صورة مصغرة لـالدخيلة الجزء 20 و الأخير

الدخيلة الجزء 20 و الأخير

da5ila dakhila l2akhir wa w

رواية الدخيلة الموسم الثاني

سكتات ورجعات تكات على صدرو كتلعب بيدها فصدايف بيجامتو 
اسراء: يحيى ... بغيت نسولك 
يحيى : سولي 
اسراء: واش مزالة مرتك اللولة كتعيط ليك
رد عليها بهدوء: من نهار قالت ليا مبروك الزيادة ماعاودات عيطات 
اسراء:هزات راسها فيه باستغراب ) مقلتيهاش ليا!
يحيى: ماكنتيش مساليا 
اسراء: كيفاش مكنتش مساليا؟
يحيى: مكانش عندك الوقت .. كنتي واحلة فالمكياج واليدين والرجلين ... فين كنتي مساليا ليا بعدا 
سكتات وكمشات فمها : ومزالة كتعيط؟ وشكون قاليها انا ولدت؟
يحيى: مابقاتش كتعيط ومنعرف شكون قالها ليها 
اسراء: وفاش طلقنا ... عيطات ليك 
يحيى: لا ... مافراسهاش طلقنا وحتى خوها ما قلتهاش ليه 
اسراء: اممم...وديك النصارنسة اللي تزوجتي باش درتي الجنسية
يحيى: ششريت الجنسية ماااشي عطاتها ليا ... وقعنا العقد بحال شي اتفاق كل واحد ساكن فجيهة ... مكتشوفني مكنشوفها نهار خديت الجنسية خدات هي فلوسها وكل واحد مشا فحالو .. مازواج ما تالعبة .. انا شريت وهي باعت وصافي
اسراء: اممم ... وديك المحامية 
يحيى: انا محامية
اسراء: اللي كنتي غتزوج عليا ... مسيييتي؟
يحيى : اااه ... معاودش شفتها من نهار طلقنا معاودت هضرت معاها .
اسراء: وكنتي ناوي تزوج عليا بصح 
يحيى: الحق يتقال كنت غنتزوج 
اسراء: ياااك !!! ماشي حشومة عليك 
يحيى: انتي اللي بغيتي ... والى رجعتي كما كنتي غنتزوج عليك مغنبقاش نتسناك حتى ترشق ليك 
اسراء: واش عارف راسك اش كتقول؟
يحيى: عااارف 
ناضت غضبانة وهوا يجرها كيضحك 
يحيى : اجي لهنا كنضحك معاك 
اسراء : حلف
يحيى: مغنتزوج غير كنضحك ... عندي هاد الغزالة ونتزوج عليها ! مكتيناش هادي اللي حسن منك احبيبة
اسراء: امممم.. ههه دابا نشوفو 
يحيى: ماقلتش حسن منك فالزين ... حسن منك فالمعاملة اوك (غمزها)
اسراء: طلعات حاجبها ) كفاش زعما ؟
يحيى: باش تكوني نتي حسن ... عطي لراجلك اهتمام وعرفي واجباتك معاه وحطيه قدامك وسبقيه على كاااع المشاغل ديالك ... وفري ليه جو زوين وتهلاي فيه وفراسك ليه وهوا مغيشوف فحتى وحدة من غيرك ومعمرو يفكر يشوف فوحدة اخرى ولايفكر يتزوج ولا يخسر ليك الخاطر ... اما الى كنتي هاملاه بحال اللي كنتي قبل وماحاسباهش واش كاين ... راه غيمشي يقلب على صدر حنين فين ينعس . هانا جيتك من اللخر باش منبقاوش نكدبو على بعضياتنا ... راه الدوام هادا ماشي مسألة يوم ولا شهر ولا عام ... والانسان عندو حساة وحدة الى كان غيربطها مع وحدة تنكد عليه عيشتو حياتو كاملة ... بلاش منها كاع 
اسراء: وليتي كتخلعني
اسراء: وليتي كتخلعني ... مابقيتيش كما كنتي ... هضرتك رجعات قاصحة بزاف 
يحيى : لا بلعكس... باش نتي متمشيش غالطة خاصك تسمعي هادشي ... الى مشمعتيش ورجعتي كما كنتي غنعاودو نطيحو فنفس المشكل ، دابا كلشي فيديك نتي تعرفي 
اسراء: بصدمة) وتقدر تسمح فيا شي نهار ؟ 
يحيى : اسراء ... انا صريح وراكي عارفاني ... نيشان نيشان ... مغنافقك منكدب عليك منقولك بحال اللي كيقولو بزااف دالرجال ... ديك الهضرة ديال واخا ديري فيا اللي درتي منخليكش. انا كنعرف حاجة وحدة ... نصبر مع بنادم والى متبغاش يفهم كنخليه ، ونتي شفتيني صبرت معاك بزاف ومعمرني قلت ليك شي كلمة خايبة ولا قللت منك . . . حيت ماشي من النوع اللي كنعلق بزاف . فاش كيطلع الدم راه مكنعقل عل تا واحد ... عارف راسي مزيان مع الناس وماشي ديال العيب واللي قلب عليا وحك عليا كيلقاني
اسراء: وانا دتبا فنبقا معلقة خايفة شي مهار تسمح فيا 
يحيى : قلت ليك مغنسمحش فيك ... واش انا ولد الحرام ؟؟
اسراء: لا!
يحيى: وعلاش غنخليك الى مدرتيش شي كارتة يزلق فيها جمل .. الكدوب والنفاق مامعاناش... وانا اللي خايف يزنزن ليك الشيطان وديري شي حاجة تمرضيني فيها عاوتاني 
اسراء: لا منديرش ههه 
يحيى : وراكي كبرتي زعما ومابقيتيش برهوشة وفعايل البراهش ... اولا ؟
اسراء: ههه (حطات يدها على وجهو) كتبغيني؟
يحيى: وشنو بان ليك ؟ 
اسراء: ومانعرف؟
يحيى:الى مكنتش كنبغيك على غنرجع ليك ونتزوج بيك ... راه البنات مزلعين 
اسراء: وماتبقاش تقوليا راه البنات راه الزمر ... حتى الرجال راه موجووودين وفاش طلقتيني جاو حتى لهنا دالرجال بغاو ستزوجو بيا ومابغيتش
يحيى:ببرودة) طامعين فيك ... ولا داك الشارف سفير الطواجن بغا يدير معاك زواج مسيار !
اسراء: شنو ؟ كيفاش زواج مسيار؟
يحيى : معارفاهش زعما؟
اسراء: لا معرفتوش؟ واش كاين شي زواج اخر من غير زواج ديالنا 
يحيى: كاين بزاف ...منهم هاد المسيار هادا ... هوا زواج المتعة ... يعني فالاول كيتافقو على زواج مسيار وغالبا الراجل كايكون مزوج وكيجيب وحدة اخرى كيخفيها على مرتو ولا يمكن كاع يوريها ليها وكيكون داير معاها زواج مسيار .... كيتزوجو عادي بالاوراق بكلشي ولاكن الموضعية كتختالف حيت كيتزوجها غير باش يعيش الرفاهية معاها ومكيولدش معاها ومللي كيطلقها مكتسالو حتى سانتيم ... حيت فاش يكون مزوج بيها كينفق عليها ويمتعها ويفطحها كي بغات ومستمتع هوا معاها ... ويمكن ليه يشرط عليها فداك الزواج انه ميجيش عندها باللي ويبقا يجس غير بالنهار وهي يلا وافقات مكيبقا ليها حق وحقها هوا النهار اما الليل كيمشي عند الزوجات ديالو لخرين ... ويلى بغا هوا منو راسو يمشي عندها بلليل كيمشي ... يعني زواج متعة وفاش كيطلقو مكتسالوش وحتى فاش كيبغي يتزوج بيها مكيعطيهاش شي مهر نييت ... يمكن يزوجها فابور كاع ويطلقها فابور ويتزوج وحدة اخرى ويبقى ينقز من وحدة لوحدو ... هوا فقط كيصرف عليها فالمدة اللي كيكون مزوجها 
اسراء : اويييلي بلاش كاع من هاد الزواج! شكون هادي اللي تقبل على راسها هادشي ؟
يحيى: كاااين ... كاينين باغيين غير يتزوجو ويطلقو وميسيقوش لخبار كاع للناس اشمن زواج دايرين ... هادشي كاين عندنا فدبي اما المغرب عندو زواج واحد ... زعم تاكل اللحم 
اسراء: اشمن ربح عند هاد البنت مسكينة فهاد الزواج اللي عارفة راسها غيجي نهار وطلق 
يحيى: الربح هوا انها بالنسبة ليها بحال شي عشيقة والفلوس كتزلع عليها من غند زوجها بحال الشتا فالفترة اللي هي معاه ... وفديك الفترة ممكن تأسس حياتها ومشتقبالها بدوك الفلوس كيعطيها ومنها نيت راها مساريا وعايشا الحياة ... فاش كطلق كتلقا راسها جمعات الحصيصة ودارت علاش ترجع ... يعني كونطرا دالعمل وسالات 
اسراء: عمرك درتيها!!!!
يحيى: هانتي بديتي تخسري الهضرة ... اس خاجة قلتها ليك نسبيها ليا ... نتي معارفة تا لعبة ومجايبة للدنيا خبار وكتعلقي فين تفلقي .. دايرة شرع يديك وتافقتي مع سفير الطواجن ! كن لعب عليك فين كنتي غتخرجي
اسراء: وناااري مابغاتش تسرط ليك هاد القضية غتبقا كل مرة تفكرها ليا!!!
يحيى: حيت نتي كديري شي حوايج مكيتنساوش .
اسراء: وصافي قلب دابا الموضوع خلينا مزيانين 
يحيى: هاهوا ساكت 
تكات عليه وبدات كتلعب ليه فشعرو ... شوية وهي تلحن صوتها 
اسراء: يحيى...شحال ديال البنات عرفتي فحياتك؟
يحيى: بهدوء) معقلتش
اسراء: بااز ... معقلتيش زعما؟ شحال غيكونو كاع؟
يحيى: وشكون عرف 
اسراء: يكونو 10 كاع 
يحسى: كن كانو عشرة كوراني عاقل
اسراء: وشحال؟ 20؟ 
يحيى: كن كانو عشرين كوراني عاقل
اسراء: اويييلي 30 ؟ 40 ؟ شحال؟
يحيى: فوت 40 داكي علاش معقلتش 
اسراء: ناااري ! مكتعياش؟
يحيى : ميمشيش عقلك بعيد راه ماشي داكشي اللي كتفكري فيه 
اسراء: اممم ... وشكون اللي بغيتس فينظ وعجباتك؟
يحيى: نتي
اسراء: سيري دابا براكة من الطنز .. .من غيري انا 
يحيى: تا وحدة 
اسراء: باز ... زعما مرتك اللولة غير جيتي وتزوجتيها ماكنتيش كتبغيها؟
يحيى: ماعقلتش ... حكي ليا راسي وخلينا نتسنطو لعضامنا 
اسراء: وهي كتحك ليه) بدا كينوض فيك الشيب ... واحد .جوج ... 3 فيك شي شيبات كل وحدة فين 
اسراء: خليه عنداك تحيديه 
قلبات ليه وجهو عندها ونعساتو على رجلها كتقلب ليه فوجهو وهو مغمض عنيه ناشر رجليه وحدة مدلية على الارض ووحدة فوق ضهر الكنبة 
اسراء: كاع ماباينين فيك التجاعيد ... ياكما داير التجميل 
جاوبها بهدوء : اه 
اسراء: اوييلي حلف 
يحيى: حل عينيه فيها) واش من عقلك كتهضري ؟ ندير التجميل ! اش هاد السؤال ؟
اسراء: وكاع مافيك التجاعيد ! زعما حدا عينيك فين خاصهم يكونو مكينيش!
يحيى: نوضتي فيا الشيب بقاو ليك غير التجاعيد دابا 
اسراء: كتقلب ليه اللحية) حتى اللحية ناضو ليك فيها شي شيبات ... نحيدهم ليك؟
يحيى: شد ليها يدها) هداي غتحيدي شي زغبة نتفك 
اسراء: ههه ومالك عاجبك الشيب 
يحيى: خليه عاجبني 
اسراء: ندير ليك شوان لوجهك بحال ديك المرة ؟
يحيى: غتقصحيني 
اسراء: لا متخافش ... ايوا كمل ليا بعدا ... كيفاش تلاقيتي مع مرتك اللولة 
يحيى: وصافي اسراء عاوتاني كترجعي ليا لداك التخربيق ... مكيعجبني نهضر فداكشي 
اسراء: واغير كنسول ... قول ليا كيفاش وشنو عجبك فيها و اش خي حسن مني؟
هز عينو فالساعة وبغا ينوض
يحيى: 3 هادي مشاا الحال غنطلع نعس
اسراء: جراتو رجعاتو بلاصتو ) وصافي اجي هانا ساكتة 
تكا راسو على رجليها المربعين مرة اخرى وبدات كتلعب فشعرو ووجهو 
اسراء: بصوت حنين) علاش طلقتو 
تهز هزة وحدة : بدا كيجيك الحماق عاوتاني ... طلقي خليني نطلع نعس
اسراء: شاداه ) ههههه وصافي اجي جلس منعاودش نسولك . . . وصاافي اجي 
جراتو بالجهد تا كان غيطيح عليها وشد راشو بيديه 
يحيى: غانمشي نقتلك امسخوطة .
اسراء: يالاه رجع بلاصتو ههه 
رجع تخبط حداها على ضهرو وتكى براسو على رجليها ... بدات كتلعب فشعرو وتفلي ليه وجهو وتخشي يدها فصدرو لداخل كتلعب وتلمس فيه تحت البيجامة وهوا متكي عندها مرخي كيتسنط ليها تا نعس

بقات كداعبو وهوا ناعس تا داها نعاس حتى هيا ... فاقت على صوت امير كيتشعبط فيهم باغي يطلع حداهم ... حلات عينيها لقاتو قدامها سروالو مدلي وتريكو مخربق ومشعكك كيتقاتل ويحيى مقادرش يحل عينيه كيشد فيه بيدو ويطلعو وهوا ناعس 
اسراء: فين طالع اماما فين ها حنا غنوض 
شافت الساعة لقاتها السبعة دالصباح وناضت كتجر يديها من تحت راس يحيى بشوية ، مشات شعلات ليه التلفازة ودارت ليه الرسوم ورجعات بشوية باغا تنعس ...شوية وقفات تقيا ومشات كطير للدوش بدات كترض حتى تجيفات وغسلات وجها ورجعات سخفانة تخشات حدى يحيى وهزات رجلها على كرشو ورجعات فالنعاس . 
1:00 دالعشية عاد ناض يحيى وبدا كيفيق فيها 
يحيى : اسرااء...اسرااء .. نوضي راه الوحدة 
ردات عليه بصوت تقيل : خليني مافيا اللي ينوض ... راه صبحت كنرد مع السبعة ... راسي تقيل ومعدتي كضرني 
يحيى: دوز يدو عاى راسها)واش مريضة بزاف؟ . . . هانا غنمشي نجيب ليك الدواء اللي خرجات ليك الطبيبة ونجيب معايا شي حاجة للفطور (خز عينو فأمير) امير ... فسك الجوع ابابا؟ يالاه نمشيو نتسخرو 
ناض هز امير كيبوس فيه وطلعو على كتافو ويلعب معاه .. داه غسل ليه وجهو وعطاه يحك سنانو بحالو ومشا لبس سروال سورفيط رمادي و تيشورط كحالو ولبس لامير سورفيت حمراء بالقب وكلاكيطة وهزو ... داز حدى اسراء باسها فحنكها وخرج ، مشا جاب بلاستيكات ديال الفطور وكراطن مربعين وخنشة ديال الماكلة د سام وانير هاز بالون صفر كبير كيزنزن ونونوس حمر كبير هازة مقاتل معاه وداخل للفيلا كيضرب برجلو فدسك البالون حتى قاسها مع واحد الزاجة وهي تفركع فالسماء قفزات اسراء من بلاصتها غوتات غوتة وحدة وجات جالسة شادة فقلبها كتشوف اشنو وقع قدامها 
اسراء: اربي السلامة اربي السلامة شنو هادشي طرطرق 
امير كان كان غيبكي وهوا يشوف اسراء نقزات ديك التنقيزة وجلس كيضحك فالارض ويتكور حتى بغا يسخف 
اسراء : اوييلي شهادشس طرطق ؟
يحيى: خهههههه نفاخة طرطقات 
اسراء: نتري قلبي .. ناري على خلعة 
ناضت بالزربة كتقلب راسها ودوز يدها موراها 
اسراء: كن طاح ليا دابا بنادم بهاد الخلعة!!!! اش هاد الضحك 
يحيى: وايييلي على يطيح !!! غير نفاخة ماشي قنبولة 
اسراء: ؤاه بالخلعة يقدر يطيح ... راه تهزيت من بلاصتي ... ناعسة كنحلم حتى قفزتوني حشومة عليكم 
يحيى: وامير اللي (تلفت لقات كيضحك حتى تقطع فيه الصوت) كضحاااك !! ههه عجباتك هادي ؟
امير: ههههههههههههههه............ (تقطع ليه الصوت) ..... وااععععع هههههههههههه
يحيى: هههههههه هانتا غتموت هههه 
اسراء: هههه واخا عليك 
امير: هههههههه بااااق هههههههههن 
جلسات كتنهج وضحك حتى بردو و فطرو ولبسات حوايجها .. تاصل بعلي ودار معاه يتلاقاو ... مشات معاه فشلانة دارو العقد ورجعو مزوجين من جديد ... خرجها فالليل حتافلو بزواجهم للمؤة الثانية فريسطو رمانسي وخلاو امير مع علي وسحر . 
دوزو ايام بين الرومانسية والحب والمرض والوحم داسراء اللي بدا كيبان ومزاجها المتقلب فكل مرة ... خرج سمحمد براءة ومشا عندها للفيلا شكرها ... شرطات عليه يتزوج بسكينة وبقات معاه حتى قناعنو ولاقاتهم قدامها ... طرقات ليه على صبعو و تهنات من جيهتو ... اما سكينة غيطير بالفرحة ...رجعات للدار وكتجري وتوجد وتخيط متحمسة واخا سيمو ممستحملش الحماس ديالها و مطايقهاش ... كيحاول يولف ويتأقلم مع الجو وكل مرة كتجرو معاها لقيسارية فشكل حتى كيصعر ويجسس معصب وتم خي تابعاه بالصيكان والميكات كتجري . 
امير من نهار خلع اسراء بالبتلون وهوا مصدع يحيى كل نهار يجيب ليه بالون ويخلي اسراء حتى تنعس ويمشي عند راسها يطرطقو باش تفيق مفزوعة ويجلس هوا يضحك فرحان بالانجاز اللي دار حتى مابقاش كيجيب يحيى البالونات وحرمهم عليه الى اجل غير مسمى .
دازت 20 يوم والكلام مقطوع مع الوايدين ... الحجاج على استعداد للسفر وكل مرة كيمشي فوج .. بقا يوم واحد فقط ويمشو الواليدين يحجو واسراء ويحيى قاطعين الاتصال بيهم .

في يوم من الايام كانت جالسة متكية على الاريكة ويحيى حداها جالس كيداعب شعرها 
يحيى : ضعافيتي بزااف اسراء 
اسراء: عاادي .. دابا نرجع كي كنت هاكا داز عليا الوحم مع امير 
يحيى : خاصك تاكلي شوية ... شنو نجيب ليك ؟ تشهيتي شي حاجة؟
اسراء: لا غير خليني مافيا اللي ياكل 
فجأة سمعو صوت علي ... 
علي: السلااام وعليكم ... حنا ضياف الله 
هزو عينيهم بجوج شافوه داخل مع باب الفيلا لابس جلابة بيضاء و معاه الحاجة والزوهرة وحسن لابسين الابيض ... ناضو وقفو مندهيشين .. شافت اسراء فالزوهرة وعينيها ماليين دموع .. مشات عنقاتها وكذالك يحيى عنق مو ... طلبو منهم السماحة وتم الصلح بيناتهم وبين عاءلت اسراء .. رافقهم يحيى للمطار وبقات اسراء ناعسة فرحانة و مرتاحة من جيهتهم . 
كملات حياتها مع يحيى ومل مهار كتزيد تكتاشف مدى حبو ليها وعطفو عليها وحنانو لولادو وحبهم ليهم . دازت سنتين ورزقها الله ببنيتة ولداتها ففرانسا وقابلاتها الحاجة اللي ولات عايشة معاهم ... رجعات لبلادها وعندها بنيتة شقراء فآية الجمال كتشبه ليها ... خلات دارها لسيمو خوها بدا حياتو الزوجية فيها وكيتأقلم مع الوضع شوية بشوية وبمساعدة سكينة اللي هازة شغل اسراء كامل قدرو يشريو شقة هي وياه ورجع كيعتامد عليها فكلشي ومحملها المسؤولية دكلشي وهي الري وهي الشوار . اما اسية من نهار طلعات ليها القرعة دامريكا هزات حوايجها ومشات مشافتش موراها ومعاوداتش دكرات حس الزواج على فمها وفضلات تعيش بوحدها احسن ليها من راجل يسود ليها حياتها ... وكيما ماعندهاش زهر فالعلاقات مع الرجال عندها الزهر فحوايج اخرين .. مشات تبني مستقبلها وهي كلها حيوية وحماس . 
اليوم داخلة اسراء ككل يوم من العمل مع الستة لقات الحاجة فالكوزينة 
اسراء: الحاجة... كي دايرة لابااس ؟
الحاجة: لاباس ابنيتي ... حااادة ... حطي كاسكروط 
حادة: واخا لاللة 
اسراء: فين هي تاليا؟
الحاجة: راه فالبيت كتلعب 
طلعات اسراء كتقرقب بالصباط وتجمع فشعرها .. دخلات لغرفة الاطفال لقات بنتها تاليا اللي ختارت ليها اسم بنفسها .. شافت جالسة حتلة رجليها لابسة كسيوة وشعرها الاشقر مجموع لفوق بحال شي شجرة بلاستيك ومحنية على دفتر كتلون فيه ... ابتاسمات اسراء وتحنات عندها باستها 
اسراء: توتو ديالي .. شنو كديري؟
تاليا: بصوت طفولي) نونو 
اسراء : انشوف نونو 
قلبات عينيها جيهت الدفتر وهي تجمع الضحكة وبدات كتقلب فالاوراق وعينيها خارجين 
اسراء: اوييلي .. اويييلي الدفتر دمحمد امير ديال النقط ديالو لونتيه كامل (شدات حناكها) وييلي الدفتر مشااا!!!
تاليا: بصوت طفولي) ماما نونو 
اسراء: ويييلي على نونو !!! هادا راه بوعو غيجي يلقى الدفتر هاكا!! هييييه!!!
مزال مكملاتعا سمعات الباب تحل وامير داخل هاز شكارة وموراه يحيى
امير: ماااما ...
اسراء: يحيى ... ديه ديه .. خرجو يمشيو ياكل 
يحيى: عييت ... شحال وانا كنتسناه حدى المدرسة يخرج ... جلس .. حط ديك الشكارة .
ناضت تاليا فرحانة كتجري بزز وتعكل حالة يديها جيهت يحيى .. تحنى على ركابيه ليها كيضحك وعنقها 
يحيى: هابابا جا 
تاليا: بابا ... نونو نونو 
هز يحيى راسو فاتجاه اللي كتشير ليه بصبعها ومع الهزة شاف امير هاز الفتار من الطرف مدلي وكيغوت 
امير: ااااااااااااعععههع... اعىء اهىءاهىءاهىء. .. (ضربو مع الحيط وغوت بجنون) دفتاراااااااارييييييي اعععععىىىىى
شاف فتاليا بغضب ومشا كيجيري جيهتها مصعور وهوا يخطفها يحيى هزها بالزربة

ناض يحيى هزها وامير كيغوت ويبكي ويتعلق باغي يجرها ويحيى كيدور بيها فبلاصتو مبعدها عليه اما اسراء جالسة شادة راسها بين يديها 
يحيى: صاافي صاافي غنجيب واحد اخر ... غدا غتمشي معاك ماماك للمدرسة تقوليهم راه تاليا خصراتو ليك 
امير: كيبكي بغضب) اهىءاهىءاهىء هاااديك المرة قطعات ليا كتاااابي اهىءاهىءاهىء ودابا دفتاااري اعىء اهىءاهىءاهىء 
يحيى: ياك شرينا كتاب اخر اصاحبي 
امير: الاااا هادا دفتااري 
ناضت اسراء كتنهد هزاتو وعنقاتو وهوا مخشي فكتفها كيبكي 
اسراء: صاافي صاافي . . . انا غنمشي معاك غدا للادارة وناخدو الدفتر يشوفوه 
امير: اهىءاهىءاهىء غيضحكو عليا صحابي اهىءاهىءاهىء 
اسراء: باستو فحنكو) مغيضحكوش عليك نتا مجتهد وغتبقى ديما مجتهد ونتا اللول فليكول ... يالاه سكت (كتمسح ليه دموعو) صافي اماما .. النقط راه كيبقاو عندهم غير كيعطيوكم الدفتر باش نشوفو حنا النقيطات ديالكم .
عوجاتو لجنبها هازاه ومشات تحنات عند الدفتر هزاتو وشافت فيحيى كتلوي فراسها وتنهد .. تمات خارجة وهي تبدا تاليا كتغوت وتجبد فيديها ... تكمات فيحيى معصرة كتبكي 
تاليا: انننننهىء اهىءاهىءاهىء نونو دالي دالي نونو 
امير: منين جاك نونوك ؟؟دفتااري 
تاليا: ااااانننن هىء اهىء نونوووو دالي دالي 
يحيى: دياالك دياالك اري ليها دفتاارها ... عطيوني دفتاار بنتي 
اسراء: نعطيوها الدفتر غير باش تسكت صافي ... وباباك غيجيبو لينا 
عبس انير وقلبو وجهو كيتنخصص معنق اسراء 
اسراء: هاكي ها نونو دياالك هاهوا 
شداتو تاليا عنقاتو وفمها معوج بالبكى كتنخصص ورجعات عنقات يحيى 
تاليا: نونو 
يحيى: صاافي ... ماتبقايش تبكي ... ها هوا ديالك 
بدا كيدوز يدو مور ضهرها ويسكتها وخرجات اسراء هازة امير فيديها كضحك معاه باش ينسى 
اسراء: اااا ميتي ميتي مييمتي ضهري .. كبرتي مابقيتش كنقدر نهزك شي نهار غنطيح 
امير: مابقتيش كتقدري تهزيني هههه 
اسراء: وليتي بحال باطمان هههه نتا خاصك تهزني دابا 
امير: نقدر نهزك ههه 
اسراء: وا نتا بطاال بحال باباك تقدر تهزني هههه 
نزلات بيه لتحت وجلسات فوق الفوطوي شاداه عندها كدوز يدها على شعرو 
اسراء: ياك عزيزة عليك ختك الصغييورة ؟... علاش كنتي غضربها مسكينة وهي معندهاش القوة بحالك 
امير: هي عزيزة عليا ولاكن ديما كتخصر ليا كتوباتي ودفاتيري ... هاديك المرة لونات ليا حنكي بالفيتر كاع مابغا يتحيد 
اسراء: هههه واحتا انا فقت لقيتها لونات ليا رجليا ووجهي ... وصبغات لباباك ضفارو حتى ناض لقا رجليه مصبغين بالصباغو ديالي ... واخا هاكاك مضربهاش ووحلت فيه انا جلست نهار كاامل هازو القرعة وكنمسح ليه ضفارو 
امير: وعلاش هيا كدير لبسالة 
اسراء: حيت باقا صغيرة 
وهما كيهضرو نزل يحيى هازها كيراري بيها وجلس مقتبل مع اسراء 
اسراء: فين الدفتر؟
يحيى : شووو... راه لفوق 
امير: هي بااغا ترجعني كاسول 
يحيى: لالا غير شافت دفتر قدامها لوناتو ... جمع دفاترك وخبيهم باش متبقاش تجبدهم ليك وتخصرهم ليك ... ماتبقايش تعطيها الملونات ا اسراء
اسراء: هااي هاااي !!! كدور دور وتجي تقولك نونوانات .. ويلا معطيتهاش تبدا تغوت حتى كيتشق ليا راسي 
تاليا: نونواانات؟
اسراء: بسخرية) هه! فهماتها ... ااه نونوانات ديالك لفوق حتى تبغيهم وسيري عندهم 
تاليا: نونوانات؟
يحيى: اه
تاليا: نونوانات؟
يحيى: امم
تاليا : نونوانات؟
يحيى: واييه
تاليا: ننووانات؟
يحيى: لا رد 
تاليا: نونوانات ؟
يحيى: الصمت
تاليا: شدات ليه وجهو) بابا نونوانات؟ 
يحيى: اه اه ابابا نونوانات ديالك وغنجيب ليك دفاتر فيه مومو لونيه 
تاليا: نونوانات؟
يحيى: اه
تاليا: نونوانات؟
اسراء: وبقا مقابلها ... هاكاك كديري وفاش تقوليه تاكلي تقولك امم؟ تاليا تاكلي ... امم؟ تاليا فيك جوع؟ امم؟ . . . كااع ممسوقا

اسراء: تاليا ... اجي اماما ... امير سير غسل يديك باش تغدا 
ناض امير مشا ونزلات تاليا من عند يحيى كتجري عند اسراء .. دارت رجل على رجل لابسة سروال دجين وقميجة وبانطوفة بيضاء هزات تاليا عندها وجبدات ليها البزولة كترضع وتلعب فرجليها ... تكى يحيى بضهرو على الاريكة كيتجمع معاها 
يحيى: سامية عاضانا للسبوع 
اسراء: اوييلي واش اللي عندو البز غيمشي لشي بلاصة ؟ كي غانديرو لهادو ... امير بعدا كيجلس هادي راه متخلينيش نجلس كي الناس غنبقى تابعاها 
يحيى: حشومة ماتمشيش ... غيحساب ليها ماعرفت اش واقع كاع 
اسراء: ايوا انا غير ققلت ليك ... مغنجلسش فخاطري وغير غيكتر عليها بنادم كتبقى تبكي مكتبغيش تسكت ... لا تكشيطة غتبقى ولا مكياج ولا شعر كنرجع شوهتي شوهة قدام الناس 
يحيى: راه هادو هما الولاد ... ماعندنا منديرو 
اسراء: ايوا شغاندير ... نمشيو لهاد السبوع ونصبرو 
يحيى: غنجلسو شوية ونرجعو بحالنا هادو مخاصهمش يسهرو بلليل 
اسراء: راه المشكل فداك الجوق والبشار كامل اللي غيكون ... غتعمر الدنيا و هادي كتخلع كتبدا تبكي وتجبد كي غندير ليها 
يحيى: خليها تولف 
اسراء ها حنا غنشوفو 
يحيى: امييير ... اجي تاكل وسير جيب دفاترك نشوف شنو عندك 
امير: واخا 
جلسو مجموعين والخاجة وحادة معاهم على الطبلة ... اسراء كتاكل وفنفس الوقت طالقة البزولة لتاليا كتجبد فيها تا سالاو وناض يحيى كيراجع مع امير ويقريه ومشات اسراء هازة تاليا دخلاتها للدوش دوشات ليها وغسلات ليها شعرها ولواتها فالفوطة وخرجات ... جلسات كدهن ليها شعرها وتمشط حتى نشفاتو ولبساتها بيجامة وتكات حداها 
اسراء: يالاه نعسي دابا اماما ... وقت النعاس 
تاليا: اننأ
اسراء: لا غنعسو احبيبة مشا الحال

جا النهار دالسبوع ولبسات اسراء تكشيطة مذهبة معرية من الضهر كاملة محجرة وفوقها سلهام ابيض طويل ... دارت مشطة لشعرها والقصة ملوية مفروقة فالوسط وصباط عالي فالباج محجر مع مكياج سموكي وعكر موف . خرجات من الصالون ديالها من بعد ماحولات جميع اعمالها للمحلات اللي عطاها يحيى . خرجات كتقرقب مغطية فسلعام لقات سيارة يحيى واقفة فالباب لابس سروال توب وقميجة وصباط كلاص وشاد فيدو تاليا لابسة غوب فالغوز ودافرة شعرها على شكل مشيطة وامير لور جالس لابس سروال وقميجة وجسلي اسود ، طلعات وسدات لباب عليها وهزات تاليا فيديها .. بقات كتشووف فيها هاد الاخيرة وهي دوز صبعها على شفايف اسراء مسحات ليها العكر ودارتو فمها 
اسراء: هبطات المراريا االلي قدامها) هيييه!!! وييلي خربقااتو .. مديرييش نتي صغييرة اش بااغا ديري ... ولاعيلا هادشي اللي بقا ليا ... عشكانقول ليك اللي عندو البز يجلس فدارو مصالحش ليه يخرج 
يحيى: هههه.... نتي معكرة ومزوقة وهي لا ! بطبيعة الحال غتبغي دير بحالك 
اسراء: ولاهيلا عبراات ... مسحاتو ليا ودارتو راسها ! ارى داك كلينيكس نمسح ليها فمها 
تاليا: قلبات وجها) انننأ 
اسراء : خاايب اماما ... غتمسحيه 
تاليا:اننخننننماهىء اهىء
اسراء: صااافي صاافي خلييك هانا مغنمشوحش ليك 
شداتها عندها وهبطات المرايا غادية فالطريق وكتقاد العكتر حتى وصلو للقاعة فين كاين السبوع ونزلات كتقرقب هازة تكشيطتها وسلهامها وهازة تاليا لحال الوردة فلاغوب فيديها .. يالاه بغات طلع فاادروج وهي تعمل شدات فيحيى
اسراء" هيييه!! كنت غنحي عل فمي شي عين ضرباتني 
يحيى : اري هاديك لهنا غطيحيها نوحلو فيها 
هزها يحيى وهزات هي جلايلها داخلها والانضار عليها كيشوفو اخر صيحة لانها مبلية بالموضة وكلشي عارفها وكيتسناها شنو تلبس وكي غتجي . دخلات هازة قنانفها للسما شادة وشادة فيحيى وجارة امير ... وصلات حتى لواحد الطبلة فين مجموعة العاءلة وهزات ييها لاحت ليهم السلام وبات كتبركم تحت سنانها مع يحيى
اسراء : مافيا اللي يسلم حناكي غيطيبو والمكياج غيمشي ... اللي بغا يهضر خليه يهضر
حول عينيه وتنهد مردتش عليها ودار ليها بلاصة جلسات فوق الفوطوي حدى الحاجة وسحر . وشدات تاليا عندها 
سحر: هااي هااي هااي جاتك التكشيطة كتحمق 
اسراء: بصح؟ يالاه جبتهم باقيين جداد... علاش ماجيتيش عندي تاخدي تكشيطة 
سحر: هاهيا ديالي باقا جديدة ..تااالياااااا اجي عند طاطا بوسيني
اسراء: خليها جالسة يا ختي قبل ماتنوض ...راه كترطى باغا تنزل 
تاليا : انننأ انن
اسراء: هانتي يالاه نزلي تشوف اش باغا ديري
تاليا: بابا 
اسراء: باباك خرج برا جلسي غير هنا حدايا غيقيسك شي واحد يطيحك ... امير بقا حاضيها اماما نهضر مع طاطاك 
امير: واخا 
تقلبات ظايرة رجل فوق رجل كتهضر مع سحر 
سحر: ايوا ... مناوياش تزيدي تولدي؟
اسراء: خرجات عينيها) هيييه !! فين غنزيد .. لجهنم ؟
سحر: ويلي ويلي شديها شديها 
ثلبات اسراء وجها شافت تاليا غادة دافعة وجها قدامها كتجري بلاغوب جيهت البوفي جرات واحد البلاطو دالحلوى طاح فالارض تشتت فوق الزربية قدام كلشي ... ناضت اسراء هازة تكشيطة كتجري بالطالون قبل متوصل سبقاتها عكوزت سامية ضربات تاليا ليدها بكاتها

مشات اسراء وعشرين شيطان كيقز قدامها هزات تاليا عنقاتها وخرجات عينيها فالعكوزة ثدام الحضور كامل كتغوت 
اسراء: ماربيهااش .... متقطعتيش عليا باش ضربيها .... على بلاطو دالحلوا ضربتي البنت حتى بكااااات مرااهاش كاااابرة فالجوووع باش ضربيها على الماكلة راه شبعااانا حلوااا فدارهم غير معارفاش 
العكوزة: عاقدة حجبانها) ربيو ولادكم وشدوهم عندكم ... كتولدو وطلقو 
اسراء: بزااف علييك مربيين حسن منك ومن اللي رباااوك بلاطو دالحلوا درتي عليه حالة راه باها عندو باتيسري تخدمي حياتك كاملة مادريهاش ... جووع بحال الى غير نتي اللي دايرة الحفلة ... الى ماقدراش تصبري متعرضيش على الناس 
سحر: كتفك) صافي دابا اسراء نعلي الشيطان 
اسراء: طلقي مني ... اناااا اللي مها عمرني زعفت عليها ولا ضربتها تجي نتي تحمري ليها يدها شوفي سحر يدها كي رجات حمرة واش قد هادي ديال الضرب ؟ ماتقييييسهااااش ومعندهاااش الحق ضربهااا ماشي هي اللي والدها الى مولفة بالعصى ماطبقوش على بنتي 
اسراء رجع وجها حمر كتنهج وضوتها كيتسمع حتى للزنقة ... جا راجل سامية كيجري كيسكت ويرطب 
الزوج: ختي اسراء مسحيها فيا .. صافي ساك جايا عندي مسحيها فيا 
اسراء: شووف يدها ... واش حيت طيحات الحلوى تاكل هاد الدقة ؟ راني شفت البلاطو طاح ونعوضو ليها بعشرة ولاكن باش ضربها على الحلوة لااا ... ومضربهااش راحنا مكنربيوش بالضرب حتى نتا متبغيش تحي مي ضرب ليك ولدك على خيزة ولا على حلوة ... كن دارت شي حااااااجة ولا هرسات ولا ماعرفت تش دااارت كاع تهضر معاها بالفم راه كتفهم ماشي تنزل عليها ليدها تا كرماتها 
صوتها القوي وغواتها سمعو يحيى من برى ودخل كيتشاءل بعينيه جرها من اللور وهي مخرجة عينيها فالعكوزة معاقلة على حتى واحد ... شاف تاليا كتبكي وهزها فيدو ومن غوات اسراء سمع موضوع الصدع ... هز لتاليا يدها شافها حمرا وعنقها وخرج عينيه فالعكوزة 
يحيى : جيتيني مرى كبيرة اما كن درت معاك الازم 
الزوج: السي يحيى على وجهي انا اللي عارضكم للسبوع ...
يحيى:بغضب) شوف نقول ليك ... الي يضرب ولادي راه نرجع ليه الضربة . تصابت مرى كبيرة مغنزيدش معاها الهضرة ... و مغنزيدش هنا الضربة . كن ضرباتها على شي حاجة اخرى تقدر دوز ولاكن على الماكلة والدراري الصغار كيشوفو شي حاجة كيمشيو ليها ... تعطيها الحلوى راه باقا صغيرة وتجي تقول ليا البلاكو طاح العيب والعار والى محضروش 10 دالبلاطويات دااابا. بنتي عنرها بكات بالضرب وعنر شي واحد ضربها ... المهم الله يكمل بالخير ... يالاه اسراء 
سكتات اسراء وهزات خنافرها فالسماء وهزات حوايجها وسحر كطلب فيها وهس خارجة مور يحيى .الزوج شاف فمو وتعصب 
الزوج: اش داك مالقيتي شكون ضربي علاش ضربيها على الحلوى .
الحاجة: ايوا نرخيو ليهم حتى يطيحو كلشي؟
الزوج: لااا لاا لااا .. البلاطو طاااح وثبل ميطيح حضيه اما الى طاح غير خليه ... مابغيناش شي حد يغضب علينا ... وماجيتي غير مع خو سامية ضربتي ليه بنتو ... هاهوا سمح فالكادو اللي جاب قدو قاش ومشا ... حشومااا كاع الواليدة واش حما تجمعنا نفرحو ولا نتعاداو ؟

طلع فالطوموبيل خوا واسراء وولادهم وتحرك من قدام القاعة واسراء حداه معنقة تاليا كتبوس فيها وتسكتها والاخيرة مابغاتش تسكت من البكى وجها رجع حمر وعرقات وكتهز يدها يدها توريها ليحى وتشكي 
يحيى: صافي ابابا صافي راني ضربتها .. اري يديدة نبوسها 
عطاتو يدها باسها ورحعات وراتها لاسراء 
اسراء: اري نبوسها باش متبقاش ضرك (باستها وعنقاتها) صاافي اماما اماما صافي ... ابنتي الحبيييبة ديالي ... ضربوك على بلاطو يعطيهم ضربة 
يحيى بحال الى كان كيتسناها غير تهضر .. رد عليها بعصبية وخرج عينيه
يحيى: بغضب) فيين كنتي نتي ؟؟؟ اشتو مقااابلة طاالقة البنت بووحدها ماعرفاهاش كتحرك متجلسش؟
اسراء: بتوتر) راه ماعرفتش كيفاش حتى طرات وانا بالطالون ... 
يحيى: بغضب : جلسيها عندك مطلقييهاااش ولا خرجيها ليا انااا نهزها ... ماشي يجي واحد اخر يمد يدو عليها ... كن حضيتيها وشديتيها مكانتش غتاكلها 
اسراء: الصمت
يحيى: ماااعرفتش اش حاااضياااا... (ضوب لفولون) تفووو . . . لاحولى ولا قوة الا بالله . . . بنااقص من شي سبوع ولاشي زمر كااع 
وقف الطوموبيل حدا القهوى ديالو ونزل دخل خلا اسراء مكمشة مقادراش ترد عليه ... خرج هاز كارطونة بيضاء فيديه وطلع فالطوموبيل حلها عامرة حلوى 
يحيى: تاليا ... هاكي ها الخلوى دبنتي 
شافت فالحلوى وحركات راسها بالنفي 
يحيى: امير ... بغيتي الحلوى ابابا؟
امير: لا شكرا 
يحيى: تاليا هاكي الحلوى زويينة 
اسراء: كولي الحلوى اماما ... (هزات وخدة لفمها) هاكي دوقي بحال هاديك الحلوى اللي عجباتك 
تاليا: هربات وجها) انننأ
يحيى: صافي خليها . . . مكانتش باغاها اصلا غير بغات تشوف وصافي ... تاليا باقا يدك كضرك؟
تاليا: (حركات راسها بالنفي)
يحيى: يالاه اجي عند بابا 
عطا لاسراء الكارطونة شداتها فيديها وهز هوا تاليا عنقها وكيداعبها لفترة قصيرة وعطاها لاسراء
اسراء: راه كااينة الحلوى فالدار طالعة ليهم فالراس ... غير فاش كيشوفو شي حاجة عند شي واحد كيبغيوها 
يحيى : صافي دابا سدي علينا هاد الموضوع ... كن مكنتيش لابسة ها التكشيطة كن قلبنا طريق لشي بلاصة نبدلو هاد جو النكد اللي حنا فيه
اسراء: ويالاه ديني نبدل دغيا ونرجع 
يحيى: غتعطلي
اسراء: لاالا دغيا شعري غنخليه كما هوا غنبدل غير حوايجي 
يحيى: يالاه 
مشا نيشان للفيلا ودخل وثف السيارة حدى سيارة اسراء الزونج البيضاء اللي شرا ليها هدية منو وجلس شاد تاليا وهي كتبش فالطوموبيل وتهز وتحط حتى رجعات اسراء لابسة سروال كلاص حتى للكرش وقميجة بلا يدين كحلة محجرة ديال السهرات وصلك مربع حمر فيه حجر اسود بصباطو العالي . طلعات حداه وشدات تاليا فيديها وطلقات موسيقى وقلبو الجو للضحك والنشاط ولاكن قالبة جها على يحيى وهوا كيشوف فيها بنص عين الطريق كاملة حتى وصل لاوتيل ونزلو ... نزلات هازة تاليا وغادية قدامو كضحك مع ولادها وهوا كذلك وفكل مرة يقوبها شي حاجة كدير راسها صمكة ومتجاوبوش ... شوية جرها من يديعا بابتسامة وهي معفرة عليه 
يحيى: مالكي غضبانة
اسراء: لا رد
يحيى: دوز يدو مور خصرها وباسها فحنكها) مقلقة مني؟
اسراء: اممم.. شوف نتا راسك شنو درتي 
يحيى: وا ساعة غضب ودازت ... حنا خارجين نبدلو الجو .. ماشي هما ناشطين وحنا ينكدوه علينا 
اسراء: نتا اللي بغيتي النكد ماشي انا 
يحيى: وصافي دابا نساي

دخلات هازة تاليا فيديها ويحيى شاد امير ومشات ختارت طاولة زوينة ومعزولة على الناس .. جلسو فيها ناشطين ضاحكين غير هما ب اربعة وتعشاو مجموعين فحو رمانسي ... طلعو حجزو فنفس الاوتيل ودخلو لغرفتهم هما ولادهم بدلات ليهم الحوايج ولبساتهم بيجامات وخلاهم ليحيى للي متكي عريان وسط الناموسية لابس شورط قصير كيضحك معاهم وهما كيطلعو عليه ويلعبو ... جلسات اسراء قدام المرايا كتمسح وجها وتنضفو حتى سالات وناضت فسخات شعرها ولبسات بيجامة بالشورط قصيرة وطلعات حداهم فوق الناموسية .. هزات تاليا عندها كتفسخ ليها شعرها وتماصي ليها فروة راسها وامير متكي عند يحيى معنقو 
امير: بابا ... شحال هادي محكيتي ليا شي قصة 
يحيى: نكيها لولدي المجتهد ... اشمن قصة نحكي ليك 
امير: اللي عجبك ابابا .. باش نعس
اسراء: ليوم غنحكيو ليكم واحد القصة زويينة انا وباباك 
هز يحيى عينو فيها داير نصف ابتسامة كيتساءل بعينيه وهي كتفرنس
اسراء: غنحكيو ليكم واحد قصة حب زوينة ... تاليا ... كتسمعي ابنتي 
تاليا: امم
يحيى : راها فايقة 
اسراء: شتها قطعات الحس ... مهم قالك هادي واحد الاميرة زويينة كانت عايشة مع ماماها وباباها ... وكانو عزاز عليها المشيشات 
تاليا: مياو ؟
اسراء : اه كانو عزاز عليها مياو وكانت ديما كتربيهم وتوكلهم وكان كلشي كيحماق عليها 
يحيى: واالامير حتى هوا كان زويين وكان كلشي كيحماق عليه والبنات كينقزو قدامو بحال الدرة 
شاف فاسراء بابتسامة ساخرة لقاها عاقدة حجبانها ومخرجة عينيها فيه وهوا يضحك عليها 
اسراء: باااز كينقزو بحال الدرة؟
يحيى: ونتي مكتحشميش اللي كتقولي فيها بوجهك حمر وانا جالس ... كيحماااقو عليا!!
امير: وا كملووو
اسراء: مهم ... كانت هاد الاميرة عزيز عليها تربي القطيوطات 
تاليا: مياو؟
اسراء: اه مياو اماما .. واحد النهار جا الامير يخطبها ... ولاكن هي مابغاتش
يحيى: لا عساك اولدي ماشي مابغاتش غير كانت معفرة 
اسراء: كتسوط) راه بصح مكنت باغا 
امير: وا كملو دااباا 
اسراء: مهم ... جا يخطبها وهي(شافت فيحيى بطرف عينها) مكانتش عارفة واش كتبغيه حيت كانت صغيرة وزويينة فنة كتحمق ... ماماها وباباها زوجوها لداك الامير بزز منها ... وفاش تزوجو ...
يحيى: فاش تزوجو بدات فتحراميات والزبايل .. وداك الامير كان كيدوزهم ليها حتى لواخد النهار عصباتو وناض عطاها قتلة دالعصى تموت ما تنساها هههه 
اسراء: بغضب) ماغاتخليناش نكملو دابا؟
يحيى: هههههه ومالي كدبت 
اسراء: حنا كنهاودو داكشي الزوين ... تاليا؟
امير: نعساااات ... وكملو .. هادي تخربيقة ولات ماشي حكاية 
اسراء: صافي سكت نتا خليني نكمل ليه ... فين خليناها؟
يحيى: فاش عطاها قتلة دالعصى
امير: فاش عطاها العصى 
اسراء: كمشات فمها وحجبانها) ضربها وغضبات ليه ومبقاتش كتهضر معاه ورجعات كتعتاني غير براسها ...
يحيى: حتى رجعات بحال المونيكة ديال تاليا ديك اللي شعرها صفر 
اسراء: يحيى هانتا كتعصبني 
امير: وانتوما كتفلاو ... خليوني نعس هادي ما حكاية ما والو 
يحيى: نعس ابابا نعس غدا عندك عطلة .. الويكاند غنمشيو لشي بلاصة ندوزوه فيها 
خشاه الوسط هوا تاليا ناعسين بيناتهم وجلس كيهضر هوا واسراء بصوت خافت 
يحيى: كملي ليا القصة 
اسراء: سير سير كتفلا عليا مالقيتي ماتعاود غير العصا والمونيكة 
يحيى: ههه كنضحك معاك الحمقة ... ونتي كتعصبي على والو 
اسراء: شوو خليني نعس 
يحيى: نعسي
عنقات تاليا كطبطب عليها وترجعها تنعس فكل مرة حلات عينيها على صوتهم حتى داهم النعاس بجوج. الصمت والسكات والضلام فالغرفة حسات اسراء بشي واحد كيحركها من كتفها وحلات عينيها بشوية لثات يحيى واقف كيحرك فيها ويهمس بصوت خافت ويدير اشارات كيقوليها نوضي ...شد ليها فيديها حتى ناضت وباسها فعنقها 
يحيى: اجي معايا .. توحشتك احبيبة 
اسراء: بهمس فين؟
يحيى : شووو... الشومبر اللي اونفاص ... شوية ونرجعو (مع غميزة)
شد ليها فيديها وخل الباب بشوية بلا حس باش ميفيقوش الدراري وداها معاه كضحك حشمانة
❤ النهاااااااااااااااااااية