نهى بائعة الهوى الجزء الثاني

من تأليف نهيلة احسني
2018

محتوى القصة

رواية نهى بائعة الهوى

دابا شهر تقريبا باش الحبيبة راحت وخلاتني، باش مات ميمتي، وليت حالتي حالة، مابقاش عندي الخاطر لا لماكلة لا القرايا، تانشوف فبا لي فأسبوع ولا حالتو حالة مسكين، ماعمرني شت با بكى حتى شتو ملي مات مي، قلبي تايتقطع عليه وعلى راسي........ اوا نهضرو تانعياو وكيف تايقولوا المكتوب مامنو هروب... 

اليوم فقت الصباح ومشيت نقرا، دازت عليا سليمة.........اوا العشية وصلات طيبت العشا لبا، وهزيت تانكتب داكشي لي فاتني. صافي الايام عادية،كملات الدورة الاولى، جت فيها 10،60........واليوم الاحد تافقت انا وسليمة نمشيو لحمرية عند واحد مول الحانوت تاتقضى منو، بغات تشري شي لبسة..... مهم انا ماعندي مايدار، مشيت معاها شرات داكشي لي بغات ودزنا لساحة الهديم، بحال ساحة جامع الفنا لي فمراكش مي هي صغيرة شوي عليها، بقينا تاندورو، جلسنا ناكلو الحمص حتى واحد اللحظة جلسات قدامي شابة حاملة ماعقلتش فين شفتها،ولكن غير شفتو هو تفكرت، هادي مرت مراد وهداك اللي حداها مراد،هي ماعقلاتش عليا، ولكن هو شافني توتر، شافتو حتى سليمة هي تقولي يالاه نمشيو، خلصات هي ومشينا، ماغانقولش لكم باقا تانبغيه، ابدا ولكن حسيت بالغيرة من مراتو، مي صفحة مراد طويتها. 

مهم رجعت للدار من بعد ماتفارقت انا وسليمة، فاش دخلت لقيت با سبقني، سلمت عليه ووجدت لو اتاي، جلسنا تانهضرو شوي، وحسيت بيه بغا يقولي شي حاجة مي بحالا توتر، ولكن فالاخير ماقال والو. 
الغد ليه فقت مشيت عاود مع سليمة تقراو داز النهار غير فالقرايا، مع المغرب جات سليمة عندي وقالت لي اجي راه مي عارضاكم للعشا انت وباك، وراه عمي (على با ) غايدوز من الجامع هو با ويجيو، صافي سديت الباب ومشيت معاها، سلمت على خالتي (مان سليمة) 
،،قالت لي بنتي قبل مايجي باك انا بغيت نهضر معاك، قلت لها مرحبا اخالتي (جاني فبالي غير بلي شي راجل فالطريق ههه)،،،،،، الام دسليمة #شوفي ابنتي، مك الله يرحمها كانت ختي وصاحبتي، ونتي بحال سليمة بنتي، وباك تاهو فمقام خويا، اوا كيف شتي نتي تاتقراي وملي تاتجي تاديري شغال الدار،وهادشي بزاف عليك، اوا داكشي باش اقترحنا على باك يتزوج.... وفالاول والاخير راه راجل. 

{بهاد السهولة، واش با يكون نسا مي دغيا، واش يكون تايعرف شي وحدة،...... بقى عقلي تايسول بزاف بلا جواب، ماحسيتش راسي تاسمعت مان سليمة كاتقولي ابنتي بلا ماتبكي، اه نزلو دموعي، بقيت كانبكي بجهد، حتى جا با وعمي لقاني تانبكي، با فهم علاش......الظاهر ان العشا كان مديور غير على وديت هاد الموضوع، جا با عنقني وقالي صافي ابنتي غير ماتبكيش الله يرضي عليك، وراه فبلاصت مك تاوحدا ماتكون، وهادي الموضوع نسايه ... مهم طلعت للسطح ددار سليمة وتبعاتني هي تاتواسيني وتبكي معايا بقيت كانفكر، حتى عيطات لينا خالتي نتعشاو هبطت،،غسلت وجهي وجلسنا فوق الطبلة، كان السكات، حتى قطعتو ملي قلت لبا#با توكل على الله انا بكيت غير حيت تفكرت مي، كلشي شاف فيا

بعد النهار د العشا باسبوع.:
:::::##############---
سليمة #نوضي اصاحبتي باركة من البكا، راه باك غايتقلق، حشومة فرحي ليه شوي،ولا غير ديري راسك فرحانة. 
مالقيت باش نجاوبها، اصلا مستحيل تحس بداكشي اللي كانحس بيه ماعدا الى جربات، وماغايحس بيا غير اللي طاح فهاد الموقف، باك يتزوج ويجيب وحدة فبلاصت الام ديالك صعيبة بزاف......المهم مشينا لدار ختي حياة (المراة اللي غاتولي مرت با)............
وصلنا لعندها، كانت ساكنة غير قريب من مكناس، واحد المكان اسمو ويسلان، المهم وصلنا، دقينا الباب، خرجات عندنا مراة شارفة رحبات بينا. 
من بعد الترحاب، دخلنا للصالون كان بسيط مي زوين، شوي جات واحد المراة تكون عندها 37او 39 عام، زوينة فوجها، ماشي بحال مي الله يرحمها ولكن تاهي زوينة بيضاء والعينين قهويين وكبار، على اي جميلة وتاتبان عليها الطيبة،، وهادي هي اللي غا تولي مرت با ....... حطات لينا الصينية د اتاي، وسلمات علينا كاملين، ورجعات جابت لينا الحلوى والمسمن......، المهم ضايفونا باش ماقسم الله، من بعد ماشربنا اتاي،.
خالتي زهور الام دسليمة #اوا الله يخلف ويزيد، المهم الالة رقية (اسم المراة الشارفة )،راكي عارفة لاش جينا وراه سبق وهضرت معاك، احنا بغينا يد بنت ختك حياة ولي بحال بنتك لخويا (الحسين)....وراه راجل معقول ماغايخصها تاخير.....وكيف تاتعرفي راه هو عندو بنية ماشاء الله تاهي راه فسن الزواج، الى كتب الله راه غاتولي فمقام بنتك. 
خالة رقية #اوا يكون خير حياة راه فمقام بنتي، وتاهي راه مها عطاتكم عمرها وخلاتها هادي 4 سنين، وبقات بوحدها، اوا ملي جاب ليها الله راجل طيب بحال سي (الحسين)،ماغاديش نرفضو، وبنتو راه بحال بنتها، الله يجعل كلشي مبارك ومسعود،.....
خالتي زهور # اوا يالاه اسيادنا قراو الفاتحة، با وديك حياة جلسو هضرو شوي بحضور الاب والام دسليمة، واخا كبار، ولكن الحشمة باقا فيهم,,,,
صافي تافقو بلي العقد غايكون من بعد شهر .... وغايعملو غير صدقة عادية. 

اوا وكيف الايام كاملين داز داك الشهر، وجا النهار فاش غاتجي حياة، لبسنا ومشينا بحال الاول الصدقة كانت فدارها، بحكم احنا قلال، وكانوا اصلا الناس فالصدقة قلال، تعشينا، ونضنا خرجنا معانا حياة، اثرات فيا فاش خرجات كانت جارة 2 فاليزات وشي كواش مهم دوك الكادوات القلال، ولكن فاش خرجات من دارها، شت عينيها دمعات، مهما كبر بنادم، الحنين ديالو للمكان لي كبر فيه تايبقى فقلبو. اوا جينا للدار انا مشيت مع سليمة، باش نخلي العرسان على راحتهم، فالصباح ناضت خالتي زهور فيقاتنا قالت ليك نديو الفطور لحياة، راه ماعندها حد وحتى خالتها راه ماجاتش معاها ورجعات لدارها لبارح بالليل، انا كان يحساب لي واش ديك حياة غاتكون ديجا مزوجة ساعة راه باقيا عازبة ...... دينالها الفطور لقينا با خرج كيف ديما، وهي جالسة بحكم مازال ماعرفة تاحاجة فالدار، المهم جلسنا فطرنا معاها وضحكنا، وصل الوقت باش سليمة ومها مشاو، وبقيت غير انا وهي فالدار.... نضت جمعت الماعن باش نغسلهم، وتبعاتني للكوزينة..... بغات تغسلهم، قلت لها لا حشومة، غير تولفي. 
بعد شهر #

بديت كانولف على حياة، صراحة صدقات بنت الناس، مسكينة ماتاتخلينيش نحط يدي فالماء، كاتقولي غير قراي ابنتي.......حياتها تاهي كانت صعيبة باها مات فاش كانت صغيرة وتكلفات بيها مها، ولكن تامها مرضات وضطرات تخرج تخدم وهي صغيرة، وقابلات مها وداكشي باش ماتزوجات، وماندماتش، كيف تاتقول رضات مها عليها هي الدنيا وهي اللي غاتنفعها، تفكير زوين......صافي انا بديت كانوجد للوطني مع سليمة، وبقات حياتنا روتينية، كيف ديما......

##############

وصل الوطني ودوزت عادي، مهم داكشي لي حفظت درتو. والكمال على الله. 
من بعد اسبوعين تعلقو النتائج، انا دزت بمركول (ههههه قصدت مقبول)،سليمة بمستحسن. ولكن فرحت مع ذلك اصلا اخرتها لافاك.......... درنا انا وسليمة حفلة، دالنجاح..... اوا وديك الفرحة دالباك لحظية ماطالتش، تاتفرح نهار يومين اسبوع وصافي تاتمشيوهبطت كملت ا،،، رهذا حال الدنيا كل داكشي لراحنا نعيشوه سوى يفرح ولا يقرح تايسالي وتايجي الجديد ....... ورجعت للروتين، ولكن هاد الشهر مختالف شوي.... كنت مشغولة مع سليمة، قرب عرسها........واخا مؤخرا جا راجلها ولات تاتخرج معاه ولكن مع ذلك تانعاونهم فالدار............

نهار العرس #

سليمة #ناري اختي مابقيتش لاغا نتزوج صافي، شاداني الخلغة من صبع رجلي الصغير 
انا #ههههههه الحمقة راه قالت لي حياة تاهي خافت نهار الصدقة واخا كبيرة فالعمر.... ههههه.يعني داكشي راه عادي...... اصلا هانتي بقات ليك غير لاغوب وكاع لبيسات دوزتيهم مزيان وجيتي ماشاء الله عليك.....
سليمة #مانكونش بحالك، مسخوطة جاتك التكشيطة واعرة والله، وحتى هاد الماكياج واخا خفيف زوين.... 
انا #عويناتك الزوينين 
النكافة # بنتي سليمة اوا يالاه راه خاص نخرجوك وراجلك هاهو لبس....

اوا خرجات سليمة، بلاغوب اخر لبسة انا تقبط قلبي، حتى صاحبتي غاتمشي عليا،تخلطو عليا احاسيس عديدة، حسيت بلي انا ماتانملك والو، لازهر لازين، وكلشي خلاني، ومع ان عمري عاد 18 لعام ولكن تانقول علاش ماتانتخطبش، المهم كبت هاد المشاعر لي فيا، وخرجت مورا العرسان، صراحة عرس سليمة داز فوق زوين، سالا العرس مزيان، وخرجو العرسان مشاو شدو الطريق لمراكش قاليك غايدوزو اسبوع تما قبل مايمشيو للخارج....... بقات سليمة تاتبكي ولكن ماتكونش بحالي، بكيت على فراقها، على فراق مراد، على فراق مي، وعلى زهري، عندي كلشي وماعندي والو وليت نحس براسي وحيدة والوحدة ديالي غاتكمل ملي غانعرف حقيقة حياتي.

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.