العشيقة الصغيرة الجزء السادس

من تأليف fatesha
2018

محتوى القصة

رواية العشيقة الصغيرة

امير:انا كنسمعك 
ياسمين:شوف امير انا بغيت نعتذر ليك على البارح انا كنت محتاجة وقت نفكر اناا كنت مخربقة بزاااف 
امير:و فيصل هو سباب هادشي؟
ياسمين:مغنكدبش عليك ونقولك لا اه هو السباب هو مكانش خاصو يبان ف حياتنا خصوصا فهاد الفترة 
امير:عادي يوقع هدشي و تخربقي انا عارفك مزال كتبغيه وماشي ساهل باش تنسايه ولكن ايلا نتي باغا تنسايه و تبداي معايا حياة جديدة غانتعاونو نسيو بعضياتنا ياسمين انا ياله خارج من تجربة زواج فاشلة دفعات ثمنها بنتي الله يرحمها انا جربت الزواج لي بدا بالحب وهاد الحب بقا كيتلاشى مع الوقت يمكن حنا هاد المرة نبنيو الحب مع الوقت 
ياسمين:عندك الصح و انا كنواعدك نكون زوجة صالحة و ام مزيانة
امير باس يديها:وانا معنديش شك فهدشي 
ناضو خلص امير دكشي وركبو فالموطور رجعو للقرية 

كملو البنات فطورهم و وقفات عليهم حياة بالسطولة و شطابة و الكراطة 
حياة:ياله احبيباتي نوضو خملو معايا 
شافو البنات ف بعضياتهم و ناضو على كفضو حوايجهم و شدو دكشي من عند حياة 
سناء كتمسح و تنكر:خااارجة كضور و حنا نخملو هنا حنا لي ايجيو يخطبونة ولا هيا 😡
حنان كتجفف:ناري ظهري تقسم مبقيتش قادا 
مريم:حيت ولفتووو لعكز انا لي نقيل نجفف و نصبن و نطيب بسييف ضسرووو ياله خملو دبااا 
ياسمين حلات الباب شافتهم بديك الحالة ماتت بالضحك عليهم 
ياسمين:هههههههههههه ماما شداتها الحالة عليكم 
حياة:ياسمين سيري بدلي حوايجك و اجي تعاوني صحاباتك
ياسمين:مااماا راني عروسة زعماا 
حياة:ويلااا انا راه ملي جا باك يخطبني هزيت الدار كاملة بوحدي و عاودت رديتها 
ياسمين ضربات برجليها و مشات لبيتها لبسات بيجامة شورط و دوني باش يسهال عليها تشقاا و خرجات عند البنات 
سناء:ولاهيلا عبراات عليك هههه 
حنان:قووولي قووولي اش درتو 
يااسمين:غي هضرناا 
بدات كتعاود ليهم و كيشقاو ف نفس الوقت

ايمان:اوف تخنقت هنا مبقيتش قادا نزيد دقيقة وحدة 
حسام:صبري شوية غدا انرجعو 
ايمان:اوف كان ضروري توافق نجيو كون قلتيليه عندك شي حاجة مهمة 
حسام:ياك نتي قلتي خاص نكون فجنبو هانا كنطبق دكشي لي كتقولي و سكتي شوية صدعتيلي راسي انخرج نتمشا شوية تخرجي؟
ايمان:اوا صاف على اساس كاين فين تمشا 
حسام:اوا خليك هنا انا غادي 
خرج حسام و بقا كيضور تما و كيتفكر ملي كان صغير كان كيجيبو امير هو و احسان و كيدوزو عطلة د الربيع هنا هبط لواحد البلاصة فيها كان فيها العين ولكن لقاه نشف و ولات ديك البلاصة خاوية بقا كيشوف تما حتا بانت ليه واحد البنت جاية كتجري بجهد و كتغوت و تابعها كلب كبيير مصعور تبلوكا معرف ميدير حتا قربات ليه و بدا حتا هو كيجري معاها بعدو علا داك الخلا ودخلو ف واحد الزنقة الصغيرة تخبعو تما 
حسام كينهج واش نتي مسطية اش وصلك لتماا 
سناء:محساابليش كاين الكلاب تماا اجي نتاااا حساام بنيييس اه نتااا

سناء:جيتي معا باباك ياك 
حسام:باش عرفتي 
سناء: انا صاحبت مرات باك المستقبلية هههههه"شافتو خنزر فيها و هي تجمع الضحكة"باينة معزيزش عليك الضحك 
حسام نفض حوايجو و مشا 
سناء تبعاتو:مسولتينيش شنو سميتي 
حسام:الصمت
سناء:انا سناااء ..باينة حتا الهضرة معزيزاش عليك 
حسام:اووف نتوما العيالات شحال فيكم ديال الصداع سيري رجعي فحالك للدار بعدي مني
سناء كتغوت:كوووون كنت عاقلة علاا طرييق كاعماا نحااشيها ليك 
حسام:و انا مالي 
سناء:تفو على بشار قولي غير طريق منين 
هي كتهضر و حسام هز راسو بانو ليه جوج كلاب جايين جيهتهوم شدها من يدها و عطاوها للجرا 

ياسمين:فين بقات هاديك ياكما تلفات 
حنان:قتليها تجلس حتا نخرجو كاملين مكتسمعش حتا تيليفونها طافي 
مريم:ياله نخرجو نقلبو عليها 
خرجو و تلاقاو ب امير و ايمان حدا باب وفاء ..مشات ياسمين لعند امير 
ياسمين:شنو كاين 
امير:حسام من الصباح وهو خارج مزال مرجع و تيليفون خلاه ف الدار 
ياسمين:حتا سناء خرجات و تيليفونها طافي 
امير:ياله نقلبو عليهم 
خدم الموطور وياسمين ركبات ف بيكالتها و مشاو كيقلبو 

سناء و حسام مخشيين فواحد الدخلة و الكلاب كيدورو على برا 
حسام بهمس:هدشي كامل بسبابك 
سناء بهمس:نتا لي وقفتينا كون كملتي الطريق كون وصلناا دابا شنو غنديرو حتا تيليفوني طفاا اوف ايكونو كيقلبو علينا ياك 
حسام:واقيلة حنا خارجين علا القرية دبا مشفتيش شحال جرينا 
سناء:اوف فيا الموت د الجوع 
حسام:شو حنا فاش و نتي فاش 
سناء:راه قريب يطيح الظلام و انا مزال متغديت 
حسام:و شنو بغيتي ندير ليك 
سناء:شوو دبا هادو لاش كيضورو هنا يمشيو فحالهم 
حسام:كيبان لي يا غنموتو بالجوع و العطش اولا غياكلونا هاد الكلاب ههه 
سناء:لااا هئ هئ مبغيتش نمووت هكا يا ربي 

ياسمين:الو حنان واش مزال مرجعات 
حنان:لا مزال واش ملقيتو والو 
ياسمين:والو اختي طاح الظلام و مكاين ليهم اثر 
حنان:الله ياربي فين غتكون مشات هاد المسخوطة 
ياسمين:انمشيو للقرية لي حدانا يقدو يكونو وصلو لتما 
حنان:الله معاكم 

سناء فشلانة:نوض شوف واش مشاو 
حسام:نوضي نتي 
سناء:ناري مكرهتش نلوحك ليهم يتلاهاو فيك و نهرب "ناضت كطل ملقاتهمش"مشاو مشاو😍
حسام:بصح ياله نمشيو دغيا 
سناء:انا راه مبقاش فيا الجهد لي نجري 
حسام:شنو بغيتيني نهزك 
سناء:مكرهتش 
حسام:بقاي تسنااي هنا"مشا"
سناء:تفو علا حماار وااا تسنااني 
مشات لحقات عليه و بداو يقلبو على البلاصة لي فيها الديور حتا كيبان ليهم شي موطور جاي بداو كيشيرو ليه 
ياسمين:راااهم راااهم وقف وقف "هبطات و تلاحت علا سناء عنقاتها"اش وصلكم حتا لهناا خلعتينا عليك 
سناء:ختك فيها الموت ديال الجوع ديني ناكل و نعاود ليكم 
ركبات سناء مع ياسمين و حسام مع امير و رجعو للقرية ديالهم و دخلو لديورهم 
حنان:هااااهي جاااات فين كنتي غاابرة 
سناء:شوفو متهضروش معايا حتا نااكل خالتي حياة عتقي الروح 
حياة:واخة ابنتي انجيب ليك الماكلة 
كلات سناء و عمرات كرشها وبدات كتعاود ليهم 
حنان:ههههههههه ناري كنتخيل منظركم 
ياسمين:و كون مامشاااوش من تماا ههههههه 
مريم:ربي حفظكم و صاافي 
حنان:اوا هانتي الالة دوزتي النهار مع حسام بنيس 
سناء:يخ على بنادم كيداير كلشي بسباابو منفخ على والو 

ايمان كتغوت:اش كنتي كديير معا هديييك هااا دوي 
حسام:رااه قلت ليييك تبعونا الكلاب واش مكتفهميش 
ايمان:انا ماشي برهوشة باش تضحك عليا ب هاد جوج كلمااات فهمتتتي شو بعداا كيدااايرة مالقيتي غي هديك تبدلني بيها 
حسام:خليك هنا حماقي مع راسك و صايبي افلام بوحدك انزل لتحت 
ايمان:هاااع حسسسساااام اجي لهنااا اوووووف اووووف 

فاقو الجميع بكري البنات مشاو للحمام و حياة و وفاء تجمعو فالكوزينة يوجدو و خرج حسن و هو و امير يهضرو 
حسن:ياسمين هي بنتي الوحيدة بغيتها تكون فرحانة و مرتاحة ف حياتها 
امير:وانا كنواعدك نخليها اسعد وحدة
حسن:نتا تزوجتي من قبل و عندك تجارب فالحياة اما هيا مزال صغيرة و معارفة والو كنتمنى ولدك و مراتك الاولى مياذيوهاش 
امير:من هاد النحية بغيتك تكون هاني ولدي معندوش مشكل و اكبر دليل انو جا معايا نخطبها اما مراتي الاولى ف معندها باش تاديها هي فالمصحة دبا 
حسن:الله يسهل عليكم 
امير:امين
رجعو البنات من الحمام و تجمعو ف بيت ياسمين يوجدو راسهم 
لبسو البنات كنضورات خفاف حنان لبسات وحدة فالبيض و فيها الطزر بالزرق جمعات شعرها اما مريم لبسات وحدة فالليموني بوكلات شعرها و طلقاتو اما سناء لبسات وحدة فالشيبي و فيها السفيفة فالكحل و صايبات شعرها و طلقاتو و كلهم دارو ميكاب خفيف اما عروستنا ياسمين لبسات قفطان فالكرونة و مززوقة من جيهت الصدر دارت مشيطة سامبل و ميكاب خفيف ركزات على عينيها 
كملو و خرجو لعند حياة لي حتا هي لبسات كنضورة فالبلو ماغين و قادات الزيف 
حياة:يويوويويويوي تبارك الله ماشاء الله ععلى بنياااتي جيتووو كتحمقووو 
سناء:حتا نتي اش هاد الزين كاامل 
حنان:لي شافك يقول ليك خت ياسمين ماشي ماماها هههه 
مريم:واايه 
حياة كتشوف ف بنتها و ياسمين كتشوف فيها و الدموع ف عينيهم 
سناء:ويااكم تبكيييو اتخسرو ل ميكااب و ناس مبقا ليهم والو و يجيو 
"الدقان فالباب"
ياسمين:نااري جااااو اش ندير انااا 
حياة:سيري لكوزينة و نتوما تبعوني

حلات حياة الباب و حداها البنات و تبعهم حتا حسن لي كان لابس جلابة ... دخلو عائلة العريس وفاء لابسة جلابة دو بياس فالباج و حسام لابس كومبلي ف الزرق مغلوق و قاميجة بيضة و ايمان لابسة كسوة كحلة مفتوحة من القدام و من الصدر و مصايبة شعرها طالقاه و ميكاب تقيل بحال ديما ثم عريسنا امير داخل هاز بوكي د الورد ولابس كومبلي كحل قاميجة بيضة و كرافاط بلو ماغين سلمو على بعضياتهم و جلسو فالصالون شوية دخلات عندهم ياسمين بالصينية منزلة راسها للارض حشمانة سلمات عليهم كاملين و وصلات لعند امير همس ليها"جيتي غزالة"خلاتها تزيد تحشم كتر جلسوهم حدا بعضياتهم و جبدو الخواتم لبسوهوم و قراو الفاتحة ... حسام عينو غي على سناء سحراتو بتصروفااتها الطبيعية و العغوية و ايمان كتشوف ف هاد الوضع لي معجبهااش و كتفكر كيفاش تصرف 

كملات الخطبة و رجعو امير و عائلتو لدار وفاء و البنات و حياة بدلو حوايجهم و تعاونو على ديك الروينة جمعوها و مشاو تجمعو البنات ف بيت ياسمين كيشوفو فالخاتم
سناء: كيييحمق 😍
حنان:باقي غي شهرين للعرس خاصنا نبداو نوجدو 
ياسمين:انقول ل امير ميديرش شي حاجة كبيرة غي شي حفلة صغيرة باركة 
مريم:و شهر العسل فين اتمشيو 
ياسمين:مزال مهضرنااش ف هدشي ولكن انا باغة نمشي لتركياا😍
سناء:ياختي سعداااتك الله يجيب لينا شي بنيس حتا حنا ههههه 
ياسمين:تستااهلو كل خير يا البنات 

دخل حسام للبيت و لقا ايمان واقفة كتسناه ب لباس مثير 
ايمان:تعطلتي 
حسام وقف قدام المرايا و بدا كيحل صدايف القاميجة :كنت غي مع الواليد 
جات ايمان من موراه و كملات على حلان الصدايف و ضوراتو لعندها خشات يدها مور عنقو و قربات منو حتا حبسها
حسام:حتا نرجعو دبا يقدو يسمعونا 
ايمان:وانا مالي 
رجعات تاني كتكمل خدمتها حتا لقاو رايهم فوق السرير 

صباح جديد 🌞 فاق الجميع لبسو حوايجهم و فطرو و شدو الطريق للمدينة ...وصلهم امير للدار و رجع هو الاوطيل دوش قاد حوايجو و خرج يشوف الفيلا الجديدة كانت فيلا مكبيراش بزاف فيها جردة مزينة بالورد و شوية د شجر و بيسين و الداخل فيها جوج طبقات مزال خدامين فيها عوال يكملها و يمشي هو و ياسمين يشريو الاثاث
كمل و مشا داز للمصحة دخل عند الطبيب
الطبيب:سلام مسيو امير تفضل 
امير:شكراا كاين شي تحسن ف حالة عايدة 
الطبيب:اه هي غادة مزيان دابا ايلا بقات علا هاد الحال قريب تخرج من هنا ان شاء الله كيف قلت ليك الوقوف ديالك و ديال ولدكم بجنبها فادها بزاف 
امير:واخة شكرا دكتور 
الطبيب:مغتشوفهاش 
امير:مرة اخرى ان شاء الله 
الطبيب:ان شاء الله 
خرج امير و ركب ف طونوبيلتو و عيط ل ياسمين 
امير:حبيية صافا رتاحيتي شوية 
ياسمين:اه لقيتيني انخرج دبا 
امير:فين 
ياسمين:للشركة نتا ماغاديش 
امير:لا بلاما نمشيو ليوم شنو بان ليك نجي نخطفك و نمشيو لشي بلاصة 
ياسمين:هههه و اناا مواافقة تخطفني 

بدلات ياسمين حوايجها لبسات شي حاجة خفيفة و جمعات شعرها سمعاتو وصل و نزلات لعندو 
امير باسها: فين تبغي نمشيو 
ياسمين: نمشيو لاماغين ديك المرة معلمتينيش الصيد 
امير:حيت طحتي و خلعتيني عليك 
ياسمين:هههه صاف هاد المرة مغنطيحش 
امير كيعيط:الو علي وجد الباطو بغيتو دبا شوية ... ندوزو حنا النهار كامل تماا كااع ههه 
وصلو لاماغين و طلعو للباطو كاين اللي مكلف يالقيادة و بدااو الرحلة ديالهم 

كان حسام جالس ف بيروه خدام فالبيسي حتا دخلات عليه ايمان 
حسام:فين كنتي كنت باغيك 
ايمان الضحكة واصلا ليها للوذن:كنت فالمستشفى 
حسام:علاش مشيتي 
ايمان حطات ليه شي وراق فوق البيرو 

ايمان:انا حاملة😃
حسام وقف:كيفاااااش 
ايمان:حتا انا تصدمت فلول ملي عرفت ولكن دابا فرحانة بزاف"حطات يدو علا كرشها و كضحك"قريب يكون عندنا بيبي 
حسام:وااش عارفة رااسك اش كتقولي راه حنا ممزوجينش 
ايمان:اوا نتزوجو ساهلة 
حسام:اولا تطيحيه
ايمان:واش حماقيتي منقدش نقتلو و زايدون حنا كنا انتزوجو من بعد اش فيها ايلا تزوجنا دبا 
حسام:نهضرو فهدشي من بعد دبا عندي شي خدمة خاصني نساليها 
ايمان:نمشي نقولها لعمي 
حسام جرها:لا ماشي دبا حتا نكونو بزوج 
ايمان:اوك "جلسات فالفوطوي و بقات كتشوف فيه و ضحك"(فنفسها:دبا نشوفو ا حسام بنيس واش تقد تشوف فوحدة اخرى)

كملو ياسمين و امير نهارهم ف لاماغين و رجعها لدارها و رجع هو للاوطيل و علموه بلي ولدو كيتسناه ف ريسطو دخل كيقلب عليه لقاه هو و ايمان و مشا لعندهم 
امير:سلام "جلس"تسنيتوني بزاف؟
حسام:لا ماشي بزاف باش جينا 
امير:ياك لاباس 
حسام:قلنا نتعشاو مجموعين و بغينا نهضرو معاك فواحد الموضوع 
امير:انا تعشيت قولي اش كاين 
حسام:احم ب صراحة ايمان حاملة 
امير:شنووو 
ايمان:حنا عارفيين ا عمي بلي غلطنا وبلي كان خاصنا حتا نتزوجو و لكن هدشي لي وقع و دابا قررنا انا و حسام نتزوجو ف اقرب وقت 
امير:نتوما كبار و تعرفو كيف تحلو مشاكلكم و هادا هو احسن قرار 
ايمان فرحانة:شكراا اعمي بزاااف 

💛بعد شهرين💛
فهاد الشهرين وقعو بزاف د الحوايج منهم زواج حسام و ايمان لي كان كبير بزاف هضر عليه الاعلام و الصحافة و ساهم باش الشركة تزيد القدام وعايدة لي خرات من المصحة مور العرس بشوية و هي جالسة دابا مع حسام و ايمان ف فيلتهم ..اما ياسمين و امير فكملو تجهيز فيلتهم و دابا كيوجدو للعرس لي بقا ليه غير جوج سيمانات 
اما شهد ف اليوم هو اخر نهار ليها فالمشفى كملات علاجها بالشيميو و كانو النتائج مزيانين الحمد لله تشافات و لكن مزال كاين تخوف انو يرجع ليها المرض 
فاقت ليوم على غير عادتها فرحانة حيت غترجع لحياتها الطبيعية و غتخلص من هاد العداب و الوجع ..ناضت للحمام غسلات وجها و رجعات لبيتها لقات فيصل كيتسناها 
فيصل:فايقا منورة ليوم 
شهد:اكيد حيت تهنيت من هاد المرض 
فيصل:ولكن خاصك تسمعي كلام الطبيب و تبعيه خصوصاا العصبية 
شهد:كون هاااني 
الممرضة كتشوف ف فيصل و كتهضر:شهد اجي معايا خاصنا نديرو شي تحاليل 
شهد:ياك درنا كلشي 
الممرضة:مزال شي حاجة 
فيصل:صافي سيري معاها انا غنتسناك حتا ترجعي 
شهد:واخة 
مشات شهد مع الممرضة و ناض فيصل و بدا كيكحز فالكوافوزات حتا دخلو ماماه و مامات شهد و ختها هازين الكراطن ف يديهم حطو دكشي و بداو كيحلو فيه كانو النفاخات و الملصقات بداو كيقادو فيهم و يلصقوهم فالحيط من بعد قادو واحد الطبلة تما و فرشوها و حطو عليها الكراسة و مامات شهد جبدات فستان بيض حطاتو فوق سريرها صيفطو فيصل يلبس حوايجو و كملو هوما الزينة و خرجو تخبعو فالغرفة لي حداها و سيفطو مسج للمرضة باش ترجعها 
الممرضة:صافي سالينا ياله نرجعو 
شهد:تعطلنا بزااف 
دخلاتها لغرفتها و تجمعات عليها الصدمة و الفرحة ناضت من الكرسي و مشات جيهت السرير شافت الفستان ضارت لقات فيصل داخل ب كومبلي فالكحل 
فيصل:غيجيك كيحمق 
شهد طارت عليه عنقاتو:قرسني عافاك باش نتيق 
فيصل:القريس بلاش ممكن ندير حاجة اخرى باش تيقي هههه 
تحل الباب و طلو عليهم واليدين شهد و فيصل و البنات لي خدامين ف مطعم شهد بقات كتشوف فيهم و هوما كيسفقو عليهم ...جبد فيصل بواطا من جيبو كان فيها الخاتم لبسو ليها و باس ليها راسها .. جروه البنات خرجوه و سدو الباب و بداو يوجدو ف شهد لبسات الكسوة و قادو ليها شعرها خلاوه مطلوق و دارو ليها ميكب خفيف .. و مشاو حلو الباب للعريس يدخل ..
فيصل دخل و قرب منها:هاد الزين كامل ايولي ديالي 

شهد:كون تسنيتي حتا نخرج من سبيطار 
فيصل:مبقيتش قادر نصبر ههههه 
دخل العدول و جلسو ف هاديك الطبلة و بداو مراسم عقد القران كمل العدول و ولاو شهد و فيصل رسميا زوج و زوجة 😍

عايدة و ايمان جالسين فالجردة كيشربو القهوة و يهضرو
عايدة:راه مبقا والو و خاص تبان ليك الكرش اش غاديري 
ايمان:دبا نلقا شي حل 
عايدة:و البيبي حتا هو خاصك تبداي تلقبي 
ايمان:وايه كون مدرتش هكا كون مزال مجرجرني معاه و نيت ف هدوك الليام الاخيرة كان باغي يبدا يلعب ب ذيلو 
عايدة:دابا خاسك ديريه خاتم ف صبعك راه حسام ساهل زعمة هههه
ايمان:وايه هه ونتي اماما عايدة امتا اترجعي للشركة 
عايدة:قريييب 😉
ايمان:عااوديلي اش غادييريي عافاااك
عايدة:اتعرفي فالوقت المناسب 
ايمان:اووف واخاا اش بان ليك تخرجو نديرو شوبينغ 
عايدة:ياله اصلا مكاين مايدار 

حسام كان فالشركة كيخدم خدمتو حتا عيط ليه امير 
حسام:الو 
امير:الو حسام شوف ليوم انديرو عشا فالفيلا الجديدة اجي نتا و ايمان 
حسام:واخة انا غنعيط ليها 
امير :باي
عيط حسام لايمان لي قاتليه بلي مشغولة بالشوبينغ مع عايدة غي يمشي هو ...كمل خدمتو و ناض هو لا فيست ديالو لبسها و خرج شد الطريق للفيلا د امير ... وصل و حلات ليه الخدامة دخل عندهم لصالون لي كانو دايرين فيه جلسة عصرية و تفاجئ حسام بوجود سناء تما من خطوبة باباه ماشافها ...سلم عليهم و جلس 
امير:فينها ايمان 
حسام:خارجة مع الواليدة 
امير:اوا نوضو للجردة نبداو نشويو 
خرجو كاملين للجردة كانو حاضرين البنات و كريم خطيب مريم و سعد الصديق د امير و حسام ..دايرين واحد الجليسة فالجردة جلسو فيها البنات و الرجال ناضو يشويو و يتكلفو بالعشا 
سناء:مقلتيش لينا ا ياسمين بلي عايدة خرجات من المصحة 
ياسمين:حتا انا مفخباري والو 
حنان:ياربي غي تبقا بعيدة عليكم ديك المرا كتقطر شر 
مريم:دكشي حتا ايلا شفتيها حاولي متجبديش معاها الصداع و خليك بعيدة عليها 
ياسمين:شفتيتي انا غي مساليا ليها 
سناء:انا شحفت اندخل نجيب الما 
دخلات ياسمين للفيلا الداخل كتقلب على الكوزينة حتا تصاطحات مع شي حد 
سناء:ااي راسي واش مكتشوفش 
حسام:راه نتي لي دخلتي فيا 
سناء:هادا نتااا وريني لكوزينة فينها 
حسام:قولي بعدا كيداير لباس عليك
سناء:شفت لسانك تطلق على اخر مرة 
حسام كيضحك:ونتي لسانك غي ماكيزيد يطوال 
سرحات ياسمين فديك الضحيكة لي ترسمات على فمو و ما فيقها من سهوتها غي يدو لي كتحركها 
حسام:فين مشيتي 
سناء:وريني الله يحفظك الكوزينة فين راه انسخف باللعطش اوف 
حسام:زيدي قدامي زيدي 
وصلها حسام للكوزينة و جبدات الما كبات و شربات 
سناء:اللله 
حسام:قولي لي فاش خدامة 
سناء:شفتك فحالا باغي تعرف عليا حشومة راك راجل مزوج زعما "مشات رجعات للجردة و خلات حسام مخربق الهضرة كتخرج ليه بلاما يفكر ..شوية و مشا رجع لعندهم حتا هو"

كمل العدول المراسم و باس فيصل راس شهد و ناضو باش يخرجو من المشفى هزها فيصل بين يديه و خرج بيها قدام نظرات الجميع حطها فالطونوبيل لي مزوقة حتا هي حط فالكوفر حوايجها و ركب 
شهد:باقا ممتيقااش لدابا😍
فيصل شاد يدها و كيبوسها: لا غي تيقي احبيبة 
شهد:و الخاتم شحاال زوين حبيييت 
فيصل:مايكونش زوين كتر منك 
شهد:فمك كيقطر عسل ليوم ههههه 
وقف فيصل ف حي راقي و هبط حل لباب لشهد و هزها بنفس الطريقة 
شهد شاداه من مور عنقو:شنو جينا نديرو هنا 
فيصل:هنا دارنا 
شهد:لا متقولهااش هاد البلاصة زوينة بزاف و باينة كالم 
طلع بيها فيصل للطابق لي فيه الشقة ديالهم و دخل ليها .. كانت شقة كبيرة فيها صالون كبير مفرش بطريقة عصرية و تلاتة د البيوت و كوزينة ...بقا فيصل هاازها و كيضور بيهااا فالدار 
فيصل:انا فرشتها على دوقي و لكن ايلا بغيتي تبدلي شي حاجة بدليها 
شهد:لا لا داار واعرة عجبني دوقك 
دخلها للبيت و حطها فوق السرير تكات فوقو وهو حيد لافيست و الكرافاط و جا تكا حداها
شهد:ليوم هو اسعد نهار ف حياتي 
فيصل:حتا انا 
شهد:فيصل نتا عارف بلي كاين صعوبة باش نولد زعما انا نقد نحرمك انك متكونش اب 
فيصل حط صبعو على فمها:شوو حنا نجربو و ايلا مكتابش نربيو شي دري ولا شي بنية و اصلا اش وصلنا لهاد الهدرة حنا مزال صغار خاص نعيشو حياتنا شوية عاد نفكرو فالولاد 
شهد شابكات يديها مع يدو:كنبغيك 
قرب منها فيصل باسها ف فمها و بغا يكمل و حبساتو 
شهد:انا ماواجداش اليوم و عيانة باغا غي نعس 
فيصل:واخة ماشي مشكل من بعد
بدا فيصل كيلعب ليها بشعرها حتا داها نعاس و نعس حتا هو 

صباح جديد🌞
فاق فيصل على صوت شهد لي كتغني على برا ناض خدا دوش و بدل حوايجو و خرج لعندها لقاها موجدة الفطور و كتسنا فيه 
فيصل باس راسها:صباح الورد 
شهد:صباح النور 
فيصل:كنت معول انا لي نوجد ليك الفطور 
شهد:فحال فحال مرة انا و مرة نتا 
فيصل:فين تبغي نسافرو 
شهد:فينما بغيتي لمهم نكون معاك 
فيصل:"قرصها من حناكها" يخليلي انا الزين"كما فطورو و ناض"انا غانمشي للمطعم نشوف دكشي كيف غادي علاما تجمعي لينا الحوايج 
شهد:واخة متعطلش بزاف 
فيصل باسها:واخة باي 

عايدة واقفة قدام المرايا كتقاد الروج ديالها لابسة كسوة قصيرة فالبلو غوا و بالكمام و طالون كحل شعرها بوكلي طاقاه و ميكاب تقيل هزات صاكها و هبطات لقات ايمان و حسام كيفطرو 
عايدة:صباح الخير 
ايمان و حسام:صباح الخير 
حسام:فين غادة 
عايدة:لخدمتي مغنخليش الشركة لي بنتيها ضيع 
ايمان:اكيد ا ماما و الشركة محتاجة للابداع ديالك
عايدة:شكرا احبيبة 
كملو فطورهم و مشاو مجموعين للشركة ...عايدة طلعات نيشان لعند امير دخلات بلاما دق الباب لقاتو جالس مع ياسمين و كيضحكو 
عايدة حاطة يدها على فمها:اا سمحولي ولفت ندخل بلاما ندق 
ياسمين:انا غنمشي نكمل خدمتي 
عايدة:تسناي شوية نبارك ليكم ا العروسة 
امير:عاااايدة اش بغيتي 
عايدة:هههههه كيفاش اشنو بغيت ياكما حسابليك هاد الشركة ديالك بوحدك راه ديالي حتا انا 
امير:فهمنا اوا سيري لبلاصة خدمتك 
عايدة:هاهيا غادة "وقفات حدا ياسمين طلعاتها من الفوق للتحت و ضارت عند امير"مبروك امسيو امير "خرجات"
امير:جات تصدع لينا مخنا تاني 
ياسمين:امير انا هاد المرا كتخلعني
امير:معندك مناش تخافي و انا معاك 
خرجات عايدة من عندهم و تاجهات لمكان عملههاا و هي كتمشا راسها مرفوع و نص ابتسامة على وجها اول انطباع تقد تاخدو عليها هو"الغرور"هبطات للطابق الخاص بالتصميم و الكل بدا بالترحيب بيها 
عايدة:شكرا شكرا من هنا نص ساعة نبغيكم كامليين ف قاعة الاجتماعات 

حسام فبيروه شاد البيسي و كيقلب على شي معلومة توصلو لسناء دخل ل الفيسبوك و قلب ف لي زامي د ياسمين و لقاها دخل لباج ديالها و لقا البلاصة لي خدامة فيها طفا لبيسي و هز لا فيست ديالو و خرج ركب ف طونوبيلتو و تاجه للبنك لي خدامة فيه كان قريب وقت الغدا دكشي علاش تسنا شوية حتا تخرج ...بعد دقائق بانت ليه خارجة مع شي راجل و ركبات معاه فالطونوبيل تبعهم حسام حتا وقفو و نزلو لواحد الريسطو دخل حتا هو و جلس قريب ليهم حاضيهم و كيشوفها كيفاش كضحك معاه و كيفاش كيشوف فيها و ف صدرها ...شافها ناضت للحمام و هو يتبعها تسناها حتا خرجات 
سناء و علامة التعجب على وجها:نتا!
حسام:اه انا 
سناء:صدفة زوينة"بغات تمشي و هو يجرها رضها لبلاصتها"
سناء:مالك 
حسام:شكون هداك 
سناء مخرجة عينيها:وانتا مالك 
حسام:جاوببببي
سناء:ماشي سوقك اويلي "بغات تمشي تاني و هو يجرها لسقها مع الحيط"
حسام:لا راه سوقي 
سناء:هاد الهضرة قولهاا لمراتك ماشي ليا 
حسام:لا غنقولها ليك نتي حيت نتي لي كتهميني 
سناء:اش كتخربق طلق مني خليني نم.."قاطعها حسام بقبلة سكتات ليها الحس"
سناء دفعاتو و صرفقاتو:تفو كلكم فحال فحال و مزوج يا حسرة 
مشاات خدات صاكها و خرجات كتجري شدات طاكسي 
اما حسام فشاد حنكو و مزال ماستوعب هدشي لي دار 

رجع فيصل لدار لقا شهد لابسا حوايجها و جامعة الفاليز كتسناه 
فيصل:سمحييلي بزاااااف تعطلت عليك 
شهد:ماشي مشكل احبيبي لمهم جيتي 
فيصل:ياله اجي نهبطو 
هز فيصل لفاليز و شهد سدات الباب و تبعاتو ركبو فالطونوبيل و شدو الطريق 
شهد:فين غانمشيو 
فيصل:مفاجئة 
شهد:لاا حشومة عليك قولي غير واش قريب ولا بعيد 
فيصل:بعيد شوية 
شهد:اووف واخا 
مدات يدها لراديو شعلاتو كانت موسيقى هادئة خلاتها تستسلم للنعاس

كملات عايدة خدمتها بكري رجعات لدار بدلات حوايجها باش ترجع تخرج نزلات و تلقات ليها الخدامة 
الخدامة:لالة هاد البرا جات بسميتك و قالي لي جابها ضرورية بزااف 
عايدة:واخة اري نشوف 

فيصل:شهد فيقي راه وصلنااا 
شهد بدات كتحل عينيها حتا فاقت مزياان و ردات البال فين كاينين 
شهد:يااااااااااااااااااااي😍😍😍😍 باش عرفتي هاد البلاصة 
فيصل:هو انا فالصراحة الصباح كدبت عليك كدبة بيضة انا ممشيتش للمطعم مشيت عندك خالتي نجاة باش نسولها على البلايص لي كيعجبوك تمشي ليهم و قاتلي على هاد المزرعة من صغرك كيعجبك تجي ليها 
شهد عنقاتو:ااه اه بزااااف و عندي فيها ذكرايات زوينين ياله نهبطو خاصني نوريك كلشي 
فيصل:غي بشوية عليك راه مزال لينا سيمانة كاملة 

حلات عايدة البرا لقات فيها ورقة حلاتها و بدات كتقرا 
...:سلام عايدة اكيد كاتسائلي دابا شكون لي مسيفط ليك هاد الرسالة انا ماماك اعايدة واخا مكنستاهلش هاد الكلمة انا عارفة بلي غتكوني كتكرهيني دابا و لكن تيقي بيا مكانش عندي حل اخر من غير اني نتخلى عليك يمكن كون خليتك معايا كنتي متي غير بالجوع و العطش على الاقل نتي دابا عايشة حياتك مزيانة و مرتاحة ف حياتك انا باش خليتك فالخيرية تعدبت بزاف ماحيلتي لفراقك ولا لفين غنعس و شنو غناكل و لا نشرب نعست فالزناقي كليت من الزبل تغتاصبت مكيناش شي حاجة خايبة موقعاتش ليا دوزت عشر سنين فالزنقة حتا لقيت خدمة عند واحد السيدة ساكنة هي و راجلها لي تعدا عليا و جرات عليا مراتو من بعد عرفت راسي حاملة ب خوك ولدتو و لكن تزاد مريض بالتوحد بقيت كنضور بيه الزناقي حتا تلاقيت بواحد المراة خدامة فواحد الجمعية داتني ليها و تهلاو فيا انا و خوك عاودت ليهم عليك و قالو لي غادي يرجعوك ليا ساعة ملقاوكش من بعد عرفت بلي خرجتي منها و بنيتي حياتك تزوجتي و ولدتي و مبغيتش نجي انا و نخرب ليك السعادة ديالك ملي غاتكوني كتقراي هاد الرسالة غانكون انا تحت التراب بغيت نطلب منك السماحة ابنتي حتا نتي ام دابا و عارفة بلي الام تقد دير اي حاجة باش يكونو ولادها مزيانين و انا خليتك فالخيرية باش منخرجش عليك عندي لي طليبة وحدة اعايدة سيري خودي خوك من الجمعية هو محتاج ليك بزاف معندو حتا حد من غيرك دابا غتلقاي العنوان مور الصورة ديالو سامحيني ابنتي 
سالات الرسالة و عايدة مصدومة شدات فالكرسي جلسات باش مطيحش و كتحاول تستوعب هدشي لي قرات حتا بدات كتبكي و تغوت 

شهد و فيصل دخلو للمزرعة بدلو حوايجهم لبسو سبور و خرجو يدورو 
شهد كتنقز من الفرحة:عرفتي شحال مجيت لهنااا توحشت هاد البلاصة بزاف "شدات ليه فيديه"اجي نوريك المخبأ السري ديالي هههه
فيصل:ههههه مخبأ سري؟
شهد:اه هانتا"كان مابين الشجر مكيبانش لداخل ديالو فيه فراشة و وسادة قدام و شي العاب"هنا كنت كنجي ملي كاندير شي مصيبة كنتخبع هنا ههههه و مساكن شحال كيبقاو يقلبو عليا 
فيصل:هههههه كنتي باسلة 
شهد:اه بزاف هههه اجي دابا نوريك الاسطبل كاتعرف تركب الخيل
فيصل:لا عمري جربت 
شهد:اجي نعلمك 

ياسمين فالتيليفون📱📱
ياسمين:الو حنان صافا 
حنان:صافا احبيبة و انتي 
ياسمين:حمد لله شوفي علمي البنات مور مانساليو الخدمة نتلاقاو فالمول خاصنا نختارو الكسوة 
حنان:اه صافي انا غنعلمهم 
ياسمين:واخا بااي 
امير عنقها من لور:حبيبة 
ياسمين ضارت عندو:امير حنا فشركة ايشوفنا شي حد 
امير:و يشووفو 
ياسمين تفكات منو:ليوم انمشي نختار الكسوة 
امير:انمشي معاك
ياسمين:لا انمشي معا البنات ماشي مزيان تشوفني بيها قبل العرس 
امير:دكشي غي تخربيق
باسمين:اوا صاف خليها مفاجئة 
امير:امم لي بغيتي مور ماتسالي عيطي لي نجي عندك انتعشاو برا 
ياسمين:واخا انمشي نكمل شي شغل و نخرج 
امير:واخا "خرجات ياسمين و بدا تيليفون امير يصوني كان حسام"
حسام:الو الواليد مسالي 
امير:علاش 
حسام:محتاج نهضر معاك انصيفط ليك العنوان ف مسج اجي عندي ضروري 
امير:واخا 
هز امير لافيست ديالو و سوارت و خرج متاجه للبلاصة لي فيها حسام ..وصل لقاه جالس كيتسناه 
امير:حسام ياك لاباس 
حسام:انا مخربق بزااف محتاج لي وجهني
امير:اش كاين قولي 
حسام:انا كتعجبني صاحبت ياسمين سناء 
امير:و ايمان؟
حسام:هنا فين كاين المشكل انا قبل مانتلاقا ب سناء كنت كنضن بلي كنبغي ايمان و لكن كنت غالط انا مكنحس جيهتها ب والو انا باغي سناء 
امير:وشنو عوال دير اطلقها؟
حسام:معرفتش لي غيصعب عليا الامر انها حاملة بولدي 
امير: كان عليك تفكر فهدشي قبل مدير معاها علاقة خارج الزواج 
حسام:اه عندك الحق الغلط مني انا ولكن دابا محتاج المساعدة ديالك اشنو ندير 
امير:سناء شنو كتحس جيهتك 
حسام:هي مكتعطينيش حتا فرصة نهضر معاها 
امير:دابا نلقاو شي حل 

عايدة شادة الورقة فيد و صورة خوها فيد كتشوف فيهم بزوج و عينيها حمرين بالدموع 
عايدة:نتي خرجتي على حياتي خرجتي عليها و دابا جاايا تقولي لي خودي خوك محتاج لييك فييييين كنتتي كنتي بااش كنت انااا محتاااجة لييييك فيييين اههئ اهئ ولكن عرفتي شنو "مسحات دموعها"انا مغنكوونش فحالك باركة بنتي لي خسرت و ولدي لي بعيد عليا يمكن هادي فرصة باش نتبدل 
هزات صاكها و التصويرة لي فيها العنوان و خرجات شدات الطريق للعنوان ..وصلات للجمعية و دخلات لعند المديرة 
المديرة:سلام فاش نقد نعاونك 
عايدة:انا جيت ناخد خويا من هنا هادي هيا صورتو"مدات ليها الصورة"
المديرة:اه سليم اذن نتي هيا عايدة الاخت خديجة الله يرحمها كانت كتنمى تشوفك 
عايدة:انا جيت باش ناخد الاخ ديالي و صافي 
المديرة:واخا اجي معايا 
مشات معاها عايدة حتا وصلو لواحد الغرفة حلات المديرة الباب و اشارت لعايدة باش تدخل ... عايدة بدات كترعد و خايفة من اللقاء ديالهم كتقول بينها و بين نفسها كون غير مجيتش خايفة يولي نقطة ضعفها ...دخلات بخطوات تقال و الدموع مجموعين فعينيها شافتو كيفاش جالس و كيشوف فنقطة وحدة مئة سؤال كيضور ليها فراسها
عايدة:واش بصح هدا خويا ؟كيفاش انتعامل معاه؟كيفاش غاتقوليه هي ختها و هو خوها؟كيفاش اتاخدو معاها 
بدات كتقرب منو شوية بشوية حتا تحنات على ركابيها و شاف فيها 

سليم:ععع أي دة (ملاحظة:سليم ديما كيتفت فالهدرة ولكن انا غنكتب عادي لمهم نتوما تخيلوه كيتفتف😂)
عايدة و علامة الفرحة على وجها:عرفتيييني؟
سليم : اه ماما كانت كتوريني تصاورك ولكن كاتباني حسن من التصاور
عايدة طارت عليه عنقااتو و كتشم فريحتو و دموعها نازلين 
عايدة:اااه اااه اخويا الحبيب اهئئ اههههئ 
سليم غير كيضور فعينيه: علاش كتبكي دابا 
عايدة رجعات شافت فيه:حيت كنت محتاجة نشوفك شحال هداا 
سليم:وعلاش مجيتيش لعندنا انا و ماما حتا هي كانت باغا تشوفك 
عايدة كتمسح ليه على شعرو:لمهم دابا شفتك و غنديك معايا من ليوم اتبقا معايا و مكايناش شي حاجة تبعدنا على لعضياتنا 
سليم:انا منقدش نمشي من هنا ايلا رجعات ماما و ملقاتنيش اتقلق مني 
عايدة شادة البكية:غاتجي عندنا حتا هيا ياله انجمع ليك حوايجك 
جمعات ليه عايدة حوايجو و شدات ليه ف يديه خرجاتو من تما و ركباتو فالطونوبيل 
سليم :طونوبيلتك زوينة بزاف 
عايدة:عجباتك 😃
سليم:اه بزاف كيعجبوني الطونوبيلات بزاف عندي بزاف منهم صغار دابا نوريهم ليك 
عايدة:خاصني نعرف عليك بزاف ديال الحوايج ها حنا وصلنا 
سليم:هادي هيا دارك 
عايدة:هادي دار ولدي 
سليم:نتي مزوجة 
عايدة:لا انا مطلقة وعندي ولد سميتو حسام تقريبا ف نفس سنك غادي تعرف عليه 
سليم:لا لا انا مبغيت نتعرف على حتا واحد 
عايدة:علااش 
سليم:بغيت نبقا معاك غي نتي و ماما بوحدنا 
عايدة:واخا اجي ندخلو بعدا 
نزلو من الطونوبيل و مشاو مشادين حلان ليها الخدامة الباب و تلاقاو مع ايمان نازلة .. سليم خاف و تخبع مور عايدة و هو كيترعد
ايمان:شكون هدا 
عايدة: ايمان من بعد و نهضرو حيدي من الطريق 
طلعات عايدة و سليم لبيتها و ايمان ضرها راسها بالفضول 
عايدة:حبيبي اتجلس هنا علاما توجد ليك الخدامة بيتك 
سليم:انا معجبنيش نجلس هنا كاين ناس مكنعرفهمش خلينا نرجعو للجمعية و جلسي معايا تما 
عايدة:ميمكنش ا سليم و زايدون خاسك تولف تعايش مع الناس هديك لي شفتيها التحت ايمان مرات حسام ولدي 
سليم:مابغيتش نعرفهم مبغيتش نعرف حتااا واحد 
عايدة:واخا تهدن خليك هنا واخا 
سليم:واخا 
خرجات عايدة من بيتها لقات ايمان واقفة قدام الباب جراتها من يدها و بعداتها على تما 
عايدة:شهادشي وليتي كتصنتي عليا 
ايمان:لا اماما انا كنت كنتسناك تخرجي قولي لي دغيا راه راسي ضرني شكون هداك 
عايدة:هداك خويا 
ايمان:كيفاااااااش😱و منين بان هاد خوك 
عايدة خرجات فيها عينيها:سمعي ا ايمان دكشي لي خاصك تعرفيه راه عرفتيه و متبقايش تماداي عليا كتفهمي 
خلاتها كتبلق ف عويناتها و نزلات لتحت عند الخدامة 
عايدة:شوفي طلعي قادي البيت لي حدايا 
الخدامة:واخة ا لالة 

تلاقاو البنات فالمول مور ما سالاو خدمتهم و مشاو بلاصة فستانين العرس 
سناء:واااو هدشي زوين بزاف 
حنان:بااز ليك ا ياسمين كيف غديري تختاري مابين هدشي كامل 
مريم:وعلاش جايبانا معاها غير علا ود هكا 
ياسمين:اااه اري داك الراس نبوسو الوحيدة لي كتفكر فيكم هههن ياله ندخلو خلاص راني متشوقة 😍
دخلو البنات جلسات سناء و حنان و مريم فواحد الفوطوي و ياسمين بدات كتقيص فالفساتين و هوما يعطيوها رأيهم ...دازت ساعة و هوما على نفس الحال حتا خرجات ياسمين و كلهم حلو ف مهم 
سناء:واواواواواااااااو 😍😍😍😍
حنان:يااااي جيتيييي كتحمقي 😍😍
مريم:تبارك الله ما شاء الله 😍😍
ياسمين:حتاا اناا عجبني بزااف صافي هداا لي ناخد (حتا تشوفوه نهار العرس😂)
بدلات ياسمين حوايجها و خلصات الكسوة و خرجو جلسو فالكافي 
سناء:البنات عندي شي خاجة خاصني نعاودها ليكم 
ياسمين:شنو كاين 
سناء:حسام ..حسام بنيس 
حنان:مالو 
سناء عاودات ليهم على دكشي لي وقع اليوم 
مريم:ولكن هو عاد تزوج
سناء:هدشي لي محيرني انا عاد تزوج و مراتو حاملة و جاي تابعني انا 
حنان:يقد يكون مكيبغيهاش 
ياسمين:وي بصح يقد يكون تزوجها غي حيت حاملة 
سناء:معرفتش انا بانلي هدشي ف شكل 
حنان:و ايلا طلقها و بغاك ترتابطي بيه؟
سناء:احح مكرهتش"تكات على يدها و سرحات"هو واعر كيحمق اي وحدة تمناه 
ياسمين:نوضو نوضو البنت راه طايحة هههه 
حنان:نوضي ابنتي و باركة متحلمي راه ديك الساحرة الشريرة والله لا خلاتو ليك 
سناء:كان ضروري تحطمولي معنوياتي 😏تسناااوني 
خرجو البنات رجعو للدار و ياسمين عيطات ل امير يجي عندها ...بعد 10دقايق وصل طلعات لوطو باستو و ديمارا 
امير:امضرا ختاريتي شي حاجة 
ياسمين:اه خداوه البنات ل دار 
امير: امتا يوصل نهار العرس خلاااص 
ياسمين:هههه صبر شوية مااك 
امير:هاحناا صابرين ياله نزلي وصلناا 

شهد و فيصل دوزو نهار غي علا برا ركبو على العود و دارو بيه فالمنطقة من بعد رجعو للمزرعة تعاونو على العشا صايبوه ...تعشاو و شهد خلات فيصل يجمع دكشي وصاتو مايجي حتا تعيط ليه و دخلات لبيتهم خدات دوش و نشفات شعرها لبسات شوميز دو نوي فالكحل دارت شوية دالميكاب و عيطات ليه ... 
دخل فيصل للبيت و لقاها واقفة بهداك الجمال و الانوثة قرب ليها و خشا يدو مور عنقها قربها ليه و همس ليها ف ودنها
فيصل:اش هاد الزين كامل "باس ليها راسها"اندخل ندوش و نجي 
شهد:واخا 
يتبع... 

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.