العشيقة الصغيرة الجزء 12

من تأليف fatesha
2018

محتوى القصة

رواية العشيقة الصغيرة

فيصل كيف كل صباح كيوصل ولدو للمدرسة و كيدوز على المطاعم ديالو ...تاجه لريسطو شهد ..المطعم الاقرب لقلبو واخة عندو افخم منو و لكن هاد المطعم كيفكرو بشهد دكشي علاش عاطيه قيمة اكتر ... نزل من الاوطو و دخل ..سمع الصداع شي وحدين كيدابزو 
....:انا قلت ليك باغا نخدم هناا 
احمد(المكلف بالريسطو):ماشي اي واحد كيخدم هنا و زايدون حنا مامحتاجينش خدامة دابا 
....:ولكن انا محتاجة لهاد الخدمة بزااف 
احمد:سمحيلي ماعندي فاش نعاونك 
فيصل:شنو واقع هناا 
شافتو هاديك البنت و هي تسخف بين يديه 
فيصل:مال هادي 
احمد:ماعرفتش ياله كانت مزيانة 
فيصل:جيب شي ريحة 
جاب ليه احمد الريحة و دارها ليها ف نيفها و بدات كتفيق 
.... دايخة:فيصل فيصل هادا نتا انا مكنحلمش واش مشيت للجنة ياربي 
فيصل:واش نتي بيخير 
.....:اول مرة نكون فيها بيخير ف حياتي 
احمد:يمكن ليك تمشي دابا ملي بيخير 
....:لا انا مباغاش نمشي من هنا بعد ما لقيتك"موجهة هضرتها لفيصل" 
فيصل مافاهم والو كيشوف فاحمد و كيتسائل مال هادي 
.... شدات لفيصل فيدو:خليني نخدم هنا عافاك انا محتاجة نخدم هنا عافاك 
فيصل:كنضن مغنهضروش على هدشي و حنا مليوحين فالارض هكا 
.....:ههههه اه اه عند الحق "ناضت و ساست حوايجها و قادات شعرها"دابا نقد نخدم هنا ياك 
فيصل:واش فايت ليك خدمتي فشي ريسطو 
....:اه اه بزاف ..اا يعني عندي خبرة 😃
فيصل:صافي خليها هنا ا احمد وريها الخدنة كيكاتمشي انا خاصني نمشي 
مشا فيصل و هاديك البنت من وراه كادير ليه باي باي و كضحك 

ياسمين و رميساء كيوجدو راسهم باش يخرجو ..ياسمين لبسات طاي بوط فالخزي وصاية طويلة فالبيض و فيها وريدات صغار ملونين ...صندالة عالية فالباج و صاك صغير بسنسلة فنفس اللون ...طلقات شعرها و دارت شوية د الميكاب ...اما رميساء لبسات شورط فالبيض و تيشورت فالبلو سيال و صبادري فالغوز و جمعات شعرها 
هبطو مشادين فطرو دغيا و ركبو فلوطو د ياسمين ...الطريق كاملة و هوما منوضين الحيحة مخدمين الاغاني بجهد و كيغنيو معاهم لي دازو من حداه كيبقا يشوف فيهم و هوما مكاينينش فهاد العالم و مامسوقينش ...وصلو لمحل الالعاب ...دخلو للداخل و رميساء مشات لجيهت النونوسات لي على شكل حيوانات بقا كتشوف و تعزل فيهم حتا بانت ليها ياسمين غادة ب طخوتينيت و حاطة قدامها دب كبير 
رميساء:واقيلة ماما حماقت 😯
مشات تبعاتها و عي تلقاها واقفة قدام واحد اللعبة ديال ماشا و الدب و كتلعب بيهم و تهضر معاهم 
رميساء:حالتك صعيبة اماماتي 😯
حطات ياسمين هداكشي و مشات لبلاصة الماطر و لي سكوتر ركبات فواحد فالحمر و بقات كضور بيه حتا وقفات قدامها رميساء 
رميساء:اش كديري اماما شوهتينا 
ضحكات معاها ياسمين و حطات ماشا حداها و كملات طريقهاا ...تبعاتها رميساء و خداو لعبات التركيب و بداو كيركبو فيهم تمااا ...من بعد مشاو للاحصنة المتحركة ركبو فوقهم و بقاو كيلعبو بجوج ....دارو الاجنحة و هزو العصا السحرية و بدات رميساء كتجري و ياسمين تابعاها حتا لقاو رجال الامن قدامهم 

مدير المحل:اش هاد الفوضى درتو لي هنا خاصك تخلصي ا مدام الخسائر لي سببتو 
ياسمين:مالنا اشنو درنا كاع راه غي لعبنا شوية 
المدير:شريهم و سيري لعبي بيهم ف داركم 
ياسمين:واش عارف راسك معامن كتهضر اولا 
المدير جرها من دراعها ل لاكيس 
ياسمين:هييه نزل يدك علياااا"طرشاتو"
رميساء تخلعات و بدات كتبكي و الناس تجمعو عليهم 
المدير هز يدو بغا يضربها و شي حد شدها ليه و ضورو لعنو ضربو براس 
ياسمين:فيصل اش درتي 😯
جبد الفلوس من جيبو و لاحهم عليه و جر ياسمين و رميساء خرجهم لبرا و آسر وراهم 
ياسمين دفعاتو:اش هاد التصرف درتي اش دخلك 😡
فيصل:شنو كنتي باغاني نخليه يضربك 
ياسمين:ماش...
آسر قاطعها و هو غي كيشوف فيها:نتي ياسمين😯
ياسمين ضورات راسها كتشوف فيه و رجعات كتشوف ف فيصل و كتسولو بعينيها 
فيصل:ممكن نحيدو بعدا من هنا خاصنا نهضرو ضروري 
ياسمين بشوية:معندنا فاش نهضرو ا فيصل و مديرش هكا قدام رميساء 
فيصل:اخر مرة سمعيني لاخر مرة فحياتك 
ياسمين بدات كتفكر واش تسمع ليه اولا حتا هضر آسر 
آسر:كاينة حديقة الالعاب غي هنايا انمشيو انا و رميساء نلعبو ياك ا رميساء 
رميساء شافت ف ياسمين لي حركات ليها راسها لمعنى اه ...تقابطو و مشاو للحديقة يلعبو 
ياسمين:شنو باغي تقول 
فيصل:اجي نجلسو بعدا 
جلسو فالكراسة لي تما و بدا فيصل كيهضر 
فيصل:انا غانقولك هادشي غي باش متبقايش واخدة نظرة خايبة علياا حيت نتي ظلمتيني بزاف و مخليتينش نشرح ليك من الاول و نتي دابا فرحانة معا عائلتك الصغيرة و انا هدشي لي باغي 
ياسمين:شنو الموضوع افيصل 
فيصل:اولا موضوع شهد الله يرحمها 
ياسمين:قلتي الله يرحمها 😯
فيصل:اه شهد ماتت هادي خمس سنين ..ملي تفارقنا انا وياك بغيت نكري واحد المطعم صغير و هي كانت مولاتو تما فين تعارفنا و عاوناتني بزاف و عرفت من بعد بلي هي مريضة بسرطان الدم و مكانتش باغة تعالج وقفت معاها و قنعتها تعالج و تعالجات ملي خرجات من الكلينيك تزوجناا و بسبب وضعها الصحي مكانتش تقدر تولد دكشي علاش تبنينا آسر ومن بعد"دمعات عينيه"رجع ليها المرض و خبات عليا بقات حتا نتاشر ليها فجسمها و .."حابس البكية"ماتت 
ياسمين تاترات:الله يرحمها 😢 انا كان كيحساب لي ...
فيصل:بلي كنت معاها قبل مانتفارقو 
ياسمين حنات راسها بندم 
فيصل:ومزال موضوع احسان الله يرحمها حتا هي بنت راجلك ..حتا هي مكان بيني و بينها والو ...كل ماكاين ان البنت كانت مريضة و انا غي عاونتها و هي فهمات هاد المساعدة غلط ..على اي الله يرحمهم بزوج و يغفر ليهم "هز ليها راسها"انا ماقلتش ليك هدشي باش تحسي بالدنب اولا الندم حنا مامكتوبينش لبعضياتنا و لكن كانتوقع ولادنا اتكون بيناتهم شي حاجة هههههه
ضارو بزوج كيشوفو فيهم كيفاش كيلعبو بزوج 
ياسمين ضارت كتشوف فيه:سمحلي افيصل انا جرحتك بزاف و معطيتكش فرصة تشرح لي 
فيصل:لي فات مات اياسمين و كنتمنى تكوني سعيدة معا امير "ناض وقف و مد ليها يديه"تهلاي فهاديك الباسلة 😃
ياسمين سلمات عليه و بتاسمات ليه ....مشا عند آسر قاليه يمشيو و رميساء جات عند ياسمين 
رميساء:قالي آسر بلي نتي وباباه كنتو اصدقاء فحالنا باش كنتو صغار 
ياسمين عنقاتها:نتوما غاتكون حسن منا احبيبة

ركب فيصل و آسر ف لوطو و آسر كيتسناه يبداا يعاود ليه 
آسر:وا هضر خلاااص ضرني راسي 
فيصل:كنحس فحالا حيدت شي هم تقيل على قلبي و رتاحيت 
آسر:و دابا خاصك تشوف حياتك حتا نتاا 
فيصل:و هاد المهمة صعب من انني نهضر معا ياسمين حيت ما غانكمل غي معاا لي اتختارها لي نتا و لي غاتكون مرتاح معاها 
آسر:انلقااوهااا ههههه 
فيصل:هههه فيك الجوع 
آسر:اااه نمشيو ناكلو ف ريسطو د ماما 
فيصل:عاد مشيت ليه الصباح و لقيت تما واحد الحمقة كتقلب على خدمة و كتقول محتاجة ليها واخا باين من شكلها مامحتاجاش 
آسر:زوينة؟ 
فيصل ضار كيشوف ف آسر :شفتك زربان ههههه 
آسر:شوية هههه 
وصلو للمطعم و نزلو دخلو للداخل 
فيصل:احمممد 
احمد:اهلا اهلا بسي آسر بغيتو تغداو ياك 
فيصل:اه حنا انجلسو على برا جيب لينا لتما ..اه اجي هديك البنت كيغادا معا الخدمة 
احمد:البنت مكاتعرف دير والو ا فيصل باينة عمرها خدمات سرباية و هضرت معاها تمشي فحالها كتقولي فيصل لي خدمني هنا 
فيصل:صيفتها ليا على براا 
احمد:واخة 
خرج فيصل و آسر لبرا و جلسو فواحد الطاولة .... و جات هديك البنت وقفات عليهم 
فيصل:اا شنو سميتك بعداا 
ماريا:سميتي ماريا 😃 نتا عيطتي ليا باش تجري عليا و لكن انا مغنمشيش من هنا😃😃😃

فيصل:انا لي كنقرر هدشي ماشيي نتي و زايدون نتي كدبتي اولا حيت قلتي نتي محتاجة لهاد الخدمة تانيا حيت قلتي عندك خبرة 
ماريا جلسات معاهم فالطبلة: اه انا كدبت كدبة صغيرة باش قلت عندي خبرة و لكن ماكدبتش باش قلت محتاجة لهاد الخدمة 
فيصل:حالتك هادي مكنقولش محتاجة لخدمة 
ماريا:اه نتا حسابلك محتاجة للفلوس ههههه لا لا انا قصدت محتاجة نبقاا حداك..مالك كتشوفو فيا هكا 
فيصل:واش نتي هاربة من سبيطار الحماق 
ماريا:لا لا انا بعقلي😃
فيصل:واخة الالة بعقلك مزيان و لكن نتي مطرودة من هنا 
ماريا:مايمكنش ليك تطردني 😃
فيصل تعصب :واشش باغا تحمقيني معاك ولا شنو اش هاد الفعايل د
البراهش 
ماريا:يااااي حتا و نتا معصب كييوت😍😍
آسر بدا كيضحك و خنزر فيه فيصل جمع الضحكة 
فيصل:ايلا مامشيتيش من هنا انعيط لبوليس
ماريا:اشنو وصلنا لشي بوليس انا باغا غي نخدم هنا و تبقا قريبة منك و صافي نتاا واقيلة مكدخلش لانستغرام بزااف دكشي علاش معرفتينيش
فيصل:كيفاش اشنو دخل انستغرام
ماريا:دابا انا خاصني نعاود ليك من الاول ...انا افيصل من ااااااششششد المعجبين بييك و حتا دايرة ليك صفحة د الجيش الفيصلي ههههههههههه
آسر كيموت بضحك و فيصل كيضحك بالفقسة 
ماريا:انا كانعرف عليك كولشي و تفرجت فكاع اللقائات لي درتي و بيتي عامر بتصاورك و من زمان و انا باغة نتلاقاك و لكن مكانتش عندي الجرأة و ليوم تغلبت على كلشي و جيت حتا لعندك باش نخدم عندك و باش نكون قريبة منك 😃😃 
فيصل موجه هضرتو ل آسر:مكانش كيحسابلي انا مشهور لهاد الدرجة 😯
ماريا:غاتخليني فالخدمة يااك 
فيصل:ماريا هادش...
ماريا قاطعاتو:ياااه سميتي طالعة من فمك فحااال العسل 
فيصل :ياربي اشنو درت باش تسلطتي علياااا 
ماريا😃😃😃😃:خليني هنا عافاك و انا غانتعلم معا الوقت 
فيصل:واخا بقاي هنا و عندك اسبوع تعلمي فيه من بعدو ايلا درتي شي غلط اتخرجي راسك و متخلينيش ندير شي تصرف خاايب ..ياله ا آسر 
ناض فيصل و آسر لي بقا ضاير كيشوف ف ماريا لي كدير ليه باي باي و كضحك 
ماريا:ماعرفتي بعد اسبوع نولي حبيبتك 😍😍

رميساء و ياسمين جالسين فالزعلولة فالجردة و كياكلو الكلاص 
ياسمين:عنداك تقولي شي حاجة لباباك على دكشي لي وقع فمحل الالعاب ايتعصب على والو 
رميساء:مخاسكش تخبي عليه و لكن ملي طلبتيني منقولش ليه 
ياسمين:ماشي انخبي عليه غي الموضوع صافي تحل و ايتعصب على والو 
رميساء:كون مكانش اماما هاداك الصديق ديالك كون ضربك هاداك الحمار خاصنا نبقاو نخرجو معانا روكي باش لي قرب ليك نطلقو عليه 
ياسمين:اه و نتي خاصك غي الفرصة لي طلقي فيها هداك الكلب 
رميساء:حيت خاصنا نستعملوه فموقف فحال هادا 
امير جا من وراهم:شنو كيديرو الاميرات دياولي هنا 
رميساء:كنتبردو شوية ههههه 
امير جلس وسطهما و عنقهم بزوج:عندي ليكم واحد المفاجئة 
ياسمين و رميساء:شنو هيااا😍
امير اندوزو هاد الويكاند فالقرية 
رميساء ناضت كتنقزز:ياااااااي اخيرا انشوف الدجاج و الفلالس ددياوللي 😍😍
ياسمين و امير:ههههههههههههه 
ياسمين:انا بااغة غي البحر 😍
امير بهمس:الحوتة ديالي نتي 
ياسمين🤗🤗
بقاو مجمعين فالجردة حتا طاح الظلام و دخلو جلسو يتعشااو ....تحط العشا و بداو يتعشاو حتا هضرات رميساء 
رميساء:ليوم تلاقات ماما بصديق طوفولتها😃
ياسمين ضارت خنزراات فيهااا دارت فيها شوفة ديال القتيلة 
رميساء:مقلتيليش نخبي على بابا حتا هادي 🙁

ياسمين زادت خرجات فيها عينيها باش تسكت 
امير:شنو مخبيين عليا 
رميساء:حن...
ياسمين قاطعاتها:رميساء حبيبة ممكن طلعي لبيتك انهضرو انا و باباك 
رميساء شافت فيهم و طلعاات لبيتها 
رميساء:واش غلطت ف شي حاجة ☹

امير:شنو كاين 
ياسمين:ليوم وقع لينا واحد المشكل فمحل الالعاب 
امير:مشكل ديالاش 
ياسمين:ااا انا و رميساء نسينا راسنا و بدينا كنلعبو تما و لكن غي شوية و جراو علينا من المحل صافي هدشي لي وقع 
امير:هههههه باينة لعبتو بزاف ماشي غي شوية عندي جوج برهوشات فهاد الدار 
ياسمين بينها و بين نفسها:الحمد لله معاقش بيا 
امير:و شنو موضوع صديق الطفولة ياكماا..
ياسمين:فيصل ..شفنا فيصل بالصدفة قدام محل الالعاب ..اه و رميساء و ولدو اصدقاء 
امير:امم مزيان 
ياسمين:انا غانجمع الطبلة 
امير:و انا غانطلع عند رميساء 
ياسمين😱:ععلاااش؟
امير:باش تقولي لحقيقة"قرب لوجها"مكتعرفيش تكدبي ا ياسمين 
طلع امير لعند رميساء و ياسمين جاسات شادة راسها 
ياسمين:اوووف كون غي قتلو الصراحة :)

امير حل الباب دبيتها:رميساء واش نعستي 
رميساء:لا مزال 
امير جلس حداها :اش ديك الفضيحة لي درتي نتي و ماماك ههههه 
رميساء:هههههه رونا المحل كامل ولكن كون ماتدخلش عمو فيصل كون هداك الحمار ضرب ماما 
امير 😡: الحمار؟ 
رميساء:المدير د المحل ملي شافنا اشنو درنا بغا يضرب ماما و عمو فيصل حبسو و ضربو 
امير😡:واخة نعسي دابا احبيبة مشا الحال تصبحي على خير 
باسها و نزل بسرعة عند ياسمين 
ياسمين :) :امير انا...
امير قاطعها:ناي شنو ا ياسمين نتي شنو ..نتي وليتي كتكدبي عليا و فوجهي و شنو كتعلمي بنتنا هاا؟ كتعلميها تخبي عليااا ولكن الحمد لله مشبهاتش ليك ف كدوبك 
ياسمين😡:امير واش عارف اشنو كنقول هادي اول مرة نخبي عليك شي حاجة و ايلا خبيتها غي علا قبل صحتك باش متعصبش 
امير:اه معلوم حيت نتي دابا مزوج بواحد الراجل كبير و مريض معارفاهش يموت غدا و لا بعدو ونتي صافي شفتي حبيب القلب القديم ...
ياسمين:غاندير راسي فحالا ماسمعتكش ا امير حيت نتا دابا معصب و ودنك مكتسمعش اش خارج من فمك 😢
خلاتو و خرجات بالجرا لدار حسام ..كدق عليهم و حلات ليها سناء الباب 
سناء 😱:ياسمين مالك علاش كتبكي 
ياسمين عنقاتها:واخة نبات عندكم هاد الليلة 
سناء:دخلي دخلي قولي لي اشنو وقع 
ياسمين:واخة متسولينيش عافاك ماقاداش نهضر 
سناء:واخة اجي نديك ترتاحي 
داتها لبيت الضياف و مشات عند حسام
حسام:شكون لي جا 
سناء:ياسمين اتبات عندنا هاد الليلة 
حسام:ياك لاباس 
سناء:مقاتليش ولكن باينة دابزات هي و امير 
حسام:هاهو كيعيط نييت ..الو ..اه جات عندناا ..شنو وقع ...لوك ..تصبح على خير 
سناء:شنو قالك 
حسام:حتا هو مابغاش يهضر 
سناء:يعلم الله علاش دابزوو 


امير جلس شاد راسو و كيحاول يتهدن حتا سمع صوت البكا ...ضار و شاف رميساء جالسة فالدروج و كتبكي ...ناض عندها دغيا و حيد يديها على وجها 
امير:علاش كتبكي 
رميساء:اهئ اهى نتوما دابزتو بسباابي 
امير عنقها:شوو ماشي بسبابك احبيبة 
رميساء:اتكون غضبانة عليا بزااف😢
امير:ماشي قد ما غضبانة علياا 
رميساء:علاش شنو درتي ليها حتا نتا 😢
امير:قتليها شي هضرة مكانش خاصني نقولها 
رميساء:و فين غاتكون مشات دابا  :) 
امير:متخافيش اتكون غي حدا دار دابا تجي و نتي خاصك تمشي تنعسي دابا حيت غدا عندك مدرسة 
هزها امير و دخلها لبيتها حطها فوق السرير و غطاها ..باسها و طفا الضو و خرج .... بعد على بيتها و جبد تيليفونو عيط على حسام عرفها مشات عندهم و خلاها على راحتها 

🌞🌞
هاد الصباح وصل فيصل آسر للمدرسة و مشا لريسطو شهد يشوف هديك الحمقة اشنو كدير ...وصل و دخل نيشان عند احمد 
فيصل:صباح الخير 
احمد:صباح النور مزيان لي جيتي كنت غانعيط ليك نيت 
فيصل:ياك لاباس 
احمد:هاديك البنت الحمقة هرسات البارح عشرين طبسيل و زلعات القهوة على جوج د نااس ايلا بقات غاتجري لينا على الكليان 
فيصل:ماافيهااش امل ياينة 
احمد:سمعتي هاد الصوت 
فيصل:لا ..ا شي وااحد كيداابز 
ناضو بالجرا يشوفو اشنو واقع لقاو ماريا مشادة معا شي وحدة 

كانت ماريا واقفة فواحد الطبلة فيها البنات و كتحط ليهم داكشي لي طلبو حتا سمعات وحدة كتهضر 
البنت:خاصني ضروري نشوف فيصل اليوم سمعت بلي ولا كيجي لهنا بزاف هاد المرة ضروري يخرج معايا 
ماريا😡😡😡:واقيلة كتهضري علا حبيبي 
البنت:باردون؟ 
ماريا:هاداك لي كتحلمي تخرجي معاها هو حبيبي 
البنت:ههههههههههههه"ضارت عند صحاباتها"واش من نيتها هادي "ضارت عند ماريا "سيري شوفي راسك فالمراية احبيبة فيصل ايخلي انا العارضة المشهورة و يتصاحب معا سرباية فحالك ههههههههههه
ماريا شدات كاس د العصير محطوط فوق الطبلة و كباتو عليها 
البنت😡:واش حماقيتي ولا مالك"ناضت صرفقاتها" 
ماريا جن جنونها شدات هديك البنت من شعرها و طيحاتها للارض و و جلسات فوقها كتنتف فيها و تقمش ...الناس كيجرو فيها و هي لاسقة فيها 
ماريا:اتعاودي تقربي من حبيبي الموونيكة انشوه ليك كماارتك لي فرحانة بيها 
فيصل:مااارياااا😡😡😡

فيصل: مااريااااا😡😡"نوضها من فوقها"اشنو كاديري واش حماقيتي😡
ماريا:انااا...
فيصل قاطعها:غادي تخرجي داااباااا من هناا و مانعاودش نشوفك واخا غي صدفة اولا غانجيب لي يخرجك بزز 
ماريا شافت فيه و الدموع ف عينيها حيدات الطابلية و حطاتها تما و خرجات 
فيصل موجه هضرتو لهديك البنت:سمحيلنا على هدشي لي وقع مغاديش يتكرر 
البنت:ماشي مشكل انا نسيت اصلا فيصل ماكرهتش نخ....
فيصل:بصحة فطوركم"مشا و خلاها مخرجة عينيها" 
البنت هزات المرايا:ويلي ويلي ويلي الحيواانة كيرداات لي وجهي و انا عندي تصوير غدااا😭😭😭
فيصل دخل معا احمد للادارة
فيصل:سمع ايلا عاودات جاات هاديك الحمقة لهنا جيب ليها البوليس 
احمد:كون هاني مكانش علينا نخدموها من الاول 
فيصل:عطيناها فرصة و مستحقاتهاش المهم خاصني نمشي دابا تهلاا 
احمد:الله يعاون

امير:رميساء فيقي ايمشي عليك الحال 
رميساء حيدات عليها الغطا:واش مجاتش ماما 
امير:باتت عند خوك 
رميساء:مقلقة منا لهاد الدرجة :) خاصنا ضروري نصالحوها 
امير:عندك شي فكرة 
رميساء:امم اه عندي واحد الفكرة و لكن خاصني نعاونك اذن مغانمشيش للمدرسة 🤗
امير:هههه باغة غي السبة المهم شنو هي الفكرة 
رميساء:امم غادي تصايبة شي غداا يكون كيعجبهااا و خاصك تمشي تشري الورد و تجيب ليها شي كادو خاتم اولا سنسلة المهم كادو 
امير:و ايلا جات قبل الغدا 
رميساء:امم نعيطو على خالتي سناء و نقولو ليها متخليهاش تخرج حتا لوقت الغدا 
امير:اري هاد الراس نبووسو 
رميساء:ههههه🤗🤗
نزلو امير و رميساء للكوزينة و جابو طابليط 
امير:شنو غانطيبو 
رميساء:اكتر اكلة كاتعجب ماما 
امير:امم الحووت ..نصايبو حوتة كبيرة فالفران 
رميساء:ولكن مكايناش 
امير:انا غانخرج دابا نجيب كلشي و نتي قادي الطبلة د الجردة حيدي الورد من تما و قاديها 
ضربو فيدين بعضياتهم و مشا كل واحد يقضي شغلو 
ياسمين فاقت معطلة حيت منعساتش بكري ..غسلات وجها و نزلات لتحت لقات سماء جالسة فالصالون 
سناء:صباح الخير ياسمين 
ياسمين:صباح النور 
سناء:كنضن دابا اتقولي لي اشنو واقع 
ياسمين:خاصني نمشي دابا لدار 
سناء:لا لا ماعندك فين تمشي اتجلسي و تعاودي لي اشنو واقع 
ياسمين:واخة واخة 

رجع امير للدار هاز فيديه التقدية دخلها للكوزينة و عيط على رميساء تجي عندو ...قلبو على طريقة التحضير ف يوتيوب و بدا كيصايبو معاه ...ردو الكوزينة حالتها القشور فجةو الخضرة فجهة اخرى اما المعان حتا اللي مطيبوش بيه وسخوه ..دخل امير الحوت للفران و ضار عند رميساء 
رميساء:خاسنا نجمعو هدشي 
امير:مبقاش لينا الوقت بزاف موال خاصنا نصايبو لي صالاد و العصير حتا نكملو و نجمعوها 

سناء:غي كان معصب اصاحبتي 
ياسمين:عارفاه كان معصب ولكن هديك الهضرة جرحاتني كيفاش من بعد هاد السنين كاملة و مزال شاك بلي كنبغي فيصل لي كل ماكان كيقرب لي و يبغي يهضر معايا مكنخليهش 
سناء:انا متاكدة ماقصدش دكشي لي قال و هو هضر هكاك غي حيت خبيتي عليه هداك الموضوع لمهم نتي مزال حتا مافطرتي انوض نوجد ليك الفطور 
ناضت سناء و بقات ياسمين فبلاصتها كتفكر شنو دير بغات تهز تيليفونها مالقاتوش و تفكرات بلي خلاتو فالدار ...خرجات من دار حسام و مشات لدارها و هي كضن بلي مكاين لا امير لا رميساء حلات الباب و سمعات التخرخيش فالكوزينة مشات علا صباع رجليها حتا وصلات ليها و هي تحل فمها من الصدمة 
ياسمين:اش هااد الحالة درتو للدار 😱😱😱😱😱😱😱😱

ياسمين:اش هااد الحالة درتو للدار😱😱😱😱😱
رميساء كتشوف ف امير و امير كيشوف ف رميساء 
رميساءشنو لي جابك داابااا
ياسمين:كيفاش شنو لي جابني دابا و نتي شنو كديري فالدار ياك عندك مدرسة 
امير:انا لي قتليها بلاما تمشي 
ياسمين مكتشوفش فيه:ملي تساليو لعبكم جمعو الدار 
طلعات بالزربة لبيتها و سدات الباب 
ياسمين:و انا لي كان يحساب لي ايجي يعتاذر و عوما ماعلا بالهومش بيا جالسين يليعبو بزوج  😔 
خدات دوش و لبسات كسوة قصيرة فالغوز بارد نص كم دارت ميكاب خفيف و صايبات شعرها طلقاتو ..ياله كانت اتلبس صبادري و هو يتحل الباب 
رميساء كطل عليها من الباب:ماما 😔
ياسمين:نعام ا رميساء 
رميساء دخلات و سدات الباب و جلسات حداها فالسرير:ماماتي 😢
ياسمين:رميساء ايلا غاتقولي شي حاجة قوليها حيت خاصني نخرج 
رميساء:متبقايش مقلقة منا عافاااااك 😢
ياسمين شدات وجها بين يديها:انا مامقلقاش منك احبيبة 
رميساء:ولكن انا سباب فهدشي لي وقع😢
ياسمين:لا احبيبة نتي مادرتي والو انا مكانش عليا نخبي من الاول 
رميساء:اذن غاتسامحي بابا 🤗
ياسمين:ماشي بهاد السهولة 😉
رميساء تلاحت فوق الناموسية و نعسات:هيييي تحياا ماماتي 🤗🤗
ياسمين:تحنات عندها:قولي لي شنو كنتو كديرو التحت 
رميساء:منقدش 🙊
ياسمين:ايييه دابا متقديش تقولي و انا البارح فضحتيني 
رميساء:باباتي داير ليك مفاجئة منقدش نقوليك كتر من هكااا 
ياسمين:امم مزيااان🤗

فيصل و آسر فالدار كيتغداو 
آسر:حشومة عليك ياك قلتي اتعطيها اسبوع 
فيصل:فضحاتنا ا آسر كون خليتها اسبوع كون مابقا كيجي عندنا حتا حد 
آسر:يعلم الله كيفاش اتكون حالتها داباا 
فيصل:هكا حسن ليها خاصها تخرج من هدوك الاحلام البايخة لي عندها 
آسر:ولكن هي ضريفة الصراحة تقال 
فيصل:نتا شفتيها غي عشرة د الدقايق و عرفتيها ضريفة 
آسر:ووي ضريفة و قلبها بيض 
فيصل:المهم كمل ماكلتك داباا
كملو غداهم و ناض فيصل يجمع الطبلة و خدا آسر تيليفون فيصل و طلع لبيتو 
آسر:اشنو كانت قالت سميت هديك الباج اووف تفكر تفكر اااه الجيش الفيصلي 
دخل الانستغرام د فيصل ة قلب منو على هديك الصفحة دخل ليها و بدا كيشوف التصاور لي فيها 
آسر:هادي و الله حتا حمقة هههههه
اكترية التصاور اللي حاطة د فيصل ف المقابلات الصحفية اللي داار و فالاعلانات د المطاعم و الضور الاخرى كلصقة تصاورها معا تصاورو 
آسر:شنو اندير دابا نصيفت ليها ميساج زعما تكون داخلة ليه دااباا امم نجربوو 

ماريا جالسة فوق سريرها اللي ولا عامر فكلينيكس فازك بدموعها 
ماريا:اههههههئ اهئئئئىى فييييصل😭😭صافي فيصل مشااا😭😭اشنو غاندير داابااا ...كوووون نشد هديك الصفريطة نشرب من دمهااا هياا السبااب هياا كان ضروري تقول هديك الهضرة ملي كنت واقفة تماا كون تسناات غي حتا مشيت و تقولها😭لا لا اصلا مخاصهااش تقول هديك الهضرة حيت فيصل حبيبي😭لاااااا اهئ اهئ اهئ فيصل مااشي حبيييبييي اهىئ اهئ "بدات كتقلب على تيليفونها وسط هديك الروينة و دخلات لانتستغرام"ياريت كون تصورنا بصح هاد التصاور اهئ اهى اهئ علاااش جريتي عليا علاااش 😭😭 صافي صافي تهدني اماريا اش هاد الحالة وصلتي ليها صافي خاصني نتهدن ايلا مشا فيصل يجي حسن منو😃 لا لا اهى اهئ مكاااااينش حسن من فيصل😭😭 اوووف صاافي براكة من هاد الدل صافي هو معقد ماباغيش يرتبط صافي خاصني نساه"ناضت وقفات فوق السرير"خاصني نحيد هاد التصاور من هنا و نمسح هديك الباج و صافي غادي نساه معا الوقت صافي😃😃غايجي نهار لي يبوس لي رجلي و مغنرتابطش بييه حيت ديك الساعة انكوون معا اللي حسن منوو😃😃صافي انا ماريا القوية 💪🏻💪🏻"سمعات صوت التيليفون و رجعات جلسات و هزاتو"اممم مساج من انستغرام شكوون هدا يا تري امم ندخلو نشوفو ..ااا لا لا ميمكنش لا يمكن فو كونط لا لا هادا حسابو الحقيقي ميمكنش ميمكنش"ناضت فوق الناموسية كتنقز و تعاود تنقز بالفرحة"ياااااي فيصل صيييفت لييي سلام صااافي وليت حبيييبتووووو😍😍😍😍ياااي تحقق حلمي اخيييرا"طاحت ناعسة فوق السرير و رجعات كتشوف فالميساج و كضحك بوحدها"

آسر:هادي مالها عشرة د الدقايق و مزال مجاوبات ..على سلامتناا 
ماريا:السلام ..شنو بغيتي 
آسر:بغيت نعتاذر على دكشي لي وقع الصباح و انا عارض عليك هاد الليلة للعشا كانتمنى تقبلي 
ماريا شافت اش قال و هي تخرج عينيها من الصدمة:ياربي ياربي ايلا كان هدا حلم خليني ناعسة طول حياتي فيصل عارض علياااااااااا😍😍"ناضت عاوتاني فوق السرير و بدات كتنقز"
آسر:اوف فين كتمشي هادي دبا يعيق بيا بابا 
ماريا:واخة فين انتلاقاو 
آسر:فريسطو شهد مع السبعة 
ماريا:اوك 
مسح آسر هدوك الميساجات وخرج من انستغرام و صيفت ميساج لاحمد "السلام احمد عندي ليك واحد الخدمة بغيتك اليوم تخوي ليا الريسطو معا السبعة و تقادو واحد الطابلة لجوج اشخاص و سد كاع البيبان د الريسطو خلي غي منين ندخلو شكراا "
تسنا حتا رد عليه و مسح الميساج و خرج من بيتو رد التيليفون بلاصتو و مشا عند فيصل 
آسر:بابا نخرجو نتعشاو اليوم فريسطو د ماما 
فيصل:نمسيو لواحد اخر ماشي ضروري هداك 
آسر:لا بغيت نمشي لهاداك 
فيصل:واخة لي بغيتي 

رميساء:انا غانزل دابا و ملي نعيط ليك نزلي للجردة واخة 
ياسمين باستها:واخة
نزلات رميساء للجردة لقات كلشي وااجد 
رميساء:هادشي جا زوين بزااف😍
امير:غايعجبها يااك 
رميساء:مادام عجبني انا ادن غايعجبها حتاا هي ههههه
امير:هههه ياله عيطي لياسمين 
رميساء:عيط ليها نتااا 
امير:اييه واخة الالة تسناي هنا 
طلع امير لبيتهم حل الباب و لقا ياسمين متكية فالسرير و كتلعب فالتيلي 
امير:ياسمين 
ياسمين شافت فيه 
امير:خاصنا نهضرو بخصوص البارح 
ياسمين ناضت وقفات قدامو:امير انا عارفة بللي غلطت ملي خبيت عليك ولكن هاديك الهضرة...
امير:مكانش خاصني نقولها ..حتا كلمة من دكشي لي قلت ماكنت عانيه انا متاكد من حبك ليا و عارف بلي غاتبقاي وفية ليا طول الحياة و هدشي علاش انا كنبغيك ا ياسمين 
ياسمين عنقاتو:سمحلي حيت خبيت عليك 
رميساء كطل عليهم:اودي اودي هادي هيا ماشي بسهولة انسمح ليه 😂😂😂
امير:غادي نهبطو تشوفي المفاجئة اللي وجدنا ليك انا و رميساء 
ياسمين:امم كنتمنى تعجبني هههه 

من بعد ماكملات ماريا الهضرة مع فيصل ناضت خوات الماريو كامل فالارض 
ماريا:اشنو غانلبس داباااا كيبانلي فحالا هدا اصعب قرار اناخدو ف حياااتي اووف نلبس هادي اولا هادي و لا هادي حتا هي زوييينة هاااااااع وحدة وحدة خاصنا نتختار وحدة صافي انغمض عيني و نشير على وحدة هي اللي انلبس "غمضات عينيها و شيرات على وحدة و حلاتهم"اووف مزويناااش حتا حاجة من هدشي ماعجبني عندي حل واحد اوووووف "ناضت لبسات بنطوفتها و مشات كتسلت لبيت ختها دخلات و حلات الماريو و حلات فمها معاه"واااااااااااااو😍اش هدشي كاامل انا اللي كبر منها و معنديش هدشي صافي صافي خاصني ناخد شي حاجة دغيااا اممم اناخد هادي زوينة "هزات واحد اللبسة و خرجات كتسلت تاني و دخلات لبيتها فرشات هديك اللبسة فوق السرير و ختارت شنو دير معاها"امم دااباا كلشي وااجد "سدات الباب بالساروت و دخلات للحمام عمرات البانيو و تخشات فييه ...ترخاات و نسات راسها حتا داتها عينيها....بعد ساعتين بدات ماريا كتحل عينيها و هي دايخة بالنعاس عاد كتستوعب فين هي و هي تقفز 
ماريا:ويلي ويلي على حماارة اهم نهار فحيااتك نعستي فالدووش "لوات عليها فوطة و خرجات بالزربة شافت الساعة"اوف باقي ساعة و نص خاصني نسربي"نشفات شعرها و كريباتو دارت ميكاب تقيل شوية و لبسات كسيوة على شكل طوب طالع على الكرش و صاية طويلة مفتوحة من القدام فالبيض و فيهم خطوطو طوال بالزرق ...دارت عقيق فالزرق و صندالة عالية فالباج و بوشيط نفس اللون... وقفات كتشوف راسها فالمرايا"تبارك الله عليااا 😍😍حاسة اليوم يطلبني لزوااج 😋😋
خرجات كتسلت باش متسمعهاش ختها ...شدات طاكسي وصلها لريسطو و دخلات للداخل لقاتو خاوي و فيه غي طبلة وحدة مقادة بطريقة رومانسية 
ماريا😍😍😍:حاسة براسي انسخف هدشي عمري شفتو حتا فالحلم ديالي😍😍 فين هو فيصل انجلس نتسناه 

فيصل:خارجين نتعشاو غي انا وياك لاش باغيني نلبس كومبلي 
آسر:خاصك تكون انيق راه عندك معجبين دابا و دارو ليك جيش كاع😂😂😂
فيصل كيقاد فالكرافاط:ههههه الله يمسخك نتا وياها 
كملو لبسهم و نزلو لوطو و ساق فيصل للمطعم ....هبطو و مشاو ياله ايدخلو و هو يهضر آسر 
آسر:بابا عطيني ساروت د لوطو نسيت جاكيط ديالي 
فيصل:هاك و تاكد بلي سديتيها 
دخل فيصل و آسر مشا بزربة خدا سوارت الريسطو من الاوطو و سد عليهم الباب و رجع هو جلس ف الاوطو 

دخل فيصل للمطعم و بان ليه خاوي مكاينش الحس ..دخلو الشك 
فيصل:احممممد احمممد 
ماريا سمعات صوت فيصل و هي تنوض قادات كسوتها و تسنانو حتا وصل عندها ....وصل فيصل لهديك البلاصة لي جالسة فيها و تصدم 
فيصل😱😱😱:نتي شنو كديري هنااا و شنو هدشي 
ماريا:كيفاش شنو كندير هنا نتا عارض عليا😄
فيصل:اشنو كتخربقي انا الحاجة الوحيدة لي درت معاك هاد النهار هي جرييت عليك من هنااا و قلت ليك ماتعاوديش تجي و دابا جايا ديري عليا حماقك.. لي معرفتش هو كيفاش احمد عاونااك 
ماريا:بلاتي بلاتي راه نتا لي كتحمااق عليااا دابااا اش هاد الفعايل ديال البراهش مسيفط ليااا ميساج كتعتاذر و تقولي نتعشاو بزووج و دابا كدير لي هكاااا😔
فيصل:فييين هضرت معاااك اناااا فين علاش كتكدبي داابااا😡
ماريا خرجات فيه عينيها:نتاااااا لي كتكدب بلااتي بلاتي "جبدات هضرتهم"هااك شوووف هداك نتا ولا خيالك 
فيصل خدا من عندهااا تيلي و بدا كيشوف هضرتهم بزوج دخل لهديك الباج و تاكد بللي ديالو 
ماريا:شتي دااباا هادو هوماا فعاايل البراهش كان كيحساب لي بعقلك 
فيصل:عندك الحق هادو فعايل البراااهش وااخة ا آسر واااخة 
ماريا:اشنو دخل آسر فهادشي 
فيصل هز البوشيط حطها ليها فيدها و جرها جيهة الباب:وقع واحد سوء التفاهم ولدي لي هضر معاك ماشي اناا و داباا ياريت ترجعي ل داركم 
ماريا وقفات قدام الباب:ماشي مشكل واخة ولدك لي هضر معايا ولكن دابا نتا هنا ..انا وياك هنا علاش مانجلسوش و نهضرو و نتعرفو على بعضياتنا كتر
فيصل:ماريا فهمي هدكشي لي عندك فباالك حيديه "جرها باش يحل الباب لقاه مسدود" آسسسسر اشهاد الفعااايل كديير اوووف 
ماريا كضحك:واش سد علينا الباب 😃
فيصل خنز فيها جمعات الضحكة و بدا كيقلب فجيبو على تيليفونو ملقاهش و هو يضرب يدو معا الباب 
ماريا:ماااك عاوتاني 
فيصل:عطيني تيليفونك 
ماريا:علاش ؟
فيصل:باش نخرجو من هناا 
ماريا دارتو وراها:لا مغنعطيهش ليك 
فيصل:ماريا ارييي 
بداو كيضاربو عليه حتا لاحتو ماريا بجهد كامل تهرس 
فيصل:صاافي هدشي لي بغييتيي نبقاو محبوسين هنا حتا صباح 
ماريا:اه هدشي لي بغيت😃
فيصل:اكيد مغيكونوش سدو البيبان كاملين انا غانشوف 
ماريا وقفات قدامو و الدموع فعينيها:واش انا خايبة لهاد الدرجة لدرجة انك متقبلش تعشا معايا😢
فيصل بقات فيه:لا ماشي هكاك ...
ماريا:ايلا كان ماشي هكاك ف غادي نمشيو نجلسو فهديك الطبلة و نتعشاو و من بعدها ندوزو الليل فالهضرة و بلاما تحاول تلقا شي طريقة نخرجو فيها من هنا 
فيصل:و آسر..
ماريا:آسر اللي دار هدشي كامل و لعب علينا بزوج اكيد ايسلك راسو هاد الليلة 😉
شداتو من يديه و جراتو لجيهة الطبلة و جلسو 
ماريا:بصراحة قبيلة شديت راسي غي بزز هدشي كيشهي بزااف الله يعطيكم الصحة ..اا هاد الريسطو سميتيه بسميت مامات آسر الله يرحمها ياك 
فيصل:اه 
ماريا:واش ..اا زعمااا حيت كنتي كتبغيها بزااف و ماتت دكشي علاش مبغيتيش ترتابط بشي وحدة اخرى
فيصل:واخة منهدروش فهاد الموضوع 
ماريا:واخة..اينا موضوع بغيتي نهضرو فيه 
فيصل:ماريا تعشااي راه مزال ليلة كامل قدامنا نهضرو فيه 
ماريا:وااخة تعشاو فجو هادئ فيصل خاشي وجهو فطبسيلو و ماريا كتاكل و تشوف فيه و الابتسامة على وجها حتا كملات ماكلتها
ماريا:انا غانمشي للحمام 
فيصل:اوك 
دخلات للحمام سدات الباب و تكات عليه شوية و مشات قدام المرايا 
ماريا:هاد الليلة هي فرصتي خاصني نتهدن و مانديرش هادوك الحمااقات اللي مولفة نديرهم اصلا هوما لي خلاوه مايبغينيش هاد الليلة غانبين ليه بللي انا اللي نقد نسيه ف شهد اه خاصني نبين ليه "بتاسمات لراسها فالمراية و رجعات عندو لقاتو جمع الطبلة" كون تسنيتي حتا جمعتها
فيصل:ماشي مشكل 
ماريا:ملي خدمت هدوك اليومين هناا شفت الطيراس الفوق كيطل على منظر زوين شنو بان ليك نطلعو لتما 
فيصل:خاصناا نطلعو علاياش نجلسوو 
ماريا:انطلو هداك الفوتوي 
فيصل:خاصك تعاونيني 
ماريا:واخة واخة 
طلعو واحد الفوتوي لطيراس حطوه و نتابهو للمنظر 
ماريا😍😍:انا كنت شفتو فالنهار محسابليش ايكون بهاد الجمالية بالليل 
فيصل:عندك الحق زوين بزااف 😍
ماريا جلسات و جراتو يجلس حدااها :عاودلي كيفاش تلاقيتي ب شهد 
فيصل:ماريا انا مافيا لي يهضر و لكن نقد نسمعك ايلا بغيتي عاودي لي على راسك شنو قصتك
ماريا:قصة مملة 😔
فيصل:كنسمعك 

ماريا:قبل ست سنين كنت بنت اخرى مختاالفة بزاف على اللي كتشوفها قدامك دااباا هههه بنت سكوتية حشومية و داخلة سوق راسها كنت كنحتارم واليديااا بزااف خصوصا الاب ديالي كنت معتابراه القدوة ديااالي و كنت كانحلم نولي ناجحة فخدمتي فحالو حتا لنهار اللي غايطيح صورتو قدامي ..جا و بزز عليا نتزوج بصاحبو باش يوسعو الشراكة اللي بيناتهم ههه تخاايل بنت عندهاا 17 عاام غايزوجهاا بااها بوااحد عمرو 54 عاام "تنهدات"بززو عليا نتزوج بييه و حاولت نهرب شحال من مرة و حصلت و مكانش عندي خياار اخر من غير اني نقبل نتزوج بيه و هناا اتبداا المعااناة ديالي معا هداك الشارف اول ليلة تعامل معاياا فحال الوحش ماكانش مدرك باللي بين يديه بنت صغيرة و اول تجربة لييهااا "بدات كتبكي"كاان نفس الفيلم كيتعااود كل ليلة ...تزوج بوحدة صغيرة غي بااش يفرغ فيهااا الكبت ديالووو ...شحال طلبت واليديا يطلقوني منوو و يردوني عندهم مابغاوش و كانت كلمة وحدة لي كيعااودوهاا كل مامشيت عندهم"خاصك ضروري تحملي منوو" انا مكنتش بااغة نحمل منو و نهز قطعة من هداك الوحش فكرشي و حتا هو مكانش باغي اصلا حيت كيف قتليك جابني غي باش يفرغ فيا كبتو و ملي ايشبع مني ايلوحني هاد الهضرة كان كيقوولها بلساانو ...ماعرفتش كيفاش وقع و لكن حملت و ماعرفت حتاا كملت تلاتة د الشهور ..كنت عارفة ايلاا عرف بالحمل ديالي ايقتلني انا و اللي فكرشي و قررت نهرب و نجحت من اول محاولة و مشيت لدارناا قلت ليهم على الحمل ديالي و بللي هداك الوحش مغاديش يبغي يخليني حاملة ..خلاوني عندهم و خبرو هداك الوحش بالحمل ديالي و باللي انبقا عندهم حتا نولد و داكشي اللي كاان....جا نهااار الولادة و صيفط طبيبة لعندنا هي اللي تولدني ...دازت ولادة صعيبة بزاااف ولكن نسيت هداك الالم ملي سمعت صوت ولدي كيبكي ... بعدهااا غييبت و مللي فقت قاالووولي مااات مااات اهئ اهئ قتلوو لي ولدي اهئ اهى وااخة كان من هداك الوحش كنت قابلة نولدو و نربيه ...هدااك النهار اللي قتلو فيه ولدي قتلو فيه حتا ماريا القديمة ..من هداك النهار قررت منبقاش ماريا الدمدوومة اللي ايلا قالو ليها واليديها لوحي راسك تلووحو وقفت ف وجهم و عطيتهم خياار يا يطلقوني منو كيف زوجووني اولا غانبلغ البوليس باللي زوجوني منو وانا قااصر و بزز مني ...مدازش بزز ديال الوقت و تطلقت و مابغيتش نجلس معاهم مزال فهديك الدار و مشيت سكنت معا جدااتي و مشات معاايا حتا ختي خوفاا انها تعرض لنفس مصيري ...سكناا معا جداتنا فهاد المدينة و انا رجعت لقراايتي باش نساا هاداك العام اللي قلب لي حياتي ..تلاقيت و تعرفت على صحاب جدااد و نضميت لواحد الكليكة د البنات و الدراري اللي علموني نعيش حياتي و ندير اي حاجة جات فبالي بلاما نفكر فالنتائج و هداكشي اللي درت ...دازو سنين و تبدلت وليت وحدة اخرى وليت ماريا النشيطة مارياا الحمقة ماريااا اللي ولاا همهاا هو تبغيهاا ..شفتك اول مرة فتيفي نهار حليتي هاد الريسطو كنتي معا مراتك شهد... من بعدها قريت الخبر د وفاتها بقات فياا واخة كنت كنحسدهاا عليك ... موراها وليت كنشوفك بزاف فالاخبار كل مرة حاال مطعم جديد وليت كنتفرج فاللقائات ديالولك و عجباتني شخصيتك قبل ما نتلاقا بيك و نهضرو بقييت علا هداك الحال حتا وليتي شاغل تفكيري و احلامي ..خفت نصارحك و منعجبكش و قررت ندير صفحة على الانستا و نبقا نشر تصاورك بهدف انك تشوفهم شي نهار و تهضر معاايااا ولكن عمرك عبرتيني ..وصلت لحالة اني نبقا نجي كل نهار لهنا و نتسناا نشووفك عييت مانبقاا مخبياا فقلبي و قررت نبان قداامك و جيت خدمتك هنااا فيصل تقدر تقول عليا مريضة ولا حمقة ولا اللي بغيتي ولكن انا عاانيت بزاف و انا مزال ف ريعان شبابي و مكرهتش حتا انا نلقا اللي يعاوني و يوقف معايااا و يخليني نسااا كاع دكشي اللي دزت منوو ...فيصل انا بااغاك تعطيني فرصة و تعطيهاا حتا لرااسك فرصة تخلييناا نتاجوزوو بزوج ماضينااا نتااا تنسااا موت مراتك و انا نساا ماضياا الاليم شنو قلتي 
فيصل جرها لعندو عنقها :اا انا ماعرفتش فحالا هدشي لي سمعت داابا بزااف على الواحد يستوعبووو كيفاش الواليدين كيقدرو يديرو هدشي فوالدهم 

ماريا:للاسف ميستحقوش يكونو آباء 
فيصل:اخر حاجة كانت تخطر على بالي هيا نتي يكون عندك ماضي فحال هدا ..يعني اول انطباع خديتو عليك هي بنت حمقة طايشة و مفششة اي حاجة حلات عليها فمها اتلقاها قدامهاا 
ماريا بضحكة استهزاء: جات نوبتك تعاود ليا انا ماخبيت عليك حتاا حاجة حتا نتاا كون صريح معاياا 
فيصل:قصة طويلة بزااف 
ماريا:واناا كيعجبوني القصص 😃
فيصل:واخة الالة"بدا كيعاود ليها قصتو معا ياسمين من الاول و كيفاش تفارقو و كيفاش تلاقا بشهد و تزوجو و تبناو آسر ... بقاو الليل كامل على هداك الحال هو يعاود و هي تسمع حتا بدا كيديهاا النعاس"
فيصل:من بعد ما ماتت شهد انا..ماريا واش نعستي 
ماريا تخشات فحضنو:امم 
فيصل خلاها على راحتها و بقا كيفكر فقصتها حتا نعس حتا هو ...

آسر بعد ما سد عليهم الباب دخل لطونوبيل و سد عليه و بقا كيلعب فالطابليط ديالو حتا دااه النعاس ...🌞🌞فاق على اشعة الشمس اللي زعجااتو ..شاف شحال الساعة و ناض دغيا خرج من الاوطو سدها و مشا لباب الريسطو كيحل فيه بشوية ...دهل كيتسلت و كيقلب عليهم مالقاهمش تمااا
آسر:فين مشاو هادوو ياكما خرجوو من شي بلاصة انشوف الفوق 
طلع بشوية لطيراس ..دخل و شاف الفوطوي و ريوسهم..مشا قدامهم و شافهم كيفاش ناعسين و معنقين بعضياتهم ..خدا التيليفون ديال بابه و صورهم فهاديك الحالة ...فيصل بدا كيحل عينيه و شاف آسر قداامو و ماريا مخشية فيه ...حيدها عليه بشوية تكاها على الكنابي و جر آسر من دراعو نزلو للتحت 
فيصل:اشنو هاد اللعب الباسل ا آسر😡
آسر:واخة باسل و لكن باين عجبكم الحال و تفاهمتو راه شفتكم كيفاش كنتو ناعسين 
فيصل:آسر منبغيكش تعاود فحال هاد التصرف حنا صحاب اه ولكن باش تلعب بيا فحال هكا و تحطني امام الامر الواقع لاا 
آسر:هديك البنت كتبغيك بصح علاش متعطيهاش فرصة تقد تولي تبغيها حتا نتاا 
فيصل:هداك ماشي حب هداك غي اعجاب و صافي و هيا خاصها تزاوجو حيت ميمكنش تكون شي حاجة بيناتنا من هنا لقدام انا مكيعجبونيش البنات فحالها اللي كيلوحو راسهم على الدراري نهار اللي انبغي نرتابط بوحدة انختار وحدة كنبغيها 
كمل هضرتو و سمع صوت البكا دور راسو لجيهة الدروج .. كانت ماريا واقفة و كتبكي ...مشات لعندو بخطوات تقال و وقفات قدامو 
ماريا:عندك الحق انا دلييت راسي بزااف سمحلي ا مسيو فيصل مغاديش نعااود نلوح رااسي علليك 
ضربات فيهم و خرجات زدحات الباب بجهد 
آسر:عجبك الحال دابا 
فيصل:زيد قداامي للدار 

امير و ياسمين و بنتهم شادين الطريق للقرية ... رميساء ناعسة و ياسمين و امير كيهضرو 
ياسمين:منضنش يكون عندها مشكل رميساء كبرات دابا و بعقلهاا مغنلقاوش معاها مشكل 
امير:حنا نهضرو معاها و حتا ايلا مبغاتش نحاولو نقنعووها 
ياسمين:اه دكشي"ضارت كتشوف فيها"الاميرة ديالي "بدات كتفيق فيها"حبيبة فيقي وصلناا 
نزلو من لوطو و لقاو كل من حياة و حسن و وفاء كيتسناو فيهم 
حياة:حفيييدتي الزوينة"كتبوس فيها و تعنق"توحشتك الغزالة ديالي 
وفاء:خليني حتا انا نسلم على الكتكوتة ديالي توحشتها 
ياسمين:واقيلة حنا غي نرجعو فحالناا هههه 
حسن:ههه مرحباا بيكم ابنتي دخلو للداخل 
دخلو لدار بابات ياسمين و جلسو فالصالون يرتاحو و يشربو كاس د اتاي 
رميساء:الميمة فينهوما دجاجاتي 
حياة:ههههه اجي نديك ليهم 
شدات ليها ف يديها و خرجاتها للبلاصة اللي دايرة فيهم الدجاج 
حياة:هانتي لعبي معاهم و عنداك يهربو ليك 
رميساء:متخافيش😃
بدات رميساء كتلعب معاهم و توكلهم حتا وقفات عليها ياسمين 
رميساء:ماما اجي تشووفي هادي شحال زوينة 
ياسمين:رميساء حبيبة بغيت نهضر معاك فواحد الموضوع 

يتبع....

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.