صورة مصغرة لـعذابي الجزء 15

عذابي الجزء 15

3adabi
رواية عذابي لنهى مر

خدات نفس ديالها و شافت وجهها فالمرايا لقاتو حمر... غسلاتو و عاود شافت راسها فالمرايا معصبة و كاتسوط، هزات لفوطة مسحات وجهها و كاتخد نفس و تزفرو باش تتهدن حتى بدات كاتكالما شوية و هزات راسها شافت فالمرايا لقات خدودها حمرين و نيفها كذلك... شدات جزء من شعرها لاحتو على لقدام من الجوانب بجوج باش يغطي خدودها و خرجات كاتمشا بأنوثة كيف ديما و دخلات عندهوم و رجعات لبلاصتها جلسات و غيث متبعها بعينيه و عاقد حجبانو جالس فوق فوطوي و كايحك لحيتو
ياسمين: جدة انا غانمشي دابا عندي لخدمة كتيرة ها التوينز معاكوم غانرجع فليل نشوفك و غانمشي
قمر: علاش ماغاديش تبقاي تباتي هنا ?
ياسمين: نو غانبقا نجي نطل و نمشي
جوري: (هازة أناييس)و التوينز !!بغيت ندوز معاهوم وقت اطول التصاور و لفيديوات ماشبعونيش
ياسمين: ماتخافيش ا ماما جوري (بتاسمات) التوينز غايبقاو معاكوم
قلب غيث وجهو كايسوط بعصبية و شهاب مقابلو
ياسمين: مايكون عندك باس (باستها) حتال ليل
إلينا: الله يوفقك ا بنيتي
ياسمين: أنوسة اجي عند مامي
أنيس: 🙌 مامي 😄
هزاتو و عنقاتو و شبعاتو بوسان و حطاتو حدا قمر و هزات أناييس من عند جوري
ياسمين: مامي انا غانمشي شوية و نجي اوكي
أناييس: واخ.. انا ديلش بيتيس (واخا... انا ماغانديرش لي بيتيز)
ياسمين: عارفة فنيونة ديالي (باستها) قابلي خوك صافي و مادابزوش
أناييس: دابزوش نيس وييين يلعب مايا (ماندابزوش أنيس زوين كايلعب معايا)
ياسمين: واخا مزيااان كاين بنت عمك سميتها شوق ماضربيهاش راها زوينة غاتلعب معاك صافي ?
أناييس: بنت حداخرا 😱
ياسمين: اااه كاينة وحداخرا لعبي معاها راه زوينة
أناييس: يشوف (حتى نشوف)
ياسمين: واخا ا لالة حتى تفكري نتي و مخك (باستها) رضي ليهوم لبال عافاك خصوصا أناييس راه كاتغفل و كاتمشي لجردة
قمر: ماتخافيش راها بحال بنتي
حطاتها فالأرض و غيث سمع لحوار كامل لي دار بينها و بين أناييس و هو قالب وجهو معصب غادي يطرطق... سلمات عليهوم من بعيد و خرجات من لبيت ماجات فين تهبط مع الدروج حتى حسات بيد شداتها و ضوراتها
ياسمين: هيييييه بعد مني
غيث: اش قلت ليك ! و اش غاتديري نتي 😡
ياسمين: ماشي سوقك فيا ا بنادم انا وياك غادي نطلقو و ماشي من حقك تتحكم فيا
غيث: شفتك تيقتي راسك طلاق ولا النم راه ماغانطلقش
ياسمين: اوا نتلاقاو فالمحكمة (ضارت غادة و رجع شدها) وا طلق منيييي
غيث: واش باغة تجهلي ديلمي 😡 علاش كاتقلبي
ياسمين: كانقلب على راحة لبال و نتا مامعاكش راحة لبال من نهار عرفتك و انا فمشاكيل و مرضة راسي شحال من مرة غادي نعيش شنو غانبقا عايشة فالهم و الغم ياك نتا عزيز عليك تغبر اوا سير غبر و دير راسك بحال الا ماتشاوفناش و بقا قدما بغيتي غير فاش غاترجع غاتلقاني بنيت حياة جديدة بلا بيك
غيث: ايييه ا لالة اوا حتى يقرب ليك شي واحد و تفرجي... شنو دابا ماغاديش تبقاي هنا حدا ولادك
ياسمين: لا ماعندي ماندير هنا و نتا غاتكون طليقي و ماخصنيش نبقا ساكنة معاك فدار وحدة
غيث: واخا دابا نشوفو
ياسمين: (ضحكة سخرية) باي دابا ماعنديش وقت نعطيه ليك
رخا منها و هبطات كاتعوج فالدروج و سروال لجنيز مزيرة على طرمتها مفصلها و غيث بقا واقف مصغر عينيه كايشوف فيها و كايبلاني فراسو حتى غبرات مابقاتش كاتبان ليه و رجع للبيت عند ولادو

مشات نيشان للشركة ديالها جخلات للبيرو و جلسات كاتفكر و كاتخمم ماعندها لا خدمة لا والو غير بغات تخوي و صافي ... هضرة غيث جرحاتها فقلبها عارقة راسها حتى هي جرحاتو و لكن عاماين كافية باش ينسا... تحل عليها لبال و هي فدوامة ديال التفكير
سامي: ياسمين ... لك مصيبة رح تصير 
ياسمين: شنو واقع تاني
سامي: (جلس قدامها) لموديل إلي راح تضهر بالإعلان على البارفان لجديد مريضة و الإعلان راح يتصور بعد ساعة مشان بكرا ينشر
ياسمين: هادشي لي كان ناقصني يخخخخ تفووو نهار كيف داير وجه النحس هاد غيث... دابا شنو ندير عيط على شي وحداخرا
سامي: في موديلات بس أجانب مو عرب الكل ملتزمين بشركات تانية
ياسمين: اش غاندير دابا (غادة جاية) و لموشكيلة خلصنا باش ينشرو ل إعلان و مشا غير واحد ولا جوج بزااف زبابل ديال لفلوس
سامي: (حل عينيه على وسعهوم) إنتي لحل
ياسمين: (وقفات) كيفاش !
سامي: صوري إنتي ها الإعلان ... حلوة و رشيقة و مرا متكاملة أحسن ميت مرة من هدول لمودلز
ياسمين: و لكن راه غيث غا (حبسات لهضرة) اصلا انا غادي نطلق ماشي سوقو فيا نتصور ولا لا (ضحكة جانبية) باش نيت نطرطق ليك لمرارة.... سامي أوكي انا غانصورو
سامي: تعالي معي مشان تغيري تيابك
هزات بوطابلها و تبعاتو غاديين حتى خرجو من الشركة و ركبات معاه فلوطو ديالو و وصلها لموقع التصوير كولشي حاضر و موجد خاصهوم غير لبنت... دخلات لواحد طوموبيل طويلة و كانت معاها أخصائية فاللبس هي لي مكلفة باللباس ديال العارضات لي كايجيو... عطاتها صاية رمادية مخططة و ديياردور أبيض و فيست ديال الصاية و صباط أيود عالي كلاص... بدلات حوايجها بالخف و لبسات داكشي و جمعات ليها الشعر و عطاتها نضاضر و خرجات لموقع التصوير لي كان عبارة عند شارع كبير و طاقم التصوير هوما الناس.... مشات عند المخرج باش يقوليها اش غادي تدير
مخرج: اهلا مدام ياسمين... ماعندكش شي حاجة صعيبة غادي تدخلي لهاد لكافي و غادي تكون عامرة بالناس و غاتوقفي عند لباب و ترشي ريحة و غايشموها الرجال و غادي يتبعوك زعما و ديك ساعة غمزي للكاميرا و جري
ياسمين: اوكي سي سامبل
مشات ياسمين و وقفات قدام لكافي و لكاميرا موراها و وحدة فالجناب عطا لمخرج الإشارة ل بدء التصوير و دخلات ياسمين كيفما قاليها المخرج و رشات ريحة و سالاو المقطع الأول... بداو فالمقطع التاني فاش شمو الريحة و ناضو و حبسو المقطع الثاني و تبعوها و غمزات للكاميرا و سالات تصوير الإعلان و لكن حتى ضلام لحال حيتاش تعطلو بزاف و عاد كانو الأخطاء... جلسات كاتاخد صور باش يتنشرو فالجرائد و المجلات و المصور كايقولها كيفاش تدير و سامي واقف من بعيد كايشوف فيها كايتسناها تسالي باش يوصلها

سالات التصوير مع منتصف الليل و بدلات حوايدها و لبسات الحوايج لي جات بيهوم الجينز و شوميزة و مشات مع سامي حتى وصلو لوطو ديالو
ياسمين: تفو تعطل لوقت غايكونو نعسو
سامي: أجليها لبكرا و روحي زوريهون... تعالي لوصلك
ياسمين: اوكي... وصلني للشقة ديالي ماشي للفيلا (ركبات)
سامي: ليش شو صار ? (دار امارش)
ياسمين: راجلي رجع (تنهدات) قاليا واحد لهضرة و بقا فيا لحال بزاف كانتفكرها كايضرني خاطري اوفففف و دابا غادي نرجع ليه كولشي اي حاجة عاطيها ليا و غانطلب الطلاق
سامي: انت بتحبيه مو معقول تطلقيه (كايسوق)
ياسمين: كرامتي هي لولا عاد نشوفو الحب و الزمر... عاماين و هو غابر مخليني بوحدي حتى ميساج ماعمرو سيفطو ليا ولا هو سول فيا حتال ايمتا غانبقا هاكدا ماغاديش نعيش حياتي انا بحال الناس .. ماشي من حقي حتى انا يكون معايا راجل نحس معاه بالأمان و نعيش حياتي معاه و نزيد نولد
سامي: من حقك انت ساويتي الصح لك هيدا الرجال اجدب مامقدر قيمتك و بوعدك بدك تلاقي رجال يعاملك مثل الملكة... وصلنا
ياسمين: ان شاء الله (ابتسامة) تعطل لوقت اجي بقا معايا
سامي: مرة تانية
ياسمين: لا ويلي جيتي تال حدا الدار و ماتطلعش يالاه بلا عنادات
سامي: ماشي متل مابدك
بلاصة لوطو ديالو فالباركينك و هبطو بجوج كايضحكو و دخلو مع باب العمارة، طلعو فلاسانسور حتا تحطو قدام الشقة ديال ياسمين، حلات لباب و دخلات ودخل حتى هو بدلات فراش الدار بالكامل و شرات دار ملاصقة مع دارها و خلطات الديور باش تكون كبيرة و مع الدخلة كاتلقا صالون جانبي عصري بالسدادر و العود مقاد على حقو و طريقو و كبير و على الجنب الثاني كاينة كوزينة مفتوحة كبير و عصرية عاد كاينين لبيوت لداخل واحد ديال توينز و بيت نعاسها هي و بيت للضياف و عاد جليسة بالفوطويات
ياسمين: خود راحتك انا غانمشي نبدل حوايجي و نجي
دخلات لبيتها و حيدات حوايجها و لبسات شورط ديال الدار حد الركبة مزير عليها فالغوز مع ديباردور ديالو فالغوز كذلك فيه هيلو كيتي و لبسات بانطوفة فرجليها و جمعات شعرها شفنجة مهملة و خرجات من لبيت مشات لكوزينة و سامي كايبان ليها
ياسمين: غانطيب ماكلة تاكل حتى نتا
سامي: ماشي.. عندك ثياب رجالية بدي غير
ياسمين: واقلة عندي شي حاجة من حوايج غيث تسنا نمشي نشوف.
مشات باش تشوف و بقا سامي جالس فالصالون كايتسناها حتى سمع الدقان مجهد و ناض حل لباب و هو يبان ليه غيث واقف معصب عينيه خارجين لابس سروال جينز مع قميجة كحلة طاوي ليها لكمام و حال الصدافي لفوقانيين و فرجليه صبدريلة كحلة و شعرو طالع و ريحتو عاطية... شاف سامي و زاد صعر
غيث: شكاتدير هنا نتااا (دفع لباب و شنق عليه)
سامي: شو بتساوي (شنق على غيث) مو من حقك
غيث: كان خاصني نقتلك شحااال هادي
سامي: روح ولا بطلب لك الشرطة
غيث: ايييه الشرطة نعام اسيي وا سكت هنينا حاس براسي جالس فباب الحارة (عطاه بونية)
جمع سامي القبضة ديالو و عطاها لغيث للكرش و ناضت كومبا تما... سمعات ياسمين الصداع و خرجات كاتطل و بان ليها سامي و غيث مشادين كايدابزو و كايتغاوتو و مشات كاتجري نقزات طلعات فضهر غيث كاتغوت
ياسمين: بعد منو ا بنادم وا بعد منو
عضاتو فعنقو حتى خلات فيه لاطراس و صعر غيث بالبيان و دفع سامي حتى طاح و جر ياسمين شاف فيها معصب عينيه مابقا ليهوم والو و يخرجو من بلاصتهوم و حمريين
غيث: اش هاد لخرااااا 😡😡 باغية تجنني ديلمي
ياسمين: (كاتفركل) وا عطيني بالتيساااااع اش باغيني سير غبر لاش جاااي 😡😡
غيث: اش كايدير عندك هادا فالدار 😡😡
ياسمين: (عضاتو فيديه و طلق منها) فتحت دار الدعارة سوقك نتا
ماحساتش حتا طلع معاها بطرشة عوج ليها الحنك و طاحت فالأرض بقوة الصدمة
غيث: نتي خاص تعاود ليك التربية... فينو داك الحمار
ياسمين:(ناضت و عينيها مدمعين) بعد منو 😡😡 (مشات لكوزينة هزات موس و حطاتو على عنقها) تقرب ليه نقتل راسييييييييي
ضور غيث وجهو و شافها حاطة جنوي قدو قداش على عنقها و وجهها حمر كيف مطيشة و لاطراس ديال صباعو مصورين فوجهها
غيث: حطي داك الجنوي ا ياسمين
ياسمين: خرج براا و نحطو
غيث: (كايقرب منها) واخا ا حبيبة (كايساوي معاها) يالاه حطي جنوي بلا ماتتهوري ماغانضربوش (نوضو) اجي معايا نديك لسبيطار فين مقصح
سامي:(بتثاقل) ياسمين انا بدي روح عالمستشفى... ماتتهوري انا منيح بعدي ها السكين
ياسمين: تسنا انا غانمشي معاك
سامي: لا لا مو شي خطير بس في الم فضهري
غيث: يالاه ا حبيبة حطي جنوي هاهوا بيخير
سامي: بشوفك بكرا (خرج)
ياسمين: يالاه خرج نتا يالااااه (قربات جنوي اكتر ) راه عارفني نديرها حمقة و مقطعة الوراق
غيث: صافي ا حبيبة هاهوا غادي غير بردي نتي
بخفة و رشاقة غفلها و طار عليها شد ليها اليد لي فيها الجنوي و بثات كاتضارب هي و وياه عليه حتى غلبها و حيدو ليها و بدا كايشوف فيها بشر

غيث: اش قالك راسك نتي 😡 واش باغاني نقتلك عاد تتهناي (كايغوت)
ياسمين: وا بعد منييييييي وا عباد الله تهجم عليا واك وااااك ا عباد الله
غيث: وا عتقوهااااااا راجلها جا عندهاااااا ، بغيتي لغوات انا سيدو و صوتي على من ديالك و حار عليك بغيتي نغوتو حتى تجمع علينا الرباط كولها ماعنديش موشكيل نتفضحو بجوج
ياسمين: اش بغيتي عندي ياك خليتك (بهدوء)
غيث: شناهيا دايرة دار الدعارة اش هاد الهضرة ديال لخرا... واش عمرني سبيتك و قلتليك عاهرة ! واش عمرني طيحت من نيفو ديالك لديك درجة ! مراتي انا ماشي عاهرة فهمتي (حمر عينيه فيها)
ياسمين: وا سوقي هاداك ماشي سوقك اش باغي مني
غيث: لاش مدخلة داك خينا هنا ماكفاكش داكشي لي دار فيك داك لحمار ديال سليم!!
ياسمين: هادا خاطب و قريب يتزوج و رادا بالي و هو لي عاوني حتى وقفت ديك الشركة على رجليها فالبلاصة لي خاصك نتا تكون معايا هو كان بلاصتك و مابيناتنا والو و ماشي سوقك هي سطاش
غيث: وا ماشي سوقي خاطب ولا مزوج لمهم بو *لوة شوفي ا ياسمين انا نفسي حااااارة فاش كنتي ديال راسك ماعمرني تحاسبت معاك و نتي راك مرا مزوجة جمعي راسك لاش مدخلة راجل لدارك كون غرو شيطانو و نتي لابسة جوج شريويطات فين غانوصلو
ياسمين:(بسخرية) انا مرا مزوجة ! مرا مزوجة ماشافتش راجلها عاماين هادي و علام الله اش كايدير ماشي بعيد تكون عاطيها غير لقصاير مع دوك الحوالة لي تما و مضورين بيكوم لبنات
غيث: (طرشها) غاتجمعي فمك ولا مايعجبك حال راه غانهرس ليك عضامك
ياسمين: (مشات لكوزينة كاتطيب و كاتبين لبه لا مبالاة) اصلا اش جهدك تدير غير تضربني ! هاك ضرب طرشني ها حنك حمرتيه زيد ليه حتى التاني... صافي نتا حرارة معاك العيشة و احسن حاجة هي الطلاق
غيث: بقاي تحلمي.... ماباغاش تمشي معايا لدار اوا هاني جيت نجلس معاك
ياسمين: جلس سوقك هاداك (كاتحك مطيشة)
بقا غيث كايشوف فيها و هي كاتطيب و معصب كايجمع النفس و يرخيها و هي وجهها حمر و اثار طرشاتو باينين بوضوح على وجهها المكور و شعرها مليوح من الجناب مشعكك... دخل لصالون كاينهج كايحاول يهدن راسو و كايشهق و كايزفر و يديه كايترعدو و قاص العضة لي فعنقو لقا فيها لاطراس و لي فيديه كذلك ... بعدما تكالما شوية و برد خرج من الصالون كايقلب على الطواليط حتى لقاها و دخل ليها غسل وجهو و يقا كايشوف فالمرايا اما ياسمين فغير دخل غيث لطواليط و طلقات لبكية و الدموع هابطين بالجرا واخا كاتضاهر بالقوة قدامو الا انها مجروحة بزااف و كاتحاول تكبت مشاعرها و تصبر... مشات لافابو غسلات وجهها و جمعات شعرها اسفنجة، خرج غيث من طواليط و داز من حداها كايشوف فيها و بانو ليه لاطراس ديال صباعو فخدوجها بجوج و تنادم معاه لحاال و مشا عندها جاها من لور
غيث: اش كاتطيبي
ياسمين: غانطيبو ليك و نقطعو لكلاب ياكلوه بعد مني الله يغبر ليك الشقف (تحركات من حداه كاتدوق لاصوص)
غيث: ياااك و باش غاتقضي نتي !
ياسمين: عطا الله الرجال نتزوج و نقضي
غيث: ها نتي بديتي كاتصعريني
ياسمين: الصمت (قلبات عينيها)
غيث:(خدا نفس و زفر باش يتكالما) سمحي ليا (دوز يديه على خدها بحنان) ماشعرتش براسي حتى ضربتك قلتي هضرة اهانتي فشرفي
ياسمين: الصمت (كاتضاهر بلا مبالاة)
غيث: وا صافي عتاذري حتى نتي و خلينا نتكالماو
ياسمين:(ضارت شافت فيه) ماعندي علاياش نعتاذر اي حاجة درتها او قلتها ف انا عارفاها اوكييي
غيث: ياااك واخاااا (جرها حداه) شنو ماتوحشتينيش ! هم (كايشوف فيها بشغف و شوق)
ياسمين: الصمت
دوز يديه على خدها و هي قالبة وجهها لجنب كاتسوط و جرها عندو عنقها و كايدوز يجيه على ضهرها و هي راسها على صدرو حيتاش اقصر منو.... بادلاتو العناق و قلبها كايضرب بحال الا كاتجري، بعد وقت من الزمن بعد منها و هز ليها راسها كايشوف فيها و بادلاتو النضرات و لكن نضرات قاصحين
ياسمين: كيفما عندي حقوق عندك حتى نتا عندك حقوق و من حق تعنق مراتك حاليا و انا واجب عليا نبادلك لعناق سي تووو
غيث: (كايضحك) هههههههه ايييه ا لالة رضيتي ليا هضرتي و مابقاتش فيك الشمتة ياك بردتي دابا ! و اش نديرو فقضية التصاور و لبواط و الهضرة مع الرجال! شنو ندير حتى انا بحالك و يجيبو ليك تصاور ديالي مع شي وحدة باش تحسي بلي حسيت
ياسمين: لفوط لي درت هو انني مشيت لبواط و هضرت مع داك لحمار سي توو شي حاجة وحداخرا لاا و راه ماشي صعيب عليهوم يهزووني من فيلتك و يديرو لي بغاو حيتاش كيفما رجعوني غايديوني و راه عتاذرت ليك شحال هادا و مابقيتش غانعتاذر و دابا حيد عليا بغيت ناكل

غيث:الله يهديك ا ياسمين هادشي لي عندي مانقول
ياسمين: فلول ديال النهار كنت انا تابعاك و فالخر ديال النهار وليتي نتا لي تابعني
خلاها على راحتها و مشا جلس فالصالون مقابلها اش كاتدير و هي كاتحط لماكلة ليها سباكيتي مع لاصوص... هزات داكشي فطبسيل و ضارت باش تجلس فبلاصة لكراسا من جهة لكونطوار و غيث كايشوف فيها كايطلع و يهبط حتى حس براسو بدا كايسخن و هز مخدة من جنب دارها على حجرو باش مايتفرشش و كايحاول يشتت النضر ديالو و لكن بدون شعور كايمشي يشوف فيها
غيث: مالكي ماجيتيش للفيلا?
ياسمين:(بنفخة) كنت خدامة ماساليتش بكري
غيث: علاش ماجاوبتيش فتيلي !
ياسمين: ماسمعتوش
غيث: خلي معاك بورطابلك نعيط ليك جاوبيني
ياسمين: علاش اخويا (كاتاكل) اصلا قريب نطلقو ماكاين لاش تعيط عليا
غيث: مازال شادة فبالك الطلاق (ضحكة استهزاء) بقاي تحلمي ماكاينش اصلا شي محامي غايقبل يشد الدعوة ديالك و نفتارضو كاع شدها المحامي و دفعتي كولشي و وصلات للقاضي راه ماغايبغيش غايخاف على راسو ا حبيبة القاضية فيها لبترول... شنو غاترشي عليه الريحة و غايوافق بفففف راه ا زين كولشي خايف على بلاصتو فهاد لبلاد
ياسمين: الصممممت
كملات لماكلة تحت انضار غيث لي كاتحس بيهوم كايختارقوها و ناضت مشات لبيت النعاس غسلات سنانها و دهنات كريمها الليلي و تخشات فالفراش شوية سمعات خطاوي ديال رجلين عرفاتو هو و تضاهرات بالنوم.... حيد سبرديلة نصل سروالو و بقا بالبوكسر و حيد القاميجة بقا عريان من لفوق و عضلاتو بارزين جسمو مفتول و عامر باينة فيه متريني .. تخشا حداها فالفراش و حط يديه تحت راسو و كايشوف فالسقف و هي حداه ناعسة جنب
غيث: غاتحمقيني نتي و الله .. الا مت عاد غاترتاحي (تنهد) باش كلشي يكون واضح و نتهناو من هاد الحرب انا ماكنتش فدبي كنت حداك و قريب ليك و كانعاونك بلا ماتعيقي مقابلك من بعيد و عيني عليك فينما كنتي ماكانتش ساهلة عليا عاماين مانقربش ليك و لكن كنت عانعاقبك و نعاقب راسي بسبابي حتى طرا داكشي راه عارفة على اش عاقبتك و لكن لي ماعارفاش هو ولد عم زمرد هو لي دار داكشي و هادشي بسبابي انا حيتاش كايلومني بلي ماتت بسبابي و نتي قربو ليك و خدروك و داوك بسبابي انا و كنت كانعاقب راسي و واحد لوقت قلت مانستاهلكش خصوصا فاش شفتك جامعة راسك و بنيتي راسك من زيرو و ولات عندك سمية و شركة فرحت من قلبي ليك و راه كنت كانجي عندك كل ليلة نبقا جالس حداك و نتي ناعسة حتى كايصبح لحال و كانمشي فحالي كان هادا هو عقابي هو نكون حداك و مانقيسكش و مانحسش بحبك ليا راه قلت ليك شحال من حاجة ما كنتيش عارفاها و غير كاتدوي و كاتقولي هادا عايش حياتو و لكن و الله ماكنت عايش حياتي بلا بيك كانت ضلام حيتاش نتي هي النور لي مضويها ياسمين تخلقات لغيث و غيث تخلق لياسمين و راه كنت غادي نرجع قبل كاع ماتمرض الحاجة و لكن خرجات ليا خدمة من الجنب و تلاهيت معاها هي فاش جبت التوينز عندي نتلاها معاهوم حتى نرجع معاهوم هي فاش عرفت بلي الحاجة مريضة و سيفطتهوم ليك... تصوري حفضت سورة البقرة و ال عمران كيفما طلبتي مني يا لموصيبة و نتي باغة الطلاق ! جامي يكون ليك و بالنسبة للهضرة لي قلت ليك الصباح راه غير بغيت نرجع ليك الحرقة لي تحرقت و صافي ماضنيتش بلي غادي تاخديها بديك الطريقة و تقلبي عليا فخطرة ... عاماين و انا مضارب مع راسي حتى كانقرر نرجع عندك و نقلب تاني و نجلس و لكن عيني عليك ديما و كيفما قلت ليك كل ليلة دوزتها حداك (ضار عنجها و عنقها من لور و همس فودنها) كانبغيييييك و غانبقا ديما كانبغيك نتي نور حياتي و ليتي غادية ليا فالدم... ياسمين (طلع حواجبو) ياسمين (كايحركها) وا ياسمين خرا هادا نعسات و انا كانعبر موصيبة هاد لمرا
باسها فوق الطرشة و خشا راسو فعنقها و غمض عينيه و هي تحل عينيها كاتدمع فصمت سمعات كل كلمة من هضرتو و اثرات فيها و عرفات اش وقع ليه فغيبها و عرفات اسبابو و عرفات بلي قدر ما تعدبات هي تعدب حتى هو

اشرقت الشمس معلنة عن بدء يوم جديد . فاقت ياسمين و بدات كاتكسل و هي ناعسة فوق صدر غيث و شعرها مليوح على وجهو و هو حاط يديه على ضهرها و رجليها بين رجليه ..حلات عينيها المعمشين و بدات كاتشوف من بين رموشها حتى توضحات ليها الصورة و بثات فوق صدرو حتى مشات منها الدوخة ديال لفيقة و هزات راسها بشوية شافت فغيث و هو فسابع نومة ، ابتاسمات و قلبها مرتاح لأول خطرة بعد سنتين .. دوزات يجيها على وجهو بلطف و كاتحسسو كأنها كاتأكد من وجودو بين ذراعها ... قربات منو و قلبها كايضرب بجهد و حطات شفافها على شفافو و باستو بوسة خفيفة و بعدات منو ناضت بشوية لدوش غسلات سنانها و حيدات منو الريحة لي كاتكون فالصباح و رجعات فوق صدر غيث بشوية بلا ماتبزطو و بقات كاتدوز يديها على صدرو كاتحسس فيه كأنها كاتستمد منو الطاقة باش تكمل نهارها بعيدة عليه ... خشات راسها فعنقو و غمضات عينها و شعرها مليوح فوق صدر غيث طويل مغطي ليه الصدر ... حس غيث بشي حاجة كاتهرو و تبرزط و اضطر يفيق ... حل عينيه على وسعهوم واخا باقي شاد فيه النعاس و شاف صدرو لقا شعر ياسمين و ضور وجهو لقاها خاشية راسها فعنقو و رجلها وسط رجليه و الدباردور طالع ليها و الشورط كذلك و بان جزء من مفاتنها ... ابتاسم غيث ابتسامة رضا و قلبو مطمئن مرتاح و دوز يديه عليها بلطف و هي دايرة راسها ناعسة ، باسها فراسها بلطف و كايلعب فشعرها كايخشي يديه من فروة الرأس حتال الأطراف ... بعد بشوية و بان وجهها الدائري الأبيض دايرة بحال أناييس الا كانت ناعسة نفس الكيوتنس و البراءة ... دوز صبعو على وجهها كامل و شاف الطرشة زراقت و ندم على الضربة لي عطاها و باسها فيها.. حط صبعوعلى شفافها كايدوزو بشوية و قرب منها و حسات بأنفاسو حدا وجهها سخونة كاتحرق ... طبع قبلة حنونة على شفافها الموردين و بعد شوية و خلا نيفو حدا نيفها و همس بصوت صباحي
غيث: ياسمينتي.. سوسو فيقي حبيبة باراكة من النعاس
ياسمين:(بتمثيل) اممم... عننسيدج هنكط
غيث: اش كاتقولي ! هههه وليتي كاتهضري بالشنوية ... باراكة من النعاس
ياسمين: خليني ننعس
غيث: لاا باراكة عليك من النعاس فيقي يالاه (كايفرق قبل على وجهها) يالاه باراكة من النعاس (قاص العضة لي فعنقو) عرفتي سنانك قاصحين ااااي وا عضة عندك كاتضرني
ياسمين:(حلات عينيها بشوية) اش كاتدير هنا (بعدات من حداه) سير فحالك بعد مني واااه على لصقة (جلسات عاطياه بالضهر كاتكسل)
غيث: (كايشوف فيها) لاصق فمراتي سوقك نتي ( دور يديه على خصرها و جرها حتى تجبدات و طلع فوقها) رجعي ليا مراتي شكون نتي ... بغيت ياسمينتي (خاشي راسو فعنقها كايهرها باللحية) عطيني مراتي و بعدي منا وا بغيت حبيبتي
ياسمين:(كاتدفعو و كاتضحك حيتاش كايهرها) بعد هههههههه راه كاته هههههههه كاتهرني 😂😂😂 حرام عليك 😂😂😂 كرشي ت هههههه تزيرات عا... عافااك
غيث غاترجعي ليا مراتي هم ! (كايهرها)
ياسمين: وا لااا 😂😂😂 عافاك رصا 😂😂😂 الله يحفضك 😂😂😂
كاتفركل كيف الدجاجة و كاتركل و كاتضحك بجهد و غيث كايشوف فيها كايضحك عاجبو لحال حيتاش هي فرحانة حتى جمعات معاه بضربة فحجرو و هو لابس غير لبوكسر وخرج عينيه من حر الضربة
ياسمين: 😳😳 تق... تقص ... تقصحتي 😳😳
غيث: (يديه فوق حجرو و جلس كايتألم) باغة تقتليني 😠😠 اييييي
ياسمين: (ناضت مخلوعة) ماقصدتش و الله اش ندير 😨
غيث: ايييي جيبي الثلج 😠
مشات كاتجري باش تجيب الثلج و طلق غيث ضحكة خفيفة حيتاش ماتقصحش بزاف بغا غير يشد فيها... جات هازة كيس ديال الثلج فيديها و صفرة الطرشة لي باينة فوجهها و جمع هو الضحكة و دار كايتألم ... عطاتو الثلج و هزو حطو فوق حجرو و شد ليها يديها و حطها على لكيس باش تشدو و هي بالخلعة لي ركباتها ماتجاحدتش معاه و شدات لكيس و هي تالفة و كاترعد غير بوحدها
ياسمين: باقي مقصح ياكما غاتموت 😨 ياكما ماغاتبقاش تولد 😱

غيث:(حابس الضحكة) اااه ناري غانمووت
ياسمين: صبر شوية نعيط على طبيب 😰
غيث:(جرها حتى قربات ليه ) بلاش طبيب غير اجي مسديه ليا و غادي يبرا.
ياسمين: لا يعععع اصلا انا وياك غانطلقو
غيث:(من تحت السنان بعصبية) واش باغاني نفرعك عاد تتهناي ماكاين بو طلاق غاتبقاي مراتي حتى نهار نموت
ياسمين: شفتو مابقاش ضارك (مطلعة حاجب مهبطة لوخر) كاتفلا عليا
غيث: راه قصحتيني ااحح ماشي حشومة عليك مابقاش فيك (غمزة)
ياسمين: تستاهل .... شوف وجهي كيف ولا بسبابك (مغوبشة)
غيث: (جلسها وسط رجليه وجرها على صدرو) راه نتي كاتقولي شي هضرة كاتخرج بنادم عن طوعو شناهيا فاتحة دار دعارة وليتي عاهرة !! ماعندكش لحق تسبي ليا مراتي و تهينيها بديك الطريقة و عاد قفرتيها بديك سهران و مدور بيك لبنات كون بغيت نسهر و ندور بيا لبنات كاع مانسوق ليك نتي و ولادك (باسها فخدها) هانا تصالحت معاه ، ماتبقايش تديري شي حاجة تكعيني ا ياسمين راه كانجهل نقدر نضربك فلحضة غضب نسيفطك للقبر (ضور يديه عليها) و انا مانقدرش نعيش بعدك و كانتمنا نموت قبل منك
ضارت ياسمين و حطات يديها على فمو سكتاتو و عينيها مغرغرين بالدموع
ياسمين: ماتقولش هاكداك الله يبعد عليك لموت
غيث:(حيد ليها يديها و باسها و ابتاسم) الموت علينا حق ا ياسمينة غير هو بغيت نموت قبل منك
ياسمين: صافي سكت (بعينين مدمعين)
غيث: هاهوا سكت ... صافي جابا تصالحنا !
ياسمين: و ديك عاماين لي ضاعت من حياتي
غيث: نعوضك فيها نهار بنهار ... راه لبارح فليل جالس كانخطب عليك و فالأخير لقيتك خامرة ببففف حشيتيها ليا
ياسمين: (ابتاسمت ورموشها فازكين) غيث لياسمين و ياسمين لغيث 
غيث:(طلع حوايجبو) سمعتيني ! شويطينة مع راسك... تصالحنا دابا
ضورات وجهها و شافت فيه و قربات بشوية من وجهو و فتحات فمها... فهمها هو و حل فمو باس يستقبل القبلة ديالها و نغامسو فيها وغاصو فبحر من القبل و الحب ،الغرام و الكلام المعسول و انتهى الامر بممراسة خلاتهوم يتوحدو جسديا و روحيا و يمشيو لعالم فيه غير هوما بجوج ترفعو على العالم و خلاو الشوق ديالهوم هو لي غالب و كل واحد كايشبع شوقو للآخر .
بعد ساعات، غيث كاينهج ناعس فوق ياسمين و العرق فضهرو الشيء لي كايدل على انه دار مجهود و ياسمين تحت منو عريانة و سخفانة عينيها مقلوبين و شعرها مسرح حداها فوق الفراش و جبهتها عرقانة و كاتنهج ... نعس غيث بالجانب ديالها و هو كايبتاسم و جر عليها الغطا غطاها و غطا نصفو التحتاني.. هز يديه كايدوزها على وجهها بحب و هي كاتقلب عينيها مهلوكة
غيث: صافي سخفتي ? دغيا 
ياسمين: انا ماشي بحالك (بسخفة) ماعنديش الجهد ديالك
غيث: هههههه فيك الجوع !
ياسمين: اه و لكن مافيا لي يطيب
غيث: انا غانعيط ليهوم يجيبو ليك لماكلة حتى لعندك .. شنو بغات الحبيبة ديالي
ياسمين: لي كان جيب ليا على ذوقك 
غيث: واخا ا حبيبة (باسها) رجعي سوفل حيتاش هاد ليلة غاتدوز حمرا (غمزة و بوسة فالهوا)
ناض من حداها عريان و هي متبعاه بعينها كاتفرنس حتى لبس لبوكسر و هز تيلي ديالو عيط لمطعم و طلب من عندهوم القطبان و اللحم مبخر و سالاد دياال الخضرة كل حاجة منها جوج و مشا لدوش دوش بالخف حيد الجنابة و توضى باش يصلي ... سالا الجوش و خرج لاوي عليه فوطة و شعرو فازك كاتقطر بالما على وجهو و ياسمين متبعاه بعينيها بحال الا اول خطرة تشوفو ... قرب من حداها و حرك شعرو و تلاحو عليها قطرات من الما و بقات كاتضحك ... لبس حوايجو لي جا بيهوم تحت انظارها 
غيث: ماغاديش تدوشي !
ياسمين: عيييت حتى ناكل و نوض
غيث: واخا ا حبيبة انا غانمشي نصلي (قبلة فالهوا)
هز الصلاية و توجه للقبلة و صلا الصبح و تبع ليه الضهر و العصر كذلك ... غير سالا الصلاة و سمع الدقان فالباب ... هز الفلوس و حل لباب خلص و خدا الماكلة ستفها فالطباسل و حطها فسينيا و دخلها عليها و هي مجبدة لاوية عليها ليزار

حط ليها الماكلة فوق ركابيها و هي غادي تطير بالفرح... جلس حداها و بدا كايوكلها ويديه كايقيسوها فوجهها كايدوزها على بلاصة الطرشة و حاس بتأنيب الضمير ... عاقت بيه ياسمين و ضارت شافت فيه بحب و حطات يديها على لحيتو
ياسمين:(ابتسامة) ماكاتضرنيش
غيث: واخا ماتضركش راه ماكانش خاصني نضربك قوتك ماشي بحال قوتي و نتي مرا ماتولدتيش باش تاكلي العصا بالعكس خاصك تتحطي فوق الراس واخا تديري لي تديري تمنيت كون تقطعت يدي و ماضربتكش
ياسمين: حتى انا راه عضيتك و خليت فيك لاطراس عتابرها بلي تساوينا
باسها فجبهتها و كايوكلها و كايوكل راسو حتى شبعات و حيد لبلاطو حطو فالأرض و شبك صبعانو مع صبعانها و قرب منها و هي هازة راسها كاتشوف فيه
غيث: هاد الدار شهدات على بزاف ديال الحوايج لينا بجوج ... قبل كاع مانعرف راسي طايح فيك و غارق تال لودنين فوق هاد لفراش نعست وحداك تجبدت و حطيتي راسك فوق صدري و عاودت ليك على خطيبتي و خليتك تحسي بالغيرة بلا مانقصد
ياسمين: داكشي فات ا غيث نتا ديك ساعة كنتي مازال كاتبغيها و انا ماكنتش فحياتك من قبل
غيث: فاس فكرت مزيان لقيت راسي ماكنتش كانبغيها جيست مولفها حيتاش هي مكانتش مسوقة ليا عكس لوخرات لي كايرميو راسهوم قدامي و كانت كتحدي انني نطيحها فيا و من بعد شوية بشوية حتى عرفت الجوهر ديالها و ولفتها فحياتي و فاش ماتت خلات فراغ حيتاش ربع سنين و انا معاها و جيتي نتي عمرتي الفراغ و خديتي قلبي معاك (تنهد) رجعي ليا قلبي راه بنضرة من عينك ولا مسجون
ياسمين: رجع ليا ديالي و نرجع ليك ديالك ا تيتيز بلادي
غيث: اااااي منيمتا ماسمعتها توحشتها (باسها)
ياسمين: انا توحشتك ... توحشت بسالتك توحشت هضرتك توحشت حماقك توحشت حلاوة هضرتك توحشت بوساتك توحشت نشوفك قدامي كاتضور و تلوح ليا كليمات و غميزات
غيث: اححح و تشوفي انا و لكن من دابا للقدام ماكاينين غير الايام السعيدة حتى تقولي اوف بغيت المشاكيل
ياسمين: انا بغيتك نتا كيفما كنتي و بغيت دوك جوج اقزام لي خليتي ليا
غيث: ههههه نقوليهوم يجيبوهوم ليك !
ياسمين: لا غير خليهوم مع ماما جوري غير هو بغيت حوايجي بقاو فالفيلا ... تمشي تجيبهوم ليا !
غيث: غير هوما لي بغيتي صافي !
ياسمين: لي برودوي عندي هنا خاصني غير مانلبس
غيث: (باسها) دابا نمشي نجيب لحبيبتي حوايج و لي شوميز دو نوي (غمزة)
ياسمين: سير سير خليني نوض ندوش
شدها من حناكها و عصر ليها شفافها لبرا و طار عليهوم بقبلة و ناض من حداها خرج باش يجيب ليها حواجيها و هي ناضت مشات لدوش حيدات الجنابة و توضات باش تصلي ... خرجات من دوش لابسة بينوار و لاوية على شعرها فوطة... نشفات ذاتها ... دهناتها بكريمات مرطبة و مغذية و جبدات دو بياس حمرين مع كسيوى بلا كمام قصيرة حد الفخاض فالغوج سامبل زوينة و واسعة ... نشفات شعرها بسيشوار و ناضت لبسات حوايج الصلاة و تقبلات و صلاة الصبح و العصر و سمعات دقان مجهد فالباب ... كملات صلاتها و ناضت باش تشوف شكون و هي لابسة العباية ... حلات لباب و بان ليها غيث معصب عينيه حمرين و خارجين مزير فمو و التشاش خارج من عينيه

ياسمين: دغيا رجعتي (ابتسامة)
دفع لباب بلا مايدوي معاها و حركاتو ماكاتبشرش بالخير ... سد لباب بجهد حتى تسمع صوتو مجهد و ياسمين تبدلو ملامحها بسرعة و كمشات جبهتها
ياسمين: مالك اش وقع !
بلا كلمة بلا جوج لاح تيلي ليها و لتاقطاتو و كاتشوفيه بتساؤل و قلبات تيلي لقات فيديو دخلات ليه لقات الإعلان لي صوراتو تلاح فباج ففيسبوك ... بدا قلبها كايضرب و عرفات راسها قفراتها تاني ... طلعات راسها شافت فيه ... حجبانو معقودين كايسوط عينيه خارجين من بلاصتهوم صدرو كايطلع و ينزل و مزير على فمو فارق رجليه و مربع يديه
ياسمين: (كاتبلع ريقها) غيث هادشي قبل مانتصالحو ياك ... مالقيتش موديل تدير الإعلان و صورتو انا سي تو بلا ماتقلق
غيث:(من تحت السنان) قراي لي كومونطير
هبطات راسها كاتفتف مشات لي كومونطير لقات الدراري كايتغزلو فيها
شاب1: وا هيا ناري ماكرهتش نشمك ا زيين
شاب2: و تا بربي حتشا هادي قوقة اش بغينا شي روسيات
شاب3: اجي عندي ا زين راه بيتك فوق صدري ليلة
شاب4: هادي هي بغمزة نطيح عشرة شوفو لعوينااات يا الناس رماديين تشك فيها واش مغربية
شاب5: ماكرهتش نكون من دوك لي تابعينك ا تيتيز
ماقدراتش تكمل حيتاش داكشي طويل و بدات كاترعد ... هزات راسها فغيث بأسى و باينة فيها الندامة ... قربات منو و هو كيف البركان يقدر فأي لحظة ينفاجر ... مابقا كايفصلها والو عليه قريبة ليه بزاف و هو كايشوف اش غادي تصنع ... حطات يديها على خدو و كاتشوف فيه بعينين ذابلين كأنها كاترجاه باش يسمح ليها
غيث:(بصراخ) اش هاد الخرا تاني واش انا ماغاديش نتهنا من هاد لمشاكيل ديولك ... تبرهيش هادا 😡😡
ياسمين: سمح ليا راه كنت باغة غير نجاكرك
غيث: اوا هانتي ! اش ستافدتي 😡 واش نتي باغة تصفيها ليا 😡😡 (كايسوط و بعد منها كايهضر غادي جاي) قلبي كايضرني حابس راسي بزز راه غادي نضربك شي ضربة حتى تدوخي (كايعبر بيديه)
ياسمين: وا صافي عافااك 
غيث: واش باغة الرجال يتبعوك ! ها ! اش هاد الإشهار الماسخ و كاتغمزي ! ماقلتيش بلي بااك يقدر يتعصب الى شافو مافكرتيش بلي راه طيحتي من قيمتك هين ! مافكرتيش ف اش غادي يقولو عليا ! غادي يقوليا ديوتي حيتاش مخلي مراتي تدير هاد الخرا
ياسمين:(كاتدمع) مافكرتش هاكداك
غيث: نتي اصلا ماكاتفكريش غير كاتديري صافي (ضرب يديه مع الحيط) هااااااا غادي تقتليني (ضرب برجليه فاز و تهسات) هادشي علاش خليتك فلول (جا حداها) على ود هاد الطيش ديالك واش و تقولي واش تديري عقلك ماحدك كاتكبري و نتي كاتبرهشي
ياسمين: صافي عافاك مانعاودش (بصوت مخنوق)
غيث: هاكدا قلتي ليا قبل عاماين و هانتي عاودتي و لبارح مدخلة راجل لدار
ياسمين: (كاتقرب منو) صافي ا غيث ندير لي بغيتي واش نقوليهوم يمسحوه !
غيث: ديجا هضرت معاهوم و راه كايتمسح مانتسناكش حتى تبغي تمسحيه
ياسمين: و لكن راه عطيت فلوس على ود هاد الإشهار راه غادي تضرر شركتي
غيث: ها لخرا تاني .... وا جي عندي ا زمرة قوليها ليا ديك ساعة و نعطيك لي بغيتي
ياسمين: (قربات ليه) صافي (كاتدمع) يالاه تصالحنا بلا مانوضوها تاني
غيث: (قلب وجهو كايسوط) انا راه ماكاندير والو كولشي منك و من عقلك لعوج
ياسمين:(كاتمسح دموعها) وا صافي عافاك عرفت لفوط ديالي مانعاودش
غيث: نفس الهضرة كل خطرة و كاتعاودي (مشا لصالون جلس شد راسو بين يديه)
ياسمين: (جات حداه) عارفة راسي كاندير شي تصرفات ديال لعصا ونتا ماتستاهلش
غيث: (شاف فيها) عارفاها بعدا واش كايعجبك تعصبيني و تشوفيني كانغوت ! شي نهار غادي تسكتي ليا قلبي و لا يشدني شي كريز
ياسمين: الله ينجيك (حطات يديها على صدرو) ماغانبقا ندير حتى حاجة حتى نتشاور معاك
غيث: لي جوغنو راه كتبو علينا تفضحنا بالبيان
ياسمين: مادرنا حتى حاجة حرام ا غيث
غيث: صورتي انا تمسات ... ماعمرهوم ماجبدو كنية راييس فشي حاجة ولا لقاو منين يشدونا حتال دابا
ياسمين: مانتسوقوش غادي يبغيو تصريح و مانعطيوهش ليهوم مع لوقت غادي ينساو
غيث: (كايحك جبهتو) يطلعو ليا لخرا غادي نحبس عليهوم البيترول و انا لي شاد السوق حاليا ماعندهوم منين يجيبوه كولشي مغليي الثمن
ياسمين: (كاترطب) داكشي علاش مسميينك امبراطور البيترول
غيث:(طلع حواجبو ) باغة تلفيني ! راه و الله مانسا و غادي تخلصي هادشي لي درتي

ياسمين: (لصقات فيه) وينو على زين ديالي كايكون زوين فاش كايتقلق
غيث:(طلع حاجب هبط لوخر) كاتضحكي عليا كاتشوفيني غادي نتفركع و كاتقولي ليا كاتكون زوين
ياسمين:(حيدات لعباية و الفولار و بقات بلاغوب) و مالي كدبت ههههه كاتكون حرش
غيث:(طلعها و هبطها) همم حرش? هي نقلب سيستيم و نولي خايب
ياسمين:(كاتدوز يديها على وجهو) لا لا حتى غيوش الضريف بغيتو ... اصلا انا كانبغيك كيفما كنتي
بالخف دوز يديه وحدة مور ضهرها التانية تحت رجلها و هزها حطها فحجرو و كايدوز يديه مور ضهرها و هي مدورة يديها على عنقو
غيث: (جبد الخاتم من جيبو) هادا باقة تحيديه اقسم بالله حتى نخشيه فصبع وحداخرا (لبسو ليها)
ياسمين: تديرها نقتلك 😡 اصلا ماتقدرش نتا كاتبغيني
غيث: تجربي (بتحدي)
ياسمين: نقتلك 😡
غيث: نتي طحت ليك على لكود ديالك ههههههه تخافي و ماتحشمي كاتديري الزبايل قد راسك و تجي تمسكني
ياسمين:(بتحلوين) عادي بب اصلا الا ماتمسكنت عليك علامن نتمسكن
غيث: احياني عليك ... راه غاتخلصي هادشي لي درتي غير صبري
ياسمين: ياك واخا (كاتلعب فلحيتو)
غيث: زيانيتي يا لعفريتة و ربيتي اللحم
ياسمين: هههههه 😄
غيث: مزيان فاش درتي هاكدا ... شعلت انا و بردتي نتي ماشي بحاال فاش كاتشعلي و كانشعل راه غانوضوها .... دغيا بردت و بلا مانضربك
ياسمين: راه بغيت نخرج سالكة بعضامي صحاح باراكة غير العلامة لي خليتي ليا فوجهي وليت نخاف منك و نتا يدك قد البالة
غيث: كاتسبي عاين باين و الله يا والديك يا حتى نعاود ليك الترابي
ياسمين: و انا غادي نفورماطيك و نعاودك من لول و جديد
غيث: هههههههه بقاي تحلمي .... غاتبقاي هنا !
ياسمين: فين نمشيو (كاتمسكن)
غيث:عند عائلتي ماتوحشتيش ولادك هم ! و الحاجة لي مسكينة مريضة
ياسمين: واخا نمشيو نشوفوهم (ناضت و بقا غيث شادها من خصرها)
غيث: بهاد اللبسة (طلع صبعو و هبطو)
ياسمين: و مالها عادي
غيث:(قلب وجهو كايسوط و رجع شاف فيها) صدرك عريان رجليك عريانين فخاضك باينين هادشي كولو و عادي !!
ياسمين: ديما كانلبس هاكدا و ماكاتقول والو
غيث: لا ا لالة ماكاتلبسيش هادشي فالزنقة و ماعمرني خليتك تخرجي هاكدا مازال حد الركبة شوية وا شوفي غير رجليك شحال عريانين كولك مفضوحة انا و خليتيني ن**م عليك و الناس الى شافوك اش غايطرا فيهوم ! مابغيتش مراتي يتمنضرو فيها الناس بغيت نشوفك غير انا بوحدي فهمتي انا راجل مغيار بزايد نتي ديالي بوحدي
ياسمين: (ابتسامة) واخا صافي مايكون غير خاطرك مي اش نلبس عندي غير اللبس المفضوح هنايا حوايجي لمستورين فالفيلا
غيث: لبسي ديك لي لبستي لبارح سروال و شوميز واخا السروال مزير عليك بزاف بحال الا كاع مالابساهش
ياسمين: حطيتهوم يتصبنو
غيث: لبسي شي حاجة وحداخرا (كايشوف فجنابو) هاكي العباية لبسيها حتى نمشيو للفيلا و سيري عريانة كاع نتي
ياسمين: (تحنات عندو و وجهها حدا وجهو) واخا شي حاجة وحداخرا
غيث: صافي غير هادشي (باسها)
ياسمين: (شدات ليه يديه) اش واشم هنايا
غيث: هاكي شوفي
عطاها يديه فالرسغ ديالو كاين وشام صغير فيه كتبة قلباتو و بدات كاتفرنس عجبها الحال و خدودها حمارو
غيث: عجبك !
ياسمين: واشم سميتي و مابغيتش يعجبني بطبيعة الحال جا زوين ... ايمتا درتيه !
غيث: فاش مشيت لدبي درتو
تقادت فالوقفة و هزات العباية كاتلبس فيها تحت انظار غيث لي بغا ياكلها بعينيه واخا كاتدير فيه الزبايل و المصايب الكحلة الا انه كايبقا كايبغيها و القلب ماكايشاورش و ماكايفرقش مابين مزيان و خايب و دغيا كايسمح ليها و فاش كايشوف دموعها كايضعف قدامها و قلبو كايتزير عليه ماكايبغيهاش تبكي ... لبسات العباية و خلات شعرها مطلوق و لبسات صباط اسود بلا سامبل ... خلات وجهها خالي من المكياج ... هزات تيلي ديالها و خرجو من الدار مشادين ليدين و هبطو فلاسانسور حتى تحطو فأسفل العمارة و بدا تيلي ديالها كايصوني شافت لقاتو سامي و جاوبات بسرعة
سامي: الو ياسمين
ياسمين: كيف بقيتي شوية !
سامي: ايه منيح الحمد لله ، الإعلان انمحى و القنوات بدون يااه
ياسمين: (ركبات فطوموبيل) يمشيو يخراو جيب شي موديل تصورو و عطيه ليهوم ... راه تشرا لياةموسكيل بسبابو (شافت فغيث و لقاتو كايشوف فيها بنص عين دار امارش)
سامي: بس المصاري
ياسمين: ماتخافش الفلوس لي خسرنا غادي يرجعو ... انا ماغاديش نجي ليوم كولشي يمشي كيف العادة حتى حاجة ماتخرج بلا ماتشاورو معايا
سامي: مثل مابدك بخاطرك هالا (قطع)
غيث: (يد سايق بيها و يد شاد بيها يد ياسمين) مالو هاد خينا ماغاديش يبعد منك
ياسمين: راه خدمة هادي ا غيث و هانتا سمعتي كنا كاندويو غير على لخدمة صافي حبسني نتا كاع و هني راسك
غيث: نقدر نديرها اصلا غير غاتبرا الحاجة شوية و غانمشيو كلنا لدبي
ياسمين: كيفاااش و الشركة ديالي 😨
غيث: قابليها من بعيد كيفما داير انا غير باغ تيليفون
ياسمين: نتا راه قديم فهاد دومين و الشركات ديولك واقفين على الصح ماشي بحالي يالاه بادية راه باقي مادرتش شي انجاز نيت
غيث: وليتي خامس اقوى امرأة فالعالم و كاتدوي 
ياسمين: واخا هاكداك (كايصوني تيلي) شكون هادا .... الو
....: مدام ياسمين
ياسمين: وي علاش 
....: حنا من شركة الإعلانات شفنا الإشهار ديااك و ماكرهناش تجي باش ندويو عجبنا بزاف
ياسمين: نو شكرا مابغيتش (قطعات)
غيث: شكون !
ياسمين: شركة ديال شي اعلانات
غيث: (قلب عينيه و وجهو كايسوط) ها لي مابغيناش 

ياسمين: مالك تاني !
غيث: غايبقاو يعيطو و يتعنبو ! اصلا منين جاتهوم نمرتك
ياسمين: (عوجات فمها و قلبات عينيها) منين غانعرف انا
غيث: عاجبك وجهك هاكداك مالك مادرقيته بشي حاجة
ياسمين: بغيتك تبقا كاتشوف فيه باش تعرف اش درتي
غيث: اوفففف (زير ليها على يديها)
بقا سايق حتى وصل للفيلا و دخل مع لباب الكبير و بلاصة لوطو و هبط ، حلات ياسمين لباب و جا عندها غيث شد ليها فيديها و تاجوه للباب لكبير لقاه مردود دفعو و دخلو بجوج مالقاو حد لتحت من غير الخادمات لي كاينضفو ، طلعو للفوق و يديهوم مشبوكين مشاو لبيت إيلينا ، دخلو مالقاو حد
غيث: (طلع حواجبو) فين مشاو هادو
ياسمين: ماعرفتش زيد نسولو شي خدامة
خرجو من لبيت باينت ليهوم خادمة كاتنضف المنحوتات
غيث: بست ... فين مشاو !
خادمة: كولشي جالس فالجردة
ياسمين: ميغسي
هبطو مع الدروج و اتاجهو للباب الخلفي خرجو معاه و لقاو راسهوم فجردة كبيرة و كولشي خضر ... الشجر كاين كتير مضلل الدنيا بانو ليهوم جالسين تحت شجرة و اتاجهو عندهوم ... دايرين فوطويات جالسين فوقهوم و الدراري مفرشين ليهوم فالأرض كايلعبو ... وقفو عليهوم و ضورو وجاههوم شافوهوم
جوري: تصالحتو !
غيث: الا بغيتي
جوري: اوا على سلامتكوم كنا شحال هادي خاصنا نلاقيوكوم
ليث: علاش اصلا حنا فين شفنا شي غيث ياك غبر غبرة وحدة كايعيط غير فتيلي و مازال مرة مرة
قمر: (غمزات ياسمين) اجي جلسي حدايا
غيث: لا لا غير خليها حدايا ... الحاجة كيف بقيتي شوية (باس ليها راسها)
إلينا: شوية اولدي و صافي اوا الحمد لله فاش درتو عقلكوم 
غيث: (جلس حداها و جلس حداه ياسمين شاد ليوا فيديها) فيها خير ا الحاجة
شهاب: الصممممت (داير رجل فوق رجل و كايسمع الهضرة و كايوزنها و جوري حداه ضور يديه عليها)
ياسمين: أنيس ماتوحشتيش ماما
أنيس : ماسي دابا بع مني (ماشي دابا بعدي مني)
جالس أنيس فوق زربية و حداه بنيتة شعرها كحل طويل دايرة ليه gرينات لابسة ليبة بيضة مع صاية جينز و تيشورت غوز عويناتها كحلين و كبار بيضة و خدودها موردين فنيونة و أناييس جالسة فالطرف كاتلعب بوحدها و مرة مرة كاتشوف ف أنيس كايلعب مع لبينتة و كاتلقب وجهها
ياسمين: شوق اجي عندي .... تبارك الله فنيونة حسن من التصاور
سمعات شوق سميتها و ناضت كاتمشا كيف لبطريق جات عند ياسمين و هزاتها هاد الأخيرة حطاتها فوق رجليها كاتداعبها
ياسمين: وينو على زوينة ديالي ... قمر هادي غير تسخرتي فيها ليث محطوط
قمر: راه عارفة مفاهم معاها كتر مني و عزيز عليها مقطر ليها من عينها
ياسمين: شحال عندها دابا
قمر: فشهر 12 غاتكمل عاماين .... مابيناتهاش و بين توينز مدة كبيرة مفاوتين بالشهورة كاملين ولاد عام واحد
ياسمين: هممم فينهوم سنينات وريني السنينات
ليث: عنداك راه كاتعض
هزات ياسمين راسها كاتسمع لليث و حلات شوق فمها باش تعض ياسمين فحنكها و لقا ليها غيث يديه و قاصتو فكفو بفمها
ليث: ها لي قلنا هههههه عندك الزهر كان لحنك غايطير ليك
قمر: (ناضت) لا شوق 😡 علاش تعضي خالتي (وقفات عليها كاتخاصم) كون عضيتيها اش غادي تدير فحنكها (شافت حنك ياسمين) ويلي مال حنكك 😨
ياسمين: والو غير تضربت فيه ماشي شي حاجة
قمر: (شافت فغيث) احياااني بالة هاديك ماشي يد
شوق: اهههههئئئئئئ اههههئئئئئ اههههئئ 😭😭😭😭
ياسمين: (شافت فشوق) ويلي مال هادي
قمر: مارضاتش نخاصم عليها
شوق: بابي 😭😭😭 بابي اهههههئئئئ اههئئئهههههئئئهههئ
هبطات و مشات كاتجري كيف لبطريق لعند ليث لي استقبلها بيديه و عنقها
ليث: صافي ا بنتي ماتبكيش صافي ششش
جوري: هههههه عشنا و شفنا ليث كايراري بالولاد
قمر: (جلسات حدا ليث) اوا ليث و بنتو محاميين عليا
سمعات شوق صوت قمر و ضارت بوجهها الأحمر و اادموع معمرين وجهها و شداتها من شعرها نتفاتها
شوق: عنننننننعععنننننننن 😭😭
قمر: اييي (كاتجر راسها) وا عتقني
ليث: شوق لا هداي (كايفكها) ماما هادي لااا
فكها بالكشايف و صعرات شوق و بدات كاتركل ليه حتى حطها فالأرض كاتعصر ماعجبهاش الحال يفك قمر و مشات جلسات حدا أنيس معصبة و دغيا نغامسات معاه فاللعب و جمعات لبكا و التنخصيص ... شافتها أناييس رجعات و ناضت لابسة شورط فالغوز فيه لولو كاتي مع ديباردور ديالو و صبرديلة غوز و الكوش معمرين الشورط و كاتمشا حتى هي كيف لبطريق ... وصلات حدا شوق و هي تجرها من واحد الgرن

يتبع