صورة مصغرة لـشيطان في المغرب الجزء الثاني

شيطان في المغرب الجزء الثاني

tani fi chaytan lmaghrib maroc 
رواية شيطان في المغرب

عويشة ( بعدات شويا و بدات تخنزر فيه ) : و شكون نتا !! بااااينا شفار .. عووك عووك أ عباد الله عتقو روح .. شفاار بغا يقتلني
راوص : علاش كتكدبي فين شفتيني باغي نقتلك أ شارفة
عويشة : انا شارفة يا هاد شفار لخانز .. داخل متنكر بهاد لكرون و هاد لعباية و لعصا د جوطية .. و هادوك راني عارفاهم ماشي عينيك .. داير لعدس فيهم صحابليك أنا ماكنفهمش فهادشي
راوص : سيري شغانقوليك .. خليني ساكت
عويشة ( شداتو من ودنيه ) : هاد لودنين طوال باينا ملصقهم .. حايد نشوووف .. حايدهم راك طحتي ف عويشة
راوص : اااااي ودني طلقي مني .. قولي أعوذ بالله من شيطان رجيم قوليها دغيا قوولييييييييييهاااااااااا ..
عويشة : الشيطان هو بنادم يا هاد الماسخ ... حايد هاد لفضيحة لي داير فراسك راك مغتخلعنيش .. و زعما سحابليك أنا غانخاف و غا تقد عليا بهاد لفرشيطة لكبيرة لي هاز .. أجي لهنااا نربيك مزيان باش عمرك تعاود تدخل لديور ناس باش تسرق
راوص : اااااي طلقي من وذني .. راه أنا ماشي شفار .. هادو وذنيا و هادا أنا و مزايد فراسي حتى حاجة الشارفة ... نتي راك كتهدري مع الشيطان شخصيا
عويشة ( دارت يديها ف جنبها و بدات طل عليه ) : شغانقوليك أ هاد لحلوف .. الله يعفو عليك .. ديك لبلية خلاتكم كيف لحماق و مسخاتكم حتى رجعتو تشبهو راسكم بالشيطان
راوص ( هرب منها و بدا يحك فوذنيه ) : اشمن بلية باغا تحمقيني ! أنا راه شيطان و سميتي راوص .. جيت فمهمة باش نخرب ليكم لبلاد و ننشر الفاحشة و الفساد
عويشة ( تفركعات بضحك ) : ههههههههههههه أ ويلي يا هاد لمسخوط و الله حتى ضحكتيني ! أجي أ وليدي أجي نتا باينا فيك غير نية و خرجو عليك ولاد لحرام ب داك سم لي معرفت كيسميوه
راوص : لا بقاي بعيدة .. ماتقربيش مني
عويشة : هاويلي على ماتقربيش مني ! أنا فحال ميمتك أ وليدي و باغا ليك غير لخير
راوص : واش نتي مسطية الشارفة ! واش أنا كنقوليك بلي شيطان و هاا هوما قروني . احم لموهيم واخا صغار راه بداو كيبانو .. ان شيطان شيطااااااان شيطان و نتي كتقوليلي فحال ولدك
عويشة : أففف .. دابا اش باغي اش .. راه معندك ماتسرق .. ولدي لي كايجيبو كتخسرو ديك سفريطة د مراتو .. مكايخبيو والو ل دواير زمان غا هني بالك مغاتلقى حتى باش تنقي سنانك
راوص : اااف مصيبة معاك .. دابا شنو بغيتي ندير باش تأكدي أنني ماشي بنادم فحالكم و بلي انا جاي من لهييه من عالم اخر 
عويشة : قوليا واش حليمة جارتي بصح ولدها خدم جنيوور ف لخاريج ولا كدبات عليا
راوص ( سكت و بدا كايشوف فيها ) : دابا الى جاوبتك غاتأكدي انني ماشي من صنفكم
عويشة : أيييه
راوص : ايوا راه كدبات عليك و ولدها خدام غا ف واحد سيبير مارشي ف مدينة صغيرة تماك .. رتاحيتي
عويشة : قوليا أش سميت راجلي
راوص : و لاش هاد سؤال عاوتاني
عويشة : جاوب و سكت .. باش نتأكد
راوص : لول سميتو عبد القادر و ثاني مولاي حمد
عويشة ( وقفات ) : اويلي هي نتا إبليس
راوص ( تحنى على ركابيه و شاد عصاه ) : سمح ليها أ سيدي سمح ليها .. مقصداتش و غير شارفة كتخرف
عويشة : اش كادير تم ا داك لممسوووخ .. ياكما باغي تقتلني
راوص : واش نتي مسطية .. انا عاد مبتدأ و باقي مزال ماوصلت لشي مرتبة و كتقولي إبليس .. راه ابليس هو زعيم الشياطين و زعيم القبائل كاملين
عويشة : وانا مالي غانديرليه لاكارط
راوص : ففف .. المهم قتانعتي دابا ولا مزال
عويشة : صافي .. و لكن شكل ديالك .. ههههممم .. ماكايخلعش و كايبان غا زواق
راوص : واش نتي خليتي لمهم بانليك غا شكل ديالي
عويشة : و اش باغيني نشوف أ هاد شويطين
راوص : ففف .. لمهم انا غانشرح ليك السبب لي خلاك تشوفيني .. منين كناكل الحلويات و السكريات كنرجع نبان .. و لكن كايشوفوني غا شي بعضين ماشي بني ادم كلهم .. فهمتي دابا
عويشة : هاااكاك .. ايوا قوليا دابا نتا جاي تخرب لبلاد و توسوس لناس و تنشر لفساد
راوص : ايييه انا
عويشة : هههههه أ ودي ضحكتيني
راوص : علاش ضحكتك ..
عويشة : واش فخبارك بلي نتا فلمغرب .. دابا ناس غايتسناو حتى يجي هاد زقيقة لي هو نتا .. باش تنشر ليهم لفساد و تخرب لبلاد بتشوطينك ... علاما كايبانليا نتا باقي بريء و عندك سنان لحليب .. و من حسن حضك طحتي هنا و بلخصوص عندي .. ندوزليك سطاج
رواص : كاتعايريني ... غاتندمي على هاد لكلام 
عويشة : هههه ياك أ شويطين .. ايوا اجي نقولك
راوص : اش
عويشة : نتحداك فواحد القضية و نشوفو شكوون فينا شويطين و كيدو عظيم
راوص : قولي نشوف
عويشة : ايوا اجي جلس حدايا و اراليا دوك لودينات لمطنشين
راوص : هاهوا

عويشة : نتا دابا عند بالك غاتغلبنا و تقد علينا ..نتا على ماكايبان ليا موحااال واش كتعرف على نسا شي حاجة .. حنا لعيالات راه كيدنا عظيم
راوص : واخا صافي أنا كنتحداك الشارفة و غانشوفو شكون لي كيدو عظيم ..
عويشة : صافي .. أنا غاندير واحد المشكل و نشوفو واش غاتقدر تحلو
راوص : حنا حتى حاجة مكاتصعاب علينا
عويشة : ايوا غادي نشوفو ..
راوص : بداي
عويشة ( ناضت لبسات جلابتها ) : يالله اجي تبعني .. 
راوص : صافي انا غانتحكم فراسي و نخليك غا نتي تشوفيني
عويشة : زيد ..
تبعها راوص و خرجو لزنقة ..بقات دور بعينيها حتى بانليها واحد دري ولد جيران شاد لحيط كيف موالف و مقصر مع شي دراري صحابو
عويشة : هيي نتا ! أجي لهنا
شاف فيها دري 
أنور : أنا ؟
عويشة : اييه نتا اجي
جا عندها و سلم عليها
انور : شنو بغيتي الحاجة
عويشة : قوليا أ وليدي .. نتا خدام ؟
انور : لا أ خالتي مزال كنشوميو
عويشة : مزيان حتى انا هادشي لي بغيت .. غادي نخدمك عندي هاد نهار و نخلصك .. و لكن نتا عليك بسكات .. شوف و سكت 
انور : بصح ولا باغا تنصبي عليا
عويشة : واش انا وجهي وجه شي نصب .. الله يمسخك .. قول دابا اه و لا لا .. باش نمشي نقلب على لي يستاهل نيت
انور : واخا الحاجة انا معاك غا زيدي .. ندير لي بغيتي لمهم نتخلص .. جالسين جالسين اللهما نتحركو نضبرو مصيريف
عويشة : ايوا زيد تبعني
انور : هاهوا .. 
تبعها دري و شدو طاكسي .. و بطبيعة الحال راوص مراقب كلشي و طالع معاهم و لكن عويشة مابغاتش تلفت الإنتباه بلي كاين معاهم شخص تالت باش مايقولوش تسطات ..
وصلو لواحد لمحل كايبيع تواب .. دخلات و طلبات من أنور يتسناها حدا لباب و مايدخلش
دخلات أ سيدي و بقات كتشوف فتواب و تلمس فيهم ..
صاحب المحل : مرحبا الحاجة
عويشة ( هزات واحد ثوب باينا فيه غالي ) : سلام أ شريف .. شحال داير هادا !
صاحب المحل :هذاك راه غالي الحاجة شي شويا
عويشة : ايوا لواه أ شريف تصاوب معانا الله يرضي عليك
صاحب المحل : الحاجة الى مغاتدريش على فلوسو حطيه و شوفي شي ثوب على قدك
عويشة : لا أ وليدي مانقدرش .. الى ماخديتش هادا غاتوقع شي مشكلة ( و بدات تمسكن و طيح ف دميعات )
صاحب المحل : لاش الحاجة مالك ! ياكما كاين باس
عويشة : ايوا أ وليدي شعندي مانقول .. الرجا فالله .. شفتي هاداك لولد لي كيتسناني حدا لباب
صاحب المحل : اه الحاجة مالو
عويشة : هاذاك وليدي كبدتي .. كيبغي واحد لمرا مزوجة و حتى هي كتبغيه .. و مين غاطلق من راجلها ، ولدي غايتزوجها .. و قاليا الى موافقتيش على هاذ زواج غانرميك لزنقة .. و أمرني نشري ليه ثوب غالي باش يعطيه للمرا لي كيبغي ولا غايطردني من دار لي هي ديالي أصلا .. اهئ اهئ .. و أنا كنت غلطت و كتبتها بسميتو ... اهئ اهئ
صاحب المحل : لا حول ولا قوة إلا بالله .. صافي الحاجة صافي .. ضريتيني فخاطري .. جلسي رتاحي و اري داك توب نقادوليك ف ميكة .. و عطيني غا ربع التمن ديالو ولا غا لي قديتي عليه .. انا مسامحك و غانعتبرها صدقة و صافي .. بقيتي فيا
عطاتليه عويشة غا 50 درهم قاتليه هي لي كتسعى .. خداها من عندها و عطاها ثوب و مشات .
عويشة : الله يرضي عليك أ وليدي ياكما تعطلت عليك ... المهم ! هاذا العنوان ديال داري .. بغيتك تمشي ليها و تسناني تماك ف واحد لبيت جاي على ليمن .. تدخل و تسد على راسك حتى نجي انا نحل عليك .. ماتخرج حتى نحل عليك لبيت .. هاك ها ساروت ..
انور : صافي ! هانا مشيت
.. مشا انور و شدات طاكسي مع رواص لعنوان اخر 
رواص : فين جينا
عويشة : زيد و سكت
دقات واحد دار لي هي فالأصل دار مول المحال ديال ثواب .. حلات ليها مراتو ..
زوجة صاحب المحل : سلام أ لالة أش حب لخاطر
عويشة : الله يا بنيتي .. ميمتك عيات بطريق و ماقادراش نزيد خطوة ، طالبة ضيف الله غا شي 5 دقايق نستراح فيهم الله ينور طريقك .. و شي كويس د لما نبلل ريقي نشف
زوجة صاحب المحل : تفضلي الحاجة مرحبا .. جلسي فصالون و انا غانجيبليك لما و شي كاس اتاي لقيتي عاد صايبتو
عويشة : الله ينور طريقك أ بنيتي
.. حطات ليها اتاي و لحلوة .. كلات و جات غاديا و تعمدات تنسى ثوب فوق سداري .. مشات عويشة فحالها و خلات لمرا كطل من لباب تقلب عليها واش باقا قريبة
زوجة صاحب المحل : ففف مشات و نسات هاد ثوب ديالها .. صافي خليه هنا حتى ترجعليه و تاخدو .. نمشي نخبيه ليها ف لماريو باش مايتوسخش .. 
رجع مول المحال لدارو .. حطات ليه مراتو يتغدى و نعس شويا .. فاق مع الأذان ديال العصر حل لماريو باش يبدل حوايجو و هو يتفاجئ ب ثوب ديال قبيلا لي عطاه لعويشة .. و تفكر القصة لي عاوداتليه .. عرف ان المرأة لي دواتليه عليها عويشة هي مراتو .. يعني مراتو كتخونو .. خرج عندها معصب و لاح فوجها توب و رما عليها يمين الطلاق و لاحها فزنقة ب بيجامتها .. بقات عويشة جالسة فراس درب هي و رواص كيتسناو ..
راوص : نتي فين عرفتي هادي مراتو
عويشة : أنا مكتخفى عليا حتى حاجة .. و ماقصدتوش غير صدفة .. 
راوص : هييم .. ايوا شوفي شوفي .. ديك لمرا خرجات .. راه باينا هو لي طردها ..
مشات تجري عندها
عويشة : مالك أ بنيتي كتبكي ! ياك لاباس أ لحبيبة
المراة : طردني راجلي و رما عليا طلاق إهئ اهئ .. و المشكلة مخلاني حتى نشرح ليه
عويشة : ماعليش ا بنيتي يالاه معايا لداري
مشات معاها لمرا لدارها و دخلاتها جلساتها فبيتها و انور مزال ف لبيت لاخرا .. طلات عليه و لقاتو متكي ناعس و سدات لباب بشويا و خرجات شدات طريق ديريكت للكوميسارية
لبوليسي : تفظلي الحاجة اش عندك ..
عويشة : اهئ اهئ سي لبوليسي .. كنت جالسة ف داري ماعليا ما بيا .. حتى هجمو عليا واحد راجل و مرا و جلسوليا فداري .. عييت ما نخرجهم و عايروني مابغاوش يخرجو .. و مالقيت حتى شي حل من غير نجي عندكم توقفو معايا و تاخدولي حقي اهئ اهئ

لبوليس : واخا الحاجة غير تهدني ..
بعد ساعة مشاو معاها لبوليس لدار و لقاو القبض على أنور و الزوجة ديال صاحب المحل .. مافهمو والو .. 
عويشة ( عطات لراوص قطعة من سكر باش يبان عاوتاني ) : شد يا شويطين .. ايوا دابا حل ليا داك لمخيخ و فكليا هاد المشكلة
راوص ( بدا يضحك بهستيريا ) : هههههههههههه والايني كضحكي عليا يا هاد الشارفة .. واش نتي خربقتي لخيوطة و كاتقوليلي فكها دابا .. أكيد كضحكي عليا
عويشة : ايوا ياك قلتي حتى حاجة مكتصعاب عليك
راوص : ماشي حتى لهاذ الدرجة .. هادي مشكلة مستحيل تتحل
عويشة : و شحال تعطيني الى رجعت المياه لمجاريها ! فحايلا حتى حاجة ما وقعات ..
راوص : غانعطيك لقب الإمبراطورة
عويشة : ههههه واخا حتى هادي زوينة .. تبعني ..
مشات عويشة لسجن عند المرأة و زارتها .. 
عويشة : نتي أ بنتي عاونتيني .. و حتى انا جا دوري باش نعاونك .. هاك لبسي هاد العباءة ديالي و غطي راسك و خرجي فحايلا نتي هي أنا .. و انا غاندخل بلاصتك
المرأة : واخا .. و لكن و نتي ... !؟
عويشة : ماشي سوقك فيا .. أنا غانخرج راسي كيف خرجتك ..
.. تمت عملية الهروب بنجاح
جا الظابط لي مكلف ب المداومات الليلية و طلب الحراس يجيبو ليه المسجونين ..
جابو عويشة و أنور و وقفوهم اونفاص ل ظابط
الظابط : علاش شدوكوم !؟ أشنو درتو
جلسات عويشة ف لكرسي و عكفات ظهرها
عويشة : ما درنا واالو أ وليدي .. كنا جالسين أنا و ولدي فدار و جاو دخلو علينا شي بوليس و جابونا هنا .. الظلم خايب خصوصا منين تجي فلمسكين ( بدات تكحب و تبكي ) : قلب الملفات و مالقاش ليهم شي تهمة و خرجهم و اعتاذر لعويشة على هاد الغلط لي وقع
خرجو من لكوميسارية و عطات لأنور 200 درهم على المساعدة لي ساعدها هاد نهار .. و هنا سالات خدمتو معاها .. خدا لفلوس و مشا فرحان .. شدات طاكسي ف داك ليل و مشات عند مول المحال دقات عليه فدارو .. لقاتو مهموم .. شرحاتليه عويشة انها قبيلا عيات ف طريق و قصدات بابو .. و بأن مراتو امرأة أصيلة و كرماتها .. و بلي ب كترة ما كانت عيانة نسات عندهم الثوب ديالها و بأن مراتو بريئة .. طلبات منو يخلي عندو الثوب حيث مابقاتش محتاجاه .. رجعليها 50 درهم ديالها .. جبدات عويشة مراة مول المحال من يديها و قاتليه اعتاذر لمراتك راه مظلومة و رجعها ..
خرج مول لمحال لبرا عنق مراتو و طلب منها سماحة و هي بدورها سامحاتو .. اعتاذرات عويشة منهم مرة تانية و دخلو سدو لباب و هو يخرج ليها رواص
عويشة : ايوا كيجيتك أ شويطين
راوص : من اليوم ف صاعدا غانبقى نعيطليك غا الإمبراطورة عويشة
عويشة : هههه ايوا باش ماتسهلنيش و تقول هادي غا شارفة ماعندها نفع
راوص : غانبدا نتعلم منك
عويشة : ايوا زيد زيد نمشيو ل عند داك ولدي و مراتو نشوفو حريرتهم حتى هوما ... نهار كامل و أنا غايبة يعلم الله اش يكونو دارو .. 

وصلو ل حدا لباب د برا و هوما يسمعو صداع ف دار ..
عويشة : اويلي منوضينها .. بففف
دفعات لباب دلخشب و دخلات بقات كدق عليهم
عويشة : أ حلو يعطيكم موصيبة .. معمركم تفاهمو بلعقل
منال ( حلات لباب ) : هااه .. هااااهيا جات خالتي و أخيرا .. فين مشيتي فيين !!؟؟؟؟ اجي شوفي ولدك زهواني باغي يصيفطني ل روضة .. كون غا كنت شي كوفرة نقولو من حقو ... 
عويشة ( سدات ليها فمها و دخلات سدات لباب من وراها ) : سكتو فضحتو راسكم مع جيران .. حتى لي معرفو خانك غايعرفك بهاد لحلق .. يعطيك غرزة
منال ( جلسات فالأرض و ربعات رجليها ) : اهئ اهئ اش درت انا اش اش .. لاش يديرليا هاكاك لاش 
كمال ( خارج من لبيت كيلبس طريكوه ) : منال و اللهما درتها بلعاني .. مي دوي معاها راك عارفة شيطان حرامي .. سميحيلي و الله ما كنت فالوعي ديالي ا حبيبة.. و كنواعدك ماعمري نعاود نخونك و غانشد طريق معاك لأخر لحظة فحياتي
عويشة ( جراتو من وذنيه ) : هادو هوما فعايل رجال يا هاد لولد .. باغي تخرجليا فحال باك .. الى ماربيتكش ف صغرك غانربيك فكبرك .. 
منال : اااااا اهى اهئ اهئ .. اش ذنبي انا اش درتليه .. و اللهما نبقاليكم فهاد دار و دير لي بغيتي
عويشة : جلسي يا هاد لمهبولة و ردمي داك لفم .. اويلي يا ويلي .. نهار نبغي نجي نفوج كانلقا غا صداع و حريق راس
كمال ( باس راس مو ) : سمحيلينا أ مي سمحيلينا على هاد تمرميدة .. دخلي تجلسي و منال انا غانعرف كيندير نصالحها
منال : سير بعد مني و اللهما نتصالح معاك .. غانخليليك كلشي و ربح بيه و خون على خاطرك .. طلقني طلقني مابقيتش حاملة نعيش فهاد الجو
عويشة : اويلي على طلقني .. دوزي دخلي للبيت .. سيري الله يمسخك حنا معندناش رجال لي يطلقو عيالاتهم
منال : اهئ اهئ تعاونتو عليا بجوج .. حيت انا يتيمة و ماعندي حد .. اهئ اهئ ياك أ خالتي عويشة ياك
عويشة : فففف .. صافي أ بنتي سيري وجديلينا لعشا راني سخفانة بجوع .. و هاد راس لعتروس انا غانجبدليه ودنيه و شي لاخر
منال : واخا اخالتي
دخلات منال للكوزينة كتزخنن و تمسح ف خناينها و هي محلفة عليه 
منال : الى بقاتها فيك يا وليدي يا كمال يا ولد عويشة راه ماشي انا هي منال .. غانخليك تجري ورايا فحال لكلب و مانعبرش بوك .. يييخخ تفو
... عويشة : واش هادو فعايل يا ولد كرشي ! انا ربيتك على هادشي
كمال : ا مي راك عارفة شيطان ولد لحرام .. بلية و صافي و هادي اخر مرة
عويشة : شيطان هو بنادم أ ولدي .. سمعني نقوليك .. أنا زوجتك باش نرتاح و نتهنى .. ماشي باش نبقى ديما فصداع .. دير عقلك راه عندك 27 عام الله يعطيك غبارة
كمال : وا صافي الله يسامح .. اخر مرة .. و انا غانعرف كيندير نصالح منال غا ماتفكريش فهادي
عويشة : ديك لبنت صابرة معاك و نتا كيصحابليك راك بحلاوة لسانك لاحس دماغها .. راه نهار تعيا غاطج و تخليك .. و جي بكي عليا .. و اللهما نحليك لباب
كمال : وا صافي أ مي نساي الله يخليك
... تكا و شعل تلفازة و مشات عويشة عند منال للكوزينة كتحاول ترجع ليها عقلها ... تعشاو و جمعات منال طبلة و فرشات لعويشة فراشها و عطاتها دواها .. و دخلات لبيت نعاس سدات عليها بساروت و خلاتو فصالون .. مابغاش كمال يجبد صداع و يبدا يغوت ... هز ايزار من لبلاكار و تغطا فصالون و نعس ...
... صبح يوم جديد و فمكان جديد لقا فيه راوص راسو .. و بالضبط فمدرسة خاصة صغيرة 
منى : على سلامة أ ختي سناء
سناء : الله يسلمك
حفيظة : خليتي بلاصتك لبارح .. فين غبرتي
سناء : ايوا مكاين لاش نقوليكم فين غبرت
رجاء : وا عاوديلينا مالكي
سناء : فيناهوما نجاة و نعيمة
منى : هاهوما فلقسم
سناء : هييم .. ايوا مزيان
حفيظة : وا قوليلينا فين غبرتي لبارح .. راه ماموالفاش ليك تخلي لمدرسة و ماتجيش نهار كامل
سناء : ضاركم راسكم حتى لهاد درجة باغيين تعرفو فين كنت ! ههه
منى : ههه وا راك عارفا
سناء : ايوا أ سيدي انا لبارح تزوجت .. 
حفيظة : واااايلي ! مبروك عليك الحبيبة ماح ماح
منى : مبروك المديرة لحبيبة ديالنا .. و اخيرا فرحنا بيك ههه
رجاء : مبروك ا ختي سناء .. و لكن كيدرتي ليها .. حنا زعما معلمات معاك فلمدرسة و ديما معاك .. علاش ماقلتيهاش لينا ! و شكون هاد راجل
سناء : هههه ايوا تما فين بقات .. راجلي حبيبي لي تزوجت بيه لبارح .. راه واحد من رجالكم العميرات
الكل : اشنو !!
جات داخلة فاطمة و سمعات لهدرة 
فاطمة : اويلي على واحد من رجالنا
سناء : اييه واحد من رجالكم 
منى : قوليلينا شكون ! ياكما راجلي انا ا ويلي
سناء : انا غانقوليكم و لكن بشرط

الكل : اشنو هو ؟؟
سناء ( جلسات فكرسيها و حطات رجل فوق رجل ) : ايلا بغيتوني نقوليكم شكون هادي لي تزوج بيا راجلها .. غايخصكم تخلصوني .. كل وحدة تحط 200 درهم .. ايلا خديتها من عندها يعني راه ماشي هي لي تزوج بيا راجلها .. و الى ماخديتهاش من عندها يعني راه هي المقصودة .. و حشومة نكون خديتليها راجلها و نزيد ناخد من عندها لفلوس اولا !
رجاء ( جبدات 200 درهم من جيبها و حطاتهاليها ) : هاكي ا ختي سناء .. لعار هزيها
سناء ( بتاسمات و ربعات يديها و بقات تشوف فيها )
رجاء ( فيها الخلعة و غاتسخف ) : هزيها أ ختي سناء حلال عليك والله .. عافاك 
سناء ( ضحكات سناء و هزاتها ) 
رجاء : يعني ماشي راجلي ياك ؟؟
سناء : لا ماشي نتي .. غير رتاحي
منى ( مشات بجرية لقسمها هزات صاكها و جبدا منو لفلوس و رجعات حطاتهم ليها .. بقات متوترة حتى هزات سناء لفلوس و رتاحت ) : افف الحمد لله فرحتيني .. ديهم حلال عليك 
حفيظة : ناري يا ختي سناء و الله حتى نموت ليك فيها و ماتهزي ل 200 درهم ديالي
سناء ( هزاتها من عندها و ابتاسمات ) : ماشي نتي
حفيظة : ههه ناري كنت غانطلقها ف سروالي
فاطمة : و انا و انااا .. ( حطات ليها لفلوس فوق لبيرو حتى هي ) : هزيهم الله يرحم ميمتك
سناء ( هزاتهم ) : ماشي نتي أ فاطمة
دخلات نجاة كتجري حطات ل 200 درهم فوق لبيرو من بعد ما وصلات ليها منى لخبار منين مشات تهز صاكها من القسم .. 
نجاة : عار ميمتك ماتصدمينيش
سناء ( هزاتهم ) : ماشي نتي أ نجاة هههه
الكل شافو ف بعضهم : يعني ! لي تزوجتي راجلها هي نعييييييمة ؟؟
... جات داخلة نعيمة كتجر فرجليها و تمسح ف نيفها حيت ضاربها لبرد
نعيمة ( كدوي بنيفها مسدود ) : ختي سناء جيتي ! على سلامة .. اش واقع واش كاين شي اجتماع ؟
شرحو ليها لبلان كامل و بلي غا هي لي بقات يعني هي المقصودة
نعيمة ( جلسات فوق لكرسي كتندب ) : اوييلييييي اوييليييي اهئ اهئ
سناء : حطي ل 200 درهم بعدا و شوفي واش غانهزها ولا لا .. حتى نتي غاتجربي حظك
نعيمة ( جبدات 200 درهم من جيبها و حطاتها ليها ) : هانا يا ختي هانا ( كتمسح ف دموعها و خنونتها سايلة ) : ديها و ماتديليش راجل الله يخليك
هزات سناء ل 200 درهم و وقفات بدات كتحسب ف لفلوس 
سناء : انا ماتزوجت حتى راجل من رجالكم .. و ماتزوجتش اصلا .. مزيان مزيان .. هاهيا دابا 1200 درهم .. لي شحال و انا نطلبكم عليها تعاونو معايا و تجمعوهاليا باش نزيد عليها و نصاوبو السقف د الأقسام لي تشقق كامل .. نتوما هادشي لي ينفع معاكم .. وقتما نقوليكم تقولو معندناش و دابا جبدتوهم باردين و ساخيين عليهم .. اخختفو كنس ناقص
منى : حشومة عليك أ سناء طيرتيها منا خلعة
سناء : سيرو سيرو تقريو .. ضيعنا نص ساعة غا باش نجبد منكم هاد جوج ريالات .. انا غانخرج دابا نمشي نتفاهم مع لي يصاوب لينا دوك سقوفة الله يعاون
من بعد ما خرجات خلاتهم كايتغبنو بوحدهم ولكن كلهم فرحانين حيت رجالهم ماتزوجوش عليهم .. يعني مابقاتش فيهم ديك ل 200 درهم حتى لديك الدرجة ..
راوص : و لايني هاد سيدة مكتسواش .. فكراتني غا بشارفة د عويشة .. ااحح و لكن زويينة . هاد بني ادم دغيا كيدخلو لخاطر ... سميتها سناء .. اووه على سناء .. ففف راوص واش تصطيتي .. ايوا داكشي لي بقاليك غا طيح حتى نتا .. و فيمن .. ! ف بني ادم .. ( تفكر حبيبتو لي تزوجات و سمحات فيه و لي بسبابها نفاوه و حرموه من العطلة و هو يكعى ) : اصلا لعيالات كلهم مكايسواوش .. بغاو يكونو شياطين او بني ادم .. انا قلبي غانسدو و معمر تدخل ليه شي وحدة أصلا ...
●● يا ترى ؟ واش بصح راوص غايسد قلبو و ماعمر شي وحدة تدخل ليه .. ؟ و واش يقدر شي نهار شيطان يتزوج ب انسان ؟ فلنتابع ذلك مع تتمة القصة ..

من بعد ما خرجات سناء من المدرسة .. طار راوص ل منزل كمال و منال يشوف علاياش صبحو عاوتاني .. لقا الأجواء عادية و منال فلكوزينة كطيب لغدا و عويشة كتفرج ف مسلسل تركي 
راوص : عاد تأكدت انكم كلكم فهاد الأرض بحال بحال .. ماشي غا نتي لي حرايمية
عويشة : فففف بسم الله الرحمان الرحيم .. اش هاد دخلة داير ليا .. راني مرا كبيرة و قلبي على قد لحال .. بقا تعلمني
راوص : مسيكينة .. 
عويشة : اش تماك و فين كنتي غابر هاد نهار ا شويطين
راوص : اش غانقوليك .. فقت لقيت راسي فواحد لبيرو د واحد المديرة فمدرسة .. تحايلات عليهم بتاحراميات حتى خدات منهم فلوسهم و خلاتهم كيضحكو .. غا بلفن
عويشة : ايوا تعلم
راوص : لا خاطيني .. 
عويشة : اجي شوف فيا .. تا شوف فيا مالك مهبط راسك
راوص : هانا
عويشة : شكون قلقك يا زغبي ! شفتك غضبان
راوص : مكاين والو .. عيان 
عويشة : هههههييييه يا ويلي على شويطين عيان .. صافي ضربتي يومين هنا و عييتي .. هاحي هاحي على لي غاينشر الفساد هههه نتا ما صبنتي حتى حوايجك و نشرتيهم كيف ناس بقاليك غا لفساد لي تنشرو ..
راوص : عارف راسي منافع لوالو .. حتى خدمتي ماقادر نديرها كيف شياطين لاخرين ..
عويشة : و اش داك ليها .. اجي قوليا شحال عندك من عام
راوص : عندي 2087 ..
عويشة : اهيا ويلي على شارف لمجلد لاخر . هي دابا انا كانبان حفيدة ديال احفاد احفادك هههه يا حليلي
راوص : هي نتي من قبيلتنا ! ففف .. واخا كاع هاديك لقفوزية كتبقاي مكلخة .. حنا كنعيشو بزاف و مكنموتوش ماشي فحالك .. يعني انا كون كنت عايش ف العالم ديالكم غاتكون عندي غا 30 سنة مثلا
عويشة : هووكاك
.. دخلات عليها منال
منال ( هازا لمغرف و دايرا طابلية د لكوزينة ) : اويلي ا خالتي عويشة ! واش تسطيتي ! معامن كتهدري
عويشة : لا أ بنيتي غا مع لمسلسل .. انا عزيز عليا منين يكون بادي نبدا ندوي معاهم
منال : ايوا الله يستر ا خالتي
عويشة : عليك .. مالك شفتيني كنلوح حوايجي لزنقة ! اولا شفتيني كندور فزناقي عريانة ! خختفو .. حطيلينا نرهجو راني كنموت بجوع
منال : وا اش درتليك ا خالتي انا دابا .. نتي غا دوري دوري و ترجعي تعايري فيا .. نتسناو حتى يجي ولدك راه قريب يدخل هادي هي وقيتو ..
سمعو ساروت فلباب و جاي داخل كمال
منال ( عوجات فمها و عينيها و جات راجعة للكوزينة ) هاهوا جا .. دكرنا سمن و لعسل .. 5 دقايق و نحط ا خالتي نوضي غسلي يديك
عويشة : على سلامة اوليدي .. كيداير مع لخدمة
كمال ( جلس و سرح يديه و رجع راسو تكاه مع لحيط ) : الله .. تمارة الواليدة .. و لكن الحمد لله هاحنا مقاتلين مع زمان
عويشة : الله يكون معاك ا وليدي
كمال : منال باقا مقلقة :/
عويشة : ايوا دابا تصالح معاك ان شاء الله .. ولدي انا نتغدى ونمشي .. ليوم بليل معروضة لواحد صدقة ديال واحد لمرا صاحبتي كتقرى معايا فجامع
كمال : واخا الواليدة .. و لكن سيري و رجعي عندنا .. 
عويشة : ايوا من بعد من بعد .. تا تصالحو
جات منال حطات لماكلة و جلسو يتغداو فصمت .. من بعدما كلاو سلمات عويشة على عروستها منال و مشات شدليها ولدها طاكسي و هو مشا رجع لخدمتو .. و فهاد الأثناء استاغلات لفرصة و صونات ل أسماء باش ينفدو الخطة ديالهم و يمشيو ل شوافة تقضيليهم الغراض و يرجع كمال فحال الخاتم ف صبعها .. على قولتها ..

قصتي ليست ك كل القصص .. قصتي جميع شخصياتها أبطال .. لكل شخصية حقها ف دور البطولة .. لكل شخصية ميزتها .. لكل شخصية وجهان .. و لكل شخصية جانبان .. جانب عدواني شيطاني .. و جانب بريء ملائكي .. بعض المواقف مقتطفة من الواقع .. و ترددت في شتى السلسلات على مر السنين .. منكم من مرت عليه و منكم من يكتشفها بطريقتي الخاصة و بلمستي أنا شهيرة بلعوشي ...
.. هل يوجد شيطان ب قلب ملاك !؟ جملة متضادة في صيغتها .. تشرح نفسها انه لا وجود ل مصداقيتها .. و لكن قصتنا ستتطرق لخيال اخر .. الخيال ليس له حدود .. فلماذا لا نصنعه بأنفسنا و ننسج له أرض من واقع خيالي .. من منكم لم يعش الخيال في حياته اليومية بشكل متكرر ومستمر .. من منكم لم يتحدى حدود واقعه بخيال منجي من واقع روتيني ممل ! جمييعكم تعيشون الخيال يا قراء و يا قارءات .. و الآن دعونا نتوقع هل الحب أقوى من الشر و الشياطين .. أم العكس 

راوص ( جالس ف جردة ف واحد لقنت و كيبتاسم .. جات بين عينو المديرة ديال المدرسة .. و بقا كايتفكر داكشي لي دارت ليهم و كايبتاسم غير بوحدو من حركاتها الصبيانية الناضجة .. امرأة بعقل طفلة مشاغبة .. فلحظة حس بضربة فقلبو و حل عينيه فالعالم الحقيقي ديالو )
مسعود : مرحبا
راوص ( شاد ف راسو ) : ففف .. زربتو عليا .. اااااه علاش ماعلمتونيش
تحل لباب و دخل باه
أب راوص : ايوا كون نتا كنتي بعقلك و كادير لخدمة لي صيفطناك عليها .. مكناش غانظطرو نجيبوك بهاد طريقة
راوص ( شاد فصدرو ) : ااه .. صدري كيضرني .. مقادرش نتنفس
اب راوص : حسيتي مزيان ! كيجاك هاد الألم
راوص : ااااه مقادرش .. انا حاس بلي كنتقطع من لداخل .. ااااه عتقني أ بابا ..
اب راوص : هاد الألم لي كتحس بيه .. غاتحس ب ضعف ضعفو الى حاولتي شي نهار تميل بداك القلب و تحلو ل شي انسانة من البشر .. متنساش القانون ديالنا اش كيقول .. 
راوص : انا مادرت والو .. ااااه .. مامملت بقلبي لحتى شي شخص ..
اب راوص ( غوت عليه ) : متكدبش 
.. حنا مراقبين كلشي .. و نتا ولدي و كنحس بداكشي لي ناوي عليه .. و اصلا ما قضيتي حتى حاجة من نهار مشيتي .. دير فبالك انه هاد التقصير ديالك غايكون عندو عواقب جد جد وخيمة .. و غاتتحملهم بوحدك .. حنا ولدناك باش تخدم القبيلة .. ماشي باش تأسس حياة
راوص : انا مزال كنحاول ندير مجهود باش ندرسهم .. و من بعد نقوم بالخطوة ديالي .. اااااه هاد الألم غايقتلني
اب راوص ( شدو من فكو و خرج فيه عينيه لي كيخلعو ) : بقاليك شهر و 25 يوم صافي .. الى ماخربتيش هاديك لبلاد دير فبالك انك غاتهبط لتحت و عمرك ترجع للقبيلة .. غاننفيوك لتحت بوحدك و تكمل تماك حياتك كاملة .. وحيد و منبوذ .. واش سمعتي !!! انصرف

رجع راوص طاح لأرض لقا راسو منو لسما .. و لقوة ديالو انهارت و ماقدرش يستحمل ذاك الألم .. بقا هاكاك مستلقي على الأرض ف جردة ديال دار كمال و منال .. لمدة ساعتين حتى زال الألم و فاق على صوت اسماء كتعيط ل منال باش تخرج بزربة حيت تعطلو على الموعد لي دايرين مع شوافة ...

اسماء : وا زيدي واش بلعام
منال : هانا هانا خارجة تسناي نسد لباب
اسماء : شوفي نعلمك من دابا .. هي راه عزيز عليها لحبة .. رخي يديك تكون معاك مزيانة و تقادليك الأمور حسن من داكشي لي ناويا عليه
منال : وا غا تقديلينا الغراض و 200 درهم كاملة ديالها
اسماء : ايوا زيدي زيدي راه شدينا رونديفو
.. شدو طاكسي و مشا معاهم رواص يستكشف حتى هو العالم ديال المشعوذين ..
وصلو لواحد لبلاصة جايا خارجة على لمدينة .. بالضبط فواحد الدار صغيرة مصبوغة بصباغة غوز باهثة و كلها مقشرة ... ناس واقفين بالصف كيتسناو .. منهم ناس على قدهم و منهم ناس لي ب طوموبيلات و كلاص .. كتفرقهم الطبقات و همهم واحد
مشات اسماء دوات مع شي مرا باينا كتعرفها .. و دوزاتهم ل داخل يتسناو .. بقاو تقريبا شي ساعتين و نص و هوما كيتسناو حتى عيطاتليهم لمرا يدخلو ...
زنوبة شوافة : دخلو و سدو وراكم لباب .. زيدو زيدو متخافوش
اسماء ( باست ليها يديها ) : اهلا ا خالتي زنوبة .. كيدايرا لاباس
زنوبة : بيخير .. تفضلو
منال : شكرا ربي يخليك
زنوبة ( سدات عينيها و بدات كتستنشق البخور ) : هههههههممممممم .. نتوما ماجايينش بوحدكم .. جاي معاكم شخص تالت
منال ( شافت ف اسماء )
اسماء : ا ويلي ا خالتي لا و الله ايلا جايين بوحدنا مامعانا حد
زنوبة : كلشي غايبان من بعد .. هههممم .. نتي عطيني يديك
منال : هانا
زنوبة : جايا على ود راجلك ... كلكم غراضكم رجال
منال : ايوا راه ولد لحرام غضرني اهئ اهئ .. كيخوني و عينو زايغة شماتة اهئ اهئ ..
زنوبة : شششششش .. كلهم فحال فحال .. انا غانربيه ليك و نخليه لي قلتيها ليه يقول ليها غا اه
منال : غاديري فييا خير كبيير
زنوبة : هاااأاااا .. انا كنشم ريحة فشكل .. ريحة ديال شي حد اخر .. هههمممم هادا ماشي بنادم .. ريحتو قاصحة و مجهدة .. نتوما جايبين معاكم شي حد اخر ... شكون هاذا اعتارفو
اسماء : اوييليي شغايكون !! راه جينا فطاكسي حتى لهنا و شافتنا خالتي حلومة و هي لي دخلاتنا .. كنحلف ليك حتى جينا بوحدنا
زنوبة : ههههممممم .. انا ماقصدتش انه انسان .. ريحتو ماشي ديال بنادم .. و لكن ما علينا .. تسناوني هنا نقضي ليكم الغراض . و لكن هاا ! راه عزيز عليا لمطلوق
منال : كوني هانيا اخالتي .. فلوسك موجودة غا عتقيني الله يخليك ..
بعد 10 دقائق رجعات زنوبة هازا فيديها واحد لكموسة دايرة فيها شي تخربيق .. حطاتو لمنال فيديها و قاتليها
زنوبة : هادشي غاتعطيهلو فالماكلة .. معلقة وحدة قاضية لغراض .. سمعتي ! ايوا و تفكريني
منال ( باست ليها يديها ) : الله يخليك لينا اخالتي ( جبدات 200 درهم من صدرها مداتهاليها ) 
زنوبة ( شداتها و عينيها شبه مغمضين زعما مامسوقاش و مكتشوفش شحال مداتليها دلفلوس ) : حنا ا بنتي كنديرو غا لي علينا .. انا مرا مولات خير و كنبغي ننفع بيه العبد .. و مومنة وقلبي عامر بالايمان الحمد لله ( باست يديها )
راوص : اييه نتي رابعة العدوية
زنوبة : هووووو هوووو .. سمعت شي حس .. انا متأكدة نتوما ماجيتوش بوحدكم .. خرجووو .. خرجووو كنحس بطاقة سلبية مالية ذاتي .. خرجووو
جمعو منال و اسماء رجليهم من الارض بزربة و هزو صنادلهم و خرجو مدردبين من تماك .. شدو طاكسي و رجعو لدار 

دخلو لدار و حايدو جلالبهم و جلسو كيخممو
منال : ففف هاد زنوبة ديالك خلعاتني .. اجي واش بصاح داكشي غايقضي لينا لغراض ؟
اسماء : واش نتي حمقة ! راه هاديك زنوبة معرووفة و ناس كتجي عندها منين و منين .. حيث عارفين دقتها مكاتعاودش جوج مرات .. توكلي على الله و عنداك تفعفعي .. انا غانمشي نتلاقا مع داك شماتة د خطيبي 
منال : وا تقلي شويا و نتي وقتما يقوليك الو اجي نتلاقاو تمشي طايرة
اسماء ( جلسات و بدات تغبن ) : اووف و اشنو ندير .. راه كنتوحشو الله يعطيه موصيبة .. صافي خليني نمشي غا ليوم .. وصلات حدا لباب حتى حلاتها و رجعات خلاتها محلولة
اسماء : منال ! عنداكي تنساي راه قاتلينا شوافة غا معلقة .. ايوا سيري لوحي داكشي كامل فلمرميطة و صدقي قاتلاه .. تصدقي لا ديدي لا حب لملوك
منال : وا صافي صافي .. ناري شاداني لخلعة .. عنداك غا توقعليه شي حاجة
اسماء : وا تي سيري اش عندو مايوقعليه و عو فحال لغول .. ديري معلقة كيف قالت شوافة .. و ماتخافي من والو .. كحازي و خلي الغراض يعطي المفعول ديالو .. و من بعد غاترجعي تسمعي غا نعام أ لالة ههههه
منال : هههههه مسخوطة ضحكتيني .. ايوا من فمك ل ربي
راوص : نااااااريييي كويميييل كيتصنط 😈 قفرتوها 
كمال جا داخل لدرا من بعدما رجع من لخدمة و هو يبانليه لباب محلول .. استغرب و حتى جا داخل و هو يسمع اسماء نطقات شوافة .. و قطع لحس و بقا لايح وذنيه كيتصنط
كمال : مزيياااان .. قوليلي هاكاك أ لالة منال .. صدقتي سحارة من سحارات لكبار .. و انا لي حمار كنقول مسكينة مراتي درويشة و مكاينش فحالها .. و ناوي ندير عقلي و نخرج من بالي لعيالات حيت متستاهليش لخيانة .. و لكن دابا بينتيليا وجهك لحقيقي يا سحارة لخانزة .. انا غانوريك معامن طحتي ..
رجع بلور جوج خطوات و جا داخل فحايلا عاد وصل
كمال : هاا احم احم .. شكون مخلي هاد لباب محلول
اسماء ( خرجات عينيها ف منال ) : احم سي كمال .. سلام .. غا انا كنت خارجة .. يالاه ختي منال خليت ليكم راحة .. سي كمال بسلامة
كمال ( خنزر فيها بنص عين حتى خرجات و دخل لصالون تكا ) : كاين شي اتاي
منال : وجدو لراسك
كمال : كيفاش هادي نوجدو لراسي ( دار رجل على رجل و بدا يطلع فيها و يهبط و يسبل فعينيه ) : انا عاد جاي من لخدمة عيان .. و حتى كاس اتاي ماقادا تقاديه .. واخا ا لالة مزيان .. انا غانخرج نشربو برا
منال ( تكاكات مع راسها ) : احم .. سير .. سير شربو برا
كمال : واخا
.. خرج كمال و من بعد ساعة رجع .. لقاها كطيب لعشا .. دخل بدل حوايجو و توضى و صلى .. و مشا كيتسلت على صباع رجليها كيطل عليها فلكوزينة
منال ( كتحل من ديك لكموسة لي عطاتها شوافة بشوية و كادور جنابها تشوف واش جا ولا مزال ) : قاتليا معلقة .. فففف ... هووا اصلا موحال واش تكر ليا فيه غا معلقة ( خواتو كامل ف كوكوط و بدات تحرك ) : مزيان هاكا .. خليه نلوحو كامل باش يولي فحال لكلب .. نقوليه زيد منا يقولي هاو هاو
كمال ( كايدوي بشوية مع راسو ) وااخا يالالة .. هاحنا غانشوفو شكون غايولي يقول هاو هاو

حطات منال لعشا فوق طبلة و قاداتو مع شلايظ و صايبات عصير .. و دخلات عيطاتليه باش يتعشى
منال : نوض تاكل
كمال ( شاف فيها بنص عين و نص لاخر كيشوف بيه فلبورطابل ) : هييمم .. هاني جاي
.. جلسو عل طبلة و بقا واحد يشوف فلاخر .. بدات منال بشلاضة و بقات تشوف فيه بنص عين كتسناه ياكل
كمال : ايوا بداي بسم الله
منال : لا دايرة ريجيم غاناكل غا شلاضة
كمال : هييم ( هز لفورشيط و بدا يشوف فيها ) : اش هاد لفورشيطة لمسخة .. نوضي نوضي جيبيلي وحدة خرا .. و تكون كبيرة مابغيتش هاد صغار
منال : فففف .. هادي مسخة ! راه عينيك لي مسخين و سير غسلهم ( ناضت و كتشوف فيه بنص عين .. )
خلاها حتى دخلات للكوزينة و بدا كيكحز فالمرقة من جيهتو و يدفع فحايلا كلا ..
كمال : اأ الله يعطيك صحة على هاد لعشا .. ( عمر فمو بشلاضة )
منال ( جات حطاتليه لفورشيط و بدات تشوف فطبسيل بانليها كلا منو كمية لا بأس بيها ) : ااحم .. جا زوين !؟
كمال ( جاوبها براسو بالإيجاب و دوا بفمو عامر زعمة و هو فيه غا شلاضة و بقا يلحس صباعو ) : و الله جاني واعر الله يخليلي مراتي
منال ( ابتاسمات ) : ايوا زييد زييد كول
كمال ( شد فكرشو بلعاني و حط لخبز من يدو ) : اااااه .. اااه
منال : اويلي مالك !
كمال : ااااه كرشي .. كنتقطع .. كنمووووووت .. ااااااه
منال ( بدات ضرب ف وجهها و فخاضها ) : اويلي اويلي ! هاك لما ا كمال .. الله يخليك ماتموتش و تخليني .. ماااالك !!!! سمح ليا سمح ليا .. اهئ اهئ .. اويلي يا فضيحتي ...
كمال ( تلاح فوق سداري و بدا يتوجع و يتعصر بلعاني ) : لموووووووت يا منال لمووووت ... صااافي رووحي كتخرج .. اش هادشي أ ربي ... مسارني كيتقطعو أ منال صافي غانموت و نخليك .. غاتولي أرملة أ منال على صغرك اااااااااااهخخ
منال ( كضرب ف فخاضها و حناكها و تبكي و دور بوحدها ) : اويلي اااش غاندير .. اويليي اويليي انا سبااب .. الله ياخد فيك لحق يا زنوبة .. الله ياخد فيك الحق يا أسماء خرجتو عليا اهئ اهئ
كمال : مناال اجي .. كح كح كح .. اجي احبيبتي نودعك .. صافي حاس بعمري غاتخرج صافي .. أشهد ان لا اله الا الله .. و اشهد ان محمدا رسول الله .. لمسامحة ا مراتي .. لمسامحة
منال : لاااااااااااااااا اهئ اهئ .. سكت خليني نفكر اش ندير اوييلييي .. صبر نعيط ل مصطفى جارنا يجي يديك لسبيطار .. اويلي اويلي اش درت
كمال : اجي عنقيني نتوادعو .. مناال .. هاهوا عزرائيل جا يديني .. كنشوفو أ منال كنشوفو
منال : لااااا اهئ اهئ سكت سكت سكت .. انا سبابك ا حبيبي انا .. مشيت لشوافة سحرت ليك باش ماتبقاش تخوني .. و لكن و اللهما درتها بنية خايبة .. اهئ اهئ اهئ .. بغيتك غير تكون ليا بوحدي و صافي اهئ اهئ سمحلي ا كمال ا حبيبي ماصحابش ليا غانوصلو لهادشي سمحليا اهئ اهئ اهئ .. ماتخلينيش بوحدي منقدرش نعيش بلا بيك اهئ اهئ ..
كمال ( ناض شدها من ذراعها و بدا يفرنس ) : هااااا .. هانتي اعتارفتي يا سحارة
منال ( تفاجآت و مسحات دموعها و هي مستغربة ) : شنوو ! واش كنتي غير كتضحك :/
كمال : اه السحارة كنت باغي نخلعك باش ماعمرك تعاودي هاد لفعايل .. لنفترض ماسمعتش ديك هدرتك نتي و ديك صاحبتك لمسخة لي غاتخرج عليك ! دوي !؟ كنت دابا غانكون مجبد حداك ميت د بصح .. ؟ هادشي مانستاهل عندك ا منال ! انا رخيص عندك حتى لهاد الدرجة ياك ! هادا هو الحب و الإخلاص و الوفاء
منال ( نترات يديها منو ) : خليني .. تفو عليك .. كنتي غاتوقفليا القلب و نعيش حياتي بعذاب الضمير تفو تفو .. و زايدون شكون كيهضر على الإخلاص و الوفاء ! واش نسيتي شنو لي وصلني نمشي ندق باب الشوافات ولا نفكرك ! هاا
كمال : و نتي كنتي غاتحلي المشكل بسحور ! باش تمتالكيني بالتحلوين و الحب و تبرعيني بالغرام .. نايضة تسحريلي .. فففف الجهل امتالكك صافي ..
منال (هزات كتافها و مدات شنايفها ) : خليني .. صافي انا ندمت .. 
كمال : واش معارفاش بلي داكشي راه غير سم ! معارفاش شحال من واحد مات بداك لوسخ !؟ اش داكشي بعدا لحتي فلماكلة ! نتي معارفاش حتى اش داك لخنز و عطيتيني ناكلو ياك !؟ حياتي رخيصة عندك حتى لهاذ الدرجة ؟
منال : صافي سمحلي .. نتا لي دفعتيني لديك طريق
كمال : ففف .. الله يهديك أ منال هاذا مانقول
منال : و نتا كتكدب عليا و تقولي شايف عزرائيل و كتشهد و داير موتة حمار .. صدقتي ممثل الله يمسخك .. تفو
كمال : ههههه .. عزرائيل ماعندو شغل غايجي عندنا حنا ! مسالي هو
راوص : وا راه انا لي مسالي صراحة .. مالقاو فين يصيفطوني غا لسبيطار لحماق .. والايني مهمة هادي .. 


منال و كمال ( شافوه و سخفو فدقة )

يتبع