قطعات سارة تيلي مع هدى وجلسات فالبالكون ساهية كتفكر والنعاس طار ، بقات شادة تيلي كدخل وتخرج فالكروبات وليباج وسناب شات وفكل مرة تشوف شي كوبل من صحتباتها مصورين كتفقض وبالاخص فاش كتشوف شي واحد بايس شي وحدة وشاد السيلفي بيدوكتزيد تمرض ، لقات راسها داخلة لكروب مخلط بنات و اولاد مجموعين فيه غير البنات الكبار من العاءلات الغنية والاولاد كبار وهي تعجب
سارة: ااه ...هاد الكروب هوا اللي كنت سيفت ليهم دعوة هادي شهر عاد قبلوني ! اممم.
بقات طالعة نازلة فالكروب كتشوفهم خارجين ومصورين مجموعين وضاحكين مرة فالغابة مرة فبواط مرة لابسين تكاشط والدراري بالكوستيمات فحفلة دليرينها راسهم مرة مسافرين للخاريخ ، تحلو عينيها وبقات كتشوف مبتاسمة وفرحانة للعيشة اللي عايشينها ، لقات الكروب فيه 48 عضو فقط ومازعماتش تكتب شي حاجة وتلوحها ليهم كونها باقة جديدة وهما باينين كيعرفو بعضياتهم حق المعرفة ودارو كروب خاص بيهم يضحكو فيه ومغاديش يعرفوها هيا او يمكن يحرجوها بشي تعليق ، تكمشات وبدات كتكتاشف كل عضو فداك الكروب السري ، بدات كدخل لكل واحد للبروفايل ديالو وكتشوف ولاد من وشكون والى اشمن عاءلة كينتميو لقات كل واحد عندو مكانة كبيرة فالمجتمع منهم اولاد الوزراء اللي كانت تسمع غير بكنيتهم ومنهم بنات سيايسيين كبار خارج الوطن وداخل الوطن ، دارت على جميع الاعضاء واحد بواحد تا عيات وناضت لبيتها لقات سمير ناعس وتلاحت حداه نعسات
تلاحت سارة على هدى كتبكي عليها ودخلاتها لدار جلساتخا وعطاتها كاس دالماء تا بردات عاد بدات تهضر
سارة : كتنهج) يا ختي ولد الحرام كيكذب ليا...غدرني ولد الحرام. الز*** جيت دابا منعندو ...لقيت بنت خالتو خارجة من عندو من الدار كتسلت كي الشفار ، طلعت لقيتو فالدار وانا عند بالي راه فالخدمة ...اوييييلي حيي على الكلب باش بدلني
هدى: اويلي سمييير!!!! لالا متقوليهاااش
سارة: بعيييييني شفتهم ...بعييييني مقالها ليا تا واحد
هدى: كوراه غير جات على شي حاجة ...سمير معندوش علاش يخونك وفين سلقى حسن منك
هدى: شوووو متبينيش ليه ...هضري عااادي حتى نفكرو شنو نديرو ، راه الشوهة الكبيرة هي فاش تفضح القضية واها يتفضح هوا راه كتفضحي تا نتي ..اه حقى سارة خانها راجلها ، ونتي عارفة كل وحدة كتهتر براجلها ...انا راجلي دار انا راجلي انا راجلي ومل وحدة مطلعة الشان راسها ومترضاش شي حد يهضر فيها ، هضري دتبا عادي ومتبكيش
فتحات سارة الخط وهدى فدامها كتهضر بالاشارات كتاكلميها وتقوليها شنو تقول
سارة: نقطع يدي الى مكان كيخوني ...ولاد الكلاب تا كيشوفو راسهم مزبلينها عاد كيبداو يرطبو؟ هاي هاااااي هه ! حبيبة قالك ، كيحيد التهمة على راسو ويبين ليا البراءة الكلب لا خور ...شتي يا هدى كم هضر معايا عادي ومنفخ كنت نقدر نقول مكيخونش ولاكن دابا اهووووووي ميحيدهاااش ليا الطبيب ، ماديرش متخافش ، كن مادار والو غيهضر بكل تقة فالنفس ولاكن دابا شك فيا شكيت فيك وخدام يصبغني باش يحيد ليا الشك ،
كيخوووووني ولد الحرااام متقووولوووش ليا ، وديك صباح الكلبة دبنت خالتو بلاااتي عليها المشكودرة لخرى الى مندمتعا على حياتها ماشي انا هي سارة
هدى: وهيااا ناااري ياخيي غا بشوية مالكي على هاد الحالة ، بردي راه ميمكنش تا خدي قرار وطبقيه ونتي فهاد الحالة
سارة: وماشي بعيد تكون مو وخواتاتو متافقين عليا باغيين يلبقو ليه صباح باش يكركبوني انا ، وانا اللي دايرة ليه الخاطر ونشري فالكادويات وفعيد الميلاد نصاوب فالحلوة والدجاج محمر ونقاد ليه ونزوق ليه ونسيفط ليه فالميساجات وهوا طلع للسماء ، المكلخ لاخور يحساب ليه منو نخلاق والله كن ما الشوهة حتى نرجع لدارنا وخلي والديه...بففف ولاكن فيين غنرجع فيين وانا كرشي سابقاني خخختفوو
هدى: بردي دابا وتكاي شوية رتاحي تا تبردي ونشوفو شنو نديرو ولا قوليها لداركم
سارة: لا ياختي غادي نمرضهوم ويباتو بلا نعاس كيفكرو ليا وهازين الهم ونحيد ليهم الضحك ونخليهم مغبونين ، لالا منقولش تا نشوف شنو ندير
جلسات سارة تبكي وتشكي على هدى تا بردات وناضت رجعات لدار باها وجها صفر ودخلات نيشان لبيت ختها نعسات ، فكل مرة كيعيط ليها سمير كتهضر معاه ببرودة وحتى النكير مابقاتش كتنكر ، ولات غير كتساوي وهوا مبررد السوق وداير ليها الخاطر تا داز الشهر على نفس الحال وعمر سارة رجعات لدارها طلات ، شهر كامل وهي مهدودة وعينيها منفوخسن بالكى ديال كل ليلة ومن غير صاحبتها هدى اللي ديما على اتصال معاها كيهضرو من غيرها مكتهضر مع تا واحد وكلشي كيفول الحمل اللي رجعها هاكاك مسهوتة .
سمير: ماشي دابا من بعد ...غنطفي هاد النمرة بلا متسيفطي مسج فيها ونصدقو فالمشاكل ، فاش نبغي نهضر معاك غنعيط ليك انا وماتبقايش تشوفي فيا كل مرة راك عيقتي
صباح: وانتا اللي كتديهاش فيا بحال الى انا مكيناش
سمير: واش بغيتي نعنقك ونبوسك قدامهم ولاشنو ، واش نسيتي بلي مزوج ؟ حتى نكونو بوحدنا ماشي قدام كلشي ، نسايني دابا من بعد ونهضرو
خرج بزربة خلاها فالطوايط ورجع لقى شارة ولدات وكلشي فرحان ودخل عندها كيضحك وقف حداها
سمير: على سلامة
سارة: لا رد
سدات عينيها وغطسات فالنعاس وهز هوا البيبي فيدو
الفرملية: عندك بنيتة مبروك عليكم
سمير: الله يبارك فيك اختي شكرا.
شد بنتو فيدو والعاءلة كاملة فرحانة من غير صباح اللي واقفة كتفيبري فبلاصتها وتشوف فيه بنص عين فرحان وكتسناه يشوف فيها مقلقة .
دوزو النهار كامل فالكلينيك معاها تا فاقت وعطاوها بنتها فيديها ترضعه ا لقات سمير حداها وبنت خالتو واقفة فالقنت طالعة ليها عيشة قنديشة ، تقدمات صباح كضحك ضحكة صفرى باركات لسارة وسارة بادراتها نفس الضحكة الصفرة وكتشوف بنص عين فشمير وبنص عين فصباح كتشنى تشوف شي ردة فعل ماشي هي هاديك ، بان ليها شمير مرتابك ماقادرش يبقا معاهم بجوج فنفس البلاصة وناض كيضحك بزز وكيتلف تا خرج وخرجات تبعاتو صباح بلا متعيق قدام الحضور ، ولاكن عادشي ماخفاش على سارة اللي غرغرو عينيها وشافت فبنتها ودمعات عليها وتقجات تا بدات كتنفس بزز ، بقات صابرة وكاتمة احاسيسها حتى تفرقات العاءلة وبقات مقابلاها غير مها عاد دخلات هدى بالجلابة فالحمر والبلغة حمراء وبوكي دفلوغ كضحك فرحانة
هدى: ويينووو على صاحبتي ولات ام ههه
عنقاتها و سارة غير شافت هدى خشات وجها فعنقها وعطاتها للبكى ويديها كيترعدو والسيروم بليباري مركبين فعروق يديها
الام: ماتبكيش ابنتي راه كولنا وقع لينا هاكا فاش ولدنا...الله يسمح لينا من حق الواليدين وخلاص ، هانا برى يضربني البرد وهانتي مع صاحبتك شبعي منها وتشبع منك
هدى: لهلى يخطيك اخالتي
خرجات ام سارة وخلاتهم لاسقين على بعضياتهم وحدة تبكي ولخرى تحزر فيها
سارة: بالبكى) خرج وتبعاتو ومهليني انا هنا العشية كاملة متبان فيهم تا واحد ، راه دابا معاها وانا اللي مرتو والدة ليه سامح فيا وحتى بوسة مخسرها عليا ، دخل قالي على السلامة وجلس بحال الى تقولي انا مرت باه ، مالي انا اش ناقصني كلشي فيا علاش لدلني بيها اهىءاهىءاهىء كن غير كانت حسن مني والله مايبقى فيا الحال ، كيبقى فيا الحال فاش كيبداو يتبسلو عليا الرجال والدراري منين ما دزت وكيسمعوني داكشي اللي معمر سمير سمعو ليا ، وكن غير يكذب عليا ويصبغني بحبيبة و كبيدة ميبقاش فيا الحال نقول راه بعدا كيقول ليا وبحالي بحال كاع هادوك اللي كيسمعوهوم رجالاتهم هضرة زوينة و ماعرفينها واش بصح ولا مذوب مهم ميطلعو ليهم المعنويات
جلسات تبكي تاعيات وبرداتها بجغمة دالماء وودعاتها صاحبتها ومشات ، دوزات فالكلينيك 3 ايام نفس الروتين والتعامل ديال سمير معاها تا خرجات من الكلينيك ورجعات لدارها شدات الفراش كترضع بنتها ، سمير من الخدمة للدار وشي مرات كيغبر وحتى سارة مبقاتش كتسولو فين مشيتي ولا فين جيتي حيت جواب الاسءلة ديالها عارفاه وممحتاجاش تسولو ، زيادةً على هادشي بنتها مابقاتش كتخلي ليها الوقت فين تحرك و ولات مشغولة مع بنتها تا وصل النهار دالسبوع وعمرات ليها الدار بعاءلت راجلها وعاءلتها .
وصلات لباب صالون الحلاقة كتبكي وشادة كرشها ولابسة بيجامة بباتجوفتها كيوت ودايرة ويف حياتي على راسها تلاقات مع الكوافورة خارجة شافتها بقات مصدومة
وهما كيهضرو دخلات وحدة طويلة لابسة الكلاص سروال سليم لاسق ولودي لاسق دتيرة عليه فيست فاقهوي وصباط عالي فالقهوي وهازة ساك فالموطارد وجامعة شعرها فازك بقراصة ناوية تصايبو ، جلسات حداهم كتسمع لسارة اللي قلبها طايب كتخوي وماهمها لا شكون سمع لا شكون شاف ، تدخلات البينت مللي سمعاتهم كيهضرو على الخيانة وشافت سارة كتبكي والكوافورة كتصايب ليها شعرها
البنت: سمحي ليا اختي نتدخل...نقوليك واحد الحاجة ، راه ماشي نتي اللولة ولا اللخرة ، انا براسي راجلي زهواني وعاطيها للزهو والنشاط ومابقيتش كاع كنبان ليه انا ، كنت بحالك وكنت غنتسطى فاللخر شفت تاعييت وانا نخلي الزبل يدير مابغا وخرجت قلبت على خدمة وتهنيت وتعرفت على ناس فشكل بديت علد كنعيش بحالي بحال الناس
دترت عندها سارة مطلعة حاجبها
سارة: عندك شي ولاد؟
البنت: غندي ولد وبنت ...داكشي باش كنقوليك الواحد صابر على ولادو والمجتمع مكيرحمش
سارة: فاش خدمتي؟
البنت: ايوا خدمت فسونطر دابيل ، هادا هو الحل اللي لقيت ، ولقيت ناس نقيين كتلفو فالخدمة ونضحكو ونشطو انا لا بقيتي حاطة فراسك فا الراجل بوحدو بحال الى هوا الحياة راك غتسطاي
سارة: وايييه ياختي تا انا بغيت نخدم مكرهتش وليت بحال الحمقة دوقني المرار الكلب لاخر ، تا انا مكرهتش شي بوسط كيما كان نتخشى فيه فالسونطر دابيل ونتلف حتى انا شوية والله ، واخا زعما معنديش فالصراحة شي فرووونسي واعرة ولاكن نزطط راسي ، كنقب شوية من الفرونسي وصافي
البنت: وراه كاين اللي مكيعرف يكتب تا سميتو تا نتي وخدام كيشد 70 حتى ل 100 الف فالشهر ، راه كيعطيوك واحد الورقة حفضيها هي اللي كتبداي تعرضيها على الناس فالتيليفون بلا متبقاي تشدي وتجبدي معاهم فالهضرة الى بغاو يشري كيشريو الى مابغاوش كيقولك لا والصلاة على النبي .
سارة: بصح !! ياختي والله مكرهت يعطيوني غير 40 فالشهر ونجلس ليهم تما منرجعش للدار..شنو سميتك بعدا؟
البنت: سميتي سكينة انا راه كبر منك يمكن
سارة: انا عندي 20 ونتي؟
سكينة: 25 ...قلت ليك كبر منك. راه هادشي دااابا تولفيه ويوليو يبانو ليك غير ولتدك ماتبقايش مسوقة للراجل
سارة: بغيتي الصراحة ؟ انا كرهت ديلمو مللي شفت دوقو العوج وعلامن طاح على بنت خالتو المعوقة ، غير نخدم والله منعقل على مو راك مزال مكتعرفينيش انا الى حطيت الحاجة فراسي
سكينة: مهم هانتي قيدي نمرتي ولا عطيني نمرتك وفاش تبغي تخدمي نشوف ليك فالسونطر دابيل اللي خدامة فيه انا
شارة: اينا واحد خدامة فيه؟
سكيتة: ستيل اللي فأكدال (الرباط)
سارة: الله على راحة ...اكدال حسن لواحد يخدم ويتسارة
سكينة: وفيه الناس نقيين وكلاص والله تا فوجي حسن من الجلسة فالدار ، واخا طخونسبور من حي النهضة لاكدال يوميا ولاكن مكيهمش
سارة: تا انا شاكنة هنا فحي النهضة هههه نمشي ونجي انا وياك نتوانسو
جلسات كتصايب وكيتجمعو فنفس الوقت تا سالات وصبغات يديها ورجليها وقادات الحجبان والشعر وعطات سدرها للكوافورة
سارة: جبدي واحد 200 درهم ها هي فين مخشية الى جبدتها غتجلخ ليا الصباغة ، هااه! هادو فلوس الزرورة اما العوج كاع ممسالي باش يعرف اش ناقصني يعطيه النقص والضعف الجنسي
الكوافورة: هههه مسخوطة نتي
سارة: وراني مسخوطة نيت اللي تلاقيت بمسخوط بحالي
قطعات الكوافورة فلوسها ورجعات ليه صرفها وناضت سلمات على سكينة
سارة: بالصحة والراحة احبيبة ها نمرتي عندك وانا غير يدوز هادشي ونوقف على رجلي غادي نجي نخدم
سكينة: الله يسهل الامور احبيبة ، انا نسيفط ليك مسج فالواتساب ونرة مرة نتكونيكطاو
سارة: انشاء الله بسلامة عليكم
خرجات دربات الدورة طلعات للعمارة لقات سمير طالع نازل كيتسنى فيها، شافت وهي تعقد حجبانها
سارة: الناااس النااس الناااس ، وشكوم داها فيك الناس كل واحد وهمو ، واللع ومابعدتي مني هاد الساعة تا نديرو شي فضيحة قدام الناس اللي نتا مخلوع منهم
طلعات وخلاتو واقف ومشات دازت حدا بنت خالتها لقاتها لابسة تكشيطة فالزرق والاصفر وهي تعوج سيفتها
سارة: شهاد اللوان؟ مالقيتي متلبسي ...لا ولاكن نتوما عزيز عليكم اللوان لا رجالكم لاولادكم وماعندكمش مع لون واحد كتبغيو تنوعو
حشات ليها الهضرة ودخلات لبيتها مخرجاتش دوزو السبوع وهوا كيضحك مع بنت خالتو وخوتاتو ويشطح معاهم وسارة فبيتها جالسة كتشوف فيه من الباب عاجبو الحال ، متسوقاتش ليه وخلاتو حتى تأكد انها مابقاتش تشك فيك بصفة نهاءية ورتاح من جيهتها ورجع للاهمال ولا مبالات كالعادة.
⬅⬅⬅اربع شهور وهما على نفس الحال والصدع والمشاكيل مكيتقاداوش بسبب اهمالو ليها وحتى هيا هملات راسها فهاد المدة ، كتبات سهرانة مع البنت وتقيل مقابلاها وشعرها متبقاتش تصايبو ولات مقابلة الدار والتربية تا لواحد النهار.
جلسات تسنى فيه تا ضلام الحال عاد دخل لقاها جالسة جامعة شعرها بمقبط ولابسة عادي وبنتها ناعسة ، دخل شافها جالسة وطلع حاجبو ودخل بدل حوايجو ورجع للكوزينة لقى العشاء طايب ، حطو راسو وبداو يتعشاو فصمت تا نطقات ...
سارة: غنخدم
سمير: لا رد
سارة: راتي قلت ليك باغا نخدم
سمير: لا رد
سارة: واش صمك؟ مكتسمعش؟
سمير: كنسمع
سارة: اوا راه باغا نخدم
سمير: شكتخربقي ؟؟ اشمن خدمة ونتي والدة وديك البنت شكون يربيها؟ بقات لينا غير الخدمة تاهيا
سارة: بعصبية) غنخدم هي نخدم عجبو الحال مرحبا معجبكش اللي عجبك ديرو
سمير: دابا شنو ناقصك؟ ياك واملة شاربة وكلشي عندك على كتقلبي على الخدمة
سارة: بعصبية: ماعندي وااااالوو مكنكساب مكنعلام ...داكشي ديالك زيدو فراسك راه حتى عند با كنت واكلة شاربة وبيييخير حسن من هنا بالف مرة ، ياكما لقيتيني فالزنقة كنسعى ولا عريانة وسترتيني ودرتي فيا خير؟ راك اسي جبتي من دار با بعزي وشاني وبحوايجي و بكرشي عامرة ماكلة وجيت شبعانة ممحتاجاش نامل عندك سمعتي والخدمة غنخدم واللي بغيتي ديرو ديرو ، عجبك هوا هاداك ..ماعجبكش هي هاديك
سمير: نعلي الشيطان دابا ... علاش غتخدمي وشغديري بشي خدمة
سارة: بغييت ..بغيت نخدم
سمير: بعصبية) شتي انا هاد الصدع والهضرة مكتنفعش معاك...سيري قولي لباك باغا تخدمي وديك الساعة الى خلاك نخليك تا انا
سارة: حيت عارف با ميخلينيش وباغي تشدني من اليد اللي كدرني
سارة: لله لله واش انا غنخدم هنا !! الى جا خضر معايا شي حد بالفرونصي نخرى ليه فيها (جمعات النفس) اففف ...اللي ليها ليها اصلا حتى واحد معندو الفرونسي المجهدة كلشي دافع الجبهة ...ندفعها تا انا واللي بغا يوقع يوقع.
دخلات كدور فعينيها حشمانة ماعارفة فين تمشي تا نزلات عندها سكينة وخرجات ليها من واحد القنت سلمات عليها وداتها معاها للمكان المعلوم ، دخلوها لمكتب بداو معاها فبعض الاسءلة بالفرنسية وهي كتجاوب تا سالا الحوار و وقعات معاهم اوراق العمل وناضت خرجات عند سكينة كتنخج وضحك
سارة: خههه قبلوني اففف ناري كنت خايفة من دوك الاسءلة وقابي كيضرب تا قلت الموت هادي...جاب الله سيفطتي ليا الاسءلة تدربت عليهم واخا وحلت فشي وحدين بدلوهوم فالاسءلة مي جاوبت على الباقي
سكينة: اففف...مزيااان ..يالاه دابا راكي غتبداي سطاج واحد السيمانة تشوفي طبيعة العمل باش تبداي الخدمة ويعطيوك بوسط...دابا غتبقاي جالسة حدايا كتشوفي شنو كندير صافي
سارة: بحماس) صافي ههه
داتها سكينة لواحد القاعة كبيرة عامرة بليبوسط بزااف جالسين فيهم بنات ودراري شباب كل واحد غاطس فالحاسوب اللي قدامو بحال شي سيبير فارق بيناتهم جدار قصير بين كل بوسط ، جلسات حداها وبقات حاضياها اش كدير تا وصل وقت الغدا وقلبوها ضحك ونشاط وشي كيهضر مع شي وسارة عاجبها الحال ، نزلو كل واحد فين مشا يتغدى وتجمعو كليكات بنات و ولاد خالقين السعادة غير بالضحك ، سالا وقت الغدا ورجع كل واحد للبوسط ديالو تا وصلات الخمسة دالعشية وخرجو كل مشا بحالو وركبات سارة مع سكينة فطاكسي كيتجمعو تا وصلو وكل وحدة مشات لدارها .
دخلات سارة للدار مالقات تا واحد بدلات حوايجها وتكات معسات تا رجع سمير وهاز معاه البنت فيدو وهي تنوض
سارة: لالا اختي...مبغيتش نطلق ، انا حقيقة كنبغيه واخا دار فيا هادشي وغدرني مقدرتش نخرجو من قلبي ...وهانا كاع رجعت لظارنا وطلقت ، راه مغنخرج مغنخدم مغنشوف الزنقة...راه عندي خوتي خااايبيين راه مكنتش كنشوف الشارع قبل ما نتزوج ، راه عاااد مغتزيد حياتي تكفس الى رجعت مطلقة ..واش هما ماقالونيش حتى وانا بنت بقا غير يقيلونس وانا مطلقة...ماعمرهم يسكتو من النكير والهضرة وكترت الحكام والله تا يحررو فيا العيشة كتر ما هيا حارة ...اللهم خليني مع هادا كيما كان الحال كنفدر نرد عليه الهضرة وغادي نقول لخوتي ضربني ومنقولش ليهم خاني...هما ديك الساعة يتفاهمو معاه على قضية الضرب ، كرهت حياتي اللي تقلبات وليت مخنووووقة
سكينة: مشكيييلة هادي...يالاه نمشيو ها الطاكسي عمر ، جلسي تا تخدمي وهرجي كري نتي وبنتك وتهناااي وطلبي الطلاق
سارة: نتي راه غيير كتهضري هه ، راه والله لا خلاوني نسكن بوحدي ...واش انا يالاه عندي عشرين عام ونطلق بالبنت ونسكن بوحدي ودارنا فيها دراري قد السخط هه! زعما يخليوني ! ولا فالاحلام، الا طلقت غيشدوني عندهم ويوليو يحكمو فيا ويديرو ليا الغولار كاع ونجلس حداهم مانشوفش الشمش باش ميهضر فيهم تا واحد ، انا حياتي ضاااعت دابا واللي عطا الله عطاه وليت مزوجة عير بالفم اما شي زواج ماحاسة بيه ، بنت خالتو من جيه ودارهم من جيه ودارنا وخوتي من جيه وزيد حتى البنت من جيهة وشكون يقبل عليا وانا عندي البنت وحتى يالا فكرت نتزوج يحيد ليا بنتي ، راه خاصك تفكري شحااال واش سحاب الطلاق ساهل ، راه ميجي من جيهتي لا شعب لا قانون اللهم نبرد ونعطيه النخال ونتكمش ماحدي مزالة كنخرج فيه عيني اما دارنا يلا خرجت عيني فيهم يفكسوهوم ليا ونجلس عمية حياتي كاملة. انا حل واحد اللي عندي هوا نصبر تا نجمع الفلوس ونمشي لدارنا نطلب الطلاق ونشري ليه الصداع مع خوتي مزياااان ونهرب لتوركيا ونخلي ليهم البنت عند ماما تقابلها بعد ما تحكم ليا المحكمة بالحضانة ، ندير ليهم كان هنا ومنرجع تا نقاد راسي ونوقف على رجلي باش ميهضر تا واحد فيهم ونرجع نشري دار فالمغرب وشي مشروع ونربي بنتي والى هضر شي واحد فخوتي نجيب ليه البوليس هادا اخر خل كنفكر فيه من دابا واحد العام بيدمن نجمع الفلوس ونضبر على شي توركي فالفايس بوك نتصاحب معاه ويشد ليا السكنة تما ونمشي نيشان منضور لا هاك لا هاك
سكينة : مشاكيييل والله اففف يالاه نمشيو يالاه
داز النهار دالخدمة عادي بحال كل نهار ورجعات لدارها كالعادة سدات عليها فبيتها وسكتات مهضراتوش وتا هوا جلس طايح عليه الضيم فين ما يشوفها دتيزة غضبانة وعينها منفوخة كيتحسر ويبدا يلعن فراسو وسوط غير بوحدو ، كل نهار نفس الروتين والاكتآب و المرض عشش ليهم فالدار وحتى الفراش مابقاوش كيشركوه مع بعضياتهم ، ديما هي سادة عليها وكتفيق قبل منو كتمشي للخدمة وترجع دخل نيشان لبيتها وتسد عليها ومكتشرك الهضرة مع تا واحد ، شدات لوسط فالخدمة من بعد ما سالات مدة ديال السطاج ورجعات خدامة بحالها بحال المواضافين وكتلف الوقت مع الدراري والبنات اللي خدامين معاها ، لراو الندبات اللي على وجها ورجعات نضارة بشرتها ، وصل وقت الغدا ونزلات للخدمة مع البنات يتغداو ويضحكو ويتجمعو ، وهي جالسة كتاكل شافت البنت اللي حداها شادة تيليفون وكضحك
سارة: بشرى!! ايوا ضحكينا معاك
بشرى: ههه ...هادا واحد الكروب دخلني ليه واحد الولد كنعرفو مجموعين فيه غير شكون وشكون مكاينش البراني بيناتهم
سارة: انشوف؟ (طلات على تيلي) اااه تا انا داخلة ليه
بشرى: معلووم ...هه! مالي غنفلتها!؟ راه الى محضرتش غيفوتني عمري كامل ماشي غير النص ، راه ولاد الالبة والريوس الكبار اللي غيكونو وبيان سيوغ الجلسة معاهم شي حاجة الطوووب وداكشي غيكون هاي كلاص ...خليني من بوزي وزبالو اللي فيهم الفوحان على والو
سارة: تا انا داخلة فالكروب ، نمشي تا انا؟
سكينة: اوييلي ورا..
عفطات ليها سارة على رجلها قبل متكمل الهضرة وزواتها بيدها للجنب تا خرجو عينيها
سارة: فوقاش خاظ الميتينغ؟
بشرى: بعد غدا فحي الرياض فواحد الفيلا ..اشمن فيلا راه قصر واقيلة ..دخلي عند مروان السنتيسي تشوفي الفيلا اللي غيديرو فيا الميتينغ
سارة: بلليل ولا بالنهار؟
بشرى: بالنهار واللي بغا يبقى لليل راه كيبقى
سارة: صافي نمشي انا وسكينة
بشرى: (كتشوف فالتيلي) خاصك انقيتاسيون بالنسبة للناس الجداد...راه كيكون ليكارد كورد فالباب ميخليو تاواحد يفوت بلا دعوة
قلب جريح الجزء الثاني
محتوى القصة
التنقل بين الأجزاء