صورة مصغرة لـكيف تصطادين عريسا الجزء الثامن

كيف تصطادين عريسا الجزء الثامن

tamn kayfa tastadina 3arisan
رواية كيف تصطادين عريسا

(نغيرو الوجهة من اسبانيا ونرجعو للمغرب بالضبط حي حياة لقديم)
سي محمد:(ماشي جاي على طول صالة الحاجة جالسة وفاطمة حتى هي.وفلقنت جالسة مليكة كتاكل لخيار...كيتسمع غير صوتو ففمها)
فاطمة:(كتشوفو ماشي جاي قدامها)اللهم طولك ياروح...واش نتا غادي نبقى ماشي جاي علينا....
سي محمد:واش بااااغيين تحمقوني اولا شنو..منين جاتكم هاد الحنية والحب المفاجئ!!
فاطمة:انا توحشت بنتي وبغيت نشوفها نمشي نطمن بالي عليها..نشوفها واش مرتاحةو شنو ناقصها...اكيد كتحس بالغربة..الله ابنيتي الله لاش عطيتك...توحشت مصايبها هئ هئ 
الحاجة:هادشي لي قالتو فاطمة صحيح بغينا نمشو نشوفو حياة وندورو شوية منها حجة ومنها زيارة ...بغيت نمشي نشوف هاديك لبلاد قاليك يختي هي فاش متلات كوادلوبي العرجة...
فاطمة:(دارت عندها)اربي كتهضري بصح؟
الحاجة:والله ابنتي مكدبت عليك...متلات فيها حتى باربرا ساندوفال...
مليكة:(كتاكل لخيار)بغييت نمشي اسي محمد...نولد تماك متعرف يخرج لولد كيشبه لگور...
سي محمد:ياربي صبرك شهاد العائلة لي عطيتني...باش غادي تمشو...ياك متكونو من العائلة المالكة وانا مفراسيش!!
فاطمة:انا مخلية شوية لفلوس لدواير الزمان وزيد عليه دهبي والحاجة حتى هي.... واصلا مغاديش نجلسو تماك شهر...حدنا سيمانة وراجعين...
الحاجة:اييه اوليدي نتا لي غادي دير دابا هو تسول لينا على لوراق وشنو يطلبو...
سي محمد:اوووف يعني اخر كلام عندكم هو هادا!!
فاطمة :اخر كلام...مليكة صوني على حياة من هاداك وادساب...علميها
مليكة:واخا اخالتي(طلبات حياة ففيديو واتساب...بعد لحظات جاوبات )
مليكة:حياااة على سلامة ملي جاوبتي..
حياة:الله يسلمك...كيدايرين؟؟
مليكة:الحمد لله...عندي ليك واحد الخبر تاكلي صباعك وراه؟
حياة:(حلات عينيها على جهدهم كتموت فالتبرقيق)هضري هضري شنو واقع..؟؟
مليكة:حاجة متخطرش على بالك!
حياة:امم...هنية طلقات!
مليكة:لا...
حياة:عويشة تزوجات؟
مليكة:لا
حياة:صافي عرفتها...محماد جاه سيزي...
مليكة:ههههه لا
حياة:وهضري!!
مليكة:احم...انا والحاجة وخالتي وسي محمد...جايين لعندك
حياة:(حلات عينيها على جهدهم...هادي لي استحالة طيح على بالها)

حياة:ف..ف...فين جايين؟
مليكةّ:لصبنيول غادي نقعدو معاكم سيمانة ..
حياة:لا لا متجوش؟
فاطمة:وعلاش منجوش..شنو واقع؟
حياة:لا امي متفهمنيش غلط راه غير طريق طويلة عليكم ومصاريف طيارة غالية..
الحاجة:حنا قادرين براسنا...غير نقادو لوراق وهحنا عندك
مروان:حيااااة.....حياااااااة
حياةّ:ولكين...(سمعت صوت مروان كيعيط ليها)انا هناااا...
مروان:نزلي بغيتك!
حياة:ا..مي نخليكم دابا مروان كيعيط ليا..عافاكم غير فكرو قبل متجو راه مصاريف عليكم
مليكة:بسلامة بسلامة(قطعات عليها)
حياة:اويلي محايني...انا شنو درت عند ربي...لاش غادي يجو...فضيحتك فضيحة احياة...والله حتى يقلبو اسبانيا على راسي..
مروان:حياااااة...
حياة:(رمات تيلي ونزلات لعندو تجري )هانا مالك امروان..
مروان:ا...يلاه صوناو ليا من الخدمة ...الموظفين دايرين رحلة للغابة غادي نجلسو يومين ...بغيتك تجمعي حوايج لي يخصونا هاد نهارين...
حياة:يخصونا!!!...كتقصد حتى انا غادي نمشي..؟
مروان:اه حتى نتي راه رحلة خاصة بلازواج منضمتها الشركة للموظفين..وخاصنا من هنا لساعة نخرجو..
حياة:واخا..دابا نجمع حوايجي(طلعت تجري فرحانة..جبدت باليزا صغيرة جمعات فيها حوايجها وقلبها غادي يطير بلفرحة لبسات تيشورت وسروال دجينز.لبسات فيستا ديال لكوير كحلة وصبيبط كحل خلات شعرها مطلوق مع ميك اب خفيف...جرات باليزتها وراها ونزلت لعند مروان لي كان كيتسناها...جبد من عندها لباليزا وتوجهو لوطو...حطو داكشي فلكوفر ..وطلعات حياة لقدام عويناتها كيقطرو بالفرحة....ديمارا مروان لوطو وتوجهو لمنتجع لي حاجزة ليهم الشركة...حياة مخرجة راسها من شرجم لوطو وكتشوف فهاد الجنة لي عاطهم سيدي ريي..ارض خضرة وجنان فشكال ولوان...كانت طريق طويلة شوية تقريبا ساعة...تلفتات حياة على مروان ونطقات:
حياة:مروان مزال موصلنا؟
مروان:مبقا والو واحد عشرة دقايق..
حياة:هاد لبلاصة لي غاديين ليها شنو سميتها ؟؟
مروان:غابات سيرينا»..هاحنا وصلنا..(وقفو لوطو قدام منتجع كبير..وقدامو غير لخضورة وصوت النهر واصوات طيور كتسمع...نزل مروان من لوطو وحلو لكوفر خرجو لفاليز...وتوجهو لريسيبسيون...هضر معاهم مروان وعطاوه سوارت غرفة وحدة..حياة ماشي هنا غير كدور عينيها يمين وشمال..
مروان:حياة..يلاه
حياة:(جرات باليزتها وراها وشدو لاسونسير فاتجاه الطابق ديالهم..توجهو لغرفة وحياة كدور عينيها )
مروان:مالك كتشوفي هكا؟
حياة:(حدرت راسها)
مروان:احم..انا منقدرش نشد جوج غرف حيت هاد الجناح كلو فيه موظفين واصلا الشركة شدات غرفة وحدة لينا راك عارفة
حياة:(على نياتك كتشرح ليا...وتا راه انا ممصدقاش غادي نتعصرو فبيت واحد ..)ماشي مشكل...(دخلو لغرفة وبدات ختنا دور وجها)

مروان:دخلي شدي راحتك اما انا غادي نخرج ندير اتصال
حياة:واخا...'( تبعاتو بعينيها حتى خرج..ّحلات ستائر ديال البالكو وشهقاات من جمال المناضر لي برا)وااااو شهاد شي ...حلات لبالكو وخرجات كتشم ريحة لهواء النقي وتشوف جمال المناضر الطبيعية لي قدامها)ماشاء الله شهاد الجنة لي عند هاد الناس....(دخلات للغرفة وبدات تلمس اي حاجة قدامها بيدها...طلعات فوق الناموسية وبدات تنقز فوقها...دخلات لدوش عمرات البانيو حيدت حوايجها ودخلات فلبانيو ولكن هاد المرة مطلعاتش رجلها خافت لتبقى معلقة ...سالات دوشها ولبسات حوايجها نشفات شعرها وبدات تسنى فمروان يجي مبغاتش تخرج من ىشومبر حيت عارفة. راسها ومصايبها فمن لاحسن تشد لقنت... بعد لحضات سمعت صوتو حل لباب..
مروان:سلام
حياة:سلام..
مروان:تعطلت عليك؟
حياة:لا يلاه خرجت من الدوش
مروان:مزيان بصحة...
حياة:يعطيك الصحة...
مروان:يلاه نزلو كيتسناونا بلغدا
حياة:واخا(حطات لمسات خفيفة ديال لمكياج وخرجت معاه..توجهو للغابة لي كانت محسوبة على المنتجع..كانت ميدة طويلة فجنب النهر فوقها ماطاب ولذ من المأكولات ..)
مروان:(شد بيدها وكيهضر)اغلب لكوبل هنا مغاربة يعني تقدري تشدي راحتك فلهضرة..
حياة:(السيدة ممعاهاش كتحس ببالتبوريشة طالعة من صبعها صغير لزغب شعرها)هااااااا...
مروان:قلت ليك خودي راحتك فلهضرة تقدري تهضري دارجة...
حياة:و...و.وواخا(تقدمو لعندهم وسلمو عليهم...جر مروان لحياة لكرسي دارت عقلها وجلسات)
بنت1:مراتك زوينة امروان خسارة محضرناش عرسكم
حياة:شكرا عويناتك زوينين خسارة مرة اخرى..(زير على ايدها مروان)ا...اق...قصدي بمرة خرى ملي نولد...(زاد زير على ايدها)
حياة:(جرات كاس ديال لماء وطاحت عليه دقة وحدة)
البنت 2:كيجاتك اسبانيا؟
حياة:زوينة ماشاء الله...
البنت3:خليونا من هادشي كلو...كيدرتي حتى طيحتي مروان...كان رافض فكرة الزواج!
مروان:هههه بلما تحرجو مراتي...شتكم عيقتو عليها..
البنت3:بليز عاودي لينا كيدرتي حتى تعرفتي عليه
حياة:(بدات تبسم وتحك رقبتها بيدها)احم...اول مرة شفنا بعضياتنا كنت كنشر لحوايج فوق سطاح..معا كان الصابون تجمع ليا ديال 20 يوم.بقيت نابتا فصطاح نهار كلو مع لحوايج..ايوة طلع مروان يكمي...
ولد1:وليتي كتكمي؟
مروان:كح كح كح....
حياة:..ق...ق...قصدي.طلع يجيب ليا لمقابض ديال لحوايج...حيت هو ولد خالتي وجا لعندنا واحد اسبوع من صبنيول..
البنت1:ايوة؟
حياة:ايوة صافي عطاني لمقابض..بقينا شوف فيا نشوف فيك...شوف فيا نشوف فيك..ديك اللقطة ديال لهنود لي كيطولو فيها...صافي دخلت ليه خاطرو وبغاني وحتى هو دخل خاطري وبغيتو...
البنت3:زوين هادشي عندكم الحب من النضرة الأولى
حياة:ههه بحال داكشي...(شافت ريهام جاايا لعنهدهم...دارت عند مروان)لاش جايا هادي؟ياك ممزوجاش؟
مروان:وراه معانا فشركة!يمكن لمدير خلاه تجي حين عزيزة عليه.
ريهام:هاااي..(سلمات على شي بنات كتعرفهم وجات لعند مروان ضربات ليه دوك لحنوك بجوج بوسات وجلسات حداهم...حياة شداتها لحالة دودة بدات تخدم استحالة تخليها تحلي جلستها معاهم...شافت فلبنت لي حداها)
حياة:كتعرفو هاد البنت؟(كتهضر بشوية)
البنت:اه هادي ريهام خدامة معانا...
حياة:ويلي ميمكنش...
البنت:مالك؟
حياة:يختي منقدرش نقول ليك!
البنت:اربي لما قولي مغادي توصل لحد..
حياة:يختي سمعت عندها سيدا...قالك يختي كتمشي مع المدير ديالكم!
البنت:اويلي من فين سمعتي هاد الشي؟
حياة:البارح واحد الميساج وصل لتيلي ديال مروان من عند شي حد كيحدرو يبعد من هاد خيتي حيت مريضة بهاد المرض...
البنت:ويلي..شهاد لفضيحة؟
حياة:،شكون منضم هاد الرحلة؟
البنت:هاداك لي جالس فراس الطبلة
حياة:(شافت فيه حياة ورسمات بسمة ديال تحرميات على وجها)صافي خليها ليا..
البنت؛اربي لما هنينا منها مكنحملوهاش
حياة:هههه تي راك مزال معرفتي حياة بنت فاطمة ..(بدات تاكل وتشوف فالشخص لي وراتها البنت...كونو متوقعين شي مصيبة فالطريق)

حياة:(كملات مكلتها وبدات دور عينيها...عقلها خدام يخطط ويفصل ناوية على خلا عيشة ريهام...)
شخص:الى ساليتو غداكم شنو رايكم نتمشاو شوية(كلشي وافق وبداو ينوضو كلها شاد بيد مراتو...)
مروان:(جر ايد حياة وتمشاو معاهم)
حياة:(كتحس بلفراشات كيطيرو فكرشها حاسة بواحد الفرحة شحال هادي معاشتها....بدأو يتمشاو وحياة غير حاطة عينيها على ايد مروان لي شادها بيها وتيلي فيدو لوخرا...كتبسم بلا شعور عايشة الدور ...وحاسة براسها ولات مرات الراجل بصح...مرجعها لواقع غير صوت ريهام كتكركر حدا مروان:
حياة:صبحنا على الله والنبي رسول الله...ياربي يشدها لكلاكاج فضروسها
مروان:قلتي شي حاجة احياة؟؟
حياة:ههه لا غير قلت ليك الجو زوين
ريهام:(جات لعندهم كتنقز)مرحبا..
مروان:(جمع صيفتو مزال منسا الشي لي دارت)
ريهام:بعرف انكم زعلانين مني بس بليز مابدي تاخدو علي نضرة مو منيحة...
مروان:شي لي درتي اريهام صدمني فيك..
حياة:(مزيان عبرت على طواسلها ...كتطلع فيها وتهبط وكتهضر فخاطرها....على سالف عندها بنت الهم..كيتي انا شعري محيريق بسيشوار.)
ريهام:عن جد اسفة بعتزر مبعرف شو صارلي ..
مروان:(مجوبهاش)
حياة:احم الشي لي درتيه عيب اريهام..زعمة قلت مع راسي كتباني بنت بعقلك ومهدنة وبنت الناس ..مصدقتيش ياخسارة
ريهام:(مجوبتهاش شافت فمروان وشدات بيدو)بلييز لاتساوي هيك مبدي ياك تزعل مني معقول مبتعرفني ..لك عشرة عمر احنا استحالة اعمل هيك شي(كترمش ليه بعويناتها)
مروان:(تبسم ليها ونطق)نتمنى داكشي،لي وقع ميتكررش مرة اخرى..
ريهام:وعد مني(طارت عليه بتعنيقة)
حياة:(اما ختنا ف اجي تشوفو حالتها كي ولات...عاقدة اجتماع طارئ مع شمهروش..عينيها خارج منهم المكر وتحرميات..باينة ريهام غادي تندم على النهار لي شافت فيه مروان فحياتها)

حياة:(رجعو من الغابة باتجاه المنتجع....حياة ولا همها الوحيد ريهام ..خاصها تفش غدايدها وربي كبير...دخلو المنتجع وكلها مشا لغرفتو...دخلات حياة لشومبر ومروان معاها:
مروان:دخلي دوشي الى بغيتي!
حياة:ا...غير سبقني نتا ..انا بغيت نرتاح شوية..
مروان:أوكي(دخل مروان لدوش وخلاها جالسة كدور عينيها...ناضت من بلاصتها ماشية جاية كتفكر فشنو دير...ريهام خاصها طير من طريقها وربي كبير...حاطة يدها على خصرها ويد اخرى كتعض بيها ضفارها ماشية جاية تقول كتدرس طريقة تحرير فلسطين...خرج مروان كينشف شعرو لابس غير سروال ديال النعاس وصدرو كيقطر حاط فوطة على راسو وكيشوف فيها باستغراب عارفها كتخطط لشي حاجة...نطق بصوتو الرجولي:
مروان:حياة مالك!!!
حياة:(دارت عندو بزربة يلاه جات تجاوب حسات بشلل رباعي على مستوى لسان...عقلها توقف عن تفكير ..زغب داتها طنش...كتحس بقلبها وقف...عينيها خرجو فمها تحل حتى بانت ضرسها لمسوسة...لونها بدا يتلون لحمر تقول لفعة كتبدل جلدها...بإختصار حالتها مطمنش...
مروان:حياة ماااالك...راااه سولتك زعمة؟
حياة:شكون حيااااة(كديره ليه سكانير..نزلات عينيها على لمعلم مكلضم مع الدوش كيخرج داكشي واقف)تبااااارك الله وصلاة على النبي...
مروان:حيااااة راني هضرت معااااك.
حياة:(مزال مغيبة كطلع وتهبط فيه ..)امي فاطمة فينك...
مروان:(قرب منها جامع غوباشتو وكيشوف فيها مستغرب من حالها)حياااااة!!!!!
حياة:(يلاه رجعات فيها روح ملي حسات بيه حداها استجمعات نفسها )ا...ا...كاين الصهد ياك(كتنش على رأسها)
مروان:كتهضري من نيتك...واش التلج طايح ونتي شادك الصهد!!
حياة:ااااه والله الى كنحس بالصهد...قلبي غادي يسكت
مروان:(دار بتسامة جانبية وعطاها كاس ديال لماء)شربي عالله تبردي...
حياة:موحاااال امروان موحاااال...
مروان:يعني هادا ماشي صهد عادي...شواقع ليك(ضربها بغمزة استفهامية)
حياة:اححح ..(حطات ايدها على جنبها)الصهد الصهد والله الى الموووت امروان..
مروان:الصهد شادك فجنبك(عااق بيها عارفها تبنجات مبقات عارفة شتقول)
حياة؛(عرفات راسها عيقات حتى فهم شنو طاري وحاولت تغطي على الشي لي خرج من فمها)..ا....ا...راه عندي الصهد فلكلوة ملي كنت صغيرة...ه...هكاك لاش جاتني هاد الحالة
مروان:سبحان الله...اول مرة نعرف بلي لكلوة كيشدها الصهد!!
حياة:اويييلي ومشتيش ملي يشدك الصهد فمصران الزايدة ..
مروان ّتبااارك الله(حابس الضحكة بزز...رجع كينشف شعرو وخلاها تشد انفاسها مراقباه بعويناتها وكتنش على راسها)

مروانّ(لبس تيشورت بعدما نشف شعرو...جلس على صوفا شاد تيلي بين ايديه وكيخربق فيه...حياة جلسات فوق الناموسية وكتفكر فلخطة لي غادي دير لريهام...رسمت بسمة على فمها..وشافت فيه:
حياة:احم...مروان
مروان:(عينيه على تيلي وكيهضر)وي.
حياة:شنو سميت المدير ديالكم؟
مروان:ديفيد...(طلع عينيه فيها)لاش كتسولي؟
حياة:والو...غير فضول وصافي...
مروان:(صغر عينيه فيها ورجع حط راسو على تيلي..حاسس بل متأكد انو هاد الكارتة لي معاه كتخطط لشي حاجة...)
حياة:(بدات دور عينيها فشومبر كتقلب على ورقة وستيلو..بانو ليها محطوطين...وقفت بشوية..وجرات ستيلو واجوندا بشوية بلما تعيق قدام مروان لي كان حاط راسو على تيلي...دخلات الدوش وسداتو عليها)
حياة:اوووف ...(حطات لاجوندا وستيلو وبدات تخمم فلكلمات لي غادي تكتب)بسم الله...دابا نشوفو ابنت التبولة والله متنساي هادشي لي غادي ندير فيك طول عمرك..(حطات ايدها على ستيلو وبدات تكتب)احم...«حبيبتي ريهام...متتصوريش قديش شتقتلك.... طول الوقت عم فكر فيكي ...مومصدق انك مو معي...بحبك كتير... مابدي ياكي تفكري فمرض السيدا لي معك.راح وقف جنبك غزالتي....حبيبك ومديرك «ديفيد»بحبك...ريهام.)
حياة:صافي باراكا...هكا مزيان(طوات لورقة ودارتها فصدرها حطات ستيلو ولاجوندا فواحد لمجر ..وخرجات لعند مروان لي ملقاتوش يمكن يكون خرج...لبسات صبيبطها وحلات الباب بشوية خرجات راسها مبانش ليها...سدات الباب ومشات لعند ريسيبسيون....
حياة:اويلي كيغادي يديرو حتى يفهموني...ا...هاااي
الشخص:هولا...
حياة:ا...شومبر....ديال مستر...جليل
شخص:que??
حياة:زبل كيغنشرح ليك...، ليه....ا...نوميرو...شومبر....مستر...جليل..
الشخص:oh bueno la numero es 56
حياة:مفهمتش؟؟؟ا....ايدونت ...ايدونت هاديك مفهمتش شنو كتقولو ليها؟
هو:(جبد ورقة وكتب ليها رقم الشومبر...جراتو من بين ايديه ومشات تجري لغرفة 56...رمات لورقة تحت الباب ومشات تجري لشومبرها)

حياة:(شعلات تلفازة وبقات جالسة على أعصابها معرفاش واش جليل لي هو منضم رحلة قرأ الورقة اولا لا....حسات بلباب تحل..قادت القعدة ودارت راسها زعمة كتفرج...دخل مروان عليها مستغرب كيشوف فيها جالسة وشادا لارض ..
مروان:سلام..
حياة:اهلا...اجي تفرج!!
مروان:زوين هاد الفيلم؟
حياة:فن...واعر فادخي يعجبك..
مروان:على اساس مكتفهميش اللغة...؟؟
حياة:ا...راه ميحتاجش تفهم..انا متبعة حركاتهم وكنفهم...بحال متلا هاد خيتي قالت ليه طلقني...
مروان:بصااااااح...
حياة ّاه....شوف كيكادير فيه..اكيد قالت ليه طلقني...
مروان:(بقا شحال كيشوف فيها وفعفويتها ..واخا بعد لمرات كتعصبو بكوارتها ولكين زوينة فاش كتشد لارض )
حياة :(بقاات مركزة فتلفازة حتى سمعو شي صوت وغوات برا...)
مروان:شواقع؟
حياة:(صرطات ريقها...)م..معرفتش...
مروان:(ناض من بلاصتو...وحل لباب...لقا جليل كيغوت على ريهام لي كتبكي..والموظفين دايرين بيهم)
ريهام:لك معملت شي هئ هئ 
جليل :وشهاد الشي واش باغيين تخرجو على الشركة...
مروان:(وقف عليهم)شواقع؟
حياة:(حالة الباب ومخرجت راسها كتشوف)
جليل:شوف امروان هاد الفضيحة...(عطاه الورقة)
مروان:(بدا يقرا وريهام تبكي وتخنن...تحلف بحلوفها بلي مدارت شي حاجة....خرج عينيه مزيان فلورقة وبدا يعاود يقراها مرة وجوج وتلاتة....اول حاجة جات فبالو هي استحالة مستر ديفيد يكون عندو علاقة بريهام...حيت الى كانت كاينة علاقة بينهم استحالة يكتب ليها بلعربية وهو مكيعرفش ليها...وتاني حاجة بدا يفكرفيها هي كلمة غزالة لمكتوبة ...بدا يدور فبالو هاد الرسالة ..وكيشوف فلموضفين لي استحالة تكون هادي فهايلهم...دور عينيه لشومبر كيبانو ليه عويناتها...غمض عينيه ورجع حلهم...عرفها مولات لفعلة...كمش الورقة بين ايديه ودار فيها تخنزيرات حتى سدات الباب ودخلات.)

حياة:(غير شافت تخنزيراتو ليها سدات الباب وضرباتها بجرية لطواليط...سدات عليها الباب وبقات واقفة تعض ضفارها حتى سمعت صوتو حل الباب)
مروان:(كيضرب الطواليط بيدو)حلي....حيااااااة حلي
حياة:ا...ممسلياش دابا امروان...
مروان:حيااااااة متزيديش تعصبيني كتر حللللي...
حياة:و..و...والله ممسلياش...غير صبر عليا نكمل ...والى كنت مزير نزل لطوليط لتحت..
مروان:(عرفها غادي تجنو..مشا حل الباب ورجع سدو بجهد ووقف ليها حدا طواليط)
حياة:(سمعات صوت الباب تسد عرفاتو خرج..شدات فجنبها)احح كنحس بقلبي وصل لمبولة....(حلات الباب وخرجات تلتاقط أنفاسها..معاقت براسها حتى حسات بشي يد شداتها من دراعها)
حياة:ا...ا.مروان ...والله الى كنت مزيرة...غ...غير دخل الى بغيتي
مروان:بغيت غير نعرف منين تسلطتي عليا..واش مكتمليش من هاد المصائب
حياة:م.م...م...مفهمتش؟
مروان:نتي لي كتبتي الرسالة على اساس انك المدير ديفيد...واش كتصحابي راسك مطورة
حياة:...و...و...والله مدرت شي حاجة(كتصرط ريقها)
مروان:(طلق منها ونطق)انا مليت من هادشي شي نهار غادي تخرجي على حياتك اصلا من النهار لي جبتك ونتي مدخلة ديلمي فمصائب...
حياة:(مقادراش تجاوب غير حادرة راسها وكتشوف فلارض)
مروان:اول حاجة غادي نديرو هو نرجعو لدار...وتاني حاجة غادي نمشي نقطع ليك فطيارة باش ترجعي للمغرب.
حياة:( كلامو نزل عليها بحال شي سطل ديال الماء البارد تخوا عليها.... حلات فمها على جهدو ممصدقاش الشي لي كتسمع )

حياة:(رمشات بعينيها وشافتو متوجه للباب..حسات براسها اغبى خلق الله بدل متجرو لعندها وتخليه يبغيها غادي ضيعو من بين ايديها..شافت فيه ومشات تجري لعندو)
حياة:عافاك امروان مديرش فيا هكا هئ هئ 
مروان:مبقيتش قادر نستحمل هادشي احياة...
حياة:صافي واخا..انا مقلت والو غير متخلينيش نمشي للمغرب دابا...عائلتي غادي يجو هاد لايام عافااااك امروان متخليش ناس يضحكو عليا هئ هئ
مروان:(باستغراب)شكون غادي يجي؟
حياة:عائلتي...
مروان:وعلاش معلمتينيش!!
حياة:نسيت كنت غادي نقول ليك ونسيت...
مروان:(بقا كيشوف فيها ونطق)صافي واخا فاش يمشو عائلتك غادي تبعيهم.
حياة:(هزات ليه براسها...وشافتو خرج خلات دموعها مهودين على خدها...كتلعن غبائها وكوارتها اللامحدودة...مسحات دموعها وبدات تجمع حوايجها..حتى سمعت شي حد كيدق عليها...حطات لحوايج بين ايديها ومشات تحل:
البنت:سلام...
حياة:مرحبا ختي..
البنت:انا مرات يوسف صديق مروان..
حياة:اه مرحبا دخلي..
البنت:لا غادي نمشي بغيتك غير الى كنتي مسالية تخرجي معانا حنا غير غادي نضورو شوية فلغابة 
حياة:اه ولكين مقلتهاش لمروان
البنت:وباااااز ليك اختي علاش خاصنا نعلموهوم بكل حاجة غير يلاه راه كنتسناوك حدا باب المنتجع
حياة:(ضوراتها فراسها ووافقت..رجعات دخلات البيت بدلات حوايجها لبسات سروال دجينز وبيل طويلة شوية فلبيض لبسات صبيبيط وجمعات شعرها لفوق جمعات حوايجها فلباليزا وجمعات لمروان حتى هو حوايجو معولة غير ترجع يشدو طريق لدار...هزات تيلي وخرجات لعند النسا لي كانو كيتسناوها لتحت سلمات عليهم ومشاو باتجاه الغابة شادين جماعة وناسيين راسهم وسط جمال الطبيعة الخلابة وصوت العصافير فوق راسهم ..نساو راسهم حتى نطقت وحدة منهم:
البنت:ويلي البنات نسينا راسنا الحال بدا يضلم
البنت2:اه عندك الصح يلاه خلينا نرجعو(بدا يرجعو مع طريقهم ..طريق تلوحهم فطريق اخرى...حتى توضرو بين الشجر )
البنت1:اويلي محايني حنا شنو درنا...هئ هئ اليوم يطلقني يوسف..
حياة :متخافوش البنات غادي نلقاو طريقة
البنت2:وراه الغابة هادي كينديرو حتى نخرجو منها هئ هئ 
حياة:(بدات تفكر لاعلى وعسى تعرف شي طريقة لي تخرجهم من هاد الزبلة لي غادي تخلي عيشتها)

البنت:هئ هئ خئ غادي يطلقني راجلي مفيهاش
البنت2:هئ هئ خئ ويلي شنو درت عمرني طحت فهاد الموقف موالفة نمشي للغابات ونخرج منهم عادي...
حياة:وصافي سكتو غادي نبقاو تبكو هكا مغاديش نخرجو من هنا...
البنت:هئ هئ شنو غادي نديرو
حياة:(بدات دور عينيها حتى بانت ليها شي حاجة مدلية من شجرة معرفاتش داكشي شناهو بانليها بحال شي حبل بدات طلع يدها كتجر فهادكشي حتى طاح قدام لبنات لي ضربوها بغوتة بين السماء والأرض)ااااااااااااااه(هزات صباطها فيدها وعطات رجليها لريح تقول هشام لگروش تابعينها النسا يجرو ويغوتو...حتى سمعو شي حد طاح...ضورو وجهم شافو وحدة منهم طاحت كتنهج
البنت:ياسمين مالك نوضي
البنت 2:ش...ش..شفتي ل...ي...لي شفت...لغعة اختي لغعة..
حياة:وراه لغعة لي غادي تطلع مع قزيبة جد بوكوم الى مانضتو
البنت:واش نتي معندكش لعقل علاش جبدتي داكشي..
حياة:علاش انا كنت كنصحابها لفعة ...واصلا لاش مخرجيني معاكم ونتوما معارفين فين دخلو ولافين تخرجو
البنت:سبحان الله يعني الغلط دابا فينا...
حياة :وعلاش فمن فغانا...
البنت.مضربك حد على ايدك انتي لي جيتي بخاطرك
حياة:وعلاش جيتي دقي عليا...علاش جيتي لعندي؟
البنت:صراااااحة الغلط مني جايبة معايااااا هاد النوع
حياة:مال هاد النوع مالو بان ليك مسطي اولا مجنون...
البنت:ايوة بحال داكشي!
حياة؟(غير سمعات هاد لكلام طارت على.راسها تنتف وتجر تعض من هنا ولهيه وتضرب فكل بلاصة جات قدامها ...حتى حسات بشي حد جرها لعندو وكيغوووت:
مروان:هدااااااااي...
حياة:(طرطقات عينيها ملي سمعت صوتو بدات تشد نفس وطلقو اخرتو مرجعها كفتة مشوية....)
يوسف:مروى...لاش جيتو هنا!!وعلاش هاد الحالة؟؟
البنت:خئ هئ هاهي هئ هئ هي لي قالت لينا نخرجو للغابة وملي غوتنا عليها حيت وضرتنا بدات تضرب فيا
حياة:ايوة الله يعطينا وجهك اوجه الكسكاس...ماشي نتي لي جيتي دقي عليا ابنت طيييييط
مروان:حيااااة سكتي...زيدي قدامي
حياة:وا....و...
مروان:سكتينااااا(جرها من دراعها وخرجها من الغابة حل ليها باب لوطو...وطلع يجيب حوايجهم ندم علاش جابها معاه وندم على نهار لي فكر فيه يخرج فشي رحلة)

يتبع