شكون هي الشخصية الثانية فقصتنا، شكون بطلتنا من بعد براءة.... سميتي نهيلة احسني، كانكتب لكم الجزء الثاني من قصة انا غير هبيلة من بعد الجزء الاول لي لقى تفاعل
هذا جزء مستقل على الاول رغم ان العنوان هو نفسه، صحيح ان شخصية البطل زياد، بطل الجزء الاول،حاضرة.... وان الاحداث الاولى تقريبا هي نفسها، ولكن
هذا الجزء كانأكد انه غايكون زوين على الاول......
قبل 6 سنوات :
نهى #اهئ اهئ اهئ، علاش وقع ليا هادشي، علاش خلاني، باش حسن مني هي.
سليمة(وهي كاتبكي لحال صاحبتها) #صافي اصاحبتي، راه هو لي ضايع، اما نتي دابا يجي لي يستاهلك...... الف واحد يتمناك
نهى # ماتقوليليش هو اللي ضايع اسليمة، انا لي ضايعة، 4 سنين من حياتي ضيعتها معاه، كلشي عارف علاقتنا، واش انا خايبة بزاف اختي، نكون درت لو شي حاجة خايبة اهئ اهئ اهئ....
سليمة #صافي اصاحبتي عافاك راه والله مايستاهلك، ونتي راكي ماشاء الله عليك الف واحد يتمناك...
سميتي نهيلة، اغلبية يعيطو لي نهى، 17 سنة، انا بنت سمراء ولكن سمورية فاتحة، عيني كبار وكحلين، انف عادي، وفم صغير لكن منتفخ الشفتين،ميلحة اصافي ماشي زوينة.... اللي ميزني بزاف هي فورمتي، كيف نقولو مرسومة ...... مي اسمها زينب، ماتاندي منها والو، هي شقراء وعينيها خوضر (ربة بيت )، الاب ديالي {الحسين، } حتى هو بيض، اب حنين بزاف ولكن موقر راسو الشيء اللي تايخلي الكل محتارمو، وهادي اللي كانت معايا صاحبتي سليمة اجمل فتاة فحينا (هههه)، هي بنت بيضاء، زرقاء العينين، فم صغير، وانف منحوت.......انا وهي صحابات بحال ماما وماماها .....
##################
اليوم الشخص لي كنت تاندير كلشي على قبلو اكتاشفت بلي تزوج، قلبي تايتحرق من الداخل، مراد كان كلشي فحياتي، تلاقيت معاه فاش كنت طالعة ف14 لعام. كان هو تايقرا الماستر ديك الساع فلافاك هنا فمدينتي مكناس، اصلو من افران، العام اللي فات تخرج استاذ، وكنت قلت لو يخطبني ملي توظف، وقالي بلاتي توصلي 18 لعام،وتشدي الباك ديالك، حيت هو غايجلسني فالدار على حساب وليديه مايبغيوش، احترمت هادشي لي قال وبقيت معاه، ومع هو تخرج غير فبوفكران مدينة قريبة من مكناس ، كنت كانهبط تال عندو تانجمع لو الدار ونشقى ليه، هو ماعمرو ماطلب مني شي حاجة كبيرة (راكم فهمتو قصدي )،وكونوا متأكدين كون طلبني كون قبلت، كنت كانتيق فيه كتر من راسي، دابا انا عندي السيزيام، والامتحان قرب لي، مابقاش مراد تايعيط لي مؤخرا بزاف قلت واقيلة بغاني نحفظ، وهادي 2 اسابيع تانعيط لو والو التلفون ديالو، اليوم الصباح هبطت لبوفكران، مالين دار عند بالهم راني تانقرا..... وصلت مشيت للدار لي كان كاري، دقيت كانتفاجئ بواحد البنت شابة خارجة عندي، قالت#لي شكون، قلت لها واش كاين مراد، قالت لي شكون نتي انا راه مراتو، تصدمت قلبي تقطع اللي تعرضات لهاد الموقف هي اللي غادي تحس بيا، مشيت كانجري تال لبلاصة فين خدام، ماخلانيش السوكيريطي ندخل، حيت ماتانقراش تما، جلست تانتسناه فالباب، وصلات 12، عيطت لمي فالتلفون وانا تانحاول مانبينش صوتي المخنوق بالدموع، قلت لها انا غانتغدا مع سليمة، وعيطت لسليمة قلت لها ماتبانش قدام مي تانجي،،،،،،.......
قلت # علاش درتي هاكا، واش درت ليك شي حاجة، انت عارف بلي كنتي كلشي فحياتي، حتى من قرايتي وليت كانخليها على ودك، علاش درتي هادشي وبقيت كانغوت عليه وتانعاير، صرفقني بجهد، بقيت مصدومة وقالي#شوفي اختي، انا وياك سالينا، كنت باغيك ولكن ماكتابش نتجمعوا انا وياك، صافي كل واحد فطريق الله يسهل عليك بماحسن مني..... دابا طلعي نوصلك راني عندي بزاف دالشغال،، ، ،،،، انا بقيت غير تانبكي، قلت لو سير كيف ماحرقتي قلبي بغيت الله يحرق ليك ديالك وانت ماتقدر دير لو والو..... مشيت وقفت فجنب لاخر دطريق وهو طلع فلوطو ديالو وزاد، اش كنت نتسنى منو، جا الطوبيس طلعت، ومشيت للدار وصلت مع لوحدة ونص، عيطت لسليمة، ومشيت للدار شفت ماما خارجة غادة لمحاربة الامية..... مهم خليتها خرجات مشيت فتحت الباب دخلت لبيتي كاين فالسطح، جات عندي سليمة حليت لها، وطحت تانبكي عليها، (وتما دار الحوار اللي فالأول دالحلقة.)
مشات سليمة وبقيت انا تانبكي تاداني النعاس
مافقت حتى اذن المغرب، نضت صليت، وبكيت على الله، حيت قلبي ضارني، معرفتش واش نطلب منو السماحة على وديت العلاقة الحرام لي تانبكي عليها، ولا نبكي على صلاتي لي تهاونت عليها، ولا نبكي حيت مارضيتش بقدر الله وقضاؤه، ولكن فالاخير طلبت السماحة على كلشي، وعارفه بلي الله غايسمح لي،وعلاش لا وهو الرحمان الرحيم......
مي #خليني نتفرج فهاد ليهود الله ياخد فيهم الحق، جالسين تايقتلو فالناس، وتاواحد ماتايهضر.....
هادي عادة مي ديما شادة الاخبار، تانشك شي مرات بلي كون لقات شي اسرائيلي قدامها تقطعو طراف طراف،ههه.
المهم جلست تانتفرج معاها ماشي نسيت مراد فنهار ولكن تانحاول نقنع قلبي بلي مايستاهلوش، اصلا الى جلست بوحدي غادي نبقى غير نبكي.... جا با وجدت شوي دالشوربة تعشينا بيها.... وانا تانحاول ناكل غير باش مانبينش لهم ، وطلعت لسطح لبيتي، قلت لهم بغيت نحفظ، سديت عليا، وهزيت شي صور كانو عندي، ديال مراد، عنقت وحدة وبقيت كانبكي، وانا ندمت حيت تعلقت بيه، وكون بيدي كون حيدت قلبي ونحط اخر فبلاصتو، باش ننساه، ولكن صعيب، الليل كامل وانا تانبكي، فاش كاتحسوا بقلبكم تايتقطع ونفسكم مخنوقة، هذاك هو الاحساس لي الليل كامل وانا نحس بيه، اذن الفجر، نضت صليت، عاد تكيت داني نعاس، مافقت غير على صوت سليمة جات دازت عليا باش نمشيو للكوليج، اليوم كنا داخلين مع 10،......
مشينا، قرينا، انا كنت حاضرة غير جسد بلا عقل......اوا مشات يام وجات يام والى قلت لكم نسيت مراد غانكون كانكدب ولكن حاولت نتناسى الموضوع، دوزنا الجهوي، مهم خدمت شوي...... تعلقو النتائج ونجحت بعشرة ههههه، فرحت بزاف ماكانتش باغا يكونوا عندي الكريدي دالنقط، وحتى سليمة نجحات، ولكن ب 12، فرحت لها.
صافي كيف ديما الجلاس فالدار ماعمرنا ماسافرنا، هاد الايام تخطبات سليمة، ماغنقولش حسدتها، لا والله تافرحت لها ولكن احتقرت راسي، وبان لي بلي ماعنديش الزهر.... ماعمر شي حد دق بابنا، ماعدا الدراري لي باغيين يتصاحبو..... اوا حضرت للخطوبة ديالها، كانت واعرة، عقدات من بعد اسبوع، ولكن غاتجلس تشد الباك عاد يعملو العرس، بحكم ان راجلها ففرنسا، وماغايديها تال الصيف الماجي......
داز الصيف بسرعة، وبدات القرايا، مي مريضة بزاف هاد الايام، فاش مشات عند الطبيب قالها عندها ورم فالراس، وقالها مانعرت واش تقدر تنجح لها العملية الى بغات تحيدو او لا، هنا جاتني الصدمة الثانية، بكيت غوت، ولكن صبرت مابغيتش نبين لها...... من بعد شهرين من الدراسة، الام ديالي صحتها تدهورات بزاف، وانا هملت قرايتي، وليت خايفة تموت وتخليني...... مع ذلك كنت كانمشي هي ماكانتش تاتبغيني نغيب، هاد النهار كنت فالقسم، تا جات بنت جيرانا، مع الحارس العام، وقالت لي فالقسم، بلي مي ماتت........... وهنا قلبي وقف.
قصة نهى بائعة الهوى
محتوى القصة
التنقل بين الأجزاء