مرة مرة خاصك تهز واحد كاس دأتاي وتطلع لسطح تفكر مزياان فشنو باغي دير وهادشي لي درت بعد ما قاليا جمال باغيني نسافر معاه قلت ليه عطيني وقيتا طلعت دكيكا لسطح وكنخمم واش نمشي ولا لا حيت عارف بلي هاد تسافيرا غتكون لولا وماشي لخرى غيبقاو ديما غادين جاين بيا من بلاصة لبلاصة بصح خلاولي والديا دار ولمحل ولكن لوقت وزمان هدا نقدر غدا توقع ليا شي لعبة منبقاش قاد نخدم ولا نكبر لوقت راه طاير هاد لخدمة لي عندي مع هاد زوج مكتعاودش دنيا كتعطيك فرصة وحدة باش دير شويا دصرف تحتك صافي جبدت تيليفون قلت ليه غدا معاش اتدوز قاليا بكري مع 6 دصباح نوقف قدام دار.. نعتليه دار فين تحولنا وقطعت وبقيت وااقف تما حتى طلعات عندي مريم قلت ليها بلي غادي نسافر غدا كتقوليا انمشي معاك واش منيتك راه عندي خدمة تما غنمشي نهار ولا يوماين إلا تعطلت فاش نرجع إلا بغيتي نسافرو لشي بلاصة بزوج نمشيو كنعيا منشرحلها كتقوليا ودبا علاش لا ونعاود تاني من لول راه عندي خدمة مغاديش نحك راسي انكمل ونرجع بزربا.. جمعت حوايج نخدم بيهم وباش نبدل واحد الف درهم فجيب دصاك وحطيتو عند لباب غدا نهزو فاش نكون خارج لمهم ضلام لحال ديك ساعة بارك مع ديك بنت ناس كتعاود ليا على خدمتها وداك لهيت تحركنا لدارها جبنا طلة بركنا شويا رجعنا لدار باش نوجدو ما نقصيو غدا غادي نخرج بكري خاص نعس بكري.. كنسمع دقان حليت لباب لقيتها لواليدة جايبا طبسيل ولخبز متأكد شميت ريحت لمرقة وتغماس قبل متدق كاع لمهم جات بوحدها مداتلي داكشي من لباب قلت ليها لا غير دخلي معاوداتهاش بركنا سيدة عاطيها ربي فيديها لمهم داويا هيا ومريم وبداو داوين على لعراسات وتاشياخت وديك لهضرة صافي كان غادي يهرب ليا أنا تا كنبغي نشوفيها شوفة زوينة كنتفكر بلي زهوانية ولفعايل لي دايرا كتعاود تطيح من عيني تييي غا سكتي لله يعطك جلط.. بغات تمشي وقفت معاها باش نسد لباب وهيا تقوليا فاش تكون مسالي بغيت ندوي معاك فشي حاجة كين شي حوايج من شحاال وأنا باغيا نقولهم ليك.. قلت ليها هيا دبا قالتلي لا مخليا خوتك كيتسناوني باش يتعشاو غدا مسالي؟ لا غدا مسافر هاد ليوماين يمكن منكونش فدار بقاي تطلي على مريم إلا بغيتي.. لمهم مشات سديت لباب دخلت ننعس ضرباتني لفيقة مع ل5 باش دوشت ولبست تأكدت من لحوايج ولفلوس لي فصاك فيقت ديك بنت ناس وصيتها وخرجت بزز خونا تيعيط ليا لقيتو كيتسنا فيا بلإمبالا ديالو قاليا تسوق؟ قلت ليه سمح ليا اصاحبي أنا ميكانيك ماشي شيفور ولد لعبد باغي يخليني نسوق باش ينعس لقاني تانا داكشي لي باغي ندير طلعت لور حطيت راسي على صاك نعست معقلتش على راسي تا فيقني وسط واحد لكراج وصلنا شحااال من ساعة وأنا ناعس وخا نكون ميت.. خرجت نضرب طلة دنيا كيدايرا تم كتباليا دنيا مقطوعة سحرا ولا شبغات تكون أنا تخلعت يقتلو ديمي تما مكينش لي يجيب ليا لخبار لمهم دخلت شفت طوموبيل موجدين كلشي صباغ بياس غير بدلت حوايجي وبديت لخدمة لقيت فيها واحد لبلاكة كتعقل على أيام لإستعمار حيدتها هيا لولا داير زربا فبالي ديال بصح باغي نرجع لدار لمدينتي بالخف راه معمري سافرت أنا.. جمال تاهو كيعاون فيا مبيهش تيعرف بعدا شنو تيدير مشا جاب لينا لغدا ورجعنا لخدمة فليل مقدرش يبقى فايق خونا عيا مع لعلم مدار والو طلع لطوموبيلتو نعس بقيت أنا خدام وتندير صداع ديال بصح ومع دالك خونا ناعس بحال لميت تال صباح فايق مع 7 لقاني موجدها تصبغ قلت ليه صبغ نتا وطلعت أنا لطوموبيل نعست ديك 3 سوايع وفقت لقيتو مزال كيخربق فصباغا ولبومبا مباغياش تخدمليه قاديت ليه داك لعجب وخليتو خدام خرجت لبرى عيطت على مريم عيطاتلي لبارح وريزو مكاينش كاع فداك لمحل لمهم ديك لهضرة ديال والو كيف داير كب دايرا قالت ليا بلي لواليدة باتت معاها لبارح.. رجعت كملت مع خونا صباغا داير ماريو على وجهو ومع دالك بقى غير كيعطس تا ملي معندكش لخرقة ديال هادشي لاش كتلاح ..مبقاش زاد معايا ضربة طوموبيل معاودا من اول وجديد غا لكادر لي مبدلناهش داك نهار داز طاير محسيتش بيه تا كنلقاها 12 ونص دليل مواكل والو من ل11 من لفطور وصافي كنقلب على جمال ملقيتوش تا طوموبيلتو ساط خلاني مشغول مع لخدمة وتمارة ومشا نموت أنا بجوع دبا درتها ليه على قد فعايلو حطيت دوك سوارت من يدي طلعت لديك طوموبيل كنتسنى نعاس ولموووت ديال لخلعة عرفتي واااحد لبلاصا كتخلع وداك لمحل قديييم كلو حديد مصدي مصدي كيعقل على هتلر داني نعاس لغد ليه تيفيقو فيا جمال وداك صاحبو تاهو جا قاليا سمحلي إلا فيقتك غير بغيت نسولك واش كملتي ولا مزال؟ قلت ليه واحد ساعتاين وأنا معاك.. وانا نشوف فجمال نتا واش ضميرك مرتاح نتا مخليني لا غدا لا عشا ومشيتي بلا تا شي إندار واش منيتك؟ وهو يقوليا هانتا شنو مشيت نجيبلك ومدلي جورنال مطوي حليتو لقيت فلوس ديالي محسوبين ناضين تسدات ليا شهية أنا صافي وقفو حدايا كملت ليهم خدمتهم كلشي هو هداك بقاو كيقلبو فيها أنا مشيت غسلت وبدلت عارف راسي ممخليش ليهم فاش يدويو.. جا مول داك لكاميون طلعو طوموبيل داها خونا حتى حنا غادي نتحركو جمال وهو يقوليا سير طلع مع سماعيل أنا عندي واحد لغرض هو غادي يوصلك.. مجاوبتوش غير نزلت طلعت مع داك صاحبو غليض شويا معنديش معاه حيت مدويناش بزاف ومكنعرفوش بيناتنا غير جمال لي تاهو براسو مكنعرفوش شي معرفة تلاقينا قبل لخدمة شي زوج مرات ولا 3 كون ما مشيتش مع مريم داك نهار فاش تلاقات بدوك صحاباتها مكنتش غادي نشوف خونا وحتى حاجة من هادشي مغادي تكون.. هاد سماعيل كنت غالط فيه ساط ضريف وضحوكي معرفتش واش هو ديما هكداك ولا غير ديك ساعة حيت مقاد ليه خدمتو لمهم سيد كيسول فيا فين تعلمت وهضرة كتجيب هضرة وقف فطريق تا فطرت هو كان صايم داك نهار قالك باغي يضعاف هاااا قوليا داير ريجيم وصافي ماشي صايم.. بقى داوي معايا كنصحو زعما أنا راه لفورما مقادا من عند الله غير لماكلا ولخدمة.. وصلني لدار يلاه غنزل وهو يقوليا سعيد خويا بلاتي رجعت لبلاصتي قلت ليه شنو؟ قاليا بلي باه باغي يشوفني سولتو علاش واش كنعرف باك؟ قاليا لا موحال ولكن راك خدام معاه دبا هادشي كامل ديالو فاش ايدخل لبلاد غادي يجي عندك لمحل وبغيتك دير معاه لخاطر راه كيتعصب على والو وإلا تعصب غادي يطيرني تانا من خدمتي.. كنت زربان ما حكرتش معاه قلت ليه صافي ومشا مبغاش يدخل لمهم دقيت فلبا لقيت بنت ناس فدار يلاه دخلت دوشت وبغيت ننعس نرتاح شويا ولكن شكون لي خلاك بقات كترطا تا خرجت معاها لواحد لعرس دشي وحدة فصحاباتها مزوجا ليوم لمهم غادي فطريق عيطاتلي لواليدة قالت ليا عشيا نتلاقاو إلا كنتي مسالي على ود شي هضرة قلت ليها مرحبا غير نرجعو لدار نصونيلك قطعت وبقى ضارني راسي متأكد غادي تدوي عليا ولوقيتا فاش خلاتني ولا على سيد لي كانت معاه زعما لواليد راه نموت ونشوفو زعما نكون تنشبه ليه.. لمهم وصلنا لداك لعرس خيتي مزوجا بواحد لفريخ فاش كنت قدو كنت كناكل تراب وكنتبع بنادم لي دايز من درب بالحجر..
خليناها فداك لعرس يمكن لمهم تعرسنا مزيان غي هو مشطحتش أصلا مكنعرفش وكنحشم وعيااان يلاه جاي من سفر وبقا فيا لبرهوش لي مزوج كنت قدو كنت غير هبيل.. لمهم تلاقيت تما بشي ناس صحاب مريم بقاو باغين يشريو معايا معرفة.. وصافي خرجنا رجعنا لدار فلعشيا وكنت ديجا داير مع لواليدة نتلاقاو منعرف شنو باغيا تقوليا غير دخلت بركت شويا وعيطتلها تخرج لعندي مبغيتش نمشي لديك دار يشوفني راجلها لمهم واحد 10 دقايق وهيا تعيط ليا خرجت لقيتها عند لباب قالت ليا يلاه نتمشاو بزوج بدينا كنتمشاو وهيا دير يديها فيدي أنا معرفتش شنو نقول ولا ندير خليتها على خاطرها سولتها شنو باغيا تقوليا فلول قالت ليا نفس لهضرة ديال ديما سمحلي وأنا غلطت ماشي مغلطتش أنا را غير بشر ولكن دبا بغيت نعوضلك إلا خليتيني.. خليتها تا سالات قلت ليها شوفي غير متبقايش تحلي هاد لموضوع واش ملاحضتيش بلي وليت كنتعامل معاك عادي بحالا مكاين والو غير متسنايش مني شي حاجة أخرى دار كتعرفيها وقتما بغيتي تجي جي أصلا كتباني ليا تعاشرتي مع مريم غير بقاي تعيطي ليا سعيد بلاش ديك ولدي كتجيني ناقصا من عندك وصافي إلا كانت شي حاجة أخرى معارفهاش و باغيا تقوليها قوليها ليا دبا.. بقينا كنتمشاو واحد لوقيتاا مبغاتش تبرك غير كنتمشاو يمكن بلعاني باش متشوفش ليا فوجهي عرفتها عندها متقول من غير لهضرة ديال ديما.. بزز باش زعمات تهضر وبدون سابق إنذار قالت ليا بلي سيد لي كانت معاه قبل ما تزوج زعما لواليد هو سيد لي كان مربيني عرفتي من نهار عرفت بلي راجلها ماشي لواليد تخيلت بزاااف درجال فدرب كيشبهولي ولا دواو معايا شي نهار مزيان ولكن سيد لي رباني مع مراتو معمرها طاحتلي فبالي هو معمرو بين ليا شي حاجة بقات كتحلف ليا ومع دالك متيقتش سيد راه كان دايرني بحال عدوه قالتلي بلي مكانش باغي ختها لواليدة تعرف هادشي وبلي عطاها فلوس سيدة معرفتش شحال ربحات مورايا كيف والو تكون طلبات بيا فاش كنت فكرشها وليت نتسنا منها أي حاجة.. رجعنا لدرب مشات هيا لدارها ودخلت تانا لدار بغيت نمشي لمحل نطل عليه ولكن لموت ديال لعيا ونعاس حطيت راسي مفقتش.. لغد ليه عاد مشيت لتما خديت فلوسي من عند دراري طليت على لمحل قاديناه واقف كنفكر نصبغو خونا غادي يجيبلي باه لهنا معرفتش شنو كيتسناني ندير ليه ولكن هانية كنربح معاهم فلوس.. عيطلي جمال داك نهار قاليا نفس لهضرة بلي بات خونا غادي يجي لعندي لمحل وكدا قلت ليه صافي شنو باغيني ندير ليه أنا نزرع ليه لورد فطريق وقتما بغا يجي يجي.. شي 3 ايام دوزتها غير راحة ونعاس وتسركيل مرة مرة تنضرب طليلة على لمحل خونا فاش غادي يبغي يجيب باه غادي يعلمني وتانا خاص نرتاح شويا قبل ميعيطو ليا لشي خدمة أخرى لمهم نهار 4 عيطلي صباح بكري قاليا بلي باه غادي يجي لتما بوحدو يلاه بدلت حوايجي غسلت وجهي وخرجت وصلت لتما أنا لول حليت لكراج وبارك تندور فيه وهيا توقف واحد لمرسيدس قديما فلكحل وزاج فيمي بحال لهيت لي كيجيبو ليا خوتنا خرجت لعندو عرفتو هو نزل لعندي خونا اتكون عندو شي 60 عام شعر مخلط بيض وكحل ولموسطاج يصلاح حلفة لماعن وضارب سروال قندريسي خونا بحالا هربان من لفانوس مديت ليه يدي وهو يجرني سيد كيبوس بالحنك قاليا سعيد ياك؟ قلتلو هو هدا قاليا شبالك فيها وشاف فطوموبيل, صرعها مكنتش عارف فاش غادي ندوي معاه وجبد ليا لموضوع لي كنفهم فيه بعدا بقيت داوي معاه جاو دراري سلمو عليا عطاوني فلوسي بداو خدامين وهو يلوح ليا سوارت قاليا دينا لشي بلاصة نفطرو ديتو لواحد لقهوة سيد تيخلصنا بلملاين ومفطرو ب20 درهم براد دأتاي لحرشا لحرشا ولمسمن ولكن تشا راه كياااكل ولموسطاج كياكل معاه بدا داوي ليا على لخدمة ديالنا قاليا بلي تاهوا كانت خدمتو هادي سولني شكون علمني قلت ليه لواليد وبلي لمحل كان ديالو غير خلاه ليا وبقيت داوي أنا لسان عندي خاصو يتقطع من جدر ولكن سيد كيسمع والله شاد كاس فيدو كيشرب وضحكة محيداتش ليه من وجهو معرفتش علاش ولدو خلعني منو سيد مكينش بحالو وخا بصراحة كيخلع إلا مبركتيش معاه وشفتيه كيداير فشخصية ديالو.. لمهم بدا كيعاود ليا على لوقيتا لي حرڭ فيها وكيفاش جمع راس لمال وبدا هاد لخدمة سيد ممخلي حتى بلاصة ممشاش ليها بحال هاد نوع خاص غير تجبدو مكيبقاش يسكت بدا كيعاود واحد نهار و واحد نهار ضربات ل1 وحنا مزال باركين تما ولينا مغدين فنفس لبلاصة وصلني لمحل باش يمشي زعما ولا واااقف معايا تما تاني قاليا بلي كيبغي يتلاقا بدراري لي خدامين معاه وديك لهضرة ديال دخلتي ليا لخاطري وكدا قلت ليه فطرنا بزوج تغدينا بزوج علاش متجيش تعشا عندي ليلة فدار وجيب معاك لعائلة إلا بغيتي؟ قاليا لا نتا لي خاص تجي جيب لمدام واجي عشيا.. نعتلي لبلاصة صافي عرفتها وهو يتحرك نهار داز حلوة يلاه وقفت شويا مع دراري تما فلمحل ورجعت لدار قلت لديك بنت ناس بلي غادي نمشيو فليل معروضين بقات كتسول فين وشكون وأنا ضاريني حناكي بالهضرة ومع دالك جاوبتها درت ليها خاطرها عطاني ربي صبر سيدنا أيوب عيط ليا ولدو سولني شنو وقع قلت ليه والو غير بقينا داوين وتغدينا بزوج راه عارض عليا لعشا, قاليا مزيان وراه مغاديش يكون تما مساكنش مع والديه.. فليل مشينا أنا لي عارف لبلاصة أنا لي سايق وصلت لتما نعتلي دارو تبارك الله مريم غير كدور فعينيها ولد ناس منين كتعرف بحال هاد ناس؟؟ شفتك حاكراني راه مني لمولشي فهاد لبلاد أنا وايييلي.. تلاقينا بيهم سيد متواااضع عندو هاد لخير كامل وكيضرب معايا فلحرشة واتاي لمهم خونا مراتو غاوريا ولكن خيبا بروجولا معرفتش واش حيت كبرات ولا هيا أصلا خيبا لمهم لجمال فلقلب ومعلمها ديك لعربية ديال نفنافا كتدوي من نيفها كتقوليا وندي بقيت ساعتين داوي معاهم عاد فهمت بلي كانت باغا تقوليا ولدي لمهم خوتنا كياكلو بسكين وشوكة وخونا موسطاجو يعمر سرير ومدابز مع طريف دلحم بموس غير قبيلا كان كيدخل قطيب عامر لحم تيخرج غير زلاڭ معرفتو واش كياكل هو ولا مخبي شي 10 دناس تحت داك لموسطاج.. وعندو واحد بنتو تبااارك الله تدير من خوها زوج لحناك غير ديال صوصيط ولكفتا ههههه نصلاح كزار غير ضيعت لموهبة فلميكانيك.. خارجين معانا فاش بغينا نمشيو قاليا عطيني نمرتك باغي ندوي معاك فشي حاجة منبعد عطيتها ليه قاليا وأخيرا لبرهوش ديال ولدي عرف شي ناس مزيان عالله غير ياخد منك شي حاجة.. حشمني ديال بصح وجهي ولا حمر ولدو قدو قد لعجل وتيقوليه برهوش.. مديت لمراتو يدي نسلم عليها باش نمشيو وهيا تجرني وماشي سلام ديالنا تراه كتبوس لحنك وقدام راجلها حشماتني بنت لكافرة.. غادين راجعين لدار باش وصلنا كتباليا لواليدة كتسنانا عند لباب ولابسا جلابتها عرفت بلي كينا شي حاجة راه راجعين فنص ليل نزلت لعندها شنو كاين؟؟ قالت ليا سعيد وخا نبقى معاكم هاد ليوماين؟ قلت ليها خودي راحتك ياك ماكين باس بعدا؟..
عرفتي قهراتني ماكلا دزنقا مزيان ملي لواليدة غتبقى معانا شي يوماين ناكلو تاحنا بحال بنادم وااتق من قدراتها فلكوزينة.. لمهم دخلناها لدار خليتها داويا مع مريم مبغيتش نسولها علاش جايا غتقولك كيجري عليا ولا منعرف بدلت حوايجي وأنا نطيح معقلتش على راسي تا كضربني لفيقة صباح على ريحة لمسمن فلول كيحسابلي كنحلم رجعت ننعس باش نفيق(لمنطق) تراه بصح ريحة لمسمن خرجت لكوزينا كيبانو ليا واقفين قلت ليها علميها علميها لله يرضي عليك راه قهراتنا بماكلا دزنقا من رمضان ودخلت غسلت وجهي غنمشي نفطر وهو يعيط ليا لموسطاج بات خونا على صباح قاليا فينك أنا قدام لمحل مبنتيش ليا.. حقدت ديك ساعة نهار موجدين ليا فطور الأبطال فدار يوقف عليا هاد ساط أش هاد زهر مغاديش نمشي لعندو وخا منعرف شنو باغي قلت ليه بلي يلاه غنفطر مع دار إلا قبلتي عليا وجيتي فطرتي معايا داكشي لي عزيز عليك عرفتي ديك الا قبلتي عليا كتقتل بنادم مكيقدرش يقول ليها لا نعتليه درب غير قريب لتما قطعت عليه قلت ليهم تسترو لموسطاج راه وجهو ماشي ديال تقة بارك قدام تلفازا حتى عاود صونالي نزلت حليت ليه سلام سلام دخلنا باركين فصالون واحد راس تيقوليا ندور فيه باش يفهمو راسهم من نهار خدمت معاهم مبقيتش ديال راسي لي بغا غير يحك طرمتو يعيط ليا ميعرفو واحد فلحمام ولا شتيدير درنا ولاد بكري مع هاد ناس لله يصبرني غي حتى نجمع معاهم شويا دلفلوس وغادي نقلب دوزت هاد تسخسيخ مع لواليد حتى طلع ليا فراسي ماشي تال دبا ويعاودوه ليا هادو.. بارك معاه داوي ليا على والدين وكدا وديك لهضرة ديال كتفكرني براسي.. حطو لفطور خونا كياااكل تراه بزااف اول مرة نشوف مسمنا بلعسل بفرماج و كتطوا على ربعة كتغبر أنا خفتو غير يولي مخنوق ومصيفطينا حنا لحبس اه وكيدور وكيقوليهم لله يعطيكم صحة هادشي معتبر بقى كيعاود فهاد لهضرة حتى كنت أنا غادي نشنق عليه بزز باش وقف خرج كيتسناني على باري باغيني نمشي معاه دخلت تنبدل وهيا تلحق عليا مريم فين غادي معاه عنداك تمشي تسافر عاودتاني.. قلت ليها إلا قالو ليا تسافر غادي نمشي راه عندي معاهم خدمة زوينة بقينا مناقشين عاد خرجت طلعت مع خونا غادين قلت ليه بلي جمال و ولدو سماعيل مبقاوش كيعيطو ليا من شحاال هادي واش كين شي مشكل ولا غير لخدمة مكيناش قاليا لا موجودا لخدمة غير أنا قلت ليهم يخليوك ترتاح شويا لبريكول جاي أنا غادي نعاونك فيه من شحاال ما خدمت طبعا إلا بغيتي؟ قلت ليه أه الله اودي كين لي يقول لا لفلوس.. مشينا لواحد لافيراي بقينا داخلييين حتى تلاقينا بمول داك بكاميون تما سلم على شيباني وباس ليه راسو من هضرتو عرفتو عمو لمهم خرجنا من تما وبقينا تابعينو حتال لمحل عندي نزلو داكشي بحال ديما بلاما طليت أنا على دراري لي خدامين معايا بدلت حوايجي وبدينا خدامين خونا جبد تيليفونو غادي يطلق لمزيكا كنتسناه شنو غيطلق وهو يخدملي داتني سكرة دخالد وجهد دبصح سيد محن خدامين وكيضحك معايا سيد داير معايا وااخد لخاطر وليت شاك فيهم منهم🌈 أنا سيد مكراشيني واقيلا ولا شي لعبة راه بزااف على لخدمة لمهم وقيتة لغدا بقينا نتغداو عندي لا عندي مقديتش نبقى نتزايد معاه فلهضرة عيطت على دار علمتهم بلي مغاديش نجي و مشينا لعندو لدار باركين كنتغداو فجردا ديك بنتو بڭرااا سيدة كلها هبرة موحال واش فيها لعظام تدير مني شي 10 ولا 20 لمهم كلينا كنتسناه يبدل حوايجو خونا خرج ضارب حطة ديال صحاب لماطر د لهارلي وداك لهيت وهو يباليا مخرج واحد من لكراج سيد قتلني بديك لحياة لي عندو عندو واحد لهيت فشكل ومع لموسطاج وشكل دلوجه وكبير فلعمر كيبان خارج من شي فيلم من هوليود مشينا لمحل تاني بقينا خدامين سيد معلم غير صحة خانتو وصافي كيعاودلي على ولدو خليتو يقرا ومكملش فيها ولي درتها ليه كيخرج عليها و.. بقى داوي على ولدو تا طيح ليا سيد من عيني.. دراري لي خدامين معايا مشاو بقيت غير أنا وخونا تما قلت ليه واش انتعشاو ولا غادي تمشي لدارك تانا نمشي لدار؟ قاليا لا غادي تمشي معايا لعند واحد صاحبي عارض عليا لواحد لقصارة غادي تدوز ليلة مكتنساش.. خونا خلعني قلت ليه سمحلي معنديش مع داكشي تكون شي حاجة فيها لماكلا أنا معاك.. وصافي ملي باغي غير تاكل يلاه غادي تاكل وتدي معاك.. مقديتش نبقا مجاقر معاه تاني بدلت حوايجي عيطت على مريم قلت ليها بلي عندي خدمة فلمحل غادي نتعطل بلاما يتسناوني.. مشيت مع خونا لواحد لفيلا كنسمع شعبي من راس ديك زنقا دخلنا شمنك يا شراب ويا حريم وليت شاك فراسي داخل لشي فيلم ديال لكفار قريش زاهين وصافي سيد غير وصلنا لتما مبقيتش عارفو فين مشا كيباليا حولي كيتشوا كيدوور مسكين بقيت داير معاه بالي غير يبانو ليا بداو ياخدو منو غادي نضرب شي فخض لعيد لكبير قرب.. بارك تنشوف فيهم كلهم كبار فلعمر أنا صغير كنقلب على خونا لي جابني معجبنيش لجو سولت واحد راجل واش شافو غير قلت ليه موسطاج قاليا أاه لحاج حاميد شفتي دوك شيخات لي لهيه غتلقاه وسطهم وبصح مشيت لقيت خونا كيلوز وسطهم سيد يعطس يطير راع عندو جناح ماشي موسطاج وبارك تيلوز طحت فالأرض بضحك سيد لاصق على واحد شيخة خونا مزوج بغاوريا ولكن كيموووت على لبلدي بقا كيعلق ليها تا حشمات وعطاتو نمرتها طاح من عيني ديال بصح وكيقولو ليه حااج يا حصرة تراه لفلوس مقودا تخليك حاج وخا تكون يهودي.. باليا سيد مشغول وزاهي مبغيتش نكعيه ضربت واحد لكييلو من داك لحولي هزيت ديسير وأي لعبة بانتلي فوق ديك طابلا وريحت فكرسي تحت واحد شجرا وبقيت تنضرب تا كتعيط ليا مريم بعدت على صداع وجاوبتها كتسول فيا فين نتا قلت ليها راه قلت ليك عندي خدمة فلمحل دبا راه مزال معطل.. وهيا تبدل صوت أول مرة نسمعها كتهلل تشاا كيفااش كتقولي فلمحل كيفااش وأنا نص ساعة واقفا تندق فيه وضو طافي خرج راه جبتلك ما تاكل.. لبنت ماشي هضرتها هادي 100% غتكون لواليدة لي عمراتها راه حنسراتني كنشوف دوك لقطات غير فالأفلام تا ولاو كيوقعو ليا بغيت نقلب معاها لموضوع بلاتي كيفاش خارجا فهاد لوقت معامن تشاورتي انا مع سيد برى كنتعشا وغادي نجي لدار شويا سيري لدار حتى نجي.. مبقاتش عندي لخاطر لماكلا مشيت عند خونا قلت ليه باغي نمشي قاليا غير صبر راه عاد بدينا مزال غيجيبو لماكلا وبنادم وغادي تزهى قلت ليه لالا غير سمحلي خاصني نمشي دبا لدار غير رتاح نتا أنا غنشوف شي طاكسي.. قاليا اشمن طاكسي هنا وفهاد لوقت صافي أنا انوصلك.. خرجنا غادين سيد غادي طاير فطريق باش يرجع ولموطور فداك ليل قتلني لبرد قرب لدرب وبموطور عندو غيفيق لميت قلت ليه غير هنا باراكة عليك نزلت غادي وهو يقولي صبر وقف موطورو ووقف معايا تاني معلابالوش بلي غادي نلقا لحرب لعالمية تالتة كتسنا فيا فدار.. واقف معاه سيد بدا داوي على بنتو أا لقرايا أا الأدب شويا بدا عليا كيفاش كتجيك.. وهو يقوليا مغاديش نلقا ليها بحالك فهاد لوقت عرفتي ريق مبقاش باغي ينزلي ديك ساعة بديت تنضحك معاه قلت ليه دوماج تعطلتي شويا لقيتيني تزوجت وهو يقولي هااا علاش شرع عطانا ربعا..
بلان متبغيهش لعدوك واااع قلت لا غادي يفهمها فشي شكل قلت لا غادي نخرج على حياتي, حشمت من سيد وهاد الأيام مبقيناش كنتفرقو قلت ليه دبا زربان غدا ان شاء الله وندويو.. خليتو وشديتها جريا وحدا لدار وااع واش منيتو هدا تيضحك ولا كيفاش.. تندق فدار حلات ليا لواليدة قالت ليا على سلامتك وأنا عاارفها شيطانة غتكون عمرات لمريم راسها وداكشي لي كان سيدة شاعلا بقيت داير معاها لخاطر تانا مدرت فيها ميصلاح بلان مبرهش وهيا مكبرا بيا وغادالي بلماكلا وكدا بقيت داير معاها لخاطر حتى سكتات وجابتلي ناكل زعما وأنا ديجا ضارب خروف فكرشي ولكن مقديتش نقول لا.. ومبغااش يديني نعاس ديك ليلة دبا واش خونا حطني فعينيه لبنتو ولا كيفاش زعما تكون هيا لي قالت ليه شي لعبة عليا زعما عارفاني مزوج مشيت عندهم داك نهار أنا ومريم هادشي كيمشكل لواحد فنعاسو.. لغد ليه باركين تنفطرو بقيت أنا ولواليدة ملقيتش وقيتا باش ندوي معاها من قبل سولتها شنو واقع ليها مع راجلها قالت ليا غير شي مشاكل وصداع بغيتو يحس ببلاصتي شويا عاد نرجع لعندهم.. خرجت غادي لكراج ونسيييت لموضوع ديال خونا وبنتو بدلت حوايجي عيطاتلي مريم بقينا داوين كتقوليا سمحلي لبارح كبرت لموضوع وكدا بقيت داوي معاها وخدام فديك طوموبيل حتى عيطلي شيباني قاليا بلي غادي يتعطل شويا عندو شي خدمة قلت ليه خود راحتك أصلا ولفت نخدم بوحدي.. بقيت فداك لبيت حتال شي ل11 ونص عاد جا دخل سلم عليا طلق لمزيكا وبدل حوايجو بقينا خدامين شويا قاليا يلاه تغدا لعندي مقديتش نقول ليه لا علمت دار ميديروش بحسابي ومشيت معاه غادين وعارفو غيدوي على لموضوع دلبارح غير امتى و واش منيتو هادشي لي معرفتش دخلنا لدارو بقينا كنتمشاو فجردة تما سيد مدواش يمكن حشم وأنا ندوي معاه قلت ليه لبارح واش كنتي كتضحك قاليا لا واش داكشي فيه ضحك أنا بغيتك تولي واحد من ولادي ماشي غير نسيبي.. خونا أفحمني بالهضرة ولكن أنا غي وحدة فيها 50 كيلو دايرالي ضجيج عاد نوض نزيد هاد بنتو تبارك الله منقدرش تا ندوي معاها سيدة غير تنفخ عليا نطير أما لا مشيتي نعستي حداها وتقلبات عليك ولا حطات يديها عليك غتموت بلا شهادة هوما دبدوبات زوينين ولكن هادي راه دب.. بارك كنتغدا معاهم وكنضرب عليها بنص عين راه ولات كتخلعني ومتسمعش صوتها فديك دار معرفتهاش واش كتحشم ولا زيزونة.. غادين راجعين لكراج وأنا نجيه نيشان سي محمد راه مزوج وسيدة راك شفتيها داك نهار لله يعمرها دار راه مستحيل نزيد عليها تانية كان يحصل ليا شرف نتناسب معاك و.. لمهم صبغتو سيد متقلقش متبدلش معايا فلهضرة بقى داوي معايا كيف لول وتا لخدمة بقيت خدام معاه داك نهار كون كعا ولا بغا يديرلي صابونة غادي ينفضني ديك ساعة لمهم كل نهار كنتلاقاو فلمحل ديالي خدمة مورا خدمة سيد عاد كيزيد يعاشرني.. واحد لواليدة محشاهاش راجلها من نهار خرجات تيليفون مخسروش عليها مرة مرة تاجي شي وحدة فلبنات تشوفها وتبقى معاها شويا, لعيد لكبير وصل سيدة غادي تعيد معانا يمكن بنادم بدا كيشري لعيد وأنا راه زيرو خبرة سولت شيباني زعما إلا كان تيعرف شي واحد قاليا لا عيد هاد لعام على حسابي بقيت كل نهار مدابز معاه باش يشوفلي غي لي نشري من عندو سيد ميكروب تا كتوقف لهوندا قدام دار فواحد صباح وهو ينزل منها ساط جايب ليا تور ماشي حولي غي ڭرونو باراكا مبغاوش تا يدخلو مع لباب تنمد ليه فلوسو وهو كيحلف عليا قاليا تانا معطيتش فيه درهم راه غير صاحبي خدمتو هادي راه بحال ولدي نتا مبيناتناش..بقا لعيد شي يوماين بقيت غير أنا وشيباني حميد فلمحل معطلين فواحد طوموبيل قاليا بلي مورا لعيد غادي يسافر لبرى دمعت أنا لا علاش ها حنا خدامين مزيان هنا و ولفتك.. قاليا بلي عندو خدمة تما كتر من هنا وحتى مراتو باغا تمشي تشوف عائلتها, قاليا علاش متمشيش معانا تانتا وإلا مشيتي معايا مغاديش نتعطلو غنديرك سبة باش نرجعهم بزربا ومزيان تعاوني تما.. كيحساب ليا غير كيضحك فلول قلت ليه مكرهتش ولكن بيني وبين لونغلي غير لخير والإحسان ومكين لا وراق لا والو أنا لمغرب ومكنسافرش فيه نتا كتقولي نخوي لبلاد.. قاليا غير هضرة هاديك لوراق أنا معاك داكشي غير بضحك راك غادي لخدمة وغادي معايا ولغة راه مبيكش فاش مشيت لتما كنت قل منك إلا زكلتي هاد تسافيرا معايا غير موت والله ما غادي تعاود فحياتك راه بديت كنشم ريحت لموت وصحتي كتقلال هاد لفلوس لي كدور دبا ولخدمة غير انمشي أنا غادي تشتت فنهارها ولدي راه عطيه غير فلوس مو يبيعها وبنتي غادي تخسرهم غير ماكلا مها غادي تزوج داك نهار.. بقيت كندير ليه عقلو معرفتي شكون سابق دبا تمشي وترجع ندوزو وقيتا حسن من هاد لي دازت غير متعطلش.. كانت أخر مرة نشوفو قبل لعيد داك لعيد مكيتنساش أول عيد غادي نتكلف بيه أنا كنت كنشوف لواليد شنو كيدير وكنعاونو بالخصوص سنين لخرين حيت بدا كيكبر ناس لعيد لول كتشوف شي حاجة صغيرة على قد يدها تعلم فيها أنا زهري طاح فغول وتقول واش بغا يطيح ليا وبوحدي وأنا ندير ليه لخدمة ديال ليهود ربطتو ومع دالك بغاش يطيح وهيا تطلع لواليدة عندي ديك سيدة معرفتش شنو كانت كتريني ضرباتو بواااحد شمال أنا بقى فيا.. دوزت عليه يلاه غادي نحل لحبل باش رابطو وهو يقطعو شنو غادي تشد ومع سطح وليت خايفو غير ينقز طلعت فوقو بحال داكشي ديال روديو وهو يقصد دروج نيشان مكركبين بزوج واااحد لحالة متبغيهاش لعدوك ولكن طاح بموتو عدبتو غيدخلني لجهنم بعينيا مسدودين.. مبغيتش نبين ليهم بلي غلبني وقفت بحالا موقع والو راه أنا بغيت نزلو هنا وهوما يعطيوها لغوات هادو مالهم فيناهو لموس تنضرب على رجلي ليسرا لمعنى لحقيقي لتقبني دخل من جهة وكيطل من الأخرى محاس بوالو مع طيحة ودم سخون مغوت موالو حيدت لموس حرت واش نمشي لصبيطار ولا نكمل لحولي فصليخ بعدا؟ تيجرو فيا باش تمشي وأنا والو نصلخ عاد نمشي مكينش شي دم وداكشي لي درت صلختو خويتو عاد مشينا اه نموت عادي ولكن لحولي ميضيعش هادي هيا شوهة بنادم معيد وحنا كندورو على صبيطارات لحمد لله ماشي غير بوحدي ها لي ضارب وجهو ها لي رجلو أما ليدين بلاما دوي عليهم وبنادم دمو سايل وتيضحااك كتحس بجو ديال لعيد حاضر خيطلي عطاني شي دوا ورجعنا لدار غسلت وبدلت عاد حسيت بضربة وطيحت لي ضربتها دبا معمرو يتنسالي داك لعام تا لحمو مبغاش يدوز ليا بقا فيا زغبي.. جاو دراري لي خدامين معايا شافوني و ضحكو عليا شويا أما واحد شيباني تنعاودليه وتيضحك تا كتباليا ضرسة ديال لعقل, راه قلت ليك معرفتي شكون غيموت لول هانا على بونة كنت غنودع.. سيد مزال مفقدش الأمل فأنني نمشي معاه بدا تيقول لواليدة دوي معاه خاصو يمشي و.. سيد مشا لعند أخر انسان نقدر نتقبل منو نصيحة ولكن سيد حاط عليا ديال بصح باغي يديني معاه لتما وصافي..
لمهم سيد بقا تيرغبني باش نمشي معاه عمر لواليدة عليا ولكن مجابو معايا لا حق لا باطل صافي معندي منمشي ندير تما.. معرفتش كيفاش قنع مريم لمهم بنت ناس فاش مشا جات لعندي قالت ليا إلا كنتي باغي تمشي وخايف عليا غير سير ها خالتي معايا خدمتك هيا لولا.. قلت ليها ماشي هكداك غير خاصني وقيتا نفكر.. وبصح طالع لصطح كنشعل واحد لفاخر وكنخمم مبغيتش نخلي ديك بنت ناس بوحدها كنغير أنا ولبعد وشيطان وفنفس لوقت كتباليا تسافيرا زوينة وخدمة مكتعاودش مدويتش غير كنخمم وهيا تدوي معايا لواليدة قالت ليا شوف إلا كنتي خايف على مراتك تبقى بوحدها غير سير أنا معاها مغاديا فين خدمتك هيا لولا.. هادو غير باغين يصيفطوني 100% غادين يقلبوها دار دعارة مورايا ولا شي لعبة هادشي ماشي طبيعي زعما على ودهم مباغيش نمشي قلت ليهم ملي باغين تهناو مني صافي علاش لا نشوفلي شي زعرا تما نجيبها نحسن نسل ديال هاد لعائلة نوليو نشوفو فيها كمامر زوينين.. عيطت على سيد قلت ليه صافي دير بحسابي راه غنمشي معاكم وراه معارف والو فلوراق لي غنجمع قاليا ضرب داكشي كامل على حسابي نتا غير متبدلش رأي ديالك وصافي دبا عطيتيني لكلمة.. قطع وهو راشقا ليه بقيت بارك معاهم كنوصي فيهم من ديك ساعة لمعنى لحقيقي ل مسبق لفرح بليلة.. ولكن مزيان نرجع بشي طوموبيل من تما نبقى نتبعصص على بنادم مدخلتش لبلاد هادو زوج عام ونقدر نبقى تما ونسمح فهاد لحزاق وصداع كامل.. لغد ليه درت معاه باش نتلاقاو فلمحل وداكشي لي درنا بقينا باركين كيقوليا شمن وراق لي غنعطيه وهو غادي يتكلف سيد زربان غي أنا لي شادو مشا يقضي شي غرض عيطت أنا على واحد دري خدام معايا قلت ليه بلي غادي نسد لمحل حيت غادي نسافر قاليا ليا لا مجاتش تسد لمحل راه غادي تقطع رزق دناس لي خدامين معاك ها لي عندو عائلة ولي كاري وأنا راه عندي ولاد والمدرسة ولعيد يلاه فات غتسدو تا لكليان ديالك غيبدلك فاش ترجع.. علاش متشوفش شي واحد تقة يقابلو ويخليه محلول وفلوسك يعطيهم لدار عندك ولا يديهم لبنك.. قلت ليه هو نتا صافي قابلو نتا غير كون راجل ومتخصرش لدراري أنا لي طلعات قابل بيها.. بقيت داوي معاه مبغاش ولكن أنا ميكروب مطلقتوش حتى وافق عطيتو سوارت.. دوك الأيام دوزتها غير صداع دلوراق طلع هبط سيد تاهو عندو دارو وخدمة خاص يديرها بقات لينا شي ورقة غيصيفطها شي صاحبو من تما وتعطل لمهم صافي درنا لوقيتا لي غادي نمشيو فيها درت واحد دويرا تنشوف بنادم لي تنعرف ولعائلة لموت ولحياة هادي طليت على سيد لي كنت خدام عندو شحااال هادي مزال عندو ديك طوموبيل بقيت معاه شويا عاد مشيت لمحل عندي سلمت و دويت مع دراري وصيتهم يلاه غنرجع لدار وأنا نقول أجي نضرب طليلة على دار عمي غير زوج خطوات مجاتش منمشيش عندو بالأخص إلا قالوها ليه دراري.. دقيت وهيا تحل ليا مراتو عنقاتني كيف داير لباس وديك لهضرة قالت ليا دخل دخلت.. باش طلعت مع دروج كتباليا بنتهم سناء تما عرفتي شحاال مشفتها كندخل لمحل كنسد عليا مع هاد لخدمة وقفات لعندي معرفت واش نقول سلام ولا نمد يدي وهيا تلوح حنكها سولتهم عمي واش مكينش قالت ليا مها هاوا خارج غير هنا وغادي يجي برك رتاح انعمر لولدي وااحد لكاس داتاي.. مقديتش نقول لا وأنا باغي نشوف سيد بقيت أنا ولبنت راس فراس بدات كتسولني كيف داير وكدا شويا قلبات لهضرة لمريم كتسولني عليها كنجاوبها عادي سولتها واش تزوجات قالت ليا لا وقع ليها شي مشكل مع داك خونا لي كان خاطبها.. جبدت لهضرة ديال سفر وبقينا داوين كتقوليا لوقت دايز طاير غير لبارح قلتي ليا خرجتي من دار عمي.. تا دخل باها وقفت سلمت عليه بركت معاهم شويا عاد مشيت لدار باقي يوماين وبارك تنجمع فحوايجي من ديك ساعة مقديتش نصبر شنو غندي معايا ديت حوايج تقال وخفاف ومنيتي درت حوايج دلخدمة ضحكو عليا حتى شبعو واش غادي تدي معاك هاد لحوايج نتا يقدرو يرجعوك من لباب دلمطار.. عرفتي كاع ديك سير سير وخدمتك هيا لولا تبدلات فليوماين لخرين بالأخص معارفش امتى غادي نقدر نرجع يمكن شهر ولا زوج تلاتة ولا عام كاع نقدر منرجعش هادشي علاش شفت كاع بنادم لي تنعرف ولي داير معاه شي حاجة طلبت منو لمسامحة تيقتوني ياك واش من نيتك خوكم مغربي ماشيي خلينا من تخربيق دلأفلام لي غلطت فيه يعاودها لمو أصلا مكنضلم حد أنا.. لواليدة لي مشكلاتني سيدة ولات مناقشا مع راجلها فطلاق واصلا سيدة زايدا نغزة غير دور وتعمر فمريم عليا مالو كيتعطل فليل مالو مكياكلش فدار مالو.. لمهم وصل نهار لي غنمشيو فيه سيد واقف بطوموبيل لتحت و ولادو ومراتو معاه كيتسناو فيا مزال مدابز مع لواليدة ومريم متمشيوش معايا غادي مع ناس واصلا غنجيبوها قد قد واقيلا مكين لاش تمو غادين جاين.. ولكن لا حياة لمن تنادي صافي غنجيو غنجيو مشينا سيد ولدو حاقد عليه غير وصلو لتما ومشا والله ما نزل من طوموبيل غادي غير هو ومراتو وبنتو وأنا يلاه توادعت مع دوك بنات ناس صيفطتهم لدار وداخل مع لعائلة لكريمة غادين فدرجة رجال الأعمال بسيف عليهم بنتو راه فيها 3 لبلايص يلاه تحط لقاعدة ديالها وترتاح فوق دوك لكراسي تما.. أنا أول مرة ليا فطيارة لخلعة وداكشي فشكل تخلطو عليا لمشاعر تا جاني نعاس بديت كنحس بالغربة وطيارة مزال متحركاتش.. درت لكيت فودنيا حطيت لبيسي قدامي عندي شي أفلام باغي نشد بيهم حتى يضروني عينيا ونعس يلاه بديت كنتفرج وهيا تقولي بنتو وخا نتفرج معاك؟ أول مرة نسمع صوتها قسما بالله ما ديالها غير شافراه غول وعندو صوت معزة صوتها رقيق ورطب قلت ليها علاش لا بدينا كنتفرجو وباها مقابلنا كيشوف فيا غير بنص عين.. بنت ناس عندها لخاطر فيلم فيه ساعتين ونص متحركاتش راسها محكاتوش وليت شاك فيها ماتت أنا.. لبيسي محطوط بيناتنا فخضها تبارك الله شهاني فنعاس غير تحط عليه راسك متفيقش.. سالا لفيلم وبقينا داوين عليه فلول كنت داير ليها خاطرها ولكن طلعات فشكل فينما ضرتي معاها دور معاك قلة ما يدار وغير راحة عاطياها غي لأفلام وسيريات ولمزيكا.. بقات كتزيدني شي كلمات لرصيد لمعرفي لبنت عندها دكتوراه فالعربية وصداع لكحل دلقرايا ديبلومات ولغات وباغين يزوجوها لواحد راس مالو ڭريفا وسوارت يخطاوه هزو لما.. مدويتش مع باها كاع طريق كاملا من غير فاش كنا كناكلو.. وصلنا شدينا طاكسي دانا لدارهم تما فهمت بلي ديال مراتو دار فشكل داكشي دلعود ومخلياها وخاويا لبلاد رجعات لقات كلشي فبلاصتو سيدة كتجي تخملها وعادي فواحد لبلاد نسيت سميتها لياجور ولحديد وصداع لكحل ويدخلو عليك ونتا فدار.. وصلت عياان وخا كنت غير ناعس يمكن تبدل عليا لجو عيطت على مريم قلت ليها راه وصلت باش ميبقاوش دايرين بالهم معايا ودخلت لواحد لبيت وأنا نطيح بنعستي
اسم على مسمى الجزء الرابع
محتوى القصة
التنقل بين الأجزاء