عمتي فيقي .. حلات عمتي عينيها قالت ليا : موحماد باقي حي أولدي خمسطاش اليوم هدي ونا كايهزو فيا الناس وكايحطو فيا ماعرفاهم تا فين غادين بيا من نهار لا حوني هنا ماعمر شي حد سول عليا مكادوزش شي لحضة حليت فيها عيني وماتفكرتكش بريت أولدي وبغيت نخرج و ماعرت فين غانمشي توحشتك أولدي خرجني من هنا، شكون هد الدرية .. نقزات كلثوم قالت ليها : أنا بنت السيد لي خدام عندو وها هو با راه معنا نيت .. عمتي مكاتعرفش العربية قالت ليا : ( ماستنا أيوي ) .. ( تنايام نتات تكا إليس نوالي دار خدمخ هاتي راد ياشك غيلاد ) .. ( مقار إنياس يسكم ربي سعد نم أيلي إجازياون سلخير ) قول ليها الله إنور سعداك و الله إجازيكم بخير .. دخل با المعطي فديك لحضة وهز معاه جوج ميكات عامرين ديسير ودانون والحليب تا بالمعطي ماعرت كيفاش تا حن .. قلت ليها: عمتي عمرني مانسيتك و البرا ديالك يالله وصلاتني و وصيت مي ماعمري غانفرط فيها، أصلي نتي لي بقيتي فيه و ماعمري نسيتك ولا غانساك أعمتي، كيبقيتي شوية بعدا أنا مزوك فيك أعمتي سمحي ليا .. دوا بالمعطي و قاليها: مايكون عندك باس الالة و موحماد راه غا وصلاتو لبرا حلف تايجي إقلب عليك والحمدو لله راكم تلاقيتو الله إجيب الشفاء الالة .. بقينا كانهضرو أنا وعمتي تا دخلات عندنا واحد الفرملية هزا واحد البلوك قالت ليها : إوااا مبروك ألالة ها هما عائلتك وصلو لعندك ودابا اليوم إنشاء الله غاتخرجي فحالك و فرحي .. أويلي هدي حريرة خرى عمتي خاصها تخرح فين غانديها .. قلت ليها : ( عمتي هياخ نوضان غيلاد ) ها حنا راجعين دابا .. قلت ل بالمعطي : أجي بغيت نهضر معاك .. خرجنا أنا وبالمعطي قلت ليه : بالمعطي راك سمعتي لفرملية أش قالت عمتي خاصنا نخرجوها و ماعرت فين غانديها .. صافي جيتي خرجتي عليها و كايضحك شوف أولدي أموحماد نتا راك الصغير فولادي، كبر منك و هد الطريق لي شادها مغاتخرجكش فتاشي نتيجة خرج عمتك وسير معاها البلاد و بقا معاها تا ترجع صحتها تكون بخير ورجع تاني قلب على رزقك غا هو نصيحة لي وجه الله أولدي ملي ترجع أخير وحدين تفكر ترجع عندهم ولا تسول فيهم هما أنا و نعيمة و بنتي راه غاديين بك غالهوية وراه ماعندهم باش إفيدوك، الشلوح راه كانعرفهم رجال و عشاهم كايخرجوه من فم السبع مكايتعشروش مع القحاب .. قلت ليه: بصاح داكشي كل لي قلتي أبالمعطي ولكن تا أنا راه ماشي بخاطري راه زمان لي رغم عليا نتاعشر معاهم ماشي بخاطري و الله إجازيكم خيركم و خا تكرفيس و التبهديل و تا نتما ما فحالكمش و لكن راه و الله لي عالم بيه .. هداك واجب أولدي، ونتا غا موحماد واحد ولكن راه كاينين موحمادات بزاااف مالقاوش لي يوقف معهم .. جبد با المعطي تمنة لاف ريال و عطاها ليا قاليا : هادي المركوب ديالكم نتا و عمتك سير لبلادك و نتمنى إلى رجعتي تاني المدينة نتلاقا معاك فحالة حسن من هدي .. كانتمنى أبالمعطي .. دخلنا عندكلثوم وعمتي البيت قلت ليها : عمتي صافي راه الادارة عييطو على الناس ديال الجمعية وقالو ليهم بلي وصلت لعندك راه عطاوهم الموفقة باش تخرجي .. جمعات ليها كلثوم حوايجها و لبسات جلابيتها و سينات فالدفتر ديال السبيطار و عطاهم بالمعطي فطوكوبي د لاكارط ديالو و سينة ولكن تال دابا كلثوم مزال ماعرفاتش لاش خططنا أنا وبا المعطي و فين غانديو عمتي، و قفنا فوق الطريطوار كانتسناو الطاكسي .. قالينا با المعطي : و دابا نتا أموحماد خاتشدو الطاكسي صغير نتا و عمتك قولو ليه غا الباب د المحطة حنا غانلحقو عليكم أنا وكلثوم فطاكسي أخر .. قلت ليه: بالمعطي أنا مامخالطش بزاااف و غانترونوا خليني نجي وكلتوم وسير نتا وعمتي .. شاف فيا بالمعطي عارفني غا باغي نبقا مزال مع كلثوم وكايضحك قاليا : أهيا عندك تلسق فيا عمتك و ضورو مع شي ضورة راه المرا غا خليتها فخنيفرة .. بقينا كانضحكو أنا وكلثوم بالمعطي و عمتي شدو طاكسي وشدينا طاكسي أخر أنا وكلثوم قالت ليا: شت بالمعطي ناشط، ياكما ناوي تدي عندو عمتك البراكة .. قلت ليها : لا الله إنجيها كلثوم واقيلة هد القايق هما النهاية ديالي معاك أنا صافي غا نرجع مع عمتي البلاد تايدير الله تاويل د الخير .. و خا فراقك صعيب وولفناك ألكربوز و لكن هد المرة مغانحبسكش مزال عمتك مكرفصة ومحتاجة ليك سير وقف معاها كيما وقفات مع مك فوقت الحزة وحنا جهدنا راه درناه معاك زهرك مكوز كانتمنى نتلاقا معاك فشي حالة حسن من هادي وطهلا فراسك بزاااف وديها فعمتك و فمستقبالك ماضيعش كيما ضعنا . و مرة خرى قبل ماتصبن الحوايج فشي سطاح سول ديال من لا تلقا راسك فالسطاح ديال زوامل ( كلثوم جمعتنا الحلقة 4 ملي لقاتني كانصبن ودفعت عليها كبير) .. ههه شكرا كلثوم تانتي خيرك راه كتير كانتمنى الله إلاقيك مع شي ولد الناس إسترك ونسمع خبارك بلي رجعتي لداركم و تلاقاي مع واليديك وتولد كلثوم تاني مرة ماتكونش هديك لي كانعرف .. كلثوم كاضحك وقالت ليا : هداك لي غايسترني إستر غا ترمتو و دارنا هي أخير حاجة نقدر نحلم بيها فهد الدنيا، سير سير نتا لي راك باقي فالكرانطي، إنشاء الله نجي عندك نلقاك داير شي هري أما أنا غا قحبة مصيري باين و عارفاه .. وصلنا المحطة ولقينا بالمعطي و عمتي كايسناو فينا، دخلنا قطع ليا با المعطي جوج بلايص ديال تيزنيت وبقينا كانتسناو فالكار إمتى غايخرج .. قلت ليها: كلثوم دابا نتي أش غاديري فين غاتمشي تاني غاترجعي مع بالمعطي؟ .. قالت ليا : لا غانبقى فهد المدينة نجرب فيها زهري قاليا داك الدري لي هضرت معاها البارح القحاب خدامين فيها بالعز و تا زوامل ماشي بحال سلا و الرباط وداك الدري هو لي غانبقى معاه، أنا صافي غا نساني أموحماد قدا بكري و باك المعطي غاطلعو مع الكار غانسوسو. بقينا كانهضرو تا كانسمع يالله أسيدي الناس ديال أكادير تزنيت ماعمري عنقت كلثوم عناق الحب و الاخوة تالديك اللحضة، عمتي شافت فيا بانت ليا ماعجبهاش الحال حيت حنا شلوح عيب تعنق شي مرا من غير مك و لا ختك قدام الناس و لكن عمتي ما عرفاتش فاشمن وقت لقيت كلثوم وحسيت بها كا إنسانة ماشي كا قحبة كيما كايحسو بها الناس، طلعنا الكار أنا وعمتي وبقات كلثوم وبالمعطي كايشيروا لينا بيديهم تا خرج الكار من المحطة . فراق كلثوم وبالمعطي ونعيمة و حنان صعيب بزاااف. أخر ماسمعت على كلثوم و بالمعطي ونعيمة سمعتو على لسان حنان فالصيف ديال 2005 تلاقيت معاها فالاكوط فأكادير تا هي كبرات و تزوجات وعندها بنية و ولد تلاقينا غاصدفة ولقينا الفرصة باش نهضرو حيت راجلها كاوري عقلية نقية كن كان شي مغربي كن عطاها براتها ملي هضرات معايا و هي فصراحة ماعقلاتش عليا ولكن أنا الملاميح ديال وجهها لا هي لا كلثوم لا نعيمة لا خديجة لا بالمعطي ماعمرهم خرجو من عينيا، قالت ليا حنان بلي نعيمة دخل خوها المغريب ودار ليها وريقتها و خرجها الانكليز وتمة فين تلاقاو هي وياها صدفة فشي معرض ديال هدشي ديال المغاربة، وقالت ليا بلي حاقدين على باهوم مارحموهش باقا حالتو هي حالتو. ولد الحاجة ضربوه ب خمسطاش ر عام حبسا نافدة، الحاجة ضربوها بست سنين بتهمة إعداد واكر للدعارة، كلثوم كرات دار فمركش ودارت فيها دار القوادة تا هي عطاوها تلت سنين دوزات فيها عام و إنتحرات داخل السجن بو المهارز .. قالتها ليا كلثوم: قالت ليا نهايات القحاب كاتكن يال الحبس يا الانتحار، كلثوم جمعتهم بجوج. ونا موحماد ها هو يحييكم و إلى جيت نعاود من 1995 تال اليوم فسيدي مومن خاصني نكتب ليل ونهار و ماندير وااالوا .
شهر ونص فدار القحاب الجزء 37 والأخير
محتوى القصة
النهاية
التنقل بين الأجزاء