خمسطاش ، واخا تقراوها بجميع اللغات ! غاتبقا بالنسبة ليكم مجرد عدد بسيط 😊، ماعندو حتا اهمية👎 ، و لكن رأيكم هذا غايتبدل نهائيا بعد قراءة هاد القصة😨😨😨😨 ، كتاشفو معايا كيفاش رقم بسيط يقدر يغير حياة انسان بكل معاييرها ، تابعو معايا قصتي الجديدة ، قصة مليييئة #بالغموض 🙈🙈🙈 ، #التشوييييق 🙉، #الألغااااز ،😱 و أكيييد الحب ثم #الحب 😍😍❤❤، نكتاشفو جميع شنو يقدر يدير هاد الرقم و شنو كايخبي فطياتو !
قصة بعنوان : خمسطاش_15
ياسين، ماغاتبقاش مجرد سمية ، عندي يقين بلي غاتولي شي حاجة كبيرة بزاف ، شي حاجة غاتكبار قيمتها و غاتتشهر ، غايولي كلشي يهضر عليه و كلشي يشجع فيه ، غايولي يدوز و يبغيو الناس يتصورو معاه ، غايشوفو فيه واحد الشوفة زوينة يتمناها اي واحد ، غايحقق حلمو لي بغا، من اليوم ماغاتهموش الطريقة كثر ماغايهمو الهدف! بجميع الطرق ، غايتخلا على كلشي ، او اصلا راه ديجا تخلى على كلشي ، نسا كلشي و اي حاجة متعلقة بيه فالماضي ، دابا ماكاين غي ياسين !
كون شفت راسي غي البارح هاكا كنت غانقول مستحيل ، انا نولي هاكا ، مستحيل ، و لكن بصح دابا تبدلت و لي عطا الله عطاه ، راسي متكي على الكوسان ، الكار عامر ، لابس سورڤيطا فالرمادي و سبرديلة كحلة ، تحسينة جاتني زوينة مع شعري رطب ، ندمت لي ماتاخدتش هاد القرار من شحال هادي ، ندمت انني حبست احلامي على قبل ناس مايستحقوش ، على قبل ناس عمرهم ما كنت شي حاجة بالنسبة ليهم اصلا !
و اخيرا وصلنا ، مدينة جديدة عليا ، واخا صغيرة غانتعود عليها ، هادي هي المدينة لي غاتحقق لي احلامي ، لاڤاليز ديالي ماكانتش ثقيلة بزاف ، مجرد لبيسات قلال اغلبهم رياضيين، كاسكيطات ، ديك السبرديلة لي كانت سبب فهاد القرار لي تاخدتو اصلا ، جيل للشعر ، ريحة رجالية ، و شي لعيبات بساط، كون كنت بنت دابا ههه ، كانتخيل دابا! كون راه ڤاليزتي عامرا بالماكياج و ألف لبسة و زيد و زيد غايخصني البوجي باش نهزها ، و لكن انا ماشي بنت ، انا راجل ، وراوني فين كاينة غرفتي الخاصة بالنادي ، ماولفتش دغيا الاجواء ، الدراري صحاح و كبار و طوال ، ماشي بحالي طبعا ، الطول و الفصالة على قد الحال ، صلاح هو الدري الوحيد لي كان صاحبي فديك الفرقة ، كلهم كانو متنمرين و حاسدين و متكبرين ، حاسيين بصحتكهم و فيهم قنطار ديال العياقة .
دازو يوماين و انا فالنادي ، كان فيا العياء ديال السفر و طلبتهم يجيبو ليا الفطور لعندي ، واخا ماشي داكشي لي ولفتو فدارنا و لكن ماشي مشكل ، كاس ديال القهوة و معاها پتي پان أوشوكولا او بعبارة اخرى اكثر شعبية كرواااصة ، كان فيا للموت ديال الجوع عضيت الكرواصة كانحس بشي حاجة ماشي هي هاديك ، حيدتها من فمي ، لقيت كاغيط وسطها! اش هاد الزمر هادا اوووف ، لحتو فالارض كايبان ليا كبير نيت! هزيتو لقيتو مطوي ، اشهادشي!! رسالة هادي ولا شنو! مايمكنش هادشي يتبعني حتال هنا! اول حاجة مشيت نشوفها هي التوقيع ! و داكشي لي كان فتوقعاتي هو لي كان بصح ، التوقيع مكتوب فيه "15 " ، اما الرسالة ، فيها " يَنْظُرُ لَهُ البَعْضُ نَظْرَةَ ثَرَاءٍ ، اَمَّا البَعْضُ الاَخَرُ فَيَتَلَذَّذُونَ بِهِ ، يُوجَدُ المَكَانُ المُنَاسِبُ بِجَانِبِهِ ، بِهِ ثَلاَثُ أَعْيُنٍ فَقَطْ ، وَ السَّبِيلُ إِلَيْهِ يَقْرَبُهُ بِسَبْعِ خُطَى فَحَسْبْ ، مِنْ جِهَةِ القَلْبِ ، أَمَّا السَّبِيلُ الثَّانِي فَفِي سِنِّ الفَمِ الأَسْوَدِ ، اليَاسَمِينُ فِي كُلِّ مَكَانٍ ، وَ الاَهَمُّ مِنْ كُلِّ هَذَا (15) .
توقيع : 15 "
هادشي بدا كايخلعني ، فالاول القهوة قلنا ممكن غي صدفة عاوتاني السبرديلة قلنا هادشي غي تبرهيش غادي يتقادا! و لكن باش يوصلني هادشي فوسط فطوري راه بزاف! و مايمكنش نعرف شكون دارها حيت المطعم ديال النادي كاينغل بالطباخين و السربايا و ديما مبدلين يعني صعيب بزاف نعرف شكون! هادشي ايلا جاني اصلا من وسط النادي و ماشي من شي بلاصة اخرى ، و مانقدرش نقولها لهم حيت غايحسبوها خطر عليا و نصدقو فالتحقيقات و لاكارط ناسيونال و الحالة و غانتقشع ، اللهم نسكت ! هادشي خاصني نحلو و نعرف فين غايديني كاع بالسلامة ، فطوري ماكملتو كاع ، بقيت كانقراها و نعاودها! على حساب ما فهمت شي حاجة كاين لي كايشوف فيها نظرة مادية و كاين لي كايشوفها بنظرة معنوية ، و لكن كيفاش المكان المناسب و الخطى و الفم و الاعين و السن و الياسمين و ماعرت اشنو! يالاه باقي كانقرا داكشي كانسمع الدقان ، قفزت من بلاصني و دغيا خبيت الورقة فجيبي ، اووف غير صلاح ، دري شهب و طوييل هههه كوايري واعر كانشوفو فالتدريبات شي حاجة مجهدة بزاف و كايقتل بنادم غي بالتواضع و هادي اكثر حاجة خلاتنا نوليو صحاب ، هو صاحبي الوحيد هنا وسط هاد الشلاهبية لخرين .
-انا : ( بارتباك) ااا صلاح! اشكادير هنا
-صلاح : يااك! انا لي حمار جاي نصبح عليك
-انا : ( كانضحك) ههههه كانضحك معاك! صبااح النوور يصبح عليك الخير و الربح
-هو : (ضربني لكتفي) ههه هاكاك
-انا : (تقصحت) ااااي ، هههه
-هو : اصاحبي واش نتا مصنوع من الحلوة دغيا كاتقصح! الصراحة جيت هنا نقتارح عليك واحد الاقتراح زوين و لكن حيت ماتصرفتيش معايا مزيان صافي بدلت قراري
-انا : وا صلاح راه غي كانضحك معاك واه!
-هو : ههههه يالاه انعطيك خمسة الدقايق لبس حوايجك و يالاه
-انا : (بفرحة) واااو فين غادييين ؟
-هو : ربعة الدقايق
-انا : (جريت للماريو ديالي) صافي صافي هاني هههه !
خرج كايتسناني فالزنقة ، انا دغيا لبست تيشورت مع سروال ديال السورفيط مع سبرديلة و دوزت يدي على شعري و خرجت ، حيت انا اول مرة نجي لهاد المدينة و من نهار جيت عمرني خرجت قرر باش يجيب بيا ضويرة! هادو هوما الصحاب و الا فلا ، جبنا ضويرة واعرة و نزلنا للبحر
-صلاح : صافي بلا ماتكعا عليا ، علاش ماباغيش اصاحبي مالك هاكا واه
-انا : (بملامح حزينة) وا ..، انا ، انا فالصراحة ، ماكانعرفش نعوم كانخاف بزااف من الماء فاش كنت صغير كنت غرقت فالبيسين و من تماك وليت كانخاف من الماء
-صلاح : ايوا قولها من الصباح كون بقيتي شوي كنت غانسلت ليك التيشوت و نلوحك فالما هههه
-انا : ناااري و تديرها هههه
-صلاح : هااهو! من قبيل و انا كانقلب عليه !
-انا : شكون هو!
-صلاح : (جرا) وا زيد زيد مابقيتش قادر نصبر
-انا : هاني كانتسناك هنا!
(بعد عدة دقائق)
-صلاح : (هاز فيديه ميكة) هانييي
-انا : (بتغوبيشة) فين مشيتي وخليتي هنا كانتسنا فيك
-صلاح : غاتنسا هاد الوقت لي تسنيتيني فيه و غاتحيد ديك التغوبيشة فاش غاتدوق شنو شريت
-انا : (كانطل على الميكة) شنو شنو
-صلاح : (جلس فالرملة) المحاااار
-انا : بنين ؟
-صلاح : بزاااااف !
رجعنا للنادي بالجرا من بعد ما كلينا المحار ، بنين بزااف ، النهار كلو داز فالتدريبات ضروني عظامي بزااف ، هاد الدراري لي هنا خلاوني نكره هاد النادي و ما يجي منو ، مافهمتش كيفاش الانسان يقدر يكون هاكا ، كايتسناو اي لحظة باش يضحكو عليا ولا يقمعوني و لا يجبدوني ، جابلاه صلاح مكوڤري عليا ، فقت فالصباح عضامي ضاريني و لكن نضت فطرت مع عباد الله ، اللهم والا نصدق فشي رسالة اخرى تاني و انا هاديك باقا ضاراني فراسي ، جلست فالطبلة مع دوك الشلاهبية و المدرب ، عاد جا صلاح ، قال صباح الخير و جا جلس حدايا ، كان اصلا كايقول ليا هادو كلهم لي هنا ماكانحملهمش نتا الوحيد ا ياسين لي لقيتك انسان مزيان فيهم .
-صلاح : صباح الخير عليكم ، (جلس حدايا و ضربني على كتفي) أ صباحو!
-انا : صبااحوو ، صافا
-صلاح : بنتي ليا مبوق ههه ياكما سهرتي الليل كاتقلب ياكما تلقا شي لؤلؤة وسط المحار ههههه
-انا : ههههه داكشي لي بقا ليا! (جمعت الضحكة و بقيت شحال ساكت) اشنو ! (نضت من الكرسي)
-انا : عافاك الله يخليك راه ضروري والله ما نتعطل ! نقدر كاع نتدرب مع الكروب ديال الليل! ؟
-هو : فهاد الحالة غايخصك تعاود معاهم التدريبات ديال البارح و اليوم
-انا : ماشي مشكل ماشي مشكل! نخرج ؟
-هو : اوكي
-صلاح : (جرني من يدي) شنو واقع! نجي معاك خاصاك شي مساعدة ولا ؟
-انا : لا لا والو باس ، غير جلس كمل فطورك شوي و نجي!
مشيت كانجري بالخف مابدلت لا حوايجي لا والو ، حتا سيور السبرديلة عقدتهم فالطريق ، الطريق كلها كاندعي الله ياااربي نلقاه! هزيت معايا ورقة اللغز و قصدتو! كيفاش ماعرفتوش من الاول! ساهلة بزاف! و لولا ديك الجملة لي قال ليا صلاح ماكنتش غانعرفو بهاد السهولة ، " يَنْظُرُ لَهُ البَعْضُ نَظْرَةَ ثَرَاءٍ ، اَمَّا البَعْضُ الاَخَرُ فَيَتَلَذَّذُونَ بِهِ " واضحة وضوح الشمس بلي هو المحاار! حيت كاين لي كايبغيه باش يقلب على اللؤلؤ و يدير لاباس ، و كاين لي كايبغيه باش ياكلو حيت بنين! خصني نلقا ضروري داك مول المحار حيت كيفما تذكر فاللغز "يُوجَدُ المَكَانُ المُنَاسِبُ بِجَانِبِه " يعني البلاصة لي كانقلب عليها راه حدا داك مول المحار! و لكن شنو كايعنيو بداكشي لاخر ديال فم و ماعرت شنو!
و اخييرا لقيتو! مشيت عندو بكل ارتباك و باش مانبينش ليه خديت من عندو شوية المحار كليتو و بديت كانهضر معاه!
-انا : تبارك الله على هاد الخير ، قالو ليا هاد المدينة عامرة بالياسمين
-هو : الياسمين ؟ انا بعدا اولدي عمرني شفت شي بلاصة فهاد المدينة فيها الياسمين من غير جردة الغول
انا سولت على الياسمين حيت هو الحاجة الوحيدة لي واضحة فداك الجزء الثاني ديال اللغز " اليَاسَمِينُ فِي كُلِّ مَكَانٍ " ، فعلا غير ضرت مع الدورة كايبانو ليا شي محيبقات عامرين بنبات الياسمين ، دابا فاش غاينفعني الياسمين ؟ غانجرب حضي و نشوف! قريت الجزء الاخر "وَ السَّبِيلُ إِلَيْهِ يَقْرَبُهُ بِسَبْعِ خُطَى فَحَسْبْ ، مِنْ جِهَةِ القَلْبِ " ، من جهة القلب باينة هي زعما اليسار حيت القلب مايل لليسار ، نجرب حظي و نشوف ، بالطمارة مشيت للجهة اليسرى و درت سبع خطوات بالحساب ، درت بحال ايلا طايحة ليا شي حاجة باش ما نعيقش و بديت كانحفر ، و لقيتو!!
لقيت صندوق !حاولت نحلو حاولت نهرسو واالو مابغاش ، صافي فقدت الامل و ماباقيش فهمت داكشي لاخر ، هزيت الصندوق لي لقيت معايا و رجعت للنادي ، كاتسناني الخدمة بزااف ، فرقتنا مقسمة على جوج فالتداريب ، كروب كايتدرب فالصباح و الاخر فالعشية ، دابا غانضطر نتدرب مع لخرين ، اووف ، مشيت لقيتهم يالاه بداو ، سمعت الهضرة من المدرب ولكن عندو الحق انا لي تعطلت ، من بعد ما سالا التدريب مشيت لخزانتي نهز فوطتي و حوايجي ، و الصندوق طبعا ! كانخمل فديك الخزانة والو مالقيتوش قلبي مشا يسكت ، شوي كانسمع شي صوت من ورايا.
-الصوت : كاتقلب على هادا
-انا : (ضرت) امين عطيني الصندوق
-امين : (هاز الصندوق فيدو و معليها) و ايلا ما بغيتش
-انا : (غوتت) ماعندكش لحق تقلب ليا فاغراضي الخاصة سمعتي!
-هو : (كايضحك) ربي ربي ؟
لاح الصندوق لواحد آخر و يالاه مشيت ناخدو من عند هاداك لاحو عاوتاني لامين و بقاو هاكاك و انا كلنحنقز من واحد لواحد ، شوي جا منقدي! لوا ليه يدو و خدا ليه الصندوق و عطاه ليا! شكون من غيرو! صلاح!
-صلاح : (كايمسح ليا دموعي) ترجل اصاحبي واه البكا لاش! نتا حساس بزااف و ضريف نتا من افضل الصحاب لي كانو عندي ، و لكن خصك ترجل شويا الله يهديك بلا ما تفقصني تانا
-انا : دابا انا اش غاندير بلا بيك
-صلاح : من نهار جيتي لهنا و انا كانشوف فيك خويا الصغير الله يرحمو ، حتا هو كان صغيور بحالك و بريئ ، داكشي علاش ماكنتش كانقدر نشوف شي واحد كايآذيك!
-انا : الله يرحمو ، باش مات
-صلاح : كسيدة ، مهم خلينا من هادشي ، انا قلت ليك هادشي باش تعرف معزتك عندي
-انا : مانقدر ندير والو ايلا ماكنتيش معايا!
-صلاح : (ضرب ليا على كتافي) غاتدير لي فجهدك و كثر ، باش تولي بحالي وحسن ، غاتقاتل معا ديلمهم و غاتوريهم نتا علاش قاد و بلي قدرتي تدخل لهاد النادي عن جذارة
-انا : (كانمسح دموعي) ولكن نتا الوحيد لي كنت معايا و لي ساندتيني نتا صاحبي الوحيد ، كيفاش غانقدر نتأقلم بوحدي معا هاد الشلاهبية بلا بيك و نتا عارفهم شحال كايسخرو مني و ماكايحملونيش
-هو : (شد ليا فراسي) ماكايحملوكش حيت ردو لبال بلي غايجي واحد النهار و غاتولي حسن منهم
-انا : صلاح عافاك ماتمشيش
-هو : مانقدرش ا ياسين! راني دابا قربت نحقق حلمي، حلمي كان هو انني نولي عضو فداك الفريق و اخيرا قبلوني ، عرفتي اللعابة ديالو شحال واعرين ، كيفما نتا كان حلمك نتظم لهاد الفريق انا داك الفريق هو كلشي بالنسبة ليا ، اصلا انا راه ماشي رسمي فهاد الفريق راه غي كنت مبرومپلاصي اللاعب الاصلي ، و حتا نتا شي نهار غايجي و غايوليو يتهافتو عليك المدربين و الفرق العالمية و هاني قلتها ليك!
-انا : (عنقتو)
-صلاح : (عنقني و شد ليا فكتافي) تهلا! انا كانتيق فيك!
-صلاح : (هز الصاكادو ديالو ،ضربني على كتافي و ضحك و مشا و هو كايدير باي باي)
مشيت لبيتي و البكية شاداني ، دابا صافي غدا غانفيق ماغانلقاش صلاح ، ودعوه و انا ماقدرش نبقا تماك معاهم حيت البكية شاداني و كانفكر شنو ممكن يكون فهاد الصندوق!
كايخص الانسان شوية الوقت و لكن فالنهاية كلشي كايتنسا! واخا غاتكون عندي شويا ديال تامارة و لكن تشجيعات صلاح واخا بعيد و عزيمتي غاتحطم كاع الحواجز ، دازت سيمانة على مغادرة صلاح ، اليوم فطرت بزربة ، هزيت الصاكادو ديالي و مشيت بزربة ، عندي لانطريمة ليوم ، وصلت شوية روطار و لكن المدرب طمر عليا ، ضروري من التسخينات قبل مانبداو ، القفز على الحواجز زوين ، كانسمع ياسين نوبتك ، حزمت سيوري ، خديت الوضعية ديالي و جريت ، دغيا غانحنقزو حيت الحاجز قصير اصلا ، جريت بكل ما فجهدي يالاه غانحنقزو و هو يعلا! جات التحنقيزة معا الحاجز ولا عالي ، كانحس بشي حاجة كاتحرقني فجبهتي ،
ماشعرت براسي حتا لقيت راسي فالسما ، ماتشاورش معايا هزني و انا كانغوت بحال المسلسلات! ضحك فيا كاع الفرمليات ، كركبني فالطوموبيل و وصلني للنادي ، انا ماهضرتش الطريق كلها جاتني اللقوة و الصدمة و البكية و كلشي تجمع فيا ! دغيا وصلنا
-هو : (حل الباب)
-انا : (غوتت) تقرب ليا نخلي داربوك
-هو : ياغاتنوض بخاطرك يا غانهزك تاني
-انا : شوهتيني مع الفرمليات دابا زيد شوهني مع اللاعبين ، صافي هاني نايض!
نزلت و وصلني حتال بيتي ، حليتو و دخلت ، شوي ماكاملة حتا ربع ساعة كانسمع الدقان .
-عصام : (دخل)
-انا : ماعرت فين داخل بالسلامة
-هو : (شاف فيا) واقيلا راني مامعشوقش فيك ا خويا! خلينا نديرو خدمتنا الله يرحم بيها الواليدين بلا نگير ، راني ماقاتلش راسي باش نجي عندك المدرب لي كايعطي الاوامر
-انا : ماكاين لاش بسلامة (دخت)
هزني بزربة حيت جسدي خفيف عكسو هو لي طويل و صحيح ، دخلني لبيتي ، كانو عضامي كلهم مدكدكين و الدوخة مابغاتش تفوتني ، كانهز راسي من المخدة و نعاود نفشل و ندوخ
-ياسين : (قاد ليا المخدة مع راسي) صافا شوية ؟ باقي دايخ ؟
-انا : (يالاه كانفيق) ضراتني كرشي
-هو : بسيف راك ماكليتي والو الليل هادا من قبيلا و نتا دايخ ، ياكما كاتحس براسك باقي ضارك بالطيحة
-انا : لا لا وليت شوية
-هو : (هز زلافة ديال الصوبة و قرب ليا المعيلقة) حل فمك
-انا : راه كانعرف ناكل بوحدي واقيلا واش انا دري صغير
-هو : (كايعيب فيا) حيت كانبغيك و كانموت عليك! وا باز بنادم مايديرش الخير ، ماعطاتنيش اخويا خاطري نخليك مريض بحال هاكدا و انا السباب ، انا لي غلطت و هزيت الحاجز و لكن بلا مانقصد والله مارديتش البال ، بغيت نطمأن بلي نتا بيخير باش ضميري يرتاح ، سمح ليا اخويا والله ماقصدت
-انا : (غوتت) خرج تق** عليا من بيتي مانزيدش نشوفك !
رجعني لكثر من الشهر فالزمن ، رجعني لاكثر الايام و الاحداث لي كانحاول ما امكن ننساها ، او بعبارة أخرى نتناساها حيت صعيب بزاف ننساها بهاد السهولة و فوقت قليل! تجننت بديت كانبكي و كانغوت من بعد ما خرج هو معصب و ردخ الباب ، هو والله حتا هو ، يا الدنيا الصغيرة بزاف يا زهري انا لي مكوز يا بجوج ، دابا من بين الفرق ديال المغرب ما كتاب نطيح انا وياه غي فنفس الفريق ! غانحماق غانتسطا ، لي بانت ليا كانضرب بيها ، حطيت راسي فوق المخدة و دموعي مابغاوش يحبسو ، ماقدرتش مانتفكرش داكشي كلو لي داز ، كانتفكر صفاء ، كانتفكر كيفاش صدفة تقدر تفرحك و اخرى تحطمك ، كيفاش كايتلاعب بينا القدر كيفما بغا بحال شي دمى خشبية و حنا ماعندناش القدرة على اننا نجابهوه ، داكشي علاش كانكتافيو بالرضا و الطاعة و الاستسلام ، كانفكر كيفاش بنت بريئة ساذجة تعرضات لقمة الاستغلال ، كيفاش باقين عايشين مع ناس بهاد السوء ، كانتفكر كيفاش كانت حياتها زوينة ، عادية و بسيطة ، و لكن كلشي كايتقلب بين عشية و ضحاها ، باقي ذاكرتي ماقدراتش تنسا داك النهار ، كانت خارجة بكسوة صيفية بالليل ، ماكانتش عارفة شنو مخبية ليها ديك الصدفة .
غايكون داز شهر على هادشي او كثر ، الكاس ديال القهوة لي كانت هازك فيديها طاح بكثرة الصدمة! خدا عقلها بزاف ديال الوقت ، مافهماتش دغيا و ماقتانعاتش دغيا ، ماقدراتش نقطع شكها باليقين واخا شافت فيه مزياان ، واخا دققات فكل تفاصيلو ، نفس العينين اللوزيتين ، نفس الفم نفس الشعر ، نفس الملامح ، كلشي واضح قدامها و باين ، جميع هادشي لي كاتشوف دابا بعينها ايلا كان كايدل على شي حاجة فهو كايدل على ان هاد الراجل لي قدامها هو ياسين ! دارت نفس الحاجة لي كانت غاديرها اي وحدة كانت فبلاصتها ، اي وحدة اول مرة كاتشوف الولد لي كاتبغي اون فاص ، غوتات غوتة وحدة "يااسيييين " جرات جرية وحدة حتال عندو و تلاحت عليه بتعنيقة حاارة و هي كاتضحك و كاتشوف فيه و تقيس ملامحو و كانها كاتشفي غليلها و كاتشبع ذاتها لي كانت كاتنتاظر هاد اللحظة هادي عام
-هو : (كايهضر بهدوء) الوانك المفضلة البنفسجي و الاسود ؟
-هي : (بسخرية) ههه باينة ، اصلا صاپغة شعري بهاد الالوان يعني ماشي شي حاجة كتاشفتيها من راسك (سبقاتو )
-هو : ( ضحك) مزيودة بين 20 يناير و 19 فبراير ، كايعجبك الورد الابيض كثر من الاحمر (وقفات فبلاصتها و دارت لعندو) ذكية ، ماعندكش مع بنادم بزاف و فنفس الوقت ماكاتكرهيش تكوني صداقات ، كاتخافي من الارتباط حيت كاتعطي اهمية للحرية ديالك و استقلاليتك بالدرجة الاولى ، عزيز عليك الفضي كثر من الذهبي ، كاتميلي للالوان الغامقة و الموسيقى الصاخبة ، حاستك السادسة هي التنبؤ يعني شحال من مرة طاحت ليك شي حاجة فبالك و وقعات بصح ، هادشي حتا هو ساهل يتعرف ؟
-هي : ( قاطعاتو) باش عرفتي هادشي كامل! شي حوايج من هادو ماعمرني قلتهم لشي حد!
-هو : ماشي ساهل تكون فلكي ، خصك بزاف ديال الوقت و الجهد
-هي: علاه نتا ماشي موسيقي ؟ فلكي ؟ زعما من دوك الناس لي كايكونو خبيرين فالابراج و داكشي ديال النجوم و الكواكب و داكشي ! عمرك قلتي ليا بلي عندك هاد الميول ، كنتي كاتميل للأدب كثر و كايعجبك الشعر!
-هو :الموسيقى مجرد هواية ، (بتاسم) عندك صعوبة فالتنفس فالاماكن العالية ، و مشاكل هرمونية ، و ماكاتآمنيش بشي حاجة سميتها الاعراف والتقاليد
-هي : ( مذهولة و مخرجة عينيها) زيد كمل ليا! اشنو مازال ؟
-هو : (ضحك) مممم ، اه! برج الحظ ديالك هو الفيروز ، الكواكب لي كايأثرو عليك هوما زحل و الاورانوس بينما عطارد ماكايتحكمش فيك نهائيا ، الابراج لي متوافقة معاك هي الجوزاء و الميزان و القوس
-هي: واااو ! كيفاش كادير تعرف هادشي كامل
-هو : ممكن تعتابريها سر المهنة ، حتا انا مثلا كون مشيت عند شي هاكر ماغاديش يقول ليا شنو كايدير
-هي: (كاتضحك) من نيتك! نتاجابد ليا سمية التيلي و شحال عندو فلارام و ايمتا تقادات و ماعرفت كاع اش داكشي راه نتا لي خصك تشرح للهاكر هههه
-هو : (ضحك) ههه انا و التيكنولوجيا ؟ مايمكنش انا حتا البيسي و ماكانعرف ليه مزيان ، كانركز على الطبيعة و الهدوء فكلشي! التكنولوجيا ماكاتسوا عندي والو ؟
-هي : (باستو فحنكو) انا ماهامني تاواحد ، فرحانة بزاف (حلات باب الدار و هي كادير ليه باي باي)
فرحانة ، طبيعي تكون فرحانة ، انك تشوف الانسان لي تعرفتي عليه غير عن طريق مواقع التواصل الاجتماعي و كنتي على علاقة معاه لمدة عام و عمرك شفتيه حيت بعاد بزااف ، و من بعد يجي واحد النهار و تشوفو ، طبعا غاتفرح ، غاتفرح بزاف و غاتمنا هاد الفرحة عمرها تسالي ، اسابيع كثيرة دازو و هي كل مرة كاتزيد تتعرف على حبيبها كثر ، كاتتناسا غرابتو و ارتباكو الكثير! كاتناسا غموضو و مزاجو المتقلب و تناقضو الدائم ، و كاتشوف فيه غير شوفة زوينة ، من بعد تزوجو و كايعيشو فسلام و حب و مشات خبيرتي من واد لواد ، هادشي كايكون غي فالمسلسلات ، اما الواقع حاجة أخرى ، فالواقع عمرنا ماغانكونو عايشين على هاد النحو ، و حتا صفاء ، غاتعرف بلي كاع داكشي لي كانت ناسجاه فخيالها مجرد خيال
((بعد مرور اسبوعين))
-صفاء : (حادرا راسها) ايلا كنتي مدرك اسيدي راه المكتبة هادي ، قرا فخاطرك الله يخليك راك كاتشوش عليا راه حتا انا كانقرا واقيلا (هزات راسها) سملرحمرحيم! اشنو كادير هنا !؟
-صفاء : كيفاش ؟ (كاتغوت) نزلني حسن ليك اش هاد الشوهة واا نزلني راه غانطيح
-ياسين : ( هازها و خرج من المكتبة) نتي لي ماباغاش تهضري
-صفاء : (كاتغوت) صافي صافي عافاك نزلني راه شوهتيني صافييي
-ياسين : (نزلها من كتافو) صفاء انا عارفك مقلقة مني بزاف ، انا كذبت عليك و لكن نتي ماعرافاش علاش ، كنت باغي انا نقولها من اللول و لكن (حط يديه على قلبو) شي حاجة فالداخل ديالي منعاتني
-صفاء : انا عارفا اشنو هي ديك الحاجة !
-ياسين : (بتاسم) بصح! زعما! فهمتيني ، عرفتك غاتفهميني والله
-صفاء : اه طبعا غانفهمك ، انا عارفا شنو هي هاديك الحاجة لي فالداخل ديالك و لي منعاتك
-ياسين: ( بتاسم ابتسامة عريضة) شنو هي ههه
-صفاء : (غوتات) هاديك قلة التربية و قلة الايمان و قلة الضمير
-ياسين : اووووف! صفاء! شوفي لي قلتيها ليا عندك فيها الحق ، و لكن انا فالاخير عتارفت ليك ، قلت ليك كلشي حيت ماقدرتش مازال نكذب اصلا دغيا غانتفضح
-صفاء : خليني عافاك
-ياسين : صفاء ماتصوريش شحال كنتي فرحانة داك النهار ، جيتي عندي و كاتقولي ليا ياسين و انا وياك مصاحبين و كانبغيك و كذا ، و كنتي فرحانة بزاااف ، تصوري غانجي و نقول ليك لا اختي انا ماكانعرفكش و عمرني شفتك ، هاداك معا من مصاحبة راه غي فوكونط خدا تصاوري و سميتي و معلوماتي و دار فايسبوك بيهم و بدا طالقها عليك عام و نتي بكل سذاجة متيقاه و على نيتك! كيفاش غاتحسي! كاع ديك الفرحة لي كانت فيك غاتمشي ، راه ليهودي و مايقدرش يشوفك فرحانة بحال هاكاك و كاتضحكي و عينيك كايلمعو و يجي ينكدها عليك ، وجهك الجميل لم يخلق سوى للابتسام
-صفاء : (كاتبكي) باراكا من التعناب قهرتيني صافي خليني
-ياسين : صفاء!
-صفاء : (غوتات و مشات) وا الله يصفيها منك!
-ياسين : (شدها) ماعمرك ما تساءلتي علاش كثر من جوج سيمانات كانتلاقاو يوميا و ماقدرتش نقول ليك الحقيقة و اظطريت نكذب ؟ علاش قلت ليك بلوكي النمرة لقديمة و هاكي نمرتي الجديدة واخا هي فالحقيقة راه نمرتو هو! حيت بغيتك ليا! حيت ماكرهتش بصح نكون انا هو داك ياسين لي كاتبغيه ، حيت حسدتو! حيت كنت كانحاول نولي بصح هو ، واخا نفس وجهي و لكن ماكنتش انا ، اه قولي عليا كذاب قولي عليا استغلالي ، حيت فقانون العشق كلشي مباح
-صفاء : (كاتشوف فيه)
-ياسين : عطيني فرصة ، راني معجب بيك بزاف ، عطيني فرصة نكون انا بصح هو داك ياسين لي راسماه فخيالك و حسن ، تيقي بيا هاد المرة و عمرني نخذلك! ...
يعتمد تصديق الوعود على من وعد ، فان كان اهلا للثقة صدق ، و ان لم يكن كذلك ترك بسلام ، لكن في قانون العشق كل شيء مباح ، واخا يشبع فيك الانسان لي كاتبغي تجرجير مجرد نظرة اعتذار منو تذيب الثلج لي بينك و بينو! كاتخليك تيق فيه لسبب وحيد ، حيت كاتبغيه ، كاتولي تآمن بالفرص و كاتعقد أمل كبيير ، كاتنسا كلشي فسبيل من تحبه ، و كذلك صفاء ، سقطت في دوامة الحب ،فلم يسعها حل سوى الاستسلام لمن تحب ، و لكن كلنا كانتبدلو ، و ممكن تكون هاد الصدفة و هادشي كلو مجرد طريق باش فالاخير تكتاشف حبها الحقيقي ، داز شهر على صفحتهم البيضاء الجديدة ، و ماندماتش ، بلعكس فرحات حيت لقات بلي هو يستاحق هاديك الفرصة لي عطاتو ، و من بعد هاتف مباغت كاتسلت كيف العادة من الشرجم
-صفاء : (هازا سباطها فيديها و كاطل من الشرجم ) هاك شد هادا
-ياسين : (من الاسفل ) واخا لوحي (شدو)
-صفاء : ( نازلة مع البالكون) شدني شدني عنداك لا نطيح
-هي : فين غاديين ؟ خلعتيني مضور ليا مع النص ديال الليل يالاه تقادي راه خارجين
-هو : ايوا غي يالاه و غاتعرفي
-هي : ( عنقاتو) نمشيو فينما حبيتي هههه
(بعد مرور ثلاث ساعات)
-هي: (مشادين و راجعين) ههههه وا انا بغيتك تشوف هاادي (كاتوريه فالتيليفون) شوف شحال كاتبان بريئ و زوين بزاف والله ، كنتي ساااهي و صورتك على غفلك عمرني شفت شي حد يقدر يسهى فوسط بواط هههه الدنيا محيحة و نتا ساهي
-هو : (كايضحك) ولكن راه حيحت مزيااان
-هي: ( كاتضحك) و انا اش نقول ههه راه سلخت جلدي فراسك سنين هادي عمرني ستمتعت بحال هاكدا والله
-هو : فرحت بزاف حيت فرحتي!
-هي: اصلا انا فرحانة بزاف واخا نجلس انا وياك غي باب الدار و ناكلو الزريعة (شداتلو فيدو) انا كانبغيك بزاف و ماعمرني فكرت فالفلوس و داكشي ، واخا تقول راني كانبغي داك ياسين لي كنت كانهضر معاه و لكن فيها خير ، هو اصلا تمحا ليه الاثر ، و انا بلا مانشعر لقيت راسي معاك ، فرحت بزاف حيت تلاقينا ، واخا صدفة و لكن تصور ، فراسك شحال عام ا ياسين و انا كانحلم بهاد اللحظة ، كانت بالنسبة ليا مستحيلة ، فبلاصة مانزومي على تصاورك باش ندقق فملامحك سنين هادي ، واخا ماشي نتا و لكن اليوم تعطاتني فرصة نشوفك بكل وضوح ، (حطات يدها على وجهو) نقيس وجهك بيدي ، نقيس رموشك ، شنايفك ، خدودك ، لحيتك ، دابا نقدر ندوز يدي على شعرك ، (شدات ليه يدو) انا كنت كانحلم كل نهار نشوفك ، نعنقك و نشم ريحتك ، (عنقها) انا ماباغاش كثر من هاكا
-هو : صفاء ، ماتصوريش شحال كانفرح فاش كانعرف بلي باقي بنات بحالك ، نتي بنت الناس ، زوينة قلبا و قالبا ، واخا ماكاملة حتا شهر باش عرفتك و لكن والله حتا حسيت راسي بحال ايلا كنت كانعرفك هادي سنين
-هي : (ضحكات) حتا انا يا بوقال هههه
-هو : (شد ليها فيديها) صفاء ، بغيت نقول ليك واحد الحاجة
-هو : ماكرهتش ، و لكن مايمكنش ليا نزيد نتفلا عليك ابنت الناس
-هي : (كاتضحك) كيفاش ؟
-هو : (شد ليها فيديها) اول مرة شفتك كانت هادي شهر تقريبا ياك
-هي : (كاتضحك) ههه تانا
-هو : عارف ، و لكن انا كانت هاديك اول مرة كانشوفك و كانعرفك
-هي: عارفا اياسين
-هو : ( شد راسو و تنهد) خليني نشرح ليك عافاك ، ماعارفش كيفاش غانشرح ليك اووف ،كلشي داز بالزربة ماعرفت ماندير ، كنت دايز بالليل باغي نشم شوية ديال الهوا النقي فهاد المدينة ، دزتي من حدايا ، بقيتي كاتشوفي فيا و تعجبت ، مالقيت ماندير من غير انني حتا انا نشوف فيك بحال اي راجل كان غايكون بلاصتي ، شوية جيتي عندي كاتجري و عنقتيني ، كلشي داز بالزربة والله ماعرفتش شنو غاندير .
-هي: (جرات يديها) ياسيين!
-هو : صفاء جيتي فجأة عنقتيني ، شوية بستيني و انا مالقيت ماندير من غير انني نتجاوب معاك واخا ماكانعرفكش ، كنتي فرحانة بزاف ، انا راجل و اي راجل كان بلاصتي كان غايدير نفس الحاجة ، عرفت انه كاين شي سوء تفاهم و لكن ماقدرت نقول والو ، عشت اللحظة ، قلتي ليا نتا ياسين فلان فلاني و كدا مالقيتش مانقول من غير وي انا هو ، شوي فهمت انك اون كوبل معايا هادي عام فمواقع التواصل الاجتماعي و هادي اول مرة نتلاقاو غي صدفة حيت حنا ساكنين بعاد على بعضنا ، لقيت راسي كانكذب و مشيت معاك فالخط ، ماشي لخاطري ا صفاء والله ، فاش فقت براسي لقيت الامور خارجات عن السيطرة ماقدرتش نصارحك و نقول ليك راه كاين شي سوء تفاهم خفت نجرحك و فنفس الوقت ماسخيتش بيك
-هي : ياسين الله يهديك راك فايت معاود ليا هادشي! واش نسيتي ولا شنو ، راه هادي شحال و حنا مع بعضياتنا من مور ماهضرنا فهادشي ، ياك هاداك كان فوكونط ، خدا تصاورك و معلوماتك و دخل بسميتك و معلوماتك ،قلتي لي بلي من بعد لقيتي راسك معجب بيا ، و انا سامحتك و قررنا نبداو صفحة جديدة اشنو الجديد
-هو : صفاء هاداك ماشي فوكونط ، هاداك كونط حقيقي ، و لكن ماشي انا هاداك
-هي: ( الدموع فعينيها) و لكن! نتا هو! نتا هو والله (كاتبكي) نفس العينين نفس الملامح نفس الفصالة نفس كلشي ، (جبدات التيليفوني كاتوريه تصاورو) هاه شوف هاد التصاور لي كنتي لايح فالواتساب و الفايسبوك ، و لي كاتصيفط ليا ، راه نتا هادا شوف
-هو : (قاطعها) ماشي انا ا صفاء ، كذبت عليك ، قلت ليك بلي هاداك فوكونط ، اقسم بالله ما انا! من بعد بدلت سميتي فالفايسبوك باش نرجعها هي سمية هاداك معا من كاتهضري ، كلشي كذوب فكذوب ، انا ماشي هاداك ياسين واخا كانتشابهو بزاف ، ماعرفتش كيفاش غانشرح ليك! انا ماسميتيش ياسين اصلا والله العظيم!
-هي : و لكن! ولكن راه شبه كبير بينك و بينو مايمكنش راه نتا هاداك
-هو : (حيد يديا من يديه) مانقدرش نشرح ليك كثر! انا وياك مايمكنش نكونو مع بعضياتنا مستحييل ! ماكرهتش! ماشي لخاطري ، مانقدرش نزيد نكذب عليك سمحي ليا! علاقتي معاك غاتسبب ليك غي المشاكل و غاتشوفي شي حوايج عمرك شفتيهم والا عرفتيهم ! نتي بنت الناس و ماشي ديالت هادشي ! ماشي لخاطري حتا انا ماكرهتش و لكن مانقدرش! مستحيل ، عارفك مافاهما والو و انا مانقدرش نزيد نشرح ليك حيت اصلا ماغاتفهميش ، مايمكنش شي حد يفهم هادشي معقد بزاف! سمحي ليا بزاف ! سمحي ليا!
خلاها مسمرة فبلاصتها ، مشا بكل بساطة ، غادر على مرآى من عيونها و هي محطمة ، مامتيقاش! كلكم كاتقولو دابا بلي انا هو ياسين ، و لكن لا ، انا ماشي ياسين ، ماشي ياسين لي كاتعرفو ، انا ياسين واحد آخر ، مشاركين غير فالاسم ، انا ياسين جديد تبنا على انقاض صفاء ، و صفاء ؟ شكون هي هاد صفاء ؟ بكل بساطة ، هي انا!
قصة خمسطاش
محتوى القصة
التنقل بين الأجزاء