الدخيلة الجزء 17

من تأليف Ghazal trust
2018

محتوى القصة


رواية الدخيلة الموسم الثاني

طلعات ولدها للدار وكلاتو ودخلات حطاتو فوق الناموسية وتخشات خداه ... عنقاه وجلس كيلعب ليها فشعرها 
امير: ماما .. غلاش درتي الغوز؟
اسراءة ماشي غوز هادا فيولي 
امير: ديري لبلو ماديريش الفيولي 
اسراء: البلو مكيدارش فالشعر نديرو فالدفار
امير: الااا لاا مديريش هادا فشعرك حيديه كيديروه البنات ... وانا منقراش فليكول للي داني ليها بابا نقرى فوحدة اخرى
اسراء: هههه واخا دابا نقولها لباباك 
امير: وغدا حيديه مديريش هادا 
اسراء : انشاء الله .. يالاه نعس دابا .. نقرا ليك قصة؟
امير: اه ديال فومبيغ؟
اسراء: لا هادوك خايبين .. مزوينينش غنقرا ليك ديال الدب و النحلة بحال اللي عضاتك ديك المرة عقلتي عليها ههه 
امير: وعلاش منقراش ديال فومبيغ؟
اسراء: حيت هادوك مزوينيش كيعلمو غير الحوايج الخايبة .. فيها القتل والدماء والسرقة .. نتا خاصك تقرا ديال الطبيعة والحيوانات والوريدات باش متخلعش بليل ومتعلمش العنف وترجع عصبي ... صاافي الحبيب ديالي ... حتى ديال الدب والنحلة زويينة وكضحك .
امير: هههه زوينة 
اسراء: اه... قالك هادا واحد الدب كان فيه الجووووع ... وبقا كيقلب كيقلب حتى لقا واحد الشجيرة فيها العسل ... دخل يدو فالعسل وبقا كايااكل كياكل كيااكل فرحاان ... شوية خرجات ليه واحد النحيلة عضاتو فنيفو ... قالها انا الدب انا غنااكلك حتى نتي... مشات كتجري عيطات لأصدقاءها النحل ... هجمو عليه كيعضوه وهوا كيغوت كيغوت كيفوت 
امير: هههههه عضووه فعينو كيبحالي؟
اسراء: فعينو وفمو ونيفو وهرب كيجري
امير: مدارش فاصمة كيبحالي؟
اسراء: هههه لا هوا طاح فالماء ... والنحل مقدرش يقرب للماء ومشا بحالو 
امير: ومات؟
اسراء: لا ... ناض من الماء فيه بواقة هنا وهنا وهنا 
امير: هههه هوا تعاقب حيت كلا العسل ماشي ديالو وغيمشي لجهنم ... حيت بابا قالي اللي خدا شي حاجة ماشي ديالو كيمشي لجهنم ... وكيتعاقب كيبحال الدب ... انا ديك المرة تعاقبت حيت قطعت الوردة وعضاتني النحلة فعيني منعاودش ناخد الورد ياك اماما ... وحتى عمران ولد عمو اسماعيل كياخد ليا طوموبيلتي اللي شرا ليا بابا ... وديييما كنقول ليه ربي دابا يعاقبك كتاخد ليا طوموبيلتي وغيديك لجهنم ... ولاكن اماما قالي بابا غير نخليه يلعب فيها 
اسراء: ماشي مشكل لعبو بجوج 
امير: وهوا كيبغي يضربني ياك اماما ... وانا مابغيتش نضربو او او اوقلت لسام عضو ومشا عضو سام فرجلسه وسال ليه الدم 
اسراء: هيييه!!! حشوماا 
امير: هوا اللي كياخد ليا طوموبلتي وكيبغي يضربني ... وسام عضو حتى بقا كيبكي 
اسراء: ماتبقاش تقول لسام يعضهم حشومة ... نتا زوين وسام زوين 
امير: سام عض حتى عميتو رشيدة ... عضها وقطع ليا الكسوة حيت بغات ضربو ... وجا بابا غوت عليها قاليها مضربيهش واخا يعضك 
اسراء: ههههههه ... نعس اماما وحلم بالدب والنحلة ... يالا نبقاو نحسبو حتى لعشرة ونعودو نحسبو حتى نعسو 
امير: واحد ... جوج ..
بقات كتحسب معاه حتى نعس وناضت بشوية حلات الماريو جبدات حوايجها ... شوية سمعات تيليفون كيصوني ومشات هزاتو 
اسراء: الو
يحيى: امير نعس؟
اسراء: اه
يحيى: يالاه نزلي انا لتحت 
اسراء: فين غنمشيو؟
يحيى: لبسي شي حاجة كلاص ونزلي يالاه سربي راسك
لبسات سروال اسود قصير مع بوظي كلاص مزير مايل من الكتاف مشبك اسود وفوقو عباية فالباج فاتح بتوب شفافا بحال الشبكة نازلة حتة للارض ايفازي محلولة من القدام يديها واسعين طلقات شعرها ودارت مكياج خفيف كحلات عينيها وعكار بوردو ، رشات بارفان مع اكسسوار وهزات صاكها فيدها هوا والصندالة وخرجات راسها من الباب كطل ، السكااات والضواو طافيين مشات بشوية على صبعان رجليها معنقة صباطها كتختل حتى للباب وحلاتها مزيرة على سانها وسادة واحد العين باش مديرش الصوت .. خرجات وسدات الباب موراها وهبطات فلاساسنسور كتلبس فالصندالة الكحلة العالية . خرجات مقادة كتعوج لقاتو جالس فالطوموبيل لداخل كيشوف فالساعة ... الشارع كيصفر وسيارتو بوحدها اللي شاعلة الضوء . هو عينيو شافها جاية ونزل لابس سروال توب كلاص وقميجة بلو مارين بارزة عضبات جسمو وريحتو معطرة السيارة من الداخل .. انزل عندها بابتسامة سلم عليها من لابيز وفتح ليها الباب طلعات جلسات وجمعات يديها كتشوف فيه بحدر 
اسراء: فين غنمشيو؟
يحيى : بابتسامة ) مالكي خايفة ... الى مكنتيش مرتاحة بلا منتحركو 
اسراء: هاد الهدوء ديالك كيخلعني...
يحيى: ونتي فضولك ما هناك ياك...صفي نيتك اسراء صفيها 
اسراء: حلف مداير ليا شي بلان خايب ... انا مقداش نتحمل شي حاجة اخرى ... الى مشيتي حتى درتي ليا شي حاجة غنمشي فيها هاد المرة ... نتاقمتي مني وانا ماباغش نرجع ليك صرفك باش منبقاوش رجع ليا نرجع ليك 
شد الفولون ومشا سايق كيشوف قدامو: قلت ليك صفي نيتك ... وشرحت ليك موضوع الفيديو وقلت ليك شنو كاين 
اسراء: تنهدات ) واخا ... هانا غنصفي نيتي 
خدم الموسيقى وطلق ليها اغنية ماجد المهندس ... "تيناديك"
يحيى: عاقلة على هاد الاغنية ... كنت قلت ليك فين ما نسمعها غنتفكرك ... وفعلا كنت فين ما نسمعها نتفكرك .. او بالاحرى كنديرها بيدي ... نفسي كدفعني نسمع ليها ... عرفتي اسراء فاش وقع المشكل بيناتنا ... جربت نقنع راسي انني نسيتك وبللي كاين ما حسن . . مي والو مقدرتش
ابتاسمات حانية راسها... تلفت ليها بابتسامة وقال
يحيى: كتبغيني ياك
شافت فيه وابتاسمات حشمانة وهبطات راسها ... هز يدها باسها وكمل السياقة ديالو فصمت مع الاغنية اللي كتعجبها ... بقا غادي حتى بدا كيدخل فطريق خاوية ... الشجر والضلاام الشىء اللي خلاها تستغرب وتسولو لصوت خافت خايفة 
اسراء: فين غاديين؟ خرجنا على المدينة 
يحيى: بابتسامة ) خايفة؟
اسراء: قلبي ممهنينيش ... حاسة بشي حاجة ماشي هي هاديك ... علاش دزنا من هاد الطريق؟
يحيى:ببرودة ) حيت هادي هي الطريق اللي غتدينا للبلاصة فين حنا غاديين 
اسراء: بثوتر ) قربنا ولا باقي؟ علاش كتمشي بشوية؟
يحيى: ببرودة وابتسامة) حيت مساخيش بيك...وبغيت نبقى معاك وقت طويل 
ابتاسمات بمجاملة ورجعات شافت فالزاج والخوف متملكها ، وقفات الطوموبيل حدا فيلا كبيرة فيها الاضواء وامامها بزاف ديال السيارات باينة عليهم سيارات الاغنياء ... مزا وفتح ليها الباب نزلات ... شد ليها فيديها ودخلها ، غادية مستغربة كتشوف الفيلا وكأن شي حفل مقيوم فيها ... بنات كتار داخلين خارجين لباسهم مفضوح ومن وجهم باينين بنات الليل ... خافت وطبقات منو جمعات يديها عندها وكملات طريقها غاية حداه بحذر ، دخلات لوسط الفيلا لقات رجال بزاف وبنات شي واقف شي جالس كيتجمعو بحال شي كازينو فيه موسيقى و بنات كيتلاحو على الرجال .. جر ليها مرسي على طاولة جلسات وعينيها كيدور فالمكان وقلبها كيخفق باين على وجها الخوف ، جلس حداها بارتياح ولاح يدو مور ضهرا بابتسامة
يحيى: شنو تشربي؟
اسراء: لا شكرا ... علاش جينا هنا ؟ شكون هاد البنات؟
يحيى: نتي السوم ضيفة الشرف فهاد الحفلة ... وحتى وحدة مغتبان قدامك 
اسراء: كيفاش مفهمتش؟ انا راه قلتي ليك فاش كنا جايين قلبي ممهنينيش
يحيى: هزي عينيك لفوق وشوفي 
هزات عينيها شافت شاشة كبيرة فالحيط انام الملىء.. شوية بان الفيديو ديالها وهي معاه فالفراش ... وقفات بهول الصدمة كشتوف فالفيدو وفالناس اللي كيتفرجو ورجعات تلفتات ليه لقاتو مزال جالس كيما هوا وداير ابتسامة جانبية .
يحيى: مالك تصدمتي ؟ عادي جيت نتشارك صحابي (وقف ورفع يديه) جست نتشارك صحابي المتعة اللي ستمتعت بيها وانا معاك ... كيما حتى هما كيشاركوني متعهم 
اسراء: فذهول) وو..واش.. واش نتا حمق؟ واش مريض؟ واش بعقلك ؟ واش انا اللي تسطيت ولا شنو ؟ انا راه غنحماق مابقيت عارفة والو .. واش هادا نتا ايحيى اللي درتي هادشي؟ واش نتااا هادا جااوبني ؟ 
تلفت الكل كيشوف فيها ورجع هوا اللور داير ابتسامة جانبية 
يحيى: اللي عليا درتو .. والرهان كسبتو ونتي دابا شوفي كيفاش تخرجي راسك من هنا وكيفاش تقنعيهم انكي ماشي عاااااهرة ... عااااهرة ... ههه ولا ختاري ليك شي واحد فهادو اللي تراهنت معاهم انني غنجيبك حتى لهنا ... قدامهم ... شوفي الى عجبك شي واحد فيهم كملي معاه راه غيعطيك اللي بغيتي

بقات كتشوفيه مصدومة والارض كدور بيها وكلمة عاهرة كتردد فالاذان ديالها حتى سخفات فالارض . 
يحيى: اسرااء... اسراااء ... اسراااء 
حلات عينيها بتتاقل شافت وجهو قريب من وجها وهي تنوض مفزوعة كتشوف جنابها لقات راسها فالطوموبيل ... شافت فيه مخلوعة 
اسراء: بعد مني ... طلق مني رجعني بحالي 
يحيى: باستغراب) مالكي؟ راه وصلنا يالاه نزلي 
شافت فراسها و طلات من واج السيارة لقات راسها اوتيل كبير ... بقات ساهية .. ودنيها مصمكين وقلبها كيضرب بالجهد ... خطات يديها على صدرها وتنهدات مغمضة عينيها ... قفزاتها يد يحيى اللي تحطات على كتفها وهي تهلع
يحيى: مالكي واش كاين شي مشكل؟ مشبعتيش نعاس يمكن ... حطيتي راسك ونتي تنعسي 
اسراء: هاا؟ شحال وانا ناعسة؟
يحيى: مللي طلعتي ونتي ناعسة ... مابغيتش نفيقك قلت حتا نوصلو
اسراء: فين حنا ؟
يحيى: يالا نزلو 
كمشات يديها : لالا بفيت نرجع بحالي ... مابغيتش نمشي لحتى بلاصة رجعني للدار 
يحيى: مالك اسراء اش وقع؟ واش حلمتي شي حاجة ؟
اسراء: غير رجعني اخويا الله يرحم ليك الواليدين ما بقيتش باغا نخرج 
يحيى: نعلي الشيطان ونزلي
اسراء: بأصرار ) لالا غنرجع بحالي ... مابغيت نمشي تا بلاصة عافاك رجعني 
مزل من السيارة ودار جيهتها فتح الباب وحل قرعة دالماء عطاها ليعا 
يحيى: شربي الماء راك غتسخفي ... شدي (شربها الماء وشد ليها فيديها) يالاه اجي معايا متخافيش ... هادا اوتيل وشي داخل شي خارج واش غنهرب بيك فاوتيل؟ يالاه نعلي الشيطان 
بعد اصرار منو وبصعوبة كبيرة قدر يهبطها من السيارة وهوا شاد فيها .. مترددة كل شوية ككترجع بللور باغا تهرب وهوا مستغرب من تصرفاتها وكيحاول يسايسها .. دخلات للاوتيل كترعد وتشوف شوفات حذرة وتنقز بوحدها فكل مرة يدوز شي واحد ويقيسها بكتفو ... شافها متوثرة ومخلوعة ودوز يدو مور خصرها كيمررو بلطف ويهمس فودنها 
يحيى: هانتي ماعندك مناش تخافي ... وسط الناس وحتى حاجة مكتغلع ... رخي اعصابك ورتاحي ... هاد الليلة ليلتك نتي .. ونتي ضيفة الشرف 
سمعات هاد الكلمة وهي تشوف فيه مخرجة عينيها ونترات يديها راجعة بللور هاربة ، تبعها شدها كيسايسها وهي كتبكي باغا تمشي بحالها 
اسراء: غير خليني انا غنشد كاكسي نمشي بحالي ... مابغيت نكون لا ضيفة شرف ولا والو بغيت غير نرجع بحالي 
يحيى: غير شرحي ليا مالكي؟ شنو تبدل علاش كديري هاكا ... ياك خرجتي بخاطرك علاش حتى لدابا عاد تراجعتي
اسراء: بترجي ) الله يرحم ليك الواليدين خليني نمشي بحالي... انا شنو درت ليك حتى تشوهني كاع هادا سم فيك .. انا واخا تكون قاتل ليا با نخليك منك بمولاك ومنديرش ليك هادشي
يحيى: بعصبية) اش كتخربقي واش نتي تسطيتي؟ اشمن شوهة ولا النم اسراء ؟ اشمن سم علاش كتهرضري
اسراء: كتبكي) ياك رجعتيها ليا فوجهي فإفران وصافي هانتا فشيتي قلبك ... نساني وخرجني من بالك وانا من هنا كنقولكيك نتا اللي ربحتيني وعطيت حماري غير فرقني عليك ... انا غنتسطى فعقلي وكيجيوني كوابيس خايبين بسبابك و . . . 
مخلاهاش تكنل وضمها بقوة باسها فراسها وهي كترعد وتبكي 
يحيى: شووو .. كنحلف ليك اسراء مناوي ليك شي حاجة خايبة ... صفي نيتك وسمعي ليا 
اسراء: اعىء اهىءاهىءاهىء 
يحيى: غير تيقي فيا ... مغنآديك مغنضرك بحتى حاجة 
اسراء: هزات عينيها فيه) ياك نتا كتصلي وربيتي ولدك احسن تربية ... خلي اعمالك مع الله مزيانين علاش غضيعهم على قبلي اهىءاهىءاهىء 
يحيى: تنهد) اسرااء... تيقي فيا ... غير تيقي فيا هاد المرة 
سايسها مرة اخرى ودوز يدو مور خصرها غادي بيها وهي كتشوف فالناس خايفة .. دخلها لغيسطوغون شافت ناس جالسين كيتعشاو نقيين عكس اللي شافت فالحلم ديالها ... جر ليها كرسي وهي تالفة ... حط يديه على كتافها وجلسها بشوية على الكرسي وجلس مقابل معاها ، ابتاسم وشد ليها فيدها بشوية
يحيى: اسراء ... واش عيانة بزاف ؟ شنو اللي خلاك تخافي مني ختى لهاد الدرجة 
هبطات راسها كتبكي وتنخصص ... تنهد ونا بدل الكرسي وجلس حداها ... حط يدو على كتافها ورجع ليها شعرها اللور 
يحيى: انا عارفك مبقيتيش كتيقي فيا ... وندمت على ديك الطريقة اللي تصرفت معاك بيها ... بغيت نعلمك تهضري ومتعاوديش تعايري ... اما ديك الهضرة اللي قلت راه كانت طالعة من الحلق ماشي من القلب 
اسراء: الصمت 
سكت في حيرة كيدوز يدو مور ضهرها ويهز ليها لافخونش على عينيها ... قرب لدنها وهمس
يحيى: شحال اليوم فالشهر اسراء؟
اسراء : ماعرفتش؟
يحيى: اول مرة نحتافلو بهاد النهار 
هز راسو وشار بيدو وهي تطلق موسيقى وقتاتة دات ضوت جميل كتغني فالميكرو
هابي بووووورثدااااي تووويوووو 
هابي بوووووورثداي تووويوووو 
هابي بوورثدااااي تويوووو اسرااااء هابي بوووورثداي تووويويووو
هزات اسراء عينيها فذهول شافت جوج شوبان جايبين ليها حلوى كبيرة شاعل فيها الشمع كيشقشق فالابيض والاسود حطوها لسها قدامها والناس كيسفقو ... باركات ليها المغنية فالميكرو واسراء مزالة فحالة ذهول جامعة يديها عندها عينيها كيبريو بالضوء اللي ضارب فيهم مع الذموع اللي بقاو فعينها . شافت فيحيى ورحعات شافت فالحلوى ... شوية بداو عينيها كيبتاسمو والضحكة كترسم على شفايفها ووقفات ببطىء كشتوف فالحلوى

ماعرفات راسها كي دارت قطعاتها وسط التسفيقات والموسيقى حتى لقات راسها كتاكل منها ... داخت .. تلفات والدنيا دارت بيها ... جلسات فوق الكرسي وربعات يديها كتشوف . 
يحيى: عنقها) ههه مالكي جلستي؟
اسراء: هاه؟ تخربقت ... واش عيد ميلادي هادا؟
يحيى: هههه قطعتي الحلوى وكليتيها وعاد كتسولي؟ 
اسراء: لالا راه بصح تخربقت ... شحال تليوم فالشهر؟
يحيى: ليوم 30 اكتوبر ... نسيتي ولا مالكي؟
اسراء: ااه ... نسييت ههه شكرا على المفاجأة 
يحيى: ومالكي مخلوعة وخايفة؟
اسراء: لا غير حسيت براسي عييت ... وجلست 
جلس حداها وجع ليها شعرها اللور
يحيى: دابا كتقولي مع راسك هادا جا دغيا زرب عليا 
اسراء: مابقيت فاهمة فيك والو 
يحيى : داكشي اللي غنبقاو نزوقو ونلسقو بلاش منو ... سيمانة وانا كنقلب عليك وكنتسنى فوقاش تبان ليا ... كن غير جاوبتيني داك النهار فالتيليفون كن شرحت ليك شنو كاين 
اسراء: واش بصح بصح الفيديو مسحتيه؟
يحيى: بجدية) مسحتو ا اسراء ... فين عنري كدبتك عليك اللي كاينة كنقولها نيشان ... مسحتو يعني مسحتو ونسااايه ندمت حتى درتو 
اسراء: راه كيخلعني داك الفيديو الة مشا حتى شافوه واليديا ميبقاش ليا الوجه باش نشوف فيهم 
يحيى: وا تهناااي راه مسحتو ماشي تسطيت نوريه ليهم ... راه ماشي شماتة كيما عايرتيني نتي باش نشوهك 
قلب وجهو عاقد حجبانو وهي تحط يدها على كتفو 
اسراء: يحيى ...
تلفت ليها 
اسراء: سمح ليا على ديك الهضرة ... نتا ماشي شماتة راجل وتعاملتي معايا راجل ... واخا فاللخر قهرتيني و ... 
يحيى: هاداك الغضب والجنون والاعصاب اللي ركبتي فيا اللي خلاوني درت ليك هاكاك باش نبرد العافية اللي شعلتي فيا 
اسراء: باقة شاعلة فيك؟
يحيى: حط يدو على جبهتو كيضحك)هههه لا ... ودابا نساي داكشي اللي وقع ... غنحاولو نبداو من الاول 
ابتاسمات وحركات راسها بالايجاب
يحيى: باقا حاقدة عليا؟
اسراء : لا ... عنداك غير نتا تكون كتفلى عليا 
يحيى: كوني صريحة معايا ... وعمرك تكذبي عليا ولا ديري شي حاجة مور ضهري وبلا خباري ... وانا كنواعدك معمرني نغدرك ولا نكون خايب معاك (شد ليها يديها) راكي عارفاني كي داير بلا منحتاج تقول ليك ... عاشرتيني وعرفتيني 
اسراء: معمرني نخبي عليك شي حاجة ... غير متصدمنيش برااكة هادشي اللي داز عليا ... راه ولاهيلا تمحنت و متبقيتش كي كنت ... انا كنقول ليكك هاكا باش متبقاش واخد عليا نضرة خايبة ... راه بصح ايحيى تبدلت وتهديت متبقاتش عندي طاقة للمشاكيل ... بغيت نرتاح شوية عييت 
ابتاسم وجرها عنقها : نساو اللي داز متافقين؟
عنقاتو بيديها : اه ... متافقين 
شد ليها فحناكها : انا دابا عاد رتاحيت ... ونتي مديريش متخافيش 
اسراء: انا غنتيق فيك هاد المرة ... وتبت ليا انك رااجل وقد كلمتك ماشي تفلا عليا 
يحيى: ههه رااجل وقد كلمتي ... عطيت لواليديك كلمة نهار جيت خطبتك و بقيت شاد فكلمتي حتى بديتي كتزيكزاكي معايا ... وحلفت حتى نوريك فعايل الشمايت ... هههه وضحكت معاك داك الضحك وبدسك الهضرة اللي قلت ليك فإفران ... حيت هادوك هما فعايل الشمايت ... اما اللي راجل مكيديرش داكشي ... وكن صبرتي كنتي غتعرفيني ضحكت ماشي درتها بصح و كنت كنتسانا غير تشوفي الفيديو نمسحو ... ودابا عطيتك كلمة مغنتفلاش عليك ومغنتخلاش عليك الة نتي تبتي ليا انك بصح تبدلتي و مابقيتيش كيما كنتي ... وبلي الكلمة اللي عطيتك دابا غتخليني نوفي ليك بيها بأفعالك نتي ... ماشي ديري معايا الخشونة وتقولي ليا موفيتيش ... من هنا كنقولك كوني معايا مرى نكون معاك راجل 
اسراء: وهانتا دابا كتخلعني .. ويلة شي واحد شرى ليا شي صدع ولا شي مشكل مادرت فيه لا بيدي ولا برجلي شنو ندير؟
يحيى: انا ماشي مكلخ نجي ونتيق ... بعدي راسك من المشاكل واللي كانت قوليها ليا منبقايش تفصلي وتخيطي بوحدك كيما وقع شحال هادي تا تشتتنا ... تفاهمنا 
اسراء: اه 
يحيى: بابتسامة ) يالاه هاكي ... ها الكادو ديالك

يحيى : ها الكادو ديالك
هبطات عينيها شافتو هاز حوج سوارت فيديه ، استغرابت وسولاتو
اسراء: شنو هادو؟
يحيى: كنتي قلتي ليا كاريا المحلات وكتخلصي الكرا غالي ... هادو سوارت ديال جوج محلات فالشارع فين عندي القهوى والغيسطو 
اسراء: كيفاش؟ مفهمتش؟
يحيى: بقاو عندي جوج محلات كبار فالشوكة على الرومبوان ... مسدودين راك تكوني شفتيهم 
اسراء: ااه عرفتهم 
يحيى: هادو ديالك ... خرجي من الكرا ... نتي باغا تخدمي وعندك طموح ... انا كنهديك هادوك المخلات بجوج ديالك نتاقلي ليهم 
اسراء: بدهشة ) بصح؟ واش ديالي ولا ... 
يحيى: ديالك وفسميتك 
اسراء: هاه!!! لالا منقدرش ... لا منقدرش نشدهم ايحيى 
يحيى: علاش ؟ ماعجبوكش؟
اسراء: لا بلعس ... حشن من هاديك البلاصة فين كاينة انا ... وجاو فموقع زويين وكبار ولاكن منقدرش نقبل هاد الهدية كاملة 
يحيى: الصمت 
اسراء: عافاك متقلقلش مني ولاكن انا كنبغي نعتامد على راسي ... وبحال هاد الكادو كبير منقدرش نقبلو ... ونتا عارف دابا المشاكل اللي كاينة و شنو غنقول لدار 
يحيى: قلب وجهو ) اوك اللي بغيتي
بقات كتشوف فيه فيه حيرة وهوا مقلقل نوعا ما 
اسراء: واخا صافي ... انا قابلة هاد الكادو 
تلفت ليها بابتسامة عطاها السوارت وعنقها 
يحيى: متعاوديش ترفضي شي كادو جبتو ليك ... بغيتي تخليهم خاويين حتى نلقاو شي حل مع العاءلة خليهم ... ولاااكن 
اسراء: شنو ههه
يحيى: داك الكرا انا اللي غنخلصو .. ويلا ولفتي الخدمة تما غنشري ليك دوك المحلات بجوج 
اسراء: حطلت يدها على وجهو) يحيى .. نتا خيرك سابق ... وانا مابغيتكش على الفلوس ... انا بغيتك نتا ... ماشي حيت كتشري ليا اللي بغيت .. ولاكن حيت كتبغي تشوفني فرحانة وكتحاول ترضيني ومعمرك عزيتي فيا شي حاجة واخا تكون كيما بغات تكون ... نتا سخي بزاف وكريم وحاجتك ماشي ديالك ...وانا على قلبك و على تعاملك معايا وليت كنبغيك 
بقا ساكت كيشوف فيها وهي كدوز يديها على وجهو وعلى شعرو بحب وعنقاتو 
يحيى: حتى انا كنبغيك . . . ودابا كنموت عليك 
اسراء : يالاه نمشيو .. راه امير بقا بوحدو فالبيت 
ناض وقف عطاها بوكي دفلوغ وبواطة حمرا وباسها فحنكها ... شد ليها فيديها وخرجات فرحانة وحشمانة ... طلعات حداه وشد ليها فيديها سايق ومرة مرة يبوس ليها يديها حتى وصلها للدار تلفت ليها بابتشامة وحط يدو على كتفها بلطف 
يحيى: غنتوحشك 
اسراء: ههه 😋
يحيى: ونتي ؟
قالتها بخجل: حتى انا 
قرب منها بشوية كيتأمل ملامحها وكيزيد يقرب وهي كتمش حشمانة حتى تخلطات انفاسهم وقبلها بلطف من شفايفها ... شد ليها عنقها بشوية وبداو بوس يامات بوس .
اسراء: بخجل) تعطلت 
يحيى: بلاتي 
رجع قبل من فمها مرة اخرى وهي كتهرب حشمانة 
اسراء: وصاافي ههه غيكون امير فاق 
بعد عليها وتنهد ودار ابتسامة 
يحيى: يالاه ... تصبحي على خير 
نزلات بالزربة هازة الورد فيدها والعلبة وطلعات للدار ... دخبات شادة الصندالة فيديها كتسلت حتى لبيت النعاس وسدات عليها الباب ... لقات امير ناعس لايح رجلو فوق المخدة وفمو محلول . حطات الورد وحلات العلبة الحمراء متحمسة لقات فيها سنسلة بيضاء وبراسلي وخاتم وحلقات فيه حجيرات صغار فالابيض من الالماس . ابتاسمات وفرحات وناضت للطواليط قيساتهم فعنقها ويديها عجبوها ... غسلات وجها من المكياج ونضفاتو منضف الالويفيرا ودهنات كريم ليلي .. خرجات لبسات سوميج دونوي كحلة وتكات حدى امير كتبوس فيه وهوا ناعس ...هزات تيليفون دارت على ودنها وتاصلات بيها 
اسراء: بصوت ناعم ) الووو 
يحيى: الو حبيبة

اسراء: شكرا على الكادو 
يحيى: بصحة احبيبة
اسراء : نعستي؟
يحيى: لا مزال ... يالاه نويت ... امير فاق ؟
اسراء: لا لقيتو ناعس 
يحيى : كنت بغيت نقوليك ... الى بغيتي نسافرو لشي بلاصة انا ونتي وامير 
اسراء: فين؟
يحيى: طنجة مثلا ... ياك يخليوك تسافري 
اسراء: مكاينش اللي يقول ليا شي حاجة 
يحيى: ايوا صافي ... جمعي لامير حوايجو وغدا ندوز عليك 
اسراء : امم .. واخا .. شحال غبقاو تما ؟
يحيى: شحال مابغيتي 
اسراء: صافي ... يالاه تصبح على خير 
يخيى: بون نوي بب
قطعات وغنضات عينيها طايرة بالفرحة ... جرات امير عندها وخشات راسها فيه ونعسات ضاحكة . فاقت ناشطة كتجمع لامير حوايجو وجمعات اجمل ما عندها فالحوايج ... وصات سكينة على الخدمة وسدات باب بيتها ونزلات لابسة ظجين مقطع من الركابي وتيشورط بيضاء وصبادري بيضاء . جمعات شعرها كوب شوفال وخلات القصيصة نازلة . 
امير: ماما ماما وسام ؟
اسراء: غيمشي معانا 
امير: ساام .. يالاه 
تبعها سام كيجري وينقز طلعاتهم فالطوموييل للور وساقت بيهم . تاصل بيها يحيى وهسا كدور بالطوموبيل 
اسراء: الو ... 
يحيى: فينك؟
اسراء: هانا كندور بالطوموبيل معرفتش فين نخليها 
يحيى: فين نتي بالضبط 
اسراء : كندور فكيليز طالعة نازلة 
نعت ليها البلاصة فين هوا وقلبات الطريق مشات عندو دخلات لحي راقي فيه فيلات كبار وبقات كدور تا شافت طوموبيلتو حدى واحد الفيلا وهوا واقف حال الكوفر . وقفات حداه كلاكصونات عليه وطلات من الزاج 
اسراء: كوكو هاحنا جينا 
يحيى: ههه مرحبا ... امير.... جيتي ابابا 
امير: كيطل من الزاج) بابا نزل بابا نزل 
يحيى : نزل ... واجي طلع هنا .... اسراء دخلي الطوموبيل لداخل 
اسراء: فين؟ ديالمن هاد الفيلا؟
يحيى: ديال امير ههه يالاه دخليها 
دخلات الطوموبيل لداخل ونزلات حلات الكوفر ، دخل عندها حط يدو مور ضهرها وباسها فحنكها من اللور
اسراء: ههه 
يحيى: اري ليا باليزتك 
هز باليزتها داها ورجع سد الباب ديال الجردة ومشا شاد فيها كيعنقها و يضحك معاها . شدو الطريق فجو رومانسي وكونيدي مع امير حتى وصلو لطنجة ونزل هاز امير فيدو كيبوسو واسراء موراه كتهضر فالتيلفون دخل لاوتيل راقي حجز غرفة ليه و حجز لسام مكان يبات فيه فالاوتيل فبلاصت باقي الحيوانات وطلع هوا واسراء . دخلات للغرفة وجمعات النفس وطلقاتها
اسراء : الله على جو شحال زوين 
دورها بيديه من اللور : شديت واحد الاباررطومون على البحر خارجة على على المدينة ... غتعجبك 
اسراء: بصح ؟ توحشت البحر
يحيى: العشية هادي ... نخرجو امير شوية ونتعشاو برا و غدا نمشيو للابارطومون 
اسراء: بالفرحة) اه صافي ... عرفتي 3 سنين محسيت بالصيف ومستمتعت بيه ... كيدوز مكنعرفوش كي داز ومكنستاغلوش
يحيى: واستاغليه دابا .
اسراء: غيكون اخسن صيف ندوزو فحياتي 
يحيى: حسن من داك شهر العسل اللي دوزنا ياك ههه
اسراء : اصلا انا ونتا مدوزناش وقت بجوج... مخرجنا ماتسارينا ما حتى حاجة ... سالاه شهر القطران اللي دوزنا فمصر عقلتي ..وديك السيمانة اللي دازت فتركيا صافي
يحيى: باسها فعنقها) كان عسل ... ونتي رجعتيه قطران 
اسراء : كنحس بنفسي مبهجة ومتشوقة للهاد الصيف بزااف 
امير: باباا يالا نمشيو 
يحيى: واخا ابابا هاحنا غنمشيو
اسراء : كيقنط دغيا ... مكيبغيش يجلس بين 4 دالحيوط 
يحيى: لبسيه شي حاجة راه رجع حالتو بالشكلاط
اسراء: قلت ليك متشريش ليه راه غيدوب ونتا اللي بغيتي
يحيى: ماشي مشكل .. يالاه بدلي ليه ويالاه

بدلات حوايجو وخرجو بثلاتة ... شادة ليه فيدو وهوا هاز امير باليد الاخرى بحال اي اسرة سعيدة تمشاو فالكرنيش وتعشاو فمطعم هادىء ورمانسي بثلاتة . واخا امير كان كينوض وكيلعب فالطبلة مبرزطهم الا وكان جو جميل و فيه الضحك مرة تشدو اسراء مرة يشدو يحيى ومرة يوكلهم بيدو مرة يوملوه هما فسعادة وهناء ، داز العشاء جميل ورجعو للاوتيل هازين امير وهوا ناعس حطوه ففراشو ودخلات هي للدوش سدات عليها وشافت فالمراية كتبتاسم فرحانة ، خدات دوش ولبسات سوميج دو نوي فالغوز ودارت بينوار عليه ، نشفات شعرها لداخل ورشات جوج رشات من البارفان فالهواء ودازت وسطها استنشقاتها . حلات الباب وجها حمر مزنك لقاتو واقف لابس شورط قصير ومتكي بيديه على البالكون كيطل لتحت ويهضر فالتيليفون .. حطات الكاس بصوت مسموع باش تلفت انتباهوا وتلفت ليها مبتاسم ، هز يدو وودع المخاطب وقطع ، دخلات بسرعة فالفراش حدا ولدها قبل ميدور عندها وعنقاتو ، تم جاي جيهتها بابتسامة ومشا نيشان للدوش وهي كتسمعو كيدوش لداخل ، شوية حسات بيه خارج وهي تغمض عينيها دارت راسها ناعسة حتى حسات بيه دخل حداها فالفراش وريحتو طالعة نع مناخرجها في عنقها بيديو بيدو وهمس فودنها بابتسامة 
يحيى: نعاسة .. فيقي باقي الحال 
حلات عينيها بشوية فيه بابتسامة وهي كتقلب جيهتو ويدو مور ضهرها كيداعبها ... حط نيفو على نيفها كيشوف فيها وهي غالباها الضحكة وقلبها كيضرب ق 90 ... باسها بوسة خفيفة على شفايفها وتبع ليها ببوسة طويلة واندامجو فقبلات بدون انقطاع ... قبلة طويلة انتهت بيهم فأخر المطاف لممراسة حميمية كاملة دامت طول الليل حتى طلع الفجر ... ضهرو عرق ونفسو سخونة وهي كتنهج مستمتعة معاه وعايشة بكل احاسيسها . طلع عليهم النهار وهي ناعسة على صدرو العريض مرتاحة ومغطية جسمها العاري غطاء ابيض . ناض امير حل عينيه شعرز مشعكك وعينيه مجبديم وحناكو حومر ...طلع فوق يحيى وهوا ناعس وبدا كيتحاك بيناتهم فوق الغطاء حتى دار بلاصة ولاح رجلو على اسراء وجلس كيلعب فشعرها ويهضر بوحدو .. شوية حس بيه يحيى كيتحرك ويلعب برجليه وحل عينيه لقاه الوسط وهو يتقلب على جنبو ويدو تحت عنق اسراء 
يحيى: بصوت غليض كيضحك) مالك مابغيتش تخلينا نعسو 
امير: بابا ... قول لماما دير لبلو 
يحيى: ماشي فالشعر ابابا كيديروه 
امير: كمش فمو) منقراش حتى انا فديك ليكول اللي فيها الغوز 
يحيى: زوينة ابابا علاش مبغيتيش تقرا فيها؟
امير: حست فيها البنات و او صابغينها بالغوز .. انا بغيت البلو 
يحيى: رجع ليه شعرو اللور وباسو فحنكو) معجباتكش هاديك غنشوف ليك وحدة اخرى ... هدا ابابا متهزش رجلك عليها ... خلي ماماك تنعس 
امير: نفيقها؟
يحيى: بصوت حنون) لااا... خليها تنعس ... بوسها بالاه وخليها تنعس 
امير: ماما زويينة حسن من لاميتخيس ديالي 
يحيى: ماماك حسن من لامتخيس ديالك ... يالاه اجي نعسو شوية باقي الحال اصاحبي 
هزو تكا على هضرو ونعسو على صدرو و عنقو 
يحيى: يالاه نعس دابا 
امير : انا بغيت نوض 
يحيى: نوض ... جيب تيليكوموند ندير ليك الروسوم وجلس تفرج 
مشا امير كيعفس عليه برجليه جاب ليه التيليكوموند ورجع تخشا الوسط كيتفرج فالروسوم ويهز رجليه فالسما وكيتحرك مخلاهمش ينعسو

ناض يحيى دار بناقص من النعاس ومشا دوش وخلاه كيهضر مع الرسوم ويلعب على اسراء حتى فيقها .. حلات عينيها وشدات الغطاء عندها 
اسراء : امير ... فقتي اماما 
امير: انا اللول اماما اللي فقت 
اسراء : عطيني داك البينوار الحبيب ديالي
امير: هادا؟ 
اسراء: اه
شدات البينوار لبساتو تحت الفراش وناضت جلسات كدوز يدها على شعر امير وتوبسو فرقبتو حتى خرج يحيى كيمسح شعرو لابس شورط .ومشا جلس حداها دور يديه مور ضهرها وباسها فكتفها 
يحيى: حبيبة ديالي مخلاكش تنعسي 
اسراء: ههه ... انا غنمشي ندوش 
باشتو فحنكو وناضت دوشات ... لبسو حوايجهم وجمعخم ونزلو دازو على سام وشدو طريق البحر . وصلو لمطنقة غبوية خلابة على البحر .. كانو بعض العمارات صغار فخمة مبنيين على جنب البحر .. طلعو حوايجهم للشقة وبالفرحة بدا امير كيحيد حوايجو وينقز 
امير: غنعومو نعومو هههههه غنعومو هههه 
سام كيدور بيه وينبح فرحان معاه . مابغاش يجلس وكيجر فيحيى ويشكي 
امير: بابا يالاه يالاه . يالاه نهبطو نعومووو يالاه عافاك 
يحيى: واخا بلاتي نصلي الضهر ونمشيو ..اسراااء ديري ليه شي حاجة ياكلها ... راه طلعت التقدية اللي فالكوفر كاملة 
ردات عليه اسراء من البالكون : واخا .. اميير اجي 
مشات للكوزينة لقات التقدية فوق الطبلة من كل ما تشهات خاطرها ..ستفات كلشي فالتلاجة وكل حاجة بلاصتها وطيبات ليهم طاجين ديال الدجاج بالزيتون كيشهي وصايبات شلاضة وبدات كتحط وتقاد فوق الطبلة . خرج عندها يحيى عريان كيدور بالشورط لقا الطبلة عامرة والراءحة شهية ومشا عنقها من اللور 
يحيى: اممم .. هادشي زوين ... وقتاش بديتي كطيبي؟
اسراء: من نهار هربتي وخليتيني 
يحيى: وابعدا طلعتي بنتيجة ... (هز زيتونة كلاها وباسها فحنكها) دابا نتي اللي غتولي طيبي ليا ياك 
اسراء: علاش لا ... عجابتك ماكلتي؟
يحيى: جر الكرسي جلس) عاد غنشوف
اسراء: علاش مالك معمرك دقتيها ؟ ولا نكرتي؟
سها بعينيه كيتفكر: لا ! عمرني دقت انا ماكلتك
اسراء: بابتسامة) شوف وكان
يحيى: مصغر عينيه كيتفكر ) امم... لا مكنضنش
اسراء: وداك الدجاج المحمر اللي كليتي عندي فالدار اخر مرة دخلتي فيها عندي... نسيتي؟ نهار حطيت ليك العشا نتا وامير
يحيى : باستغراب) اوااه ... نتي طيبتيه 
اسراء : كتحلون) وشنو 
يحيى: صراحة برافو عليك...كعندي منقول تبارك الله عليك ... انا حساب ليا شريتي واجد 
اسراء: لا .. انا اللي طيبتو وحطيت ليك حتى الحلوى ... صايبتها انا بيدي
يحيى: بنضرات اعجاب) تبارك الله عليك ... راكي فتحسن ههه
اسراء:كتلوي شعرها بيديها) ايوا شنو يحساب ليك 
يحيى: بصوت مرتفع) امييير.. اجي تغدا ... احي نشوفو هادشي اللي دارت ماماك 
دار اللقمة الاولى داقها وشاف فاسراء بابتسامة
يحيى: هادشي بنين ... دابا ماكلت الزنقة بااي ... نتي اللي غتبداي طيبي بيديك .. واللي خصاتك نجيبها ليك 
اسراء: ههه بالصحة 
هز امير فحجرو وجلسو كيتغداو وهوا كيشكرها وهي عاجبها الحال فرحاانة ...سالا وبدا كيمسح يديه وداير ضحكة غريبة وساهي .
يحيى: سمعت الواليدة كتقول لعلي...

يحيى: سمعت الواليدة كتقول لعلي ... شفت يحيى داخل خارج عنداك تكون شي وحدة ملوية عليه 
اسراء: ههههه ايوا 
يحيى: قلت ليها فخاطري كن تعرفي شكون هاد الوحدة تجيك سكتة قلبية 
اسراء : وشنو فيها الى عرفات ... ياك هي معرفاش علاش طلقنا 
جرها من يدها جلسها على رجلو ودور يديه على خصرها بحنان
يحيى: نتي فاش تكوني مستعدة ... قوليها ليا 
اسراء: بدلع) اممم... نتا مستاعد
يحيى: انا معنديش مشكل ...نتي اللي واش مستاعدة توقفي قدام واليديك فاش نسولك قدامهم واش تبغي ترجعي ليا 
اسراء: ونتا ... شنو تقول لداركم 
يحيى: شكون دارنا ؟ الواليدة زعما! ماشي سوقها فيا نتزوج ولا نطلق شغلي هاداك 
اسراء: غتعرفني انا مغتبغيش 
يحيى: هاداك شغلي انا بلا متعمري بيه راسك ... المهم نتي نهار تكوني مستاعدة نهضر مع واليديك 
اسراء: وا دابا المشكل الكبير تعايبنا وخرجنا للعيب وهما مكتوقعينش كااع نكون انا كنهضر معاك 
يحيى: اييوا هادا هوا المشكل ... و انا دابا اللي خايب فعينيهم حيت معارفينش علاش نايض الصدع .... نتي البراءة قدامهم انا اللي كنبان ليه منسواش
اسراء: هههه براكة من الضحك ... اااه انا البراااءة يالاه 
يحيى: هههه عاجبك الحال ... نوضي يالاه نهبطو 
ناضت عنقاتو من اللور وباستو فعنقو وهوا ينوض جرها تا لسقات مع الخيط كضحك 
اسراء: هههه اااي يالاه نهبطو 
يحيى: وا نتي قلبتي عليا ههه
اسراء: هههه 
عنقها وباسها فعنقها : توحشتك ... كن كنتي هاكا من الاول 
اسراء: بخجل) وصافي ههه
هزها كيعنق ويبوس وهي كتخطف بوسات فرحانة ... دخل لبيت النعاس وسد الباب برجلو . بقا امير مع سام كيلعب وتابع سام كيجري موراه حتى خرج لبرا ورجليه كيتمشاو فوق الرملة ... شاف البحر صافي قدامو والدنيا خاوية وبدا كيقرب ويضحك مع سام ... قرب من الماء فزك رجليه وهرب اللور كينقز 
امير: ساام نعوموو نعومو هههه ... اجي نعومو 
عطى بضهرو للبحر كيضحك وهي تجي موجة كبيرة من اللور جمعاتو

فعز الدلع والممراسة والضحك تسمع صوت سام كينبح بصوت قوي وكأنه تسطى ... هز يحيى راسو طلق ودنيه سمع النباح وهوا يصفار وجهو وناض كيطير
يحيى: امير وقعات ليه شي حاجة 
لبس الشورط وخرج كيجري مالقاهش فالدار وخرج لبرا وجهو صفر كيلعت بالخلعة .. تقطع نباح سام وبقا يحيى كيدور فبلاصتو قدام البحر وكيغوت بأعلى صوت ويديه على راسو بغا يحماق 
يحيى: امييييييير ...... امييييييييييييييير 
شاف البحر امواجو هايجة ولا اثر لا لسام ولا لامير دخل وسط البحر والامواج الهايجة كيقلب ويغوت على حر جهدو تا بغا يبكي بالفقصة . . بانت ليه اسراء خارجة كتسد البينوار وكتشوف فيه وتغوت 
اسراء: يحيااا فين امير فين امييييير 
مجاوباهاش وغطس فالماء وعاود هز راسو فجهة اخر كيغوت ويقلب جيهت الحجر ... عاود غطس واسراء كتبكي وتغوت وضرب فراسها كتسناه يطلع .. ولاكن الغطسة اللي غطس تحت الماء وبالحرقة على ولدو هبط ومعاودش طلع بمرة .. وبقات غير اسراء بوحدها كتغوت على يحيى وعلى امير وكتجري بحال الحمقة ... صوتها كيتعاود ولا مجيب ولا معين لها فمكان خالي سوى الله ... طاحت فالارض فوق الرملة كضرب فخادها وتبكي وتغوت حتى بان ليها سام جاي كيجري من جيت الحجر وكينبح وهي توقف ... بقا كيدور بجنابها وينبح ومشا كيجري جيهت الحجر وتبعاتو .. لقات امير مغمى عليه فوق الرملة فازك ورجلو معضوضة مطارسيين فيها سنان سام ... واللي هاد الاخير كيدور بيه ويلحسو وينبح ... طاحت عليه اسراء فذهول وهزاتو بلا عقل كتجري طلعاتو فالطوموبيل ديال يحيى اللور وهزات سوارتو و مشات سايقة كطير وتشوف موراها وتبكي ... دخلات لطنجة ولاقرب كلينيك دخلاتو كتجري بيه للانعاش . جلسات برى كتبكي حاطة يديها على وجها وحفيانة ... جابو ليها صابو لبساتو فرجليها وجلسات كتسنا الطبيب يخرج. ناضت تاصلات بالبوليس خبراتهم بالفاجعة اللي وقعات وسارعو لعين المكان كيبحثو على الغريق رجعات لباب الانعاش... ساعة ساعتاين 3 دالساعات عاد خرج الطبيب طمنها عليه وصفاو ليه الرية من الماء وعالجو ليه رجلو وخلاوه تحت العناية المركزة .. ناضت وقفات حدا الزاج كتشوف فيه ناعس بحال الملاك والتيوات لاسقين فيه والاكسيجين على فمو . بكات وهبطات دموعها حارين على خدها . دوزات نهار كحل كتسنى يردو عليها خبر يحيى اللي داه البحر وهوا كيقلب بحرقة على ولدو

دوزات ليلة سوداء اسود من سواد الليل بوحدها جالسة فالكلينيك كتبكي وتعصر ... ضربو ليها ابرة مهدىء تهدنات شوية ولاكن دموعها مابغات توقف .. هزات تيليفونها وبغات تتااصل بعلي ... ترددات فالاول ولاكن جمعات طاقتها وقوتها وتاصلات بيه ... 
اسراء: بصوت مبحوح) الو ...علي انا اسراء
علي: بجدية) نعام؟
اسراء: سبقوها دموعها)علي اهيء اهىءاهىءاهىء علي يحيى غرق فالبحر ...يحيى غرق اعلي وولدي فالانعاش وانا بوحدي غنتسطى اهىءاهىءاهىء 
علي: بصدمة) كيفاش؟ كيفاش اش كتقولي فين هوا 
اسراء: حنا فطنجة ... انا ويحيى وامير اهىءاهىءاهىء يحيا مشااا اعلي مشااا اهىءاهىءاهىء 
علي: اش كتقولي واش كتخربقي واش كيدير هوا معاك ؟ اينا بلاصة واينا كلينيك
عطاتو العنوان بصعوبة و تكات كتبكي بحرقة ... طول الليل وهي من مهدىء لمهدىء بغات تحماق .حتى صبح الحال وهي مزالة بالبينوار ديالها الاسود والصابو ديال الفرمليات فرجليها ..عينيها دخلو ووجها صفار .. واقفة حدا الزاح كتشوف فولدها الناءم لداخل ... دموعها نشفو وكتبكي بلا دموع ... شوية جا علي والحاجة ومعاهم سحر واسية كيجريو مخلوعين لقاوها حالتها ... شافتهم وهزات يديها تلاحت على اسية كتبكي وتشهق . محسات براسها حتا جراتها الحاجة بقوة من شعرها وبداو كيفكو 
الحاجة: فين ولدييييي .. اش درتي ليه يا الكافرة بالله فين ولديييي
اسراء: اااااي اهىء اهىءاهىءاهىء ااااااااهىء اهىءاهىءاهىء 
مقدارتش دافع على راسها وخانتها قوتها وطاحت فالارض فقدات الوعي . 
فاقت لقات راسها فغرفة معلقين ليها السيروم ... كتحل عينيها بزز ... الصورة مضببة ونضرها ضعيف .. بقات كتحقق الوجوه اللي دايرة بيها حتى تأكد ليها ان مها وباها وخواتاتها دايرين بيها ... نقزات عليعا الزوهرة بعصبية بغات تجرها وهوا يجرها حسن 
الزوهرة: اش جااابك هناااا... صافي هادشي اللي بغيتي ؟ شوهتينا وفضحتينا .. درنا فيك التيقة 
بقات كتبكي دايرة يدها على وجها مكتجاوبش
الزوهرة: طلق مني ليوووم نقتل واليديها الكلبة لخرى .. هادا هوا المضنون فيك ابنتي هوا هادا ... رديتينا ضحكة 
حسن: سكتينا ياك هاد المرى مكاينش اللي مشوهنا قدك ... واش باغا تسمعي للناس الفضيحة ولا شنو . اللي مساق لينا الخبار يسيقو 
خرجها حسن كتغوت وتسب لبرى وبقاو معاها خواتاتها ... ناضت اسية وقفات حداها كتنهج
اسية: هانتي دابا درتيها قد راسكك ... يالاه تهناي دابا... عيييت نهضر معاك ونشرح ليك ونتي راسك قاصح 
اسراء: اهىءاهىءاهىء بعدو منيييي خرجو عطيوني تيسااع مشغلكمش فياااا بعدو مني 
سحر: فيين غنبعدو منك فييين كن ماكنتيش ختنا لهلا يقلب ... انا بغيت غير نفهم فوقاش وكيفاش ؟ 
اسراء: شنو الي كيفااااش؟ مالكي 
سحر: راك حاااملة يا المصيبة ولا حتى هادي مفراسكش
ضرباتها الساكتة لفكها وتقطع حسها وخرجات عينيها مصدومة 
اسراء: حاملة؟
سحر: علاش معارفاش؟ شهر دابت عندك ... امتى تصالحتي نتي وياه وامتى تافقتو وامتى درتو هادشي
اسراء: لقاوه؟؟؟
اسية : لقااوه وراه فالانعاش حدى ولدو ... من الصباح وحنا كنطلبو الله مايموت ميوقع ليه والو غير باش يصلح هادشي اللي دار 
ناضت وقفات حيدات الابرة وخرجات حفيانة كتجري وسط العاءلة كاملة ... ناضت تبعاتها الزوهرة والحاجة وهي غادا مكتقشع حتى حاجة ... وقفات حدى الزاج دالانعاش وبقا كتشوف فيه ناعس لداخل بحال امير ... بقات كتبكي وتشهق وهي تجرها الزوهرة 
الزوهرة: كتبكي عليه يابنت الحراااام هااا...دايراها قد راسك وكتبكي 
الحاجة: الاللة خرجي علينا بنتك ... خرجات علينا وخرجات عل حياتنا الله ياخد فيكم الحق 
الزوهرة: بغضب)ولدك اللي جا ليها ماشي هي اللي تلاحت عليه 
ناض الصدع وناض الغوات وبغاو العاءلات يدابزو ... شوية غوتات بأعلى صوت سكتات الكل 
اسراء: صاااافي صاااافي براااااااكة .... برااااااااااكة ... نتوما عااءلة نتوما؟ نتومااا عاءلة ؟ ولدي فالانعااااش وباه كيمووووت وجالسين كدابزو ... مهامكم حتى وااااحد .. حتى وااااحد من غير الشوهة والفضيييحة وشنو يقولو عليكم الناااااس.... خرجو براااا وقولو الناس مواااقع وااااالو ... علاش جالسين هنااا مني هامكم كولو غير النااااااس
الزوهرة: بغضب)شكوون اللي دار هاد الفاضاااايح من غير يا بنت ...
نقزات بغات تجرها من شعرها وهي تهز فاز من فوق واخد الرف هرساتو وهزاتو فوجهم بغضب شديد
اسراء: اااااه ... انا درت الشوووهة ودرت الفضيييحة ودرت اللي عجبني ... واللي قرب ليا نخشي فيه هاد الزاااج

يتبع


التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.