صورة مصغرة لـقصة قدري أن أحبك

قصة قدري أن أحبك

بقلم غزلان ش
رواية قدري أن أحبك

القصة كتدور حول شخصين بطبيعة الحال مختلفين من حيت الشخصية و وسط العيش ، غيتلاقاو بطريقة ماشي عادية الشي لي غيولد طاقة كلها كره و استبداد ما بينهم .. و هادشي غيدخلهم فسلسة من الشجارات و صراعات البقاء للاقوى 😂😂 كولشي هادشي حتال دابا عادي و مكرر و لكن غنوظف هاد الامور بشكل جديد و بوصف للامور الخفية لي كتوقع الداخل باش نبدلو الروتين... غتكون شخصيات واقعية بعيوبها و بمميزاتها .. كيفما عودتكم .. كل شخصية عندها حقها و دورها فالوجود ... هاذ البطلة غتوقع فمشكل مع البطل لي غادي يخليها تدفع التمن ديالو بطريقتو ... و هاد التمن لي غتخلص غيطيحها فمشكل اكبر من هاذا و كولشي فطابع مهزلي و مسخري و كوميدي تماما بحال طوم و جيري غتكون قصة تحفيزية و ملهمة مخلطة كيف العادة ... مهم اشمن نوع من المشاكيل غطيح فيهم ؟ و شنو ردة فعل البطل الشرير ؟ واش غيخرجها منها و لا غيكمل لي بدا ؟ 
كولشي هادشي غتكتاشفوه مع تقدم الاحدات ...

👑👑👑
في سيارة فارهة ... مجموعين شلة ديال الدراري ...4 ديال الشباب مجمعين على الضحك والتقشاب و مقصرين ..شي شاد غارو و شي كيشرب ريدبول... قال واحد فيهم ...
فؤاد جالس بالمقعد القدام : وعلى سلامتنا منين رجعتي اصاحبي الشلة والو بلا بيك 
ايرتان فالمقعد الوراني لايح رجلو القدام وكيشرب : هههه كون مابزز عليا الواليد واماصراتش الوالدة واللهما نرجع. .. 
عز حداه : وراه نيت مكاين مايدار هنا ماشي بحال أمريكا... الزهو والتقشاب و الدريات. .. و نااري على دوك الأيام 
اشرف القدام: نعاودوووهم علاش لا... 
ايرتان بانت ليه كاميرا صغيرة وحوايج محطوطين حداه... 
ايرتان : لاش هادشي ؟ . 
اشرف: كنصيدو كلبات الفلوس ههههه 
ايرتان : ?? gold diggers bro هههه من نيتكم باقين كتلعبو هاد اللعب.... زعما ماغاديروش عقلكم ؟؟ 😏😏
دارو عندو ب3 حالين عينيهم بصدمة ... 
ايرتان شاف فيهم وقال: زعما بينما رجعت 😏
تلاحو كلهم لور كيتلوااو بالضحك
عز: لا واش دابا من نيتك نتا لي كتقول هاد الهضرة هههه.. 
اشرف: نتسناها من كولشي. ..إلا القائد فتاحراميات و تاشلاهبيت 
ايرتان : هههههه صافي رجعت. ..مكاين غير ضرب وهرب 😂
رجعو تاني لضحكهم وكل واحد شاد كرشو كيضحك ....
فؤاد: وا هي لا درتي لينا الافتتاحية ديال هاد العشية بشي تطليعة... ديالولك كيطلعو مصروعين... 
عز: عندو الحق... نوض نشطنا شوية... 
ايرتان: حيدو لهييه... هههه هاك هادي بعدا *عطاه مشروبو *.. *هز الحوايج كيشوف* واش هادشي لي كاين ؟؟
عز: اه 
اشرف: مزيانين هادوك باش نقتلو لمهم الأمل فالأول... 
ايرتان: صافي واخا... هههه نااري الهربة مع هاد الشراوط... 😂😂😂
🎬 بعد لحظات 🎬

خرجات رجل لابسة صندالة ديال الجلد رجالية قد الفلوكة خارجين صباعو منها ... و حنا كنطلعو بانظارنا لابس سروال التوب ازرق مقزب .. نزيدو نطلعو شوية لابس قاميجة نصف كم صيفية حمرة عامرة بورود زرقاء خاشيها وسط السروال و مطلعو لحد كرشو و داير سمطة..هاد اللبس مأترش فجمالية هيئة جسمو لي متوسط البنية ...نزيدو نطلعو مزال... بان وجه ضاحك ضحكة غبية بنظارات الشوف مربعين كبار فوق عيونو العسلية و تولالة وسط الحنك كبيرة وخارج منها الزغب... والشعر الأسود مفروق فالوسط ومملس بالدهنة .. جبد لحيتو ملس جوانبها... و برمهم و دار ايديه فجيابو شي لي خلا السروال يتزير عليه و يبانو عضلات فخاضو. .. غادي كيتمشا وكيصرفق بصندالتو... مخلي وراه 3 الأجساد طار ليهم الفريخ بالضحك. .. الشيء لي لابس و طريقة مشيتو وديك الابتسامة الغبية على وجهو زيادة على داكشي لي غيدير ... خلاهم يجهلو بالضحك 
عز: هههههه طيرني ولد الكلب 😂😂😂 
اشرف: تاورق السكانير خدام دابا... 😂😂 
فؤاد: زيدو نتبعوه...😂😂

ايرتان غادي فشارع وسط المدينة الزحام والدنيا عامرة ومخلطة وكيشوف: مممم اش غتطلع لينا القرعة اليوم...
دازت عينو على شلااا بنات ... الطويلة القصيرة الشهبة و لي شعرها كحل ... لابسة معري ولا مستور ... كاجيول و لا كلاس... كولشي داز على عينو. .. ولكن مابانت ليه غير وحدة فواحد القنت واقفة عاطياه بالظهر شعرها كحل و كورلي كتييف و مبعتر مطلوق و طويل وعامرة شوية ... لابسة دجين أزرق و شوميزة صيفية بيضاء و صندالة بيضاء ومعلقة ساكها فجنبها شادا تيلي فودنها غادية جايا. ..
ايرتان طلعها من راسها لرجليها ابتسم ابتسامة جانبية برم لحيتو وتقدم ناحيتها والدراري مخبيين كيطلو ورى واحد الحيط 
عز: شوف راه ضرب على ديك الشهبة مولات المينية الحمراء ... ههههه ناااري غيصرعها الى صدقات ليييه 😂😂😂
فؤاد: وايييه 😂😂 ... 
اشرف : توما ورقو ليا عند من مشا 😡 
عز: what the heck 😂😂😂😂😂😂😂
... تقدم اييرتاان لناحيتها و حط ايدو على كتفها وقال...
ايرتان :سمحيلي ليا الآنسة 
دارت عندو بسلو موشن ... طار شعرها الكتيف فالهواء بان وجه بملامح لطيفة عيون سوداء مرمشة و دايرة نظاظر الشوف كبار شوية مغبرين وجها و لاحظ نميشات خفاف على نيفها و شوية على حناكها... 
هي شافت داك المنظر لي كيجهل بالضحك و جمعتها بالزز حفاظا على مشاعره وقالت. .. 
..... : نعم اخويا... 
هنا الدراري شعلو الكاميرا كيصورو. .
ايرتان: شفتك واقفة بوحدك. .. وصراحة عجبتني و قلت ندوزو شي وقيت هنا فشي كافي نتعرفو على بعضياتنا. .. اش بان ليك ؟
.... : *طلعات فيه وهبطات و قالت بحرج* ااه؟! ... سمح لي ... كنتسنا خطيبي يجي 😯 
ايرتان: غير فكري مغتندميش. . 
.....: لا اخويا شكرا ... 
ايرتان: واخا سمحي ليا على الإزعاج 
.....: ماشي مشكل ☺☺ 
دار غادي كيتبسم نصف ابتسامة داز على الدراري زربان وتبعوه كيضحكو ووقفوا حدا اللوطو وهو كيقلع الحوايج 
فؤاد: دابا مالقيتي غير هاديك ... خليتي شحال من وحدة زوينة ومتوتزة بحال الشهبة لي كانت فجنبك مشفتي غير ديك العوجة 
ايرتان: ههه ماسوقكش هاديك باان ليا فيها البلان... مهم مرأة... و طلقوني قبل متمشي ...
عند البنت لي منين مشا شدات تيلي كتعيط لشي رقم: اوووف فين مشى هذا ؟ وا جاوبني ....اوووف الفقصة... 
دارت مع الدورة وقفات قدامها اللوطو. .. بعدات من الطريق و رجعت لور... وهي شادا التيلي كتسنا شي حد يجاوب. .. و مشات جلست فالكرسي لي تما ومرضاتش البال لايرتان لي كيحاول يقرب ليها و يخليها تشوفو... 
تعصب حيت ماداتهاش فاللوطو لي فينما يدوز بيها قدام شي وحدة كتبقى متبعاه. .هادي شافتها المرة الأولى مابقاتش شافت جيهتها مزال و غير ملاهية مع تيلي ... 
تقدم وجلس حداها باش يلفت نظرها.. وهي شادا تيلي ... ضرباتها ريحة رجالية عجباتها... لاحت طرف عينها تشوف شكون جلس حداها غير بطرف عينها بلا متدور راسها و هي تحوال ليها العين بقوة التعصار و هي تنفض راسها يمين و شمال ...فشلات تشوف وجهو .. ولكن قدرات تشوف غير التحت سروال دجين زرق مقطع و برودكان دين فالموطارد ... عرفات من لبسو وريحتو ولد الفشوش. .. رجعت من سهوتها للتيلي ديالها. .. 
قشعها بلي دوزات عليه السكانير ضحك ضحكة جانبية و رجع راسو لور شير لصحابو وغمز ليهم.. و حنحن و قال ... 
ايرتان: انسة سمحي ليا بغيت نسولك. .. 
استغربات منين عرفات الكلام موجه ليها.. اكييد واحد بحالو شنو لي غيخليه يجبد معاها الكلام ... هزات راسها فيه شافت شخص وسيم عينيه عسليين و لحيتو عامرة و مسرح شعرو باناقة لور و لابس تيشورت فالاسود و جسمو منسجم القد بتفاصيل متناسقة.. شكلو ما اترش فيها و جاوباتو قائلة: تفضل 
ايرتان: أنا عمري جيت لكازا اول مرة ليا .. و بغيتك تقتارحي عليا احسن ريسطو كاين هنا ... 
هي تقرصات حيت مكتوصلش لريسطورات الكبار... و جاوبات قائلة ..
....: ااه سمحلي حتى انا ماشي بنت كازا ولكن كاينين بزاف ديال لي ريسطو فهاد النواحي ... جرب شي واحد ☺☺ 
ايرتان: اااه شكرا ...مهم كيف قلت ليك انا براني و معنديش صحاب هنا و مابغيتش نأكل بوحدي واش ممكن تقبلي دعوتي ومنها نيت نتعارفو؟ .. حيت بصراحة جيتيني ظريفة وعجبتيني.. 
عينيها خرجو و طلعات فيه برييبة وحجبانها مقرونين و فمها مقروم كيمشي يمين ويسار ومستغربة تماما من كلامو وقالت: ل..لا سمح لي كنتسنا خطيبي. .. ناضت غادية وقال. .. 
ايرتان: تسناي ا انسة ... 
دارت عندو ...و أشار لسياراتو 
ايرتان: هادي سيارتي. .. غير ركبي معايا و ياله ندوزو وقيت زوين كنواعدك غيعجبك الحال... 😉
تقدمات لعندو وحل السيارة باش تركب و داير ابتسامة النصر فوجهو ... حتى وقفات قدامو....
.... : واش من نيتك كتهضر *اشارت بصبعها ليه وجمعاتو هو وسيارتو بحركة دائرية بصبعها* انا نركب معاك نتا ؟ 
سد السيارة وقرب ليها مزيان و عينيه فعينيها بنظرة حادة قال: مالك؟ ماعجبتكش .. 
... : و...والو ... بعد شوية و هضر و زايدون انا مخطوبة سمح لي .. 
قبل ما تدور و تمشي قال: كلكم كتقولو هكاك. .. هاهي السيارة و باينة عليا ملعق و الزين والفورمة والاهم هو اللحية ... اش بغيتي؟ ... 😏 ماشي على هادشي كلكم كتحفرو وتقلبو ؟ 
.... : * استافزها كلامو و قربات لعندو * بزاف عليك. .. انا ماشي من داك النوع اسي الزين و الفورمة والملعق *طلعات فيه وهبطات ووركات على الكلمة * والللللحية ... سير قلب فجهة أخرى... جاي تفوح عليا برزق باباك... رجال آخر الزمان 😕
دارت تمشي ووقفاتها جملة قالها : شحال تمنك ؟؟ 
مارضاااااااااتش ضارت لقاتو داير ايدو فجيابو و كيضحك بشر ... مافكراتش دغيا قربات ليه نقزات دخلات فيه بروسية للحنك وهي تعلق خلاتو شاد وجهو و طايح فالارض ...
جاو صحابو كيجريو ووقفوا حداه ميتين بالضحك 
فؤاد: نااري على روصية عطاتك غير قصيورة ودارت فيك هادشي هههههه 
عز: ههههه واش صورتو كولشي ..ناري واش كنحلم😂😂😂😂... 
هز ايرتان راسو وشاد حنكو بنظرة كترمي شرارات من العافية و سنانو كيتغززو بالفقصة وغوت : غنلقااااااك😡😡
✋سطوب... نوقفو الصورة فكمارة ايرتان الغاضبة ونعطيكم لمحة عليه.... 
الاسم : ايرتان التازي
السن:24 سنة
ايرتان الباد بوي... اكبر جلاخة عرفاتو البشرية ...شرييير.. ولد الحرام مقطر ... مكمل قرايتو في أمريكا و عير بالزز ... من المفروض عليه يرجع لعائلتو من بعد ما يسالي قرايتو ولكن بقا تما على الزهو والنشاط و ماعينوش يخدم اولا ينضم لباه فشركتو المتخصصة فعالم العطور و مستحضرات التجميل... ايرتان عايش حياتو ماخاصو والو ولي بغاها كتحضر لعندو .. المفشش ديال والديه. .. إلى دار شي حاجة أولا شي حد فبالو مايتهنى حتى يوصل ليه ... قبيح مغرور شرير ... عاجبو راسو ومكيشوفش التحت معندوش شي حاجة سميتها الأخلاق فقاموسو من صغرو جلاخة وباقي جلاخة هو القائد فتاحراميات فاش كيكون مع صحابو ... و هاد الساعة لي غيدوز هي اكفس ساعة فحياتو ...just kidding 😂😂

طارت البنت كتجري و تهز نظاظرها حتى دارت مع الدورة و تكات على الحيط و طلات لا يكون تابعها و رجعت تكات و خدات نفسها وقالت .. 
....: شحال تمني؟؟ بقرة انا ؟ الله يعطيك الجدام و الكساح الحيوان المسخ القذر ... 
قادات حوايجها و حلات سيارتها وتخشات فيها سداتها و لاحت الساك حداها ....
....: اوووف هادشي لي كان ناقص ... انا من ديما كنجيب غير الشارفين ولي سالات مدة الصلاحية ديالهم و الخيش بيش ... أول مرة كيطيح شي واحد بحال هذا ... اويلي اشمن ...بااينة شي بلان تما مستحيل نعجبو بالصح... يعلم الله اش كان ناوي ولد الحرام شنو زعما يديني لشي عصابة يقتلوني و يبيعو اعضائي و لا يبيعوني عبدة فشي قنت ..هااا .. انا يضحك عليا بديك الحديدة.. طوووز تانا عندي واخا مخرشة وماهي شي ماركة و باقية لدابا كندفع فيها ولكن هانية ... واخا هكاك ولد الحرام بوقوس ... اويلي اش كنقول أعوذ بالله يسمعني جلال يتقلق مني فين تيلي بعدا . .اوووف ماعيط ماوالو ديما كيخليني منشورة هاد الزمر ...😡

✋سطوب عاوتاني ونوقفو الصورة فوجه البنت المقلق المعصب ونعطيكم لمحة عليها... 
الاسم: جهينة الطاهري 
السن: 23 سنة 
ممرضة فمستشفى خاص... همها غير تجمع فلوس من عرق كتافها و تدير مستقبلها مع حبيبها جلال لي تاهو ممرض معاها فنفس المستشفى ... عزيز عليها القص والماكلة. .. ضحوكية ومرحة واجتماعية مكيهمها حد عايشة كيف بغات هي... و .. ضريفة وقلبها ابيض ... عندها غير امها لعايشة فالعروبية مع خالهاا و اسرتو لاسباب صحية ...

جالسين الدراري ب3 فكافي ووسطهم ايرتان لي حاط كانيطة باردة على حنكو وباقي دمو كيفور من الموقف لي تعرض ليه وخاصة بنت لي زرقات ليه حنكو. .. لايح رجل فوق الطابلة و مغوبش ساهي فالزاجة قدامو ... 
عز: ههههه برد اصاحبي... ميخية دارت فيك هاد الحالة... و فااقصااتك ... انت لي مشيتي عندها كانت الاخرى تطلع ليك مصروووعة .. اما فاتيفلزووغات مكتعرفهم علاياش مطويااات 😂😂
فؤاد: هههههههههه ...ايرتان التازي خدا روسية من بنت واللهما متيق 😂😂😂 
اشرف نغزو: هههه سكت اصاحبي مكتشوفش فشوكتو معلية هههه 
عز: انا لي بغيت نفهم غير كيفاش متشداتش لييك ههه اصلا اش قربك ليها لازين لافورمة لا تاحاجة. .. 
ايرتان كيهضر وعينيه فالزاج : حgرتها قلت هادي غنطيحها بعينيا مغمضين. ..ساعة صدقت بخبيزتها... فيها غير شبر و زرقات ليا وجهي. .. واللهما نساها ليها و غنلقاها وندمها
فؤاد: هههه لعن الشيطان اش بغيتي فيها نسا عليا الويل 
اشرف: ههههه هذا عينو يلعب 
ايرتان: يسحاب ليك غندوزها باقي متزادتش لي تدير فايرتان التازي هاد الحالة وتفلت... ههه ولكن واخا هكاك نجحات فالاختبار واخيرا صادفنا شي وحدة متسوقاتش للمظهر والفلوس هههه عمر شي وحدة قاوماتني بحال هادي ... هضرات على خطيبها يقدر يكون شي ملعق ولكن منضنش شي واحد من داك النوع يشوف فوحدة بحالها ... زعما باقين بنات بحال هكا 
فؤاد: هههههه موحاااال و حتى إلى كانو كيكونو خيبات 
اشرف: ههههه واللهما كدبتي من هنا القدام غيوليو الدراري لي بغا يتزوج يقلب على شي خايبة حيت هي لي كتكون بنت الناس وماعندهاش سوابق 
ايرتان : اش وصلنا لشي زواج ههههه
عز: مهم خليونا من هاد الموضوع و قولوا ليا فين غنكملو هاد العشية. .. 
ايرتان: غير عفيوني انا راجع للاوطيل منقدرش نبقى خارج بهاد الحالة... 
دار النظاظر وناض ... 
فؤاد: ههههه مباينش بزاف ههههه
ايرتان: غير طنزو دابا كيف بغيتو. ...الله يعاون
خرج خلاهم كيضحكو ركب اللوطو ديالو وديمارا...
جهينة غادية كتسوg فالطريق كيف العادة بسرعة بطيئة و كل شوية تهز نظاظرها و كتهضر غير بوحدها...
جهينة: يااخ تفو.. اش غندير دابا و فين غاطس حتى نساني 😡 *تيلي كيصوني* 
شافت شكون و هي دير سبيكر .. 
جهينة: مالك معيطة ليا انت اش بغيتي؟؟ 
ايناس: مالك معليا شوكتك تاني ؟ باينة شي بلان مع داك بوركابي ديالك ..
جهينة: شوفي اه بلاااا متبداي عليا تانتي بداك بوطزطاز ديالك راه اصلا لي فيا مكفبني هاد النهار منبن فقت و انا مكنتصادف غير مع الكسايد 😡 
ايناس: هههه مالك تاني ؟؟ 
جهينة: والو مع واحد كيليميني تلاقيت معاه قلب عليا ولقاني ... 
ايناس: واش قربك لشي كيليميني ياك ماكاتحمليش ولاد الفشووش 😂😂 
جهينة: وا هو لي جا عندي ... عرفتي شنو قطعي راني كنسوق ...جي عندي للدار ... 
ايناس: ههه واخا الالا غتلقايني فالدار ... و ردي البال للطريق قدامك العورة ... 
جهينة: العورة هي مك ... و قطعات عليها

وصلات جهينة وهبطات من السيارة و كتنغر ... هزات ساكها ودخلات للعمارة ... طالعة فالدروج وكتصوني على جلال و والو مكيجاوبش ... 
جهينة: هاد وجه الويل ... بالناقص حتى تبان 😡 
حلات الباب لقات ايناس مسرحة فالسداري و شاعلة التلفازة كتفرج و حاطة الماكلة حداها .. 
جهينة: تباركالله على القايدة طامو ...تهزي من تم دار بااك ... 
ايناس : هههه واللهما ندي عليك ... باقية معصبة 😂😂😂 
حطات الساك و الصباط و دخلات جلست .. 
ايناس: مالك عاودي ليا .. 
جهينة: هاد النهار داز كي الويل ... درت مع جلال نتلاقاو فالمدينة و ماجاش ... و ما خسرش عليا حتى مكالمة ... كنت واقفة معصبة و خاصني غير معامن ... حتى وقف عليا واحد المنونخ قالك بغاني نخرج معاه كركبتو مدازتش ربع ساعة جاني واحد اخر و لكن اساطة تيتييييييز ... 
ايناس ناضت جلست حدااها : اياه كملي 😍 
جهينة: اش غنكمل هاداك باينة وراه شي بلان واش فنظرك وحدة بحالي غيديها فيها بحال هذاك ... 
ايناس: وما عرفتي؟ مهم اش قالك .. 
جهينة: جلس كيستعرض عليا عضلاتو و فليساتو ... خرج للعيب و طلعت مع مو بروسية و علقت .. 
ايناس: اويلي على بنت المسخوطة 😱😱

جهينة: مالك كتولولي عليا تما يحرق طباسل مك .. اش يسحاب ليك غندير نركب معاه متلا ... يسيفط بويا لشي جايحة اقل الخسائر يدير عليا النوبة هو مجموعة ديال الكلاب بحالو و يلوحو طاسيلتي فشي خلا .. و زايدون عندي جلال حبيبي انا مخلصة ليه و باغياه غير هو ماعندي ماندير بشي حد آخر .. 
ايناس عوجات فمها و قالت: طووووز ... جلال .. كتقولي فيها بحال الى شي جالااال نييت و هو كي سفود البرادعية .. لا زين لا فورمة .. راسو كيف عظم لافوكا .. و فاااشل .. طالع بالنقلة و التسنطيح و معجااز ... هذاك راجل هذاك لي كل مرة مسلف منك ... دابا واش من نيتك كتفكري فيه كزوج و ديري معاه الولاد و تكملي معاه حياتك .. واش ضارب بوك الله و لا ساحر ليك ... 😡 
جهينة: خلي هضرتك عندك اختي .. بغيتو هكاك .. لي سمعك كتهضري يقول انا ماعرت كيف دايرة... و نحمد الله و نشكرو لقيت لي يقبل عليا و بحالتي الله يهديك .. 
ايناس: مافهمتش مال مك حاgرة راسك ... خاصك غير تضعافي و تهلاي فراسك شوية و تحيدي عليا دوك النظاظر و تملسي ديك الشعكاكة ونقصيها و تقادي لبسك شوية و هانتي الف واحد يتمناك .. 
جهينة: ساليتي و نوضي تهزي جمعي عليا هاد الروينة لي درتي .. خليني نعيط للوالدة راه نسيتها هاد اليوماين ... 
ايناس: نوضي احنينتي .. نوضي ... طليتو خضر معاك ...
ناضت جهينة دخلات لبيتها و حطات الساك و جبدات التيلي ... 
جهينة: الو ...ماما ؟؟ 
....: ختي جهينة .. هادي انا حنان .. 
جهينة: اهلااا بنت خالي صافا ... 
حنان: حمد الله و انت اش خبارك .. 
جهينة احنا نحمدو الله و نشكروه .. ماما مكايناش ؟؟ 
حنان: راها فالجنان مع مي كيشربو اتاي .. تسناي نعطيها تيلي ... 
جهينة: واخا ... 
خرجات حنان كتجري و عطاتو ليها ... 
الام زكية: الووو .. جهينة .. 
جهينة: ماما الحبيبة .. لاباس عليك .. 
الام زكية: حمد الله ابنتي و انت لابس .. 
جهينة: حمد الله احبيبة .. باقي عندك الدواء و لا نسيفطو .. مهلية فصحتك و لا لا راه كنعرفك .. شتي كون بغيتي تجي تسكني عندي فكازا نقابلك مايكونش احسن ؟ 
الام زكية: لا ابنتي راك عارفاني ماقادا على داك الجو فالمدينة ... كنمشي تما كنمرض و زايدون خالك و مرات خالك مهليبن فيا و حنان و عبد الرزاق ولاد خالك ما مخليينش من جهدهم بلا متبقاي ديما تسولي ... 
جهينة: مهم هو صحتك و على خاطرك احبيبتي .. 
الام: اوى ابنتي ايمتا غتشدي الكونجي راه توحشتك .. 
جهينة: الكونجي؟ ااه .. ماعرت باقي ماعرفتش .. 
الام: واجي عندي ابنيتي راه توحشتك .. 
جهينة: ان شاء الله اماما .. ان شاء الله ... ياله انا غنقطع .. تهلاي فراسك .. 
الام: و حتى انت ابنتي .. الله يرضي عليك .. 
قطعات جهينة و بدلات حوايجها .. لبسات بيجامة صيفية خفيفة و خرجات للعند ايناس .. لقاتها عمرات اتاي ... 
ايناس: كيف دايرة خالتي ؟؟ 
جهينة: حمد الله ... سولاتني على الكونجي تاني .. و اللهتا تأنيب الضمير ... ماقلتش ليها السيمانة الجاية غنجلسو واحد 15 يوم ... 
ايناس: وعلاش .. سيري عند ميمتك طلي عليها شوية .. 
جهينة: نمشي باش يبقى لاسقني داك خالي تاني .. باغي يلبق فيا داك العجل المصرفق ديال ولدو .. اه انا خيبوعة ولكن ماشي لديك الدرجة .. وزايدون ماغيفهموش بلي عندي بويفراند ديالي و كنبنيو و نجمعو على قبل مستقبالنا .. 
ايناس: بلاتي الحبيبة نصحح ليك .. كتجمعي ماشي كتجمعو ... نحلف عليها ساحر ليك .. 
جهينة: و انت مالك ديها غير فالنونوس ديال راجلك ..
ايناس: ااايوى مانسمحش ليك هاداك سييد الرجال قالاك نونوس .. 
جهينة: اوى منين سيييد الرجال مالكم باقي مادرتو العرس و جمعتو علينا حزاقكم راه قهرتوني كل مرة تخشاو عندي هنايا بحال فعايل البراهش ..😡
ايناس: هههه ختك انا .. راه الحب صعيب راك طايحة على زنافرك و عارفة اش كنقول .. 
جهينة: اوى اختي طايحة اه ولكن ماشي ندير ليه لي بغى اويلي ديري قيمة لراسك شوية .. 
جيهان: مالي بنت ليك كندير فالحرام بحال شي مدلولات .. راه ضاربين الكاغط و حتى صداقي خديتو بقى غير العرس و نفرشو الدار ..انتوما ما بينكمش شي حاجة رسمية انت ماشي هي انا .. 
جهينة: واخا هكاك ... خاصكم تحتارمو المراحل و لكن اختي بان ليا انت مولات الفعلة ..
جيهان: هههه اش كتصحابيني اختي اويلي زدتي فيه .. 😂😂😂
جهينة: طوووز عليا انا لمك .. انا كنعرفك اكتر من امك لي و لداتك .. اححح كنتخيل شي نهار تحصلك و تعرفكم قضيتو الغرض تسيفط مك بلا وقت .. 
ايناس خصرات وجها و دقات فالطابلة و قالت: الله يحفظ مالك اختي على هاد الفال .. عمرك تقوليها زينة.. 😨
جهينة: و دابا من هادشي كولو فين غابر جلااال 😡

ايناس دارت رجل على رجل و هزات كاس اتاي وقالت: ماغايكون غير مع شي وحدة طالقها عليها كيفما داير معاك ... قالت هاد الجملة و بدات تجر فجغمة اتاي ..
جهينة حداها استافزاتها بكلامها و حتى بداك الصوت و هي تشد قاع الكاس و رجعاتو على وجها حتى تكب و هي تنوض كتنقز ... 
ايناس: سخون سخون سخون سخون سخون ... 
جهينة: نوري لمك انا تقولي على جلال ديك الهضرة مافهمتش علاش مامسروطش ليك دا ليك شي حاجة .. مالي ماكنشدش الزكير مع عتمان ديالك .. 
ايناس: ها ههي لا بقات فمك .. (مشات للحمام) 
جهينة: ياااخ و نهار هذا تفوو 😡 ... (تيلي كيصوني) 
شافت فيه ديال ايناس .. 
جهينة: اجي جاوبي راجلك اوجه الزلط ... 😠
ايناس: جاوبي انا جايا .. 
جهينة: الله يحرقكم ب2 ... اشنو بغيتي انت .. 
عتمان: هههههه مسينا عالله .. 
جهينة: راه انا لي خاصني نقولها .. اش باغي راه لوخرى فالحمام .. 
عتمان: واخا .. ولكن مالك معصبة تاني اش واقع 😂😂 
جهينة تنهدات و جاوبت : لهلا يوريك اش داز على ختك هاد النهار .. ها الكارتة ديالك .. شدي ... 
خدات من عندها تيلي و مشات للكوزينة كتحنقز .. 
جهينة معوجة فمها : مزينتك لا انت لاهو ... 
ايناس كتهضر و دوز صبعها على البوطاجي: وي حبيبة ... 
عتمان: كبيدة ديالي لاباس .. 
ايناس: ما لاباس والو توحشتك امتى غترجع راه السيمانة الجاية غنشد الكونجي .. راه كولشي وجدتو .. 
عتمان: غير سمحي ليا احبيبة .. باقي عندي الخدمة هنا .. دوزي السيمانة الاولى مع جهسنة و السيمانة التانية غنجي ... 
ايناس: اوووف واش ضروري تحضر للداك المؤتمر.. 
عتمان: راه ضروري احبيبة .. خاصني نبان فالواجهة باش نستاحق الترقية و راك عارفة راه خاصنا نتجمعو فاقرب وقت .. راه جهينة شي نهار غتطوعنا من الشرجم 😂😂😂 
ايناس: هههه واخا احبيبة تهلا ليا فراسك .. 
عتمان: متخافيش احبيبة .. اه و بلا منوصيك .. كترة الدوران و التزرييط مامعاناش .. 6 دخلو فحالكم و داك اللبس المع...
قاطعاتو: صااافي فهمنا اسيدي غير كون هاني .. 
عتمان: واهكاك نبغيك ههه ياله احبيبة الله يعاون ... 
ايناس: بااي .. 
خرجات عند جهينة لي كانت حالة فمها فالتلفازة .. 
جهينة: مال كمارتك .. 
ايناس جات تخشات فيها و كتبكي بالجهد (غير بالضحك) . 
ايناس: ديك الخدمة اللعيييينة .. 😢
جهينة كتفرج و تضرب على كتفها ... 
جهينة: مزيانة فمكم لا انا لا انتوما انتوانسو ... 
ايناس: ياك الكلبة و انا لي بغيت نديك فبلاصتو ..😢
جهينة قلبات هضرتها: ديك الخدمة اللعينة ديما خارجة ليكم من الجنب احبيبة يااخ الله يقطعهم ... صافي احبيبة مايبقاش فيك الحال .. ☺
ايناس: الله ينعل كمارتك .. 😢
جهينة حطات راسها على راس جيهان و كتدوز على حنكها و قالت: مقبولة منك فداءا للخرجة .. فين غنمشيو .. ☺
ايناس هزات راسها متحمسة و كتضحك .. 
ايناس: بنت خالي عندهم دار على البحر طلبتها تخلي عندي سوارت لهاد 15 اليوم ... ماغنسافروش ولكن غنبدلو الجو شوية..
جهبنة: البحر 😍😍😍 اححح اقلبي سير امدير عتمان الله يعطيك الخير
ايناس و هي كتضحك: واللهما نجاوبك مافياش لي يتحارب .. 
جهينة: كيفما كان الحال احسن مانمشي للفيرمة عند خالي اختي كنرجع غير بالفقصة و الغدايد واخا موحشة ماما و لكن عائلتها لا تحتمل .. 
ايناس: وا صافي دابا احنا غندوزو وقيت انا وياك ولكن غير سيمانة السيمانة تانية غتعطيني بالتساع حيت حبي غيرجع .. 
جهينة: ماشي مشكل .. مهم ندوز واخا غير يوماين .. 
ايناس : والمهم ظلام الحال ماما غتدبحني ..غنمشي الله يعاون .. 
جهينة: بسلامة .. 
ناضت ايناس و خرجات .. و ناضت جهبنة جمعات الماعن و داتهم للكوزينة .. سمعات البورطابل كيصوني و مشات هزاتو .. 
جهينة: وا على سلااامتي منين تفضلتي و عيطتي .. 
جلال: اه راه غير شي ظروف .. 
جهينة: بطبيعة الحال بحال ديما اشمن ظرف عندك تاني .. 
جلال: الوالدة مرضات و دينها للسببطار .. 
جهينة: واش بالصح كتهضر ياك لاباس .. 
جلال: هبط ليها السكر و داخت .. 
جهينة: مسكينة .. شنو دابا بيخير واش جبتيها للسبيطار عندنا نجي عندكم دابا .. 
جلال: ها ؟ لا لا راه رجعتها للدار مكاين لاش راها بيخبر دابا .. 
جهينة:واش بالصح .. اوى الحمد الله بعدا .. وا كنتي تعيط و تقولها ماشي تخليني منشورة حتى بدا بنادم ينق عليا تما 
جلال: صافي مانبقاش نعاودها راه غير تشطنت و نسيتك .. 
جهينة: ااه صافي ... اصلا تانا دوزت نهار خايب ... 
جلال: ااه حتى انا احبببة ماديريش فبالك مهم خاصني نقطع دابا .. تصبحي على خير .. 
جهينة: ا... اه .. تصبح على .. 
ماكملتش و قطع ... شافت فتيلي و لاحتو فوق السداري .. 
جهينة: ماسولش فيا و لا شنو وقع ... ماغارش عليا فاش قلت ليه نقو عليا .. مفكرش حتى يعوضني على اليوم .. اش عاجبني فهاد الكلب .. ايناس عندها الحق .. و لكن الى تفرقت عليه شكون غيقبل بيا و لا غايديها فيا .. (تبدلات نبرتها من حزن لأمل )واخا هكاك كنبغيه ...هو شخصيتو هكا و غير نتزوجو غيتبدل اكيد ... اشنو ندير للعشايا اليوووم .. 
دخلات كتحنقز للكوزينة .. 
عند ايرتان ...

دخل ايرتان للشومبر ديالو .. لاح سباط و حيد تيشورت ديالو و دخل للحمام .. شاف وجهو فالمراية و الزروقية لي فيه ... تفكر الموقف لي طاح فيه مع البنت ... 
ايرتان: والله بوك الكلب لا بقات فيك ... انا ديك الدبيديبة دير فيا هاذ الحالة .. غير بلاتي و اللهتا غنلقاك و ندمك .. 
قال هاد 2 كلمات و دخل للدوش .. دوش و طلب العشاء و تسرح فبلاصتو بالبينوار و شعرو الفازغ شعل تيفي و تقابل معاه كياكل .. حتى دخلو عندو الدراري .. 
عز : نوض اصاحبي للكلوب نحيحو شوية.. 
ايرتان؛ غير سيرو مافياش هاد الساعة ... 
فؤاد: مالك .. باقي كتفكر فديك خيتي؟؟ 
ايرتان: و لاش غنفكر فيها ... من نيتكم .. غير مافياش هاذ الساعة وصافي سيرو بلا بيا .. و غذا انا معاكم .. 
اشرف: واخا اسيدي .. تلااح 
خرجو الدراري و تسرح فبلاصتو .. دار ايدو على راسو و غمض عينيه .. حتى سمع رنة الهاتف ديالو ... مد ايدو لقاها الوالدة ديالو .. جلس و جاوب .. 
ايرتان: مدام وفاء التازي ؟؟ 
وفاء: ولدي لاباس عليك توحشتك .. 
ايرتان: واغير ديك السيمانة كنت عندك .. 
وفاء: وا غير قول ليا اولدي شنو هي سيمانة قدام سنين ديال الغربة .. 
ايرتان: واصافي الوالدة اندوز الصيف مع الدراري فكازا و نجي ..
وفاء: واخا احبيبي راه حتى جداك كتسول فيك و باك ديما كينغر كيعيط ليك مكاتجاوبوش .. تفادا المشاكل معاه الله يرضي عليك اولدي .. 
ايرتان: واخا الوالدة .. تهلاي فراسك انا غنقطع .. 
وفاء: تصبح على خير.. 
قطع و لاح تيلي للجهة الاخرى ... و خشا راسو تحت المخدة
اصبح الصباح .. 
فاقت جهينة مع 11 كيف عادتها فأيام الويكاند ... 
غسلات وجها و مشات للكوزينة .. دارت فطورها و مشات للصالة .. جالسة بشعرها المخربق و عينيها مبجقين بالنعاس .. شعلات tv و حلات شرجم يتحرك الريح ... 
جهينة: اووف .. اش هاد الصباح الممل تاني .. 
هزات تيلي لا مساج لا بريا .. 
جهبنة: ههه بطبيعة الحال .. بارد القلب لي عطاني الله .. 
طوعات تيلي و شعلات المزيكا و ناضت للدار .. 
جهينة: جهينة يا جهينة ... 15 اليوم ماسيقت الدار تسمعاها ماما تدبحني اوووف خاصك تحداكي شوية مابقا والو و نزوج بجلال و نتفضح معاه .. *بدات تنقز بالحماس* ييي انا و جلال نتزوجو و نديرو دارنا ووليدات فنيونين ...*مشا بالها و صورتها هي و جلال مشادين و بيناتهم بنيتة حتى هي شعرها مفنكش و دايرة نظاظر كبار بحال ماماها * ناااري عنداك يخرجو ليا انا ... لا لا اكيد يخرجو لباباهم ... هههه الله يستر 
زادت فالموسيقى و مشات جابت الماء و بدات تسيق و هي كتشطح و تخدم فنفس الوقت .. حتى سالات .. مشات للكوزينة و شافت فالتلاجة ... 
جهينة: خاصني نتقدا ... 
سدات التلاجة و مشات بدلات حوايجها ... هزات سوارت و خرجات ... 
ركبات سيارتها و ديمارات ... 
فنفس الوقت ... ايرتان سايق و كيهدر فتيلي .. 
ايرتان: مال مك مافيقتيني الحيوان .. 
فؤاد: على انت بغيتي تحرك ... مهم راه كنتسناوك حدا سوبر مارشي غير طلقنا ... 
ايرتان: واخا .. الله يعاون ..

عند جهينة... 
جهينة: اوووف اش هاد الصهد ... 
حلات الشرجم لي حداها و لي فجنبها... 
جعينة: الله هكا احسن ... 
العرق كينزل من جبهتها .. جبدات كيلينيكس حداها و هي كتسوق بايد وحدة..بقات كتجبد حتى خسرات البواطة ديالو خدات لي بغات و لاحتو مخربق فالكوسان لور و كملات سوقان .. بانو ليها الطوموبيلات كيوقفو فالسطوب ... جات توقف وهي تلمح الحركة وراها و داكشي كيطير ...
دارت لقات كلينيكس مشتت و داير زوبعة وراها بسباب البرد لي داخل .. خلعها غوتت و هي تدخل فالسيارة لي قدامها ... 
ايرتان واقف كيتسنا فالسطوب مابيه ماعليه حتى تخبطات سيارتو من لور ... هز راسو فالمراية لور لي كتعكس حتى وجهو لي كيخرج منو الشر و نظاظرو الكحلين لي عواجو فوق وجهو بفعل الصدمة ... و هو يحل الباب و خرج هكاك ...

جهينة شادا المقود و تخشات فحوايجها و كتطل وسط شعرها المموج الكتيف مخبية بيه وجها ... و عرفات راسها مقفراها منين شافت اشمن ماركة ديال الطوموبيلات و السيد لي خرج من السيارة و باينة فيه واعر (زعما شخصيتو )من مشيتو و ملامح وجهو و لبسو لي كان كولو اسود داير خواتم كبار فايديه و كورميطات كذلك و سنسلة فعنقو ... قرب لبابها و خبطو من الفوق .. 
هي الداخل كترعد و كتفكر كيفاش تعلق .. 
شافها ماخرجاتش و هو يدق فالجاجة لي طلعاتها.. 
ايرتان: خرجي .. شكون هاد القو** لي كيعطيكم هاد البيييرمي .. خووورجييي... 
والو ماخرجاتش ليه و هو يطل من الجاجة .. هزات عينيها شافت فيه و تحلو عينيه منين قشعها شكون هي .. رجعات بيه الذاكرة للبارح فاش جا هضر معاها و عطاتو بروسية ... شد فحنكو و قال ...
ايرتان: انت ؟؟ هادي انت ؟؟ 😡
جهينة: ش .. شكون .. علامن .. كتهد .. ر 😢
ياسين: قو*** خرجي لمك نوريك .. شكون و علامن كنهدر ... 
مجا فين يحل الباب و هي ترجع بالور ... الحركة لي درساتها مزيان و هي كتهدر معاه .. 
رجعات بلور و دازت للجهة الاخرى و عفطات .. خلاتو واقف كيفما هو ... دار شاف فيها كتهرب و لكن حفظ الماتريكيل ديالها ... مشا ركب فسيارتو و ضرب المقود .. 
ايرتان: طحتي بين ايديا ... دابا نيت قفرتيها و غنديرك فبالي ... كسيرا و تبع الطريق منين دازت .. حتى لقاها طالعة مع العقبة ديال السوبر مارشي ... و كسيرا يوصل ليها و لكن فصلوه 2 سيارات .. هي فهاد اللحظة دغية دخلات و تخشات بين السيارات و تنهدات .. 
جهينة: فلت باعجوبة .. ناااري عنداك يكون حفظ الماتريكيل لا لا طرت موحال يكون شدو .. ناري الى عرفو و اللهتا هادي هي الاخرة ليا .. علاش كطيحي فهاد المشاكل اجهينة اوف اوف ...

خرجات من السيارة و قادت نظاظرها و قادت شوميزتها و تمات غادية ... شافت فجنبها و هي تلقاه واقف و داير ايديه بزوج على جنابو وكيقلب بعينيه و هي تحنا بالخف و طارت تخبات ورى طوموبيل ..
جهينة: ناري مي قفرتها ... ماكيتفاكش تبعني ولد الهم.. نخرج ليه و صافي؟ .. اويلي ماعندي مانعطيه كتعويض ... مستحيل نعطيه من فلوسي لي جمعت ... الزقرام لي حطو تبعني على خديشة .. اشنو ندير يااخ تفو على زهر لي ما كمل البارح غيكمل اليوم تفوووووووو.. 
بقات كتنغر و كتطل عليه حتى بان لبها داز للجهة الاخرى و باقي كيقلب و هي طير دخلات ... 
جهينة: اوف نتقدا بالخف و نهرب قبل مايلقاني ...
عند ايرتان: كيفاش فلتات ليا تاني 😡.. ااه هي نفس البنت ديال البارح ... غير بلاتي نلقاك غندمك على النهار لي تولدتي فيه ... ماغاتكون غير الداخل .. 
دخل كيجري و كيقلب بعينيه .. حتى جاه اتصال .. 
عز: تا فين غطستي .. 
ايرتان: تبعوني لسوبر مارشي وقع ليا واحد البلان .. ديك خايتي ديال البارح دخلات فيا بقجقاجتها و علقات .. 
غير سكت و هو يسمع التكركير و الخبيط .. 
ياسين حيد التيلي من ودنيه و خنزر فيه بحال الى كيخنزر فصحابو وقال : الله ينعل اصل والدين بوكم الكلب ياولاد الكلاب ... مالقيت معامن نترافق .... وقطع .. 
شاف حواليه و تم غادي كيجري و كيقلب .. رابط الغوباشة و ناوي على يخزيت 
غادية و كتهز التقدية و تحط فالشاريو و كتستمتع بالموسيقى الخفيفة المطلوقة و تقلب كل منتوج بالشوية واش يلائمها و لا اللا حتى تقلبات الموسيقى الهادئة لاغنية من نوع الروك ... هزات راسها الفوق مستغربة ... 
جهينة: شكون هاد الغبي المتناقد البسايكو لي كيسيلكتي فالاغاني ... 😓
مع غتحدر راسها ...لحمها بورش ووقفتها عواجت منين شافت فعينيه لي موجهين ليها من الجهة الاخرى .. نظرتو الشريرة خلاتها باغية تهرب لآخر الدنيا و تخبا .. 
جهينة: نااااااا ااااااري قشعني .. 😱😱
طارت بالشاريو و هو غير تحركت وهو يجري باش يبلوكيها من الجهة الاخرى .. كيجري و شعرها هو لي موجهو حيت مميزها على البقية .. 
حتى وصلو لآخر الرواق ووقف قدامها ... مالقات كيف دير ... دفعات الشاريو لعندو دخل فيه و هي علقات ... 
كتجري بحر جهدها ... بعدات شوية عاد قدر يجري على رجلو لي تلوات ليه ... خرجات مع الباب نيشان لسيارتها ... 
خرج من الباب دازت قدامو طايرة وهو يغوت .. 
ايرتان: غندمااااااك 😡 
خرجات من الباب الرئيسي و مخلية وراها العافية دازت على الدراري صحابو لي كانو داخلين تاهما بالسيارة و قشعوها شكون... بقاو معجبين عاد بان ليهم ايرتان كيضرب لي جات قدامو و يغوت ... و مشاو وقفو و خرجو من السيارة ... 
عز: مالك ماتبعتيها الحيوان ... 
فؤاد: و قصة مع هادي تاهي 😂😂😂 
اشرف: غير قول لينا كيفاش حتى تساطحتي معاها تاني 😂😂😂
ايرتان: دابا زاد شوقي نشدها بين ايديا *كمش ايديه بعصبية* و نعصرها و نكورها هكا بين ايديا ... 😡😡 
عز: كان ممكن تتبعها كيف غدير تلقاها .. 
ايرتان دار و حك ذقنو بايدو و ضحك ضحكة جانبية شريرة و قال: غادي تشووف ...

جهينة طايرة فالطريق و كتشوف وراها ... 
جهينة: ههههه نااااري كيف درت ليه انا واااعرة ... *جمعات الضحكة دغية * ناااري عنداك يلقاني ... باينة فيه رئيس شي عصابة ... هههع اويلي اش كنقول اكيد غير بغا يخلعني .... ههه زعما كيفاش غيلقاني ... ولد الحرام ماخلانيش نتقدا بخاطري تفوووووو حمار ... نشوف شي بلاصة اخرى ... 
مشات لسوبر مارشي آخر و دخلات تقدات و رجعات لدارها ... 
اما الدراري مشاو للكلوب فين موالفين يجمعو ...
جالسين مجمعين و ايرتان جالس الوسط لايح رجلو فوق الطبلة و كيلعب بسنسلة فايديه ... 
شاف فيه اشرف و قال .. 
اشرف: هههه اشنو غدير .. كيف غدير تلقاها..
ايرتان: حفظت الماتريكيل ديالها ... يوماين نجيب خبارها كاملة ..ههه و ديك الساعة غنبالي بيها .. 
عز: اممم ... العجب معاها يوماين متابعة 😂😂 وا زهر عندها مالقات معامن طيييح 😂😂😂 
كان ايرتان كيدور السنسلة بصبعو ... جمعها فقبضتو و بانت على وجهو نظرة كتبعت فالنفس الذعر و كملها بابتسامة جانبية ... قائل...
ايرتان: غنخليها تكره حياتها ..

عند جهينة ... جالسة فالصالة و كتطل من الشرجم ... كتخمم و تفكر فتهديداتو .. 
جهينة: زعما يلقاني ؟؟ علاش هربت علاش ؟؟

اليوم الاتنين ...
منبه كيرن ... تمدات ايد من تحت الغطاء و سكتاتها .. 
خرجات من تحت غطاها و جلسات مربعة رجليها .. شعرها واقف و تحت عينيها زرق .. الشي لي دل على انها ماغمضاتوش ... غمضات عينيها و خرجات تنهيدة طوييلة ... لاحت غطاها وناضت .. بعد الروتين الصباحي لبسات و خرجات .. 
ركبات سيارتها و توجهات للمستشفى ... ركنات السيارة و دخلات للمبنى المستشفى ... 
دخلات نيشان الفيستيير بدلات و جمعات شعرها و خرجات ... مشات للجناح لي فيه .. دخلات للمختبر لقات جلال جالس ... كان كيهضر فالتيليفون ... شافها و بدا كايقول : يالله ... حتى تجي ..الله يعاون ...
جلال: جيتي؟؟ 
جهينة سدات الباب و سلمات عليه بلابيز: اش بان ليك ... معامن كنتي كتهضر ؟؟
جلال: والو غير مع خويا .. غيجي عند الوالدة ..
جهينة: اااه ماماك بيخير... كيف بقات ؟
جلال حك مؤخر راسو و قال: حمد الله .. بيخير دابا .. كيف داز الويكاند عندك ؟؟ 
جهينة دورات وجها و تبدلات نظرتها لغضب و قالت: كيف الزفت .. 
جلال: مايبقاش فيك الحال .. غنعوض ليك مرة اخرى .. 
جهينة: لا ماشي عليك ... غير .. 
ناض من فوق المكتب و دار ايدو على كتافها و قال .. 
جلال: ياله نخدمو دابا .. الهضرة من بعد ... 
ابتسم و خرج .. بقات جهينة فبلاصتها كتدور فعينيها ... تمات خارجة و كتافها طايحين حتى تساطحت مع ايناس ... 
ايناس: هههه صبحنا عالله .. مال كمارتك تاني .. شفت كحل العفطة خارج من هنا .. قال لك شي حاجة ؟ 
جهينة: لا ... هاذي هي المشكلة ما قال والو .. 
ايناس: انت احبيبة لي باغياه .. 
جهينة: بلا متبداي تاني مناقصاكش .. كاينة مصيبة اكبر من هادشي لي كتقولي دابا .. 
ايناس: اويلي اش وقع 😨 
جهينة جراتها : زيدي دابا .. حتى لوقت الراحة و نهضرو ..

عند ايرتان ... 
خارج من الحمام بالفوطة كينشف شعرو ... شعل التلفازة و هز كأس القهوة كيشرب و يشوف ... جاه اتصال ...هز التيلي و مشا لجهة الشرفة الكبيرة لي كطل على الشارع كيشوف فالسماء و كيسمع ... 
ايرتان: اممم مزيان ماعندي ما يتسالك ... 
.....: تبغي شي خدمة اخرى اسيدي ؟؟ 
ايرتان: لا صافي ... 
قطع ايرتان لاح تيلي فوق السرير و رجع دور وجهو للسماء بابتسامة شر و رشف من قهوتو ...

بعد ساعات ...

ايناس جارا جهينة : وقت الغداء هذا دااابا غنمشيو لبيفيت و غتعاودي ليا راه ماقديتش نخدم هضرتك بقات كتاكل فيا .. 
جهينة: اوووف و غييير صبري عليا غنعاود ليك .. غير بلا جران شوهتينا ... 
ايناس: زيدي و سكتي ...

جالسين و بلاطواتهم عامرين بالماكلة قدامهم .. 
ايناس: ياله طلقيني .. 
جهينة: فيا الجوع حتى ناكل .. 
ايناس هزات عليها فورشيط : غتقولي و لا غنتقب لمك عينك بهادي ... 😡 
جهينة: اووف .. صافي واخا ... *قالتها بين سنانها و وركات عليها مفقوصة* وااااااخاا ...* تبدلو ملامحها لخوف و بدات تغبن* انا درت واحد الزبلة البارح 😢 
ايناس: اش درتي المسخوطة 😨😨 
جهينة: عقلتي على داك السيد لي قلت ليك دخلت فيه بروسية نهار السبت 
ايناس : ااه مالو ... *شهقات* رجع عندك و قالك عجبتيني من اول ضربة و انت بنت ديال المعقول حيت ماقبلتيش تركبي معايا و انا ناويك للزواج و نديك معايا للفرانسا و نعيشو تما و نديرو وليدات و نعيشو سعداء للابد و تولي لاباس عليك و تصوفيني انا و عشيرك و تخلي لينا الدار و نعيشو كولنا سعداء للابد ؟؟؟ 
قالت هاد الهضرة بالزربة و لقاتها كتشوف فيها بغير حيلة و مخسرة وجها على الغباء لي كتفوه بيه .. حطات ايديها على الطابلة و قربات ليها وقالت .. 
جهينة: واش فهاذ الدنيا كااااااااااملة ... مالقيتيني غير انا لي تشللي ليا اعصابي ... انا ناقصاك دابا ؟ واش بانت ليك حياتي مافيهاش لي يكفي من الحزاق تجي انت و تكملي عليا اااه ؟ ياربي انا علاش ضايرة غير بالفقصة على ختها .. فين كان عقلي منين تصاحبت معاك انت و داك عوت عوت ديالك ... فين كان عقلي منين ارتابطت بداك العجل ديال جلال ... انا اش كندير فراسي... اش كندير فهاد الدنيا .. شنو فائدتي ياربي ... عافاك خودني و ريحني منهم راه تكرفصو عليا ... 😢😢 
ايناس: شششششش .. بلاتي واش ماشي هادشي لي وقع ؟؟ واشنو وقع ؟ ... *شهقات تاني * صافي عرفت .. 
جهينة قاطعتها : سكتي .. انا غنعاود ليك هالعااار بلامتبداي... مهم .. البارح كنت غادية للسوبر مارشي و دخلت فالسيارة لي قدامي .. و خرج منها نيت داك الراجل لي دخلت فيه براس .. 
ايناس ندبات: اويل الشيطان ... هاناري على بنت المسخوطة ... واش متأكدة هو هو ؟؟ 😱😱
جهينة: بحال الى شفتيه بعينيك ... و اللهتا كان غيسكت ليا البارح و المصيبة عرفني .. هربت ليه و دخلت للمارشي و تبعني حصلني الداخل و تبعني و مافلت غير بالزز منين تميت خارجة سمعتو ورايا كيقول غنلقاك ... واللهتا قفرتها الصغعة انا راه منحوسة الى لقاني مشييبت فيها 😢😢 
ايناس ناضت لحداها و حطات راس جهينة على كتفها كتدوز على شعرها و كتغبن معاها و كتقول ... 
ايناس: عمرك درتيها زينة .. نحسك غيقتلك مافيهاش 😧 دابا اقل حاجة غتوقع ليك .. غيغرق لمك الشقف فالحبس .. 
جهينة: غنديك تونسيني 😢 ... 
ايناس: و علاش احبيبة ... سيري بوحدك .. انا عندي راجلي محتاجني و انت ليك الله 😢 
جهينة: اوى الله يلقيها ليكم ب2 😢 
ايناس باقية معنقاها باستها فراسها و بقات كدوز ايديها وقالت: معذورة احبيبة ... لييك الله 😢

راجعين البنات من البيفيت و شافو جلال جالس كيتغدا مع شي شخص فمكان شوية بريفي ... 
ايناس نغزات جهينة: ماشي هادي هي فردوس ديك الطبيبة المفششة بنت مول الشي ؟ 
جهينة: ااه ...هي 
ايناس: واش مجلسها مع كحل العفطة ؟؟ شتهم هاد الايام مكيتفارقوش ... شنو زعما كيبروفيتي فيكم ب2 ؟؟ 
جهينة:زدتي فيه .. متنسايش هي الطبيبة بنت السي الرازي مول المستشفى و هو من الفريق ديالها اكيد غيكونو ديما مع بعضهم .. ديما مخرجة قصة الله يحضر السلامة 😡 
دارت ايدها فجيياب الطابلية و مشات و تبعاتها ايناس كتجري ...

انتهت المناوبة ديالهم و خرجات جهينة و حداها جلال و ايناس معاهم مبعدة و قالبة وجها حيت ماكاتحملوش .. وقفو قدام الباب شاف جلال فجهينة وقال.. 
جلال: يالله بسلامة .. صوgي بالشوية عليك .. نتلاقاو غدا .. 
جهينة: اه .. بسلامة .. 
مشا جلال و ايناس جرات جهينة لي بقات كتشوف فيه غادي .. 
ايناس: غتوصليني 
جهينة: زيدي الكارتة ...
تمات غادية و هي تعنقها ايناس من لور و كتنقز و كتقول : يخليلي الحب ديالي ...كننووووت فيك انا ... 
جهينة: اوووححح اوووححح قتليني البقرة ... قتليييني 😡

ركبو فالسيارة ديال جهينة وديمارات ... كيف العادة كتسوق بالشوية.. 
ايناس: الساطة باقي الحال خلينا نمشيو لشي بلاصة ندوزو شي سويعة .. 
جهينة: بغيت نمشي ننعس ... 😩
ايناس: وصافي اصاحبتي كاين شي نعاس دابا ... احمباااك ياله .. و نيت تنساي شوية ماعياكش الروتين ؟
جهينة قلبات الطريق و قالت : امري لله

جالسين فالمقهى و خدات ايناس رشفة من عصيرها و حطاتو ... شافت فجهينة لدايرة يدها على خدها و كتشوف فالمنظر قدامها .. 
ايناس: دابا واش غتبقاي دايرة يدك على خدك هكا .. اش واقع غاااع ... 
جهينة: واللهما عرفت ... تاحاجة ماهي هاديك .. حاسة بلي شي حاجة غالطة و ماشي هي هاديك .. احساس فشكل و مامرتاحاش .. 
ايناس: شنو هاد الحاجة لي غالطة و ماشي هي هاديك ؟.. مرتابطة ..خدامة و عندك طوموبيل .. جامعة شي بركة مخططة بيها للمستقبلك.. كارية دار زوينة و بتمن معقول ... عندك ميمتك الله يطول فعمرها ..صحتك ماشاء الله بيخير .. اش بغيتي اكتر اختي ..هاداك وجهك ولا بلاصة اخرى .. عندك الوجه تطلبي اكتر .. كون محشمت نطوع مك من هنا 😬 
جهينة: باسم الله الرحمان الرحيم ... قوسي عليا اختي .. 
ايناس: قلت ما شاء الله .. مال مك محسوسة 😬 
جهينة: *تنهدات* عرفتي ا ايناس اموري كتبان ليك مزيان و عال العال و لكن لا ... حياتي مستاقرة بطريقة مرهقة و روتينية و هاد الاستقرار وهاد الجرى و التفكير فالمستقبل كنحس بيه كياكل شبابي و صغري .. حاسة بهادشي ماشي ديالي .. حاسة بلي هاد الحياة ماشي ديالي .. ديما بالي مشغول و كنفكر بلي مزال شي حاجة ناقصاني ... و لكن الاسوء من هادشي كولو ماعارفاش اشنو ... 
ايناس شدات فايديها و جبداتهم عندها و قالت : حبيبة ديالي .. صاحبتي العزيزة ... انا حاسة بيك ... انت دازو عليك امور كتيرة مأترة فيك و بالسيف .. فقصة الخدمة و داك كحل العفطة تاهو .. و ماماك لي شاطناك .. كولشي هادشي معييك ... داكشي علاش خاصك تنساي عليا ... و فهاد العطلة لي جايا .. غدوزي معايا سيمانة فداك الكابانو ديال خالي فالبحر و منين يجي عتمان سيري عند ميمتك رتاحي عندها و خوي راسك من هادشي و رتبي افكارك و بعدي على هاد الروتين راه هو لي مسبب ليك بهادشي ... اوكي ؟ 
تنهدات جهينة وقالت : يمكن عندك الحق غير العياء و صافي ...

وهي كتكلم داز من حداها شخص مسرع و خرج ... فلحظة ريحة رجولية زوينة تغلغلات فحاسة الشم ديالها هزات راسها مستغربة كتفكر فين شمات داك العطر .. و هي كتقلب بعينيها و نظرة تساؤل فعينيها.. لاحظت ايناس و قالت ..
ايناس: باسم الله عليك مااالك تاني 😂😂 
جهينة: ماعرت فييين شميت هاد الريحة ؟؟ 
ايناس: و الروايح عطا الله لي كيديرهم نوضي ابنيتي راه ساط فيك الريح هاد العشية 😂😂

ناضت جهينة و هي كتدور فراسها على مول الريحة ...
حتى خرجوا ... ركبو فالسيارة وديمارات ... 
وهما كيركبو كانت سيارة وراهم ... سائقها كيراقب تحركات جهينة و ايدو كتحك فلحيتو ... و ابتسامة مسافزة على وجهو ... صوب نظرتو عليها وقال .. 
ايرتان: جهينة يا جهينة ....هههه ليك معايا قصصصة و غتكوون ممتعة ... بما ان حياااتك مملة لهاذ الدرجة ... هههه غنخلييك تطلبي ترجعي لهاذ الحياة لي ماعاجباكش و مغتلقااايش ... غير تسناي ...

ديمارات و ديمارا وراها ....

يتبع

أجزاء القصة
قصص جديدة
قصة كرهتك حد العشق من تأليف نونة الحنونة
قصة كرهتك حد العشق نونة الحنونة
قصة سيد القلعة من تأليف حياة جمالي
قصة سيد القلعة حياة جمالي
كايتنشرو القصص والأجزاء كل يوم مع التاسعة ليلا بتوقيت المغرب
9isas maghribiya bdarija قصص مغربية بالدارجة قصص و روايات بالدارجة المغربية