صورة مصغرة لـعذابي الجزء التاسع

عذابي الجزء التاسع

tas3 3adabi 
رواية عذابي لنهى مر

بقاو جالسين مدة من الزمن حتا سمعو صوت الطوموبيلات برا و هبطات سعيدة فأبهى حلة عاجبها راسها و معلياه للفوق، حلات الخادمة لباب و دخلات جوري مبتاسمة لابسة غوب سواغي فالأحمر طويلة فيها فتحة من الرجل طويلة شوية و بلا كمام عازلة صدرها و كايبان واقف مشدود و مزيرة عليها من اللور كاتبان مؤخرتها بارزة و لايحة عليها كاب أسود رطب مغطي كتافها من على لبرد و لابسة فرجليها صندالة سودااء عالية بصميطات و ضفارها مصبوغين بالأسود و طالقة شعرها دايرة ليه بوكلي من لتحت و لابسة الطقم لي كان جاب ليها شهاب فزواجهوم و شاد فيها شهاب و لابس كومبلي فالبلو مارين مع قميجة بيضاء و شعرو الأبيض زادو جمالية و إثارة، داير فيديه ساعة طخي شيك كادو من عند جوري و مرجع شعرو اللور و لابس صباط بلو مارين لامع، دخلو بجوج و تبعهوم غيث لابس سروال أسود و قميجة بيضة لاصقة على جسمو و برزات عضلاتو و لابس جيلي أسود مزير عليه جتا هو و زادو جمالية و هاز لفيستة فيديه و مرجع شعرو اللور و ريحتو عاطية و كاتشم على بعد كيلومترات و سنسلة ديال النقرة مزينة عنقو كاتطل من تحت القميجة لي حال ليها الصديفات الفوقانيين، لابس فرجليه تقاشر بيضين مع صباط أسود مقمقم من القدام، داير يديه فجيبو و داخل بشوية خليه و مولااه جوج من لي كارد هازين الورد و لي كادو.
تقدمات سعيدة و ناض توفيق و سليم و سلمو على الضيوف و رحبو بيهوم و هوما يدخلو جلسو فالصالون 
سعيدة: مرحبا و الف مرحبا
شهاب: كيفما كاتشوفو هضرتنا معكلة شوية بالعربية ندويو بلونجلي أحسن باش نتفاهمو مزيان
توفيق: جي عندي نزيد ليك السوايع فالدارجة
شهاب: ههههه ايييه ربي يخليك
جوري: فينها ياسمين!
سعيدة: هاهيا شوية و تجي
سليم: غيث صافا
غيث: بيخيير من ايمتا و نتا هنا!
سليم: جيت قبيلة مع عمي توفيق باش نحضر معاكوم
غيث: اوك
بقا غيث جالس داير رجل فوق رجل و كايفيبري بيها باف غي يشوف ياسمين و حداه شهاب مجمع مع توفيق لي مقابل معاه و حداه جوري كاتهضر مع سعيدة لي مقابلة معاها و سليم مقابل مع غيث، فهاد الأثناء هبطات ياسمين من الدروج بكل أنوثة و هازة راسها و هي حاطة يديها على دارابزون ديال الدروج حتا وصلات للتحت و هي تمشي باتجاه الصالون وهي تدخل و قلبها غايطير من لفرحة و حناكها مزنكين و متوترة، غير دخلات كاع الأعين توجهو ليها و كايشوفو فيها بإعجاب و غيث ماقدرش يخفي اعجابو بيها فالبلدي و يالاه بغا ينوض و شدو شهاب و هو يهمس فودنيه
شهاب: جلس لأرض لاتصدق بايسها قدام عائلتها
دخلا ياسمين سلمات على جوري بلابيز و سلمات على شهاب باليدين و سلمات على غيث باليدين و هي حابسة الضحكة و هو ماكرهش يطير عليها غير حابس راسو، عطاتو بالضهر و مشات جلسات حدا سليم و هو يتقرص حيتاش كايصحاب ليه بلي هي غاتجلس حداه و هو يعقد حجبانو بسرعة و حس بالغيرة شاعلة فيه
شهاب: سي توفيق راك عارف لاش جينا، ولدنا و بنتكوم بغاو بعضياتهوم و تزوجو و حنا ماعلينا غير نباركو ليهوم و نفرحو بيهوم و داكشي علاش جينا ليوم باش نتافقو على العرس و الصداق
توفيق: الصداق شوف هي اش بغات و بالنسبة للعرس كانضن من الأحسن نخليو داكشي للعيالات هوما لي غادي يفهمو فهادشي أكثر
سعيدة: انا و مدام جوري غادي نتافقو على العرس، بف غيت نسولك ا ولدي واش نتا ساكن هنا ! يعني واش غادي تستاقرو هنا من بعد العرس
غيث: لا انا سكن فدبي و عائلتي فالبرازيل جينا هنا غير على حساب شي حاجة و غادي نرجعو فحالنا و من بعد العرس مباشرة غادي نمشيو لدبي
سعيدة: بعيدة اولدي بزاف و غادي تبعد عليا بنتي
غيث:وقتما توحشتوها ولا توحشاتكوم تمشي عندكوم ولا تجيو عندها ماعنديش موشكيل
سليم: (بهمس فودن ياسمين) هادا ناوي يغبرك علينا يا لمسخوطة
ياسمين: (بهمس) غير خليها على الله انا كاع مافخباري بلي غايديني لدبي
لاحظ غيث الوشوشة لي بين ياسمينة و سليم و هو يزيد يصعر غير كايرض الحر لراسو و كايكالمي و حجبانو عاقدهوم
شهاب:(شاف فياسمين) اشنو بغيتي ا بنتي فصداقك
ياسمين: انا الحمد لله ماخاصني والو اي حاجة بغيتها كاينة و بغيت حاجة وحدة من غيث الى كان فري كايبغيني راه غايديرها
غيث: و شناهيا!
ياسمين: بغيتك تحفظ سورة البقرة و سورة آل عمران و تعرضهوم عليا
غيث: كواااا!
شهاب: أحسن حاجة تطلبيها أ بنتي، غيث هادشي لي طلبات من لبنت راه حاجة قليلة و كبيرة عند ربي و راه كاتعرف للعربية و يعني ماعندكش موشكيل ديال اللغة
تحرج غيث قدام عائلة ياسمين و اضطر يوافق و هو يشوف سليم و ياسمين كايتغامزو و يضحكو و كايزيد يتشوا

وجد العشا و تحط فوق السفرة و جات كبيرة الخدم قالت لسعيدة
سعيدة: لعشا تحط،نتعشاو و نكملو هضرتنا
جوري: حتا هذا نظر
ناضت جوري و شهاب و سعيدة و توفيق و سليم،سبقو شوية بخطوات و ناضت ياسمين كاتفرنس و هي تحس بيد غيث شداتها و زيرات عليها و هي تضور شافتو كايخنزر فيها كون نضراتو كايخرج منهم القرطاس كون قتلها
غيث: غادي تجلسي حدايا فالعشا و فاش نساليو العشا غاتبقاي حدا حتا نرجعو لفيلا تزيدي حرف ولا تديري شي حاجة ماشي تال لهيه غاي نعرعر ليك هنا و اجااا مايحبسني هاني دويت
ساط فيها و داز خلاها مصدومة ماعارفة ماتقدم ولا توخر و ماعارفاش لاش معصب عليها هاكداك،تبعاتو بخطوات بطيئة حتا شافتو فين جلس بجانب شهاب مباشرة و هي تجلس حداه و توفيق جالس فالراس ديال الطبلة و حداه سعيدة و سعيدة حداها سليم لي كان كايتسنا ياسمين تجلس حداه و لكن خاب أملو فاش ماجلساتش،جلسات جوري حدا شهاب بجانب توفيق من الجهة الثانية و جات مقابلة مع سعيدة و بقاو كايهضرو دغيا تافقو حيتاش حتا سعيدة مرا قارية و مثقفة و عندها فاش تدوي و تحاور.
داز العشا عادي عندهوم اما ياسمين فمتوترة و كاتشوف فغيث بنص عين و هو باقي عاقد حجبانو و كاياكل غير بزز،كملو عشاهوم و حطو ليهوم الديسير لي كان عبارة عن حلوى،ناضو على الطبلة و رجعو جلسو فالصالون و ياسمين بقات حدا غيث ماتفارقاتش معاه،جاو الخدم عطاوهوم قهوة و بقاو كايتحاورو و كل واحد هاز قهوتو كايشربها و غيث باقي كاعي و مرة مرة كايخنزر فسليم و كايجاوب غير ب اه ولا لا.سالات الليلة و ناضو باش يتوادعو مع عائلة ياسمين
شهاب:اوا بيناتنا تيليفون و راه دابا ولينا عائلة وحدة
توفيق:ههههه وي سي شهاب اوا الله يجعل كولشي مبارك و مسعود
جوري:بيناتنا تيليفون مدام سعيدة
سعيدة:بلا مدام هههه كاتحسسيني بلي انا شارفة
جوري:لا بالعكس كاين ماباينة فيك،كاتمشي لاصال!
سعيدة:وي عندنا لاصال هنا و مواضبة على الرياضة و حتا نتي تبارك الله كاع ماباينة فيك والدة جوج
جوري:السبور و الاكل الصحي هوما السبب
شهاب:جوري تعطلنا خاصنا نمشيو
جوري:وي ههههه دوزي غدا عندي ولا نجي عندك باش نهضرو مع التريتور و النكافات و نشوفو شي وحدين مزيانين
سعيدة:صافي غدا نتلاقاو
غيث:يالاه ا ياسمين نسبقوهوم،أمسية سعيدة
سعيدة:غاتمشي معاك 😨
توفيق:(نغز سعيدة) غير سيرو ا وليداتي
سبق غيث و ياسمين من بعد ماسلمو على كولشي و ماخلاش ليها غيث حتا الفرصة باش تسلم على سليم و ركبو فلوطو و ديماراو و خلا عائلتو مازال كاتهضر

سكتات ياسمين و ماقلت حرف و هي كاتشوفو كايتغدد و عروق يجيه بانو فيديه لبيضة و هو كايسوق بيها و باليد الثانية كايحل الصدايف ديال جيلي و كايدوز يديه على عنقو بعصبية و غير كايسوط، وصلو للفيلا ديالهوم و بلاصة لوطو فبلاصتها و هبط و زدح لباب و عينيه خارج منهوم الغضب و هي ماعرفاتش ماتدير، هبطات من لوطو بشوية و بصبعانها هزات القفطان و بقات غاجة و كاتبلع فريقها حتا وصلات للباب و دخلات و مالقاتوش لتحت بف غات تعيط بسميتو باش تشوف فين كاين مي خافت من شي ضربة من عندو و هي ماعمرها ماشافت الغضب منو حيتاش ديما كان كايتحكم فراسو باش مايخلعهاش و لكن دابا خلعها حتا سميتو مابقاتش باغة تقولها خوفا من انه يخرج ليها من شي قنت و ماكاين لي يفكها، طلعات فالدروج بشويةو صوت الطالون كايتسمع مجهد حتا وصلات لبيتها لقاتو خاوي و مافيهش غيث، دخلات للبيت و سدات لباب و حيدات القفطان و لبسات شوميز دو نوي فالموف من الساتان رطب و زوين قصير حد الفغاض، نضفات وجهها و دارت كريماتها و خرجات كاتقلب عليه دخلا لكاع لبيوت و مالقاتوش حتا وصلات لآخر بيت و لقاتو جالس فالبالكون كايكمي و لابس شورط حد الركبة بلو مارين و تيشورت كحل لاصق عليه و حجبانو معقودين و فوق الطبلة كاينة طفاية عامرة برماد الكارو و كاس و قرعة من لبوربن الثقيل (نوع من الشراب) و كايشوف فالسما، تقدمات جيهتو بخطوات بطيئة و هو سمع لباب تحل و غير من ريحتها عرفها بلا مايضور عندها و خلاها و هو جالس داير رجل فوق رجل و كايفيبري بيها، تشجعات ياسمينة و كبرات خطواتها حتا وصلات حداه و هي تحيد ليه لكارو من يديه و طفاتو فالطفاية
ياسمين: هذا مضر لصحة مابغيتكش تكمي
بلا مايسوق ليها هز كارو وحداخور و شعلو و بدا كايكمي فيه و كايشرب من لكاس كأنها ماكايناش، بنفاذ صبر جات موراه و حطات يديها على كتافو و بقات كاتماصي ليه من فوق تيشورت و هي تهبط راسها حدا ودنيه و تبعها شعرها و تلاح على جنبها و هي تدوز يديها لصدرو وي تهمس
ياسمين: مال حبيبي مقلق واش درت شي حاجة ماعجباتوش
ماجاوبهاش و مادار حتى رد فعل الشيء لي خلاها تتقلق و هو يدير نترة وحدة فالكارو و ساطو فالهوا و هز لكاي شرب داكشي لي بقا فيه و ناض، اضطرت هي تحيد يديها و توقف مقادة و هي كاتشوف فيه كايقاد المخاد ديال لفراش باش ينعس، طفا الضو بالتيليكوموند و حيد تيشورت و بانو عضلات صدرو المشدودين و تخشا فالفراش و نعس على كرشو و سرح يديه فالفراش و غمض عينيه و هي بقات واقفة فالظلام بوحدها، حسات بالبكية شاداها و جلسات فالفوطوي لي فالبالكون و لبرد كايضرب فيها و هي لابسة داكشي و هي تهز لقلاعة و خوات ليها كاس و بدات كاتشرب حتا حسات بيه ناض و هز لقرعة و حيد ليها لكاس من يديها و خباهوم و رجع لبلاصتو و تخشا فيها و بقات هي كاتشوف فيه من بلاصتها و حابسة البكية بقا فيها لحال على هاد البرود لي كايتعامل معاها بيه، بقات جالسة و لبرد كايسوط فيها حتا داتها عينها و نعسات فوق الفوطوي و بلا ماتحس هزها غيث و داها لبيتها و هي تبان ليه دمعة من عينها هبطات ، حطها ففراشها و مسح ليها الدمعة و هو يسمعها كاتهدرز و كاتهضر
ياسمين: اممننن... غيث نمماممم
غيث: ششششش حبيبة انا حداك
ياسمين: غيث... ماتخلينيش
غيث: فين غانخليك الله يهديك 
ياسمين: بعد مني مننننن غيث (تقلبات الجيهة الثانية)
غيث: هاهوا بعد منك (ناض) مضاربة معايا حتا فالأحلام
طفا الضو و هو يتخشا حداها و هي ناعسة و بقا كايلعب ليها بشعرها بعد ماتكالما حتا داتو عينو و نعس

فاق غيث فالصباح بكري و لقا ياسمين مخشية فصدرو و شعرها مسرح موراها و حالة فمها و رجليها وسط رجلي، دار ابتسامة خفيفة و كايشوف من وسط رموشو و هو يحيد يحيد خصلة من شعرها كانت مليوحة على وجهها و باسها فجبهتها و ناض بشوية بلا مايفيقها و هو يتكسل و سرح يديه حتا الحد ديالهوم و هو يتمشا كايجر رجليه بشوية و هو يدخل لدوش طلق لما و حيد الشورط و البوكسر و تخشا تحت الرشاشة و بقا لما كايتكب عليه من لفوق و هو مغمض عينيه كايخمم حتا حس براسو رتاح شوية و هو يدوش و خرج من الدوش لاوي عليه فوطة من لتحت و شعرو كايقطر من لما و كايهبط فوق صدرو المنحوت، تقابل مع لماريو و هو يشوف حوايج ياسمين مستفين حدا ديولو و هو يبتاسم و هو يهز سروال جينز مغلوق مع تريكو كم فالبلو مارين سامبل، لبس هادشي و هز صمطة كحلة دارها لسروال و خلا فرجليه كلاكيطة و حاط فوطة فوق كتافو كايمسح بيها شعرو، هبط للتحت وجد لفطور و جلس كايفطر بوحدو و خلا لفطور لياسمين و هز تيلي ديالو و دار لكيت و خرج.
توسطات الشمس السماء و الغيوم مخبياها و لبرد كايسوط فكولشي، فاقت ياسمين و لقات راسها فبيتها بوحدها و هي تشم ريحة غيث حداها فالفراش و عرفاتو نعس حداها و هي تنوض مبوقة بالنعاس كاتقلب عليه و شعرها واقف و مخربق بالنعاس، دارت فالفيلا كولها و مالقاتوش و هي تمشي للكوزينة لقات فيها لفطور محطوط من الصباح، طلعات لبيتها و غسلات وجهها و حكات سنانها و هبطات للتحت باش تفطر و بقات بشوميز دو نوي ديالها، جلسات و خوات عصير ديال البرتقال ليها و شرباتو كامل دقة وحدة و خوات كاس ديال لقهوة كحلة مع شوية ديال السكر و دارت توست مع لفورماج و بدات كاتاكل و هي تحس معدتها مقلوبة و كاتلعب و هي تنوض كاتجري لافابو و هي ترد كولشي كاع داكشي لي كلات و هي تغسل وجهها و ولات صفرة و السخفة باينة فيها حيتاش مسارنها خرجاتهوم
رجعات جلسات فالطبلة و حطات راسها فوق الطابلة حتا رتاحت شوية و ناضت جمعات داكشي و حطاتو فالجلاية و طلعات كاتجر رجليها و طلعات لبيتها فيها السخفة و تجبدات فوق فراشها، جا غيث و هو كايردد شي حاجة، ضرب طلة فالكوزينة لقات لماكلة ماكايناش فوق الطابلة و لماعن فالجلاية، خرجهوم حيتاش تغسلو و مالقاش لغدا و هو يطلع لبيتو لقاها مجبدة و وجهها صفر، ضارت شافت فيه بعيون ذابلة
ياسمين: غيث (كاترمش)
غيث: الصمت
مشا حداها و حط يديه على جبهتها مالقاش فيها السخانة و هي تشد يديه
ياسمين: مالك معايا ! واش درت شي حاجة ماعجباتكش (بصوت منخافض)
غيث:(بصرامة) واش كاتضرك شي حاجة!
ياسمين: فيا السخفة
غيث: فطرتي !
ياسمين: كاع داكشي لي كليت رضيتو (كاتشوف من بين رموشها)
ناض غيث جمع لوقفة دغيا و هز تيلي ديالو
غيث: جيبو ليا طبيبة دابا (بالغوات)
رجع جلس حداها و هي تشد ليه فيديه و شاحبة و سخفانة و هو كايدوز يديه بحنان على وجهها و فنفس لوقت باقي مكايهضرش معاها و مقلق منها

ياسمين: (بصوت تقيل) تيتيز بلادي مالك مقلق (حطات يديها على جبهتو) سرح هاد الحجبان
غيث:(سرح جبهتو) هاني سرحتها غير ترخاي نتي حتا تجي تشوفك طبيبة
ياسمين: ماغايكون فيا والو ، غير واقلة كليت شي حاجة ضراتني
غيث: الصمت
ياسمين: مال حبيبي مقلق مني اش درت ليك
غيث: اش درتي ! قولي اش مادرتيش، واش كاينة مرا مزوجة كاتخشا فراجل وحداخور كان باغيها لزواج و تبقا تضحك معاه و تهامس هي وياه قدام راجلها شنو انا مونيكة قدامك باربي ! الله يحفضك ا ياسمين خليني ماتجبديش داكشي لانصدق مهدم هاد لفيلا على راسك (سمع الدقان) دخل
تحل لباب و دخلات عليهوم طبيبة فالثلاتينات تقريبا لابسة لكلاص سروال توب واسع مع قميجة بيضة و مونطو و جامعة شعرها بقراسة و هازة صاك فيه المعدات ديولها
طبيبة: السلام مسيو راييس
غيث: (واقف فارق رجليه و مربع يديه و عاقد غوباشتو) شوفيها مالها فيها السخفة و داكشي لي كلاتو رضاتو
تحنات الطبيبة كاتقلب فياسمين و اول حاجة طاحت ليها فبالها هي الحمل حيت هادو هوما اعراضو و قلباتها تحت نضرات غيث و مرة مرة كايحك لحيتو بعصبية حتا وقفات الطبيبة و شبح ابتسامة على وجهها
طبيبة: مبروك مسيو راييس المدام حاملة
غيث: كواااا ! حاملة ! (طلع حواجبو)
ياسمين: حاملة 😨
غيث: بشحال حاملة
طبيبة: بشي اسبوع تقريبا و هاد الاعراض غادي يبقاو معاها مدة من الزمن و خاصها الراحة و ماتهزش التقيل و ماتحركش بزاف حتا يشد الحمل مكانو و يشد فراسو
غيث: حاملة ! (فرح) ميغسي دكتور سيري لاكيس و غادي يخلصوك
طبيبة: هادو دي فيتامين غادي يعاونوها شوية و مبروك مجددا
خرجات الطبيبة و بقا غيث و ياسمين و مشا جلس حداها و هي ماعجبهاش لحال
ياسمين: غادي ندير كورطاج
تصدم غيث و كاع ديك الفرحة غبرات من على وجهو و طلع حاجبو و بقا كايشوف فيها بغضب
غيث: شنوووو ! كورطااج ! نتي واقلة بغيتيني نقتلك منين جاك الحق تقتلي ولدي ولا بنتي ! و ماشي بعيد تآذي راسك واش حماقيتي تقتلي روح زرعها ربي فكرشك، الا ماباغاش دراري قوليها ليا باش ندوري لبروطيكس ولا تشربي حبوب ولا نديرو اي حاجة ماشي حتا حملتي عاد لا مابغيتوش
ياسمين:(كاتنخصص) انا بغيت نعيش حياتي مازال صغيرة على لولاد و صداع راس 😭😭 راه ماشي نتا لي غادي تترهل و تقابل الدراري راه انا
غيث: خايفة تغلاضي ! ها لواليدة كاتشوفيها دايرة كيف ملكة الجمال باينة عليها والدة جوج ! و بالنسبة لبيبي راه غاتكون مربية تعاونك و حياتك غادي تعيشيها عادي، خلاش مال لواليدة كانت طبيبة و مقابلة خدمتها و عندها انا و ليث جوج ماشي حتا واحد و مقابلانا و معاونينها المربيات و لكن اغلبية لوقت كاتدوزو معانا و عايشة حياتها و عاطية للواليد وقتو و عاطية لينا وقتنا و عاطية لراسها وقت و عاطية لخدمتها وقتها
ياسمين: و لكن 
غيث: (قاطعها) ما كاين لا و لكن لا والو تديري شي حاحة فراسك ولا فالبيبي ماغاديش نعقل عليك ا ياسمين انا باغي هاد لبيبي و باغيه منك غير قلت خليه حتا نديرو لعرس و نمشيو لدبي و نجبد هاد سيجي و لكن ربي بغاه من دابا و مرحبا بيه (مسح ليها دموعها) و راه باقي ماسحمتش ليك على داكشي لي درتي لبارح (ناض) انا غانجيب ليك خادمات باش يطيبو و ممرضة باش تقابلك و ماتنوضيش من فراشك سمعتي دكتور اش قالت خلي لبيبي يشد بلاصتو راه يالاه الأسبوع الأول
ياسمين: ماتقولهاش للافامي ماما غادي تتقلق خلي حتا نديرو لعرس و نقولها ليهوم 😔
غيث: واخا لي بغيتي، حيدي لفكرة ديال لكورطاج من بالك ولا غادي تخسري معايا ا ياسمين (خرج)

مشا غيث و خلاها كاتنخصص و تقلبات على كرشها كاتبكي ماباغاش تخسر حياتها و باغة تعيش حياتها هي لولا عاد تولد ماشي تبداها بالولادة و هي يالاه قالت بسم الله فزواجها مع غيث و فنفس لوقت مابغاتش تكعي غيث حيتاش عرفاتو مني تحلف عليها الا انه غادي يدير شي حاجة تندمها، بقات سخفانة و صفرة و متكية خاشية راسها وسط المخاد حتا طلع غيث و دخل للبيت هاز سينيا فيها لاسوب ديال الحوت و مع الديسير مقطع فزلافة
غيث: جاسمن نعستي !
ضارت عندو عينيها حمرين و منفوخين و نيفها حمر مزنك و رموشها فازكين بالدموع
غيث: (حط سينيا) مازال كاتبكي 😠
ياسمين: الصمت
جلس حداها و حجبانو معقودين و كايسوط معصب و حط سينيا فوق رجليه
غيث: جلسي باش تاكلي
ياسمين: مابغيتش
غيث: ماغانبقاش نعاود لهضرة
ياسمين: مافياش جوع
غيث: (غوت) نوضي تهزي تاكلي 😡😡
تخلات من نبرة صوتو العالية و هي تجلس قدامو و كاتقفقف بالخلعة حيتاش ماعمرها شافتو هاكداك عينيه غايخرجو من بلاصتهوم بالأعصاب و عينيه حمرين و عروق يجيه باينين و كايسب و يلعن و لكن ماكاتسمعوش كاتشوف غير شفافو كايتحركو، هز معلقة عمرها و حلات فمها بلا ماتهضر و خشاها ليها ففمها و شرباتها
ياسمين: انا غاناكل بوحدي
ماجاوبهاش و عمر المعلقة تاني و خشاها ليها ففمها و هي شعرها كاع مخربق و وجهها مابقاش بيض ولا صفر و شوميز دو نوي هابط الخيط ديالها من كتف و خلا شوية من صجرها يبان و مغطية بالكوفر لي و موراها مخدة رطبة و شابكة صبعانها كاتلعب بيهوم متوترة و خايفة و كاتاكل غير بزز، كملات لاسوب كلها و بدا كايعطيها ديسير مقطع بالفورشيط و هي كاتاكل بحال شي بنت صغيرة و كاتمسح الدموع بيديها و هو تدريجيا بدا كايهبط و مابقاش معصب كيف لول و لكن مازال عاقد حجبانو باش ماتدصرش عليه حيتاش مازال مقلق منها و تجمعو عليه لفلاش لي دارت مع سليم و زادتها بغات تدير كورطاج و هو عزاز عليه الدراري الصغار و ماكرهش يولد معاها فرقة ديال الكورة و فرحتو كانت كبيرة فاش عرفها حاملة و لكن كولشي تهدم فاش ذكرات لكورطاج، كان باغي يعنقها و يبوسها و يعطيها اي حاجة بغاتها و ينسا داكشي لي دارت مع سليم و لكن هي بكلمة وحدة خسرات كولشي و بلاصة مايفرح خلاتو يكعا.

كملات لماكلة و هو برد و مابقاش معصب و حتا هي تكالمات و حبسات من لبكا و يالاه بغا ينوض و هي تشدو من يديه و ضار شاف فيها و حط سينيا فوق الكوافوز لي حدا راسها و رجع جلس و هي تحدر راسها كاتلعب بصبعانها و شعرها هبط مع الجناب و تفكرات الحمل ديالها و بدات كاتبكي بصمت كاتسمع غير الشهقة ديالها حتا بقات فيه و هو يهز ليها راسها و شافيها و لقا وجهها حمر و العيون حمرين و الدموع غير هابطين و هو يطلع حواجبو و مسح ليها الدموع و تلاح على صدرو عنقاتو كاتبكي و كاتنخصص و فزكات ليه التريكو لي لابس
غيث: ششش باراكة من لبكا،راه ماطرا والو غادي تكبر لكريشة و غادي تحسي بيه كايتحرك وسط منك و غادي تغلاضي و غادي تزياني
ياسمين:(شافت فيه و هي كاتنخصص)غادي تبقا كاتبغيني واخا غليضة 😭
غيث:هههههه غادي نبقا كانبغيك و غادي نزيد نبغيك واخا تكوني خايبة و شعرك طايح و سنانك طايحين و عامرة تجاعيد
ياسمين:ههههه ماتضحكنيش خليني كانبكي
غيث:هههههه انا مابغيتكش تبكي(باسها فعينيها)
ياسمين:باقي مقلق على حساب لبارح
غيث:ياسمين بغيتيني نبقا معاك مزيان و ماتسمعيش صوتي عالي عليك ولا نتقلق منك فوتي عليك الرجال مانلقاش ريحة شي واحد حداك انا مغيار بزاااف و حاجتي ماكانبغي حد يشوفها عاد يقيسها ولا ياخودها راه نقتلو،حطي راسك بلاصتي نهار كولو و نتي بعيدة عليا و من بعد جيتي و لقيتيني كانتمازح مع روجينا اش غاتديري
ياسمين:(بأسى)غادي نتقلق
غيث:اوا داكشي لي طرا ليا تقلقت و مازال روجينا غير بنت لافامي و مابيني و بينها والو و سليم راه كايبغيك و كان غايتزوج بيك راه باقي لحد الآن كانلوم راسي حيتاش خليت ليه لفرصة فين يطلب منك الزواج،شنو دابا تافقنا !
ياسمين:وي مي حتا نتا
غيث:هههه ماتخافيش من جيهتي انا عندي حبيبة وحدة و خدات كولشي فيا و دابا حاملة بولدي ولا بنتي(حط يديه على كرشها) ماتصوريش ا حبيبة فرحتي قداش(شد وجهها بيديه) راه باغي لولاد منك ليوم قبل غدا(باسها)سمحي ليا قبيلة غوت عليك
ياسمين:سمح ليا نتا قلقتك مني لبارح
غيث:عندك زهر ماكانضربش العيالات اما كون تهرستي
ياسمين:ماعمرك ماضربتي شي وحدة!
غيث:نو جامي،ربانا لواليد على ان الراجل لي يضرب لمرا ماراجل ما تالعبة غير عندو عضو ذكري و صافي اما الرجولة ماكايسابهاش و كانعاقب انا بالتجاهل،كون ماكنتي مريضة و حاملة ماكنتش غادي ندوي معاك

ياسمين:(ربعات يديها مقلقة) ياااك كنتي غاتخليني بلاكة
غيث: غير واحد المدة حتا ننسا و نرجع نتصالح مع لقطيطة ديالي
ياسمين: هممم تيقتك، ياك نتا ماكاتشربش لاش لبارح هاز لقرعة و لكاس
غيث: ايييه فكرتيني بعدا كيفاش هازة لكاس و كاتشربي عندك الزهر اما و الله حتا نجفف بيك الأرض ا ياسمين الكارو لاا و الشراب لااا ماعنديش مرا تكون كيف الراجل و تسكر حتا هي نساي عليا دوك لي بواط و التزنديق
ياسمين: و نتا تسكر 😡
غيث: انا شربت لبارح غير حيتاش كنت معصب و خويت سمي فالكارو و الشراب باش مانكعاش عليك و ندير شي حاجة تمرضك
ياسمين: اوا دابا ماتبقاش تكمي خليك زوين
غيث: انا زوين !
ياسمين: اه زوين و بزاااف 😍
غيث:(نعس حداها) اش زوين فيا
ياسمين:(قربات منو و حطات يديها على وجهو) عندك حجبان زوينين غلاض و مقاديين و كحلين (حطات يديها عليهوم) اما عينيك واعريين كايحمقوني لونهوم خضر مايل شوبة لزروقية و مرمشين كتر من ديولي و كبار اما نويف هههه زوين و صغير و عاد فمك عندك سنينات بيضين مستفين و مقاديين و شفافك غوز زوينين حلوين فالبوسة (باستو) و اللحية (دوزات يجيها عليها) عندك زوينة هابطة تال لتحت و لقياس و مقادة و هاد لموسطاش كايعطيك واحد المنظر زوين واخا كايدقني فاش كانبوسك و ريحتك كاتحمقني زوينة بزاااف
غيث:(حاط يديه مور ضهرها و يد متكي عليها و داير نصف ابتسامة عاجبو لحال) و اش باقي 
ياسمين: عاد كتافك كبار و قاصحين و صدرك كايحمق عندك ليزابدو مقاديين و مستفين وحدة حدا وحدة ماكرهتش نبقا كانقيسهوم نهار كامل و عاد ضهرك واسع و قاصح و يديك مطبزين و حنان و فنفس الوقت قاصحين و ذراعك فاش كاتعصب كايخرجو العروق و كايبانو 😍 و عاد عندك شوية ديال الزغب شاد من السرة للتحت كايعجبني و نيت انا كايعجبني الصدر مايكونش مزغب جيتي على داكشي لي بغيت
غيث: هههههههههههه مازكلتي حتا حاجة !
ياسمين: و داك لي على بالي و بالك تبارك الله عليه 😉
غيث: ههههههههههه نتي بزاف و الله غادي ناكلك يا لمسخوطة (خشا راسو فعنقها) كاتهبليني يا لعفريتة
ياسمين: (بهمس فودنيه) كليتي !
غيث: فطرت فالصباح
ياسمين: انا نوض نوجد ليك شي حاجة
ناضت جلسات و هي تشدها الدوخة و رجعات تجبدات
غيث: غاتشربي الدوا و غادي ينقص هادشي و اهم حاجة ماتنوضيش من لفراش و لعرس حنا كاع نأجلوه
ياسمين: لا لا غير خليه انا صحة سلام
غيث: وا وليتي صفرة و كاتقولي صحة سلام

ياسمين: هييييييين 😭😭 حشومة عليك ماتأجلوش ياك انا مراتك مامات ولادك عافااااك غيث: هههههه مزوج بحمقة صافي ماغاديش نأجلو غير بقاي على خاطرك ياسمين: يا دابا مزيان 😌 (جمعات لبكية) غيث: اي اي على دموع التماسيح شلاهبية مع راسك ياسمين: ياك انا شلاهبية 😡 غيث: غير كانضحك معاك، كاتشدي فالكلمة 😒 ياسمين: (نعسات فوق صدرو) كانبغيك ا لحمق (بصوت خافت رقيق) غيث: كتر منك يا لمنتوفة (باسها فراسها) جيبي ليا لبيسي راه كاين فوق لفوطوي تما، نوضي غير بشوية بلا جهالة ياسمين: واخا 😋 ناضت بشوية و كاتعبر كل خطوة و وجهها مابقاش صفر كيف كان نقص داكشي و بدات ماتمشي الدوخة حيتاش كلات و غذات الجسم ديالها، هزات لبيسي و رجعات و عطاتو ليه و جلس هو دار موراه لمخاد و حط لبيسي فوق حجرو و جلسات حداه و جرها و ضور يديه عليها و شعل لبيسي قدامها و خرج ليه بلي خاضو لكود باش يحلو غيث: اش فنظرك داير لكود ديال لبيسي ياسمين: (شافت فيه) سميتك ولا سميت ماماك (ببراءة) غيث: ههههه اري يديك عطاتو يديها و شد صبعها و بدا كايكليكي على لي توش و هي متبعة معاه حتا كتبات سميتها و هي تشوف فيه غيث: داير هاد لكود فالبيسي و فتيلي و فأي حاجة داير ليها لكود و نتي بوحدك لي عارفاه بقات كاتشوفيه و هي عاجبها لحال و كاتنفخ ريشها و حسات بلي داير ليها قيمة فكولشي و داير ليها خاطرها و دايرها فوق راسو، شعل لبيسي و مشا لجوجل و بدا كايبحث على الاعراض لي كايجيو لحوامل و بدا كايقرا كل موضوع بوحدو حتا كايفهمو مزيان باش يعرف كيفاش يتعامل معاها و هي فينما كاتشوفو مركز كايقرا كاتخشا فيه أكثر حيتاش عرفاتو مهتم بيها بزاف و كايقرا على هادشي لي طاري فالجسم ديالها باش يعرف يتعامل معاها و هادا هو الشيء لي ماكايديروهش أغلبية الرجال ماكايعرفوش اش طاري فمراتو و كايتعامل معاه عادي بحال الا ماحاملاش و ماعارفش بلي الحمل مرحلة صعيبة و كاتكون فيها المرا حساسة و ابسط حاجة كاتبكي عليها و هرموناتها كايتبدلو، كمل غيث القراية و هو يشوف فياسمين لي لقاها ساهية فوجهو و مضورة يديها عليه غيث:همممم هي دابا نتي كاتشونجاي من لداخل، توحمي عليا باش يخرج ولدي بحالي عنداك تنفريني راه نشدك نلوحك من الشرجم ياسمين: كيفااش 😨 غيث: غير كانضحك معاك ، تفششي و تدللي كيف بغيتي لي بغيتيها غادي تحضر تال عندك و حتا انا الى بغيتي ماتشوفينيش و جاك لوحم خليا و نفرتيني قوليها ياسمين: لا لا (زادت عنقاتو) انا بغيتك نتا غيث: ههههه حتاا انا بغيتك و تشهيتك دابا (خشا راسو فعنقها كايبوسها و كايهرها) ياسمين: هههههه حتا انا تشهيتك غيث: (جا فوقها) كاتعجبيني بهاد التقصدير الى بغيتي شي حاجة كاتخرجي ليها ديريكت عكس شي بنات كايبقاو يحشمو من رجالاتهم ياسمين: اوا نتا راجلي لاش غانحشم منك غيث: exactement دخلو فدوامة من القبل كملوها بممراسة ما كملات حتا بدا الظلام كايطيح عاد ناض من عليها و هي عينيها مقلوبين و عريانة و فارقة رجليها و سخفانة و هو تجبد حداها كاينهج حيتاش وصلو لطوووب و خلاتو كاينهج غيث: ماعمرني ماوصلت لهاكدا (كاينهج) غادي تفضي معايا ياسمين:(سخفانة) نتا غادي تقتلني (سادة عينيها) سخفت بزاف غيث: (رجع السوفل) اوفففف على سلامة رجعت الجهد، حتا لهضرة ماقديت نهضرها(خشا راسو فعنقها و لصق جسدو معاها من لور) حبيبة ياكما نجيب ليك شي حاجة باش ترضي السوفل ياسمين: بغيت ننعس عييت غيث: (باسها) واخا انا غانخرج دابا راه تيلي حداك حتاجيتي شي حاجة عيطي عليا الا فقتي و راه لخدامات جاو الا بغيتي تاكلي غير وركي على لبوطون و غايطلعو عندك اوكي بب ياسمين:(سخفانة) اوكي

ناض غيث دخل دوش دوش بالخف و خرج و لبس سروال رمادي مع تيشورت كحل و كويرة كحلة و لبس سبرديلة فرجليه و نشف شعرو بالفوطة و هو يضور شاف ياسمين داخلة فسبات عميق و رجل فالشرق و رجل فالغرب و عريانة جا حداها غطاها و باس راسها و خرج، دازت ساعات و هي ناعسة حتا ناضت كاتكسل بعدما شبعات نعاس و حلات عينيها و بدات كاتحكهوم و هي تضربها ريحة غيث فنيفها و بدات كاتشوف من بين رموشها و لقات غيث مجبد حداها و خدام فالبيسي لابس غير لبوكسر و هو يشوفها بداك كاتحرك و ضار شاف فيها
غيث: فقتي يا النعاسة
ياسمين: خرجتي !
غيث: خرجت و رجعت و نتي مغيبة
ياسمين: شحال الساعة!
غيث: دابا (شاف البيسي) جوج و نص ديال ليل
ياسمين: اااي نعست بزااف
غيث: حيتاش عيتي بزاااف 😉
ياسمين: انت نمشي نغسل وجهي و نلبس شي حاجة باش نهبط ناكل
غيث: لماكلة حدايا غير اجي عندي نوكلك (حط لبيسي جيهة رجليه) اجي قربي حدايا ماغاتكليش ناعسة جلسي باش تاكلي
جلسات و هي عريانة حيتاش طاح ليها لكوفر لي و بقا صدرها مبندر قدامها و هي كاتكسل حتا شافتو و هي تهز لكوفر لي و غطاتو خايفة لايبدا شي ماتش تاني، بدا كايوكلها و كايداعبها حتا كملات و عطاها الدوا و شرباتو و هو يتجبد على ضهرو و نعسات فوق صدرو و كاتدوز يديها عليه و هو كايدوز يديه على ضهرها و كايماسيه ليه بحنان
ياسمين: فين مشيتي قبيلة!
غيث: مشيت عند لواليدة شفتها شوية و رجعت
ياسمين: بديتي لحفظ ولا باقي
غيث: احياني عليك نتي راه صعيبة شوية نحفضها حيتاش طواال
ياسمين: ماشي شغلي انا، شفتك نتا لا علاقة ليك بالدين
غيث: ماشي هاكداك ، لواليد كبرت لقيتو كايثلي هو و لواليدة و بديت الصلا فصغري مرة اه مرة لا حتا كبرت واخا كان كايزيرني عليها مي مرة مرة كانميك عليها و فاش مشيت لدبي صافي تشغلت الله يسمح ليا و مابقيتش حطيت جبهتي على الارض، و حتا لواليد و الواليدة شفتهوم ميكو على الصلاة مني جينا للمغرب
ياسمين:همممم لمهم من هادشي هو حفظهوم
غيث: على قبلك ندير اي حاجة و راه بديت كانحفظهوم
ياسمين: يالاه نعس باراكة من الصهير
خشا غيث راسو وسط صدرها و ضور يديه على خصرها و بقات كاتلعب ليه فشعرو حتا داه النعاس و بعد وقت قليل نعسات حتى هي

صبح الصباح و فاقت ياسمين بكري حيتاش شبعات نعاس و هي تلقا غيث باقي ناعس فوق صدرها و بعينين معمشين شافت فيه و عنقاتو و باستو فراسو و هو غارق فسابع نومة، هزات ليه راسو بشوية و حطات المخدة تحت راسو و هي تنوض عريانة ماتمشي بشوية و جسدها جذاب و جميل و صدرها كايتحرك معاها فينما مشات كايتهزهز و طرمتها كاتحرك معاها، دخلات لدوش برعات راسها بحمام ديال الكريمات و الزيوت و البرودويات المرطبة، خدات وقتها فالدوش حتا شرب جسمها الزيوت و زاد رطاب كتر ما هو رطب، خرجات لاوية عليها فوطة من الراس و لابسة بينوار و غير كاتفرنس و الحناك حومر و لقاتو فاق لبس شورط و جات الخادمة طرفات البيت و جمعات الروينة و قادات لفراش و حط غيث البيسي فوق لفراش و هي تخرج الخادمة و هو يجي عندها باسها
غيث: ناس صابحين على الروائح الزينين و الرطوبية نعام ا سي
ياسمين: اوا ضاروري ماندلل راسي فالدوش
غيث:دللي راسك و دلليني حتا انا (حط يديه على خصرها و جرها عندو) راه انا بحال ولدك
ياسمين: راك نتا ولدي ماشي غير بحال ولدي (باستو)
غيث: ماسخيتش بشفايفك (جبهتو على جهبتها و نيفو على نيفها) حلوين و رطبين
ياسمين: انا ماسخيتش بيك كاملك و لكن باراكة عليا داكشي لي درتي ليا لبارح
غيث: راه تكايست عليك و ماخليتش فيك لاطراس
ياسمين: جبد ليا مانلبس بغيت نشوف ذوقك
باسها ففمها و جلسات هي فوق الفراش و بدا كايجبد ليها لحوايج حتا غفلها و هز تيلي و صورها
ياسمين: مابقا ليك غير تصورني عريانة
غيث: عندي عرام ديال تصاورك عريانة خاصني نحطهوم فالبيسي حتا نجيب يوسبي تيلي عمر ليا
ياسمين: كاتصورني و انا عريانة😨
غيث: حتا تشوفيهوم 😉 هاكي لبسي هاني داخل ندوش
حط ليها كسيوة قصيرة حد الفخاض بالخويطات من جيهة الكتاف فالغوز فيها وريدات كبار فالأسود و، باسها ودخل لدوش و خلاها كاتلبس و هي تجبد سليب أسود لبساتو مع لكسيوة و طلقات شعرها و نشفاتو و خلاتو مطلوق على راحتو

هبطات للتحت و لقات لخاجمات وجدو ليهوم لفطور و محطوط فوق الطابلة شافت فيهوم بإبتسامة و جلسات كاتفطر و كاتبنن حتا هبط غيث مهبط معاه لبيسي و تيلي ديالو لابس تيشورت أبيض و سروال باج و شعرو ناشف و واخا دوش باقة باينة فيه يالاه فايق من النعاس، حط لبيسي و تيلي و جا حداها فطر معاها و لخادمات خلاوهوم بوحدهوم باش ياخدو راحتهوم و مايبرزطوهومش، كملو لفطور وشربات ياسمين دواها و ناضو، هز لبيسي ديالو و تيلي و داهوم لبلاصة وحداخرا و جلس خدام و ياسمين كاتلعب فشعرو ولا كاتلعب فلحيتو و هو مخليها دايرة ما بغات حتا تفكر شي وراق
غيث: حبيبة عافاك جيبي شي وراق كاينين فوق البيرو فملف زرق
ياسمين: واخا
مشات تحت انظارو جابت ليه لوراق و هي كاتبان بحال شي بنت صغيرة فديك لكسيوة و شعرها غادي جاي معاها، عطاتهوم ليه و جلسات حداه كملات اللعب ديالها فيه و خصو ستيلو باش يكتب فالوراق
غيث: حبيبة جيبي، عرفتي شنو كترت عليك و نتي ماخاصكش تتحركي بزاف
ياسمين: غير قول انا نجيب ليك
غيث: غير خليك انا نمشي
ناض هو و رجع للبرو ديالو هز باقي لوراق لمهمين و هز ستيلوات و رجع حط لوراق و هو يهز عينو فياسمين لقاها كاتصور فيه و هو يبتاسم و هو يجي حداها
غيث: فكرتيني خاصني نيحدهوم من تيلي راه عمر
ياسمين: وريني تصاوري
غيث: واخا
دخل بلاصة التصاور و هو يوريها عرام ديال التصاور ديالو معاها ناعسة ولا فايقة ولا ساهية مرة عريانة مرة لابسة كل صورة فيها بوز شكل
ياسمين: ايمتا كاتصورني
غيث: كاتكوني ساهية حالة فمك كاع ماكاينة فيه و كانغفلك و كانصورك و لبارح ضربت شي تصيورات معاك و نتي عريانة يا سلام ههههههه
ياسمين: موصيبة كحلة نتا، هاني نضت نشوف اش كايطيبو
غيث: رجعي ليا دغيا (باسها)
مشات ياسمين و خلاتو هو جاب خيط باش يربط مابين تيلي و لبيسي و دخل لبلاصة التصاور و لقاها عامرة تصاور و فيديوات و ماعرفش ديالاش بالضبط حيتاش كتار و بلا سمية و بلا تاريخ يالاه بغا يدخل لواحد لفيديو و هو يسمع ياسمين كاتعيط عليه و هو ينوض و بلا قصد ضغط على الفيديو و خدم بوحدو و مارضش ليه لبال و مشا عندها للكوزينة
غيث: وي حبيبة مالك
ياسمين: مامالي والو غير بغيت نعاونهوم و ماخلاونيش
غيث: انا لي قلتها ليهوم، عطي لراسك الراحة
ياسمين: اوففف راه عييت بالنعاس ضهري ضرني
غيث: لا حول ولا قوة الا بالله واخا انا غادي نخليك تعاونيهوم مي تحت عينيا جيبي ليا لبيسي و تيلي لهنا باش نقابلك و نقضي شغلي
ياسمين: نتا the best بب كانحماق عليك
مشات كاتنقز باش تجيب لبيسي و هي تشوف بلي فيه فيديو خدام
ياسمين: علام الله اش مصور تاني هاد المسخوط
جلسات و تقابلت مع لبيسي و هي تلاقة مع نهاية لفيديو و هو يتعاود اوتوماتيكيا و هي تحس بقلبها تشد عليها و تزيرات و حسات بالدمعة مزيرة فعينها

بقات كاتفرج فالفيديو و كاتعاودو و صدرها كايطلع و يهبط و كاترعد كلها و بلا شعور بدات كاتبكي و هي تهز لبيسي و كلها كاتفيبري بالفقصة و هي تمشي ليه و ماكاتشوفش مزيان حيتاش عينيها مغرغرين بالدموع، وقفات عليه فالكوزينة و هو جالس فوق كرسي داير رجل فوق رجل و لخادمات كايطيبو و هو يشوفها و طلع حواجبو معجب
ياسمين: توحشتيها ياك (بالغوات)
غيث: خرجوو (بالغوات مع لخادمات)
خرجو الخادمات كايترعدو خايفات و هو يوقف معصب و هي تلوح ليه لبيسي فوق الطابلة و هو يشوف اش فيه و هو يشوف فيها بعينين ذابلين
غيث: حمقة ديالي هادشي ماشي كيفما فهمتي
ياسمين: عندك الحق انا حمقة حيتاش تيقت بلي نسيتيها و بلي بصح كاتبغيني 😭😭 و نتا كاتفلا عليا و دايرني كيف المونيكة هنايا باغي غير تمارس معايا و تخليني نولد ليك و تغرقني ولاد و نتا عقلك مازال معاها، خليتيني حتى نضت و جلستي كاتفرج ف فيديواتك معاها و هازهها فوق ضهرك و هاديك هي الشريفة العفيفة لابس دو بياس و معلقة فضهرك (كاتنخصص) كون غير بقيت مع سليم ممكن مع المدة ننساك و نبغيه على الأقل هو كان صادق معايا (كاتبكي)
غيث: صافي ساليتي (عاقد حجبانو) مرضيتين ا ياسمين بهاد الشك ديالك ماكاتيقيش فيا كل مرة موشكيل جديد مالي انا مانشك فيك نتي و سليم ! و نتي قدام عيني مخشية فيه و كاتضحكو و كاتهامسو و زيدك انا ماكنتش كانتفرج فداكشي و ماعرفتش اش كاع داكشي دخلت لدتما باش نحط تصاورنا فالبيسي حيت تيلي عمر تيلي و لقيت بلي لبيسي عامر و دخلت باش نشوف..
ياسمين:(قاطعاتو) شنو انا كانرضع صبعي لبيسي ديالك و نتا لي عارف لباس وورد يعني نتا لي حاط داكشي تما و دابا كاتقوليا ماعرفتش اش داكشي
غيث: راه مافيه لا تاريخ لا سمية و نسيتو، خلاصة القول ا ياسمين نتي ماكاتيقيش فيا و ماعمرك غادي تيقي فيا (معصب) و العلاقة لي مامبنياش على تيقة دغيا كاتهدم
ياسمين: اوا طلقني و هنيني و سير عيش مع ذكراتك و مع خطيبتك لميتة و خليني عليك انا قلبي عذبتيه بما فيه الكفاية

غيث: (غمض عينيه بعصبية و حلهوم ) راكي ماعارفاش اش كاتقولي خليك حتا تكالماي و ندويو
ياسمين: لا عارفة اش كانقول طلقني مرضت فصحتي و مرضتي قلبي كل مرة حاجة شكل انا بغيت واحد ليا بوحدي ماشي معايا جسديا و لكن عقليا مع خاطيبتو
غيث:(قرب ليها) ياسمين تيقي فيا واخا غير شوية راه و الله ماكاين والو
ياسمين: شفت بعيني الفيديو خدام شفتو بعييينييي (كاتشير لعينها و كاترعد كولها) كون ماعيطت ليك كون بقبتي فيديو مور فيديو و علام الله شحال من مرة كاتفرج فيهوم، باقي يالاه داز شهر على زواجنا و شحال من حاجة حصلت عليك ا غيث مانقدرش نصبر
غيث:(حط يدو عليها) ياسمين غير سمعيني
ياسمين: (بعدات منو)ماتقيسنيش، بعد مني 😭😭 عطيني بالتيساع قهرتيني و مرضتيني
غيث: واش لهاد الدرجة ماتايقاش فيا (بعد من حداها معصب) زدتي فيه ا ياسمين
ياسمين: كون غير بقيت مع سليم 😭😭 كون غير بقيت معاه 😭😭
غيث: ياك ا ياسمين صافي هادي هي كانبغيك
ياسمين:(كاتمسح دموعها و يدها كاترعد) مانقدرش نكون رقم جوج فحياتك، طلقيني و خليني نمشي فحالي
غيث:(بعصبية) مامطلقكش 😡
مشا غيث من حداها و خلاها كاتبكي و كاتنوح و هي تطيح على ركابيها كانتخصص بصوت عالي و كاتف غوت و تجدب حتا حسات براسها تقال عليها و سخفات، تحبس صوتها و مابقاش غيث كايسمع صوتها و خاف تكون دارت شي حاجة فراسها و هو رجع عندها و لقاها سخفانة و هو يهز ليها راسها حطو فوق يدو و وجهها حمر بالبكا و الدموع باقيين هابطين و قلبها كايضرب بجهد
غيث: ياسمين فيقي ا حبيبة ماتخلعينيش عليك (مخلوع) يالاه ا حبيبة حلي عينيك ندير ليك لي بغيتي (كايضربها فوجها بشوية)
شافها مابغاتش تفيق و هو يهزها و شعرها مليوح فلهوا و هي مغيبة ماحاسة بوالو و ركب فلوطو ديالو و حطها فاللور و ديمارا نيشان لكلينيك

تسمع فران سييك قدام الكلينيك و خرج بالخف و حل لباب و هزها و دخل بيها لداخل فالكلينيك هازها و كايجري حتا تلقاو ليه بفراش متنقل حطها فوقو و دخلوها لغرفة المعاينة و بقا هو برا غادي جاي متوتر و مخلوع خايف توقع ليها شي حاجة هي و لبيبي و كايرض لومة لراسو و جلس فوق الكورسي داير راسو بين يديه و فارق رجليه و كايجمع النفس و يرخيها مرعودة و هو يسمع صوت خطوات حداه هز راسو لقا جوج من رجالو تبعوه و هو يجمع لوقفة و خنزر
غيث: عيطو لواليد دابا
بعدو من حداه مني شافو كاعي و رجع لبلاصتو و كايفيبري برجليه حتا تحل لباب و خرج الطبيب و ناض كايجري تلقا ليه
غيث: اش عندها!
طبيب: غير انهيار عصبي عطيتها مهدئات
غيث: و لبيبي
طبيب: لبيبي مزيان و لكن خاصها تبعد على التوتر و اي حاجة تدير ليها الأعصاب خاصها الراحة الجنين باقي ماشادش بلاصتو مزيان يعني اي حاجة تقدر تطيحو
غيث: ايمتا تقدر تخرج
طبيب: من الأحسن تبقا حتال غدا و تمشي باش نعاين حالتها مرة تانية و نشوف ياكما كاينة شي حاجة كاتهدد سلامة الجنين، بالشفاء ان شاء الله
غيث: ميغسي
مشا الطبيب و دخل غيث بعدما تنفس الصعداء و تطمئن على حالتها و حالة الجنين و هو يجي جلس حداها و هي ناعسة باقة بكسوتها و شعرها مسرح حداها و دايرين ليها شوكة ديال السيروم فيديها و مغطية، شد يديها و هزها و بقا كايبوسها و كايدوز يديه على وجهها الشاحب و هو يطبع قبلة خفيفة على شفافها و هو يسمع صوت شهاب برا و هو يجمع لوقفة و خرج عندو شافو شهاب و مشا عند ولدو
شهاب:مالكوم اش طرا
غيث: (تنهد) بغات الطلاق ا لواليد
شهاب: !?
غيث: اجي جلس و انا نشرح ليك كولشي
شهاب: هي بيخير بعدا !
غيث: هي بيخير غير انهيار عصبي (جلس)
شهاب: اش طرا ياك كنتو بيخير

عاود غيث كولشي لشهاب حيتاش دايرو كيف صاحبو و ماكايخبي عليه والو و شهاب كايسمع و كايحلل باش يعطيه جواب يكون فمحلو
غيث: اش بان ليك فهادشي ماشي لحماق
شهاب:(تكا على لحيط و دار رجل فوق رجل)من حقها تطلب الطلاق(ببرودة)
غيث:لواليد بلا ضحك راه غادي نطرطق
شهاب:واش نتا هاد لبنت مسكينة كل مرة تحصل عليك حاجة و تسكت ليك،ياك كنتي كاتعاود ليها على زمرد ماعمرني مانبغي غيرها هي كولشي و فالتالي جيتي عندها و كاتقوليها كانبغيك
غيث:اقسم بالله الا كانبغيها 
شهاب: باينة فيك،شوف ا غيث لمرا معقدة شخصيتها و فشكل وياسمين عندك مغيارة كيفما نتا مغيار حط راسك بلاصتها كاتعاود ليك على شي خطيبها قديم و كاتقوليك اش كان كايلبس و اش كان كايدير و طبعو و تصرفاتو و زيد عليها لقيتي بيت ديالو فدارها باقي كيفما هو و فيديواتها معاه باقيين عندها هادشي كيفاش غاتفهمو نتا ،ماشي غاتقول بلي باقة كاتبغيه و نسيتي راسك ياك غير فاش شفتيها كاتهضر مع داك خينا لي كان عندهوم فالدار شعلتي
غيث:اه كنت كانبغي زمرد و كنت متشبت بفكرة انني ماغانعيشش بلا بيها و لكن فاش عرفت هاد المجنونة خرجاتها من بالي و حيدات ليا ديك الفكرة بلا مانحس و اكبر دليل انني بغيتها و ماشعرتش حتا لقيت راسي مزعوط فيها زعطة خايبة،و بالنسبة للبيت غير كنت باغي ناخد راحتي معاها و ديتها لدار حيتاش فلوطيل ماغاناخدوش راحتنا و كنت معول نشري فيلا و داكشي كاياخد شوية دياال لوقت و كنت باغي نخوي لبيت و لكن بلا ماتشوف اش فيه و هاهيا شافت و شكات فيا واخا عييت مانحلف و هاد لفيديوات نسيت كاع واش كاينين فهاد لبيسي راه عندي تستيفة ديال لبيسيات فين غانعقل فاش دخلت ليه شافت هي داكشي و فهمات بالمقلوب
شهاب:اش غانقولك دابا اش غاتدير
غيث:لاصق فمها ماتحلمش بالطلاق انا ماغانخليهاش على قبل هادشي
شهاب:لبنت حاملة و نتا غير غاتزيد تمرضها اللهم ميك عليها و الى حلات عينها و بغاتك تبعد بعد و خليها حتى تولد و رجع ليها
غيث:انا خاصني نرجع لدبي ماغانبقاش هنا غانديها معايا و تبقا تحت عيني بلا ماتشوفني
شهاب:لبنت عندها واليديها و ماغايبغيوش تفرض عليها شي حاجة و هي براسها ماغاتبغيكش تفرض عليها هادشي و تقدر تدير شي حاجة فراسها
غيث:مانقدرش نخليها ا لواليد حس بيا،وليت كانحفظ لقرآن على قبلها واش عمرني درتها ياك حتا فالصلا كانصلي غير السور القصار بزاف

غيث: نعطيها عيني غير ماتمشيش (خشا راسو بين يديه)
شهاب: الصبر ا ولدي (كايدوز يديه على ظهر غيث)
غيث: كانو عندي لوحات راسم فيهوم زمرد و كولهوم سيفطتهوم لواليديها مابغيتش نخلي شي حاجة ديالها عندي باش ماتقلقش ياسمين مي ماضربتش الحساب لهادشي
شهاب: ها حنا غانشوفو الا فاقت اش غاتقول، عيطتي لواليديها!
غيث: نو (تنهد)
شهاب: نوض عيط على باباها و علمو راه من حقهوم يعرفو
غيث: ايمتا غايجي ليث و قمر!
شهاب: غدا فالصباح بكري غايكونو هنا
ناض غيث و خدا تيلي من عند شهاب و دوز لمكالمة لتوفيق و خبرو بلي بنتو فالكلينيك و قطع معاه و هو دخل عندها لقاها باقة ناعسةو هو يجلس حداها و كايشوف فيها بعيون حزينة و كايدوز يديه على شعرها حتا دخل عليه توفيق و سعيدة مخلوعين
سعيدة: مال بنتي (جات حداها)
غيث: جاها انهيار عصبي (بأسى)
سعيدة: انهيار عصبي 😨 الله يا بنيتي باقة صغيرة ماشفتي ماتشوفتي و جاك انهيار
توفيق: شنو السبب ديالو
غيث: سي توفيق ممكن نهضرو على انفراد
توفيق: تفضل
خرج غيث هو و توفيق و بقات سعيدة مع ياسمين و مشا معاه لكافيتيريا ديال لكلينيك و عاهد ليه كولشي بلا مايخبي حتى حاجة
غيث: من حقك تعرف اش واقع مع بنتك و لكن بغيتك تعرف حاجة وحدة هي انني كانبغي ياسمين و ماباغيش نتفارق معاها و خصوصا هي فمرحلة صعيبة
توفيق: اش غانقولك عندي عوينة وحدة و الا تقاست راه انا لي غانتضر الى هي بغات تكمل معاك و ترجع ليك غاترجع ليك و لكن تحت الملاحظة ديالتي و نشوف هاك ولا هاك غانرجع بنتي عندي و الى مابغاتكش من الأحسن تفارقو واحد المدة حتى تهدا هي و تبرا نفسيتها و ديك ساعة نشوفو اش غاتدير هي
غيث:(تنهد) غادي تسطيني بنتك
توفيق: نتا لي غادي تسطي راسك اولدي هي مادارت لابيديها لا برجليها نتا لي كان عليك تحيد اي حاجة كاتعلق بخطيبتك لقديمة و لكن دابا لي طرا راه طرا نشوفو المستقبل
غيث:راه كانت باغة تحيد لبيبي ماتخليهاش عارفها دابا ماغاديش تسمع مني انا
توفيق:الإجهاض راه جريمة و انا ماغاديش نخليها ماشي على قبلك و لكن على قبل ربي حيتاش ربي لي زرع فيها ديك الروح و انا ماغاديش نخليها تقتلها(ناض) من الأحسن ماتشوفكش الا فاقت باش ماتكملش عليها
مشا توفيق و بقا غيث جالس كايحس بقلبو كايتقطع عليه و خصوصا انه مادارش شي حاجة بيديه كولشي جا صدفة واخا هو اي حاجة كانت عندو مع زمرد نساها

بقا جالس كايفكر ماحسش كاع بالوقت حتى حس بيد تحطت على كتفو و هو يضور شاف شهاب واقف مبتاسم
شهاب: نوض مراتك فاقت و سولات عليك بغات تدوي معاك
غيث: (بلهفة) بصح ! فاقت ! (ناض) و هي لي سولات عليا
شهاب: وي فاقت هضرات مع واليديها و دخلت انا و قالت ليا بغيت نهضر مع غيث
غيث: واخا انا غانمشي عندها (فات شهاب بخطوات)
شهاب:(شدو من كتفو و جرو عندو) غيث ماتتأملش مابغيتكش ترجع محطم دير فبالك راه تقدر تقوليك شي هضرة تجرحك و تقدر تقوليك هضرة تفرحك
غيث: عارف ا لواليد انا راه ماشي دري صغير و فرحت شوية غير حيتاش حلات عينيها و فاقت سي توو
شهاب: يالاه سير عندها
مشا غيث بالخف و هو باقي بالحوايج لي لبس فالصباح و وصل للإطاج لي فيه الشومبر ديالها و دخل لقا سعيدة جالسة حداها شادة ليها يديها و توفيق جالس فوق كرسي كايهضر معاها و هي ناعسة و صفرة و وجهها ذابل، شافوه دخل و ناضو شافت فيه سعيدة و قلبات وجهها و خرجات و هو يتبعها توفيق، سد غيث لباب و جا بالخف حداها جلس فوق الفراش و شد ليها يديها باسها و هي تهربها و هو تصدم من داكشي لي دارت و هي تشوف فيه بعيون حزينة
ياسمين: شفتي فين وصلتيني ! انا لي قليل فاش نوصل الكلينيك صدقت ناعسة فيه و بسباب انهيار عصبي و انا لي الضحكة ماكانتش كاتفارق وجهي، كنت فالول باغة نخرجك من الحالة لي كنتي فيها صدقتي نتا غاتدخلني ليها ماشي حرام عليك اش درت ليك فاش أذيتك ياك بعدت عليك و خليتك و جيتي نتا تبعتيني و خطفتيني من عرسي و كاتقوليا كانبغيك
غيث: راه بصح كانبغيك ماكانكدبش عليك و داكشي لي شفتيه راه غير فهمتيه غلط انا ماشي كنت كانتفرج فداكشي
ياسمين: كنتي كاتفرج او ماكنتيش شغلك هاداك لي كايهمني انني عييت و مرضت و هادشي بزاف كل مرة تجبد شي حاجة عليك نتا وياها و الموشكيلة كون كانت غير حية نلقاو ليها الدوا هي راه ميتة و هادشي كايتجبد انا راه مرضت و هانتا كاتشوف حالتي
غيث: ياسمين انا ماغاديش نطلقك و انا كانواعدك غادي نمحي كولشي و نبداو من جديد
ياسمين: ✋🏼 (قاطعاتو) مابغيت منك والو غير طلقني و خليني عليك باراكة هادشي يحبس هنا
غيث:راه الحمل مأثر عليك و ماعارفاش اش كاتقولي عارف بلي حالتك من الداخل ماعالم بيها غير الله
ياسمين: مابقيت باغة منك والو و حتا هاد الجنين غادي نحيدو مابغيت حتى حاجة تربطني بيك (حيدات الخاتم) ورقة طلاقي بغيتها فأقرب وقت (عطاتو لخاتم)
غيث: قولي ليا عطيني عينيك و نعطيهوم ليك قولي ليا عطيني روحك و نعطيها ليك و لكن باش تقولي ليا طلقني مانقدرش ا ياسمين
ياسمين: تقدر كيفما نسيتي زمرد دغيا غاتنساني حتا انا
غيث: هادي هي كانبغيك ا غيث هادي هي مانقدرش نعيش بلا بيك
ياسمين: كانبغيك اه و هذا هو غايكون عذابي
غيث: مابغيتكش تعذبي راسك و تعذبيني
ياسمين: سير فحالك و عطيني بتيساع ا غيث ماتبقاش تضور بساحتي
غيث: واش ماكاتيقيش فيا !
ياسمين: مابقيتش كانتيق فيك
غيث: (ناض) اوا سمحي ليا ا بنت الناس ورقة طلاقك غاتوصلك فأقرب وقت مني مابقاتش الثقة مابقا والو
عطاها بالضهر و هو محطم و خرج و هي خشات وجهها فالمخدة و قلباتها بكا

خرج برا شومبر و لقا شهاب كايهضر مع توفيق و هو يهز راسو شاف ولدو عينيه خارجين و عاقد حجبانو باينة فيه معصب و هو ينوض عندو و هو يجرو بلا مايعيق حتا خرجو برا لكلينيك و مشاو الجردة وهو يوقفو
شهاب: اش قالت ليك
غيث: ماكاتيقش فيا ا لواليد (كايغوت) بغات الطلاق صافي هو لي يكون ليها عييت مانشرح ليها و نفهمها و هي طالعة لجبل مابقا ليا غير نبوس ليها رجليها باش تبقا معايا 
شهاب: راه حاملة ا غيث و نفسيتها مريضة راه ماعارفاش اش كاتقول
غيث: بلا ماتجي من جيهتها ا لواليد راه انا غاتقتلني قلبي كانحس بيه غايسكت بهاد الأعصاب (شد راسو) ماخليت مادرت معاها باش غير تنسا لقديم و تبدا معايا من جديد و هي لا حقا ماكاتبغينيش شنو طليتي على قلبي (ضرب كرسي برجليه) فااااك، قول المحامي يوجد داك الزبل ديال الطلاق
شهاب: (جلس فوق الكرسي) واخا ان شاءالله
غيث: (جلس حداه) ينعل بو جد الحب ولا الزمر ماكاين ماحسن من سيليباطير و الى تكبتي عطا الله لبنات
شهاب: تربيتي راحت فكلام فاحش (شاف فيه كايضحك)
غيث: مافيا لي يضحك ا لواليد راه غادي نفاجر،عمر لواليدة دارت ليك هاكدا!
شهاب: فاش كانت ام ليث حاملة و كنت باغي نجيبها لقصر و فاش قلتها ليها صعرات و كانت حتا هي حاملة و زادت نفراتني و لكن ماوصلناش لطلاق
غيث: شفتي العيالات لي بصح كايبغيو رجالهوم كيفاش كايديرو ماشي هي فأول زمر طالبة الطلاق و زايداها بأي حاجة منك مابغيتهاش و الجنين باغة تحيدو، الى حيداتو تجي تحيد ليا الموسطاش واخا نعرف نشد والديها نكتفها حتى تولد و ماتحيدوش
شهاب: ماغايخليهاش باها دويت معاه و نتا الى طلقتيها خرج سوقها
غيث: مامطلقهاش لاصق فيها شكون قال غانطلقها بغات العكس انا بااه يالاه (مغدد)
شهاب:دابا واش غاتطلق ولا لا
غيث: مامطلقش (شاف الخاتم ديالهاو خشاه فجيبو) تضرب راسها مع الحيط باغة غير تعذبني و تمرضني حتا انا غاندير نفس الحاجة ينعل بو الشركات انا حداها بوت نبت
شهاب: زيد معايا لدار راه خليت مك كاتجدب حيتاش مابغيتش نجيبها معايا

غيث: واقلة غانبقا هنا حتا يمشيو واليديها و ندخل نهضر معاها تاني
شهاب: زيد قدامي خلي عليك لبنت لاتصدق قاتلها
جرو بزز منو و داه للفيلا غير دخلو لقاو جوري جالسة فالصالون متوترة و هي تشوفهوم و ناضت عندهوم
جوري: ولدي 😨 مافيك والو ياك (كاتقلب فيه) علاش كنتي فالكلينيك اش وقع فينها ياسمين
غيث: انا بيخير مافيا والو ياسمين فالكلينيك
جوري: هييي 😨 اويلي مال لبنت اش درتي ليها
غيث: مادرت ليها والو (تعصب) هي لي دارت لراسها
شهاب: دابزو بجوج و شدها انهيار عصبي و سخفات و داها لكلينيك و زيد عليها حاملة
جوري: حملات 😨 دغيا
شهاب: راه هادا كتر مني، عندو داكشي خفا زربا ههههه
جوري:باراكة من الهضرة الماسخة ديالك (جرات غيث) اجي عاود ليا اش وقع
غيث:(وقف) لواليدة غادي نمشي ندوش دابا ياك راسي كايحرقني و فيا شي أعصاب ديال الدنيا و الدين الوغ غير خليني عليك ها لواليد يعاود ليك
غمزها شهاب زعما ميكي عليه و هي تخليه مشا طلع لبيتو باقي كيفما خلاه اخر خطرة فاش كان العرس و سخفات ياسمين شهر و لبيت كيفما هو الفراش مرون و تكشيطتها مليوحة فالأرض و دو بياس ديولها محطوطين فوق الفوطوي، سد لباب و دخل و باقة نفس الريحة فالبيت و كايشوف خيالها ناعسة شاحبة و هو يقلب وجهو بعصبية و حيد حوايجو و دخل لدوش لقا القاميجة لي كانت لابسة هزها بدون شعور و شمها لقا ريحتها باقة فيها و هو يخرجها حطها فوق الفراش و رجع لدوش حيد حوايجو و طلق عليه ما بارد لعل و عسى تطفى النار لي شاعلة فيه، بقا مدة و هو واقف و الما كايضرب فبه من جوج جوايه و كاينزل على لحمو و كايكون بارد غير كايلتقي بالجسد ديالو و كايولي سخون و الكلمة جيال طلقني كاتعاود ليه فبالو و كايتعصب، حس براسو ولا شوية و هو يكمل تدواشو و خرج لاوي عليه فوطة و هو يحل الماريو ديالو و هز سروال جينز و هو يلبسو مع بوكسر اسود و هو يلبس لقميجة لي كانت لابسة ياسمين و هو يمسح شعرو مزيان حتا نشفو وهو يشوف سحال الساعة لقاها تسعود ديال ليل، هز كويرة كحلة و لبس سبرديلة كحلة وهو يهبط لتحت لقا شهاب جالس هاز لبيسي خدام فيه و هو يمشي عندو تسالم معاه باليد بحال الصحاب و جلس حداه

يتبع