صورة مصغرة لـقصة عيشة العمشة

قصة عيشة العمشة

qisat 9isat 3icha l3mcha 
رواية عيشا العمشة

مالك أهداك بوخنونة..ياكما سخنو عليك جنابك..والله ومتحيد كروستك من بلاصتي حتى نعاود لمك الختانة.. ختي عيشة بلا معيوور..راه عير شفتك تعطلتي..وحطيت بلاصتك.. واخا نتعطل..هاد البلاصة ديال عيشة مولات القزبور..ولي جا ليها يطير ليه الراس.. حدر راسوو ودفع كروستوو..بلا ميزيد حتى كلمة حيت عارف راسو معامن ومعامن غادي يكون من غير عيشة العمشة ..شعالة العوافي..لي ديما مدابزة ومحيحة فالمارشي عيشة الملقبة بالعمشة..بنت المارشي والسواق..عندها شي عشرين عام ولكن لي شافها يعطيها كثر..مبينها وبين الأنوثة غير الخير والاحسان..ديما لابسة واحد الكيطمة..مرسوم فيها راية ميريكان..تقاشر..كحلين مقطعين من الكدام..عاكسة داك الراس بواحد زيف حياتي بيض ولكن مع الربيع والباربة..والغبرة والتراب..ولاو فيه ألوان الطيف..قرات حتى للسيزيام..فاش مرض باها ومات..خرجات من القرايا حيت هي الكبيرة..وخلا خوتها صغار ومها مريضة...شمرات على الكتاف..وخرجات لبلاصة ديال باها فالسواق ..والمارشيات....

فظرف عام رجع كلشي عارفها ..وتيخاف منها ..من نهار كانت غاديا تطير لواحد الخضار..ودنييه.. داك النهار ..كان بحرا مات باها..جاية للمارشي كيف العادة..لقاتو شاد ليها بلاصتها..بقات معاه الهضرة والمعيوور..حلف لا تزعزع من بلاصتها..طارت ليه طيرة وحدة على وذنيه بعضة..كون ما فكوهش..كون طيراتها ليه.. وكانت ديما تغوت وتهلل..ومحيحة..وكانت معقولة فالبيع..والشرا متدي لحد ديالوو..متخلي حد يدي ليها ديالها.. منقدرووش نعرفوا واش زوينة ولا خايبة..حيت ملامحها مخربقين..كانو عينيها مراض وفيهم الحساسية..والطبيب قاليها تبعد على الربيع والنباتات..وكيف تدير تبعد..وهداك طرف الخبز ديالها.. داكشي لاش كانو عينيها ديما معمشين..وكلشي تيعيط ليها" عيشة العمشة".وكالة الوذنين هاد الصباح ناشطة..وفرحانة..سلعتها جديدة وطرية.. أزيدو زيدو مابقى والو الربيع..الكرافص..الحمص فازغ.. زيدي الحادكة ديري الحريرة..تتغوت والعيالات تيشريوا منها ويتعاودو معاها..

موحا مول الصنك تيدور..غير تتشوفو تيتخسر ليها النهار صبحنا ع الله وجه النحس موحا:صباح نور عويشة.. فنفسها:عيشة قنديشة لي تضربك تعوجك وانت معوج من ربي.. عيشة:اش كاين أموحا واش تبدا بيا انا لولة..راه المارشي طويل وعريض..خليني نترزق الله بعدا.. موحا:وعويشة ..وشكون قالك أري الفلوس..غير رضي عليا..وتعيشي معايا فالعشة ميخصك تاخير.. عيشة خرجات فيه عينيها:تا تمشي ولا نوض ليك أعينين موكا ..العشة تخركها ان شاء الله..والله وما تبدل الساعة حتى نعلفك الربيع والكرافص..يالله دووب مشا موحا تيجري..وخايف لادير فيه شي مصيبة.. كملات البيع والشرا..مشات شرات خضيرة ولحيمة لدارهم..أغلبية تيعطيوها الخضرة فابور باش يسلموا من شرها... دفعات كروستها ومشات..طلعات مهلوكة للدار..وتزاوطات فوق واحد السداري.. مها:انوضي حيدي دوك النقاشر وغسلي دوك الرجلين بعدا..راكي دوختينا.. عيشة:أمي راه رجليا متيديروش الريحة.. مها:أويلي نوضي شوفي خوتك سادين نيوفهم.. عيشة:اوووف الله يستر متخليوا حد يرتاح مشات خشات رجليها تحت الروبيني وجات.. حطات مها الغدا..تغدات..ومشات تنعس باش عشية عندها مايدار..وفراسها واحد البلان.. شخرات مزيان حتى جات مها:عيشة وا عيشة عيشة:مممم مها:وتي نوضي راه الخمسة هدي.. عيشة قفزات: وتعطلت أمي ناضت نيشان لبسات سبرديلتها وهبطات.. البارح فالسوق سمعات التجار تيهضرو على واحد السيد لباس عليها..عندوو الفارم تيبيع الخضرة رخيصة..وهي قررات تبدل الحرفة..علاش متوليش هي لي تبيع ليهم الخضرة..وتولي مرفحة وتدير بيكوب ..ولا كاميو كاع.. ركبات طاكسي مشات لديك الفيرمة..تمات غادا داخلة بحال الى داخلة لكوري..جاي واحد العساس تيجري..شدها من يديها:ألالة فين داخلة واش زريبة هدي..

غير شدها طارت عليه بقجة حتى خرجو عينيه..وهي تتنزل عليه هاك بالاك هاك بالاك..حتى سخفاتو تجمعوا عليها الخدامة..وتيفكوا .وصداع.. شوية خرج واحد الشاب..سبحان من خلقه..غزال الفورمة والعينين والشعر.. شافتو عيشة وحلات فمها.. تم جاي لعندهم:أش هاد الصداع..اش هاد الفوضى..شكون هذي..واش حمقة؟؟ العساس:سي مصطفى معرفتها منين خرجات ليا..جايا داخلة حبستها ودارت ليا هاد الحالة.. عيشة فاش قال عليها الحمقة كانت غاتخلي دار بووه..غير سمعاتو سي مصطفى..وهي تفرانا حيت غارضها بيه مصطفى:اش كاين الالة شكون نتي واش باغا..واش نتي من العيالات ديال الموقف..؟ اش هاد الفوضى دايرة ليا... عيشة:انا جاية للبيع وشرا هنا..وهاد راس الطارو جاي شادني..ودارت بغات تنزل عليه وهي تتعض شلقومتها.. مصطفى:أش من بيع واشمن شرا لي غادي يكون عندي معاك نتيا؟!!وطلعها وهبطها دار عند العساس:جيبها للمكتب..ومشا وخلاهم.. عيشة:يالله أراس الطارو مسمعتيش سيدك قالك جيبني..دفعاتو :زيد.. داها عندوو للمكتب..وهرب بحالو.. دخلات بقات حالة فمها فيه..واو شحال زويون..بحال الممتلين.. هز راسو لقاها مخرجا فيه عينيها..وحالا فمها..جاتو الضحكة من منظرها..وحبسها بزز:شنو بغيتي وشمن بيع وشرا؟؟! عيشة:أنا سيدي خضارة.(وهي هازة راسها للسما)وسمعت التجار تيقولو راك تتبيع الخضرة بثمن رخيص..ومع أنا جامعة فليسات لدواير الزمان..قلت مع راسي حتى انا نولي من لخضارة الكبار.. مصطفى شاد الضحكة غير بزز:شنو تتبيعي.؟! عيشة فرحانة:تنبيع اسيدي الربيع والكرافص..الباربة والخيار..وحتى الحمص فازغ.. مصطفى مقدرش يصبر وانفجر بالضحك ..وهي بقات تخنز فيه:ولكن دابا صافي انولي من الريوس لكبيرة 4سنين وانا نجمع

مصطفى:وشحال جامعة؟؟ جبدات واحد الميكة خاشياها فصدرها ..ميكة وسط ميكة..وهي تكبهم ليه فوق البيرو..غير 20درهمات دايزة عليهم الحرب:هاهوما سيدي سطاش رالف و تمنميا..وتصايب معايا.. مصطفى بقا يضحك يضحك حتى بانو ضروسو وهي تتخنزر:الخضرا لي عندي راه بالملاين الصحيحة..هي تبدلوا فيها اللوان..وهزات فلوسها:تتضحك تهجروا ان شاء الله..كون ما حشمتش كون نتفت ليك ديك التشويكة بحال الى لاحسك حمار..يحساب ليك نسيت ديك حمقة لي قلتي ليا قبيلة.. مصطفى بدا يخنزر فيها..وبحرا بغا ينوض ليها.. وهو يتحل الباب بجهد. دخلوا واحد الزوج صحاح ومكلضمين:سي مصطفى مبغيتيش تحشم..ياك سي احمد قاليك بعد من طريقو!وقربو منو واحد جبد موس..طارت عليه عيشة بواحد العضة ليديه حتى تلاح..ناض ليها بغا يضربها..وهي تجبد 2كيلو كانت هازاها فجيبها..ونزلات عليه للراس حتى طوش دمو..لاخر بدا يدابز مع مصطفى..وهاز عصا ضرب بيها مصطفى ليديه غوت..وهي تطير عليه من لور عضاتو من عنقوو حتى طاح لارض..سمعوا الخدامة الغوات جاو تيجريو..لقاو جوج طايحين دمهم سايح..ومصطفى شاد يديه..عيشة واقفة بحال علال القادوس هه طلب منهم مصطفى يعيطوا للبوليس..وللطبيب.. جاوا البوليس داوا دوك الجوج..وجا الطبيب يفحص مصفطى..لقا يديه ورجليه مفدوعين..ودار ليه البانضات..قاليه خاصك راحة 10 ايام مصطفى طلع ليه الدم حيت معندوش لي يقابل ليه شغلوا والخدامة..

عيشة جمعات الوقفة تمشي بحالها..عيط ليها مصطفى:معرفتش كيفاش نشكرك حيت كون ما نتيا..يعلم الله كون راني مت..سمعي.. شنو سميتك بعدا؟!! عيشة:سميتي عيشة وهي تتحك عينيها.. مصطفى:سمعي أعيشة..من بعد هادشي لي درتي ولات عندي التقة فيك ..عندي ليك واحد الاقتراح..نتي محتاجة للخضرة..انا مستعد نعطيك لي بغيتي..ولكن بشرط..تجي تقابلي ليا الفيرمة..والخدامة هاد العشريام..من بعد نولي انا لاباس نعطيك الخضرة لي بغيتي..أش قلتي؟؟ عيشة بقات تفكر:ايوا وكروستي..والربيع والكرافص.. مصطفى:ألالة كل نهار نعطيك داكشي لي موالفة تصوري..شحال تتصوري فنهار.. هزات راسها لسما بحال الى تتصور الملاين: النهار العيان تنصور سطاشرميا مصطفى:ألالة كل نهار نعطيك 500 درهم سمعات التمن وخرجوا عينيها وحلات فمها:اه أسيدي موافقة ..فوقاش نبدا؟؟! مصطفى:من غدا ان شاء الله..جبد عطاها شي فلوس:سيري شري حوايج بدلي هاد الحالة عيشة:مالي هاد الكيطة راه من لميريكان شريتها من البال بستميا. هو حبس ضحكتوا:لا غير رميها..وشري حوايج خريين..راه الشيفور أيوصلك لداركم.باش الصباح ..يجي يجيبك.. خرجات عيشة..وهي هازة راسها للسما كان يحساب ليها ..وصلات للقمر 

ركبات..حدا الشيفور..وصلها حتى الحومة.. دخلات فرحانة بحال الى مروحينها عروسة..كلشي تجمع عليها..وخوتها الصغار طلعوا فوق الطوموبيل تيشطحوا..خرج الشيفور مسكين من الحومة غير بزز..وقاليها:غدا نتلاقاك فالشارع الكبير طلعات لدارهم غير حلات الباب تلاقاتها مها بالمعيور:أويلي أبنت الحرام..ولاو يجيبوك الطوموبيلات حتى للدار..صافي خرجوا رجليك للشواري..هدي هي أخر تربيتي..وطارت عليها بنتفة..خلات شعنانتها طالعة للسما.. عيشة:وامي وامي وغانشرح ليك مها:معندك ما تشرحي اللفعة الكرطيطة..من غدا نجوجك لموحا الصناك ..راه ديما تيخطبك..وهزا زنفارتك على زينك..وكحل عيونك.. عيشة:وامي غير سمعي.. بقات عيشة تشرح لمها ..عاودات ليها على الخدمة..وجبدات ليها الفلوس عطاتهم ليها..قالت ليها داك الراجل من هنا عشريام يعطيها الخضرة وغادي يوليو مرفحين.. عاد مها سكتات من المعيور.. خرجات للبال تتكسى..شرات واحد السروال زرق ..وتريكو غوز..مشات للدار فرحانة..دوشات..والوسخ ما بغا يحبس..عطات لمها تفك ليها شعرها..مها تتمشط وهي الدموع والخنونة هابطين:أي أي مي قصحتيني مها:قطعي الحس..تنقولك ديما مشطي شعرك المعفونة..راه خاصو يطرو ديال الزيت عاد يتفك.. نعسات..وهي تتحلم بنهار جديد ديال الخدمة..وبمصطفى لي عجبها.. فاقت الصباح ..لبسات حوايجها جداد(كل لون من بلاصة)بدلات الزيف..هاد المرة كعسات بزيف خضر..حسات براسها مفركسة خارجة وهازة زنافرها..سلمات على مها وخوتها لي مغاتشوفهمش عشريام هبطات غاديا للشارع تتلاقا مع الشيفور.. بداو ولاد الحومة ينكو عليها:عيشة والزين..شفناك ملونة اليوم..هزات حجرة..تيرات عليهم..فركتات المجمع:شماكرية لخرين.. خرج ليها موحا الصناك:عويشتي مازال مابغا يهديك عليا الله..

عيشة:صبحنا ع الله أوجه موكا..راه واخا يتقادو الرجال منتجوجكش..حيد من قدامي قبل مايطلع ليا الدم زادت وخلاتو وبدا يهضر: ها العار لما حني على هاد العبد الضعيف..بحرا دارت هزات حجرة غاديا تشير عليه..وهو يشدها بكعطة.. مشات لقات الشيفور تيتسناها..ركبات ..ومشاو للفيرمة.. الشيفور كان طالق اغنية الدودية"واعر واعر"وهي بقات تتغني بواحد الحلوق يطيح الزرزور من فوق الصور..واعر واعر انتايا داونجي ..الشيفور مسكين كره الاغنية..وندم حتى دارها كاع.. ..وصلات للفيرمة..دخلات للفيلا تشوف مصطفى كيف صبح..دخلات لقاتو فوق واحد الفوتاي..لابس كيطمة فالابيض..تيبان غزال تيحمق.. حلات فيه فمها..هو شافها مقدرش يحبس الضحكة..بقا تيموت بالضحك:أمالك على هاد اللبسة؟؟!! عيشة:جيت زوينة ياك..راه ألفرانك للبياسة.. مصطفى:ياك عطيتك الفلوس ..كون مشيتي لشي بوتيك وشريتي شي لباس ع الموضة.. عيشة:واسي المصطفى..راه قاليك لبس قدك يواتيك ..انا خضارة..البال لي يقبل عليا مصطفى:دابا نتي غاتنوبي عليا..قدام التجار..خاصكي تكوني لابسة مزيان ..صافي انا انتكلف بموضوع الحوايج.. دابا سيري مع العساس..تشوفي خدمتك..وكوني على بال مع التجار.. خرجات مع العساس ..تيشوف فيها مسكين غير بنص عين..ومزال مسكين مفكر السلخة ديال البارح.. بقا غادي بيها وسط ديك الفيرمة..تبارك الله على خيورات ها الخضاري على الانواع ..دلفواكه تيشهيو..الخير لي معمرها شافتو..داها لواحدظليلة..فيها طبلة وكرسي

جلسات وبداو يجيوا التجار يشريوا منها.. جالسة دايرة رجل فوق رجل..وواحد تارازة فوق راسها..بداو التجار يجيوا..ومع هي تبارك الله داية وجايبة فالزمان..شحفاتهم..كانت تطلب ليهم تمن مضوبل على لي كان تيبيع بيه مصطفى..كانت عارفاهم تيشروا بالرخى..بقاو التجار:ألالة سي مصطفى كان تيبيع لينا بتمن مناسب..نتي راكي بغيتي تقطعي رزقنا عيشة:أسمعوا أدوك الشلاهبية..راني بنت الحرفة..هاد الثمن لي قلت ليكم..راكم رابحين منوراه الملايين..وسي مصطفى ..راني نايبة عليه..لي عجبوا الثمن يشارجي لي معجبوش الباب الحباب.. التجار:اناري الالة عيشة شحال قاصحة.. عيشة:وراه الزمان لي قاصح.. قرب منها واحد التاجر لوذنيها:أش بان ليك تبيعي لينا بالتمن القديم..ونعطيوك حصيصتك وغير بيناتنا..وغمزها.. ...محسش بيها حتى طارت عليه بقجة وتتغوت وتهلل:أيوا راني عيشة بنت الجيلالي..متنسرق ..متنكذب ..متناخد رشوة..مافكوه مسكين من يديها غير بالكشايف.. فالاخير شراو التجار بالثمن لي بغات هي..شدات الحصيصة..بقات تتحسب فيها..ومشات الفيلا..دخلات لقات مصطفى جالس ومعاه واحد البنت زعرة لابسة شورت قصير..وديباردور ورقيقة..وطويلة..غير شافها مصطفى وبقا يضحك:عيشة عاود ليا العساس على شنو درتي مع التجار..صراحة برافوو عليك عيشة فرحات:هاكا سيدي رزقك..وبقات تحسب ليه وهو تيضحك.. مصطفى:بلا متحسبي أعيشة..صراحة بحالك قلال فهاد الزمان.. هاديك البنت تتخنزر فيها:مصطفى شكون هدي واش الخدامة؟؟!

عيشة طلعوا ليها الكرون:الخدامة هي نتي الصفريطة..العوجة ..أمسيسي مصطفى:تهدني أعيشة..نسرين مقصداتش..نسيت مقدمتش ليك..نسرين صديقتي..ودار عند نسرين..هدي عيشة خدامة معايا..فهمتي..وخنزر فيها.. نسرين:أو ما شيغي ..شحال متوحشة.. عيشة بقات تعوجها..مكرهاتش طير عليها بنتفة.. مصطفى:صافي باركة.. ودار عند عيشة: بغيت شي شهيوة من يديك..فيا الجوع.. عيشة فرحانة:شنو نوجد ليك الرفيسة العمية..ولا كسكسو بالكديد لي حب الخاطر.. نسرين بقات تتعوج:ياي شهاد الماكلة.. عيشة:لا بنيتي هاد الماكلة متصلاحش لمصارنك..مصارنك غير ديال دانون..وبقات تفرنس ومصطفى تيموت بالضحك دارت عند مصطفى:أنوجد ليك الرفيسة بالدجاج البلدي..باش تقوي عضامك..ودارت عند ننسرين:وغاديا نكتر التومة والحلبة.. وتتطلع ليها فحواجبها ههه نسرين مشات بحالها..عيشة مشات للكوري ديال الدجاج..بقات مضاربة مع الدجاج..حتى شدات ليك واحد مولاتي الدجاجة..عطاتها لسليمان العساس دبحها..ريشاتها..وبدات تصايب ليك الرفيسة..سليمان تصالح معاها..وتيعاونها فلي بغات..وحتى هي باست ليه راسو وطلبات السماحة. ريحة ديال المسمن..وريحة الرفايس واصلة حتى لباب الفيرمة. وجدات الغدا قاداتها وزوقاتها بالدجاج البلدي.. وداتها لمصطفى:اممم هادشي باين بنين..جلسي أعيشة ونسيني.. عيشة:صافي أسي مصطفى انا اناكل فالكوزينة انا وسليمان.. مصطفى:كوني تسمعي وجلسي تونسيني..متنبغيش ناكل بوحدي.. جلسات وهي حشمانة..أو !! عيشة المقزدرة حشمات..أش وقع؟؟! هه جلسات عيشة شمرات وبدات تاكل.. 

تتهز الحلبة والتومة وتتحطهم ليه:كول باش عضامك يبراو دغيا..واخا هو معندوش مع الحلبة ..عجبوا الحال وعجبوا اهتمام عيشة..وحس باحساس غريب ..حيت والديه ماتوا ومعندو حتى حد فالدنيا..اول مرة يحس بشي حد أمين وتقة وباغي ليه الخير..كاع لي دايرين بيه اما خايفيين منو..اما طامعين فيه.. كملوا غداهم..جابت ليه عيشة اتاي:هاكا سي مصطفى أتاي بمرسيطة والزعتر..ضروري مع هاد الرفيسة.. مصطفى:ايوا كبي نشوفوا..وبلا ديك سي عيطي لي غير مصطفى.. كبات ليه عيشة أتاي وبقا يسولها على حياتها وعائلتها.. بقات تعاود ليها على باها لي مات وخلى ليها اسرة كاملة..هي لي مسؤولة عليها..بقات تحطي ليها على عالم السوق والديابة لي فيه..وكيفاش الدنيا خلاتها تولي سبع باش مياكلوهاش الديابة..كانت تتهضر وتتحك فعينيها..سولها مصطغى عليهم قالت ليه عندي الحساسية..وقاليها خاصك ضروري تتعالجي حيت العينين أهم حاجة عندنا.. وراها مصطفى بيتها فين تنعس..دخلات كانت بيت زوين ومريح..مشات للمراية وتتشوف فراسها وتتفكر مصطفى الضريف..وكيفاش تيتعامل معاها مزيان.. تتشوف فوجها وملامحها وتتقارنها مع مسيسي ديال نسرين..وبقات تتضحك على راسها:أفيقي من الكلبة أعويشة ..واش ايخلي ديك الزين ويديها فيك..هديك من توبو وبحالو..نتي غير خضارة..عندك معاه عشريام..والله يعاون...نعسات فوق الناموسية عجباتها.

عمرها نعسات فوق شي ناموسية..طلعات فوقها وتتنقز..زلقات طاحت لارض:أي ميمتي جنابي.. طلعات وهي تتعرج..تكات بحوايجها..تغطات ونعسات... طلع النهار بكري فالفيرمى..فاقت ناشطة ..هبطات للكوزينة الخدامات جاو حيت تيجيو غير فالصباح والعشية تيمشيو.. لقات الفطور..اشمنك يا ملاوي اشمنك يا بغرير..شهية مفتوحة ليها..عركاتها وخرجات للفيرمة تشوف شغلها.. مشات مقابلة البهايم..مقابلة الناس المهتمين بالحليب..ومقابلة الخدامة لي فالارض..كل واحد عارف خدمتو..وتيتقنها.. داك النهار كانو غاديين بالخرفان للسوق يتباعوا..وكان خاصها تمشي معاهم باش توقف على شغلها.. ركبات فالكاميو..وصلوا للسوق وداروا بيهم الكسابة..مع تبارك الله السلعة زينة كلشي بغا ياخدها..بقات تبايع وتشارى..طلعات ليهم التمن للسما حيت عارفة عندها المليح.. فالاخير باعتهم بالتمن لي بغات..وربحات فيهم حصيصة كبيرة تبارك الله.. موحا الصناك..بانت ليه عيشة شادة الفلوس وتتبايع ..جاي عندها حال فمو ومعارف والو:وا عويشة..وتي منين جاك هادشي هاو؟؟! عيشة:وتا مالك كي النحس تابعني..الله يلكيها ليك..ومشات خلاتو جات تابعها..شدها باش يهضر معاها ..غير قاسها..فرجات عليه السوق كامل..ضرب ..قميش وعضان وركيل..كملات منو بحال الى كانت فالحرب..شعنانتها طالعة للسما..وجها حمر..وكلها مغبرة قالت لمول الكاميو:يالله تحرك نمشيو.. موحا تيبكي:واخا عيشة الى مخليتها فيك منتسماش انا موحا السوسي.. وصلات للفيرما بديك الحالة..دخلات للدار شافها مصطفى تخلع:ياربي السلامة مالكي فهاد الحالة.. عيشة:غير موحا وجه الفكرون ..تابعني كي التابعة..ومكملها شادني..بالحق خليت دار بووه.. مصطفى تيموت بالضحك:وابردي شوية مالكي عزيز عليك المضاربة..والمشاكيل .عيشة:ورا بنادم حكار يشوفك درويش..ياكلوك ويغلبوا عليك..راه لي يفكر يقيسني..تنقطع ليه يديه.. بقا مصطفى تيضحك وهي تتخنزر فيه:هاك شد فلوسك..وحسبهم.. مصطفى شد الفلوس تيحسبهم:هادشي بزاف أعيشة..مموالفش نربح هادشي كامل.. عيشة:حقاش مخدم معاك الرعاويين..وراهخاصك تكون حار فالبيع والشرا ..خاصك تكون موس وماضي.. مصطفى قرب عندها وبقا يشوف ليها فعينيه..واخا عينيها مخبيهم داك العمش..ولكن حس ان وراهم سحر عجيب.. هي تلفات :ها ها انا نمشي نوجد العشا.. مشات وخلاتو..دخلات الكوزينة..وهي تتفكر فيه..معرفاتش علاش قلبها تيضرب بزاف منين تيشوفوا..اويليى ياكما هدا هو داك الحب والغرام..أويلي يا عيشة ..يعطيك حبوبة لما فيقي..آش جاب القصدير للذهب.. صاوبات واحد مولاي الطاجين بالخضرة..صايبات شلاظة..وجابت لمصطفى العشاء..وكيفما ديما ..شدها تتعشا معاه.. بقاو يهضروا..ويتعاودو..بقا يحكي ليها قصتوو..قاليها بان والديه ماتو وخلاو ليه فلوس بزاف..وهو كان عايش ففرنسا..جا للمغرب باش يقابل ملاكاتو..لكنه متأقلمش وتيفكر يرجع عن قريب.. هي قلبها تكمش منين سمعاتوو غادي يسافر:واش كاين شي واحد عندوو هاد الجنة يسافر ويخليها..علاش متعيش هنا تزوج وتدير ولادك..هوما يعمروا عليك.. مصطفى:مزال ملقيتش هدي لي تخليني نبغي الارض ونتشبت بيها.. عيشة: وديك البنت نيسرين(بغات تشوف شنو تحت راسه) هو ضحك:نسرين هاهاها نسرين ديال الخروج ..المسارية..الحفلات..اما الزواج والفيرمة متصلاحش ليهم. شافيها:راها مجرد صديقة من يامات فرنسا ميمشيش تفكيرك بعيد..لي تصلاح ليا مرة مأصلة..بنت البلاد..تبغي الارض..ولكن خسارة عيشة فنفسها:هاانا قدامك لعمة لعمة..ولكن نمشي نشوف راسي فالمراية باش نفيق من الاحلام ههه كملوا عشاهم..كل واحد طلع لبيتوو وهي تتفكر فيه وفهضرتوو.. ..حتى هو تيفكر فيها ..عجبوا عقلها..أمانتها..أخلاقها..طيبوبتها..تمنى هادشي كامل يلقاهم فشي مرا تكون ع الاقل فيها غير شوية ديال الانوتة...

فاقت الصباح..نزلت فطرات..ومشات تقلب على مصطفى..قالوا ليها راه هبط للمدينة خرجات للفيرمة..يديها بيد الخدامة تعاون هذا وهدا..هاهي مع البقر والغنم..هاهي فالارض مقابلة الخدامة..شوية مشات للظليلة..جاو التجار..هاد المرة كاع مناقشوا معاها الثمن. شراوا بلي قالت ليهم..باعت وشرات..شوية جاي سليمان العساس تيجري..قاليها تكلمي لسي مصطفى.. مشات تتجري دخلات لقات مصطفى مع واحد الراجل ومراة مصطفى:زيدي أعيشة..دخلي..هذا الدكتور يوسف اختصاصي فأمراض العيون..صديقي عاد جا من فرانسا..جاب باش يدوز ليك على العينين..وهدي ايمان مراتو..راها اختصاصية فالتجميل..راهم ايبقاو معانا واحد تلات يام وتهلاي فيهم.. عيشة:على الراس والعين..سلمات عليهم..مشات للكوزينة . حمرات الدجاج البلدي..وذبحوا خروف صيفطوه للفران يتشوى..الفواكه والمشروبات كلشي على حقو وطريقو ... فالعشا كلشي تبهر بيها..بطيابها وتاويلها لي للاسف..غير فالماكلة..اما الشكل ديالها كلوو مخربق.. خرجوا الرجال بره..بقات غير هي وايمان ايمان ضريفة..ومحبوبة..دغيا انساجمات معاها:عيشة حبيبة..مصطفى تيشكر فيك..على اخلاصك..وخدمتك.. عيشة حدرات راسها حشمات:حتى هو يا ختي ضرايف.. ايمان حسات بيها تتميل ليه..وبقات تضحك:عيشة..علاش احبيبة دايرة فراسك هاد الحالة..نتي ملامحك وفورمتك زوينين ولكن مكرفساهم..بهاد الدرابل لي تتلبسي ..وهاد الشرويطة لي دايرة فوق راسك..علاش مبغيتيش حتى نتي يتغرم بيك شي ولد الناس ويتزوج بيك.. عيشة:ايوا لباس مولات القزبور هو هذا.. ايمان:دابا نتي خدامة مع وتقادي ديري مكياج.. عيشة:أويلي يا ختي بغيتي نولي بحال المونيكا.. ايمان تتضحك:خلي هادشي عليا انا ..من عدا نبدا فيك الخدمة..راه خاصكي مجهوووود..وبقاتتتضحك.. بقاو يتعاودو ويضحكوا ايمان كانت غزالة كيف الممتلات..وحتى راجلها بحالها.. قالت عيشة مع راسها:حتى مصطفى نهار يتزوج خاصو وحدة كيف ايمان.. جا الدكتور أمين كشف ليها على عينيها قاليها:مكرفصة على هاد العينين..ولكن عندي واحد الدوا جايبو معايا من فرنسا ..ايفيكاس.. عطاها الدوا قاليها ديريه من الليل لليل.. طلع هو ومراتو لبيتهم..بقات هي ومصطفى قالت ليه:شكرا أسي مصطفى عمري نسا خيرك..وجبدات فلوس البيع عطاتهم ليه خدا منهم50 الف قاليها سيفطيهم غدا لداركم مع الشيفور.. عاودات شكراتو قاليها:متعاوديش تشكريني راه حقك هدا.. ومشا ينعس..خلاها غارقة فالتفكير..وتصرفاتو نهار على نهار تتخليها تتعلق بيه.. طلعات لبيتها تنعس..دارت الدوا..واخا حرقها..حسات بالراحة ومبقاتش تتحك..فاقت هبطات تعاون فالفطور..فاقوا الاخرين

دات ليهم الفطور..كلشي على حقو وطريقوو.مصطفى تيشوف فيها..وختى هي..ايمان لاحضات هدشي وبقات تتضحك.. عيشة طلبات من مصطفى تمشي تشوف عائلتها..وتدي ليهم الفلوس..قاليها تطلب من الشيفور يوصلها..لكن ايمان قالت ليها انا انوصلك ونتساروا شوية ونجيوا.. ركبات حدا ايمان فالطوموبيل..دازت شرات لخوتها الحلوى والشكلاط..ومشات..غير شافوها بقاو يعنقوها بحال الى غايبة شهر.. عطات لمها الفلووس..وسلمات عليهم ومشات..وامها تترضي عليها.. ركبات حدا ايمان..ومشاو لواحد المول فيه سونتر ديال التجميل..وفيها بوتيكات راقية ديال الحوايج.. ايمان:جبتك هنا باش تولي انسانة جديدة..تحيدي هاد الشرويطة...تقادي حالتك.. عيشة:لا ختي ايمان خليني غير فصباغتي.. ايمان:قولي لي ياك تيعجبك مصطفى..؟؟؟ عيشة بدات تتلون..وتلعتمات معرفات ما تقول.. ايمان:ايوا الى عاجبك وباغاه خاصك تتغيري على قبلو عيشة:اش جاب لجاب اختي ايمان ..اناش شفتيني فين عايشة..قلة شي وعندي ليتامة.. ايمان:مصطفى بغا غير لي يبغيها..وتبغيه وتفهموا..شنو غايدير هو بوحدة عندها الفلوس..علاش ناقصينوو..؟؟ ايوا تبعيني وسكتيس دخلوا للسونتر..كاع البنات تيشوفو فيها ويضحكوا..عيشة:تهجروه انشاء الله مال مكم ؟؟ايمان تقلقات..وعيطات للمديرة:بغيت نحجز بيت للانسة عائشة..وكاع البنات لي هنا يتكلفوا بيها.. وجبدات حزمة دلفلوس لاحتها ليها..وراتها كارت فيزيت..غير عرفاتها مولات أكبر مركز تجميل فباريس وبدات تترعد وتتقفقف.. طلبات منهم يقادو عيشة من aحتى لz دارو ليها الكيراتين للشعر..ولا مسبسب كيف الحرير..وعاد بان لونو الحكل لي تيبري..داروا ليها كوب جديدة ..قادو ليها الوجه سوان دو فيزاج..الحجبان..العينين..لي مع الدواء تحسنوا..اليدين والرجلين..لاسيغ.. ايمان خلاتهم معاها..وخرجات تجيب ليها ما تلبس..شرات ليها بزاف دلحوايج.. دخلات..حلات فمها..واش عيشة هدي؟؟شافت انسانة أخرى..أنوتة جدابة ..جمال خلاب فين كان هدشي مخبي كامل..لبساتها سروال دجين وشوميز قصيرة..صباط بصاكو..وعاد دوراتها للمراية.. عيشة شافت راسها تصدمات ونزلوا دموعها..عنقات ايمان وهي تتبكي:عمري ننسا خيرك أختي..راه ختي كون كانت عندي متديرش معايا هادشي.. ايمان تتضحك:باركة من البكا غاديا تخسري المكياج يا 

فالطوموبيل..غاديين للفيرما ..قلبها تيضرب بجهد..هي ولات تتحس براسها انسانة جديدة ..كانت خايفة من ردة فعل مصطفى..اش غادي يقول عليها.. وصلوا للفيرمة..داخلة وبحال الى ماشية على الجمر..تتحسب الخطوات ..وتتسنى ردة فعل مصطفى كيف غاديا تكووون.. دخلوا للصالون وتماو لقاوهم.. ..لقاو مصطفى جالس فالصالون هو وأمين تيتفرجوا فالكورة..هزوا راسهم فيهم باستغراب.. أمين:تعطلتي..شكون هاد السيدة..؟؟ مصطفى:فين عيشة؟؟ ايمان بقات تتضحك:غير مشينا درنا براسنا انا وعيشة..كيف جاتكم ؟؟ تصدموا بزووج..كيفااش؟؟؟ هدي عيشة؟؟ ايمان:عائشة الله يخليكم... مصطفى تلف ودارت بيه الدنيا...قرب عندها:عيشة..فين كنتي مخبية هادشي كامل.. عيشة بدات تترعد كاملة:ها انا ماشية نوجد ليكم العشا..شدها من يديها..هاد المرة ما ضربات ما عضات..بالعكس عجبها الحال وبقات تترعد:اجي شمن عشا نتي راه تجلسي كيف الاميرة..والعشا يجي لحتى لعندك..شدها من يديه وداها للطبلة..جابوا الخدامات للعشا..تعشاو وهوما تيشوفوا فبعضياتهم.. ايمان وأمين تعشاو بزربة..وفهموا راسهم..طلعوا وخلاوهم.. مصطفى طلب منها ..يخرجوا على بره..بقاو ماشيين..شوية مصطفى دار عندها وشدها من يديها.. عيشة صراحة..من نهار لي جيتي هنا تشديت ليك ..شدوني أخلاقك..أمانتك..صدقك..وشهامتك..ولكن كنت تنشوفك ناقصة من واحد الناحية..كنت بغيتك..تتبدلي غير شوية ..تلبسي مزيان..تهلاي فراسك..ولكن ايمان ورات كاع الحوايج لي مخبيين فيك..مكنتش متوقع انك بهاد الجمال والانوتة كاملة.. قرب منها شدها من يديها:عيشة تزوجيني..وغانكون اسعد واحد فالدنيا.. عيشة كانت اتسخف بالفرحة..وافقت وعنقها بجهد مشا خطبها من ماماها..وداروا عرس كبير فالفيرمة..وجاب ماماها وخوتها عاشوا معاها.. وموحا مول الصنك انتحر هههه
 النهاية  😂😂😂