كيف تصطادين عريسا الجزء الرابع

حياة:(رمات قفطانها ومسحات مكياجها بزعفة لبسات بيجامة فيها لارانب وجمعات شعرها كعكة مهملة لبسات بلغة فرجلها وخرجات لعند عائلتها المتواضعة لي كانو كيتفرجو فلخواسر:

فاطمة:كيداز العرس؟؟مجبتي والو ؟؟

حياة:مبيهش..ومجبتش.(كتقني زريعة وتفرج)

مليكة:كيطلعالة لعروسة زوينة؟؟

حياة:مبيهاش...

مليكة:والعريس؟؟

حياة:مبيهش...

مليكة:شنو دارو فلماكلة...؟؟

حياة:لبيصارااااا...وافرقيني عليك امليكة وااه عصبتيني 

فاطمة:نقصي صوتك اهاديك الجحشة

حياة:هاحنا سكتنا...غير فرقوني عليكم

فاطمة:انا نشوف شكون كيدق..

مليكة:والله متوقعتها منك احياة...لاش كتهضري معايا هكا..

حياة:(شافت فيها ورجعات شافت فالتلفازة)

الحاجة:ايوة واحد السلام عليكم

حياة:اوووه العروسة زبيدة بجلالتها عندنا...

مليكة:مرحبا امي نهار كبير هادا

الحاجة:ترحب بيك الجنة ابنتي...

فاطمة:جلسي امي..بينما نسخن ليك شوية صوبا زوينة فهاد البرد

مليكة:انا نعاونك اخالتي...

الحاجة:البايرة كيدايرة...

حياة:ولله الحمد ناشطة اجدة...

الحاجة:اش غادي نعاودليك احياة..زواج زوين..

حياة:بصااااااح...

الحاجة:اييه ابنتي تمشي حتى دوقي الحلوة والله لابقيتي خليتيها...

حياة:وهاد الحلوة اجدة منسمة ؟؟

الحاجة:خهههه كل مرة باش كنسموها...انا عزيز عليا نسمها بشكلاط والحاج كيبغي ينسمها بالعسل

حياة:اييه اجدة وليتي منحرفة مايا خليفة ومدرتها...

الحاجة:حتى تجربي وتفكري كلامي...اجي قربي بغيت نقول ليك واحد الحاجة

حياة:(قربات لعندها)شنو!!

الحاجة:غدا بغيتك تخرجي معايا السوق نشري شي كسيوات ديال النعاس بحال هادوك لي كيبانو فلافلام.

حياة:ههه وعلاش لا اجدة وانتي باركة على الحلوة المنسمة بقاليك غير شوميز دونوي...من حقك الحاجة من حقك

الحاجة:شنو تمشي معايا...

حياة:صافي حتى لغدا وندوز عليك

الحاجة:يلاه تصبحو على خير

فاطمة:فين ماشية امي راه سخنت ليك صوبا

الحاجة:لا ابنتي الحاج مسكين كيتسنى نمشي نحط ليه عشاه...

حياة:متنسايش تنسميه ليه بلعسل...

الحاجة:(كتغمز فيها باش تسكت)

فاطمة:علاش شنو كتهضرو...مفهمتش

الحاجة:والو ابنتي والو غير هاد المسخوطة خاصها تربى...يلاه انا مشيت.

فاطمة:بسلامة امي.

حياة:(بدات تحك عينيها على اشعة الشمس لي تسلات لبيتها رمات لغطا عليها وناضت من بلاصتها كتململ يمين وشمال...توجهات لدوش غسلات حالتها ولبسات حوايجها لي كانو عبارة عن سروال دجينز وتيشورت جمعات شعرها لفوق ولبسات صبيبيط وخرجات )صباح الخير

فاطمة:صباح النور

حياة:(جلسات على الميدة وبدات تفطر)

مليكة:فين غادية من الصباح...؟؟

حياة:غادي نمشي لسوق مع الحاجة

مليكة:عافاك جيبي ليا شوية ديال شباكية مشهياها

حياة:ياك عندك راجلك انا شعلاقتي....

مليكة:هئ هئ مالك معايا احياة...لي قلت ليك كدابزي معايا فيه هئ هئ

حياة:ياربي السلامة فينما هضرنا معاك كتبكي...انا مشيت

فاطمة:متعطليش راه غادي نمشي لطبيب مع مليكة

حياة:واخا(خرجات حياة فاتجاه دار الحاجة..دقات عليها وخرجات ليها الحاجة زبيدة لابسة جلابة لاصقة على عضمها فلغوز..دارت معاها زيف حياتي قهوي وبلغة قهوية سواك فلفم كما العادة ومكحلة العينين وريحة كتشم من مسافة بعيدة..)

حياة:(كطلع فيها وتهبط)بشاااخ على تبوكيسة

الحاجة:يلاه يلاه خلينا نمشو

حياة:(دارت ايدها فدراع جدتها ومشاو لقيصرية معروفة بشوميزات دو نوي...بدات حياة تعزل للحاجة شوميزات طوال وساترين شوية...هزاتهم بين ايديها ومشات لعند الحاجة لي كانت حتى هي كتعزل)

حياة:جدة دخلي قيصي هادو

الحاجة:اويلي شهادشي بنتليك مزوجة باخواني...شوفي لي خترت انا هادو هوما لي غادي نشد

حياة:(حلات عينيها من الصدمة ..كانو غير خويطات وشبيكات وتوب الشفاف..)ولاش جايباني معاك اشيخة زنامك..

الحاجة:بغيتك تشوفيهم عليا..

حياة:نتي هي كراديشيان...عرفتي اجدة انا لي حمقت جايا معاك..شدي(حطات ليها شوميزات بين ايديها)انا مشيت...

الحاجة:اويلي فين غادية..حياة حيااااة

حياة:(جرات صاكها زعفانة وخرجات من القيصرية طالعة ليها القردة لراس..محسات براسها حتى دخلات فشي حد..طلعت عويناتها وشافت فيه وللمرة المليون كتسهى الهبيلة ديالنا فجمال المخلوق الجديد لي قدامها.)

حياة:(حلات فمها على جهدو وبقات ترمش بعينيها )

شخص:ختي صافا...

حياة:ا..ا...صص...صافا والله حتى صافا وانت!!

هو:ههه سمحيلي كنت زربان ودخلت فيك

حياة:عادي اخويا غير دخل...

هو:شنو؟؟

حياة:ا...قصدي قصدي عادي كتوقع ماشي مشكل

هو:سمحيلي مرة اخرى

حياة:(كتبسم ليه وعويناتها كيرمشو)انا لي سمحلي ...(سيد مشا ولبايرة ديالنا متبعاه بعينيها..حتى غبر..حسات بشي يد جراتها من قفاها..)

الحاجة:فين مشيتي الجرادة خليتيني نعيط ليك بحال لمسطية

حياة:وصافي اجدة غير طلقيني متفضحيناش

الحاجة:زيدي قدامي ...

حياة:(جرات لميكات من بين ايدين الحاجة وهزاتهم عليها...شدو الطوبيس ورجعو للحومة...الحاجة مشات لدارها وحياة مشات لعند سمية..)

سمية:وامي وامي....

حليمة:(ام سمية)اشبغيتي...

سمية:قولي لولدك يعطيني لمقبض ديالي...

حليمة:(ساست ايديها من كسكسو ودخلات عليهم لبيت ..بزارزلها كيتحطو ويتهزو وكرشها كتلعب بوحدها زيد عليها دوك لملامح الغريبة لي مرسومة على وجها بإختصار الشوفة فيها تخلع..)اشواقع مالكم اتريكة لخنز على هاد الصداع

سمية:قولي لولدك يعطيني مقبض ديال شعري...

سي محمد:معنديش...

سمية:مي والله الى عندو ..ملقى ميعطي لصاحبتو غير مقبض الشعر ديالي...

حليمة:هانتوما نقسم بالبزولة لي رضعت والكرش لي خرجت منها ..ومتغبرو من خليقتي.والله يمنخلي فتريكة بوكم عظم مقااااد غبرووو. يغبر لمكم الشقف ...على زبل ولدت ناس يولدو زين وانا والدة لخرا....غبروووو

سمية:(مشات مكشكشة حلات لباب لحياة لي جالسة كدق)

حياة:واهيا ناري غواتكم مسموع من راس دريبة

سمية:دخلي ...(توجهو لبنات لغرفة سمية وجلسو وحدة تشوف فلاخرى)

حياة:ايوة... غادي تبقى وحدة تشوف فلاخرى اولا شنو

سمية:خليني عليك معصبة...

حياة:شنو دار هاد المجحوم تاني...

سمية:يختي لمقبض ديال شعري. لي شريت انا ونتي من عند صطيفو..ملقيتوش فبلاصتو شدو هاد الشمكاري لي عندنا وداه لصاحبتو بغيتلها تونية...

حياة:وشعرفك بلي عطاه ليها؟؟

سمية:وراه سيمانة الفايتة شفر عليا دو بياس لي شديت من لبال ..وكل مرة ملي نشد شي حاجة جديدة كيعطيها لمشعكة ديال صفية.

حياة:صافي دابا نساي نخرجو انا ونتي ونشدو مقبض جديد...

سمية:اووف..مهم فين كنتي جيت لعندك اليوم ملقيتكش؟

حياة:كنت مع الحاجة مشات تشري روب دونوي...

سمية:هاكاوا على زبيدة وصويلح...

حياة:شتي على فريفرة...وصلك كلامي

سمية:وايلي والله ماساهلة الحاجة...غدا ولا بعدو تحبل

حياة:اويلي فمك لحسو كلب الى هادي اسمية الى هادي...نتسطى الى وقعات.

سمية:الى مشا حتى دارها صويلح نخرج بلما حوايج للحومة.

حياة:اووف قلبي الموضوع...اجي تمشي معايا لحمام

سمية:والله الى محتاجة لشي تكسيلة فاعلة تاركة

حياة:ايوة يلاه نوضي وجدي صاكك ونتلاقاو عند باب لعمارة

سمية:واخا(جمعو لبنات حوايجهم وصطولة ومشاو لحمام لحومة..حيدو حوايجهم ودخلو شدو بلايصهم وبداو يحكو ويغسلو...)

سمية:ايه شحال هادي متكسلت هكا

حياة:الله اعضيماتي ..كنت محتاجة لهاد تكسيلة اجي عطيني شوية من شمبوان سالا ليا ديالي

سمية:بركي نديرليك شوية فراسك

حياة:يختي شحال زقراااامة تي اري القرعة الله يحرق وسخك

سمية:حياة نوضي عمري الصطل ..نخاف ننتف شي وحدة

حياة:اري السطل لهنا...(جرات السطل ومشات تعمرو)

عيشة:والحاجة والالة حنا معجبناكش...راه من صباح واقفين

حياة:وانا قلت ليك وقفي...شي وحدة تجيب ليها كرسي تقعد

عيشة:واشوفي احياة هاد الحركات راني حافضاهم حيدي تقعدي راها نوبة ديالي هادي

حياة:والله لاعمرتيه اعويشة لخوينزة يصحاب ليك غادي تغسلي وسخك الى جيتي لحمام...لي خانز خانز

عيشة:اتي حيدي من قدامي البايرة ..گرانگ تزوجو وولدو ونتي مزال كطلع لينا فلوجه..

حياة:وغادي نبقى غير طالعة ليكم فلوجه حتى يشيب راسي...والى كنتي مرأة اعويشة عمري هاد الصطل..

هنية:صافي اعيشة يلاه خليها دابا تخرج جنونها ياربي السلامة

عيشة:والله لابقات فيك ابنت فاطمة.

حياة:وعندك تنساي... غسليها مزيان بكلير راه كيخلي فيها ريحة زوينة الخوينزة...(عمرات الصطل ومشات لعند سمية لي كانت باركا تحك )

حياة:(كتشلل شعرها وكتهضر مع سمية)فراسك اسمية

سمية:شنو؟؟

حياة:مليت من هاد الروتين لاقراية لاخدمة ..غير نعاس وشقى

سمية:ويااه حتى انا...

حياة:مكرهتش نعمر وقتي بشي حاجة..

سمية:اويلي نسيت مقلتش ليك!

حياة:شنو؟؟

سمية:لبارح كانت جاتنا غزلان العورة بنت خالتي رقية لعرجة عرفتيها...

حياة:اه مالها...

سمية:قالت ليا اختي..فتح حدانا فلحومة واحد لاصال ديال لبنات

حياة:ومن بعد..؟

سمية:واشنو من بعد راه قلت ليها تسجلنا فيه

حياة:وشكون قالها ليك..انا مبغيت لارياضة لاختها هي لي بقات ليا

سمية:وازبل قاليك عندهم هاديك الرياضة ديال الترمة..سميتها زكواط

حياة:يشويني فيك ..حاجة مكتعرفيها جابك تنطقي بيها...سميتها سكواط

سمية:اه هادي هي...صافي احياة بلما تعكسي علينا خلينا نمشو نخرجو الطرماحة ...

حياة:انا اختي عندي ممحتاجاش...

سمية:اويلي شعندك...ترمتك لاوية بحال ترمة الفار..

حياة:(ناضت من بلاصتها وحطات المسعودة قدام سمية)دابا هادي كلها ومعجباتكش؟

سمية:والله مبانت ليا شي حاجة مضروبة بمقلة ياربي السلامة...قعدي لارض فضحتينا..سمعيني ازبل لوكانت عندنا الترمة كون شحال هادي تزوجنا...

حياة:يختي عندك الصح رجال كيتبعو غير شي حاجة كتهز وتحط

سمية:ايوة صافي هادي هي حلنا باش نتزوجو...خاصنا نخرجو المسعودة

حياة:الى كان لعريس غادي يجي بالترمة نخرجو جد بوها الكلب...

سمية:غدا ندوز عليك نمشو

حياة:صافي مشات...دابا شدي حكي ليا ضهري

سمية:قربي لعندي.

(هاهي الشمش دخلات على بيت حياة🌝🌝..حلات رجليها كما العادة وطلقات قنابلها الصباحية المعروفة...خنزات الفراش بحزاقها المخنق وتوجهات لدوش قضات حاجتها ولبسات حوايج سبور..وخرجات لعند عائلتها لي كانو جالسين يفطرو:

مليكة:حياة فين غادية؟؟

حياة:ياربي السلامة واش نتي دورك فهاد الحياة امليكة هو تسوليني فين غادية ومن فين جاية

فاطمة:جلسي تفطري وباراكا من الصداع على الصباح

حياة:(بدات تخشي فوجها حتى قرعتها وهزات صاكها..وخرجات لعند سمية لي كانت جالسة كتسناها فالدروج)

سمية:ولاش جاية كنتي غير جلستي حسن

حياة:مال مك كتنفخي علينا على صباح

سمية:وزيدي تقعدي..اشمن ترمة غادي تخرج ونتي معايا

حياة:غادي ندير راسي مسمعتش(توجهو لبنات لاصال لي كان مبعيدش بزاف عليهم..دخلو بعدما خلصو الشهر الاول وبداو يقومو باحماءات قبل ماجا المدرب:

حياة:سمية اربي شوفي صدر هاد خيتي... محلبة بوشعيب ومجاتش عليها...

سمية:ويلي ورقي ليا مولات الغوز...شوفي على ترمة عندها..انا لوكنت منها والله مندخل لشي سبور..

حياة:واياااه حتى واحد ملقاها كيفما بغاها...

سمية:حياة شوفي ليك عويشة حتى هي دخلات هنا..

حياة:ياربي السلامة كتهز بحال رايب خاسر...

سمية:صافي باراكا من تبرگيگ خلينا نديرو الاحماءات

مدرب:فتيات واحد السلام عليكم...

حياة:(هزات عينيها فيه...ميمكنش يكون نفس الشخص...سدات عينيها وحلاتهم وشافت فيه...كان هو الشخص لي تصاطحت معاه حدا القيصارية...اكيد هادي اشارة ربانية ملي رماه سيدي ربي فطريقها..شدات فراسها وبدات تجري مع لبنات وعينيها متبعين المدرب الوسيم..«سفيان»

سفيان:لبنات تجمعو عندي....كيفما تعرفو هادي اول حصة عندكم معايا..بغيتكم تعرفو اهم حاجة...ممنوع الهضرة والجماعة... حنا هنا باش نديرو رياضة ونقصو من الوزن...

حياة:(طارت من بين كلشي)انا مجيتش ننقص الوزن ..انا جيت نخرج المسعودة قالو ليا كتلعب سكواط..(بدا كلشي يضحك)

حياة:ومالكم كضحكو على اساس نتوما جايين تصلو...راه باينة لاش جايين

سفيان:(حابس الضحكة بزز..)شنو سميت الأخت؟؟

حياة:(وناااااري على هاد الأخت لي لاصقة فديلمي تقول ولدتنا فاطمة من كرش وحدة)حياة...سميتي حياة

سفيان:متشرفين احياة..وكيفما قلتي نتوما هنا جايين تلعبو سكواط وخصكم ضروري شوية من الالتزام

حياة:داكشي لي كاين اسي سفيان..

عيشة:ولعبنا بكري ملي معانا هاد خيتي

حياة:مال هاد خيتي اعويشة مالها معجباتكش؟؟

عيشة:اش فيها يعجب..زين يحشم على زينو 

حياة:قلتيها بعضمة لسانك اعويشة زين يحشم على زينووو ....ماشي يجي يهز علينا بزازلو بحال لبقرة الجربة

عويشة:واش نتي حتى فالرياضة تابعاني البايرة...سيري عطيني شبر ديال تيساع

سفيان:(فاتح عينيه على جهدهم وكيشوف فلمصارعة لي قدامو)

حياة:بنتليك گرادة كنلصق فيك...كون كنت انا منك نجمع شحوماتي ونمشي نتكمش فداري

عيشة:وراك فتي لقياس البايرة...ياك ميصحابليك خايفة منك

حياة:حربش تقربي مني والله لاخليت فيك عظم صحيح..نصيفط بوك لسبيطار لعسكر نتهناو من كمارتك المنحوسة

عيشة:(مشات تجري لعند حياة وبدات المضاربة نتف من هنا نتف من لهيه...وكلشي داز تحت أنظار المدرب لي مسكين معرفش باش تبلى..)

حياة:(كتغوت وتبربر وسمية شداها )وطلقوني طلقوني عليها مزال مبردت جنوني فيها...بنت الهم البركاكة..عقلتو اعباد الله على النهار لي دابزت فيه دكالية مع راجلها..هالي كانت السبب عويشة ..بدات تلعب بعقل لمراة حتى دابزت مع راجلها....

سمية:ويلي عويشة نتي لي فرقتيهم؟؟

عويشة:باطل اعباد الله باطل...والى كانت غير على ضواسى لقدام...عقلتو على نهار لي هرب فيه حمزة ولد الشوافة من العمارة ...عرفتو شكون السبب هاد الفريفرة لي قدامكم...كتشد ليه كراسنو من السطاح...

حياة:كنت كنصحابهم ديال خويا...

عويشة:ديال خوك الهايجة...تي قولي ملقيتي ريحة رجال وليتي تسرقي كراسنهم من السطوح

حياة:طلقوني طلقوني عليها....(رجعات تنتف وتقمش خلات وجه عويشة كلو مخرط بضفارها...جراتها سمية وخرجتها من لاصال...شعرها واقف ونفسها كطلع وتهبط بزز!

حياة:بنت الهم البركاكة ...

سمية:وصافي اصاحبتي ناري شوهتينا فاول نهار لينا هنا؟؟

حياة:راه غادي نكمل على مك حتى نتي. الى مسكتي!

سمية:بقا فيا غير المدرب مسيكين هرب تقولي لارض بلعاتو

حياة:(حلات فمها على جهدو)ويلي انا شنو درت شنو درت..طار صافي طار...اكيد غادي يطير ملي شاف هاد المتوحشة قدام عينيه ..

سمية:على شنو كتهضري ازبل

حياة:تفو يخ كان عليا نتحكم فراسي دابا ضاع كلشي ...

سمية:وفهميني الويل...

حياة:والو...احح شعري كيحرقني!!

سمية:وبازعلى وجه قاصح عندك مقلتي راسك مقلتي وجهك...شعرك ابنت الطيييط

حياة:خاصني نمشي معاك اسمية لدار نقاد هاد الحالة لي دارت ليا هاد المجحومة..تشوفني ماما هكا مدخلنيش

سمية:ايوة الله يستر ..شداك لهاد الصداع كلو....شنو نديرو غدا ملي نمشو؟؟

حياة:عادي مالنا شنو درنا..واصلا هي لي جبدتني

سمية:يختي شحال عزيز عليك الصداع..يلاه يلاه طلعي.

حياة:(دخلات الدار كدور وجها بحال شفار..مشافت حد..دخلات لبيتها وبدلات حوايجها..لبسات بيجامة وخشات رجليها فتقاشر وجمعات شعرها بزيف حياتي...ومشات لكوزينة كتقلب على شي حاجة تكال..حلات التلاجة وجبدات طبسيل فيه توت ديال مليكة...رشات عليه شوية سنيدة...وخرجات لبيتها...بدات تاكل وتفكيرها كلو فلمدرب سفيان لي كتبسم بلا شعور ملي تفكرو )اييه اسفيان سبحان من خلقلك...كلشي فيك شاد لعبار...سنينيات مستفين....عوينات عسليين...لقلدة مقادة ولعضلات مقاديين...ايييه نهار لي غادي نركب انا وانت فوق لعمارية...ونوشوش ليك فودنك تقول لماما تخلي ليا حقي من الدجاج..ندورو على الميدات ميدة ميدة نسلمو على الناس...نبقى نبدل فتكاشط نضور على الالوان كلهم...ولكين خاصني نشد نگافة خديجة داكشي عندها متوش ...نشدو تصاور مع العائلة ...نشد بيدك ونمشو لاوطيل ناكلو الحلوة...اه ه كنتسنى هاد النهار بفارغ الصبر ..

فاطمة:الله اضهري عييت من الوقفة

حياة:مي على السلامة

مليكة:(كتحل زيفها طاحت عينيها على التوت فطبسيل)بغيتليك السم...بغيتليك الإسهال...بغيتليك الجوع...تي مال مك كتشدي حاجة غيرك...

حياة:اييييه تي مالكي على هاد الهضرة

مليكة:هاد التوت لي بين ايديك شداك تشديه...شداك تقربي ليه هئ هئ اخالتي هضري معاها هئ هئ 

حياة:شدي شدي بغيتليك جوع نتي وهاد المخلوق لي فكرشك الله يستر...(حطات ليها الطبسيل بين ايديها ومشات لبيتها...دارت رجل فوق رجل وبقات تشوف فالسقف...نقزات من فراشها ومشات لبيت خوها جرات بيسي ديالو...ومشات تسلل لبيتها...حلات لفيس وبدات تقلب...

حياة:اممم شنو غادي يكون كاتب فلفيس....نجرب..سفيان المدرب...امم تيتيز سفيان....(بدات تقلب وتجرب فجميع الاسامي...ضرها عنقها وحسات بلعيا...سدات لبيسي ورجعاتو بشوية لبلاصتو وحطات راسها على المخدة كتحلم براسها مهزوهة فوق العمارية.)

حياة:(كانت واقفة كتمشط شعرها..لبسات حوايجها وجمعات صاكها...ونزلات تجري عند سمية لي كانت جالسة عند الباب كتسناها...)

سمية:اوووف وأخيرااااا

حياة:يلاه تعطلنا...

سمية:هي هي هي على لعكر حمر على الصباح

حياة:اشمن عكر نتي لوخرا..راه غير واحد الوصفة درتها البارح كتخلي الفم حمر طبيعيا

سمية:تي سيري كدبي على حد آخر ماشي انا..قالك وصفة..امتى طليتي على كمارتك شي حاجة بقا غير فمك

حياة:اووف وباراكا من الهضرة يلاه قودي قدامي..

سمية:مقادراش نشوف فلمدرب بعد هاديك الشوهة لي درتي

حياة:واصافي يلاه(حطات ايدها فدراع سمية ومشاو باتجاه لاصال..حطو سيكانهم ودخلو...بدات دور عينيها فلاصال مبانش ليها..جرات المساعدة لي كتكون معاه)

حياة:اجي اختي واش المدرب سفيان مزال ماجا؟؟

مساعدة:(كطلع فيها وتهبط)مزااال

حياة:ومالك اختي على هاد السكانير لي دايرة ليا..

مساعدة:ياك مبنتش ليك حتى انا فلبلان وبغيتي توري ضفارك عليا؟؟

حياة:ايوة منعرف ...(طلعات فيها وهبطات ...مشات تجري مع لبنات...بداو الاحماءات وعينيها على الباب كتسنى امتى يدخل )

سفيان:صباحكم مبروك

حياة:(طلعات عويناتها فيه وبدات تدفع لبنات حتى وقفات فالصف لول قدامو شاف فيها وقلب وجهو لاتجاه لاخر وبدا يهضر)

سفيان:اول حاجة.... غادي نبداو بحركات بسيطة بشوية مضغطوش على راسكم و.....(بدا سفيان يهضر ويقوم بحركات رياضية ولبنات متبعين معاه..والهايشة ديالنا كتحاول قدر لامكان انها تخليه يشوفها...بعد نصف ساعة من التداريب..سلات حصتهم..وبداو لبنات يخرجو لغرفة لاخرى لخاصة بالتبديل الا حياة لي بدات تقلب فعينيها...الى مهضراتش معاه غادي يطرطق فيها شي عرق...شافت حتى عيات ومشات لعندو.)

يتبع