المصخوط الجزء 19

ديك ساعة مكنتش عارف راسي راه مقودها ديال بصح تنضحك ومخايف موالو لخويلة ودرب دصحاباتها ومعارفها ومعتبتش برى لكوميسارية تال لعشيا قالت ليا بلي متقدرش تخرجني غادي يحولوني لبلاصة أخرى تا ندوز من قدام لوكيل بقات داويا متنفهمش أنا فداكشي قلت ليها مديريش فبالك عادي دبا تخرجيني أنا عارفك.. داوني لحبس أخر هدا فيه بنادم معمري وصلت لداك سطاج حدي لكوميسارية تدعقت فداك لحبس غير بارك لملل أنا الا متحركتش وقريت وتفرجت فشي سيري ولمزيكا را كيدوز نهاري تقييييييل ولكن لقيت حاجة أخرى ندوز بيها لوقت كنشوف فبنادم كنقرى ليك بنادم وكنسول على كل واحد شنو داير باش ملي نخرج نكتب عليهم شي كتاب اندير لبوز كل نهار تنقصح وجهي وتنقول لشي واحد صباح لخير وتندوي معاه أول واحد دويت معاه واحد ساط معايا فنفس شومبر خونا قريب لعام وهو كيتسنى ينطقو ليه بالحكم فشي جلسة ساط كان مقصر هو وصاحبو وجايبين وحدة مدابزين شكون أيمشي معاها لول ضربو بقرعة ديال سبيسيال صغيرة قتلو هههههه وديك بنت ناس أصلا مزوجا سافر راجلها قاليها شيطان ياانوضي نوضي خرجي أول مرة ليها شوف فاش طاحت تاهيا هاد راجلها هو لي يقول أنا شريف وجات معاه أخويا.. واحد مشا لقبر ولأخر لحبس فكروني فداك لولد لبرازيلي مع ديك لبنت لي دايرين لبوز هاد لأيام لمعنى لحقيقي ديال أخر نكحة للمرحوم لا حول ولا قوة الا بالله لا دنيا لا أخرة.. ساط طلع دماغ كان غادي ياخد دكتوراه ديالو داك لعام غا زيغة وتبرهيش لي داروها ليه مبقاش عندو تا لوجه باش يشوف والديه تيجيو ومتيخرجش لعندهم واحد سيد فشومبر لي حدانا كيبان من داك نوع لي هاز لخيخ ديال دنيا فدماغو غادي يبقى يعاود ليا تا نخرج وميكملش درت ليه دخلت ديال لهنود كان واقف وأنا نقوليه خويا بحالا فايت ليا شايفك فشي قاليا موحااال 4 سنين ونص وأنا هنا ديك ساعة شحال كان عندك؟ دار ليا قمعة ديال لكلاب يمكن سمعني كندير لإحصاء لمهم موراها بنهار كنت غادي كنسرح فرجليا وهو يعيط ليا مشيت عندو قاليا شنو جابك هنا مبيناش ليك فوجهك دير شي حاجة خيبة بقيت كنشووف فيه واش من نيتك راه واقيلا خاصك نظاظر أساط شوف وجهي كيداير شوف مزياان بحالا خارج من فيلم ديال رعب بقى كيتفلسف عليا داك نهار مسكتش أنا كنت عارفو هو لي غادي يقتل ليا لملل فلعشيا وهو يقول للي معاه فلبيت يتبادل معايا لبلايص قاليه راه أنا من عائلتو ساط مقدرش يقول لا كيحتارموه هو لملعق ديال لحبس فليل مدانيش نعاس داوي معاه وفنفس لوقت حاضي معاه إلا شرف يا أعداء الله ليل كامل وهو كيسول فيا كيفاش دخلت لتما زعما كنت معول عليه هو يعاود ليا طلع سيد عارف كااع لي تما بحال صباع يديه دار لقدية ديالي قبل ما نبدا انا نصوم رمضان واقيلا عاودت ليه لبلان ديالي تا دخلت لتما قاليا بعدا راك غادي تخرج وتلقا فلوسك تضوبلو واش عارف شحال ديال صرف غادي يتزاد قلت ليه ولكن حرام وهو يطل عليا من سرير لفوقاني قاليا اتعاود تقول حرام انزل نكويك كلشي حلال فهاد لبلاد الا كنتي اتصدق بيه متنسانيس.. وبدا كيعاود ليا على صحابو لي برى ولعاقة وكيفاش صرف كيدور خونا فينما درتي معاه تيدور معاك وليت كنقول يا ربي نبقى واحد 3 شهر ناخد غير نص ديال داكشي لي فدماغو ونخرج.. قلت ليه زعما شحال يحكمو عليا نقدر نخرج قاليا معرفتش ولكن موحال واش تخرج على ما عاودتي ليا لي ضربتي فدار دفاع عن نفس معروفة ولكن لي كانو غادي خارجين حاجة أخرى وقلتي بلي جيران كانو كيشوفو ها شهود بلي كانو خارجين.. نتا وزهرك طلب طيح فشي قاضي حنين وقلب على شي محامي نيت.. معقلتش امتى داني نعاس ساط بقى داوي معايا تا نعست بحال داكشي ديال لڭور وقصص ما قبل نوم(تماما بحال هادشي لي كندير معاكم انا دبا😂😂) لغد ليه وهو يفيقني قاليا نوض ليوم زيارة إلا كان غادي يجي عندك شي واحد خاصك توجد راسك من دبا لماكينا ديال حسانة تحت سرير ولحق عليا تفطر.. شفت وجهي فلمرايا هو هداك أصلا غير لخويلة لي غتجي مشيت فطرت عارف لخويلة غادي تجي وصلت لوقت تيعيطو على بنادم كنتسنى سميتي والو مجاتش يضرك خاطرك سيمانة وأنا كنتسنى داك نهار باش نعرف امتى غادي نخرج وشنو وقع رجع بنادم خونا تا هو رجع كاع ولاد ناس لي راجعين هازين شي لعبة فيديهم إلا هو كيما خرج كيما رجع قلت ليه كيفاش بلانك قاليا لخوادرية صغيرة أنا محرم عليها تجيبلي شي حاجة مكنحملش هاد لقضية أصلا كلشي كين هنا لي بغا يشوفني يشوفني ونتا شفتك مخرجتيش كاع واش مجاتش خالتك لي قلتيلي عليها كنت باغي نشوفها زعما.. أول مرة نشوفو كيضحك نشط فاش شاف ختو مبغيتش نرجع ليه صرف واحد شويا وهو يبدا كيضرب لحيط قلت ليه شنو كدير سخنتي سخنتي؟ وهو يباليا تيبكي جريتو بزز ساط صحيح.. هرب ليه قلت ليه عماد زعما نتا مول لعقل فهاد بنادم كامل لي هنا برد أخويا شنو واقع؟ وهو يبدا كيبكي معمري شفت شي واحد كيبكي هكداك خليتو بوحدو واحد شويا عاد رجعت قاليا 4 سنين اخويا ميجمعها غير لفم خليت ختي كتقرى ف تامنة دبا غادي تزوج وأنا مزال هنا.. ملي شفت هاد خونا بدماغو وعقليتو وهضرتو كيبكي ومصبرش عرفت بلي معمري غادي نصبر ولا نولف ديك لبلاصة كان كيضحك معايا غير باش ينسى شويا سولتو شنو درتي باش دخلتي مبغاش يقوليا تاني بقى كيدي ويجيب فلهضرة تا واحد تما معارفو لاش داخل لمهم صحاب لوقت كيعاملوه فشكل على لأخرين لي تما هادشي لي خلاني فلول نقول بلي ملعق نهار موراها تيقولو ليا لمحامي ديالك باغي يشوفك داوني لواحد لبيت لقيت لخويلة عنقاتني وهيا تبدا تبكي بدينا تاني قلت ليها مخلي بنادم بنادم كيبكي لهيه بلاما تزيدي تا نتي محسسيني بلي خاص نتعالج معنديش دموع واقيلا دمعة مكطيحش.. قلت ليها امتى غادي نقدر نخرج؟ شنو وقع لهادوك خوتنا؟ قالت ليا معندك ما تسمع والله.. لي ضربتي برى ماتو فدار ولول مات فصبيطار يوماين دبا سولتها امتى غادي نخرج تاني بقات كدور فلهضرة وتقدر تكمل قرايتك هنا وتخرج بديبلومات مزيانين عاودت سولتها قالت ليا نكدب عليك را كتشوف فواحد 15 عام لي ضربتي على برى.. نفس لضهرة لي قال ليا خونا مبغيتش نبين ليها بلي ديك ساعة كانت أقود ساعة فحياتي قلت ليها ديك ساعة شحال غادي يكون عندك؟ موحال غتكوني متي واقيلا!! بدات كتضحك ديك ضحكة لي بدموع ديال شي واحد ماتليه شيحد عزيز عزيز عليه مكتعرفهاش واش فرحانة ولا كاعيا قالت ليا نتا هو نتا غادي نخرجك من هنا والله وخا نعرف نبيع تا حوايجي لمهم غادي تخرج قلت ليها ديري معايا بحال داكشي لي كديري مع أي قضية عندك متخرجيش على راسك أصلا أنا مزال صغير وكما قلتي غادي نخرج من هنا بشي حاجة غير لبارح جيتي لدار لي كنت كاري ودبا قراب لعام لوقت كيطير أنا زعما كنصبر فيها وهيا كتزيد تدير ديك لبكية لعجيبة قالت ليا أاه تفكرت سلمات عليك آية باغيا تجي تشوفك..مرحبا غير إلا جيتي لمرة جايا جيبي شي mp3 وليزيات ديري فيها كاع دياسك لي فتيليفوني ولبيسي وفورماطيهم صافي متجيبي ليا تا حاجة أخرى كلشي كين هنا.. رجعوني لبلاصتي مدويت مع حتى واحد نيشان ضربتها بوااحد نعست أنا ماشي بحالهم مكنبكيش أنا كنعس مغادي نخرج تا نفوت 30 عام كنت انا سباب لواليد تا دخل لحبس ومات يمكن هكدا كنتعاقب كل حاجة درتيها عندها رد فعل.. بلاما نبدا تاني داوي مغاديش نسكت وكيباليا طولت عليكم ليوم...

يتبع