صورة مصغرة لـقصة الحوراء

قصة الحوراء

7awra2 Hawra2 qisat 9isat 
رواية الحوراء لغزلان الشهدالي

الاحدات غتكون كتكلم على فتاة بنت الشعب بحالنا كاملين ...غطيح فمصيدة المراهقة ... ماشي مراهقة نور و رميساء وجودية .. لا ... المراهقة فالحياة الواقعية .. غتطيح ضحية للعوامل العيش ديالها ...وغتغرق فبحر القدر لي لاحها فتيادي غير آمنة تحت قناع الحب و غادي يخصها تجدف نحو بر الامان ...شنو هما هاد العراقيل لتعرضات ليهم ؟ واش غتقدر توصل للبر الامان سالمة ؟ تبعو معيا وغتعرفو ...

الدنيا صعابت وخيابت... العيشة حرارت و مابقات بلاصة للضعيف... ولات كيف الغابة عايشين فيها غير الدياب .... شي كيغدر بشي .. وشي ياكل شي ... وشي يطعن فشي ... مشات النية فالعلاقات وكولشي ولا بالمصلحة ... لا بين العائلات لا الصحاب الى من رحم ربي... لي جمع 2 دراهم كيصحاب راسو ماعرت اش دار غهاد الدنيا وكيطغى ... ونسى بلي كولشي ديال الله وكيفما عطاك غياخد ليك .... وفرمشة عين .... ااناس تابعين غير المال والجاه والمصالح .... والاشرار فينما مشيتي كاينين ...ياخدو منك لي بغاو وبلوحوك كيف الجرتيلة ... مابقات تقة ... مابقى امان .... مابقاتش النية . 
حوراء كتوشوش لختها بسمة: اووووف ها هو هاد باك بدا علينا تاني فالمحاضرات البايخة ديالو 😠 
بسمة : كوني تحشمي باك هداك ... وكلامو معقول ونتي باقية صغيرة ابنيتي باش تفهمي هادشي... 
حوراء : 18 ابنيتي اشمن صغيرة ... انا نقريك الدنيا واشنو فيها ...
بسمة: قلتها حتى انا لي فعمري 21 عام ... نوضي تهزي جمعي الماعن ... قالت ليك تقريني ... الله يعطينا وجهك... 
حوراء: سيري جمعيهم نتي نيت ... حيدي عليا نمشي نعس ... 
بسمة: نوبتك البرهوشة ... واش ديما تلصقيهم فيا او ... 
حوراء: عادي متغسليهمش... 😏😏
ناضت وخلاتها كتفقص و تغدد ....
سناء الام: نزضي ابنتي غسليهم نتي راه ديك الكرنيسة ديما معندا خاص والديها نعود فيها التربية ... 
عبد الرحيم الاب: قلت ليك شحال هادي ... قصحي معاهم ومتبقايش راخيا ليهم هاوحدة خرجت ضاسرة .. لا قراية لا تاحاجة غير كتضيع فوقتها مخرجتش لخوتها.... 
سناء: واصافي دابا دير عقلها راه هي الصغيرة زعماا
ناضت بسمة على وعدها وسعدها جمعات الماعن و مشات تغسلهم (ديما بين الخواتات كتكون واحد البيتش لي حاااسة براسها وفيها العياقة ومكتبغيش دير الشغل و غالبا هي الصغيرة وكتخليك ديري كولشي وهي كتبقى ناشرة رجليها ..انا عندي 2 😭😭 )
اما حوراء دخلات لبيتها لي كتنعس فيه هي وختها...
تكات فوق الناموسية وهزات تيلي لقات ميساج فواتساب من الساط ديالها... 
عادل شهراين باش تلاقاتو قدام الليسي ديالها ... الوقت لي كان خاصها تكون فحصة المات .. ولكن حيت مكتبغيش هاد المادة كتمنك ليها وكتخرج دور حتى كتفوت وترجع ... كان دايز بطوموبيلتو ... وهي كانت واقفة مع بنات وولاد ... ضرب عليها من لوطو وهي تبسمات ليه ... مكانش من العاجزين ومزغلهاش ... هبط من لوطو ومشا لعندها وهي تقدمات ليه ... وتعارفو تبادلو النماري ومن داك الوقت وهما كيخرجو ويتلاقاو وبطبيعة الحال ورى عائلتها... 
عادل: الحب ديالي ..
حوراء: نعام احبيبة ... 
عادل: توحشتك ... اش كنتي كديري..
حوراء؛ والو غير كنتعشى مع دوك القوم ... 
عادل: مبقى والو ونهنيك و نديرو دارنا انا وياك مايبقى حد ينغر عليك وتعيشي نتي مولات الدار ونرجع من الخدمة نلقى مراتي كتسناتي ونعيشو حياتنا ونديرو ولادنا ... 
حوراء: بالصح بالصح احبيبي 😍😍.. اووف وامتى مابقيتش قادرة نصبر 
عادل: غير صبري شوية نقاد شي امور ونخطبك .. 
حوراء: فرحتيني احبيبي 😍 
عادل: والى فرحتك .. صوري ليا راسك ووريني حبيبتي اش لابسة ... 
حوراء؛ ههه اويلي غير بيجامة اش بغيتي تشوف فيها ..
عادل:دابا غير صورة عادية مابغيتيش ... صافي عاادي .. 
حوراء: ودابا مالك تقلقتي .. نتصور لحبيبي ياله .. 
عادل: بلا زيف .. 
خدات سمية تصويرة ليها ببيجامتها قصيرة وطالقة شعرها وصيفطاتها ليه... 
عادل: احححح هادشي كولو ديالي😍😍 ... مطا عليا امتى ونشدك منطلقكش .. 
حوراء غير قرات لميساج وقلبها بدا يرفرف والضو كيضور فجسمها كامل... وبدات كتلوى فالسرير بالفرحة ..وعاد جاوباتو ... 
حوراء:: حتى انا احبيبي مطا عليا امتى نكون مراتك 😍
عادل: مبقى قدما فات احبيبة ... مهم غدا ندوز عليك ..معاش خارجة.. 
حوراء: قارية العشية خارجة حتال 6 ولكن نخرج قبل على قبلك ... 
عادل: صااافي مزيان احبببة ... تصبحي على خير ..غدا خدام 😘😘 
حوراء: تصبح على خير احبيبي 😘😘 ديكونيكطاو حطات تيلي ...

بفم حوراء: اممم سلام ...انا حوراء ...حوراء العماري ... بنت الgحيم العماري ... بغيت نقول عبد الرحيم العماري و سناء العماري ... عندي خويا الكبير يوسف العماري .. جدارمي نسخة طبق الاصل على بابا مكيتفاهموش بالهضرة ودبما مخنزرين الله يحضر السلامة .. عندي ختي بسمة ضريفة وحنينة واخا دبما مضاربة انا وياها ... كتقرى التمريض... وعاد انا حوراء ... هاد السمية لي مكنحملهاش ... سماها ليا عمي لي اصلا مكنعرفوش مات منين كانت عندي عام ...طان ادبي وشاعر و مات بكسيدة ... قالك سماني حوراء حيت شعري وعينيا كوحل و بشرتي بلقاء ... وحيت عزيز على بابا خلاه يسميني .. مفهمتش اش هاد السمية العجيبة ماكابنش لي سمعها ومضحكش عليها .. ابلاتي .. حتى نتزوج ونشوف راجلي يعاوني نرفع دعوة ونبدلها ... مهم خليوني دابا نقرى شي قصة من دوك القصص نتعلمو الحياة الزوجية ونحلموشوية 😅😅
✋انا الكاتبة لي غنكمل دابا ..... بقات كتدور فالفيس ... بانت ليها قصة من القصص لي موالفة تقراهم ... 
وجبداتها تقراها ، كتقرى وكتخيل بلي تاهي غتزوج بعادل و غايعاملها كيفما كيعامل البطل البطلة ..يدير ليها مفاجآت و كل يوم كادو ويغنجها ويتهلا فيها يسفرها ويغرقها حب ورومانسية ... تعيش فدارها ديالها.. ودير وليدات ... تلقا داك الصدر الحنين لي تخشا فبه كل ليلة ( 🐸) قرات اجزاء كتوصف الحميمية بين الزوج والزوجة .. بقات تقرى وتخيل ... كتخيل راسها فداك الوضع مع حبيبها .. قلبها كيضرب ووجها كيتبسم ... وهادشي مغايقودها غير للعادة السرية باش تبرد نار لي شعلاتها بايديها .. بدات كتمارس ..و هي فوق سريرها و غارقة فعالم احلام الزهور ...(او على الاقل داكشي لي كيبان ليها هي ) تحل عليها لباب و هي تقفز ...

بسمة دخلات بالزربة ويدات الباب وطارت على ختها .. 
بسمة: اش كنتي كديري يالحمارة ... 
حوراء: و والو ...غير كنت .. 
بسمة؛ من امتى ونتي كديري هادشي ...
حوراء: شي 3 سنين 😔😔 
بسمة: آخر مرة نشوفك كديري هادشي .. راه غير غتخرجي على حياتك المستقبلية ... راك كتهضري فصحتك صافي .. وزايدون حرااام ... وتقدري تادي راسك .. وديري شي مصيبة ... وديك الساعة شوفي شكون غيتيقك .. واللهلا رحموك .. وغيتوصم عليك وصمة العار وعديمة الشرف ... سمعتي اخر مرة ديري هاد الفعلة .. 
حوراء: وصااافي فرعي ليا راسي حتا نتي ... باك ينغر نتي تنغري خوك غير كيخنزر ويضرب .. او رحمونا شووية فهاد الدار راه قهرتونا ... الواحد هو لي يزيد ويخلي بوكم ..تفو تريكة .. 
ناضت خرجات من البيت .. 
بسمة: هاد فليفلة غتجيبها فراسها بهاد الطيران لي فيها .. نمشي نعس احسن ليا ... 
مشات حوراء للمرح وشعلات تيفي ودارت مسلسل تفرج حتى دار ساروت الباب ودخل يوسف خوها ... 
يوسف؛ 1 هادي نتي باقية فايقة ... 
طفاتو وناضت : انا غنعس .. 
يوسف: فايقة غايقة سيري سخني ليا عشايا .. 
حوراء: واخا ... 
داخلة للكوزينة كتنفخ : هاد الزمر مهرس تفو .. كولشي نديرو ليهم انا فهاد الدار 😡 
سخنات ليه طويجين ديااو وجابتو ليه هو والخبز ... 
حطاتو وتمات غادية وعيط ليها .. 
يوسف: كتقراي مزيان ولا عاطياها غير للتفلية والضوران .. 
حوراء: لا كنقرى ... 
يوسف: احنا غنشوفو .. نحصل مك تاني مع شي واحد نهرس لوالديك دوك الرجلين ... ديها فقرايتك هي لي غتنفعك ..
حوراء: واخا اخويا ... تصبح على خير ... 
مجاولهاش جلس بتعشى ... دخلات للبيت وتكات فبلاصتها و كتسب وتنغر ... 
🌄اصبح الصباح🌄
العائلة مجموعين كيفطرو الا حوراء لي باقية ناعسة حيتالصباح عندها خاوي .. تفرق المجمع وكلها قصد قرايتو ولا خدمتو الا سناء لي ربة بيت ... مقارياش ومزوجة غير زواج تقليدي .. 
جمعات الماعن ودخلات للكوزينة غسلاتهم و نصبات الغداء .. وجمعات الدار وسيقاتها .. حتى وصلات 11 ونصف عاد نايضة وحدة ... خارجة من البيت كتجر رجليها وتحك عينيها .. 
سناء: عاد طفات عليك الشمعة .. 
حوراء: ماما الصباح هدا .. 
سناء: اشمن صباح تي قولي الظهر هدا .. 
حوراء: كاين شي فطور ... 
سناء: قولي واش كاين شي غدا ... 
حوراء: بالناقص غااع ... 
دخلات لبيت وسدات عليها ... جبدات حوايج لي غتلبس للمدرسة .. شوميز غوز من الفوق توبها رهيف وفيها حجيرات فالكول ديال ختها و سروال دجين بلو مارين خدات بينوار ومشات للحمام ديال الدار دخلات ضرباتها بتدويشة .. لبسات بينوارها ورجعات للبيت .. نشفات شعرها ولبسات حوايجها وخرجات لبرى لقات باها وختها جاو .. جلسات معاهم وحطات مها الغداء .. اما خوها مكيجيش للغداء .. تغداو فجو صامت .. غير تلفازة لي كتهضر .. ناضو من بعد .. دخلات حوراء للبيت لوات فولارعا ولبسات الصباط والطابلية .. قادت صاكها .. هزات ماكياج ختها من مجرها .. رشات الريحة .. وخرجات .. 
حوراء: انا مشييييت .. 
خرجات حتى التحت ... حلات الباب ومشات دغية دارت مع الدورة ووقفات قدام دار عشيرتها سلمى كتعبط ... 
حوراء: سلمىىى ... وهبطي اصاحبتي راه معطليين .. 
سلمى كطل: وااخا تسناااي اصاحبتنا او ... 
بعد شوية هابطة كتدردغ ... 
وتسالمو... سلمى: وفين العشيرة .. 
حوراء غاديبن وكيهضرو: هاحنا .. نتي سافا... 
سلمى: حمد الله .. طيحت واحد الهبيل البارح .. بااينة غنحلق على المصيريف هاد الايام 😂😂
حوراء: نتي هامك غير الفلوس .. انا يعيشني غير فبيت المهم يغرقني حب وحنان باااركة عليا 😍😍 
سلمى صبعاتها: ها الحب ... هااا الحنان ... ناس كيقلبو على مايشبعو فكرشهم ونتي كتقلبي ليا على الخرايف ديال القصص ... راه مكاين لاحب لازمر .. الى لقيتي 2 مصاحبين .. فكل طرف عندو الاستفادة و الذكي فيهم كياكل لاخر .. هادي هي حياتنا الحالية .. 
حوراء: الا عدولتي الحبيب ديالي .. هداك كيبغيني وكنبغيه وقريب ان شاء الله غنتجمعو فالحلال ... 
سلمى: صحايبتي ردي البال لراسك .. انا علمتك ميغركش داك الحب وداك الوجه البريئ هاد النوع هو لي تخافي منو اطوووونسيوون 
حوراء: هههه زدتي فيه كنعرفو هادي شهراين عمرو اداني ولا خرج العيب... 
سلمى: وعلى غادي يخرج العيب من الاول .. غيتسنى حتى يوزنك ويعبرك ويعرف طينتك ..عاد يعرف اش يدير معاك ... 
حوراء: نقصي الافلام الدرامية احبببة راه حتى المود دراما عندك ولاديما مآكتيفي 😂😂 
سلمى: غييير زيدي .. عااارفة راسي كنكب ااماء على الرملة ..
دخلو لليسي و بقاو مجمعبن فالساحة حتى جا البروف ودخلو .. كيف العادة عاطيننها غير للحتيت والضحك هنا ولهيه .. حتا كتسالي الحصة ... سلات الساعة وخرجو ... 
سلمى: اش بان ليك نخرجو ... مافيا لي يدخل شي ساعة مزال .. 

حوراء : حتى انا .. دابا ياله3 ... نخرجو نتسركلو .. ونرجعو مع 4 حيت دايرة مع عادل غيجي عندي ... 
سلمى: اووف عادل تاني .. واخا الالا... غير زيدي ... 
خرجو لبرى و مشاو كيتسركلو ...وقفو خداو بانيني للوحدة .. وكملو طريقهم ... غاديين ويضحكو بالجهد .. يشدو فهادا وفهادا .. ولي داز من حداهم يلوح كلمة .. سلات ساعة ورجعو لليسي نيشان للحمام .. 
حوراء: سربي سربي .. الطابلية حتى نخرج ونحيدها ..مفيا لي يضارب مع داك الشارف لي فالحراسة تاني .. اشمن عكر ندير ... 
سلمى: الكورال كيجيك زوين مع وجهك .. رصاي نصايب ليك اليلاينر ... 
حوراء: واطلقيني ... 
سلمى: صافي .... كتحمقي نتي حسن من داك بو خنونة ... ماعرت اش عاجبك قيه ... 
حوراء: عاجباني رجولتو... والحنان لي ملاقياهش وسط دوك العائلة ديال المرض ... ديما كلامو حلو وكيدير ليا لي بغيت .. مكيخلي مايشري ليا وفينما بغيت كيديني ... شحال من بلاصة عمري عتبتها حتى وراها ليا ... ديما كنحمد الله ونشكرو عليه نزيدك ولا براكة؟ ... واخر مرة تعايريه ولا غنخسر معاك ... 
سلمى : واخا الالا .. عالله غير يكون نيت ناوي الحلال .. مهم بسلامة ... نمشي نشوف ليا شي فيكتيم اخر ... 
حوراء: مكتشبعيش ... نتعايطو باليل 😂😂 
سلمى: بااي ... 
خرجات سلمى وحوراء جاها اتصال من عادل ... خرجات كتجري ركبات لوطو و ديمارا بيها ...

هبطو فواحد الكافي ... هبطو و دخلو خداو طبلة معزولة باش ياخدو راحتهم ... 
عادل: توحشتك احبيبة ... 
حوراء : حتى انا ... 
عادل: كيف غادية مع القراية ... 
حوراء: بلا متجبدها ليا يخ تفو ... مابقاتش كتدخل ليا لراسي نهائيا ... بعيت نجلس منها وبابا مبززها عليا ... تفو حياتي وباغيين يتحكمو فبها ... داكشي علاش بغيتك تهضر مع عائلتك دغيا باش تخطبوني ... 
عادل: اليوم نهضر معاهم متخافيش احبيبة .. والقراية ماشي مهمة نتي بنت مستقبالك هو راجلك وولادك وتقابلي دارك ... مهم كتعرفي تقراي وتكتبي .. (عزى مك 🐸) 
حوراء: عندك الحق .. راجلي وولادي ..هههه ... 
عادل: هههه علاش كضحكي ... 
حوراء: ماعرت عجبتني هاد راجلي وولادي ههه 
عادل: هههه ومالك انا راجلك ونتي مراتي .. 
حوراء: كنبغيك اراجلي هههه ... 
عادل: راجلك ومكديريش ليا خاطري ... 
حوراء : فاش ... 
عادل: البارح ماسيفطتي ليا تصورك حتى تقلقت زعما ماتعطيهمش ليا بلا متشحفيني ... 
حوراء: غير حشمت زعما .. مابيناتنا حتا حاجة رسمية ... على الاقل خطوبة بعدا ... 
عادل: والى خطبتك ديري ليا خاطري ... 
حوراء: حتى لتما ونشوفو .... 
عادل : كتحمقيني ... 
تبسمات ليه و شربات من عصيرها وهي غطيير بالفرحة ... 
عادل: واشنو ماغديري والو ... البنات الى قاليهم خطيبهم شي كلمة زوينة ... كيبوسوه ولا يعنقوه نتي والو ... 
حوراء: ناااري اي حاجة تقلق عليها ... ياله ارى ليا داك الحنك ... 
قرب لبها وباستو فحنكو ... 
عادل : وازيديني وحدة اخرى ... 
حوراء جات تعاودو ودور وجهو دغية جات في شفيفو ... وهي ترجع لور ... 
حوراء: اش درتي ... حشومة .. 
عادل: هههه مالك راه غير بوسة ... شكون لي مكيشلقمش فهاد الوقت ... وزايدون عاجلا ام أجلا غنتزوجو مكاين لاش نبقاو دايرين الحدود بيناتنا ... انا كنبغيك و مغنتخلاش عليك .. تيقي فيا احبيبة ... 
حوراء: انا تايقة فيك ... غير هو حشومة قدام الناس ... 
عاادل: مممم واخا احبيبة ... ولكن كتحمقي بلا زيف كون غير حيدتيه ... 
حوراء: مادايراهش غير باش نسكت بابا وخويا ... مولفة غير كندخل ليسي نحيدو غير نسيتو ... (وهي تحيدو ) 
عادل مد ايدو وطلقو : اااح على السوالف الكوحل ... كتحمقي... كلك كتحمقي ... 
حوراء: شنو دابا خاصني نبوسك هههه ... 
عادل: ههههه نوضي نمشيو ... 
ناضت معاه حط الخلاص و خرجو ركبو لوطو .. و ديمارا ... وقف فجهة البحر ... خاوي مكاين حد ... وطلق المزيكة ... 
عادل كيهضر وكيدوز على شعرها: احبيبة .. شحال بغيتي نديرو ديال الولاد .. 
حوراء: ههههه مكرهتش شي 4 ... جوج بنات وجوج ولاد ... 
عادل: مممم ونزيدو واحد سوكور ... 
ضحكات حوراء وقالت: اياه علاش لا ... 
قرب ليها بلمساتو بايديه فشعرها وهي عينيها فيه ... كتشوف فيه المنقذ ديالها .. منبع الحنان لي مامعطيش ليها ... دايرا فيه تقتها العمياء ... وكتسنا اليوم لي غيجمعها بيه بفارغ الصبر .. 
دوز ايديه من شعرها لحناكها ... باصابعو كيدوز عليهم حتى حط ايديه على شفايفها و هي دايبة فعينيه و كلام الغزل بفمو ...قرب ليها و قبلها ... مشات معاه تحت تأتير المغناطيس ديالو ... وبداو ايديه يتساراو فجسمها حتى فاقت و دفعاتو كتمسح في فمها .. 

حوراء: و ... واش ..حماقيتي ... هادشي حرام ... حتى نتزوجو ... 
عادل: واايلي حتى نتي .. اشمن حرام .. ولا الباكور ... هذا زماننا تاحاجة مابقات حشومة ولا حرام ... اصلا غنتزوجو ونتي ديالي ... وانا كنعتابرك مرتي من دابا داكشي علاش مرتاح معاك و كنتصرف معاك باريحية حيت كنبغيك وكنتيق فيك ولكن نتي بان ليا العكس ..
حوراء: لا .. اش كاقول بالعكس نتا الوحيد لي كنبغيه ومستاعدة نضحي بكولشي على قبلك .. ولكن كولشي بوقتو .. وتكون علاقتنا رسمية على الاقل .. 
عادل: واخا الالا .. مهم غنرجعك دابا عندي مايدار .. 
حوراء: دغيا باك قلتي ماعندك مايدار .. 
عادل: لا راه تفكرت واحد البلان احبيبة .. 
حوراء: واخا على خاطرك .. ولكن اليوم غتهضر مع داركم باك ..
عادل: اااه .. 
حوراء: ههه وااخا .. 
وصلها لحدا دربهم وهبطات مدرقة و في فولارها لي دارتو فالسيارة .. درقات فواحد القنت ومسحات الماكياج ولبسات طابليتها و مشات لدارهم دقات وحلات ليها مها .. 
حوراء: سلام ... 
سناء: على سلامة ياله واصلة .. 
حوراء: كنت مع سلمى داكشي علاش .. 
سناء: دخلي دخلي ... 
دخلات دغية للبيت حيدات حوابج ختها قبل ماتجي وحطاتهم فالماريو ولبسات بيجامة و خرجات ..
حوراء: فيا جوع .. 
سناء: تسمايني نوض ندير ليك تاكلي من صغيراتك ابنيتي ... سيري راه الكوزينة ديري اتاي وقطعي كيكة راه صايبتها هاد العشية .. 
حوراء: اووووف هاهي .. 
سناء: نهضر معاك بداي تأفأفي اقليلية الترابي .. 
دخلات حوراء للكوزينة حطات الماء يطيب ... وشدات تيلي ديالها مكونيكطيا .. حتى طاب الماء وعمرات اتاي وخرجات للمرح حطاتو و رجعت قطعات كيكة وداتها لفوق الطبلة وجلسات تامل وماماها حداها كتخيط شي زواقات هادي صنعة علماتها ليها امها ديما كاشغل راسها بيهم وكتبيعهم للخياطات .. 
حوراء كناكل وكتفرج في فيلم هندي ... 
شافت فيها مها وقالت .. 
سناء: نتي باله قابلي ليا غير الافلام والمسلسلات تمنيتك يا بنيتي تنوضي راسك وتشدي شي دفتار .. راه الامتحان مابقى ليه والو ... شتك مامسوقاش
حوراء: صافي اماما .. حتا يقرب ويحن الله .. اصلا شحال من مرة كنقول ليكم مابقاش غندي الدماغ لي يقرى .. ننوما لي مصدعبن ريوسكم ومصدعينا معاكم .. 
سناء: اوويلي باقا كتقول فهاد الهضرة ... والى جلستي ليا لمك هنا اش غديري بسلامة .. 
حوراء: نتزوج وندير داري ... 
سناء شافت فيها شحال وقالت: اهياتا .. 
حوراء كدور فعينيها: مالك .. 
سناء: اش قلتي دابا .. * قرصاتها* كتعرفي شي حد ..
حوراء : ا..اا.. لا ... زعما اه.. 
سناء: اويلي على بنت الحرام فين كتعرفيه .. 
حوراء: اححك اماما بلاقريص غنتقول ليك .. 
سناء: باله طلقيني .. 
حوراء: انا مكنعرفوش .. زعما شحال من مرة كنكون راجعة من ليسي وكيوقفني ..
سناء: ونتي ابنت الحرام كتوقفي ليه .. 
حوراء: لا اماما بالعمى ... ديما كنخلو .. ولكن اخر مرة قاليا غيعلم عائلتو وغيجي يخطبني .. باينة فبه اماما ولد الناس ..
سناء: لا لا ابنيتي مارتاحيتش لهادشي كنعرف ولاد الناس كيمشيو يهضرو مع والدين البنت ماشي يوقفها فالزناقي .. وشكون هذا .. كنعرفوه من الدرب ؟ 
حوراء: ولد الدرب .. شكون داها فهاد بوزبالات .. هذا راه ولد عائلة .. بطوموبيلتو و خدمتو و واجد موجود وماساكنش هنا عندو دار ف****** 
سناء: وهانتي لمك باركة تكدبي تاني ياك عاد قلتي مكتعرفبهش و عمرك شفتيه ... منين جبتي عليه هاد الهضرة كاملة 😡
حوراء: ا..ا..ز..زعما ... منين اخر مرة هضرنا قال ليا هادشي فهمتي .. 
سناء: شوفي فيا اخر مرة تجبدي هاد الموضوع ماحد ماكاين والو .. غتبقتي تمشي نيشان ليسي وترجعي لداركم متوقفي لحد وماتيقي فحد هاني كنعلمك راه الدنيا عامرة بالذياب وولاد الحرام .. هادشي انا مارتاحيتش ليه والى بقيتي كديري لي فراسك غنقولها لخوك هو لي كيعرف ليك ... وديها فقرايتك اما الزواج باقية صغيرة عليه... مافيا لي يتصادع مع باك بسبابك تاني لي فيا مكفيني😡😡
حوراء دورات وجها بالزعفة معجبهاش الحال .. كملات الفيلم ديالها وهي غير كتخمم كيف غدير لهادشي حتى دخلات ختها .. 
بسمة: السلام .. 
سناء: وعليكم السلام ابنتي .. سيري بدلي حوايجك واجي ترتاحي..
دخلات لبيتها حطاتصاكها وحلات ماريوها تجبد بيجامتها ولقات حوايجها لي كانت لابسة ممطويينش هزاتهم شماتهم لقات فبهم ريحة الريحة وهي تغوت 
بسمة: حوراااااء 😡😡 
حوراء: اوووف بدينا تاني 

ناضت عندها ووقفات عليها.. 
حوراء: مالنا .. 
بسمة: هزيتي حوايجي تاني 😡 
حوراء: لا .. 
بسمة: وا باراكة من الكذووب فبهم ربحتك الكلبة ... وشدي صبنيها دابا ياله .. واخر مرة تهزيهم عندك حوايجك ازمر تفرقي من حاجتي ... 
حوراء: تي مالك درتي لينا فضيحة اري لهنا ..لي سنعك يقول كتلبسي ليا غير من زارا وgucci ... فو على غنس.. 
بسمة: راه غنطير على مك نتفك... تفرقي ليا من زمري ولاراكة من تخراج العينين .. ياله غبربها .. 
سناء: مالكم تاني اش كااين 😡 
بسمة : خدات ليا حوايجي تاني 😡😡 
سناء: مال مك نتي كطيري .. واش ياله غنرجع ليك للضرب راه كبرتو مغاديروش عقلكم ؟ 😡 انا هذا الله صافي عييت من صداعكم ... 
بسمة: صافي هادشي لي بغيتي هانتي غطلعي ليها السكر .. صافي اماما غير رتاحي ما وقع والو .. 
خرجات سناء كتنغر ... بسمة سيري صبنيهم واخر مرة تهزيهم .. ضربات فيها ومشات .. 
حوراء: الله يطيركم عليا تفو .. مكاينش نهار لي بدوز بيخير معاكم .. 
هزات الحوايج بالنفاخة ومشات تغسلهم .. نشراتهم فالبالكو و رجعات جلسات معاهم فالمرح .. 
شوية قالت سناء: حوراء آجي عاونيني ابنتي .. 
حوراء: معنديش مع داكشي اماما .. راه الاخرى حداك هي تعاونك.. 
سناء: نتي لي كتعرفي و زواقاتك كيخرجو غزالين احسن من ديالولي .. نيت ضوري الحركة حتى نتي مالك .. 
حوراء: مابغيتش نحفي فعينيا على 2 فرانك بالناقص و اصلا مفياش ... 
ناضت ودخلت للبيت سدات عليها .. 
بسمة: ناري هاد البنت عندكم شحال صعيبة وقبيحة .. 
حوراء: مافهمتهتش ديما معصبة ورابطاهم .. هاد البنت خالعاني ومشوشاني مالقيتكمش صعاب نتي وخوك قدما هي صعيبة الله يهديها ياربي ... 
بسمة: راه غير حيت الصغر .. ماديش عليها دابا دير عقلها .. 
سناء: امين .. نوضي ابنتي ديري العشاء ما قديت نديرو .. 
بسمة: واخا اماما ... 
حزدوراء جليات فالشرجم كطل على الدرب وكتفكر حتى بانت ليها سلمى دايزة وصفرات عليها ... 
هزات راسها وقالت لبها .. 
حوراء: طلعي الموصيبة .. 
سلمى: واهبطي حلي الباب ... 
مشات حلات الباب ودخلات عندها .. 
سلمى: نصحابك باقي مرجعتي .. 
حوراء: اويلي 8 هادي اش غنكون باقية كندير برا .. راه الوالد وحويا غير حتكين عليا هاد الايامات منين حصلني خويا كنتسركل وقت القرايا .. 
سلمى: نتي ابنيتي لي باركة تسكلي غير حداهم ناس لى بغاو يظيرو المغامرات راه كيبعدو ...نتي راه غير كليخة ابنيتي مهم اش درتي نتي وداك عويديلة ديالك .. 
حوراء : هههه طلعي لا يدخل بابا يلقانا هنا بعدا .. 
طلعو ب2 دخلات سلمى سلمات عليهم ودخلات هي و حوراء للبيت وسدو الباب .. 
حوراء: ناااري مك اليوم حرق البلاكة معايا ياصغعة .. 
سلمى: ناري متقوليهاش .. اش دار ..
حوراء: متخافيش والو غير بوسة .. 
سلمى: واش لمك تسطيتي 😡😡 علاش خليتيه انا كنتصاحب مع 3 فدقة وعمر ولد المراة محط هليا يديه جا ميخي و خليتيه يبوسك الحمارة 😡 
حوراء: اولا هاذاك ماشي ميخي مالو زوين كولشي البنات كيموتو عليه ... وراجل و باغيني للزواج كون كان كيتفلى ما يقولهاش ليا ويظل نهار كولو وهو كيهضر على الزواج و الدراري وزايدون اليوم غيتاصل بيا ويعلمني امتى غيجيو يخطبوني .. 
سلمى: العجب .. واخا هكاك متيقيش و عمرك تهليه يقرب ليك راه كيتمسكنو حتى كيتكنو ولاد الكلاب كلهم بحال بحال .. (بطبيعة الحال لا كاينين ولاد الناس واخا قلال) 
حوراء: عادل غير شي والله راه غير مكتعرفيهش .. 
سلمى: كنتمنا .. كنقولك هاد الهضرة حيت نتي صاحبتي لانتيم واسراري مكاينش لي كيعرفهم من غيرك و عزيزة عليا دتكشي علاش كنبهك راه دزت على غاع طينات بوركابيات وكولهم يابنيتي عندهم عرض واحد كنشطحهم عليه وكنخسر على مهم غير بلوك .. حيت كيستاهلو كيسحاب ليهم ريوسعم غير هما لي كيفكرو وكيفهمو .. و نتي ابنيتي قاابلة لهادشي حيت نية و كتخدمي العاطفة ديالك وهادشي ممسلككش ابنيتي فهاد الدنيا .. 
حوراء :سلمى نتي صاحبتي متخصريهاش معيا بهاد الهضرة راه عائلتي نافرة منهم غير بسباب هاد كترة المحاضرات والنغير 😐 
سلمى: كولشي لمصلاحتك احبيبة .. مهم حضي راسك ..والله يسهل عليك ويكون نيت ولد الناس ناوي المعقول .. 
حوراء: متخافييش .. قولي ليا غير نتي اش درتي .. 
سلمى: ههههه واالو متشد ليا حتى واحد النهار كولو وانا نتزريط بين الزناقي... واقلة قاديتهم 😂😂😂 
حوراء: هههههه باراكة عليك غير دوم 2 دابا اش باغا اكتر 😂😂 مافهمتش كيف كاديري ليهم عمرك حصلتي 
سلمى: عااارفة اش كندير متخافيش عليا .. مكاينش فيهم لي نيتو صافية والو تمنيت نتلاقا شي ولد ناس نيت واللهتا نمشي معاه بنيتي ولكن خسارة والله .. 
حوراء: غتلاقاي ولد الناس اختي غير نقصي من التخلويض راه نهار تحصلي واللهتا تشوهي .. 
سلمى: ختك حافظة صواريها متخافيش عليا .. مهم نخليك دابا قبل مايحي هتلر راه تانا حاط عليا 😂😂 
حوراء: سيري ابنيتي الله بعفو علينا منهم محررين فينا العيشة .. 
سلمى: نتلاقاو غدا .. 
خرجات سلمى وهزات حوراء تيلي حيت عادل كيعيط ... 

حوراء: الو حبيبة .. 
عادل: زين ديالي سافا .. 
حوراء: نقولو صافا وانت .. 
عادل: صافا .. مهم عبط ليك نعلمك بلي راه والدية غيجيو يخطبوك .. 
حوراء: بالصح بالصح 😍😍 واش بالصح كتهضر .. 
عادل: اااه احبيبة يسحابلك انا كنلعب ولا كنتفلى علبك ..
حوراء: انا من ديما كنتيق فيك احبيبة ... دابا غيخصني نعلم واليديا باش نحددو يوم الخطبة .. 
عادل: بغيت فاقرب وقت .. السبت الجاي ان شاء الله غنجيو .. 
حوراء: صافي واخا .. مرحبا بيكم 
عادل: ياله احبيبة نخليك .. 
حوراء: بسلامة .. 
قطع هو وهي ناضت كتنقز فوق السرير حتى دخلات ختها .. 
بسمة؛ مالك ابنيتي ملاعباش فصغرك .. 
حوراء: دخلي دخلي وسدي الباب .. 
بسمة : مالك اش كاين تاني .. 
حوراء: لاول مرة فحياتك تصنتي ليا بلا نغير وغوات احمباك .. 
بسمة: خلعتيني اش كاين .. 
جراتها جلساتها قدامها: بغيتك تعاونيني واحد الدري بغا يخطبني .. 
بسمة: اشناهوا .. 
حوراء: هضري بالشوية ازمر .. السبت الجاي غيجيو هو وعائلتو وانا عطيتو الموافقة وباقي مافاتحتهم .. 
بسمة: وشكون هذا وفين كتعرفيه .. واش قاري وخدام واش واجد للزواج ولا غير كيلعب .. 
حوراء: بصراحة نتي ختي وغنتيق فيك وغنقولك كنعرفو هادشي شهراين .. بان ليا ولد الناس وظريف و خدام و عندو دار وطموبيل ماخاصو والو الحمد الله ... وهضرت مع ماما قبايلة و مفهماتنيش وغوتات عليا .. عاافاك نتي مفاهمة معاهم قنعيهم ليا الله يرحم ليك الوالدين ... 
بسمة: ولكن اختي قرايتك .. 
حوراء: راكم عارفيني ماباغياش نكمل ديك القراية غير مبززين عليا وصافي .. انا غنتزوج ونشد داري كافيني .. 
بسمة: صافي انا غفاتح ماما فالموضوع ونقنعها تهضر مع بابا و خويا فالعشاء ..الله يخرج هاد الليلة بيخير .. 
حوراء: ناري واللهما نسا خيرك .. 
خرجات بسمة لعند ماماها ... وحوراء بقات كطل .. 
بسمة: ماما .. 
سناء: نعام ابنتي طفيتي على العشاء .. 
بسمة: اه طفيت هلينا من العشاء... دابا بغيت نهضر معاك فوضوغ .. 
سناء حطات لي فايديها: الله يسمعنا خير ..اش كاين .. 
بسمة: مكاين غير الخير ... الموضوع كيخص حوراء .. 
سناء: مال ديك المسخوطة .. 
بسمة: ياك فاتحاتك فواحد الموضوع اليوم ؟ 
سناء: اه وخاصمت عليها .. واقفة ليا مع واحد معارفين اصلو من فصلو و لا اش نااوي .. راه الحمد الله باها مكاينش اما يسمع هادشي لا انا لاهي غنباتو فهاد الدار .. 
بسمة: و الى قلت ليك راه ناوي يخطبها وغيجي هاد السبت .. 
سناء: اوبلي هاد السبت .. اش هاد الزربة وامتى قررو و شكون هذا بعدا .. فين هي حوراااء .. 
قفزات حوراء ورى الباب وخرجات كتعض شفايفها .. 
سناء: جلسي .. قولي ليا ...لي قالت ختك صحيح...
حوراء: اه اماما .. راه باينة فيه معقول وولد عائلة وواجد مخاصو خير وانا اماما بغبت نتزوج بيه ماعيني لا فقراية لاوالو .. عافاك هضري مع خويا وبابا وقنعيهم .. 
سناء: جيني للصراحة فين كتعرفيه .. 
حوراء: ر..راه..قلت ليك .. 
سناء: واخا الالاة .. انا غنشوف .. نتي ماعينك لا فقراية لا يديك لا يخليك .. اللهم تزوجي .. 
ناضت كتبوس ليها راسها .. 
سناء: صافي حيدي عليا .. كيف غندير نهضر معاهم اوووف .. 

☆ ☆ ☆ ☆

مجوموعين كيتعشاو الا حوراء لي مخشية فبيتها كتطرطق صباغها والخلعة غتسكت ليها القلب ... وكل شوية كتدعي الله يدوز هاد الليلة بيخير ... 
بسمة غمزات مها و هي تسرط دغمتها وقالت ... 
سناء: اححم ... عبد الرحيم ولدي يوسف بغبت نهضر معاكم .. 
عبد الرحيم : اش كاين .. 
يوسف: الله يسمعنا خير الوالدة .. 
سناء: مكاين غير الخير ان شاء الله .. حوراء دواو فيها شي ناس و بغاو يجيو هاد السبت .. 
عبد الرحيم : قلتي حوراء ؟؟ 
سناء: اه .. 
يوسف: وشكون هاد الناس .. 
سناء: ا...ا.. علمي علمكم اولدي .. كانت اليوم جايا من ليسي حتى وقفها قال ليها هاد 2 كلمات وجات عندي نيسان قالتهم ليا .. 
عبد الرحيم: وعلى هاد السيد .. معارفش عندها باها وخوها ؟؟ لاش يوقف الدرية فالطريق 😡 
يوسف: هاد الهضرة ماداخلاش لراسي حgلها مخبية .. 😡 
سناء: اللهيرضي عليك اولدي بلا صداع .. راه صافي دابا هضر معاها وجاها نيشان وحدد يوم الخطبة .. دابا بقا غير تعطيو الموافقة ديالكم .. 
عبد الرحيم: ولكن هي راه باقية صغيرة وختها اكبر منها وباقي مزوجناها بقات غبدير الصغيرة لي الباك باقي ماخداتو .. 
بسمة: جاها نصيبها دابا ابابا غير خليوها .. وعاد ماعينها لافقراية لا والو اللهم تزوج وتهناو عليها .. 
بقا عبد الرحيم كيضورعا فراسو وقال .. 
عبد الرحبم : يجي بعدا ونشوفو كيف داير ... 

ناض يوسف ودخل عندها للبيت لقاها غادا جايا ... غير شافتو ووقفات كتغزل قدامو .. 

يوسف: بالصح هضر معاك شي واحد .. 
حوراء: ا..اه .. 
يوسف: متأكدة اول مرة كتشوفيه .. 
حوراء: ا.. اه اخويا .. 
يوسف: واخا ... ونتي موافقة ... راك باقية صغيرة على الزواج والمسؤولية .. 
حوراء حدرات راسها حشمات منو .. 
يوسف: مهم بجي ونشوفو هاد عريس الغفلة كيف داير .. 
خرج من البيت وناضت كتشطح و تزغرت فخاطرها ..
حوراء: اووووف الحمد الله ... واخيرا .. نعيط ليه نعلمو ... 

☆ ☆ ☆ بعد اسبوع ☆ ☆ ☆ 


لي داز فالتوجاد لهاد الخطبة .. اليوم السبت وتحديدا بعد الزوال .. كولشي ناضي واسرتها الصغيرة كلشي فالدار كيتسناو الخطاب ... معمرين الطبلة بالحلوبات واناي ودوازو وكلشي متول ...ولابسين مقاد ... 
حوراء وختها وصاحبتعا فالبيت كيقادو ليها ... 
حتى سمعو السوميط فالدار وخرج يوسف يحل ... 
كان عادل هاز بوكي الورد ومحلق على الحالة .. و باه و مو تاهما معاه محملين .. 
يوسف : مرحبا .. تفضلو .. 
جا باه و مو كيرحبو تاخما حتى دخلوهم للصالون وهما يضورو فعنيهم ويشكرو فيهم .. خداو من عندهم داكشي وجلسوهم .. 
عبد الرحيم: مرحبا بيكم .. 
اب عادل: الله يبارك فيك اخويا .. انا سميتي عبد المالك وهادي مراتي لطيفة وهذا ولدي عادل ...
عبد الرحيم : انا عبد الرحيم وهدا ولدي يوسف وهدي مراتي يناء وعاد كاينة بنتي بسمة وحوراء الصغيرة .. 
عبد المالك؛ واهي علامن جينا ... طالبين راغبين فيها على سنة الله ورسولو و بعد موافاقتك بإذن الله .. 
عبد الرحيم: مرحبا بيكم ... صراحة البنت باقية صغيرة على الزواج وباقية كتقرى .. بانت ليا باغية وموافقة داكشي علاش قبلت نشوف و نعطي فرصة والى كتاب راه غيتزوجو .. 
عبد المالك: والى البنت موافقة ووالديها موافقين ماهلبنا غير نزيدوهم رضانا .. 
عبد الرحيم : داكشي لي كاين ... ولكن ماقلتوش ليا بعدا .. فاش خدام اولدي؟؟؟ و واش وااجد للزواج ؟ 
عادل: انا موظف فشركة **** وعندي داري و طوموبيل وجامع فلوس فالبنك .. معند بنتكم مايخصها معيا .. 
يوسف: وفيبن شفتيها .. 
عادل: ا.. انا كنجي بزاف للحي هنا كنشوف واحد صاحبي ولكن وشفتها شحال من مرة سولت علبها وكولشي شكرها ليا وتوكلت عالله .. 
لطيفة : واعيطو للعروسة نشوفوها .. 
سناء: هي الاولى ... بسمة .. جيبي ختك .. 
ببسمة :نوضي نوضي راه بغاوك .. 
حوراء : كولشي مزيان؟؟ صافي 
سلمى؛ كتحمقي غير سيري .. 
مشات مع البنات دخلو سلمو و شكروها ودامشي وجلسات حدا معا ككل على عادل حشمانة .. 
عبد الرحيم: اشنو قلتي ابنتي موافقة .. 
حدرلا راسها واومات بيه وفهمو بلي موافقة .. و قراو الفاتحة وباركو ليهم .. و تافقو على تاريخ العرس لي غيكون بعد شهراين ... داوزو العشية هكاك مجموعين وكيتافقو حتى ناضو مشاو وودعوهم وطارت حوراء لبيتها فرحاانة كتنقز فوق السرير وسلمى و ختها بسمة كيضحكو عليها ... 

دازو 15 اليوم بعد الخطوبة ... ديما كتهضر هي وياه فتيلي و كيبقى يقرى عليها زابورو المعتاد وهي ديما تايقة فيه وطايرة فسحاب بسبابو .. كيتلقاو بزاف وكل مرة فين غادي بيها ولات كتخليه يبوسها ومل مرة دايها لقهوة اولا ريسطو فشكل اما ليسي غير تخطبت مابقاتش وصلاتو وسلمى كتجي عندها تقريبا يوميا تعاود ليها مغامراتها .. 
اليوم الاحد خارجة هي وياه .. وبعلم والديها بما انهم مخطوبين .. تغداو فريسكو وخرجو جيهة البحر وكبف العادة فبلاصة خاوية .. 
ماد ايدو على عنقها ومعنقها .. هي حاطة راسها عليه وشادا ايدو .. اما هو فعينيه غير فالجسد ديالها .. زعم مد ايدو كيتلمس فيها .. وضرباتها ليه .. 
حوراء: اويلي كون تحشم حتى نتزوجو .. 
عادل: وايلي على هاد السيرة .. انا وفيت بوعدي و خطبتك وراك عارفة الطبة راها النصف الزواج كتبقى غير ديك العقد وصافي .. نتي راك مراتي وكولشي ناس عارفينها دابا .. متبقايش تحشمي عاادي .. ولا مكتيقيش فيا .. 
حوراء: لا احبببي بالعكس منين خطبتيني اتبتي ليا بلي مكتفلاش غير هو نصبرو زعما حتال ... 
عادل ناض عليها ودار راسو تقلق .. 
حوراء: وا صافي متقولش ليا غنتخاصمو على والو تاني .. 
عادل: نتي السباب انا كندير ليك خاطرك ولمن نتي مهامكش .. 
حوراء: وصافي متقلقش ..باستو فحنكو وهو جرها شلقم فيها حتى شبع و قال ليها .. 
عادل: اجي .. موريتكش دارنا لي غنسكنو فيها ... 
حوراء: لا احبيبة .. 
عادل: ياله باش نيت الى معجبكش الديكور نبدلوه .. 
حوراء: ايه علاش لا 😍 

ديمارا بلوطو و وصلو للعمارة فين كاينة دارو .. هبطو ودخلو مشادين .. طلعو ودخلو ويد الباب .. 
دخلات كدور وتشوف .. 
حوراء: داار زوينة .. 
عادل: شوفيها بعدا .. هنا الصالة ..
حوراء: منظمة وزوينة عجبني .. 
عادل: اجي تشوفي الكوزينة .. 
حوراء دارت فيها وقلباتها .. 
حوراء: شفت دار فبها التقدية والماكلة .. 
عادل: ا...اه .. راه كنجي ليها مرة مرة نريح فيها .. راك عارفة بنادم كيبغي يرتاح من صداع شوية .. 
حوراء: اااه .. مزيان ... 
عادل : اجي تشوفي بيت النعاس .. 
تبعاتو حوراء .. وراها البيت كيف داير .. خرجات ابالكو كطل وهو جا وراها كيطلع ويهبط فيها .. 
دارت عندو ورسم ابتسامة كادبة فوجهو .. 
حوراء: البيت زوبن ومهوي عجبني بزااف .. 
عادل:تانا كتعجبيني بزاف .. 
ضحكات وحدرات راسها .. قرب ليها وعنقها و بدا يبوس فيها حتى لاحظت ان قبلاتو مبقاتش بريئة (اصلا فين عمرها كانت بريئة) دخلها لبيت و حيدو من البالكو .. حيد ليها الفولار وهو ايديه دازت على جسمها كامل ... فجأة دفعاتو .. وخرجات لبرى .. 
تبعها بنظرات ماكرة وقال .. 
عتدل: غيكون جاك جوع نوجد شي حاجة .. 
حوراء: لي بغيتي .. 
مشا لكوزينة وجد شي حاجة خفيفة وعمر اتاي وجا حطهم فالطبلة و كلاو ب2 وحاول يتلفها بالهضرة باش تنسى .. حتى ناض شعل الشعبي .. و حيد الفيست ديالو وبدا يشطح وهي كتصفق وتضحك .. جرها من ايدهها و زعمها تشطح معاه ..وتاهي مشات معاه ..
عادل: حبظي جلابة غتعرقي فيها .. 
وهي من الزيغة لي فبها حيداتها بقات ب بيجمة صيفية خفيفة .. حزمها بزيفها لي جات مستورة بيه و بركو يشطحو ب2 و دار راسو عيا وجلس كيتفرج فيها وهي كتشطح ليه فرحانة .. جبد تيلي صورها بغفلة منها .. خلاه كيصور وناض عندها كيشطح ومعنقها كيتلمس بايديه و يبوس فيها .. حتى سلت ليها البيحامة .. 
حوراء: اويلي اش كدير .. 
عادل : رحميني احبيبة منقدرش نصبر حتال بعد شهرين .. 
حوراء: يهديك الله هادشي حرام .. حتى نتزوجو ما بقا والو .. 
عادل كيلهت كيف الكلب و كيحاول يبعد ايديها على جسمها لي مخبياه: هانتي شوفي .. غير مرة وحدة واللهما نطلبها منك تاني .. 
كيهضر وكيدفع فيها للبيت النعاس .. حتى دخل وسدو برجلو ... 

🍃  🍃  🍃

البيت مظلم .. حيت طاح الظلام ودخل الليل .. جالسة مهدودة فطرف السرير جامعة رجليها لعندها وايديها فوق ركابيها وحادرة راسها لي تقال علبها بكترة البكاء والدموع ... و عادل متكي فالسري مغطي نصو وداير دراعو فوق راسو مغمض عينيه لملامح مرتاحة .. حيد دراعو من فوق راسو و ضرب فيها شوفة ودور وجهو للجنب بلا مبالات و عوج فمو ... وقال .. 
عادل: وا بغينا نغمضو غير نصف ساعة ماخليتيناش مالك اش وااقع .. 
حوراء دارت عندو بالزعفة ووجها حمر ومنفوخ بالبكا: اش واااقع ؟ ... اويلي على اش واقع ؟ ...رتك ضيعتيني فشرفي .. راك تعديتي حدودك معايا.. اش غنقول لمي .. خرجتي عليا ... 
عادل قاطعها: صافي صافي مالنا على هاد الهضرة .. ماوقع باس نتي خاطيبتي .. وغنتزوجو .. 
حوراء: واش كتهضر بالصح .. مغتخلاش عليا ياك ؟؟ 
عادل ناض عندها عنقها: بالعكس احبيبة .. كنبغيك وكنموت عليك و مستحيل نتفرق معاك .. 
حوراء تخشات فحضنو وطمنها بكلامو وبوعودو .. 
حوراء مسحات دموعها وقالت: راه تعطلت بزاف ديني عافاك .. 
ناض لبس هو وياها و خرجو وصلها وقالت ليه .. 
حوراء: هبط تشرب اتاي .. 
عادل: لا احبيبة غير سيري ...مرة اخرى .. 
حوراء: واخا .. 
هبطات وطلعات .. 
عادل؛ هلط تشرب اتاي هههههه اكبر مكلخة دزت غليها فحياتي ... اححح نشوفو الفيكتيمة الاخرى اش دارت ...
طلعات حوراء حلات الباب بساروت لقات باها وخوها جالسين فالمرح وكيتفرجو فماتش .. وسلمت بلا متشوفىفيهم ومشاتىلبيتها حتى وقفها خوها . 
يوسف: شتك نتي كترتي دهل وخرج مع داك خاينة . نقصي تلكيران شوية وتقلي حتى تضربو الكاغط وضبرو راسكم .. 
حوراء: واخا اخويا .. 
دخلات لبيت كانت ختها كتمزك مادواتش معاها حيدات جلابة والزيف وجبدات حوايجها .. لي غتلبس ومشات للدوش .. الماء فوق راسها وكلما سداتةعينيها كتفكر اش وقع ومع كدوز ايظيها على جسمها كتفكر ايظيه فاش كانو عليها .. واخا وعودو مارتاحتش و جلست تطلب الله مايتخلاش عليها .. طالت مدة الدوش وهي غير كتخمم وكتبكي ... حتى دقات عليها مها باش تخرج تعشى .. وجاولاتهاىبواخا نشفات حالتها ولبسات حوايجها وخرجات ... تعشات حادرة راسها وكل دغمة كتندغها غير بزز و مكتسرطها حتى كتدوب بقوة التخماام .. حتى سلاو وناضت هي الاولى نيسان لسريرها غكات وجها و نعسات ...

فاقت الغد ليه ...حلات عينيها فبلاصتها كتشوف غير فالسقف ... شوية بشوية رجعو مشاعر لي نعسات بيهم .. الخوف والتوتر ... قلبها ضرب بالزربة منين تفكرات اش دارت .. تفكرات ذكرياتها كلها معاه .. افعالو لي كان كيدير .. وقارناتها مع كلام سلمى .. "ردي بالك راه الذياب ممكن يديرو اي حاجة غير باش طيحي بين ايديهم " " ميغركش الكلام الحلو والغزل و الكادوات ...كولشي داكشي فسبيل الشي لي بغاوه" " مكاين لا كنبغيك لازمر كاين غير عطيني نعطيك " ... وهي كتفكر طاحو دموعها على خدها بدات كتحس بكلام سلمى لي ديما كتحذرها ... دابا هادشي لي بغا؟ صافي غيلوحها ولا غيتزوجها كيفما قال اخر لحظات لقاء البارح ... 
ناضت من سريرها بشوية ... لقاتها ياله 7 الصباح .. مولفة تفيق حتال 11 و لا 12 ... بالها المشغول مرتاحش الليلة كاملة ... جمعات شعرها بفليل و ناضت لاحمام .. غسلات وجها ومشات لاكوزينة جبدات تلج حطاتو على عيونها المتورمين ... حتى تفشو و خدات نفس رمات العبء لي فقالها وقنعات راسها اولا نقول بردات على راسها ب2 كلمات ... 
حوراء: متخافيش غيتزوج بيك ... 
هزات البريق دارت فبه الحليب وشعلات عليه .. و القهوة تاهي ... بقات تما طيبات الفطور .. فاقت مها لقاتها كتزجدو تعجبات ليها .. 
سناء: حوراء .. اش مفيقك دابا مامولافاش ليك .. 
حوراء: والو اماما ضرباتني الفيقة قلت نوجد ليكم الفطور .. 
سناء: والله يرضي عليك ابنتي هكا نبغيك .. ونيت قربتي تزوجي خاصك تعلمي الشقا والتاويل .. 
حدرات حوراء راسها وضارت كتكمل شغالها .. 
سناء: ياله حطيه انا غنفيق خوتك وباك ... 

تجمعو على الفطور وكولشي مستغرب من فياقها فهاد الساعة .. ناضو خرجو واحد واحد يوسف لخدمتو ولاه تاهو عاد بسمة لقرايتها .. ناضت حوراء جمعات الماعن ومشات لاكوزبنة ووقفات كتغسل و مها وراها .. 
سناء: حوراء .. شتك ماشي هي هاديك .. 
حوراء بلا مادور: لا اماما اش غيكون عندي .. غير منعسنش الليل بشي وجع فكرشي .. ودابا انا مزيان .. 
سناء: واخا .. 
دخلات مها حداها كتوجد للغداء ... وحوراء غسلات الماعن وخرجات تقاد الدار .. 
حتى سالات ومشات هزات التيلي ... فين الميساج الصباحي لي مولف يسيفط ... يمكن باقي ناعس هادشي لي قالت فخاطرها ... حطاتو ومشات تكات فالمرح كتفرج بلا عقل ... 
داز النهار معيطش وتاهي ماحاشاتهاش ليه ... حتا داز اسبوع ... وهي متكية فبيتها كتفكر ..جامعة رجليها لعندها بحال شي جنين و اطراف رجليها مارصاوش من تحراك الشي لي كيعكس التوتر ديالها .. بدات كتأكد من كلام سلمى .. كولشي كيوضاح دابا ... هزات تيلي ديالها بعد تفكير طويل دوزات النمرة ديالو .. ولكن مجاوبهاش ... عاودات اتاصلت ووالو كيصوني ولكن مكايجاوبش .. حطاتو وخرجات لانرح جلسات مع مها وختها لي كيضحكو وهما كيتفرجو في فيلم كوميدي .. حسدات راحة بالهم ومكرهاتش تاهي تستمتع بداك الفيلم وتضحك معاهم ... هما كيضحكو وهي دمعتها فطرف عينيها مزيراها باش مطيحش ... رجعات للبيت تخشات فوسط سريرها كتبكي وتعاود ..حتا بلاصة مكتريحها ...غاع قنات الدار بكات فيهم مكاينش لي حس بيها ولا عرف اش بيها حتى من سلمى ما عاودات ليها والو ... 
دازت يوماين .. وهي كتعيط وتعاود ولاهو كيجاوب .. 
هنا صافي تأكدت بلي السيد كانت جامعاها بيه غير حاجتو لي خداها و تخلا عليها دابا ... مابقات طامعة لا فكلام حلو ولا غزل و لا كلمة كنبغيك وا لا تاحاجة ... كتفكر غير هاد المصيبة لي خاصها تحلها ... و يتزوج بيها فاسرع وقت قبل ماتعرف فضيحتها... 
هزات تيلي تاني .. ودوزات نمرتو .. بعد شخال عاد جاوب .. و من صوتو باينة غير لا مبالات ... 
عادل: مالك فارعة ليا راسي .. اش كاين .. 
حوراء: اش كاين؟؟ من نيتك كتهضر ؟؟ يوماين وانا كنعيط ليك مكتجاوبش وسمانةمسولتي فيا لا مكالمة لا ميساج؟؟ 
عادل: ها الخدمة والمشاغل صافي .. 
حوراء: المشاغل مكانوش شاغلينك عليا من قبل ياك ؟؟ ولا دابا خديتي اش بغيتي .. 
عادل داير سبيكر مع صحابو وكيغمز فبهم : حشومة احبيبة تقولي هاد الهضرة .. فينك انا نجي عندك نتلاقاو .. 
حوراء: غنتسناك .. 
قطعات و صحابو تلاحو بالضحك لور .. 
ونطق واحد: ههههه مكتشبعش اصاحبي 😂😂😂 
عادل: ههههه معندي مايدار هاد العشية .. نبروفيتيو فيها شوية و نكركبها فخطرة .. هز كونطاكت و لبس سبادري ديالو وقال .. 
عادل: شوفو غنجيبها هنا ... نرجع منلقا تا قندوح فيكم ... 
خلاهم كيضحكو وخرج ركب نيشان لراس دربهم واتاصل بيها تهبط عندو ... 
هبطات ركبات معاه جا يبوسها وبعدات .. ورجع وجهو لور .. 
عادل: مالك . 
حوراء: حيد من هنا بعدا .. 

وقف بالطوموبيل قدام العمارة وشافت فيه .. 
حوراء: لاش جايبنا هنا .. 
عادل: باش نهضرو احبيبة على خاطرنا ... 
خرج من الوطو و ضحكات ضحكة جانبية ساهرة وهبطات تبعاتو .. طلعو الفوق و حل الباب سبقها ... 
دخلات ضرباتها ريحة الغارو و الصالة مرونة وشافت فيه .. 
حوراء: هادشي لي كان شاغلك ... القصارة .. 
عادل: راك عارفة مرة مرة كنبغي نزهى مع الدراري .. حيدي حيدي جلابتك وجلسي ترتاحي .. 
حوراء: بعد متقيسش فيا .. غلطة درتها مرة مغانعاودهاش ... 
عادل: غلطة .. علاش احبيبة .. 
حوراء: من الاول كان داكشي هو غراضك ياك .. 
عادل: علاياش كنهضري .. 
حوراء: باراكة ماتبقى تبوهل ععليا .. 
قرب ليها كيحاول يدوخها .. وهي كترجع بلور بغا يبويها ودفعاتو .. 
حوراء: ماتقييسنييش ... 
عادل: اوووف صدااع الراااس تاني
حوراء: ضحكتي عليا ياك ... قول الحقييقة .. ضحكتي عليا ...
عادل: عرفتي شنو .. اه .. ضحكت عليك .. من المرة الاولى لي شفتك فيها وانا كنخطط لكيفاش نطيحك بين ايدي واخا خديت وقت معاك ولكن مندمتش .. 
حوراء: لا .. ل.لا .. نتا غير كتكدب .. 
عادل: لا الغزالة مكنكدبش .. كان كيسحاب ليا فهمتي راسك منين مابقيتش سولتي كيف دارو لي قبل منك و دابا حتا نتي باينة جايا تفرعي ليا راسي بديك خاصك تزوج بيا و تسترني و ديك الهضرة ياك هههه
حوراء: وا شنو .. غتخلى عليا .. عافاك ماديرش فيا هادشي ماعارفش الموقف لي حطيتيني فيه راه غيقتلوني بلا رحمة .. 
عادل: هههه وانا مالي ضبري راسك درتيها بايديك ما بزز عليك حد .. 
حوراء: غنوصلها لواليديك ... و غنشكيك للبوليس .. 
عادل: هههههههه من نيتك .. فين والديا راهم ففرانسا ماجايبين خبار .. والى كنتي كتهضري على هادوك لي شفتيهم .. غير زبالة ديال الزناقي بحالك طمعتهم فشوية الفلوس وتبعوني كيلهنتو كيف الكلاب .. و نزيدك الهوية لي عطيتك ماشي حقيقية .. من غباءك معمرك سولتي على لاكارط ديالي .. و لا واليديك تاهما .. باغين يتفكو و يلصقوك فيا هههه ها الدار ماشي ديالي كاريها غير نبرتش فيها صافي .. و تلبوليس .. اش غتقولي ليهم فاش غنوريهم هذا .. (وراها الفيديو كتشطح و خو كيحيد ليها حوايجها وكتبان كتضحك معاه ) غنوريهم هذا غيشدوك نتي ماشي انا بتهمة الفساد الق**** و عتشوهي داك الجادارمي ديال خوك ههههه اشنو مالك سكتي .. 
حوراء كتبكي: اشنو درت ليك حتى دير فيا هادشي .. اشنو درت ليك .. منين مناويش المعقول علاش جيتي عندي علاش قربتي ليا علااااش .. مآديتك فتاحاجة علاش تجازيني بهادي علاش .. كنتي تمشي لديور العاهرات علاش تخرج عليا انا علااااش ...
عادل: نو عزييز عليا البنت بمييكتها هههه كتكون بطعم خاااص و زايدون كون ماعطيتينش الضو الخضر منقربش ليك .. غير شفت فيك ضحكتي وتحليتي .. لقيتك غير باب الله قلت نلعبو شوية .. ذنبك على راسك .. صدقتي نيييييية بزاااااف .... الغباء ديالك فاات الحدود .. شفتي الطوموبيل والدار قلتي نطيحو ساعة طحتي فالشبكة ههه مكلخة ... 2 كلمات دغية تقتي واش كيسحابلك كاين شي حب كان غير الز** هههه وااا نااري شحااال تقيلة على القلب .. صبرت ليبك بزااف ولكن على قبل الحلوى هااانية ..

حوراء: حشوومة علييك اش غندير فحالتي دابا اش غندير .. اويلي اعباذ الله عطيت شرفي لواحد مايستاهلش .. انا اش درت من غير بغيتك بقلب صادق .. شفت فيك البطل لي غيخرجني من ديك العيشة ديال الزمر شفت فيك المنقذ ديالي .. بغيتك من قلبي .. حلمي كان نكون مراتك وام ولادك .. عطيتك اغلى مكانملك ولكن ماكاتستاهلش ... غضرتيني وطعنتيني فشرفي .. و حتى انني ماعطيتوش ليك بخاطري ... درتي ليا مصيدة و حيت تقت فيك استسلمت ليك .. جيت معاك حيت تايقة فيك .. يظلو يقولو ليا بعدي عليه ولكن انا مكنت كنشوفك غير نتا .. نتا الوخيد لي كنت مستاعدة نتخلا على كولشي على قبلك .. جلست فدار ومدوزتش الوطني باش نوجد لعرسنا .. ضيعتيني فكولشي ... قرايتي وشرفي و حياتي كاملة .. غيقتلوووني غيدبحوني .. غنتشوه بين بنادم وجيران ... اشنو غندير دابا اشنو نديير .. 
عادل: ههههه وانا مالي واعومي بحرك .. ولا عرفتي غنعاونك .. كاينة واحد دار الق**** ... دابا سرحت ليك القضية و مع نتي قوقة غتربحي الفلوووس و انا غنكون اول زبون عندك اش قلتي .. راه تلقاي صحاباتك تما نفس بلانك .. كانو غير مكلخات ضحتيا متةيسمى بالحب .. ههههه من نيتكم خرجو على ديلمكم الافلام والمسلسلات كظلو حالين فامكم قدامهم و يسحاب ليكم غتديو راجل بحال هكاك ... حنا مربيين تربية حرشة مكاينش شي حاجة سميتها الرومانسية وااالو .. وفاقد الشيء لا يعطيه الكبيدة .. مهم من الاخر دابا صااافي مابقيتيش صالحة للزواج .. ق*** غتجي معاك واللهتا تشبعي فلوس .. اش قلتي .. 
حوراء غير كتشوف فيه وتيبكي مع الكلمة الاخيرة جبدات ايديها وصرفقاتو .. تعصب وشدها من زيفها جامع معاه شعرها .. 
عادل: شوفي الق*** غتخرجي تق*** من داري و لا غنطوع التامل بوك من هاد الشرجم .. و يقولك راسك تمشي تشكيني لبوليس ولا ماعرت شنو فيديوك غتشوفيه فاليوتيب والفيسبوك وحتا البوليس ما بقيتش باغي نشوف كمارتك ... تم غادي بيها الباب لاحها وشدات ليه رجليه .. 
حوراء: الله يرحم ليك الوالدين .. رحمني عتقني من هادشي .. راه انت اول واحد فحياني .. نتا لي قصتيني تزوج بيا غير شهر وطلقني .. الله يرحم والدييك .. 
عادل: يسحاب ليك واليديا غيقبلو بجرتيلة بحالك .. نوضي قو** من قدامي .. راهةشوهتي براسك اما مرامتك راه بااح مابقاتش ههههه قالت ليك تزوج بيا .. ياله تهزي من هنا .. راه الفيكتيمة الاخرى كتسناني واللهتا كترتو ما يصلح ليكم غير لي بحالي .. 
جبد رجلو من ايديها ودخل وردخ عليها الباب.. 
وناضت كتقول ورى الباب: الله كيشوف ... و غياخد حقي من الظالم .. انا غير بغيتك .. ماكنت ناوية حتى حاجة من غير نكون مراتك .. لعبتي بعقلي وعلمتيني درس ... غتندم عاجلا ام آجلا و ممسامحاك لا فالدنيا لا فالآخرة ... ومن هنا لتما كنتمنا تعيش اسوء كوابيسك و معمرك تهنا فحياتك .. و تموت مدلول كيف الكلب وحاشا واش تكون بحال الكلب و متنساش الدنيا كدور و دعوة المظلوم كتوصل ... 
قالت هاد الكلمات ومشات هبطات كتمسح دموعها .. وخلاتو ورى الباب كيتصنت و كيضحك باستهزاء... 

غادية فالطريق وكتلوح رجليها .. كواشي تهدم ..احلامها ومستقبالها دارهم تحت رجليه ودهسهم بحال شي وردة حمرة ... غادية وكتشوف فالناس .. تمنات تكون فموضعهم كاملين الى موضعها هي ... علاش هي لي وقع ليها هكاك ؟ علاش هي بالذات؟ علاش تاقت فيه ؟ و اشنو غدير دابا ؟ فااات الفوت... دارت غلط وجا الوقت باش تخلص عليه .. طيشها و نيتها .. عفوا بغيت نقول غباءها .. طيحوها فاول ذيب صادفت فحياتها ... 

بعد ساعة ونصف ديال المشي وصلات لدربهم تلاقات سلمى جاية مسخرة و سلمات عليها .. 
سلمى: فين كنتي الدايعة ... 
حوراء ضحكت ضحكة جانبية ساخرة: والله ايلا دايعة .. 
سلمى: مالك شتك ماعاجبانيش .. هاد الايامات الاخيرة شتك غير ساكتة .. و مكونة ياك لاباس .. اجي بعدا واحد عادل مبقيتي غاع جبدتيه ليا .. كنتي معاه دابا؟ 
حوراء: رخفي عليا اسلمى واللهتا عيانة .. الله يعاون .. 
مشات خلاتها وراها كتشوف .. 
سلمى: اويلي هادي مالها .. ياكما تا هي غير غتزوج وتقلب عليا... الحاصول كلكم بحال بحال .. نمشي لدارنا احسن ليا .. 
دخلات حوراء لدارهم .. لقات مها كتسناها .. 
سناء: اجي نتي معامن تشاورتي حتى خرجتي .. 
حوراء: راه مشيت غير هنا ورجعت اش وقع غااع ... 
سناء: باراكة من تخراج العينين ونقصي ديك دخول وخرج معاه راكم باقي مضربتو الكاغط .. اصلا من نهار الخطبة ماشفناه .. والعرس ما بقا ليه والو اش كيتسنا ؟؟ 
حوراء: وا بعدو مني ورخفو عليا ... تفرقو مني عييت عيييت .. كلها كينغر عليا من جيه قهرتوني .. الزواج العرس الزمر ... مابقيت باغية والو .. صافي سالينا .. مكاين لاعرس لاواااالو فضيينا .. 
سناء: اويلي اش كتقووولي ... *شداتها من دراعها* دابا غتقولي ليا مالكم .. علاش تفارقتو ... 
حوراء: مابقيتش بغيتو مابقاش عاجبني وفضيت معاه ساالينا .. ما تبقاوش تجبدووه ليا .. 
سناء: اوووييلي على بنت الحرام بغات تشوهني .. واشنو نقول للناس والجيران .. اوييلي يافضيحتك اسناء يافضيحتك ... وانا ماخليت لمن قلتها يا بنت الحرااام من فعايلك .. دابا تعيطي ليه يجي نفكو المشكل .. 
حوراء: الاااا مامعيطاش .. نسااايه ... هاداك ضربي عليه .. مابقا عندي غرض فزواج .. بغيت نموووت هاد الساعة كنطلب الله يرفعني عندو .. حيت معندي لاش نعييش .. علاش ولديتيني علاش .. الله ينعل النهار لي فكرتي تولديني فيه .. كرهت هاد العيشة كرهتها ... كل نهار كنشوف نفس الكمامر كنسمع نفس الهضرة ... مابقاش كيطلع ليا النفس معاكم فهاد الدااار .. منين ولدتيني عمري عقلت على راسي فرحتوني باي بغيت .. عمري خديت شي حاجة لي كان حلمي فيها ... وزايدينعا غير بالنغيير والعصا ... قهروتوني و حررتو فيا عييشتي .. باربي تموت ومتهنا من هادشي ياااربي ... 
سناء واقفة كتشوف مصدومة اول مرة كتوصل معاها لهاد نيفو من الغوات والمخاصمة ..على صوتها... كتبكي مخنوقة ووجها باين فيه هم الدنيا .. وهوما مخاصمين قدام الباب حلو يوسف ومعاه ختو بسمة ياله جايين .. 
يوسف : اش واقع صوتك نتي واصل حتال برا .. 
حوراء: جيتي ختا نتا واجي تسمع نيت ما حدها مق** عليا .. 
سناء سدات ليها فمها .. 
بسمة: حوراء ..اويلي اش كتقولي .. 
يوسف: هاديك البرهوشة .. وليتي تخسري الهضرة .. قدامي الحمارة ... 
سناء: متديرش عليها اولدي غير مقلقة شوية .. 
حوراء؛ طلقي مني اااه .. نخصر الهضرة ونزيد مزاااال .. 
يوسف شدها من دراعها و بسمة ومهم كتحاول تفك ..
يوسف: توحشتي العصا البرهوشة ... وليتي تحلي فمك .. 
حوراء: هههه واش غدير غتضربني .. يالهضرب .. هادشي لي كتعرف دير لا نتا لا داك بااك .. 
جمعها معاها بتصرفيقة حتى طاحت .. و كشاو كينوضوها مها وختها .. 
بسمة عافاك اخويا صافي خليها راه غير ستريس لي داير فيها هكا .. 
يوسف: يسحاب ليها تخطبت قطعات الواد ونشفو جليها .. ماحدك هنا غتبقاي تسدي فمك و تحدري راس... معليا علينا صوتك حنا قدك الحمااارة ... والله يامك وباقي نسمع صوتك حتى نقادهم ليك .. 
حوراء: واش نسحاب راسك .. دابا خلعتيني .. صاااافي معندي منخسر .. اش غدير غاع غتقتلني . داكشي لي بغيت قتلني وهنيني من هاد عيشة الدل .. لي معيشيني فيها .. قالك عائلة .. اول فرصة تجيني نخليكم والاه عمري نرجع نشوف فيكم حتى شوفة تفووو .. 
دخلات للبيت و ردخاتو .. 
يوسف والبقية بقاو كيشوفو .. سناء كتبكي وبسمة دايرة ايدها على فمها .. ديما كيتناغرو ولكن عمرها خرجات كلام كبير بحال هذا .. 
يوسف: هادي مالها .. 
سناء: ف..فسخات خطوبتها من داك عادل .. هادشي علاش معصبة .. 
يوسف: واشنو هادشي لعب الدراري .. 
مشا ليها للبيت وحلو بالجهالة كتنت تكات فسرير وناضت قفزت .. 
يوسف: بالصح هادشي لي قالت مك .. 😡 
حوراء: ا.. اه .. 
يوسف جرها من دراعها: وشنو السبب بالسلامة .. 
حوراء: ك.. كان غير كيلعب ... 
يوسف: كيفاالش كيلعب .. اشنو طراا هضريييي .. 
حوراء: م . ماطرا واللووو .. ا. انا حصلتو مع وحدة اخرى و فسخت الخطبة معاه هاظشي لي كاين .. 
يوسف: عطيني نمرتو نوري لكلبة مو يلعب ببنات الناس .. 
حوراء: ب..بدلها .. 
يوسف: شنو سميتو كاملة .. 
حوراء: عطانا هوية ماشي ديالو .. 
يوسف: اشنووووو .. جبد معاها بضربة للوجه و نزل كمل عليها و مها وختها كيفكو ..حتى شبع فيها ضرب وناض .. 
يوسف: باش نوري لمك تجيبي ولاد الزنقة الكلبة .. من اليوم مابقا لاخروج لا تاحاجة .. هنا لمك غتدفني حتى نجيبو ليك لي يديك .. 
قال هاد 2 كلمات وخرج خلاها غارفة فدموعها ودمها لي خرج من نيفها و جرحاتها ... 

نوضاتها ختها للحمام غسلاتةليها وجها ومسحاتو ليها ورجعاتها لبيت ... تكات وغطاتها ... خبات وجهاةتحت مخدتها زدوعطاتها للدموع .. حبت عارفة هادشي ماهو غير بدايودة لداكشي لي جاي .. 
وصلات العشية وجا باها ... عاودو ليه اش كاين وخوها لي عاود ليه .. دخل عليها كيف الرعدة ... صبنها مزياان وماخلاش من جهدو وتاهو حلف عليها لابقات عتباتها ... 

دازو يوماين وهي غير فبيتها .. كخرجاتش منو حتى من الماكلة كتاكلها غير باصرار امها .. 
جالسين كيتعشاو وهي فبيتها كتكية حتى كتدخل عليها ختها .. 
بسمة: حوراء حوراء .. 
سافت فيها ورجعات حنات راسها .. 
بسمة: ماعرفت كيف غنقولها ليك .. ولكن اسماعيل صاحب يوسف غيجي يخطب فبك غدا .. 
قفزات حوراء من بلاصتها وجلسات .. 
حوراء: من .. منيين ...جبتي هاد الهضرة .. 
بسمة: باله قالها .. يوسف لبابا .. 
حوراء: و .. اش قال .. 
لسمة: اش غيقول .. مزافق بطبيعة الحال كيعرفو وعزيز عليه .. 
حوراء: ولكن انا مابغيتوش .. 
بسمة: هاد المرة موووحااال واش يديوها فرأيك .. غير تلله يشوف من حالك اختي .. 
حوراء: على انا غنسكت ليهم .. ناضت كتجري ومقدرتش تشدها بسمة حتى وقفات عليهم .. 
حوراء: لقيتو لمن تلبقوني .. 
يوسف: دخلي تنعسي .. الى مابغيتيش ندير فيك ايديا .. 
حوراء: انا ماقابلاش بداك صاحبك .. انا مغاديش نتزوج gااااع ... 
عبد الرحيم: واش باغية ديري بالسلامة .. 
حوراء: غنهرج نخدم على راسي و نكري بيت وماباقيش غتشوفو كمارتي .. 
يوسف: هههه وا تي سيري ريحي من تبرهيش .. وغدا خطبتك ..عطيت للكلمة ليه .. كامل مكمول ماخاصو والو وصاحبي وكنعرفو من القرايا ماشي بحال داك النصاب لي جايبة .. 
حوراء: راه انا لي غنتزوح ماشي نتوما واش باغيبن تلصقوني لواحد ماكانحملووش ... 
عبد الرحبم: بسمة دي عليا هاد الجيفة .. 
جراتها بسمة وهي كتبكي .. مستحيبل يوصلهم صوتها قدماةغوتات وصرخات مستحيل يحسو بيها .. جلسات من القراية الزواج حلين لا تالت لهما ... 
دخلات لسريرها كتبكي و تغبن حتى نعست .. 
الغد ليه وجدوها وهي جتة هامدة لاحركة ليها ... مها ماكاين في فمعا غير صبري ظابا بفرج ربي ... راه راجل مزيان وغيعيشك مزيان .. غتولفو بعضياتكم مع الوقت .. وهاد الكلام مدخلها لا من هنا لا الجهة الاخرى .. 
جلسوها قدامو .. حامية راسها وهما كيمدحو ويتغزلو فيها .. تساواو فيها بحال شي بقرة فسوق مقدرت لا تهضر ولا تكلم .. ماعرفاتهم امتى سالاو و تفرق المجمع .. دخلات حيدات عليها داك القفطان لي كرهات المنظر ديالو فوقها .. لاحتو وتخشات فسريرها لي ولا المؤنس ديالها هادي شهر والزيادة .. وهي متكية تدق الباب و دخلات سلمى .. 
سلمى: صافي قلبتي علينا نتي ولا مالك .. مزيان دابا .. نكون غير دايزة ونشوف الخطاب فختك جاو و ماقلتي لبا والو ... 
ناضت حوراء دغيا عنقاتها وطلقات دموعها فوق كتفها تبكي وتزيد .. والاخرى معنقاها مفاهمة والو .. 
سلمى: اويلي مالك .. 
حوراء: قلبي طايب والحمل تقااال والدنيا كحالت فعينيا وعييت وتهدييت .. 
سلمى كتمسح دموعها: مالك اخايىشكي عليا همك على حنا ماشي خواتات فين عمرنا خبينا على بعضنا .. 
حوراء: جابك الله عندي .. نصحيني وقولي ليا لش ندير .. مالقيت حد فجنبي مالقيت السند لي نتيق فيه من غيرك .. 
سلمى: طلقيني الزمر قولي اش عندك .. 
حوراء: الخطاب لي جاو دابا جاو فيا انا .. 
سلمى: اوياي وعادل .. 
حوراء كتبكي: مكاين لاعادل لازمر .. كاين غير مستقبالي لي ضاع اسلمى .. خدا احلامي وخلاني ... خدا برائتي وخلاني نواجه بحر قد الدنيا وماعندي منين نخرج منها ياسلمى .. حاسة بالتقل على سدري .. جايا لشهر ونصف وانا فهاد الحالة وماعالم بيا غير لي خلقني 
سلمى: واش ..و..اش..
حوراء هزات راسها لآه و هي تضرب فخاضها وزادت بحناكها وكتولول... 
سلمى: اويييلي يا حوراااء واش درتي ... 
ناضت غدية جاية .. 
سلمى: وهادشي نظل نوصي فيك .. ردي البال راهم كلاااب احوراء ... ردي البال واخا ماعرت اش يدير ليك متستسلميييش ليه .. * جلسات قدامها وبدات تبكي * اش غديري فهادشي ... كيفاش غتواجهي هادشي .. راك ماعارفاش اش كيتسناااك .. 
حوراء: عاااارفة اسلمى ...عااارفة .. وانا مابقا والو ويزوجوني لاسماعيل ... وصاحب خويا من الفوق يا سلمى .. مابقيتش عارفة اشنو ندير ... صافي ضعت غيقتلوني واللهما غيرحموني.. 
سلمى: كيف درتي حتى تقتي فيه فين مشات هضرتي فيبن ... 
حوراء: انا كنت غادية معاه للدار باش نشوفو لي غنسكنو فيها .. مطاحش فبالي انه غيتجرأ عليا لديك الدرجة .. قاومتو فالاول و حاولت نقنعو بلي حرام ولكن مسمعش ليا .. نجارفت معاه وخلاني نسا راسي معقت براسي حتى بعد عليا ... تما عقت بالغلك لي درت ... من تما وانا غنمووت اسلمى ... خليت روحي واحلامي وكرامتي وشرفي وجيت مدلولة كيف الكلبة .. نصحيني شنو ندير .. بغيت نهرب .. الحل الوحيد هو هذا .. 
سلمى: فين غتهربي المكلخة .. تخرجي من هنا تلقاي كلاب جهل من هذا والله تايهنشروك ومايخليو فيك حتى عظم ... 
حوراء: وشنو المعمول اسلمى شنو نديير .. 
سلمى: الحل الوحيد هو تسحري لديلمو غيجي عندك حاني راسو كيف الكلب يبوس ليك رجليك .. باش ترحميه ويعيش كلب تحت رجليك ..

يتبع