واخير وصلنا للمدينة لي كانكرها واخا عمرني شفتها، كانكرها واخا مازال ماعشت فيها، يمكن حيت هي المدينة لي فيها قصة منى مي لي معاها بدات قصتي.
فيقت با اللي داتو عينيه، فالطريق، انا حلف النعاس لا جاني، هبطنا، دخلنا لواحد القهوى جنب المحطة دالتران، قالي با اش بغيتس تاكلي قلت لو غير اتاي، شد لينا براد انا وياه، وجبدنا شي حلو ى كنا جايبينها معانا من الدار، درنا راسنا تاناكلو، حيت انا ماعند الماكلة منين دوز، منين قلبك تايكون مريض كلشي تايضياق، وبا تاهو مسكين شرب داك الكاس داتاي هكداك، غير باش يضحك على كرشو ويقولها راني وكلتك، سالينا ونضنا، شدينا طاكسي للحي فين ساكنة مي منى، سمعتو قالو عين الشق، مشات بينا الطاكسي، دغيا وصلنا، هبطنا، دخلنا فشي زناقي حتى وصلنا لواحد الباب حمر د واحد السفلي، دق با ومع كل دقة فالباب تايدق قلبي، ماعرفتش مناش خايفة...... واحد الشوي خرج عندنا واحد الراجل شارف، طاحلي فالبال غايكون راجلها ولكن هذا كبير بزاف واخا باقي شاد فراسو ولكن وجهو باين بلي ديال راجل تكون عندو ديك 60 عام...... وانا تانفكر نطق با بصوت عيان# السلام عليكم اسيدي سمحلنا واش ماشي هنا تاتسكن واحد السيدة سميتها منى.
الرجل المسن بصوت خافت # وعليكم السلام ورحمة الله وبركاته، لا اسيدي المراة اللي كانت هنا قبل منا ماعارفش اسمها، ولكن راه رحلا، دور فهاد الزنقة راه كاين واحد مول الحانوت قديم هنا راه غايكون عارفها.
با # الله يرحم الوليدين سمحلينا.
درنا فالزنقة اللي قالينا، لقينا وح مول الحانوت، سلمنا عليه سلام الله وردها..... سولو با#سمحلنا اسيدي واحد المراة كانت ساكنة فهاد الدار السفلية لي على راس دهاد الزنيقة، اسمها منى،واش ماعرفتيش فين رحلات.
مول الحانوت # اييه، بنتي منى، كانت مراة طيبة، واش نتا من عائلتها، وعلى مافراسي عندها ختها وحدة راه فالراشيدية، وخوها اللي فالحبس، ومها اللي كانت عندها راه عند الله،.....
با # ان لله وانا اليه راجعون، انا من عائلة باها الله يرحمو، هادي بنتي وجينا نحيو معاها صلة الرحم.... واش ماعرفتيش فين رحلات اسيدي.
مول الحانوت # اه غاتفرح بيكم، غير هي راه رحلات عام هذا، مشات لسيدي رحال، شد طاكسي وقولو يديك لطاكسيات دسيدي رحال وغايوصلوك... ولي تنزل وسول على دار موسى البناي، وراه غايوريوها ليك.
با # الله يرحم الوالدين اسيدي.
ترحنا من تما با مسكين عيا وبانت فوجهو، انا كتر منو حتى انني ندمت على قراري ولكن كيف ديما ماجاتش نقولو مابقيتش باغا نمشي، عودنا شدينا طاكسي، غير الطاكسيات كلاونا، هاد المدينة ماشي دالفقراء........وخص قبل ماتدخل ليها خاصة الى ماكنتيش عارفها، فعول على ميزانية غاتمشي غير فالطاكسيات، وصلاتنا الطاكسي للطاكسيات الكبار دسيدي رحال، اوا وشدينا الطري لتما..... من بعد 40 او 30 دقيقة تقريبا وصلنا..... هبطنا وسولنا واحد مول القهوى تما على موسى البناي وفعلا ورانا الطريق لي نشدو، وصيفط معانا واحد الدري باش يوصلنا، شدينا عاود الطريق، حتى وصلنا لواحد البلاصة قريب للبحر ولكن فيها الديور مكرفصين، لا سواتر فيهم لاتكصاص لا والو....... بناء عشوائي، حتى وقفنا قدام واحد الدار مبني فيها غير النص والنص لاخرالسور بلا ضالة، لان لي هادشي تحيت كان بابها محلول.... عيط داك الولد عمي موسى، واعمي موسى شوي خرج عندنا واحد السيد تكون عندو ديك 45. عام ولكن مكرفص، وباينة فيه كماي غير من فمو.
قالو نعام قالو شي ناس تايسولو فيك، دغيا طار داك الولد ماخلاليناش الوقت لي نقولو لو شكرا
موسى # السلام عليكم اش حب الخاطر اسيدي
با # وعليكم السلام ورحمة الله وبركاته، انا كنت تانسول على منى وقالي واحدة مول الحانوت نجي نسول هنا عليك، وغادي نلقاها.
موسى # اه انا راجلها شكون نتوما
لا # من عائلتها......
قبل مايكمل با التقديم، خرجات واحد المراة عندنا # السلام عليكم، مرحبا والف مرحبا بسي الحسين، (اكيد هادي هي منى مي، حيت الشبه بيناتنا واضح واخا هي ملامحها مكرفصة وباينة عليها تمارة)،واش هادي نهيلة بنتي، طاحت عندي عنقاتني بحر جهدها وبقات كاتبوس فيا، انا مابدلتهاش العناق، اصلا ماحسيتش بحتا شي احساس ماعدا الندم، الخوف، الكره،...... تخلطوا عليا احاسيس متناقضة، دخلاتنا لداك البيت، دورت وجهي مع الدخلة بانتلي كوزينة مسقفة بالقزدير، وحداها بيت بالياجور، احنا دخلنا لبيت اخر فيه مفرش ولكن غير الهدادن يعني ماشي سدادر او شي صالون، جلسنا وجات كاتعنقني، وراجلها تايهضر مع با هضرة خاوية وتايبتاسم ابتسامة صفرة...... واحد الشوي جبد الكارو تايكمي قدامنا، با حسيت بيه مارضاش مسكين، شت مونى غمزات راجلها هو يطفي الكارو وتايسوط، ناضت عمرات لينا اتاي وحطات لينا معاه زيت والعسل والزبدة، تاواحد فينا ماقدر ياكل، با غير داق ورجع لور......
مي منى# زيد اسي الحسين مرحبا بيك....
با# الله يخلف ابنتي، ندوزو لمهم، احنا جينا حيت بنتك بغات تعرف عليك وبغات تجلس معاك باش تشوف خوتها ويعرفوها ويولفوها، وانا راه ربيت عليها الكبدة ولكن ملي شتها باغا تجي من خاطرها مابغيتش نخسر لها الخاطر.
منى # خيرك سابق اسي الحسين الله يجازيك بخير، وبنتي مرحبا بيها وحتى راجلي موسى غايديرها فعينيه
موسى #الله اودي مرحبا بيك ابنتي، واخا راك شتي الضيق ولكن تزاحمي مع ولادي (قصد يقول ولادي باش نعرف راسي شكون )
منى # اوا اسي الحسين فين هي لالة زينب علاش ماجاتش معاكم.
منى وعينيها عمرو دموع، وعلاش لا ولالة زينب بقلبها الكبير دارت فيها خير # #-- الله واكبر ان لله وانا اليه راجعون، البركة فراسكم، ماكانتش فراسي اسي الحسين والا كنت جيت فاش عاد مات، اوا هاديك هي بلاصتنا كاملين الله يرحمنا من عندو.......
با# لا مرة اخرى ان شاء الله دابا راني مشغول شوي، واخا ماشتش لوليدات ديالك ولكن مرة اخرى، خليت لكم راحت البال.
موسى # صافي امونى خلي سيد على خاطرو راه مشغول (با ماعجباتوش هاد الهدرة وانا بانتلي من ملامحو ولكن كتمها وسكت)
صافي ناض، انا خرجت معاه انا ومنى للباب، عنقني عناق وداع بحال الى عمرني نشوفو، ماقديتش نحبس دموعي بقيت تانبكي وتاهو، قلت لو شكرا ب ابا وسمحليا بزاف
ماجاوبنيش، جبد بزطامو، حطلي فيدي شي فلوس، اللي غانعرف من بعد انها 1000 درهم، وقالي # داركم محلولة فوجهك نهار تبغي تجي شدي الطريق ولا صوني عليا ونج نديك.
توادعنا، ودخلت مع منى للدار.
بقيت جالسة انا وهي اما راجلها خرج لبرا ، مابانوليش ولادها، ولكن ماسولتش حيت اصلا انا مخنوقة، باغانغوت نبكي ولكن ماقديتش....
شوي سولاتني فاش تانقرا # قلت لها شديت الباك وجلست.
منى # توحشتك ابنتي، كنت ديما تانفكر فيك، سمحليا بزاف ولكن الظروف فوق مني وبقات تاتبكي ولكن ماحركات فيا والو
غير هو جاوبتها # كون كنتي كاتفكري فيا كوراك تاتجي على الاقل تسولي فيا، والظروف ماشي غير عندك، نتي ام، المقطة لي حيوان وكاتهز ولادها بين سنانها وماكاتخليهومش، ماعرفتيني واكلة ولا شاربة، ناعسة ولا فايقة، لابسة ولا عرايانا
منى # سمحليا ابنتي، راه والله حتى الظروف اللي خلاتني ندير هاكا، وهانتي دابا كبرتي والحمد لله لالة زينب و الحسين داروك كتر من بنتهم..... وهاني دابا نعوضك ان شاء
انا# هههه واش تاضحكي عليا انا ك محتاجاك فصغري اما دابا فات الفوت.... ولكن كيف قلتي الحمد لله لي كانت زينب مي والحسين با..... كنت باقا باغا نأنبها ولكن دخلو واحد جوج براهش تايغوتو توام، بنت وولد تكون عندهم ديك 7 سنوات لقاوها تاتبكي وعنقوها ، وبقاو تايبكيو معاها وخا صغار ولكن بقات فيهم، واخا ماعرفينش السبب، ولكن هاديك العلاقة كاتكون بين الام وولادها،عكسي انا واخا هي مي الحقيقية ولكن ماحركات فيا والو ببكاها........ مهم قالت لهم # هادي نهيلة ختكم الكبيرة، وشافت فيا وقالت هادي سلمى وهذا سليم عندهم 7 سنين....(.كيف توقعت،)،سلموا عليا عادي
شوي قالت لي ديري حوايجك فداك الماريو الى بغيتي، وتكاي شوي غاتكوني عييتي..... صافي نضت تكيت حتى جا راجلها عاد فقت، نعست حيت كنت عيانا، حطات لينا الغدا اناماقديتش ناكل..... غير دقت ورجعت اللور.......
اوا مشات ايام وحات اخرى، وكملات 2 اسابيع وانا معاهم،سليم وسليمة بداو تايولفو عليا وانا ومنى، ماتانهضروش بزا، غير الى بغيت نعاونها فشي حاجة عاد كانهضر، تعرفت على واحد البنت اسمها زهيرة، فايتاني بعام، قالت لي بلي تاتخدم فشي معمل فكازا وتايديوهم ويجيبوهوم،واقتارحات عليا نمشي حتى انا نخدم ولكن مازال ماولفت، كاتبقى تعاود لي على صاحبها وقالت لي على شي صاحب صاحبها بانه بغا يتعرف على شي بنت للزواج وقالت لي واش تعطيه نمرتي ورفضت بالطبع، حيت انا وليت كانكره الرجال ومايجي منهم........ با وحياة مرا مرا تايعيطو لي،وموسى نادرا في... تانتلاقاه،وفين ماشافني تايبقا يرمي لي الهضرة....ولكن، فهاد الاخير نقص ولا يقولي بنتي..... حال واحوال هاد السيد.
نهى بائعة الهوى الجزء السادس
محتوى القصة
التنقل بين الأجزاء