عذابي الجزء السادس

رواية عذابي لنهى مر

وصلو للصالون و قلبها مزير عليها و كايبكي الدم ماكرهاتش بكون هادا عرسها من غيث و لكن عقلها كايرفض هاد لفكرة هادشي لي ولد واحد الحرب داخلية مابين قلبها لي كايقوليها بغيه و سمحي ليه و عقلها لي كايقوليها نسايه، خلاتهوم بجوج فديك الحرب و هزات يديها حتا تشوف فالنهاية شكون لي غادي يربح.
دخلو لصالون و رحبو بيهوم مزيان حيتاش عارفين القاضية فيها بوكو حبة، جلسو لبنات كل وحدة فكرسي و ضارو بيهوم البنات باش يصايبو ليهوم حالتهوم، مابقاو كايستقبلو حد حيتاش حجزو النهار كامل و غادي يتخلصو خلصة صحيحة، دارو ليهوم ماسكات للوجه و حيدو ليهوم الزغب و قادوهوم رجعوهوم كايشعلو كيف البلارات، داكشي لي كايديرو لياسمين كايديروه لصحاباتها حتا هوما.
مشطات لبنت شعر ياسمين مزيان و صايباتو ليها و دارت ليها مشيطة زوينة جمعات الشعر كولو على شكل وريدة زوينة و خلات قصيصة هابطة من لقدام بينات ليها وجهها و دارت ليها مكياج لي غادي يتناسب مع لبيسات لي غادي تلبس فالحفل و برز ملامحها و بين براءة وجهها و لون عيونها، نفس الشيء تدار لصحاباتها و لكن ماشي بنفس الحمالية خيتاش ياسمين العروسة و هي لي خاصها تكون متميزة، ضربات ياسمين صباغة حمرة لليدين و الرجلين و زادو قادو ليها الضفران، ضارو بيها من كل جهة و ولات خطيرة غير نضرة منها تطيح الرجال.
شافو لبنات الساعة لقاوها الربعة ديال العشية و خرجو من الصالون و ركبو فالكاط كاط و غاديين عاجبهوم لحال ما عدا ياسمين لي مريضة و حزينة و كاتحس بغصة فقلبها و الجمعة على طرف عينها و ماقادرة تدير والو حيتاش هادشي دخلات فيه العائلة و ماشي لعب دراري الصغار و تقدر صداقة ديال والدها توفيق مع محمود تتدمر بسبابها هي. جاتها الطريق قصيرة مقارنة مع الأيام العادية، بسرعة وصلات و ماحساتش براسها ايمتا هبطات من لوطو و كاتسمع الزغاريت و الصوت غادي و كايقرب حتا دخلات لقاتهوم مقاديين كولشي الطوابل محطوطين و الناس بداو كايجيو و منصة مصايبة على حساب الفنان لي غادي يجي يغني ليها فعرسها و لبرزة مقادة و كولشي باللون الباج و الأبيض الشيء لي عطا واحد الجمالية للمكان.
طلعوها لبيتها و موراها كاتتردد الصلاة و السلام و دخلات جلسات و جابو ليها ماتاكل داكشي خفيف ضريف غير باش تعمي الجوع و هي فكل دغمة كاتهبط لمعدتها كاتهبط كيف السم، مشات حلا و لبنى باش يعاونو سعيدة و هي كاترحب بالناس لي بداو كايجيو و بقات ياسمين بوحدها فالبيت و لوقت كايدوز طيارة و هي فكل مرة تقلب الساعة كاتلقاها زادت ب 30 دقيقة او اكتر كاتشدها السخفة و الخلعة.

تحل عليها لباب و دخلات النكافة و جوج مساعدات ديولها و معاهوم سعيدة لابسة قفطان فالأخضر الملكي و مصايبة شعرها و دايرة مكياج خفيف و صباط عالي عاجبها راسها و فورمتها باقة مزيانة حيتاش كاتهلا فراسها
سعيدة: هاهي النكافة هي لي غادي تلبسك ليوم و راك اصلا مقادة لماكياج مزيان نيت باش نختاصرو لوقت و راه عائلة لعريس جات و جابت معاها الدفوع و داكشي و طاهور جا كايغني شوية و هبطي صافي ا بنتي !
ياسمين:فينو بابا
سعيدة: بغيتيه نسيفطو ليك!
ياسمين: اه بغيتو
سعيدة: جالس مع الرجال انا نهبط عندو تهلاو ليا فبنتي لخدمة بغيتها تكون متقونة
نكافة: ماتخافيش ا مادام كولشي غادي يكون هو هاداك غير سيفطي ليا لعريس باش يلبس حتا هو
سعيدة: واخا
مشات سعيدة و بقات ياسمين جالسة قدام مرايتها و كايعاودو يثبتو ليها لماكياج باش مايسيحش و جبدو ليها تكاشط و خلاوها تختار لي بغات
نكافة: تلبسي على ذوقك ولا على ذوقي!
ياسمين: عطيني هاديك لي فالباج
دق سليم و هو يدخل لابس كومبلي كحل مع قميجة بيضة بصدايف كحلين و كرافاط كحلة و ريحتو كاتشم على بعد أميال و صباط فرجليه أسود لامع مع تقاشر بالبيض و ناقص من اللحية و مرجع شعرو لور جا كايسطي
سليم: بغيتيني فشي حاجة!
نكافة: بغيت غير نقولك لبس مي بان ليا جيتي لابس، تسناها هنا فالبيت لي حداها حتا نعيط ليك باش تهبطو بجوج
سليم: اوك
خرج سليم و حيدات ياسمين حوايجها بقات غير ب دو بياس فالأبيض و لبسات التكشيطة بمساعدة من النكافة و المساعدات ديولها و لبسات صدالة بطالون عالي بصميطات فالباج و قادوها رجعات كاتضوي و زوينة لي يشوفها يتبهر بيها و بدات كاتقرا عليها النكافة المعوذتين حتا سمعو الدقان
ياسمين: دخل
تخل لباب و دخل توفيق لابس كومبلي أسود حتا هو مع قميجة بيضة بلا كرافاط و صباط اسود فرجليه مقمقم من القدام و شعلاو الشايب ماشطو مزيان و هو يبتاسم و خرجو النكافات باش يخليوهوم على راحتهوم.
قرب توفيق منها و شد ليها وجهها و باس ليها جبهتها
توفيق: تبارك الله عليك ا بنتي الله يرضي عليك و الله يحفضك من لعين و الله يسعدك فحياتك و عرفي بلي فيننا كنتي و معامن كنتي غادي نبقا راضي عليك و أهم حاجة عندي انا هي السعادة ديالك عاد اي حاجة و كولشي ثانوي نتي هي لولا تهلاي فراسك بزاااف (عنقها)
بادلاتو العناق و لسانها تعقد ماعرفات ماتقول حسات بيه كايدوز ليها شي ميساج و لكن مافهماتوش، باسها تاني و خرج و دخلو النكافات و جابو سليم شاف فيها بشوق و محبة و فنفس لوقت بحزن و شدها من وجهها باسها فجبهتها و خشات يديها تحت ذراعو و مشاو و النكافات كايصليو على النبي و جاو صحاباتها و مها كايزغرتو و يصليو على النبي فرحانين حتا هبطو لتحت و ناض كولشي كايشوفو فالعرسان و طاهور كايغني خليهوم و يمدح فيهوم حتا جلسو فالبرزة و بداو كايتصورو و كايتصورو معاهوم الناس و حتا سعد و حلا و لبنى و سعد لي مصدومين من هاد لعرس حيتاش عارفين بلي ياسمين ماكاتكن حتى مشاعر لسليم.

بقات جالسة و سليم شاد ليها فيديها و طاهور كايغني عليهوم حتا يجي حداهوم و يبداو لفلوس كايتشايرو عليه صحابهوم رجعو لطبلة ديالهوم و جالسين فوق فوطويات فأبهى حلة و كل واحد فيهوم شاد خطيبتو
سعد: مينة و سليم !! واش هادشي بصح نيت ! ولا غير كانحلم
كرم: زيدني عليك ماعمرني توقعتهوم يديروها
سعد: لبنات عارفيين شي حاجة !
لبنى: حتا انا فحالك ا حبيبي ماشفتها مني رجعنا من بورتوريكو كان بيناتنا غير تيلي و كانت انورمال ماشي مينة لي كانعرف و هاد سيمانة عيطات علينا انا و حلا و قالت لينا غادي تتزوج كيصحاب ليا فلول داك بو عيون خضرة لي كان معانا فالرحلة مي قالت ليا بلي سليم و تصدمت حيتاش هي رافضة سليم رفض كلي
كرم: علاش بينها و بين هاداك شي حاجة!
حلا: كانت قالت لينا بلي كايعجبها و حتا فاش رجعنا لمغرب بقات كاتلاقا معاه ماشفتيش التصاور لي كانت كاتلوح فالفيسبوك ديالهوم
كرم: ايه و علاش تزوجات دابا ب سليم!
لينى: مازال ماتزوجات حتا تبغي تلبس لاغوب عاد قاليك غادي يجي لعدول و يكتبو كتابهوم
حلا: هي راها راشدة و عارفة اش كاتدير يعني خليوهوم يعومو بحرهوم حنا غير نباركو ليهوم و صافي راه صحابنا
سعد: اوا الله يسعدهوم.
ناضت ياسمين و هي معنقة يد سليم تحت انظار لجميع و طلعو لفوق باش يبدلو او بالأحلى تبدل هي حيت غادي تلبس تكشيطة فالأحمر كيفما تافقات مع النكافة، لبسوها و هبطات هي و سليم تاني و جلسو كايتصورو و دايرة ابتسامة زائفة باش ترضي الناس و سليم، فهاد الأثناء تحطات الفيراري ديال غيث و هبط منها بكامل أناقتو لابس كومبلي بالبلو مارين مغلوق مع قميجة بيضة و حال جوج صدفات و جاه لاصق عليه و برز حجم عضلاتو و كايبان ضخم و فرجليه صباط أسود لامع تشوف وجهك فيه الى تحرك كايتسمع صوتو و داير فيديه ساخة باينة غير من الشوفة باهضة فالثمن من كالفن كلين و شعرو الأسود مرجعو لور كايبان اسود من الليل و غير من الشوفة باين رطب و لحيتو قادها ولات مسفة و داهنها بالزيت و عاطياه منضر زوين و حجبانو غلاض كحلين عاقدهوم الشيء لي عطاه واحد الهبة و شفافو شهوة منهوم حميمرين طبيعيا يشهيوك فالبوسة و عينيه الخضرين الى سرحتي فيهوم بحال سرحتي فشي غابة كولها خضرة و لونو الأبيض عطا جمالية لوجهو داير بحال بياض الثلج، عطا السوارت لراجل لمكلف بطوموبيلات و فيديه الدعوة لحضور الزفاف عطاها لكارد لي مكلف بأخذ الدعوات و دخل داير يديه فجيبو و رحيتو عاطية مجهدة كاتشم على بعد و رجولية بإمتياز الى شميتيها تبغي تعرف غير شكون مولتها، بقا غادي و مسرح عينيه فالمكان و كايرمش ببطء و متقل خطواتو حتا وصل لبلاصة الحفل و يقا غادي حتا ضور وجهو و شاف ياسمين جالسة فوق البرزة لابسة التكشيطة الحمرة و كاتبان خطيرة جذابة و مثيرة و فنفس الوقت محافضة على براءة وجهها، هزات هي راسها و جات عينها فعينو و تشد عليها قلبها تجمدات فبلاصتها حتا النفس ماقدراتش تطلعها و عينيها قربو يخرجو من بلاصتهوم، بكل هدوء مشا جيهتها تحت أنظار البنات لي دوخهوم من الشوفة و بغاو يعرفو شكون قتلهوم الفضول، وصل عندها و بابتسامة على وجهو مدي يديه لسليم و سلم عليه
غيث: مبروك
سليم: الله يبارك فيك
غيث: جاسمن مبروك (ماد يديه ليها)
ياسمين: (تحكمات فراسها) الله يبارك فيك
عطاهوم بالضهر و يديه فالجيب و بقا غادي متقل المشية و فكل خطوة كايديرها كايطيح قلوب لبنات معاه حيت هو لوحيد لي مرزن و متبت تما كولشي كايطير مع الطيور و لوحيد لي ماشاف فحتا بنت و زيادة على وسامتو لي كاتسحر الناس من الشوفة، وصل لطابلة خاوية و جلس فوق لفوطوي دار رجل فوق رجل و سرح يديه فوق الفوطوي و بقا كايشوف فياسمين و سليم و وجهو ماكايتفسرش.

تحط العشا فوق طوابل اش منك يا بسطيلة بالأنواع اشمن منك يا خرفان مشوية و زيد الدجاج محمر و العواصر و المشروبات الغازية بالأنواع، ضهر الرضا على وجوه الضيوف لي لقاو لماكلة لي حبات خاطرهوم و غيث بقا جالس بوحدو مابغاش ياكل و جابو ليه غير قهوة كحلة كايشرب فيها و كايشوف فياسمين لي بقات جالسة هي و سليم و مرة مرة كاتشوف فيه بلا ماتعيق قدام سليم.
حلا:(كاتاكل و نغزات لبنى) ماشي هو هاداك داك خضر لعينين!
لبنى: فين!
حلا: بلا ماتعيقي ق راه لجيك جيهة جالس بوحدو
لبنى: هيييه و الله الا هو اش كايدير هنا !
حلا: واقلة جا يبارك
لبنى: شوفي كيفاش كايشوف فياسمين و حتا لعشا ماحطوهش ليه
حلا: حتا هي كاتشوف فيه مرة مرة رضي لبال
لبنى: ياكما بيناتهوم شي حاجة!
حلا: ماكانضنش حيتاش كون بيناتهوم شي حاجة كون دارو غولاصيون
سعد: اش كاتقولو نتوما تما (فمو عامر)
حلا: لا والو 😅
كرم: احياااني عليكوم نتوما بجوج
لبنى: كاتضلمونا 😔
سعد: صافي ا حبيبة ماقلنا والو هاكي حلي فمك (وكلها)
كملو الناس لماكلة بعدما تحط ديسير و عمرو كروشهوم و الا عمرات الكرش كاتقول للراس غني، و ناضو كايشطحو و ناضت ياسمين باش تلبس اخر لبسة ليها لي هي الفستان الأبيض حيتاش لعدول جا و خاصها تتزوج، طلعاتها النكافة لفوق و جبدات ليها غوب بيضة طويلة مزيرة من لفوق بلا كمام عندها سميطات هابطين على لكتاف و منفوخة من لتحت بحال لكساوي ديال الأميرات و منبتة كلها بالأحجار اللامعة و فخصرها كاينة صميطة فيها وريدة بالأيض و الاحمر و عطاو للبسة جمالية و روعة و لبسات الطرحة و جاتها لور طويلة غطات ليها شوية فضهرها العريان و صدرها بقا عريان و لبزازل طالعين مشدودين طالعين لفوق، لبسات صباط ابيض طالون عالي و جا مغطي بسباب لكسوة و شافت راسها فالمرايا الطويلة لي عندها فالبيت و بقات كاتشوف فراسها اي وحدة كانت بلاصتها غاتكون فرحانة حيتاش لبسات لفستان الأبيض و غادي تتزوج الا هي، تنهدات تنهيدة عامرة بالحزن و خلاجوها النكافات و تلقا ليها سليم و تبهر بيها و شدها باسها فخدها
سليم: جيتي كاتحمقي
خشات يديها فيديه و هي غادة و متوترة و قلبها دقاتو غاديين و كايتزادو حتا هبطو لتحت و لقات لعدول جالس و حداه باها توفيق و اب سليم محمود و الناس بداو كايسفقو ليهوم وهي فينما كاتقرب كاتزيد تخلع اكتر و قلبها حسات بيه غادي يسكت حتا جلسو بجوج و لموسيقى حبسات
العدول: ياسمين التازي بنت توفيق التازي قابلة تتزوجي ب سليم العمراني ولد محمود العمراني على سنة الله و رسوله!
بقات ياسمين كاتشوف فغيث و هو جالس ماداير حتى رد فعل و كايشرب فقهوتو مبرد و هي تشوف فسليم لي عينيه فاضحينو من ناحية حبها ليه، يالاه بغات تنطق و تقول قابلة و تقطع الضو فالفيلا كاملة و كولشي تخلع
سعيدة: اهيلي اش طرا.... ربيعة ا ربيعة سيري شوفي الضو مالو
محمود: ماطرا والو غير تسناو غادي يكون غير شي عطل تقني
شعل ضو فجأة و تنفسو الصعداء و لقاو ياسمين ماكايناش فكرسيها و غيث جالس مبرد على وجهو ابتسامة
سعيدة: اويلي بنت فينها 😨 توفيق بنتي فينها
توفيق: سعيدة غير صبري 
سعيدة: ياسميييييين ... مييناااا فينك
سليم: مينة ياسميييين فينكييي!!!
ناض كولشي كايقلب و مخلوعين عليها و غيث خرج بكل برودة ركب فلوطو ديالو و ديمارا

☀أصبحنا و أصبح الملك لله☀
فاق غيث فكامل حيويتو و نشاطو عكس الأيام الأخرى لي كان كاينوض فيها خاسر خاصو غير معامن، دحل لدوش و دوش و هو كايدندن و ناشط و خرج لاوي عليه فوطة و كايصفر حل لماريو جبد تيشورت أسود و بوكسر أبيض و سروال ديال لكيطمة أسود فيه خط أبيض من الجناب من لحزام حتال لتحت، طل من الشرجم لقا لجو صاحي و الشتا مشات و شميسة كاتطل من وسط لغيوم، نشف شعرو بالفوطة مزيااان و طلعو لفوق و هز نضاضرو و لبس سنسلة ديالو كان عطاها ليه شهاب و ساعة فيديه من كارتييه، جبد سبرديلة كحلة فيها خطوط بالبيض زوينة فالشكل من نايك و جلس فوق لفراش و لبسها مع تقاشر بيضين و رش من ريحتو و هز تيلي و خرج ناشط كايدندن و هو يتلقا مع جوري غادة كاتعوج لابسة كسيوة حد الركبة فالبوردو بلا كمام و الصيكان عريانين و طالقة شعرها على طولتو و لابسة صباط طالون اسود و هو يهزها غيث و بقا كايضور بيها فرحان و هي كاتضحك عاجبها لحال و هو يحطها
جوري: ناشط ليوم!
غيث: بالسييف مانكون ناشط لي عندو هاد الزين ماينشطش 😉
جوري: الله يخليك ديما ناشط (باستو)
غيث: انا خارج (باسها)
جوري: اويلي فطر بعدا
غيث: لا غادي نفطر برا فطري غير نتي (باسها)
هبط غيث مع الدروج درجة يعفط عليها و تلاتة لا حتا وصل لتحت و خرج بالخف دار نضيضرات على عينيه و مشا جيهة لباركينك هز بورش مجبدة كحلة ماط و زاجها فيمي لي يشوفها يدوخ اخر موضيل، هز لكونطاك و ركب فيها و دار ليها سيلونس باش مايتسمع صوتها حيتاش مجهد و ديمارا و مشا مكسيري ماكايوقفش حتا فالصطوب حتا وصل لواحد من لوطيلات ديال عائلتو، عطا السوارت لراجل لمكلف و دخل داير يديه فالجيب و كايتنعكر عاجبو راسو و كايلعب بشفاه تحتانية و كايضربو ليه السلام حيتاش عارفينو شكون و دخل فلاسانسور ماوقف بيه حتال آخر إيطاج، الإيطاج لي ماكايوصلو حد من غير الخدم مخليينو للمالكين ديال لوطيل، حل لباب و دخل لواحد السويت زوين مصبوغ بالباج و فراشو بالقهوي لون غيث المفضل و سد لباب عليه و بقا غادي حتا وصل للفراش و بانت ليه ياسمين ناعسة فوق لفراش بكسوة ديال لعرس و وجها فيه لمكياج باقية كيفما هي و ناعسة على كرشها و وجها مضوراه و هو يقرب حداها دوز يديه بحنان على وجهها و هي ناعسة كيف لي بيبي و لبراءة طاغية عليها و هو يحس بيها بدات كاتفيق من تأثير المخدر لي دارو ليها و ناض تكا على الشرجم لي كولو زاج و كايطل على لمدينة كولها و على بعد ارتفاع شاهق

بدات كاتفيق و كتحل عويناتها و هي تكسل و حكات عينيها جلخات داك الضلال لي كانت دايرة و ولات عينها حالتها و تحل عينيها مزيااان و هي تشوف غيث واقف مقابل معاها كايشوف فيها و محيد النضاضر و ابتسامة على وجهو، بادلاتو الإبتسامة بلا ماتشعر كايصحاب ليها بلي راه غير كاتحلم حتا فيقها صوتو الرجولي الخشن
غيث: صباح لخير ا موكة
تحلو عينيها على وسعهوم و خرجو و هي ترجع بلور مصدومة و هي تنوض و جلسات لقات راسها بكسوة ديال لعرس
ياسمين: اويلي اش طرا فين انا فين العرس فين سليم شكاتدير نتا هنا😨
غيث: اي ! اسئلة بزااف واحد بواحد
ياسمين: اش كاتدير هنا و شكون جابني هنا! دوي 😡
غيث: بلا ماتبداي تعصبي و تعلي صوتك حيت راه الى جينا نعليو الصوت صوتي غادي يغلب
ياسمين: وا جوي ا بنادم اش كاندير هنااا
غيث:(ببرودة) انا لي جبتك هنا
ياسمين: اويلي 😨 و علاش اش بغيتي عندي
غيث: بغيت رشقات ليا عليك و توحشتك
ياسمين: توحشتيني و تخطفني نهار عرسي 😡
غيث: ههههههه اوا اش ندير انا هوكا
ياسمين: يا حليلي واش كاتضحك عليا 😡 انا غانمشي فحالي نتا تسطيتي
عطاتو بالضهر و بقات غادة هازة لكسوة ديالها و كاتنكر حتا وصلات للباب و لقاتو مسدود و رجعات ليه
ياسمين:(هزات صبعها فوجهو) بابا ماغاديش يعقل عليك و دابا غايكون كايقلب عليا هو و سليم و غادي يلقاوني و ماغاديش يرحموك
غيث: هههههههه واخا غادي يقلبو عليك هوما شكون بحالهوم تهناو من موكة سيري شوفي راسك فالمرايا راكي كاتخلعي
ياسمين: يخخخخ على بنادم
مشات مفقوصة لطواليط لقات وجهها مجلخ بالماكياج و حالتها حالة و هي تخرج و جلسات فوق لفراش و غصة فقلبها
ياسمين: (كاتهضر مكالمية) اش بغيتي عندي ياك خليت ليك كولشي و عطيتك بالتيساع 
غيث:(تقاد معاها و جلس قدامها) و انا مابغيتش داك التيساع توحشتك و بغيتك و مابغيتكش تتزوجي بغيتك تضحكي غير معايا و تهضري غير معايا و وقتك كولو يكون معايا
ياسمين: غيث عطيني بالتيساع راه مانسيتش ليك لهضرة لي قلتي فالكلينيك
غيث: سمحي ليا ماقصدتهاش و ديك لهضرة ماخرجاتش من قلبي
ياسمين: لهضرة خرجات و لي عطا الله عطاه فات لفوت باش تسحبها
غيث: (تنهد) بدلي حوايجك بعدا و مسحي وجهك راه كولشي فالماريو و زيدي معايا
ياسمين: فين تاني واش نتا خاطفني و كاتقوليا زيدي معايا
غيث: جاسمن ماغاديش نعاود لهضرة بزاف يا غادي تنوضي ولا غادي نوض ليك و نتي ختاري
ياسمين: اش فيديك ماتدير يالاه
شافتو بدا كايسوط و يحمار و عض شفافو لتحتانية كعلامة انه غادي يضربها و هي تنوض كاتجري للماريو جبدات لحوايجو و ديماكيون و لقطن و دخلات لطواليط مخلوعة و هو جار ليها هاكداك غير باش يخلعها اما هو مايقدرش يضربها.
مسحات وجهها من لماكياج و حيدات الطرحة و الكسوة و بقات بسليب فقط و لبسات سروال اسود لاصق عليها مع تريكو طويل مقطن فالرمادي و سبرديلة فرجليها رمادية و حلات شعلاها و حلاتو مطلوق مبوكلي و جمعات لحوايج و خرجات برا لقاتو كايتسناها، جمع لاغوب فبلاصتيكة و خلاها تما و بقات غادة و هو موراها حتا خرجو من سويت و شد ليها فيديها وهي تطلع معاها سخونية و قلبها تهز من بلاصتو واخا عقلها رافض هادشي لي طاري الا ان قلبها فرحان و كايشطح الشعبي، دخلو فلاسانسور و بغات تهرب يديها باش ماتبانش بلي سهلة لمنال و هو يحبسها صوتو
غيث: توتوتو ماتحاوليش يديك غاتبقا تما
ياسمين: طلق من يدي 😡
ياسمين: باش تهربي ليا لا غير خليها
تحل لاسانسور و خرجو منو و مشاو بإتجاه لباب و لقاو لوطو كاتسناه، حل ليها لباب بكل لباقة و طلعات و هي معصبة و دار بالزربة باش ماتخرجش و ركب و رجع شد ليها فيديها و بقا كايسوق بيد وحدة
ياسمين: اوففف طلق مني 😡 راه ماعندي فين نهرب
غيث: يدي عجباتها يجيك و بغات تبقا شاداها
ياسمين: الصمت

بقا غادي سايق و شاد يديها و فرحان و هي قالبة وجهها جيهة الشرجم و متكية عليه كاتشوف هادشي لفين غايوصل، شافتو بدا كايخرج على الرباط وهي تنوض مخلوعة
ياسمين: فين غادي بيا 😨
غيث: دابا تعرفي ا زين
ياسمين: اوففف مرضتيني ا غيث طلق يدي راه عرقات (كاتجر يديها)
غيث: (زير عليها) بلا ماتحلمي بب يديك غادي تبقا وسط يدي (شبك الصبعان مع بعضياتهوم) غادي يبقاو هاكدا بحال الا دايرة ليهوم لكولة
ياسمين: عائلتي ماغاديش ترحمك دابا تشوف 😡
غيث: ههههههههه واخا دابا نشوفو
قلبات وجهها تاني و هي عارفة ماكايناش نتيجة من المجادلة ديالهوم حيت هو اقوى منها و الا حاولات تهرب غادي تجيبها غير فراسها.
بانت ليهوم دار فالخرجة ديال لمدينة شبه كبيرة فمنطقة مهجورة عامرة برجال غيث و هو يقلب الطريق جيهتها و هي عينيها بغاو يخرجو من بلاصتهوم و هي تشوف فيه مبتاسم و داير نضيضراتو و مركز فسوقان حتا بلاصة لوطو و هبط منها و هي تحل لباب هبطات مخنزرة و هو يشد فيديها و جرها حداه و هي قالبة وجهها و دخلو لدار لي كانت زوينة و شكلها هادئ مع الدخلة كاين صالون مفتوح فيه شوميني كبيرة داير بالفوطويات و الا زدتي لقدام كاينة كوزينة كبيرة مجهزة بكولشي و كاينين دروج كايديوك لبرومي ايطاج لي فيه بيوت النعاس و حمامات.
دخل غيث كايتمشا و هو يتكسل
غيث: حسبي راسك بلي راه فدارك
ياسمين: (جات ليه) واش كاتضحك عليا 😡😡 غيث هاد الضحك لباسل ماعندي ماندير بيه رجعني لدارنا
غيث:(جرها حتا لسقات مع صدرو) نتي غاتبقاي معايا فينما كنت غاتكوني معايا
ياسمين:(كاتنتر) بعد مني عطيني بالتيساع 😡😡 طلقني ماتقيسنيش
غيث: هاهوا طلقك مع لوقت غادي تولفي 😉
ياسمين: (جلسات) اش بغيتي عندي وا عتقوني يا الناااااس (كاتغوت) عتقونييييي راه خاطفني (ناضت كاتجري لباب) عتقونييييييي 😡😡😡
غيث:(كايغوت) عتقوهاااااا عتقوهااااا غادي ناكلهااااا عتقوهاااااا ههههههه حبيبة غير انا وياك لي كاينين هنا 😉
ياسمين:(طاحت فالأرض كاتفركل) اهئ اهههههئئئ 😭😭😭 اش بغيتي حشومة عليك اهئئيييئئئ اهههئئئئيييئئ 😭😭
غيث:هههههه ماجاوش معاك دموع التماسيح، لمهم كولشي كاين فالكوزينة الا بغيتي شي حاجة راه تما و طلعي لفوق ختاري لبيت لي بغيتي و رتاحي شوية
ياسمين: الصمت
غيث: (تجبد) ااااح الله على راحة (غمض عينيه)
شافتو ياسمين تجبد و هي تنوض ليه تلاحت على كرشو و زواتو واخا طاكاها و هي تطير عليه بغات تقجو و هو كايضحك كايبعد وجهو عليها و كايبعد يديها
غيث: ههههه باغة تقتليني
ياسمين: موت و هنيني منك من نهار عرفتك وانا لور لور
غيث:(شد ليها يجيها و تقلب جات هي لتحت و هو فوقها) و انا من نهار عرفتك و انا لقدام (باسها فخدها) مقلقة على ديك لهضرة لي قلت ليك راه قلت ليك سمحي ليا
ياسمين: ماكافياش هاد لكلمة 😡 نوض من فوقي و ماتعاودش تبوسني 😡
غيث: فاش بستيني نتي ماقلت ليك والو، اش بان ليك نعاودو بحالها 😉
ياسمين: لااا 😨 بعد مني 😡
بقا كايقرب منها ببطئ و عينيه مفيكسيين على شفايفها الكرزية المنتفخة و هي جمعاتهوم لك داخل و ضغطات عليهوم باش مايلقا مايبوس و هو يقلب الطريق وخشا راسو فعنقها و باسها فيه و هي تهر
ياسمين: بعد مني 😡😡
غيث: راك حلوة هههه (سمع الدقان) ها لحوايج جاو 
ناض من عليها و مشا حل لباب و هي توقف حتا هي معصبة و مشات كاتجري للباب و هي تلقا سليم واقف هاز فاليز

ياسمين:(مشات كاتجري عند سليم) سليم جيتي 😭😭 عافاك عتقني منو راه خاطفني (عنقاتو) سمح ليا راه ماشي بخاطري انا باغة تنزوج بيك راه هو لي خطفني 😭😭
سليم: شششش (حط لفاليز و كايدوز يديه على ضهرها) كولشي غايكون مزيان ا مينة ششش يالاه بلا ماتبكي باش نهضرو (حبدها منو و هز ليها راسها مسح ليها دموعها) خليني ندخل بعدا و نهضرو
ياسمين: اويلي فين غادي تدخل وا زيد نهربو 😨 راه هاد لحمق ماشي بعيد يقتلك هنا
سليم: ههههههه يقتلني كاع ماتخافيش غيث ماغاديش يدير ليا شي حاجة (شاف فغيث) ياك!
غيث:(مربع يديه و مقابل معاهوم) ههههه هاديك راه حمقة ماتديش عليها
ياسمين: اويلي اش هادشي 😨 واش متافقين عليا باغيين تغتاصبوني (بعدات من سليم و هربات مور لفوطوي)
غيث: واعععععع 😂😂😂 سليم هادي بزاف و الله
سليم: كاتخيلي بزاف نتي 😂😂 مينة يا مينة ديري عقلك 😂 واش فنضرك انا غاندير شي حاجة تضرك
ياسمين: اوا شنو بيناتكوم
سليم: جلسي بعدا باش نعاود ليك
ياسمين: هاهيا جلسات (كاتنخصص)
جلس حداها سليم و مشا غيث لكوزينة باش يشرب لما حيتاش ياسمين قتلاتو بالضحك
سليم: شوفي ا ياسمين ديري معايا عقلك مزياان اوكي.... تعقلي نهار لي خرجنا باش نشريو لحوايج !
ياسمين: وي (كاتمسح دموعها)
سليم: بعدو بنهار جا عندي غيث انا و توفيق
ياسمين: 😨
#فلاش_باك
بعد لهضرة لي قال شهاب لغيث تأكد من مشاعرو تجاه ياسمين و عرف راسو كايبغيها و لكن ماشي لدرجة حبو لزمرد و لكن حب ياسمين نساتو فزمرد فوقت قصير و خدا قرار باش تبقا ليه، غير طلعات الشمس و صبح الصباح و بداو ناس كايتحركو و كل واحد فين غادي، خرج غيث فأبهى حلة كيف عادتو وديمارا ماوقف تال عند الشركة ديال اب ياسمين و اب سليم و طلع ديريكت للبيرو ديال توفيق بعدما عرفوه شكون هو ماقدروش يرجعوه بحجة ماعندكش رونديفو حيتاش عارفين غادي يقلب عليهوم تما و ماغاديش يقدرو يرجعو ليه الصرف.
دخل للبيرو و ناض توفيق سلم عليه بعدما قالو ليه شكون هو و رحب بيه و جلس هو وياه
غيث: شوف ا مستر توفيق لي نطولوه نقصروه انا صديق ياسمين لي مشيت معاها لبورتوريكو و بنتك كاتبغيني و انا كانبغيها غير طرا موشكيل و ماعتارفتش ليها و خدات هاد لقرار لمتهور ديال الزواج من سليم و راه تقدر تشوفها فوجهها بلي مافرحاناش، لمهم انا جيت باش نقولك بلي انا غادي نخطف بنتك نهار لعرس قبل ماتتزوج و قلت من الأحسن تكون فخبارك باش ماتخلعش عليها و غادي تكون فأيدي أمينة و غادي ترجع ان شاء الله بقرار انها تتزوج بيا عندك شي اعتراض
توفيق: ماعنديش لمهم عندي تكون بنتي فرحانة سي تو... فرصة سعيدة مسيو غيث (مد يديه)
غيث:(بتاسم) فرصة سعيدة (سلم عليه)
خرج غيث بعدما تهنا من واحد الجيهة و تأكد بلي توفيق لاحظ لحزن على بنتو و مايقدر يقول والو ليها، مشا لبيرو ديال سليم و دخل و هو يشوفو سليم و تصدم و جلس فوق لكرسي بلا إذن
غيث: غادي نقولك شي حوايج و نتمنا تفهمهوم، اولا انا كانبغي ياسمين و هي كاتبغيني و نتا راك عارف هادشي و الا كنتي بصح كاتبغيها غادي تخليها تشوف مصلاحتها ماشي تربطها معاك باش تكون نتا سعيد و لاموغ ماشي غير هو تبغي الشخص فقط لاموغ هو تبغي الشخص لي تكون معاه يكون سعيد و نتا عارف ياسمين ماعملاها غاتكون سعيدة معاك، ها لكارط فيزيت ديالي فيها نمرتي نهار تبدل رأيك عيط ليا و بليس انا غاندير شرع يدي و باباها راه موافق يعني من الأحسن تشوف مصلحة لكل
ناض خرج و رجع منين جا و خلا سليم فصدمة لدرجة لسانو تعقد ليه.

سليم: و من بعد عيطت ليه و قاليا لبلان لي داير
حذف سليم داكشي لي بغا متلا كإعتراف غيث ليه بحبو ليها حيتاش هو بغا يعتارف ليها بطريقتو و تسمعها من عندو هو ماشي من عند سليم، و ياسمين بقات مصدومة ماعرفاتش ماتقدم ولا توخر
ياسمين: مي ياك كاتبغيني لاش خليتيني
سليم: اه كانبغيك و نطلب من ربي ينسيني هاد لاموغ، كون تزوجنا كنا غادي نعيشو تُعساء حيتاش نتي ماكاتبغينيش و معتابراني مجرد صديق، لمهم ها نتي مع غيث هنا و ها حوايجك فالفاليز و كاع دوك لكريمات و داكشي و تهلاي فراسك مزيااان راكي فأيدي أمينة (باسها بحرارة فجبهتها) بسلامة عليك
ناض و خلاها حايرة و مشا عند غيث لكوزينة
سليم: راه تسمح فيها ولا تدير شي حاجة تقلقها غادي ناخدها منك
غيث: لا ماتخافش ميغسي (مد يديه)
سليم: تهلا فيها (سلم عليه)
خرج سليم و بقاو غير هوما فالدار و ياسمين مكمشة فوق فالفوطوي تالفة و هو يجي حداها غيث
غيث: مالكي!
ياسمين: لاش درتي هاكدا!
غيث: حيتاش.... (كايحك جبهتو)
ياسمين: حيتاش اش ! كانتسنا جوابك
غيث:(شاف فيها مطولا و رجع خصلة مور ودنيها و شدها من الذقن ديالها) حيتاش كاتعجبني ريحتك نشمها و كايعجبني هبالك و كايعجبني نخرج معاك نضحك معاك و نطيب معاك و نخلعك، و كايعجبني شعرك و لون عيونك و شفافك (حط صبعو على شفافها) و براءتك و صوتك و حلاوتك
ياسمين:(ناضت) و من بعد ! انا ماكايهمنيش هادشي (ردات لبال لي جزء منو محلول) و هو فالصراحة هادشي لي قلتي زوين ا غيث و الله (غادة جيهة لباب) و لكن كيفما عارف لهضرة لي قلتي قاصحة شوية و ضراتني فخاطري
بدون سابق إنذار جرات لبوانيي و حلات لباب و طلقات رجليها لريح و بقات كاتجري و غيث شافها و خرج حتا هو و لقا لي كارد بغاو يشدوها
غيث: بعدو منها خليوها يقيصها شي واحد نحييي مووو 😡😡😡
رح جعو لي كارد فحالهوم و تبعها هو بالجرا حيتاش مابغا حتا واحد يقيصها ولا يقرب منها و هي كل شوبة كاتلفت تشوف واش قلب حتا لقاتو قلاب يشدها و طلقات زواكتها
ياسمين: هييين اههيههئئييين 😭 بعد منييييي
شدها غيث و حكمها و هي كاتركل و شعرها كايطير معاها و هو شادها و مخليها كاتركل و رجعها لدار و طلعها لبيت النعاس و حطها فوق لفراش كاتفركل بحال دجاجة و كاتهرنن و هو يحمر فيها عينيه
غيث: سكتي 😡😡 حمقة نتي 😡 فين هربانة لوالديك ا دوي
ياسمين: بعد مني 😭😭😭 اش بغيتيني لاش خاطفني 😭
غيث:خاطفك حيتاش كانبغيك 😡 و بغيتك ليا فهمتي ا لحمارة 😡
ياسمين: نتا ماكاتبغينيش نتا كاتغي خاطيبتك الميتة بلا ماتكدل عليا
غيث: (تنهد و جلس حدها ) متغاديش نقولك بلي نسيتها لي دوزت معاها ماشي قليل راه 4 سنين ديال لاموغ و لكن نتي جيتي بسرعة و نسيتيني فيها و عمرتي بلاصتها مي ماكانبغيكش بدرجة باش كنت كانبغيها مي لقلب عامر بيك نتي و هي بقات مجرد ذكرى
ياسمين: الا كايصحاب ليك غادي تضحك عليا بهاد جوج كليمات راك مشيتي غالط كاتبغيني و كاتبغيها اش هاد الروينة
غيث: وا ماكنبغيهاش بقات مجرد ذكرى الله يرحمها ماعمرني شفت منها شي حاجة خايبة كانبغيك نتي 👈🏼 فهمتي
ياسمين: مامسامحاكش على هضرتك
غيث:(ناض) لمهم انا خارج شوية و غانجي بلا ماتبرهشي تاني (خرج)
ياسمين:(ناضت) ياحليلي كايبغيني 😍😍 فرحي يا لالة سعدي يا لالة غيوش كايبغيني 💃🏻 ههههه و لكن و الله لا سمحت ليك دغيا نخليك تبوس اليدين و الرجلين عاد نسمح ليك مالنا كانلعبو هنا

ناضت طرمتها كاتصفق بالفرحة و قلبها كايشطح بالفرحة و خدات راحتها فالدار و غادة مسرحة رجليها كاتمنضر فالدار و عجبها الديكور ديالها و دخلات لبيت حدا بيتها لقاتو مصبوغ بالأسود و ريحتو ريحة غيث و دخلات سدات عليها لباب و بقات مسرحة رجليها بيت كبير شوية فيه فراش فالوسط فالرمادي و حداه كوافوزات و ماريو فالأسود حلاتو و لقات حوايج غيث مستفين و مطويين مقاديين بلاصة لسراول و بلاصة للقوامج و بلاصة لتريكوات، و عاد الصماطي، كولشي منضم ، مشات لكوافوز لكبير فيه مراية كبيرة و محطوطين الروايح ديالو و لي برودوي لي كايستعمل و هي تهز الروايح وحدة بوحدة حتا لقات هاديك لي كاتشمها بزاف فيه و رشاتها عليها و هي قلبها كايفرفر ماعمرها ماتوقعات غادي تبغي شي واحد و نهار دق قلبها بغا واحد عايش على ذكرى خطيبتو الميتة و واخا بغاتو ماضناتش بلي غادي يبادلها نفس الشعور.
خرجات من بيتو و على وجهها نضرة رضا و مشات لبيت وحداخور مابغاش يتحل ليها و هبطات للتحت لقات لفاليز و هزاتها طلعاتها لبيتها و حلاتها و لقات فيها لبرودويات ديولها و كريماتها و جزء من حوايجها ديال الدار و ديال الزنقة، هزات داكشي و ستفاتو فالماريو و حدا لكوافوز و هي تسمع كرشها كاتغرغر و تفكرات بلي ماكلات والو من لبارح و مشات لكوزينة حلات لتلاجة جبدات كاشير و لفرماج و لبيض و شعلات لبوطة و قلات لبيض و لاحت عليه طروفة ديال لكاشير و لفورماج حتا ولا داكشي كايتعلك و ريحتو عطات و هو يدخل غيث محمل ببلاستيكات فيهوم لماكلة و شم ريحة
غيث: الله هادشي زين (دخل عندها لكوزينة وقلبات وجهها) حبيبة صايبيلي معاك (حط لبلاستيكات)
ياسمين: عندك يديك صايبو راسك (كاتعوج)
غيث: ياك ا حبيبة ماشي حشومة طيبي ليا و نطيب انا لغدا
ياسمين:(كاتاكل) بااي
مشات كاتعوج و بلعاني كاتلوي طرمتها قدامو و كاتلوي فشعرها و كاتدير شي حركات باش تثير إنتباهو و هو فكل حركة كاتديرها كايدوخ و قلبو كايطيح فيها أكثر و أكثر.
مشات لصالون كاتاكل و كاتبنن و كاتدير اصوات كاتعبر على لذة لمذاق ديال لماكلة و ماشي بإرادتها داكشي عفوي و هو كايسمع الأصوات و مغرق راسو فالكوزينة و كايطيب لغدا و قلبو كايضرب بحال الا كايجري.

غيث: نقصي من دوك الأصوات راه غانجي ليك
ياسمين:(بتحلوين) اوا انا هاكدا كاناكل ماعجبك حال رجعني لدااااري
غيث: ماغاديش تمشي من هنا حتا تسمحي ليا و نرجعو كيف كنت و حسن و تكوني ليا
ياسمين: اوا بقا تحلم
غيث: اجي عاونيني حشومة تخلي حبيبك فالكوزينة بوحدو
ياسمين:(بتبعكيك) مابغيتش (عوجات فمها)
غيث: نقصي شوية من التحلوين راه سخنت ا لعفريتة
ياسمين:(كاتلوى) اوا انا مالي انا طالعة لبيتي ننعس شوية و نرتاح
غيث:(حط لخضرة من يديه) نطلع نعاونك فالنعاس 😉
ياسمين: هاهاها نو ميغسي مامحتاجاكش خاصني انا شرف هو لي غادي يعرف ينعسني (عاطياه بالضهر و غادة و كاتهضر)
غيث:(زعف) و الله يا والديك و تجبدي ليا باقي داك لحمار يا حتا ننن....😡😡😡
ياسمين:ن... آش! اش اصلا عندك ماتدير بففف ( طالعة مع الدروج)
مشات و خلاتو واقف كايسوط و راسو سخون و لحمو سخون هيجاتو بتصرفاتها ، بدا كايلعن الشيطان و هو يكمل خدمتو، أما ياسمين فغير طلعات لبيتها و هي كاتشطح و تغني فرحانة و هي تهز بيجامة شورط صغير قصير بزاااف مع ديباردور ديالو فالشيبي مفتوح و دو بياس فالأبيض و هزات كريماتها و دخلات لدوش و دوشات حيدات عليها لعيا ديال لعرس و لبسات داكشي و و لوات شعرها ففوطة لقاتها تما و خرجات وجهها بيض كاتضوي و حنيكات حميمرين و لون عينيها بارز و باين و هي تهبط كاتكسول
غيث: حبيبة هبطي راه لغدا طاب
ياسمين: غير بشوية انا حداك و نتا بغواتك غاتريب هاد الدار
غيث: الزين خارج من دوش و ريحة لورد عاطية منو
ياسمين: اش طيبتي (قلبات وجهها)
غيث: شويت لحبيبتي الضلعة و درت سالاد من لخضرة باش تبقا حبيبتي محافضة على هاد لفورمة و ماغلاضش
ياسمين:(جلسات) انا ماشي حبيبتك
غيث:(جلس حداها) حبيبتي و حياتي و روحي
ياسمين:شفتي هادشي كولو ماموكلش معايا لخبز هضرتك جامي ننساها
غيث:(تنهد) واخا غير كولي دابا شوية و لهضرة من بعد
بدات كاتاكل بالفورشيط و لموس بكل لباقة و ايتيكيت و كاتمضغ مزيان عاد تسرط بكل أنوثة و غيث متبعها فحركاتها و فرحان و كاياكلحتا سالاو و ناضت خلاتو و مشات جلسات فوق لفوطوي
غيث: ماكاينة ميغسي ماكاينة طيابك زوين ماكاين والو!
ياسمين: باسلة داكشي ماطايبش مزيان
غيث: اوا ميغسي
ناض جمع لماعين و حطهوم فالجلاية و خرج و خلاها بوحدها ضار لور ديال دار كاين كاراج داير فيه مرسم تاني ديالو و دخل كايرسم و كايفرغ داك لغضب ديالو فالرسم و بقا تما شي ساعتاين حتا عمر بالصباغة و كمل اللوحة لي كانت عبارة عن منزل ياسمين بالتفاصيل المملة، حس براسو تكالما و دار هاكدا باش مايديرش شي حاجة يندم عليها و هو كايحاول يرجعها جيهتو و نساحب باش ماتنوضش حرب بيناتهوم.
رجع لدار و مالقاهاش لتحت طلع بشوية دخل لبيتها لقاها ناعسة على كرشها و شعرها نشف مليوح حداها و سد لباب و مشا لبيتو حيد حوايجو بقا غير بالبوكسر و لبس كابيتشو كحل محلول شوية من الصدر و سروال ديال لكيطمة و دار كاسكيط و لكيت و تيلي و خرج باش يجري

مشا كايجري فالخلا حتا عيا و رجع لدار دوش و لبس شورط رمادي و تيشورت لفوق و طيب لماكلة و كلا و طلع عند ياسمين لقاها باقة ناعسة عيا مايفيق فيها و لاهي بغات تفيق، هبط كلا غير هو و خلا ليها حقها مغطي و مشا لبيتو بقا خدام فالبيسي حتا نعس و مسورت باب الزنقة و ماعندها منين تهرب، فنص ليل فيقاتها معدتها و هبطات كاتقلب على ماتاكل حتا لقات لماكلة لي غلا ليها غيث و ساطت فيها كاملة ماخلات والو و طلعات رجعات نعسات.
دازت أربع أيام و هوما على هاديك لحالة فينما يجي يحزرها و يغازلها حتا كاتضور فيه و كاتخليه يندم و هو لي كايطيب و كايدير كولشي غير باش تبقا على خاطرها و هي دافعة كبير و كاتهضر منفخة و تقمع و تغوت عليه حتا مرضاتو بهضرتها.
ناضت ليوم كيف عادتها معطلة بشوية عليها غسلات وجهها و قضات حاجتها و حكات سنانها و هبطات كاتعوج لقاتو جالس لابس سروال كحل مع تريكو كم رمادي مغلوق مزير عليه و صباط موكاسان كحل فرجليه و كيف لعادة الريحة كاتضرب منو و شعرو واقف و جالس كايفطر و كايهضر فتيلي و مبتاسم
غيث: وي روجينا.... هههههه.... هي جيتي !... اوا على سلامتك....ههههه كيف خليتي ناس كوريا... باقيين كايتشابهو... هههههه لا انا ماشي فالفيلا انا فدار برا لمدينة مريح شي يامات هنا و قريب غادي نرجع لدبي و نخوي هنا فخطرة (شافت فيه ياسمين) ... اوا ضاروري... نتي فين... اوكي من هنا ل ساعة نكون عندك... يالاه باي
سمعات ياسمين لحوار كامل و وحلات ليها الدغمة ماقراتش تهبطها و كاتحاول ماتبينش ماعرفاتش شكون هاد روجينا ولاش غايمشي غيث فحالو و هي مشطحاك كيفما بغات، ناض جمع لوقفة و خرج و خلاها مصدومة ماعرفاش ماتدير و حتى الشهية تسدات ليها و هي تنوض طلات من السرجم لقاتو مشا و هي تزير فقلبها
ياسمين: اويلي 😨 فين مشا هادا و شكون هاد خيتي لي خلاني علة قبلها اهيييييييييئ 😢😢 ياكما بدلني دغيا  😨 لا لا غيث بعقلو مايديرش هاكداك اويلي فين مشا و زاد كملها غادي لدبي واش بغا يسطيني و انا لمن غايخليني 😨😨 انا لي حمارة جا عندي و كايطلب فيا و كانقمعو حمارة انا 😭😭 يا ربي اش ندير و هو بوكوس دغيا يطيرو بيه و يديوه.
بقا غادة جاية و خاطرها مامهنيهاش سمحات فالماكلة و سمحات فالنعاس و بقات غاجة جاية حتى سمعات الدقان و مشات كاتجري و تحل عليها لباب لقاتو واحد من لي كارد
....: ماجام مسوي غيث بغا يدوي معاك
خدات تيلي من عندو و بدات كاتسمع صوت شي بنت حداه كاتضحك و هو كايهضر
غيث: بلا ماتسنايني نجي نطيب مامساليش طيبي بيض و كوليه
روجينا: ههههه غيث قطع و كمل ههههههههه
غيث:(مع روجينا) وا صبري هههه الو جاسمن سمعتيني !
ياسمين:(بقوة) سمعتك
قطعات عليه و عطات تيلي للكارد و سد لباب عليها و طاحت كاتبكي و كاتشهق حيت هي ماشي من عادتها تبين ضعف ديالها لشي واحد و واخا ضعفات قجامو و داكشي لي سمعات ضرها فقلبها الا انها مابغاتش تبين ليه.

يتبع

أجزاء القصة
كايتنشرو القصص و الاجزاء كل يوم ابتداءا من 8 دالعشية بتوقيت المغرب
9isas maghribiya bdarija قصص مغربية بالدارجة قصص و روايات بالدارجة المغربية
DMCA.com Protection Status رخصة المشاع الابداعي