طلع الصباح وبانت شمسو لمضوية...ودوزاتو هي وشامة فبيتها مخشية...نسات همها معاها وبانت ضحكتها شوية...داز النهار كامل وتعاشات لعشية...كانت كتصلي فاش دقات عليهم هنية...وجدو راسهم وتوجهو لقصر الانوار فين غتكون لعراسية...دخلات هي حانية الراس وفعينيها دمعة مخفية...وشامة موراها كتبركك ودور فعينيها فحال شي مجلية...حلات فمها كتشوف فجنابها هنا شوية ولهيه شوية...داخلة مع الباب وتحت رجليها زربية حمراء طويلة تقليدية...على ليمن وعلى الشمال طبالي بويض تزينو زينة عصرية...وفوق منهم شميعات صغار خلاو الجلسة تكون رومانسية...قدام كل كرسي تحطات علبة صغيرة ذهبية...على شكل صندوق وفيها هدية رمزية...تنقشات اسمائهم عليها بحروف فضية...هزات عينيها فالسقف لي مدلية منو ثرية...كبيرة ومضوية وعاطية للمكان جاذبية...سرحات عينيها قدامها وبانتلها جلسة ملكية...بيضة ودايرة بورود كلها طبيعية...ومزينة بأضواء خفيفة عطاتها لمسة سحرية...حلات فمها مبهوضة فديك الجمالية...وتبعات رؤيا لي دخلات لبيتها وكتهضر كلبوهالية...ورؤيا ساكتة وكتسمعلها وهي كتعاود بكل ما فيها من نية...عمرات القاعة والناس بداو يجيو شوية بشوية...وطلعات شامة كتجر فلبستها الموبرة والشعورات مدلية...طالقة زينها وعاجبها راسها وكتعوج فالمشية...وتبعاتها رؤيا بقميص بيض مخيط خياطة بلدية...شربيل فرجليها وفوق راسها سبنية...ووجهها مغطي بشبكة كبيرة ذهبية...على جنابها بنيتات صغار بسبنية جبلية...وفيديهم شميعات وعلى وجوههم تبسيمة ملائكية...وقدامها زوج هازين طيفور وكيخلفو بشوية...وموراها النكافان كيعشقو ويصليو على نبي الأمة الإسلامية...جلسات وكلشي كيشوف فيها وهي لراسها محنية...والعداية بدات تردد الموال كيف شي اغنية..."داري يا دار لبنات البارح عامرة واليوم خوات"...هاد الجملة خلات الدموع يتسرسبو من عينين هنية...ورؤيا لقاتها سبة تبكي وتشهق وتطفي نار الكية...حطولها الورد فاليدين والشربيل تبدل بواحد جديد مخدوم خدمة فاسية...والنسا يطبلو ويقولو اللالة مود يد موودو لحناني ترودو العزيزة عليا...هبطوها وخلاو الناس فالماكلة والحلوى والشطيح ملهية...ورجعو طلعوها وهي لابسة الشدة الطنجاوية...كلشي كيشكر فزينها ولبنات كيقولو يا ربي عطينا من زهرها غير شوية...عينيها فالارض ما هزاتهومش حيت هادي هي العادة الشمالية...جلسوها فبلاصتها كترجف وقلبها كيدق الدقة المراكشية...وجمالها البسيط بان فتان فاللبسة الخضراء الملكية...رجعو هبطوها حتا طلعات بلبسة صفراء ونقرية...كيسميوها لبسة الاميرة لي جات فيها كي شي وردة جورية...وعلى ألحان"يا أميرة يا بنت الأمراء"تهزات فالعمارية...عائلتها دايرين بيها يغنيو ويشطحو ويقولو ألف هنية وهنية...وهي كترسم ضحكة مزورة فوسط هاد الاجواء الحماسية...ومابين يديها سليلة فوق رجليها لمثنية...كترمي فالشكلاط والحلوى وكلشي كيعيط لوحي ليا...طاحت يديها على طوبة دالسكر وهزات راسها فهنية..ورجعات شافت فكريمة لي لابسة تكشيطة زيتية...وغلباتها الضحكة حتا بانت ضرستها لخرانية...نزلات ورجعات طلعات بلبسة فلجرونة تصميمها مغربي وفالطابع هندية...طغى زينها وبانت كيف البلارة وهما يغنيو يا لالة لعروسة يا لمحضية...حتا بانت رقية داخلة بلبسة زرقاء سماوية...وفالباب عيساوة كيغيطو ويطبلو هما والطقطوقة الجبلية...ولعيالات قدامها هازين طيافر كبار وصنادق منقوشين نقشة مغربية...هازين فيهم دفوع ملكي وجايبين هدية واااا شمن هدية...هزات عينيها فيها كضحكلها وعلاش لا وهاديك خالتها رقية...باستلها يديها وهي باركاتلها وقالتلها الله يرضي عليك المرضية...ومشات جلسات مع النسا وسلمات على هنية..وهي كتشوف فعروسة ولدها لي ما ولداتو ما زحمات عليه فحال أي ولية...
دخلت رؤيا كتلبس اخر لبسة ليها وتحط موراها لعشاء تحط فالاول طبق اكلات بحرية مع لي صالاد ومقبلات تهز وتحط موراه حولي مشوي فكل طبلة مع دي صالاد مختالفين تهز وتبعو الطبق لي موراه والعصائر كيتفرقو فكل مرة وختموها بدي بتي طارط لكل واحد مع العصائر..سالاو لعشاء وتطفى الضو وشعلو مصابيح وجهوها لوسط القاعة على طول السجادة الحمراء وبانت رؤيا داخلة من الباب بفستان ابيض منفوخ كفساتين الاميرات مزين بورود مترشة فكل جيهة من الفستان..كتافو طايحين ومزينين بورود صغيرة هابطة على الصدر تابعها من لور ذيل طويل يديها مجموعين قدامها هازة بيهم بوكي دالورد ابيض وحاطة فعنقها كولي من الالماس وحلاقاتو وكورميطو جابولها فراس نهار الخطبة..شعرها بوكلاتو و تجمع على شكل مشيطة مرخوفة نازلة على ظهرها العريان وتحط فوقو تاج اميرة وموراها طرحة طويلة مزينة بنفس شكل الفستان بورود صغيرة..ماكياج هادئ مركزين فيه على العينين فقط كانت فاتنة بمعنى الكلمة كل مرة كتفاجئ الحظور وتبهرهم بجمالها.. داخلة وما كيبانلها حتا واحد حيت كلشي مظلم وهي الوحيدة لي كتبان فوسط الحضور كتمشى وقلبها كيحرقها..اي بنت كتسنى هاد النهار لي تلبس فيه الفستان الابيض لحبيبها وهي فرحتها ما كملاتش بيه..داخلة بثبات على ايقاع اغنية بيانو هادئة..الضو ضارب فعينيها وخلا الدموع لي فيهم يبريو..هنية متبعاها بعينيها وكتبكي وفرحانة بيها واخيرا وصلات الامانة لي كانت عندها واخة ايجيها لفراق صعيب..هزات رقية يدها حطاتها على كتفها كتصبرها وكتحاول تخفف عليها تبسماتلها ورجعو كيشوفو فرؤيا مأخوذين بجمالها والكاميرا كتصورها وهي داخلة حتا وصلات لحدا المنصة ووقفات ودارت وجات الزيانة موراها طلقات لاغوب وقاداتها وقادات الطرحة موراها..
تبدلات الاغنية وعلمو النسا لي بغات تستر راسها..تطلق دخان على طول الطريق وكلشي دار كيشوف جيهة الباب..وهي علات عينها بشوية وشافت قدامها وهو يبانلها واقف قبالتها فلباب بعيد عليها بأمتار لابس كوستيم فالاسود وقميجة بيضاء مزيرة عليه وبابيون سوداء وصباط كلاص داخل عينيه غير عليها دخل بهيبتو وهاز راسو وخاشي يدو فالجيب كالعادة زاد قاد لحيتو ونقص منها ومن شعرو..كلشي تبهض فجمالو ورجولتو وريحتو لي ملآت القاعة وبقاو غير حالين فمهم فيها وفيه..هي واقفة فآخر الطريق كتشوف فيه و هو واقف فأولو..واقف مبهور فيها ما تخيلهاش بهاد الجمال الفتان اميرة خارجة من قصص الخيال هي الوحيدة لي كتبان فالقاعة كاملة وفباقي القاعة غير الظلام..تقدم بخطوات ثقيلة على إيقاع اغنية "بيت حبيبي"..هو كيقرب وكيزيد يتبهض فيها وضهرات على فمو ابتسامة جانبية وهي كتشوف وما نزلاتش عينها..قرب منها ووقف قبالتها قريب ليها كيتفحص ملامح وجهها..شم ريحتها وتغلغلات فمخو..كانت آسرة بالنسبة ليه كيتأمل فيها وريحتها ذوباتو..قرب منها كثر وحاوط راسها بيديه وما حسات الا وشفايفو كيطبعو قبلة حنينة على جبهتها..تزيرات وحسات بكهرباء سرات فجسمها من كثر حنية قبلتو ليها بعد ببطء وعينو فعينيها وما نطق بحتا حرف حتا حس براسو وتنهد ورجع وقف بجنبها وعطاها يديه..شافت فيه وشاف فيها ورجعات تنفسات وهزات يديها وحطاتها فوسط يدو
"ودوني على بيت حبيبي نعيش مع بعض فيه 🏡
دا بئلنا مدة طوبة طوبة بالحب بنبنيه ♥
ان لبسة الطرحة ومش سيعاني الفرحة وانا وياه 👰🏻
إرمو الورد علينا وبركولي بيه 🌸
هسمع كلامو وتحت أمرو في لي يئولي عليه ☺"
تمشاو بشوية على ايقاعات الاغنية والدخان والظلام خلق جو رومانسي وخلا كلشي هايم فيهم
رؤيا:هه يانا بغيت داك البيت يريب على مخك إن شاء الله
فراس:الصمت
"ها أكلو بإديا ومش هخاف وخبي🎶"
رؤيا:السم ان شاء الله اوليدي غير تسنى عليا
فراس كيسمعها ومخليها تهضر وهو كل ساعة يخطف فيها الشوفة ويرجع يدور وجهو وريحتها وهي قريبة خلاتو يتسحر وحس براسو ترفع وعاد استوعب أنها رجعات مراتو
وصلو للباب ودارت رؤيا من بعد ما سمعات أصوات لبنات موراها شافتهم مجموعين موراهم وفهماتهم..بعدات يديها من يد فراس وشاف فيها باستغراب دورات وجهها وقبطات البوكي بزوج يدين ورماتو موراها وخلاتهم يتقاتلو عليه..رجع قبطلها فيديها وخرجات هي وياه مع آخر كلمات الاغنية
🎶انا شايلة إسمو وفيه بئاسمو شريكتو في الحياة..زفونا يا ناس خلونا نروح ئوام 🎶
خرجات رؤيا وفراس وقبل ما يوصلو للباب الخارجي قربات منها الزيانة رمات عليها سلهام أبيض وحطاتلها القب على راسها مغطي النص فوجهها..قرب منها حسن كيباركلها وكيعنق فيها وتبعو جلال و ابراهيم كيشوف فيها من بعيد و ما قادرش يقرب و هنية موراها اتسخف بلبكا ورقية والعائلة كيصبروها،كان القصر محاط برجال فراس وما مخليين حتا شي حد يقرب منو وخاصة الرجال..ودعوها بالاحضان و الدموع وهي حلفات ما تهبط قطرة قدامو
قربات من باب القصر ليموزين سوداء..سلمات رؤيا على عائلتها لي خلاتهم موراها كيبكيو ويدعيو معاها وطلعات فالسيارة والزيانة موراها كتعاونها تركب وتقادلها لاغوب..حسن طبطب على كتف فراس وهو باسلو راسو وودعهم ودار ركب حتا هو،تحركات السيارة ديالهم وتحركو معاها سيارات سوداء قدامها وموراها عامرين برجالو
هو جالس فجيهة وهي فجيهة اخرى قبالتو فستانها الابيض مفرش حداها ومغطي لكوسان كامل بحجمو لكبير بدات السلهام على وجهها وشافت جيهتو كان عاطيها بالجنب كيشوف فالطريق وساكت..عملات فحالو ودورات وجهها جيهة السرجم وعينيها كيتلصقو عليها بالنعاس..طال الصمت حتا وقفات بيهم السيارة وتحلات الباب،نزل فراس وتبعاتو هي مضهشرة وكتجر فجلاليلها وحاصلة مع لاغوب والطالون وفلخر زولاتو وبقات داخلة بلحفا..دخلو لفيلا دفراس كان سابقها كيخلف بالزربة وهي داخلة بشوية عليها.. دخلات للفيلا ما بانلهاش ولقات وحدة من الخدامات واقفة فلباب كتستقبلهم
هبطات الخدامة ودفعات رؤيا الباب ودخلات..تقدمات خطوات وحلات فمها وبقات كدور فعينيها..كان الضوء مطفي وفوسط البيت الكبير شاعلين شميعات صغار فالارض وفوق الكوافوزات والخزانات واوراق الورد الاحمر فكل قنت وفوق الناموسية لي مغطية بلحاف ابيض ومكسرات ومأكولات خفيفة منزلة فوق طاولة مدورة بزوج كراسة فالبالكون والشمع مشعول فوقها
رؤيا رمات السباط من يديها جا فالارض..
رؤيا:(بغضب)لااااا صافي كملات..لحيوان من نيتو شهاد الزبل..تفووو فأحلامو والله لا كانت ليه..(كتحل خيط السلهام لي على عنقها وكتسوط)هه عول اسي فراس باغي الزواج هانا انوريك الزواج على أصولو..والله حتا ندمك على الساعة لي خذيتيني فيها(رمات السلهام فالارض )عاملي فيها سي رومانسي واخة هاحنا انشوفو..اوف اوف(غادة جاية وكتسوط على الشمع)اليوم نهجرو نطاسيلتك..هييييييه تفو كنت انجي على مناخري..هادي غوب ولا بصلة الزمر على نهار كحل..فاينيا..فاين..هاااا هي..
قربات رؤيا حدى الباليزة ديالها وشعلات الضوء فالبيت..حنات حلاتها كتجبد حوايجها وتنكر..جبدات منها بيجامة سروال ابيض بتيشورط ديالو فلحمر وهزات لاتروز ديالها لي اتحتاج وكلاكيط جديدة لبساتها فرجليها ودخلات للحمام لي فلبيت..كان حمام كبير بدوش وجاكوزي وطواليط فالجنب وعندو جيهة كلها من الزاج عااالية وكطل على الجردة من فوق دخلات كتجر فكسوتها ووقفات قدام لمراية كتفك الطرحة زولاتها وهبطات كتاف الكسوة بشوية حتا زولات لاغوب وتقابلات مع لمراية كتفك التاج وكتفسخ المشطة سالات وجبدات مزيل ماكياج وقطن كتمسح بيه وجهها..تخشات تحت الدوش خذات حمام خفيف وخرجات كتفوح منها ريحة باندوش الفراولة..لوات عليها فوطة نشفات راسها وشعرها ولبسات حوايجها وجمعات شعرها اسفنجة وخرجات هازة لاغوب فيدها ورماتها فوق لفوطوي ورجعات كتشوف فمنظر لبيت تبعات الشمع كامل كتطفي فيه حتا سمعات لباب تحل ودخل فراس كيشوف فيها وفلبيت باستغراب وطلع حاجبو
رؤيا:اووووه شو شكون جا سي رومانسي 😡
فراس:(بتعب)اوووف مالنا عاود على لغوات شنو واقع!
رؤيا:شني واقع؟يانا لي خاصني نسقسيك شني واقع؟ شني هادشي هااا؟ياك ما زيالك بلي يانا وياك انكونو فحال اي راجل ومراتو هه لا كتسمع غير بلا ما تحلم..مزوق البيت بالورد والشموع شني زيالك شني قالك داك ثنثون دمخك..هااااا الورد..وهاااا الشمع (هزات لغطا رماتو فالارض)يله وريني شغاتعمل!
فراس خنزر فيها وقلب وجهو كيزول كوستيم وكيفتح لبابيون بالنترة
رؤيا:شششني كتعمل قلتلك بلا ما تحمل ااا زعما بلا ما تحلم..خرج فحالك خرووج!
هي كتهضر وفراس زول كوستيم رماها فوق الفوطوي حدا لاغوب ديالها وقلب وجهو زول السمطة رماها حداه
رؤيا:شو راه ما كنضحكشي سمعتي والله وتقرب مني حتا نن..
فراس:😏
رؤيا:شعندك كضحك..ما كنتفلاشي را..
سكتات رؤيا من بعد ما شافتو هز حوايجو وداخل للحمام
رؤيا:فااااين ماشي خرج فحا..(طاااق)
فراس دخل و زدح الباب خلاها كتغوت موراه
رؤيا:انعنعنعننن تفووو
بقات رؤيا غادة جاية فلبيت وكتسوط وحاطة يديها على جنابها كتسناه يخرج
خرج فراس لابس شورط فلبلوسييل مع إكس بيضة وشعرو فازك هابط على عينيه وريحة باندوش كتفوح منو بقات كطلع وتهبط فيه ما شافش جيهتها وتم غادي جيهة الناموسية وهي توقف قدامو حاطة يديها على جنابها
رؤيا:فاين ماشي بالسلامة؟
فراس:(حط يدو فجيابو)انمشي نعس كاين شي اعتراض!
رؤيا:لا موت نتينا كاع اذا بغيتي بلحق ماشي هنا وماشي فهاد البيت
فراس:وعلاش بالسلامة!
رؤيا:(ربعات يديها)حيت هذا بيتي ونتينا مشي فتش على شي بيت ياخور
فراس:هذا بيتي سمعتي واذا كان شي حد ايخرج فهو نتي
تخطاها وبغى يدوز وهي ترجع توقف قدامو
فرس:(غمض عينو بنفاذ صبر)
رؤيا:كااااااان بيتك..دابا رجع بيتي ونتينا مشي فتش على شي بيت ياخور..يانا من هاد البيت ما انخرجي سمعتي!
فراس:(بهدوء)ما تخرجيش غير خليني نعس
دفعها وزاد وهي ترجع توقف قدامو وفتحات يديها ورجليها حابسالو الطريق
رؤيا:(بتحدي)قلتلك خرج يانا وياك ما انبقاوشي فنفس البيت..يله خرج!
فراس:(طلع فيها و هبط)حيدي من قدامي حسن ليك..(ودفعها وتمشى جيهة الناموسية)
قبطات راسها رؤيا باش ما طيحش ودارت بالزربة كتجري وسبقاتو ترمات على الناموسية بالعرض
رؤيا:والله لا نعستيها😡
فراس:(غلباتو الضحكة وما بغاش يبين)نوضي تحركي راه غنفرع جد ملتك
رؤيا:(عقدات حجبانها)ما كنخافشي غير خلي تهديداتك عندك
فراس:(ربع يدو وطلع حاجبو)دابا علاش كتقلبي!
رؤيا:تعطيني التيييساع وتخرج فحالك!
فراس:مزال ما خلاقش هذا لي يخرجني من بيتي سمعتي ودابا كحزي لهيه
دفع رجليها شوية وبغا يتجبد فوق الناموسية وهي تكور تقلبات على كرشها وكحزات لفوق جيهة لمخاذ
رؤيا:يله واا نعس دابا!
فراس:بركة من التبرهيش وبعدي خلينا نسهطو
رؤيا:(ناعسة على كرشها وكطل عليه بالجنب)التبرهيش هو لي فيك اسي..اذا بغيتي تنعس مشي نشي قنت ياخور
فراس:رؤياااااااااااااا
رؤيا:خريييييييواااااااا
فراس:اجي لمك هنا ما بغيتيش تخرجي..هانا انوريك
حنا فراس وقبطها من رجليها وبدا كيجر فيها..وهي قبطات فحرف الناموسية كتجابد معاه هو كيجر وهي كتجر
رؤيا:(بلغوات)وااااارخييييي بعد وااااااااااااااع..والله لا نعستيها رخيييييي
فراس:(جاتو الضحكة وحابسها عاجبو اللعب معاها وما بغاش يبين)ها حنا انشوفو واش انعس ولا لا..
فراس:(كتفلها يديها بيديه وخشالها رجليها ما بين رجليه ما بقاتش قادرة تحرك وهو كيهضر مرخي بنعاس)علاش كتقلبي هاد الليلة ها!
رؤيا:نتينا لي بديتي..رخي مني اووووووف انتخنق رخيييي!
فراس:(خشا وجهو فعنقها كيهضر حدا وذنيها)هاكا اتبقاي حتا يصبح الحال!
رؤيا:شنيييي!!رخيي مني رخيييي..اووووف بعد ما باغاشي نعس حداك..جبتيلي لخنقة رخي مني اووووف
فراس:(غمض عينو)لخنقة؟اووووك ايوا ابب غير ضربي لحساب لهاد الخنقة كل ليلة..نتي لي جبتيها لراسك
رؤيا:انننهننهن..انموووت زول زواااال اعععع(عضاتو من دراعو لي دايرة عليها)
فراس:(عضها فعنقها)
رؤيا:اااااااي
فراس:زيدي عضي نشوف
رؤيا:ااااي عنقي انننهن وا غير طلق مني منزيدشي ندوار بيك
فراس:نن رشقاتلي عليك دابا..نعسي وسكتي
رؤيا:اوووووف انخليلك البيت بلي فيه غير طلق
فراس:الصمت
رؤيا:وا معاك..اممممم(كتجبد باش تفك راسها وهو مزير عليها)اوووووف
بقات رؤيا كتعافر وتفركل وهو حاكمها وهي كتنكر وتغوت وحابسة لبكية وهو ساكت مغمض عينيه وحاكمها مزياااان عيات ما تحاول وحتا بغات ترجع تعضو وهي تفكر عضتو ودارت بناقص وبقات كتقاتل وتغبن حتا عيات وبداو عينيها يتلصقو وما حساتش براسها حتا تغمضو عينيها ونعسات فحضنو وهو ضامها ومزير عليها وخاشي وجهو فعنقها ونفسو كضرب فيها والقمرة ضاربة فيهم والهواء داخل من البالكون كيحرك الستائر بشوية وكيلعب بالورد لي فالارض ويديه ويجيبو حتا صبح الحال
☀يوم جديد شمسو منورة..ناضت كتكسل وتجبد وتدور بجنابها وتحك فعينيها..
رؤيا:(دايخة)فاين يانا؟هذا ماشي بيتي؟(دورات عينيها وشافت فستان الزفاف فوق الفوطوي ولفراش مرمي فلارض والورد وهي تفكر)اووووووف
ناضت وقفات تمشات بشوية مضهشرة وكتشوف فأرجاء لبيت وكتفكر ليلة لبارح وتسوط..دخلات للحمام عمرات لبانيو وكبات فيه جيل بريحة الفراولة وتخشات فيه..دوشات وتوضات..سالات وناضت لبسات عليها بينوار بيض وجمعات شعرها ففوطة وخرجات وهي كتخمم فوليد و بالها معاه
حنات كتجبد حوايجها من لافاليز لي حدا الناموسية..هزات ملابس داخلية فلغوز بارد وطوب وشورط بويض مشبكين من الاطراف..حطاتهم فوق الناموسية وجبدات زوج قمصان واحد فلصفر بارد توب جوهرة و مخيط براندة خفيفة بلون الاصفر مغلوق بدرجة وحدة على توب لقميص وبيدين طوال..وقميص اخور فالازرق فاتح ثوبو ساتان دو صوا فيه وردات مطبوعين فيه من نفس الثوب ومخيط بخياطة بلدية بعقيدات صغار بلديين حتا للتحت وبيدين واصلين للمرفق فرشاتهم فوق الناموسية وحطات يديها على جنابها كتشوف شنو تلبس فيهم
سمعات صوت من موراها حدا وذنيها.."لزرق حسن"..دارت رؤيا وهي تلقاه لاصق فيها كان لابس شورط بيض مع تيشورط فالزيتي وكلاكيط وساعة فضية روليكس فيدو لي خاشيها فالجيب مطلع شعرو وريحتو لي ما كيبدلهاش عاطية منو
رؤيا:هييييييه
دفعاتو وبغات تهرب للحمام وهو يقبطها من المرفق ديالها ورجعها قبالتو قريبة ليه..صدرها كيطلع ويهبط ومخرجة عينيها فيه وهو كيبتسم ابتسامة جانبية
رؤيا دخلات للحمام وسدات عليها كتلبس وهي معصبة وغير كتسوط ودور دور وتشوف فعنقها لي بانت فيه عضة دفراس وصبحات حمرااء
شامة بقات كدور فلبيت وتلاحت فوق الفوطوي جالسة
شامة:ااخ يا الحب ااااخ ههه
لبسات عليها قميصها الازرق الفاتح وواتاها وجا مع بشرتها البيضة وعطا نضارة لوجهها وخرجات من الحمام كتنشف شعرها لقات شامة جالسة
خنزرات فيها و مشات جيهة لافاليز ديالها جبدات سيشوار وحطات قدامها ماكياج وجلسات قدام لمراية وشامة متبعاها بعينيها وحابسة الضحكة
بقات جالسة وكتنشف فشعرها حتا تمت هنية وحبيبة جداتها ثانية وكلثوم داخلين متابعين عندها للبيت كيزغرتو وموراهم الخدم مدخلين الشوانط ولحوايج والكادوات لي جاوها فالدفوع ومن عند الناس..ووقفات كتسلم عليهم وهما كيعشقو ويباركولها وفرحانين بيها وكيشوفو فارجاء البيت ويتغامزو بيناتهم خرجو الخدامات من بعد ما دخلو كلشي سدو الباب وجلسو تصافو حدا شامة وهنية شدات فحفيدتها وجلسو فجنبهم فوق كراسى على شكل بوفة ورؤيا جلسات وحشمانة منهم ومن منظر البيت وندمات لي ما جمعاتوش هو الاول
كلثوم:صباح الخيييير على لالة لعروسة ههه
حبيبة:كيف صبحتي ابنتي مزيانة
رؤيا:الحمد لله
هنية:تبارك الله على بنتي صابحة منورة ونازل عليك السر من عند الله
رؤيا:هه
كلثوم:ايوا ضروري ماشي راها عروسة ههه(غمزات رؤيا)
شامة:ههههه لااااالة زينة وزادها نوووور لحمااام(كتبرك على لحروف)ههههه
كلثوم:هههه
رؤيا:(خنزرات فيهم)
حبيبة:كونو تحشمو ادوك لملاعق..ولا نوضو خرجو
كلثوم:لا لا صافي هااا يانا ساكتة ههه
هنية:هههه
بقاو جالسين يتجمعو كيطمنو عليها ولبنات مطلعينها عليها وفلخر ناضت هنية وجرات رؤيا بعيد على لبنات وتبعاتها حبيبة وقنتوها مع الناموسية
هنية:احم ايوا امدرا ابنتي!
رؤيا:(بعدم فهم)هاا!
حبيبة:واش كلشي مزيان؟
رؤيا:(بصدمة)اااا..اممم اه اه هه
هنية:الحمد لله ههه الصلاااااااة والسلااام على رسول الله
تبعاتها حبيبة وكملو لبنات وختموها بترغريتة ورؤيا غير كدور فعينيها ما كرهاتش كون تشق الارض وتسرطها
هنية:شو نقولك ليزار ديالك خبعو مزيان هااا وذني منك..ولا عرفتي شني اراهلي نخبعولك يانا حسن الدنيا والزمان هذا ما بقاتشي الثقة
رؤيا:هه لا لا بلاش ما تخافشي خبعتو
حبيبة:وهايداك ابنتي الله يرضي عليك هههه يا فرحتي بيك يا فرحتي بيك كبرتي ورجعتي عروسة(عنقاتها كتبوس فيها)
رؤيا:ههه
كلثوم:(نقزات)وصااافي بركة عليها من البوسان راه تكون طابت من لبارح هههه
شامة:هههه ويييييع خاصك تشوف عنقها ههه
كلثوم:واااايلي اجي نشوف ههه
حبيبة:فرقو عليكم البنت يعطيكم لمسخ..اجي ابنتي اجي ما ديهاشي فيهم
رجعو جلسو و رؤيا ناضت صلات لي فاتها و رجعات جلسات كتنشف و تقاد شعرها و هما كيهضرو و يضحكو و شامة و كلثوم ناضو كيجمعو لبيت و يقشبو على رؤيا
طلقات شعرها مسرح سامبل و غطات بيه الطبعة لي فعنقها و فرقاتو فالجنب و قادات وجهها بماكياج خفيف و رشات عطرها و لبسات ساعة دالجلد فيديها بيضة و خاتم زواجها كان فصبعها حطات حلقات صغار فوذنها بويض و لبسات بلغة بيضة فرجليها و الحنة حمراء خارجة فيديها و رجليها طاح عليها السر و جات زوينة و جمالها هادئ و بسيط
خرجو بيها كاملين كيعشقو و يصليو و دايرينها فوسطهم حتا هبطو فالدروج و تلاقات ليها رقية فالهبطة دالدروج بلحليب و التمر و صبحات عليها و باركاتلها و دخلو بيها لصالة كانو مجموعين فيها العائلة المقربة كاملة خالتها و ولادها و جدودها و حسن و خالها وولادو و مراتو كانت الصالة عامرة و لعايلات فجيهة و الرجال فجيهة اخرى قبالتهم ناضو كيباركولها و حسن و جلال فرحااانين بيها و هي حشمانة فوسطهم و العينين كلهم عليها جلسوها لعايلات بيناتهم والطبالي قدامهم عامرين بالحلوى و المكسرات و اتاي و القهو و العصائر و التمر و شهيوات منوعين وبداو كيهضرو و يضحكو و موضوع يجيب خوه وهي غييير ساكتة وكتبسم و شامة جالسة حداها خاشية وجهها فتيلي طالعة نازلة فلفيس من جروب لجروب
حتا دخل فراس وقال غير السلام حيت سلم عليهم قبل فاش جاو و جلس حدا باه و مشات عينو جيهة النسا و هي تبانلو جالسة قبالتو لابسة نفس قميص لي اختارلها ولبساتو هو نفسو بلا ما ترد البال وكتشوف فيه و تخنزر منين دخل وهي متبعاه بعينيها حتا جلس غمزها و تبسم ورجع قلب وجهو كيهضر معاهم
دازت لعشية و تغداو و تحطو الذ الاطباق المغربية ورقية قايمة بالواجب و مكلفة بكل صغيرة و كبيرة وداز لغذاء معتبر مفرقين فيه الطبالي دالنسا على دالرجال
تغذاو ورجعو جلسو فالصالة وتحط اتاي وتحطو معاه اشكال حلويات مختلفة وشهيوات مبدلة وكل واحد فين جلس وهاد المرة جلسو مع بعضهم ما فرقو نسا من رجال..رؤيا طيرات الحشمة لي كانت فيها ونسات الهم شوية وهي وسط عائلتها ورتاحت وبدات كتجمع وتهضر وتضحك مع كل واحد شوية وناضت قربات من حسن وجلال لي توحشاتهم جالسة كتجمع معاهم وفراس مقابلها وجالس جلستو المعتادة وكيدقق فحراكتها ومتبع معاهم الحوار لي داير..دخل معاهم فالحوار حتا ولد خالها خالد شاب فمقتبل العمر صغر من فراس بعام عندو 28 سنة مسرار فيه حقو دالزين وواعي ومثقف استاذ جامعي..بقاو كيتجمعو ويضحكو تبدل الموضوع وبقات غير رؤيا وخالد كيهضرو وحسن وجلال قلبو الهضرة مع خالها وجدها ابراهيم
فراس لي من الصبح وهو حاضيها وجالس على اعصابو..ما عاجبوش الحال ان مراتو جالسة وكتكركر مع واحد ياخور واخة ولد خالها فلخر كيبقى راجل..عيا يتلف ويقلب فعينو ما يشوفش فيهم ووالو..ولكن فاش شافها قربات منو وما بقاش كيتسمع شكايقولو تما فاض الكاس..بقى حاط عينو عليهم يدو محطوطة على الفوطوي وكيضرب بصبعانو ورجلو كتفيفري وكيعض على شفايفو وعاقدهم بالمعقول
خالد:شني فهمتي هه
رؤيا:امم توريني يانا غير قول حصلتي اوليدي فرشتي راسك بيدك الناس دالحب وداكشييي ههههه
فراس سمع اخر كلامها وزاد تعصب على ما كان وزير القبضة ديالو
خالد:ويلي سكتي فضحتينا
رؤيا:(بهمس)وا يله قول ولا نفضحك..يانا راني عارفة قصص الحب ديييما كيبداو بربيني نربيك ههه
خالد:اهاااه المدام عارفة ههه على هاد لحساب واش فراس لي رباك ولا نتينا لي ربيتيه
رؤيا:(عقدات حجبانها)شنيي!..امم اححم دابا بلا ما تبدل الموضوع عاودلي قصتك مع هاد خيتي
خالد:شعانعاودلك ههه ما كاين والو بنت وكتقرا عندي ضسرات وربيتا وصافي ههه
رؤيا:وااااخة ما بغيتيشي تقولي وا ها يانا انمشي عند خالتي ونقولها بلي خالد بغى يزوج باش تمشي تفتشلك على شي بنت الناس..راك شرفتي وخاصك تجمع راسك ونتينا ما كتبغي حتا شي وحدة كيما قلتي ياك..ايوا تسنا
بغات توقف وهو يشدها من دراعها ورجعها تجلس وهي بدات كضحك
فراس مع قبط فيها عينيه حمارو فلبلاصة وصدرو بدى طالع نازل وغير كيسوط ورجلو كتفنفن
رداتلو لبال رقية لي جالسة فنفس فوطوي حداه وعرفاتو معصب حيت حافضاه وعارفاه مزيان.. شافتو فين كيشوف وهي طيح عينيها على رؤيا لي جالسة وخالد حداها وكيضحكو ويوشوشو وعرفات سبب عصبيتو تبسمات وشافت جيهة رؤيا
رؤيا شافت فيها وشافت ففراس لي جالس حداها وباينة عليه معصب وما حملاتش تجلس حداه..
رؤيا:(تنهدات)واخة اخالتو..(وقفات ودارت شافت فخالد)من بعد و نكملو ههه(وغمزاتو)
فراس خرج الريح من نيفو بالجهد وهز يدو كيحك لحيتو بعصبية
رقية:احم اجي ابنتي ياجي
رؤيا:هه هانا
جلسات رؤيا بيناتهم وعاطية لفراس بالظهر لي ما تحركش وبقى على نفس الوضع ورجلو كتحرك وكيشوف قدامو
رقية:ما تبئاش تئولي خالتو
رؤيا:وشني نقولك هه
رقية:دابا نتين مراة ولدي هه ئولي يما حسن
رؤيا:ههه صافي ما يكون غير خاطرك ايما هه
رقية:(بهمس)شفتي دابا مزيااان هه..جلس حدا راجلك شوية راه يكون توحشك هه
رؤيا:هاه😳!؟
رقية:ههه بلا ما تحشم راه راجلك هداك..انا عارفاك مزال ما ولفتي بلحئ دابا نتين مراة مزوجة وشحال من حاجة كنتي تئدر ديرها و دابا ما تئدرش وفالمئابل كاين شحال من حاجة خاصك تبدا تعلم ديرهم دابا مابئيتيش حرة دراسك اولا..فهمتيني ياك ههه
رؤيا:(عرفاتها كتهضر على خالد)هه اه فهمتك اخال..هه ايما ما يكون عي خاطرك
رقية:يرضي على بنتي..يله دور عند راجلك..عطيه شوية من وئتك هه
رؤيا:(ابتسامة صفراء)هه واخة
رقية:(ابتسامة)
دارت رقية عند حبيبة وهنية كيهضرو ورؤيا تقادات فالجلسة كتشوف قدامها حاطة رجل على رجل وكتشوف فرجل فراس لي كتفيفري..شافت فيه بنص عين ما كانش كيشوف فيها وشنايفو حومر بقوة ما عض عليهم وعينيه كثر منهم
فراس:زيدي حنززي فيا
رؤيا:على زاينك..ما شوفتشي فيك(وربعات يديها)
فراس:الصمت
رؤيا:راه غير يما لي عايطاتلي نجلس حداك اما يانا ما سوقيشي فيك
فراس:وحتا دابا ما ضربك حد على يدك نوضي رجعي كملي هضرتك
رؤيا:هه بارح عاملي فيها سي رومانسي ودابا سي لمغيار..شفتك تيقتي راسك هه
فراس:(دار شاف فيها شوفة قاصحة)
فراس:(تحت السنان)نتي الالة لي مزال ما تيقتي راسك راك مراة الراجل..التسلكيط ديال زمان نسايه عليك و جمعي راسك حسن ليك وليا😡
رؤيا:(بغضب)شني شني شني؟..تسلكيط!!جمع دقمك اسي..بزاف عليك..ماجيبتينيشي من الزنقة
رقية:(لي سمعات صوتهم كيعلى شوية)اححم اححم
شاف فيها فراس وهي تعملو اشارة بعينيها باش يفهمو راسهم راهم حدا الناس..رجع قلب عينو مغلغل وناض وقف ورؤيا كتشوف فيه مخرجة عينيها جرها من يديها بلطافة قدامهم وخرجو هي وياه من الصالة..دار مع الدورة وهو جارها حتا غبرو عليهم وقنتها مع واحد القنت حدا لخرجة دالجردة..دورها بالجهد ورجعها قبالتو ولصقها مع الحيط..
رؤيا:(هزات صبعها)شو راه زدتي فيه به..
فراس:(ققاطعها وقبطلها صبعها بغضب)هادا ما يتهزش عليا سمعتييي!..راه الحد الساعة صابر عليك وما باغيش نمد عليك يدي(لصقلها يدها لي قابط مع الحيط) اتسمعيني نقولك زوج كلمات ما انعاودهومش..نتي دابا مراتي سمعتي..مرااااااتي ومن دابا لفوق تبقاي تصرفي على هاد الاساس..ممزوجاش بميخي باش تسيبي على خاطرك😡
سعيدة:(قرصاتها وكتهضر تحت سنانها)سكتي يسكتلك الحس!
شامة:(بجهد)اححح علاش قرصتيني
سعيدة:(ابتسامة صفراء)ههه واخة ليماك دابا نوريك هه
قلبو الموضوع وفراس خرج للجردة جلس كيشم لهواء وتبعو حسن جلس معاه ورؤيا ناضت طلعات تصلي ورجعات هبطات جلسات حدا شامة لي لقاتها معبسة
رؤيا:شعندو الزاين مكشر
شامة:(بنبرة باكية ويديها على حنكها)الزاين اينتاحر ويتهنى!
رؤيا:هه ما فهمتشي قصتك مع الانتحار..دور دور وتهضر عليه
شامة:حيت هو لي ايفوكني ويهنيني من داك الجبل لمنحوس
رؤيا:علاش شعندك ما فهمتشي!
شامة:(كتخنصص)يماااا!!
رؤيا:شعندا؟!
شامة:قالتلك غذا راجعين نالجبل..قالتلك العرس سالا صافي ما بقى ما نعملو هنا..يانا ما قلت جيت نمدينة وهي باغة ترودني مزال ما جلست فيها حتا سيمانة فحال الناس هئ هئ..شو يانا والله حتا انتاحر هئ هئ هئ
رؤيا:ههه شووو سكت الهبيلة ههه
شامة:هئ هئ هئ
رؤيا:هه غير سكت..بغيتي غير مدينة صافي الالة هايانا انهضر مع خالتي ونقولها تخليك معايا بقيتي على خاط..
شامة:واااااااااااااااااع ههه
رؤيا:😳
شامة:(طارت عليها عنقاتها)هههه نتينا احسن بنت خالة فالدنيا
رؤيا:هه عارفة راسي ههه
تعاشات لعشية وتحط لعشاء سالاو وناضو كيودعوهوم وشامة بقات معاهم بعد اصرار رؤيا..مشاو وهنية ما ساخياش ودمعتها واقفة فعينيها
قلب عينو وفتح باب البيت باش يزيد يتهوى البيت وهي متبعاه بعينيها حتا دخل للحمام وزدح الباب موراه وهي كضحك..خلاتو دخل وناضت رجعات سدات كلشي وتكات فبلاصتها
رؤيا:شني ايعمل فلحمام هذا!ايكون كيرد باينة هههه اتخرج بلهلا يطريهلك غير صبر عليا ههه كحكح الله يا ربي هاد الريحة شحال زعيقة..معدورتو تخنق!
طفات الضوء وخلاات اباجورة شاعلة ضوء خفيف وتكات على جنبها براحة وغمضات عينيها..ما هي الا دقائق حتا حسات براسها معلقة فالسماء وفراس هازة فوق كتافو
رماها فبانيو دلحمام عامر بالماء وداير فيه معطرات..خلاها مرمية فيه بحوايجها وخرج وسد الباب عليها
فراس:(من مور لباب)ما اتخرجي من تم حتا تحيد منك ديك الريحة
رؤيا:(وقفات)انهنهن واااااااع يعطيك مصيبة فزكتييني..اوووف على حالة(كتحاول تفتح الباب)وااا المرض فتح فتح
فراس:(كيهوي البيت)بلا ما تعذبي راسك..ما اتخرجي حتا تحيد منك الريحة فمرة..بغيتي غير التبرهيش نتبرهشو معاك حتا حنا
رؤيا:فتااااااح انننهن ما غاسلاشي سمعتي هايدا انبقى
فراس:حتا انا ما فاتحش ديك الباب ونشوفو كلمة شكون اتمشي
رؤيا:(ضربات الباب)بناقص ما تفتحشي..ناعسة هنا يانا
فراس:شغلك هداك..ااه وفليل سلميلي على صحابنا اوك ههه
رؤيا:(بخوف)ااا شمن صحاب؟
فراس:لي بالي بالك ابب.."وما خلقنا الانس والجن الا ليعبدون" ههه
رؤيا:(كدور عينيها وتسرط فالريق)امم..ماكنخافشي
فراس:الصمت
فتح كلشي فالبيت وخدم مروحيات مفيكسيين فجناب السقف صغاااار كيسفو لهواء ولا كانت شي ريحة قبيحة وخلاه كيتهاوا مزيان وهز حوايجو ودخل لبيت اخر لبس دراعية بيضة صلا وسالا..ولبس سروال كيطمة اسود واكس حمراء ورجع دخل للبيت دبالو لقا الريحة بدات كتنقص شوية
حط وذنو على باب الحمام كيتصنت سمع صوت الماء وهو يتبسم ومشى تجبد فوق الناموسية ورجع ناض من بعد ما شم فلفراش ريحة المسك..صونا على وحدة من الخدامات وطلعات كتجري بدلاتلو لفراش وطلقات معطر فالغرفة وهو جالس فلبالكون حتا سالات ورجع دخل ترمى فوق الناموسية حاط يدو تحت راسو كيتفرج فالتلفازة وكيتسناها تخرج
رؤيا شافت حتا عيات وما قدراتش تخايل راسها بايتة فلحمام وقنطوها لحوايج لي لاصقين عليها بالماء وناضت كدوش..سالات وناضت لوات عليها بينوار غوز قصير فوق الركبة علقوهلها الخدامات فالحمام وجمعات شعرها ففوطة ودقات عليه فلباب..
رؤيا:(زفرات وجاوباتو تحت سنانها)عاافاك اذا جات على خاطرك تعطيني حوايجي!
فراس:شفتي دابا مزيان
فتحلها الباب ودفع الباب بغى يدخل وهي تردها بالزربة
رؤبا:فاين داخل عطينيي حوايجي
فراس:(دفع الباب بالجهد)حتاا نتأكد بعدا!
رؤيا:(جمعات لبينوار على صدرها)
فراس:(ابتسامة جانبية)
هي كتمشى راجعة لور وهو كيقرب بشوية وكيطلع ويهبط فيها بابتسامة
رؤيا:شششني باغي(وصلات للحيط)
فراس الصمت قرب منها ببطء كيتأمل وجهها وحنوكها الحومر وشفايفها الورديين ولحمها لبيض حتا تلاصق معاها وشم ريحة الفريز عاطية منها..غمض عينيه وحس بيها كترجف بين يديه
رؤيا:ببب..بعد انههنن
فراس:(مغمض عينيه)ششش(حط صبعو على شفايفها وسكتها)اممم
كالا يدو مع الحيط وخشى وجهو فعنقها كيشم ريحتها ونفسو كضرب فعنقها وهي مزيراها البكية هزات يدها كدفعو من صدرو بقوة وهو يحط يدو على يدها شدهالها وزاد خشى وجهو فيها حتا حسات بشفايفو فوق لحمها
كان غايب ما حاسش براسو كأنه تنوم مغناطيسيا شكلها وريحتها دوخوه ..حط شفايفو على عنقها وكيدوزهم ببطئ فوق منو بلا ما يبوسها وكيطلع النفس ثقيييلة
رجليها فشلو عليها بالخلعة وكتجر يدها من يدو لي فوق صدرو لي طالع هابط..تكاتها لحيتو فعنقها وبورشها وهو كيدوز وجهو بشوية وتخلطو عليها الاحاسيس بقات كتحاول تبعد عنقها وهو غير ما كيزيد يزير عليها..حتا حسات ببوسة خفيفة فعنقها فشلاتها وعوجات عنقها..تبسم وعرفها تبورشات وفيقاتو بحركتها وبعد وجهو عليها بشوية وهو كيتنهد وعينيه نايمين..شاف فيها لقاها كلها حمراء وعينيها خارجين بالخلعة..مشاو عينيه لشفايفها لي كيرجفو وسها فيها وهز صبعو دوزو على جنب فمها فوق الخالات لي عندها ورجع دوزو بشوية على شفايفها حتا حس بقطرة قاصت صبعو وهو يهز عينو شافها كتبكي ورجع عبس وبعد عليها
فراس:(كيحاول ما يشوفش فيها)احم..دابا ريحتك فحال الناس..اخر مرة ترشي داك الويل سمعتي
دار يدو فجيب السروال وعطاها بالظهر خارج وهي تنطق بصوت فيه الرجفة دلبكى
رؤيا:ببب..بغي..ت حح..حوايجي
فراس:اوك
خرج فراس وهي جرات للباب طرقاتو موراه وتكات عليه حاطة يدها على قلبها لي كيضرب ايخرج من بلاصتو و دموعها هابطين
رؤيا:هئ هئ تفووو اواعدي علاش ما بعدتيهشي الحمارة علاااش هئ هئ علاااااش خليتيه يقرب منك هئ هئ هئ
خرج فراس حاس براسو ايطرطق ما عرفش شنو وقعلو مشى للبلاكار هز اول بيجامة جات عينو عليها ودق عليها فتحاتلو ومدهالها مور الباب ورجعات سداتها بالزربة وهو خرج للبالكون حط يدو على عنقو من اللور وبقى كيشم لهواء حتا ارتاح..
رؤيا قبطات البيجامة فيدها وحطاتها فوق كرسي فلحمام و قربات كتغسل وجهها وترجع النفس وتمسح فدموعها حتا تهدنات ورجعات قلبات عينها جيهة البيجامة هزاتها وهي تلقاه جابلها بيجامة كحلة طوب فوق السرة ودايرة عليه شبكة بيضة من لتحت وشورط قصير دايرة عليه نفس الشبكة من تحت خرجو عينيها
رؤيا:اواعدي شهادشي..ماجبر ما يجيب غير هادي..انننهن تفووو على ليلة.. بلحق يانا لي جبدت لبلا على راسي..اوووف كي انعمل نلبس هادي قوداموو والله حتا يغتصب حسي هاد الليلة هئ هئ هئ
قربات من الباب كدق وتعيط ووالو فراس لي يجاوبها جالس فالبالكون بعيد عليها ومرفوع ما كاينش فوق الارض..عيات تعيط وتعاود من مور لباب حتا حسات بالبرد فرعها مزيااان وفتحات الباب بشوية خرجات راسها ما بانلهاش فالبيت وهي تنفس بارتياح..وزولات عليها ولبسات البيجامة لي عطاها وخرجات كتمشى بلحفى وشعرها طايح على كتافها كيقطر..تمشات حتا وصلات حدا لبلاكار باغة تجبد بيجامة مستورة..وهي تشوفو من لمراية داخل من البالكون شهقات وهو يهز عينو شافها عاطياه بالظهر ورجليها لبويض عريانين والشورط مطراسيها وداخلها فالشقة حيت ما لبساش دوبياس..النص فظهرها باين وشعرها فازك..واللون الاسود جا مع لون بشرتها البيضة..بقى واقف فبلاصتو بدون حركة وعينيه كيتساراو فجسمها
هي غير شافتو هاكاك قلبات الدورة بالزربة وجرات لبلاصتها وتخشات فيها وتلمطات فلفراش كتستر راسها وكلها كترجف وعطاتو بالظهر
رجع قلب وجهو وجلس فوق كرسي فلبالكون كيشوف فالسماء وكيتنفس وكيدوز يديه على راسو وصدرو ومرة تبانلو فالبينوار ومرة بالبيجامة السوداء وصورتها ما حيداتش من قدام عينيه وريحتها مزالة لاصقة فيه..صبر حتا عيا ودخل للبيت
دخل للبيت لقاها مزالة كيما خلاها ورجع قلب عينو ما باغيش يشوف فيها..ودخل للحمام دوش ورجع خرج هز حوايجو لبس شورط فالاخضر داكن مع تيشورط لاصقة فنفس اللون وفيها كتابة جيهة الصدر بيضاء حس براسو ارتاح شوية وطل علبها شافها مغمضة عينيها ورجع جلس فوق الفوطوي هز المصحف كيقرى شوية دازت نص ساعة وهو كيجود بشوية حتا طاب نعاسو وناض تخشى حداها حاط يدو على جبهتو وكيشوف فالسقف وريحتها لصقات فنيفو عيا كيحاول ينعس ووالو وفلخر دار على جنبو جيهتها وهي عاطياه بالظهر وقرب منها بشوية لا إراديا ودخل يدو تحت لغطاء وحطها على كرشها لعريانة..لصق موراها ودفن راسو فعنقها طلع نفس عمييييق كيستنشق ريحتها وغمض عينيه ونعس
دازت ساعتين وهما ناعسين ورؤيا كتشقلب وتقلب حتا رجعات عاطياه بلوجه وحاطة راسها على يدو وهو مزال معنقها من كرشها جاها لعطش وحلات عينيها بشوية وهي تلقى راسها مخشية فيه..خرجات عينيها وبعدات عليه بشوية كتنهج حتا وقفات
رؤيا:(بهمس)شنيي وقع اواعدي..يانا نعست ولا غيبت..شي نهار نوض نجبر راسي كنولد ويانا لا خبار..تفوووو(طلات عليه)اممم لي يشوفك ونتينا ناعس يقول ملاك ونازل من السماء..منافق مكبوت ييييخ..شوية وكان ايغتاصبني..غير لقيتيني كنخاف اما يانا والله ما نخرجلك من تما عا بيا ولا بيك..قالك(كتعيبو)سلمي على صحابنا..الله يسلطوم عليك يااااا المكبوت فشي لي..(سكتات كانها تفكرات شي حاجة)ههه ولاهيلا هادي واعرة..تسنا عليا اسيهم فراس الا ما وريتك راني ماشي رؤيا ههه
خلاتو ناعس وهزات قرعة فوق طبلة صغيرة فلبيت عمرات كاس..الماء شرباتو وهي كضحك ورجعات مشات للبلاكار ديالها جبدات منو شي حاجة وجلسات قدام لمراية..دازت شي ساعة دالمكانة تقريبا وهي ساقرة والضوء مشعول فلبيت خفيف..سالات وناضت طفاتو وبقى ضوء القمرة بوحدو مضوي البيت..قربات منو بشوية لابسة قميص كلو بيض..مريشة شعرها مزياااان وموقفاه فالسماء كلو مخربق ووجهها كلوو مخربق دهنات لوجهها بودر بييضة وكترات منها كحلات عينيها مزياااان وسيحات لكحول حتا تمسح تحت وفوق عينيها ورجعات الدورة دعينيها كلها كحلة..وهزات ايلاينير رسمات بيه ضربات فوجهها فحال الا مغرزين..شدات عكار موف مغلوووق وعكرات بيه فمها وعودات حتا بدى يميل للكحولية..كان المنظر ديالها كيخلع هي وخافت تشوف راسها فلمراية
مدات يديها بشوية قاستلو رجليه وما تحركش ورجعات حنات تحت رجليه مخبعة وجراتهالو..جبد رجلو عندو تناها ورجعات جراتهالو بالجهد حتا حل عينيه..شاف جيهة رؤيا ما لقاهاش حداه وتجلس عليه كيحك عينو وكيشوف فرجليه باستغراب
شافتو جالس وهي تخرج راسها من تحت رجليه بشوية وشعرها سابقها مريش بقى كيحك عينو كيستوعب وهي مطلعة راسها بالعرض البطيئ حتا بانو عينها كوحل ومخرجاهم فيه وهو يقفز شوية رجع لور وهي مزالة طالعة حتا بانلو فمها زرق وحالاه على وسعو كتفرنس ووقفات قبالتو كتحرك فراسها يمين شمال وكتصدر اصوات غريبة
فراس خرج فيها عينيه كيستعوذ بالله ويحقق فيها وهي جاية وكتقرب وهو مكوانسي فبلاصتو تمشات بشوية حابسة الضحكة بزز وتاقنة الدور ما خلاتش شي صوت ما خرجاتوش ويديها مهبطاهم ما كتحركهمش بمرة وغير رجليها وراسلها لي كيتحركو حتا قربات ليه وحنات قدامو بشوية وهو تبانلو السنسلة لي مولفة كدير رؤيا مدلية من عنقها ورجع قلب وجهو شاف فبلاصتها وساط ودار عندها عاض على الفك ديالو وملامح الغضب ترسمات على وجهو
رؤيا:اننييييعااا هااهاها
فراس:اجي لمك نوريك انيعا كيدايرا 😡
ناض وقف بالزربة وشدها من الكول دالقميص جارها وهي مخرجة عينيها فيه..وكتحاول تبقى محافظة على ثباتها واتقانها للدور
رؤيا:(بصوت مخيف)جنييييتي على راسك..نتينا اذيتينا ولي كيأذينا كيجبرنا..(غوتات)واااااااع شهد على روحك..نااادييتك يا شمهرووش تحضر وتعوجلو لخنشوووش هووووش
فراس خرج بيها للبالكون هازها بيد وحدة من الكول وهي كتفركل حتا وصل للحافة وحط يدو تحت رجليها وهزها بين يديه
رؤيا:واااااااع شني كتعمل المشعوط..هبطني انهنننهن!
فراس:قولي لصحابك يتعرضولك لتحت
رؤيا:وااااااااااااااع
غوتات غوتة وحدة وهي هابطة فالسماء حتا لقات راسها فالماء..فراس رماها مباشرة للبيسين الغارق لي جاي تحت من البالكون تماما..حط يدو على حافة البالكون كيتبسم ابتسامة جانبية
فراس:يله ضحكي دابا!
دخل فحالو وخلاها ترمى فوق الناموسية حط يدو تحت راسو وغمض عينو كيتفكر منظرها وكتجيه الضحكة...دازت شي ربع ساعة وفراس متكي كيتسناها تطلع تقطع الحس وغير صوت لهواء لي كيتسمع..استغرب وناض وقف كيطل عليها من البالكون و هي تبانلو فوق سطح الماء ما كتحركش غير ظهرها لي كيبان ويديها مفتوحين ووجهها مغطوس ولقميص منفوخ بالماء وشعرها لكحل كيلعب بيه الماء وكيديه ويجيبو..
الخوف والذعر والصدمة هما التعابير لي بانو على ملامحو..حط رجلو على الحافة دالبالكون وهو كينهج وسوطا كيضرب برجليه ويديه حتا وصل لعندها وقلبها على وجهها وهي فشلانة بين يديه..شعرها هابط على وجهها لي تجلخ كلو بالماكياج..قربها منو كيبعد الشعر على وجهها ويديه كيرجفو وكيتنفس بسرعة كانه جرى لأميال ومسافات
فراس:رؤيا..حلي عينيك..رؤيااااا
ضربلها وجهها بشوية وهي لا حركة وجرها خارج كيضرب بيد ويد قابطها بيها وكل ساعة يعيط بسميتها هزها حطها على جنب بيسين وطلع موراها بالزربة كيقطر حط راسها على ركابيه وقبطلها وجهها بين يديه كيحركو
شاف حتا عيا وقرب وجهو منها بشوية وحط يدو على نيفها سدولها وبغى يفتح فمها وهي تبزق الماء على وجهو جا فوسط عينيه قبل حتى ما يقيصها
بعد عليها كيستوعب وهي ناضت وقفات كضحك وتلوى وشادة فكرشها وهو حاني على ركابيه كيشوف فلبلاصة لي كانت طايحة فيها و كيسمع صوت قهقهاتها..وقف وعينو ما حيداتش ليها وهي ميتة بالضحك ما حبساتش
فراس:صبرتلك وفوتلك بزااااااف ونتي غييير ما زايدة فيه..ولكن من دابا لفوق مايصلاح لوالدين مك غير لعصاااا..البرهووووشة باغة تلعبيييي هااااا..انااااااا لي انربي والديييك..يااا إما تقااادي ياااا إما نقتلك😡
رؤيا:(كتنهج وكتبكي)طلق الله يعطييييك العذاااب اهئ اهئ اي شعريييي وااااا رخي هئ هئ هئ
فراس:يله ضحكييي دابا نشووووف..يلاااااااااااااه😡
رؤيا:الصعر وااا الصعاااااااااار هئ هئ هئ
فراس:وا راااااه غادي نقتلااااااااااك..سكتييييييي!قطعي النفس..عاوديها وتشوفي الا ما بكيتهم لد*** مك دم راني ما نتسماااش
طلق من راسها ودفعها بالنترة وهي كالات بيديها باش ماطيحش ودور راسو وخلاها مرمية ورجع دخل للفيلا
بقات فبلاصتها والصوت مقطوع فيها غير شهقاتها لي كيتسمعو مرة مرة وكلها كترجف بالاعصاب..حنكها ما بقاتش كتحس بيه فمرة وفروة راسها كلها كضرها والنفس ما بغاتش ترجع فيها ودموعها كيتلاقاو هما وقطرات الماء وكيهبطو مع وجهها
دازت مدة وهي على نفس الحال وفلخر جمعاات النفس مزياااان وناضت وقفات كتمشى ورجليها فاشلين عليها وصدرها ايوقف بقوة لبكى ما حملاتوش يهز يدو عليها
طلعات بشوية عليها حتا دخلات لواحد البيت خاوي و قصدات الحمام وتخشات تحت الرشاشة بحوايجها
رؤيا:انننهئ والله حتا ندمك اهههئ ااااي اهههئ
حطات يدها على حنكها لي عاطيها لحريق ورجعات زولات حوايجها ودوشات حالتها وهي كتحاول تجمع البكية حتا سالات وتلوات فبينوار باج معلق بفوطتو وخرجات وقفات قدام لمراية لقات حنكها تنفخ وحمااار و اثار صباعو باينة على وجهها وعينيها فحال قطرة دالدم..بقى فيها راسها وما رضاتش بأنها تضرب وحبسات لبكية باش ما تهبطش
رؤيا:(بغضب)غادي ندمك على هاد الضربة كنواعدك والله ما تبقى فيا..اااي حنكي هئ هئ
توجهات للفراش وهي مصممة انها تردلو الاهانة باهانة اكبر منها بقات ببينوارها وتغطات وجمعات رجليها عندها
فراس لي أول ما طلع وهو يزدح ويردخ..دخل مباشرة شلل وخرج بدل عليه بسروال كيطمة رمادي مع اكس سوداء وهبط لصالة الرياضة باغي يفرغ غضبو فشي حاجة
داز الوقت وهو كيهز هادي ويحط لوخرى ووجهها وهي كضحك ما كيتمحاش من بالو..قلبو كان غادي يسكت بالخلعة عليها وفلخر صدقات غير دايراها بيه ما عرفش شنو وقعلو وكيفاش ولكن عصباتو بزاف حيت كلشي عندها ضحك..هو كان غادي يحماق وهي صدقات غير كتفلا..بقى حتا تهدن ورجع طلع للبيت ما لقاهاش فيه وهز دراعية صلا بيها لفجر لي أذن و تلاح فبلاصتو ونعس
صبح الصباح وناضت كتكسل حاسة بوجع فوجهها ذكرها بليلة أمس هزات لفراش عليها وناضت وقفات قدام لمراية لقات حنكها زراااق وزاد تنفخ على لي كان
رؤيا:هيييييه اواعدي وجهي خسرولي الشماتة..انننهن الله يعطيك لكرد يا ربي اوووف ااااااي حنكيي
هزات راسها وخرجات كتسلت حتا وصلات لبيتها وفتحات الباب بشوية ودخلات كدور عينيها وما لقات حتا واحد ورجعات طرقات عليها باب البيت..مشات للباليزة ديالها جبدات بوماد هي الاولى ذهناتها لحنكها..هزات عباية مخلياها للصلاة صلات الصبح ورجعات لبسات عليها كسوى طويلة بكتاف طايحين فلجرونة و طلقات شعرها وفرقاتو لجيهة الضربة كتحاول درقها شوية..رشات عطر خفيف وتنفسات بعمق كتحاول تقوي راسها وكتفكر فالخطوة الجاية هبطات بشوية عليها فالدروج لقات رقية وشامة جالسين فالصالة مونجي كيفطرو بوحدهم..قربات عندهم بشوية مهبطة وجهها
رؤيا:صباح الخير
رقية وشامة بابتسامة:صباح النور
جلسات بجنب شامة عاطياهم بزوج بالجيهة لي مهبطة عليها الشعر..جلسو كيهضرو ويضحكو ورؤيا كتحاول ما تخاليش وجهها يبان
شامة:اححم واهانا على لحمر غير آمر ويانا نغامر هههه
شامة:اميييين ياختي امييين بلحق فاين هو فاااين اوووف..بعض المرات كنحس بلي الرجال غادي ينقارضو ونبقاو نفتشو عليهم فالقرعة دكوكا ونجمعو غلاقات هادي فيها رجل وهادي فيها يد وهادي فيها الراس بلحق لي فيها الربحة لكبيرة ما نجبروهاشي ههههههههه
رقية:احمم..لبارح كنت باغة نهضر معاك وما كانش عندنا كيفاش
رؤيا:هاا؟
رقية:شوف ابنتي..نتين دابا مراة مزوجة خاصك تئرب من راجلك وتفهمو ويفهمك..البارح يمكن نتين ما رضيتيلوش البال بلحئ انا شفتو كيفاش كان ايموت بلغيرة عليك ههه وهذا دليل على أنه كيبغيك وما خاصكش تئلئ منو بلعكس هو ما كيتصرف بداك الشكل على شي واحد الا اذا كان داك الشخص كيهمو وكيهمو بزااااف..خاصك تعرف راجلك كيفاش كيفكر وتئرب منو(هزات يديها حطاتها على حنكها)
رقية:(كتهزلها شعر على حنكها وكتشوف)هيييه حنكك كلو زرئ اويلي واش فراس لي دارلك هادشي الله يا ربي الله شنو وئع!
رؤيا:(كدور فعينيها)دد..دابا هو هو
رقية:غير بلا ما تكذب راه باينة يديه هادو..هييييه شوف صبعانو كيبئاو مطراسيين يااا ربي عوينة وصابتكم..(بدات كتسوط)مزياااان تبارك الله هادشي لي بئى غير يضربك ونتين بائة عروسة حنتك وبائة ما مشات..غير حتا يجي الا ما نوريهش راه مانتسماش رئية بنت عبد الئادر..الله يا بنيتي وزرئلك وجهك..ئول علاش شنو لي خلاه يضربك؟
رؤيا:(كتفكر)اممم..للبارح ههو..اا
رقية:(حطات يدها على حنكها)امولاي دغيس الشريف..متئوليش ضربك على ولد خالك(بلغوات)لاااا لاااا مزيااان تبااارك الله انا ربيتو باش يكبر ويترجل على النسا
رؤيا:(بهمس)بزاف عليه الرجلة لحمار..(جات لبالها فكرة وتبسمات بخبث ورجعات قلبات وجهها كتبوحط)اهئ لا ايماااا ماشي هايداك اهنننن
رقية:شنو لي ماشي هكاك شنو؟
رؤيا:هو ما ضربنيشي على قبل ولد خالي اهئ اهئ
رقية:وعلاش بالسلامة ضربك..بغيتلو ضربة
رؤيا:اهئ اننهنئ..دابا هو
رقية:مالو هو هضر وسكت من لبكا..والله لا بئات فيه غير حتا يجي ونئيلو وذنيه مزيااااان
رؤيا:لا ما تقولو والو اهئ هئ..شو ايما يانا انقولك شني كاين بلحق ما تقولوشي يانا قولتالك واخة!
رقية:(بعصبية)غير هضر دابا
رؤيا:(كتلعب بصباعها)دابا هو من نهار لعرس وهو باغي ييي..اهئ
رؤيا:هادي يوماين وهو كيبغي ييي..وو(سرطات ريقها)ووو ما كيقدرشي فهمتي!
رقية:(باستغراب)كيفاش ما كيئدرش..(خرجات عينيها)واااش ما كتخليهش😱اويييلي يا الزغبية لكعبية وشدرتي!
رؤيا:لا لا ماشي هايداك..دابا يانا كنخليه ياك هو لي ما كيقدرشي!
رقية:(بانزعاج)شنو كتئول ابنتي..كيفاش هادي عاود!
رؤيا:(كتبوحط)هئ هئ فهمني ايما هو ما قدرشي ويانا حيت طبيبة وقارية على هادشي قلتلو يمكن يكون مريض ولا عندو شي حاجة اهنههئ وهو مارضاشي وناض ضربني اننهئ شني ذنبي يانا اهئ يانا غير قلتالو باش يمشي يشوف شني عندو وهو ناض صرفقني انهنهننئ ما عملتلو والو ايمااا
رقية:(ضربات على فخاذها)اويلي يا ويلي..ئولتيلو ماشي راجل هااااا..الله ياااااااا ربي الله..واش ابنتي حمئتييي..كاين شي مراة تئول لراجلا نتين نائص ولا معيوب اويلي على لخطية اويييييلي شغانئولك ابنتي زطمتيلها فعينيها..(فطنات)واجي بعدا كيفاش زعما؟؟دابا واش فراس بصح مريض وما كيئدرش ييييي..(حطات يديها على راسها كتديه وتجيبو)يااااا مصيبتي ياااا مصيبتي..ويااااا مصيييبتك ارئية!!
رقية:(ناضت وقفات غاذة جاية وكتعبر بيديها)لا لا ما يمكنش لاااا اكيد نتين غالطة..مستحييييييل فراس فراس!لااا لا شي حاجة تما..الله يا ربي على وليدي الله..واش نتين مأكدة من هضرتك بعدا؟
رقية:سكتييي سكتيي عندك يسمعك شي حد ونصدئو فشي طاب وشي ما طاب(تنهدات)ياااا ربي ومنين خرجاتلنا هاد المصيبة..ونتين يا الطنكة ما تعرفش تجمع فمك عطيتيهالو فوجهو وهو نفسو عندو هنا(حطات صبعها على نيفها)..اهئ اهئ الله على وليدي الله هئ هئ
رؤيا:الله يهديك ايما علاش كتبكي دابا راه يانا قلتالك باش نشوفو شي حل لبكا ما عندو باش يفيدنا..يانا كنقول هضر معاه وقنعو باش يتعالج راه ما ايرجعاشي فوجهك..ونتينا كيما كان كيسمع لكلامك ماشي فحالي غير هضرت ناض جمعا معايا بطرشة هئ هئ
رقية:(حطات راسها بين يديها كديه وتجيبو)ااااخ يا ولدي اااااخ..وانا كنئول مالو الصبح خرج ماشي هو هاداك وهو راه هاز فئلبو لي ما يتهز..اهئ اهئ فرحتك يا رئية عمرها كملات..اييييه وانا كنئول مال الراجل عمري شفتو ئرب لشي مرا هادي كثر من 4 سنييين
رؤيا:(حابسة الضحكة)احم واييييه ايما شفتي راجلي مسكييين اااخ..ما عرفتشي شني نعمل باش نريحو ما نقدرشي نشوفو مقلق..ما كيهونشي عليا..يانا نصباااااار عليه ايما نصباااااار..بلحق هو راه ضرووووري خاصو يداوى ويمشي عند الطبيب..عرفتي شني يانا كنظن بلي أحسن حاجة نقولوها نبابا ولا جدو وهما ايعرفو يهضرو معاه حسن منا
رقية:اهاه ونئولوها حنا للمغرب كاااامل اما اذا ئلناها غير لباك وجدك راه كيف والو..ئالك ما ئدو فيل زادو فيلة!
رؤيا:ولااااا ايما فهمني اذا قلناهالوم هما رجال بيناتم ايعرفو كيفاش يوصلوهالو..راه هادشي كووووولو لمصلحة راجلي حبيبي لهلا يخطيه عليا ويشافيه يا ربي هئ هئ اااااخ قلبي محروق عليه ايما محروووق
رقية:نتين غير ئولتيهالو بينك وبينو وشوف كيردلك وجهك راه الا عرفك درتي بيه طر والله حتا يئبرك تبات ما تصبح..الله يااااا ربي على حريرة
رؤيا:(كتمسكن)كلو يهون ايما غير هو يتعالج اذا بغى يقبرني يقتلني يعمل لي بغى هئ هئ مهم يمشي نالطبيب..اذا ما صبرتشي على زماني وتاج راااسي علااااامن انصبر علااااامن..شو نتينا غير هضر مع بابا ولا جدو يهضرو معاه..اولا عرفتي لا نتينا ما اتقدرشي عرفتي شني انهضر مع عزيزة وهي تقولا نابراهيم وجابراهيم يقولا نبابا شني قلتي هايدا حسن ياك..ما خاصناشي نفكرو فشي حاجة دابا من غير مصلحتو..راه شحاااال من واحد كان مريض وما داواشي وفلخر فاش مشى للطبيب جبر الحال فاااتو وما جبرو فيه ما يعتقو
رقية:اوييييلي لا لا..ولدي ايداوى اويلي على ما يلئاو ما يعتئو!لا لا ما يمكنشاااي
رؤيا:(يييييس)صافي هانا انمشي نعيط نعزيزة ونقولالا راه هاد المرض خاصنا نزربو عليه..حيت كينتشر بالز..
رقية:(بعصبية)جلس اويلي فين غادية شمن عزيزاك ولا حناك..فين هو عئلك فيين!!بئيتي غير كطرطر..نتين عوالة تشوهيه ماشي داويه اويلي لا..فحال هادشي خاصو السترة..نتين كون جات عليك تئوليها لطاسيلتك كاااملة وائيلة!
رؤيا:(والله ما كرهت تكون شوهة معتبرة نوريه الرجلة دبصح)هئ هئ ياااك ايما ياااك هذا هو زجاتي حيت يانا باغة مصلحتو غير هو ضربني ونتينا كتزبل فيا هئ هئ هئ..صافي خليه هايداك حتا يطيح الفاس فالراس وتقول يااااا رييييت سمعت كلام رؤيا
رقية:شمن فاس وشمن راس سكتينا من هاد الفالات..ولدي ما ايوئعلو واااالو..انا انشوف شي حل غير خليها عليا!
رؤيا:(اوووف ميرد)وفين هو دابا!
رقية:علاش ما عارفاش؟
رؤيا:ما عارفة والو يانا!
رقية:ايييه بنات اخر زمن ما عارفاش حتا راجلك فين مشى ومنين جا!
رؤيا:ايوا هو صبح منفخ عليا ما بغاشي يهضرني..عيييييت ما نحزر فيه اواااالو..بقيت نرغب نرغب نرغب نرغب نرغ..
رقية:(قاطعاتها)صافي صافي دابا..راجلك سافر فالصبح على شي شغل حتا ليل عاد يرجع
خلقت له الجزء السابع
محتوى القصة
التنقل بين الأجزاء