اسراء: ونااري على بنادم! وصافي حطو لينا نتعشاو برامة من الهضرة ... سكينة حطي الطبسيل واجي تعشاي
سكينة: اممم بنيين متعرفي طيبي
اسراء: عاد تعلمت مكنتش كنعرف
جلسو كيتعشاو ويتجمعو بشوية عليهم حتى سمعات صوت يحيى كيعيط ليا وناضت كتجري لقاتو منعس امير على صدرو
يحيى : هاكي ديه لبلاصتو
اسراء: تعشا؟
يحيى: اه .. ديه لبلاصتو
قربات من يحيى بغات تهزو وجات يدها على يدو وهي تهربها بارتباك وهزات امير ناعس
يحيى: عطي لسام ياكل عنداك تنسايه
حركات راسها بالايجاب ومشات هازة امير ناعس داتو لبيت النعاس حيدات ليه سبرديلتو وحطاتو فوق الناموسية ورجعات بالزربة للصالون لقات غير الطبسيل وحداه جوا فيه الفلوس ... سرحات عينيها الصالونات مالقاتش يحيى ، هزات لطبسي والجوا ورجعات للكوزينة عند البنات
اسية: تعشاو ؟
اسراء: اه كلااا يا ختي حساب ليا مغياكلش ... هاكي عطي هاد الدجاجة لسام ياكلها فالبالكون وبعديه عليا .. فرشي ليه شي كاشة ولا زبية فالبالكون وخليه تما
اسية: مالو غياكلك! راه نقي ماشي مسخ ... انا غنمشي نمشط ليه ونقيه باش يبقا يدور فالدار نقي
اسراء: مهم ديرو اللي عجبكم ... سكينة الصباح سيري للمحل قابليه بحال اليوم ... انا مشيت نعس.
⛅صباح جديد و نفس الروتين . . . اسراء خدامة غير بالتيليفوز كتوصل بالاخبار ... تاصلات بالمحامية ديالها خبراتها بالمحامي الجديد اللي غيشاركها القضية ، اتصالها بالسفير مزال متداوم لاكن محاولة حادة فالعثور على جواز السفر والحالة المدنية فشلات . قرب موعد الجالسة ومزال اسراء كتصر على حادة تلقا ليها الاوراق . اتصلات يحيى مزالة مستمرة وكل ليلة كيجلس مع مع امير بوحدو فالصالون حتى كينعس ويعيط لاسراء تهزو ... علاقتهم فحدود مزالة كما هي وكلامهم قليل الا على الولد . اسراء متفادى تخرج باش متسمعش كلام جريح من يحيى، هاد النقطة كانت لصالحا وخلات انير يتعلق بيها فهاد الفترة اللي دوز معاها ... كل يوم كتخرجو تساريه وشوية شوية تعودات على سام ومابقاتش كتخاف منو حتى رجع كينعس ليهم فوق الناموسية حدى رجليهم ، الهضرة د اسية على مجيىء يحيى للدار كترات ورجعات كتقسح الهضرة مع اسراء ، اما سكينة فقايمة بالواجب ومقابلة لشغل كما يجب لاسراء وكتنقلها الاخبار كاملة حرف بحرف وكتمشي للاعراس وحاضية كلشي فبلاصت اسراء .
المحامي : هادي اهم خطوة وبيها غنبداو .. وحاولت ما امكن نقب موعد الجلسات مع بعضياتهم ... عندنا اليوم جلسة و غدا جلسة
اسراء: باه كيجي عندي ... و كنحاول نتفادى المشاكل معاه ...زعما راه عارفني رافة ظوة ضددو هوا المحامي ديالي ... مكيجبدش ليا الموضوع
المحامية: الى شهد ضددو المحامي راه غادي يتشد
اسراء : اففف... انا مابغتوش يتشد حيت ولدي متعلق بيه بزاف ويسول عليه ... مابغيتش ليه الحبس لى قبل ولدي
المحامي: هادا هوا الحل الى بغيتي حضانة ولدك ترجع ليك امدام
اسراء: واخا ... شغاندير .. معندي مندير المهم نشد الحضانة باش منبقاش تحت تهديدات ديالو
المحامي : بجدية) مستعدة؟
اسراء: بتوثر) اه
المحامية: يالاه ندخلو
دخلو للقاعة كل واحد شد بلاصتو ... شوية دخل يحيى والمحامي ديالو و علي خوه معاه جلسو فالجهة الاخرى ... دخل القاضي والمستشارين وبدات الجلسة ... كل واحد كيدافع على الموكل ديالو وكيدير ما فجهدو عل قضية النصب والاحتيال اللي تعرضات ليها اسراء من طرف يحيى و المحامي ديالها اللي كان حاضر حتى هوا ... الجلسة كانلة واسراء شادة البكية وكترعد وتشوف فيحيى بنص عين وهوا جالس عاقد حجبانو ومربع يديه كيتسنط ... خايفة يجبد موضوع الخيانة ... اعتارف المحامي بالتهم المنسوبة ليه وتحكمات القضية لصالح اسراء وربحات الجلسة ولاكن مفرحاتش لان يحيى شد بتهمة التزوير هوا والاطباء اللي شاركو فالعملية ... شافت فيه بعيون مدمعة ودار ابتسامة بكل برودة فوجها . خرجات فرحانة وفنفس الوقت مأزمة وشكرات المحامين ديالها وطلعات سيارتها رجعات للدار فرحانة ... دخلات على اسية كتجري
عبد الله : دابا الحضانة غتشديها ... حيت باه اللي عندو الحضانة تشد فالحبس و الحضانة غترجع ليك ... بما انكي ربحيتي الجلسة فهي غتخدم لصالحك فالجلسة الثانية ...
اسراء: انشاء الله ... شكرا على وقفتك معايا
عبد الله : هادا واجب الاللة اسراء
اسراء: سمح ليا غنخليك .. ولدي كيعيط ليا
قطعات ومشات دخلات للبيت وجلسات كتفكر نضراتو ليها فالجلسة وسكوتو طول الوقت ... دمعات عينها وتكات على المخدة ساهية ... معات صوت امير وتلفتات ليه جراتو عندها وعنقاتو
امير : ماما .. ماما الزوينة شوفي شنو رسمت
هزات الورقة اللي فيدو حلاتها ببطىء لقات فيها طفل صغير مرسوم الوسط شاد فيد باباه وماما وكاتب عليهم " بابا ماما انا " ملون ليها شعرها بالصفر ويحيى شعرو فالكحل وراسم سام حداهم
اسية: نااعسة جات الصباح من العرس وطاحت دودة ... غير سيرو انا غنبقا مع امير حتى تجيو
اسراء: يالاه زيدو راه مشا الحال
نزلات بمزاج معكر ظايرة نضارات شمسية ركبو ومشاو نيشان للمحكمة ... كالعادة دخلو للقاعة لقاو الحاجة وسامية وعلي وخت يحيى الكبيرة المزوجة ... شافت فيهم اسراء بنص عين وجلسو . . . بدات الجلسة وبداو المحاميين فالدفاع وذلك المحامي ديحيى اللي هاد الاخير تغيب عن الجلسة وماحضرش ليها ... دازت الجلسة فجو من الاعصاب والتوثر حتى حكم القاضي بالضانة لصالح اسراء ووقفات بالفرحة كتبكي وترعد . انتهت الجلسة وشي خرج فرحان شي خرج زعفان ، تلاقاو خارج المحكمة وناض الصدع بين الحاجة واسراء و خواتات يحيى ؛ انا الزوهرة حاولات تدخل بخيط ابيض لان بنتها مزالة عندهم كزوحة لعلي . تجاهلات اسراء الغوات والصدع وحاولات متردش عليهم ... مشات لسيارتها جلسات وخلاتهم حتى طلعو مع عليه ونزلات شيرات ليه
اسراء: علي .. انا ... انا مابغيتش يحيى يتحبس ... كن متحبسش عمرني كنت نحلم بالحضانة
علي: اسراء ... خديتي الحضانة ... وصلتي لداكشي اللي بغيتي ... حبستي خويا ودابا عاجبك الحال ... ايوا مبرووك ... وعاءلتنا ضربي عليها ختك الى بغاتك تحي عندك ... عمرك تعاودي تحطي رجلك عندنا ... ولد يحيى منا ولينا ومن حقنا نشوفوه الوقت اللي بغينا ... ولا حتى حنا باغا تبعدينا عليه؟
اسراء: لالالا بلعكس انا مابغيتش نوصلو لهادشي ... ويرضيك 3 سنين وانا فالعذاب ؟ نتوما ماحاسينش بيا كل واحد كيحس بدمو ... اما انا غير دخيلة عليكم مغيخس بيا حتى واحد
شاف فيها علي بغضب ومشا . رجعات واليديها للدار حطاتهم وبقات فالطوموبيل جالسة
الزوهرة: مغتنوليش؟
اسراء: لا غير سيرو انا عندي ميدار
ديمارت السيارة ومشات نيشان فاتجاه السجن ... جمعات النفس ودخلات
دخلات جلسات حيدات نضاضرها كتسنى على اعصابها ... سمعات خطوات تقال وهزات راسها شافتو جاي داير يديه فالجياب لابس تيشورط كحلة وسروال توني كحل وتقاشر بيضين كيشعلو وصندالة رياضية وكأنه جالس فأوتيل باقا شاعتو فيديو واسوارتو الذهبية حتى هي وسنشلتو فعنقو حتى حاجة متحيدات ليه ... جاي مع البوليسي اللي كيبان رقييوق قدام يحيى ، شاف فيها مطلع حاجبو وجر الكرسي وجلس حال رجليه متكي على الطبلة كيدور فعينيه ويدوز يدو على لحيتو وشعرو
يحيى: اش جابك؟
شافت فيه بارتباك وهوا كيقلب وجهو مكيشوفش فيها : جيت بغيت نهضر معاك
هبط راسو كشتت النضر وكيتصرف وكأنه عاش حياتو كاملة فديك البلاصة
يحيى: هضري كنسمعك
اسراء: يحيى ...
يحيى: لا رد
اسراء: يحيى انا مابغيتش ندخلك لهاد البلاصة ...
ضحك بسخرية وشاف فيها بابتسامة : دخلتيني!!! انا اللي دخلت راسي ماشي نتي اللي وداك خينا اللي كيفرق الطواجن ففرنسا هما اللي دخلتوني
تصدمات وعبطات عينيها مقدراتش شفوف فيه ... بقا ميشوف فيها بابتسامة خفيفة وكيتامل ملامحها ساعي بتفكيرو
يحيى: حساب ليك انا هبيل اسراء ؟
اسراء: الصممت
يحيى: يالاه هضري ... قلتي جيتي تهضري ... ولا جيتي تخرجيني ؟ ولا بقيت فيك وجيتي تونسيني! عندي بيتي بوحدي الى بغيتي دوزي معايا شي ليلة فيه ... شي سعتاين بحال السعتاين اللي دوزتي فلوتيل نتي وسفير الطنجية ... جاك العكار حمر زويين ... دايرة مع البطل ديالك من بعد ما تربحي الدعوة تمشي تشكريه؟
هزات عينيها ويديها كيحكو بعضياتهم بعصبية فوق الطبلة الصغيرة اللي جامعاهم
اسراء: حاشاااك...نتا بنتي ليا عاجباك هاد البلاصة وباغي تبقا فيها
يحيى : صغر عينيه ) قولي ليا اسراء انا فاش اديتك؟ شنو درت ليك حتى طعنتيني فضرهري ؟
اسراء: نتا اللي خديتي ليا ولدي 3 سنين و .
قاطعها: قبل 3 سنين اسراء ... فاش ضريتك ؟ بخلت عليك؟ كنت معاك خايب؟ ماعجبتكش؟ عاادي قولي ليا طلقني ا يحيى انا باغا واحد اخر نطلقك
اسراء: نتا مخليتينيش نشرح ليك ... قلت ليك انا مخنتكش ... وعمرها كانت بيناتنا شي علاقة
يحيى: ببرودة قطع ضفرو بسنانو) ماشي ضاروري تخونيني بجسديا ... ديجا قلتها ليك ... مجرد تهضري مع واحد غريب وتلاقاي بيه راه خيانة
اسراء: هادشي هادا علاش وليتي كتكرهني
يحيى: ماشي غير كنكرهك .. شي حاجة فووق كنكرهك .. غير تصابيتي مت ولدي اما كن شحال هادي فضيت معاك ووريتك اللي عمرك شفتيه ... الى نتي عندك عاادي تهضري مع واحد براني وتخرجي عندو و كتكدبي عليا ... راه كان خاصني نقتلك عليها
اسراء: قلت ليك نيتي كانت فشكل
يحيى: نيتك!! انا بوكيمون ؟ درتي ما بغيتي معايا وكندوز ليك دوزت ليه 20 يوم برا الدار وجلسة فالبار مع الحوالا ... وزدتيها بالميساجات مع كريم و خارجة تلاقاي بيه ... هادشي غير اللي عارف انا ... اما اللي ماعارفش يعلم الله شنو .
اسراء: يحيى ... ماعمرني ردت شي حاجة .. اه غلطت ولاكن
يحيى: ضحك بسخرية ورجع تكى قدامها مربع يديه على الطبلة) ولاكن كن دوزت ليك حتى هادي كنتي غديري عقلك . ولا كاع تلعبي لعبة كبر منها ... تعاملت معاك تعامل زويين زعما صغرت عقلي معاك ... كنتي ديري اي حاجة نسامحك عليها الى تهضري مع واحد اخر مور ضهري وتخرجي تلاقاي بيه هادي معمرني نسامحك عليها
الزوهرة: نتي اللي غادا بلا فطور للمحكمة بسيف متسخفي
اسية: هانتي تهنيتي دابا من داك الحكام الخاوي ديالو ... وحتى من داك خيطي زيطي مل ساعة جاي فارع لينا راسنا
الزوهرة: شنوو؟؟
قلبات اسراء عينيها ومشات خلاتهم
اسية: كان كل شوية جاي ... حابس عليها الخروج وكيهددها ياخد الولد ... يشبع فيها معيور وسبان يهزها بالق**** ويحطها بالق**** وحنا نجلسو نفكو .. شنق عليها تا كان غيقجها ... ولاللة غنو تا هي نزلات عليه بالفاز فكتفو تا تهرس عليه ...وناااري ياختي كي الحيط كن داز ليها من قتلها
الزوهرة: هيييه!!! كن عيطتو للبوليس ديك الساعة ... ماخفتيش يمشي يقتلها الحللوف لاخر ... اييه تخدعنا فيه ... كن حساب لينا غيوقع هادشي كولو كاع منعطيوها ليه... ولاكن فيها خير هاهيا دارت منو علاش ترجع وراه باااقا صغيرة تجيب سيد سيدو فين ... تمشي تزوج شي كاوري ولا شي سعودي كيما دارت بنت خالتها راها فالسعودية مفطحة وشارية لباها طوموبيل جديدة وصلحات ليهم الدار
اسية: وراه تا اسراء كن بقات مع يحيى مان ناوي يشريها رونج روفر ويدير ليها اللي بغات ... شتي غا بحال ديك التزويجة دبنت ختك غا بلاش منها ... مزوجة راجل شارف مزوج جوج وهي الثالتة وعندو البراهش ويزيد عليها الرابعة ... اشمن زواج يخخ كن بغيت انا بحال داك الزواج كوراه شحاال هادي تزوجت سعودي وراني عايشة فوق السلك ... بعدا بعدا اسراء راه تزوحاتو لاباس عليه وزوين مهلي فراسو معندها لا ضرة لا جوج وراجل كي العود غير الى خرجات معاه كتسنى خارجة مع راجل ختى واحد مايقدر يقول ليها شي كلمة ... لالالا اماما ماعندها مدير بشي سعودي شاارف فيه الموت ميعرف يبوس ميعرف يدير تا زفتة
الزوهرة: اش بغاات بداكشي معندها مدير بيه كيطلع فالراس
اسراء: وراه كبير اماما مابقاش صغير تبقاي تشيري عليه
سكينة: هههه خالتي زهور واش مزالة كتسلخي ولادك؟
اسية: خالتك زهور راه كدردك على ولادها ومزاااالة تحزم بالموزون وتشطح لبابا
سحر: داكشي مكنديروش انا
الزهرة: ومالي منشطح ... صافي دابا غير اللي ولد وكبر ميشطح ماينشط !
اسراء: لا ختي غير شطحي بصحتك نتي عمرك تشرفي
الزهرة: اييييه (كتلوح براسها) انا راه كنت بحال اسراء ... كنت نطلق ليييك السااالف الاللة ... ونحزم بالمزوون ونشط الرحبة ونجلس نشطح لعمك حسن هاك بالاك ... كان يعلق ليا غير بالربعالاف ... وانا هااه هااه هااه وهوا حاال فمو ... كان يقصي الغراض ويسالي و الصباح يصبح كيقوليا اري ليا الفلوس راني زوييت
سكينة: ههههههههه حلفي
سحر: وشنوو! تي راه الزوهرة هادي...شادة حسن من قرجوطتو مكيتنفنش ... الشليييحة غير كتبدا تفيبري بدوك الكتاف غير كحزي اللور
سكينة: هههه سعداتكم كاع ما كتبان كاع واش ماماكم
الزوهرة: اناا راه غير صيدني حسن غرقني فالولاد اما انا راه باااقا صغييرة
سحر: راه هي دابا مكنخسبوهاش منا كنحسبوها بحال صاحبتنا ... واخا فاش كتنوض كنهربو
الزوهرة: كيتكم ... متعرفو ديرو والو ... متشطحو مضحكو متعيشو حياتكم ... لويتو وليتو نهار ومطال شادين تيليفونات وتسبحو ... (شارت بصبعها لسحر) هادي كنضل نقوليها تهلا فالراجل وتبورد عليه و تمخمخو يرجع حال فمو ... وهي كتخشم ... حيدو عليا كتعصبوني ... غير اسراء اللي فيها الضوء شوية كتشبه فيا ... فير معرفت كي طرا هزها يحيى تا لسما وطلقها
اسراء: انا راه كيتي بالكواوي انا اللي عارفة راسي
الزوهرة: الراجل يكون كيما بغا يكون ... عطيه كرشو والشهيوات وعطيه الركيز والحلوى ميشوف لا هاك لا هاك ... ولاكن دابا تجيبي ما حسن نشاء الله ... فوقاش تزوجو كاملين نتهنا ونعيش غيير انا وحسن مهنييين ونرجعو يامات زمان ديالنا ... اما نتوما مفيدكمش بقاو تحشمو هاكو (عطاتهم الصبع)
اسية: وا هداااك ومااان وهادا زماان الحلوى راه موجووودة فين ما مشا يلقاها غير ب 20 درهم مكمشة ياكل الحلوى حتى يشبع .. ماشي بحال شحال هادي كان أيلى متزوجش ميدوقهاش والى بغا الحلوى يقلب عليه بالريق الناشف ميلقهاش .
الزوهرة: نتي طفريه الاللة وسيري شوفي ليك شي ولد الناس تزوجي باااركة عليك من الدوران
اسية: ولد الناس لقيناه!! ها حنا بالخدمة بالنانضة ودافعين فالدار ومالقيناش الراجل ... اللي عرفتو نهار لغد ليه يقوليا الدار ... مكاين لا معقول لا ستة حمص
اسراء: المعقول فالحبس
اسية: لا عسااك ... غا اللي تلاقيتو فاللول كيبين ليك درويش ويقول ليك المعقول ... شوية يالاه نتعارفو وناخدو راحتنا .. ولا نعيط ليه ويقول ليا انا فالدار دوزي عندي !! حتى واااحد مجبد معايا المعقول وهاناا الحمد لله مناقصني والو موضفة فالبنكة واللي تلاقاتني كتسولني واش مزوحة منقولها مزال كتقوليا .. تأ ! ايوا غزاالة تبارك الله ومزال متزوجتي! ... وا حتا نلقااه بعدا والعيب والعار الى قلت لا ... شي طامع شي باغيني نخدم عليه و واحد عارض عليا ول لبارح فالقهوة حشا ليا الصبع وزاد
سحر: مالك ؟
اسية: عرض عليا للقهوى وبقييينا كنتجمعو وطلبت انا حلوى وعضير وهوا قهوى .. شوية جلس عليا بالمسااوات ما المساوات والديموقراطية وهاظشي كاااامل باش فاللخر يقول ليا حقا المساوات وكي لمرى كي الراجل ... وقالي نخلص قهوتي وخلصي نتي عاصيرك وحلوتك .. المساوات قالك
الزوهرة: ماعرفت كي دار لها حتى دخل فيها سرسب داك الزاج اللي على برا كاامل خرجوها كولو مجرح ... هادا غا نهار وشوف اش دار .. تا باه اللي عاطيه الطونوبيل خصو العصا... وسروو نييت يخلص الزاج كاامل للبنكة باش عمرو يعطيه السوارت
اسراء: عياااط عليا وسيفطت ليه الفلوس فك الجرة ... 2 دالمليون اللي خلص على داك الزاج اللي تهرس والباب ديال البنكة ... يحمد الله اللي مضربش شي واحد فوسط ديك البنكة اما كوراه دابا فالحبس
الزوهرة: خلييه .. سروو ... مانظي ليه قفة ما ندي ليه خنشة .. بو المصايب كل مرة جايب موصيبة حديدة ودابا قالك نبيعوها ونشريو وحدة اخرى
اسراء: هاد المرة غيطلع بيها فوق السطح دالعمارة ماشي فالبنكة . انا غير متعيطوش ليا نسيفط الفلوس
الدخيلة الجزء 14
محتوى القصة
يتبع
التنقل بين الأجزاء