قصة بارون الشيطان السوري

من تأليف ابتسام قراري
2018قصة كاملة

محتوى القصة


قصة بارون الشيطان السوري بالدارجة

فروايتي الجديدة هي التكملية ديال رواية #العميلة بحيث ان الجميع كان طالبني فداك الوقت باش نكتب الجزء الثاني ليها لكن فداك الوقت كان بالنسبة لي الجزء الثاني شبه مستجيل انني نكتبو .... ومع ذلك قررت نرضي لخواطر باش نرجع متابعيني القدام.... لكن غادي يكون الجزء الثاني بأبطال جداد وفعالم جديد ماشي فالمغرب

المقدمة:
الموت !، كايختلف تماما فاش كاتمشيليه برجليك ، أو فاش كايجي هو عندك ، الشخص لي كايمشي لعند لموت هو في الأصل ميت ، فاقد لإدراكو وأملو ، وما الإنسان إلا عين ترى المستقبل بكل أمل

الألم !، هاد الوحش الكاسر الراڨد بين مشاعرنا ، عندو قدرة أحيانا كاتفوق قدرة الإنسان على مقاومتو ، فكايسلبنا أملنا، ومستقبل باغين نعيشوه ، فكانختارو الموت في الأخير

أما فاش كايختارنا الموت ، فهو كايخلينا نعرفو كم أن حياتنا زوينة ومليئة بالأمل ، وحتى الى تسالا يقدر ينبت فمكانوا أمل جديد.

كايفكرنا الموت فاش كايتبعنا أن عندنا أحلام ماعمرنا شفناها كاتحقق ، وأهداف ماعمرنا سعينا موراها باحثين ، وبكلمات معمرنا قولناها ، وبساعات ماعمرنا عشناها . كايفكرنا بلأشخاص لي كانبغيوهوم وبلي غادي نبغيوهوم وبلي غادي نوهبوهم الحياة.

فاش كايجيك الموت ، ضروري كاتفكر فمستقبلك بحال شي ماضي عشتيه بكل روعاته ، بأمنياتك لي ماتحققاتش ، وبأحلامك لي ماعمرها غادي تحقق ،بكلمات ماكتبتيهومش ، وبأطفال ماولدتيهومش.

كل هادشي كايخليك تتمسك بالحياة أكثر ، وتمنى يوم واحد تعيشو كيف كاتبغي ، مع الشخص لي كاتبغي

هاد الأيام غير كاضحك عليك ، كاتعطيك دروس ماعمرك تنساهوم ، كاتخليك بسيف عليك تعرف بأن الموت ماشي إختيارك ، وبأن الحياة هي الخيار الوحيد الصحيح ، وبأن لي وهبك هاد الحياة هو فقط لي غادي ياخدها منك ، وغادي ترجع تسول راسك ، واش حياتي كاتشبهلي؟ ، واش عشتها كيفما بغيت ؟ ، واش عطيتها حقها ؟.

هاداك ساع عاد غادي تبغي الحياة ، فاش غادي تحس أنك غادي تخسرها ، غادي تعشقها وغادي تغير للأبد .

شهقت "روعة" في محاولة إلتقاط أنفاسها بينما كاتخبط بين أمواج البحر الهايجة فديك الليلة الكحلة ، مر من أمام عينيها شريط حياتها ملي طلقت أول صرخة إثبات وجودها فالحياة لأخر صرختها وهي كاتناجي ملاك الموت يمشي ويخليها تعيش ولو لأيام معدودة ، ولو لدقائق ولو بضع ثواني تملئ رأتيها ببعض من إكسير الحياة ولو كانت غادي تدفع ثمن الثواني القليلة فالعداب .

مكانتش قادرة تغوت أو تطلب النجدة فديك الجزء من الثانية لي كايوهبهالها الرحمان باش تلتقط ولو القليك من لأكسجين داخل رأتيها ، فأكيد مكانتش غاضيعو بمجرد صراخ ربما مغاديش يوصل صداه للأدان البشرية . كانت كيف الكرة بين لأمواج ، وضعوها وسط ملعبهم وقدفوها لبعضياتهوم للتسلية وحدا تخبطها للثانية ، اوحدا تضربها بعنف وقسوة لعند الثانية.

سحبتها الجادبية للأسفل بينما شعرت بفقدان السيطرة على جسمها ، وكأن أطرافها أصابهم الشلل لكنها كانت مازالة فوعيها ، وهي كاتشوف بعينيها أشعة الشمس المنعكسة تحت الماء وكأنها خيوط ذهب تسللت من جنة الفردوس قصد إستفزازها وتذكيرها ، بالجحيم المنتظر ، لكنها حبتها

يااه...! لهذه الدرجة عشقت لون الشمس!؟ ، ياك كانت كاتصبح عليها كل صباح! ، وغير كاتسمع صوت باباها أول كلمة كاتقولها

"تفو على صبح كيف داير" او بعبارة اخرى " صبحنا على الله" ودابا ولات كاتمنا ولول لحظة فوق سطح الماء

دعات فنفسها وفوسط خوفها للخالق ينقدها من هاد الكابوس او يوضع ليه حد باش ترتاح ، وما هي إلى لحظات واستجاب القدير لرغبتها فمكان عليها إلا أن تستسلم و تسلم روحها للخلاص ، نعم إستسلمت لكل شئ سئ بداخلها ، حتى الضوء الخافت تطفا ، وأصبح الظلام هو المسيطر على تفكيرها ، مشا الأمل ودا معاه الصبر لي عيا منها ، وحتى لحب قفز منها وهرب بين شواهد القبور باش يقلب على نفسو لكن مع الأسف يمكن خصو يقلب مزيان بين لمواج يمكن يلقاه ضايع وسط شي موجة هايجة .

رسالة عاجلة إلى السيد إبليس:
"الأمور هنا تسير على النحو الذي تريد حيث الناس أصبحو أكثر سوء منك بدرجات ، فتقبل تحياتي "

#ابتسام قراري

قصة بارون الفصل الأولى : أمواج غاضبة

ضرب الرعد فداك نهار وأثار جنون العاصفة , ولولت بغضب ورمات كل ماعتارض طريقها هنا وهناك دون شفقة ولا رحمة ، رياح عاصفية وقطرات المطر مخلطة مع حبات البَرَدْ "تبريرو" لي كان كايخبط فيخت الجوهرة بحال لحجر ، وكأن الدنيا ولات مجنونة وجاتها نوبة من الهستيريا , حتى أن الرعد أصبح أكثر قوة وهو متسلح بخيوط البرق وكأنه عازم على قتل المزيد من الأرواح لي غادي تعتارض طريق غضبو دون تردد .

القبطان السيد مرزوق لي أصبح على أبواب السبعينات من عمرو ، كان متواجد فكابينة القيادة ومتمسك بالعجلة بكل قوتو وكايحاول يتحكم فاليخت وهو كايزطم على دواسة البنزين في محاولة انه يخلي اليخت يتوجه فخط مستقيم بأقسى سرعة لكن الأمواج لي كانت كاضرب اليخت مع الجوانب خلات المهمة تصبح شبه مستحيلة ... الجميع كان چالس على أعصابو ومتشبتين بالمقاعد و بالأعمدة.

- دخيل الله يا سيد مرزوق لاقيلك شي حل.
غوتت بيها "تاليا" سورية الأصل وهي كاترجف بالبرد والخوف

- لا تخافي أختي ، مارح يصير شي ، الله راح يحمينا والسيد مرزوق بيعمل كل الى طالع بإيدو
غوت بها "جبل" أخ "تاليا" لكبير وهو كايحاول يواسي ختو لي كانت فحالة عصبية مخلطة مع الخوف والتوتر

بينما "مراد" لي كان متشبت بالعمود الوسطاني ديال اليخت وحاني للأرض كان مغمض عينيه وكايدعي لله يخرجهوم من هاد المحنة لي هوما فيها عاجلا غير أجلا

غوتت "اسية" بخوف فاش ضربت موجة ضخمة الجانب لي كانت متكية عليه داخل كابينة القيادة حتى تسمع صداه بحال شي قنبلة نووية مما أثار رعبها وخلاها تغوت برعب وخوف وتشبتات بدراع "ياسين" لي شاف فيها بشفقة وطبطب على يديها باش تهدء وهو كايتمتم بين شفافو بدعوات للخالق.

مرت دقائق والوضع مازال مأساوي بل غير مكايزيد ويتأزم كثر فناض " ياسين " وهو كايتشبت بالجدار باش يوصل للقبطان "مرزوق" وهو فحالة من العصبية والخوف ، وقف فجنبو وشد جهاز الإتصال الاسلكي فمحاولة طلب المساعدة وقال :
- سي مرزوق .. شنو هو رقم النجدة ؟

شاف فيه مرزوق بنظرة خاطفة ورجع ركز انظارو للأمام وهو متشبت بعجلة القيادة وقال بحزم وبصوت غليض:
- ماتحاولش تتاصل بيهوم

عقد ياسين حواجبو بإستهجان وقال:
- كيفاش ؟؟

رد عليه مرزوق بصوت هادئ وبارد
- واش فنظرك فجو بحال هدا غادي يكون شي إرسال !؟

قلب ياسين عينيه بإستياء وقال وهو كايحاول يحافض على توازنو وكايشد فلجدار :
- خلينا نجربو ونتا مالك ؟

تنهد مرزوق وهو كايحاول يتمالك اعصابو وقال:
-قلتليك مابغيتش ابنادم واش مكاتفهمش؟

توسعو عيون ياسين بدهشة مخلطة بالغضب فاش سمع رفض مرزوق ...كيفاش قدر يرفض أنه يطلب المساعدة ، واش هو في كامل قواه العقلية ولا كايحاول يمرضو بالأعصاب ؟ ... إلا هو سخى بحياتو وبغا يوضع ليها حد فهوما مازالين طامعين فالحياة وفمستقبل جديد ....
ناض حتى جبل فاش شاف الجو مكهرب بيناتهوم و حيد الراديو من يد ياسين وقال بهدوء عكس الشئ لي كايشعر بيه من جيهة مرزوق :

-ياسين نحنا مهاجرين غير شرعين ومش من مصلحتنا ان خفر السواحل يدخل لإنقادنا .

نفث ياسين الهواء من فمو بغضب وقال:
-ياك أسي جبل ... بلاتي مالنا على هاد حريق الراس كامل ... إلا كانت عند شي واحد فيكوم الرغبة فالإنتحار فليتفضل مشكورا ... خرج راسك غير من هاد الباب وكانضمن ليك أنه غايطير ... وبلا تفلسيف وهضرا خاويا أنا باغي نعيش ماباغيش نموت ... كون كنت باغي نموت كون قطعت شرايين يدي ومت بهدوء فقلب داري وبلا تكرفيص ... لكن أنا باغي نعيش فهم هادي اسي جبل .

ثم تخطى ياسين جبل و رجع جلس فبلاصتو بسخط وبقا كايشوف فيهوم هو ومرزوق بنظرات الغضب والغيظ.. 

تنهد جبل في محاولة السيطرة على أعصابو فماشي من الساهل أنه يوقف هادئ أمام شخص كايغوت فوجهو بدون سبب وكأنه هو لي تسبب فهاد العاصفة الهوجاء ،... كون جاه فشي ضروف أخرى وعلىَّ ياسين عليه صوتو وتواقح معاه بهاد الطريقة كان غادي يشتتليه سنانو بدون تردد . لكن قدر حالتو النفسية بعذر أنه غير خايف وماباغيش يموت .

إلتفت جبل وتقدم للوحة التحكم وهو كايحاول يسيطر على توازنو ثم شاف فسي مرزوق وقال بصوت عميق :

- مرزوق بك ، اعطيني معلومات عن إحداثيات الجي بي إس لليخت لحتى اقدر حدد مكان الي احنا فيه بالتحديد .

تجاهل سي مرزوق طلب جبل ودار راسو مشغول بتعديل مسار اليخت فكرر جبل طلبو وهو كايبرك على سنانو 
- سيد مرزوق ... معلومات الجي بي إس لو سمحت

شاف فيه مرزوق بتردد وقال: 
- جهاز الجي بي إس خاسر

ضحك ياسين بسخرية بأعلى صوتو وقال:
- صافي الله يرحمنا جميعا ... كنا ناس طيبين .

قلب جبل عيونو بغضب وهاد لمرة مابقاش قادر يصبر على شلة المجانين لي فجأة لقى راسو وسط منهوم وقال بين سنانو:
- كيف يعني ؟

رد عليه مرزوق بعدم إهتمام و بصوت بارد :
- نسيت ماتأكدتش من سلامة المعدات قبل مانقلعو ، ماكنتش داير بحسابي لعاصفة بحال هادي .

عفاريت جبل تلبسوه فديك اللحظة وغوت بغضب :
- ولاك إنت لهذه الدرجة شخص مستهتر ، عم تخاطر بحياتك وحياتنا.

شاف فيه مرزوق ببرود ثم قلب عينيه بعدم إهتمام وقال بصوت ساخر:
- الرحلة كانت غاتستغرق 5 ساعات أو أقل إذن علاش غانحمق راسي ، وزايدون شكون نتا باش تحقق معايا؟؟... لايكون هاد اليخت ديالك وانا مافخباريش!!؟

طفح الكيل بأعصاب جبل وفاض كأس غضبو لي تملئ على الأخير بسبب مرزوق فضرب الراديو الاسكي مع الحيط بغضب حتى وصل للأرض عبارة عن قطع صغيرة متفاوتتة الأحجام وطار على مرزوق شنق عليه وهو كايغوت

- ولك حيوان واطي أنا سيدك يلي راح يربيك ياختيار الجن 

عطاه بضربة قوية لوجهو ثم شنق عليه من عنقو حتى كان غادي يقتلو وهو كايغوت ويسب فيه ... فالكل كان متبع مشهد الأكشن من بعيد شي كايتشفا ولي هو ياسين ، وشي خايف ولي هي أسية وتاليا لي كانت كاترجف بالخلعة ، وشي ماهاموش الأمر وكايشوف فيهوم ببرود ولي هو مراد .. فإذا كانو غادي يموتو فمكاين باس يستمتع مراد بمبارة قتالية مسلية .

- مــــراااااااد !!!!
غوتت بيها أسية وهي مخرجا فيه عينيها وكأنها كاتعني بنظرتها " الله ينعل لي مايحشم نوض فرق بيناتهوم أقليل النفس" فتنهد مراد بملل وقلب عينيه ثم ناض بتثاقل وقرب من مرزوق وقدر يفكو من براثين جبل الغاضب بستة وستين كشيفة. حتى تطبعو أصابع جبل فعنق سي مرزوق وبدا يلهت بقوة في محاولة إلتقاط أنفاسو من جديد وطاح للأرض وهو كايشد فعنقو باش يتأكد بأنه مازال لاصق فوق جسمو .
قال مراد بغضب وهو كايشوف فجبل لي كانو عروق جبهتو ورقبتو بارزين اوجهو تحول لونو للأحمر غاضب :
- تهدن أصاحبي ، ماشي هدا هو الوقت ديال الدباز ، حياتنا فخطر ونتا لي هامك هو جهاز الجي بي إس ... طلب من الله تهدء العاصفة ومن بعد دير لي بغيتي لكن خارج هاد اليخت كاتفهم ، ولا كانقسم ليك بربي غادي نلوحك نتا وياه من لبرا.

إيوا صافي هادشي لي بقا غير مراد يزيد الطين بلة ، دفع جبل يد مراد لي كانت شادا فيه بغضب وغوت فوجهو وهو كايقول: 
- وأنا بحلفلك بربي ، اذا حصل شي لأختي راح تموت إنتا وياه ، سمعتني؟

ضحك مرزوق بسخرية قارسة على كلام جبل ومراد وهو كايدلك عنقو بألم وقال:
- وأنا نحلف لكم برب الكون ، انه غير غادي تهدء العاصفة غادي تسوطاو تمشيو بحالكوم للجحيم وإلا غادي نقلب هاد زمر كولو ولي عندو شي حاجة عندي يجي يديها ، هاد اليخت ديالي غادي تكلسو فيه بإحترام ولا مانشوفش كمامركوم هنا كاتسمعو.

- أشنو كاتقول نتا !؟... 
غوت بيها ياسين بغضب وجا نايض يهجم عليه لكن اسية شدات فيه بقوة وماخلاتوش ينوض وهي كاتقول في محاولة تهدأت النفوس:

- سي مرزوق ياك حنا جيران ، الجزائر و المغرب وتونس خاوا ، وسوريا فوق راسنا ، كولكوم مزيانين وضريفين وكولنا غادي نحتارمو بعضياتنا ، هادي مافيهاش الشك ....

ناضت أسية بسرعة جرت مراد لعندها وكملات وهي كاتقول بصوت لطيف وهادئ:
- إنشاء الله ماغادي يكون غير لخير غير بشوية ديال صبر والدعاء وغادي نجاو بإذن الله ...
شافت فتاليا وكملات وهي كاتقول:
-تاليا ، شدي خوك مابغينا صداع 

أومأت تاليا براسها و ناضت بسرعة وشدات جبل جراتو لعندها وهي كاتقول لسي مرزوق :
- مرزوق بك ، أنا أسفة نيابتا عن أخي جبل ، بترجاك لا تواخذو ، ماكان بيقصد.

لكن جبل زاد فوق غضبو اطنان باعتذار تاليا نيابتا عليه وكأنه غلط فاش تعصب على مرزوق وهو ماشي من داك النوع لي كايبغي يعتارف باخطائو . نتر يديه من تاليا وغوت فوجهها بغضب
-لا تعتذري نيابتا عني وليييك

هربت تاليا بخوف من خوها وتخبات خلف ضهر أسية وهي كاتشوف على وجه جبل كل أنواع الشياطين متلبسينو وماشي بعيد يضربها إلا زادت معاه .

تنهدت أسية بهدوء وطبطبت على يد تاليا باش طمنها ثم قالت وهو كاتشوف فجبل :
-سي جبل , انا مقدرة غضبك لكن الإنسان فاش كايغلط مافيها باس يعتارف بغلطو ويعتاذر ، نتا ماعندكش الحق تمد يديك على راجل كبر منك فالسن واخا ماعرفت شنو يدير .

ضحك جبل بإستهزاء بأعلى صوتو وقال وهو كايشوف فيها بإستخفاف :
-انا عندي قاعدتين في حياتي يا مدموزيل أسية , الأولى انا ما بخطئ ابدا . والثانية اذا كنت مخطئ فرجعي للقاعدة الأولى ورح تفهمي أنو أنـــا مابخطئ أبدا . مفهــــــوم.

أومأت اسية براسها بتفهم بغات غير تهدء الجو المكهرب بأي طريقة ولو كان جبل مستخف بيها مابغاتش تنوض معاه صداع من جديد ولا تعارضو فقالت بصوت رزين:
-فهمت 

قرب جبل منها وجبد يد تاليا لي كانت مخبيا موراها لعندو وقال. بصوتو الرجولي وهو كايتفرسها بأنظارو الشيطانية 
-شطـــــورة .

جر جبل ختو الخايفا لعندو وتراجع كل واحد لمكانو وتهدئو , لكن نظرات الغضب بيناتهوم كانت بحال الرعد لي كان كايضرب فسماء ...

مرت ساعة تقريبا ومن بعد هدئ الجو شوية ، تباعدت الغيوم وفتحات مجال لأشعة الشمس باش تتسلل فوق يخت الجوهرة من جديد....

حلت الطمأنينة على نفوسهم وترخات أعصابهوم ... تلاح مرزوق على مقعد القيادة وتنهد وهو كايفكر ...
جهاز الجي بي إس لي غادي يبين ليهوم راسهوم من رجليهوم ضايع ... وراديو باش يطلبو المساعدة هرسو جبل قبيلة ، اشنو الحل؟
اش غادي يدير فهاد الموصيبة عاوتاني ؟، كيفاش غادي يعرف مكان تواجدهم ؟ ،واش هوما فشرق ولا فالغرب ، واش فالشمال ولا فالجنوب !! بالإضافة للبنزين لي قرب ينفد منو. غمض عيونو بقوة ثم تنهد بتعب

__________

كيف العادة ... بعد كل عاصفة قوية كايخرجو الناس باش يتفقدو أثارها وشي لي خلافاتو موراها من دمار وخراب ومن بقايا تركتها العاصفة في عنفوان اشتدادها وغليان زوابعها .

خرجت أسية من كابينة القيادة وهي كاتمدد أطرافها وكاتلوي عنقها لي تشنج بقوة الشد والعصبية لكن وهي كاتجبد فيديها لمحت عينيها زيتونية السواد شي حاجة كاتلمع فوق الماء !!!. 

عقدت حواجبها وركزت مزيان وكان مصدر اللمعان هي البزة الواقية من الغرق لي نعاكس لونها الفسفوري البرتقالي مع أشعة الشمس الساطعة المتسللة بين الغيوم ...

لاحظت أسية أن فوسط البزة شي حاجة و بحكم المسافة البعيدة ماقدراتش تشوف مزيان , لكن أشنو غادي يجيب بدلة الغرق لوسط البحر الى مكانتش محمله فوسطها جسد غريق محتاج للمساعدة أو جثة هامدة كاتنتاظر إكرامية الدفن .

- دراري ، أجيو تشوفو.. 
نادات أسية بصوتها المرهق على الشباب لي كانو مازالين فبلايصهوم چالسين فندائها حرك الفضول وسطهم وناضو يستفسرو على شنو واقع ، إلا جبل وسي مرزوق لي بقاو فبلايصهوم و ماتحركوش وهوما كايشوفو فبعضياتهوم بغيظ وغضب

- شنو واقع؟ ....
قالها ياسين وهو عاقد حواجبو بإستفهام ومن وراه كانت تاليا ومراد واقفين بفضول

تنهدت أسية بحزن وقالت :
- مع الأسف شي حد مات مسكين فوسط العاصفة يعلم الله كيف جراليه!؟ ....

همهم مراد وتمتم ياسين بأسف لكن تاليا قالت وهي كاتمعن فالجثة مزيان:
- شباب ، يعني مالازم نتأكد إذا كان الشخص لي هنيك لساتو عايش !..؟

شافو فيها كاملين بتردد إلا مراد لي قال:
- متافق معاك ...
شاركوها الرأي أسية وياسين بعد لحظات من التأمل فالجسم وقالو بجوج
- حتى انا 
- حتى انا متافقة

ناض جبل بفضول فاش سمعهوم كايهضرو على شي حاجة وكايتافقو ثم داز من قبالت مرزوق لي شاف فيه بحقد وخرج وهو كايحاول يتجاهل وجودو 

- اذن أنا غادي نهبط للماء نشوف كانتمنا يكون مازال عايش وخا مكانضنش 
قالها ياسين بكل شجاعة وهو كايفك أزرار سوميجتو البيضاء وكايستاعد باش ينزل للماء لكن ستوقفو صوت مرزوق المستفز لي كان وقف عند باب كابينة القيادة وقال:

- إلا هبطتي للماء ماغاديش ترجع طلع فوق هاد اليخت هانا فين قولتهالك .

ضارو شافو فيه كاملين بإستنكار من حد حتى جبل لي طلع فوق سطح اليخت إستنكر كلام مرزوق وطل عليهوم فإنتظار شنو غادي يوقاع عاوتاني فقال مراد بإستهجان:
-واش من نيتك أصاحبي؟ 

لا هاد ناس مكايفهموش ولا كايتغاباو وكايديروها بلعاني. ياك هو حذرهوم قبل ونبههم أن هاد اليخت ديالو وحتى واحد ماعندو الحق يقرر مصيرو من غيرو علاش دابا باغين يشدو معاه لعكس ... تنهد مرزوق بغضب ثم قال بصراخ:

ـ أه من نيتي ، لي هبط للماء غادي يبقا تما وأنا عند كلمتي غادي نحرك اليخت وغادي نسمح فيه وغادي نزيد

عقدت أسية حواجبها بإستنكار وقالت بصوت حازم:
ـ وإلا كان مازال عايش !...

رد عليها مرزوق بوقاحة وهو كايطلع ويهبط فيها بعينيه البنية :
ـ إلا كان فيك لفضول بارشا هبطي تأكدي بنفسك ...

قاطعو مراد وهو كايقول بغضب:
ـ مكانش كايحسابلي انك حتى لهاد الدرجة ولد لكلبة

تنهد مرزوق بملل لأن هادي معلومة قديمة بالنسبة ليه وقال بصوت بارد مستفز :
ـ واش كاتعرفني !؟... لا ... حنا هنا غرباء على بعضياتنا ومن دول مختلفة ، جمعتنا المصلحة على هاد القارب لي فيه مؤن قليلة ماغاديش تكفينا وحنا ب6 بينا عاد الى زدنا الشخص السابع غادي نموتو بلعطش وجوع ، ماعندنا إحداتيات الموقع ماعدنا راديو يعني حنا هنا تالفين فوسط هاد لقرينا لكحلة لي ماعرفناها مغرب ماعرفناها إسبانيا ماعرفناها إيطاليا ماعرفناها توت الخالي كيف كاتقولو نتوما لمغاربا .... لهدا غادي تلتازمو حدودكم وماشي صوقكوم فديك الجثة تكون عايشا ولا ميتا كاتفهمو؟؟

فالحقيقة هوما فهمو لكن الشخص لي موراه ماوصلاتوش الفكرة مزيان هدا لاش نقز وسط الماء بحوايجو فقط ضد فيه وفقوانينو السخيفة !..

لتافتو كولهوم بصدمة لمكان السقطة و كان جبل غادي كايعوم بكل رشاقة فوسط البحر بجسمه الرياضي متوجه لعند الجثة و تبا لمرزوق ولقوانينه السخيفة فليضعها في مؤخرته العجوزة . 

لتافتو كولهوم للقبطان مرزوق وشافو فيه بترقب وكأنهم كايتسناو ردت فعلو لي من صبح وهوا يغوت عليهوم بنص قوانين اليخت الصارمة ولي هي : ممنوع منعا باتاً إضافة أي شخص على متن يخت الجوهرة إنسان كان او شبح.

ضار مرزوق بسخط وتوجه لكابينة لقيادة ، يعني راه قال لهضرة ومغايعاودهاش جوج دلمرات ، لي نزل للماء غادي يبقا تما ومايحلمش يرجع لليخت شكون مابغا يكون ....

مجموعة من الأغبياء كايفهمو من مؤخرتهم ولكن هاهو غادي يربيهوم ويوريهوم مرزوق علاياش قاد ... بغاو غير زكاير مرزوق هو مولاهوم .

توسعو عيون تاليا بصدمة فاش شافتو قرب لعجلة القيادة وكايحاول يخدمها فتبعاتو كاتجري وغوتات :
مرزوق بيك ! ....
وكملت بترجي..
ـ دخيلك يا سيد مرزوق ماعندي حدى غيرو ، جبل أخي هو الوحيد يلي ضل من عيلتي بترجاك مابدي أخسرو بوووس إيداك 

شدات ليه فيديه باش تبوسها وهي كاتبكي لكنه خطف يديه بسرعة وقال بغيظ
ـ استغفر الله ... سمعيني ابنتي ، مرزوق كايقول الهضرة غير مرة وحدا ماشي جوج ولا عشرة ...هدا اليخت ديالي ولي مغاديش يحتارم قوانيني يطلع برا ، سواء كان خوك ولا نتي ولا اي واحد هنا ماغانرحموش.

على برا كانت اسية وياسين كايغوتو ويعيطو على جبل باش يرجع قبل مايقلع اليخت :
ـ جباااااال رجاع اصاحبي ...
غوت بيها ياسين وتبعاتو أيسية حتى هي كاتناديه بصراخ
ـ جباااااال ... فكر فختك لي غادي تبقا بوحدها ...حرام عليك رجع وماتعدبهاش.

لكن جبل ماكلفش راسو حتى يلتافت ليهوم وكمل السباحة متوجه للجثة ... اما داخل كابينة القيادة كان مراد واقف كايشوف فتاليا وهي فموقف محرج وكاترغب فسي مرزوق لي مكانش مهتم لتوسلاتها على الإطلاق وكايحاول يشغل محرك اليخت . 
ماقدرش مراد يصبر مزال مع أنه مكايبغيش يتدخل فمشاكل غيرو وقال بهدوء :

ـ سي مرزوق نتا راجل كبير وانا ماباغيش ندير يدي فيك سمعتيني ... 

ضار شاف فيه مرزوق بنص عين ورجع كمل شغالو وهو كايتمتم ببعض من الشتائم البذيئة لي غير وصلات لمسامع مراد غوت بلا مايشعر:
ـ وابربي وحركتي هاد اليخت من هنا هاد نهار نتا لي غادي تبات فلبحر وهانا فين قولتهالك والله يعطينا معاك شي ميتاين عام دلحبس ....

لتافت مرزوق عند مراد وهو كايضحك بسخرية واستهزاء وقال:
ـ دابا واش كاتهددني!؟

قلب مراد عينيه بغضيب وتأكد أن الجدال مع مرزوق ماعندو باش يفيدو .. مراد من داك النوع لي ماعندوش مع كثرت الهضرة واللف والدوران حنا بسرعة وسحب المسدس لي كان رابطو مع رجليه وحطو بين عينين مرزوق وهو كايقول بهدوء:
ـ كانضن دابا أنني واضح

تراجعت تاليا للخلف برعب وتوسعو عينين مرزوق بدهشة!. ماتوقعهاش منو حتى ان النفس ديالو تقطع , لو كان عارف أن مراد هاز معاه سلاح مكانش غايوافق على برم الصفقة معاه ابدا ، إبتلع مرزوق ريقو بتوتر وقال وهو كايتمتم بخوف :
ـ نتا ماتقدرش تقتلني ....

ابتسم مراد بخبث ومكر ورد عليه بصوت عميق:
ـ واثق من نفسك !

مابغاش مرزوق يبين خوفو لمراد فقال وهو كايحاول يتحلى بالشجاعة وإستعان بأخر جوكر بين يديه .
-بارشا ... ماغاديش تقدر ، حيت انا لوحيد لي نقدر نسوق هاد اليخت 

قلب مراد عينيه بغيظ وقال وهو كايبرك على أسنانو:
ـ واخا نعرف نربط طواسل بوه مع دنفيل ونخلصو باش يخرجنا من هاد لقرينة لكحلة ... فهمتيني أعمو تونسي شيباني.. ماغاديش نرحمك الى فكرتي تحرك هاد زمر كاتسمع ... وبارشا بارشا يا مدلل

هز مرزوق راسو بتفهم فاش تحرقت اخر بطاقة جوكر كانت عندو ورفع يديه باستسلام بدون ماينطق باي كلمة ممكن تسبب فموتو على يد واحد مجنون بحال مراد.

شاف مراد فتاليا لي كانت منحاشرا فزاوية الغرفة ويديها على فمها كاتحاول تكتم شهقاتها الباكية وتنهد ببرود وقال وهو كايدفع مرزوق ولمسدس فيديه :
-زيد قدامي 

دفعو لخارج غرفة القيادة وغير شافت أسية المسدس فيد مراد ، تخلعات و غوتات ثم تخبات مور ياسين لي شاف فالمسدس بصدمة ..لكن فاش لاحظ مرزوق كيف مدلول وخايف على راسو من الموت إبتسم بخبث وشاف فمراد 
وهو كايفكر ...
غريب ماشي هو نفسو مرزوق لي كان مطرطق فيهم عينيه غير دابا واحد ل10 دقايق ، سبحان الهيبة لي وهبها سيدي ربي لملاك الموت حتى أن كلشي كايتراجع للخلف إلى حضر عزرائيل وكايسقطو كاع وسائل الدفاع أمامو ومكاتبقا عند الحياة حتى شي قيمة فاش كايحضر هو .

وصل جبل أخيرا للجثة لي كانت بعيدة بعض الشئ على اليخت ، تردد فالأول انه يقترب منها يمكن خاف ويمكن هو من الأصل ماعندو غراض بهاد الجثة سوى انه يثير غضب سي مرزوق ويتحداه ، لكن خصو يتحمل مسؤلية قرارو المتهور بما أنه على بعد بضع أمتار قليلة من الجثة.

لمح شعرها الأسود الطويل لي كان طافي فوق الماء وتأكد أن الجثة هي فالأصل لبنت أو مرأة , حس بالراحة شوية ، هو براسو ماعرفش علاش! ، يمكن كان خايف ان الجثة تنوض وتهجم عليه ؟، لكن بما ان هاد الجسم الغريب كايعود لفتاة فالأصل فامغاديش تقدر تأديه. 

نفض راسو من هاد الأفكار السخيفة وإستعاد بالله ،
كيفاش غادي تهجم عليه جثة ميتة !؟... قرب من الجثة بحذر لكنو ماكلفش راسو يشوف فيها ولا يتحقق منها .. شد فطرف من سترة الغرق وسحبها موراه وتوجه لليخت وهو كايعوم بسرعة باغي يتفك منها بأسرع وقت . 

غير وصل عاونوه أسية و تاليا باش يطلع من لبحر بينما تكلف ياسين ومراد من إنتشال الجثة من الماء 
ترمات تاليا على خوها وعنقاتو وهي كاتحمد الله على رجوعو ليها بالسلامة ، فقال جبل بهدوء وهو كايشوف فختو:

ـ تاليا حبيبتي .. لا تخافي أنا بخير

شافت فيه تاليا بعيون باكية وقالت بعتاب
-لا تعيدها مرة ثانية.. والله بقسم لك إنو أنا يلي رح زتك برا هاليخت عم تسمعني .

إبتسم جبل بهدوء ورد عليها: 
ـ لا أنا هيك هخاف منك يامجنونة ... 

ضرباتو لكتفو وهي كاتقول بعتاب :
ـ مبلا لازم تخاف مني يا عنيد ... إذا بيصرلك شي ، أنا بموت من بعدك
مسح جبل على راس ختو بحنان وقال بصوتو الرجولي:
ـ بعد الشر عليك حبيبتي .

قاطع كلامهم ياسين وهو كاغوت بصوت مرتفع وبحماس
ـ مازالة عايشا !!... مراد عاوني فيها ، نتا ديرلها التنفس الإصطناعي وانا غادي نبركلها على معدتها باش يخرجو السوائل من رأتيها تافقنا ؟.

جاوبو مراد بسرعة وحماس وهو كايقرب من رأس البنت
-اوكي 

بتاسمت أسية بفرح ومسحت وجها بيديها ببعض من الراحة بينما تنهدت تالية بسعادة وإبتسمت وهي كاتقول: 
ـ الحمد لله .. بفضلك إنت هالبنت راح تعيش ، أنا كثير فخورة فيك ..

هز جبل راسو بإبتسامة خفيفة وطبطب على راس تاليا ثم شاف فجسم البنت الملقى على الأرض ، مالحقش يشوف ملامحها بسبب مراد لي كان حاني على شفايفها وكايحاول يرجع ليها نفسها لكن قدر يلمح خصل من شعرها الأسود المبلول وماقدرش يخبي الراحة لي حس بيها ... شاف فتاليا وقال: 

ـ أنا راح غير ثيابي ... 
إبتسمت تاليا وجاوباتو بسرعة وحماس:
ـ إي حبيبي روح غير ثيابك منشان ماتمرض 

إستدار جبل باش ينزل للغرفة لي فأسفل اليخت لكن إستوقفه صوت أسية وهي كاتناديه:
ـ جبل..

إلتفت جبل على صوتها الرقيق وشاف فيها فكملات أسية وهي كاتقول بإمتنان:
ـ شكرا بزاف.

هز جبل راسو بإبتسامة خفيفة ثم حنى راسو و غبر تحت اليخت بينما الشخص الوحيد لي كان طالعلو الدم ومعصب هو سي مرزوق لي كان كايشوف أن هاد البنت مجرد عبئ وحمولة زائدة .
ماكرهش كون زدقات ميته يعني كان غادي يكون حسن ... كان غادي يرجع يقلبها فلبحر ويزيد ويادار ما دخلك شر ، لكن اش غايدير مع هاد البنت لي عندها سبع أرواح

يعني الجي بي إس ضايع وراديو مهرس ، والبنزين قرب يسالي وكاين إحتمال مايوصلوش لليابسة يعني هدا غادي يطلب المزيد من الماء والمزيد من الأكل .
مكانش حاسب حساب للعاصفة كان كل همو أنه يوصل البضاعة فالوقت والزمان المطلوب ... لكن دابا كاين إحتمال مايوصلوش فالوقت .

إنطلقو يوم الأحد مع ثالثة قبل الفجر من ميناء طنجة ودابا هادي الرابعة بعد العصر فنفس اليوم .. كان من المفروض يوصلو مع السته ديال صبح او اقل بما أن المسافة قصيرة بين البلدين لكن العاصفة لي هبت فجأة غيرت كل موازين الرحلة وأصبحو في مكان مجهول بلا مايعرفو فين هوما .
كل مكايشوفوه قدامهوم هو البحر من القدام ومن لور ومع جناب ، مجرد بحر ، ومكاين حتى شي علامة لي كادل أنهم قرابين من اليابسة

لكن الهم ديال مرزوق الوحيد هي البضاعة لي محمل معاه ...، 1000 كيلو من مخدر الحشيش بالإضافة للحبوب المهلوسة أسفل القارب خصها توصل للزبون فالوقت المطلوب وإلا غادي يكون فورطة حقيقية ماغايقدر حتى حد يطلعو منها ولا يعتقو من بين يدين "البارون" و "الدون ماركيز"

فين كان عقلو نهار لي فكر يهرب معاه مهاجرين غير شرعين ، هو يعني قال زيادة الخير خيرين ، غادي غادي ، يهز معاه بليصات ويغامر بيهوم.
شكون لي غادي يرفض جوج دلمليون للشخص يعني 10 دلمليون غايكسبها ف 3 ديال الساعات بالإضافة لفلوس لي غايشد ملي غايسلم البضاعة ... يعني ثروة يعني المجد بعينة .

رغم أن اليخت ماشي ديالو ولا حتى البضاعة ، هدا مكايعنيش انه غايربح غير القليل بل الدور ديالو أهم من المصدر والمستقبل بحد داتو ، بلا بيه حتى شي واحد ماغايربح وحتى هاد البضاعة الغبية مكان غايكون عندها حتى شي قيمة بدون فخامة سي مرزوق . ولا حتى العصابة لي كايشتاغل لصالحها غاتوصل للي وصلاتليه حاليا.

سي مرزوق كان فزمناتو كايسوق باخيرات صيد السمك في المرسئ لي متواجدة فمدينة تونس العاصمة الإقتصادية التونسية وكان عايش اواكل طرف ديال الخبز غير من المرسئ فلحلال ، لكن مكان كايكفيه الدخل ديالو فوالو ، واش يصرف علي دارو ولا يقري بيها بنتو الوحيدة لي تزادت بعد عناااء مع الأدوية حتى كان كايقول أنه عاقر ومكايولدش ، لكن فسن الخمسين رزقو الله بديك البنيتة لي دخلات الفرحة على حياتو وحياة مرتو .

لكن البلية ديال الشراب ولحشيش بالإضافة للقمر خلات مرتو تمل منو وتكرهو ، بعدما رهن البيت لي كايكساب فلقمر وخسرو ، فلقا راسو هو ومرتو وبنتو فالشارع وبدون مأوى ، لهذا مشا سكن مع نسابو هو ومرتو وبنتو. لواحد الفترة. 

لقا سي مرزوق راسو أمام طريق مسدود ، كثرت المشاكل وحريق الراس ،... هدا لاش هز حوايجو وسافر للمغرب بعدما تعرضات عليه مهمة توصيل الحشيش لإسبانيا بمقابل مالي كبير

مرزوق من داك نوع المتملق والمتملص كايعرف كيف يدير يخرج من المشاكل كيف الشعرة من العجين حتى إلى ضطر يورط غيرو وينجى هو فماعندوش مشكل ، دائما كايطبق مقولة " أنا ومن بعدي الطوفان" حتى لو إبتلع الطوفان أقرب الناس ليه فماغاديش يهتم ، مصلحتو الشخصية هي الأهم ، المهم يحقق أحلامو ولو كان السبيل الوحيد لأحلامو هو تسلق ظهور الغير او العبور على جثثهم. 

" أنا " هي كلمة سي مرزوق المفضلة وهي نفسها كلمة إبليس لي استحق بها غضب الرب ولعنته إلى يوم القيامة "أنا خير منه ، خلقتني من نار، وخلقته من طين""

مرزوق مكاتهموش الروابط الأسرية ولا الإنسانية ومكايهموش الضمير لي فقدو برضاه .. هدا لاش سيفط الوثيقة ديال الطلاق لمراتو بعدما تفتح أمامو باب الرزق الحرام وماعقلش عليهم من داك لوقت.

خدمتو كانت ديما نقية وماعمرو تشد من طرف شرطة السواحل لا المغربية ولا الإسبانية هدا لاش ولا محبوب عند رؤسائو ومكايستغناوش عليه فمسألة توصيل البضاعة ومكايبخلوش عليه ، فالمقابل كايعطيوه غير لمليون ينطح لمليون.

واخا كبر اولا فعمرو 70 عام الجشع ديالو بالإضافة للحظ لي ديما واقف معاه كان السبب لي خلاه مازال متشبت بالمهنة ديالو لي كاتمنحو بزاف ديال لفلوس . لكن دابا هو فورطة كبيرة ... وهاد الورطة ممكن توضع لمسيرته المهنة الناجحة حد ونهاية.


بالنسبة للهجة السورية غادي تسالي بداية من الفصل 3 ماغاديش تبقاو تشوفوها ..مكاين غير الدارجة نعام اسيدي 
انا ضطريت ندخل لهجة سوية باش نعرف بأصول الشخصيات لي فالرواية 
يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.