صورة مصغرة لـقصة عروس الملك السابعة

قصة عروس الملك السابعة

qisat 9isat sab3 malik sabi3a 3aros almalik

القصة في طور الكتابة .. يعني احتمالية توقف القصة في بعض الأيام لأسباب خارجة عن الإرادة ..

القصة متوقفة مؤقتا !

رواية عروس الملك السابعة , زوجة الملك السابعة

قصة شاملة بطابع فكاهي ودرامي ... ولأول مرة غنوضف الخيال فقصصي ...
 نجرب الخيال هاد المرة ونشوف اش غيطلع تاني 😂

أيها الشعب العظيم..الخاضع لملك أعظم
لليوم هو يوم اعتلائي لعرش الملك
وبهذه المناسبة أود ان اعلن عن بعض 
التغييرات التي ستلحق بدستورنا الكريم 
والذي وضعه الملك العظيم الراحل ..ومن 
خلال تجربتي داخل الامارة الملكية 
استطعت الخروج بقرارات مهمة ستكون 
سبب تقدم مملكتنا..وطبعا هاته القرارات 
اتخدت بعد العديد من الاستشارات 
والمداولات مع اهم مكونات الجهاز 
الملكي لدولتنا العظيمة
أول قرار اتخد هو ...
قرار التجنيد..اي ان كل شاب في مملكتنا 
في عقده الثاني سيجند وسيصبح جنديا 
خاضعا لاوامر المملكة وعليه فإنه منذ 
الغد على كل رجل بهده المواصفات ان 
يتقدم الى ادارة القصر الملكي كي ينضم 
الى الجنود الاخرين ليتنفع به بلده لمدة 
اربع سنوات .. وبعدها له كل الحق في 
اتخاذ قراره 
وأخر القرارات والتي لا تقبل 
المناقشة..سيتم الغاء احد أهم العادات 
والتقاليد اللاحقة بدولتنا الكريمة وهو انه 
من اليوم فصاعدا لن يكون هنا شيء 
اسمه الزواج في مملكتنا الا بعد ان 
يتزوج الملك بمعنى انه سيتم الغاء شيء 
يلقب بعقد الزواج او النكاح
وأي رجل خالف قراري او اعترضه .. او أتى 
على مسمعي أنه نكح امرأة وتزوجها قبل 
زواج الملك سيكون له عقاب اقسى من 
عقاب القاتل..سوف يعلق جسده وسط 
المدينة وكل من مر عليه سوف يقطع من 
جسمه قطعة حتى يصبح أشلاء وسيعد 
تصرفه جريمة يعاقب عليها القانون، 
واعلن من هاذه اللحضة ان اي شىء يسمى بالزواج .. او الحب .. او النكاح فهو جرم . جرم لن يبقا بعده صاحبه حيا 
... وغير 
هادا فتبقى باقي القوانين كما هي لا غبار 
عليها ... والسلام عليكم ورحمة الله تعالى وبركاته


كان يامكان فايام زمان .. ايام الحيا والحشمة والمرى تخرج منقبة ... فوجها يبانو غير عينيها .. ومكتخرج للزنقة كاشفة لتامها غير المرى المطلقة ولا الهجالة ... اما العزبة عمرها كانت ولا كانت انها خرجات بلا لتام فيوم من الايام

وفدار تاجر من تجار المدينة لكبار .. عيالات مجمعات فوسعة كبيرة وسط الدار ... دايرين بيها الحيوط من كل جهة وسقفها عريان .. مونساهم الشميسة اللي ضاربة فحبات الوزع المفرشة فوق الحصيرة 

-ايوا هانتي تشوفي الحكام اللي حكم علينا هاد الملك ... دابا نتسناوه هوا حتااا وكان يلقا هاد لالا للعروسة عاد نتزوجو حنا !

-شنقول انا اللي فعمري 25 عام وحتى خطبني ولد عمي ونوينا نعرسو عاد جا هاد الحكام ... حلف فينا حلفة بغانا نبورو ... 

نزلات شابة مع الدروج الترابية المفرشة بزربية خضراء من الفوق حتى لتحت ... فرجليها شربيل مذهب من الصم الحر .. ومن شوفة درجليها باينة مكتمشي حفيانة مكتشتف على بطانة ... هازة بيدها قفطانها الخضر المطروز بالسقلي الحر ونازلة بشوية عليها كتحسب خطواتها ... فعنقها عقيق من الجوهر وسطو كتلة من الذهب منقوشة .. لحمها ابيض كيبري بالنقاء وشعرها كحل بحال ضلام الليل .. دايزة وسط راسها فرقة قاسمها فالنص ومقاد معاها فالطول كيضرب فاقدام رجليها وكيلمس الارض . وقفات فاخر درجة كتشوف فيهم بعويناتها لكبار وترمش برموشها طوال ... قربات منهم بشوية وجلسات فوق مخدة فالارض على جنبها منعسة رجليها ومتكية على يدها .. لاخت شعرها براسها رجعاتو للور وقالت بصوت ساحر وشفايف كتكلم بحال خيوط العود كيتنغم وكتمايل بصوتها 

روح الندى : سمعتكم كتكلمو على ملك ما ملك .... ياك لاباس 

قالت وحدة غليضة دايرة الشمار على كتافها وكتنقي الزرع 
- علاش الاللة روح الندى مافراسكش 

رمشات وقالت بصوتها المتنغم : مافراسيش !

-مافخباركش باللي هادا شحاااال باش مابقا لا زواج .. لا نكاح ... مافخبارش باللي الملك اللي خلف باه حرمها على كلشي ... مافخباركش باللي قال ... حتى يتزوج هوا عاد ديك الساعة يتزوج كلشي . 

ضحكات روح الندى وقالت : ياوا حكااااام هادا ..... انا بعدا هاد الملك عمرني شفتو غير كنسمع بيه


- وعلاه الاللة حنا شفناه ! ولا شافو شي حد! هوا قال كلامو فالقصر والكلام خرج و من تما تنشر .

روح الندى : هاد الملك يا اما فايت دارتها بيه شي مرى ... يا اما فايت فيه الزواج ومالقا فيه نفع وحرمها على كلشي .. وحدة فهادو 

تكلمات وحدة اخرى صمراء ورقيقة فجبهتها وشام وقالت 
- نبكيو حنا يا لاللة ... اما نتي مزوجة .... ماعندكش علاش تبكي ... دوزتي مع اللولا كيتنا حنا اللي غنجلسو تسناو السي الملك حتى يتزوج عاد نتزوجو .. هادشي وييييييلا تزوج ... نوضو نوضو راه باقي تابعنا الواد نمشيو ليه 

قالت روح الندى بابتسامة وهي كترجع شعرها للور: شكون قال ليكم انا مزوجة !

قالت البنت الغليضة : والسي ادريس شكون يكوون هههه عمك !

ردات عليهم ببرودة وهيا كتلعب فشعرها : مربيني .... غير كيقول ليكم مراتي .... السيك دريس ماباغي حتى واحد يعرف باللي مربيني ... باش حتى واحد ميطمع فيا .

خرجو عينيهم وقالو : كيفااااش! مايمكنش!!! 

هزات حاجبها وقالت : اااايه .... ونزيدكم ... انا بااااقا عزبة هههه .... وليوم غنمشي معاكم للواد فين كتغسلو شعركم نغسل حتى انا شعري 

قالت السمرا : محرم عليك تفوتي العتبة .. ويلى فتيها يدوز عليك بالخنجر . . . كلشي عارفك مراتو ! 

روح الندى : واش انا هبيييلة نتزوج بواحد قد جدي ! وزايدون كلشي عارفني مراتو .. عارفيني فوجهي؟ ياك عارفيني غير بالفم .... وزايدون مابقاش كيهمني دابا يعرفو ولا ميعرفوش ... مع هاد الحكام الجديد ديال الملك بغيت كلشي يعرفني باللي ماشي مراتو ... وباش نرتاح منو شوية وما يعاودش يفكر يقرب ليا ... ولا يحط يدو عليا.... بغيت نرتاح من هبالو ديال كل ليلة ... شحال قدني نسايس ليه و فحماقو نهز ليه ... شحال قدني نعطيه دوك العشوب باش ينعس ويهنين من نقيرو .

- هييييه ! كتشربيه العشوب !!!! منين جاوك ؟ ونتي مكتخرجي مكدرجي ومكتعرفي حد من غيرنا!

هزات حاجبها كترمش بابتسامة وقالت : ديك الشجرة المجردة اللي فالسطح ... انا اللي زرعتها تما .. وهي اللي كتولد ليا باش نخمر الشارف الهارف ونتهنا من صداعو كل ليلة 

بقاو غير حالين فمهم فيها .. اما هي وقفات كتلوح شعرها الطويل للور وقالت بفخر 

روح الندى: احسن حاجة دار هاد الملك هوا لاح هاد الحكام على شعبو ... كن ماهوا كن راني كل ليلة كندور بجنابي مدعورة من الشارف الهارف ..... (تلفتات بابتسامة ) يالاه البنات ... ليوم نخرج من هاد الدار بحالي بحال العزبات ... نمشط شعري فالواد وندهن رجلي بالداد ... ياك السي دريس سافر يجيب التواب . . . ايوا عفا عليا الله انا باش نخرج نشوف الدنيا وندير الجيران والصحاب .

قررات روح الندى تخرج من الحبس اللي عايشة فيه .. وحكام الملك على شعبه جاها من الجنة والناس ... وماكرهاتش تخبر الناس كاملين باللي عزبة .. وباللي ماعندو الحق حتى واحد يقيسها قبل زواج الملك .. واللي قرب ولا حطو يدو يتعدم فنهارو .. استغلات غياب التاجر وقررات تخرج مع الخدامات اللي كبرو فديك الدار وكبرات معاهم هي بحال ختهم لصغيرة ... واخا سر زواج كان مخبي فضحاتو هي مللي سمعات بحكم الملك الجديد . اش عند الخدامات مايدرو قدام قراراتها . ماعليهم غير ينصحو واخا عارفينها ماشي ديال النصاءح .. الهضرة كدخل مع ودنيها بحال الهواء . وماعليهم هنا غير يديرو ليها الخاطر ويردو البال باش متوقع حتى شي موصيبة ... يدوزو النهار بحال العاظة ويرجعو بحالهم للقصبة بلا ميسيق حظ لخبار لروح الندى


طلعات روح الندى لبيتها الترابي المزين بسجادات فالحيوط .. لاخت عليها حايك كحل سترات بيه راسها وخبات وجهها .. هزات سلة فيها المشطة والعشوب دالشعر ونزلات بشوية عليها لباب القصبة 
)القصبة هي ديور الكبار اللي بحال الرياضات ) 

لقات لبنات بتلاتة ملحفين وهازين سليلاتهم وبلاغيهم فرجيلاتهم كيتسناوها ، حلو بابا القصبة وخرجو كيتمشاو ويدورو فعينيهم .. ماباغيين حد يوقفهم ولا حد يسلم عليهم ... داز بين الديور كيتمشاو بالزربة حتى خرجو للطبيعة عاد حيدو لتامهم ... سبقاتهم روح الندى للواد كتجري فرحانة ولاحت الحايك فالارض ومشات دخلات بقفطانها الخضر والماء واصل ركابيها ..فرحتهت بهاظ النزاهة محاس بيها حد بحالها كترش الماء وتهز راسها فالنخل اللي داير بيها وترجع ترشو فالسماء ، جلسو لبنات مل وحدة على حجرة .. ها اللي كتمشط شعرها ها اللي كتحك رجليها ... اما لاللة روح الندا طلقات سالفها مشا مع الواد على طولو حتى تقال بالماء عاد تلفتات عند البنات كتعيط

روح الندى: عبديااا ... فطوووماااا .. اجي البنات عاونوني نغسل شعري راه مكنقدرش عليه بوحدي ... عافاااكم 

هزات علدية مولات الوشام جلايلها وناضن 
عبدية: شعرك باش يتغسل خاصو ليلة ونهار ... اما غير جوج يدين ولا ربعة مااا غاديش يهزو كاع هاد العبار .... دوري عطينا ضهرك واري المشطة ... تباارك الله تقلو كيوزن قنطار وطولو يضرب من هنا للدار .. غير قولي ليا كفاش كتقدري تهزي كاع التقل على راسك واش مكيسخفكش !

روح الندى : كن كان يدوز فيه المقص كن راني ضربت منو النص .

لاحت ليهم سالفاه وخلاتهم كيمشطو .. وحدا تسرح طرافو و وخدة ترطب جدورو . ولاللة روح الندى جالس فوق الحجر مربعة رجليها وكتشوف فالطبيعة . . . وسط هاد الهدنة اللي هما فيها تسمع صوت الخيول ... حبسو البنات ووقفات روح الندى حاطة يدها على قلبها مخلوعة 

روح الندى: شي حد !

عبدية : مفزوعة ) صوت الخيل ... وماشي غير خلي واحد ... يكونو فايتين 4 ؟ 

روح الندى : هي الرجال هادو ! ... سربي عاونوي نحمع شعري ... دغيا عاونوني


بداو كيهزو فالشعر وهوا كيتفسخ ليهم والماء زاد تقل على التقل حتى ماعرفو كيديرو ليه ... صوت الخيل قرب ومشياتو فالارض كتسمع .خلا البنات يطلقو من الشعر مفزوعات وهربو خلاو روح الندى كترجف واحلة فسالفها ... هزاتو بين يديها عنقاتو وهزات شالها بالخلعة ونقزات بين الحجر دالواد وتخبات حاطة يدها على صدرها و قلبها كيضرب ... واش هادي الموت 
. ولا غير خلعة وغاتفوت .. هبطات راسها كتسمع صوت الرجال .. رجال كبار .. وكتار ... كلاها الفضول وهزات راسها بشوية طلات من بيه الحجر والنخل اللي نازل عليها وبدات تبعهم بعينيها ، كانو رجال كبار ... طولهم طول وعرضهم عرض. لباسهم بحال لباس العبيد ... منهم 8 لابسين لون واحد كرونة ومنهم 4 لابسين الكحل ومنهم واحد لابس لباس الفرسان ومحزم بحزام خاشي فيه خنجر فالجنب . واقفين بجنب الواد مخليين الخيول تشرب .. وبين هاد الرجال شاب كيبان فيه غير الكتف .. دايرين بيه الرجال كل واحد من جهة ... لباسو لباس الملوك .. سروالو وفوقاني ديالو محلولة شوية من الصدر كتافو عراض وعليه عباية حمراء مشدودة من الكتاف وطويلة من اللور مع طولو كيرجها مع الارض .. وفكل كتف داءرة نحاسية نازلة بالهدب فالباج .. شعرو كحل عريان .. محاط فوقو لا عمامة ولا تاج ماشي بحال رجالو اللي راسهم مغطي بعمامة ، روح الندى نسات راسها وبدات كتجبد تابعة مول العباية الحمراء الحمراء بعينيها حتى صربات راسها مع النخلة عاد تفكرات راسها فين هي .. شدات حبهتها ورجعات تخبات كطل بنص عين .. شوية صهل الخير بأعلى صوتو وتهزو رجليه القدامية ووقف كيوغوت .. تخلعات وهزات راسها تشوف شنو واقع بان ليها كلشي دتر بالخيل الكحل اللي على ضهرو سرج احمر خيل اصيل ... لونو كيبري مع الشمس وكيجدب العين اللي شافت فيه .. مافهماتش شنو وقع لهاد الخيل الاصيل حتى هز فمو من الماء كيصهل ... تكون عقرب عضاتو ولا حية ! مالو فمو محلول مابغا يسدو ... ولا شي واحد فدوك الرجال قد يوقفو ويعرف مالو .. شوية قرب مول الباية الحمراء وهي موراه كتجر .. حط يدو على الخيل بشوية وشد لجامو هبطو عندو .. دوز يدو على وجهو حتى تهدن وشد ليه فمو اللي مابغاش يسدو ولا قدر يحرك لسانو ... خشا صبعو وسط فم العود وهوا يجبد شي حاجة مكتبانش ... بقا كيبعد يدو ويزيد يبعد ... اش هادشي ... شنو هادشي اللي كيبان طويل ومكيبانش! خرجات عينيها روح الندى وهي تحط يدها على فمها فاش شافت زغبة من شعرها الطويل تلوات للعود على لسانو حتى خنقاتو ... شافت اليد اللي جبداتها وشافتو كيسرح فيها بيدو .. كانت غير يديه اللي كتبان .. الرجال الدايرين بيه ماخلاوش وجهو يبان ... شافتو كيلوي الزغبة على صبعو وكيحبد صندوقة صغيرة من جيب سروالو .. حط فيها الزغبة ورحعها لجيبو .. ضرب على الخيل وطبطب عليه وطلع فوقو هوا اللي معاه .. حلف وجهو مايبان ليها واخا خرجو عينيها ... شافت ضهرو وشافت العود كيجري بيه والعباية كيطيرها الهواء فالسماء من موراه ... مشا وخلا عينيا تابعينو وعقلها مرفوع وهي واقفة كتقطر بالماء.

يتبع