إنه جنة في عين العاشق الولهان الذي يتواجد قرب حبيبه
و لعنة على من تركه الحبيب و مضى
لا ألومك على هجرانك لي
بل ألومك لأنك وعدتني بالبقاء طول الحياة
صعب، صعب أن تتواجد بقربي ولا أستطيع أن ألمسك، أضمك، أقبلك
آهٍ ، آهٍ يا قلبيَّ المسكين
أدخلتك متاهة من الحزن و العذاب و الألم
أنت تعرف أنني لم أقصد ذلك
أعتذر لك أشد الإعتذار و أتمنى أن تسامحني في يوم ما يا أيها القلب الدامي
غُرِست فيك خناجر البعد و الهجران
حتى أصبحت وحيدا، حزينا، و مجروحا
لا أستطيع القول أن نار البعد تؤرقني
و لا أستطيع القول أن النوم لا يزور جفوني
و لا أستطيع القول أن حبّك في القلب بات يرهقني
و لكن أستطيع القول إمضي في سبيلك و لا تنظر خلفك
سأعالج قلبي الدامي بنفسي
أعدك، سأكون بخير مع مرور الوقت
شكرا لأنك أحببتني
و شكرا لأنك عذبتني
في غرفة مظلمة كئيبة لي دخلها كايجيه الحزن بالجو لي فيها، ضو واحد لي فيها خارج من تلفاز كبير معلق فالحيط فيه تصاور ديال بنت فمقتبل العمر شابة جميلة ذات ملامح عربية سمراء الوجه عندها جسم منحوت شعر طويل أسود من الليل و عيون بنية كبيرة و مرمشة و خدود وردية و غمازة فخدها الأيمن.. بقاو الصور ديالها كايتبدلو بوحدهوم حتا وصل واحد لفيديو ديالها فيه هي و واحد الشاب طويل سليم البنية أبيض البشرة كتافو واسعين عريان من لفوق و ماباينش وجهو و هاز لبنت فوق ظهرو و هازة تيلي و دايرة فيديو سيلفي و كاتهضر و كاتضحك و كاتبوس الشاب لي هازها فعنقو و هي لابسة 2 بياس ديال لبحر.
بقا غير صوت لبنت لي كايتسمع فالبيت الكئيب شوية ناض شاب كان فالبيت لابس كولشي كحل و فالظلام ماكايبانش هز قرعة كانت حداه و لاحها فجيهة الشرجم و تهرس الجاج و بقا داخل ضوء خفيف و هو يبان الشاب كاينهج و معصب و حادر راسو عندو لفورمة ديال الشاب لي كان فالفيديو و هو يهز راسو و هوما يبانو عينيه خضرين و وجهو الأبيض و شعرو الأسود و لحيتو السوداء الخفيفة المبعثرة....شاب وسيم بكل معنى الكلمة و لكن عينيه ذبلانين و الحزن باين عليه و الدمعة على طرف عينو.
بالزعفة خرج من لبيت و زدح لباب و هبط مع الدروج كايزرب و كايعفط على درجة و جوج لاا حتا هبط للأسفل و هو يخرج من لباب الرئيسي للفيلا و مشا للباركينك هز لكونطانك و ركب فطوموبيل من نوع بورش مجبدة من لقدام على شكل لفيراري سوداء و ديمارا و مشا مكسيري كايتسمع غير الصوت ديالها و خلا الريح موراه... فهاد الأثناء كانت مرا واقفة فالبالكون ماطويلاش بزااف شعرها الأسود جامعاه على شكل كعكة و كاتشوف بحزن و حداها راجل كايفوقها فالحجم أضعاف فشعرو شوية ديال الشيب و كايدوز يديه على ضهرها
....:غير خليه مرحلة و غادي تدوز
.....:ولدي ا شهاب ولدي غادي يضيع مني
شهاب:ششش حبيبة ماتقوليش هاكداك ولدك ولا راجل و قاد بشغلو عذريه راه خطيبتو ماتت
جوري:حاسة بيه و لكن راه قلبي كايتقطع عليه
شهاب:عارف بب (عنقها) مع الوقت غادي ينسا
مشا الشاب الحزين لحدا لبحر و جلس تما فوق كرسي و مقابل مع لبحر و كايشوف فيه بعيون حزينة و ذابلة و كايتنهد كل شوية و باين فالملامح ديولو لحزن و الناس حداه غاديين جايين و هضرتهم هضرة عربية و بالتحديد الدارجة... بقا جالس تما مدة طويلة و كايشكي للبحر حتا ظلام لحال و هو يركب فلوطو ديالو و رجع للفيلا ديال جدات جوري (الزهرة).
دخل مع لباب و لقا عائلتو جالسة فالصالة كل واحد مشطون عليه... دخل شاف فيهوم و هو يزيد و هي توقف جوري
جوري:غيث اجي ا ولدي بغيت نهضر معاك
غيث:(وقف) واخا ا لواليدة
رجع عندها واخا ماباغي يهضر مع حد غير ماقدرش يخسر ليها خاطرها حيت كاتبقا الأم ديالو و هي السباب حتا جا لدنيا... جلس قدامها و مشا كولشي بقا غير شهاب و جوري و غيث قدامهوم جالس مفرق رجليه و حاط يديه عليهوم و حادر راسو
جوري:حتال إيمتا غاتبقا ساد عليك راك داير كيف الشمعة كل نهار كاتطفا شوية
غيث:(الصمت)
جوري:عارفة بلي يوميا كانقولك هاد الهضرة من نهار ماتت زُمرد و لكن عذرني راه نتا ولدي و قلبي كايتقطع عليك
غيث:(الصمت)
شهاب:انا حاس بيك فقدان شخص كاتبغيه صعيب بزاااف و لكن هادا قدر الله و ربي بغاها و عنداك تلوم راسك راه هادشي قدر الله
غيث:لواليد تقدر تعيش بلا لواليدة نهار واحد!!
شهاب:(كايحك جبهتو) لاااا
غيث:(وقف) حتا انا نفس الشيء زُمرد كانت كولشي بالنسبة ليا و كولشي مشا فلحظة و بسباب التهور (وقف) ماتخافوش عليا انا ماغاديش نتبلا بشي حاجة راه عندي 26 عام و عارف اش كاندير و خدمتي غادي نقابلها غير من هنا و إلى بغيتو ترجعو لبرازيل رجعو انا قاد براسي لمهم تصبحو على خير
مشا و خلاهوم جالسين و حرقة فقلبهوم و طلعو لبيتهوم حيت عارفين بلي غير كايخويو الما فالرملة و شهر هادا باش ماتت و نفس الهضرة كايعاودوها و ماكاينة حتا نتيجة.
دخل غيث لبيتو و حيد حوايجو و لبس شورط أسود و بقا عريان من لفوق و طفا التلفازة لي خلاها شاعلة فاش خرج و تجبد فوق الفراش و بقا حال عينيه ماجاهش النعاس
صبح الصباح و طلات الشميسة ديال فصل الربيع بأشعتها الذهبية على المغرب بالتحديد مدينة الرباط و دخلات من الشرجم المكسور لي فبيت غيث و هو مصطح على ضهرو و حال عينيه ليل كامل مانعس ماشاف نعاس... ناض من فراشو و غسل وجهو و حك سنانو البيضين و هز لكاسك و دارو فوق راسو و طلق لموسيقى و هبط لاصال لابس غير الشورط و لفوق عريان ... دخل لاصال و بقا كايتريني و كايفرغ الغضب ديالو و الحزن ديالو فالحديد حتا حس براسو عيا و هو يخرج من لاصال و طلع لبيتو دخل لدوش و حيد حوايجو و طلق الرشاشة و وقف تحت منها و مد ذراعو و تكاها مع لحيط و لما هابط عليه و هو مغمض عينيه و كايتخيل زمرد كاتضحك و كاتجري قدامو و هو يحط يديه على قلبو و بداو دموعو كايهبطو بلا مايشعر و لما لي فوقو كايطفي عليه شوية ديك النار لي فداخل قلبو....بقا شحال و هو هاكداك حتا حس براسو شوية رتاح و غسل شعرو و نقا حالتو و خرج من الدوش لاوي عليه غير فوطة و الما هابط من صدرو الأبيض الرياضي و العضلات ديال كرشو مستفين وحدة وحدة و شعرو الأسود هابط عليه فازك... نشف راسو و مشا للماريو غير حلو و هي تضربو الريحة لي كانت كاتستعمل زمرد حيت كان كايعجبها ترش ريحتها فحوايجو... غمض عينيه و بقا كايشم فيها و النار لي فقلبو مابغاتش تطفا و مابغاش يتقبل بلي زمرد ماتت... بقا مدة قدام الماريو مغمض عينيه و كايشم فالريحة حتا فيقو صوت رجولي خشن ديال شاب طويل و عامر فالفورمة ديالو شعرو كحل و عينيه كحلين و أبيض البشرة و لحيتو كحلة مطراسية داير ساعة كحلة فيديه و لابس سروال ديال الجينز أزرق و قاميجة فالبلو مارين ساد ليها الصدايف ماعدا تلاتة ديول لفوق و بقا جزء من صدرو عريان و طاوي الكم و يديه عامرين و مزغبين
.....:صباح لخير
غيث:الصمت (باقي فنفس البوز)
....:مابغيتيش تجاوب خوك لكبير
غيث:ليث والله ماعندي مورال (مغمض عينيه و كايهضر)
ليث:(جا حداه) الله يهديك ا خويا راه زمرد ماتت الله يرحمها دعي ليها بالمغفرة و الرحمة و الحزن ديالك ماغاديش يرجعها
غيث:الصمت
حل عينيه و هو يجبد سروال أسود و جبد معاه تيشورت أسود سامبل لكول على شكل v و بوكسر و دخل لدوش باش يلبس و خلا ليث واقف حدا لماريو كايتحسر على خوه... لبس حوايجو دغيا و خرج مشا حدا لمرايا هز ساعتو و دارها فيديه و دار نضاضر فوق راسو و خلا شعرو هاكداك فازك حيت لجو دافيء حيت هوما فشهر 5 ... هز سبرديلتو الكحلة و لبسها و خرج من لبيت و خلا ليث تما واقف حاير هبط لتحت بالخف لقا عائلتو مجموعة على لفطور و شاف فيهوم
غيث:السلام عليكم
جوري:و عليكم السلام...فين غادي اجي تفطر
غيث:(وقف)مافياش الجوع غير كولو نتوما
تحرك بالزربة باش ماتقولش جوري شي حاجة و مشا لباركينك هز لكونطاك ديال لوطو ديالو و ركب فيها و ديمارا
ليث:(باس ليها راسها) ماغاديش يضيع غير مرحلة حزن و غادي تمشي غير صبرو عليه شوية و عذروه راه خاطيبتو ماتت و 4 سنين و هوما كايبغيو بعضياتهوم (جلس حدا قمر)
جوري:(تنهدات) باقي صغير على هادشي
شهاب:هذا قدر الله و ماعندنا مانديرو
قمر:فين مشا دابا هو
ليث: و الله ماعرفت دوا معايا غير شوية و لبس حوايجو و هبط خلاني فالبيت بوحدي
جوري:توحشت ولدي أما هادا راه ماكانعرفوش ولدي البسمة و الضحكة ماكاتفارقش وجهو
شهاب:غادي يرجع إن شاء الله كيف كان و حسن كاع (كايدوز يديه على ظهرها)
جوري:أميين يا ربي 😞
كملو فطورهوم و ناضو كل واحد فين مشا و خرج ليث و قمر بجوج مع بعضياتهوم و ركبو فلوطو و خرجو من لفيلا حتا بعدو عاد شدو فيدين بعضياتهوم و مشاه بإتجاه اوطيل كبير فالمدينة...وصلو ليه و حطو لوطو و دخلو ليه و حجزو سويت و عطاوهوم لكارت و دخلو ليه بجوج و هي تلاح قمر فوق لفراش
قمر:اوفففف اخيرا غادي نتصرفو كيف بغينا
ليث:تحملي ا حبيبة شوية (جلس حداها) راكي عارفة فاش بغيت نعاود ليهوم علينا ماتت زمرد و راك شفتي كولشي كيف دايرين حالتهوم حالة و ماجاتش نقولها ليهوم
قمر:عارفة بب... و لكن انا عندي 23 سنة و نتا 27 سنة راه عارفين اش كانديرو راه نضجنا و ماشي ضاروري الإذن ديالهوم باش نتزوجو
ليث:ماتنسايش بلي انا وياك فنضر كولشي غير خوت و هادشي غادي يدير لينا ماشاكيل
قمر:(عنقاتو) أنا وياك غادي نتزوجو واخا مايبغيوش
ليث:يكون خير بب (كايدوز يديه على شعرها)
بقا ليث و قمر فلوطيل غير جالسين و كايهضرو حيت مربيين بلي أي حاجة قبل الزواج حرام حدو كايبوسها ولا يعنقها باش يعبر ليها على حبو الدفين ليها لي من صغرو و هو كايحس بيه و ماعمرو ماعتابرها ختو و كان كايغير عليها بزااف و اي حاجة تقيسها بحال الا قاصتو و الا مرضات كايمرض هو و مع لوقت ولا كايحيد ليها ديك لفكرة ديال ليث غير خويا ولا كايتقرب منها كرجل و كايحسسها بمشاعرو اتجاهها حتا تكونات مشاعر حب اتجاه ليث من طرف قمر و اعتارفت ليه و اعتارف ليها حتا هو و دارو علاقة غرامية بلا خبر عائلتهم و كايتسناو الوقت المناسب باش يخبرو عائلتهم.
فجهة أخرى بقا غيث بلا عقل غير كايسوق لوطو ديالو و غادي فالطريق و مرفوع حتا لقا راسو حدا لبحر فجهة شبه خاوية فيها دي ريسطو سمع كرشو كاتغرغر حيت ماكلا والو من لبارح و اتاجه لواحد من لي ريسطو و بلاصة لوطو و هبط و سدها و مشا اتجاهو و دخل شد بلاصة و جلس فيها و جاات عندو النادلة و طلب فطور و مشات بقا جالس كايحس بالملل و كايحاول يتناسا داكشي لي طاري معاه حيت عرف راسو حزنو ماغاديش يرجع زمرد للحياة و لكن نفس الوقت كايحس بلي إلا مابقاش حزين و رجع كيفما كان بلي كايخون زمرد صراع داخلي لي كايعيشو كسرو صوت فتاة رقيق فالخلف ديالو معاها شاب طويل و عامر حروفو زوينين و أسمر ضار تلفت شاف فيهوم و هي تصادف مع لوقت لي هزات راسها و شافت فيه بعيون رمادية جميلة و وجه أبيض مدور و ابتسامة ساحرة و شعر طويل أسود ممزوج بالبني...هزات راسها بالخف و جات عينها الرمادية فعينو الخضراء و ضور هو وجهو و هي حدرات راسها دغيا كاتشوف فخريطة و هازة ستيلو فيديها و كاتخطط
.....:شوف قلت ليك التريب بغيتها كلها تكون فالبحر و اصلا دابا شهر 5 يعني الصهد خلينا نتبحرو و نتبرونزاو شوية
.....:و لكن أ ياسمين إينا بحر غادي نمشيو ليه نبقاو غير فالمغرب او كوا!!
ياسمين:بفففف فين عمرني درت أنا شي تريب فالمغرب (ضرباتو بالستيلو فراسو) نتا أكبر مكلخ شفتو فحياتي أ سعد
سعد: و نتي أكبر حمقة شفتها فحياتي ا مينة(اختصار ياسمين)
ياسمين:وي بيان سييغ اوا صافي نمشيو ليها علم الكليكة باش يوجدو ليها لاسومين بخوشين ان شاء الله
سعد:اوا هي شادة كونجي
ياسمين: هههههه وي ضاروري مسكين بابا ولف كل شهر نشد كونجي من الخدمة
سعد:و لكن فاش كاترجعي تخدمي راه كاتقادي كولشي و كولشي كايكون ناضي
ياسمين:علاش كايصحابك بابا مخدمني تما حيتاش بنتو راه ماخدمني حتا عارفني مرا و نص
سعد:بقا فيا عمي توفيق مسكين كون راه شيبتيه
ياسمين: لا ههههه بلاصة الخدمة خدمة و بلاصة الضحك ضحك
سعد: اوا الا نتي شادة كونجي انا لااا راه تعطلت و خاصني نمشي
ياسمين:تسنا انا غادة معاك
عيطو على النادلة و خلصوها و ناضو خرجو و غيث سمع هضرتهوم كاملة من لول حتا لأخير و حسدهم حيت ماعندهوم لا هم لا غم
بقا غيث جالس تما شحااال و هو ساهي و باينة فيه مهموم غير من الشوفة دور وجهو و بقا كايشوف فالبحر و لفطور قدامو ماقربش ليه حيت شبع بالهم و رجع ليه الإكتئاب ديالو و الشهية لي تحلات ليه لمدة قصيرة تسدات بالهم و التخمام و الحزن مافيقو من هادشي غير تيلي ديالو لي بدا كايصوني...خرجو من جيب السروال و قلبو و هو يقطع و حطو فوق الطابلة و هو يعاود يصوني و قطع تاني و يصوني و قطع ليه الصوت و خلاه كايصوني حتا برد قلبو و هو يوقف عليه شاب طويل قوي فالبنية لابس سروال فالرمادي و تيشورت بيض لاصق عليه سامبل و هاز تيلي حاطو على ودنيه و مطلع التشاوك و الريحة عاطية منو و عينيه عسليين و لحيتو مقادة و فمو صغير و مقاد... شاف فيه غيث طلعو و هبطو و هو يدور وجهو لجيهة الشرجم مقابل مع البحر و هو يحيد الشاب تيلي من على ودنيه و حطو فجيبو و جلس مقابل مع غيث و حط يديه على الطابلة
....:علاش ماكاتجاوبش
غيث:الصمت
....:عاود ليا ليث على اش داير فيهوم و لكن ماتصورتش بلي غايكون هادشي حتال هاد الدرجة
غيث:الصمت
...:غانبقا كاندوي بوحدي ... على الأقل غير كول شي حاجة راه ماماك مسكينة مقهورة عليك واش بغيتيها تمرض بسابك ا غيث الله يهديك
غيث:كيفاش لقيتيني!!
...:ب جي بي إيس كولشي ساهل بالتيكنولوجيا
غيث:اوا دابا لقيتيني يا سير فحالك باغي نبقا بوحدي مكونسونطري ا زيد
زيد:من نيتك!! خليتيني نتا فاش كنت كانطلب فالزنقا باش نخليك دابا ا غيث حنا صحاب ا عشيري
غيث:و الله ماعندي مورال غير خليني عليك
زيد: زمرد ماتت ا غيث راه ماغاديش ترجع و فكر مع راسك واش هي غادي تبغيك تكون هاكدا مكتائب نسيتي اش كانت كاتقوليك ديما كن فرحان واخا يطرا لي يطرا حياة وحدة لي غادي نعيشو نسيتي هادشي!!!
غيث:مانسيتش ا زيد مانسيتش راه هضرتها كلها فبالي و مانقدرش ننسا راه زمرد غادية ليا فالدم و نتا اكتر واحد عارف هادشي و الى تابعت حياتي عادي راه بحال إلا كانخونها
زيد:حماقيتي ولا شنو!! تخونها الا كانت عايشة و مشيتي مع وحداخرا ماشي هي ميتة و نتا مكاتئب فيق ا صاحبي راه شهر و نتا هاكدا و عطيتك لوقت لكافي لهادشي نسيتي خدمتك نسيتي المرسم ديالك نسيتي عائلتك نسيتي صحابك!! حتا الإبتسامة مابقاتش كاتخرج من شفافك ا صاحبي
غيث:الصمت
زيد:دابا غادي تفطر ياك و من بعد غادي نمشيو المقبرة نزوروها
غيث:الصمت
بقا كايحاول معاه حتا قنعو باش ياكل غير دار ليه لخاطر و صافي ناضو و خلص غيث و ركب كل واحد فلوطو ديالو و اتاجهو المقبرة دخلو و جابو واحد قرا لقرآن على لقبر و عمروه ورد و مشاو
خرجو من المقبرة و وقفو باش يتافقو على فين غايمشيو
غيث:(يديه فالجيب) انا غادي للفيلا
زيد:تسنا ا صاحبي نمشيو لشي قنت نتكونسونطراو فيه
غيث:غير خليني نمشي للفيلا خاصني نخدم شوية راه ميكت على داكشي
زيد:لمهم لي بان ليك بيناتنا تيلي و فاش نعيط ليك جاوبني ماشي تخلي تيلي كايصوني حتا يبرد قلبو
غيث:ان شاء الله
مشا غيث و يديه فجيبو و النضاضر فعينيه حل لوطو من بعيد و طلع فيها و ديمارا و شير ليه زيد من لوطو و هو بدورو شير ليه و مشا زااف حتا لحق لشارع الرئيسي و مخرج يديه من الشرجم و غادي مكونسونطري مع السوقان حتا وقفو فالفووو رووج شوية بدا كايسمع الصداع شدو الفضول و طل على بلاصة الصداع و هي تبان ليه نفس لبنت لي كانت فالكافي فالصباح لي كاتخطط للرحلة كاتغوت على واحد الشاب و بين يديها طفل صغير و الناس هبطو من طوموبيلاتهم و ضايرين عليهوم... بقا غيث فلوطو ديالو جالس كايتسناهوم يساليو على خاطرهم حتا بان ليه بلي الشاب بدا كايتنفض على لبنت و كايهز يديو و كايغوت مابقا والو و يضربها و الناس غير واقفين كايتفرجو حد ماتجرأ يدوي و لا يتكلم حيت كولشي خايف على راسو.
هبط غيث بالخف من لوطو و مشا ليهوم
غيث:اش كاين هنا مالكوم! علاش كاتهز يديك على لبنت مامعلمش لإحترام ولا شنو !!
ياسمين:هاد لبغل كان علاين يقتل الدري الصغير حيت بغا يبيع ليه لورد حمار ولا هو ليوووووم غادي تعفن فالحباسات و دابا تشوف يا لبغل عندك جالوقة و كيصحاب ليك عندك لحديد لواعر ولا شنو
غيث ماقدرش يصبر فاش سمع هاد لهضرة و هو اصلا معصب و خاصو غير فمن يفجر الغضب ديالو و هو يعطيه بونية حتا طاح للأرض و ماتلاش قدر ينوض
غيث:هادي باش تتعلم تحتارم لعيالات ا الشماتة
ياسمين:(هزات تيلي) الو ...صافا بيخير... لمهم بغيتك فغاراض .... واحد لحمار كان غادي يدوز على دري صغير مسكين كايبيع لورد و فاش هضرت معاه ماعجبوش الحال و بدا كايتهز عليا... انا فالشارع الرئيسي لي ف...... شكرا بزاااف (قطعات) هاهوما جايين يهزوك يا عيفة الرجال
غيث:اري ليا الدري نديه معايا
ياسمين:(شدات فالدري) فين غاتديه غير خليه معايا حتا نشوف ليه شي جمعية تتكفل بيه
غيث:انا عندي دار ايتام غير اريه ليا... هاكي كارط فيزيت ديالي كاع الى بغيتي تتأكدي (جبدها من جيبو و عطاها ليها)
ياسمين:(قلباتها) غيث راييس
غيث:راه سدينا الطريق تحركي باش تخوا
شد غيث الدري الصغير معاه و مشا لوطو ديالو و ياسمينة ركبات فلوطو ديالها و حركات و حلات ليهوم الطريق منين يدوزو و الشاب لي ضربو غيث ناض من الأرض و تلاح فطوموبيلتو سخفان
ديمارا غيث و قلب الطريق لدار الأيتام ديال ماماه حيتاش ماكفاهاش غير واحد و بغات تعاون الأطفال برا لبرازيل و حيتاش المغرب فيه عائلتها دارت ميتم وحداخور و الدري حداه داير ليه الصمطة و حالتو حالة كاع موسخ و دموعو بقات لاطراس ديالهوم فوجهو الأبيض لي بكترة لوسخ ولا كايبان كحل.. دار فيه غيث نضرة خاطفة و بغا يكسر داك الحاجز ديال الصمت لي بيناتهوم و يخلقو جو بيناتهوم
غيث:اش سميتك
....:مروان
غيث:شحال فعمرك
مروان:عندي 10 سنين
غيث:ماعندكش واليديك
مروان:(حرك راسو بالنفي)
غيث:واش من صغرك و نتا عايش فالزنقة!
مروان:لا ا عمي كنت مع خالتي و كانت كاتحgر عليا بزاااف و كاتضربني و كاتسخرني و كاتعطيني نقدي الشغل واخا صغير و ولادها كايلعبو و يمشيو يقراو و انا معدية عليا و فاش بغاو يرحلو من هنا لاحوني فالزنقة
غيث:و آش كاتاكل!
مروان: كانبيع لورد و داكشي لي كايعطيوني كانشري بيه لماكلة ولا كانسرق
غيث:فين كاتنعس!
مروان:فالزنقة
شاف فيه فيث مطولا و بقا فيه دري صغير يالاه عندو 10 سنين فسن بريء جدا كايتعرض لهاد لمعانات
غيث:(كايدوز يديه على شعر مروان) غادي تمشي معايا لواحد لبلاصة زوينة فيها لماكلة و غاتقرا فيها و فيها الألعاب و حوايج زوينين
مروان:بصح 😄
غيث:اه بصح... قوليا اش طرا قبيلة شكون لي تعدا لبنت ولا داك خينا
مروان:كنت قاطع الشانطي و هو يجي داك الراجل بطوموبيلتو بغا يدوز واخا الضو لحمر و كان غادي يضربني و بالخلعة طحت ا عمي و هو يجي لبا بدا كايخاصم عليا و كان غادي يضربني و هي تجي ديك لبنت لي شفتيها و خاصمات عليه و ماعجبوش لحال و نتا تجي
غيث:حمار هادا (ضرب لفولون) شماتة بزاف عليه الرجلة تفوووو
بقا سايق و كايسب و يلعن بقا فيه الدري الصغير حيت حقوقو مهضومة و لي جا كايشتف عليه و حط راسو بلاصة داك الدري الصغير و تخيل راسو كايطلب فالزنقا و ماعندو ماياكل و ماعندو فين ينعس ماكاينش حضن دافئ غادي يرجع ليه و يعنقو ولا غادي يرجع لدار و يلقا لماكلة موجودة و ماماه كاتسناه هادشي ماكاينش كاين غير الزنقا و لعذاب و الإحتقار و كولشي كايشتف عليه و يعنفوه.
بعد مسافة ديال الطريق وصل غيث للميتم و هبط هو و مروان و داه دخلو و وصا عليه لناس لمكلفين تما و سلم عليه و رجع لوطو ديالو و قل الساعة لقاها بلي الربعة ديال لعشية و هو باقي ماتغداش.... مشا لريسطو راقي دخل ليه و جلس طلب سلطة ديال لخضرة و لاسوب ديال فواكه البحر كغداء رئيسي... جابو ليه داكشي و بدا كاياكل و الجسم حاضر و العقل غائب و عرف بلي كاينين ناس عندو هموم و مشاكيل كبر من ديولو و إلى كان هو فقد شخص غالي على قلبو راه كاينين ناس لي محرومين من طفولتهوم ولا مراض بأمراض خطيرة ولا ماعندهومش ماياكلو ولا عايشين فالزنقة يعني الهم ديالو و لحزن ديالو ماكايتقادش مع لهموم ديالهوم...كمل غداه و خلص و خرج ركب فلوطو ديالو و عقلو غادي يتفجر و قلبو خلاص مابقاش حاس بيه ديمارا دغيا و مشا مورك فالطريق مخلي غير الريح موراه و غادي للبلاصة لي كايلقا فيها راحتو
وصل للمكان لي بغا و بلاصة لوطو قدام كاراج كبير حل ليه لقفل و دخل و شعل الضو و هو يبانو لوحات مختلفة مرسومين بإتقان و دقة عالية و ألوان متناسقة معلقين فالكاراج لي نقي و فيه دي كانابي و تلفازة معلقة فالحيط كبيرة و فالجهة المعاكسة كاينة بلاصة عامرة بالألوان و الوحات البيضاء الفارغة و كرسي فين كايجلس هو و حداهوم لوحات مغطيين مشا ليهوم بمشية تقيلة و بعينين ذابلين حيط لغطا بسرعة و هي تبان لوحة فيها زمرد مرسومة كاتضحك و شعرها مغطي النص فوجهها دوز يديه على اللوحة و غمض عينيه كايتفكر لحضاتو معاها و هو يتنهد و هو يحيد لغطا على اللوحات لوخرين و بان اش مرسوم فيهوم و كل لوحة فيها زمرد فوضعية مختلفة يقا كايدوز يديه على كل لوحة و كايتفكر كل ذكرى ليه معاها و هي تهبط دمعة سخونة على خدو و مسحها بالخف مارضاش يبكي و ماتقبلش لفكرة ديال انه يبكي حيتاش راجل و نسى بلي راه هو إنسان و عندو قلب و روح.
بقا مدة كايتأمل فاللوحات حتا عيا و هو يجيب لوحة فارغة و حطها فالمكان لمخصص ليها و حيد حوايجو الفوقانين و بقا عريان بجسدو المفتول و جبد الألوان و الشيتات و طلق موسيقى هادئة كاترخي الأعصاب و بدا كايخلط الألوان و هز بالشيتة و يرسم و يلون و يزوق و ماعندوش فكرة فبالو محددة غير كايرسم و صافي بقا ساعات و هو هاكداك غير كايرسم حتا كملها و بعد من حداها لقا راسو رسم ياسمينة مع مروان فاش كانت فالشارع كاتغوت بقا مصدوم فراسو حيتاش جوج خطرات لي شاف لبنت و رسمها كما هي بالتفاصيل ديولها.... جلس فوق لكورسي كاينهج و صدرو عمر شوية بالصباغة و ماعرفش علاش ولا كيفاش رسم ديك اللوحة...هز غطا و غطاها بيه و نصل حوايجو لي بقاو و دخل لدوش لي داير تما و طلع عليه لما و حيد الصباغة لي لصقات فيه و هو غير كايصوط بحال الا هاز جبل حتا كمل و مسح بفوطة تما و رجع لبس حوايجو لي حيد و خرج و سد لكاراج و لقا بلي الظلام طاح قلب الساعة لقاها 12 ديال ليل داز لوقت بلا مايحس بيه ركب فلوطو ديالو و مشا مكسيري للفيلا دخل و بلاصة لوطو و مشا لبيتو بدل حوايجو و تلاح فوق فراشو
صبح الصباح بنسيمو لعليل الدافئ و غيث متكي فوق لفراش ماغمضوش عينيه فخطرة فكل مرة يبغي ينعس تطيح صورة زمرد بين عينيه و يطير عليه النعاس...ناض من فراشو دخل لدوش دوش بالخف و خرج لاوي عليه فوطة من لتحت و لفوق جسدو عاري و أبيض عندو عضلات مفتولة و جسد رجولي بإمتياز و زغيبات خفاف هابطين من سرتو حتال لتحت الشيء لي زادو إثارة.... مسح الجسد ديالو من لما و جبد بوكسر ديال كالفن كلين فالرمادي لبسو و جبد سروال جينز لبسو بلا صمطة و جبد تيشورت نص كم كحل مخطط بالأبيض لكول ديالو ضاير مع صبرديلة كحلة أديداس و ساعة كحلة فيديه و رش ريحتو المعتادة و هز نضاضرو و هز تيلي لقا نمرة غريبة معيطة ليه شحال من خطرة ماسوقش ليها و خرج من بيتو هبط فالدروج لقاهوم مجموعين على لفطور و هو يتاجه جيهتهم
غيث:صباح لخير
الجميع:صباح لخير
جوري:اجي حدايا
مشا غيث جلس حدا جوري و بدات كاتحط ليه لماكلة فطبسيلو و كاتكب ليه أتاي و لعصير حطاتو ليه حداه لعل و عسى ياكل شي حاجة... بدا كاياكل بالمهل و جوري كاتدوز يديها مور ضهرو و فرحانة حيتاش بدا شوية كايتبدل و كايخرج من العزلة لي خشا راسو فيها... كمل ماكلتو و ناض وقف
جوري:فين غادي!
غيث:خارج يضرب فيا شوية ديال لبرد
جوري:واخا ا حبيبي يالاه حتا تجي
تحنى عندها باس ليها راسها حيتاش عرف راسو شطنها معاه بزاااف و داز لشهاب باس ليه راسو حتا هو و خرج مشا للباركينك هز سوارت لبورش ديالو و ركب فيها و مشا مكسيري كيف لعادة حتا وصل لكورنيش و بلاصة تما حيتاش ولا كايرتاح حدا لبحر و كايشكي ليه همو... هبط من لوطو و قفلها وبقا غادي و الناس حداه كايديرو السبور و غاديين جايين كايديرو لامارش و هو غادي حادر راسو كايقلب على بلاصة تكون خاوية بالناس باش يستفرد براسو...بقا غادي و الراس محني و شارد الذهن حتا دخل فشي واحد هز راسو بالخف و هو يلقاها نفس لبنت ياسمينة لابسة سورفيط فالرمادي تروا بياس سروال مزير فيه خط فالجنب بالغوز و تيشورت رمادي و جاكيط لاويها على لتحت و سبرديلة كحلة فيها الغوز و جامعة شعرها كودو شوفال و هازة رجليها حاطاها فوق حجرة عالية و كاتدير الرياضة لرجليها
ياسمينة:شنو ماكاتشوفش قدامك 😡😡
غيث:سمحي ليا ماشفتكش (ببرودة)
ياسمينة:انا بخوشة ماكانبانش ولا كيفاش a !!
غيث:(حيد النضاضر) راه عتاذرت منك واقلة
ياسمينة:تسنا تسنا شايفة هاد لكمارة فشي بلاصة
غيث:(تعصب) حسني الفاظك كيفما محتارمك حتارميني
ياسمينة:ياحليلي نتا هو ديال لبارح نتا لي خديتي داك الدري الصغير فين هو و عيطت ليك شحال من خطرة و ماجاوبتيش ياكما ديتيه لشي قنت و قتلتيه ا دوي
غيث:لا حول و لا قوة إلا بالله (كايحك جبهتو) واش ماكاتسكتيش طرطارة غير بلا بلا بلا بلا و كاتألفي قصص من لراسك ا لالة سيري لدار الأيام ديال دنبي راه معروفة هنا و قولي ليهوم مروان لي جابو غيث لبارح و غادي تلاقايه و تعلمي تكلمي بإحترام و دابا الله يعاون
دار نضاضرو و زاد خلاها واقفة تما
مشا غيث كايقلب على بلاصة خاوية و بقات ياسمين واقفة كاتغدد و ماحاملاش داكشي لي دار ليها
ياسمينة: يخخخ على باشار حاس براسو كيصحاب ليه بلي راه غير لاباس عليه صافي غادي يحل عليا فمو بنادم كيداير باينة فيه ماشي مغربي قح مشاو الإنجليز و خلاو لينا ولادهوم هنا يخخخخ
بقات غادة و كاتسوط و تبركم حتا وصلات لوطو ديالها لي كانت عبارة عن لامبرغيني حمراء حلاتها و هزات لباب ديالها للفوق و دخلات كاتخاصم و تسوط و تلعن... دارت بناقص من السبور و مشات مكسيرية للشقة ديالها لي جات فحي راقي مجهزة بكلشي و عايشة بوحدها حيت بغات تستاقل بذاتها و مرة مرة كاتمشي لعند واليديها فالفيلا ديالهوم...وصلات للعمارة و بلاصات لوطو و هبطات و دخلات طلعات فلاسانسور حتا وصلات للإطاج لي فيه دارها جبدات السوارت و حلات الدار و دخلات لاحت صاكها و دخلات لدوش حيدات حوايجها و دخلات تحت الرشاشة و بدات كاتدوش و كاتسمتع بالدوش ديالها و نسات لمشكل لي طرا لسها مع غيث حيت هي بطبعها انسانة عطوفة و دغيا كاتنسا المشاكيل و المخاصمة....كملات الدوش و لوات عليها فوطة و خرجات من الدوش و دخلا لبيتها لي مصبوغ بالكريمي و الأثاث باللون البني لونها لمفضل... جبدات بيجامة فالباج عبارة عن شورط قصير مع ديباردو ديالو بخويطات و سوتيمات لتحت خفاف نشفات شعرها بالفوطة و جمعاتو على شكل كعكة مهملة و مشات للكوزينة باش توجد فطورها... عمرات أتاي و لخبز جابتو فالصباح بكري حطات الجبن و لعسل و الزيتون و لكاشير.... و جلسات كاتفطر بالمهل و كل دغمة كاتعرفها فين مشات و كاتسمتع بالماكلة... بقات كاتاكل بشوية حتا حتا سمعات صونيط فالدار
ياسمينة:تسنااا
ناضت و لبسات صندالتها و حلات لباب و هي تلقاه صديقها سليم شاب فعمرو 25 سنة أبيض لبشرة شعرو أسود حروفو زوينين و حرشين و عينيه كحلين و باباه شريك أب ياسمينة
ياسمين:لكليكة كاملة راه هضرت معاهوم و كولشي بدا كايوجد عافاك عافاك اجي معانا
بدات ياسمين كاتمسكن بعويناتها الرماديين حتا قنعات سليم لي هااايم فحبها من زماااان
سليم:واخا صافي مايكون غير خاطرك
ياسمين:يااااااااااي 😄
نقزات عليه عنقاتو و بادلها لعناق و غمض عينيه كايتمتع باللحظة و كايشم ريحتها و هي معنقاه بكل براءة و دايراه كصديق ديالها
تمالك راسو و بعد منها حيت قلبو غارق بما فيه الكفاية و من صغرو و هو باغيها و هي مافاهماهش و دايراه مجرد صديق مقرب ليها صافي
سليم: نخرجو!!
ياسمين:مافيا لي يخرج عيانة كنت كاندير السبور فالصباح اوفف
سليم:و آش نديرو!
ياسمين:بغيت ننعس (نعسات على رجليه)
سليم:(كايدوز يديه على شعرها) ماكاتشبعيش من النعاس 😒 نوضي نقادو الدار شوفي كيف دايرة حاالتها عايش زوفري هنا ماشي بنت
ياسمين:حتال من بعد و نقاد هادشي
ناض سليم بالزربة و تخبط ليها راسها مع لفوطوي
ياسمين:ناري على بقر علمني ديك الساعة بلي راه غادي تنوض يخخخخ على تريكة
سليم:ماكاتقادايش من الهضرة ديما مشرعة داك لفم سكتي شوية و نوضي تgعدي يا لمعكازة
حيد سليم لفيست ديالو و طوا لكمام ديال لقاميجة دياالو و حيد الساعة حطها فوق الطابلة و بقا غادي كايدور فالدار
سليم:العفن شوفي لوسخ اش هادشي ا مينة لماكلة ديال يوماين مليوحة هنا (قلب لفوطوي) اش هاد لخنز (جبد طرف من لبيتزا مليوح تما) بيتزا اييييييف حماضت (ضار شاف فيها) واش هادي دار ولا مزبلة بزاف هادشي انا لي راجل و مانقدرش ندير هاكدا (مشا حداها و نوضها) دابا غادي نتعاونو و نقادو الدار اوكي!!
ياسمين:اوفففف اوكي
سليم:نبداو بهنا
تعاونو على الطبلة و جمعوها وهحطو لماعن فالكوزينة لي مرونة كتر من غرفة الجلوس فيها ماعيين من ايام و اياام... حركو الفوطويات و شطبو تحت منهوم و بقاو متعاونين حتا كملو الصالة و نقاوها و طلعو لبيت ياسمين لقاوه عامر بالحوايج بداو كايطويو بجوج حتا جمعو لحوايج و حطوهوم فالماريو و قادو لفراش و شطبو لبيت و دخلو لدوش نقاوه و قادوه و دخل لبيت النعاس ديال الضياف لقاه مقاد حيتاش ماكاتدخلش ليه و ديما مسدود.... هبطو للكوزينة و جمعو لماعيين و حيدو ليهوم الماكلة الشايطة و حطوهوم فالماكنة ديال غسيل لماعن و نقاو لكوزينة ماكملو من داكشي حتال لحقات التلاتة و جلسو مهدودين
ياسمين:فيا الجوع
سليم:اش بغيتي تاكلي
ياسمين:عيط على كينتاكي بغيت الدجااااج
هز تيلي ديالو و عيط عليهوم طلب داكشي لي بغا مادازش لوقت بزاف حتا تحطو عند لباب كايصونيو عليه
تغداو بجوج فجو لا يخلو من الضحك و التقشاب حتا كملو و تلاحت ياسمين نعسات على ضهرها و لاحت رجليها على سليم
سليم:جمعي رجليك
ياسمين:غير خليهوم راه عييت و فيا النعااااس
سليم:طلعي لبيتك و نعسي على راحتك
ياسمين:(بصوت تقيل) عيييت رجلي ماهازينيش
ناض سليم هزها و هي تعلقات فيه و حطات راسها على صدرو حتا وصلو لبيتها و حطها فوق لفراش و بسرعة نعساااااات بحال الا مانعسات سنين و تلاحو شي شعرات على وجهها و حيدهوم سليم من على وجهها و دوز يديه على خدودها الطبيبزين و باسها فجبهتها و تنهد و ناض من حداها خرج لصالة شعل التلفازة و بقا كايتفرج حتا داه النعاس و بعد ساعات ناضت ياسمين كاتكسل و كاتحك فعويناتها الرماديين المرمشيين و ناضت من فوق لفراش كاتمشي بشوية و كاتحك فشعرها و كاتفوه و هي تلقا سليم ناعس و التلفازة شاعلة...هزات تليلكوموند و طفات تلفازة
ياسمين:سليييم سلييييم...نوض نخرجو وااا سليييييم
مابغاش سليم ينوض من النعاس واخا عيات ماتفيق فيه و بدات كاتشوف فيه و هي طيح عليها فكرة مشات لدوش بالخف و هزات سينيال طلساتو ليه على يديه و هزات ريشة كاتهرو بيها فوجهو صبر حتا عيا و هو يحك لبلاصة و عمر ليه وجهو كامل بسينيال و هي تغوت بالضحك
ياسمين: 😂😂😂😂😂😂 واعععععععععع
ناض سليم مقلوب بالنعاس و وجهو حالتو بسينيال لقا داكشي فوجهو وهو يبدا كايخاصم
ناض و وجهو مجلخ و كايشوف فيها و هي بالضحك ناضت عوجة و بدا كايجري عليها و هي كاتجري عوجة و كاتضحك حتا بداو كايضورو على واحد الطبلة
ياسمين:سمح ليا 😂😂 ماغانبقاش نعاود 😂😂
سليم:غير عاودي 😡😡 اجي لهنا
شافتو داير مع الطبلة و جاي ليها و هي تهرب ليه كاتجري فالصالة و بالخف لحق عليها و شدها و تعكلات برجليه و طاحت على لأرض و طاح هو فوقها و هي كاتضحك مابغاتش تحبس ليها فخطرة و عينيها تسدو كاع و هو ولا مقرب منها بزاااف و كايتأمل فيها عن قرب و كايشوف ملامحها و ضحكتها الجذابة و سنانها لبيضين المستفين و عيونها لكبار المرمشين و خدودها المطبزين و وجهها لمضور و فمها لحميمر الصغيور.... بقا فوقها و كايشوف فيها نسا داكشي لي دارت ليه و زاد بغاها اكتر و تعلق بيها اكتر...تمالك نفسو و ناض من فوقها و مد ليها يديه و جرها حتا ناضت
سليم:انا غانمشي نغسل هاد لحالة سيري بدلي حوايجك باش نخرجو
مشات هي بالخف جبدات شورط ديال الجينز قصير مع ديباردو أسوج طويل شوية و مشطات شعرها و طلقاتو بلا ماتدير ليه لبغوشينج و دارت مرطب شفاه و ماسكارا و صنيديلة خفيفة فرجليها كحلة و هي تخرج عند سليم لي كان برا كايتسناها
ياسمين:هاني واجدة
سليم:(شاف فيها) ماعندكش أقصر من هاد لحوايج
ياسمين:عندي نمشي نبدل !!
سليم:باااز لوجهك واش نتي غادة لوسط لمدينة ولا لبحر
ياسمين:عادي (هزات صاكها) ديما كانلبس هاكدا (حلات لباب) ماغاديش تخرج
سليم:غادي تحمقيني
هز جاكيط ديالو لبسها و هز لكونطاك و خرج كايسوط... سدات لباب و هبطو فلاسانسور مناكرين كيف عادتهوم و خرجو من لعمارة و بغات تمشي ل لامبرغيني ديالها
سليم: ا لالة فين غادة غادي تركبي معايا و انا لي غادي نرجعك لدار ا لمعكازة
دارت شافت فيه و هي تنفخ و شدها من يديها و داها لوطو ديالو عبارة عن ميرسيديس آخر ماخرج فالسوق رمادية... حل ليها لباب و دخلات و حطات رجليها فلفوق و رجعات لكورسي للور و هو يدخل هو جلس و شافها
سليم:هبطي رجليك يا لحمقة
ياسمين:غير خليني عليك ميك شوية ا صاحبي
سليم:زوفري لي غادي معايا ماشي بنت
ياسمين:سوق سوق و هنينا شحال فيك ديال لهضرة
ديمارا سليم لوطو و تحرك بيها و بقا سايق و هي تشعل ياسمين راديو و بدات كاتغني معاهوم و سليم كايشوف فالحمقة لي حداه لبنت لي واخدة ليه قلبو و مسطية ليه عقلو
ياسمين:فين غاديين!
سليم:غاديين لواحد لكافي كاينة لكليكة تما
ياسمين:مزيااااان 😁
بقا سايق حتا وصل لواحد لكافي كبيرة و راقية كلها زاج بباصة لوطو فالباركينك و هبطو و دخلو ليها كافي هادئة فيها فرقة كاتعزف على لكمان و صوت واحد لي مرون الدنيا جاي من طبلة فيها ربعة ديال الأشخاص مخلطين شباب و بنات
سليم:بعد من لبنت خليها عليك راه طريق كلها و انا وياها شد ليا نقطع ليك
.....:مينة مالك كاعية
ياسمين:هضري مع خطيبك و غانكون طووب
كرم:حلا خلي عليك ديك لمخلوقة لاتصدق دايرة ليك
.....:بعدو من حبيبتي (عنقاتها)
ياسمين:شفتي ا لبنى شفتي كاع ضوروني
سعد:ياك لبوك من الصباح و انا نقوليك عنقيني و مابغيتيش و دابا معنقة ياسمين
ياسمين:تفو على محساد
سليم:بدينا تاني !!!! خليونا نتكلمو على التريب لي غانديرو
تلاحت ياسمين فالقنت و دارت رجل فوق رجل تحت الطبلة و شيرات بيديها لسرباي و جا عندها طلبات كافي كخيم و خدا سليم قهوة نص نص و مشا سرباي و نقصو الدراري من هبالهوم و تجمعو على سليم لي كايبان جدي من الملامح ديولو
سليم:دابا ايمتا الديبار
ياسمين:ليوم لخميس الوغ يكون تنين كولشي موافق
الجميع:اوكي
سعد:موجدين وراقكوم كولشي ناضي ياكو
الجميع:وي
سليم:اوا صافي عنداكو تنساو لي تيكي ديولكم و باسبورات نهار التنين و خصوصا نتي ا لبنى ديما ناسية شراوطك
لبنى:راه بورتوريكو هادي ماغاديش ننسا 😍
سعد:ماتخافش انا غادي ندوز عندها و نتأكد بنفسي
ياسمين:احسن حاجة تقدر تدير ا سااط
سليم:واش نتي زوفري ولا بنت شناهيا تاني هاد ا سااط واش عندك 23 سنة و مازال صغيرة فعقلك
ياسمين:واش سوقك فيا اوفففف
بداو تاني النقاش ديالهوم و فالخلف ديالهوم كان زيد جالس مع غيث لي جابو معاه بزز و جالس تما و ماحاملش راسو و بسباب صوت اصدقاء ياسمين العالي سمع هضرتهوم كاملة
زيد:اش بان ليك
غيث:فااش!
زيد:فهاد الدراري نمشيو معاهوم
غيث:باقيين براهش ا صاحبي و ماعندي مورال شي عطلة غير خليني علييك
زيد:الى سمعت ليك نتا ماغاديش نزيد للقدام (ناض)
غيث:فين غادي!
زيد:دابا تشوف
مشا زيد بإتجاه الطابلة لي جالسة فيها ياسمين و صحابها و غيث متبعو بعينيه و وقف عليهوم و كولهوم شافو فيه
زيد:سمحو ليا على التطفل ديالي و لكن بالصدفة سمعت هضرتكم كاملة و قلت إلى كان ممكن ننضمو ليكوم انا و صاحبي راه جالس لهيه (شير لغيث و ضارو كاملين شافو فيه)
ياسمين:نتا تاني (بهمس)
سليم:شكون!
ياسمين:حتا حد
بسرعة طاحت لياسمين خطة فبالها و هي تتقابل مع زيد
ياسمين:وي ماشي موشكيل اجيو معانا و لكن راه كل واحد غادي يخلص على راسو
زيد:ماعندناش موشكيل من ناحية لفلوس
ياسمين:اوكي سي بوون عطيني نيميرو ديالك باش نبقاو اون كونطاكت
زيد:اوكي قيدي عندك 06........
ياسمين:ميغسي و اجيو نضمو لينا باش نيت نهضرو على كولشي دابا
غيث:لا مادرتي والو لمهم بون فاكونس انا غادي (هز سوارتو و ناض) خليت ليك الراحة فاش ترجع عيط ليا
زيد:فين غادي !
غيث:فحالي
جبد غيث لفلوس حطهوم فوق الطابلة ديال لكونسوماسيون ديالو و خرج و تابعو زيد موراه كايحاول يرطب معاه لجو
زيد:ا صاحبي بلا ماتعكس خلينا نمشيو نبدلو لجو
غيث: سير نتا انا ماباغيش (حل لوطو ديالو)
زيد: (جرو) شنو زعما! غاتدير لي فراسك هادشي درتو على قبلك باش تخرج من لعزلة لي نتا فيها اما انا كاع ماهاماني شي تريب ولا زمر لبلاصة لمخيرة نمشي ليها و راك عارف غيث رجع معايا لعندهوم و وافق غير باش تبدل لجو و تنسا شوية و راه بانت ليا كليكة متفتحة و قشاشبيين غادي تنسا همك معاهوم ديرها رحلة لإكتشاف الذات أ قلتي!
تنهد غيث و هو يحيد يديه من زيد و ركب فلوطو ديالو و مشا مكسيري و بقا زيد تما واقف كايحك فجبهتو و كاينفخ و هو يرجع عند ياسمين و صحابها
زيد:لمهم خرج لينا بلان فشكل و مضطرين نمشيو نبقاو اون كونطاكت و لي كان غادي نعلمكوم
سليم:واخا غير علمنا بكري باش نديرو حسابنا
زيد:واخا ان شاء الله و شكرا
ياسمين:لعفو
مشا زيد بعدما خلص و رجع لدارو اما ياسمين فبقات مع لكليكة ديالها كايهضرو و يضحكو خالقين السعادة من والو أما غيث فمشا مكسيري للفيلا حطها فالباركينك و مشا ديريكت لبيتو حيد حوايجو كامليين بقا غير بالبوكسر و نعس على ضهرو داير يديه مور عنقو و حال عينيه فالسقف و هضرة زيد كاتضور فبالو حتا داتو عينو بالنعاس لأول خطرة من شحال هادي.
صبح صباح جديد بشميستو المنورة لي فيقات غيث من نعاسو... ناض من فراشو كايتكسل و دخل لطواليط قضى حاجتو و غسل وجهو و مشا للماريو جبد شورط ديال جينز حد الركبة مع تيشورت فالبلو مارين سامبل و ساعة فيديه كحلة و سبرديلة فرجليه و مشط شعرو رجعو لور و دار ريحتو و جلس فوق فراشو و هز تيلي ديالو دوز لابييل ل زيد و في ساع جاوبو
زيد:صباح لخير
غيث:صباح النور.. لمهم مازال غادي لديك التريب
زيد:(فرح) وي على قبلك
غيث: ديرو بحسابي (كايحك جبهتو) لمهم وجد ليا كولشي
زيد:نتلاقاو دابا!
غيث:غادي نبقا غير فالفيلا ميكت على لخدمة بزاف
زيد:لي بان ليك.. بيناتنا تيلي
غيث:اوكي (قطع)
دوز غيث النهار غير فالدار الماكلة كاتجي تال عندو و هو هاز لبيسي خاشي راسو فيه خدام و كايبان جدي فملامحو حتا سمع شي واحد كايدق فالباب
غيث:دخل
دخلات جوري لابسة سروال ديال التوب فالباج مع شوميزة خفيفة فالأبيض فيها وريدات بالباج و البني و جامعة شعرها كو دو شوفال و وجهها مجبد واخا كبرات فالسن مابانش فيها و جسمها باقي رشيق كيفما كان بسباب السبور و التغذية الصحية....دخلات للبيت و كاتقرقب بالطالون ديالها حتا وصلا لفراشو و جلسات حداه و مالت جيهتو كاتلعب بشعرو
جوري: هبط تتعشا
غيث:خدام قولي ليهوم يطلعوه (عينيه فالبيسي)
جوري:بغيت نتعشا معاك
غيث:خدام ا لواليدة هانتي شوفي
جوري:انا نتعشا معاك ماشي موشكيل
غيث:لي بان ليك
جوري:شوف فيا بعدا و نتا غير خاشي راسك فالبيسي
غيث: هاهوا (شاف فيها)
جوري:(حطات يديها على وجهو) توحشت نشوف عينيك لخضرين و توحشت ضحكتك
بقا كايشوف فيها مدة و هو يجرها عنقها و زيرات عليه و حطات راسها فوق صدرو
جوري: خلعتيني عليك ا ولدي
غيث:عارف غير سمحي ليا و عذريني (باس راسها)
بقاو معانقين مدة هو كاياخد لحنان و الطمأنينة منها و هي كاتاخد منو راحة لبال لي فقداتها من نهار شافت ولدها مكتاءب
جوري:انا غادي نقوليهوم يطلعو ليك لعشا
غيث:واخا (باس يديها) هاني كانتسناك
ناضت جوري فرحانة من حداه حيت شافت بلي ولدها رجعات فيه الروح شوية و هبطات عند لخدامات قالت ليهوم يطلعو لماكلة ليها و لولدها لبيتو.
وجدو السينيات و طلعات هي سابقة و الخدامات موراها حتا وصلات للبيت لقاتو جالس حدا واحد الطابلة فبيتو كايتسناها و مدور بيها مخاد من الريش... حطو الخادمات الماكلة فوق الطبلة و خرجو خلاوهوم بجوج بدات كاتوكلو ماماه و فرحانة و هو داير ليها لخاطر بقا كايوكلها و كاتوكلو حتا سالاو و باس ليها راسها و مشات فرحانة و سيفطات لخادمات جمعو الطباسل و هزو الطبلة و رجع هو لخدمتو
داز لويكاند عادي على غيث و ياسمين كل واحد ملهي فشغالاتو ف غيث مقابل خدمتو و حدو لبيت كايعوض داكشي لي ماخدموش من نهار ماتت زمرد و ياسمين مشات زارت مروان فدار الأيتام و تأكدات بلي هضرة غيث صحيحة و قلبات عليه فالأنترنيت و جمعات معلومات عليه و كونات خلفية على شخصيتو و عرفات الحادث المأساوي لي تعرضات ليه خاطيبتو و عذراتو حيتاش تصرف معاها هاكداك.
صونا المنبه مع الستة ديال الصباح و فاق غيث و سكتو و دخل لدوش دوش بالخف و خرج لبس سروال كحل مع قميجة فالبلو مارين طوا لكم ديالها حتال المرفق و بانت يديه المزغبة و عروق يديه بارزين... حل جوج صدفات و بان جزء من صدرو و هز ساعة دارها فيديه كحلة طخيي شيك و لبس سبرديلة كحلة نايك مع تقاشر بيضين طالعين شوية هز ريحتو رش منها و مشط شعرو طلعو لفوق و هو يشوف راسو فالمرايا لقا راسو هو هاداك ماخاصو والو هز لفاليز ديالو و هبطها و لقا جوري جالسة فالصالون كاتسناه باش تتوادع معاه و هو يحط لفاليز و جا واحد من لخدم هزها ليه خرجها برا و هو مشا عند جوري باس ليها يديها و راسها
غيث:صباح لجوري
جوري: ههههه صباح الشتا (غيث هي الشتا باللغة العربية) صافي غادي!
غيث:وي راه طيارة مع (قلب الساعة) مع 8
جوري:بون فواياج حبيبي
غيث:ميغسي (باسها)
جوري:فوج مع راسك و نتمنا ترجع غيث لي كانعرف
غيث:يكون خير لمهم هاني مشيت سلمي على لواليد و ليث و قمر
جوري:واخا ا حبيبي تهلا فراسك
غيث:حتا نتي يالاه باي
باس ليها يديها و مشا خرج من لباب ديال لفيلا حل لوطو ديالو عن بعد و دخل فيها لخادم لفاليز و مشا... ركب غيث فلوطو ديالها و دار ليها مود سيلونسيو باش ماتديرش الصداع فاش يبغي يديماري و مشا زاف بلا مايعيق بيه حد و خرج من لباب لكبير ديال لفيلا و هو يتلقا اتصال دار لكيت فودنيه و جاوب
زيد:الو
غيث:وي زيد
زيد:فقتي
غيث:لا ناعس... اش هاد السؤال
زيد: المناكرة على الصباح ماتبدلش لمهم دوز لعندي هزني راه خسرات ليا لوطو
غيث:واخا هاني جاي نلقاك عند لباب
زيد:مشااات
قطع غيث لمكالمة و قلب الطريق لدار زيد بعدما كان غادي للمطار و بعد 15 دقيقة تحط عندو قدام لعمارة لي فيها هو و لقا زيد كايتسناه قدام لباب لابس سروال جينز مع تيشورت كحل و نضاضر فوق راسو و لفاليز عند رجليه غير شاف غيث و هو يهز لفاليز و دخلها لوطو و ركب حداه و تسالمو و مشا باتجاه المطار و هو يجيه زيد اتصال من عند ياسمين و هو يجاوب
زيد:وي مادموزيل ياسمين
ياسمين: جايين فالطريق!!
زيد:اه وي مابقا والو و نوصلو للمطار
ياسمين:اوكي سي بوون
غيث:(بهمس) قوليهوم يتسناو حدا لباب مايدخلوش مع الناس
زيد:بااي (قطع) نسييت ماقلت ليهوم غانمشيو بطائرة خاصة
غيث: عولنا عليك بكري بفففف
زيد:وا الف حاجة و حاجة لي عندي فالراس
غيث:الصمت
طريق كولها و زيد كايهضر و كايحاول يجبد موضوع مع غيث و غيث كايجاول غير ب اه ولا لا حتا وصلو للمطار و لقاو ياسمين تما جالسة فوق لوطو ديالها لابسة صاية كحلة قصيرة طالعة حتال لكرش مع ديباردور مزير فالغوز بارد خويطات من لكتاف و رجليها عريانة و صنيديلة طالون كحلة و يديها فيها ساعة كحلة طخي شييك و و ليد لوخرا فيها كورميط من النقرة و جامعة شعرها كو دو شوفال و دارت كريم واقي من الشمس و كلوس و اي لاينر باش يبرز عينها اكتر و نضاضر فوق راسها... شافوها و هبطو عندها و هو يدقق فيها غيث و هو يقلب وجهو حيت مشافهاش ديك لخطرة مزيان
غيث:فاااااك
زيد:مالك
غيث:والو ... غير الله يدوز هاد لفاكونس على خير
بعد بضعة خطوات ولاو فاص ا فاص و تسالمو و البسمة مرسومة على شفاف ياسمين
زيد:هادا صاحبي غيث
ياسمين:(مدات يديها) متشرفين... سميتي ياسمين و لكن مي زامي كايقولولي مينة
غيث:متشرفين
سلم عليها و هرب يديه بالخف و قلب وجهو و ربع يديه
ياسمين:مسيو غيث ممكن دقيقة معاك
غيث: (طلع حاجبو) بوغكوا!
ياسمين:بغيتك فشي حاجة
غيث: وي تفضلي
بعدو شوية من زيد لي بدورو فهم راسو و بعد منهوم باش يهضرو على راحتهم
ياسمين: مسيو غيث بغيت نعتاذر على داك النهار طولت لساني بزاف سمح لي
غيث:ماشي موشكيل هانية
ياسمين: ميغسي بوكو و بما اننا غاديين لبلاصة وحدة و غادي نتشاوفو بزاف بغيت لخواطر تصفا
غيث:من جيهتي كوني هانية
ياسمين: ميغسي بزاف و سمح ليا حيت خديت من وقتك
غيث:ماشي موشكيل Any time (فأي وقت)
رجعو بجوج لعند زيد و وقفو معاه
ياسمين: اجي بعدا لاش قلتي ليا نتسنا
زيد: حيت غادي نمشيو فالطيارة لخاصة ديال غيث ماغاديش نتزاحمو مع الناس
ياسمين: هممم سي بوون
غيث:هاجو مازال معطليين (كايشوف ساعتو)
ياسمين:شوية و يجيو .... (شافت سليم) ها واحد جا بعدا
شيرات لسليم لي جا بلاصة لوطو حداهوم و هبط عندهوم و هو يطلع و يهبط فغيث و فزيد و مشات ياسمين نقزات عليه تسالمو بلابيز و تسالم مع الدراري باليدين و تعارفو بيناتهوم و هي تجي لبقية كل كوبل فطوموبيل سعد و لبنى فلوطو و كرم و حلا فلوطو اخرى... وصلو عندهوم و هبطو تسالمو و اعتاذرو على التأخر ديالهوم
غيث:غادي تركبو فطوموبيلاتكوم و تبعوني
مشا بالخف ركب فاللوطو ديالو و خلاهوم مبهوضين مافاهمين والو حتا كلاكسونا عليهوم عاد مشا كل واحد ركب فلوطو ديالو و ديمارا هو و مشا من طريق مخصصة للطائرات لخاصة حتا خرج فوسعة كبيرة فيها طائرة متوسطة الجحم و شي رجال لابسين دي كوستيم ضايرين بيها و لكيت فودنيهوم و البيلوط و المضيفات كايتسناو الركاب بلاصاو طوموبيلات و هبط غيث و تبعو زيد و مشاو جوج من لي كارد لي كانو ضايرين بالطائرة هزو لي فاليز حطوهوم فالطائرة و غيث مشا كايهظضر مع عمال الصيانة و لبيلوط باش يتأكد بلي الطائرة جاهزة للإقلاع
غيث: زيد... قوليهوم يطلعو
مشا زيد علمهوم و طلعو كاملين للطائرة و بقاو حالين فمهوم بالديزاين ديالها من لداخل بلاصة مايلقاو كراسا لقاو فوطويات مريحين فالجلسة ديالهوم و الطائرة واسعة من لداخل دخلو و كل واحد جلس حداه خطيبتو و سليم جلسات حداه ياسمين و حداها زيد و غيث مشا مع لبيلوط.... وجدو كولشي و اقلعت الطائرة و ولات فالجو و عطاوهوم إذن التحرك و ناضت ياسمين كاتكتاشف الطائرة
قصة عذابي
محتوى القصة
التنقل بين الأجزاء