مشينا .. وكنت لابسة كسوة مزيرة حتى للركبة كحلة و صندالة د الصبع و كنتكسول فالمشية انا وشعري المطلوق، كلشي حال فمو
مشينا طلعنا للمكان اللي نعت لينا داك خونا..
سلمى: متشوقة نشوف التصميم كي غيجي
ملاك: وانا مكرهتش كن نخدم غير نهار فهاد الشركة ، ويلي شحال د الباقص خدامين هنا و الكوستيمات... كي شي عرسان.!!!!
وصلنا ودخلنا للبيرو .. وانا بديك اللبسة اللي عطاتني سلمى ، سكت القلب لكاع لبنات اللي خدامين تما ههه، اللي عندها شي واحد حاطا عليه طيرتو ليها و خليتو بلا عقل ، حال فمو..الله يا ربي الفول كيتعطى غير اللي ماعندو دراس(الوضيفة).
دخلنا البيرو، ستقبلنا المهندس اللي جالس فيه بضحكة بينات ليه الضرسة د العقل ..
سلمى : بونجوغ ... جيت على واحد التصميم ديجا دفعتو ليكم ديال مركز التجميل (Centre de Beauté) وجيت باش ناخدو .
المهندس : وي مادموزيل موجود(حال فمو تا هوا) .. غير هوا خاص يوقع ليك عليه المدير د الشركة.. هاكي تفضلي و طلعي للطابق الرابع سواي تما يوريوك فين جا .
هزينا الضوسي وطلعا فالسانسور غادين و كنسولو تا وصلنا ، الشركة قد البحر و كلها بالزاج ديال الهندسة المعمارية ... كيبنيو العمارات و تجزءات و فيلات بسمية مول الشركة و كيبيعوهم ، لحال الشكل د الضحى الى اخ ، وصلنا عند السكريتيرة...
سلمى : الله يخليك بغلت نشوف المدير على واحد الضوسي بغيتو يوقع ليا غليه.(السكريتيرة مخنزرة يالاطيف محملاتنيش)
الله ياربي الله و سميتو جاد من الفوق اميمتي قلبي غادي يسكت.(السخفة )
دخلنا و جلسنا حاللين فامنا..وهوا شد الضوسي دار نضيدرات كلاص و بدا يوقع..(ها العار ايلاما نقص شوية من الاتيكيت راني غنطيح ليك هنا) كيوقع ومرة مرة كيهز عينو فيا.
سالينا و خارجين ...
انا: ...عطيني نشرب .. تزاد عليا الحال .. الله فشلت ...
سلمى : صبري شوية ، نخرجو من الشركة و سخفي ، تا انا راني شادة فيها تا نخرج..
خرجنا برا،ودخلنا للطونوبيل تنشرنا فيها.
انا: قلبي كيضرني شداني نجي معاك اختي، جيبي الضوسي و لا خليه وانا مالي ...جراني معاك كتدي مني الدنوب.
سلمى: خليني يا ختي نرجع الذاكرة بعدا ...وناااري على بوقوص. يحسن عوان اللي خدامين معاه تما.
انا: وا يحسن عواني انا اللي عمر نعاس يجيني من اليوم.. واشتي على فورمةو على طولة !!!!مرسوم ياختي و على صدر كي عامر وعلى كتاف و !!وعضالات و على وقفة كيوقف .ناري ويلي ويلي على شوفة عندو ،بحال النمر وعوينات عسلية فاتحين ،شعرو الرطب الكحل مطلعو لفوق ..واااو . كيهضر ماكرهتش نبوسو ،وخا عمري بست شي قمقوم ،فمو ديال البوسان ..اما مللي هضر الله يا قلبي شبغيتي عندي صوتو غزااااااااال حرك ليا ليسونتيمو(المشاعر) وهوا كايسيني بدوك ليديدات ...حسن من يدينا.
انا: كيغندير يا ختي ؟ قولي لي كيغندير نشد داك السبع !!!!
زيدي يالاه نمشيو ..ديري السمطة قبل ما يندمنا شي بوليسي..
مشينا و انا مضهشرة ما بغاش يحيد ليا من بالي اول مرة يقنعني و يعمر ليا عيني شي واحد ،بيان سيغ حيت انا قطة قرطاسة صعيب يعمر ليا شي حد عيني . من غير خويا ، هوا اللي كيعمرها ايا ويزوقها ليا بزرق ملي كنرجع معطلة للدار .
شوية و هيا تنقز سلمى قالت لي..
سلمى : شتي منين جلسنا و هوا (كتبعكك)كيشوف فيا ما حيدش عينيه عليا.
انا: و فييقي تبولي!!راه ماداخا فتا وحدة فينا .
سلمى تقرصات و معجبهاش لحال وهيا توقف اللوطو وقالت لي.
سلمى: (معفرة).. ومالك اختي جاتك الغيرة حيت شاف فيا وماداهاش فيك؟ وشكون نتي اصلا اللي يديها فيك واحد بحال هاداك ؟!!! اما انا بنت القاع والباع وجات معايا.
انا: !!!! سلمى ؟!!! الله يرحم ليك الواليدين اختي(مصدومة)...عندك الحق ،شكون انا اللي يديها فيا.!؟اما نتي راه تولدتي وحليتي عينك ف R+4 وباك محامي قد الدنيا ومك طبيبة،ومعاونينك على المشروع واخا ما قريتيش. ماشي بحالي انا ...اللي حليت عيني فبراكة ومات با وخلا لينا تقبة(ارض) مدابزين عليا حنا وعمومي،ومي مسكينة كتبيع الخبز باش تصرف علينا و خويا لاخدمة لا ردمة (بتسامة ساخرة) ههن كيفاش كنتي غتعرفي عليا كن ما جيتيش لمدراسة د الحلاقة نتي وباك يشري ليك الديبلوم باش تحلي مشروعك ..وكيفاش كنتي غتعرفي العالم اللي حنا عايشين فيه ؟!شكرا بزاااف ..مي انا مغندتبزش معاك على راجل ربحي بيه(خرجت من اللوطو كنبكي)
خارجة كنجري وكنبكي ولابسة كسوتها و ماحاملاش راسي ..اعز صديقة عندي صدماتني، عمرني حسدتها و لا غرت منها حيت عندهوم لفلوس . ديما راضية بالقدر ديالي وحامدة الله على الصورة اللي عطاني وخا ديما كنتمنى مكون بحالهم و نتهنى من ديور البرارك و الحي الخامج اللي عاشة فيه.
حليت عيني كنشووف كنلقا راسي ف الانعاش و رجلي مهزوزة معلقينها ودايرين ليا الجبص طالع حتى للركبتي . سيرومات و ليباري مضروبين فيا... كنسمع !تيت تيت تيت .. الدقت قلبي فوق راسي وغير بوحدي و تا حد مكيدخل عندي من غير الاطباء و الفرمليا .
انا: شكون هاد الحيوان اللي جمعني هاد الجمعة ..اي رجلي!
الفرملية: راه السيد اللي ضربك هوا اللي جابك هنا و نتي فاقدة الوعي
انا: وفين هوا هاد الحمار ؟لاحني هنا وخلاني شكون غيخلص هادشي (بالي غير فلفلوس)
الفرملية : راه من النهار كامل و هوا هنا واقف كيشوف من الزاج حيت ممنوع يدخل عندك شي حد
انا: وشحال هادي فالساعة؟!
الفرملية: هادي الستة ونص، راكي من 11h00 ديال الصباح ونتي مغيبة... عطينا النمرة د واليديك ليهم
عطيتها النمرة د والديك نعيطو ليهم و عيطات ليهم وانا مجبدة واكلاها فهضامي،دايرين ليا فاصمة فوق حجباني و محيدين ايا حوايجي و مغطية بغطاء زرق . كنتسنا الاسرة ديالي الصغيرة تجي (ماما و خويا).
دورت وجهي جيهت الزاج !!!!!!! اواااااه ؟!!! البوقوص مول الشركة المعمارية.!!ميمكنش شكيدير هدا هنا(كيشوف فيا من الزاج) .
دخلات عندي الطبيبة ...وهوا معاها
الطبيبة: كي بقيتي شوية . عمرك طويل نجيتي منها باءعجوبة! هادا مسيو جاد اللي دربك بلافواتيغ.
انا حاللة فمي و كنشوف !!شهاد الصدفة ؟؟!وهوا واقف حدايا لابس كابيتشو كحل بالقب و سروال دجين و سبرديلة وكيشوف فيا .. وانا غندخل فغيبوبة !!!على زين ؟!!من لاكلاص لsport(الطبيبة كتهضر و انا ساهيا فيه و عيني مبوقة ههه ) مابقات تاحاجة كضرني ملي شتو !!! نتايا الزين د العالم اللي خبطتيني!!!(بيني بين راسي) نستاهل هاد الخبطة و الله ،مستعدة تخبط مي مرى خرى غير باش تجي عندي نشوفك.(فيقني من السهوة وقالي)..
جاد : البنت عاد طلعوها من الانعاش وبغيتي نجلس نستجوبها؟ ! باراكة غير داكشي لي داز عليها و رجلها اللي كجبصة راه رفعتها تا لسما و ردختها
سليم: و صاحبي اول مرة نشوف شي بنت قرطاسة على حقيقتها و يالاه فايقة من النعاس بلا مكياج... ملااااك اصاحبي والله اسم على مسمى. نااااري كن شافتك فاتي كتقادلها لمخاد كن . (قاطعو جاد).. ومال فاتي، مرتي؟ فاتي صاحبتي و ماشي صاحبها .. هيا اللي لاسقة فيا ويلا بغات تعرف تعرف تعاود الراسها ملليت منها و من صداعها ... فين ما درت نلقاها و تابعاني فين ما مشيت.اففف يلاااه سير سبقني هاني جاي(رجع جاد عندي للبيت)
جاد جلس حدايا كيوصيني باش ايلا خصاتني اي حاجة نعيط ليه فالتيلي و هوا كيكتب ليا النمرة ديالو .
مشا جاد و بقيت بوحدي هزيت الورقة اللي كتب فيها النمرة و خليتها عندي،وكل مرة تجي عندي فرمليا فشكل ، تعبر ليا الطونسيون..بقيت بوحدي و كنتخايل صورة د جاد و قلبي كيضرب وتعامل ديالو معايا كيزيد يخليني نتعلق بيه كتر، وخا انا كنتعلق فين نتفلق و عارفة راسي عمري نفرح بيه ..مي سمحت لراسي انني نبغيه من اول مرة شتو.
انا : خلي تا لغدا ونمشيو . (عالاقل يجي جاد فالعشية و نشوفو)
ماما: لا خاصنا نمشيو دابا صافي نتي وليتي لاباس تقدري تنوضي و الجبص غدي ديري ليه لعكاكز واحد 15 يوم و نرجعو لهنا تحيديه ، راه الطبيب قالي كلشي على حساب داك الولد اللي ضربك.
نوضي راه خوك ف الدار ماتلاش سافر .وراه كيتسنانا ..سربي ماخصنا صدع معاه عاوتاني.
سيمو خويا طويل و مقطع الوراق،عندو 26 سنة شمكار تاهوا من صحاب الصندالة و التقاشر بيضين .كيبيع فالحشيش ...فالمعجون ...قرقوبي.. بورطابلات كيشفرهم و كيكريسي ف عباد الله اللي جا قدامو كيتهلا فيه..ملقب ب <روبيو> حيت زعر بحالي .ولاكن وجهو مكيبشرش بالخير .5د المرات و هوا كيتشد فالحبس .
سيمو: على السلامة ! ياك ما عجباتك الجلسة فداك السبيطار؟ شتك سكنتي تما..
انا: سميتو كلينيك (واقفة و دايرة العكاكز كنوجد بلاصة نجلس فيها) .. ماكرهتش نهبط على مك بهاد العكاز.
جا الليل و نعسنا انا و ماما فواحد البيت كل واحد فوق سداري ديالو، وسيمو ماكاينش . كل مرة معاياش كيدخل . و شي مرات كيجي كيحيح فالحومة سكران . كلشي كيخاف منو قاطعها فداك الحي كامل و تا واحد مكيقدر يقرب ليا من دوك الشماكرية، و البزناسة.
مهم بقيت فبلاصتي و جبت ديك النمرة ديال جاد كنقراها و كنبكي. تا نعست ... شوية و هوا يفيقني غوات سيمو محيح فالزقة ، جاي سكران . درت راسي ناعسة باش ميجيش يشد فيا عاوتاني و نوضوها صباط.
دخل كيتمايل و يطيح و ينوض دايرهم بعشرة كريساج و سكرة و حشيش ، ههه كيسالي معايا مللي كيجي مسالي كنبقا غير كنضحك.
جلس فالارض و عينيه مبوقين و كيتمايل. جبد واحد الميكة كحلة عااااامرة بورطابلات، جبدهوم و ستفهم قدامو و بدا يحسب و يتلف و يعود ، و انا تحت الغطى حاضياه(ونووووض تنعس ،واش السكايري كيحسب!!) ههه و عالااام هاد الروبيو.
جمعهوم و ردهم فالميكا و طاح نعس حداهم ..بدا يشخر و حال فمو ! مقطاااااااع (ناعس).
نضت كنجر فرجلي لعندو، و حليت ديك الميكا و لقيت فيها بورطابل ينسيك فبورطابل!!!!!! هزيت ليه واحد واااااااااعر ايفون ههههه ورجعت نعس .
قصة نصفي الثاني
محتوى القصة
التنقل بين الأجزاء