صورة مصغرة لـقصة كيف تصطادين عريسا

قصة كيف تصطادين عريسا

qisat 9isat kayfa tastadina 3arisan
بقلم ساريتا
رواية كيف تصطادين عريسا

تقديم:👙👙
«العريس وماادراك ماالعريس»واحد المخلوق لي على وشك الانقراض...والسبب الاساسي فلانقراض ديالو هي كترة الزواحف ...والزواحف نوعان فيها لمدودة وهادا أخطر نوع حيت كيكون قافز وكيطيح لعريس على زنافرو....وكاين النوع التاني لي تقدرو تقولو عليه «خبز ربي فطبگو»هاد النوع اغلب الاحيان كيكون ممسوقش لزواج كيتسنى العريس هو لي يجيه ماشي هو لي كيقلب عليه....وملي يفوت الفوت عاد باش يطلع معاه القالب ديال عشرة دراهم ويعرف بلي رجال مبقاتش ريحتهم ...وهنا تبدا عملية البحث عن عريس بشتى الطرق....ترمي صنارتك وتسناي بصبر طويل تصيدي شي حاجة...والى مصيدتي والو فكنبغي نبشرك عزيزتي القارئة انك دخلتي ضمن لائحة«البايرات».......😁😁

كيف تصدادين عريسااا😈للكاتبة ساريتاا😘
(فمدينة معروفة بالبساطة والحياة العادية..وبالضبط فحي معروفة ليه كترة الحركة وصوت الخضارا وصحاب السردين كيجرو فكرارسهم غاديين جايين...براهش كيجرو بلاسراول ونساء كينشرو فشراوطهم على الحبال لي مشتين فزنقة....فعمارة باين عليها القدم كانت اصوات الزغارات والتعارج كتسمع من هاد العمارة...فواحد من ديور لعمارة كانت البطلة ديالنا ماشيا جايا على طول لمراح لابسة بيجاما كاشفة لون السروال فشكل ولون التيشرت فلون اخر عاقدة زيف حياتي على راسها ولابسة بلغة ديال 600 دريال محلول نصها كتسمع غير صوتها كتحك مع لارض...دخلات مها لابسة جلابة شيبية ولاوية عليها زيف حمر ...غير حلات الباب طارت عندها تجري...
حياة:شكون امي شكون لي تخطبات؟؟
ماماها(فاطمة):الله ابنتي الله ملي ولا براهش 2000 يتخطبو ويتزوجو ونتي مزال باركة هنا ..غير سيري تسجلي فدار العجزة عالله يقبلوك 
حياة:وامي هضري شكون هادي لي تخطبات!!!
فاطمة:(كلسات على السداري وحلات زيفها):اح اضهري سيري جيبي ليا كاس ديال لماء
حياة:وامي وامممممي ..... وشكون لي تخطبات..هئ هئ .امي هضري خلاص راني كنحس بلمرارة غادي تطرطق ...
فاطمة:اووف ...بنت نجية... البرهوشة ديال اكرام خطبها ولد عمها قالو استاد اسلاميات وغادي يديها معاه لرباط حيت خدام تماك
حياة:ش...ش.شنووو اكرام البرهوشة لي كنت كنصايب ليها ضفيرات...لي كانت كتبول لينا فلفراش ملي كتنعس عندنا....هي نفسها لي كنت كنحفضها جدول الضرب ومكتفهمش حتى وزةحيت راسها فيه لعجين...لا لا لا امي هادشي بزااااف عليا...ملي هاد البعلوكة تتزوج وانا لا هادشي بزااف ...هئ هئ..غير قولي ليا الصراحة واش انا خايبة اماما هئ هئ...
فاطمة؛وبقات فزين وتي لي بلا زهر يضل عمرو كلو بلا بيه..البنت جاها زمانها ومها عطاتها خافتها لاتبقى بايرة ليها.
حياة:هئ هئ هئ (كتبكي وتخنن كضرب رجليها مع الارض وتمسح لخنونة بكم تريكو لي لابسة )وا بغيت نتزوج هئ هئ بغيت نتزوج اعباد الله....هئ هئ مي وامي زوجيني الله يستر عليك
فاطمة:انوضي تهزي الهايشة الجحشة...عييت معاك المسخوطة مخليت شوافة مخليت كزانة ...طرطقنا فوق راسك الدون(الرصاص)...بخرنا تحتك زغب لفار..حنينا ليك رجليك قولنا عالله يكون هاد فال خير ...عطيناك بول السبت تغسلي بيه...شكرناك قدام النسا...دكرناك قدام رجال.ومع دالك مزال مقلزة لينا هنا...اختي عييت عطيني بالتساع ...دابا لعربس عليك.. جيبيه نتي انا لي فجهدي درتو'
حياة:ياك امي ياك قلبتي عليا فرمشة عين..حتى انا مخليت مدرت ..مخليت عرس مخليت زنقة مخليت شارع نضل ماشيا جايا على الله نلقا شي ولد الناس وتقول واش صنارتي قدرات تصيد شي حاجة هئ هئ 
فاطمة:وانا لي عليا درتو..نوضي دابا باركا متخني عليا وجدي لغدا جداتك مبقا ليها والو وتوصل
حياة:هئ هئ انا كنمر بأزمة بايرية ونتوما همكم غير كرشكم(مشيت كنجر هاديك البلغة لي فرجليا ودخلت لبيتي لمتواضع ..لي كان لحيط كولو عامر بصور رجال (عارضين ازياء)مكاين غير لعضلات وشعر لمسبسب ولحية لمطراسية....حليت شرجم وحطيت يدي تحت حناكي وبقيت مقابلة عباد الله..حتى بان ليا عريس اكرام(هادي ديديكاس لاكرام امورس😬)كان طويل ورقيق فيه غير راس مدور وكبر من جهامتو ..لابس كوستيم فلكري كيلمع ..وداير تحتو قاميجة معرفتش واش صفرة واش خضرة مهم داك اللون ديال اراك من بعيد...هاز ورد فيديه وكيرد نضاضر الكاس مرة مرة بصبعو...دخل عريس الغفلة ومعاه قبيلتو وراه شي براهش معاهم...قلبت وجهي لحهةه لاخر شفت هنية كتنشر كراسنها ..شافت فيا وهي تنطق)

هنية :واحياة..شفت لبراهش بداو يسبقوك ياك مبغيتي نفوسخك
حياة:'(متستغربوش راه عادي الى هضرات هكا قدام الحي كلو..حيت هاد خيتي لسانها فيه ميترو ميسلم منو حد...ولكين انا كنجيبها ليها فتمام)
حياة:انا بعدا مشكيت عليك
هنية:غير خفتك لاضفريه بيض..
حياة:متخافيش اخالتي غادي نضفروه بيض انا وبنتك سامية انشاء الله
هنية:(خرجات فيها عينيها هزات شبكتها ديال لحوايج ودخلات)
حياة:(شفت فيها حتى دخلات وسديت شرجم ..تلاحيت على فراشي ودرت يديا تحت راسي وبقيت كنشوف فسقف..وابقاو نتوما مقابليني.على زبل كيداير ملقات هاد الكاتبة متكتب غير علي انا..المهم لي بايرة غادي تحس بيا وتفهمني حيت سبحان الله كتكون عندنا نفس المشاعير والاحاسيس..على العموم الاسم ديالي حياة.شادا دبلوم فلمحاسبة ومن بعد مكملت بركت فالدار ..اخيب سؤال منبغيش نسمعو..هو شحال فعمرك؟؟ناري كنحس بلبانكرياس كيتشل...كنحس بلكبدة لصقات على رية ...
..وراه نعيا نشرح ونفهمكم والله لافهمتوني..ولكين انا غادي نجاوبكم عمري 29 وبعد ستة اشهر غادي ندخل فالسنة المشؤومة30..لذلك درت كتر من جهدي فهاد السنة اني نصيد شي عريس وندوز هاد رمضان فدار راجلي حتى انا بحال بحال أيتها الناس..نقاد ليه الشهيوات..نصبن ليه حويجاتو..نشوف شنو ناقصو..ويدخل علينا عيد لكبير نغسل لكرشة فدار راجلي ..ندير لقديد..ويجيب لينا الله شي بيبي نجروه فلكروسة ونخرجو نتعاشاو برا..اححح على عيشة كنتسناها بفارغ الصبر..اوووف (ناضت من بلاصتها بعدما سمعات صوت الزغارت من جديد...هزات يديها لسما وبدات تطلب)سيري ياكرام بغيتليك الاسهال نهار الدخلة..هو يدخل ونتي تخرجي فلخير من قفاك...بغيتلك الدود وحبوبة تنوض...بغيتلك الحكة وقلت الضفار..بغيت..استغفرك الله أنا مالي وليت شريرة..ياربي سمحلي والله انا مهاكا..
فاطمة:حياة واحياة
حياة:ونعام امي
فاطمة:نوضي قلي الحوت راه جداتك مشا يجيبها سي محمد
حياة:اووف ياربي..(رجعت لبسات بلغتها ومشات تجرها لكوزينة..بدات طيب لغدا وجامعة هادوك الحجبان بحال سيوف سعودية.)

الحاجة:اووف اي ارجلي اي..مزال موصلنا اوليدي
سي محمد(خو حياة):هاحنا الحاجة ها الدار..(حل الباب بساروت وبدا يعيط ليهم..
فاطمة:مرحبا بيك امي(،تبوس وتعنق)
حياة:(خارجة من لكوزية حالتها كلها تصفيرة ودقيق تكول فارة مخشية فخنشة ديال الدقيق)مرحبا الحاجة (ومشات تبوس يدها)
فاطمة:(جراتها لعندها وبدات توشوش ليها فودنها)اشهاد الحالة ابنت لحرام'(قرصتها فدراعها)
حياة:ايي وغابشوية..وزايدون نتي لي قلتي ليا نقلي الحوت
فاطمة:(كتغمز بعينيها باش نسكت قدام الحاجة)
حياة:ومالكي كتغمزيني دابا
الحاجة:الله اربي الله هاد جوج حياتهم كلها مغادي يتغيرو..عقرب وبنتها
فاطمة:ياك امي ياك. هاد الهضرة ليا انا
سي محمد:صافي باراكا من الصداع خلو الحاجة ترتاح شوية
فاطمة:اجي نتا بعدا فين مراتك شتها مبقات سولات من نهار لي مشات فيه لدارهم؟؟
سي محمد:سيمانة الجاية غادي ترجع الواليدة
حياة:(دخلو لصالة ورجعت انا لكوزينة كنوجد لغدا..صايبة طابلة حطيت فيها داكشي لي وجدة ومشيت نبدل حوايجي..لبست كسوة سميطات ديال الدار فيها شي تخربيقات ولبست بلغتي..وجلست معاهم كنتغداو حتى نطقت جدا:
الحاجة:هاد المصيبة مزال باركة هنا متخطبات متزوجات
حياة:اللهم صلي عليك ارسول الله..شهاد الهضرا دابا اجدا خلينا نتغداو
حاجة؛ايوة كولي كولي...يبقا بالك غير فلماكلة 
حياة:من بعد نهضرو انا وياك اجدا ..(غمزة)
حاجة:شنو بغيتيني؟؟
حياة:والو غير نسول على حالك واحوالك
الحاجة:امم صدقتك..ايوة غير كولي دابا ونشوفو شنو تحت راسك
حياة:(بديت نخشي فوجهي وكنخطط ونفصل فراسي مبقا عندي من غير جدا ....ياك كيقولو الناس لقديمة عندها لحكمة والخبرة..انشاء الله ياربي تعطيني شي طريقة نجيب بيها هاد العريس بغيتليه غبارة..مبغاش يبان )

حياة:(كملنا لغدا غسلت لماعن وضربت تسيقية على الدار..نشفت ايديا ومشيت لعند جدا لي كانت كتاكل الزريعة وكتفرج فحب للايجار.هادي هي الحكمة والرزانة..)ايوة الله يكبرنا على الطاعة وتباعة
الحاجة:اجي اجي تشوفي هاد السفريطة خفيفة بحالك
حياة:(جرات من عندها الزريعة)اشكديري اجدا ..كتاكلي زريعة غادي ضرك
الحاجة:اري لهنا اري..
حياة:لا..خاصني نهضر معاك
الحاجة:اري الزريعة لهنا ونهضرو
حياة: ..خاصك تسمعيني
الحاجة:جلسي نشوفو..شنو كاين هضري
حياة:(جلست قدامها وبديت نتبوحط)جدا..انا كيف مكتعرفي كبرت والكار على مبان ليا غادي يخليني بايرة ويمشي..
حاجة:شكون هو هادا لي غادي يمشي؟؟
حياة:الكار اجدا...اووف هادا غير متل كيقولوه..دابا نيشان بلا منبقا نتبعكك عليك هنا..انا بغيت نتزوج قبل مندخل ل30 وبغيتك تعاونيني
الحاجة:والله ابنتي مكنفرق فرجال..انا براسي كنقلب على لي يونسني من يوم مامات جدك..ملقيت لي يبغيني قدو
حياة:واجدا واش كتهضري من نيتك من يوم مامات جدي ونتي تزوجي طلقي تزوجي طلقي وجالسة تقولي ليا ملقيتي لي يبغينك قدو..نتي بعدا راك لقيتي كيتي انا هئ هئ
حاجة:اويلي شوف لهبلة تبكي وتخنن
حياة:هئ هئ ضحكي ضحكي عليا هئ هئ 
حاجة:سمعيني نقول ليك..هضرتي خليها حلقات فودنيك
حياة:(مسحت خنانتي وشفت فيها شنو غادي تقول )
حاجة:الراجل ابنتي مكيطيحش من السما..راك نتي لي خاصك تقلبي عليه
حياة:مفهمتش
حاجة:واش نتي دابا باغية تزوجي ونهار كلو جالسة فالدار لاخدمة لاقراية ..فين غادي يشوفك هاد الراجل الى مبنتبش قدامو
حياة:اهاه يعني خاصني نقلب على شي خديمة عالله يجي شي ولد الناس
حاجة:أيوة هانتي بديتي تفهمي قلبي على شي خدمة وشوفي زهرك
حياة:والله الى طلعتي دكية اجدا هاد الفكرة كاع مطاحت فبالي..ههه'(بستها فراسها)يخليك ليلي هاكي هالزريعة تلفي بيها الوقت(طرت نجري لبيتي درت عليا بينوار وخرجت لعند سمية صاحبتي الانتيم...
سمية:وابشوبة وبشوية ازبل
حياة:زينونو توحشتك
سمية:بغيتليك ضربة مالك على هاد دقان
حياة:كاين شي حد هنا
سمية:لا غير جدي كيصلي
حياة:(جريتها من ايدها ودخلتها لبيتها)
سمية:ومالكي غير بشوية
حياة:سمية عقلتي داك النهار ملي قلتي ليا كاينة واحد الخدمة فلمكتبة 
سمية:ايه..شفكرك بيها دابا؟
حياة:بغيت نخدم فيها اختي هضري مع خوك يهضر مع مولاها ياك صاحبو؟
سمية:اه ولكين سيد متدين موحال واش يوافق عليك
حياة:مالي ياختي ميوافق بنت ليك خارجة من فيلم بورنو ..
سمية:ولا الزبل ماشي هاكا خاصك تكون كتلبسي المحتشم بحال السندري متلا
حياة:وعلاش لا اختي ..الواحد يستر راسو راه مابين الجنة والنار غير شبر
سمية:واش هادي حياة لي كنعرف
حياة:مالكي ياختي كتحسيني بلي انا كافرة ولا يهودية ..راه قلبي عامر بالايمان..وجات الفرصة نبين هاد الإيمان
سمية:لا لا لا والله منتي طبيعية
حياة:دابا بلا تقحبين الخرا غادي تهضري مع خوك لحشايشي يهضر مع هاد زبالة يخلني نخدم ...يلاه تلاحي(دفعاتها ومشات)

الحاجة:حياة واحياة
حياة:(داخلة مدرمة جامعة هادوك لحجبان..ولقرودة كيشطحو فوق راسها)
الحاجة:واحياة...
حياة:وانعام وشنو وشكاين ....
الحاجة:بغيتليك لحناش يخرجو من قفاك ويدخلو فلالاك....وليتي ترفعي صوتك عليا الجحشة
حياة:لا اجدا شهاد الهضرة راه غير حيت مفقوصة شوية
الحاجة؛تفقصي ولا طرطقي كاع...سير غسلي ليا سروالي راه حطيتو فطواليط
حياة؛عوتاني اجدا بلتي فيه...واش هاد القاعيدة مقدرتيش تحيديها منك 
جدا:شوفي اهاديك البايرة راه بديتي تخرجي فيا جنون..علاه انا كنديرها بلعاني راه لبرودة هي لي كدير فيا هكا..سيري طلقينا خلاص غسلي ليا سروالي
حياة:(هزات ايديها لسما)ياربي يامولاي يجي هاد بوراس خانز الرجلين يديني من حبس عكاشة لي عايشة فيه...
ماما:شوف الكلبة شكتقول ...الله يحرق طواسلك الجحشة غبري غسلي لجداك سروالها.
حياة:(مشيت كنجر رجليا لطواليط...جمعت شعري شفنجة مخربقة وحطيت مقبض ديال لحوايج فنيفي ومشيت نغسل سروال جدا اصل هاد العادة فيها من نهارها مكتقدرش تتحكم حشاكم فلبول وكطلقو فحوايجها وانا لي كنتكفل بيهم(هاد الحالة راه كتوقع لناس لكبار فلعمر).'...غسلت داكشي ودخلت لبيتي لبست بيجامة وسمعت صوت تيلي ديالي كيصوني....كانت سمية
حياة:شكاين!!
سمية:مال مك مفرعنة؟؟
حياة:وهضري راه يلاه بغيت نحط راسي ننعس شوية.
سمية:المهم راه هضرت مع خويا قاليك غدا يلقاك فراس دريبة يوصلك لمكتبة حيت خالد مزال ملقا شي حد يعاونو
حياة: اححح وسميتو خالد من لفوق... اربي كتهضري بصح
سمية:وعلاش كنتفلا المهم غدا مع 9 تكوني واجدة
حياة:واخا
سمية:ونزيدك السيد راه متدين احياة يعني لباسك يكون محتشم وعينيك فلارض راني عارفاك الخرا
حياة:وسيري تقودي بنتليك انا غاديا نتح••معاه راه حتى انا فيا الإيمان ودين يلاه تلاحي دابا....(قطعات المكالمة مع سمية وخشات راسها فلماريو تقلب على حاجة مستورة وتقول واش لقات شي حاجة تحمر لوجه...تفكرات السندري ديال ماماها كتصلي بيه..دخلات تجري لبيتها هزاتو بتخبية وداتو لبيتها معولة غدا تلبسو.)

(هاهو الصباح جا بنور شمسو الدافية☀☀ بدات تجبد فوق فراشها بحال شي مشة...حلات رجليها وعطاتها لحزاااق وحدة ورا وحدة هادا هو سيستيمها الصباحي الى مخوات كرشها على صباح متفيقش مصحصحة...جرات تيلي تشوف شحال ساعة لقاتها 8:30 رمات لغطا وخرجات لدوش شعرها واقف وسروالها رجل طالعة ورجل هابطة...دخلات دوش بزربة توضات قضات حاجتها مشطات شعرها وحطات ميك اب صباحي خفيف بزااااف رجعات لبيت لبسات السندري ديال ماماها وهزات صاكها رمات فيه تيلي وخرجات من البيت زربانة فاتجاه الكوزينة..شدات نص محراشة دهناتها بسمن وشوية الزيت لعود الحر كلات نصها والنص لاخر لاواتو فميكة وخشاتو فصاكها. هبطات تجري لعند خو سمية(محمد)لي كان كيتسناها بلموطور....
محمد:تبارك الله وصلاة على النبي هادي حياة لي كنعرف؟؟
حياة:لا هادا خيالها...وزيد زيد راه تعطلنا على الراجل كيتسنى حشومة
محمد:(ركبات وراه وعفط على الموطور لي كيوقف فكل دقيقة ...خرشاشة والسلام....واخيرا وصلو للمكتبة لي غادي تخدم فيها.)
حياة:(دخلات حانية راسها وتقول عروس فليلة الدخلة...كتلعب بصباعها ووجها كيشوف فلارض)
محمد:هانا اخويا خالد هادي هي البنت لي قلت ليك
خالد:مرحبا ختي تفضلي..
محمد:يلاه انا مشيت الله يسر ليكم
حياة:(بصوت خافت)امين ياربي ونجيب منو توام ..
خالد:قلتي شي حاجة ختي...
حياة:لا والو...
خالد:واخا...انا يلاه هادا شهر باش حليت هاد المكتبة ..غادي نوريك الرفوف وفين تقدري تلقاي الشي لي باغيين لكليان بحال متلا هنا كاينين القصص دينية..وهنا كا.. 
حياة:(السيد يشرح وحياة فسابع سما..تصطات تجنات بلعربية تعرابت مشا ليها لفريخ...السيد كان لابس فوقية كحلة وحاط على راسو طاقية مشبكة ..مسواك فلفم وريحة المسك كتفوح منو...طولة تبارك الله ولحية كحلة مطراسية ومرتبة...كطلعو وتهبطو حتى دار عليها على غفلة ...رجعات حطات وجها لارض وصوتها بسيف يتسمع.
خالد:احم امم كلشي واضح اختي.
حياة:..احم..ا..واضح شكرا ليك
خالد؛امم هنا لاكيس يلاه الله يسخر
حياة : ...من فمك لسيدي ربي.(جلسات فوق الكرسي....وبقات على نفس الوضع حاطة عينيها لارض وساكتة تقول هنا نبات...بينما خالد دخل لداخل شغل القرآن ورجع جلس كيشوف فيها ويرجع ينزل عينيه جدباتو ..باينة فيها بنت الناس ومربية ماشي بحال بنات هاد الجيل لخفافات..هادشي لي كان يدور فبالو...)

(رجعات حياة لدار بعدما سالات خدمتها ضورات الساروت فلباب ودخلات.... عند الباب بدات تحيد السندري لي لابسة حيت سخنها)
حياة:اوووف شحال كيسخن كيندير حتى نستحملو ...
ماما:هي هي هي ...شوف حياة حتى هي ولات تلبس السندري...لاش كتخطي اديك العفريتة راني حافضاك المسخوطة
حياة:ماما اي...عافاك عاونيني نحيد هادشي لي وحلت فيه اوووف
ماما:(بدات تعاونها حتى حيداتو)أيوة ومن بعد منوياش تجاوبي...فين كنتي المسخوطة ولاش لابسة هاد الشي؟؟
حياة:'(جلسات على صوفا تشد نفس)من اليوم اماما متسولينيش فين كنت اولا فين مشيت..
ماما:(جمعات معاها بقرصة حتى نقزات من بلاصتها)شنو قلتي ابنت لحرام مسمعتش....منسولكش؟؟
حياة:احح اييي ...وراه نتي لي قلتي ليا نمشي نجيب عريس وراه هادشي لي كندير
ماما:تمشي تجيبي عريس ..ياك ميصحابليك راسك مسخرة..اربي باش بليتني هبيلة وقالو ليها تزوجي...
حياة:اوووف راسي ضارني اماما غادي نمشي ننعس عيانة 
ماما:نوضي نوضي نشوفو تاليتها معاك
جدا:نتوما جالسين هنا مجمعين ومخليني انا.جالسة بوحدي 
ماما:ههه الله يهديك امي راه غير هاد المصيبة شي نهار غادي تجيب اخرتي
حياة:اوووف انا مشيت ننعس
جدا:مرات ولدك فينها شتها غبرات!!
ماما:سي محمد قال بلي غادي يجيبها غدا
جدا:امم ايوة يلاه شعلي ليا هاديك المشقوفة ديال التلفازة راه لمسلسل بدا عليا
ماما:الله يهديك حتى نتي امي بدل متشدي تسبيح وتستغفري ربك مقابلة المسلسلات
جدا:وراه نتي لي بقيتي ليا فلبلان متعيشو ومتخليو لي يعيش...زيدي قدامي شعلي ليا هاد الويل.
حياة:(لاحت هداك سندري فوق الكرسي وتلاحت على فراشها كما لعادة رجل فليمن ورجل فليسر لابسة سروال ديال الدار متقوب كيبان منو لكيلوط ديالها فلارونج...ومخليا شعرها مليوح على لمخدة وصوت شخيرها كيتسمع من مسافة بعيدة...)

(هادا اليوم 15 لحياة فلخدمة ....كما العادة كتفيق مع 8 وتبدا سيستيمها الصباحي المعتاد..لبسات السندري ديالها لي بزز باش كتستحملو حيت مزال موالفتو..وخرجات تجري خايفة لايفوت عليها الطوبيس...فطريقها تصادفات مع خو سمية (محمد)
محمد:صباح الخير
حياة؛صباح النور...ناري اليوم يجري عليا صاحبك تعطلت بزاااف
محمد:ههه وغابشوية مبانش ليا غادي يجري عليك
حياة:وباش قلتها...؟
محمد:فلحقيقة بغيت نهضر معاك فموضوع مهم كيهم الزواج..ولكين صافي حتى ترجعي
حياة:(قلبها كيضرب...حسات بواحد تبوريشة من صبعها صغير حتى لبوصيلات شعرها هادي غير كلمة خلقات فيها هاد الحالة)احم مسمعتش شنو قلت..زو...ز..زوا..
محمد:زواج ..
حياة:اه هادي هادي..(جراتو من الكول عندها)شكون وامتى وفوقاش ؟؟؟
محمد:(خرج عينيه فيها)بسم الله الرحمان الرحيم سلامااا قولا...
حياة:(نتبهات لراسها)ههه راه غير كيعجبني نضحك على الصبح..هههه اجي نهضرو لهيه لايسمعنا شي حد.
محمد:صافي سيري حتى تخرجي من الخدمة.
حياة:(خرجات عينيها فيه)لهيه لهيه سير لهيه خلينيا نهضرو!!
محمد:(حدر.راسو ومشاو لجنب لحيط...حياة دورات وجها يمين وشمال تقول غادي تقوم بعملية ارهابية...خايفة لايسمعهم شي حد)شوفي اختي حياة السيد بغاك على سنة الله ورسوله..و
حياة:شووووش هضر بشوية واش نتا حمق...استرو حوائجكم بالكتمان
محمد:(حدر راسو مسكين لعندها حتى قرب من ودنها وبدا يوشوش ليها تحلف عليه كيبوسها..)خالد لي خدام معاك طلبني نهضر مع عائلتك حيت عجبتيه وبغاك على سنة الله ورسوله الى كنتي موافقة
حياة:موافقة موافقة اخويا والف موافقة(مع هاد لكلمة خرجات عليهم عويشة شفتهم فهاداك الوضع وهي طلقها بغوتة)
عويشة:اويلي اعباد الله... وخرجو الجيران خرجو تشوفو لالاكم حياة الإخوان وفتيح الجوان...ضاربة الدين والتقحبين...
حياة:سكتي اهاديك لفعة سكتي شنو كتخربقي راه غير كنهضرو
عويشة:كتهضرو واش اعباد الله عنقو فعنقك وتقولي كتهضرو....اخرجي افاطمة تشوفي بنتك كضور برجال ..
حياة:(شافت فيها شوفت ماكرة ومشات كتزرب فلمشية وخلاتها كتبرر بوحدها...وصلات لعند راس الدريبة وشيرات عليها بحجرة لراس..وهزات هاداك السندري بين ايدها حتى بان كولونها وعطات رجليها لريح...)

(شدات طوبيس ومشات قلبها غادي يخرج..ممصدقاش بلي جاتها خطبة من عند هاد الطيطز المتدين الف وحدة تتمنى واحد بحال خالد شدات نفس ورداتو ودخلات للمكتبة :
حياة:(حادرة راسها بحال ديما عينها فلارض والسكون والطمأنينة نازلة عليها..)السلام عليكم ورحمة الله وبركاته
خالد:عليكم بالسلام
حياة:عذرني اخ خالد تعطلت شوية..كنت كنعاون امي فلحلوة
خالد:(تسبيح فيدو وبسيف كيطلع عينيه فيها)ماشاء الله ماشاء الله ..ماشي مشكيل تفضلي
حياة:(دخلات حانية راسها وجلسات فكرسيها فرحتها بسيف حابساها ناوية فاش ترجع لدار تمشي لعند سمية يدردكو شوية على أنغام مول البندير..)
خالد:(كيدوز فلقنوات ومع ختكم فيها طول لسان نطقات بصوت هادئ)
حياة:ممكن اخ خالد دير برنامج «على خطى الإيمان»
خالد:معرفتوش فين كيبدا؟؟
حياة:فقناة اسمع!!
خالد:قناة اسمع؟؟اول مرة كنسمع بهاد القناة...
حياة:ميمكنش!!راه قناة معروفة فيها هاديك العلامة الخضراء
خالد:الى كنتي كتقصدي هادي(كيقلب بين القنوات)فهادي سميتها اقرأ
حياة:(ويلي على فضيحة بغيتلك الساني لحرور وحبة ضور....)ههه هي راه غير غلطت حيت كاينة قناة اخرى سميتها اسمع
خالد :ماشي مشكيل...
حياة:(تزنق وجها ومحملات هاد الموقف لي وقع..دارت لعند لكنطوار حيت جاو شي بنات)
البنت 1:ختي بغينا كتاب ديال تح...ميمكنش حياة يعقوب هنا
حياة:(خرجو عينيها ميمكنش يكون نهارها مكفس هكا)
البنت2:شو القحبة زيانت بالسندري
حياة: هههه بنات شنو حب الخاطر
البنت1:بشاخ على تبوكيسة خدام معاك...اربي عقلتي على ايامتنا ملي كنا كنسرقو 10 دراهم على واليدينا وكنمشو نشاطو مع تيتيز هههه
البنت 2:خههههه ويلي متفكرينيش نهار لي شطحات لينا حياة الشرقي فعيد ميلاد فؤاد باش تفقس سيمو وفلاخر جابت الربحة على المسعودة هههه
البنت1:هههه ويييه ناري ايامات الصوبيصة...مزال مبلية بلفيدوات ديال مايا خليفة اطحبة؟؟
حياة:(وجها ولا حمر ومرة صفر ومرة زرق...يعني تزنقاااات بلمعقول)ههه لبنات يمكن غالطين انا ماشي هي البنت لي كتهضرو عليها....
البنت2؛اويلي شكتخربقي احياة...راه غير من نهارين لقيناك فالدرب مشيتي معانا لعرس صفية بلامارا لابسة قفطان سومو وشعرك طالقاها وبقيت غير نابت فلمنصة كدردكي عقلتي ولانفكر ملي جاك هاداك التيتيز لي قال ليك ...
حياة:صافي صافي يرحم باباكم مشو من لهنا راكم غادي ضيعو كلشي عليا ..سيرو سيرو
البنت1:(قربات لعند ودنها)ياك متكوني دايرة شي مونتيف مع التوت لي وراك
حياة:(خرجو عينيها ملي سمعت بلي وراها صافي كلشي مشا ليها فزيرو.)
البنت1:ا..يمكن غلطنا ياك امروى
البنت2:اه سمحي لينا اختي تخالطتي لينا مع وحدة اخرى
حياة:خهههه ماشي مشكيل شنو حب الخاطر
البنت 1:ا...حتى نرجعو عندك يلاه باي(غمزتها ومشاو)
حياة:(دارت عندو بلعرض البطئ كيكرر كلمة وحدة)
خالد:استغفر الله استغفر الله.....
حياة:ههه بنات هاد الجيل الله يحفض وصافي كيطيرو...راه غير تخالطت ليهم مع شي وحدة الله ينجينا وبنجيك من هاد الاشكال
خالد:(شاف فيها شوفت غير مفهومة ودخل ..خلاها ماشية جاية كتخمم بينها وبين راسها خايفة لايكون لعريس طار من بين ايديها.)

حياة:(بقات على هاديك الحالة حتى شافتو خرج حاط تيلي على ودنو وكيهضر فيه...بعد لحضات رجع دخل..تحت انضارها الخائفة...سمعت صوت ميساج جاها...حلاتو كان من محمد:
«اشنو درتي السفريطة؟»
_شنو درت؟؟
_السيد تراجع على فكرة زواج ومقاليش علاش
_شنو؟؟كتهضر من نيتك!!
_لا كنهضر من قفايا...راه يلاه هضر معايا قالي الموضوع ديال زواج مبقاش كاين.
حياة:(حطات تيلي وجمعت هادوك لحجبان ناضت من بلاصتها وشافت فيه كان كيقرا واحد لكتاب...حطات يديها على خصرها وبدات تبربر عليه)مزيان تبارك الله يصحابليك بنات الناس لعبة بين ايديك تضحك عليهم ...
خالد:(باستغراب)لاحول وقوة الا بالله...شنو واقع اخت حياة!!
حياة:اويلي شوف لهبيل مزال كيقول ختي...واش اسيدي انا وانت خرجنا من كرش وحدة رضعنا من بزولة وحدة باش تقولي ختي....؟؟
خالد:(حدر.راسو حشمان)استغفر الله استغفر الله..
حياة:اييه اسيدي ستغفر ربك راه واقفة قدامك شيطانة زبيدة مرات شمهروش جالس تستغفر ربك..مالي اخويا بنتليك مخرجة شي طرف مني..اولا بنتليك كنمارس الرااااسيلة..الراااافيلة ...لخرا هاديك لعيبة ديال واحد و وحدة..بنتليك كنديرها باش تلغي فكرة الزواج.؟؟
خالد:(غير حاط راسو لأرض مصدوم من هاد التحول الغريب لي وقع ليها)نضن بلي الاخ محمد وصل ليك لكاين انا ابنت الناس مضحكتش عليك شفت بلي نتي متليقيش ليا..الله يجيب لي فيه لخير ليا وليك..والله المستعان
حياة:(معجبتهاش هضرتو زادت جعرات عليه)اصلا انا لي مكنتش غادي نوافق عليك(الله يعطينا وجهك )بارك عليا اختي واخي..تقول مخرجينك من فيلم الرسالة...ولكين انا لهبيلة وافقت على راسي هاد الحالة قاليك حاگا محگا حياة لابسة سندري..اسيدي شبيني وبين شي سندري مغلفة فيه كلي بحال كيكة راس العام...وزايدون مشتيش راسك فلمرايا باش تهضر وتقولي منليقش ليك(الى هادي الالة حياة متقمشيش مشاعر طيطيز )من نهار شتك ونتا لابس هاد الفوقية بحال عريس لغفلة ..وداير هاد لخوزعبيلة فوق راسك كتصيد بيها لقمل....ولكين مزيان فيا انا لي طلعت الشان لبوجعران...(هزات صاكها وتيلي ديالها ...جات تمشي وهي ترجع مدات ليه ايدها)عطيني فلوسي ديال هاد 15 يوم لي خدمت يصحابليك غادي نخليهم....
خالد:'(سيد مرفوع بشكل كلي تصدم فيها بزاااف...عطاها فلوسها .وعينيه فلارض...)
حياة:(جرات فلوسها من عندو ومشات...وصلت لنص طريق ورجعات لعندو..طيحات لكتوبة لي كانت كتنضمهم هاد المدة وشافت فيه)
حياة:مطالعة مطالعة...خليت ليك الراحة «ابو طاقية»

يتبع

قصص جديدة
قصة افتقدك من تأليف مريامة العروصي
قصة افتقدك مريامة العروصي
قصة الحب الصامت من تأليف سلوى شتيوي
قصة الحب الصامت سلوى شتيوي