قلب جريح الجزء العاشر

من تأليف Ghazal trust
2018

محتوى القصة

رواية قلب جريح

طلعو فالطوموبيلوشدو الطريق كيطيرو حتى للمكان المعلوم ونزلو قصدو البلاصة.
و بأحديتهم الانيقة وصوت كعب الحداء يتكلم مشمأزا لكل خطوة يخجوها فوق تلك الزرابي البالية دات الوان غامقة متسخة يشهد منضرها على عدد الاقدام التي خطت خطواتها فوقها ، كيف لاقدام نضيفة واحدية راقية ان تمشي على توب بالي ، كيف لملابس باهضة الثمن ان تجلس على مقاعد يملؤها الغبار ومتسخة كأنها لم تلامس الماء يوما ، كيف لأيادي ناعمة ان تلمس مقاعد ذهنية الملمس ، كيف لرواءح راقية ان تختلط براءحة نتنة تحبس الانفاس ، كيف للعقول الواعية المثقفة ان تلتجأ الى السحر وتضع تقتها فعقول امية وتتواصل معهم كي تصل الى مبتغاها.
هاكذا هم بعض العقول المثقفة عندما تطغى تقطع حبلا متينا يجمعها مع خالقها وتضع يدها بيد شيطان ابتسم لرؤيتها ورحب بيها .
هاكا دخلات سارة لبيت شكله مهجور وسط حي شعبي لا تغلق ابوابه ابدا لا ليل لا نهار ، وهي داخلة كتشوف وسعة كبيرة مفرشين حصيرة فالارض جالسين فيها رجال
.. ونسى كبار وصغار ،، جالسين مع جناب الحيط المحرش بحال الى الظار مكملاتش البناء ديالها شادين النوبة وقدامهم باب اخر كبير عبارة على بيت اخر جالسين فيه نساء بوحدهم بجلالبهم منهم للارض فوق زربية بالية مع جناب الحيط، منهم اللي من لباسهم باينة عليهم ناس من الطبفة الرتقية ومنهم اللي من الطبقة الشعبية ، مخلطين وفالزاوية دالبيت جالس راجل كبير فالسن نحييف وعينيه كتغطيهم غشاوة بيضاء فبؤبؤ العين تكون عندو حوالي 80 سنة بجلابة بيضاء فوق هيضورة من شكلها باينة قديمة وتقدر تكون بدات معاه من نهار دهل فهاد الميدان ، قدامو طبلة مربعة من الخشب فيها زلافة وقصبة وبجنبها مجموعة من الاوراق مقطعين متساويين وحدة فوق وحدة وكتب قديمة جدا من منضرها كتبان عاشت عصور واجيال ، جالس كيهضر بفمو وقدامو جميع الناس بحال بحال بحال معاطي اعتبار لحتى واحد وحتى المضر ناقص ليه ، من غير واحد السيدة لابسة طابلية بيضاء باش تبان انها هي اللي كتسخر ليه وتقاد النوبة بين الناس وتعيط على كل واحد وصل دورو . 
جلسات سارة حتى جامعة رجليها وحداها بشرى مبتاسمة تابعة مولات الطابلية البيضاء بعينيها كتسنى تشوف فيها حتى نخزاتها سارة وهمسات فودنها
سارة: اويييلي هادشي كامل غيدوز عاد حنا! وكيهضر قدام كلشي؟؟
بشرى: وعااادي تا نتي علاه مالهم هلدو اللي حايين لاش جايين؟ راه جايين تا هما خا اللي بغا يفك السحور ها اللي غيسحر مالهم جايين لكلينيك باش تحشمي قدامهم! وزايدون كنتسنى غير ربيعة تشوف فيها باش نغمزها تجي عندي نضبر عليها بشي 20 درهم تسبقنا حنا قبل هادو اما الشريف راه مكيعرف لا نوبة لا ستة حمص كيعرف غير اللي جلس قدامو...صافي سكتي ها ربيعة جايا 
تحنات ربيعة عند بشرى بحال الى كتهضر معاها وهي تخشي ليها 20 درهم فجيب الطابلية ورجعات تكات على الحيط كتفرنس حتى ناض الولد اللي كان جالس قدام الشيخ وهي تعيط ليهم ربيعة 
بشرى: نوضي سيري بوسي يديه وجلسي قدامو
سارة: نوضي معايا حشمت 
بشرى: يالاه نوضي قبل مايبدا يسب راه مكيحشمش ولد لحرام
ناضت سارة بزربة شادة طالونها فيدها وجلسات قدام الشيخ وباست يدو وجبدات 200 درهم حطاتها فوق الطبلة وجلسات حشمانة كلشي كيشوف جيهتها وكيتسناو نوبتهم ، سولها الشيخ وهوا بصوت مبحوح وصبعانو عوجين بكبر السن ديالو 
الشيخ : اش عندك ؟ زواج ولا طلاق ولا خدمة؟؟
يالاه جات تهضر وهيا تسمع صوت امرأة هضر موراها

قبل مادور شافت راس السيدة تحنا على يد الشيخ باستها وعطاتو فيدو كارطونة عبارة عن هدية فاللون الاسود 
المرأة : الشريف...ها الكادو اللي واعدتك بيه ، الغرض تقضى الحمد لله والارض ديناها وراجلي كيقوليك راك باقي كتسال ليه الذبيحة عجل وانا حبت ليك الكادو 
شد الشريف الكادو كيتفتف ويفرنس ..سنانو طايحين ماعندو تا سنة وفمو كيتسرط لداخل وكيهضر بزز ، بقات سارة مصدومة حتى رجع شاف فيها وعاود نفس السؤال. وهي تجاوبو بصوت خافت مقادراش تشوف فجنابها وفالعيالات اللي دايرين بيها. هز بيدو المرعودة كارطة محطوطة فوق الطبلة اللي قدامو حتى هيا من شكلها باينة قديمة ، قصمها على تلاثة وحطهوم قدامها وبدا يحط صبعو ويهضر
الشريف: ها قلبي ...ها تخمامي...ها باش ياتيني الله عاوظي قوليها تلاثة دالمرات 
عاوداتها موراه وكتحط صبعها فوق كل جزء من بعد جمعها الشيخ وعطاها ليها حطاتها على قلبها لبضع ثواني ورجعاتها ليه وبدا كيفرقها قدامها بالتساوي صف تابع صف وحتى من الرسومات دالمارطة بهاتو ومابقاوش باينين بزاف ، هز نضارات حجهم فعينيه بينو ليه عينيه من الزاجة كبار كيخلعو وبدا كيشوف ويهضر
الشيخ : اللي قلبك عليه طايحة فحجرو وحدة فعز الربيع شعرها طويل بيضة معامرة نا ضعيفة وكيشوف لجيهتها ونتي عندك غيار من واحد عندك معاه الدم وقلبك على واحد خدام فطابلة دالمخزن عندو تاج كبير ... كااان كشوف فيك ولاكن دابا طايحة فحجرو وحدة هي هادي اللي قلت ليك...نتي مريضة مكتنعسيش ومغيرة فرحانة ما فرحانة باغا تبكي ومكتبكيش وقدامك طريق طويلة عامرة شوك موراك عروق شادينك وقدامك هاد الراجل ماشهب ماشعرو كحل محسون فالوجه ولاكن ذكي ردي معاه البال...(كيدور راسو) مطااااااور وساهل يتشد ليك حيت شرابو حمر ماتلقايش معاه مشكل
سارة: مفهمات تا كلمة من هضرة دالشيخ ، جمع الكارطة من بعد ما فرقها 3 دالمرات وكيهضر بالمعاني اللي كاع الناس دالمجلس فهموه الا سارة اللي بقات تخرك فراسها كأنها فاهمة ، جمع الطبلة وهز ورقة من الاوراق وبدا يكتب بالقصبة ويرجعها للزلافة اللي فيها المداد لونو بحال لون العسل وجاري كيقدر بحال الماء . بدا كيكتب فالروقة رموز ويسول
الشريف: سميتو؟ سميت مو 
سارة : سميتو وسام ...سميت مو ماعرفتهاش!
الشريف: عندك شي صورة؟
سارة: لا ماعندي والو
الشريف : ايوا مينكنش نخدمو بلا والو...غتجيبي سميتو وسميت مو والصورة ديالو باش نديرو ليه الشويكة من بعد مللي نديرو ليه الشويكة عاد غنخدمو الخدمة الكبيرة حيت دابا ماعندك حتى حاجة ميمكنش نديرو شي حاجة (طوا الورقة ومدها ليها) هاكي ها حق الزيارة خليه عندك فالصك فين ما مشتي وجيبي هادشي بيه غنديرو الشويكة هي اللولة اما كن عندك كلشي كنا نبدا الخدمة الكبيرة ونوضو ناضيين يالاه تلله يعاون
ناضت باست يدو وشدات الورقة وخرجات طالع ليها الدم وبشرى موراها تا وصلو للطوموبيل وهي تفركع
سارة: 200 درهم على والو شغاندير انا بهاد الحجاب ومافهمت تا خرية منو 
بشرى: خههه هادشي راه البدية احبيبة وجدي راسك للمعقول هوا اللي جاي فالطريق وزيدي نشرح ليك اش كان كيقول.

طلعو فالطوموبيل راجعين للخدمة وسارة دخلها الفضول بغات تحل الحجاب وهي توقفها بشرى
بشرى: هداي متحليهش خليه كيما هوا ولويه فشي لعيبة وخشيه فصاكك كيما قالك 
بدات كتلوي فيه وخشاتو فصاكها وربعات يديها شافت بشرى 
سارة: شرحي ليا شنو كان كان كيقول مفهمت تا وزة من داكشي
بشرى: اااه...قالك اللي قلبك عليه طايحة فحجرو وحدة اخرى يعني هادا اللي جيتي على قبلو باغاه راه باغي وحدة اخرى ومشاركة معاه الفراش يعني كتبات معاه وفعز الربيع يعني بااقة صغيرة وعز الربيع كيقولوها للبنات اللي عمرهم بين 10 سنين حتى لعشرين هاداك هوا عز الربيع بحال الورد فاش فاش كيبدى يتفتح فوقت الربيع بحال هاكاك البنت فاش كتكون بين 10 سنين و 20 سنة دونك مزالة صغيرة 
سارة: بصدمة) وهاانتي ياختي طايح مع بنت مزال ممكملة حتى 20 عام وكتبات معااه!! وشووفي ولاد الحرام انا كان كيتفلى عليا مان يحسابني كيعرفني غير انا 
بشرى: ايييوا ياختي هادو هما الدراري وحدة كيديروها فالقلب وحدة عشرين كيلعبو بيهم كورة ...راه وصفها ليك وباينة زوينة قاليك مغليضة مرقيقة ومتوسطة الطول ماطويلة مقصيرة يعني متناسقة دالشعر طويل وماعرفت كي غتكون دايرة فوجها بااينة طايح فيه وكيموت عليها
سارة: بعصبية) صافي دابا بلا ماتبداي تشكري فيها تانتي ...كملي شرحي ليا شنو زعما عندي غيار؟
بشرى: هازة هم وقلبك مقبوط ممرتاحاش وطايح عليك الضيم فهمتي ...ماعجبك والو والمورال طايح ليك ديما هادا هوا الغيار يعني مغيرة ماشي مرتاحة 
سارة: اممم...قالي عندك غيار مع واحد عندك معاه الدم وقلبك على واحد خدام فطبلة المخزن !!
بشرى: هاداك اللي عندك معاه غيار وعندك معاه الدم يعني عندك معاه شي حاجة لحم ودم جامعاك بيه ...يقدر يكون كيجيك من العاءلة وكن كنتي مزوجة ووالدة يقدر يكون بيناتكم داك الدم اللي هوا ولدكم فهمتي وداك اللي قلبك عليه خدام فطابلة المخزن يعني مع الدولة ...سوا مع البوليس ولا العسكر ولا جوندارم المهم طلبة دالمخزن هي هادي اللي قاليك عليها جامعة البوليس والعسكر والمخزن و كلشي اللي حدام كيحمي البلاد فهمتي؟
سارة رجع وجها حمر مللي سمعات الشرح دبشرى على الدم اللي جامعها بسمير وتخلعات خافت تعيق بيها بشرى ، رجع وجها اصفر وبدات كتفتف كتحاول تلف 
سارة: اااه كيجيني من عاءلتي ولد عمي يعني جامعنا الدم عاد فهمت ههه...ايوا كملي
بشرى: قدامك طريق عامرة شوك يعني حالتك صعييبة وعندك عراقيل فطريقك وكتافك تقال ، وموراك عروق شادينك يعني العروق هما العاءلة ولا الولاد اللي لاسقينك عنرك تفكي منهم ، يعني ماشي حرة فهمتي وقدامك راجل ما شهب ما شعرو كحل محسون فالوجه هوا وسام ،هوا اللي شعرو ماكحل مازعر الى لاحضتي لحيتو لونها غامق وشعرو فاتح شوية ماشي كحل قهوي وزوين فوجهو ومطور كيفكر بعقلو واخا تشوفيه قليل فالهضرة مي ساااهل يتشد ليك حيت شرابو حمر يعني مولف كيشرب الخمر دغيا يشد فيه السحور ماشي بحال اللي مولف اصلي ويقرى القرآن مكتشد فيه تا حاجة وتاجو كبير يعني عندو سلطة كبيرة ضاربين ليه الحساب .
سارة: ااااه....ياختي جاب داكشي صحيييح
بشرى: وشنو حساب ليك ...راه هادي اللي كنا فيها دابا زاوية ماشي دار راه فيها الرجال والعيالات راك شفتي ....وحتى الشريف بو هيضور دقتو مكتكعدش الراس وفراشك وسام الى سحرتي ليه غيتمس...غيولي عندو المس مينعس متيشوفو الساطة ولاكن ديري فراسك غتبفى مقابلاه ديما كتجددي ليه السحور ويلا مجددتيهش كيطير بحالو بحال الصباغة د الدفار خاصك كل شوية تصبغي ولا طير ليك الصباغة ، وفهاد اللول ومع نتي يالاه بادية خاصك كل سيمانة تخدمي ليه تا يتشد وديك الساعة الشريف بوهيضور غيقولك شحال تجلسي عاد ترجعي تعاودي ليه
سارة: ههه بوهيضور !!!
بشرى: اه...سميتو بوهيضور على ديك الهيضورة اللي جالس عليها مكينوضش منها ومكتصبن مكتشوف الشمش راه شتي مي ولات دايرة ...راه ديك الهيضورة تحتها العجب جالس عليها كيطلع الكارطة صحيييحة واش انا غير جيت وجبتك عند الشريف بوهويييضيرة ههههه
سارة: انا اختي المهم هوا وسام يتشد ليا راه انا اللي مكنعس مكنشوفو 
بشرى: وهانتي غتفرجي كي غيولي ...عرفتي راسو غيضرو غيبغي يطرطق تجيبي سميت مو وتصويرتو غينوض فيه الطيكوك ديك الساعة اما فاش تخدمي الخدمة الكبيرة عااد اجي تشوفي كي غيرجع

من بعد مافاقت يارا لقات راسها بوحدها فبيت وسام ناعسة جلسات مفزوعة شافت فالساعة لقاتها 12h وهي تنوض بالزربة حاطة يدها على فمها مخلوعة خرجات كتسلت من البيت ومشات كتجري لبيتها دخلات جلسات فيه مخرجاتش حتى سمعات الدقان فالباب ودخلات رانيا لابسة سروال توني اسود وتيشورط كحلة وابتسامة على وجها
رانيا: صباح النوووور ههه كي صبحتي؟ جيت لقيت الباب مسدود مابغيتش ندخل عندك قلت تموني مزالة ناعسة
ششافت فيها يارا ضاحكة وهي كتنفس الصعداء وتأكدت انها متفرشاتش وحركات راسها بالايجاب
رانيا: يالاه امامي غنسافرو غدا وجدي راسك وحوايجك نمشيو ل إبيزا فسبانيا نبدلو الجو من تما نشوفو بلاصة اخرى نمشيو ليها واخا؟
حركات يارا راسها بالايجاب فرحانة وبدات كتجمع حوايجها وتجبد من البلاكار وتلوح فوق الناموسية ورانيا معاها كتجمع ليها 

* * *

رجعات سارة وبشرى للخدمة وسالاو السوايع دالخدمة وكل وحدة مشات بحالها ، وبحال كل ليلة كتحبس سارة راسها فبيت النعاس و مكتشركش الهضرة مع سمير ومكتاكلش معاه فنفس الطبلة ، دخلات بلاطو ديالها لبيتها وحطاتو وجبدات التيليفون الجديد كتصوني على وسام كتلقى النمرة مبلوكية ، طلع ليها الدم و خبات التيلي وطاحت نعسات حدا بنتها .
فاليوم التالي كالعادة نفس الروتين خرجات من الدار فطريقها للطاكسيات شرات نمرة جديدة دارتها فالتيلي ومشات للخدمة حتى وصل وقت الغدا كلشي نزل وبقات هي جالسة فالبوسط ديالها ، جبدات التيلي كتحاول تصوني وتسمع التيلي كيصوني حتى شد ليها وسمعات صوتو وهي تفرح ، بالزربة وهي تفرح 
سارة:الو وسام 
وسام: وي شكون؟
سارة: دغيا نسيتيني ؟ انا سارة عرفتيني
وسام: وي سارة ؟
سارة: لاباس عليك؟ 
وسام: الحمد الله ونتي؟
سارة: مزيانة بغيت غير نسول فيك...كنعيط عليك بنمرتي القديمة ما ..... (تييت تييت تييت)
تقطع ليها الخط وهي تكعا وبدات كتحاول تعيط لقات الصولد سالا عاد بدات تأكدات انه مقطعش عليه وانما سالات التعبءة ، بداو كيرجعو الموضفين وهي تشوف بشرى جايا تجلس بلاصتها وناضت عندها كتجري فرحانة 
سارة: بشرى بشرى صونيت وشد ليا هههه
بشرى: بهمس ) دابا فاش تعاودي تهضري معاه غتخلي داك الحجاب وتخليه كيهضر بوحدو متحاوبيهش وتبداي تقراي على صوتو داكشي اللي مكتوب تما غيولي يدور يدور ويعيط ليك 
سارة: مفالهاش ليا الشريف
بشرى: هادشي جاري بيه العمل غير ديريه راه هوا بكترت ما كيقولو ديما حياتو كاملة ولا كيجيب ليه الله راه كلشي عارف مكيحتاجش يقولو ..سالاه سيري 
سارة: صافي بلليل نعاودها حيت راه برى ماشي فالمغرب والصولد كيمشي دغيا خصني نعمر تيلي باش ميتقطعش 
بشرى: واسيري وفاش يجاوبك متجاوبيهش مخاصوش يسمع صوتك 
سارة: الى مجاوبتش غيقطع عليا
بشرى: هه ! سيري سيري راه ميقطعش ماحدك كتقرى وهوا مشدود حتى تحبسي القراية وقطعي خليه وغدا عوتاني عاوديها نفس الشىء لمدة 3 ايام عاد هضري ديك الساعة شوفي الطريقة باش يهضر معاك
سارة: ههه هادشي فشكل مهم هانا مشيت باي
رجعات سارة لبلاصتعا كملات الخدمة ديالها تا خرجات ورجعات لدارها ، نفس الشىء خلات سمير حتى نعس وطفاو الضواو وبقات فبيتها بوحدها بدات كتصوني عليه حتى جاوبها
وسام: الو...
سارة: الصمت
حلات الحجاب بالزربة بدات كتردد بشفايفها فصمت وهوا كيقولو الو وهي كتقرى حتى سالات وقطعات عليه ورجعات خبات الحجاب و نعسات

هاكا دازت ا3 ايام ، من الخدمة للدار وكل ليلة تعيط ليه وتسكت وتبدى تقرى بالزربة وتقطع ، قاطعة الهضرة مع سمير وهوا صابر كيطيب لراسو كيتفادى الصدع معاها وفكل مرة كيحالوليهضر معاها كتجاوبو نفس الجواب و تغوت ودخل لبيتها وتسد عليها ، حتى من بنتها هملاتها ولات كتخليها بايتة عند مها وسمير عيا من سير اجي كل نهار فاش يخرج من الخدمة ويدوز يجيب البنت حتى عيا رجع كيخليها مع مامات سارة لانه عارف راسو فالصباح غيردها عاد يمشي للخدمة . 
اليوم الرابع كالعادة خرجات من الدار فطريق الخدمة على موعد مع بشرى ، ركبات معاه فالطوموبيل ومشاو فالطريق كيهضرو
بشرى: انا لقيت واحد الصورة ديال وسام مع مروان فالفايس ديال مروان وهزيتها ليه فالتيليفون ...دابا فوقت الغدا غنرجعو عند بوهويديرة يقاد ليك الدقة ...اجي بعدا جبتي الفلوس
سارة: 200 درهم ياك
ضحكات لشرى حتى بانو حلاقمها وهيا سايكة كضحك تابردات وشافت فسارة
بشرى: واش عارفة بشحال كيتقفو ولا لا؟ راه احبيبة بوهويديرة كيقف ب 1500 درهم الزين قالك 200 درهم هههه راه بوهيضور هادا الحبيبة
سارة: اويييييلي على 1500 !!!! ماعندييش
بشرى: ايوا صافي نساي شي حاجة سميتها وسام
سارة: بأسى) افففف اجي سلفيني غير نتخلص نعطيها ليك ويالاه معايا للبانكة نعطيها ليك ...غير دوز ليا المانضة نتي اللولة 
بشرى: هه...زيدي زيدي هاخنا غنشوفو ...على قبل المليون كلشي يهوون المهم هوا تعطيني مليون ديالي وصااافي 
سارة: مهم سوفيني دابا ب 1500 درهم حتى لراس شهر راه 200 درهم اللي عطيتو ديك المرة سرقتها لسمير من الجيب اما انا معندي تا ريال ...كن حساب ليا غادي يقلب عليا ويسد ليا لاكارط كن خرجت شي فلةس قبل مينوض هاد الصدع وكن راني مهنية دابا من جيهت الفلوس...عنداك هاد بو هيضور يطلع مافيدوش
بشرى: دابا زيدي وشوفي بعينيك راه قليل فين تلقاي شي واحد كيخدم بصح ماشي بحال هادوك اللي كيكدبو...راه المغنيين وكيهزو لحجابات اما دوك السواعدة بلا منهضرو عليهم راه كاين واحد فأكادير كيعاودو عليه كيخدم فالخواتم د النقرة للسواعدة بالملاين و هاد بوهيضور راه دقتو صحيحة مكتعكدش الراس غا زيدي تبعيني وتشوفي 
سارة: ها حنا غنشوفو
وصلو للسونطر نزلو كل وحدة شدات بلاصتها وسارة كتشوف بنص عين فسكينة خايفة تفضحها ورجعات عندها بحال الوسواس نغصات ليها حياتها ورجعات كتخاف منها . 
فالبوز ديال الخدمة ركبو فالطوموبيل ومشات سارة مع بشرى للكيشي تيرات الفلوس ورجعو ركبو مشاو وقفو حدا مول الدروكري وهي تنزل بشرى بوحدها عند الدروكري ورجعات هازة فيدها ميكة
بشرى: شدي...ها القفل بقا لينا الشمع غنشريو شي قطاس ديال الشمع من عند مول الحانوت ونمشيو والباقي على بوهويضيرة خههه
سارة: اوييلي القفل لاش؟
بشرى: بيه غيخدم ليك باش تقفي ديلمو ميشوف تا وحدة من غيرك والصورة راها عندنا غنقطعوها ونخليو غير وجهو بوحدو وتما غتشوفي بوهويضيرة شغايدير عنداك تخلعي هههه
سارة: ناري زيدي نشوفو هاد العجب
بشرى: نقية بعدا مافيكش لا ليغيكل لا والو
سارة: لا نقية 
بشرى: وازيدي يالاه راه عيطت لربيعة قالتعا لبوهيضور باش يدير بحسابنا

وصلو للمكان المعلوم ودخلو لقاو الناس كيما العادة جالسين ، دخلو للبيت للي كيكلس فيه وجلسو مع العيالات اللي مجمعين فالبيت كيتسناو النوبة ، بحال العادة سبقاتهم ربيعة هما اللولين وناضت سارة لاست على يدو وجلسات قدامو اما بشرى بقات فبلاصتها متحركاتش ، قربات ربيعة لودن الفقيه كته1ر وتشير بصبعها لسارة كأنها كتقول ليه شكون هيا وعلاش جات ، من بعد خرجات وبقاو غير النساء جالسين فالارض مع جناب الحيط، الدنيا فالبيت الاول مخلطة رجال ونسى عكس البيت اللي فيه عامر غير ب النسى ، هز الفقيه راسو فسارة ودار النضاضر وجبد خنيشة مخشية فالقنت حداه وبدا كيجبد من نها خنيشات صغار واوراق قهويين مطليين بلون ماءل للقهوي ماباين عليه دم ولا مداد ، حط كلشي فدامو وشاف فسارة كيهضر بصوت مبحوح
الفقيه: جبتي التصويرة؟
سارة: اه هاهيا 
جبداتها من الساك بعد ماقطهاتها وخلات عير وجهو ، مداتها ليه كتنهج نتشوقة تعرف شنو غيوقع
الفقيه: اري القفل واري الشمع وعيطي ليه فالتيليفون خليه يهضر متجاوبيهش . (هز راسو فالعيالات) اللي فيها دم الحيض تخرج ولا جنابة تخرج بلا ما نبدا نسمي فيكم
ناضو ثلاتة دالبنات خرجو وبقا جالس كل مرة ينش على راسو بحال الى داير بيه الدبان وهوا مكاين لا دبان لا ناموس و يعاود يهز يدو ويحطها على ودنو بحال الى كيحكها .
الفقيه: اري الشمع.
سارة واخا 
عطاتو الشمع وجبدات الفلوس كاملين حطاتهم قدامو 
الفقيه: سميتو وسميت مو 
سارة: سميتو وسام ومو معرفتش
الفقيه : امم...وسام ولد حواء
بدا كيكتب بيدو المرعوة على الورقة اللي جبد من الخنيشة وكيرجع يحك ودنو ويكتب بالقصبة ويكرر العملية حتى دخلات ربيعة جايبة ليه مجمر صغير حطاتو قدامو ، وهوا كيكتب هز راسو فوحدة من العيالات وزعف بصوتو المبحوح
الفقيه: خرجي نتي ...قلت ليكم اللي عليها دم الحيض ولا جنابة تخرج...واش نبقى معااودها؟؟ سيري ماتعاوديش تجي عندي
ناضت المرى كتجري حشمات وخرجات فمرة ورجع هوا كيكتب وكلشي ساكت كيشوف وسارة قدامو كتشوف فيه حتى هز يدو السما وضرب بيها فوق كتاب غليض محطوط قدامو حتى تهزات سارة فبلاصتها مخلوعة 
الفقيه: بجدية) انا نقول **** ونتوما قولو مورايا العفو واللي عطسات فيكن تعواج ...اللي فيها الرواح تخرج متعطس ليا هنا حتى واحد هاني علمت
بدا كيقول الجملة القصيرة والعيالات كيسفقو بالجهد وكيرددو موراه كلمة العفو حتى طلعو لحن بحال شي مدح غريب خلا مرى كبيرة ناضت بالجهد وقفات الوسط كتجدب و خرج الصوت حتى عند لخرين اللي جالسين فالجهة الاخرى بداو يطبلو بيديهم ويرددو موراه وهوا كيكتب والمجمر حدا كيلوح فيه بخور من البخور اللي جبد وكيرجع يكتب حتى كيكمل الورقة ويقطعها بزربة ويلوحها فالمجمر وكيردد بفمو وموراه كيعاودو كلمة العفو وقدامو المرى كتجدب وهوا كيرجع يكتب فورقة اخرى ويقطعها ويلوحها ويعاود يلوح البخور ، سارة جالسة تاخلعة شاداها كتشوف بعينيها ودور وجها جيهت بشرى كتلقاها تا هيا كضرب بيدها وتردد مع المجمع ، بقا الفقيه هاكاك حتى كتب سبعة دالورقات ولاحهم فالمجمر عاد هز يدو ضرب بيها الكتاب بالجهد باش يسكتو ، هم الصمت فالمكان وطاحت المرى اللي كتشطح سخفات هزوها كيخويو عليها الماء ورجع هوا هز القفل حلو وشفايفو كيرددو كلام ممسموعش ويكتمتم بفمو ، شاف فسارة وهي شادة تيلي فيدها 
الفقيه: صوني ليه ومتهضريش خلي صوتو يتسمع هنا (شاف فالعيالات) حتى واحد مانسمع حسها ولا نفسها ولا تخرج تعطيني التيساع.
ربيعة وقفات فالباب باش ميدخل حد او يهضر شي واحد ، اما سارة دوزات النمرة كتصوني حتى شد ليها ودارت مكبر الصوت 
وسام: الو سارة ....الوووو مالك مكتجوبيش اش كاااين ....الووووو ...
الصوت كيتسمع والفقيه كيردد بفمو ، هز الصورة بالزربة دوزها فوق المجمر اللي حرق فيهم الوراق وبدا يكتب بالزربة فضهر الصورة وفوجها ، كانت صورة ليه زوينة وهوا مبتاسم فكامل وسامتو ، كتب فوجه السورة بخطوط ورموز وشفايفو كيقراو بلا صوت مع صوت وسام اللي كيتسمع مرة مرة كيقول الو.... شد الفقيه الصورة فيد والقفل محلول فيد وحط الصورة مسطحة فالحفرة اللي كتسد القفل وبرك عليه حتى تسد وتقبات الصورة بحال شي عمارة ديال السنسلة كتمشي وتجي فالحديدة دالقفل . هز يدو بسرعة عطا اشارة لسارة وقطعات التيليفون ، لوا على القفل توب كلو مكتوب بمداد القصبة لواه على القفل مزيان وداير احتياط باش متقطعش الصورة وننفاصل مع الحديدة اللي سادة القفل ، من بعد لواه فبلاستيكة من ميكة لميكة عطاه لسارة فيديها
الفقيه: شدي ...هادا غتديه لمقبرة *** تما غتلقاي العساس على المقبرة قوليه سافطني بو هيضور دفن هادا ...وهوا غيديك يوريك فين دفنيه ودفنيه مزياان هوا وهاد الحجاب اللي كتبت ليك ، جيتي شي طاسة جمعي فيها هاد الرماد اللي فالمجمر كامل حتى يبرد ولويه فشي ميكة وجمعي كلشي فميكة وحدة دفنيهم مع القفل فشي حفرة غارقة ...ونوضي على سلامتك ها السيد تقفناه عمرو يشوف شي مرة واخا تكون كيما بغات تكون من غيرك ...ودابا سيري جيبي ليا هادشي اللي غنقوليك حيت هادا غير التقاف اما باش تشديه ليك خاصك تجيبي ********** (هز راسو فالناس) الى شي واحد عيط ليكم فالتيليفون ومكيهضرش قطعو متبقاوش تسولو شكون ...راه شي مرات كتسمعو سمياتكم كيجيب ليكم الله عيط ليكم شي حد وكدورو تقولو نعام وهوا مكاين حد ، راه من الصوت كيتمس بنادم هانا علمت

ناضت جمعات الرماد فطاسة وجمعات داكشي اللي عطاها وباست على يدو
الفقيه: دابا من هنا 15 رجعي وجيبي الشمع ....هاكي ها الشمع ديالك راه مكتوب كامل ديه شعليه بلليل وخليه حتى يطفى راسو 
هزات حوايجها ومشات خرجات هي وسكينة مشا للروضة االي قالهم عليه الفقيه ، وصلو لقاو العساس هضرو معاه وداهم لواحد القبر راشي قديم مابقا تا واحد كيزورو وحقرات حفرة فالراس دالقبر بالحجرة وطمرات داكشي اللي جمعات وخطاتو ورجعات بحالها عطات 50 درهم العساس ورجعو بحالهم للخدمة كأن شيءا لم يكن . 
رجعات فالعشية لدارها ودهلات لقات الضواو طافيين والحس مكاينش ، سدات الباب موراه وحطات ساكها فوقها الفوطوي وهوا يخرج عندها سمير من الصالة عاز حلوة فيدو فيها الشمع وكيضحك
سمير: happy biiirthdaaay to youuuuu....
دارت موراها مصدومة كتشوف فيه عاد ضحكات وعجبها الحال ، حط قدامها الحلوى كيغني وهي طفي الشمع وشافت فيه بابتسامة طالعة بزز
سارة: شكرا
عنقها سمير وباسها فحنكها وجلس حداها قطعات الحلوى وهز طرف عطاه ليها لفمها وجبد بواطة حمرة مستطيلة من جيبو ، حلها كيضحك وجبد منها سنسلة ذهبية عندها عمارة على شكل شميشة دارها ليها فعنقها ورجع هز يدها باسها 
سمير: عيد ميلاد سعيد احبيبة
سارة: شكرا
سمير: شكرا حافية؟
سارة: شكرا اسمير
سمير: وحبيبة فين هي
سارة: ناضت وقفات) خاصني الوقت ... مزال منسيت داكشي اللي درتي
مشات وخلاتو فحالة احباط متلع ليها العين ، دخلات لبيتها سدات عليها وجبدات الشمع اللي عطاها الفقيه كتشوف شنو مكتوب فيه مافهمات تا حاجة ورجعات خباتهم ، بدلات حوايجها وبقات مخشية فالبيت شادة التيليفون الجديد كتلعب فيه حتى سمعات الدقان فالباب وناضت حلات لقات سمير لابس سورفيط كحلة 
سمير: انا غنمشي نجيب دينا من عند ماماك تمشي معايا؟
سارة: لالا غير سير
سمير: يالاه تمشي تبدلي الجو 
سارة: لا بلاش غير سير جيبها توحشتها
سمير: حتى قنطت وقلت نمشي نجيبها غدا السبت مخدامش ...بلا منتسنى تا لغدا اللهم نجيبعا ليوم تونسنا
سارة: اه مزيان
خرج سمير ومشات سارة كطير شعبات الشمع فالطواليط خلاتو شاعل وبدات كل شوية كطل عليه تشوف فين وصل حتى داب كامل وجمعات كلشي كأن شيءا لم يكن ورجعات لبيتها حتى جا سمير عاز البنت فيدو وهاز ليها صاكها فالكتف ودخل كيضحك معاها . 
⬅بعد مرور 15 يوم 
رجعات سارة عند الفقيه كملات شغلها وعطاها مجموعة من الحجابات كل واحد فين ديرو ورجعات بحالها كتسنى النتيجة وكل ليلة تعيط لوسام تهضر معاه عادي وحتى هوا كيجاوبها ويهضر عادي نسى الخلاف اللي بيناتهم حتى داز الشهر...

* * *

فالفيلا دآل بن خَليفة وقفات سيارة مرسيديس فالبارك دالفيلا ونزل وسام هاز على كتفو صاك دالبيسي لابس دجين زرق وتيشورط بيضاء وحداء رياضي اديداس طالع فوق الدجين بيضاء ودابر نضارات شمسية ، خلا مواره الشيفور كينزل الشوانط ، هبط كيدردب فالدروج حتى للباب ودخل حيد النضاضر وسرح عينيه مالقا تا واحد ، طلع نيشان لبيتو ...

دخل لبيتو كيتمشى مهلوك وكل مرة كيجبد يديه لور لاين فيه العيا وعينيه نعسانين ، لا السورات فجيهة وتيليفون فجهة وحط البيسي على الفوطوي وطلع تيشورط لاحها فوق واحد الكرسي وجلس فوق الطبلة دالزاج حيد السبرديلة برجليه ودخل للدوش للدوش دوش وخرج لبس شورط كحل توبو خفيف عندو جياب والسيور وتلاح فوق الناموسية نعس على ضهرو .
بقا شحال وهوا ناعس حتى بدا كيتنفس بالزربة بحال الى كيجري وكيتحرك كل شوية فالنعاس ويقلب راسو لليمين والشمال كينهج ، عاقد حجبانو فالنعاس ومخصر ملامح وجهو ، بقا على نفس الحالة مرة نعس مرتاح مرة تجيه النوبة ويبدا يعرق ويتحرك ويهز رجلو ويرجع يحطها كيقلب على راحتو فالنعاس حتى بدا كيتحرك بسرعة وهوا يحل عينيه فالسقف كينهج ، بقا مبلوكي غبلاصتو كيدور عينيه كيتأكد فين هوا وكيراجع الحلم بينو وبين راسو ، جمع نفس طويلة وعاود طلقها كيتنهد وناض جلس كيعاود عنلية الشهيق والزفير ويحط يدو على صدرو كيدوزها ويطلعها حتى لعنقو ويتنفس 
وسام: ااافففف اعوذ بالله من الشيطان الرجيم...اعوذ بالله من الشيطان الرجيم ...اعوذ بالله من الشيطان الرجيم. 
بقا كيرددها ويتنفس وصدرو مقبوط كيدوز عليه بيدو وناض للدوش غسل وجهو ورجع هز تيلي شاف شحال فالساعة و تكى ساهي فعينيه التعب وتقال باغي يغمضهم ... بدا كيغمض عينيه شوية ويبدا يتكرع فوقات خفاف ويحط يدو على فمو بحال الى باغي يستفرغ ، كل شوية يتفوه ويشهق ويحاول ينعس ومكيديهش النعاس حتى شد راسو وبدا كيدوز صبعانو على جبهتو تا عيا وناض فاتجاه البلاكار كمسح على وجهو بيديه بجوج ، جبد قرعة ومشا فاتحاه الطبلة كيدور عنقو ويزير على سنانو كيحاول يترخى ، عمر كاس ولاح فيه حبة دالكينة دالراس وشربها ورجع تكى ، نفس الحالة كتشدو فكل مرة كيحاول فيها يغمض عينيه وكيرجع ينوض يشرب الكينة ويجلس متكي على ركابيه شاد راسو كيماسيه بصبعانو ويتنهد بحال الى هاز جبل على ضهرو ، بقا هاكاك حتى تزير وتعصب وجبد الكارو جلس كيكمي ويحط يدو على جبهتو تا عيا وصدع الراس كيزيد يزيرو ، شاف الباكيت د الكارو ما قضات ليه والو ورجع شرب الكينة ولاكن لاجدوى ، حتى بغا يتفركع وخشى راسو تحت الماء وخرج بيه كيقطر جلس متكي على ضهرو ساد عينيه الحمرين ، بقا على نفس الحال حتى شمغ تيلي كيصوني ، طل عليه لقى النمرة دسارة وجاوبها بصوت خافت تعبان 
وسام: وي سارة
سارة: وسام...لاباس عليك؟ وصلتي ولا باقي؟
وسام: وصلت ...قبيلة شوية
سارة: قلتي ليا غتوصل تعيط ليا ...مللي شفتك معيطتيش قلت نسول فيك انا...ايوا على سلامتك بعدا
وسام: ميغسي
سارة: مالك جيتيني عياان واش مريض؟
وسام: بصوت مجروح كيهضر بزز) شوية....عيان مع السفر وصافي 
سارة: الوا الله يشافيك ...توحشتك 
وسام: الصمت
سارة: الووو وسام
وسام: لارد
على صوتها داع النعاس جالس وخفاف صدع الراس ، حس براسو خفاف وهوا كيهضر وعينيه كيسدو حتى داه النعاس وقطعات سارة ، بقا جالس حاط راسو على ضعر الفوطوي ساد عينيه مدة طويلة عاد حس براسو معدب وناض رجع لبلاصتو نعس طاح طيحة وحدة

ضرباتو الفيقة مع 12 دالليل ونوضاتو المعدة ، مع حل عينه بدا كيشهق وشاد فالمعدة مركز عينيه على نقطة وحدة قدامو كيتسنط لحريق المعدة بسباب الحبات دالكينة اللي شرب ورونات ليه معدتو ، حيط يدو على فمو بالمقلوب وهوا يلوح الغطاء دخل بالزربة للدوش استفرغ وخرج هز القرعة دالماء هبط عليها كاملة ورجع جلس حال عينيه والنعاس طار ، بقا جالس مكيدير والو فالاخر هز تيلي كيصوني 
وسام: حاط يدو على فمو كيتفوه ) الو جواد فينك؟
جواد: فالدار ياك لاباس؟
وسام: نتلاقاو فريسطو كولدن توليب من دابا نص ساعة
جواد: عاد جيتي اصاحبتي رتاح شوية وغدا نتلاقاو
وسام: بعصبية) غتخرج نتلاقاو دابا وبلا متبقا تقول ليا غدا ولا ق***** ولا بناااقص كاع سير ت*****
قطع ومشا للبلاكار كيدوز يدو على شعرو ويتنهد وهوا يصوني ليه تيلي فيدو ...شاف السمية وجاوب بالنفخة
وسام: شنوو؟
جواد: اماالك اش واقع هانا خارج غتلقاني فتوليب بلا متعصب اصاح ...شكااين اول مرة تهضر معايا هاكا
وسام: عياان باغي نخرج الى كنتي غتخرج مرحبا مكنتيش متزيدش تمرضني اخاي
جواد: وكنقول ليك انا خارج نتلاقاو فتوليب بلا متعصب علينا ... يالاه خرج المرض غتلقاني تما
وسام: هانا جاي
سد الخط وخرج لابس شورط ديال الدجين بلو مارين مع تيشورط زرقة بالكول ديال لاكوسط مزيرة على جسمو وعضلات يديه بارزين وسبرديلة لاول مرة يلبسها فبلو مارين وتقاشر بيضين قصار باينين منها ، داير كاسكيط بلو مارين ضلمات ليه عينيه وخرج ركب فطوموبيلتو عفط عليها حتى تسمع الزفير ديالها قفز العسكر اللي واقفين فالباب ، مشا طاير ف 12 دلليل محبس ختى لاوتيل كولدن توايب فرح ونزل خلى ليهم السوارت يبلاصيوها فين بغاو ، دخل لبلاصة خاصة مضلمة فيها اضواء خفاف عبارة عن غيسطوغون و بار خاوي فيه غير جوح طبلات اللي عامرين جالسين فيهم جوج دالناس وطبلة فالقنت فيها جواد مسرح رجليه فوق الفوطوي حتى جلس حداه وسام عاقد غوباشتو مقال حتى السلام
جواد: تقاد فالجلسة) شكاين ها توليب هاحنا فيه مالك معصب
وسام: مكاين تا واحد فالدار غير انا ومنرفز غي بوحدي بغيت معامن نجلس ...غير بوحدي مضارب مع شيطاني 
جواد: ههه كتوقع ...شي مرات كيطيح المورال بوحدو ... ايوا على سلامتك بعدا
وسام: هز يدو) شي قرعة لهنا... (شاف فجواد) الله يسلمك 
جواد: ايوا هانيا؟ كي دوزتي السفر كي دازت لانفوغماسيون كيدازت الخدمة؟
وسام: كيتجبد) وعااادي تا نتا داكشي هوا داكشي راه بااين
جواد: كتين شي تيتيز هههه

وسام: كاين ل***** مكاين تا لعبة معنديش رغبة فشي حاجة نهاءيا باغي غي فواش نرجع
جواد: وااايلي! واسيير كولها ليهم ماشي ليا انا انا
وسام: مكااين والو لهلا فين تييق ... جاوني كاملين مشوطين مجاتني الكانة على تا وحدة ومخرجتش ، كان عندي الوقت عامر ، مرة وحدة اللي مشيت عند مي لاللة وبا سيدي جلست معاهم 3 جور مابغاوش يطلقو مني ورجعت بحالي لوطيل اما تا داري مامشيتش ليها 
جواد: شي حب جديد هادا
وسام: معرفتش اخاي ... مكنضنش واش حب يمكن كان غير اعجاب...كانت واحد البنت عاحباني جالسة معانا فالدار تا كان كيسحاب ليا واش كنبغيها مي غير سافرت مابقيت كنحس من جيهتها بتا لعبة 
جواد: هه ...راه كالوها...بعيدا عن العين بعيدا عن القلب
وسام: وصاافي تا نتا بقا تحفظ ليا هاد التخربيق ، اصلا مكايناش شي حاجة سميتها الحب ولا **** كاين غا **** والسلام. 
جواد: نهار طيح على راسك قوليا كاين غا*** ديك الساعة مكيبقا يبان ليك تا حاجة من غيرها... تما عرف راسك اولدي تزعطتي
شعل وسام كارو كيكمي وعينيه مضلمين تحت الكاسكيطة وكيشرب عاقد حجبانو مشطون غير مع راسو
وسام: قبيلة نعست حلمت واحد الحلمة نضت مفزووع اخاي!
جواد: كيشرب) هههه اش حلمتي؟
وسام: سهي فالكاس وقالب وجهو جيهت جواد) حلمت راسي ناعس وناعسة حدايا هاد البنت اللي قلت ليك ضيفة عندنا فالدار ، الضلام وحنا ناعسين وانا حال عيني كنشوف جوج قصار غير خيال مباينش شكون ، قصار عليا ، بداو كيقربو للبنت وانا ندفعهم ونضت بالزربة شديت واحد ماعرفش منين شادو كنتعفرت معاه وماجا غير فمي القرآن قريت بديت كنقرى ايات الصغرى وهوا يغبر والتاني كذالك بديت كتقاتل معاه مدافعين وشاد من جيت الراس مكنحس بوالو فيدي ، كنشوف خيال مضلم وانا حاكمو تا هوا قريت عليه وغبر ، ضرت موارايا نرجع لبلاصتي وانا نشوف واحد كبر مني ....كبييير بحال شي راجل مضلم ماباينش ...بحال شي خيال ، شفتو وقفت بحال الى كنتحداه ومخايفش ، بديت كنقرى آيات الكرسي وكنصول حتى للنص وكنتلف مكنقدرش نكمل وكنعاود من اللول ...تقووووول واش قدرت نتفكر الكمالة وااالو ، دورت راسي جيهت الناموسية مكناقاش البنت ...بلاصتها خاوية ، رجعت شفت فخونا اللي قدامي مالقيت والو وبغيت نتسطى فاش غبرات البنت !!! كنقلب فالبيت ونعيط بسميتها مكتخرجش ليا حتى حليت عيني لقيت راسي كلي عرقااان وقلبي غيسكت ...فالبلاصة عاودت ايات الكرسي فنفسي لقيت راسي كنقراها عادي حتى للخر...مي فالحلمة مكنقدرش نكملها !
جواد: وا حلمااااا عندك اخاي !! ايوا؟
وسام: ايوا! شنو اللي ايوا؟ ايوا صافي سالات الحلقة وحسيت براسي غيتفركع ...واحد الحريق عنرو جاني واخا كميت باكية بحال هادي قبل مانجي وشربت سمطة ديال الكينات كانلة ديال الراس او وااالو ...فاللخر رضيت داكشي كااامل ماء ابيض معاه الغبرة داك دوك الكينات عاد رتاحيت ...طار ليا النعاس وانا نعيط ليك
جواد: عااادي هادشي كيوقع ، الطيارة والستريس كيديرو بحال هاكا
وسام: تنهد) وااايييه ، بغيت نعيط للواليدة ودرت بناقص خللي تا لغدا ونعيط ليها نشوف فين كاينة وفوقاش غتجي...تا الواليد مشا تبعها بقيت انا نهار التنين نصبح على يعقوب على الله ميتنفخش ليا راسي نصدق داير شي روينة فالخدمة

دوز الليلة كاملة هوا وجواد فالبار بوحدهم حتى قرب يطلع النهار ، هاد المرة وسام فرط فالشرب كتر من القياس وبدا على القصح سيك هاك بالاك حتى فشل مابقاش قادر يوقف او يحل عينيه ، شافو جواد كيهز الكاس بزز وهوا ينوض
جواد: وسام...نوض اصاحبي (كيحرك فيه) وساام....وا وسام برااكة نوض يالاه نمشيو...نووض اصاحبي نتا راه خاصك ديباناج يهزك 
جواد براسو واقف كيتمايل مرة مرة ويحرك لوسام فكتفو . خوا وسام اخر قطرة بقات فالقرعة فالكاس فمو وهز سوارتو وتيليفونو وناض وقف بزز ، عنق جواد وبقاو غاديين كيتمايلو واحد على واحد حتى خرجو عند طوموبيلاتهم ، وسام ضربو لبرد لوجهو وهوا يتقلب مع واحد الشجرة بدا كيستفرغ غير الماء تا سخف وبدا كيتفتف فجيابو على كلينيكس مسح بيه ورجع كيمشي ويجي ، جوج خطوات اللور جوج خطوات لقدام ، خطوة لليمين جوج خطوات لليسار ، سمح فجواد ومشا جيهت طوموبيلتو يالاه بغا يركب وهوا يشدو جواد
جواد: من نيتك اعشيري غتسوق بهاد الحالة !! زيد زيد حتى الطريق ممسكدة اللي تعاونك ...تمشي تلوحها من فوق الجبل اللي فطريق داركم !
وسام: نتر و فشلان) وااا خلييييني
جواد: شير لواحد من الرجال الاوتيل) اجي اخاي شدو معايا
جا الراجل كيجري شدوه ركبوه لقدام فطوموبيل جواد وسدو عليه ، جر بيدو الكوسان للور وتسرح على ضهرو وطلق رجليه .
جواد: واقف كيتمايل) سوارتي!! 
الراجل: هاهما فيديك 
جواد: هه الله يحفضاااك 
طلع فالطوموبيل ديماراه وخرج بسرعة ، الطريق خااوية والشارع كيسفر كدور غير السطافيط دالبوليس وبعض الطموبيلات فيهم البنات والدراري . بقا وسام متكي تا ناض جلس كيشهق 
جواد: ياكما !!!
وسام: الصمت(شير ليه بيدو يوقف)
شد جواد الفران بزربة فجنب الطريق وخل وسام الباب خرج راسو بدا كيستفرغ وجواد كيشوف فيه عينيه تقال
جواد: شواكل اصاحبي ؟ اول مرة يوقع ليك هاكا ؟
وسام: كيرجع النفس) المعدة بنت الحرام 
جواد: شرب الماء شرب ...واش صافي نمشيو
حرك ليه وسام راسو بالايجاب وسد الباب وتحركو ، نفس الشيء وقع عاوتاني لوسام ، كان متكي وهوا ينوض وقف ليه جواد فجنب الطريق وخرج راسو كيستفرغ حتى كيتقج
جواد: وا رجعتي بحال الموحمة !! سير دوز على المعدة ضاروري الى بقات كدير ليك هاكا...شحال من مرة شربتي تا نعستي وموقعش ليك هادشي! غتكون كليتي شي كاريتة فرنسا روناتك
وسام: لا رد (كيستفرغ)
عاودو شدو الطريق وبداو غاديين وكيوقفو مرة ينزل جواد يتبول مرة يلدى وسام يرد وبقاو هاكاك تا وصلو للفيلا دجواد فين جالس مع واليديه ، دخل الطوموبيل ونزل شد فوسام خرجو سخفان وبدا يستفرغ ليه فالجردة تا عيا ، خوا عليه جواد ثرعة دالماء على وجهو وراسو وهوا كينهج ويتكرع فواقات ، دخلو للدار شادو بسيف كيتمشى بزز ، طلعو لبيت الضياف عبارة عن غرفة نوم راقية وحطو فوق الناموسية وتلاح حداه كيتنفس سخفان
جواد: افففف ناري اصاحبي نتا خصك ديباناج تهزك 
وسام: بصوت تقيل) ااه...حاس براسي غنموت اجواد...
ناض جواد جلس بزز كينش عليه وهوا ينوض كيميل راسو 
جواد: واش غتقيا؟؟
وسام: لارد)ساد عينيه متكي على يدو وراسو مايل كيتنفس بصعوبة ، بقا جواد كيشوف وناض بزربة كيتعكل جاب بانيو من الدوش حطو ليه فالارض وبقا جالس ليه عند راسو ، حيد ليه السبرديلة خلا ليه التقاشر وحيد ليه الكاسكيطة وبقا مقابلو واخا تا هوا شاد راسو بزز، بدا وسام كيستفرغ فكل مرة وتيشورط فزكات ليه بالعرق الشىء اللي خلا جواد تخلع وخرج للبيت دمو كيدق عليها تا خرجات عندو ببيجامة سروال توب وقميجة ديالها فالباج فاتح رطبة وشعرها زعر قصير ووجها مجبد لامع .
الام: بالفرنسية مع الدارجة) مالك ...شنو كاين شوااقع؟
جواد: اجي راه وسام جا معايا يمكن مريض
الام: سكرتي عاوتاني؟ 30 عام مزال ما باغي دير عقلك ! فين هوا وسام ؟ ياك راه فرنسا!
جواد: لا راه جا اجي دغيا
تبعاتو كتزرب دخلو لقاو وسام كيتنفس بصعوبة مكيحلش عينيه والعرق نازل مع جبهتو ، جلسات ام جواد حداك كتقلب ليه الضغط ديدو وحطات يدها على راسو 
الام: اجي حيد ليه هاد تيشورط وجيب ليا المعدات من البيرو سربي
جواد: واش مريض؟
الام: طالع ليه الضغط يمكن
حيد ليه جواد تيشورط خلاه عريان ومشا للبيرو دمو هز شانطة كحلة وجابها ليها حلاتها وجبدات السناطات كدوز ليه على صدرو وجيهت القلب وعبرات ليه الضغط 
الام: غنضرب ليه الابرة 
جواد: واش مريض بزاف؟
الام: سير نتا خوي عليك الماء سحسح شوية مابقيتوش كتحشمو! كتمشيو للهلاك برجليكم ...اجي عيطتي لمو بعدا؟
جواد: لااالا...مو حاملة وحتى الحمل عندها مهدد بالسقوط الى خلعتها يطيح ليها بنادم واصلا مكيناش فالمغرب لا هي ولا باه 
فديك اللحضة هز وسام صبعو وكيحرك راسو كيقوليهم لا متعيطوش وهوا فشلان .
بقا مقابلو جواد ومو حتى داز عليه الحال ونعس

⛅صباح جديد ⛅
... هاكا رجعات الايام كتجري عند وسام ، من نهار بات مع جواد ونفس الحالة كتجيه ...نفس الاحلام والكوابيس كيعيشها كل ليلة ، بوحدو فالدار وبعض الاحيان كيبات جواد ، بدا كيبان عليه التغيير ، قلت النعاس واوجاع الراس ديما مسهراه الليل ، دوزات ليه الام ديال جواد كونها دكتورة فالطب العام ، دارت ليه فحوصات على المعدة وعلى الراس وعلى القلب لانه كيعيا وديما فشلان وحتى الرياضة الصباحية مابقاش كيديرها ، مشات الخيوية ومشا النشاط و كل عشية كيرجع من الخدمة كيمشي يتلاقى سارة ويجلس معاها تا كتقوليه نمشي ، هاكا دازو الايام.....هي كدير السبة بالخدمة باش تلاقى بيه وسمير داير ليها الخاطر خايف ينوض شي صداع اللي يشتت ليهم الشمل واخا كيغوت عليها فالاوقات اللي كتجي معطلة .
اليوم مشات للخدمة كالعادة يالاه دخلات فاتجاه البوسط ديالها وهي تلقاه عامر ، بقات واقفة مافاهمة والو ، شافت فبشرى وهي تعوج فمها كتعني انها ناعارفة والو تاهيا ، بقات واقفة يالاه بغات تمشي تنوض الولد اللي جالس ليها فاللوسط وهي تسمع صوت لاسوكريتير كتعيط ليها ، تلفتات موارها فحيرة مافاهمة والو كتشوف فالسوكريتير
لاسوكريتير: تفضلي معايا الادارة بغاتك
عقدات سارة حجبانها ومشات بقات المسؤولة قدامها فالبيرو كتشوف فالاوراق ببرودة 
المسؤولة: مدام سارة ... سالات هدمتك هنا يمكن ليك تمشي 
سارة: و وو وعلاااش!! شنو وقع؟
المسؤولة: شحال فالساعة امدام؟ ها؟ نص ساعة هادي باش بدينا الخدمة ونتي عاد جايا! اون بليوس ديجا سنيتي لتيزام وزدتي فالغياب ...دابا يمكن ليك امشي فحالك 
سارة: ولاكن عندي ضروف مينكنش ليك تخرجيني غير هاكاك!
المسؤولة : لا رد
مداتهاش فيها وناضت ببرودة هازة وراق فيديها وخرجات خلاتها واقفة والاوراق ديالها فوق البيرو ديال الطرد. شافت تاعيات وهزات وراقها وخرجات كتسوط ، بقات واقفة طالع ليها الدم وهي تجبد تيلي عيطات لويسام كتبكي عليه
سارة: الو وسام ...انا محتاجاك ضاروري ...جراو عليا من الخدمة بسبابك اهىءاهىءاهىء بقيت تابعاك وكنخرج نتلاقاك حتى خرجوني اهىءاهىءاهىء. .......واخا انا نتسناك.
قطعات ومشات جلسات فالقهوة كتسناه حتى وقف بالطوموبيل فباب القهوة وخرجات عندو ركبات لقاتو جاي عندها باللبسة الرسمية ديال الخدمة ، شاف فيها عاقد حجبانو
وسام: مالكي ياك لاباس؟
سارة: خرجت من الخدمة اهىءاهىءاهىء 
وسام: افففف.من بعد
سارة: كيفاش من بعد اوسام انا مغنبقاش نقدر نخرج من الدار ومنقدرش نتلاقاو
وسام: مهم ...غنديك دابا للدار جلسي فيها تا نرجع ونشوفو هادشي 
ديمارة الطوموبيل قلب الدورة للدار ديالو كانت قريبة من القهوة ووقف 
وسام: هاكي ها السوارت طلعي تا نرجع...مشغول دابا خليت اجتماع واقف مع ضباط الصف وخرجت...غنسالي الاجتماع ونرجع
سارة: واخا
خدات السوارت طلعات وكسيرى هوا كيطير مع الشاعر بقا كلشي تابعو بعينو ، طلعات للدار تلاحت فوق واحد الفوطوي تكات شوية وناضت للكويزين اميريكان اللي كطل على غرفة المعيشة ، حلات التلاجة لقات فيها عير الشراب والموناضة وانواع الفرماج والشكلاط والايس كريم . هزات علبة ديال الايس مريم وخرجات للبالكون جلسات كطل على الشارع الكبير وكتاكل فالايس كريم تا لان ليها ماكدو مقابل مع العمارة اللي فيها هي ودخلات لبيت النعاس حلات واحد المجر لقات فيه الفلوس مشتتين ، هزات منهظ ونزلات لماكدو شرات بيغ ديستي وبيغ ماك ورحعات بحالها للبالكون عمرات كرشها وبدات كدور فالدار تا سمعات الباب تحل

مشات كتجري للباب وهي تلقا وسام هوا اللي دخل بطولو وعرضو والقميجة السوداء الرسمية مطراسية عليه وعلى هضلة يدو فكتافو الكراد ...دخل حيد الكاط الاسد من رجلو وبدا كيفتح صدايف القميجو ويهضر 
وسام: شنو وقع؟ علاش جراو عليك؟
سارة: بتحلوين) واالو ... حيت وليت كنسلت باش نشوفك داكشي علااش
وسام: واش باغا تخدمي؟ 
سارة: صافي بلاش ...عييت بالكاسك فراسي ديما
وسام: الى كنتي باغا تخدمي قوليها ليا 
سارة: قربات عندو كتفسخ ليه الصدايف) نن بلاش ، مابغيت والو بغيت غير نبقا معاك 
بقا ساكت تا حيدات ليه القميجة ودخل للدوش دوش خرج عندها بشعرو فازك لابس الشورط وجلس تكا براسو على ضهر الفوطوي ، قربات ليه كتحلون عليه وحطات يدها على وجهو وشافت فيه
سارة: وسام...انا كنبغيك
تحركات فيه الغريزة وحس براسو عندو رغبة قوية فالممارسة ، جرها وبداو فالقبل لفترة قصيرة وهزها دخلها لبيت نعاس .
تليفونها فالساك كيصوني وهي فالبيت لداخل كيتسمعو اهاتها وغواتها والتيلي برا وسط الدار كيفيبري ويعاود كل شوية فالاخير جا مسج و من بعد بدا يفيبري ، العشية كاملة وهي فالبيت حتى بدا كيطيح الضلام عاد خرجات بالزربة كتجري بدو بياس عرفات راسها تعطلات و مشات طلات على الساك لقات سمير عيط ليها 12 لمرة وخلا ليها مسج ، حلاتو مخلوعة قراتو
"دينا مريضة فالكلينيك جاوبيني فييينك؟"
غير قرات المساج وبدات كترعد خشات تيلي فالصاك ورجعات للبيت لقات وسام متكي على ضهرو مغطي نصو ، بدات كتلبس بالزربة 
وسام: مالكي مرعودة ياك لاباس؟
سارة: ماما ماما طاحت وداوها سبيطار خاصني نمشي دابا
وسام: تسناي نوصلك 
يالاه بغا ينوض وهي توقفو
سارة: لالا غير خليك يقدر يكون خويا داز عندي للخدمة حيت صونا شحال من مرة مجاوبتوش يقدر يجي ويلا خرجت معاك يقدر يشوفنا
وسام: اوك اللي بان ليك 
لبسات حوايجها ومشات عندو للفراش عنقاتو وباستو 
سارة: انا مغنقولش ليهم خرجت من الخدمة باش ميحبسونيش فالدار ...مهم غنجي عندك غدا الصباح
وسام : مدي ليا السوارت
عطاتو السورات وحيد جوج صوارت منو عطاهم ليها
وسام: هادو سوارت الدار ...الى ملقتينيش جلسي هنا او بب
سارة: واخا حبيبي شكرا
وسام: مغنباتش هنا غنرجع حيت الواليدة جايا ليوم ولا تقدر تكون وصلات (شاف فيدو الساعة) غتكون جات ...خاصني نوض ندوش ونمشي 
سارة: واخا حبي بيزو (باستو) بيناتنا تيلي ويلا مجاوبتكش عرف راه غير الدار اللي معايا راك عارف
حرك راسو ومشات وناض هوا دوش وبدل حوايجو لبس سروال توني بارد فالاسود وتيشورط فالاسود وسبرديلة فرجلو بيضاء ، هز سوارتو وتيليفوناتو ونزل ركب فاللوطو فاتجاه دار واليديه

مع الدخلة تلاقى رانيا نازلة بالشورط قصير واسع وتيشورط مقزبة ، هابطة كتجري فرحانة عنقاتو 
رانيا: توحشتك توحشتك توحشتك توحشتك 
وسام: هزها معنقها ) هههه حتى انا توحشتك بزاااااااف 
باسها فحنكها وزير عليها
وقفات قدامو شادة وجهو بين يديها كضحك وهي تجمع الضحكة
رانيا: مالك؟ مريض؟
وسام: لا ! علاش ؟
رانيا: وجهك صفر اولدي وعينيك دخلو مالك شنو كيضرك؟
وسام: لا والو غير العيا ديال السهير ..ايوا ونتي سافا كي داير الفار اللي هنا هههه (حط يدو على كرشها)
رانيا: لاااباس عليه ههه 
وسام: فين الواليد ؟
رانيا: خرج ... دابا يرجع مشا غند باك سيدك للدار .
بقات كتشوف فيه مدة طويلة ورجعات عنقاتو وجلسو كيتجمعو بجوج وهوا عينيه كيتسدو تا سكت وبقا كيسمع ليها غير هي 
رانيا: وسام! سير احبيبي لبيتك ترتاح باينة فيك عيان 
وسام: تنهد) اوك...هانا غادي تا يجي الواليد وعيطي ليا 
ناض طلع لبيتو وسد عليه ، تكى فوق الناموسية ساهي فالزاج ديال بيتو كيشوف النجوم وفضوء القمر وناض وقف قدام الزاج داير يديه فالجياب وساهي فالسماء حتى سمع الباب تحل ، حرك راسو شوية للجنب مطلع حاجبو كيتسنى يشوف شكون تا حس بشي صبع كيحركو مور ضهرو ، ضار بالزربة وهوا يلقا يارا وقفة موراه بكسيوة قصيرة عندها سميطات وشعرها مطلوق كالعادة وعوينات كيبريو وكضحك وسنيناتها كيبانو ، يالاه ضار عندها وهي تنقز عليه عنقاتو ، ابتاسم ابتسامة من القلب فاش شافها وعنقها تا تهزو رجليها من الارض ، شافت فيه والفرحة فعينيها ورجعات عنقاتو وباستو فحنكو واخا مزنكة حشمانة 
وسام: سحاب ليا مشيتي لألمانيا
شافت فيه كضحك وعينيعا مسدودين وحركات راسها يمين وشمال وهي مهزوزة عندو ، حطات يدها على قلبها وعاودات حطاتها على صدرو ودارت ليه قلب بصبعانها تا بداكيضحك
وسام: هههه فهمت ومافهمتش!
بدات كتركل تا نزلها ومشات كدور فالبيت كتقلب بعينيها بان ليها ستيلو وهزاتو ورجعات كتجري عندو وقفات قدامو كتكتب فيدها وهي توريها ليه قرى شنو مكتوب فيدها بابتسامة "كنبغيك" تنهد وهوا مبتاسم ليها وعنقها بلا ميقول والو ، بقات مغمضة عينيها فحضنو وهي تشوف فيه ببراءة ورجعات كتبات ليه فديها شي حاجة و وراتها ليه 
وسام: كيقرى) ونتا واش كتبغيني؟
شاف فيها فحيرة مهضرش تا تحرجات وهي دير ابتسامة بزز وعينيها مغرغرين كتحاول متبينش و دارت ليه باي باي وتمات غادة وكدور تشوف فيه بابتسامة تا خرجات من البيت وهما يطيحو دموعها ومشات كتجري لبيتها دخلات سدات الباب بالساقطة وتكات على الباب كتبكي وكتنزل معاه بضهرها تا جلسات جامعة رجليها مارضاتش و وجها حمر ، بدات كتنخصص فصمت وهزات راسها كتنسح دموعها وهي تشوف الكتابة فيديها ولحسلتها بلسانها وبدات كتمسحها فكسوتها وتنخصص ، بقات هاكاك حتى سمعات الدقات فالباب وناضت بالزربة وقفات حالة عينيها كتنش على وجها بيديها وهزات جلايل الكسوة شدات لبيهم شفارها وتحنات كتمسحم وتنش على وجها وتنفس ، وهي تحل الباب لقات وسام واقف قدامها وهي تبتاسم ، زرب عليها عنقها تا تخشات فيه وغمض عينيه وهمس بصوت خافت 
وسام: كنبغيك ايارا
بقات مطرطقة عينيها ووجها فكتفو وهزات يديها عنقاتو حتى استوعبات عاد بدات كضحك والفرحة غتخرج من عينيها ، وهما فديك الوضعية لمحهم صاعم وهوا دايز لبيتو وبقا واقف كيشوف من بعيد بحالة تعجب ومشا لبيتو .
جلس وسام مع يارا فالبيت وجلسها على رجلو كيطلع ويهبط فيها بابتسامة خفيفة 
وسام: توحشتك ... دابا مللي شفتك حسيت براسي توحشتك 
حطات يديها على قلبها كتحرك راسها بالايجاب بمعنى"حتى انا توحشت" فهمها وهز يها باسها وبقا ساهي فملامحها كيدوز يدو على وجها وشعرها بحنية و وجها قريب من وجهو ، قربات ليه بشوية بغات تبوسو وهما يوقفهم صوت رانيا
رانيا: ياراال...ياراااا
رانيا جايا كتعيط دايرة بحساب تقدر تلقاه معاها فالبيت وصبقات صوتها قبل مدخل عند يارا ، يالاه وصلات للباب وهي تخرج عندها يارا مزنكة 
رانيا: ياالاه تعشاي
حركات يارا راسها بارتباك ومشات معاه وخرج وسام رجع لبيتو جلس فطرف الناموسية حاط يدو على وجهو ولونو مخطوف كيفكر ويمسح وجهو ونفسو كطلع وتنزل بالزربة ، حس براسو ماشي هوا هاداك وهز تيلي عيط لجواد وخرج من البيت زربان تلاقا مع عاصم فالدروج وهي يبتاسم 
وسام: الواليد ....على سلامتكم 
سلم عليه من الوجه وعاصم رتب على كتفو وقال
عاصم: كي غادية الامور مزيانة؟ كي داير مع الدراسة والخدمة كلشي مزيان؟
وسام : سافا سافا ...خاد الساعة مزيان
عاصم: مركز على وجه وسام) شتك ماشي هوا هاداك ! مالك عيان؟
وسام: بابتسامة) هه ايوا ضاروري من العيا راه شهر ديال الخدمة والقرايا
عاصم: رد البال لراسك اولدي وتهلى فراسك ماتبقاش تابع الخوى الخاوي غتخرج على راسك ...فين غادي دابا؟
وسام: عند جواد ...داير معاه ، مهم الواليد نرجع ونهضرو
عاصم: عندي معاك شي هضرة ولاكن ماشي ليوم تالمن بعد...بعد على الشراب راه هلكك .شوف وجهك كي رجع باين فيه العيا
وسام: لالا بعدت مابقيتش ...يالاه تهلى مغنتعطلش ببا متخلع
مشا وسام وخلا عاصم واقف متبع ليه العين فحيرة من الصورة اللي شاف فيها وسام ، كترات لحيتو وعينيه تقال باين فيهم العيا ولون وجهو رجع اصفر ، تنهد ونعل الشيطان ورجع هبط جلس مع يارا ورانيا فسقرة العشاء

خرج وسام شد الطريق نيشان لدار مروان فين داير يتلاقا هوا وجواد ، حبس الطوموبيل فالباب ونزل لابس سبور ، سروال توني اسود وتيشورط سوداء ودخل لقاهم مجمعين حدى لابيسين وحداهم القراعي دالشراب وكاع نواع الخمر ، داز موراه لقى السلام وجلس على الفوطوي حداهم جبد الكارو شعلو وبقا ساهي
جواد: مالنا عاوتاني؟ نتا حل و احوال كل مرة كي كتكون
مروان: (حط يدو على رجل وسام) خاي وسام ياك لاباس ؟
وسام: والله ماعرفت! حاس براسي مزير ومخنووق 
جواد: وراه دوزات ليك الواليدة على كلشي وقالت ليك كلشي مزيان معندك حتا حاجة 
وسام: ماعرفت اخاي ...راسي شي مرات كيعطيني الصداع والنفس كنطلعها بزز ...وديما مرخي وفشلان والعكز قاتلني ختى الرياضة مابقيتش كنديرها ، وبراشيد تا هوا اللي كان كيعجبني نديرو مابقيتش مسوق ليه ، تا حاجة ما بقات كتعجبني وماعندي رغبة فحتى لعبة
مروان: عادي كتوقع ، اي واحد كدوز عليه بحال هاد فترة الاكتآب 
جواد: اجي ...ياكما كتحب المسخوط
وسام: كيدةز يدو على راسو ويتفوه) وايييه واقيلا! معانا واحد البنت عاجباني بزاااف . كنحس براسي فرحان فاش كنشوفها 
جواد : ياكما البنت اللي قلتي ليا عليها
وسام: ايييه هيا هاديك ، مي واخا كنحس بقلبي كيضرب فاش كنكون معاها غير كتغبر كنسى عليها مفهمتش ، والمشكلة راحتي تنلقاها مع وحدة اخرى ... هادشي عاد بدا كيوقع معايا! فاللول كنت مع يارا غير كتشد ليا فيدي كيفضحني المعلم ولد الكلبة كنبدى نغطيه ودابا لا ...حاس براسي كنبغيها مي الغريزة مكتحركش فيا حتى كنكون مع سارة !
مروان: ههههههه شتي نتا عندك واحد لاكسيدون فالمشاعر كل وحدة لاياش لايقة ، ديك يارا اللي قلتي عليها ديال الحب ، اما الخرى غير ديال ****** مهم وحدة فالقلب وحدة ف******
جواد: هههههه بصح اخاي وسام عطاك جواب مقاد... عيش الحياة تا نتا كتبقاش تفكر ليا فالتخربيق
وسام: لالا انا باغي غير يارا 
مروان: ومالها هاد يارا ! راه تاهيا غ....
قاطعة وسام بنضرة حادة 
وسام: هيييه....حدك تما ، ها حنا غنتبرهشو عاوتاني ، الياء و الألف وراء والألف متعاودتش تهضر عليهم ، راك كتهضر على يارا بحال الى هضرتي على الواليدة واا رد البال تاصاحبي
جواد: هاحنا بدينا فالغيرة وداكشي
مروان: ههههه السيد تزعط مسكين 
وسام : نتزعط ولا نزعرط شغلي هاداك ، تانا والله تا مساااالي جالس نهضر معاكم 
مروان: تا انا والله تا خصني عقل كنتسنط ليك 
ناض مروان خيد حوايجو وتسوطا فلابيسين وهوا سكران كيعوم ويهضر معاهم من وسط لابيسسن ، دوزو الليلة فالضحك والنشاط بلاثة تا قرب يصبح الحال عاد تنشرو فوق الفوطويات دالجردة كل واحد فين نعس .

* * *

سارة فاللحضة اللي خرجات فيها من دار وسام مشلت كطير للكلينيك فين داو ليها بنتها لقات الغاءلة كانلة مجموعة ، عاءلتها وعالت راجلها فالبيت فين منعسين دينا ، دخلات مخلوعة بلا مدوش ومابقاش ليها الوقت فين تخوي عليها الماء وتغتاسل من الجنابة ، بدات كتسول على شنو وقع وتشوف فراجالها وهوا قالب وجهو مكيشوفش فيها وباين معصب ، جلسات حدا بنتها تا تفرقات العاءلة كل واحد فين مشا وبقات غير سارة هي وسمير فالشومبر ، ناض سمير كيبخ الدم بالاعصاب جر سارة من يدها وطرطق فيها عينيه تا تخلعات
سمير: فين كنتي؟؟ هضري ....شحاااال صونيت وشحال زمرت ونتي ماشي فهاد العالم ؟ وقت الخدمة سالا ونتي دالعا؟؟ طلقت ليك وهرجو رجليك الشواري دوي؟ (دفعها)
سارة: تحت السنان) ديك الساعة عيط لبنت خالتك ولا عمتك تعاونك ..
جرها سمير من شعرها تا رجع راسها للور وهضر ليها فودنها تحت سنانو
سمير: انا نوري ديلمك هاد السيبة اللي رجعتي سايبة ، من اليوم غتشدي الارض وممنوع الخدمة وممنوع الخروج واللي فجهدك ديريه ، و واليدك الى بغاو ليك الطلاق من غدا سيري رفعي دعوة وخلصي براتك وعمرك تحلمي بالبنت اما انا مغنطلقش ، سيري طلقي راسك فهمتي
دفعها وخرج خلاها مصدومة جالسة كتبكي ، شدات السرير اللي حدا بنتها دوزات فيه الليلة حتى للصباح ، دخل الطبيب بابتسامة لقاها جالسة حدا بنتها وسمير كيمشي ويجي فالغرفة معصب 
الطبيب: سيادنا يمكن ليكم تخرجو البنية راه ولات لاباس...والله يجازيكم بيهير ردو ليها البال راه باقا صغيرة عاد كتكون عندها المناعة وخاص تكون عندها مناعة قوية متشي ضعيفة باش متبقاش تمرض ليكم ، خاصها العناية شوية والرضاعة فالوقت ماشي كل مرة ترضعوها فوقت
سمير" كيخزر فسارة) اكيد ادكتور عادشي اللي خاصو يكون
الطبيب: واش امدام كترضعيها رضاعة طبيعية ولا حليب الفرماسيان
سارة: مابقيتش كنرضع...
سمير: مابقاتش كترضع حتى مشا ليها الحليب وضطرينا نعطيوها حليب الفرماسيان
الطبيب: البنية يالاه عندها شهراين حيدتي ليها البزولة دغيا؟ لالا مكانش عليك ديري هادشي على الاقل ترضع واحد العام او لا عام ونص ، راه الرضاعة صحية ليك وليها هي 
سارة: الصمت
سمير كيشوف فيها حاقد ، هز البنت لواها فليزار وخرج تابعاه سارة ، ركبات للور عطاها البنت وركب لقدام سايك الطوموبيل وكينكر فالطريق حتى وصلو ، طلعو وهما ينوضوها صباط

ناض الصدع والغوات بين سارة وسمير فاللخر خرج هوا برى يضربو البرد ودخلات هي لبيتها هس وبنتها بدلات ليها ولبساتها وعطاتها الرضاعة ونعساتها ودخلات للدوش دوشات بالزربة وخرجات نعسات خدى بنتها ، فالصباح كالعادة ناضت بغات تمشي للخدمة وهي تلقى سمير كيلبس صباطو غادي للخدمة ، شافها لابسة وهو ينوض وقف ليها مخرج عينيه
سمير: راه هضرنا ...مكاينااش الخدمة وغتشدي الارض بزز ولا بالخاطر سمعتي ، البنت بقات كتلاح من يد ليد حتى كانت غتموت ...باش نافعانا هاد الخدمة اللي كتمشي ليها نتي باش؟ اش ناقصك الاللة باش تهرجي تخدمي وبنت مزالة لحمة خاص للي يقابلها 
سارة: قابلها نتا ماشي ولدتها بوحدي
سمير: ومللي نجلس نقابلها انا وتمرض لاش غنداويها؟ باش غنشري ليها الحليب باش غنلبسها وباش غنعيشو؟ سمعي الاللة راه كل واحد عندو دور خاصو يديرو فهمتي ، انا دوري نخدم ونوفر كاع المتطلبات ونتي دورك تقابلي بنتك ودارك والى بخلت عليك بشي حاجة عاد ديك الساعة هضري ، ها الفلوس الى خصاتك شي حاجة وراه التلاجة عامرة معندك متشري هادي غير الى بغيتي شي حاجة اخرى اما راه كلشي عندك فالدار
حط ليها 200 درهم فوق الطبلة وخرج زدح الباب وخلاها واقفة كتغدد ، جلسات مفقوصة تا سمعات بنتعا كتبكي ودخلات بدلات ليها ورضعاتها ولبسات ليها وهزاتها فيدها وهزات 200 درهم ولاكارط ناسيونال وخرجات كتجري لمكتب الكاتبة العامة دخلات عندها كتبكي وجلسات كتشكي عليها ، هزات الكاتبة ورقة وستيلو وجلسات تكتب
سارة: انا باغا نرفع عليه دعوة ديال الطلاق 
الكاتبة: من حقك ...غير قولي ليا شنو نكتب ليك فيها باش نرسلوها للمحكمة وخاصك تسناي شحااال شي شهراين ولا 3 شهور عاد يسيفطو ليه دعوة للمحكمة وديك الساعة غيتفتح الملف ديالكم فالمحكمة وخاصك محامي ولا محامية وغتبقاي شحال ونتي كتسناي الجلسة الاولى والثلنية والثالثة والاسءناف و و و و ...حيت راجلك مباغيش يطلقك راه غتجرجري بزاااف ويقدر يطلبك فبيت الطاعة ويردك بزز منك 
سارة : وشنو ندير دابا؟
الكاتبة: انا اللي عليا غنديرو ، غنغرق ليه الشكوى مزياان ونتي كلفي محامي والباقي غتكملوه فالمحكمة ... مهم شنو نكتب ليك
سارة: كتبي ليا تما كيخوني و مكيصرفش عليا وكيضربني وحابسني فالدار ومن نهار تزوج بيا وانا فدارنا مكينفقش عليا ولا على بنتو 
الكاتبة: اهاه...غندير ليك هنا بللي كتسالي النفقة دالعقيقة ، ولدتي ومنفقش عليك فالولادة وهاجرك مكيسولش فيك ونتي طالبة طلاق الخلع ...غير هوا ديري فراسك الخلع راه متساليه تا ريال حيت غتنازلي ليه على كلشي 
سارة: لالا منتناولش
ااكاتبة: دونك نديرو طلاق الشقاق ...هاكا تقدري تاخدي حقك منو ولاكن هوا خاصو يوافق على الطلاق...اجي واش نتي قلتي ليه غترفعي عليه دعوة؟
سارة: لالا خليه ميعرف منين نزلات عليه ، حتى تجيه للدار دعوة من المحكمة وديك الساعة نشوفو اش فجهدو مايدير ...شتي انا كن بغيت نطلق راه عندي اللي يطلقني منو ليوم قبل غدا غير الزهر مكاينش وماعندي كي ندير 
الكاتبة: المهم ها الشكوى عمرناها ...غاتمشي تشري تامبر وتجيبيه 
سارة: واخا
خرجات هازة بنتها شرات التامبر ورجعات عند الكاتبة عطاتو ليها وقدات ليها البرية وحطاتها عندها 
الكاتبة: صافي دابا كوني هانيا البرية غنسيفطوعا مع البراوات اللي عندنا ديال الناس للمحكمة الابتداءية اللي فحي السلام ومن تما غيسيفطو ليك دعوة فيها النهار والتاريخ ليك ولراجلك ، راه كتبت ليك العنوان تما ديال راجلك والعنوان ديال داركم فين ساكنين واليديك غير هوا نتي خاصك تكوني فدار واليديك باش تسلمي الدعوة من عند عون قضاءي وتوقعي ليه 
سارة: لالا انا غبقى فداري منرجعش لدار با ونقوليهم بللي هوا اللي رافع عليا دعوة ماشي انا
الكاتبة: نتي تعرفي غير هوا ردي بالك راه فالمحكمة كلشي غيتفضح
سارة: ماشي شغلي مهم تا لتما ويحن الله 
الكاتبة: هل العموم يمكن لاي وتحد يوقع بلاصتك سواء ماماك ولا باباك ، حيت العون قضاءي ميعطيش الدعوة حتى يكون شي واحد من الاقارب ديالك وقع ليه بلاكارط ناسيونال
سارة: وهاد العون قضءي غيجي حت لعند راجلي؟
الكاتبة بسان سيوغ راه هادي دعوة من المحكمة مكتحطش فصندوق الرساءل ، ودعوة ديال الطلاق من الفوق كيجيبها العون الثضاءي ماشي تافاكتور 
سارة": ااه ..شكرا ..شحال ؟
الكاتبة: 40 درهم احبيبة
خلصات سارة الكاتبة ورجعات شدات طاكسي لدار صاحبتها الاولى هدى ، دقات عليها وهي تحل ليها ام هدى الباب
الام: اهلا بنتي مرحبا مرحبا ، مرحبااااا بالكتكوتة ديالنا ...دخلي مرحبا بيك
سارة: بارك الله فيك اخالتي...هدى كاينة؟
الام: (كتعيط) هداااا..ا هداااااا هبطي ها سارة جات عندك 
هبطات هدى كتجري ، هدى صاحبة الملامح الصمراء والعيون العسلة ...عنقات سارة وخزات دينا فيدها
هدى: وينوووووو توحشتك توحشتك موااااح...كي طرى وجرى 
الام: هانا فالسطح كنقي الزرع ...جلسي ابنتي الدار دارك
سارة: شكرا اخالتي
هدى: دخلي جلسي مالكي واقفة
سارة: لالا غير خلي معاك دينا هانا جايا دااابا عندي شي غرض خصني نقضيه ونرجع نعاود ليك راه شلااااااا ميتعاود
هدى: هههه واخا يالاه سيري هاهيا دينا معايا متخافيش عليها 
سارة: شكرا اختي ، هاكي ها الرضاعة يالاه هانا مشييت مغنتعطلش بالزربة غنرجع

خرجات سارة شدات طاكسي ماوقفات حتى للزاوية دبوهيضور ، دخلات لقات الدنيا عامرة وهي تعيط لربيعة دورات معاها باش تسبقها قبل الناس وبالتهص ولات كليانة عندهم كل شوية كتجي تا ولات معروفة عند بوهيضور غير كيشوفها كيهضر ليها على الموضوع نيشان وجلسات مع الناس مركنة مع الحيط بحلابة غوز وشادة بلغتها فيدها ومكمشة كتسنى النوبة ، دارت عندها واخد المرأة غليضة بزز باش كيدخلهت اللاب وعنقها مهرهر بحال بيبي بكرت الشحمة وقاجاه بسنسلة ذالذهب فيها عين زرقاء وحناكها غلاض ديال الطبالة ، هضرات بالدعدوع(الصوت) اللي عندها محفر ومجرح بحال الشيخات
المرى: نتي اللي كنتي جيتي المرة اللي فاتت كتبتي الشمع ياك
سارة: اه...ودرت الثقاف لواحد الراجل كنبغيه
المرى: ههه ايوا حتى يانا متقفة راجلي ومشا تزوج ... راه التقاف معندو ميقضي غير كيفشل ليه المعلم وصافي وكيمرض فالايام اللولة والشمع كيخليه يبات بلا نعاس ملاقيش راحتو ومع المدة يرجع عادي ميبقاوش يجيوه هاد الاعراض ويولي غير متقف وصافي واخا يمشي معامن ما مشا ميقدر يدير والو 
سارة: ولاكن راه زعما متقف ميشوف حتى وحدة
المرى طلقات واحد الضحة وكتنضغ المسكة حتى زعف عليها بوهيضو
بوهيور: اللقوة يا البقرة واش غتسكتي ولا شلل لباباك دالم الفم
المرى: ههه هانا ساكت(شافت فسارة) قلتي ابنتي راه التقاف ميخليه ينعس مع تا وحدة بحال الى عندو العجز فهمتي وسلا مبغيتي تشدي والديه ديري ليه خريقة
سارة: شنو هي هادي؟
المرى: الخرقة اوييييلي معرفتيهاش؟ جيبي الماء ديالو لبوهيضور يخدم ليك فيه ومتبقايش ديري ليه الشمع ديري غير الخرقة 
سارة: بصوت خافت ) منين غنجيبها؟
المرى: فاش تنعسي معاه داكشي باش كيمسح هزيه جيبيه وخبيه ...انا راه عندي ساك قد هوك مخبياه فيه الخراقي ، غير نشوفو بدا يفيق كنعاودها ليه
سارة: ولاكن انا راه دار معايا الواقي وفاش ناض مشا نيشان للدوش ورجع نقي !
المرى: هيييوااا السيد مجبد هه! خايف على راسو 
سارة: لالا راه معارفش السحور ومعندوش فالقاموس ديالو ...يمكن كيبغي يدير الواقي عير هاكاك وصافي
المرى: غيكون خايف يحملك داكشي علاش ...مهم نتي هزي داك الواقي فاش يحيدو وجيبيه 
سارة: كي غندير ليه وهوا كيمشي بيه للدوش نيشان ويسد عليه
المرى: فاش يهزر يدرو لعبي فيه بيدك وتقبيه فضفرك فالراس بلا ميعيق وهوا فاش غيدخلو غيتفركع ليه وميرضش ليه البال وغيصدق كيمسح وهزي داكشي جيبيه 
سارة: صافي واخا...ويلى حملت؟
المرى: وتي مالكي طرنوونة؟؟؟ شربي الكينة
سارة: صافي واخا...عطيني نمرتكك ههه
المرى: قيديها عندك ويلى بغيتي شي لعابات ولا هانا مجودة انا والفرقة ديالي
سارة: شكرا
خدات النمرة وناضت عند بو هيضور ضرب ليها الكارطة وهاد المرة لراجلها ، سارة مابقاتش كتسوق للناس بكترت مابدات كتمشي ديما ولا كيجيها داكشي عادي ، ضرب ليها الكارطة و سولها
بوهيضور: اش بغيتي ديري ليه؟
سارة: بغيتو يسكت مسبقاش يهضر وانا اللي نحكم
بوهيضور : 60 الف ريال وكلشي من عندي ماتجيبي والو ويولي ليك بحال الحمار 
سارة: واخا ...السيمانة الجاية نجيب الفلوس ونجي
بوهيضور: (كيكتب فالورقة بالقصبة) سميتو سميت مو 
سارة: سمير ولد خديجة 
كتب ليه الفقيه 4 دالحجابات عطاهم ليها وجبدات 100 درهم مداتها ليه
سارة: ماعنديش دابا ولاكن غنرجع السيمانة الجايا ونكمل ليك
بوهيضور: الله يسامح غير سيري ..حجاب تحطيه تحت المخدة دراسو وحجاب فصباطو وحجاب فحوايجو وحجاب علقيه فعنقك فين ما تهضري يقول نعام يالا نوضي 
سارة: واخا شكرا 
باشت يدو وناضت ضحكات مع المرى اللي هضرات معاها وخرجات
* * *

فاقو الدراري فالفيلا دمروان فطرو مجموعين فالجردة و توادعو ، خرج جواد وسام كل واحد ركب فطوموبيلتو وكل واحد شد طريقو ، رجع وسام راشقة ليه ورجع فوجهو شوية الضوء لان الشمع المكتوب اللي كدير ليه سارة فدارها ماحدو كيدوب و وسام فصراع مع نفسو حريق الراس وتلاحلام والكوابيس ، غفلات عليه وتدهات مع مشاكلها و نزلات عليه هوا الرحمة وتحلات ليه الشهية مع صحابو وفطر مزيان ورجع للقيلا عند واليديه ناشط ، دخل لقاهم كيفطرو كاميلن تحت واحد النخلة فالجردة ، باس لباه راسو ولمو حنكها وجر الكرسي حدايا باسها فحنكها وهي جالسة كتفطر فرحانة لابسة بيجامة بالشورط وطالقة شعرها للجنب
رانيا: ايييوااا الناس راشقة ليهم 
وسام: جمع النفس فصدرو وطلقها) ايييوا رتاحينا شوية من العيا دالسفر
عاصم: مزيان ...مامشيتيش للخدمة ليوم؟
وسام: لا راه يعقوب كاين...شافني عيان قالي رتاح تا يدوز عليك الحال واجي راه غتلقى الخدمة مجموعة عليك هههه
عاصم: هههه المهم تابعاك تابعاك
وسام: lundi انشاء الله عندي 4 ديال الاجتماعات متابعين من 7 h دالصباح ل 12 ...واحد فلاكيديمي واحد مع جنرال يعقوب وضباط الصف و واحد فكازا خاصني نطلع تا لتما ايوا و واحد مع الادارة المحلية بمناسبة تخرج بعض الضباط الجدد عندي معاهم اجتماع ولاسومين بخوشين غادي للصحراء بلاصت يعقوب على قبل الدبابات الجداد والعسكر للي تما باش نديرو ليهم الانطلاقة يخدمو . هادي هي الخدمة اللي مجموعة عليا مي ليوم بغيت نخرج يارا شوية الى بغات (شاف فيها وابتاسم)
شافت يارا بابتسامة وحركات راسها بالايجاب
رانيا: كتاكل)نخرج معاكم تا انا
عاصم: نتي غتمشي معايا عند الواليدة مريضة كتسول فيك
وسام: وااايلي مريضة؟ فوقاش...
غمزو عاصم قبل ميكمل الهضرة وهوا يسكت حبس الضحكة كيشوف فرانيا بنص عين وهي ملهية كدهن فالفرماج وتاكل

عاود معاهم وسام الفطور فجو اضحك والنشاط وناض كيتجبد
وسام : يارا لبسي حوايجك نخرجو...انا طالع ندوش ونرجع عندك
مشا طلع لبيتو ويارا ناضت فرحانة طلعات كتجري لبيتها دخلات سدات عليها كتنقز وحلات الماريو هبطاتو كامل بزربة هزات سالوبيط ديال الدجين قصر حتى لفخاد ، لبسات بودي ابيض عريان x من الضهر و واسع من الصدر ولبسات فوقو السالوبيط ديال الدجين الازرق مكروزاين ليها السميطات من الضهر والشورط مزير ، خلات شعرها ملوي كل خصلة بوحدها على طولو تا المؤخرة ، دترت تقاشر بيضين وكونفريس بيضاء جديدة ، رشات ريحة حدا ودنيها برادة ودارت مقبط فجنب شعرها ديكور على شكل فراشة ، دارت اكخون لوجها ومشطات حجبانها وشفراها ومرطب الشفاه وخرجات هازة ساك بيد طويلة فالجنب .ونزلات كتنقز لتحت جلسات دايرة رجل على رجل كتسناه ، نزل عندها مفركس مقاد اللحيةو بالشورط ديال الديجين وليمولي قاصحين وسبرديلة كحلة وتيشورط كحلة وكسكيطة كحلة ، هوا جاي كيقرب وريحتو سابقاه هاز نضاضر الشمس فيديه وسوارت فاليد الاخرى وكيبتاسم ، ناضت وقفات فرحانة قدامو شدة فالسمطة ديال الساك الصغير كتلب فيه متوثرة ومبتاسمة وهوا موراها كيطلع ويهبط فيها ، طلعو للباركينغ ديال الطوبيلات حل ليها البال ركبات وركب حداها وديمارا اللوطو وطلق موسيقى مجهدة فالطوموبيل ، الصمت....والابتسامة مفارقاتهومش ، يارا كانت حاطة يدها حدا بواط افيتاس وهوا مرة يبدل السرعة مرا يبقا شاد فبواط افيتاس ، وتحد اللحضة هز يدو وهوا كيشوف قدامو بغا يحطها وحطها على يد يارا ، بقات مزيرة ووجها حمر وقلبات وجها للزاج كتشوف وكتحس بيه كيحرك يدو بشوية وصبعانو مع صبعانها حتى شد ليها فيدها ، بقات كتشوف فالزاج والفرحة غتخرج من عينيها وجالسة كتفيبري بوحدها ، هز وسام يدو ويدها حطها على بواط افيتيس شاد فيها وسايق ، كيشوف قدامو ، دور وجهو جيهت يارا شاف وجها حمر وبتاسم وهز يدها باسها شابكين الاصابع وشد طريق لوطوروط مطلقش من يدها تا وصل لكازا وقف اللوطو حدا سندباد ونزلو شد ليها فيدها 
وسام: باغا تلعبي؟
شافت فيه وحدكات راسها بالايجاب وشافت الواجهة دسندباد قبل ما دهل عجبها الحال ، دخلها بدا كيدور هوا وياها وهي فرحانة لاسقة فيه، مرة يعنقها مرة يشد ليها فيدها ، شيرات ليه لواحد اللعبة بصبعها 
وسام: تركبي فيها؟
حركات راسها بالايجاب وداها ركبها و وقف كيتفرج ، دارت فيها تا داخت ونزلات عندو دايخة كتمشي وتجي وهوا كيضحك عليها ، بقات كتركب من وحدة لوحدة تا عيات وبدا كيجرها بزز 
وسام: تقداو ليك؟ نوضي نهزك 
وقفات ودار موراها هزها من ركابيها وهي مخلوعة وفرق ليها رجليها وجلسها على كتافو قاد ليها الجلسة وهي كضخك وانة لا الاه الا لله تابعاهم بعينهم منين ما دازو ، شاد ليها فخادها وكيدور بيها وهي كتنخغزو وهبط راسها وتشير ليه بيدها باش يديها فين بغات ، واحد اللحضة مدات ليه التيلي من لفوق شاعلاه ودايرة كاميرة وعطاتو ليه دار السيلفي وهي فوق كتافو ، شبعات دوران وخرج هازها تا للطوموبيل وحطها وباسها فحنكها
وسام: يالاه طلعي نمشيو لبلاصة اخرى ...

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.