شرارة حب غامض الجزء الثامن

من تأليف Ghazal trust
2018

محتوى القصة

رواية شرارة حب غامض

.. ولكن بعد ما كثرو المعاريف ديالي وليت كنطلب مساعدتهم و تيقلبو معايا و تيترقبو تحركاتك و لقاو باللي مكيناش فالمغرب و لك فترة كبيرة ماجيتيش وبقيت كنتسنا رد فاش تجي .. و بالفعل فاش دخلتي المغرب عطااوني خبر و جيت و متوقعتش منك ترجعي بديك السرعة و طلبت منهم اوقفوك باش و بقية القصة كتعرفيها .. 
انا متاترتش بزاف ولكن شفت ف ماما لقيتها حانيا راسها و كدمع مهم قررت منضعفش و نواجهو كثر .. 
سندي : امم اه واخا فهمت (كنحك راسي ) علاش مشيتي فهمناه مزيان و لكن بان ليا باقي شي طرف مخبي .. 
عبد العزيز : بالفعل و طرف مخبي اكثر اهتمام لانو مكنتش باغي تعرفي بهاد طريقة و من عندي كنت كنتسنا الام ديالك تعاود لك كلشي .. ماشي غير هاد الجزء ولكن كلشي عليا من الاول حتى الاخير ولكن مع الاسف خبات كلشي كلشي و ماقالت لك والو .. و الامر صعيب عليا لدرجة مقدرتش نواجهك و قلت نخليها هي (شاف ف ماما ) تعاود لك كلشي ولكن قلت يمكن ميصلاحش نثق فيها مزال و نعاود لك كلشي قدامها .. 
سندي : واخا الله اسمعنا خير .. 
بقا عبد العزيز شحال ساكت و كيلقط انفاسو و يشوف من هنا و من الهيه و انا كنشوف ف ماما كتبكي .. صراحة بقات فيا واخا كتبان قوية و دكشي ولكن تاثرات و اصلا اي ام فبلاصتها غادير نفس المسألة .. ناضت بغات تخرج حيتاش تزايد معاها زايد ولكن مخلاهاش .. مشات حدا البالكون تشم شويا الهوا و مشيت عندها .. 
مريم : سمحي ليا (كتمسح فدموعها ) .. 
سندي : حشومة عليك ا ماما تقولي هكا انا مسامحاك .. (بستها ) .. 
مريم : من بعد هدشي اللي غاتسمعي امكن تبدلي رايك .. 
مشات ماما تجلس و مبقات كتشوف فحتى واحد من غير الارض .. و انا عينيا غا كيضورو و انا ندور عندو (مكنقدر لا نطق سميتو ولا نقوليه الكلمة اللي تيقولو ناس لدوك اللي رباوهم ) .. 
سندي : كمل .. 
عبد العزيز : (حنا راسو و تنهد و بقا شحال عاد هزو ) وجدي راسك هدشي اللي غانقولك امكن ابدل حياتك كاملا .. 
سندي : 😳😳 .. 

عبد العزيز : فاش كنتي صغيرة و جيت المرة الثانية و لقيت الام ديالك طلقاتني و حطيت ليها شروط اللي من بينهم العادات و التقاليد و الاعراف .. ان البنت بالنسبة لينا حنا كنزوجوها بالشخص اللي بغينا (عائلة باها ) يعني زواج تقليدي و زوج من عندنا (تركيا ) .. و الا رفضات اولا هربات اولا حاولات دير شيحاجة كيقتلوها .. 
سندي : 😳😳😳 أ أشنو شمن عصر فاش عايشين نتوما .. الجالية .. المرا ماشي عبدة عندكم .. (قاطعني ) 
عبد العزيز : ماشي قصة عبدة و إنما المرة كاتبقا فدار باها تا كيعطيها اللي كيستاهلها .. 
سندي : من هادشي كامل مع الاسف انا مزوجة و عندي بنت كيفما كتعرف. . 
عبد العزيز : غادي طلقي و هذا ماشي غلطي و اللي غيتزوجك نقولو ليه تغتاصبتي بز منك .. 
سندي : أ أأ ش تتقول .. لا لا امكن كضحكو معايا ميمكنش .. ماما هدري قولي شي حاجة .. (ماما كتبكي ) اشمن طلاق ميمكنش و بنتي ؟ .. سمع رجع منين جيتي و دير بحال الا معرفناك و حتى انا غندير بحال الا عمرني شفتك ولا عرفتك .. 
عبد العزيز : Olmaz. . 
بغيت نقول ميمكنش .. تقاليدنا مختالفا و هما عارفين كلشي .. 
سندي : داك تخربيق ماشي عليا .. اصلا انت مزال مكتعرفش اسلام مزيان ميمكنش اخلي هادشي يوقع .. 
عبد العزيز : ههههه امكن انتي اللي مكتعرفيناش مزيان .. واخا انا نخليك هوما ميخليوكش .. اجبدوك من تحت الارض .. 
سندي : (بديت كنتوتر و كنحس براسي ماشي هي هاديك ) هادشي اللي كتقول ماغانديرو و مستحيل نقبل .. انا اصلا مكنعتبركش اب ليا .. (بدا صوتي كيطلع ) .. سير فحالك خرررررررررررررااااااااااج عليا (طحت الارض و كنشوف ف ماما كتموت بالبكا ) .. 
سمع اسلام الغوتة ديالي و طلع كيجري حل لباب لقاني فالارض جا شدني .. 
سندي : قوليه اخرج خرجو عليا .. 
اسلام : شواقع .. 
عبد العزيز : انا نتسناكم التحت .. 
سندي : سير فحالك عمرني نشوف وجهك. . 
خرج عبد العزيز هبط التحت و تيتسنا و بقينا غير حنا و معانا يحيى .. بقيت شحال مصدومة و اسلام معايا حتى تنفست مزيان و عاودت ليه كلشي بالحرف .. ماجاوبنيش طلق مني و هبط كيجرييي فالدروج غادي عند عبد العزيز .. 
اسلام : ( من دروج باقي موصل التحت) .. شكايسحابليك راسك باش طاقني من مرتي .. امكن مكتعرفنيش شكون .. غادي نخليهم امسحو بيك الارض انت و اللي كيجيوك 😡😡 .. 
عبد العزيز : (بهدوء ) انت اللي مكتعرفنيش .. المهم غاطلقو بالخاطر ولا بزز 😈 .. 

.. خرج عبد العزيز و مشا ركب مع رجالو بقات غير العجاجة موراه و خلا حتى العافية شاعلة فالدار .. اما اسلام اللي طاحت عليها يديه يطلعها تال سما و يضرب بيها الارض .. بقا شحال معصب و تيقاد فالنفس ديالو .. حيتاش ممولفش يتحداه شيواحد .. خرج للجردة يتنفس شويا و قرر يمشي عند زهيتش .. منها يخوي طاقتو فيه و يتنفس بالمدابزة اللي بالنسبة لزهيتش لعب و منها يشوفو حيتاش هملو هاد المدة .. اما سندي و امها كل وحدة مشات لجناحها بلا ميهدرو .. يحيى بقا فالبيرو تيخمم و يطل من البالكون على اسلام .. دازت العشية كاملة بحال هكا .. كل واحد شاد ركنة و حد ما بغا يشوف كمارة حد .. طاحت الضلمة و إسلام تهدن ولكن باقي منساش المشكل .. قال يمشي يطل على سندي يشوف كيف بقات ولكن قبل مشا للكوزينة ووجدو ليه واحد البلاطو فيه العشا .. هزاتو الخدامة و بقات تابعاه .. وصل الجناح و هي يشدو عندها و شير ليها بيديه تمشي و دخل لقا سندي ناااعسة و عينيها منفوووووخين بدمووع .. اكيد غايتنفخو شكون يقلها على راسو من بعد ما توصل لهاد العمر يخرج ليك اب جديد و تلقا راسك عايش غا بالكدوب .. و ماشي غير هدشي تكون مزوج و والد و يبغيو يفرقوك على عائلتك .. المهم حط اسلام البلاطو فوق واحد الطبلة و مشا جلس حداها .. بقا شحال كيشوفيها و هو يدير يدو على وجها بغا يفيقها .. غير بدات تفيق و هي تنخصص .. حلات عينيها شافت ف إسلام و هي طير عليه عنقاتو و كتبكي ..

سندي : اهئ اهئ اهئ اهئ 😭😭😭😭😭😭😭 مم م م مستحيل مم مستحيل غنت ت تسطا ولا اهئ غانموت الا تفارقنااااااااااا .. 
اسلام : ششششششششش .. 
طلق منها و هو يشد ليها وجها بين يديه .. 
اسلام : انا متقدر تفرقني معاك غير الموت بوحدها .. كتسمعيني .. غيييير الموت .. داكشي لاخر غا حيديه من بالك(دار صبعو فجنب راسها ) راه عمرو ماغايكون و غير رتاحي .. 
غير سمعات ديك الهدرة و هي تنهد و تكات عليه عنقاتو بجهد بحال الا كتقوليه عمرك تخليني .. حتى هو ماقاليها والو خلاها على خااااطرها .. بدات كطلق منو و هو يشدها باسها من جبهتها و نوضها للدوش غسل ليها وجها مزيان .. بقا جارها لعد طبلة فاش محطوط العشاء .. 
اسلام : ضروري خاضك تاكلي شويا .. 
سندي : مم نن لا ماباغاش .. معنديش شهية .. 
اسلام ؛ لا بزز ا حبيبة غاناكلو بجوج .. 
سندي : مافياش والله .. 
اسلام : (تيجرها) وا بلا فشوش .. زيدي اصلا من الغدا مكليتيش .. 
بدا اسلام عليها بكولي كولي و هي دير ليه الخاطر .. و كيوكلها بزز باش كتشد .. حتى ولاو لاعبين كل دغمة ببوسة بقاو شي ساعة هكاك .. هو ماغاراضوش فالبوسان ولا فالماكلة خصوصا فوضع بحال هذا .. ولكن بغا ينسيها فالمشكل باش متبقاش شاطناه و يبقا ليه هم واحد هو يلقا الحل للمشكل .. 
سندي : حم حبس حبس .. خلينا حسن نجمعو هاد روينة و نعلو شيطان نوضو نعسو قبل ماتسخن الموطور و ماتلقت معامن .. 
اسلام : علاش نتي فين مشيتي .. 
سندي : هيهيهي 😄😋 لاعبة معا الوداد ا حياتي .. 
اسلام : مفهمتش 🤔 .. 
سندي : اف خاصنا نقللو الحيا باش تفهم ههه .. وا فيا ليغيكل 😆 
اسلام : نوضي تهزي من قدامي .. عاد كتقوليها حتى طمعتيني ..

دازو الايام بحال هكا و حتى جديد ماكاين عادي كيف ديما .. حد مكيخرج من القصر و حد ماكايدخل لعندهم .. حتى اسلام سيفط على رجالو لي فدانمارك يجيو يحضيو القصر و اللي غادي واللي جاي حتى يستقر الوضع باش يرجعو كاملين .. سندي بدات كتنسا شويا ولكن داك الخوف مزال فيها .. اما مريم مكتخرجش من بيتها حيتاش معندهاش الوجه اللي يشوف ف سندي .. كتهضر غير مع يحيى كيوصل ليها الجديد .. اما البرهوشة د كنزة كل نهار كتزيد تكبار ماشاء الله .. 😍 
#صباح_جديد ........ #سندي 
________________ 
.. ناعسين كيف ناس حتى كنحس بالناموسية كتهز .. اولي مال هدا ضربو حمار ضحى مالو كالس ينقز .. ندير بحال الا محسيتش لايخلطني مع هاد ناموسيا .. بقا شحال بحال هكا حتى سمعت .. 
... : اوووووف واش نتوما ميتين ماغانفيقوش .. 
🙄🙄 صوت البرهوشة د كنزة هذا .. بديت كندفع فإسلام برجلي باش يفيق هو الاول يسمع نكيرها هو الاول عاد نفيق انا .. نلقاها عيات مع اسلام و متسمعنيش بزاف 😅 .. 
اسلام : ممم هداي .. جلسي (كيغطي وجهو بالمخدة ) .. 
هي غير كيقوليها هداي عاد ما زايدا فيه ههههه .. برهوشة مكتريتاش .. 
إسلام : (جرها ) اشباغا دابا .. 
كنزة : 😏 وا غير بشوية عليك مالنا . راني غير ولية .. 
إسلام : 😳😳 (كيفيقني ) 
انا تحت الغطا كنموووت بضحك عارفا لسانها سليط .. درت راسي عاد كانفيق .. و انا ندور عندهم حليت عيني .. 
كنزة : (ضارت شافت فيا ) ييي على سلامة .. عام باش تفيقي .. على قاعيدة .. 
سندي : شوفي انا عارفا هاد المجية ماشي غير هكاك .. و بلا ماتزيدي طولي .. 
كنزة : (كدور فعينيها ) مممم اش ليوما .. 😇 ؟؟ .. 
دقة وحدة ضرنا انا و اسلام عند بعضياتنا كنتساءلو .. بالخف هز اسلام تيليفونو .. 
اسلام : (كيشوف فتيليفونو) اليوم ماكاين والو و ماعيد ميلاد تاحد و ما عيد حب و ماعيد زواج تاحد .. طلقينا شنو اليوم ..

كنزة : فففففف 😤😤 خصني نطق باش تفهو .. راه الحر بالغمزة و الحمار بالدبزة .. 🙊 يي .. لا اا ماشي هكاك اللي قصدت .. 
حمر فيها إسلام عينيه و بدات تفتف فالهدرة .. البرهوشة معندهاش حصارات و لي جات على فمها طلقها .. 
كنزة : ولكن عيد ميلادي بعد يومين و يالله الوقيتة باش نوجدو .. 
اسلام ؛ بنتي .. هاد القربالة كاملة على عيد ميلاد بعد يومين .. انا ف نص نهار نوجد ليك احسن عيد ميلاد .. 
سندي : فين بغيتيه ا بنتي فوصت القصر ولا فالجردة .. 
كنزة : (كتعوج ) راني انا ماشي حمقة عارفا شكنقول .. انا ماباغاش عيد ميلاد هنا .. باغاه ف شي بلاصا فيها ناس بزاف خصوصا قدي .. مبغيتش نضفي شمع و نلعب مع لكلون كيف ديما و نشوف وجوه نفس الاشخاص (شارفين ).. بغيت هاد العام حاجة مبدلة .. و 5 سنين اللي عندي راني كبرت زعما .. 
اسلام ؛ ممم صافي غانتكلف غير تهناي 😉 
كنزة : 😍😍 يعيييش بابي 💃🏻 .. 
باستو و هي تزيد .. قلت ليها و انا و مشات بدات طلع ليا فحجبانها .. 

.. بعد ديك الحيحة اللي نوضات صاحبة السمو كنزة هههههه فاقت سندي و اسلام بز منهم .. دخلو دوشو مع شويا دالبسالة مكتروش و لبسو حوايجهم .. هابطين ناشطين افطرو و كيف العادة بوحدهم .. مريم كتفطر فالجناح ديالها و يحيى كيبقا معاها. . اما كنزة و مي فطومة فاقو و فطرو بكري و خرجو للجردة .. 
سندي : (كتفطر ) بب شغانديرو بعد الفطور .. 
اسلام : ممم تاحاجة .. عندي شي خدمة نقضيها دغيا .. اصلا قليلة .. و من بعد نجي نستارح .. 
سندي : نتكلف انا بعيد ميلاد .. 
اسلام : امم لا من الاحسن بجوج .. نتي تعطيني رايك و انا نطبق .. 
سندي ؛ اول حاجة خاصنا نمشيو نحجزو .. لعيد ميلاد بعد غدا ولا لا .. 
اسلام : كوني هانيا انا غانمشي و نكلفهم بكلشي .. قولي ليا غير شمن ديكور ..
سندي : شفتك بحال الا وليتي حابسني هنا رسميا .. منخرجش .. اسلام مخبي عليا شيحاجة .. 
اسلام : أ .. لا شغانخبي عليك مثلا.. بلا تخربيق .. . انا غير مبغيتكش تعدبي .. 
سندي: اوا انا باغا نمشي نختار البلاصة براسي .. و نعرف شغايجي معاها .. 
اسلام ؛ ففففف ..(نايض كيمسح فمو ) باز حالتك هي حالتك .. (حط يديه فوق طبلة)
واخا غانقضي غاراض و نجي نلقاك لبستي .. الا تعطلتي نمشي و نخليك .. 
سندي : (نايضة عندو ) غير كون هاتي 😄 (باستو فمو) .. 
.. خرج اسلام و طلعات سندي فالدروج كتجي تقاد حالتها .. باز مكتعاااتقش اللي فراسها اللي يكون .. يالله كتبدل حوايجها و هي تعيط على فتاح يطلع عندها .. وصل و تيدق فالباب .. 
سندي : دخل .. 
فتاح : نعام ا لالة سندي .. شحب الخاطر .. مودة هادي مبقيتي عيطي ليا .. 
سندي : غير مع الوقت و صاف .. مهم بغيت تجيب ليا شي تصاميم ديال اعياد ميلاد دالدراري صغار قد كنزة.. و و و 
فتاح : واخا .. ولكن و و شنو؟؟ 
سندي : و ممم نن اففف مكيعاود لك اسلام والو .. 
فتاح : اااااه ههههه لا اسلام مشغول هاد اليامات مكنشوفوش بزاف .. و شحال مجلسنا .. عيهييههيهي
سندي ؛ مممم صافي سير .. متعطلش ليا دكشي بغيتو دابا ..
تم غادي جيهت الباب .. 
سندي : شوف الا كنتي كتكدب راك عارف شغايوقع .. 
فتاح : حاشا .. (قاطعاتو ) 
سندي : انا غير علمتك ا فتيتيح .. 
فتاح : ( حدر راسو و دار ضحكة صفراء و خرج و سد الباب ) ..

.. وجدات سندي راسها و وصلوها تصاميم اللي وصات عليهم قتاح .. خدات فكرة و كونات نوع ديكورر اللي بغات بالضبط فراسها .. و اي حاجة غاتحتاجها .. باش متنساش هادشي كتباتو فتيليفونها و كتسنا إسلام ادوز عليها .. بقات شي 30 دقيقة و هي كتسنا حتى طلع ليها دم و هي تجي عندها الخدامة .. 
.... : مدام سي إسلام كيتسناك فالتحت .. 
سندي : هاني جاية .. 
.. كانت لابسة كسوة رمادية فايتة ركبة .. لاسقة معاها و معرية من واحد اليد و بوط قصير دومي طالون محلول من القدام و شعر سامبل مع شوبا دالبوكل فالتحت باش يعطيها الفوليم مع مكياج سامبل .. مشات كطير فدروج .. كتجري توصل عند اسلام .. وصلات حل ليهاا واحد من الخدم الباب و هونا يضيماريو و تبعاتهم واحد طنوبيل من الحرس جديد اللي جاب اسلام .. 
سندي ؛ تعطلتي .. فين مشيتي ؟ 
اسلام : كنت كنقاد الوراق باش نجرجعو فحالنا بعد العيد ميلاد .. طولنا بزاف و انا عندي الخدمة .. اجي شداك اللباس بعدا ؟! 😠
سندي : (مابغاتش تنكد عليها الفرحة و قلبات الموضوع) 😍😍😍 اخييييرا .. حم فين غانمشيو .. 
اسلام : كنفكر ندير ليها أنيق فالبارك اشبان لك ؟ 
سندي : ممم مفكرتش فيها .. معرفت كيف غتجي .. حتى معنديش فكرة كيف غانديرو للديكور و كلشي .. (قاطعني ) 
اسلام : متخمميش (شاف فيها و غمزها ) غانجيب اللي غايتكلف بكل صغيرة و كبيرة .. غير خصنا نمشي شخصيا نعلمهم .. راكي عارفة كنزة .. 
سنديي : هيهيهي عارفا عارفا .. مهم نمشيو نشوفو .. و تماك نقررو .. 
وصلات سنددي و اسلام البارك اللي ديجا شافو اسلام و بقا ليه غيرر اهضر مع مولاه و يتفاهمو .. تناقشو و حدد معاهم انه غايحجزو ليوماين .. نهار للتزيين و نهار لعيد ميلاد .. سيغط اسلام ايمايل فيه تعليمات كاملين للمكلفين باش يبداو خدمتهم .. اما سندي حلفات لا رجعات للدار .. باغا تمشي تجلس هي و إسلام فشي قنت و هو ماحاملش اتخلط مع بنادم .. ولكن كيفما كتعرفو سندي ممفاكاش .. دار ليها خاطرها كيف كل مرة و مشاو لكافي جلسة على الهواء الطلق .. جلسو شويا .. 
اسلام : اوا ا حبيبة كيفما درت لك خاطرك ديري ليا ديالي و زيدي فحالك .. 
سندي : راه عاد جيني .. خلينا مزال شويا تخنقت .. ديما محبوسة .. 
اسلام : شفتي نتي واخا تباتي فالزنقة راه ماغاتشبعيش 😒 .. متزيديش هدرة و زيدي فحالك ..

..دازت يوماين عاديا مافيها حتى جديد .. العيد ميلاد مكلفين بيه ناس متخصصين فداكشي .. الحوايج و الكوافور و دكشي غيجيو عندنا تال بيت نعاس .. 
وصل نهار عيد ميلاد .. فقت بكري بسبب الموسيقى اللي مطلوقة فالقصر و مجهدة .. إسلام جايب الكلون و شي دراري صغار القصر يبقاو مع كنزة حتى نديوها للمفاجأة اللي موجد ليها .. 
نضت بكل حيوية و نشااااط فرحاااااااانة ببنتي اللي كاتكبر قدامي 😍 تبارك الله عليها كتحمق .. و عارفا شكادير و شكاتقول ماشي بحال مها .. نضت بوحدي بطبيعة الحال حيتاش إسلام فايق بكري .. كنزة بالنسبة ليه أغلى مكيملك فالدنيا ميفرطش فيها .. قيسي ليه عينيه و متقيسيش ليه كنزة .. و واقف على تجهيزات برجليه .. كان بإمكانو يخلي شي واحد يعطي للمكلفين تعليمات .. ولكن حيتاش بنتو كنزة كيخدم و هو فرحان ... مهم مهم نضت دوشت لبست شورط و X نفطر بينما جات الكوافورة و الموديليست .. 
خرجت للجردة نشوف الاجواء و طلبت من الخدم يخرجو ليا الفطور تما .. بديت كنسرح عويناتي و بانت ليا ماما مع كنزة و كانت كتشوف فيا .. درت فيها شوفة ناقصة و قلبت وجهي .. حطو ليا الفطور و طلعت للجناح ديالي نتسنا فيه .. عيطت لوحدة من الخدم .. 
سندي : الا وصلات كوافورة و ستيليست اطلعو هنا .. 
... : واخة مدام .. 
ضارت باش تمشي ..
سندي : اه و حتى كنزة طلع معاهم .. 
... : واخا مدام .. 
سندي : إسلام مكينش ؟
... : لا خرج .. 
سندي : اه شكرا .. 
... : حاجة خرا ا مدام ؟
سندي : لا لا شكرا .. يمكن لك تمشي 😊 
.. جلست شويا كنلعب فتيليفون و تحل الباب تمات كنزة داخلة مدرمة .. و عرفت باللي جاو حيتاش هي غاتجي معاهم .. تدق الخدامة فالباب .. 
.... : مدام راه كوافورة و الاخر جاو .. 
سندي : واخا خليهم يدخلو ..

..دخلو و حطو باكاجهم بديت نختار انا و بنتي و نتخيرو .. حيتاش قبل عطينا مقاساتنا للستيليست و هو جاب لينا ليغوب تختارو شنو نلبسو انا و بنتي (زعما نفس ستيل ) .. ولكن معامن انا .. اللي حطيت عليها يدي مكتعجبهاش قالت لك .. حتى عييت خليتها تختار .. مول الميكب و شعر متناقشتش معاه قلت ليه دير لينا اللي يجي معانا و هو يعرف حسنا .. سالينا مكياج و يالله بغيت نبدا فالشعر قلت نصوني لإسلام يقوليهم يوجدو لينا سيارة انا و بنتي .. و ضيوف اللي فالتحت ينقلوهم للبارك .. دكشي اللي درت .. لبسنا و سالينا انا و بنتي جينا كنحمقو .. خرجنا باش نمشيو لقيت ماما و بابا يحيى عاد مشاو .. حسن نيت اصلا مفيا ميهدر معاها .. باقي مبردات النار اللي شاعلا فيا .. 
وصلنا البارك و انا نتفاااااجئ بديكور ولا في الأحلام .. دكشي كثر من خيالي .. تنا انباهرت واخا نعيا نوصف منقدرش .. اي حاجة كتحماق عليها كنزة كاينة و حاضة .. لا من الالوان لا من رسومات و كلشي .. مزال كاعما فقت من صدمة د ديكور و تصدمت بالضيف اللي جاب 😳😍 .. 
لقيت منصة مجموعين فيها دراري صغار و وسطهم محبوبة الصغار نانسي كتغني يا بنات يا بنات يا بنات .. ياللي مخلفشي بنات .. 
مشات بنتي كتجري عندها و كتلعب معاها .. ولكن مبقاتش بزاف نظرا للإلتزامات ديالها .. مهم بقينا فجو اكثر من رائع و ضحك و شطيح و انا و إسلام كلعبو مع كنزة و فرحانين حتى جا وقت تقطع الحلوة .. 
و الكيك كان ثالت صدمة ليا ليوم .. حيتاش كان عبارة على كنزة منحووتة .. صراحة نباهرت بالدقة د إسلام فكل حاجة و منسا والو .. ولكن قبل كان باغي يعطيها هديتو قبل منطفيو شمع .. جاب ليها شي وراق فيهم ان الفيلا د اسلام اللي فمراكش ولات على سمية كنزة .. كلشي بقا غير حال فمو و حتى انا معاهم .. حيتاش ماقالي والو قبل .. و طلعات معايا باللي مجبت ليها والو و اش جاب ميسكتها .. و حتى هي كتسنى نعطيها كاضو ديالي .. 
كنزة : و انتي اش جبتي ليا (معلقة ف باها معنقاه ) 
سندي : انا هيهيهيهي ممم .. (عاق ليا اسلام مشريت والو .. و اصلا مكتخرجش ) كاين فالد.. (قاطعني) 
اسلام : انا و ماماك اللي درنا هادشي كامل و الكاضو اللي عطيتك ديالنا بجوج .. 
كنزة : اااه ممم .. اوا يالله وقت الحلوة و نطفي شمع .. 
مشينا تجمعنا على الحلوة كاملين و طلقو الموسيقة ديال غنو لحبيبي و قديمو له التهاني .. عيد ميلاده الليلة عسا مئة عاااام ... 
بقينا كنغنيو ليها حتى طفااات شمع ..و تسمعات ..
Booooooooom 💣💣💣 

من بعد الصوت اللي تسمع كلشي غاب على الوعي ديالو .. لا من المنظمين ولا من المدعويين وحتى من البوديكارد د إسلام .. 
#بعد_مرور_15_دقيقة 
بداو تيفيقو واحد بواحد .. و كلشي ضرو راسو و مافاهمش شواااااقع .. 
بدا إسلام كيفيق و لقا حداه سندي كلس تيفيق فيها و ناض اقلب على باه و مريم و مي فطومة و كنزة و رجالو .. ولكن قرر هو الاول يشوف رجالو .. 
كلشي فاق مافاهم تاحاجة و كيبقا يتساءل شنو وقع و كيتفكرو شناهي اخر حاجة سمعو ولا شافو .. 
اسلام شك ف شي حاجة ولكن كيتسنا حتى يأكد شكوك ديالو.. مشا عند رجالو اللي لقاهم يالله كيتوكضو .. 
اسلام : سيرو شوفو منين جا هاداك صوت .. 
مشاو رجالو دارو على الباااارك كامل كيقلبو فكل بلاصة و لقاو واحد القرعة متوسطة .. تقريبا تتهز 5لتر و كحلة و من شكلها باينا هي اللي طرتقات .. جابوها لإسلام .. 
اسلام : (كيشوف فيها مزيان ) عيطو على لجنة المنظمة .. 
مشاو يعطو ليهم و هي تم جايا سندي عند اسلام كتجري .. 
سندي : كنزة ماشي معاك ؟؟ 
اسلام : لا لا .. فيقتك و مشيت نشوف شواقع .. و .. (كيحك راسو ) شوفي مع ماماك .. 
سندي : لا شفت ماما كتقلب علينا و مامعاها تاواحد .. 
اسلام تزايد معاه زايد و بدا يتعصب .. جاو رجالو و معاهم اللجنة .. 
(حطو الكارد ديك القرعة ) 
اسلام : سيرو قلبو على بنتي كنزة فينما كانت جيبوها .. 
اسلام : (تمشا شويا للقدام و جمع جهدو كامل ) ديالاش هاد القرعة .. 
المدير د اللجنة : (مزال كاعما توكض مزيان) .. أ أ .. مم (كيشوفيها مزيان و يحل عينيه ) معرفتش .. و عمرني شفتها .. (ضار عند ناس اللي خدامين عندو ) شكون جاب هادي .. 
كاااع قالو باللي عمرهم شافوها .. 
اسلام : كيفاش ماعارفينش .. و غير انتوما اللي كنتو هنا .. و البلاصة كانت محروسة بزاااف .. سيرو جيبو لائيحة الموضفين اللي خدمو هنا هاد يوماين .. 
سندي غا كتشوف مفهمات حتى حاجة .. 
سندي : اسلام شوااقع ؟؟
إسلام : سندي سيري حدا ماماك خليني نركز .. 
(ماتناقشاتش معاه ضارت تمشي .. ) جاو ليكارد كيجريو .. 
.. : ملقيناهاش ا مسيو إسلام لا فالبارك لا برا البارك .. و اللي سولناه كيقولينا ماشافهاش .. 
سندي : 😳😳😭😭😭😭😭 
مريم و يحيى حسو باللي وقعات شي حاجة جاو عندهم .. طارت سندي على مها كتبكي و تعاود ليها شواقع و يحيى كيسمع .. و اسلام غادي جاي كيتسنا لائحة الموظفين .. بقاو شحاال كايتسناو .. جات اللائحة .. كيحل فيها إسلام ... 
تررر تررر تررر (تيليفون تيصوني ) 
إسلام : (ففف ماشي وقتو) ألو .. 
... : نسيبي العزيز 😈 .. 

..اسلام : كنت عارفك واااش انت .. والله و مترجع بنتي راه وجهي لاخر غاتشوفو .. مزااال مكتعرفنيش مزيان 😡 
عبد العزيز : Olmaz canım ... hhh çok komik  😅 .. sakın sakın hayatım 😈 (ابدا يا روحي .. مضحك جدا .. اهدء يا حياتي ) ..
احم هههه بغيت نقوليك اللي نطولوه نقصروه بنتك فالحفظ و الصون و انت شروطي عارفهم .. تعطيني بنتي نعطيك بنت .. فكر و رد عليا (قطع) .. 
اسلام العرووووووق ديالو خرجو .. ضرب بالتلفون الارض .. سندي غا كتبكي واخا مافاهما والو .. و مها كتسكت فيها .. 
يحيى : شواقع ؟؟ 
اسلام : شواقع ههه باغيين تعرفو شوااقع .. (كيمشي و يجي واحد اليد محزم بيها وحدة كيحك بيها وجهو ) .. اييه واخا انا نقوليكم .. اوا ا لالة سندي باك اللي دار هاد البلبلة و خدا كنزة ..
(بدات تدوخ و تفشل و تبكي و مريم شاداها لاطيح ) .. 
اسلام : لا بلا ماطييحي مزال ماساليتش .. اوا قاليا نعطيه بنتو اللي هي انتي و يعطيني بنتي .. 
مريم تصدمات .. و سندي سخفات و يحيى معرف يشد سندي ولا مريم تجمعو عليهم ناس حتى غوت اسلام على رجالو فرتكو زقلة .. 
... : سالات الحفلة الله اعاون .. 
بداو تيمشيو الناس .. اصلا مبقا ميديرو الحفلة تقلبات سفاها على علاها و اصلا مولات العيد ميلاد تخطفات .. كلشي مشا بقاو غير هما بوحدهم (اسلام ، سندي ، مريم، يحيى ، مي فطومة ، الكارد ، شواافرية ، المنظمين .. )
من بعد ما اسلام عرف شكون مول الفعلة .. فمكاين لاش ابقا تم ادير تحريات ديالو حيتاش كلشي باين .. بعدما فاقت سندي رجعو للدار كاملين و اسلام طلب يبقا بوحدو فالبيرو و ميبرزطو تاواحد ..
سندي طلعات لبيتها بوحدها .. تاهي مابغات تشوف تاحد خصوصا مريم اللي حتى هي حالتها صعيبة و كتشوف راسها هي سباب فكاع هادشي اللي وقع و يحيى معاها كيواسيها .. 

.. مشا إسلام بقا بوحدو فالبيرو و قدامو القرعة و الكاس .. هو تيفكر و ماحاسش بالوقت كيفوت .. و تفكر دوك اليامات اللي كان كيحس باللي شيواحد تيراقبهم .. ولكن كان كيظن باللي هو سابق خطوة للقدام مع انه وقع العكس .. عبد العزيز سااااابق 10 دالخطوااات القدام و كان مراقب كلشي و التحركات ديالهم كلها عارفها .. قرب اصبح الحال و إسلام باقي فنفس الوضعية اللي هو فيها تيفكر و تيحاول يلقا حل لكلشي .. 
صبح صباح .. و القصر هادئ بحال الا مافيه حتى واحد .. اكيد كنزة كانت هي الروح ديالو .. و كانت هي الشعلة دالحماس للجميع .. ولكن دابا ديك شمعة المضوية طفات .. واخا يكون صباااح هما عندهم كلشي لييل .. 
قبل مينعس إسلام جبد تيليفونو تيدورو شحاااال فيديه .. شويا دوز واحد النمرة .. 
إسلام : ألو .. 
... : Efendim .. (نعم )
إسلام : شنو ؟؟ 
عبد العزيز : قررتي ؟ 
إسلام : موافق .. 
عبد العزيز : çok güzel 😍 y Tamam o zaman  😉 .. ( مزيان بزاف .. واخا ) .. بغيت نقول احسن مادرتي و متأكد هذا قرار مزيان .. 
اسلام : ففف مهم انا نقولك تفاصل من بعد .. متعيط ليا تا نعيط لك انا (قطع) .. 
.. ناض إسلام مشا لجناح ديالو لقا سندي باقا ناعسة هز شي حوايج باش يبدل و مشا تأمل فيها شويا باسها من جبهتها و خرج .. مشا لبيت ضياف دوش و تكا قبل مينعس عمر تيليفونو يصوني بعد ساعتين و نعس .. 
وصلات 10 دالصباح .. طلعات الخدامة عند سندي باش تسولها فين بغاو افطرو (جردة ولا التحت ولا ف الجناح ديالهم) .. 
سندي :(باقا فالفراش) جيبي ليا لفطور انا و اسلام للبيرو .. 
... : واخا ا مدام .. 
سندي : شكون فايق ..؟
... : حتى واحد .. مدام مر..(قاطعاتها )
سندي ؛ صاف يمكن لك تمشي .. 
... : واخا مدام .. 
دوشات سندي و لبسات و خرجات تمشي عند اسلام للبيرو يفطرو مجموعين .. 
تلاقات الخدامة واقفا كتسنا .. 
سندي : علاش مدخلتيش ؟
... ؛ كنتسناك ا مداد نتي ولا مسيو اسلام تجيو .. 
سندي : لا اسلام بقا هنا .. علاش مدقيتيش ؟ 
... : مسيو إسلام كاين ف بيت ضياف ا مدام 
سندي : 😳😳 .. ممم أ أ اه بصح نسيت .. حطي الفطور لداخل و سيري .. 
... : واخا ا مدام ..

.. مشات سندي كتجري كتقلب على اسلام فين ناااعس .. يالله مالقاتو .. مشات تطير عليه تفيقو .. و مع هو عاد ناعس مقدرش يفيق و تجمع عليه العيا ديوماين دالتوجاد و هو نيت يكملها .. ولكن سندي هي سندي عنيدة متفرقاتش عليه تا فيقاتو .. تيحل عينيه بزز .. 
سندي : وا فيييق .. لاش نعستي هنا .. 
إسلام : (تيحل عينيه بزز و تيغندج ) وش وقت الهدرة هادي .. سيري تا نفيق .. 
سندي : لا لا دابا فيق .. و نهدرو 
اسلام : (تقلب و غطا راسو ) ماكنتش باغي نفيقك هكاك علاش جيت هنا .. يالله سيري خليني نعس .. 
بقات شحااال تتفكر فهدرتو و دورها فراسها حساات كاينا حاجة اخرى.. 
سندي : (جرات ليه الغطا ) ماشي اول مرة تلقاني ناعسة فاش ترجع .. ديما (لاحظات باللي اسلام لابس غير سليب ) أ .. م م علاش مشيتي .. ا بغيت نقول .. ي ااه علاش زعما ماجيتيش لبلاصتك ( كتحك فراسها و دور عينيها ) .. 
..اسلام لاحظ انها توترات فاش لقاتو مالابسش و حتى هو تيعجبو يحشمها و هو يجرها لصقها عندو .. 
اسلام : (معنقها ) و علاش نتي ماجيتيش عندي فاش ملقيتينيش ؟ 
سندي : أ اه انا .. كنت غانجي .. و .نسيت 
.. لا بغيت نقول معرفتش .. ايي اش كنخربق 
إسلام : هههههه .. 
طار عليها سكتها بواحد البوسة .. منها تكالما و منها متبداش دخل و تخرج فالهدرة .. رونو دنيا ولا شي فوق شي و شي على شي .. نساو ريوسهوم و مشاو لعالم الخاص بهم ديال إسلام و سندي فقط.. بدا اسلام تيوقف لعلام و بغا يحيد لسندي لفوق دبيجامة و هي ضربها لفيقة حبساتو .. 
سندي : مم لا ماشي دابا .. غادي يبرد لفطور .. 
تسلتات من تحتو و هي تهرب .. 
سندي :(وصلات حدا الباب و هي دور عندو ) لبس حوايجك و تبعتي للبيرو نفطرو (كتقاد حالتها باش تخرج ) .. 
اسلام : (طاح على ضهرو ) افففففف (خرجات و سدات الباب ) هادي هي وقتو مبقاش عندنا الوقت فاش نعوضو غانتوحشك بزاف ا حياتي 😑 ..

.. ناض اسلام بدل حوايجو و مشا للبيرو عند سندي ... فطرو مجموعين و جلسو كيهدرو .. 
سندي : مم إسلام .. كيفاش غانرجعو كنزة ؟ 😣 .. 
اسلام : متفكريش فهدشي .. دابا يبان 😉 
سندي : اااه و الا مت.. (دخل يحيى ) .. 
يحيى : اه .. نخليكم حتى تساليو .. 
اسلام : لا ا الوليد غا اجي ماكاين والو .. 
سندي : بصح انا اصلا كنت نايضة .. نخليكم .. 
وصلات سندي حتال حدا الباب و عيط ليها يحيى .. 
يحيى : بنتي سيري هدري مع ماماك .. راه حتى هي ماباغاش هدشي يوقع .. 
سندي : مممم المهم هاني مشيت 😊 .. (خرجات و سدات الباب ) .. 
بقا إسلام شحال كيضور بالكرسي و هو يشوف ف باه .. 
اسلام : فطرتي .. 
يحيى : وقت هاد الهدرة دابا .. شغانديرو ؟ 
اسلام : عيط المحامي ديالنا يوجد وراق ديال طلاق .. 
يحيى : اشنووووو شمن وراق و شكون غيطلق .. 
اسلام : انا و سندي .. (نايض يخرج ) و قوليه فأسرع وقت .. (خرج و سد الباب ) .. 
مشا للجناح ديالو هز حوايجو بدل و خرج .. مشا فتاح يحل ليه طونوبيل .. 
اسلام : لا غير خليك انا غانصوك .. غادي بوحدي .. 
فتاح : واخا ا سي اسلام .. 
عطاه سوارت و ضيمارا خلا غي العجاجة موراااه و حتى رجالو ماخلاهمش اتبعوه .. مشا بعد بزاف حتى خرج على المدينة .. الخلا و الهواء الطلق .. جيد تيليفونو و عيط .. 
اسلام : الو ... 
عبد العزيز : كيفما شفتي مكنتعطلش باش نجاوبك .. ماشي بحالك كتخليني كنصوتي بزاف .. 
اسلام : معنديش لوقت لهاد الهدرة. . انا نسيفط لك العنوان و اجي نهدرو .. 
عبد العزيز : واخا .. هاني جاي دغيا .. 
اسلام : بوحدك .. 
عبد العزيز : مكنتيقش فيك لهاد الدرجة باش نجي بوحدي .. مهم جاي 
اسلام : ههههه (قطع ) .. 
سيفط ليه مسج فيه فين غادي يجي .. و بالفعل عبد العزيز كان كيتسناه حيتاش زربان يقضي الغرض و يرجع فحالو .. كيحس باللي طول فهادشي .. 
فظرف نصف ساعة وصل عبد العزيز عند اسلام و بطبيعة الحال ماشي بوحدو مع رجالو .. لقا اسلام واقف حدا طونوبيلتو محزم يديه لابس الكلاس .. كوستيم فالبلو مارين مع قاميجة بيضة و سروال دجين و صباط كلاص و داير نضاضر .. واق حدا طونوبيلتو كيتسنا .. 
هبط عبد العزيز هو و رجالو و سيفطهم يقلبو إسلام ياكما هاز سلاح .. 
اسلام : هههههه لهاد الدرجة خايف مني .. 
عبد العزيز : انا ماشي حمق .. كيفاش تقبل بهاد السرعة و انت مرتاح .. 
اسلام : انا بنتي اغلى حاجة عندي فهاد الدنيا .. نعطيك روحي و متخدهاش مني .. و فاش وقع الاختيار بينها و بين سندي اختاريتها .. تفضل عندي للسيارة نهدرو كثر .. 
عبد العزيز : Hayır .. (لا) تفضل عندي انت .. كيفما قلت مكنتيقش فيك .. 
طلع عبد العزيز للسيارة و اسلام تم جاي عندو .. 
اسلام : (مكيسمعوش عبد العزيز ) ههههه ماشي لهاد درجة هههه مزال مدرت والو 😇 ..

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.