دخلات سلمات على المحامي ... كان راجل كبير بلحية بيضاء وباين عليه المعقول . جلسات دايرة رجل على رجل وقالت...
اسراء : جيت على القضية دولدي
المحامي: اييه مرحبا ... الدعوة هي هي معندك مديري حتى يدخل للمغرب
اسراء : داكشي علاش جيت عندك لهنا ... هوا قريب يجي يقدر غدا ولا بعدو ولا السيمانة الجاية المهم غيجي .. بغيت ولدي يرجع ليا
المحامي: الى دخل للمغرب غيتم توقيفه ... سواء بوحدو ولا مع ولدو .. المهم غير تهناي غيوقفوه وحتى الى داز ودخل راه غيتمنع عليه يسافر ولا يخرج من المدينة واخا معاه الولد وتما غيتم التبليغ عنه للداءرة اللي نتي مبلغة عليه فيها باش يتحل المشكل ويتسد الدوسي ميبقاش محلول
اسراء: هوا غيحبس؟
المحامي: لا ... خطف الابناء جريمة مكيعاقبش عليها القانون ... لانه ولدو ماشي بحال الى خطفو جدو ولا عمو ... هاداك الاب ديالو ... نتي غير غترجع ليك الحضانة وصافي وغتحكم عليه المحكمة يشوفو ومعمرو يخرجو من البلاد الا بالموافقة ديالك ... المهم دابا هوا يرجع
اسراء : انشاء الله ... كنتمنى نساليو هاد الصراعات ونرتاحو من هادشي .... عيت بالمحاكم وليت كنعرف كلشي فيها حتى ولات بحال دارنا بكترت مكنمشي ليها ... والكوميسارية مابقاتش كاع كتخلعني رجعت عارفة البوليس كاملين بحال خوتي
المحامي: انشاء الله يكون خير...اما ايلا مرجعش فالحل الوحيد اللي عندك هوا تمشي عندو لفرنسا وتما تبلغي عليه انه خطفو ليك وتبداي الصراعات تما باش يرجع ليك الولد
اسراء : فرنسا منقدرش نزعم فيها ... غنصبر حتى يرجع ... المهم شكرا بزاف
توادعات مع المحامي وخرجات مشات لمركز تجاري ودخلات دايرة نضاضر فرحانة ... مشات نيشان لبلاصت الالعاب والاطفال ولدات كتسول على ملابس 3 سنوات والالعاب وبدات كتهز وتشري فالحوايج وضحك فرحاانة .. شرات ملابس واحدية والعاب ودباديب بكثرة داتهم للطوموبيل ورجعات غدات اغطية ناعمة وافرشة ومساحيق وبرودوسات وكل مكيخص الطفل ومشات تقدات لوازم الطبخ و الخضرة والسلعة كااملة ورجعات للدار فرحانة ... دخلات كلشي حتى تصدمات اسية وداخت معرفات ضحك ولا تبكي
اسراء : اه يالاه راه عيطات عليا كتغوت وعلي مكاينش معاها ومكاينش اللي يهزها من الرياض يديها للكلينيك ... خوتو كل واحد فين مشا سكن و معاها غير الحاجة وسامية
علي: دااابا ربي يفرج ... والله يزي الشيطان ويتجمع الشمل
اسراء : (غلبوها دموعها) يرجع ليا غير ولدي ومابغيت والو
علي: بأسى) كن كان بيدي نرجعو ليك ... ولاكن هانتي شفتي يحيى مكيعطيني حتى خبر حيت عارفك عزيزة عليا وجيت من جيهتك النهار الاول وعارفني غنوصل ليك كلشي
هزات عينيها بترجي: غير قول ليا اخويا علي الله يسهل عليك واش مغيجيوش؟ واش مغيرجوعش راني معلقة وقلبي مرض ... بغيت غير نعرف واش غيجيو
بتاسم ورتب على كتفها: غيجيو انشاء الله غير تهناي
اسراء : واش غيجيو بجوج ولا غير خوك بوحدو
علي: بجوج
اسراء : حلف ! عندااك تكون كضحك عليا .. راه غتمشي توقع ليا شي حاجة راه عندك وليداتك وعارف باش كنحس
علي: قلت ليك غيجيو غيجيو سوا من هنا يوماين ولا سيمانة راني حاس بيك ... غير الله دابا يحيى حقد وماعرفتش علاش هاد الحقد هادا كاامل على والو
اسراء :اودي انا اللي عارفة علاش حقد ..... انشاء الله يااربي .. سير بلا منشدك انا غنرجع بحالي ... راك شفتي انا والحاجة مكنتفاهموش حسن نخوي ... هاهيا اسية معاكم
علي: لااا الى بغيتي تبقاي بقاااي ما من حق حتى واحد يقول شي حاجة وال بغيتي تجي للرياض مرحبا وحتى واحد مغيقول ليك شي كلمة ... نتي كتجي عندي انا وسحر وحنا مرحبين بيك فوق ما جيتي
المحامي : الحضانة كتسقط فحالة كنتي مريضة حاملة لمرض معدي او ماقدراش على تحمل مسؤولية الطفل او فاسدة او مختلة عقليا فهنا القاضي ممحتاجش يشوفك ومحتاج غير اوراق كتبت انكي مختلة .. بالاخص الى كان راجلك عندو معارف فراكي عارفة كلشي فهاد البلاد بالكود بيسطو والفلوس
المحامي: حيدي من هنا قبل ميشوفك شي واحد ويصورك ومعمرك تحلمي بالحضانة ... دابا غديري فحوصات انك بكاامل قوااااك العقلية وغنرجعو نستأنفو ... فمحكمة الاستأناف كاينين قضات زايدين خبرة ... يمكن هاد القاضي يالاه تخرج وجا وحكم بالزربة ... المهم نستأنفو ويكون خير
اسراء: وهي سايقة حالة فمها) التسطية بعينيها هادي ... ويييلي وحدي ... هادا غيكون رشاهم ولا صاحبو هاد القاضي ... خرودو كلشي
المحامي : لبارح كنعيط ليك نقوليك شنو كاين كنلقا تيليفونك طافي... لبارح انا مشيت حضرت للجلسة وماعندي لا ادلة اللي كتبت انكي بعقلك ... لا حتى حاجة... هضرت وعييت نهضر ولاكن موصلت لحتى نتيجة ... فاش حكم القاضي ول لبارح راه ولدك دخل للمغرب لبارح فالصباح
اسراء: انا كنت عارفة الجلسة كاينة وقلتي ليا مكاين لاش تحضري يعني غير نبقا كيما ديما كتلاقاو غير نتوما المحاميين
القاضي: ولاكن مكنتش عارف انهم جامعين عليك ادلة ديال الحماق ... مهم وقفي هنا نطلع انا وديري داكشي اللي قلت ليك باش نتبتو ليهم انكي بعقلك
اسراء: واخا ... غنمشي بعدا نبدل هادشي
نزل المحامي حدا العمارة ومشات اسراء كتفكر حايرة .. وصلات للرومبوان وهي تخرج عينيها وشدات الفران ... قلبات الفولون بالزربة ورجعات للعمارة دالمحامي شافتو طلع فسيارتو ووقفات كتسناه يتحرك من بعيد مصغرة عينسها ناوية على نية . تبعاتو حتى وصل لطريق خاوية ووقف وهي توقف بعيدة كتراقب .. نزل شاف يمين يسار وطلع فسيارة بورش سوداء وهي ضرب الفولون بعصبية وزيرات على سنانها
اسراء: ولد للحرااااااااااام ! جالس كيدخل ويخرج عليا فالهضرة !!!!
الزوهرة: اميييمتي شفت محمد امير لبارح كان غيسكت ليا القلب...هزيتو عنقتو حتى قجيتو
اسراء: الصمت
الزوهرة: تباارك الله كبر وغزاال الصلاة على النبي ... كنت واقفة كنهضر مع سحر حتى بان ليا داخل مع الباب مخلوع كيشوف فالناس ... محسابش ليا كاع واش هوا حتى شفت يحيى موراه ومشات تعرضات ليه الحاجة هزاتو ... الزين الصافي داز من حدايا بحال الى مكيعرفنيش مشا سلم على خوه علي وعلى سحر
اسراء:ساهيا) هاداك راه واحد ولد الحرام...دابا تشوفي الى كندمتو على النهار اللي عرفني فيه غا بلاتي
اسراء : هه! المحامي... (تنهدات) لقاوني مفاهمة والو وماعارفة والو وكيضحكو عليا كي بغاو ... دابا نوريهم الضحك كي داير
الزوهرة: شكون ديك البنت
اسراء: انا جبتها غير خليها ... هانا مشيت نبدل حوايجي ... الصورة دولدي قدام عيني مقدرتش نحيدها من قدامي ... ومسخوط الواليدين دي يحيى ردني حمقة باش ياخد الولد
الزوهرة: ديريها ليه على قد فمو وحماقي نييت
اسراء: هانتي بديتي تخربقي ! باش نيت يتبتها عليا وعمرني نحلم نرجع ولدي... واش السيد اعباد الله حاالف ميعطيني الولد لا بزز ولا بالقانون ونزيد انا نسهل عليه المؤمورية ... ماعارفة كاع علاش ناوي وشنو عندو فراسو وفاش كيفكر ... بحال الى عمرني فحياتي عرفتو ... رجع واحد اخر ... باغي يغرقني بأي طريقة ومكرهش يشوفني كنمون ونتي كتقولي ليا نحماقذ ! باش نبقى فيه زعما هه! ها علاش مكنبغيش نعاود ليك ... مكتنفعيني بحتا حاجة كتزيدي غير تعصبيني وتحطميني .. انا غارقة فالمحاكم والدعوات وحريرتي حريرة مابقيت عارفة اش كيوقع ... زيد عليها المحامي تافق معاه وناويين يخرجو عليا .. وانا حتى واحد ماواقف معايا ... بابا معارف مايقدم ولا موخر وسفيان واحل مع مرتو كيتسناها تولد وزعما وكلت محامي يتكلف بكلشي . ساعة طلع معايا الصبع ماعارفاهش اش كيدير واش كيكدب عليا ولا شنو كيدير
الزوهرة : اويييييلي؟؟؟
اسراء: ههيي وشنو يسحاب ليك اللعب هادا !! 3 سنين وهوا مغبر عليا الولد وحاقد عليا كيكرهني .. شافني لبارح بحال الى شاف قتال باه مكرهش يضهسني بالطوموبيل .. اودي لمن كنخبر الخبير ديالي...انا غندخل نبدل فاش تخرج البنت عطيها تاكل شي حاجة راه غنديها معايا
مشات لبسات سروال بوردو رطب واسع ومزير على الكرش وقميجة بلون كاصي خشاتها فالسروال جاتها اللبسة كلاص مع الصباط كلاص عالي وصاك لوي فيتون صدرها كبير وؤخرة بارزة فكل خطوة كيتهز كلشي ، جمعات شعرها الفازك ودارت عكار بوردو مع رسمة حوايجب وفراجو وريسيل ورشة من عطرها الجذاب ، جبدات كسوة قصيرة كتجبد وصندالة دالصبع وخرجات كتسد الساعة فيديها
اسراء: خرجات البنت؟
الزوهرة: غيضربو باباك بالعين نقصي شوية من الهزان والتعواج
اسراء: الله يعطيك الستر اماما بلا متبقاي تنكري عليا ، بااركة هادشي اللي راني فيه وكنجري فيه بوحدي ... فين فناضرك غنمشي فيين؟ غادا نشوف كي ندير نرجع ولدي ونشوف مشاغيلي فين واصلين واش حسابك خارجة نتسارا وندور ؟
الزوهرة: ايوا غييير سولناك ماالك كتخرجي فعينيك.
اسراء: هانا نقول ليك من هنا راه غنتعطل فالليل وراه عندي ميدار ماشي كنلعب ... باش منجيش معطلة تسمعي عندي الجيران
الزوهرة : اجي شوية بكري ... الناس غيحسابهم كديري شي حاجة بلليل
اسراء: ومال الناس كيجويني باش يحساب لهم!! ينعل بو العلااام من عندي يانا واش بقا لي غير الناس نزيدهم حتى هما نضرب بيهم حساب . غير اللي معندو شغل هوا اللي غيسحاب ليه اما اللي عندو ميدار كاع ميتسوق ليا لا انا لا غيري واخا ندخل فالستة دالصباح ... هانا مشيت
الدخيلة الجزء العاشر
محتوى القصة
يتبع
التنقل بين الأجزاء