الحب ليس بالكلمات الجزء الخامس

من تأليف نهى مر
2018

محتوى القصة

رواية الحب ليس بالكلمات للكاتبة نهيلة المرواني

جلس يونس فوق كرسي و باقي مرغوي و معصب و ساتر بالقوطة نصو التحتاني كايتسنا لما يرجع لقات لينا الغفلة و هزات داك لما ديال لحلبة حكات فيه 5 ديال نيوف التومة المجهدة و دخلات لدوش بالتسلات هزات قرعة ديال الشومبوان طلات فيها لقات الشمبوان قرب يسالي ، خوات داك الخليط فالقرعة و حركاتو مزيااان ، حلاتها و شماتها طلعات فنيفها ريحة الحلبة الخانزة و ريحة الثومة ، رجعات لقرعة لبلاصتها و خرجات لقات كولشي تحرك لي عندو شي شغل كايقضيه و يونس جالس مربع يديه فوق كرسي و عاقد حجبانو ماحاملش راسو ، قربات حداه كاتضحك و طرطقات فقاعة كانت فراسو
لينا: ههههههههه دنوبي هادوك شفتي ربي كيفاش عاقبك سبحان الله العدالة الإلهية
يونس:(خنزر فيها) سيري فحالك ا لينا قلبي عليا هاد الساعة
لينا: وينوووووو 😂😂 جات معاك الرغوة ا ساااط
يونس: اووووووففففف (قلب عينيه)
لينا: رض بالك لايرجع لما و ندخل انا لدوش و نخليك حاصل هنا
يونس:(وقف) تديريها نننن (قلب وجهو و ساط)
لينا: ننن اش شد غير فوطتك لاتطيح و نصدق شايفة شي موصيبة كحلة
يونس:(حيد الرغوة من راسو و لاحها فالأرض) سيري في حالتك
لينا:(عطاتو بالضهر غادة و كاتهضر) اييه ايييه هاهيا غادة ، لما سبحان الله ماتقطع حتى عرفك دخلتي نتا لدوش
مشات لينا و خلات يونس جالس على اعصابو كايضرب فيه لبرد و هو فازك و حالتو بالرغوة لي بدات كاتلبد و لفوطة لي مغطي بيها نصو مامسخناهش ، ضور هضرة لينا فراسو مزياان و طاحت فبالو الماكانة ديال لما ، وقف و عينيه معقودين الشر خارج منهوم شاد لفوطة لاتطيح خرج لبرا و حل لباب ديال لماكانة و مشا لديال لفيلا ضورها لقاها مسدودة ، غمض عينيه بالفقصة و عاض على سنانو عرف شكون سبابو فالحالة لي هو فيها ، حل عينيه و ضورها حتى تطلق لما و سدها دخل ، مشا بالجرا لدوش دخل دوش دغيا قبل ماتعيق بيه طلق لما و خرج لابس شورط رمادي فايت الركبة مع تيشورت بيض لاصق عليه و فوطة صغيرة دارها فوق كتافو كايمسح بيها شعرو و كايضحك مني كايعرف بلي لينا سبابو فديك الحالة لكان فيها ، طلع لبيتو فرش السجادة و صلى النهار كولو ، كمل و هز لفوطة كايمسح بيها شعرو هبط عندهوم لتحت لقاهوم جالسين فالصالون كايدردشو، جلس حدا راوية كايمسح راسو من لما و كاينشفو مالقاش لينا معاهوم و عرف بلي راها كاتدوش ، قربات مو منو و شمات فيه ريحة لحلبة و التومة
راوية: مالك فيك ريحة الحلبة واش كليتيها !
يونس: لااا ماقربتش جيهتها اصلا علاش
راوية: كانشمها فيك هي و ريحة الثومة
يونس: راه يالاه دوشت الله يهديك ا الواليدة
راوية: و الله الا كانشمها فيك ، نجمة اجي قربي من يونس و قولي ليا اش كاتشمي فيه
ناضت نجمة قربات من يونس و خيبات سيفتها
نجمة: اييييه فيك الريحة
يونس: و منين جاتني انا ماقربتش ليها كاع بمرة 
راوية: اوا حنا غير قلنا ليك

بعد من حداها باش ماتبقاش كل شوية تعلق على ريحة الحلبة و الثومة لي فيه تقنت بوحدو مقابل مع لباب مسرح يديه فوق المخدة و فارق رجليه و ساهي كايفكر ، دخلات لينا عليهوم لابسة سروال طويل اسود ديال لبيجامة بتيشورت ديالو طويل هابط على ترمتها مغطيها نص كم كايبانو يديها بيضين و رطبين و حتى الشعر لي فيهوم زعر و خفيف ماكايبانش و هي اصلا ماعمرها قاصتو ولا قربات ليه بزيزوارة ولا بلاصيغ ، وقفات مبتاسمة ووجها كايبان منور بعدما دوشات، جامعة شعرها على شكل كعكة لفوق و بانت ضورة وجهها و بانو ملامحها اكثر عاد لحنيكات حميمرين بفعل سخونية لحمام عطاوها فوق جمالها جمال اكبر ... دارت يديها على خصرها و وجهات هضرتها لأمها
لينا: ماما انا غانطلع ننعس دابا صافي !
السعدية: ويلي من دابا !
لينا: غدا غانفيق بكري نتريني شوية
السعدية: لي بان ليك ا بنتي
لينا:(عطاتهوم بالضهر مشات و رجعات) اه غدا غادة تجي عندنا صاحبتي باش تحضر للعرس صافي
السعدية:(جمعات يديها القدام) شكون هاد صاحبتك !
لينا: ماغاتعرفيهاش لمهم واحد الدرية ضريفة و صاحبتي من شحال هادي
السعدية: و شكون غايجيبها من المحطة !
لينا: غاتشد طاكسي و غاتجي بوحدها عندها لادريسا
السعدية: واخا صافي
لينا: تصبحو على خييير
الجميع: تصبحي على خير
خلاتهوم كايهضرو و مشات طلعات للفوق دخلات لبيتها ، شعلات الضو و سدات لبيت ، فسخات شعرها و هزات فوطة كوزات و هبطات شعرها كولو للقدام و بدات كاتمسحو بالفوطة فهاد الأثناء دخل يونس عليها للبيت لقاها مكوزة بإتجاهو و تصدم، سمعات هي لباب تحل و ضورات غير راسها و لقات يونس واقف مخرج عينيه
لينا:(وقفات مقادة) هيييييييي 😨 اش كاتدير هنا (بصوت عالي)
نقز عليها بسرعة سد ليها فمها و تكاها على لحيط
يونس: (بهمس) شششششش ماتهضريش ا بنادم
لينا: امممممممم (كاتحرك عينيها)
يونس: حصلتي ا سليعفانة ماحشمتيش قاطعة عليا لمااا
لينا: اما مممممممم (حركات عينيها يمين و يسار)
يونس: ضوري عليا عينيك تما كيف لبويا و الله الا حشومة عليك خرجتيني من دوش بديك الحالة هادا كاع حقد
لينا:(كاترمش) مممممم
يونس: تحياني عليك لي يشوف هاد لعوينات يقول لبراءة كاتقطر و لكن لي يعاشرك يعرف سليعفانة لفعة كاتضرب من تحت لتحت
لينا:(ضورات عينيها)
يونس: عطيني بيزو و نطلقك
لينا: (خرجات عينيها) ممممممممم
يونس: انا نعطيها ليك ا زين ديالي
قرب منها باش يبوسها فخدها حسات بأنفاسو حدا وجهها و تداركت الموقف قبل ماتدوخ و تمشي مع حلاوة البوسة، جمعات رجليها عندها و عطاتو للمركز بركبتها ، شهق يونس و خرج عينيه بصدمة حط يديه على المسائيل ديالو و كايتلوا بالألام
لينا: اوا باش لوالديك تقرب ليا تاني مشي مشي و توجع برا لمرا جاية غادي نفgسهوم ليك الا ماحشمتيش اوا صافي زعمتي و وليتي غير مدلي عليا شلاقمك و كون غير شي شلاقم زينين دايرين بحال دياال الجمل يخخخخ و شير عاود دوش ريحتك خانزة بالحلبة يااااااع
طفات الضو و تخشات فالفراش خلاتو واقف كايتوجع و مزير عليهوم ، بعصوبة خرج برا عينيه خارجين بالحريق و الآلام ، توجه للكوزينة و هو مكوز ماقادرش يتمشا جبد الثلج حطو تما يالاه بدا كايبرد عليه شوبة و كايمشي الآلام بالتدريج ، خفاف عليه داكشي و ناض توجه لبيتو حط راسو فوق المخدة و هو كايتحلف عليها حتى داتو عينو و نعس

صبح الصباح فاق يونس مقلوب بريحة التومة و الحلبة قهراتو ليل كولو هو يشمها، بقا مجبد شحال على ضهرو حال عين و ساد عين يديه تحت راسو كايتسنا الدوخة ديال النعاس تتحيد، بعد لحظات ناض من لفراش تكسل حتى طرقو عضامو و حك مؤخرة راسو ، مشا لصاكو هز منو صابونة و شيتة ديال السنان و سينيال ، لبس كلاكيطة فرجليه و مشا بتثاقل غير جار رجليه مافيه لي يهزها وصل لطواليط غسل وجهو بالصابون و مسحو حك سنيناتو مزيااان حتى تنقاو و تحيدات من فمو ريحة الفم الصباحية ، خرج من الطواليط عينيه مجبدين بالنعاس و كل شوية كايتفوه، دخل لبيتو لقا خوه و أمين ناعسين ... رجع داكشي ديالو لبلاصتو و خرج من لبيت جار رجليه تاني ماعندو مورال يديه فالجيب و باقي لاعب عليه النعاس ، هبط لتحت كايقلب يلقا شي واحد فايق مالقا حد ، مشا للكوزينة هز شوية ديال لحلوة و كاس ديال لحليب مع لقهوة دمق بيهوم و عما الجوع باش يكمي ، طلع فالدروج يعفط فدرجة و تلاتة ينقزهوم حتى وصل لطابق الأول دخل للبيت مشا لصاكو فجيبو دخلاني داير باكية ديال لكارو مع بريكة هزهوم و خرج مشا ديريكت لجردة و عينيه نصف مسدودين، دخل مع الش جردة لقا لينا كاتنقز فبلاصتها لابسة سيرفيط بالرمادي مفتوح سروالها مزير على لينا و مبين فورمتها بأدق التفاصيل و لفوق تيشورت رمادي مفتوح مكتوبة فيه Gucci بالغوز مفتوح فالوسط جيهة صدرها و عندها جاكيط قصيرة عاقداها على خصرها عندها قب ا لداخل ديالو فالغوز مفتوح و فرجليها صبرديلة رمادية سبورتيف مع تقيشرات بيضين و جامعة شعرها ذيل حصان مطلعاها للفوق ، تكا على لحيط و كروازا رجليه و شعل لكارو كايكمي و كايشوف فيها كاتنقز و دايرة لكيت مجهدة لموسيقا على حدها و خاشية تيلي فجيب السرواال حيتاش مزير ، كايكمي و يسوط فالهوا و كايشوف فيها و يرجع تاني ينتر من لكارو و يسوط فالهوا، بدلات لحركة و نزلات كاتلعب طراكسيون و يونس متبع حركاتها و بأدق التفاصيل، باغي يعرف اكتر على هاد لبنت الشيطانة لي فمظهر ملاك لبنت لي عجباتو و خلاتو باغيها ليه لبنت لي فينما تزطم كاتزطم و تدير زبلة لبنت لي ماتقدرش تعيش بلا مشاكيل.
ضرباتها ريحة الكارو لنيفها و جاتها مجهدة ضورات وجهها و لقاتو واقف باقي لابس شورطو الرمادو تيشورت لبيض لي مزير عليه و ليمولي عندو كايبانو قاصحين و رجليه مزغبين، طلعاتو و هبطاتو و قلبات وجهها بإنزعاج
يونس: صباح لخير ا زين ديالي (ساط الدخان)
لينا: صباح لبعر
يونس: السبان ازين على الصباح، باقي ماتفاهمتش معاك على الضربة ديال لبارح و على لما لي قطعتي عليا عجبك لحال و انا خارج هاكداك
لينا: ااااااهه عجبني لحال (وركات عليها) سوقك نتا و لي جاي اكتر من لي رايح (قلبات عينيها)
يونس: (جاي جيهتها) و علاااش اش درت ليك انا باش تديري هادشي كولو ! علاش ماكاتحملينيش (كايعبر بيديه)
لينا: (وقفات) هييييه حدك تما يخخخخخ ريحتك خانزة بالكارو و زيد عليها لحلبة و لتومة واش كنتي مرقد فالرفيسة يخخخخ و ديك الحلبة لمجهدة ناريييي السلامة يا ربي يخ تف تف تف
يونس:ها لكارو ا لالة (لاحو و زطم عليه) الحلبة ماعرفتش منين جاتني ريحتها من لبارح و هي فيا و غير لبارح دوشت
لينا: سير سير لاتخنزني معفون كيداير
يونس: وا خلينا من هاد الهضرة لاش ماكاتحملينيش
لينا:(كاتحسب بيديها) لولا قطعتي ليا الصندالة و تعفرتي و الثانية سبيتيني و قلتي ليا خدامة و الثالتة ماما و امين خاصمو عليا بسبابك و الرابعة بسبابك كانو غايشدوني البوليس الخامسة بستيني ففمي و طولتي فيها حتى تقطع فيا النفس السادسة ضربتيني و طوعتيني مع لحيط و السابعة بستيني فحنكي و الثامنة دخلتي لبيتي و لصقتيني مع لحيط
يونس: (نصف ابتسامة) وااااااي شحال هازة فقلبك عليا (سمع صونيط) صونيط هادا ياك
لينا: (بإبتسامة) اه هو سير شوف شكون
يونس: واخا انا غادي و لكن نرجع نلقاك هنا باش نهضرو على هادشي و نتفاهمو خطرة وحدة
لينا: واخا صافي (بإبتسامة)
عطاها يونس بالضهر و هو ماحاملش يشم هاد الريحة فيه ، حل لباب ديال الزنقة و هو يتصدم جمد ليه الما فالركابي

يونس: شكاتديري هنا !!!!!
خرج برا و رض لباب عليه و حجبانو معقودين و العصبية بدات كاتبان فوجهو و هو كايشوف فإيمان جارة فاليز ديالها و لابسة سروال جينز فيه تقاطع خفاف مع تريكو مايل من لكتف واسع عليها فالشيبي و صبرديلة بيضة مع تقيشرات بيضين و طالقة شعرها الأسود الطويل دايرة نضاضر فوق راسها و كاتشوف فيونس بدهشة مخلوطة مع صدمة بعيوناتها الكحلين و وجهها مدور و صغير و حروفها صغيرين زوينين و عندها لون حنطي عاطيها جمال اكثر حطات يديها على كتف يونس لي كاتشوفو معصب
إيمان:(بصوت رقيق) مالك ا يونس ! انا جيت عندك
يونس: وا لاااااااش تجي عندي (حيد ليها يديها) انا وياك تفارقنا و اصلا باش عرفتي انا هنا شطون قالها ليك !!!!!
إيمان: جيت عند صاحبتي و صاحبتي قالت ليا بلي نتا كاين هنا
يونس:(ربع يديه) ايييه و شطون هاد صاحبتك (حط صبعو على راسو) كاتضحكي عليا ولا شنووووو شكون قالك انا هنااااا
إيمان: صاحبتي لينا ، واش مافرحتيش مني شفتيني !!!
يونس: تسناي تسناي !!! كيفاش ليناا! منين كاتعرفيها !!!!!
إيمان: صاحبتي هي لينا ا يونس تسنا انا نشرح ليك كولشي
تبلوكا يونس فاش سمع سمية لينا و كولشي تخلط عليه إيمان قدامو و يالاه مفارق معاها و باش عرفات هو تما و كيفاش لينا اش دخلها فالقاضية اسئلة كتيرة كاتضور فبالو فلحظة وحدة و جواب لي غادي يكون و غادي يكون عند لينا، زير على سنانو و دخل لفيلا ردخ لباب مزير على يديه و غادي معصب ، مشا لجردة لقاها مسترخية كاتدير ليوغا .. بالعصبية ديالو جرها من يدها و نوضها
يونس: نتي لي قلتي لإيمان فين كاين انا
لينا: طلق مني ا بنادم (كاتنتر) واش ماكاتفهمش اييي راه كاتضرني
يونس: جاوبيني نتي لي قلتي ل إيمان فين كاين ياك
لينا: وا طلق مني ب آشمن حق شاد فيا و كاتحاسبني وا طلللللللققققق ا زمرررررر
يونس:(زاد زير عليها) ماتلعبيش معايا هاد اللعب ا لينااا تبرهشتي قلت ماكاين باس و لكن باش تجيبيها هنا لااااااا فهمتيييي (حمر فيها عينيه)
لينا:(بتحدي) شكون حاسب راسك طلق مني ا لهاماج نتبرهش ولا نتزمر سوقك نتااااا طلق مني قبل مانجمعهوم عليك و نصدقو م***** فخطرة و نزيد عليها حتى الضربة ديال داك النهار لي بسبابها مشيت لسبيطار
يونس:( طلق منها و ساط بعصبية) خسرتي معايا ا لينا خسرتي معايا و بزاااف ماتوقعتكش تديري هاكدا
لينا: وا سير فحالك عطيني بالتيساع شكون سوق ليك و اش بيني و بينك باش نتخاسرو ولا نتصالحووو
شاف فيها يونس بعيون حادة و شوفة قاصحة و عطاها بالضهر و خرج و رجعات ذاكرتها بالنهار لي هزات تيلي ديال يونس و هزات منو النمرة و فاش هضرات معاها

#فلاش_باك
لينا:الو السلام عليكم
إيمان: و عليكم السلام شكون معايا
لينا: انا سميتي لينا نتي هي إيمان
إيمان: اه نتي شكون
لينا: انا كانعرف يونس صاحبك ياك يالاه تفارق معاك غير البارح ياك
إيمان: شكون نتييييي
لينا: ختو غادي تتزوج بولد خالتي و جينا نحضرو للعرس اختي لبارح سمعتو فاش هضر معاك و بان ليا محطم مسكين و بقا فيا باينة فيه كايبغيك
إيمان: الى كان كايبغيني على اش تفارق معايا
لينا: ماعرفتش واقلة خاف يتعلق بيك اكتر و تضيعي منو قال اللهم نتفارقو من دابا حالتو كاتقطع فالقلب بقا فيا بزااااف و قلت نعيط عليك باش تجي عندو
إيمان: قاليا بلي هو فالجنوب بعيد بزاااف
لينا: لااا حنا فإفران جي عندنا راه كاينة عائلتو هنا منها نيت تتعرفي اكتر على ماماه
إيمان: كدب عليا 😨
لينا: اختي عذريه راه معاه العائلة كون ماكانش عزيز عندي و بقا فيا ماغاديش نعيط عليك
إيمان: و بآشمن صفة غانبان قدام عائلتو !
لينا: نقولو ليهوم صاحبتي واش غاتجي !
إيمان: اااه على قبل يونس كولشي يهون عطيني لادغيس
لينا: غانسيفطها ليك فميساج
إيمان: ميغسي حبيبة ماعمرني ننسا خيرك

#عودة_للحاضر
ترسمات إبتسامة شر على شفايفها و قالت
لينا: دابا نشوفو اش غاتدير ا سيهوم يونس كايصحاب ليه غاننسا الضربة لي عطاني بسهولة حتى مانكونش لينا الجوهري بنت سي عزيز الجوهري و لالة السعدية الشليحة بنت القاع و الباااااع

رجع يونس عند إيمان لقاها باقة واقفة قدام لباب ، شدها من كتفها جرها و هي مافاهمة والو بعدها من حدا لباب و وقفو خرج فيها عينيه و قال
يونس: دابا غادي ترجعي لكار لي جابك غادي يرجعك
إيمان: يونس لاش كاتقول هاد الهضرة حشومة عليك
يونس: واش مافهمتيش راسك عييت مانحشي ليك و نتي والو
إيمان: انا كانبغيك يونس عافاك
يونس: انا ماكانبغيكش عطيني بالتيساااااع وا فهمي 😡😡
إيمان: انا معروضة لهاد لعرس و غادي نبقا حتى يدوز
يونس:(غمض عينيه جمع النفس و طلقها) وا منين كاتفهمي (زير عليها) واش ماعندكش كرامة كيفاش غادي تدخلي عليهوم فالدار
إيمان: ااايييي زيريتي عليا ااييي قصحتيني (طلق منها) غادي ندخل عادي صاحبتي عرضات عليا اش فيها
يونس:ضبري راسك غير انا فوتي ليا ***** ماتضوريش بيا فخطرة ها ودني منك 👂🏼 تحاديني غانلصقك مع لحيط راكي عارفاني الا طلع ليا لخز
خلاها و دخل للفيلا كاااعي و شاعل خاصو غير معامن ، طلع لبيتو جلس فوق لفراش شد راسو بين يديه و بدا كاينهد كأنه هاز هم كبير فوق ضهرو ، تلف و ماعرف مايدير من جيهة ماحاملش إيمان و من جيهة ماحاملش التصرف لي دارت لينا و جاه مبرهش و لكن شي حاجة فقرارة نفسو كاتقوليه سمح ليها و كايحاول يكبت هاد الصوت باش مايخليهش يأثر فقراراتو ، حار و ماعرف مايدير و فوض أمرو لله و لي فيها لخير غاتوقع، مشا لدوش توضى و باقة ريحة الحلبة عاطية منو ، خرج من جوش و مشا لبيتو صلى الصبح و رش عليه الريحة مزيااان و هز سوارت طوموبيل ديالو و خرج مالقاش لينا و إيمان ركب فلوطو ديالو و خرج باش يضور و يبدل ساعة بوحداخرا.

غير مشا يونس خرجو لبنات من الجردة و مشاو جلسو فالصالون و لينا كاتصبر فإيمان
إيمان:(بصوت ناعم) علاش قلتيلي بلي هو كايبغيني ! و جيت هاد الطريق كولها و فالأخير دار معايا هاكدا
لينا: ماتديهاش عليه راه عندو ماشاكيل داكشي علاش صبري ا حبيبة لي بغا العسل يصبر لقريس النحل ، شوفي نتي كسبي ماماه هي لولا و من بعد هي غادي تبغيك ليه ماتسوقيش ليه كاع هو
إيمان: و كيدايرة هاد ماماه
لينا: واحد لبعكاكة اجي واش نتي شلحة !
إيمان: لا انا كازاوية
لينا: موصيبة هادي ياختشي هو ماماه بغاتها ليه شليحة ابا عند جد
إيمان: اوفففف و دابا شنو ندير
لينا: كيفما قلت ليك تقربي من ماماه و صافي هي الا بغاتك راه واخا تكوني حتى برطقيزية ماغاديش تسوق
إيمان: ربي يخليك ا ختشي لينا ماعمرني ماننسا خيرك

فاقو اهل الدار كاملين ، عرفاتهوم لينا على إيمان و رحبو بيها كاملين ، فطرو مجموعين من بعد مشا كل واحد يقضي شغلو دوزو النهار ملل فملل بالنسبة للينا حيتاش ماكاينش يونس لي تتناكر معاه و تعصبو ولا يعصبها ، غير كاتضور فالدار بحال النحلة اما يونس فمن لوقت فاش خرج مارجعش باقي و ماعندوش مورال باش يدخل لديك لفيلا.
لحق ليل و تجمعات العائلة كلها فالصالون كايجمعو و لينا منغامسة معاهوم فالجماعة و فنفس الوقت دايرة ودنيها مع لباب اما إيمان فعيات ماتتقرب من راوية و تبين ليها التباتة و الرزانة و لكن غير عرفاتها ماشي شلحة و نفراتها كاتدير ليها غير الضحكة الصفرة فقط ، لحق منتصف الليل طلعات السعدية و خديجة ينعسو و بعد وقت قليل تبعاتهوم راوية و نجمة و عصام ولدها الصغير و رقية هازة ولدها ناعس بين يديها و معاها راجلها كايفرنس ، بقا معاذ و أمين و محمد علي و هند و رانيا و أيوب و إيمان و لينا ، فرشو فالجردة و حطو مخيدات و جلسو تما مقصرين بيناتهوم بكارطة لاعبين لاص الغماز ، طاح لاص عند أمين و المراقب عند لينا ، كولشي تغمز و حطو وراقهوم و بقات لينا كاتضور فعينيها كاتشوف فيهوم و بعد تفكير طوييل قالت
لينا: لاص عند معاذ ياك
معاذ: ههههههه حشيتيه ا بنتي عند أمين
لينا: (كاتفركل) لا لا شفتك نتا غمزتي إيمان
معاذ: اوا اه و لكن ماعنديش هاكي قلبي كارطتي
أمين: هاهوا صافي بردتي دابا اوا نوضي يابنتي تgعدي واحد الحكمة عندي ليك من داكشي
لينا: شي حاجة ساهلة عافاك (كاتمسكن)
أمين: سيري لبيتي فين كاننعس انا و يونس و حسن و فيقي حسن خلعيه
لينا: لا لا ويلي الراجل مزوج نمشي نهجم عليه فبيت النعاس و نخلعو و الى ركلني و طوعني
رانيا: ماتخافيش ههههه هو اصلا خواف كايتيق داكشي ديال الجنون يعني غادي يبول فسروالو
معاذ: نوضي ا بنتي نوضي
لينا: حرام عليكوم غادي يقول غير جاية نغتاصبو
الجميع: 😂😂😂😂😂
أيوب: ماسوقناش نوضي
هند: ايييه هادا هو اللعب
لينا:(كاتتحلف) و الله ماتبقا فيك
الجميع: نوضي نوضي نوضي نوضي
لينا: هاهيا ناضية الله ينوض فيكوم البرص
ناضت و بان شورط ديال بيجامتها فالبلو مارين حدو الركبة و كايبانو رجيلاتها بيضين زغبهوم اشهب و لفوق ديباردور ديال شورط فالبلو مارين فيه نجوم كبار فالأبيض و حد الكتف و بقاو كتيفاتها عريانين و شعرها طالقاه على راحتو ، دخلات للفيلا و طلعات فالدروج رجليها حفيانين و عينيها كايقلبو و يضورو فبلاصتهوم خايفة تحصل من عند امها ولا خالتها ولا حتى راوية، وصلات للبيت حلاتو بشوية ، سبقات راسها طلات بان ليها شخص ناعس عاطيها بالضهر ، دخلات للبيت على رؤوس أصابع رجليها و عاضة شفتها السفلية بالتوتر، وقفات على راسو و لقاتو مغطي وجهو بيديه، هزات يديه حيداتها ليه و شافت يونس ناعس ماشي حسن ، خرجات عينيها و شهقات ايمتا دخل ! كيفاش دخل ايمتا طلع ايمتا نعس هادو الأسئلة لي كانو كايضورو فبالها فديك اللحضة و هي كاتشوفو مغمض عينيه و باينة فنعاسو مرتاح لابس شورط كحل و لفوق عريان بفعل الصهد لي كان ، عطاتو بالضهر باش تمشي فحالها و ماحسات براسها غير يد جراتها و نعساتها فوق الفراش ، حلات عينيها لقات يونس كايشوف فيها ناعس حداها دايرة لتحت و وجهو حدا وجهها و انفاسو كاتضرب فوجهها ، بدات كاترمش بتوتر و تزنكات بسرعة و قلبها كايضرب بالزربة لشدة قربو ليها تجلاو ليها الكلمات و تلفات، حاولات تنوض لكن لقاتو مفيكيسها برجليه و ماعندهاش كيفاش تدير
يونس: (بهمس) جاية كاتقلبي عليا !
لينا: (بصوت محرج) لا جيت بغيت حسن
يونس: و اش بغيتي خويا !!!
لينا: والو غير لعبة حكمو عليا باش نخلعو عافاك خليني نمشي
يونس: دخول لحمام ماشي بحال خروجو ا زين
لينا:(كاتضور فيعينها كاتحاول ماتشوفش صدرو) بلييز خليني نمشي (بصوت متوتر)
يونس: لاش جبتي إيمان هنايا ! ماشي حشومة عليك تجيبي صاحبتي لقديمة و نتي عارفاني مزعوط فيك
لينا: ماجبتهاش (قلبات عينيها) بليييز خليني نمشي
يونس: ماغاديش تمشي .. مالك حشمانة ! ماعمرك ماشفتي راجل عريان من لفوق
لينا: (كاتحاول تنوض) عافاك خليني نمشي غايجيو و غايفهمو غلط
يونس: و يفهمو غلط و من بعد
لينا: غايتشرا لينا الصداع
يونس: و من بعد
لينا: (قلبات وجهها) غايقول بيناتنا شي حاجة
يونس:(شد الذقن ديالها و ضور وجهها عندو) و يقولو بيناتنا شي حاجة و من بعد
لينا: غادي يقولو درنا شي حاجة حرام
يونس: و يقولو و من بعد
لينا: غايبغيو يزوجونا
يونس:(بتاسم) و يزوجونا اش فيها كاع ا زين
لينا: بلييييز خليني نوض
يونس: حلفت مانسمحش ليك على لي درتي و لكن ماقدرتش غير شفتك و نسيت لي درتي داكشي لا إرادي اش درتي فيا يا لمسخيطة
لينا:(بعيون ذابلة و صوت رقيق) عافاك ا يونس خليني نمشي
يونس: لا خليك معايا ليوم ، ماتخافيش ماغاديش ندير ليك شي حاجة ... ماغاديش ندير معاك شي حاجة بلا ماتعطيني الضو لخضر ..واخا فغيمون بغيت نبوسك و لكن غانحبس راسي على قبلك

تزيزنات مالقات ماتقول ووجهها ولا كيف مطيشة كاع الدم طلع لوجهها قلبها كاتحس بيه كايضرب فجسمها كلو و عاد الإحراج قتلها زائد الخوف من ان شي واحد يحصلهم، قلبات عينيها و بقا هو شاد وجهها كايتأمل ملامحها و ضو خفيف لي كاين داخل من شرجم جو دافئ و حميمي ، دوز صبعو على خدها و هي مالاقياش كيفاش تهرب تحبسات بين ذراعو ، هبط صبعو من خدها لشفافها و دوزهم بنعومة و حنان
لينا: (بخوف) عافاك خليني نمشي
يونس: مالك مخلوعة و الله ماندير ليك شي حاجة تيقي فيا ا لينا اخر واحد يفكر يضرك هو انا
لينا: واخا هاكداك غير خليني نمشي
ماجاوبهاش و هبط يديه و شبكها مع يديها و هزها لعندو باسها فضهر يديها و ابتسامة خفيفة ضاهرة على وجهو ، بداو ملامح الخوف كايبانو فوجهها و بحال الا حابسة البكية ، تكا على مرفقو و خلا يدو لوخرا مشبوكة مع يد لينا
يونس: ماتبكيش و الله ماندير ليك شي حاجة ، غير خليك معايا هاد ليلة
لينا:(بصوت مبحوح ديال لبكية) لا غير طلقني عافاك يجي معاذ غاتنوض روينة هنا
يونس: ماغاديش يحصلنا شي واحد تيقي فيا اري بورطابلي راه فوق لكوافوز
ضورات وجهها و مدات يديها لكوافوز جبدات بورطابلو و عطاتو ليه
يونس: انا غانعيط ليونس و سكتي نتي ماتدويش اوكي
حركات راسها بالإيجاب و قلبها غايسكت بالخلعة و بمدى قربو ليها تخلطو عليها بجوج و تخربقو أحاسيسها اول مرة يوقع ليها هاكدا اول مرة تخلي شي راجل يقرب ليها. دوز يونس لابيل ل أمين و فلحظات جاوبو
أمين: ا فيين مالك ماجيتش
يونس: اشمن انا فالبيت شوف ليوم بات مع معاذ و محمد علي
أمين: علاش مال بيتنا
يونس: عندي فيه شي حاجة (غمز لينا) ماتخورنيش و تدخل صافي !
أمين: واخا صافي صافي ... اجي مابانتش ليك لينا
يونس: لينا ! وي دازت قبيلة لبيت مالقاتش حسن و مشات تنعس
أمين: وايني على بنت غير لي بغا يلعب معاها كارطة
يونس: لمهم انا علمت ماتدخلش لبيت
أمين: وا صافي كلمة وحدة
قطع يونس و شاف فلينا لقاها باقة مكمشة فبلاصة وحدة و كاتشوف فيه بعوينات كايلمعو
يونس: عينيك زوينين ، حتى شعرك كايعجبني، نطلبك طليبة
لينا: شنو ?
يونس: ماتبقايش تلبسي هاكدا راه معيق بزااف سوتيام ديالك كايبان ليا و حتى لبيكيني كايبان ليا و عاد هاد لبيسة مزيرة عليك بزاااف مفصلة فورمتك
لينا: (بدلال) مالك مزوج بيا باش تحكم فيا
يونس: همم مامزوجش بيك و لكن كراجل انا كانبغي احم فهمي راسك و الدار مخلطة و خالي عينو فيك
لينا: كيفاااش!!!
يونس:(قلب عينيه و رجع شاف فيها) كان باغي يخطبك ماتقولي ليه والو و قلت ليه يعطيك بالتيساع
لينا: خالك !!!

يونس: ااه خالي دابا تخيلي شي نهار يستفرد بيك و يدير ليك شي حاجة فين غادي نوليو هم (هز يديهوم لي مشبوكين و باسها) داكشي علاش انا قلت ليك هاكداك لمهم كولشي شوية بشوية
لينا: مابقاتش فيك ريحة الحلبة
يونس: اوا راه غسلت شعري ماكايبانش ليك فازك
لينا: لااا
هبط راسو عندها لوجهها و قاصها بشعرو فوجهها و هي كاتضحك بصوت خافت
يونس: هههههه و دابا فازك ولا لاا
لينا: فازك فازك ههههههه 😄
يونس:(هز راسو و شاف فيها) مرتاحة دابا
قلبات لينا وجهها بخجل ماسخاتش تمشي و فنفس الوقت مابغاتش تقولها ليه ، شدها من الذقن ديالها و ضور وجهها و شافت فيه
يونس: باش كاتحسي جيهتي !!
لينا: الصمت 😳😳
يونس: مابغيتش تجاوبي شنو حشمانة !? همممم واخا انا غانسولك و نتي حركي راسك بآه ولا لا (حركات راسها بالإيجاب) واش ماكاتحسي بوالو جيهتي
ضورات وجهها بخجل ماقادراتش تجاوب حاسة براسها غادي تسخف و النفس بزز باش كاتطلعها ، و يديها حسات بيها عرقات وسط يديه محرجة بزيادة و غير كاترمش
يونس: عرفتي شنو مابغيتش نعرف دابا خفت نتصدم خلي تال من بعد و نعرف الجواب صافي (ضور وجهها عندو) نتمنا تكوني كاتحسي بشي حاجة جيهتي
لينا:(بصوت مخنوق) كاتدير بحال الا كاتبغيني
يونس: ماشي كانبغيك و لكن كاتعجبني بزاف يعني معجب بيك بزايد و الحب يقدر يجي من بعد حيتاش ماشي غير جي و بغي لواحد راه خاص وقت اما الإعجاب راه من لول يمكن يكون و راه حاجة عادية ماكاين لاش تحشمي ولا نحشم و كانقول بكل فخر كاتعجبني لينا كاتعجبني ... عرفتي حناكك ولاو سخااان و حمرييين بزاااف حشمانة لهاد الدرجة
لينا:(قلبات لموضوع) ايمتا جيتي
يونس: شي ساعة دابا لقيتكوم جالسين فالجردة طلعت للبيت و مشيت لدوش حيدت مني ريحة الحلبة و الثومة لي درتي ليا فشومبوان يا الشيطانة و جيت ننعس و من بعد جيتي نتي . هاد الأفكار منين كايجيوك يا الشيطانة
لينا: حتا نتا تستاهل
دوز يديه على وجهها و على وجهو ابتسامة و اثار الكدمات و الجروح باقييين واضحين على وجهو ، بقا كايشوف فيها مطولا وهي ماكاتشوفش فيه بمرة و كاتحس بنضراتو كايحرقوها ، تحنى عليها و خشا راسو فعنقها كايشم ريحتها و كايتنفس براحة في حين هي حسات بالتبوريشة و تجمدات فمكانها و قلبها كايضرب بسرعة كبيرة عقلها توقف على التفكير و شداتها السخفة من هاذ الموقف ماعرفاتش كيفاش تتصرف و هي كاتحس بجزء من جسدو فوق جسدها و يديها مشبوكة مع يديه هي لي كانت ديما دايرة مسافة مع الذكور تحطات فهاد الموقف شخص غريب عليها خلاتو يلمسها و يفوت مساحة الأمان لي دايراها لراسها و جسدو كايلامس جسدها كيفاش و علاش أسئلة مالقاتش الجواب عليهوم
يونس: (بهمس فودنيها) دابا شنو غادي نديرو مع إيمان
لينا: والو
يونس: غادي تبقا لاسقة فيا و الا طلعات ليا الدم غادي نفضها تما ولا ندير شي تصرف خايب
لينا: و انا مالي
يونس: (زاد خشا راسو) اييه ا لالة واخا انا غادي نحلها ، يا لينا يا شويطينة
لينا:(تبرورشات) كاتهرني
يونس: هههههه فيك هر ، ناري شاد راسي بزز
لينا: بغيت نمشي
يونس: صافي صافي ماتخافيش ماغاديش ندير ليك شي حاجة (زاد زير على يديها) تصبحي على خير ا الشيطانة ديالي (بصوت خافت فودنها) نتمنى نلقاك فالصباح حدايا
بقا شاد فيديها مابغاش يطلق و راسو مخشي فعنقها كايشم فريحتها و فريحة شعرها ، صوت انفاسو كايتسمعو فودنها ... حسات بيه نعس و هزات يديها حطاتها على ضهرو لقاتو سخون ، طلعاتها حتى لشعرو و بدات كاتلعب فيه و ابتسامة خجولة على وجهها ، طلق من يديها و بقات هي شادة فيه ماساخياش تطلق منو احساس جديد حسات بيه و تغلغل لقلبها ضرب الوتر الحساس فيها ، عقلوا كايقول نوضي عيب و حشومة و حرام و لكن قلبها كايقول بقااي ماتمشيش مادارش ليك شي حاجة خايبة ، بدا النوم كايداعب جفونها و هي باقة ماخدات قرارها و استسلمات للنوم وسط أحضانو و يديها فيديه

اصبحنا و اصبح الملك لله
فغرفة يونس دخل الضو من الشرجم الشيء لي سبب الإزعاج للينا و فيقها بزز منها فالصباح الباكر ، حلات عينيها بزز و هازة يديها فشلانة غطات بيها الشعا لي ضرها فعينيها شوية بانت ليها يد اكبر من يدها مطبزة و ذراع مزغبة غطات عليها الشعا ضارت و هي كاتشوف من بين رموشها لقات يونس مجبد على جنبو و هي مجبدة على جنبها و معنقها من الخلف
يونس: صباح لخير ا الشيطانة ديالي
ماجاوباتوش و ضورات وجهها بسرعة و عينيها تحلو على وسعهوم و فلحظة كاع الأحداث لي وقعو فليل تفكراتهوم
يونس: بقيتي و مامشيتيش (بهمس فودنها) شكرا شكرا بزاااف
لينا: (بهمس) بغيت نمشي
يونس: واخا سيري (ضورها عندو) كاتكوني زوينة فاش يالاه كاتفيقي
لينا:(جلسات متوترة) ايمتا فقتي !
يونس: قبيلة ... شعرك هرني و برزطني و فقت حيتاش مامولفش ينعس حدايا شي واحد
لينا: واخا صافي انا غادة
يونس: (شد ليها يديها) نشوفك من بعد
احمرو خدودها و عينيها مجبدين بالنعاس و شعرها مخربق نوعا ما ، جبدات يديها من يديه و ناضت قلبها كايضرب بجهد ماقادراش تتمشى التنفس تزير عليها احساس غريب عليها جسمها كولو كايزدح عقلها غادي ينفاجر حاجة وحدة لي فبالها هي ذكرياتها من الليلة لي فاتت ، لقات راسها قدام بيتها كيفاش وصلات و فيك كان عقلها اسئلة مالقاتش الجواب عليها ، بتسلل حلات لباب و دخلات لقات السعدية ناعسة و خديجة كذلك و هند غارقة بسابع نومة ... تخشات فبلاصتها و بقات كاتشوف فالسقف و كل شوية كاتتنهد حتى داتها عينها حيتاش مانعسات حتال اشمن وقت و فاقت بكري.
دبت الحركة فأهل الدار و لي عندو شي شغل ناض يقضيه و لينا باقة ناعسة مشات فسبات عميق مافيقاتو منها غير هند لي جات كاتنكر عند راسها
هند: ليناااا وا لينااااا نوضي ا الزمر
لينا: 😴😴😴
هند: وا لباشار نوضيييي وا لينااااا
لينا:(بصوت نعسان) شنوو
هند: وا نوضي شوفي هاد إيمان غير لاصقة فيا وا لبقر نتي لي جبتيها تكلفي بيها
لينا: واخا واخا (فشلانة) ها انا نايضة
ناضت لينا بزز منها تكسلات حتى طرطقو عضامها ، ناضت تمشات بتثاقل كأنها ماحاملاش تنوض هزات مسائيلها و جرات فرجليها كلاكيطة و خرجات من لبيت لقات الصداع فالفيلا لتحت ، طلات لقاتهوم كايقادو فيها و يزوقوها على حساب العرس لي غايتقام تما ، توجهات لطواليط و هي شبه نائمة دخلات لطواليط غسلات وجهها و قضات حاجتها حكات سنانها و مشطات شعرها جمعاتو على شكل كعكة مهملة ، خرجات من طواليط و لاجعات لبيتها حطات داكشي كيفما كان و خرجات مشات لكوزينة لقات فيها خديجة و رانيا و رقية
لينا: صباح الخييير
رانيا: صباح النور ا زيين
رقية: بغيتي تفطري
لينا: اه فيا لموت ديال جوع
رقية: انا نوجدو ليك ا ختي
لينا: شكراا (جلسات) فينها ماما
خديجة: راه كاتهضر مع سي عزيز
لينا: اه مزيااان .. اوا يا لعروسة مابقا والو
رانيا: (جلسات حداها) غير خليها على الله مخلوعة
لينا: أمين الله يعمرها دار ماتخافيش منو غادي يتعامل معاك زوين
خديجة:(كاتنقي بطاطا) قالتها لي فايتة مجربة
لينا: علاش خليتونا نجربو عاسين علينا كيف السقر الجائع الحضية ماتكواو ماتخليونا نتكواو
خديجة: اويلي يا لبنت تي كوني تحشمي شوية
لينا: وا بغيت الحلوة وا بغيت تتكال ليا الحلواااااا
رقية: هههههههههه دابا تجي وقتك و نضحكو عليك
خديجة: تشوفوها هاكدا تقولو هنا نبات و لكن فالواقع الا خلاتو اجيو عكرو ليا بالحناء غاتلبس الماريو كامل و تجلس يقرب ليها غاتغوت راه اكبر حشومية هي هادي ... كيتو هادا لي غايتزوج بيك مسكين حتى الحلوة ماغايكلها على خاطرو هادا الا داقها بعدا

السعدية:(دخلات) شكون لي غايدوق و شنو غايدوق
لينا: لحلوة ا مامي بغيت ناكل الحلوة
السعدية: راه الحلوة فالتلاجة كولي حتى تشبعي
لينا: ماعجباتنيش هاديك لي فالتلاجة
السعدية: دابا نعطيك لفلوس و سيري شري الحلوة لي حبات خاطرك يا كبيدتي
خديجة: يا لمرا واش عارفة اش كاتقولي
السعدية:الدرية مسكينة بغات الحلوة شنو نقوليها لااا
لينا: لا عنداك قولي اه
رانيا و رقية: 😂😂😂
السعدية: سيري ا بنتي كوليها حتى تشبعي و تخرج ليك من ودنك
لينا: غاتخرج من بلاصة وحداخرا 😂😂😂
خديجة: قليلة العفة و الترابي نوضي تهزي عليا من لكوزينة
السعدية: اويلي تي خلي عليك لبنت فالتيقار
لينا: اصلا انا كملت فطوري 😂😂😂 اييييه الحلوة الحلوة
خرجات من لكوزينة كاتضحك و طلعات لبيتها هزات جاكيط ديال سيرفيط طويلة شوية على المؤخرة و ساتراها من لور لبساتها و هزات تيلي و كل شوية كاتفرنس و راشقة ليها، هبطات للتحت لقات الناس داخلين خارجين شي كايزوق شي كايعبر شي كايحسب ، ضورات عينيها فكل قنت و هي ماعارفاش علاياش كاتقلب ، بكل رقة و أنوثة كاتمشا و رجليها كايبانو زويونين فالكلاكيطة و فاش جمعات شعرها وجهها بان اكتر و اكتر ، جامعة يديها لور و كاتقلب بيت ببيت ماكاتلقا حد و كاتفشل و كاترجع تقلب تاني ، وصلات حدا غرفة من لغرف لي فالطابق الأول و سمعات صوت إيمان كاتهضر مخنوقة و شوية تقطع لحس ، ركبها الفضول و بغات تعرف اش طاري لحسن الحظ لباب لقاتو مردود ، دخلات راسها طلات و عيوناتها كايقلبو حتى شافت إيمان مضورة يديها على رقبة يونس و كاتبادلو قبلة فرنسية ، غير شافتهوم حسات بالزمن وقف و البروجة طلعات معاها من صبعها الصغير تال راسها و قلبها كايضرب و جرح فقلبها كبير تحل عقلها صور ديك اللقطة و خزنها ، جات عينو فعينها و هي واقفة مدهوشة عند الباب النفس ماقادراش تطلعو و الالام كثيرة فصدرها، دفع إيمان بلا حتى مايفكر و رجع شاف فلينا لقا نظرتها تبدلات و ولات بلاصتها نظرة عتاب و الم و حزن ، عطاتهوم بالضهر بلا ماتقول حتى كلمة و خرجات من لبيت و البكية حابساها بزز رجليها تقالو عليها ماقادراش تتمشا ماقادراش تتكلم ماقادراش تتنفس توقف كولشي فيها و المشهد ديالهوم كايتبادلو القبل راسخ فالذهن ديالها و كل ثانية كايتعاود، سمعات الإسم ديالها بصوتو و مخلط مع التصفار لي كايتسمع فودنها، حسات بيد جراتها و ضوراتها، شافت فيه لقاتو مخلوع كايتفتف و فعينيه حزن و اسف و احراج
يونس: ماتفهميش غلط راه هي لي تلاحت عليا و الله مابغيت نبوسها (شدها من يديها و هزها عندو كايبوس فيها) و الله ماباغيها صدقيني ا لينا هي لاحت راسها عليا
ماهضراتش معاه و شافت فيه بعتاب و قلبات وجهها و علامات الحزن باينين على وجهها ، حيدات يديها من بين يديه و مشات فاتجاه بيتها و خلاتو غادي يتسطا ، مايأسش و تبعها و حاجة وحدة لي كايردد " و الله الا هي لي تلاحت عليا" شدها من يديها وقفها و ضورها كايطلب فيها
يونس: عافاك سمحي ليا راه و الله ماباغيها انا بغيتك نتي انا بغيت لينا
حيدات يديها من يديه و شافت فيه و هي كاتتصنع البرود و قالت
لينا: علاش كاتعتاذر ! انا وياك مابيناتنا والو مصاحبة معاك و حصلتك كاتخونني متلا !! ماوقع والو حيتاش اصلا مابيناتنا والو و ماعمر ماغاتكون بيناتنا شي حاجة لاحقاش بكل بساطة انا ماكانحس بوالو جيهتك و ماعمرني ماغاديش نحس انا جبت إيمان باش تصلحو الأمور و كايبان ليا بلي داكشي لي بغيت وقع
يونس: و لبارح ا لينا !! حتى لبارح ماحسيتي بوالو
لينا: انا معتابراك كيبحال أمين ولا معاذ يعني خويا فقط و لبارح ماوقع والو بيناتنا يعني بلا ماتكبر القضية دياال لبارح و دابا بسلامة عليك إيمان كاتتسناك
ضارت عطاتو بالضهر و خلاتو حال فمو ماعارفش اشنو يدير واش يتيق هضرتها ولا يتيق احساسو

الغضب سيطر عليه و عما عينيه ماحملش لينا تشوفو فهاداك الموقف و هو مادار لابيديه لا بسنيه و يالاه بدا كايصلح معاها الأمور و يخليها تميل جيهتو و تبادلو نفس احساسو ، رجع للبيت لي فيه إيمان جامع يديه و كايسوط انفاس من نار ، شافها مكمشة كاتبكي فالقنت و هزها من ذراعها و عينيه كايشوفو فيها بشر و حقد
يونس: لاااااش درتي هاكداك لاااااااش (زير على ذراعها)
إيمان: حيتاش كانبغيك 😭😭
يونس: وا ماتبغينيش ماخاصنيش لبغو ديالك منين غاتفهمي بلي انا ماباغيكش و ماعمرني بغيتك و دابا غاتهزي تت**** عليا من هاد لفيلا قبل مانردخ ليك راسك مع لحيط
إيمان: علاش كاتدير معايا هاكدا علاش انا اش درت ليك
يونس: حيتاش نتي مذلولة على قبل تسمعي كلمة كانبغيك تديري ا المستحيل و انا ماباغيش بنت هاكداك باغي بنت حرشة ماشي الريح لي جا يديها و ماشي غير مادا فمها ... لاش بستيني لااااااش خسرتي عليا كولشي
إيمان: نتا كنتي كاتقولي سيري و انا ماتحملتش نسمع ديك لهضرة و بستك باش نسكتك و حيتاش كانبغيك
يونس:(زير عليها) وا ماتقوليش ليا كانبغيك ماتقوليهاااااااش وا عطيني بالتيساااع انا كاتعجبني وحداخرا نتي ماكايناش فبالي بمرة وحداخرا كاينة فبالي فهمتي دابا و نتي وياها ماكاتساواوش هي دايرة العز لراسها و نتي ذالة راسك لواحد الدرجة ماكاتصورش
إيمان: دغيا نسيتيني 😭😭
يونس: اصلا انا ماعمرني بغيتك كنت غير كاندوز بيك لوقت و ماتنساايش بلي نتي لي جيتي تلاحيتي عليا و تصاحبتي معايا
إيمان: و فين مشات كانبغيك ا ميمي نتي هي حياتي باااح سافرتي و تبدلتي فيناهوا يونس لي كانعرف فيناهوا حبيبي
يونس: (ضحك بسخرية) انا مابغيتكش و ماعمرني مابغيتك عقلي عامر بوحداخرا و دابا سيري درقي زلافتك شريتي ليا الصداع الله يعذبك كيفما كنتي السباب فعذابي
طلق منها و رمقها بنظرات حقد و زاد خلاها مصدومة كاتبكي ماتوقعاتش هاد الكلام الجارح يخرج من فم يونس.
غبرات لينا مابقاتش بانت ليونس لي عيا مايعيط عليها و سول و قلب كأن الأرض تشقات و بلعاتها في حين هي مخشية فبيتها مقنتة جامعة رجليها عندها حاطة راسها فوق ركابيها و كاتفكر و اثار الدموع مطراسيين فوجهها و عينيها منفوخين و نيفها حمر ، شافت تيلي كايصوني لقاتو يونس حبيات ليه الصوت و خلاتو كايصوني حتى برد قلبو، بدون يأس صونا و عاود صونا مكالمة بعد مكالمة حتى جاوباتو
لينا: الو وي
يونس: فينكي علاش ماكاتجاوبينيش ! فن كاينة بغيت ندوي معاك
لينا: سمح ليا مامسالياش خارجة
يونس: ايمتا خرجتي و واش بوحدك
لينا: لا معايا عماد
يونس:(بعصبية) شكون هاد عماد
لينا: و نتا سوقك شوف ا خويا بلا ماتبقا ترفع عليا صوتك كنتي كاتولد فيا ولا كاتصرف عليا
يونس: اوكي اوكي (كايصوط) فين نتي نجي عندك
لينا: لا ميغسي جيت مع عماد غانبقا معاه و دابا بسلامة عليك ماغانبقاش شادة لحتيت معاك
قطعات عليه و هو باقي ماكملش حتى هضرتو ، طفات تيلي و حطاتو حداها و حطات يديها على قلبها حسات بيه مزير عليها و كايضرها فينما تغمض عينها كاتشوف يونس و إيمان كايتبادلو القبلات

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.