خلقت له الجزء 17

من تأليف أسماء أديب
2018

محتوى القصة

رواية خلقت له

قطعات مع شامة وهزات راسها لقاتو جمع الطبلة وحط كلشي يتغسل فالماكينة وهو ما كاينش..ناضت كتقلب عليه فارجاء البيت ما لقاتوش لتحت وطلعات للطابق الفوقاني لي أول مرة طلعلو وكتشوف بعينيها وتكتاشف حتا خرجات نلاطيراس وبانلها عاطيها بالظهر كيطراكسيوني بإكس فالاسود والابيض وسروال سبورتيف فالاسود وعضلات ظهرو لعريض بارزين وكيتحركو مع كل حركة كيطلع فيها او يهبط وكيثناو..وقفات فالباب متكية على الكادر وحاطة راسها عليه كتشوف فيه باعجاب وتنهد بسعادة وما حساتش غير ورجليها غاديين بيها ليه وطلعات فوق منو تكات عليه وهو كيطراكسوني ودورات يديها على صدرو معنقاه وحاطة راسها على ظهرو بابتسامة..وقف هو عن الحركة ودور وجهو للجنب كيطل عليها من مور ظهرو وكيضحك 
فراس:هه ساليتي..(رجع كيتريني)هنية عليا..ساعتين غير دالهضرة مع شامة..آخر مرة انعاود نعطيك تهضري معاها
رؤيا:(هزات راسها كطل عليه وشادة فجنابو)ههه علاش
فراس:ايوا ساعتين كااملة ضيعتيها نتي غير فالهضرة..عرفتي ساعتين شنو كنا نقدرو نديرو فيها احححح ما نgولكش
رؤيا:(خشات راسها فعنقو كضحك بخجل)هههه ايوا شني نعمل ههه توحشتووم 
فراس:اهاه وانا ما توحشتينيش
رؤيا:ههههه لاااائح هه
فراس:(دور راسو كيطل عليها)ههه وااايلي؟
حركات راسها بالايجاب وحابسة الضحكة وكتلعب برجليها فالسماء وهي ناعسة عليه
فراس:ههه نتي غير طلعتي لفوق وتقلبلك السيستيم!..اجي لهنا
جرها من فوقو رجعها تحت منو بالزربة وكالا بيدو فوق منها كيتبسم بالجنب وهي كتضحك بشوية
فراس:دابا مزيااان..ايوا شنو دابا توحشتيني ولا لا (غميزة)
جامعة يديها لصدرها وكتشوف فيه ووجهها رجع حمر بقوة الضحك لي كتحاول تحبسو وحركات راسها بالنفي
فراس:ههه لواه شوفي وكان!..زعما ما توحشتيش نبووسك بحال هاكا(بوسة حنينة)..ونشم ريحتك فحاال هاكا(بوسة فلعنق)..ونعضك بحال هاكا (عضها فوذنها)
رؤيا:ههه هدا ههه..ياك كنتي كتريني وا تريني وخليني عليك فالتيقار ههه
فراس:هه منين باغة التيقار لاش جاية طالعة فوق مني هاا دوي!
كمل اللعب ديالو كيطلع وينزل وهي تحت منو كتهبط عينيها تشوف فصدرو وترجع تشوف فيه وهو فيما يهبط يسرق بوسة من فمها ويرجع يطلع
رؤيا:ههه فرا..(قاطعها ببوسة)هه فراس
فراس:اممم
رؤيا:شن..(بوسة)شني انعملو دابا؟(بوسة)..ما انخرجوشي تسا(بوسة)...وا خليني نهضر ههه!
فراس:هه هضري شكون حبسك(بوسة)
رؤيا:ههه متأ الله يست(بوسة)..ههه صافي بوس حتا تسالي نتينا ونهضر يان..(بوسة)ههه
فراس:ههه غير هضري كيعجبني نشوفهوم كيتحركو(بوسة)
رؤيا:ههههه
زيرات على شفايفها وحابسة الضحكة اطرطق باش ما يلقا ما يبوس..خلاتو كيشوف فيها وهبط عضها من ذقنها وهي كتلوى تحت منو
فراس:هههه يله لمك..عاودي جمعيهوم نشوف..فتحي نبوس رزقي
رؤيا:(بغنج)ااااي حرام عليك قصحتييني
فراس:هه تستاهلي احبيبة..نتقصح غير انا!!(بوسة)..يله هضري دابا شنو بغيتي تgولي
كمل لونتيريمون ديالو وخلاها تهضر وكتبسم ويديها طالعة هابطة معاه كتلعب فعنقو ولحيتو
رؤيا:بغيت نخرج..واش ما اتسارينيشي فهاد لخلا لي جبتيني ليلو ههه
فراس:(بسخرية)هانتي gلتيها لخلا..يعني ما عندك ما تشوفي فيه!
رؤيا:ههه وشني دابا انبقاو غير هنا شوف فيا نشوفك اطاجين الحوت!
فراس:ههه وي احبيبة داكشي لي انديرو..غير حنا غادي نشوفو ونزييدو نقيسو ونحسو ونسمعو ونعييييييشو(بوسة فالعنق)
رؤيا:هههه عرفتي نتينا وااحد الشلاهبي ههه
فراس:ههه مقبولة منك أمراة الشلاهبي
رؤيا:ههه لا لا بصح..بغيت نخرج نتسارى..متحمسة نشوف هاد الغابة..ههه انعملو فحال داكشي دناسيونال جيوكغافيك ههه
فراس:خلينا من جيوكغافيك واجي نديرو فحال روتانا ههه
رؤيا:ههههه كتعرفا!
فراس:وعلاش ما نعرفهاش..مالي جاي من زحل؟
رؤيا:ههه ماشي..غير جاتني غريبة وصافي!..مهم زيد دابا نعملو فحال جيوكرافيك وفالليل نعملو فحال روتانا تافقنا هههه
فراس:هه بلحق انا باغي داكشي فالضو
رؤيا:نشعلو بومبية(بولة)ههه
فراس:ههه بغيت الضوء طبيعي..كيبان داكشي ناتوريل(غميزة)
رؤيا:وا مشكييييلة معاك..شني دابا اتهرف عليا!
فراس:ههههه نوضي نوضي..حتا لليل ونقضي بضو الgمرة ما عندي ما ندير ههه
ناض من فوق منها من بعد ما كان كيطراكسوني كيقطر بالعرق وشعرو فازك وجرها من يديها نوضها حتا وقفات وهزها على غفلة من خصرها ورماها على كتفها حتا غوتات ورجعات كضحك..هبطها هاكاك هازها وكتفركل بين يديه وتكركر حتا وصلو للبيت ورماها فوق الناموسية وهبط فوق منها مكالي بيديه باسها بالزربة ودخل يدوش وخلاها كضحك وتفركل وتنقز فوق الناموسية بالفرحة..ناضت لبلاكار جبدات صباردين غوز لبساتها وكتسمع الماء مطلوق فالحمام حتا خرج عندها ملوي عليه فوطة وكينشف شعرو..لقاها جبداتلو حوايجو حاطاهوم فوق الناموسية وهزهوم كيلبسهوم..لبس سروال دجين ازرق فاتح مع تيشورط كري وصبادرين بيضاء وكاسكيط فالاسود مكتوبة بالابيض وساعة رياضية فيدو..
شاف فيها لقاها لبسات حتا هي كاسكيطة بيضة وصاكادو فظهرها صغير فالمارون دالجلد شدلها فيديها وخرج هو وياها مشادين كيضحكو..خرجو من الدار وهبطو فطريق صغير داخلين جيهة الغابة الخضراء لي كلها شجر عااالي وملاقيين مخليين غيير شوية ديال الضوء من اشعة الشمس يدخل والغابة كلها مظللة..حلات فمها وهو جارها موراه وكينبهها للطريق والاغصان لي فالارض خايفها تعكل..خدات منو تيلي وكل شوية تزيد زوج خلفات وتوقفو يديرو سيلفي وفيما تعجبها شي شجرة تصور معاها وهو غادي معاها فهبالها..حتا لقات راسها قدام شلال صغير ما عاليش بزاف..الماء ديالو صااافي غادي كيجري وصوت خريرو مجهد والاحجار المكسوة بالربيع دايرة بيه وقفات شادة فيدين الصاكادو وكتشوف فداك المنظر الطبيعي الخلاب والابتسامة مرسومة على وجهها وهو واقف موراها هاز راسو وخاشي يديه فجيابو
رؤيا:وااااااو ههه وااااعر
فراس:وي زوين..وكاين منو بزاف 
دارت شافت فيه كضحك وشداتها بجرية غادة كتنقز من حجرة لحجرة وتكركر وهو طالع موراها كيغوت عليها
فراس:ما تجرييييش المصيبة هاانتي اطيييحي..بشوية عليييك..رؤيااا!!
رؤيا:هههه واااااو ههه واعر واعر
وقفات فرأس الشلال وعينيها كيبريو وحطات يديها قرب فمها كتغوت
رؤيا:وااااااااااااااااااااو
تسمع صدى صوتها وضحكتها وحسات بيد زيرات على دراعها ودارت كتشوف فيه وتضحك
فراس:واااش انا انبقى ديييما تاابعك..مال مك كتقلبي عليها فيما كااانت..واش ما خفتيييش طيحي!!
شافت فيه فرحانة وكضحك ما تسوقاتش لغواتو ورجعات قلبات وجهها كتغوت
رؤيا:وااااااااا كنبغيييييييييييه هههه..فراااااااااس كنبغيييييييييييك هههه
شاف فيها باستغراب وكيحاول يضبط راسو ويحافظ على جديتو..ما قدريش يزيد يغوت عليها والضحكة خرجاتلو بلا ما يشعر وحط يدو على جبهتو مغطي عينيه وكيحرك راسو يمين شمال ورجع هز راسو فيها وجرها عندو عنقها من الخلف جامعلها يديها حدى صدرها وباسها فحنكها وهو كيضحك
فراس:وشنو دايرة فيا يااا لمعذباني ههه
رؤيا:هههه غوت حتا نتينا..قول كنبغيييييك ارؤيا هههه
فراس:ههه يا هاد الحمقة..كنبغيك وكنتسطى عليك بلحق بلا غوات ههه ماشي ضروري
رؤيا:لا ضروري..عافاك عافاك ههه..ااااه تسنى نعملو فيديو(جبدات تيلي ديالو لي خشاتو فجيبها)شوو هانا انقولا ونتينا تبعني صافي ههه(خدمات الفيديو)..فرااااااااااااس كنبغيييييك هههه
شافت فيه كتسناه يغوت حتا هو وهازة التيلي كتصور فيديو على شكل سيلفي وعاطية لشلال بالظهر..لقاتو كيشوف فيها شاد الضحكة وكيحرك راسو بالنفي ودارلها حركة بيديه على أنها حمقة وهي تدلي شنوفتها فحال الدراري الصغار وكتشوف فيه ببراءة
رؤيا:ياااك..عافاك عاافاك..على وجهيي..تبغيني نبكي ياااك افراس!عافاك عملي خاطري بليييييز
فراس:والله حتا مسطية..(عنقها من الخلف كيبوسها فحنكها ويهضر)كنبغيك وكنحماق عليك وكنتسطى عليك وعمرك تبغيني قد ما انا كنبغيك ههه..(شاف فيها)هه صافي!
رؤيا:هههه لا يانا بغيتك تغوت..كيما غوت يانا!
شاف فيها لمدة مطولة بابتسامة جانبية على وجهو وهي كترمش بعينيها بحال شي بنيتة صغيرة شاداها البكية..عنقها بالجهد ورجع طلق منها واقف كموراها وفاتح يديه وهاز راسو لسماء
فراس:واااا كنبغيييييييها..كنعشقهاااا..محمقااااني وداااايالي لعقاااااال..خداااااات قلبييييي و عقليييييييي وبلاااااا بيييها ماااا بقييييييتش قاااادر نعييييييش..رؤياااااااااا..مرااااااتي..حيااااتييييي..بنتيييييي..حبيييييبتييي..(هبط راسو شاف فيها كيضحك وهضر بشوية)نتي هي كلشي
تشوكات واقفة فبلاصتها وصدى صوتو الخشن لي فييه ديك البحة لقوية لي كتحمقها كيتعاود فوذنيها..ابتسامة سعادة عريضة مصورة على وجهها وعينين مدمعين بالفرحة كيبريو وكيشوفو فيه وهو كيقرب عندها بزوج خطوات حتا لصق عليها وعينيه فعينها وهي هازة راسها باش تشوف فيه
فراس:ههه شنو دابا..على خاطرك هه
هو مزال كيضحك وهي طارت عليه عنقاتو بالجهد وزيراااات عليه بكل ما فيها من قوة..
رؤيا:(بلهفة)كنبغيك كنبغييييك..ما تصورشي شحااال..ونهار على خوه كتزيد تربطني بيك.. 
تبسم وهبط راسو باسها فكتفها وهي باستو فعنقو ورجعات بعدات راسها بشوية وعينيها على فمو وقربات منو ببطء..التحمو شفاههم في قبلة رومانسية وسط الطبيعة والماء لي هابط على جنبهوم كيجري وصوت اوراق الاشجار لي كتلاقى مع بعضها بفعل الريح لخفيف لي كاين..اختلط صوت انفاسهم مع صوت سينفونية الطبيعة وهو هازها عندو ومدور يديه على خصرها باش تقاد معاه ورجليها مهزوزين من فوق الارض.. كتبعد هي ترد النفس ويرجع يجرها عندو وفاش كيبعد هو كترجع تقرب منو هي..دامت القبلة لمدة طويلة حتا بعد عليها كينهج ووجهو حمار ولعرق هابط مع جبهتو من تحت الكاسكيط
فراس:يله..انرجعو!
حطها فالارض وجرها من يديها مهبطها وشاد فيها عنداك طيح وهي مزالة مبهوضة حتا فاقت من إثر تخذير القبلة عاد زيرات على يديه وجراتو
رؤيا:خلينا مزال شي شوية!!
فراس:(عاقد حجبانو)الا بغيتي تهزيهوم مع شي شجرة بقاي..

رؤيا:خلينا مزال شي شوية!
فراس:(عاقد حجبانو)الا بغيتي تهزيهوم مع شي شجرة بقاي
رؤيا:(الصمت)😳
جرها من يديها غادي بيها بالزربة وكيحك فجبهتو..وهي تابعاه كتحاول تجاريه فخلفاتو حتا عيات وهبطات راسها حانية وشادة فركبتها
رؤيا:(كتنهج)اووووف عييييت..الله يا ربي اووف..(هزات راسها فيه لقاتو كيشوف فيها وجبهتو مكمشة)غير بشوية عليا را..ه اوف راني عييت جهدي ماشي هو جهدك ونتينا كتجري..(حاطة يديها على صدرها)الله يا ربي ما بقيتشي قادرة نتن..واااااااااااو
غوتات مبهوضة فاش حسات بيه هزها على غفلة وهي مهبطة راسها..شدها من اليد لي كانت فيدو حطها على كتفو بالزربة وجرها عندو من فخاضها هزها محملها فظهرو وتمشى بيها كيخلف بالزربة..عجباتها الهزة ودورات رجليها على كرشو ملاقياهوم مع بعضهم ويديها معنقينو من عنقو..ما دازش بزاف لقات راسها قدام باب الدار وحطها باش يفتح الباب..تجرات من يديها جابها قدامو كيبوس فيها بلهفة وخلا الباب مفتوحة..هز راسو كينهج زول الكاسكيطة ديالو رماها ونتر ديالها حتا هي..ورجع كيبوس فيها ويدفعها للخلف جيهة لفوطوي..حط يدو على كتافها زولها الصاكادو جا طاياح فالارض وهزها من فخاضها علاها عندو كيزفر بقوة تعنكشات بين يديه وهو كيبوس فيها من كل قنت..وصوت اهاتو كيتسمع مخلط مع صوت انفاسو المتسارعة..حطها فوق الفوطوي ووقف زول الكابيتشو رماه وطلع التيشورط زولو حتا هو وجا فوق منها كيجردها من ثيابها بسرعة حتا وقفاتو كتهضر بصوت خافت
رؤيا:الباب!
فراس:(كيبوس)غير خليه..ما كاين لي يجي لهنا
سكتات بين يديه واستسلماتلو وتجاوبات معاه..طال الوقت وهما على نفس الحال حتا تهدات وما بقات قادرة تهز لا يد لا رجل وغمضات عينيها فشلانة بين يديه وبعد عليه خلاها سخفانة ومشى جاب الماء شربولها ورش شوية على وجهها حتا صحصحات شوية وهزها بين يديه كيداعبها..دخلها للحمام جلسها فوق لحرف ديال الجاكوزي وهي حشمانة وحنوكها حومر كتحاول تغطي بيديها شي حاجة وما قدراش تهز عينيها فيه وهو كيتسارى قدامها زلاط كيعمر الجاكوزي ويقادها..نزلات عليها حشمة عجيبة غريبة من السماء وغلب عليها احساس التوتر وبقات ساكتة وهو عاطيها العين..جرها من يديها وقفها كيتبسم بالجنب ودخل هو ودخلها معاه خشاها بين رجليه معنقها
فراس:ههه مالك ساكتة..ما تgوليش ليا حشمانة هههه
رؤيا:الصمت
فراس:هههه لا واش من نيتك!
رؤيا:(بهمس)وا نتينا..احم نتينا كترتي عليا هاد..النهار
فراس:(كيداعب خدها بصباع يديه)اممم بغيتي تgولي داكشي كان مجهد ههه
رؤيا:(بخجل)هههه بعد مني
فراس:هههه لا والله حتا نتي علام..8 شهور دالزواج ودابا جاتك الحشمة..بلحق واخة هاكاك جااات معاك ههه..كيعجبني نشوف هاد لحنيكات حميمرين هه(عضها بشفايفو من حنكها)احححح
رؤيا:كتضحك فصمت
كمل مداعباتو معاها وهو خاشي وجهو فعنقها كيهضرلها فوذنيها حتا كتبورش من صوتو وكتبدا تلوى وتعوج بين يديه..حط يديه على كرشها كيهضر مع الجنين ويضحك وهي حطات يديها فوق يديه كتبتسم
رؤيا:شني فنظرك ايكون..ولد ولا بنيتة!يانا ما كرهتشي نعرف..متشوقة
فراس:لي جا من عند الله مرحبا بيه..مهم نتي هي ماماه ههه
رؤيا:هه ونعم بالله..مي دبصح زعما نتينا ما كتمناشي يجيك ولد كثر!
فراس:تؤ تؤ..ما عنديش ديك الفكرة..فحال الولد فحال البنت..وبلعكس عاد ربي وصانا بلبنات كثر..والاجر ديال التربية ديالهم كبر وكبر من ديال الولد..والا الواحد ربى بنتو مزيان وحسن بيها وكانت من المؤمنات الصالحات فتقدر دخلو لجنة
رؤيا:وي دبصح كاين واحد الحديث ديال الرسول صلى الله عليه وسلم كيقول فيه هايدا..وكيما كانت كتقولي عزيزة..ناس زمان كيقولو ربي فاش كيعطيك الولد كيقولك هانا عطيتك لي يعاونك وفاش كيعطيك البنت كيقولك هايانا كنعاونك
فراس:ايوا شفتيييي..فحال الولد فحال البنت احبيبة..مهم يكون بصحتو وبصورة كاملة..اما التباقي غير تخربيق..وهادوك لي كيميزو بين بناتوم وولادهوم ناس جاهلين..ما عارفينش فضل لمرى عليهم..نساو بلي واحد البنت خلاقت فواحد النهار هي لي كبرات وتزوجات وحملات وهزات وتعذبات باش تجيبو لهاد الدنيا..وفلخر يجي يgولك لواه الذكر حسن..اودييييي بنادم عندو المونتاليتي مرييييضة وكيجي يتمرضن على عباد الله
رؤيا:الله يهدي ما خلق وصافي..خاصو يجرب غير شوية من لي كذوقو لمرى باش يحس بيها
فراس:(زيرها عندو)لهلا يخطيكوم علينا..ويخليك ليااا..ربي يسمحلنا منكم..كتمحنو ونزيدو نمحنوكوم معانا
رؤيا:ههه واخة هايداك لمرى خاصها غير تجبر شكون يستحق وتقدر تصبر على اي حاجة على قبلو..وديك الساعة واخة تمحن ما كيبقاشي فيها الحال..مهم تمحنات على شي واحد يستاهل..ههه بحالك هايدا!
فراس:ههه ياك بعدا نست..احححح
رؤيا:(دورات وجهها كتشوف فيه)شعندك!
فراس:(شاد فجبهتو ومزير عينيه)
رؤيا:فراس؟شعندك!!..حبيبي؟
فراس:احححح اوووف..راسي..فحال شي مطرقة ضرباتني فيه..اووووف
رؤيا:الله يحفظ..واش مزالة كضرك
فراس:شوية

بقى كيحك فجبهتو بيديه وهي كتقلب فيه وتسولو حتا حل عينيه وشاف فيها بابتسامة
فراس:ما تخافيش..غير حريق عادي ودابا يفوت
رؤيا:لباس عليك احياتي..نخرج ونعملك شي عصير ديال الليمون مع النعناع اوك!
فراس:هه نخاف منك ديري شي مصيبة عاود
رؤيا:شعندك كتزيد فيهم..يانا ماشي حتااا نديك الدرجة
فراس:هههه
كمل هو وياها الهضرة موضوع كيجرهم نأخر..دوشو وسالاو وناض هو سبقها وخلاها كتجمع شعرها..لبس بينوارو وخرج بدل عليه سروال دالدار خفيف فالمارون مع كابيتشو منو للحم فالباج مكتوب بالاسود..خرجات هي لقاتو كينشف شعرو تبسماتلو وهزات حوايجها كتلبسهوم..ملابس داخلية وطوب وكولون فالابيض لاصقين..هزات لبسة على شكل فراشة طويلة بالقب وثوبها سخون شوية فالاحمر لبساتها جات فيها زوينة وفورمتها العامرة شوية جات بارزة..نفضات شعرها من الماء مزيان وخلاتو مطلوق كينشف..هزات عبايتها باش تصلي الظهر ومتبعاه بعينيها وهو كيصلي..طلقات الصلاية وقامت الصلاة حتا سالات وخرجات تبعاتو كتقلب عليه لقاتو جالس فالصالة فوق مخذات كبار ومكالي ظهرو بالفوطوي ومقابل مع التلفازة..دازت من حداه وهو عاطيها العين حتا دخلات للكوزينة..هزات الليمون عصراتو وكباتو فالخلاط مع اوراق النعناع وشوية دالماء خلطات كلشي وكباتو فكاس كبير زادت عليه معلقة دالعسل وحركاتو مزياان..حطاتو فبلاطو صغير وهزاتو وخرجات..
رؤيا:(حطات لبلاطو حداه وجلسات بجنبو)هانتينا شرب هذا(مداتولو)
فراس:اممم يخليلي لحادكة ديالي..اري نذوقو هادشي ديالك
رؤيا:بركة من الطنز وشرب..
فراس:هه اممم عطاك الله الصحة..
رؤيا:ههه بصحتك..شني كتعمل..كتلعب؟!
فراس:(حط الكاس حداه)ههه وي
رؤيا:ههه عطيني نلعب معاك حتا يانا
فراس:ما اتعرفيش..صعيبة عليك
رؤيا:لا غير عطيني..انعرف..(كتشوف فالتلفازة) اصلا بااينة ساهلة..غير طوموبيرة وكتدي وتجيب فيها..خاصك تشوفني فاللعبة ديال المداقصة ههه كنغلب كلشي وما كنخلي حتا واحد يضربني ههه كنبقى عليهم بزداف زردلاف ما كيعرفوني مناين سلاطيت عليهم ههه..ناري توحشت نلعبها
فراس:(كيشرب)اممم ههه المداقصة gلتيلي ههههه
رؤيا:ويي المداقصة..عرفتيها ياك!هاديك ديال الطوموبيرات لي فالسيركو..كيبقاو يدابزو فيها ويضاربو!
فراس:ههههه وي وي عرفتها المداقصة ههه شكون ما كيعرفش المداقصة هه
رؤيا:هه ايوا مزيان..يله عطيني نلعب دابا!
فراس:راه غادي تخسري
رؤيا:ما انخسرشي..وانغلبك كاع
فراس:اواااه تغلبيييني هه..اوك الالة ها حنا انشوفو..هاكي شدي
عطاها لمنيطة فيدها وجلسات حداه مربعة رجليها فوق لمخذة وهز هو الكاس دالعصير هبط عليه فدقة وتقاد فالجلسة ديالو شاد لمنيطة بين يديه
فراس:انبداو ماتش جديد فيه غير انا وياك اوك
رؤيا:(كتشوف فلمنيطة لي فيديها وكتجرب)اممم
فراس:(مطلع حاجبو)ههه مي الا خسرتي شنو اتعطيني!
رؤيا:ما انخسرشي 
فراس:ههه اوك مي نفترضو خسرتي شنو اتعطيني؟
رؤيا:اممم..لي بغيتي صافي!
فراس:ههه اوووك(بخبث)هانتي كل مرة خسرتي فيها اناخذ بوسة من عندك تافقنا..مي بغيتها تكون بوسة حاااااااارة هههه
رؤيا:كتولول لا!!
فراس:ههه هاديك بالضبط هي لي بغيت
رؤيا:(عوجات فمها)اممم ولا ربحت يانا..شني اتعطيني!
فراس:بوسة حر منها ههه
رؤيا:هه لا يانا بغيت شي حاجة ياخرا..البوسان خليتو ليلك
فراس:ههه اوك انعطيك واحد الحاجة اتعجباااااك..مي محال تاخذيها حيث مستحيل تربحيني(ضحكة جانبية)
رؤيا:(بتحدي)ايوا دابا نشوفو..الا ما حنتكشي راني ما نتسماشي
فراس:هههههه احححح انشبع بوسان هاد النهار..الا ما طيبتلك داك الفم راني ما نتسماش حتا انا ههه
قلبات عينيها فيه كتميقهم وهو كيضحك عليها بسخرية..بداو اللعب هي مربعة وهو جالس ثاني رجل تحت منو ومسرح لوخرى فالارض..ومع الدخلة ما خلاهاش حتا تحرك شقلبلها الطوموبيل
رؤيا:(كتغبن وتنقز وهي جالسة)ولااااا غشيييتي..ما كنتشي واجدة..لا واالو انهننن اتعاودو ما محسوبشي
فراس:ههه اجي لمك هنا gالالك ما محسوبش
جرها عندو وهي جالسة نعسها فحجرو وزير على عنقها وهبط راسو عندها باسها بقوووووة وهي كتفركل برجليها وتفرطط وهو خداام ما مسوقش وكيضحك حتا طلق منها وفمها حمممر 
فراس:احححح..ليوم نتقم منك على داك اللسان الطويل
رؤيا:(ناضت من حجرو تجلسات شادة ففمها كتبردو)واش صافا ولا صافا با!
فراس:صافا احبيبة الحمد لله يسول فيك الخيييير هههه
رؤيا:(ضغطات على يديها وفمها بعصبية)اعععععععع..اوووووك ماشي مشكيلة عاود بدا طرح ياخور وغاتشوف
فراس:ههه هي اللولة..يله بسم الله
رؤيا:بلحق بلا غش هاد المرة..ولا ما لاعبينشي!
فراس:ههه الله يهديك فوقاش غشيت انا
رؤيا:لا غشيتي..غفلتيني ما كنتشي واجدة
فراس:ههههه اربييييييي ههه..صافي هاد المرة نعلمك قبل عاد نشقلبك هههه حمقة!
رؤيا:(بنص عين)بدا بدا ونتينا تكركر(كتكفض يديها) احححم يا ربي..توكلنا على الله..يله بدا شعندك كتشوف فيا(باستهزاء)ولا خايف!
شاف فيها بطرف عينو كيضحك ورجع بدا طرح جديد

بدا طرح جديد كيلعب بانسيابية وهي كتعوج يمين شمال وتضربو ليدو بلعاني وهو كيضحك عليها ومخليها كتفرطط غير بوحدها وتنقز وما بغاش يغلبها فلبلاصة وخلاها حتا بدات تحمس وتفرح حيت ما قدرش يغلبها وبحركة وحدة بصبعو شقلبها وربح للمرة الثانية..شاف فيها لقاها شادة لمنيط فيديها بحال الا مزالة كتلعب وحالة فمها فالتلفازة مصدومة ما كتزعزعش غفلها هاد المرة دبصح..رجع راسو لور حاطو على الفوطوي لي مكالي بيه ظهرو وكيموت بالضحك على المنظر ديالها..وعلى غفلة منها جرها للخلف عندو تكالها راسها على الفوطوي وزيرها مرة اخرى ببوسة اقوى من لي سبقاتها حتا خنقها وتقطعات فيها النفس عاد طلقها كتكح بقات كتغبن وتغوت ما عاجبهاش الحال ورجعو بداو طرح ثالث ورابع وخامس وعاشر وكل مرة كتخسر فيها وكينزل عليها ببوسة حتا كتبغي تعيط بالعداو عاد كيطلقها..فمها رجع احمممر لدرجة كبيرة وتجرحات شفافها من الجنب شوية وطلعلها الزعاف ورمات لمنيط من يديها وناضت
رؤيا:ما بقيتشي لاعبة يانا..غشاش!
فراس:(شدها)هههههه اجي اجي ههه جلسي..مزال ما سالينا
رؤيا:(بنرفزة)رخي مني..ما كتعرفشي تلعب
فراس:ههههه الله يا ربييييي ههه..صافي هانتي غير جلسي وعلميني كيفاش كيلعبو هههه
رؤيا:بعد مني 
فراس:وا غير اجي الله يهديك هههه..صافي زيدي غير هاد الطرح الا غشيت ما تزيديش تلعبي هههه 
رؤيا:(كتشوف فيه وتفكر)حلف ما تغش
فراس:ههه لا حول ولا قوة الا بالله ههه وا صافي جلسي
جرها من يديها جلسها حداه وهي هازة نيفها فالسماء كتشوف فيه غير بطرف عين،بقى كيضحك عليها ويحرك راسو يمين شمال 
فراس:ههه يله بداي..باش ما تgوليش غفلتك ههه
رؤيا:انمننن(كتعيبو)
فراس:(ضربها بخفة لراسها من الخلف)تجمعي ههه
خنزرات فيه وهي شادة فراسها وهزات لبلي بالزعفة وبدات كتلعب..خلاها هاد المرة على خاطرها وبقى مسايرها حتا وصل لنص وعاد خلاها تربحو..وقفات بالزربة كتنقز وتغوت وتصغق بيديها وتشطح وتغني بحال الا دارت شي انجاز وكتفقصو بحواجبها وعينيها 
رؤيا:واااااهووووو ربااااحت هههه غلبتك غلبتك هههه والله حتا غلبتك..يله موووووت ههه واااااو يا حلييييلييي رباااحت..شقلبتوووو ههه شفتي كي عملتلك ههه 
فراس:هههه شفت شااافت الله يا ودييي ههه انا لي شفت ههه
رؤيا:باش تعلم هههه ياااي..ها لواه زيد اواه..عملاتا عملاتا والله حتا عملاتااا..ورؤيااااا عملاااتاا.. وربحااااتو ربحاااتو ههههه
فراس:ههههه الله يستر ياااا ربي ههه..جلسي بركة من التحنقيز
رؤيا:(كتقليه بعينيها ويديها)بقات فيييك ياااك هههه حو فييك..شفتي كون ما كنتيشي كتغوش كون راك ما ربحتي حتا مرة..مي نتينا غشاش..ههههه ولكن دابا ربحتك
فراس:كيضحك عليها
رؤيا:احححم اححم..يله طلق طلق
فراس:ههه شنو انطلق!
رؤيا:داكشي لي قلتي اتعطيني..ولا باغي دوخ عليا!ياك ربحتك؟
فراس:ااااه ههه اوك..حتا لبلاتي ونوض نعطيهالك اااااااااه(كيتكسل باغي يفقصها)دابا عيااااان!
رؤيا:فيك الموت لا!نوض نوض احنيني..قبايلة فاش كنتي كتشركلي دقمي ما كنتيشي عيان..نووض والله ما نتفاك معاك
فراس:ههههه..يله اجي نوضيني
رؤيا:(ضربات رجليها للارض)وااا فرااااس..انهننن حرام عليك!
فراس:ههههه صافي ها هو ناض ههه..غير بلا ما تبداي
رؤيا:ههه يله وريني..دغيا دغيا
فراس:ههه غير بشوية عليك
رؤيا:(كدفعو)واااا زييييد دغيا
زاد قدامها كيضحك وكيتمشى بشوية عليه وهي كدفع فيه حتا دخل للبيت ووقفات هي موراه متحمسة وكتشوف فيه مشى لأحد الخزانات وفتح واحد من لمجورة وجبد منو شي حاجة
رؤيا:شني هادي؟
فراس:هانتي اتعرفي!
شد داك الجهاز لي جبد فحال شي ميكرو وهو صغر شوية فيه دي بوطان والراس ديالو مضور ومربوط بسلك فالقاع ديالو وجبد تيلي ديالو برونشاه معاه وهي واقفة كطل وكتحاول تفهم وكتشوف فيه 
رؤيا:قولي شني هذا..واش ميكرو ولا شني هاد لعجب..فخبارك جاني فحال الايكو ههه
فراس:(بابتسامة جانبية وهو كيبروجراميه مع تيلي)هه ماشي فحالو..هو نيتو!
رؤيا:هااا!شني..كيفاش..واش هذا ايكو!حلف؟ واش كيخدم مع تيلي؟
فراس:هه وي
رؤيا:كتفلا..هههه دابا هذا ايكو
فراس:واا يييييه
رؤيا:ههه اواعدييييي..يااااااي دابا انشوف ولدي فوق ما بغيت هههه..اااه انشوفو دابا ياك؟ههه زعما يظهرلي واش بنت ولا ولد!مصااب يظهرلي..ههه اربيييي دغيا دغيا..خدم ولا مزال؟
فراس:ههه خدام..يله هاكي شوفي نتي..ها الجيل ديالو
مدلها عبوة فيها جيل وشداتهم من يديه فرحانة ونقزات عليه عنقاتو
رؤيا:شكرا شكرا ههه واااعر بزااف..فوقاش جبتيه!
فراس:ههه كان هنا..كنت داير حسابي زعما الا تعطلنا هنا ولا شي حاجة(غمزها)
رؤيا:هههه احسن ما عملتي..يله اجي اجي ههه
قربات لناموسية تجبدات حاطة زوج مخاذ مور راسها وهو جالس حداها كيتفرج فيها..عرات على كرشها ودهناتها وحطات عليها الجهاز كتدوزو ببطء وكتشوف فالتيلي فرحانة 
رؤيا:هههه والله حتا خدام..شوف حبيب ماماه كبر لخوينز ههه..او لا انشوفو واش خوينز ولا خوينزة...

بقات كدوز الايكو على كرشها من كل جهة وتقلب وفراس حاضي معاها فتيليفون حتا هو حتا وقفات يدها فبلاصة واحدة مبلقة عينيها وعلامات الفرحة غاديين وكيبانو على وجهها كثر وكثر وهو جالس كيشوف فيها باستغراب مطلع حاجبو كيتسناها تهضر ومتكي على لمخذة بيديه وفجأة غوتات 
رؤيا:هههههه واااااااو..هه ولد افراس والله حتا ولد هههه..ايجينا ولد ههه هانتينا شوفو شوفو والله حتا ولد
فراس:هههه حلفي..واش متأكدة(شد منها تيلي كيشوف فيه)فين شفتيه!
رؤيا:هههه هانتينا شوف هنا..ههه شفتي ظهرلك ههه والله حتا ولد..حبييب ماااماااه لخوينز ههه
فراس:(كيحقق الشوفة)فين ما..(سكت)ههه ولاهيلا ولد هههه
رؤيا:(كتشوف فتيلي وتهضر)ههه لغزيول ديالي..ايكون كيشبهلك ياك ههه.. بغيتو يكون راجل فحااال باباه ههه وينو على وليدي
فراس:(عنقها بالجنب من كتفها وباسها فراسها بالجهد ورجع كيشوف فتيلي)هههه ولدي ايكون راجل وسيد الرجال..ههه راه ولد فراس واجرك على الله(غمزها)
رؤيا:هههه دابا خاصنا نفكرولو فشي اسم لي يليق بولد فراس سلطان ههه
فراس:هه حتا يخلاق ويحن الله..الاسماء عطا الله مهم تولدي ويدوز كلشي وبيخير والتباقي حالو ساهل
رؤيا:(تنهدات)ان شاء الله يا ربي
فراس:ابتسامة وكيلعب بشعرها لي طايح على كتفها لي معنقها منو 
رؤيا:اااه حقا عاد تفكرت..شني عملو فلكلينيك!شحال ما بقيت مشيت شفت!
فراس:ها هما غاديين..مزال ما يكملوه دابا باقيلهوم الخدمة..دابا نgولهوم يسيفطولي التصاور باش تشوفيه اوك؟
رؤيا:ههه اوك..
فراس:يله دابا نوضي باش نتغذاو..اولا ما فيكش الجوع؟
رؤيا:لا فيا الموووت 
فراس:هه ايوا نمشي نوجد لحبيبتي ما تاكل
رؤيا:ههه وييييه عتئ عتئ خلاتها يما ههه
فراس:ههه اوك نتي ارتاحي..هانا نوجدو ونجيبولك..راك عييتي بزاف هاد النهار(غميزة)
رؤيا:الله يمسخك ههه..مكلي داك كلينيكس نمسح كرشي ونوض معاك نعاونك
فراس:(نايض)لا غير خليك ماشي شي حاجة..هاكي(مدلها علبة كلينيكس)دغيا نوجدو ما نتعطلش
رؤيا:الاااااا تسنا ديني معاك واخة ما نعاونكشي غير نشقمك هههه
فراس:ههه يله نوضي..هاد لغذا ما ايطيبش هاد النهار
رؤيا:هههه
شدات كلينيكس كتمسح فكرشها وناضت هبطات حوايجها وقداتهم وكتشوف فيه بابتسامة وخرجات هي وياه كيهضرو
رؤيا:اجي عملتي الدواء لرجليك هاد النهار ولا نسيتيه!
فراس:(كيحك راسو)ههه علاش لي عندو بحالك مزال يتفكر شي حاجة
رؤيا:زيد زيد تحرك قدامي..يانا خاصني نبقى ديما مقابلاك
فراس:ههه شوفو شكون كيهضر
رؤيا:(كتعوج فمها)اممم زيد عمل الدواء نرجليك هو اللول..يله
فراس:هههه
دفعاتو من كتفو رجعاتو للبيت خلاتو جالس ومشات جابت الدواء والفاصمة ورجعات جلسات حداه كتدهنلو فرجليه وتقادلو الفاصمة وهو كيحني راسو كل شوية يبوسها من عنقها ووذنها كيهرها وكيخربقلها شعرها ما خلاهاش تقادلو على خاطرها..
هاكا دازو أيامهم..11 ليوم بالضبط عايشينهم غير بوحدهم وحتا واحد ما قادر يجي يتطفل عليهم حيت المنطقة لي فيها هما منطقة خاصة تابعة لفراس كل نهار كيخرجو يتساراو فالنواحي ورؤيا كتزيد تكتشف الغابة لي هما فيها والمناظر الجميلة لي فيها..كل صباح كيتريضو ويترينيو بزوج او يخرجو يتمشاو فالغابة وكتحاول تحرك بكثرة باش ما تخليش الحمل يغلبها..الضحك الحب السعادة وحتا النفخة ولمدابزة ما كانوش ايامهم كيخلاو من هادشي..مرة مرة كيعيطو على العائلة يطمنو عليهم كاملين..وفكل ليلة قبل ما ينعسو كيجلسو يتفرجو فولدهم فالايكو ويفرحو بيه
جا اليوم لي فاقت هي وياه بعد ليلة مليئة بالرومانسية..من بعد ما دوشو وصلاو وفطرو شدلها فيديها وخرج هو وياها ركبو فالهيليكوبتر لي جاو فيها..سلكو نفس الطريق لي جاو منها غير هي هاد المرة بلعكس حتا نزل بيها فنفس الساحة وهبطها ورجعو طلعو فالطائرة لي كانت كتسناهم..طلعات هاد المرة معنقاه وجلسو بجنب بعضهم وهي ما كتسكتش من الهضرة والاسئلة..كل مرة تسولو فين غاديين وهو ما بغاش يجاوبها مخليهالها مفاجئة قلعات بيهم الطائرة فالسماء وشيئا فشيئا صوتها بدا يتقطع حتا رمات راسها على كتفو ونعسات..هاد الفترة رجعات كتنعس بزاف الا غفل عليها غير 5 الدقائق كيلقاها غيبات..قادلها راسها على فخاضو وسرحلها رجليها مع الفوطوي الطويل وخلاها ناعسة فبلاصتها وهو كيلعب فشعرها بيد وهاز كتاب بيد خرى كيقراه والمضيفة جالسة فبلاصتها كطل عليهم من مور الخامية وتنهد بحسرة وساهية فيهم وفالانسجام لي بيناتهم
فاقت من نعاسها كتحك فعينيها وتشوف فيه وهو فوق راسها بعد لكتاب من قدامو وطل عليها فاش حس بيها كتحرك..تبسم فوجهها وهبط قبل جبينها
رؤيا:(بلسان ثقيل)مزال ما وصلنا!؟
فراس:مزال شوية..ما بقاش بزاف ونوصلو
رؤيا:(حركات راسها ودورات وجهها خشاتو فكرشو ومعنقاه بيديها مدوراهم عليه)امممم
فراس:ههه اترجعي تنعسي عاود!نوضي بركة عليك..رؤيا.. فٌقْمَتِي ههه
رؤيا:(هزات راسها فيه مخنزرة)ياك قلتلك ما تبقاشي تقولالي..اوووووف!

فراس:الا بغيتيني ما نبقاش نgولها ما تبقايش عاطياها غير لنعاس ههه
رؤيا:ساكتة وخاشية راسها فيه
فراس:ههه واش ما جاكش الجوع
رؤيا:(حركات راسها بالايجاب)اممم
فراس:ايوا يله نوضي
بقى معاها كيهضر ويسايس حتا هزات راسها كتشوف فجنابها وشعرها مخربق حط يدو عليه كيقادولها ويضحك..ناضت هي دايخة توجهات للحمام غسلات وجهها وفمها وخرجات لقاتو هضر مع المضيفة باش تجيبلها ما تاكل..

بعد رحلة طويلة نوعا ما حطات الطائرة مرة اخرى في مكان آخر من بقاع الارض وهبط شادلها فيديها وخاشيها فيه من البرد وهي كتدور فعينيها..طلع هو وياها فسيارتو بوحدهوم وانطلق هو وياها..ماشي بزاف ونزل منها وقبطلها فيدها هبطها وهي كتشوف باعجاب فالبحر لي على جنبها وفالمنازل البيضاء والزرقاء لي موجودة على الجنب الاخر وطالعين فداك الجبل حتا للقمة ديالو..جرها مدور يدو على كتفها وطلع هو وياها فالدروج ديال الازقة الفاصلة بين منازل الجزيرة لي هما فيها..طرق ملونة ومرصوصة بالحجارة..نسمات البحر لكبير لي داير بيهم كضرب فيها وكل ما طلعات كل ما كتقدر تشوفو كثر وكثر وهي حالة فمها..كتشوف ناس قلال شي طالع شي هابط والجبل لعالي مزال كيبان قدامها
رؤيا:(بانبهار)وااااااو..فراس فاين حنا!
فراس:(بنص عين)هه دابا تعرفي!
رؤيا:وبركة من لبسالة وقول..فاين حنا؟..هاد موطع وااااعر بزاااف..جزيرة هادي ياك؟كنشوف لبحر داير بينا من كل جيهة!
فراس:هه لا لا ذكية ما شاء الله
رؤيا:😒
فراس:ههه اوك بب..نتي دابا فجزيرة سانتوريني..هادي من أجمل الجزر لي زرتها فحياتي كتعجبني بزااااف وخصوصي فهاد الوقت من لعام كتكون خاوية شوية ما فيهاش الناس بزاف ماشي بحال الصيف..هي جزيرة يونانية وحنا دابا فالجنوب الشرقي لليونان..عرفتي دابا فين حنا(جرها من شعرها وهي حالة فمها فجناب الطريق)هههه
رؤيا:اااااي قصحتيني(دورات وجهها)كتحمق بزاااف..سبقلي سمعت بيها ولكن عمري تخايلتها بهاد الجمال واااااو..وديورها كلهم مصبوغين بلبيض وزرق وعامرة بالغرس ولحبوقة والورد..فكراتني غير بالشاون هههه
فراس:(شدها من نيفها بصبع السبابة والوسطى وجرها عندو)هههه وي كتشبهلها
رؤيا:ههه رخي شكاتعمل..متأ شحال انبقاو طالعين فهاد الدروج..واااه الناس كي كيعملو يتحركو فيها وهي كلها دروج ما تصلاح فيها لا طوموبيل لا موطور لا والو
فراس:ههه كيتحركو بلحمار
رؤيا:(بنص عين)بركة من الضحك..كنهضر معاك بصح!
فراس:(بجدية)وحتا انا كنهضر معاكي بصح
رؤيا:لا واش من نيتك..بلحمار! 
فراس:والله..بيه باش كيتنقلو هنا..خصوصي الناس لي ساكنين فراس الجبل كتجيهوم صعيبة يهبطو حتا لتحت على رجليهم
رؤيا:هههه اواعدي بلحمار!!ههه الدرايم والله..اتركبني عليه ياك ضروري نجربو..واخة سبقلي ركبت عليه فجبل بلحق ماشي فحال فحال..هذا ايكون حمار يوناني هههه
فراس:ههه إن شاء الله..ما طلبتي غير لموجود هه
رؤيا:دابا حنايا فاين طالعين!
فراس:(كينعتلها بيديه لراس الجبل)انطلعو لهيييه.. تما كاينة الدار لي انبقاو فيها..وما كاين تما حتا واحد من غيرنا..شريت الديور لي تما كاملين وشركتهم فدار وحدة وما بقى حتا حد كيوصل لديك الجيهة
رؤيا:(بصدمة)واش كضحك عليا!
فراس:لا علاش انضحك عليك
رؤيا:واش دابا حنا انطلعو هادشي كامل..شدانا حتا لتما
فراس:ههه تمشاي وسكتي..لمشي مزيان ليك..وراه ماشي بزاف ها حنا طالعين وكنتمنظرو حتا نوصلو
رؤيا:لمشي مزيان بلحق ماشي فلعقبة..باغي تقتلني..منين كيطيحو عليك هاد لمواطع..فيما كان شي خلا وجلا كتجيبنا ليلو
فراس:(ضربها لراسها بخفة)ياك لمك هذا خلا..شكاتعرفي نتي فهادشي..نتي بركة عليك غير الجبل ديالكم 
رؤيا:هههه فكرتيني فشامة هادي 3 ايام ما هضرت معاها
فراس:(بنص عين)ومعامن كتقيلي تشاطي فالواتساب بالسلامة..ماشي شامة هاديك!
رؤيا:ولاااا ماشي فحال فحال..الواتساب شكل والمكالمة شكل ياخور
فراس:تحركي بركة من تمرضين..شي نهار نهرسلك داك المشقوف ونهنيك منو
رؤيا:ههه صافي بقالك غير هو تغير منو
فراس:ما كنضحكش..النهار لخر انديرها
رؤيا:(هزات كتافها)هرسو تشري ياخور ويانا مالي..(وقفاتو)واااااااو فراس شوفو على منظر!شو لبحر كي كيظهر من هنا 
فراس:ههه وي زوين
رؤيا:(كتنقز)صورني هنا ههه
بعدات من بين يديه ووقفات حدا السور الابيض لي طالع على طول الدروج وحطات يديها ولبحر موراه وهو جبد تيلو كيصور فيها وهي كتبوزا وتعوج وجراتو من يدو على غفلة باش تصور هي وياه..حتا عملات حركة البوسة بفمها وهو يطير على فمها باسها على غفلة وخدالهم صورة هاكاك
رؤيا:اواعدي شكاتعمل راحنا فالزنقة
فراس:هههه ياك ما سحابك راكي فالمغرب..هنا ديري لي بغيتي ما كاينش لي يتسوقلك 
رؤيا:واخة هايداك حشومة
فراس:وا زيدك هادي الا حشومة
كالاها مع السور لي موراها ولصق عليها وشدلها وجهها بزز بين يديه وهي مخرجة عينيها وكتعافر وهو كيبوس فيها بقوة وبعض المارة دايزين وشافو فيهم بابتسامة وكملو طريقهم حتا مشاو عاد بعد عليها...

بعد عليها كيضحك وشفايفهم بزوج حوومر وهز يدو خربقلها شعرها لي طالقاه وهي رجعات كاملة حمراء وغير كدور فعينيها وتقيس ففمها لي حسات بيه سخوون 
رؤيا:ما بقيتيشي كتحشم فمرة
فراس:(جرها عندو معنقها بالجنب وتحرك)هههه لي حشم فلي يضرو الشيطان غرو ابب(غمزها)
رؤيا:(حابسة الضحكة)الله يستر..فضحتينا مع عباد الله..فضيحتنا شافوها حتا اليونانيين
فراس:(بنرفزة)فضيحتنا!مالنا شنو درنا راه غير بستك فالشارع ماشي نعست معاك..مالهم هما ما كيبوسوش..انا بعدا حتا الا بستك راكي مراتي اما هما كيتلاقاو فالستة مع السبعة كتلقاهم خدامين ولغذ ليه ما يعرفها ما تعرفو
رؤيا:ههه اه اه مالنا على هادشي كامل..راه غير هضرت معاك
فراس:بحال هاد الهضرة غير خليها عندك..ماشي صاحبك انا باش نبقى نضرب لحساب للبشر!ونقيسك بتخبية..انا راه يكون با واقف حداك ما نتسوقلوش وندير ما فبالي راه غير كنوقر وكان..اما باش نتسوق لبنادم كحل الراس هادي ما عنديش..انا هاكا مولف وهاكا عشت وهاكا تربيت..ما حدي ما كندير حتا حاجة عيب ولا حرام ماشي سوقي فالعالم كااامل يمشى يعاودها لمخو..وهاد لمرة نقيسك تبقاي تبعككي عليا عاود ما نعقلش عليك
رؤيا:اوااااه شعندك عملتي فيها ليدين والرجلين..راه غير ضحكت..وزايدون نتينا الا كنتي مولف تبوس لبنات فالزنقة وقدام الناس وعندك عادي فيانا كتجيني عيب وحشومة وما موالفاشي بيها سمعتي!
فراس:(مطلع حاجبو)نبوس لبنات!واش سحابك انا كنت غا ماد شلاقمي لي جات نبوسها ولا كيفاش!
رؤيا:ايوا ما نعرفلك..شوف نتينا لي جالس كتهضر وتقولي يانا موالف وما نعرف شني..يعلم الله شحال من وحدة دوزتي؟
فراس:(بعصبية)الا gلتلك شحال يضرك خاطرك..خليك ما عارفاش حسن
رؤيا:ييييييه افراااس!شحال من وحدة!شابع بنااات ياااك..وجالس كتقول فيها بوجهك حمر ما حشمتي ما رمشتي
فراس:شابع زمر انا..واش كتفلاي عليا ولا ماالك..واش سحابك انا كنت شايط على راسي ولا شنو..الا gلت ليك ولفت راه ولفت ما نتسوق لحتا واحد ماشي ولفت نشلقم لبنات فالشارع وكل مرة ندوز الوقت بوحدة..دوزت اه ما نكرش مي ما كنتش بلعقل ديال دابا..فاش كبرت وزدت عرفت لحلال من لحرام شديت الارض..ونتي بقاي تgوليلي شوهتك وفضحتك نخشيك فحيط..عرفي شكاتخرجي على فمك!
رؤيا:(بحزن ومهبطة راسها للارض)وهادوك لي دوزتي شحال كانو؟
شاف فيها بنص عين مطلع حاجبو وهي هزات راسها شافت فيه بأسى فحال الا شادة لبكية..بقاو هاكاك مطولا وهو كيطلع فيها ويهبط حتا خرجاتلها شهقة وبدات كتغبن باغة تبكي وهو يجرها عندو عنقها وكيطبطب عليها
فراس:اربي على مشكيلة معاك..على سبة تبكي..صافي سكتي
رؤيا:اهئ شحال من وحدة قولي..بزاف ياك؟
فراس:وا نتي شمن غرض عندك بشحال..داكشي فااات صافي نساي
رؤيا:علاش نتينا كتنسى باش ننسى يانا اهئ اهئ قولي شحال..ولا ما بقيتيشي عاقل ياااك كانو بزاف اهنئ
فراس:ههه اودي معامن انا..كنتعصب عليك ونرجع نرغبك ما فهمتش كي كديريلها
رؤيا:(كتمسح دموعها)ما تبدلشي الموضوع شحال
فراس:واش انا حاسبهوم ما نعرف..مهم ماشي بزااااااف وماشي شوية ههه دوزت المراهقة والسلام..وا دابا صافي سدي علينا هاد الموضوع ما تندميناش..داكشي لي داز نسايه المهم هو نتي لي كاينة دابا وما كاينة حتا وحدة من غيرك وعمرها تجي..الا اذا بقيتي تمرضني عليا بحال دابا وتgوليلي فضحتك..ديك الساع نقدر نفكر نجيب شي واحدة تقبل على لفضيحة 
رؤيا:(ضرباتو لكتفو بالقبضة ديالها)نقتلك نتينا وياها ونشرب من دمك ونعملكم فضيحة معتبرة ديك الساعة
فراس:هههههه اجي يا لبلوة لي عطاني الله زيدي قدامي
دور يدو على عنقها وهبطلها راسها خشاهلها فكرشو كيعنكشها وغادي بيها وهي كتحاول تهز راسها وهو كيضحك
رؤيا:وراني غادي نطيح رخيييي
فراس:هههه لا باش تعلمي لمك..انا كنشوهك ها هضري!
رؤيا:ههه رخي ابنادم اتجيبني على دقمي..ما كتشوهنيشي غير رخي ههه
فراس:(كيزيد يهبطلها راسها)هههه تعاودي تgوليها!
رؤيا:ولاااااا غير طلق تخنقت ههه
فراس:ههه يله حتا تلوسيني عاد نطلق منك
رؤيا:ههه كتحلم
فراس:(زاد زيرها)شنو gلتي؟
رؤيا:اووووف ولااا افراس انطيح
فراس:ههه والله وما بستيني حتا تبقاي هاكة حتا نوصلو يله ختاري ههه
رؤيا:واش تسطيتي
فراس:اه يله بوسي
رؤيا:اووووووف..واخة واخة يله غير رخي
فراس:راه gلتلك ما تبقاايش تسوطي..هانا انفرعك..يله بوسي
خنزرات فيه وشدها بيديه من عنقها هزلها راسها وهي كترد النفس وتشوف فيه 
فراس:يله سربينا مزالة تابعانا الطريق ههه
رؤيا:ههه وارخي من عنقي بعدا قصحتيني
فراس:(بتشكيك)اممم عنقك..اوك ها هو هاد عنقك
طلق من عنقها وما عطلاتوش بالزربة شداتها بجرية وحدة طالعة فالدروج كتجري وتضحك وتلهت
رؤيا:ههههه بوس راسك دابا ههه
تبعها حتا هو كيجري حتا شدها من الكول جرها عندو هازها بحال شي علاقة وهي كتشعبق تحيدلو يديه وكتفركل
رؤيا:اواعدي رخييي
فراس:بوسي لمك نشوف يله
رؤيا:هههه وصافي انبوس انبوس غير رخي مني الناس ايضحكو علينا
فراس:مزالة كتgللي الناس..بوسي ولا بربي ما تنزلي هاكة اتبقاي معلقة باش نوريك الناس

فراس:هاكا تبقاي معلقة..حتا يتفرجو فيك الناس دبصح
رؤيا:وا والله حتا نبوسك غير رخي..وا طلق افراس صافي راني حلفت
فراس:لا بوسي ونطلقك
شافت فيه بنرفزة..وشداتو على غفلة من حناكو جراتلو وجهو عندها باستو بقوة وطلقات منو
رؤيا:يله ها نتينا..وا رخي
فراس:ههه مسخوطة عندك شي بوسات..عاوديها!
رؤيا:وا هااااا حنا دابا..بلا ما تبقى دوخ عليا وهبطني
فراس:ها نتي هبطي بلاش منك..طررررر يا وليدي بيمن مزوج انا
رؤيا:(كتقاد حوايجها)هههه مزوج بالزين دالعالم..راه رؤيا واجرك على الله هادي
فراس:وا تحركي قدامي ا اجرك على الله..ايطيح علينا الضلام وحنا غير فالطريق
رؤيا:هادي قولها لراسك ماشي ليلي
زادو هو وياها طالعين كل شوية يشد فيها ولا تشد فيه وكيقشبو حتا وقفاتلو فنص الطريق جلسات على جنب السور كترد النفس بقوة لعيا وما بقاتش قادرة تزيد 
رؤيا:اوووف تسخسخت اربي..ما نقدرشي نكمل حتا نفوقي باغي تقتلني نتينا ما فيهاشي
فراس:هههه اودييي ما منكش وصافي..وقفي وقفي
رؤيا:فاين انوقف..تسنا نرد النفس
فراس:وا غير وقفي..طلعي وقفي فوق السور
رؤيا:علاش ياك ما باغي تسيبني نتاحيت
فراس:وي باغي نتهنا منك..طلعتيلي فراسي بنgيرك ههه
رؤيا:دابا يانا نgارة؟
فراس:وا هانتي دابا عاود..طلعي وسكتينا مال راسك قاصح
رؤيا:اوووف وا علاش!
فراس:اوووف بلاش كاع من شي وقوف..يله اجي..
هبط شوية حدا رجليها هزها منهم عاطيها بالظهر وشدها من رجليها حطهوم فوق كتافو وشدها من يديها ووقف بيها غادي هازها على كتافو وهي حشمانة وغير كدور فعينيها
رؤيا:فراس نزلني..حشومة
فراس:واااا بربي وتعاودي تgوليلي حشوووومة حتا نرميك من شي قنت وااا عااااوديييها نشوف
رؤيا:هههه صافي صافي..ونااااري شحال رجعتي كتعصب
فراس:نتي لي رجعتي كتعصبي بنادم بزاف
رؤيا:(كطل عليها)بلحق واخة هايداك كيجي معاك هههه
فراس:مرضيني وgوليلي كيجي معاك
رؤيا:( طلقات منو وشداتو من حناكو كتجرلو فيهم)ههه وينو وينو على لعمير ديالي كنمرضو..يانا خايبة يانا هههه
فراس:ههههه وبزااااف
رؤيا:ههه مقبووولة منك احبيبي(هزات راسها كتشوف فجنابها وحاطة يديها على حناكو كتلعب فلحيتو)هههه والله حتا المنظر واعر من هنا..ارى داك تيلي نعملو شي فيديو ههه
فراس:هههه عاود 
رؤيا:ويييي ضروري هههه يله ارى يانا ما عندي كي نعمل نجبد ديالي
فراس:هاكي 
عطاها تيلي ليدها وهزاتو كتصور بيه وشادة فيه بيد وحدة ومرة تشدو بوحدو مرة تشدهم بزوج مرة تصور المنظر والطريق لي غاديين فيها وكتهضر وتضحك بوحدها وفيما يدوز شي واحد من حداهم تقلب وجهها حشمانة وما كتشوفش فيه..اما الناس فعندهم عادي وبلعكس لي شافهم كيتبسم ويدوز..
حتا وصلو للمنطقة لي نعتلها وعاد هبطها وهي كتكتشف جمالية المكان بعينيها والمنظر لي زاد وضاح كثر من لفوق والبحر الابيض المتوسط كيبان كاملو قدامها داير بيها من كل جيهة تسحرات كثر وكثر وشدلها فيديها جارها موراه دخلها لدار لي جات واااااسعة وكلها بالابيض والازرق كذلك وتصميمها تصميم عصري مع لمسات تقليدية يونانية..دخلها ودخل هو مباشرة لغرفة النوم وهي تابعاه فيما مشى..كانت غرفة نوم ساحرة كطل على لبحر من الاعلى..فراش دائري الشكل وغطاء ابيض بالكامل..مراية مدورة فوق راسهم وجلسة بالفوطوي قبالتهوم..مزهريات وديكورات ولوحات زادت عطات للغرفة بجمالية كثر وضافت عليها لمسة خاصة مع اضاءة خفيفة فالسقف لي على شكل اقواس مرتابطة متعددة..لي جاو من الخارج مصبوغين بالازرق و بحال شي قبة...

مشات ايام وجات ايام وهما من بلاصة لبلاصة..من دولة لدولة..يجلسو سيمانة هنا وسيمانة لهيه.. ما خلاو حتا قارة ما زاروهاش..وفراس دييما كيديها لأماكن عمرها شافتها او سمعات بيها أماكن بعيدة فيها غير هي وياه..خذاو ذكريات من كل قنت فالعالم ذكريات ايبقاو يتفكروها ديييما وعمرهوم ينساوها..لحظات حب وعشق وخصام عاشوها فكل بلاد وصور خذاوها اتبقى معاهم فالذكرى..كرشها كبرات وبانت قدامها مكورة وبارزة للقدام وولدها كبر فكرشها والشهورة دازو مور بعضهم بلا ما يحسو.. شهيتها تفتحات على لخر وفيما مشات كتكون هازة شي حاجة كتاكلها او تنقب فيها..جسمها عمار شوية ولكن واخة هاكاك مقاد ومقابلة راسها بالرياضة ولمشي والحركة بزااااف ما كتخليهاش تحس بثقل لحمالة ولعيا ديالو..بلعكس كتمشى لمسافات وتحرك عادي بلااا ما تعيا حيت ولفات..العائلة كل يوماين ثلاث ايام يعيطولهوم يهضرو معاهم وشحال من مرة هضرو معاهم بالفيديو صوت صورة..مشى لخريف وخذا معاه الربيع ودخلو فالصيف..فراس مقابلها غير هي وهازها على كفوف الراحة وفرحاااان بيها وبولدو لي قرب يجي ومتحمس كثر منها هي..كيحس بيه كيتحرك فكرشها وكيركل برجيلاتو وكل صباح كتحل عينيها كتلقاه كيلعب فكرشها ويبوس ويهضر بوحدو ويضحك
قرب عرس شامة لي ما بقالو غير 15 ليوم وهي كانت ديما على تواصل معاها وكتعطيها رأيها فالشادة والفادة..واليديها ما حرموهاش من شي حاجة وما بخلوش على آخر العنقود ديال عائلتهم وما خلاو ما جابولها..كل مرة تعيط على رؤيا وتبقى ترغب وتزاوك فيها وتسولها فوقاش اتجي ورؤيا كتكتفي بكلمة قريب ان شاء الله..قررو يرجعو بحالهم للمغرب باش يحضرو لعرسها وهي هاديك تجلس تعطي الراحة لراسها حيث شهرها قرب وفراس ما بغاهاش تولد فشي بلاد من غير المغرب.. وزيد عليها العيد الصغير لي بقالو غير سيمانة من بعد ما دوزو رمضان كاامل بوحدهم وهما مسافرين كان خاصهم يرجعو يعيدو مع العائلة

رجعو من بعد غياب لبلادهم..لقاو العائلة كتسناهم كااااملة مجموعة فالفيلا دفراس..فرحو بيهم وبكاو وهما كيعنقو ويبوسو ويدرعو ورؤيا شداتها ببكية وحدة تبكي مع هذا شوية ومع لوخرى شوية..اصلا ولف عليها فراس هاد الفترة وولا عارفها خاصها غير السبة باش تهبط دموعها..من بعد فرحة اللقاء جلسو مجموعين على الطبلة دلعشاء لي عمراتها هنية ورقية وزينب بما لذ وطاب من المأكولات..شهيوات مغربية على الاشكال والانواع..كلااات وبردااات وبقات هي اللخرة على الطبلة وهما معجبين فيها وفالكمية دالماكلة لي رجعات كتاكل وكيقشبو عليها..اما فراس رجع عندو ذاك المنظر عاادي وياااما ناض فنص الليل كيقلب عليها كيلقاها جالسة حدى الثلاجة فاتحة بابها ومربعة قدامها كتهز وتحط فالارض وتاكل وكرشها خارجة قدامها كبيرة
العلاقة دزينب مع العائلة كاااملة غادة وكتحسن كثر وحتا ما بينها وبين حسن وجلال ما بقاتش ديك الحساسية الزايدة ورجعو كأي أقارب كيفرحو لفرح الاخر ويحزنو لحزنو..ابراهيم هاد المرة ما قدرش يصبر وفاش شاف رؤيا فرشوه دموعو وحبسهم فعينيه واخة كلشي عاق بيه فرح بحفيدتو لي رجعات وما بغاش يبين..العائلة كلها تجمعات وتلمات ودوزو سيمانة مع بعضهم فالضحك والفرحة والصيام ورؤيا كتكابر بزز باش تصوم وتكمل نهارها..غير كتأذن المغرب كتلقاها سبقات كلشي للطبلة..كملات السيمانة وتسالا الشهر الفضيل وصبح نهار العيد.. من بعد الصلاة رجعو الرجال باللباس البلدي وفراس بجابادور مغربي فالازرق ملكي..لقاو النساء كيتسانوهم على الطبلة دلفطور بالقمصان خفاف بلديين..باركو لبعضهم وسلمو ورؤيا وفراس باسو يدين لكبار وتجمعو كاملين على الطبلة
وفهاد السيمانة مشاو بزوج بيهم يطلو على لكلينيك يشوفوه فين وصل..لقاوه كمل بلبني وحتا الاصلاح ما بقاش فيه بزاف..فرحااااات ومقداتها فرحة وبكاااات وهي كتشوف كيفاش ربي حققلها شي حاجة عمرها كانت تحلم بيها..حلمها كان بسييييط فقط عيادة صغيرة محترمة ونقية وتكون ديالها ولكن ربي عطاها ما كثر عليها كيقولك لي طلبها يطلبها كبيييرة ربي كيبغي عبدو لي كثيير الدعاء والتمني..هو كيسكت ويطبطب ويمسح فالدموع ويدلع وهي غيير ما كتزيد تحل ويتزادولها وتبدى تفشش وتغبن وتمخشش فيه وتمسح وهو صابر معاها وكيسايس حتا كتعصبو وكيقلب معاها 9 6 هاد كتسكت وتقطع الزي
عرس شامة ما بقاتلو غير سيمانة وجمعات حوايجها لي اتحتاج هي وزينب ورقية وهنية وطلعو كاااملين لجبل وخلاو الرجال فلمدينة تجمعو مع بعضهم..وفراس خلاها تمشي بستة وستين كشيفة من بعد الطليب والرغيب ولمزاوكة عاد خلاها وفرقها بزز..استقبلوهوم الناس دالجبل بالفرحة والزغاريت والجبل كلو فرحان فحال الا كلهم عندهم العرس واجواء الاحتفال بدات من دابا والدار عمرااات ولبراهش غير غاديين جايين كيلعبو ويتجاراو والهضرة كثيرة فكل بلاصة..شامة غير شافتها ما بغااتش طلق منها تعنق وتبوس والضحكة مشركالها لفم.. وزادت زيانت وبياضت وطاح عليها السر

فرحات بيها فوق لقياس وما بغاتش تفرقها..سلمات على التباقي وحتا هما فرحات بيهم وجرات رؤيا دخلات هي وياها للبيت كيتعاودو ويجمعو شامة على ياسين وحبها ليه لي كيزيد نهار على نهار واهتمامو بيها ولهفتو عليها..ورؤيا على فراس والسفر لي دوزاتو ولحمل ديالها وحاطة قدامها طبسيل ديال الديسير كتقشر وتاكل وتهضر..دوزات نهارها غير مع شامة كيخرجو كياكلو ويرجعو للبيت مرة اخرى وكتشاطي مع فراس وشوية شوية يعيطلها يطمن عليها.. زينب شدات قنت واحد فواحد الصالة وحاطة رجل على رجل وكتشوف فالاجواء بنص عين وكتحاول تندمج معاهم ولكن كتلقى راسها بعيدة على نمط حياتهم..رقية مدورة بيها النساء وكتجمع وتعاودلهم على مدينة فاس وعلى أصولها واجدادها وحتا هما كيعرفوها بأصلهم وهنية شدات بلاصتها حداهم..
طاح الليل وكلها شد بلاصتو فوقت متأخر باش ينعس شي مفرش فالصالة شي برى الدار فلمراح شي فلبيوت ما كاين غير فرش وتلاح..رؤيا شداتها شامة تنعس فبيتها وأصرات عليها تنعس فوق الناموسية حيث حاملة وهي نعسات فالارض..كملو هضرة مع بعضهم حتا نعسات شامة ورؤيا بقات فايقة كتقلب ودور بجنابها ما قادراش تنعس بلا بيه وبلا ما تمخشش فيه فحال كل ليلة وتشم ريحتو..هزات تيلي ديالها وطلعاتلها صورتو فالشاشة وهو يطيح عليها الضيم وعاد حسات بلفراق حتا بقات بوحدها.. دخلات طلعات نمرتو باغة تعيطلو وهي مزالة عاد ادوز النمرة وهو يصونيلها التيلي وقفزات فبلاصتها كتفافا وجاوباتو فلبلاصة قبل ما تفيق شامة
رؤيا:(بفرح وصوت خااافت)الو حياتي
فراس:(تنهد بعمق)اااااااه..شحال توحشتك
رؤيا:(بغصة )وحتا يانا بزاااف
فراس:(بصوت مبحوح بالنعاس)ما قدرتش نعس ونتي ما كيناش حدايا..ما كرهتكش كون راكي دابا ناعسة قدامي غير نتفرج فيك حتا يديني النعاس
رؤيا:اهئ يانا من قبايلة ويانا نتقلب..انهنئ كلشي نعس ويانا مزالة
فراس:اووووف دابا ماشي حرام عليك هاد الحالة لي وصلتينا ليها..كون بقيتي حدايا حتا لنهار لعرس ونمشيو بزوج ونرجعو بزوج ولكن نتي راسك قاصح
رؤيا:وراه ماشي نخاطري اهئ اهئ شامة شحااال وهي طلبني وما جاتشي نخسرلها خاطرها انهننن
فراس:الصمت وكيتنهد
رؤيا:(باسى)فرااااس!
فراس:اممم..وي حياتي؟
رؤيا:اجي نتينا عااااافاك اهئ..ياك ما عندكشي الخدمة دابا!
فراس:ما نقدرش ارؤيا ونتي عااارفة علاش..اولا ما عندي ما ندير انا تما فوسط ناس ما كنعرفهمش وزيد عليها الصداع والهاراج ما عنديش معاه..واصلا واخة نبغي ما عنديش كيفاش..خرجاتلي لخدمة من الجنب..راه 4 شهور وانا غايب..خاصني ضروري نمشي نطل على كلشي ونشوف شنو واقع
رؤيل:اهنهئ ايوا وشني دابا..ما اتجيشي عندي نشوفك
فراس:اخخخ ارؤيا..انا ما كرهتش دابا نتهز ونتحط حداك..انتسطى ونشوفك ونعنقك ونخشيك فصدري.. غبتي عليا نهار داز عليا كحل..ما عرفتش كي انكمل هاد السيمانة
رؤيا:انهننئ اهئ
فراس:شششش ما تبكيش الله يخليك..لي فيا يكفيني اتزيدي تشطنيني عليك فهاد الليل..حبيبة رؤيا هضرت معاك..مسحي دميعاتك!واش نجي نجيبك؟
رؤيا:(كضحك وتبكي)من نيتك؟
فراس:والله..غير gولي اه ودابا نحضر عندك..نجيبك ونجي..شنو g لتي
رؤيا:اواعدي لا..ما نقدرشي
فراس:وتقدري غير تبعدي عليا وتخليني مقطع الراس بلا بيك
رؤيا:(كتمسح فعينيها)وا صافي دابا..نصبرو ما عندنا ما نعملو..سيمانة كيما كان دوز
فراس:سيمانة عندك..اما انا عندي عاااام
رؤيا:هههه
فراس:هه كضحكي..ايوا ضحكي نتي لي جات معاك..كيبقى ولدي؟
رؤيا:هه مزيااان ها هو كيفركل ويلعب شبع فيا عفيس..باينة حتا هو موحشك 
فراس:عبر عليك..خليه كينتاقم لباباه..هذاك المرضي ديالي ههه
رؤيا:كتشفى ياك ههه
فراس:كنتوفى انا ماشي كنتشفى..راه ربي لي عالم بيا..اجي شنو لابسة!
رؤيا:(حاطة يديها على فمها باش تحبس الضحك)ههههههه ما لابساشي هههه
فراس:ههه لمك بلا ما تكبي الزيت على لعافية
رؤيا:هههه ضحكتييييني..كيفاش شني لابسة؟ لابسة لحوايج هاء هههه
فراس:وا هضرت معاك دبصح..بغيت نتخايلك ناعسة حدايا هه
رؤيا:اممم تخايلني..اوك هانا انقولك
طلات على راسها وكتشوف فالبيجامة ديال النعاس لي لابسة سروال واااسع وتيشورط خفيييف تحت منو الطوب وكرشها مقبلة قدامها وجامعة شعرها عشوائي
رؤيا:(حابسة الضحكة)لابسة شورط فلحمر قصيير حد فخاضي ياك..ومعاه طوب بيض لاصق عليا وطالقة شعري وصافي هذا ما كان
فراس:فين صفى..راه تخوضلي معاك انا
رؤيا:علاش!ياك نتينا قلتيلي نقولك شني لابسة
فراس:اخخخخخخ وا يييه ويا ريتني ما سولت هه
رؤيا:هههههه
فراس:(بصوت هادئ)كنبغيك
رؤيا:(تنهدات)وحتا انا
سكت هو وسكتات هي وبقاو حاطين تيليفونات على وذنيهم كيسمعو فصوت انفاس بعض في صمت ومرة مرة كيتسمعو تنهيداتهم وصوت كحتو لي كتعجبها وكتخايلو وهو حاط قبضتو على فمو وكيكح وكترسم ابتسامة على فمها..بدى كيتفوه وهي كتفوه موراه وكيتقلبو فبلاصتهم ومرة مرة يهضر يلوحلها كليمة بصوت مهموس دايخ بالنعاس وهي كتبدى تضحك بغنج حتا داهم النعاس

دازت سيمانة عليهم ياسين وشامة كتبو كتابهم ورجعات مراتو شرعا وقانونا داك النهار فرحااات وما قداتها فرحة وخلاتو هو فلمدينة ورجعات مع باها وخوها لجبل واخة كان باغي يدوز معاها داك النهار ولكن ما خلاتوش يقولها لباها حيت حشمات..الفرح والتوجاد والدار عاامرة والعائلة كتجي من كل مكان وتجمعو كاملين عندهم..الهاراج والصداع كثر وشامة داياها غير فراسها كتقيل جالسة فبيتها كتجرب فالوصفات لوجهها وشعرها وذاتها..ورؤيا كتقيل دور فالدار وتمشى وطلع وتهبط وضحك مع هذا وتجمع مع لوخرين وتسخر معاهم وتوجد واخة كيعياو فيها تجلس ما كتقدرش..النهار كامل وهي كدور من هنا لهيه وتلف وفيما كتلقى شي فرصة كتجلس تاكل وفاش كيجي الليل عاد كيطيح عليها الضيم بكثرة وكتلقى راسها موحشاه فوق لقياس وكتبقى قصارة هي وياه فالتيليفون حتا كتديهم عينهم..
جا نهار الحنة وفاقو كلهم كلها وفين شادها وكلها ومنين كيجري..فالصباح تذبح عجل وبقرة بالغياطة والطقطوقة الجبلية والزغاريت والناس كيتفرجو ويغنيو والدراري فرحانين..وفاش جات لعشية لعيالات لبسو وتقادو ورؤيا تقبطات بيها هنية ورقية وحلفو عليها حتا تحني مع شامة ويفرحو بيها حتا هي حيت ما حناتش فسبع شهور ديالها وما احتفلوش بيها وما كانتش باش يديرو بالتقاليد والعادات المغربية..شدوها هي وشامة دخلوهم دوشولهم وغسلولهم وخرجوهوم لبسات هي قفطان خفيف بلا حزام فالباج منبت بلعقيق ويديه قصار مع شربيل ابيض..طلقات شعرها وقادات وجهها بشوية دالماكياج وخرجوها هي وشامة لي لابسة قفطان جوهرة فالابيض مخيط بالراندا فالباج وسبنية دالحياتي جامعة بيها شعرها وشبكة فالذهبي رامياها على راسها مغطية بيها النص فشعرها..خرجوهوم بالزغاريت والصلاة على النبي..جلسوهم فوسط الصالة لكبيييرة فوق جلسة فالاخضر ملكي ومنبتة بالصقلي..كل واحدة شداتها حناية وحدة على ليمن واخرى على ليسر والنساء كيشطحو ويغنيو وناااشطين والحلوى كتفرق عليهم..جالسين حدا بعضهم ملاقيين الريوس وكيهضرو ويضحكو وينكرو وكل واحد فين كتعوج فجهة بقوة لجلاس ولعيا وجنابهم كياكلوهوم..رؤيا كرهات راسها وهي جالسة وظهرها تقسم عليها ما خلاتش الحناية طلسلها تحت رجليها وما دارلتلهاش حنة عامرة بزاف..زينب خدامة كتصور وتفيلمي وفرحانة بعروستها وكتصرد لفراس..شامة طاح عليها الضيم وهي جالسة وكتشوف فعائلتها لي اتفرقهم غذا قدامها عيات شادة راسها حتا طلات عليها مها كتشوف فيها من لباب والدمعة واقفالها فعينيها وهي تهبط راسها كتشهق وتنخطط ورؤيا غير شافتها بدات تخنصص معاها..شامة سكتات وبدات تسكت فيها وهي ما بغاتش تسكت كتبكي وتشهق..سالاتلها الحناية وناضت بشوية عليها كتزطم غير بلعقل وهازة لقميص بطراف صباعها وخرجات من الصالة كتمشى وتسرح رجليها لي حرقوها..
طاح الليل ودخل كل واحد شد بلاصتو..رؤيا قشرات الحنة لي قنطاتها وخرجاتلها حمراء زوينة فيديها ورجليها..وشامة جمعوهالها ما خلاوهاش تزولها..كل واحد فين متكية فبلاصتها وكيهضرو بشوية وشامة شاداها الرعدة من غذا ورؤيا كطمنها حتا صونا التيلي ديال شامة وهزات لقات ياسين كيعيط..بدات كتبسم فرحانة وفنفس الوقت حشمانة وعطات لرؤيا تيلي فتحات الخط عليه حيت هي جامعة يديها 
شامة:(بخجل)الو..ياسين؟
ياسين:حياة ياسين..عمر ياسين..روح ياسين..مراة ياسين
شامة:ههه كيبقيتي لباس؟
ياسين:الحمد لله..بلحق غذا انكون حسااااان هه
شامة:ههه
ياسين:نتي مزيانة؟
شامة:(تنهدات بغصة)الحمد لله
ياسين:مالك؟
شامة:والو..علاش؟
ياسين:ديك الحمد لله ديالك ما عجباتنيش؟
شامة:(تغرغو عينيها)واالو غير جابلك بالك
ياسين:كتبكي!
شامة:اهئ انهنئ
ياسين:شامة!مالك؟
شامة:انتوحش عائلتي بزااف اياسين اهنهنئ..ما ساخياشي بيهم اهئ اهنهئ 
ياسين:(تنهد)شامة!سمعيني احبيبة..نتي دابا مراتي ومسؤوليتي..واندير جهدي كامل باش نعيشك مرتاحة..وكنواعدك عمري نخصرلك خاطرك..نتي دابا اتجي لدارك..دارنا انا وياك..وعائلتك فوق ما توحشتيهم او توحشوك نديك حتاا لهندهم ولا هما يجيو عندك مهم نتي تكوني على خاطرك..نتي دابا غير اتبدلي الدار لي عايشة فيها اما عائلتك عمرك تحرمي منهم
شامة:اهئ اهنئ عارفة..بلحق واخة هايداك ماشي فحال فحال انهنئ
ياسين:عارف احبيبة..مي ما عندنا ما نديرو هادي هي سنة الحياة..واش بغيتي تبقاي فدار فباك ههه ما بغيتيش تزوجي وتنعسي حدا راجلك يسخنك وتسخنيه هههه
شامة:اهئ هه كون تحشم(كتمسح نيفها)اهنهئ
ياسين:ههه مسحي خناينك الموسخة 
شامة:اهنهئ اهئ
ياسين:شنو دابا ما اتسكتيش!
شامة:ما قادراشي والله اهنهئ..حاسة براسي مخنوقة اهئ اهئ دابا عاد حسيت بحر لفراق.. وكنخمم لغذا انهئ اهئ غير وجد راسك انعمرلك الرضايم(قراعي)دالماء بالدموع هه اهنهئ
ياسين:علاش؟ واش اتبكي ولا اتبولي هههه
شامة:ان..(سكتات)اووووف مشي تنعس وخليني فهمي
ياسين:همك دابا هو همي..ولي ضراتك كضرني.. ولي بكاتك تبكيني وما انتهنى حتا نشوفك ضاحكة

بقى معاها كيسكت فيها ويضحك ويتبسل حتا نساها ومسحات دموعها وعطاتها لضحك معاه..ورؤيا كتجمع هي وفراس ويترومانساو وهو كيتغزل فيها وفالصور لي وصلوه وهي نافخة ريشها عليه وعاجبها راسها وكتفشش عليه حتا داهم النعاس
اصبح الصباح وناضت كتحك عينيها على صوت الدراري الصغار لي كيلعبو برا والهاراج والضحك..طلات على شامة ما لقاتهاش وهزات تيلي كتشوف الساعة لقاتها 12 ناضت جمعات لفراش ديالها ولبسات عليها وخرجات كتصبح عليهم دخلات لطواليط غسلات وجهها وتوضات وخرجات جالسة فالكوزينة كتفطر
وصلات لعشية والمغرب أذنات..القاعة متنقلة منصوبة فالارض الواااسعة لي قدامهم برويقان بويض وحومر والطبالي والزينة والجلسة دلعروسة كلشي بتصميم موضيرن..الناس بداو يجيو والقاعة بدات تعمر..اصوات الموسيقى والطبولة خدامين..السيارات مسطاسيونين فجهة بوحدهم..العائلة المقربة كلشي حاضر وواجد ومقاد حالتو وشاد بلاصتو فالقاعة حدا الجلسة دلعروسة..لي مخشية فالبيت كيقادوها وكيتسناو الناس يتجمعو باش يبداو العرس والتيليفون خدام بيناتهم وبين عائلة لعريس ورؤيا واقفة معاها فالبيت بلبسة فالابيض بساتان دوصوا جاية مزيرة من الفوق وواسعة من لتحت مخدومة بالعقيق والطرز فالذهبي ولمضمة رقيقة فارقالها كرشها لمكورة على صدرها لي عمر وزاد تنفخ وبسلهام فوق كتافها طويييل كيتجرجر ساترلها يديها لمعريين فالشيبي مغلوق شوية ومخدوم حتا هو بالذهبي وعندو فتحات فالجنب منين تخرج يديها صاندالة عالية شوية وجاية كاااملة بطالون واحد فحال الا لابسة لبلا باش ما تعذبش بيها..جامعة شعرها بمشيطة طايحة على عنقها شوية ومخدومة مزيااان والقصة لي طوالت ورجعات واصلة لذقنها فارقاها فالوسط..شعرها طواال والصباغة لي صبغاتو غادة وكتمشي وما بغاتش ترجع تصبغو حيت فراس ما خلاهاش وعاجبو شعرها الاسود الطبيعي كيما كان زيادة على ضررها على الجنين..حاطة ماكياج خفيف كلوز وايلاينير خادمة رموشها بالماسكارا وفاغاجو خوخي داكن ما بغاتش تكثر حيت عارفاه ما ايبغيش وغير ايشوفها ايمسحولها..جالسة قدام شامة فوق الكرسي وفاتحة رجليها باش تقدر تجلس وحاطة يديها على كرشها وصباعها باينين مصبوغين بالشيبي فونصي
بداو العرس ودخلات شامة بقميص سامبل والشبكة فوق راسها وعدات العداية وبكات هي وعائلتها وبردو على قلبهم ورؤيا كتضحك فرحانة ليها وبيها حيث اتجي تسكن حداها فطنجة..النساء فالقاعة بوحدهم والرجال جامعينهم فالدار لكبيرة ديال عمها لي جات لاصقة عليهم..سالات العداية وخرجوها من بين النساء داوها لبيتها يوجدوها للبسة الثانية ورؤيا غادة جاية ما جلساتش وزينب ورقية كينكرو عليها وهي بالطالون باش دوز تجلس وهي ما مسوقاش كتجي تعمر يديها بالمكسرات والفقاص المالح والحار لي حاطين فوق الطبلة وتمشي كتنقب وتشطح وترجع عند شامة للبيت
دخلات سيارة سوداء حادرة رياضية وشدات بلاصتها فوسط السيارات لوخرين..نزل حسن وجلال وابراهيم مفركسين ومقادين الحالة وتبعهم فراس هو اللخر هبط بسروال ديال الثوب دغوا فالرمادي مع سوميج سوداء لاصقة عليه طاويلها لكمام وصباط اسود كلاص مرجع شعرو لور ومقاد لحيتو ولعطر ديالو سابقو..تقدم ابراهيم وحسن وجلال غاديين معاه وفراس موراهم كيلعب بالسوارت فيدو ويشوف فجنابو..تلاقالهم الاب ديال شامة بالاحضان كيرحب بيهم وهما كيباركولو سلمو عليه كاملين ودخلهم للصالة فين ايجلسو وفراس خلاهم دخلو وقلب الدورة هو خرج ووقف بعيد على القاعة كيشووف كمان تبانلو رؤيا خارجة من شي قنت وجبد تيلي ديالو كيعيطلها كيصوني ويعاود وما كتجاوبوش ورجع عيط لزينب هضر معاها وسولها عليها قاتلو بلي ما كايناش حداها وطلبها تخرج عندو..خرجات هازة قفطانها دالموبرة فالاسود لاصق عليها وشعرها الاسود مسرحاه على كتافها هازة راسها كتقلب عليه بعينيها حتا هزلها يديه كيشيرلها ومشات عندو كتقرقب بالطالون..قرب عندها حتا هو بابتسامة وهبط راسو سلم عليها بلابيز
زينب:كيبقيتي اولدي مزيان
فراس:لاباس الواليدة الحمد لله ونتي؟
زينب:الحمد لله..فين هما لوخرين؟ماجاوش؟
فراس:لا راهم سبقوني للدار..فين رؤيا!
زينب:ما عرفت..ما كايناش لداخل..يمكن مع شامة فبيتها؟
فراس:اممم..واسيري الواليدة عيطيلها الله يطول فعمرك..ديك الصمكة من قبايلة وانا نصونيلها وما كتجاوبنيش يعلم الله فين لايحاه
زينب:اوك تسنى هنا انمشي نشوفها ونجي
فراس:(كيحك راسو)امم اوك
وقف حاط يديه فجيابو ومطلع حاجبو كيشوف فالمارة وهاز راسو وزينب دخلات كتقلب عليها ما لقاتهاش مع شامة وحتا هي ما عرفاتها فين مشات وحتا من التيلي ديالها خلاتو حداها..خرجات كتقلب عليها فوسط الدار والصالات ولبيوت والطواليط وهابطة طالعة فالدروج ما بين الطبقات وطلعات لسطح ما لقاتهاش..تشطنات عليها وهزات تيلي عيطات لرقية لي مزالة فالقاعة سولاتها عليها عنداك تكون تما وما شافتهاش..حتا هي جاوباتها بالنفي وهبطات بحالها كدور فعينيها وتشوف فجنابها....

هبطات عندو وهو وقف كيشوف فيها مخنزر وكيشوف موراها ويرجع يشوف فيها
فراس:فين هي؟
زينب:(بتوتر)ما لقيتهاش..ما خليت فين قلبت ما كايناش
فراس:كيفاش ما كايناش..فين اتمشي؟سولتي شامة!
زينب:ويي سولتها قالت خرجات من عندها قبايلة وما رجعاتش..حتا من تيلي لقيتو عندها فالبيت.. اوووووف فين اتكون مشات يا ربي!
فراس:واش كضحكي عليا الواليدة..سولتي يما؟ واش مأكدة قلبتي مزيان؟
زينب:وا يييه راه فليت الدار فليااان ووالو ما عرفتها فين غترات..ورقية ما شافتهاش من قبايلة دخلات جلسات حدانا شوية وناضت قالت غادة عند شامة 
فراس:(بعصبية)فين اتكون مشات هاد بنادمة..دخلي لداخل شوفيها عنداك تكون تما وبانتلكش!
زينب:ما كايناش تما..سولت رقية ما كايناش!
فراس:اوووووف..اوك واخة..دخلي نتي لداخل والا بانتلك عيطيلي..انا انمشي نشوفها فين كاينة؟
زينب:واخة اولدي ورد عليا لخبار..شطناتني هاد البنت معاها
حركلها راسو بالايجاب وهو عاقد حجبانو ومعصب وخلاها دخلات للقاعة وكتقلب بعينيها وقلب هو الدورة كيقلب عليها فالارجاء مور الدار ما لقاهاش ورجع دخل للدار كيشوفها عنداك تكون تما وزينب ما شافتهاش..وكل شوية يتساطح مع وحدة فشي قنت كره راسو وهو غادي جاي ورجع خرج لباب الزنقة كيسرح عينو حتا سمع صوت ضحكات شي بنت.. ما خفاش عليه داك الصوت وبقى غادي ومتبعو منين جاي حتا وقف فباب الكاراج لي جاي فالدورة ومهبطين على بابو الريدو وريحة الطياب خارجة منو..تأكد من صوتها وهي كتهضر وتضحك وهز الريدو بعصبية وشاف فيها وهي جالسة عاطياه بالظهر فوق واحد الكرسي وحاطة كرسي اخر حداها فوق منو طبسيل عامر بالدجاج والدغميرة ومقملة يديها كتاكل وتجمع مع الطيابات..هزات وحدة من الطيابات راسها فيه وهي حانية على الطنجرة كتقلب فالدجاج وبقات كتشوف فيه باستغراب 
الطيابة:(بانزعاج)ياك لباس اولدي..شنو باغي؟
ما جاوبهاش وبقى حاط عينو غير عليها وهي هازة الشدق غادة بيه لفمها وكتقلب الدورة باش تشوفها معامن كتهضر..غير شافتو وهي تحل فمها على وسعو فرحانة 
رؤيا:فراااس ههه جيتي
ناضت وقفات هزات المنديل لي كان على حجرها باش ما توسخش لبستها مسحات بيه يديها بالزربة وكتمضغ الدغمة وكتزرب وعينيها خارجين فيه وهو مخنزر فيها والطيابات عاطيينهم العين..هزات جلايلها وتمشات لعندو دافعة كرشها قدامها وهو طلق من الريدو وخرج..خلفات بالزربة حتا خرجات من الكاراج وطلقات من الريدو هبط وهو يجرها من يدها مخنزر
فراس:(بغضب)واش انا خاصني ديما نبقى تابعك..من الصباح وحنا نقلبو عليك ونتي مخشية هنا كتاكلي؟ومخلية تيليفونك..علاش دارو الناس داك التيليفون هاااا!مخلياني انحماق ما عرفتك فين غبرتي وحتا واحد ما عارفاك كاينة..ديك الساعة غير علمي شي واحد ماشي تخلينا كنقلبو عليك!
رؤيا:اويلي..مالك اهاد الراجل..يانا باش عرفتك اتجي تفتش عليا جاني الجوع جيت ناكل وتيلي نسيتو وصافي
فراس:ما تنسايهش الالة..تيليفونك فيما مشيتي تهزيه معاك سمعتي..واخة تمشي غير لطواليط هزيه معاك
رؤيا:هههه واخة هي لي ما تعاودشي..دابا ما اتدرعنيشي وتقولي توحشتك ههه
شاف فيها بعصبية كيزفر وهي كتبسم وضحك وتشوف فيه وتنيم فعينيها وطلع وتهبط فيه وفجمالو وريحتو طالعة معاها
رؤيا:غبرت عليك غيير سيمانة تبوكصتي ههه شني هادشي
فراس:الصمت
رؤيا:ههه هنيتك من صداعي هاد السيمانة عليها ياك ههه
قلب وجهو لجنب كيتبسم بشوية ورجع شاف فيها بابتسامة وجرها عندو عنقها وكرشها واقفة بيناتهم معنكشاهم
فراس:توحشتك المصيبة لي عطاني الله ههه 
رؤيا:ههه ماشي كثر مني..يانا توحشتك بالضوبل توحشتك حقي وحق ولدك ههه
فراس:(بعد وجهو عليها شادها من حناكها بكفوفو) كيبقيتي مزيانة!
رؤيا:وي دابا فاش شفتك رجعت مخيرة ههه
فراس:ناري شحال توحشتك..خليتيني فحال شي يتيم من موراك ههه
رؤيا:هههه
فراس:(شدها من يديها مبعدها عليه وكيدورها) امممم شنو هادشي امدام..زيانيتي ههه
رؤيا:هههه وقف اندوخ
فراس:انا لي اندوخ..شهاد الزين كامل..كيجي معاك البلدي الكارثة..ولحنة فاليدين ويا لااالة ههه
رؤيا:ههه عجباتك
فراس:لحنة!هه عادي..مي فيديك جات كتحمق واخة ما نكونش كنحملها ترجع كتعجبني بزز مني هههه
رؤيا:(كتجبد فحناكو)ههه منين كتجيب هاد لهضور منيييين
فراس:ههه رصاي..احححم زيدي نتحركو من هنا
رؤيا:فاين انمشيو
فراس:كيفاش فين؟نبقاو واقغين هنا؟
رؤيا:لا..مي فاين اتمشي دابا..الدنيا مرونة
فراس:انمشيو لطوموبيل ديالي نجلسو تما..باش ما يبرزطنا حد(غميزة)
رؤيا:ههه مشي قالالك..راه دابا وهي خرجات شامة وما انشوفاشي
فراس:فاش كنتي مخشية هنا كتاكلي ما بانتلكش شامة..زيدي قدامي..واش نتي هاد شامة سيمانة ونتي معاها ومزال ما شبعتي
رؤيا:ههه تسنى..والعرس؟
فراس:ها نتي اترجعي..العرس عاد بدا وانا ما انبقااش نساينو حتا يسالي عاد باش نشوفك..يكفي تسنيت سيمانة..ودابا زيدي وبركة من الهضرة بزاف..
رؤيا:هههه اوك احياتي لي بغيتي..يله زيد هه

جرها من يديها شاد فيها وهي هازة جلايلها وكتمشى بشوية باش ما تعكلش وغاديين جيهة لباركينج شاف مجموعة من الشباب جايين جيهتهم ودار عندها مخنزر شاف فالسلهام وهزلها القب ديالو رماهلها على راسها مغطيلها حتا نص فوجهها قلب وجهو..هزات راسها متفاجأة عين فيه وعين فهادوك لي دايزين من حداهم وجايين من جيهتو استغربات ورجعات تبسمات بشوية وهبطات راسها بلا ما تهضر..جبد السوارت فتح الباب من بعيد ومشى لجيهتها فتحلها الباب عاونها دخلات وهي كتقاتل مع كرشها وجلايلها ورجع سد الباب ودار لجيهتو وطلع وجلس كيبان غير الحيط قدامهم والزاج كامل فومي ما كيبين والو
فراس:(شاف فيها بابتسامة وهي كتزول القب على راسها)ايوا امدام
رؤيا:(كضحك)هههه من عندك نعم اسي هه اااااي الله يا ولدي اووف(حاطة يديها على كرشها)
فراس:مالك!ركلك عاود؟
رؤيا:علاش هو كيهدا دييما..ااااي بشوية اولدي حاول عليا
فراس:(حط يدو على كرشها)ههه حاول اصاحبي على مك راه مزاال محتاجها 
رؤيا:كتعاون عليا نتينا وولدك ههه
حط يد مور الكوسان لي جالسة فيه ويد حاطها على كرشها ومقرب وجهو منها وكيتبسم بابتسامة جانبية 
فراس:اممم دابا اجي نتفاهمو..كيفاش هادشي ديالك امدام همم؟مخليا راجلك سيمانة وهو بوحدو..ما خفتيش من مولاك(هز يدو كيدوز صبعو على حنكها)
رؤيا:ههه وا بحرا توحشني شي شوية ههه
فراس:هاكااااك gوليلي هه..ايوا راه ماشي غير توحشتك وصافي انشدك نهنشرك ابنتي ههه
رؤيا:ههههه الا جبرتي ما تهنشر هنشر السوفل لي عندي دااااه هاد بروسلي ههه
فراس:(كيطلع ويهبط فيها وهو قريب منها)لااا مزاال الخير كاامل قدامي..عاد زكييتي تبارك الله وربي عطاني من خيرو وخميرو
رؤيا:ههه زكيت!شعندي كيلو دالشعير!
فراس:ههه لا نتي قنطار داللحم(كيشوف فصدرها)وقنطار زيييين تبارك الله ههه
رؤيا:(حطات يديها على عينيه)ههه جمع عينيك 
فراس:(زولها يديها وحطها على فمو باس فكها ورجع حط يدها على قلبو وتنهد)توحشتك المصيبة..وتوحشت حتا لمناكرة معاك ههه
رؤيا:هههه 
بقات كتضحك وهو كيشووف وساهي فيها بابتسامة سعادة واضحة على وجهو وشاد يدها حاطها على قلبو وهي بقات غادة وكتنقص من الضحك وكتسكت وخلات غير ابتسامة خفيفة ساحرة على فمها وكتشوف فيه بعينين عااامرين حب وشوق وهو غادي وكيقرب ببطء لعندها وعوج راسو حط شفايفو على شفايفها كيقبلها بشوية وبعينين مغمضين دخل معاها فقبلات طويلة وهي منساجمة معاه وحاطة يديها مور عنقو ومرة مرة كتحركها..طلق من يديها ومد يدو بشوية بلا ما يشوف هبط الكوسان لي جالسة عليه وهابط معاها بقبلات فوجهها حتا هبطو شوية وقاد نصو الفوقاني فوق منها كيبوس فيها وهي شاداه من وجهو..هز يدو فتحلها الخيط ديال السلهام لي عاقداه بالسريفة وبعدو عليها وبانو يديها لي بلا كمام وكول اللبسة الواسع خلا صدرها يبان.. انساجمو مع بعضهم كيطفيو نار الشوق لي بيناتهم وبقى هو وياها فالبوس والاحضان حتا عراقو بزوج وهو رجع كلو كينهج وعينيه حمارو.. بعد مدة لا بأس بيها بعداتو عليها دافعاه من صدرو وعقدات حجبانها طالقة وذنيها كتصنت حتا تأكدات من داكشي لي سمعات عاد هزات راسها وبعداتو عليها
رؤيا:اواعدي..شامة نسيتها..طلعوها فالأميرة! سمع ها هما طالقين الاغنية ديالها وييلييي
فراس:(مخنزر)وحنا مالنا تطلع ولا تهبط..نتي لي اتهزيها؟
رؤيا:(هبطات لمراية لي قدامها كتقاد وجهها) اووووووف شو كي رجعتيني..وخصرتيلي لمشيطة كاااملة كي انعمل نمشي هايدا دابا؟
فراس:(بعصبية)ما تمشيش واجي نكملو على شغلنا 
رؤيا:علاش نتينا خاسر شي حاجة..ما خاسر والو.. اووووف ما بغاتشي تقاد..عاوني ونتينا كتشوف فيا بهدلتيني وخليتيني
فراس:الصمت وكيشوف فيها بنص عين وهو كيفتح قرعة دالماء حداه هزها كيشرب منها ويخنزر فيها
رؤيا:متأ المرض..بالناقص كاع من شي مشطة ولا شي زمر انفتحا ونتهنا
بدات كتفتح فالمشطة بالزربة وكتزول فلمقابط وتحط قبالتها وهو شاد القرعة دالماء كيشرب منها شوية ويرجع يحطها على فخضو وكيشوف فيها عاقد حجبانو ويرجع يشرب حتا سالات ودارت يديها فشعرها قلباتو للقدام وكتنفضو بصباعها ورجعات راسها لور كتقاد القصة وتسرحو بيديها وعينيها على لمراية
رؤيا:شو شني عملتيلي فعنقي وصدري..كي انعمل دابا انا نمشي قدام الناس هايدا انهنننن..شو على فرشة عملتيلي!
فراس:(هز صبعو لعنقو)شوفي نتي شدرتي عاد هضري


بقات كتشوف فيه لقات زوج قمشات هابطين مع عنقو وشي بلايص حومر وهي تقلب وجهها كتسوط وتغبن..قادات راسها وهبطات شعرها غطات بيه عنقها وهزات لمضمة ديالها لي زولها دوراتها على كرشها وعطاتو بالظهر باش يسدهالها ورجعات دارت وهزات سلهامها رماتو على كتافها وعقداتو وقلبها ايخرج ومتبعة مع الاغنية لي مطلوقة واش سلات ولا مزال وهو متبعها بعينيه وحاط المرفق ديالو على السرجم ومكالي بيه راسو وكيشوف فيها حتا سالات وفتح الباب خرج ودار عندها لقاها خارجة جر لقب على راسها وعاونها هبطات وزادو

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.