العروسة: ولد الحراااااام تفووو كاملين ولاد الحراااام
اسراء : لااالا...شي بعد المرات حنا اللي كنكونو بنات الحرام حتى كنرجعوهوم ولاد الحرام ... انا اللي درتها لراسي
العروسة: ناااري ماتستاهلييش... بقيتي فيا والله
اسراء: هه .. عاادي كلشي دااز دابا ... وهدفي نرجع ولدي اما باه عمرو غيرجع
العروسة : وشنو درتي اختي حتى فقدتي الآمال ويأستي من الحياة بمرة ؟
اسراء: لا ميأستش ومكملة حياتي وغنرجع ولدي انشاء الله ... ومطمأنة عليه حيت راه مع باه وباه كيحماق عليه مكانش كيبغي الريح يدوز من حداه ... ولاكن قلبي معلق وملقيتش الراحة وكنبش على اخبراو وعلى غييير شوية نعرفو عليه ... اما شنو درت هاديك حريييرة بوحدها
اسراء: تنهدات) اودي ... خليها على الله ... الشهور الاولى بعدا مرضت مكنتش كنفمر فشي حاجة من غير ولدي الصغيير اللي مشا عليا وغير المحاكم والصدع مع عاءلتو اللي مقابلة...وكنت ديما كنمشي كنوض ليهم الصدع وندير ليهم الشوهة وكنرجع حتى ولاو كيهربو وكيطلو من السطوحة يشفو شكون كيدق ... فاش كنوض انا غير هربي كنولي كندرم كي التران ... كيرجعو فيا 10 ... اما كيفاش وقفت على رجلي ... راه قلت ليك راجلي كان لاباااس عليه و مغرقني ذهب ... كانت عندي مضمة ديال الذهب الحمر كدير 18 لمليون بعتها وبعت الكوليات دياولي كاملين وبعت واحد الكوليي فيه الديامند ... هاداك ملقيتش شكون يعطيني ثمنو فالمغرب وبقا حتى سافرات ختي اللي معايا دابا لتركيا وداتو معاها باعتو تما وسيفطات ليا الفلوس من تما .. باعتو ب 30 مليون ... المهم بعت كلشي مابقات ليا حتى جالوقة وحتى من خاتم المرياج ديالي بعتو
العروسة : واااو هادشي كامل كان عندك !! سعداتك
اسراء: راجلي كان لااااباس عليه كل مرة كيجسب ليا حاجة ... مريم اللي كندير لوجهي كيدير الف درهم وكان غيدير ليا رونج روفر ولاكن انا متعاملتش معاه مزيان ... مهم بعت هادشي كامل وجلست نفكر بوحدي شنو ندير ما ندير ونيت باش ميبقاوش عليا مالين دار يالاه ترجعي يالاه تمشي ... قلت ندير شي مشروع هنا ونجلس فيه باش نبقى قريبة من عاءلتي راجلي ونشم اخبارهم ... اييوا مشيت كريت محل على الشارع الكبير ب مبيون ونص للشهر وجهتو وقاديتو راكي شفتي كيداير داير ... ودخلت على الميديان فدقة وشريت كلشي فدقة ودرت التنكاف ديال العراءس ومشروع كبير ومطريال جديد وجبت حوايج جداد اللي مكينينش فالسوق وتشهرت دغيا ... حليت صالون كبير حدى المحل ديال التنكاف وزدات كبرت شوية بشوية وغامرت قلت يا ربحة يا دبخة يا اما ينجح ليا ونستتمر فالفلوس يا اما يفشل ونبقا الله كريم ... الحمد الله نجح ووليت كنمشي ب 3 دالمليون فالليلة .. ونتي عارفة مراكش مكتساليش من الزهو والنشاط والعراسات كباار ها العراسات ها السبوع ها الختانة ها الخطبة ها هادي مرة يتمرى الماطيريال مرة تمشي انا مرة يجيو 3 دالعراسات فليلة كنقسمو كنشوف انا العرس اللي زوين كنمشي ليه والعراست الخرين كنسيفط النكافات اللي عندي ... وبديت كنشري داكشي بالضوبل 4 دالعماريات 4 برزات والتكاشط بلا عدد كنختار الشكل اللي بغيت ونعطي للخياط ديالي يخيط ليا وعاد الكرى ديال التكاشط دالبنات راه مكيساليش ... المهم من جيهت المادة دايرة لاباس الحمد لله ومابقيتش كنطلق الفلوس واخا ندخل ماعرفت شحال فالنهار وفالليلة كنجمع ومنفرطاش فراسي وفعاءلتي كنسيفط ليهم المعاونة ... انا قبل فاش كنت مزوجة كانت عمتي اعيط ليا تقولي عطيني كنسيفط خالي يقولي عطيني كنسيفط ليه مرات عمي بنت بنا بنت خاالت مي حتى هي حفات ليها الجرية وقالت لي عطيني فاللخر ضحكو عليا فاش طلقت وكيعيطو ليا كيواسيوني زعما وهما عاد مكيزسدو يمرضوني وفين ما تزوج شي وحدة تعيط ليا تقولي مرحبا بيك للعرس وعندااك متجييش انا تزوجت فلااان فرتلااان
العروسة : تفووو كنكره بحال هاكا يخخخ
اسراء: هانيا تانتي انا من النوع اللي مكيتشوقش ... وهانا دابا الخيرة فيهم دير بحالي راها وحدة مهندسة ووحدة طبيبة مابايناش عليهم كااع داكشي اللي كيشدوه هما فشهر كنشد الضوبل ديالو فالصيف كل ليلة وفالبرد حتى هوا ... وبلا زواج بلا والو رجعت هيبتي وكرامتي ودرت الشان لراسي ومابقيتش محلوولة اللي تبحلس عليا نقوليه هاك.. . دابا كيحشمو يجبدوني حست عارفين راسهم ميوصلونيش وراسي وقفت على رجلي ... و تعلمت ان الانتقام هوا النجاح ... كن مانجحتش كن بقيت مدلولة وكلشي كيتشفى فيا .. اجي تشوفي دابا كي ولاو كيعيطو ويشكيو وشحال من مرة بغاوني نكف ليهم فالعراسلت وفاش كنقول ليهم شحال كيتصدمو ... وعند بالهم غنحشم منهم ونقوليهم كادو كي الهبيلة كيضحكو عليا
العروسة: تبارك الله عليييك ماعندي منتسالك
اسراء: وهادشي كااامل سبابو الهضرة اللي كان قال ليا راجلي شحال هادي وعايرني بيها ... كان قال ليا طماعة وبقات كتحفر فيا وهي اللي زيداتني ودفعاتني حتى وصلت ودرت لاباس وجمعت ريال على خوه ... 3 سنين وانا كنجمع واخا الملاين كيدسرو ولاكن لا ... كنت كنصرف فحدود وضربت على الماركات والحوايج الغالية اللي كتدي الفلوس حتى دازت 3 سنين ومشيت دابا شريت قاعة للحفالات وراها كيصلحوها ويقشوها فالدخلة دمراكش حدى ماكدو ... راه درهم يوصلك والى فرطتي فداك الدرهم وقلتي حقا عندي الملاين عمرك توصل...وكنتسنا غير النهار اللي نوقف فيه قدام راجلي ونوريه الطمع اللي قال عليا مي داير ... ويشوفني فين وصلت ومابقيت محتاجا حتى واحد واخا يكون ماشي غير لاباس عليه ... توازنات الكفة دابا وكيما هوا دار لاباس درتو حتى انا ودابا رجعت كنتهلا فراسي وفكرشي و عايشة مفييكة من جيهت المادة ... خديت طوموبيل هادي 3 شهور وغير تحرك ليا القاعة شوية نشري رونج روفر اللي كنت كنحلم بيها
العروسة: الله يعاونك اختي... شحال دابا فعمرك؟
اسراء: 24 سنة
العروسة: وزوييتة مكتفكريش تزوجي؟
اسراء: اهر حاجة كنفكر فيها عي الزواج ... ممحتاجاش ليه باغا فير ولدي يقول ليا ماما ونسمعها فودني وينعس حدايا وصاافي مابغيت راجل مابغيت زمر ... ماعند الراجل مايعطيني الى كان غير على يغطي راسي و يصرف عليا بلااش منو راسي مغطي بالفلوس حسن كااع من شي راجل ... واها الحياة ماشي هي الفلوي ولاكن قدام الناس الى عندك الفلوس كلشي يحتارمك وكلشي على الفلوس والفلوس هما الحياة اللي تعيشيها قدام الناس الى بغيتي تهز راسك ماشي الراجل اللي يهزو ليك ... يا اما ولادك يا اما فلوسك والصلاة على النبي ... وجاو بغاوني شحال من واحد وكاين اللي باغينس على زيني وعندو الفلوس وكاين اللي طامع فيا نصرف غليه وكاين اللي باغيهم بجوج الزين والفلوس ... وماالي عليها عرق كتافي خرج مني بالثاني والنثتي ورزق ولدي اللي نشاااء الله ياربي رجع ليا ... يجي شي ولد الحرام يديه ويخلي ولدي كيشوف فالسماء.
اسراء: الصراااحة قليل فين كنمشي ... انا كنمشي ايه ولاكن غير كيقادو الانور ونشوف كلشي مقاد والعروسة فرحانة كنتخلص و كنرجع بحالي ولا الى كان عندي عرس اخر كنمشي ليه تاهوا نشوف الامور كي دايرة ونتخلص وندير مع مالين العرس
معاياش يساليو ومع النكافات حيت انا عندي بزااف وعندي كوافور وكوافورات اللي كيمشيو من الصالون يباتو خدامين للعروسة ويبدلو ليها المشطة مع المكياج الى اخ ... كنرصي الامور مع كلشي ونرجع بحالي كنحقق المكانة و نعس حتى كتسرسر ولا يصونيو عليا البنات يقولو ليا راه سالينا وكنلبس عليا ونركب ونمشي نوقف على بكاجي حتى يبلاصيوه ونشد فلوسي اللي بقات والغراماات كاااملة اللي تشتات فالعرس ونتبع السطافيط للمحل حتى كيدخلو داكشي وندخل النكافات والدراري اللي تعلقات ليه شي حاجة كيجبدها ... كنحيد الغرامة بوحدها وشي مرات الى كان العرس مزوهر كيبداو الملاين يتشتتو فالعرس هاداك منعرفو عرس مضحم كنمشي نحضر حتى انا . مهم كنخلص النكافات والدراري كااااملين اللي خدمو ونشد ديك الغرامة كلها نفرقها عليهم ... كل فوج كنفرق عليه فرامتو اللي جمع فعرسو اما انا باااركة عليا فلوسي اللي كنشد والغرامة اللي كنحضر عليها كنفرقوها بيناتنا حنا كاملين حيت انا دايرة الرجال كبار بشلاغمهم خدامين معايا هما اللي كيهزو العروسة وعاد الدراري الدقايقية هادو معايا كيجيبو لسا الخدمة ونديهم الى بغاو مالين العرس الخدمة مهم دايرة يدي مع كلشي مع المصور مع الجوق مع التريتور مع كلشي ... اللي جا عندي وبغا تريتور ولا شي حاجة كنعيط على تريتور ويعطيني الباي ديالي وهوا كدالك لا هوا لا المصور لا لجوق .. ماعادا الدايقية هادوك مساكن انا اغلبية كنديهم يخدمو ... المهم محركة القضية وديما خدامة وكنجمع باش وصلت لواحد القدر اللي زعمني نشري قاعة و انشاء الله باغا نجمع كلشي ونولي تريتورة وتنكاف ويكون عندي مصور وجوق وكلشي ... غير حتى تحرك ليا القاعة بعدا
العروسة: انا كنشوف هادشي بعييد وصعيب اي بنت توصل ليه
اسراء: لا اختي ... الى كان عندك باش فاللول غير زعمي ... ويالى معندكش درجة درجة غتوصلي وربي كيعاون غير مديريش الحرام وصافي
العروسة: وبيني وبينك دابا...باقا متبغي راجلك ههه
قلبات وجها كتهز فالمكياج ساكتة
العروسة: واهضري ... الى رجع تسامحيه؟
شافت فيها اسراء حشامانة: ههه...اه
العروسة: ههه كيفاش اه
اسراء: الى قالك نرجع و ترجعي ؟
اسراء: اه نرجع
العروسة: ندمتي
اسراء: وشكون هادي اللي متندمش...انا بغيت ولدي وباه مكرهتش ومسامحة ليه غير يكون تهلا ليا ولدي وصافي ... اما الى رجع نرجع ليه علاش لا هوا مغيطمع فيا ما والو ... (تنهدات) هزي وجهك هزي نسالو دغيا راه معمرو غيرجع واخا نضرب راسي مع الحيط . معرفتش كيفاش قبلت نجي نخدم ليك برجلي فعرسك
العروسة: حيت غتكوني قنطتي و بغيتي تفوجي بشي عراسية اولا لا ههه
اسراء: ههه يمكن . مولفة كنتخلص فالصباخ ونجيب حقي دالعشا والحلوة وكللللشي ونرجع بحالي ... اما دابا غنتعشا هنا ولاكن ضااااروي ناخد معايا راه ولفت ماكلت العراسات وختي غنلقاها حالة عينيها كتسنى نجيب ليها بحال ديما هههه
العروسة: اجي وشكون كيجيب ليك اخبار راجلك؟
اسراء: راه ختي مزوجة خوه وكتجي عندنا مرة مرة وكنلقط من عندها خبيرات...و مو شخال من مرة مشات عندو لفرنسا ورجعات و ختي مكتعرف والو ودرويشة مكتبحتش وغير الى لقطات شي خبييرة وصافي
العروسة: وعلاش ممشيتيش عندو لفرنسا؟
اسراء : بغييت اختي نمشي ولاكن كيرفضو ليا الفيزا ... عاد ناوية عاوتاني ندفعها هي وليغولوفي بونكير ديال الاشهر الاخيرة ديالي باش يشوفو ان الكونط عندي عامر وممحتاجتش نهرب ليهم تما ... حيت قبل كنت اللي جمعتها كنخسرها فالقاعة والاصلاح ديالها... عاد دابا شوية عمرت الكونط ... ويعرفوه محرك وخدام وعندي مشاريع حتى انا ... مهم هاديك روينتها بووحدها حيت فاللول سافرت مع راجلي لبرا على حسابو هوا وعندو الجنسية اما دابا انا غنمشي بوحدي خصني وراقي باش نمشي ... كنفكر نتبع مو فاش تكون غادية .. تفولها ليا غير ختي تقول ليا فوقاش غتمشي ونمشي ديك الساعة للمطار واخا نخلصها غالية ونركب معاها فنفس الطيارة ونبقا حاضياها فين ما مشات نمشي موراها حتى نعرفو فين كاين
العروسة : نااري وتقدري؟؟ امشي بوحدك لبلاد غربية؟
اسراء:على قبل ولدي نتلاح فالعافية
العروسة : كتزعمي
اسراء: اجي عرفتي ريسطورون دولفين
العروسة: هأ!! وشكون ميعرفهاش وهي مشهورة بحال اركانة
اسراء: وعرفيتي كافي ليون
العروسة: اه وااايلي ههه راه من عندهم جبت بياس مونطي وليسواغي دالعرس كاملين
اسراء: عرفتي مول داكشي ؟
العروسة: اه ... واحد الاماراتي بوكوووص ههه قالك لابااس عليه و
العرووسة: ماما جمعات ليك حقك دالعشا كامل والحلوى واخا تعشيتي
اسراء: ههه شكرا احبيبة
سالا العرس وشدات اسراء الدفعة الثانية من الفلوس ديالها وجمعو النكافات والرجال اللي معاها الماطيريال ورجعو للمحل مع شروق الشمس...كل واحد عطاتو خلاصو وفرقات ليهم الغرامة و مشاو بحالهم وجلسات كتسنى الفوج الثاني يرجع ... حتى هما نفس الشيء خدات فلوسها من عند النكافة المكلفة تشد الدفعة الثانية وجمعات الغرامة عطات كل واحد حقو وتشتتو مشاو ينعسو ... جمعات فلوسها كاملين وماكلتها وخرجات لقات الشيدة اللي كتفتح المحل و تقابلو جايا تبدا الخدمة مع 9 دالصباح كما العادة ... دوقاتها اسىاء من الحلوة وخلاتها فالمحل كتجمع وتنقي هي والمكلفة بالصالون حتى هي فتحات الصالون داسرااء ... اما هاد الاخيرة وصلات تلاقات مه اسية فالباب غادا للخدمة
اسية" حقي خبيه غنجي ليه فلعشية عنداااك
اسراء" راه ليك جايباه ناااري ياربي السلامة .
دخلا للدار حجات كلشي فوق الطبلة ودات فلوسها لبيت النعاس خباتهم ووغسلات وجها وبدلات حوايجها وطاحت نعسات فوق الناموسية
رجعات اسية من الخدمة دخلات على اسراء لقاتها فبيت النعاس وبدات تفيق فيها
اسراء : تعلمي تهضري ومتحتاجي شطارة ... داك نقص ليا نزيد ليك ماعندنا مانديرو بيها ... تعلمي تهضري مع الناس وراك نتي اللي كاسبة ... هانا غنمشي للقاعة ونرجع ... (حطات يدها على شعرها) واخا شعري غيبقا هاكا مجموع معليش ... نطرطقو مسمار العروسة وقديها اما .. نهار 20 فالشهر 3 دالعراسات عنداك تنساي.
امينة: واخا اختي اسراء
طلعات فسيارتها وتبعاتها العروسة بالطوموبيل من اللور حتى وصلو للقاعة ونزلو قدامها ... هزات العروسة راسها كتشوف فالواجهة والجردة اللي قدامها بالنافورة وحيطو القاعة الحمراء بلون مدينة مراكش وشكلها التقليدي من الخارج
اسراءة هانتي راه داير بيها الصور وباركينك صغير لداخل فين يوقفو الطونوبيلات ومزال من هنا 20 يوم غتلقايها حسن كااع من هاكا
العروسة : هاكا وراها كتحمق وزوينة ..بعدا من برى راه واعرة
اسراء : وفالعرس كيطلقو الخيوط فالازرق مع الحيوط من الفوووق حتى للتحت كتولي مضويى وهاد النافوىة كضوي بالالوان ... اجي دخلي تشوفي
دخلات اسراء مع العروسة وكتهضر مع الدراري اللي خدامين على الغوتوش ... دخلو لداخل وهي تبهر العروسة بالنقش فالسقف وفالحيوط بحال شي قصر و الستاءر الكبيرة البراقة فاللون الذهبي والابيض والطاولات المربعة بالفوطويات فالابيض
اسراءة هانتي انا معنديش كراسا عندي فوطويات مربعين دالجلد والطبلة مربعة كتشعل الضوء من لداخل ... والبرزة كتكون لهيه فالراس ومزال الزرابي غيتطلقو من الباب حتى للدرجة دالبرزة والثرية كبيرة غتعلق لوسط ... وهانتي شفتي الدراري خدامي دابا على الاضواء دالسقف اللي كتعطي الالوان بحال الى راكي فشي بواط ... ومن الباب حتى للبرزة فهاد الطريق للي لوسط غيمشيو من ليمن وليسر خشبات مربعين طوال فوقهم فايوزات بحال النخل كيشعلو الالوان و بزاف دالحوايج غتعجبك غير مزال ما دارش فيها شي عرس باش نصورها وتشوفيها
العروسة: غزااالة فالصراحة هادشي كيحمق
اسراء: وغير تفرش وتعمر عاد تشوفي كي غتولي
العروسة : دوقك غزال فكلشي وحتى نتي وويتة تبااارك الله
اسراء: ههه ربي يخليك احبيبة...مهم هانتي شفتي القاعة وشفتي كي دايرة من برى ومن لداخل ... تشاوري مع راسك وردي عليا الخبار ... وانا راه مغتقول ليك سالي مع 12 ولا مع 2 بقاي فيها حتى يصبح الحال
العروسة: ايوا على هاظ الحساب من هنا نتفاهمو ... مغنلقاش محسن منك
اسراء: مرحبااا والف مرحبا
العروسة: او بشحال غتكريها ليا؟
اسراء: المرى ديالها 5ونص دالمليون ... كلشي فيها جديد وباقي بميكتو كيما كتشوفي
العروسة: ايوا غير خمسة ودعي بالتيسير
اسراء : اييوا شغانقول ليك... الله يكمل بالخير ونتمنتو تكوني عروسة وفال خير علينا وقدامك سخاان ويتيعوك عرايسااات انشاء الله ههه
اسراء: شتي حتى الجوق والتريتور ضربي كشلي على حسابي ... انا نجيب ليك جوق من داكشي وتريتور يحمر ليك الوجه بلا متقلبي حتى من الدقايقية نعطيك نعيط ليك على الولد صاحب الفرقة ... حسن جمعي كلشي وخرجي من بابا واسع انا نيت عادو كنتفاهم وكنخدم مرتاحة معاهم وكنطلعو العرس من داكشي
العروسة : واخا شكرا ههه ... ها نمرتي نبقاو على اتصال واي حاجة راه نعيط ليك وفاش تشوفي مع تريتور والجوق عيطي عليا
تافقو على كلشي وجمعات اسراء بين العروس والفرقة الموسيقي وكلشي ورجعات للصالون صايبات شعرها وبقات كتشوف وتحضي وتراقب حتى عيات وخرجات وصات امينة ورجعات بحالها للدار طالقة الشعر .. دخلات لقات سحر وبنتها صغيرة جالسة هي واسية كيتجمعو ..سلمات وجلسات كتسول على الاحوال
اسراء: علي لاباس عليه؟ كي دايرة مع داك القوم خختتفووو
سحر: الحرب ناايضة واسماعيل و عبد لطيف خرجو من الرياض سكن كل واحد بوحدو بقيت انا والحاجة وسامية فالدار والخدامات ... وناضو ولاد الحرام تافقو يبيعو الرياض ودابز معاهم علي ... جابو واحد الكاوري للرياض الاللة شافو ولسق عليه لسقة وقررو يبيعوه ويفرقو الفلوس كل واحد ياخد حقو ... الحاجة سخفات مابغاتش الرياض يتباع وعبد الحفيض طغى هوا وسماعيل مابقاو كيعرفو خوتهم ولا مهم همهم يبيعو ويزيدو وزيد عيالاتهم محرشينهم ... صبر علي تا عيا ميغاوش يتردعو وداعاو فالمحاكم على الرياض والخريرة محرحرة ... ودابا راه عيط علي ليحيى قاليه واالو تجي تفك معانا هاد الروينة وقاليه يحيى راه غيجي
اسراء: بدهشة) حلفييي... حلفي حتى غيجي
سحر: غيجي وغيجيب معاه محمد امير ههه
خرجات اسراء عينيها وحطات يديها على صدرها : اجي قيسي قلبي كي كيدير ... نااري غنسخف
سحر: وحلات معاه الحاجة معرفاتش تواصل معاه ... قالت لك كيهضر الفرونسي وشوية اللغة العربية حيت كيقريها ليه شي واحد ... اما الدارجة مكيقفل فيها تا حاجة والحاجة تا هيا تعلمات بيك شي كلمات فاش ضربات شهر معاه تما ولفات
اسية : وراه باااريس ابنتي التعليم عندهم مأدب داكشي علاش كيطلعو مربيين ماشي بحالنا التعليم كيكلخ
اسراء : يهضر حتى الشينوية ويكون كيما بغا يكون المهم نشوفو ونعنقو ونشبع منو
الدخيلة الجزء التاسع (الفصل الثاني)
محتوى القصة
التنقل بين الأجزاء