قصة المصخوط

تنتفكر واحد درس دلفسفة هل يمكن معرفة الغير.. بصراحة راه ميمكنش تعرف بنادم شنو مخبي عليك ولا علك ولا كيف داير هو حيت ببساطة بنادم تيبغي يخلي عندك ديك صورة زوينة باش نهار يحتاجك فأي حاجة متقدرش تقولش ليه لا.. متنقولش هادشي باش نبان عميق ولا شاابع فلسفة وا انا بصح عميق ولكن لمهم غندوزو وقيتا مع بعضياتنا وغادي تفهم شنو بغيت نوصليك فدوك سطورا لولين ولكن قبل منبدا بغيتك تقرا بشوياا تخايل راسك نتا لي واقعليك هادشي وفكر شنو كنتي غادي دير.. عطيني من وقتك شويا مدخلتي لهنا حتى عندك شويا دلوقت انا كنحتارمك بعدا حيت مزال كتقرى فهاد لوقت قلاال لي تيقراو وقلال لي تيكتبو😁 لمهم نقولو بسم الله لإسم دبا تعرفوه من بعد باش نعاود ليكم داكشي لي جاي على ودو خاص نرجعو سنييين لور حليت عينيا فبلاصة بعييييدة على لمدينة مكانتش عندي شي حاجة لعبة ندوز بيها لوقت(معندناش فين نتلاهاو☺) مع لعلم لواليد كان فوق فوق لبيخير لواليد كان عندي بحال شي فرعون بالنسبة ليا يقوليا غتفيق مع 3 دليل تخدم غادي نفيق ومنعاودش معاه لهضرة ماشي حيت غيدير ليا شي حاجة ولا يضربني ولكن أنا كابر هكداك يمكن حيت هو لي بقا بعد ما مشات لواليدة داكشي علاش منقدرش نخصر ليه هو بعدا تحمل لمسؤلية ديالي هادشي علاش من صغري وأنا متندير لحاجة تا كندورها فدماغي مزياان خاص نحمر ليه وجهو كيف تيقولو كنت تقريبا لوحيد لي تيقرا فداك دوار كامل بنادم كتوصلو ورقة ديال ضو تيجيبها ليا نقراها ليه وهادشي كان كيفرح لواليد تيقوليا خليك بعيييد على لخدمة ديالي وفدار كاس متغسلوش قرا قرا تيجيبلي جورنال كل نهار تنقراه ليه لمهم خالقين سعادة لواليد كان سقف ديال لأحلام لي عندو ليا انني نولي شي جدارمي تلقاه كان تيحلم بيها فنعاسو لمهم وصلت لإعدادي وكانت لإعدادية بعيييييدة وهو ياخدلي موطور بيكان كان بيكان بعزووووو أصاحبي بحالا مدخل ليهم ليوناردو ولا طايماكس لمهم تال دبا بيخير لواليد فوق رجولة وتانا داير بالي مع دراسة كل عام بعامو لقراية وداكشي حيت اصلا معندي مندير حتى من تلفازا مكيناش فدار سو مكين غير دراسة لواليد فاش تينزل لمدينة تيجيب ليا شي كتاب.. دار كانت مقابلاها واحد سيدة كبيرة كتسكن حدانا ميت ليها راجل كان لواليد تيخلصها معرفتش شحال لمهم تيخلصها أنا قلييل فين تنشوفها تنحشم كانت لحشمة نعامس تنشوفها تنقلب طريق.. واحد صباح عمرو يتنسالي نعامس فايق نااشط لعطلا بدات وكنت ناجح فالكطريام وفرحاان حيت عارف غادي نمشي ليسي فلمدينة وغنسكن تما وأخيرا انعيش بحال ناس لمهم فايق بكريي وأنا نسمع شي أصوات فشكااال عمرني سمعتهم وديال مرا غادي لكوزينة وهو يباليا لواليد وديك لمرا باش شفتهم باش داير راجع لبيتي تراه تنحلم شيطان لله ينعلو لا حول ولا قوة الا بالله تكيت ففراشي والله ما كنحلم هادشي بصح وفلكوزينة وصباااح بكري هادو ماشي يهود دبا قلت زعما نشد شي كتاب تا يساليو والله ما قديت نقرا شي لعبة دماغي تشوكا لواليد ومعاامن يا حصرى سالاو وبقيت فدار واحد نص سااعة تا ضربات 8 عاد خرجت لقيت لواليد خارج من دوش لساني تقال عليا وهو يبقى تيشووف فيا خفتو لا يشك فشي لعبة قلت ليه بصحة قاليا لله يعطك صحة نظافة أولدي راه من الإيمان يا واد يا مؤمن😂 بركنا تنفطرو وتيدوزلي دمغة غير بزز كتوحل يا خويا لواليد صدمني فيه دياال بصح هو عيبنا واحد ولكن ماشي ديك سيدة وماشي فلكوزينة وماشي تا فداك صباح خويا فداك صباح ولبرد تنخاف نحيد رجلي من تقاشر.. باركين تنفطرو وهو يقوليا بلي غادي يمشي لشي موسم مع صحابو وأنا انبقى فدار مغنمشيش معاه قلت ليه صافي وبصح سيمانة لي موراها مشا وقبل ميمشي خدالي تيليفون باش يبقى يعيط ليا بقات ديك لمرا تتجي لدار عاااد زدت وليت تنحشم نشوف فيها تنبقى نسمع داك صوت لي كدير فودني تضرني خاطري والمشكلة تنعرف ولدها نخاف غير ندوي معاه وتملص ليا شي كلمة.. لمهم من بعد ما مشا لواليد بقيت أنا غير خارج داخل فداك تيليفون مخليتش شي لعبة مدخلتش ليها حفظتو ديال بصح وطبعا لحاجة لي مكينش لي مدارهاش تتبقا تخربق فالأرقام ديال تعبئة زعما غتجيبها شي نهار هيا هاديك.. لواليد مكينش لملل ديال بصح خرجت لأرض ديال لواليد تنسركل ولعشيا ضلام بدا تيطيح وعينيا فتيليفون وصلت لحدا واحد لبير عندنا متيجبدوش منو لما حيت موسخ دايرين واحد أخر هو لي خدامين بيه من شحااال هادي.. ودايرين واحد لخشبة دايزا من فوق لبير.. شنو قاليا شيطان نوض تصور فوق داك لعود درت لتيليفون ديك لعيبة ديال لوقت دقيقة وغادي يصور قاديتو ومشيت تنجري فوق ديك لخشبة شوفوني مغامر مصور فوق لبير باش واقف محسيتش براسي تا خوا بيا داك لعود لقيت راسي غادي طايح فلبير عرفتي شحال ديال لمسافة طحت ومنزلتش نيشان تنضرب فلحاشية محسيت بوالو ديك ساعة مع لخلعة ومفاهمش شنو واقع ملعقتهاش مع لحجر ولكن ضربة لي ضربتها فلما لتحت كانت مقووودة حست بلعافية شعلاتلي فضهري كين شويا ديال لما بعدا كالا عليا شويا دقة طحت على شي لعبة قاصحة لعقتها فرجلي زهر كيداير بقيت غير تنشوف فضو لفوق عاد فهمت شنو وقعليا وقفت لما واصل ليا لنص ديالي وكامل دم أوديي وهادي هيا لفارة يا ختي كنا بااركين تا شوف فين ولينا تنقلب فراسي بعدا راه واقف ممهرس ما والو.. كما قلت قبيلا لبير مخدامينش بيه يعني الا مت هنا مكينش لي غيسيق ليا لخبار ولواليد ديما تيقول غادي يسدو وتيعڭز يعني غادي نبقى تما تا تقوم ساعة خاص نطلع تنقلب على شي حاجة نحط عليها رجلي باش نطلع وهيا تباليا خنشة كبيرة منعرف شنو فيها حطيت رجلي عليها غادي مقاتل ولموت دياال لخلعة شاداني ضلام بدا تيضيح مقديتش نطلع لعقتها فركبتي تا بديت طالع و طحت تنقلب على شي لعبة تحزم ركبتي وغنطلع كينا غير موت وحدة نموت ومنباتش هنا بانلي لبلان فديك لخنشة وخا فيها واااحد ريحة خاااانزة باش خليتها وهيا تخرج واااحد ريحة وكينا بلاستيكة كحلا لوسط باش حطيت يدي عليا حست بكمارة ديال بنادم معقلتش كيفاش طلعت بحال شي مصطي وصلت لداك لعود عنقتو وطلعت نسيت تيليفوني بالخلعة دخلت لدار من لباب ديال جردة نيشان لحمام تنشوف فلمراية وليت بحال شي كلب تنقلب على تيليفون باش نعيط على لواليد تفكرت بلي خليتو تما غادي نجيبو وكنقفقف ضلام طاح ابن عمي تنصوني عليه مكيجاوبش مشغول مع داك لموسم خرجت تنجري لعند واحد جييران لقيت غير ولدهم فدار تقريبا قدي فلعمر قلت ليه راه لقيت بنادم فخنشة فلبير متيقنيش تنقوليه شوف حالتي كيدايرا راه بزز باش طلعت قاليا تسنا دخل كنتسنى فيه وتنقفقف بالبرد ولخلعة وهو يخرج هاز بيل وحبل قاليا وريني فين نتأكدو بعدا ديتو لتما سيد عندو قلب ديال لحديد ربط لحبل فالعود ونزل انا شاد ليه من لفوق وضلام أنا لفوق وغنموت بالخلعة عاد زيد هو لي نازل تيباليا وصل قاليا جر لعندك لحبل تنجر فيه خفيف شويا عرفتو ربط لخنشة تنجر وتندور فوجهي لا تخرجلي شي حاجة ساط رابطها فلحبل خرجت لخنشة ولحتو ليه مقديتش نقيص داكشي تسنيتو تا طلع تيحل ديك لخنشة انا بعدت ريحة خاانزة هاد لولد حرشش ديال بصح من داك نوع لي تيفطر بالبن والحرشة قاليا من شعر باينا مرا خونا داير فيها شرطة لعلمية قلت ليه يلاه نعيطو على جوندارم قاليا صبر راه كين وراق ديالها هنا اجي نتا لي قاري باش نعرفو شنو نقولو ليهم قلت ليه لا نتا جيبهم لعندي اخويا وهو يجيبهم ليا وراق مباين فيهم والو ولكن لكارط مغلفة بالبلاستيك باقيا لكتبة باينا تنضرب على سميت شفت فيه هادي سميت لواليدة؟! قاليا كيفاش واش متأكد تراه سميتها هادي قاليا سير بالموطور عيط على جوندارم أنا غنجمع بنادم قلت ليه خويا غنولي داير شي كسيدة سير راه لموطور فجريدة هزو سير نتا.. مشا وأنا نوقف حدا واحد لحيط وداير ضو لخنشة كنتسناها تحرك ولا شي لعبة تخرج من لبير زعما تكون بصح هيا ولكن لي تنعرف أنا هيا مشات وزوجات فشي مدينة أخرى وديما كان تيقوليا لواليد راه سولات ولا سلمات عليك وصلو جوندارم عاوتليهم شنو وقع بضبط دنيا ترونات بنادم وجوندارم اول حاجة دارو هيا سولوني على لواليد داوني لصبيطار بقيت مع واحد طبيب تنعاود ليه شنو وقع عمرلي لحمي بالغرازي جاو جوندارم هوما لي داوني نيشان لكوميسارية أنا تخلعت تنقول غيديوني لحبس حيت لقيتها مزال مفاهم والو بركت مع واحد لكوميسير فلبيرو ديالو قاليا تشرب شي حاجة؟ قلت ليه والو بغيت غير نشوف لواليد قاليا راه سيفطنا لي غيجيبوه قاليا شنو كيعاود ليك باك على مك قلت ليه داكشي لي كاين تيقوليا راه مشات تزوجات وديما كتسول فيا وكتسلم عليا.. وهو يخرجني برى بقيت بارك بالحوايج لي طحت بيهم مقطعين وساردين وحااالة ديال ليهود لي داخل تيبقى يطلع وينزل فيا.. نص دليل عاد جابوه لتما تيشوف فيا وتيسولني شنو وقع مخلاونيش ندوي معاه دخلوه لواحد لبيت وهو يخرج عندي لكوميسير تاني قاليا واش كتعرف شي واحد فعائلة ماماك تبقى عندو؟ قلت ليه لا تيقولو معندهاش ولكن كينا عمتي قاليا لا منقدرش نخليك عند شي واحد من عائلتو.. قلت ليه شنو واقع؟؟ أنا فاهم شنو واقع ولكن بغيت نسمعها من عندو حيت تمنيت نكون أنا غالط قاليا لي عارفين تال دبا بلي هاديك لي كانت تما راه غالبا غتكون لوالدة ديالك وباك عندو شي علاقة بالموت ديالها..