رؤيا : و هادشي لي كاين.. راه بابا ماشي عديم المسؤولية باش يسمح فولدو من لحمو و دمو..يانا ماشي بنتو دبصح و غير مربيني و ما بيناتنا حتى عرق مشروك... و واخا هايداك كيحمااااق و كيتسطى عليا..و اذا وقعاتلي شي حاجة او آذاني شي واحد يقدر يموت و يقتل على قبلي..راه بابا ويانا عارفاه.. هو بالنسبة ليا أحسن أب فالعالم..(سهات قدامهت)بعد مرات كنبدى نفكر ونقول كون كان بابا الله يرحمو ما ماتشي واش كان ايبغيني قدو.. (تنهدات وشافت فيه كترجف بالبرد وشفايفها بداو يزراقو و دوزات يديها على دراعها كدفيهم)..اوووف.. خاصك تعرف بلي باباك و جدك كيبغيوك وبزاااف.. راه نتينا طرف منوم... و الولد الوحيد ديالوم ولي عندوم...اوووووه (تبورشات)...
فراس :(تنهد وهز راسو و كيشوف فيها بطرف عين) من الأحسن دخلي بحالك.. بلا ما تمرضي عاود و نحصل فيك...(رجع قلب وجهو)
رؤيا : اوووووه.. ما كانشي كيزيالي فاس باردة هايدا...(خشات يديها بين فخاذها) زعما هي كيقولو عليها سخونة...
تبعاتو رؤيا بالزربة كتعيط و خيوط الكسوة كيتحركو معاها...وكتشير بيديها زعما باش يوقف...وهو ماشي قدامها عاطيها بالظهر...حتا دخل لواحد الغرفة...
رؤيا : وقف وقف... تسنا فاين حنايا؟.. فاين جبتيني...وااااا وقااااف..!!
وصلات لباب الغرفة و فتحاتها بالجهد و دخلت كتهضر و تغوت...كانت عبارة عن مكتب حديث.. لبيرو كان عبارة عن طاولة زجاجية منزل فوق منها لابتوب كيشتغل بالبصمات من آخر إنتاجات شركة فراس لي سميتها ThecnoSol و كالعادة منقوش عليه رمز التاج... حيت هو الرمز ديال العلامة التجارية ديالو..و فوق منو مجموعة من الاوراق...و كرسي ديال الجلد فاللون الأبيض جالس عليه فراس و خدام فلابتوب... و أمامو شاشة كبيرة كتظهر على أنها زجاجة مثبتة فالحيط متصلة بكاميرات المراقبة لي فلفيلا و كتبين كل شبر منها...و تحت منها فوتوي فاللون الأزرق الداكن...و بجنب البيرو طاولة و جوج كراسا بنفس لون الفوتوي...
فراس ما حتاجش يهز راسو فيها حيت عرفها غير من غواتها بلي هي لي دخلت عليه... و حتا واحد من غيرها اصلا ما يزعم يديرها... دوز يدو على لحيتو كيحاول يهدن راسو...دخلات رؤيا كي لعجاجة كتعرج...و وقفات على جنبو
جرها حتا جات جالسة عليه عاطياه بضهرها.. و يدها فيدو ملويهالها لور...و قرب راسو لوذنيها و كيهضر تحت سنانو...وهي كتعافر تزول يدها منو و كتحرك فوق فخاضو و تحك عليه باغة تفلت منو... و صدرو ملاصق مع ظهرها...
رؤيا: امممم يدييي رخي اااي نتينا لي ما نعرف فاين جايبني ؟؟ اااي كتقصحني..
فراس:(باستهزاء) علاش الزوينة ما عارفاش فين نتي هذا فاس هه...
رؤيا: اااي بلا ما ضحك عليا... فاس ما فيهاشي بحر امممم يديي...
فراس: (كيطنز عليها)واااااايلي بصح؟ أخيرا خدمتي هاد الدماغ فشي حاجة..(وحط صبعو على راسها و دفعو للجنب )
رؤيا: يانا دماغي دايما خدام ابنادم اااااااااااااه(زيرلها على يدها) اوووف صافي صافي... رخي عافاك..ضريتيني اااااي يانا باغة نعرف غير فاين حنا.. ما بغيت منك وااااالو ( بدات كتهضر بشوية و بصوت مبعكك و كترطب معاه)...
فراس:(سها فصوتها و زاد قرب وجهو لعنقها ورخى على يدها شوية) صدقتي كتعرفي تهضري بشوية...امم ؟ حنايا فالرباط.. عرفتي دابا فين؟؟
رؤيا: (خرجو عينيها وهي تغوت) هيييييه اواعدي؟ الرباط؟ وعلاش جايين نهنا ؟ شعانعملو فيها؟ هييييييه اواعدي و خليت اوطو ديالي تما وزيد عليها حوايجي..(بأمر) دااااابا اتنوض تحرك وترجعني مناين جبتيني..ولا والله حتا نعملك الشوهة هنايا...
فراس:(رجع زير عليها) يله وريني نشوف هاد الشوهة...
رؤيا: (رجعات كتحرك فوقو وتفركل)ااااااااي حراااام عليك اي اي بشوية وا بغيت غير حوايجي ااااي و اوطو ديالي عافاك..
فراس بدا كيحس بشي حاجة ماشي هي هاديك فيه وبدات كطلع معاه التزييرة و هي فوق منو كتحك وتفركل..قريبة ليه و فخاضها قدامو عريانين حيت الكسوة طلعات شوية مع لجلاس و حفيانة و كتوجع قدامو بصوتها لمحلون وهضرتها لمبعككة ديال الشماليات و كتنتر يديها بشوية و ريحة عطر الورد لي راشة عجباتو...حس بالسخونية بدات تطلع معاه وخاف يتمادى و ما يحسش براسو و هو يدفعها ناضت عليها بالزربة...
رؤيا : (قابطة فيديها كتكمدها) اووووف فرعتيلي هاد اليد من البارح و هي معاك فالعذاب تفووو...
فراس :(مخنزر و كيتفادى يشوف فيها ) احم خرجي دابا من قدامي..
رؤيا : (باصرار) لا ما ماشة حتا ترجعني نجيب حوايجي و اوطو ديالي..
فراس:(بعصبية) واخة واخة انجيبهملك...غير حيدي من قبالتي دابا حسن ليك و ليا...
فراس :(عروقو بداو كيبانو و بدى يهضر بالغوات) وااا هضرنا صافي لي بغيتيها ايجيبوهالك غير خرجي المرض من قدامي ولا راه انفرعك...
رؤيا : (بانتصار)اه واخة انخرج.. ولكن مزالة باغة واحد الحاجة اخيرة هه
فراس:نتي راك باغة لي ييي...(سكت) تفوووووو شباغة الزمر طلقينا خلاص و درقي زلافتك....
رؤيا: (بشوية) تمشي معايا غذا لطنجة واخة!!
فراس : (واصلة بيه للجذر) صافي واخة غير خرجي
رؤيا: كلمة دالرجال...؟
فراس:(بغضب) كلمة دالزمر...اتخرجي ولا نوريك الرجلة دبصح..
رؤيا : يييييس و أخيييرا...ههه انتسنا حوايجي لفوق...يله باااااااي
خرجات رؤيا الضحكة واصلالها للوذنين واخيرا لي جات عليه قرب يتحقق و طلعات لبيتها تقاد حالتها و خلات فراس جالس فالبيرو ايتفرجع..كيحك فجبهتو ومغمض عينيه وريحتها بقات لاصقة فيه.. عيا كيحاول يكالمي راسو ويبعد دوك الافكار من راسو والو شرب كاس دالماء كان حداه.. وبقى كيدوز يدو على لحيتو و على جبهتو و كيمسح العرق...عيا صابر و فلخر طلع لبيتو و دخل للحمام تخشى تحت الرشاشة كيبرد عليه... بقى شحااال حتا برد و يسب فراسو على الحالة لي وصلها.. ما عرفش كيفاش وقعلو... هو من زمااان ما قرب من شي مرأة او تحاك معاها او كانت قريبة ليه حتا لداك الدرجة من غير مو و لالة رقية.. و شي حاجة سميتها العلاقات الحميمية زولها من قاموسو منين كمل 25 عام و حاول يبعد على لحرام قدر الإمكان وقطع صلتو بجنس النساء.. و أصلا ما كانش كيسالي وخدمتو ديما شغلاه و ما عندوش وقت لي يجلس يدير الخاطر لشي واحدة...وعليها فاش قربات منو رؤيا ومن بعد هاد المدة كاااملة تحركات غريزتو دغيا لي شحااال وهو قامعها وقامع راسو باش ما يطيحش فلحرام من بعد ما ضرب عليه فخطرة...ولكن كيبقر راجل فلخر ومن الطبيعي اتحرك رجولتو واتخدم غريزتو من بعد داك الموقف الحساس لي طاح فيه معاها...
رؤيا دخلات لبيتها كتفرنس و عاد بدات كتحنزز و تشوف فلبيت حيت فاش فاقت خرجات بالزربة و ما رداتلوش لبال..كان بيت مبهج...مصبوغ بلبيض ناموسيتو كبيرة مغطية بكوفرلي فلبيض و فيه وردات فالأزرق.. دي طابل دونوي فالابيض و اباجورات فالباج..وفرأس الناموسية غطا باج فحال الخيمة و على جنبها شجرة د الظل لونها أخضر فاقع.. و تحت رجلين الناموسية جوج كراسى قصار شوية فلبيض.. وباب كبيرة كتخرج لجردة...عجبها لبيت بزااف و عجبها تصميمو و الوانو...و دخلت للحمام دوش حالتها و توضى وتصلي الصبح لي فاتوها و العشا لي ما صلاتهاش البارح و حاولات ما أمكن دوش و ما تقيصش الجرحة لي فرجليها..
دوشات و تحممات مزيان و تعطرات و خرجات ببينوار فالأزرق بااارد و فوطة فوق راسها.. حنوكها حومر و رموشها فازكين عاطين لعينيها جاذبية زوينة و لحمها الأبيض الصافي كتفوح منو رائحة الياسمين..كتمشى حفيانة فوق الطابي الباج لمزغبة...شافت فوق الطبلة الصغيرة لي جيهة باب الجردة و هو يبانلها بلاطو دلفطور منزل فيه كاس عصير دالليمون و أومليط و التوست و الجبن الفاخر..كانت طابلة عامرة...استغربت فوقاش و شكون دخلهم من الصباح ما بانلها حتا واحد من غيرها هي و فراس فالدار كاملة... تناسات الفكرة و مشات جلست كتاكول و تعاود من البارح فالعشية م كلات ولا طاح فكرشها... كلات و شبعات و ناضت هزات كوفرلي د الناموسية صلات بيه...
وهي كتصلي تسمع الدقان فالباب المرة الاولى و الثانية و الثالثة و ما جاوب حد حيت رؤيا لي اتفتح كتصلي حتا ما بقاش تسمع عاود ...
صلات رؤيا بشوية عليها و مشات فتحات الباب كتشوف شكون دق...ما جبرات حد ولكن جبرات مجموعة من الصيكان هزاتهم و دخلات كتقلب فيهم... لقات فيهم مجموعة من الثياب لي تقدر تحتاج.. ملابس داخلية و تيشورتات و سراول و كساوي و صبابط و صبردينات و اكسيسوارات...و عطور أي حاجة تقدر تحل عليها فمها... اختارت بدلة رياضية فالرمادي الفاتح و لبسات كلاكيط فرجلها... هزات تيلي ديالها من البوشيط لي كان فوق الطابل دونوي.. و عيطات لهنية و جلال و حسن طمنات عليهم و طمناتهم عليها و خبراتهم بلي غذا اتجي لطنجة سالات و خرجات كدور و تسارى فأرجاء الفيلا و تفرج فكل قنت فيها..و فيما يوصل وقت الصلاة طلع تصلي و ترجع..وكتجبر الماكلة منزلة كتاكول و تنوض عاود تدور او تجلس تفرج...
🌙طاح الليل و رؤيا غير كدور وما رجعاتش شافتو النهار كامل..ملات و عيات و مشات لبيتها تنعس و ترتاح...ويله حطات راسها على لمخذة مشاااات...
اما واحد فراس منين سالا دوش و حس براسو ارتاح و برد عيطلهم يجيبولها داكشي لي بغات قطع.. و هز تيشورت كحلة لاصقة عليه و مطراسية عضلاتو و سروال كيطمة بيض و كلاكيط و خرج مشى للبيرو ديالو يكمل خدمتو لي مزالة تابعاه.. و طرق عليه باب البيرو تفاديا ان رؤيا ترجع عندو عاود... و بقى النهار كامل فالمكتب ما خرجش بمرة و ما كالتو كيجيبوهالو الخدم حتا لعندو و الصلاة كيصليها غير تما... بقى جالس و كيخدم و مرة مرة كيعلي عينو يشوف رؤيا لي كتسارى فلفيلا شكتعمل و فين مخشية و يرجع يكمل خدمتو حتا طاح الليل و هز عنقو كيطرطقو حيت ضرو .. و ناض فحالو طلع لبيتو يرتاح..دخل لبيتو و زول لكلاكيط و تلاح على ضهرو هاز رجل و مسرح رجل و يدو تحت راسو كيشوف فالسقف و يفكر... بقى بشوية بشوية حتا داه النعاس...
☀صباح الصبح و اشرقت شمس يوم جديد على رؤيا و فراس...ناض كل واحد فيهم دوش و توضى و خرجو لبسو حوايجهم.. رؤيا لبسات كسوة حمراء بلكمام و لاصقة عليها فايتة الركبة بشوية... و فيها سمطة جيهة الخصر بالاحمر و الباج..لبسات صندالة بلا فالباج باش ما تزيرش على رجليها..مشطات شعرها و فرقاتو فالوسط و رداتو مور وذنيها...مشطات حجبانها و قداتهم و عملات ايكخون و ماسكارا وقلم خفيف و كلوز و رشات لعطر....و هزات صاك صغير طويل فالباج دارت فيه تيليفونها و ساروت الاوطيل لي مزال عندها و خرجات راشقالها كضحك غير بوحدها...
اما فراس فلبس سروال دجين كحل و تيشورت بيض و فوقية فلباج و حط ساعة باج دالجلد فيدو و صباردينة بيضة... قاد شعرو و لحيتو و رش عطرو و خرج..عاقد حجبانو كالعادة..
تلاقات رؤيا و فراس على طاولة لفطور..طلعو فبعضهم و هبطو..
رؤيا : (مبتسمة) صباح الخير
فراس :شاف فيها و رجع قلب وجهو و جر كرسي فالراس و جلس...
رؤيا :(عوجات فمها و بدات كتمتم) بنادم كي عامل يخخ ما تصبحشي عليه حتا بفلوس...
فراس سمعها و ما بغاش يحمق راسو معاها على الصبح و خلاها كتنكر بوحدها... دام السكوت و فقط صوت المعالق و الشوك لي كيتسمع.. و رؤيا ساعة ساعة تشوف ففراس و تلقاه كيخنزر فيها و ترجع تهبط عينيها...حتا زعمت و هضرات...
رؤيا: احم احم...
فراس: (هز عينو فيها ورجع قلب وجهو)
رؤيا:بغيت نقول.. اححم بلي خاصنا نمشيو اولا..؟؟ باش نوصلو بكري راه الطريق طويلة..
فراس: (باستفسار) نمشيو؟؟
رؤيا: اه نمشيو..
فراس: كيبانلي نتي من الصبح لصبح كتشدك الحالة..
رؤيا: علاش ؟ ماشي بارح واعدتيني و قولتيلي اتمشي معايا نطنجة..اولا عوال تقلب عليا...راه والله ما نتفاك معاك...
رؤيا: تفكرتي؟ ايوا يانا ماشي شغلي نتينا قلتيلي كلمة دالرجال
فراس: 😡
رؤيا: بلا ما طرطق فيا عينيك..ما ضربتكشي على يدك..نتينا لي قلتي واخة و دابا خاصك توفي بالكلمة و تنوض معايا..راه مشى الحال انوصلو معطلين...
فراس : اوووف يا ربي على بلوة...(حك جبهتو بيديه و رجع هز سيرفيت مسح فمو و رماها فوق الطبلة و وقف) اوك واخة جلسي هنايا نسالي شغلي و نجي...
رؤيا :(ناضت وقغات كتمسح فمها و تهضر) لا لا وال...
فراس :(قاطعها) 😡 اترصاي ولا نديرو بناقص حنا gاع
رؤيا :امم..!!اااا لا لا هانا (رجعات جلسات) صافي مشي قدي شغلك اتجبرني هنايا...بلحق عندك ت..
فراس : 😒
رؤيا : صافي واخة..ها يانا ساكتة
فراس مشى خرج و بقات رؤيا متبعاه بعينيها حتا غبر...وبقات جالسة كتسنى فيه حتا صونا ليها تيلي...جبداتو من بوشيط شافت الإسم و ضحكو عينيها
رؤيا: الوووووو هه
وليد: 😡 لا نتي لي ضحكي جاي معاك أما انا راه هجرتو معاك...
رؤيا : شعندك هه ياك لباس..
وليد: لا وااالو باس غير من لبارح و انا نعيط و حضرتك ما كتجاوبيش...
رؤيا : ااااااه سمحلي و الله ا حبيبي حتا كنت مخلياه فالبيت و ما كنتشي حداه و فالليل ما هزيتوشي مرة و ما شوفتشي شكون عيط...
وليد: هاد حبيبي عندك كتقوليها غير فاش كتحصلي
رؤيا: هييييه يانا ؟الله على باطل! بالعكس ديما كنقولالك و كنقولك عمري و حياتي و حبي و ديدو ديالي ههه
وليد: صبغيني صبغيني راكي مواالفة.. دابا ما قولتيليش شني وقع جبرتي داك خينا؟هضرتي معاه؟ شني عملتي؟
رؤيا : (كتهضر فرحانة) اه جبرتو الحمد لله و قدرت نقنعو يجي معايا يشوف بابا و جدو ما تصورشي شحال فرحانة و متشوقة نشوف الفرحة فعينيهم..اخييرا والله فرحانة بزاااف اوليد واخة صراحة ما دازتشي ساهلة و قنعتو بصعووبة و وقعات شحال من حاجة ولكن الحمد لله فالآخر جهدي ما ضاعشي هايداك..
وليد: شني وقع ياك لباس؟ رؤيا جاوبي و بلا كذوب واش أذاك؟؟
رؤيا : اااا..لا لا ما أذانيشي بلعكس الراجل كريم و ضريييف ورحب بيا فدارو و ما مخلي حتا حاجة ناقصاني...
وليد: كيفاش ؟ عاودي شني قلتي؟ كيفاش فدارو؟ واش نتي معاه فالدار؟؟ واش بوحدكم؟ رؤيا جاوبي بلا ما تغلغليني..
رؤيا: 😳 امم..ااا...ددد ددابا انا وياه فالدار ياك.. ولكن ماشي بوحديتنا كاين الخدم فالدار كاااملة فيما مشيت نتعكل فشي واحد و الحرس و داكشي... و هو ما كنشوفوشي اصلا هو فبيت و يانا فبيت و دابا عاد كي تلاقيتو باش نجيو نطنجة..
وليد : ماشي شغلي مهم نتي فداااارو ..علاش ما بقيتيش فالاوطيل علاش ماشة عندو لدار ها؟؟
رؤيا : و صااافي ا حياتي بلا ما تعصب عليا عافاك اصلا غير ليلة واحدة و دازت و دابا شوية انشبرو الطريق غير بلا ما تقلق ا ديدو ههههه
وليد: رؤيا بلا ما تعصبيني فحال ليلة فحال جوج مهم بتي فدار راجل غريب...
رؤيا: دابا كيفاش زعما ما كتيقشي فيا ياك؟؟
وليد : اووووف ارؤيا ماشي ما كنتقشي فيك و إنما ما كنتيقش فالناس و هذا مزال غريب عليك كتسمعي وما عارفينش شني تحت راسو راه الوقت ولات كتخلع و انا كنخاف و كنغير عليك سمعتي و ما نبغي حد يقرب ليك او يجي جيهتك...
رؤيا: الله يخليك ليلي احياتي ما تخافشي و الله كلشي مزيان غير ارتاح وما بقاشي بزاف و نجي عندك نحمقك...
وليد:(تنهد) ههه توحشتك و الله كتغيبي ساعة كتخليني مقطع الراس لكلينيك بلا بيك ممل و حياتي بلا بيك ما كتسوى وااالو ارؤيا...كنبغييييك احياتي كنبغيك بزااف...
رؤيا: ههه حتا يانا كنبغيييك بزاااف و توحشتك بزاااف بزاف..
وليد : اخخخ ارؤيا اخخخ و شني عاملة فيا ..
رؤيا : ههههه..
وليد: يله ابب انخليك دابا تهلاي فراسك اوك و خلي تيلي ديما حداك انا دابا داخل عندي شي عملية اوك
رؤيا : واخة احبيبي ربي معاك تهلا فراسك حتا نتينا
وليد : ربي يتهلا يله بيزو...
رؤيا : هههه مكبوت (قطعات)
سالات رؤيا المكالمة ديالها و رجعات تيلي للبوشيط و دارت كتشوف جيهة الباب واش فراس رجع و هي تلقاه واقف موراها مطلع حاجبو و مخنزر و كيطلع فيها و يهبط...
رؤيا هزات بوشيطتها و تبعاتو كتخلف موراه و هو سابقها خرج بيها للحديقة الخلفية قبل ما يوصل نزلات طائرة هيليكوبتير من السما و حطات فوق خشبة كبيييرة لاصقة على الارض وجدوها باش تنزل فوق منها الطائرة رؤيا غير شافتها و حلات فمها..
رؤيا : هييييه انمشيو فهادي؟؟
فراس: 😒
رؤيا : و اوطو ديالي شكون ايجيبالي..لا لا يانا ما نمشيشي بلا بيها...
فراس: غير زيدي تحركي اوطو ديالك سبقاتك وفيها حتا حوايجك غير هنينا..
رؤيا طلعات للهيليكوبتير جلسات و جلس حداها فراس دارو السمطة و الكاسك فوق راسهم من الصداع د الطائرة و ما هي الا ثواني و قلع الربان بيهم
تحركات بيهم الطائرة و قلعات فالسماء الصافية.. رؤيا واخا كانت أول مرة ليها تركب طائرة ما خافتش بالعكس كانت مستمتعة و عايشة اللحظة حيت هي من النوع لي كيبغي المغامرات و تقدر تجرب أي حاجة مهم تعيش حياتها و كتعيش كل نهار بنهارو
جالسة و كتأمل فالمناظر لي تحت منهم عجبها الحال و بقات ساهية كتشوف من السرجم فالبيوت و الاشجار و الحقول و ابتسامتها ما فارقاتهاش..فرحانة و ما قاداها فرحة..وفراس على جنبها كاعي و طالعلو لخز لراس ما حاملش الوضع لي تحط فيه حس بيها استغلات الوضع و فرضات عليه ما بغات و حطاتو أمام الأمر الواقع..ولكن هو كلمتو ما يتراجاعش عليها واخة يوقع لي يوقع عندو الكلمة هي الكلمة
بقى كل واحد وعايش فعالمو بوحدو رؤيا عايشة فكوكب زمردة مع الطيور فالسماء..وفراس عايش فكوكب الأكشن مغلغل غير بوحدو
ما دازش بزاف دالوقت و وصل شرشبيل و السنفورة لعروسة الشمال عاصمة البوغاز مدينة طنجة..حطات الهيليكوبتير فوق أرضية مخصصة ليها داير بيها العشب من كل جيهة..هبط فراس و تبعاتو رؤيا بشوية عليها كتأمل فالطبيعة لي دايرة بيها و من الريح القوية كان ظاهر أنهم فمكان عالي ..شافت فراس ماشي و تبعاتو غادة و كتكتشف..بقاو كيتمشاو و كل ما قربو شوية كيبانلها لبحر قبالتها حتى شافتو هابط من الدروج و هبطات موراه..وهي تبانلها فيلا جات فالقاع شوية و البحر أمامها مباشرة فيلا بتصميم حديث و طابع غربي.الاشجار العالية و الكثيفة دايرة بيها من ثلاث جيهات ومن الجيهة الرابعة كاين لبحر كطل عليه الفيلا من مكان عالي
رؤيا عجبها المنظر بزااف و عمرها شافتو واخة عايشة فنفس المدينة ولكن هي ما كانتش كتوصل لهاد المنطقة بالذات و حتا واحد ما كان مسموحلو يقرب لجيهة الفيلا اصلا حيث من الملك الخاص دفراس لي شاري مناطق كثيرة و بقع و اراضي و كيختارهم قراب للبحر و للطبيعة حيت كيرتاح فداك الجو و ما كيعجبوش صداع المدينة و زحامها
دخل فراس للفيلا و هي تبعو رؤيا كتشالي بيديها و تغوت
رؤيا: افاين داخل راه خاصنا نمشيو ماشي جينا باش نجلسو هنا معاك كنه..(دخلات فظهر فراس لي وقف فجأة)اي..
فراس:نتي لي اتمشي و ما نعاودش نشوفك كمارتك..(وكمل طريقو)
رؤيا:(واقفة شادة فنيفها لي ضرها) اواعدي هذا كيضحك ياك..؟؟ تسنى فاين ماشي (تمشات حتا وقفات قدامو)..كضحك ياك؟؟ ياك غير بارح قلتي اتمشي معايا
فراس:اه لطنجة..إوا هاهي وا سيري تفرقي عليا.
رؤيا:لا يانا جيبتك باش تمشي معايا..تمشي تشوف بابا و يشوفك وجدو حتا هو..عافاك ما توصلشي حتا نهنا و تضييع كلشي..لا نتينا اتمشي ياك اتمشي ضروري هه عارفاك غير كضحك معايا
فراس:😒شوفي فيا مزيااااان!
رؤيا: لا لا قولي غير كضحك عافاك اهئ ماشي حتا جبرتك اهئ اهئ ما يمكنشي نرجع بلا بيك هاد المرة..نتينا اتمشي ياك اهئ اهئ و ايشوفوك اه اه و ايدرعوك و ايفرحو بيك اهئ اهئ و اتعيشو مجموعين..يانا السباب ياك بسبتي ما بغيتيشي تمشي حيت زبلت فيك ياك اهئ اهئ سمحلي و الله ما نعاود ما تبقاشي تسمع حسي اهئ اهئ حتا وجهي ما نوريهلكشي ما نبقاشي ندور بساحتك غير يله اهئ اهئ
فراس:بلا دراما زايدة وسيري فحالك قبل ما نعيطلهم يهزوك
رؤيا:(وقفاتو)لا ما انمشي نحتا موطع اهئ الا ورجلي على رجليك
فراس:(بعصبية)الا ما بعدتيش من طريقي انgرضهملك
رؤيا: ماشي شغلي عمل لي بغيتي قتلني نتينا وتهنا اهئ اهئ غير يله..نموت و ما نشوفشي بابا محطم..نموت و ما نشوفشي ديك النظرة فعينيه مرة ياخرا اهئ اهئ ما تخلينيشي نعيش مع هاد لحمل عافاك كل نهار كنلوم راسي بلي يانا السباب..و جدو لي بقالتلو أمنية واحدة هي يشوفك اهئ اهئ ما تخلينيشي نرجع نشوفو و هو كيتعذب على فراقك اهئ اهئ عافاك نتينا بيدك ترجعلوم الفرحة و تخليهم أسعد ناس فهاد الدنيا..كلشي بيدك اهئ اهئ(بلغوات)راه هدااااااك باك ماشي عدووووك كتسمع باااااك و ما ذنبو وااالو اذا فرقوك علييه اهئ اهئ هداك باااااك و عندو عليك حق..هو ما طالب منك والو اهئ اهئ طالب غير الشوفة فعينيك طالب غير يدرعك و يشم ريحتك اهئهئ دابا نتينا مؤمن و كتصلي منين جاك منييييين اهئنهئ فاين مشى البر بالوالدين فاااين؟اولا ما تعلمتيشي هذا يله تعلمتي تركع؟
فراس:حدك تما😡نتي راه ضسرتي بزاااف
رؤيا:شفتي ما عجباتكشي ياك؟وهادا هو الحق حتا واحيد ما كيعجبو اهئننئ ضراتك فخاطرك حيت عرفتي راسك ظاااالم سمعتي ظااالم لا نتينا لا يماك..وبابا هو المظلوم فيكم هو لي عاش سنييين يتحسر عليك اهنهنئ عاش كيتحسر على ولد فحالك ما مسوقشي ليلو..واخة عرفتي كلشيييي و عرفتي شني وقع..مزال مقصح قلبك اههئنهن نتينا أكبر أناني شفتو فحياتي..كتفكر غير فراسك انهئ ما فكرتيشي فباباك واخة غير شوية ما فكرتيشي فحالتو ما فك..هئهئ ما فكرتيشي يقدر يجي شي نهار ييييي..ييموت اههههئ و هو مزال مكوي عليك..ما فكرتيشي شني هو إحساسو و هو عارف ولدو فشي موطع فهاد الدنيا و ما قادرشي يوصل ليلو اهنئهئ
رؤيا: تلاقاه غير مرة وحدة غييير مرة وشوف ما اتندمشي اهنهئ..حس شي شوية ابنادم واش ما عندكشي القلب اهنههئ(حطات صبعها على صدرو)هذا ما كيحسشي..ما عا يأنبكشي ونتينا ناعس..ما اتفكرشي وتقول راه شي واحد ما قادرشي ينعس بسبابي اهنههئ ونتينا كضحك ما اتفكرشي بلي شي واحد هادي سنييين ما ضحك من قلبو كيتسنا نهار لي تجمعو باش يضحك معاااااك اهنههئ يماك بدااات و دمراتلوم حياتوم و نتينا عوال تكمل ما بدات..شفتي فحااالك فحااالا ما كاينشي الفرق..اولا لا لا هي أحسن منك هي بعدا كان عندها سبب على الأقل اهنهننئ سبب خلاها تبعدك عليه و لكن نتينا شني هو السبب لي مانعك؟(دفعاتو من صدرو)شنيييييي لي مخليك تبقى بعيد غير قولي..نتينا واحد جباااان و خوااااف كتسمع خواااااااف(وقفات قدامو مخرجة عينيها الحومر وكتنهج)
فراس صدماتو بقى غير ساكت و كيفكر فهضرتها.. كلامها كيتعاود حرف بحرف فراسو هو ماشي بلا قلب كيما قالت.. هو ماشي ما عارفش بحق واليديه..هو ماشي أناني هو كيشوف راسو ضحية.. عاش 24 عام محروم عاش سنين بنفس الفكرة تأقلم معاها و عايشها و كبرات معاه..فكرة أنه يتيم و باه عايش فكرة أن باه تخلى عليه و ما باغيهش..ومن بعد هاد المدة كلها وما بين ليلة و ضحاها كيتوقعو منو يرجع عااادي صعيب و صعيب بزااف عليه يتقبلها.. حتا هو باغي و ما كرهش و شكون يكره يكون عندو أب يبغيه و يحن عليه و نهار يحتاجو يلقاه فجنبو ولكن ما قادرش شي حاجة مانعاه و هو براسو ما عارفهاااش..شي حاجة مخلياه ما قادرش يخطي هاد الخطوة..زعما يكون خايف كيما قالت رؤيا..أكيد لا هو ما يتقبلهاش و ما يرضاهاش..وكلمة الخوف كتستفزو و أنها تقال ليه فهذا تحدي بالنسبة ليه
فراس:😡انا ماشي خواف سمعتي ماااااااااشي خوااااف و بغيتي غير نمشيو وازيدي قدامي
جرها فراس من يدها و خرجها و هي كتبكي و كتشهق و هو كيفور دمو كيغلي..دار لرجالو إشارة بيديه باش يجهزولو سيارتو وما هي إلا ثواني كانت قدامو سيارة رياضية كحلة كاااملة و فيها لمسات باللون الذهبي فالجوانب ديالها ضافت عليها فخامة..كلها من الجلد الأصلي زاجها فومي و ديما فراس كيجهز سياراتو بأحسن و أحدث ما نتجات شركاتو..تقدم أحد رجالو باش يصوg ورجعو ما خلاهش..فتح الباب و دفعها لداخل بالجهد و زدح الباب و دار للجيهة لوخرا طلع حداها كيسوط و يعراق بوحدو وهي جالسة حداه كتخنصص و حابسة الشهقة بزز بقوة الخلعة..ديمارى الاوطو و خدم GPS
فراس:كتبي لادريس نشوفو
رؤيا:(شافت فيه مخلوعة)ووو..واخة
بقات كتكتب ويديها كيرجفو وتشوف فيه بنص عين
فراس:طلقينا ما انباتوش هنا
بقات تفتف حتا كتباتو يله كتباتو انطلق فراس مكسيري وصوت المحرك كيتسمع منين و منين تبع GPS حتا وصلو لطرقات طنجة العامرة و الزحام ما كيزيد غير يوثرو و فين ما لقا الفرصة كيكسيري حتا لقى راسو داخل فوسط حي شعبي شوية ولكن نقي و كبير..ما فرانى حتا وقف حدا باب الدار و تسمع صوت لفران مجهد فالزنقة كاااملة و طبعا صحاب الحسنات و الفضوليين كيتسناو غير لهمزة تبان باش يطلو من الطيقان و الثقابي و مور لخوامي
فراس بقى قابط فالفولون بجوج يدين و مفيكسي عينيه قدامو ما تحركش و ما هضرش..و رؤيا اكثر منو كتلهت وصدرها كيطلع ويهبط بالخلعة قابطة فالكوسان ومزيرة عليه وقابطة فجنب الباب بليد لوخرا و مبلقة عينيها قدامها و بجوجهوم كيشوفو فنفس الاتجاه
خرج ابراهيم من الحانوت و هنية خرجات من الدار بحالهم بحال جاع الناس لي خرجو حيت لفران تسمع فحال الا شي حد دار اكسيدون..و حسن لي قرر يجلس هاد النهار ما يمشيش للخدمة حيت جلال صبح عيان شوية..كلشي واقف كيشوف فديك الطوموبيل لي عمرهم شافو شي وحدة فحالها و كيحاولو يميزو شكون فيها ولكن بدون جدوى حتا حاجة ما كتبان من الزاج الفومي الغاااامق
بنت:هيييي شوفي يا ختي على اوطو كيعااااملا كتحمق شجابا للحومة ديالنا.. دابا لي فوسطا كي عا يكون!
بنت2:كي عا يكون..ايكون حسن منها..يا ختييييي نموت و نشوفو
رؤيا دارت شافت ففراس مخلوعة
رؤيا:كك..ككك..(سرطات ريقها)كنتي عاتقتلنا
فراس:الصمت
رؤيا:(حطات يدها على قلبها)ااايماا قلبي ايخرج من موطعو اوووف.. الحمد لله حمدتك اربي وشكرتك الحمد لله الحمد لله
دارت رؤيا كتشوف جيهة الدار ديالهم لي ملاصقة مع دار حسن و هو يبانلها واقف وحداه هنية وابراهيم كيشوفو جيهتهم
ابراهيم:شكون هادو؟؟
هنية:ما عرفتشي..فحالنا فحالك
رؤيا شافتهم وتبسمات ونسات الخلعة وكلشي و دارت عند فراس كضحك
رؤيا:(بحماس)يااااااي شوف شوف راهو بابا شفتيه؟راااه حدى باب لي لابس بودي زرق شفتيه ههه نزل نزل دغيا
رؤيا فتحات الباب و نزلات و خلات لفام كااااملين يتحلو كيفاش رؤيا خارجة من طوموبيل واحد غريب و ماشي اي طوموبيل بل آخر ما كاين
بنت: اواعدي هاديك رؤيا لي نزلات؟
بنت2:هييييه و الله حتا هي..وا شوفيلك الزهر يا ختييي هادي هي الدرويشة دالحومة زعما
نزلات فرحااانة ومشات كتجري طارت على حسن بتعنيقة حتا كان ايطيح و زيراااات عليه
رؤيا:باااابا و اخييييرا و اخييرا ههه
حسن:هه رؤيا؟
رؤيا:(بعدات عليه و هي كضحك)ما تخايلشي شك..
سكتات رؤيا و دارت موراها بالزربة فاش سمعت صوت اوطو كسيرات بالجهد..كان فراس لي ديمارى و مشى فاش شافو قدامو بشيبتو لي كتبين السنين لي دازت عليه و هما بعاد شاف وجهو لي شحااال و هو كيحاول يتذكرو و يتذكر ملامحو شافو و ما قدرش يوقف قدامو حس بالحقرة كيفاش هي قادرة تجري عندو وتعنقو وهو لي ولدو ما قادرش حتا يقرب منو إحساس بالضعف تغلل فيه و خنقو و فلخر اختار أسهل الحلول لي هو الهروب..مشى فراس و خلا رؤيا واقفة مصدوووومة ما عرفات باش تبلات حتى قالت صافي وصلات و فلخر كلشي تبخر مشى فراس بحال الا عمرو كان..بقات واقفة فبلاصتها ما تحركاتش حتا سمعات صوت هنية موراها
هنية:بنتي؟
رؤيا:الصمت
حسن:رؤيا؟شعندك و شكون هذا لي نزلتي من طوموبيلتو!
ابراهيم:شفتو هاد البنت نتوما لي خارجين عليها حتا ولات تنزل من الطوموبيلات دالرجالة و قدام الدار بلا حشمة بلا حياء
هنية:شكاتقول نتينا يانا هادي بنتي و ثايقة فيها سمعتي..رؤيا بنتي شكون لي كان معاك!
رؤيا:(بصدمة)هااا؟هذاك..اه هذاك زميل اه زميل كان مم..معايا فالندوة و وصلني معاه
حسن:وعلاش ما جيتيشي باوطو ديالك و صردتيها من بارح و هي هنا
رؤيا: ها!!شني يانا صردتها؟اه(كتشوف فالطريق مصدومة)خسرتلي داك النهار فاش كنت مسافرة قبل ما نخرج من مدينة وخليتها عند ميكانيك و فاش صلحها عيطلي و قولتلو يجيبا..يانا انخليكم ندخل نرتاح شوية صافي
هنية :اه ابنتي مشي رتاح اتكون عيانة من السفر و انا انوجدلك ما تاكول
رؤيا:لا بلاش ما قاداشي والله(باستلها راسها)بلا ما تعذب راسك
هنية:واخة ابنتي على راحتك
دخلات رؤيا للدار و مشات نيشان نبيتها تلفانة و حاسة الدنيا كدور بيها زولات صندالتها و رمات صاكها و تكات فوق الناموسية كتشوف فالسقف بقات هكاك حتا بدات الدمعة هابطالها مع جنب عينيها و كتفزكلها شعرها
رجعات ناضت رؤيا لبسات صندالتها وهزات الصاك و خرجات كتجري
هنية:رؤيااااا رؤيا؟ فاين ماشة رؤياااا
رؤيا:هانا ماجة اعزيزة غير نسيت شي حاجة نجيبا و نجي
هنية:واخة ابنتي الله يبعد عليك ولاد لحرام
خرجات رؤيا قبل ما تسمع هنية و ركبات فاوطو دوليد لي فالباب و كسيرات ما وقفات حتا وقفوها رجالو لي مترشين فكل بلاصة ومانعين أي حد يدخل للمنطقة لي فيها الفيلا ونزلات حتا قرب منها احد الحرس غير الشكل ديالو يخليك تقلبي دورة
الحارس:رجعي الالة ممنوع شي حد يدخل لهنا
رؤيا:يانا خاصني ضروووري ندخل
الحارس:راه ممنوع الالة ما كتسمعيش هادي ملكية خاصة و مولاها ما كيخلي حد يدخل
رؤيا: ويانا هداك مولاها هو لي باغاه..و ضروري نهضر معاه
الحارس:(طلع فيها و هبط)قلبي روايد و رجعي حسن ليك راه لي كتهضري عليه ما معاهش اللعب
رؤيا: وحتا يانا ما جاياشي نلعب معاه شريطة..ودابا زول من قدامي خليني ندوز
الحارس:(شاف فيها شحال)نتي باينة راسك قاصح..تسناي هانا جاي
رؤيا: هانا كنتسنا غير طلقنا
مشى الحارس بعد على رؤيا شوية.. وهز الرادار عيط بيه بقات حاضياه و هو كيهضر و مسرحة عينيها كتشوف قدامها الطريق كاملة حراس ما بين كل واحد فيهم شي 10 د الامتار وحابسين الطريق بقات واقفة مخنزرة وكتفيبري برجليها حتا رجع عندها الحارس
الحارس: رجعي فحالك اختي لي كتقلبي عليه ما كاينش
رؤيا:كيفاش ما كاينشي و هو عاد دابا كنت معاه مشي قولو بلا ما يتخبا فحال الفيران فالغيران و يخرج عندي نهضر معاه راني عارفاه لداخل غير بلا ما تحمق راسك و عارفاه هو لي مصردك تكذب عليا باش نمشي بلحق و الله لا كانت ليه
الحارس:غير بلا ما تعذبي راسك موسيو سلطان ما كاينش عاد كي قلع بالطائرة ديالو و مشى فحالو و محال يرجع دابا
رؤيا:(بصدمة)كيفاش
الحارس:كيما سمعتي.. و دابا حيدي من هنا بلا ما تجبديلنا الصداع
رؤيا:لا نتينا غير كتكذب..هو اكيد ما مشاشي غير كتكذب ما يمكنشي يمشي.. زول زول من قدامي خليني ندخل راني عارفاه لداخل و ما ماشة حتا نهضر معاه
الحارس:وااااا لالة بلا ما تصعرينا فهاد لعشية راه قلنالك ما كاينش هنا
رؤيا:شو اخاي راه محتاااجة نهضر معاه ضروووري عفاك خليني ندوز
الحارس: الله يهديك اختي راه ما كاينش شحال انعاودهالك راه طيارتو يله قلعات
رؤيا:(مصدومة )😳
رؤيا بقات غير كتشوف فيه بعدم تصديق والصدمة باينة فعينيها..ما هضرات ما تكلمات خلاتو واقف و رجعات ركبات فالطوموبيل و كسيرات..غادة و الدمعة واقفالها فعينيها مضببالها الشوفة قلبها تزير عليها و حسااات براسها مخنوقة
تخنقات و بغات ترتاح و ما اتلقاش حسن من لبحر باش ترتاح فيه..وقفات فالطريق فوق جبل عااالي كيطل على لبحر و امواجو كضرب فالصخور بقوة حتا كيترش الماء و صوتو كيتسمع مجهد كيخلع..بقات فطوموبيلتها كتشوف قدامها و دموعها بداو ينزلو وحدة مور وحدة
رؤيا:فشلتي ارؤيا اه فشلتي اهئنهنن ما قدرتيشي تفرح باباك ما قدرتيشي تردلو حتا شوية من لي عمل على قبلك اهههئ(ضبات الفولون)ما قدرتييييييييييييشي اهئههههئ ااااااخ اهئننهئ(حطات يديها على لفولون و حطات راسها فوقهم كتبكي)فشلتي ارؤيا فشلتي اهئننئ
بقات رؤيا كتبكي و حاطة راسها..و فجأة هزاتو و رجعات شافت قدامها
رؤيا:لا لا ماشي يانا لي فاشلة لا..هو لي جبان اه هو اهئهئ هو لي خوااف..واحد فحالو ما يستاهلشي اب فحال بابا ما يستاهلوووشي احسن حاجة عملا هي مشى فحالو اهئهئ..بابا اهونلو يعيش و هو ما عارفوشي فاينوا على أنه يعرف بلي عندو ولد اناني فحالو اننهئ نتينا ما اتقولو وااالو ارؤيا سمعتي وااالو اهههئ خليه عايش و هو كيحلم حسن ما تصدميه بالواااقع دولدو لي ما باغيهشي ولدو لي وصل حتا نلباب و رجع شني انقولو اههههئ ولدك كان قريييب منك و بينو بينك جوج خلفات و مشى..تبخر اهنهننن(مسحات دموعها)فراس سلطان صفحة و انطويها ما يستاهلشي نضيعو حياتنا عليه و بابا كيما عاش سنيييين بلا بيه حتا دابا ايكمل حياتو بلا بيه.. سمحلي ابابا سمحولي اهئ
رجعات رؤيا ديمارات الاوطو و كسيرات ما وقفات حتا لباب الدار..دخلات للدار لقات هنية مطيبة اتاي و جالسة قدام التلفازة..زولات صندالتها و مشات كتجري حتا لعندها و ترمات فحجرها و عنقاتها من كرشها
رؤيا:(بغصة)توحشتك ايما توحشتك بزاااااااف
هنية :حتا يانا توحشتك ابنيتي كتخلي عليا الدار خااااوية
رؤيا:اهنهنننهئ
هنية:شوف فيا هيييه علاش كتبكي..شعندك ابنتي منين جيتي و حالك ما عاجبنيشي..شني واقع قولي ابنتي ياك انا يماك حبيبتك
رؤيا:وااالو ايما ما عندي وااالو غير توحشتكم و صاافي ههه هانتينا شوف هانا كنضحك
رؤيا:واخة لي بغيتي و جيبلي معاك لبواطة لي فلبلاكار عافاك حتا هي انحتاجا
مشات هنية جابتلا داكشي لي بغات و رجعات مسحات و عقمات رجليها و ضربات شوية دالبنج و رجعات عاودات لغرازي لي تفتحو..سالات و ناضت دخلات لبيتها زولات حوايجها و دخلات للحمام خشات رجليها فبلاستيكة و دوشات مزيااااان و هي كتحاااول ما تفكرش فلي وقع وبالها غير مع رجليها فوقاش تغرزات وشكون غرزهالها..ما فهمات والو وخرجات لبسات عليها بيجامة دالدار بسروالها وخرجات تشوف جلال لي ما شافتوش
☀صبح الصباح فمكان اخر من العالم و بالضبط فإندونيسيا..كان فراس جالس فرأس طاولة الإجتماع مع المستشارين ديالو لي مكلفين بمجموعة الغروع لي فآسيا كيحاولو يلقاو حل للمشكيل لي تحطو فيه..هو فاش مشى كان باغي يمشي يرتاح ويعاود حساباتو ويرجع يشوف باه بطريقة أنسب..ولكن جاه إتصال كيعلموه فيه بلي المصمم لي كلفو بتصميم المجموعة الجديدة قام بخطأ واكتشفوه من بعد ما تم تصنيع عدد كبير منهم..وكان ضروري خاصو يطلع و يتكلف بهاد المشكيل شخصيا ويحاول يصلح فالتصميم باش يخرجو بأقل الخسائر..واضطر فالنهاية أنه يسافر فالحين وبما أنه ديما كيسافر فالطاقم دالطائرة دائما جاهز ومستعد لأي سفر مفاجئ..وما هي إلا نصف ساعة وكان فراس طاير فالسماء
^^بعد مرور شهرين^^
دازو ليام فحال فحال..شهراين وهي على نفس الحال..الخدمة والدار ووليد وفراس ما فكرات فيه مزال..نساتو ونسات ما وقع ومحاتو من البال..وكتحاول تنسي معاها حتا حسن وجلال..وترسم فوجههم الضحكة لي فرقاتهم من هذا شحال..مكملين حياتهم وراضيين بمكتوب العالي المتعال..اما فراس فالايام دازو عليه ثقااااال..نسى الراحة وعطاها غير للخدمة والتقصار..فالليل مخشي فلوراق وغادي جاي بين لمدووون فالنهار..وواقف على خدمتو وما باغيش يطيح فنفس المشاكيل ويوقع فالتكرار..صلح داكشي لي خاصو يتصلح وراد معاهم البال..والخدمة كاملة كدوز قدامو عاد تخرج للانظار..وتباع وتشرى باروع جودة واغلى الاسعار
☀ أشرقت شمس مدينة طوكيو على فراس ناض كالعادة تحمم و قاد حالتو و لبس بدلة رسمية باش يمشي للخدمة..هز ساعتو باش يلبسها و هو يسمع تيلي كيصوني حطها و مشى هزو من فوق الطابل دونوي السوداء..شاف نمرة مغربية غريبة عليه
فراس:(بجدية)احم الو
الحاج الفهري:الو
فراس:شكون معايا؟
الحاج:معاك الحاج الفهري
فراس:اوووه شكون تفكرنا..(بسخرية)هه امدرا الحاج ياك لاباس ما موالفالكش
الحاج:كون ما كنتش مضطر ما نعيطش ليك.. بلحق على قبل بنتي كلشي يهون
فراس:(تخلع)زينب؟..مالها زينب شنو وقعلها؟
الحاج:😏 دابا عاد..فين كنتي هادي شهرين ما سولتي عليها ما قلتي نشوف ديك لمرى راني خليتها كتبكي مورايا ما والو!!
فراس:دابا بلا ما تمرضني فمخي كثر ما أنا مريض يا قولي شكاين يا انعرف راسي
الحاج:مك اسيدي هادي شهرين و هي طايحة فلفراش ما كتهزش الراس ما خلينا ما درنالها وحتا حاجة ما نفعات معاها.. ما كتاكول ما كتشرب و لولا المقويات لي كنعطيوها والسيروم كون راها ماتت من شحال هذا..النهار وما طال ناعسة وتعيط غير بسميتك.. ونتا آخر همك تقول خليتي كلبة موراك هادي شهرين ما هزيتي حتا تيلي تسمعها صوتك..
فراس: علاش ما عيطتيش تgولهالي قبل علاش حتا لدابا..انا اذا ما سولتش راه عندي ضروفي ماشي لخاطري
الحاج: انا لي كنعرف هاديك راها مك و عندها الاولوية فحياتك سمعتي ودابا هانا علمتك بغيتي تجي اجي ما بغيتيش تسنا المرة جاية نعيطلك تحضر لجنازتها
قطع الحاج وخلا فراس دمو كيغلي ما قبلهاش على راسو أن مو توصل لهاد الحالة وهو آخر من يعلم هو واخة معصب منها وحاقد عليها وما باغيش يشوفها و لكن كتبقى مو و ما يبغيش شي حاجة تمسها..تلف وما عرف باش تبلا وبقى واقف فبلاصتو مبلوكي وعاقدهم وكيفكر ويبلاني..ورجع هز تيلي وعيط لرجالو يوجدولو طيارتو باش يمشي للمغرب..قطع ورجع عيط للأحد المستشارين ديالو وعلمو بالسفر ديالو و بلي يقدرو يكملو الخدمة بلا بيه أصلا المشكيل علاش جا راه تحل وماشي ضروري انه يبقى
قلعات الطائرة بفراس وهو كيحسب الثواني و الدقائق فوقاش يوصل..خايف على مو وما يقدرش يتخايل أنه يخسرها واخة غلطات بزاف ولكن كتبقى مو..وصل فراس وحطات بيه الطائرة ففاس ففيلا الفهري مباشرة..نزل ودخل نيشان كيسول على الام ديالو..نعتاتلو وحدة من الخدمات فين هي وطلع طاااير كيخلف درجة وثلاثة لا
دخل فراس للغرفة ديالها طل عليها وتخلع من منضرها.. هادي ماشي مو زينب..زينب لي كانت كتعاند مع شابات 30 و ديما كتبغي تبان صغيرة دابا ولات إمرأة عجوز كتبان أكبر من عمرها ببزاااف وجهها لي كان دييما مضوي ومجبد دابا رجع كااامل مكمش وصفر وتحت عينيها زرق..فمها ناااشف و مقشر..شعرها بان فيه الشيب وجسمها الرياضي الممشوق رجع جسم نحييل وضعيف..كانت ناعسة فوق فراشها الدائري الفخم ويدها معلقينلها فيه السيروم ووحدة من الممرضات مقابلاها وفاش كيتسالالها السيروم ترجع تحطلها واحد جديد
فراس رجليه ما بقاوش هازينو كيتقدم بخطى ثقيييلة لعندها وكل ما قرب كيزيد يتصدم من الحالة لي هي فيها
قرب عندها وحنا على ركابيه وهز يدها ليمن وحط جبهتو عليها وغمض عينيه..ما عرفش شكون يلوم واش يلومها هي لي كذبات عليه و وصلاتهم نهاد الحالة ولا يلوم راسو لي تشغل عليها و ما رجعش سول فيها..ولكن لي عارفو هو أنه فعلا قصر من جيهتها واخة تكون غالطة فالنهاية كتبقى أم و عندها حق عليه وما خصوش يفرط فيها
وجه هضرتو للممرضة لي منين دخل و هي تالفة تهز الشوكات وترجع تحطهم وكل ساعة تعبر لزينب الضغط وتمشي وتجي وفمها محلول ففراس
فراس:(بصوت خافت فيه بحة)شنو عندها
الممرضة:هااااا!!
فراس:(هز راسو شاف فيها)😡
الممرضة:ااا..ععع..عندها إكبات حاد اااا بغيت نقول إكتئاب..ااه إكتئاب حاااااد هو لي مخليها توصل لهاد الحالة..(تنهدات كتهضر بشوية و سااااهية فيه)و ما تبقااااش تشوف النعاس ولا تذوق النعمة اخخخ اناااا لي حاسة بيها
فراس:😡 خرجي
الممرضة:اااا..
فراس؛ gلتلك خرجييييي
الممرضة:ااا ووو..واخة ا ميسيو
خرجات الممرضة مرفوعة و خلات فراس ساااهي فوجه مو و يديها بين يديه..ناض زول الكوستيم و الكرافاط لي كان لابس باش يمشي الخدمة و بقوة الزربة ما بدلهومش حطهوم فالكانابي تحت رجلين الناموسية و رجع جلس فجنبها
بقى فراس على نفس الحال كيشوف فيها بجدية وعاقدهم حتا بدا كيحس بيديها كيتحركو و كتصدر أنين و كتمتم بصوت ضعيف
زينب:ففف را س..وو ل دي
فراس:(تنهد)الواليدة؟هانا حداك!
زينب:فف فراس جي..تي!؟
فراس:(بحسرة)اه جيت
زينب:(فتحات عينيها بشوية وهي تشوفو و بدات تبكي) وو..ولدي..اهئ اهئ اهئ
فراس:(قلب وجهو للجنب وغمض عينيه بقوة كأنه كيقوي راسو وكيدير شي حاجة فوق طاقتو وحط يدو على حنكها كيمسحلها دموعها)صافي بلا ما تبكي دابا خاصك الراحة اوك
زينب:سس اهئننهئ سسمحلييي اهههئ
فراس:(خنزر وكمش جبهتو)ماشي وقتو دابا حتا تبراي و توقفي على رجليك ونهضرو..دابا عطي الراحة لراسك و ديها فصحتك
زينب:(زيرات على يدو)اههئ لي بغيتي نديرو..غير خليك حدايا اههههئ
فراس:هانا حداك ما عندي فين نمشي
بقى فراس معاها وكل ساعة تنوض تبكي ويسكتها حتا نعسات و ناض من حداها وخلاها وخرج مشى للغرفة ديالو وبمجرد ما دخل تفكر آخر مرة كان فيها فهاد الغرفة كان مع رؤيا..وتفكر شنو دار بيناتهم و تفكر باه لي مزالة صورتو قدامو وما نساهش حتا لحظة وقرر أنه أكييد هاد المرة ايتلاقاه..دخل دوش و بدل عليه ولبس شورط كحل وتيشورط رمادي حيت الجو سخووون والصيف دخل وفاس فهاد لوقت ما الجو كيكون قااصح فيها..وبقى جالس فالغرفة ديالو كيرتاح وما خرجش حتا جات عندو الممرضة كتعلمو بلي زينب فاقت و كتسول عليه
دازت 3 أيام وفراس ما كيتفارقش على مو دايرلها خاطرها واخة بزز منو ولي بغاتها كتحضر حتا بدات كتصح شوية و بدات كتقدر تهضر مزيان و ارتاحت نفسيا..حيث كان خاصها غير ولدها وها هو حداها
دخل فراس لعند مو فحال كل صباح لقاها فايقة و الممرضة حداها
فراس:صباح الخير
زينب:صباح الخير والربح كيصبحتي
فراس:(ابتسامة صفراء)الحمد لله..كيصبحتي نتي؟
زينب:الحمد لله خليك غير حدايا وانكون ديما مزيانة
فراس:(تنهد)هانا حداك الواليدة غير رتاحي
زينب:(بغصة)فراس..ياك سمحتيلي اولدي ياك؟.
فراس شاف فالممرضة اللي كانت ساهية فيه و فأحلامها الوردية معاه باش تفهم راسها..شافها غايبة وهو يحنحن بصوتو المبحوح لي كيزعزع الواحد حتا فاقت وخرجات وهي كدور موراها..رجع شاف فمو
زينب:قولي سمحتيلي اولدي عافاك اهههئ هما بززو عليا تيقني اهئ اهئ كلشي على قبلك
فراس:(بجدية)زينب من الاحسن نأجلو الهضرة فهاد الموضوع حيت ماشي وقتو
زينب:لا انا ما انرتاح حتا نعرفك سمحتيلي اهههئ اي حاجة درتها فأنا درتها على قبلك وعلى قبل مصلحتك اهئ اهئ كون مأكد اولدي انا كتهمني غير مصلحتك
فراس:و مصلحتي هي تبعديني على الاب ديالي هااا؟وتكذبي عليا وتخليني نكرهو حياتي كاملة..وعلاش؟على قبل لفلوس ياك!!شنو ذنبو هو اذا كان راجل على قد الحال..لفلوس عمرهم ما كانو كلشي..نتي كنتي كتقلبي على مصلحتك و صافي ما بقيتيش قادرة تصبري معاه و قلتي نرجع عند با نعيش فحال الملوك و ما فكرتي لا فيا لا فراجلك
زينب:اهئ اهئ لا لا أنا كلشي درتو على قبلك هما اهههئ اه هما كانو باغين ياخذوك مني اهئ اهئ انا ما خليتهمش اهئنننهئ انا ما بغيتش لفلوس لا انا بغيتك غير نتا تبقى معايا اهههننن هي كانت غا تاخذك مني
فراس:(طلع حاجبو)علاش كتهضري..شكون هادي لي اتاخذني؟
زينب:مينة اهئ اهئ مينة اه هي و بنتها بغاو ياخدوك مني انهنننن..هي كانت كتغير مني وبغات تاخذك مني بلحق انا ما خليتهاش ههه ما خليتهاش هزيتك وهربت بيك ههه وما خليت حتا واحد فيهم يوصلك اههئ
زينب:اههئ كنتي صغييير بزاااف فاش بغاو ياخذوك اهئنن وحتا باك كان معاهم وموافق على مخططاتهم اهههئن
فراس:زيييينب بلا الغاز شمن مخططات علاش كتهضري؟
زينب:(شافت فيه و عينيها حومر) ككك..كانو اهئ اهئ بغاو يزوجوووووك..اههئ
فراس:كيييفااااش!
زينب:اه اه بغاو يزوجووك بيها اههئ داك النهار كنت انا وياك وباك فالدار فاش جا جدك اههنئ وقالنا بلي باغينا فشي حاجة ضروورية
بقات زينب كتعاودلو وتبكي وهو غير كيسمع وذنو تصمكو عليه..ما تيقش ان هذا هو السبب لي خلاها تبعدو على باه..سبب تاافه بالنسبة ليه كون غير بعداتو على قبل لفلوس كان ايكون سبب مقنع أكثر..ولكن هي حرماتو من باه بسبب غيرتها اما الزواج فكان يمكن تخليه يكبر وأكيد هو اياخذ القرار لي يناسبو وماشي ضروري ينصاع لقرار فحال هداك
فراس:(ناض وقف كيمشي ويجي ويغوت)😡كيفاش دابا بغيتي تقولي بلي هربتي باش ما تخليهمش يزوجوني!!كضحكي عليا ياك!!...واش ولد خمس سنين غا يتزوج؟..هادشي راه ما كيدخلش لعقل!!...كون خليتيني وبقيت حتا كبرت واش فنظرك كانو غادي يبززو عليا نتزوجها..من نيتك؟(مسح على وجهو وشاف فيها)سباابك الغيييرة ماشي مصلحتي..سمعتييييي الغيييييرة!وحدة انااانية بحالك صعيييب عليها تفكر فمصلحة شي حد من غييير رااااااسها...نتي كان خوووفك الوحييييد هو نكبر وحتا انا نقبل ونتزوج بهاد خيتي ياااااااااك... نتزوج ببنت لمرى لي نتيييييي ما كتحمليهاش وكتغيييري منهاااااااااااا(ضرب الاباجورة لي حداه)فكرتي غير فراااسك وفشنو باغة ما فكرتي فحتااااا وااااحد فينا(وقف قدامها كيسوط وينهج وعروقو وعينيه خارجين)شنو سميتها؟؟..شنو سمية هاد البنت؟
زينب:ولدي عفاك فهمني اهههن اهننهئ كلشي على قبلك كلشي اهههئ
فراس:(بلغوات)شنووووووو سميتهاااااا
زينب:(بخوف)اههئ رر..رؤيا
خرج فراس من عندها كيغلي من بعد المشاحنات لي داوت بيناتهم وخلاها موراه كتشهق وتعيط بسميتو وهو حالتو حالة غير الشوفة فيه تخلعك كلو عرقان وعروقو منفوخين والسوميج لاصقة عليه بقوة ما عراق...تم هابط فالدروج كيدردك وتصادف مع وحدة من الخدمات
فراس:(تحت السنان)اجي نتي
الخدامة:نننن..نعام اسيدي
فراس:سيري عيطي على يما
الخدامة:شش..شكون؟
فراس:(زفر بقوة وغوت)سيييييري gولي للحاجة رقية تجي عندي
الخدامة:هاا..ولكن!!
فراس:(بعصبية)شمن ولكن سيري عيطيلها..ولا شتي حيدي من طريقي الزمر حتا حاجة ما تعرفولها(دفعها وزاد)
الخدامة:ولكن اسيدي..رر..راه لالة رقية ما كايناش
فراس:(دار شاف فيها مخنزر حتا خلعها)كيفاش ما كايناش!!فين مشات؟
الخدامة:دد..دابا هي ااا
فراس:وااااا هضري المرض شكاين فين مشات؟
الخدامة:مشات فحالها
فراس:كيفاش هادي مشات فحالها!!
الخدامة:(حانية راسها)نهار دالحفلة فاش مشيتي(سرطات ريقها)لالة زينب جرات عليها ومن تما ما رجعناش شفناها وما بقاتش رجعات
فراس:(بلغوات)شناهوااااااااا!
خرجو عينيه وزير على يديه وعاض على سنانو والعرق هابط معاه بحال الا كبيتي عليه شي سطل دالماء كيزفر ويتنفس بوتيرة سريعة ويسوط وزاااد تعصب على لي كان..والخدامة مسكينة شداتها لبولة قدامو بقوة الخلعة
فراس:زيييييييينب اععععععععع(ضرب يدو مع الحيط)
داز فراس فالخدامة حتا كانت اطيح و تم طالع جيهة الغرفة دزينب و لي لقاها قدامو يفرشخها حتا وصل لنص الطريق وهو يوقف كيشوووف قدامو وكيسوط زير على القبضة ديالو بقوة وضرب طبلة صغيرة فالكلوار برجليه بقوة وقلب الدورة و رجع هبط بحالو
جبد تيلي وعيط لواحد من رجالو باش يمشيو يقلبو عليها ويجيبوها فين ما كانت...وهو هز راسو هو والموكب لي ديما معاه ومشى للقصر ديالو لي جا خارج على لمدينة فطريق عين الشق وكالعادة واخذ منطقة كبيييرة باسمو وما كيخليو حتا حد يدخل ليها.. قصر فخم تصميمو ممزوج ما بين كل ما هو تقليدي عتيق وما هو عصري..سقوفة منقوشين بجبص بلدي وفوسط من النقش زجاج بألوان مختالفة وتحت من الجبص كاين أضواء فاش كتشعل كتخلي إنعكاس ألوان الزجاج يضوي القصر بألوان مبهجة..طاولات تصميمها وشكلها لهندسي عصري ولكن منقوشة نقش بلدي..كانت أي حاجة فيه مخلطة ما بين هاد الطابعين
تعاشات لعشية وفراس جالس فالجردة ما بين الورد البلدي لي ريحتو عاااطية ونسمة الهواء كتجي باردة بحكم المكان العالي لي هما فيه..وبيسين كبيير جاي قبالتو الماء ديالو صااافي ماشي معكر..وهو جالس فجلسة بلدية على شكل سداري طالعين فيه 4 سواري منقوشين دلخشب من الجناب حتا تلاقاو مع السقف و غطاو الجلسة..وقدامو مجموعة دالخدادي فالارض فوق الزربية الحمراء لي معروفين بيها الشلوح
جالس وفجنبو طبلة طويلة وفوق منها كاس دالقهوة كحلة وساهي فالماء قدامو وفراسو ألف مطرقة و مطرقة كيفكر فيها..بدل عليه ولابس تيشورط بيضة سامبل مع شورط اسود وكلاكيطة فرجليه وعينيه مركزين فقنت واحد وملامحو باردين ما كيبان عليه والو
هز راسو فاش حس بشي حد جاي جيهتو..هزو ويا ريتو ما هزو..كانت لالة رقية بجلابة كحلة بقب كبير قديمة وشال زرق كاشف وصابو فالقهوي عينيها ذااابلين وزادت ضعافت على لي كانت..دافعها واحد من الرجال قدامو بكرسي وهي كتشوف ففراس من بعيد وتبسملو وعينيها مدمعين
وقف الكارد الكرسي قريب لفراس وانسحب و خلاهم..فراس تصدم كيشوف فيها ويعاود وجامد كيتأكد واش هي هادي ديك المرأة لي رباتو وكبراتو ولات فهاد الحالة غبر غير شهرين ورجع لقى كل واحدة وفين طايحة وحالتها كتشفي لعدا
فراس:يي..يماا!!
رقية:(كتبكي)ول اهئ اهئ ولدي اهننهئ(حنات راسها حشمانة من راسها)
فراس:(هبط حنى على رجليه ونزل لمستواها وكيهضر بالزربة)يما؟ياك لباس؟شنو وقع؟ مالك شنو طرالك؟
رقية:اهئنننئ اهئ ولديي عفاك سمحلي اولدي اهئنننئ كان خاصني نئولك الحئيئة ئبل اهئ اهئ تيئني ما كنتش ئادرة ما كنت..
فراس:(قاطعها بغضب)خلينا من هاد الهضرة و gوليلي شنو وصلك لهاد الحالة..شنو وقع وعلاش هاد الكرسي(قبط فيد الكرسي وحركو بيها)..وفين كنتي فين مشيتي ها؟فهميني راه بربي حتا انحماق
رقية:اهننهئ اهئ(حطات يديها بجوج على وجهو) توحشتك اوليدي توحشششتك اهنهههئ ئلبي كان كيتئطع على فرائك اهئ اهئ
فراس:يما بلا ما تعصبيني..بلا بكاء وقوليلي فين كنتي..شنو لي وصلك لهاد الحالة!
رقية:شغا نئولك اوليدي اهئ اهئ لي وئعلي ما فيه ما يتئال
فراس:(تحت سنانو)يمااااااا راني كنغلي بلا ما تزيدي تكملي عليا غبت شهرين رجعت لقيتك هاكا..راه الا بغيت نعرف شنو وقعلك انعرف اللهم قولي نتي احسن..ياك ما زينب السباب راه بربي و تكو..
رقية:لا لا ماشي هي..اهئ اهههئ هي ما دارتلي والو اهئ اهئ
فراس:وشنوووووو وقع؟هضري!
رقية:اهئ اههئ نهار الحفلة فاش مشيتي اهئ اهئ لالة زينب طرطئات فيا حيت ئولتلك لي كاين اهههئ وفلخر جرات عليا اهههئ أصلا أنا كنت عواالة عليها اتجري عليا
رقية:داك النهار خرجت من الفيلا وواحد من الدراري لي خدامين تما وصلني الله يرضي عليه اهئههئ ئولتلو يديني عند ولدي لكبير محمد اهههئ حيت ما عندي حتا بلاصة نمشيلها من غير دار ولادي اهههن حياتي كاملة دوزتها فدار الحاج..اههئنهئ و دار المرحوم باعوها ولادي وخداو حئهم بجوج وسمحتلهم حتا فحئي اهههئ ما كان عندي بيه غرض مهم راحة ولادي اهههئ مشيت وجلست وفرحو بيا(شهقات)وفاش ئولتلوم لي كاين وبلي جراو عليا من الخدمة اهئ اهئ ما عجبهومش الحال اهئ اهئ ومن بعد ولات مراتو تخليني بالجوع و تعايرني وتخليني نشئى النهار كااامل اهئ وفاش نشكي نئول عييت كتعايرني اههئ وتئولي نتين اصلا موالفة بخدمة الديور اهههئ وديما تشريهالي مع ولدي اهئ..تضيع الحاجة وتسميها فيا واذا طاح واحد فالدراري تئولو انا ضربتو وهو ديما كيجي من صفها(مسحات دموعها)عييييت وهزيت راسي مشيت عند ولدي الصغير اههئ ئلت هو ما ايفرطشاي فيا ومراتو بنت ختي وربيتها على يدي اههههئ ولكن فاش مشيت بئات تضربني وتكويني وما خلات ما دارتلي اهئ اههئ وفليل ئبل ما يجي ولدي كتعطيني نشرب دواء دالنعاس واذا ما بغيتش اهئ اهئ كضربني بالسمطة حتا يزرائ لحمي اهنهن كنت كنبغي نئولا لولدي كتهددني تئتلو اهئ اعئ ما بئيتش كنئدر نحس بذاتي وفاش قلت نخرج فحالي نكري شي بيت بوحدي اهههئ عيطت لمحمد حيت هو لي كنت مكلفاه بالحساب ديالي اهههئ وكل شهر نسيفطلو لفلوس باش يحطهوملي فيه..ئالي واخة لي بغيتي نديروه الواليدة اهههئ حرئني فئلبي حتا واحد فيهم ما حزرني وئالي غير بلكذوب جلس ايما ما تمشيش اهههئ كانو باغين غير يتهناو مني اهههئن(هزات طرف دالشال مسحات بيه عينيها)هزني محمد وئالي راه لفلوس لي انهزو كثيرة وخاص ضروري نكون أنا ئولتلو واخة اهههههنئ نمشي بلحئ راه ما كنئدرش نوئف كانو رجلي كيضروني بالضرب اهههئ مشى شرالي ئالك هاد الكرسي وداني بيه اههههئ بلحئ ما دانييييش للبنكة كيما ئالي اهههئ ضحك عليا حتا لئيت راسي ئدام دار العجزة بوحديتي..ولادي لاحوني اهههئ ولادي لي ولدتهم من كرشي اهنننهئ رماوني وماسولوووش فيا اهئ اهئ نهار كنت بصحتي وخدامة وكل شهر نصيفط لي كتب الله اهههئ كنت غير ايما لحبيبة ايما شنو بغيتي ايما اههههئ ونهار دارت عليا الدنيا حتا ولادي دارو معاها اههههئ ووليت حمل ثئيل عليهم(تقطع فيها النفس)ومن ديك النهار وأنا فديك الدار حتا جاو هادو كيئلبو عليا اهههههئ أنا شرفت اولدي شرفت وولا موتي حسن من حياتي اهئ اهئ كنت كنتسنى غير ساعتي فوئاش تجي اهئ اهااائ فلول كنت كنتسناهم يتنادم معاهم الحااال اهئ ويئولو نرجعو عند يمانا نجيبوها اهئ اهئ تسنيييت وتسنييييت اههههئ وما جا حتا واحد فيهم اهههههئ
هبطات راسها كتشهق وفراس لعروق دجبهتو ولاو كيبانو يتحسبو عرق عرق..عينيه ولاو فحال قطرة د الدم..وصل لواحد الحالة هيستيرية شحاااال ما وصل ليها..كيسوط الدخان من نيفو هاااج وما بقى يحبسو حد كلشي الا عائلتو والناس لي عزاز عليه فهادوك خط أحمر ولي تجاوزو غير يشهد على روحو..خلاه لالة رقية فبلاصتها كتبكي وتعيط وناض خرج كيزدح ويرعرع
رقية:فراااااااس اههههئ لا اوليدي لا اهئ عفاك رجع خليهم اولدي اهئ اهئ
هي كتعيط ولكن شكووون سمعها فراس مشى وما كيشوف حد قدامو حدو هضر مع رجالو وقالهم يجيبولو ولاد لالة رقية وعيالاتهم وخلاهم يتكلفو وهو هبط لصالة التصويب لي عندو فالقصر..كانت صالة خاااوية بغرف صغيييرة من زجاج مقاوم للرصاص وفيها نافذة كتسمحلو يصوب منها..عمر الفردي وما عمل لا كاصك لا والو وحط الهدف قدامو وبقى كيتيري وكل مرة كيصيبو وما خطأ فيه حتا مرة..كيخوي فالقرطاس وعينيه كلهم شر والعصب لي كان فيه تضوبل
دازت ساعة كانو محمد وعصام وعيالاتهم فدوى و إنصاف حاضرين وحاطينهم فوسط الغابة لي دايرة بالقصر..مجلسينهم فكراسى ورابطينهم وسادينلهم فامهم وهما كيبكيو وحالتهم حالة وراكباهم الخلعة ورجال فراس دايرين بيهم من كل جيهة
وقف فراس قبالتهم بعضامتو وهيبتو وعينيه خارج منهم الشياااط..خلاهم غير كيبرققو عينيهم..هما عمرهم شافوه حدهم كانو كيسمعو بيه من امهم..
حطو لفراس كرسي دالخشب قدامهم وهما مصافين شي حدا شي وما ضاير بيهم غير الشجر والرجال..قلبو فراس وجلس فيه بالمقلوب وحاط المرافق ديالو على راس الكرسي وكيلعب بالفردي فيدو
فراس:(ببرود)اكيد دابا كتسولو بينكم وبين راسكم علاش نتوما هنا ياك!!
هز راسو فيهم وهو يشوفهم كيحركو راسهم بالايجاب وكيصدرو صوت الأنين وكيحاولو يفكو يديهم
فراس:مزياااان..انا جبتكم باش نلعبو شوية ونتوما أكيد ما اتردوهاش فوجهي ياكو؟؟(شاف فيهم وضحك بسخرية)ههه دابا نتوما بديتو اللعب وأنا انكمل
نعت لواحد لرجالو بعينيه وهو فهمو ومشى زولهم السكوتش من على فمهم بالجهد حتا غوتو وبداو لغوات ولهضرة والنواح
محمد:شنو بغيتو منا شنو علاش جايبينا لهنا؟؟
إنصاف(زوجة عصام):اهههههئ عافاكم حنا ما درنا والو اهئ هئ
فراس :(بغضب)سكتووووووووووووو..نسمع شي حيوان نطق نخويلو هذا فراسو 😡
كلشي سكت و ضرب الطم
فراس:نتوما درتو غلط وغلط كبيييير ماكيتغفرش.. نتوما تعديتو على شي حاجة كتخصني(ناض وقف وتمشى حتا لعندهم وهبط راسو شوية لعندهم بشوفة قااااصحة وفعينيه حقد كبييير ليهم وكيهضر وهو كارز على سنانو)والحاجة لي كتخص فراس سلطان ما خص حتااا حد يقرب ليها..
فراس سلطان فراس سلطان بقات هاد السمية كتردد فوذانهم وما زادتهم غير خلعة على الخلعة لي كانت راكباهم..ما قدهم فيل زادهم فيلة كانو خايفين منو بلا ما يعرفوه أما دابا عرفو راسهم كبتوها بالمعقول
عطى فراس أوامرو وخلا رجالو يتكلفو ورجع جلس فين كان كيتفرج فيهم..جابو هما البرامل دالماء و حطو كل واحد قبالتو برميل وبقاو كيخشيولهم راسهم حتا كيبغيو يتخنقو ويديهم ورجليهم مربوطين ويرجعو يجبدوهوم..شبعوهوم ماء ورجعو ركبولهوم صواعق كهربائية وهما فازكين وكل ساعة كيضربهم بشحنة كهربائية بتيار مختلف كيبقاو يفيبريو فبلاصتهم وغوتو على احر ما فجهدهم بقوة لحريق وشدات الصعقات...ورجالو ضابطين أمورهوم وما كيفوتولهومش الشحنات لي تقدر تقتلهم فلبلاصة حيث ما باغينهمش يموتو دابا..
بقى فراس جالس قبالتهم وكيلعب بالفردي فيديه ببرودة وعينيه عليهم وهما كيعذبو فيهم ويمرمدوهوم ونارو ما بغاتش تطفى داك لعصب كاامل لي فيه خلاهم يخرجوه فيهم..حتا طاح الليل وعاد أمرهم يهداو ويبيتوهوم بالجوع وغذا يكملو ما بداو..ما بغاهمش يموتو من الدقة الأولى..ورجع هز راسو وركب فالسكوتر الرباعي باش جا لوسط الغابة ورجع وخلاهم هما كل واحد فين سخفان فقنت وحس الدم ما بقاش كيبان فوجههم
رجع للقصر وسول على لالة رقية وعلموه بلي راها فأحد البيوت كترتاح..مشى عندها فراس دخل لقاها متكية وحالتها مقادة وجهها بان فيه الضو من بعد ما غسلولها وعطروها ولبسوها بيجامة طويلة مبردة وجمعولها شعرها..كانو عينيها حومر بقوة البكاء وغير شافتو وهي تزيد فوتيرة البكاء وبدات كتحاول تنوض عندو
رقية:لا اوليدي عافاك اهئ اهئ عافاك اميمتي عافاك..لا ما تئيصهمش اهئ اهئ خليهم منهم لمولاهم عافاك اوليدي اههههئ
فراس:(بعصبية)يما بلا ما تعصبيني الله يرحم باك..شغانخلي فيهم؟واش داكشي كامل لي دوزو عليك ونخليهم..هما راهم تعداو علييييييك وباغاني ندوزهالهم واش كتفلاي عليا!!
رقية:واخة اوليدي واخة اههئ اهئ انا مزاوgة الا ما خليهم فحالهم اههههئ إلا كتعزني غير شوية ما تئربلهمش اهئنننننئ
فراس:(بغضب)يماااااااااا😡
رقية:(قبطاتلو يدو بغات تبوسها)عافا وليدي اهئ اههئ ما بغيت والو عافا وليدي غير خليهم
فراس:(هرب يدو)الله يهديك ايما شكاديري..بففففففف واش ما بقاش فيك راسك هاااا؟واش لي دوزوه عليك قليل؟(عرالها على الكوع ديديها لي باينة فيه واحد لحرقة)شوفي يديك..شفتي؟شوفي حاالتك..وهادشي غير لي شفت اما لي مزال يعلم الله..ودابا جالسة كترغبي وطلبي عليهم؟بقاو فيك وما بقاش فيك راسك!!
رقية:واخة اوليدي ولادي هادوك اهئ اهئنننهئ عافاك اولدي غير على وجهي اهئ اهئ انا مسامحاهم غير خليهم اهههئ
فراس:(مسح على وجهو بعصبية)اوووووووف..(شاف فيها وتنهد)صافي شششش هاني انطلقهم(تحت السنان)بلحق غير على وجهك اما انا كنت باغيهم يبقاو يتعذبو حتا يتمناو الموت وما يلقاوهاش..ولاد ل...(شاف فيها وزير على فمو وسكت)
رقية:لا اوليدي لا اهههئ خليهم منهم للي خلئهم اهئ اهئ اهئ
قراس:(عاقد حجبانو)اوووف صافي واخة لي بغيتي غير سكتي..مهم نعسي ورتاحي دابا(باسلها راسها)
رقية:(زيرات على يدو)اهئ اهئ عندك ا ول..
فراس:(قاطعها بعصبية)وااا صااااافي ايما راه هضرنا(قلب وجهو)اووووف العصب(شاف فيها بنفاذ صبر)رتاحي وهني راسك
رقية:الله يرضي عليك اوليدي اهئ اهئ
خرج فراس وهو منهار ومعصب حاس براسو هاز جبااال على اكتافو..عيط لرجالو وقالهم يطلقوهوم و قطع..ودخل لبيتو وهو كيسب ويتمتم بهمس زول حوايجو ودخل للدوش تخشى تحت الرشاشة وهو والف سؤال كيدورلو فراسو..شنو الفرق بينو وبينهم؟وااالو!!هما ظلمو مهم وعذبوها ورماوها.. وهو مبعد على باه وحارمو منو واخة عارفو شحال محتاجو وشحال متمني يشوفو..هما عذبو رقية شهرين..وهو باه هادي 24 عام وهو يتعذب..حس بتقصيرو كثر وكثر وحس بالوجع لي فقلب باه وعرف بقيمة الوالدين فاش شاف رقية كي كتطلب على ولادها وكتبكي عليهم رغم داكشي لي دوزوه عليها.. بقى جالس بينو وبين راسو وكيخمم فهادشي لي وقع وعرف شنو إحساس الواحد فاش أقرب الناس ليه كيظلموه وكيتخلاو عليه وهو ما بيدو وااالو غير يدعي لله..وحس بباه ووجعو هاد السنين كاااملة.. وقرر وخرج بنتيجة أنه دابا وشنو ما وقع ومن بعد ما زاد عرف علاش يماه فرقاتو على باه فضرووري دابا يرجع يتلاقاه ويشوفو ويبداو صفحة جديدة كأي اب وولدو
☀طلعات شميشة وبدا معاها نهار جديد..نهار قرر فيه فراس قرار لا عودة فيه..ناض متحمس وفنفس الوقت متوتر واخة ما كيبينش..فاق بكرييي وخرج يجري ويتريض شوية..فالفترة الاخيرة كثرو عليه الاحداث وما بقاش مواظب على تمارينو
لبس تيشورط اكس فالزيتي مبين عضلاتو وشورط فلكحل مع سباردين فنفس اللون..سالا تمارين ورجع لبيتو دوش وقاد لحيتو الكحلة وزاد نقص منها شوية خلاها ما قوية ما قليلة وإنما مقادة زادتو رجولة وجاذبية وهيبة..وخرج لبس قميجة فاللون الازرق السماوي بارد بزاف طوالها يديها حتا للمرفق وفتح صدايفها حتا بان شوية من صدرو..سروال دجين مع صباط موكاسان فلبلوغوا رش عطرو وهز تيلي ديالو وساعتو دارها فيدو
داز اولا عند لالة رقية لقاها متكية وهازة تسبيح فيدها طمن عليها وباسلها راسها وقالهم يجيبولو لفطور لبيتها باش يفطرو بزوج..داكشي لي كان فطرو مع بعض ناشطين وخلاها وخرج من بعد ما ودعها ووصى عليها الممرضة لي كتقابلها..وخرج لقاهم موجديلنو طيارتو الخاصة باش ايسافر ركب وقلعو
حطات الطائرة فلفيلا ديال فراس الفخمة لي فطنجة..هبط منها وتمشى هبط فالدروج لي فالجردة ودخل رتاح فبيتو صلى وخذا وقتو وحاول يرتاح مزيان
وصلات لعشية ورجع خرج وركب فسيارتو على شكل كاطكاط كحلة براقة وزاجها فومي كالعادة وما خلى حتا واحد يتبعو..وكسيرا بيها وما وقف حتا وصل قدام محل لبيع الأثاث المنزلي
حاط يدو على الفولون ومدور وجهو كيشووف جيهة المحل دباه..كان حسن خدام مقابل زبونة وكيفرجها على مجموعة دالثريات لي فالسقف..بقى ساااهي فيه وخذا وقتو هاد المرة عكس المرة لي فاتت و حقق فيه مزياان وفملامحو وراقب حركاتو وهو كيتنهد بحسرة..مشات الزبونة من بعد ما شرات لي بغات ورجع حسن جلس فالكرسي ديالو لي مور البيرو الصغير لي عندو حدا الباب
خذا نفس وخرجو..ما عندوش مع فحال هاد المواقف عمرو كان متوتر فحال هاد النهار وما عارفش كيفاش ايتصرف او شنو ايقول لي عارفو أنه اليوم خاص هادشي يسالي..ويرجع كلشي كيما خاصو يكون
خرج من الطوموبيل ديالو وخلى العينين تابعينو..هابط بكل ثقة فالنفس وكبرياء هاز راسو ما كيشوف فحتا حد او وحدة..ولي دازت مسكينة تخلي قلبها عندو وتمشي..سمى الله فنفسو ودخل..حسن غير شافو داخل وقف كيرحب بيه بحال أي زبون..غير من شكلو و هيئتو حس بيه شخصية وعندو وزنو وجاه شكلو أجنبي وحس بيه مألوف بالنسبة ليه بزاف
حسن:(مبتسم) welcom
فراس:احم السلام عليكم
حسن:(متفاجئ)ههه وعليكم السلام شحب الخاطر اولدي..مرحبا!!
فراس واقف ما عارف شنو يقول حاط يد فجيب واليد لوخرا حاطها مور عنقو كيدوزها عليه ويحك شعرو وما قادرش يشوف فباه مباشرة..إحساس بالغرابة نتابو وخلاه يتوتر
فراس:احم امم..
فراس مزال كيفكر شنو يقول وكيفاش وهي تم داخلة فحال لعجاجة..كان عاطي للباب بالظهر ما شافهاش يله حس بيها فاش دازت من حداه وقاصت كتفو وطارت على حسن بتعنيقة حتا كان غادي يطيح وعمرات المحل بريحتها لي تخلطات مع عطر فراس الرجولي
دخلات رؤيا لابسة كسوة بيضة اوفشولدر لاصقة عليها من جيهة الخصر وواسعة وطويلة من تحت..وهازة صاك طويل كحل وصندالة صيفية خفيفة فالابيض فرجليها..وطالقة شعرها الاسود لي زاد طوال كثر
رؤيا:باااااااابا هههه توحشتك
حسن:ههه يا لحمقة عاد فالصبح كنت معاك
رؤيا:(بعدات عليه وهي حاطة يديها على كتافو) يااااك هي دابا ما توحشتينيشي كيما توحشتك
حسن:(شدها من حناكها و جبدهم)وشكون ما يتوحش هاد الزين هادا ههه غير كنضحك معاك
حسن رجع شاف ففراس لي غير كيشوف فيهم ورجع حط يديه بزوج فالجيب وهز راسو للسما بغرور و كيطلع ويهبط فرؤيا بنص عين ومخنزر
حسن:اااه سمحلي اولدي..بنتي تسناني نشوف السيد شنو بغى ونخرجو..
رؤيا:(كتهضر و كدور موراها)ههه اه واخة ها..نا..كن😳
رؤيا شافتو و تبلوكات بقات غير معليا راسها و كتشوف فيه و كتأكد منو واش هو او لا..و طاح فبالها الف سؤال علاش هو هنا؟..ومع حسن؟واش عرفو بعضهم؟ فين كان هاد الفترة ؟ألف سؤال و سؤال جاو فبالها وهي كتشوف فيه اما هو واقف نفس وقفتو و مخنزر فيها
رؤيا:(بصدمة)ففف..فرااااااس
فراس:😒
بقات ساكتة وكتشوف فيه شحال ما متيقاش بلي هذا فراس لي قدامها
حسن:(باستغراب)هه لا..(شاف فراس)اممم.. صراحة فاش دخل حسيت براسي شايفو فشي موطع و ما عرفتشي قلت غير جابلي بالي
فراس كيشوف فباه وساهي فيه حاجة غريبة تكون واقف حدا باك وهو ما عارفكش..اكيد ما ايعرفوش وهو اخر مرة شافو كان ولد 5 سنين ودابا هو راجل فعمرو 29 سنة وما بقالو والو ويدخل لثلاثينات..بقى كيشوف فيه وعينيه حومر كيبينو كمية الحزن لي فيهم..ورؤيا حالة فمها فيه وحسن واقف متبسم كل ساعة يشوف فواحد فيهم كيتسناهم يجاوبوه
فراس:(صوت مبحوح)ال..الواليد...!!
الصمت سيد الموقف..كلشي ساكت وكيشوف فلي حداه..وحسن ما فاهم والو كيشوف ففراس ويرجع يشوف فرؤيا
حسن:(باستغراب)كيفاش اولدي هه يمكن سمعتك غلط!
فراس:(بحسرة)لا..لي سمعتيه الواليد هو لي كاين
حسن:كيفاش الواليد هه رؤيا فهميني؟شي حد يفهمني؟
رؤيا:(عينيها مغرغرين)بابا..هذا ف ف فراس
حسن:(شاف فيها بصدمة كأنه ما تيقش شنو سمع وكيرجف)ششش..شكون فراس؟هه ماشي لي فبالي ياك اههئ..(نزلو جوج دمعات من عينيه)
رؤيا:(بدات تبكي معاه)اههئ لا هو..اه هو لي فبالك هذا(شافت ففراس)هذا ولدك ابابا اهئ اهئ ولدك فراس!
هز راسو شاف فولدو ودموعو كيتسابقو وحدة مور وحدة كيتنفس بالزربة وكلو كيرجف وفراس واقف قدامو كيشوف فيه بدون حركة..بقاو هاكاك لمدة غير لعينين لي كيهضرو وكيوصلو شحال من حاجة حتا حط يدو على راس الكرسي قابط راسو باش ما يطيحش
وهما غير شافوه ايطيح وجراو عندو بجوج قبطوه حتا جلسوه وعطاهو يشرب وقبطو فيدو لي كيرجفو شرب شوية ورجع حطو وهز عينيه ففراس لي رجع شوية للور كيشوف فيه
رؤيا:هئ بابا شعندك؟كتحرقك شي حاجة اهئ اهئ
حسن:اهههئ ووو.ول..ولدي اهئ اهئ اهئ
مد يدو كترجف جيهة فراس..ورؤيا رجعات للور شوية كتبكي وفراس مد يدو قبطلو فيديه وقرد قدامو وعينيه مدمعين ما باغيهمش يهبطو قدامهم وما باغيش يضعاف والبكية كتبان غير فصوتو المبحوح لي كيرجف شوية
فراس:(حابس البكية وصوتو كيرجف)هانا حداك دابا..(سكت)ولي فات مات
بقاو هكاك كيشبعو من بعضهم لمدة وحسن كل شوية يبعد عليه ويحقق فيه مزيااان من راسو حتا لرجليه ويرجع يجرو لعندو كيبوس فيه ويعنق وكلو كيرجف والسخفة شاداه ما متيقش راسو ورؤيا موراهم كتبكي شوية وضحك شوية وفرحانة..حتا بعد عليه وشاف فيه بعينيه الحومر والفرحة خاارجة منهم
فراس:(شاف فرؤيا ورجع قلب عينيه)هادي قصة طويييلة من بعد ويجي وقتها
حسن:هه ماشي مهم اصلا مهم هو نتينا دابا هنا(تنهد)الله يااا ربي كبرتي اولدي كبرتي بزااااف..رجعتي طول مني هه أخر مرة شفتك كنتي يله كتوصلي لركابي اهههئ كبرتي وما شفتكشي اوليدي اهئ اهئ
حسن:اه اه ههه نمشيو باش حتا جدك يشوفك ههه عرفتي ايفرح ايفرح الله يا وليدي جيتي وجبتي معاك الفرحة لي هادي سنين وهي هاجرانا
فراس:هه
فراس اكتفى انه يتبسم كتعبير لفرحتو ما عندوش مع داكشي دالعواطف وما كيعرفش يتصرف فبحال هاد الحالات وكيردها للسكات
خرجو مجموعين وحسن معنق فراس وخارجالو الفرحة من وذنيه ورؤيا فرحانة لفرحة باها وحتى فراس ما كينكرش بلي فرح وعجبو الحال ولكن مزال ما ولفش وكيحاول يتأقلم..حسن تم خارج ومخلي المحل ديالو نسى ما سدوش حتا فكراتو رؤيا ورجع سدو كيضحك حيت تلف بقوة الفرحة وما بقى كيشوف حد من غير ولدو ركبو فالاوطو ومشاو رؤيا جلسات اللور كتبان لفراس من لمراية وفيما يبغي يشوف فلمراية كتبانلو كتبسم وضحك مع ضحكة باباها..وحسن الطريق كاملة وعينيه غير على ولدو وكل مرة يسولو سؤال على حياتو
حسن:قلي اولدي خدام كتقرى؟زوجتي ولا مزال
فراس:(كيسوق بيد وحدة بكل اريحية ويهضر وحاط يدو على الشرجم)هه لا خدام الحمد لله ولكن لقراية ما كتحبسش ماشي كنقراو غير باش نخدمو
حسن:هه هادي كاينة الواحد خاصو يقرا باش يثقف راسو
فراس:وي
حسن:وشني قريتي فاين وصلتي؟
فراس:عندي مجموعة دالشهادات والدوكتورات فالهندسة الميكانيكية وحتا المعلوماتية والكنولوجية
بقى معاه حسن كيسولو على تفاصيل قرايتو فين وكيفاش وفاش خدام وفرح بزااااف لولدو فاش عرفو قدر يوصل بمجهودو الخاص وحقق ذاتو
حسن:(مبتسم)تبارك الله اوليدي ما شاء الله عليك
فراس:هه الله يبارك فيك
حسن:هه ايوا لقراية ولخدمة الحمد لله والتباقي ههه
فراس:(شاف فيه باستغراب ورجع شاف فالطريق) هه تباقي؟
حسن:ايوا الدنيا ماشي غير قراية وخدمة اولا ههه ما زوجتي ما جبتي وليدات ما والو
فراس:(ضحكة جانبية)هه
شاف فرؤيا من لمراية وهي كانت مركزة معاهم شافتو شاف فيها وميقات فيه عينيها ورجعات قلبات وجهها
خلقت له الجزء الرابع
محتوى القصة
التنقل بين الأجزاء