ف بيت ملون باللون الوردي تشوفو تقول هادا بيت طفلة صغيرة ... ناعسة فوق سرير حتا هو باللون الوردي و الابيض ... فحال شي ملاك تشوفها تقول هادي ماشي بشر هادي ملاك متقدر تآدي حتا حد ... فاقت الجميلة حلات عويناتها العسلية و ابتاسمات ملي تآكدات من الصوت لي فيقها .. ناضت دغيا حلا السرجم و الابتسامة مفارقاتش وجها
...: نتا هههه جيتي😍 تسناني نلبس و نخرج عندك
اووف صباح الخير عليكم سمحولي صبحت ناعسة هههه لمهم نعرفكم عليا دغيا حيت زربانة .. انا سميتي ياسمين انا الوحيدة عند واليديا ساكنين ف قرية صغيرة و الحالة المادية ديالنا عادية عندي 17 عام هاد العام عندي الباك خاصني نجيب مزيان باش نكمل فشي مدرسة مزيانة لمهم هادا لي فيقني دبا الحب ❤❤هههه فيصل من صغر و احنا مع بعضياتنا نلعبو بزوج ناكلو بزوجو نديرو المصايب بزوج ههه حتاا كبرنا و عتارف ليا بحبو 😊😊 و من ديك ساعة و حنا مرتابطين كنتخاصمو و نرجعو نتصالحو و اكيد واليدينا معارفينش هادشي حيت بالنسبة ليهم هاد العلاقات حرام خاص ولكن حنا كنبغيو بعضياتنا و مكنديرو حتا حاجة حرام ... لمهم انا غنووض نلبس حوايجي باش منتعطلش عليه... غسلات ياسمين وجها و مشطات شعرها لبسات سروال سليم كحل و تيشورت كحلا فيها كتابة بالبيض و كونفيرس بيضة هزات صاكادو ديالها و خرجات من بيتها كتسلت ...
ياسمين: اويلي اماما شوفي الدار راها مقلوبة خاصها شي تخميلة ياك هانتي حتا نجي و نخملو واش بغيتي تجي و تشوف دار هاكا و نمشي تقولها لماما تردك ضحكة بين العيالات 🐸
حياة: ولاهيلا عندك الصح صافي سيري ابنتي الله يرضي عليك ولكن كولي شي حاجة عاد سيري
ياسمين: لا غي فطري نتي انا راه تعطلت انشري شي حاجة ف طريق
حياة: واخا الله ينجحك ابنتي
ياسمين : اميين
كيبقا فيا الحال بزاف باش كنكدب عليهم و لكن الحب كيخليك دير شي حوايج بزز منك
خرجات البطلة من الدار و هزات تيلي تعيط ل فيصل 📱
ياسمين: انا خرجت دبا فينك
فيصل: انا ف القهوة لي ف جردة طلعي عندي
ياسمين : واخا انا جايا
مشات بزربة متشوقة تشوفو حيت اسبوع ماتلاقاو بحكم انو بدا واحد الخدمة ف المدينة كمساعد شاف فواحد المطعم حيت هو عزيز عليه الطبخ وهو اللي قرا عليه مور ما شد الباك
وصلات ياسمين للقهوة و عينيها كتقلب عليه ..شافتو و مشات كتجري تخشات ف حضنو
ياسمين: توحشتك بزاااااااف
فيصل شد وجها بين يديه : كون تشوفي انا مدازت عندي هاد سيمانة غي بزز
ياسمين رجعات تخشات فيه: واش غنبقاو هاكا نتشاوفو مرة ف سيمانة هئ هئ هئ راه توحشتك بزاف 😢
فيصل: اوف دبا علاش كتبكي انا علامن كندير هدشي كامل راه علا قبلك باش نكون راسي و نتزوجو 😍ههه هاكاك ضحكي مكنبغيش نشوفك كتبكي
ياسمين : اجي نجلسو و عاااود ليا كيدازت عندك هاد السيمانة و كيجاتك الخدمة واش تهلاو فيك ياك بعدا مكتعياش بزاف واش...
فيصل: حتا حاجة متغلا عليك احياتي و زيدون هاني بديت الخدمة و غنجمع الفلوس لي يعيشونا مرتاحين اااه كنتسنا داك نهار بفاارغ الصبر
ياسمين: 😊😊😊 ا ا ها الفطور جاي
فيصل : كتقلبي لهضرة فحال ديما الحشومية ديالي
عمر: هانتوما اسيادنا بالصحة و الراحة
ياسمين و فيصل : شكراا
ياسمين: ياله عاود ليا دباا من اول نهار مشيتي
فيصل: وااخة الالة نبداو ملي ياله وصلت للمطعم لي خدام فيه....
فيصل : ملي وصلت لقيت بزاف ديال الناس حتا هوما باغيين بلاصة تماك كولنا دوزنا واحد الامتحان طلبو منا نطيبو احسن طبق كنعرفو ليه صايبت هاديك الاكلة الفرنسية لي كنت كنجيبها ليك
ياسمين: ياااااه ايكونو حماقو عليها 😍
صابر: اه عجباتهم بزاف خصوصا شاف الكبير دكشي علاش ختارني مساعد ديالو
فيصل: علا انا لي عندي هاد الزين المغياار و نشوف ف بلاصة اخراا
ياسمين: و مااعرت انا غي حذرتك
فيصل: واخا انا غنمشي نخلص و نرجع نتمشاو شويا
ياسمين: واخا انا غنتسناك علا براا
خرجات ياسمين علا براا واقفة كتسناا فيصل يخرج حتا وقف عليها..
حسن (بابات ياسمين) ياسمين اش كديري هنا
ياسمين شداتها الخلعة من رجليها : اام ب بابا اش خرجك دابا خاصك تكون ف الخدمة
حسن: انا لي سولتك
باسمين: والو كنت غادا عند سمية لدار نراجعو شوية ساعة قالت لي نتسناها هنايا باش تمشي معايا لدار اانا غنعبط ليها دوز عندي نيشان لدار
جبدات تيلي و دوزات نمرة فيصل
ياسمين: الو سمية راه تلاقيت مع بابا ف الطريق و غنمشيو لدار دوزي عندي ... اه مغتقديش تجي صاف ماشي مشكل مرة اخراا بسلامة
حسن: ياله زيدي قدامي
ياسمين: مقلتيليش علاش رجعتي دبا
حسن: خاصني نجيب شي وراق من الدار
ياسمين: اه حيت جاتني عجب
وصلو لدار حسن مشا بجيب الوراق لي خاصينو و رجع لخدمتو و باسمين دخلات لبيتها وعيطات ل فيصل
ياسمين: الو ناري كنا غنحصلو
فيصل: شحال من مرة قتليك مكبعجبنيش هادشي ديال التخبية نجي نخطبك و ديك ساعة مكاين لي هضر
ياسمين: اوف ا فيصل راه مزال الحال علا هاد الهضرة مهم انا كيبان لي منقدش نخرج ليوم خاصني نعاون ماما
فيصل: مزال مشبعت منك راه غدا خاصني نرجع
ياسمين: اوف راه معندي مندير
فيصل: صاف حتا ليل و خرجي عندي نشوفك غي شويا
ياسمين: واخا انا غنشوف
فيصل: كنبغيك
ياسمين: حتا انا
قطعات معاه و خرجات عند ماماها تعاونها ... دوزو نهار غي ف التخمال تغداو و رجعو كملوو .. حتا وصلات العشية رتاحت ياسمين شوية و هزات كتوباتها تراجع
اما فيصل دوز النهار مع واليديه و خوه صغر منو توحشوه حتا هوما
وصل الليل كلشي ناعس عيط فيصل ل ياسمين علمها بلي كيتسناها تحت سرجمها ... ناضت لبسات كسيوة ف الغوز عريانة من الكتف و صباط بلا ف البيض حلات السرجم و خرجات منو بالمساعدة ديال فيصل
فيصل: جيتي زوينة بزاف
ياسمين: 😊
فيصل: اش درتي هاد العشية
ياسمين : عاونت ماما و حفظت و نتا
فيصل: جلست مع الدار شوية
ياسمين: اتمشي غدا ف الصباح
فيصل: اه اتوحشيني
ياسمين : من دابا😊
فيصل بدا كيقرب منها حتا بااسها 💋
حتا سمعات الصوت لي طلع معاها الرعدة من الصبع الصغير
حسن: يااااااااسميييييين 😡
حسن : ياسميييييييين 😡😡😡
ياسمين: ب ب بابا 😱
حسن جاي جيهتهم و عرقو خارجين .. فيصل دار ياسمين مور ظهرو
حسن: اجي لهنا يا بنت الكلب فضحتينني حيييييد نتا من قداامي ولا غنديك فين تربا
ياسممين مخشية ف ظهر فيصل و عاطياها لبكاا
حسن دفع فيصل وجر ياسمين بجهد من درااااعها و غادي بيها لدار و الناس كيطلو من السراجم
دخلهاا لدار و لاحها جبد الصمطة من سروالو و بدا عليها بالعصا ... عيات حياة تفك و والو
حسن: غادي تبعدي نتي ولا نجمعك معاها
حياة: هئ هئ هئ براكة عليها دبا تقتلهاا
حسن: خليها تمووت حسن ليها و ليناا تشوهناااا ف الدرب
اما ياسمين ف مشا ليها صوتها ب كترت الغواات و البكا و فيصل لي وصلو صوتها و بدا كيضرب ف بابهم علا حر جهدوو ... سالا حسن مع ياسمين و خرج ليه
حسن عروقو خارجين و ناوي علا خزيت: سمعني نتاااا يا غاتمشي من هنا و متعاودش ضور ب ساحتناا يا غانديييك فين تربااا 😡
فيصل: عمي راه حنا كنبغسو بعضياتنا وراه كنت باغي نجي نخطبها راه لققيت خدمة و غانتزوجها
حسن : و انا مغنععطيش بنتي لواحد فحالك كون كنتي ناوي لحلال كنتي غاتجي من لول ماشي تخرجها من دارهم ف نصاصات الليل و تت.. أستغفر الله سير من هنا ولا غنعيط ليك لبوليس
دخل و سد الباب علا وجهو و تاجه نيشان لبيت ياسمين طرق داك السرجم مزياان و خدا ليها التيليفون و سد عليها الباب بالساروت
حسن: سمعي ا حياة ايلا حليتي عليها الباب غتجمعي حوايجك و تمشي لداركم 😡
حياة: اهئ هئ حشومة عليك البنت مزال صغيرة و معارفة والو
اما ياسمين ف مكمشة ف بيتها جامعة عندها رجليها و الدموع مبغاوش يحبسو كتبكي علا قلبها لي داارها و علا لحمها لي عاطيها الصداع
ياسمين : الله ياربي اش غندير 😢منقدش نعيش بلا فيصل 😢😢
بقات كتبكي حتا داتها عينيها لا هيا لا فيصل لي نعس حدا باب دارهم 💔
حياة بقات فيها بنتها خلات راجلها حتا نعس و مشات حلات عليها الباب .. دخلات لقاتها ناعسا و وجها فازك بالدموع و لحمها زرق بالعصا .. بدات كتمسح ليها علا شعرها حتا فاقت
ياسمين: ماما هئ هئ هئ
حياة عنقاتها: علاش مقلتي ليا والو ابنتي
ياسمين غي كتبكي
حياة: واش كتبغيه
ياسمين هزات راسها بمعنى اه
حياة: و هو ؟ واش ناوي المعقول
ياسمين : اه اه اماما هو ما خلا مادار باش يجمع الفلوس و راه خدام دبا ف واحد المطعم ف المدينة راه ديما كان كيقولي يجي يخطبني ولكن انا كنت كنرفض حيت خفت متقبلوهش هئ هئ هئ عافاك اماما عاونيني انا منقدش نعيش بلا بيه
حياة: واخا ابنتي اما غنحاول نقنع باباك
ياسمين : الله يخليك ليا اماما
باستها ف راسها و غطاتهاا و سدات الباب عليها و رجعات لبيتها حطات السوارت بلاصتهم و نعساات
🌞🌞🌞🌞🌞🌞🌞🌞🌞🌞🌞 صباح جديد فاق فيصل علا صوت الباب لي تحل كان حسن
حسن : واش نتا باغي تخرج علا راسك واش مكتحشمش
فيصل: عمي علاش مباغيش تعطيني فرصة
حسن: ما عندي ما نعطيك اصلا البنت مزال صغيرة و نتا مزال مشديتي شي خدمة مزيانة بغيتيني نعطيها ليك تكرفص عليها
فيصل: وداكشي لي درتي ليها البارح ماشي تكرفيص
حسن: هااديك راها بنتي و زيدون شكون لي دار الشوهة هنايا واش انااا راه مكرهتش كون قتلتهاااا
فيصل: محرامش عليك تفرق بين جوج كيبغيو بعضياتهم
حسن: حيد من قدامي نمشي لشغلي و بلاما تعدب راسك و تبقا تسنا راها عمرها تفوت عتبة بيتها
وصل حسن لخدمتو (هو خدام موظف ف المقاطعة) و شاف الناس كيشوفو فيه و يوشوشو بحكم انهم ساكنين ف قرية صغيرة دغيا كتنشر الاخبار .. حاول يديها ف خدمتو واخا حس بالشمتة
اما فيصل ف بقا كيدق ف باب دار ياسمين حتا حلات ليه حياة
حياة : احسن الله يخليك سمع مني راه ايلا زوجتيها ادير شي حاجة ف راسها
حسن: هضرة وحدة لي قلت ولد عمها راه شحال هادي فاتحني ف الموضوع دبا نعيط ليه يجيو يديو علينا هاد الخطية
كمل غداه و رجع لخدمتو
اما ياسمين ملي سمعات ديك الهضرة تصدماات و بقات عاطياها غي البكا
ياسمين : الله يااربي اش غنديير هئ هئ هئ هى خاسني نلقاا شي حل انا مستحيل نتزوج بشي حد من غير فيصل
ناضت هزات واحد الصاك و جمعات فيه حوايجها و خبعاتو تحت الناموسية و بقات عاطياها البكا حتا وصل الليل و دخلات ليها ماما العشا
حياة: هاكي ابنتي تاكلي شو كيوليتي
ياسمين: ماغندو منين يدوز واش بابا كاين
حياة: اه راه ناعس
ياسمين: ماما خليني نمشي لصالة نطل غي من سرجم
حياة: ينوض باك ابنتي و يلقاك برا لبيت ايتفاهم معايا
ياسمين: دغيا اماما عافاك راه تخنقت هنا
حياة: واخا ياله نوضي
مشاو لصالة و ياسمين حلات السرجم و خدات نفس عمييييق
ياسمين: الله عاد تحلات لي الشهية ماما وجدي ليا شي حاجة
حياة: ياك ياله جبت ليك العشا
ياسمين: ماعجبنيش دكشي
حياة: واخا بقاي هنا متحركيش
ياسمين: واخا
بقات كتسناها حتا تبدا طيب و رجعات لبيتها هزات الصاك و شوية د الفلوس كانت جامعاهم لبسات كابيتشو علا البرد و مشات كتسلت حتا وصلات للباب حلاتو بشووية باش مديرش الصوت و غي خرجات عطات رجليها للريح كتجري باقصى حدها حتا وصلات للمحطة و لحسن حظها لقات الكار لي غادي ل مدينة عاد غاادي .. ركبات فيه عاد رتااحت و ابتاسمات
ياسمين: هانا جاايا ا حبيبي ❤
حياة: ياسمين ها انا وجدت ليك.. ياسمين فينك (مشات تقلب ف بيتها) اويلي فين مشات البنت ( كانت راجعة ل صالون حتا بان ليها باب الزنقة محلول) اوييييليي البنت هربات الله ياربي ليوم يقتلني اش داني نحل ليها واش نخرج نقلب عليها مغتكونش بعدات
حسن: مالكي كتهضري بوحدك حماقيتي
حياة كتبلع ف ريقها: ححسن 😱
حسن: مالكي اش واقع جيبي ياسمين نعلموها بزاوجها من ولد عمها
حياة : ي ي ياسسمين م م
حسن: امالكي اهاد المرا
حياة: ياسمين م مكايناش 😢
حسن: كيفااااش مكيناااش😡😡 فين مشات (شدها من دراعها) دوي ياك قلت ليك الباب ميتحلش
حياة: هئ هئ هئ خرجتها غي لصالون قاتلي تخنقات ف البيت ساعة غفلاتني و هربات هئ هئ
حسن: ميعولش عليكم نتوما العيالات ف شي حاجة انا خارج نقلب عليها و ايلا ملقيتهاش ديك ساعة اتفاهم معاك
خرج حسن قلب عليها القرية كاملة ملقاهاش طلع الصباح و رجع للدار
اما ياسمين ف داتها عينها حتا فيقاتها واحد المرا
هبطات من الكار و تخلعات من داك بنادم كامل اول مره تشوف هاد الزحام كامل بدات كتمشا حتا بعدات علا المحطة
ياسمين: اوف فين انلقاك دابا ا فيصل حتا نمرة محفضاهاش اوف انسول شي حد .. ختي سمحيلي عافاك كنقلب علا واحد المطعم مشهور هنايا
البنت: ف اينا بلاصة ب الضبط
ياسمين: معرفتش لي عارفة هو انو كاين ف المدينة حتا سمية معارفاهاش
البنت: اختي هاد المدينة راها كبيرة شحال قدك تقلبي راها عامرة مطاعم
واش كتقلبي علا شي حد
ياسمين: اه علا خطيبي
البنت: اوا عيطي ليه
ياسمين : مشا ليا تيلي و نمرة محافضاهاش
البنت: بقيتي فيا اختي سمحيلي معندي كيف نعاونك
ياسمين: نتي لي سمحيلي صدعتك
البنت : ماشي مشكل من اينا بلاصة جيتي
ياسمين : من واحد القرية سميتها****
البنت: معندك حتا حد هنا؟
ياسمين : لا غي خطيبي لي قلت ليك عليه خدام هنايا
البنت: اه اوا اختي اش غنقولك مسخيتش بيك ولكن عندي شي خدمة هاكي نمرتي ايلا وحلتي ولا تلفتي عيطي ليا انا سميتي حنان
ياسمين: شكرااا اختي و انا ياسمين
حنان: متشرفييين ياله الله يعاونك
ياسمين : مع السلامة
بقات ياسمين كاضور ف ديك المدينة الكبيرة و فين ما يبان ليها شي مطعم كتدخل تسول فيه علا فيصل حتا وصل ليل و معرفات فين تمشي شداتها البكية و الخلعة و كتمنا توقع شي معجزة و يبان فيصل قدامها ..ندمات حيت هربات من الدار و تمنات كون باها عطاها فرصة هيا و فيصل ... بقات كتمشا حتا بانت ليها واحد الجريدة مشات لواحد الكرسي جلسات فيه و جبدات من صاكها جاكيط حيت كان البرد لبساتو و دارت الصاك تحت راسها و نعسات
عند فيصل ف الخدمة غي ساهي و كيفكر كيفاش ايحل هاد المشكل
الشاف سعيد: فيصل اش عندك معجبتينيش
فيصل: والو ا مون شاف غي شي مشاكيل
سعيد : خاسك تعلم واحد الحاجة هيا ملي دخل هاد البلاصة تنسا المشاكل مخاسكش تجمع بيناتهم فهمتيني
فيصل حرك راسو بمعنى اه
سعيد: ياله كمل خدمتك
حسن ملي رجع لدار لقا حياة جالسة علا اعصابها كتسنااا
العساس: انتي لي اش كديري هنا واش مكتخافيش سيري ابنتي لداركم راه دنيا عامرة سكايرية و شفارة
ياسمين: معندي فين نمشي 😢
العساس: واش ماشي بنت هنا
ياسمين: لا انا جيت نقلب علا واحد الدري و لكن معندي لا نمرة لا سميت البلاصة فين خدام
العساس: اوا سيري رجعي منين جيتي
ياسمين: لا منقدش
العساس: لمهم بقاي هنا حتا يصبح الحال و يحن الله انا واقف غي علا برا
ياسمين: واخة شكرا ا عمي
🌞🌞🌞فاقت ياسمين علا الشمس ضاربة ليها ف وجها كرشها كتغوت بجوع ناضت حيدات الجاكيط و رجعاتو لصاك و مشات تشري شي حاجة تاكلها ... من بعد ما سلات تفكرات ديك البنت لي تلاقات بيها البارح و قررات تعيط ليها تعاونها ... قلبات علا تيليبوتيك و دارت نمرتها
📞📞📞📞📞
حنان الو
ياسمين: الو حنان انا ياسمين اللنت لي تلاقيتيها البارح
حنان: اه واش لقيتي لي كتقلبي عليه
ياسمين: لا يقيت كنقلب حتا طاح الظلام و نعست ف الزنقة
حنان: اويلي و علاش معيطيليش ديك الياعة مهم هانتي تسنايني ف ديك البلاصة لي تلاقينا فيها البارح انا شوية و انجي عندك
ياسمين: و عليكم السلام سمحيلي اختي بزااف برزطك معايا
حنان: متقوليش هاكا كون كنتي بلاصتي اكيد اديري فحالي مهم ياله معايا دابا
ياسمين: لفين
حنان: لدار
ياسمين: بلاش اختي انزيد نعدبك معايا و وليديك...
حنان: انا ساكنة غي معا البنات و راهم ظريفين بزااف و زايدون راه كيبانلي غطولي فهاد المدينة باش تلقاي حبيب القلب دكشي علاش خاسك تقلبي علا سكنة و علا خدمة
ياسمين: ولكن فاش انخدم انا عمري خدمت ف شي حاجة
حنان : ياله حنا نوصلو لدار و نهضرو ف هادشي
مشاو البنات علا رجليهم حتا وصلو لواحد الحي عادي كل واحد ساد عليه دارو و داخل سوق راسو و الدار لي ساكنين فيها البنات فيها جوج طبقات و هوما كاريين غي طبقة
حنان: دخلي مرحبا بيك البناااات هااا ياسمين جاات
البنات: مرحباا بيك
ياسمين حشمانة : شكرااا
حنان: هانتي هادي مريم و هادي سناء
ياسمين: متشرفة ب معرفتكم
سناء و مريم: حتا حناا
سناء : جلسي جلسي انمشي نصايب كاس د اتاي
دخلو البنات ل صالون و جلسو كياسناو سناء .. الدار كانت علا قد الحال صالون و جوج بيوت و حمام و كوزينة
سناء : هاا هو جاا
حنان: دبا عاودي لينا من لول باش نقدو نعاونوك
عاودات ليهم ياسمين قصتها مع فيصل و الهروب ديالها من لول حتا لاخر
حنان: بقيتو فيا يا صوكع
مريم: دبا شنو غديري اختي
ياسمين: و الله معرفت
حنان: انا غنقولك اش غاديري نتي غتسكني معانا حنا اصلا كنا ربعة د البنات و مشات وحدة نتي خودي بلاصتها و بالنسبة للخدمة انا ياله شفت هاد الصباح ديك شركة بنيس باغيين عارضات جداد و نتي زوينة و فورمة ديالك غزالة خاصنا غي نقادوك شوية باش تباني كبيرة
ياسمين: ع عارضة ازياء؟
حنان: اه مالكي معجباتكش كون كانا عندي فورمتك كون راني لاسقة فيهم و عااد راه كيتخلصو مزيااان مع الوقت اتبقاااي ترقاااي و فحال والو تولي من بعد عارضة اساسية
قادات ياسمين حوايجها ف الماريو و هزات فوطة و حوايج لي غتلبس و دخلات الحمام .. سالات و نشفات شعرها و ضفراتو و لبسات كسوة حمرا فايتا ركبة و معرية من الكتاف رشات ريحة و وجها مدارتش فيه نقطة د الماكياج حيت مكتعرفش ليه و معندهاش معاه هزات صاكها و خرجات عندهم كانو كيتسناو فيها
البنات: بصحة
ياسمين: الله يعطيكم الصحة
حنان: ياله زيدي قبل ما تسد خولة
ياسمين: شكون خولة
سناء: كوافورة
ياسمين: علاش غنمشيو عندها
مريم : فنظرك علاش غنمشيو راه خاسك تقادي راسك
ياسمين: ولكن انا راه واجدة نمشي هاكا
حنان: اه سيري هاكا باش يحساب ليهم بنت عندها 17 عام
ياسمين: وراه عندي 17عام
سناء: داكشي علاش انديوك عندها باش تسبغي شعرك و تقادي حالتك
ياسمين: لا لا منصبغش شعري مغيبغيش فيصل
حنان: فين هو فيصل وريه ليا شتي ايلا تقبلتي ف هاد الخدمة هو لي ايقلب عليك و دغيا ايلقاك
ياسمين: بصح 😍
مريم : اه اختي هادي هيا الطريقة الوحيدة
سناء : ياله نمشيو باركة من هضرة
حنان: مشينا اياسمين
ياسمين: مشينااااا
تمشاو علل رجليهم و لي داز كيشوف شكون هاد البنت الجديدة لي معاهم ..
خولة: اهلا اهلا زارتنا البركة (سلمو عليها)
حنان: هادي هيا البنت لي قلتليك عليها
خولة: اه مرحبا بيك اختي اشنو سميتك
ياسمين: ياسمين
خولة: امم ياسمين كووني اكيدة غدا اتقبلي ف شركة بنيس كاع البنات لي قاديتهم تقبلو فيها
لبسات ياسمين كسيوة ف الباج و مزوقة و جاكيط ديال التجين و صباط ف الباج و صاك صغير
حنان: دبا راك وااجدة 👌👌👌👌
ياسمين: شكراا ا خولة بزاف
خولة: مكاين لاش غي حمري لينا وجهناا غداا و عندااك تخلعي دخلي عاادي ايسولك شي اسئلة و يشوفك كي دايرة و كي كتمشاي و صاف كون تايقة من راسك
سناء: انخدمو معاها علا هادشي تكت
مريم : يلاه زيدوو
البنات: مع السلامة
خولة: باي باي
مشاو البنات عند المصور و قاد ليها شي تصاور سالاو و رجعوو لدار .. كلاو و ناضو يدربو ياسمين كيفاش تهضر و كيفاش تمشااا حتا عيااو و كل وحدة تلاحت ف بلاصتها نعسات الا ياسمين لي بقات فايقة كتفكر ف فيصل ملي يشوفها بهاد الشكل الجديد و يشوفها مشهورة واش غيفرح ليها ولا يعاتبها ولكن هيا مالقات حتا شي طريقة اخرى باش توصل ليه
🌞🌞🌞🌞🌞🌞🌞🌞🌞🌞🌞حنان و سناء و مريم وااقفين فوق راس ياسمين كيفيقو فيها
حنان كتنغزها: ياسميييين
ياسمين: اممم
حنان: نوضي ايمشي عليك الحال
ياسمين: انزيد نعس غي شوية
سناء: مريم سيري جيبي واحد السطل ديال الما
ياسمين ناضت قافزة: صافي صافي هانا نضت
حنان : علا سلامتنا اجي تفطري باش توجدي راسك
ياسمين: واخا انغسل وجهي و نلحق عليكم
مشات غسلات وجها و رجعات عندهم لقاتهم كيتسناوها
ياسمين: الله علا ريحة هاد الفطور كيشهي
سناء : مريم لي وجداتو الحادكة ديالنا ههه
مريم: متزيدوش فيه كولو دغيا
كلاو البنات دغيا و تجمعو ف بيت حنان و ياسمين
لبسات قميجة ف الموطاغد و دجين مقطع من جهة وحدة و صباط بلا خلات شعرها مطلوق و صايبات ليها حنان شوية د الماكياج
سناء: اش هاد الزين كامل ليوم طيري ل سي بنيس العقل ههههه
مريم: علا لي عندو فحال ديك المرا يشوف براا
حنان: بعدو من البنت هي باغا غي فيصل
سناء: ملي غدخل لهاد العالم و تشوف تيتيز لي فيه مغيبقاش يبان ليها فيصل هههه
ياسمين تقلقات: لا انا منقدش نشوف ف شي حد من غير فيصل من صغرنا و حنا مواعدين بالزواج هو ديالي وانا ديالو
سناء: صافي صافي راه غي كنت كنضحك مالك دغيا تقلقتي
حنان: مديش علا هاد الهبيلة فمها خارج عليها
سناء شدات فيها: واش تقلقتي مني
ياسمين: لا سمحيليا تعصبت عليك راني خايفة
سناء: متخافيش كلشي ايدوز مزيان
مريم: لبنات ياله كريم كيتسنا التحت
ياسمين: شكون هدا
سناء: الشيفور ديالنا هههه
حنان: واحد الدري كيخدم مع مريم كيوصلنا كل نهار لوجه الله هههه
هبطات من الطونوبيل و بقات كتهز فراسها حتا عواج كانت عمارة كبييييييييرة بزاف
ياسمين: كيف كيديرو يطلعو حتا لفوق هادو باز ليهم ياربي يدخلوني غي التحت
دخلات ياسمين للشركة و مشات عند الكاتبة
ياسمين: سمحيلي اختي انا جيت علا قبل الكونكور
الكاتبة: اه طلعي للطابق 20
ياسمين : شكرا
دخلات ل اسنسور و ياله كان ايتسد حتا حبسو شي حد برجليه
الشخص: السلام
ياسمين 😍😍😍😍
الشخص كيحرك يديه قدام وجها
ياسمين: ا ا قلتي شي حاجة
الشخص: غي السلام
ياسمين : اه و عليكم السلام ( شهاد الزين كامل هدشي معندناش ف القرية هههه اويلي اش كنقول عندي فيصل😐)
الشخص: الطابق 20؟
ياسمين : ا اه
الشخص: تفضلي
مشات ياسمين قدامو و هو وراها حتا دارت علا غفلة و تصاطحات معاه كانت غطيح ولكن شدها و تلاقاو عينيهم بقاو مدة كيشوفو ف بعضياتهم)
ياسمين: ف ي ن ا اندو زو الكون كور
الشخص: علا نتي من العارضات
ياسمين فاقت من الدهشة: اه اه وريني عافاك
الشخص : كون مشيتي نيشان و مضرتيش كنتي اتلقايه و كنتي ادوزي دغيا حيت راه بزاف لي كيتسناو يدوزو
ياسمين: اويلي بصح واش بزاااف يعني نقد ماندوزش
الشخص: علا نتي متايقاش ف راسك
ياسمين: لا لا هئ هئ هئ انا بغا ضروري نتشهر باش نقد نلقاه
الشخص: شكون هو
ياسمين: مكيهمكش غي زدتي ضيعتي لي الوقت
ضارت و مشات بزربا فين قالها
الشخص: هههه هبيلة هاد البنت
مشات ياسمين لقات ديك البلاصة اطرطق بالبنات ها طويلة ها رقيقة ها زعرة ها سمرة شدات نوبتها و ما وصلاتها النوبة غي بزز
مشات هازا الملف لي فيه تصاورها و داكشي لي طالبينو و قفات قدام الباب د المكتب كترعد بزز باش دقات قاليها دخلي
دخلات جالسة المدير ف الكرسي و عاطيها بالظهر اشار ليها بصبعو باش تجلس ... دارت كيف قالها وهي مبقا ليها والو و تبكي من الخلعة ... غي ضار و هي تصدم
ياسمين: نتاااااا 😱😱
ياسمين: نتاااااا😱
الشخص: اناا
ياسمين: نتا هو المدير
الشخص: انا هو المدير
ياسمين: و علاش مقلتيهاش ليا قبيلة
الشخص: كون كنتي مهتمة بهاد المجال كنتي اكيد اتعرفيني😉
ياسمين: انا ممهتماش بيه
الشخص: دونك مباغاش الخدمة علاش مضيعة لينا الوقت
ياسمين : لا انا باغاها ولكن غي بهدف معين
الشخص: لي هو؟
ياسمين: جيت المدينة باش كنقلب علا واحد الشخص و لكن لقيت صعوبة باش نوصل ليه حيت معارفاش سميت المطعم لي خدام فيه ولا نمرتو و اقتارحو عليا شي بنات اني نجي لهنا يمكن ايلا وليت مشهورة هو يقلب عليا
الشخص: امم
ياسمين: اتخدمني ياك ا موسيو ...
الشخص: بنيس.. امير بنيس
ياسمين: و انا ياسمين 😁
امير: اري
ياسمين: شنو
امير: الملف 😑
ياسمين: اه هااك هاك
امير: امم 17عام مزال صغيرة
ياسمين: ولكن مبيناش عليا 😁
امير: وي كتباني صغر 😂
ياسمين 😔شنو زعما منصلاحش
امير: انقبلك غي علا قبل حبيبة القلب لب كتقلبي عليه حتا انا ملي كنت قدكم كنت كنحب
خرجات ياسمين اطيير بالفرحة ركبات ف الطوبيس و وصلات لدار لقات البنات مزال مجاو .. بدلات حوايجها و مسحات المكياج و جمعات شعرها و دازت الكوزينة و جدات الغدا شوية و دخلو البنات
حنان: امضرااا
ياسمين: تقبلت 😍😍
سناء: ياااااي فرحت ليك
مريم: كنت عارفة 😍😍
ياسمين: ولكن عرفتو وقعلي بلان خايب مع المدير
حنان: اويلي شنو درتي
عاودات ليهم كلشي
سناء: ياه صدق ظريف بعداا انا غنوض نجمع هادشي
مريم انعاونك
جمعو البنات دكشي و دخلو الكوزينة
و بقات حنان و ياسمين بوحدهم
حنان: ياسمين سمعيني نتي دبا ادخلي لهاد العالم و اتلاقاي مع بزاف د رجال و اكترية كيكونو مزوجين و كيقلبو علا شي عارضة ازياء مزال صغيرة و زوينة كيدوزو بيها الوقت عافاك حافظي علا راسك و مدخليش هادشي لدماغك
ياسمين: متخافيش اانا عارفة راسي اش كندير شكرا بزاف علا المساعدة ديالكم و الله عمري نساها
حنان: هانية لمهم خاصنا نرجعو حنا لخدمة
ياسمين: انا غنعس شوية
حنان: ياله انا غنجر البنات نمشيو بسلامة
ياسمين: بسلامة
خرجو البنات و ياسمين تكات ف بلاصتها بقات كتفكر ف حياتها من هنا لقدام كيفاش غتكون حتا نعسات
عند امير بنيس :
امير بنيس هو مدير شركة بنيس هي شركة لي كتصمم الازياء و فنفس الوقت عندها عارضات كيعرضو دوك التصاميم هو و مراتو عايدة كانو بجوج عارضين ازياء بغاو بعضياتهم بزاف و تعاونو حتا كبرو الشركة ولدو بنت "احسان" و ولد "حسام" ولكن حبهم معا الوقت تلاشى عايدة ولات هاماها غي الشهرة و اللقائات التلفزية و الصحفية و الندوات و الجمعيات و امير ولا مشغول غي بالخدمة همو هو يعيش ولادو احسن عيشة ماشي كيف تكرفص هو باش يوصل ياا ترى وااش هاد العائلة رغم غياب الحب اتبقى مجموعة ولا غاتجي شي عاصفة تقلبها سفاها علا علاها
هادشي لي غنشوفوه ف الاجزاء القادمة
صباح جديد🌞
فاقت ياسمين بكري دوشات نشفات شعرها لبسات كسوة ف الزرق نص كم و حد الركبة مزوقة بالورد سرحات شعرها و طلقاتو دارت شوية د الماكياج لي علموه ليها البنات لبسات صباط بلا ف الباج و صاك ف نفس اللون رشات الريحة و خرجات من البيت مشات الكوزينة و جدات اتاي و حطات الخبز و الفرماج كلات شوية و خلات للبنات .. هزات صاكها و خرجاا من الدار و مشات لبلاكة ديال الطوبيس تسنات شحال حتا وصل .. حبس ف بلاصة قريبة من الشركة كملات علا رجليها و ف الدخلة تلاقات ب امير و عايدة داخلين بزوج بتاسم ليها امير و رداتها ليه ... تسناتها حتا طلعو ف ل اسنسور عاد طلعات هي لطابق 5 دخلات لقات البنات لي تقبلو مكانوش بزاف شي 15 وحدة و قفات معاهم و تعرفات علاشي وحدات حتا جات عايدة كتمختر لاصقة فيها الكاتبة ديالها سميتها منى
منى: مدام هادو هما العارضات الجداد
عايدة كطلع و تهبط فيهم : امم دخليهم لعند فؤاد يبداو التصوير
مشاو كيف قالت ليهم دخلو لبلاصة ديال التصوير فرقو عليهم الحوايج و قادو ليهم الماكياج ..ياسمين لبسوها كسوة صيفية ف الغوج معرية من الظهر و فيها سمطة خفيفة فالكحل و صندالة عالية فالكحل و دارو ليها مكياج تقيل ركزو ليها علا العينين و شعرها جمعوه ليها كوب شوفال
فؤاد موجه هضرتو لياسمين: ياله اجي وقفي هنا
مشات ياسمين و هي خايفة و حشمانة اول مرة تدير هادشي
فؤاد: ترخاي باش التصاور يطلعو زوينين
بدات ياسمين كترخا شوية بشوية حتا ولفات و عجبها الحال ولات كتحرك فحال شي محترفة و هادشي كامل قدام عينين امير لي مقدش ينزل عينيه عليها
خرجات عايدة من المكتب و امير خبط البيرو و هز لا فيست ديالو و خرج حتا هو يوجد راسو
كولشي وجد راسو للحفلة العارضات بجمالهم الساحر و فساتين المبدعة عايدة و لمسة أخصائيين التجميل
(اتلقاو اطلالة ياسمين و عايدة و امير ف الصور👇)
اتاجهو لمكان الحفلة لي كان عبارة عن قاعة كبيرة فيها الدروج الوسط و منصة ف جنب و البيفي ف الجنب الاخر ... طلعو العارضات للفوق باش ملي يهبطو وحدة وحدة .. القاعة بدات كتعمر بالطبقة الراقية و الاعلاميين .. دخلات عايدة و امير مشادين بداو كيلتاقطو ليهم صور مع بعضياتهم
صحافي : سمعنا بلي كانو بيناتكم خلافات الفترة لي فاتت واش تصالحتو
عايدة: الخلافات علدي يوقعو بين اي جوج مزوجين و هما لي كيقويو العلاقة ياك احياتي
امير: بصح احبيبة
حطات يدها مور عنقو و باستو ف فمو 💋
عارضة1: ياختي شحال فيهم ديال النفاق
عارضة2: اشمن نفاق راه باينة كيبفيو بعضياتهم
عارضة1: اش كتعرفي نتي انا راه الواحد من عينيه نعرفو واش كيحب ولا
عارضة : امم صافي هنينا خلينا نشوفو
المقدم: مرحبا بيكم ف حفل تقديم العارضات الجدد لشركة بنيس
👏👏👏
المقدم: مدام بنيس ممكن تفضلي للمنصة
ناضت عايدة كتمختر و جميع الاعين عليها
عايدة: مساء الخير كنعاود نرحب بيكم ف هاد الحفل لي من خلالو غادي تعرفو علا العارضات لي غادي يكونو ف عرض بنيس القادم و طبعا فحال كل سنة الجمهور هو لي غيختار العارضة الرئيسية دابا غاتهبط كل عارضة من رقم 1حتا ل رقم 15 و كل واحد فيكم ايصوت علا العارضة لي تستاهل هاد تكون رئيسية شكراا
بداو كيهبطو العارضات وحدة ب وحدة كل وحدة زينها ف شكل الناس حتارو ايلا شخص واحد لي كانت بين عينيه في وحدة منهم
قصة العشيقة الصغيرة
محتوى القصة
التنقل بين الأجزاء