كان صوت التيلي كيصوني وفيقني من سباتي وحلمي الجمييل يااه كون فعلا يتحقق ومعتز يتقبلني من بعد لينعاودلو غا نكون أسعد وحدة فالوجود ركزت مع التيلي كان فعلا معتز هاد المرة فالحقيقة شديت الابيل
انا:الووو
معتز:منال لباس عليك
انا(فكرت بالزربة بغيت نعاود السيناريو دحلمي ولكن معارفاش واش غادي يؤول وضعي لبحال ديكشي ليفكرتو لذلك تراجعت)لباس الحمد الله ونتا
انا:(متصدمتش من ردة فعلو وتا من سبو ليا )معتز الكلام بيناتنا سالا متبقاش تبرزطني انا وليت مرت الراجل دابا
قطعت عليه ولحت التيلي وبديت كنبكي ونغوت ونشهق مكنتش باغا نوصلو لهاااد المواصل ولكن الاقدار لاحتنا فيين بغاااات اهى اهى كنتقطع فكل مرة كنفكر فيها بلي تا هو كيفكر فيا على اساس خائنة وعاهرة ندمت حيث كذبت عليه وقلتلو بلي تخطبت باش نبعدو عليا اهئ اهئ بقيت كنبكي ووالو بلا جدوى كنت كنظن الى بكيت غا نرتاح ولكن بالعكس غا مزدت تعذبت محسيتش براسي امتا نعست ....
نهار جديد فقت درت روتينياتي وتوجهت للخدمة بقيت خدامة تا جا المدير جديد هزيت لا ليست وتوجهت عندو دقيت وتسنيت الاذن غا حليت الباب ضرباتني ريحتو القوية بفف روعاتلي قلبي
انت:موسيو هادو اخر ليست نتاع السلعة ليدرتلها الاومبلاج
هو:امم(هز راسو فيا من بعد مكان مركز فخدمتو)حطيها وكلسي مزيان منين جيتي كنت باغي نهدر معاك فواحد الموضوع
انا كلست وانا كنترعد يا سيدي ربي شغا يكون باغي مني هذا ياكما غا يجري عليا
المدير:مهم غا نقلك من البوسط ليفييه
انا:ااا كيفاش
هو:راني اطالعت على الملف ديالك وانا خاصاني سكريتيرة ولا شبه مساعدة حيث عنا الخدمة بزاف لذلك قررت اني نعينك فهاد المنصب اكيد تا الصاليغ ديالو غا يكون زايد
انا:(بفرحة)اه ا موسيو نتمنا نكون عند حسن ظنكوم
هو:تا انا بدوري كنتمنى متخذلينيش مهم من غدا تبداي فالبوسط جديد راه البيرو ديالك غا يكون ليفجنبي مبروك عليك البوسط الجديد
انا:(وقفت وبامتنان خاطبتو)شكرا شكرا بزااف
خرجت من عندو و انا فرحانة مشيت للبوسط ديالي وكلست تا جات عندي نعيمة هاذ المرة وعينيها مقلوبين ضربات يدها على الطبلة ليقبالتي
نعبمة:امم درتي بييه وعطااك البووسط ياااك
انا:اا نعيمة مالكي شنو واقع
نعيمة:مديريش عليا وجه البراءة بنتي على حقيقتك البوسط لي من نهار خدمت هنا وانا كنسعاليه ديتيه نتي بدم بارد براافو علييك هادي هي الصحبة والا فالا بالحق راني كنعرفو مزيان دابا يذوقك من المرار ليدقتو
مشات وبقيت غي كنشوف ومفاهمة والو
سعاد(كتجري و كتقلب على نعيمة)مشفتيهاش مجاتش عندك
انا:سعاد الله يخليك الا ما شرحيلي شنو واقع
سعاد:مهم متديش على نعيمة راكي عارفاها غا غارت منك وصاف مهم مبروك البووسط وصلنا لخبار
انا:شكرا
مشات وخلاتني مفاهنة والو يا ترى هاااد البووسط ليجاني على غفلة شنو مزال مخبيلي من الحقائق المرة...
يحسدوننا على ما لا نملك
ولو اطلعو على ما بفؤادنا لتعاااطفو معنااااا
نحن المضحون وهم الجلااادون
في عالم يحكمه قانون الغابة
قوي يأكل الضعيف
ورااع يقوود قطييع ابله مطيع
لا يعرف الا لغة الاماءة بنعم
#متمردة_القلم
الحياة كتاخذ مجاريها بديت فالبوسط الجديد وتأقلمت المدير ضريف وكيعاملني مزيان بنات الشركة تبدلو معايا فتعاملهوم مبقاوش كيف كانو يمكن حاسديني ومبغاونيش نوصل لهاد المنصب مكيهمنيش المهم اني انا مرتاحة وعاجبني البوسط اليوم عطلة نهاية الاسبوع وكالعادة زيارتي الاسبوعية لحنان لبدات كتمااثل بالشفاااء وكالمعتاد ايضاا لقيتها فبيتها كالسة محسات بيا تا دخلت عليها
انا:حنان لباس
حنان:الحمد الله مزيان منين جيتي كنت باغا نخرج انا وياك
انا:اهاه مي لين
حنان:خصني نتقدا شي حوايج مع اليومة غا نرجع للخدمة
انا(الابتسامة ليكنت راسمة تمحات)حنان الله يخليييك خطيك من هادشي راه غا يجيبلك غير الصداع والاوجاع راكي شفتي شنو ليدزتي منو
حنان:كتهدري ا منال بحال ليمعارفاش شنو ليكاين راه الخدمة مهمة بالنسبو ليا
انا:نتي تعرفي المهم يالله دابا
حنان:واخا غير نلبس ونمشيو
تسنيت حنان لبسات وخرجنا توجهنا للسوق و تقدات حنان ليخصها وبقينا كنتساراو تا عيينا ودخلنا لواحد الكافي كلسنا طلبنا شنو نشربو وبدينا ندردشو تا وقف علينا واحد الباندي
هو:ا فين ا زوينة
حنان:ههه غي هنا صافا
هو:الحمد الله متجيش تكلسي معانا نتي و وصاحبتك(وكيشوف فيا باعجاب) راني انا وصاحبي لهيه كالسين غي بوحدنا شنو متونسوناش(وغمزها)
حنان:امم(وكتشوف فيا)
انا:حنان راكي عارفاني الى بغيتي تمشي معاه انا
غا نمشي بحالي
حنان:امم هانتا كتشووف صاحبتي مزروبة لذلك مخصناش نتعطلو مرة خرا انشاء الله
هو:دومااج مرة خرا دونك
حنان:اه(وابتاسماتلو)
مشا هاد ميخي ليمحملتوش
انا:واش من نيتك غي ليتشوفيه تبقاي تعطي وتجيبي معاه فالهدرة
حنان:سكتي واش عرفتي هدا ليكتهدري عليه شكون
انا:ويكون شكون مبغا يكوون فملك ربي المهم محملتووش
حنان:ههه مهم راه كليان ديالي قديم هذاااك امم وشفت معاه صاحبو جديد معرفت شكون هو امم وا زييين
انا:ااطط نشووف
جيت غا نشوفو وهي توقفني حنان
حنان:اويلي بلا فرطة حماقيتي غا يولي يلصق فينا
انا:بفف ميهمش ها هما جابولنا منشربوه نشربوه دغيا وندردبو مع الطريق ما فيا ليستحملو مرة خرا
حنان:ههه واخا الالة
بالفعل ديكشي ليكان شربنا وخرجنا كل وحدة مشات لدارها انا وصلت ودخلت بدلت حوايجي وتجبدت فبلاصتي وانا نتفااجأ بالصداع والدقان بالجهد فالباب تخلعت ونقزت
انا:يا ربي السلااامة شنوو واقع اتسناااو شكووون مالنا على فريع الباب توجهت للباب وحليتو وانا نتفاجئ ببركان قبالتي بفف شبغا مني هذا كان خويا محسن وباينة فيه معصب وموراه سهام محسن دخل نيشان شدني من شعري و زير عليه...
محسن: ادوي الكلبة غا خرجتي من الداار وخرجو رجليك من الشواري وليتي تمشاااي مع القحباات ادوي ياكما تا نتي وليتي بحالها قحبة كيدوزو بيها الرجااال اللياالي ويلووحوها كي الشرويطة فالنهار
انا(تنترت مو وغوت فوجهو):بعد مني ا لحماار (وهزيت صبعي فوجهو) اخر مرة تحط علياا يديييييك كتسمعني مرة خراا تجرأ وتحط يديك عليا نديك فين تربا
محسن:آخرتك غا تكوون على يدي ا منااال خرجو رجليييك من الشواااري رخفتلك بزااف غا تسنااااي عليااا
سهام عياات متحاول تهدنو ولكن والو كان بحال شي ثور هائج تنتر منها وتلاح عليا جمع معايا بتصرفيقة طحت انا الارض وهو ينزل عليا بالركالي والعصاا كنت كنغوت ربي ليخلقني ولكن شنو بيدي انا ندير الانثى البريئة ليمعندها لا حول ولا قوة امام قوة راجل غاااضب الموقف تخايلووه مفيهش تكافئ الفرص كنت كنغوت ربي ليخلقني اما محسن بحال ليكان مغيب موعااش تا لسهام ليكتحااول بما فجهدها تفكني من بين يدوو ما طلق مني تا خلاني شرويطة شاف فيا بنظرة احتقار وبعز ولكن قبل ما يخرج شاف فيا ودوا بحزم
محسن:(وكينهج)هادشي باش مرة خرا تعلمي تحداايني ااا قويلتي لسهام الى ضرت بيك ترجعيني للحبس امم اوا جري طوااالك دابا سيري للبوليس تا يلقااوني بعدا متنساايش اختي الصغيرة بلي محد محسن حي معمرك ولا تكوني حرة وديري ليبغيتي
خرج وخلاني مليوحة بحال الكلبة غا كنبكي ونشهق قربات مني سهام باش تعاوني والدموع فعينيها وانا غوت فوجهها
سهام:(بعدات عليا ونزلات دمعة حارة من عينيها مسحاتها بالزربة)سمحيلي كون حسابلي غا يديرلك هاكة مستحيل كنت نجيبو لهنا سمحيلي
خرجات سهام وانا بديت كنحاول نجمع اشلاء جسدي ومعاهوم كرامتي ليمرمدها ذكر بحجة انو خويا الوحييد تحت رجليييييه معرفتش منااش مصنوووع داك الانساان ما فقلبو لا رحمة لا شفقة فاش كنتفكر بلي حنا بجووج ترعرعنا فنفس الرحم الطاهر وارتضعنا من نفس الثدي وكبرنا فنفس الحضن كنكره الدم ليشاركاااه معاااه مستحييل نتقبلو اخ يااه على زمان ولينا عايشين فيه فزمن الاخ المكبووت المزلوووط باش يبرد على الضغوووطات ليعايش فيها من جهة المجتمع ليمكيرحموووش كيقيل النهار كامل فالقناتي و القهاوي مع رفقاء السووء لا خدمة لا ردمة تا واحد مكيتقبلو ولا كيعطيه قيمة ومن جهة خرا مكيكووونش راضي على نفسو وهو عالة معندو تا فاائدة وبااش ينفس على راسو مكيلقا قدامو غي ديك الكائنات الضعيفة يركلها ويشنشطها فنهاية المطاف المرأة كتبقا الضحية الاولى والاخيرة معنفة ومستغلة من طرف خوتها وراجلها والرجال المحيطين بيها وزيد عليها اللائحة طويلة بقيت كنبكي وانا جامعة ركابيا عندي كيتسمعو غي صوت شهقااتي تا تدق الباب مقديتش نووض ونحل كان المي كبيير نفسي اكثر ماهو جسمي تعالات الدقااات ولكن محليييتش ومتحركتش بقيت غي كنبكي تا سمعت الساروت كيدور فالباب الشخص الوحيد ليعندو ساروت داري حنان ومن غيرهااا عليت راسي وشفتها قدامي كانت باينة مخلوعة قربات مني وهي الدمعة شاداها فعينيها وعنقااتني تخشيت فحضنها وزدت اطلقت العنان لدموع ينهامرو.....??
جموح الشهوة الجزء السادس
محتوى القصة
التنقل بين الأجزاء