مكينش شي قالب بحال تكون سميتك سعيد ونتا مسعيد ما تا لعبة كتحس بيهم نحسوك ملي سماوك.. فلحالة ديالي تدمع العين والله معرفتش حتى منين نبدا لمهم كيباليا من لول باش تفهمو لواليد كان داك زهواني أما لواليدة كانت كتاار منو خدامة فلأعراس كتقولو ليها شيخة واقيلا لمهم تلاقاو فعرس بقاو برتشني نبرتشك حتى خرجتلهم أنا فلبلان تقدر تقول كنت أنا سبابهم باش تزوجو وتا من بعد زواج لمرا لي كنت فكرشها مكانتش حاملاني وباغيا تحيدني كتقوليا ولد لحرام وا عيش نتا مع هاد شعب وكينعسو بضميرهم مرتااح.. لواليد كان بحال لخاتم تقوليه موت يموت تقول مجربا فيه سحور.. اوا هيا هاديك كنت غادي نتهنا من واحد لعيشة ديال لكلاب ولكن جدة من لواليدة كتفكر بزاااف قالت ليها ولديه وعطيه لختك مسكينة راجلها مكيولدش.. أاه وموافقاتش حتى خدات 5 الاف درهم باش تخليني لختها دبا أنا كنت ساوي 5 الاف درهم فواحد لوقت.. سي90 ساويا عليا لمهم تولدت داك نهار خداتني لمرا لي نقدر نقوليها لواليدة بوجهي حمر شي حوايج دارتهم على ودي ديك سيدة نعطيها هاد لأرض دهب مغاديش نوفي ليها نص ديال حقها كتعاودلي بلي طلبات ختها لي ولداتني باش ترضعني غير داك شهر لول قالت ليها تخلصيني.. كون مكانتش جدة حاضرا وأكداتلي هادشي مكنتش نتيق بلي كين بنادم هكذا.. من صغري كابر على هادشي كنشوف سيد ولمرا لي من لحمهم ودمهم كيعاملوني بحال أي دري تيشوفوه فزنقا وماشي غير هكذا مكيحملونيش حيت أنا عايش حسن من ولادهم وي مورايا ولدو 2 دراري و 2 بنات هادو خلاوهم عندهم من صغري وهاد 4 كيبقاو فيا ديال بصح وكنحس بيهم تاهوما بحالا حاسديني جيت فلت من ديك لعيشة ولوالدين.. أنا وحيد أمه مكانتش كتخليني نمشي لحانوت كتمشي هيا معمرها خصرات ليا أي سبرديلة ولا لعبة خرجات كتلقاني أنا لي مدخلها لداك درب.. حتى مرضات كانت بيخير حتى طاحت فلفراش 3 ايام متحركاتش من فراشها كنت ديك ساعة ولد 13 عام عاوداتلي من طق طق لسلام عليكم تا داكشي لي كنت ديجا عارفو عاودات فكراتني فيه ديك 3 ايام عمرها تنسا ليا بنادم كيجي يشوفها ويمشي ولكن أنا وجدة ولواليد محيدناش من حداها كدور وتوصي فيهم عليا فاش ماتت كلشي تبدل عرفتي بحال شي حيط كان واقف قدامك حابس عليك برد وشتا وكلشي فاش طاح من نهار لول أشمن نهار من ديك دقيقة بانت بلاصتو.. إلا لاحضتو راه تقريبا مدويتش على لواليد لي مربيني معاها حيت غادي ندويو عليه بزااف من هنا ولفوق حيت بقيت فيديه قبل متموت لواليدة كان عادي فتعامل معايا ولكن مورا ما ماتت تبدل ديال بصح كيبقا داوي على أبسط حاجة ديك نا هادشي بزاف عليا وأنا وأنا .. موراها بشهرين تزوج هنا عااد غنقول بسم الله للمشاكل مراتو كانت صغيرة عليه وعاطيا لعين معمري شفت فيها شي شوفة خيبة وخا هيا عينها زايغة.. هو مدايرش فيا تقة مكانش كيحملني نجي من لمدرسة ونبقى فدار معاها وهو مزال فالخدمة وهو يديرلي طريق قاليا لقراية متوكلكش طرف ديال لخبز ولي قراو شدارو بيها غادي تخدم معايا فالمحل انعطيك صنعة تاكل بيها دهب وغتبقى تدعي معايا و... مقديتش نقول ليه لا شنو زعما نبزز عليه يبقى يصرف عليا حتى نقرى مجاتش وخا كان بيخير برزقو لمهم بديت تنمشي معاه لمحل ديالو محل كبير داكشي ديال طوموبيلات كلشي من روايض لصباغة.. أنا عرفتو مخرجني من لقراية حيت مباغينيش ندخل لدار ومراتو كينا حيت وخا منعرف شنو ندير داك نهار فالخدمة متيخلينيش نمشي قبل منو خاصني نمشي معاه ندخلو قد قد يمكن كون كنت ولدو دبصح مكانش أيدير معايا هكدا ولكن هادشي لي عطا الله كيقولك ادا لم تستطع مقاومة الاغتصاب فاستمتع به وهادشي تقريبا لي درت حليت دماغي ديال بصح فالخدمة خاصني نعرف سميت كل بياسة هادي شنو كدير وهادي شنو كدير كنت بيض فشهرين وليت لوين يديا كيفاش كانو وكيفاش ولاو مع زربة وباغي نتعلم كلهم جراحي كلاو لعصا لمهم نتعلم لي كنسمعها كتوحل ليا فراسي مكتنساش معرفتش واش هادي حاجة زوينة ولا خيبة هيا نفعاتني فالخدمة وفلقراية ولكن فحياتي كتخليني نفكر ندير شي حاجة غتديني لجهنم بعيني مغمضين لحاجة لوحيدة لي كتصبرني هيا لواليدة لله يرحمها كيقولك لولاد صدقة جارية وأنا لي عندها مكينش لي كيتفكر قبرها جدة لي معولين عليها كبرات فلعمر كتكون داوي معاها كتغمض عينك تحلهم تقوليك شكون نتا؟ أه والديا دبصح و خوتي بيني وبينهم سلام فطريق 4 سنين عايش هكدا مرتاحيتش فيها مسافرتش مضحكتش معقلتش على عيد خدمة نعاس حمام زنقة 17 عام أي طوموبيل دخلات لداك لمحل كتلقا صبعي فيها فاش بغيت نشد صنعة شديتها ديال بصح وخا هكاك مكنتش كنتخلص كاع من غير فلوس لحمام وإلا بغيت نشري شي حاجة وصافي خدام مع لواليد راه كيهرف عليا لمهم كنتسنا غير ديك لكارط وغادي نبعاااد لشي مدينة ونشوف خدمة زوينة ولا نقدر ندير لمحل ديالي كلشي قريب عند الله لمهم هكدا كبرت كملت ديك 18 ومع دالك بقى معكس معايا فلكارط يمكن كان عارفني غير انديرها غنهرب عليه بقيت داير معاه لخاطر.. كتدخل شي لعيبة زوينة لحياتك كتزيد تقودها عليك وخا هيا حاجة زوينة, كانت ديك لحاجة بالنسبة ليا هيا واحد بنت عمي من هاد لواليد كنت كندوي مع بنادم عادي كيف دري ولا درية إلا هيا كنبدا نتمتم قدامها.. قليل فين كنهضرو وخا دارهم فوق داك لكراج لي خدام فيه حيت باها ولواليد منوضينها مع بعضياتهم من نهار فرقو ورتهم لمهم ديما كنشوفها يا خارجا ولا داخلا وبنادم كامل عارفني حاط عليها لعين حيت مكينش من غيرها تما وخا نكون لابس حوايج ديال لخدمة مجرتليين كتجي عندي كتدوي معايا عاادي فحال ملي كنكون لابس مزيان.. واحد لقضية يمكن تكون ديجا واقعا ليكم كتبقا داوي مع لواحد حتى كتلقاو راسكم مصاحبين بلا ديك كنبغيك ولا كتعجبني غير بقات كتقوليا لا وجمع راسك قاد وراقيك براسك لقينا راسنا كنخرجو نبدلو لجو مع بعضياتنا داكشي غادي وكيزيد بلاما نحس ولات كتخرج ديك كنبغيك وكدا.. هيا كبر مني كتقرى فلفاك متبعا إيكونومي أنا بيخير مقريتش ولكن عندي حرفة زوينة فدماغي و فينما حطيتيني غادي نخدم.. كلشي زوين تا واحد دوا فيها شي واحد أي حاجة كتبغي ديرها كتلقاها فراسي أنا لول لمهم قالت لدارهم عليا باها نوضها مع لواليد ديالي كنسمع فيه بودني كيسب فيا ولكن صبرت حيت مكدبش عيرني بشي حاجة فيا معندي ما نقول ولواليد كيقوليه منك ليه لبوليس راك كتعرفهم هدا زعما لي وصاتو لواليدة عليا.. بغا يخلعني باش ندير عقلي زعما يقطع عليا ديك زوج دريال وأنا نوريه لكارط قلت ليه راه قاديتها و غادي نشوف لراسي خدمة فجهة أخرى ولا هو كيطلب فيا باش ندير عقلي حيت تقريبا جرا على كاع دراري وليت أنا لي موقف داك لمحل بوحدي.. مخلاوش شي لعبة مقالوهاش لينا باش نساليو تا من ديك راكم مراضعين ولكن مصدقاتش لواليدة مخبات عليا والو قبل ما تموت سيدة لي مرضعاني بعييدة على تما وعندها غير دراري.. لمهم كتوصل لحد ديالك دصبر فقت واحد صباح فبلاصت حوايج لخدمة لبست حوايج مزيانين درت حوايجي فصاك شويا دلفلوس كنت مخبيهم لهاد نهار وراقيا وخرجت تا أنا غادي مقلتهاش ليهم خرجت عيطت على ديك بنت ناس قلت ليها مكين ما نخبي عليك نتي عارفا كلشي انمشي نشوف خدمة فبلاصة حسن نهار نولي قاد نتزوج غتكوني نتي أول وحدة طيحلي فبالي بغيتي تسناي مرحبا مبغيتيش مغادي نبزز عليك والو قالت ليا شوف عام زوج تلاتة أنا كنتسناك غير كون راجل كيما كنعرفك متبدلش...
فاش جمعت صاكي وخرجت كان كيحساب ليا غادي نلقا خدمة حسن وغادي ندير صريف تانا وملي نرجع نخلي هاد بنادم حال فمو ولكن لا جبتها فواحد لوقت لخدمة ميتااا ديال بصح نهار لول دوزتو غير دوران تا لقيت واحد لبيت فسطح فيه شي فراش كريتو مبيهش لمهم مغنبقاش فزنقا.. حطيت حوايجي ونزلت مديت لمولاتو لفلوس بقيت واقف حداها حتى حسباتهم عطاتني سوارت وتحركت نقلب لراسي على خدمة ضربات 11 دليل وأنا مزال تندور رجعت مبغاش يديني نعاس عرفت راسي بوحدي ديال بصح والله ما عيطلي شي واحد ولا سول فيا كون كانو مربين كلب حشاك وخرج راه غادي يقلبو عليه.. لمهم لغد ليه مع صباح عيطاتلي ديك بنت عمي سناء بقات كتقوليا نتلاقاو نتلاقاو وأنا مفيا ما يخرج مزال عيان بدوران على لمحلات دلبارح بقات كتطلب فيا مقديتش نقوليها لا لبست وخرجت مشيت لعندها باش وقفت معاها وهيا تزرب عليا عنقاتني و تحركنا قلت ليها شنو كين؟ عارف بلي كينا شي حاجة بركنا فواحد لقهوة وهيا تبدا غادي نتزوج وديك لهضرة ديال ديما واحد باها تقول معلق ليها للبيع فجبهتها شمنك يا أطباء ويا بوليس بالأخص لبوليس لمغرب شحال فين دلبنات كتباليهم غير ديك بنت ناس لي حاط عليها لعين نتا.. قلت ليها نفس لهضرة لي ديما كنقولها مبروك وبالذرية صالحة ان شاء الله حيت راه معندي مانقول.. ولكن بنت ناس معرفتش واش نقول عليها لصقة ولا رجولة حيت معرفتش بزااف فحياتي فصراحة معرفتش من غيرها.. قالتلي سعيد شهراين لقا فيها خدمة ولا متلقاش لمهم هاد شهرين فكر فيهم مزيان واش باغيني ولا لا بلاما دير سبة بالفلوس ولا لخدمة.. مشات وبقيت أنا بارك تما مبقيتش عارف شنو كندير ندمت حتى خرجت من دار دبا كان عليا نقلب على خدمة بعدا عاد نخرج.. كنفكر كون كانت لوالدة مزال عايشا كيفاش كانت اتكون حياتي ولكن هادشي معندو باش يفيدني تندور عينيا كيباليا واحد لكراج حدا ديك لقهوة قلت أجي ندرب دورة عندهم مشيت لداك لمحل تيباليا كبيير بقيت دااخل تنسول بنادم على مولشي كينعتولي واحد لبيرو فسدة مشيت لداك لبيرو أنا طالع وخونا نازل قاليا علامن كتسول قلت ليه علك واقيلا قلت ليه بلي محتاج خدمة وبلي مغاديش يلقا معايا مشكل معايا خونا وهو يحط يدو على كتفي باش نتمشا معاه غادين قاليا عمري شفتك فهاد لبلاصة.. جبدني جبدني عاودتليه لبلان ديالي باش يعرف بلي بصح محتاج نخدم وقفنا حدا واحد لميرسيديس قاليا شوف هادي زعما يجربني واش معلم ولا لا 5 دقايق جبدتليه لبياسة لي غتبدل قاليا مبرك هانتا لقيتي خدمة كمل لبريكول ديالك كين مول لبياس مورانا.. داك نهار مضاعش وليت مضبر فيه على 300 درهم مكيعطيهاش ليا لواليد فسيمانة لغد ليه أنا لول داخل بدلت حوايجي فطرت تما وبديت لخدمة مكين لا ضحك لا والو كنحني راسي وكنخدم لي دوا معايا طنجاوبو بضحيكة والله تا وليت ضارهم فخاطرهم دوك ولاد ناس لي خدامين معايا مفهمو والو بنادم كبر مني مزال يلاه كيتعلم سيمانة لولا لقيت راسي جامع مصيريف مبيهش شهرية ديال بنادم ضبرتها فسيمانة داك لمحل كبير وهو لي كين تما ومشهور فيه معلميا وكيتعاملو ديما عامر مكتحكش راسك جبدت تيليفون عيطت على ديك بنت ناس قلت ليها متزربش وبلي لقيت خدمة مزيانة إلا بقات مزيانة هاد شهر نقدر ندير معاها لي بغات وهيا تبدا تبكي تنقوليها مالك كتقولي فرحانة عجيب أمرهم والله.. لمهم وليت غا ضاحك وخا نكون واحل فالخدمة تال ودنيا غتلقاني ضاحك وراشقا ليا حيت خرجت ولقيت داكشي لي بغيت ومرجعتش لدار ولا مديت يديا لشي واحد كنتلاقا بيها كنخرجو نسركلو نتغداو بزوج كنسولها على لواليد حيت ساكنين فوق لمحل ديالو قالت ليا لمحل مبقاش عامر فحال ملي كنتي فيه وكيسولني علك ديما غيكون عرف بقيمتك دبا.. بنات ناس كيموتو على لهروب كنقولها ندوي مع باك تاني كتقوليا لا لا خرجو عليهم تركين لمهم تانا معنديش لوجه لي يعاود يشوف باها ولواليد حيت إلا مشيت تما انشوفو ومحاملش نشوفو دبا عاد عرفت شحال كان تيربح على ضهري.. لمهم كمل داك شهر لقيت راسي مدخل فلوش عمري ما حسبتهم مجموعين يعني غير إلا بغيت نفرط فديك بنت ناس وصافي وأصلا هيا من لحوايج لي مخليني خارج من لول كاع عيطت ليها بحال ديما ولكن ديك لمرة لهضرة فالمعقول لي بغيتيها نديرها معاك قالت ليا صافي نتا جمع وراقيك وأنا انجمع وراقيا نديرو لعقد وغادي نجي عندك حيت إلا ماشي هكذا راه بابا معمرو غادي يبغيك.. قنعاتني وأصلا معندي ما نخصر باها كنت تنسمعو كيسبني منقدرش نجي عليه يستاهل أي حاجة توقع ليه.. وداكشي لي درنا أنا ديجا عندي شي وراق وتصاور داكشي لي بقى خاصني وجدتو فديك سيمانة كنفكر لديك بنت ناس إلا عرفها باها غدير هكدا يقدر يقتلها ميكروب أنا لي عارفو راه تيعارني فوجهي باقي خاصني أنا واحد شهادة طبية قالت ليا هيا صافي جمعت كلشي بنت ناس حسيت بيها ديجا جامعاهم من شحال هادي حيت لقيتها عارفا كلشي وهيا لي قالتلي شنو غنجيب بالحرف لمهم قلت ليها تصبر تا نشوف شي بلاصة كبر نبقاو فيها وخا بقات عليا بديك لهضرة ديال نبقى معاك فأي بلاصة وأنا غادي نخدم..و.. ولكن داكشي تيخرج ساهل من لفم غادي تشوف لبيت لي ساكن فيه غادي تندم على هضرتها لمهم سولت سيدة لي كاريا ليا قالت ليا مرحبا عندها واحد دار قريبة تما صغييرة بيت صالون صغير كوزينة حمام موحال واش فيها ديك 60 ميترو ولكن مبيهاش لزوج دناس يلاه بادين وعلى قد جيبي تا يبان ما حسن هاد دار ديال ختنى نيت لي كاري من عندها غير زدتها شويا ديال لفلوس وصافي لمهم خاص فراش خاص فلوس دلوراق خاص وخاص منقدرش منمشيش للخدمة أي نهار زايد فيا ومنقدرش نضيع ديك لخدمة حيت معمري انلقا فحالها لمهم بقيت كنفكر مزياان فداكشي لي غندير ماشي حيت هيا فيها شي عيب ولا انلقا معاها شي مشكل بالعكس أنا عارفها من شحاال ومكنتخايلش راسي مع شي وحدا أخرى ولكن كنفكر لنهار لي اتوقع ليا شي لعبة ليدي ولا لرجلي منبقاش قاد نخدم هكدا وأنا خدام لا وراق لا والو لوقت وزمان هدا كلشي ممكن كنت خدام وهو يوقف عليا داك مولشي اه سميتو طارق كبر مني بشي 25 عام كتر من عمري كاما داوين وهو يسولني شنو درت حيت كنت قلت ليه بلي كنجمع شي وراق غادي باش نتزوج لقيت راسي كنعاود ليه شنو كيدور فدماغي هيا لخدمة زوينة ولكشي ولكن وهو يسكتني قاليا مكين ما ولاكن خدام خدمة زوينة مكينش بحالك فيها متبقاش تقول وإلا وقعاتلي شي حاجة خيبة معرفتي شنو مكتاب تقدر شي حاجة زوينة توقع غدا شي كونطرا لشي بلاد ولا شي شركة ولا خدمة زوينة غا هنا كلشي ممكن شوف إلا كانت لبنت تستاهل ضرب لحديد محدو سخون راه غتندم.. كنت مزال متردد ولكن مورا ما دوا معايا خونا صافي عرفت شنو باغي درت معاها نهار لي غنمشو واحد صاحبتها خوها عدول ولا منعرف وحدة اتجيب عشيرها وعشير خوها يشهدو لمهم بنت ناس عندها دوك صحابات ديال وقت شدة صافي كل نهار تنشري شي لعبة كنديرها فديك دار لمهم منبداوش من زيرو ديتها تشوف دار بدات كتشد فيها لخلعة راه ماشي ساهل تخرج من داركم أنا كنت عايش مع ليهود وجاتني صعيبة عاد زيد هيا لي بنت و والديها فشكل معاها لمهم كنت كنقول بلي صافي غادي نتزوجو وشنو غادي يوقع كاع باها يتعصب شهر ولا زوج وصافي كلشي غادي يتقاد ونكملو حياتنا عادي حيت أنا هكدا كنحلم مبغيتش شي حااجة كبيرة مبغيتش فيلات ولا طوموبيلات بغيت غير دار على قد لحال نعيش فيها مرتاح مع ديك بنت ناس وندير مع ولادي داكشي لي مداروهش معايا والديا ولكن شكون لي لقاها كيما بغاها..
معقلتش كيدازو دوك ليوماين لي بقاو على نهار لي درت معاها انتزوجو فيه شي حاجة جديدة غادي نبقى مع هديك لي كنت باغي من صغري وخا كنبقى نقوليها معنديش ومغاديش تصبري وكدا ولكن كندير كتر من جهدي حلقت على دار لكوزينة وخا خصرت صرف لي كان عندي على ديك دار ولكن هانية كنقول تستاهل صافي لغد ليه انمشيو لعند لعدول مدويناش كتوجد فحوايجها وداك بنادم لي غيمشي معانا حتى أنا مشيت عند مول لمحل لي خدام معاه قلت ليه راه مغاديش نجي ديك يوماين ولا 3 قاليا خود راحتها تا شهر كاع حتاجيتي فلوس مرحباا جبد بزطامو أنا تنحلف وهو تيحلف قلت ليه لا سمحلي نخدم معاك وخلصني مزيان ومتعطينيش مزال عمري ممديت يدي ومعمري غادي نمدها وهو يدير ليا 2500 درهم فجيبي قاليا والله تا تخليها عندك إلا حتاجيتي شي لعبة مزال غنخدمو مع بعضياتنا.. مقديتش نبقى نتجابد معاه ومحتاج ديك لفلوس.. لمهم دار ولات بحال أي دار وصرعتها كينا لمسة ديال ديكور غير ضايعا مع لكاعيط حرش ديك ليلة مشيت لعند لحلاق لحمام راك فاهم مغنبقاش زوفري وكدا خرجت من لحمام نيشان لدار نعست غدا اليوم لموعود كيفيقني تيليفون مع 3 دليل وبعيد عليا بزز باش غادي ليه كنقول غتكون سناء وقعات ليها شي حاجة تيباليا غير سيد لي خدام معاه جاوبتو كيقوليا نمشي لعندو فديك لوقت كيحسابلي غير كيضحك فلول وهو يقصح معايا لهضرة قاليا أجي ولا منعاودش نشوف وجهك هنا قلت ليه انا جاي عرفتي ديك ساعة واحد تبوريشة ديال لحكرة مكتحسش بيها كل نهار جاني فوااااحد لوقت محتاااج ديك لخدمة ديال بضح منقدرش نعاود معاه لكلمة لبست غادي وكنسب ليه بات بات بات باه ولبرد ديال بصح وصلت لكراج كيباليا مسدود ولكن ضو شاعل دقيت وهو يحل ليا لباب صغير قاليا دخل و ساط باينا شارب خلعني ياكما عرفني يلاح محسن وباغي يتقرب مني هو أنا زيانيت ولكن ماشي لهاد درجة تاني دخلت كنتسناه يدير شي لعبة غادي نقتلو فبلاصتو أصلا شاعل غير بوحدي وهو يقوليا تبعني مشيت معاه لحدا طوموبيلتو بحالا ضارب شي حمار حشاكم فطريق كلها دم وجاجة لقدامية مهرسا قلت ليه شنو هادشي قاليا متدويش بغيتك تصوبها ترجعها كي كانت قلت ليه غدا نجي على ودها وخا راك عارف شنو عندي؟ لا غادي تصاوبها ليوم عيطت على مول لبياس ها سوارت لمحل ديالو بغيتك تقادها ليلة.. واش منيتك متزيدش فيه 4 دناس وموحال يعدلوها كيف كانت ليلة وخاصني نعس غدا فايق بكري.. خونا بقى سااكت خلاني وطلع لبيرو ديالو نزل فيديه فلوس قاليا 8 هوما لي عندي دبا غنعاونك ولكن بغيتها ليلة ترجع كيف كانت كلشي موجود تا صباغة راه شايطا عليا من نهار صبغتها.. أنا لفلوس كتدوبني درتهم فحوايجي و لبست حوايج لخدمة خليتو كيغسل فيها ومشيت جبت لبياس لي غادي يتبدل حطيتو تيباليا خونا غادي يطيح غيبقى غير يعطل فيا قلت ليه سير دوش ورتاح عاد نزل عندي وهو يمشي أقود ليلة غادي ندوزها فحياتي وخا عيت ديال بصح مبركتش طلقت مزيكا قاديت لكابو تحلف عليه ما تقاص صبغتو عاد ركبت لبولات و زاجة تنركب فيهم وراد لبال ديااال بصح مع صباغة لمهم جبتها مع ديك 7 دصباح كنت ساليت صافي تا صباغا بدات كتشد كنقلب طوموبيل ونعاود مبقاتش باينا فيها شي حاجة بقيت كنصيق ونعاود فديك الأرض مخليتش شي لعبة مدرتهاش ليها جافيل لما قاطع كنت انشعل فيها غا درت عقلي فأخر لحضة تأكدت من دوك لفلوس ليكونو مزورين معرفتش واش نفرح ولا نتخلع نفرح بداك رزق ولا نخاف حيت دبا وليت شريك معاه فداكشي لي دار حيت باينا ضرب شي واحد ومن حالة طوموبيل راه مستحيييل يبقى عايش.. لمهم بدلت حوايجي عينيا حمرييين بديليو و صباغة ونعاس ولعيا نقدر نعس 24 ساعة متابعة مورا ديك ليلة تندق عليه فلباب حتى حل شافني وهو يقوليا ديك ناااري مكنتش كنحلم دبا ياك؟ قلت ليه أاايه أنا لي كنحلم واقيلا طوموبيل ديالك بحالا موقع ليها والو و نقيت لقضية صافي نمشي؟ لا بلاتي شوف هادشي ميعرف عليه تا واحد من ليوم مغتبقا تعطيني والو من خدمتي لي طلعتيها غادي تاخدها و مزال غنزيدك فلوس غير كما قلت ليك أخر مرة ندويو فهادشي أنا متعاودش تفكرني فيها.. قلت ليه صافي معندك مناش تخافي شديتها جريا وحدا لدار بدلت خبيت دوك لفلوس وسط سرير هزيت ديك 5 الاف درهم نعرض على داك بنادم لي غتجيب لشي بلاصة زوينة هاد بنت ناس جايا برزقها والله وخا منعستش ومعمري عيت فحال هكداك ولكن محاس بوالو ليوم غادي نتزوجو زعما غمضت عينيا ديك ساعة بزز باش نضت دايرين نتلاقاو تما مع ل10 لبست مزيان راك عارف واحد 10 دقايق قدام لمرايا تأكدت من وراقيا وخرجت مع 9 ونص لقيتيني تما بارك فالعتبة كنفكر نسافرو تفو لفلوس كتمشكل لواحد كتكون مزلوط كتكون هاني هههه إلا شدينا فلوس دبصح منعرف شنو غادي نديرو لمهم ضربات ل11 يعني تعطلات بساعة ضرني راسي كنت كنقول بلي غنلقاها كتسنى فيا ملي غنجي ماشي هيا لي تعطل تفكرت بلي يمكن اتجيب حوايجها وتجمع دوك لي غيشهدو وصحاباتها ضربات 12 ونص ومكيناش ريحتها تما تيليفون طافي ومع دالك مفقدتش الأمل بقيت تما حتاال 1 ونص بنادم كيدخل ويخرج يدخل ويخرج ويلقاني تما صافي ميمكنش تجي ديك ساعة كنكون صافي غادي وكنقول بلاتي واحد 5 دقايق تقدر تجي دبا فاتت جوج غادي لدار نحط لفلوس ولوراق وغنمشي لدارهم 100% باها عرف غنكون شريتها ليها ديال بصح باها وااحد لميكروب معندوش رحمة فلقاموس ديالو غنمشي غادي نوريه سعيد لقبيح(اسم مكتجيج معاه لقباحا والله😔) وصلت لدار كنلقا واحد لبنت عند لباب فعمر سناء مداتلي يدها سلمت عليها قالت ليا سناء مقداتش تجي صيفطاتني نلوح ليك هاد لورقة من تحت لباب ولكن مقديتش نصبر وقريتها.. قلت ليها واش مجاتش لخاطرها ولا حبسها شي واحد؟؟ قالتلي لا غير بوحدها تنادم معاها لحال هاك هاد لورقة ونتا غادي تفهم.. وا شوووف تنادم معاها لحال تال دقيقة 90 دبا هدا بنادم إييييه حب اييه الي انت جاي تقول عليه.. مداتلي لورقة قلت ليها صافي ملي سالينا راه سالينا علاش غنقرى شي ورقة رجعيها ليها معاك و قولي ليها بالحرف تمسح بيها..
داك نهار عرفت بلي دبصح لي سماني سعيد مكيعرفنيش.. دخلت لدار وسديت لباب على ختنى رجعت لفلوس مع خوتهم خرجت كليت من قبل 9 وأنا واقف جوع قتلني كنقول مزياان فيها خير لواحد هو لي ميزربش فزواج معرفتش واش بصح ولا غي كنبرد على راسي لمهم بارك سااهي كنفكر فشنو خاص يتبدل حيت هاد سعيد مبقاش خدام مع هاد بنادم معرفتش شنو داير ليهم كلشي خاصو غير كيفاش يغبر لمي شقف من حياتو من نهار تزاديت ولكن هاانية تانا مخاصني بصداع.. لغد ليه فقت مراشقاليش على لخدمة بقيت غير بارك قدام تلفازا مرة مرة كنحسب دوك لفلوس ورقة بورقة قلة ما يدار وصافي مكين لاش نرجع لبيت لي كنت فيه نعطيو لراسنا قيمة مالنا منستاهلوش هاد زوج ميترو لمهم نهار 3 مشيت للخدمة لحاجة لوحيدة لي كنلقا فيها راحتي درت لكيت فودنيا وخداام بنادم مطلعها عليا أا جرات عليه لمرا أا.. سمعت كاع طلعات لي كينين فلعالم داك صباح تا سكتو على خاطرهم مبقاو لاقين ما يقولو وتانا مقديتش نقولهم راه بقيت كنتسنا نهار كامل قدام لعدول ومجاتش ديك ساعة عاد غادين يطلعوها عليا دبصح.. لمهم بقيت خدام عشيا وهو يوقف عليا مول لمحل سلام سلام سولني كيف داير قلت ليه بيخير قاليا ديك كيدايرا لمدام بدون شعور بديت تنضحك قاليا مالك عاودتليه شنو وقع وبلي مكين والو قاليا صافي خيرها فغيرها فاش تبغي تمشي دوز لعندي.. فلوس خدمتي تناخدها كاملا مبقيت كنعطيه والو فلوس كان كياخد ديك تلت ولا كتر مورا ديك ليلة كلشي تبدل لمهم ساليت عشيا مشيت لعندو ملقيتوش فلبيرو ديالو طلعت لدارو وهو يحل ليا دخلنا بقينا باركين شويا تيقوليا متكعاش ونتا مزال صغير و.. أنا عارفو غير كيمهد للموضوع الأصلي وهو ينوض لبيت جاب ليا فلوس تاني قاليا هادو 5 أنا سيد ولا كيخلعني قلت ليه لا خيرك سابق والله ما نشدهم قالي شد راه رزقك هدا.. بقى تيوصي فيا تاني عنداك تقولها لشي واحد وهادي أخر مرة ندويو فلموضوع.. خرجت من عندو ديك طوموبيل ديالو هيا أغلى بريكول أنضربو فحياتي طلع ليا ب13 مليون وزيادة ديال لخدمة كل نهار تنضرب فلوسي فجيبي وتنخرج بكريي بديت كندوز فلبيرمي مجاتش ميكونش عندي لمهم فديك لوقيتة مبقيت تندوي مع حتى واحد لا سناء لا لواليد لا تاواحد غير نعاس لخدمة وراحة مرتااح فدماغي تنجمع باش ندير شي محل ديالي تانا لمهم ديك 6 شهر على هاد لحال خديت لبيرمي ديالي بديت كنقلب على شي محل نكريه داك نهار وهيا تصوني عليا واحد نمرة مكنعرفهاش جاوبت كيقوليا انا عمك!! شكون شكون؟ نسيت بلي عندي عائلة أنا أصلا شنو لي فكرهم فيا؟ قاليا لواليد ديالك مريض وباغي يشوفك.. معرفتش شكون فيهم سولتو قاليا واش مزال معرفتينيش أنا بات سناء أجي تشوف باك لموت والحياة هادي.. عرفتي على صدمة باها كيدوي معايا على بونة كنت انسولو عليها ولا غنبدا نسب ليهم لعروق بزوج جاب الله قطع.. بقيت خداام تنفكر واش نمشي ولا لا من شحااال ما دخلت لداك درب كملت لخدمة لي كانت فيدي مشديتش شي حاجة أخرى حيدت حوايج لخدمة طلعت عند مولشي قلت ليه إلا جات على خاطرك طوموبيل ديالك واحد نهار لواليد مريض وبغيت نمشي نشوفو و.. مخلانيش نكمل هضرتي مد ليا سوارت قاليا غير تهلا فيها وصافي.. مشيت لدار لبست أحسن حاجة عندي عاد مشيت لتما تندق وهيا تحل ليا مراتو دارت فيها بحالا توحشاتني ولا منعرف وكتعنق دخلت تيبانو ليا شي وجوه ديال لعائلة وشكون خارج من بيتو سناء مشفتهاش ومدويناش من نهار خلاتني منشور درت فيها حقاد ومعلاباليش سلام مقلتهاش دخلت لبيت ديالو تيباليا تبدل فوجهو ديال بصح وضعاف بستليه يدو وخا مخلاش ليا شي حاجة زوينة نتفكرو بيها ولكن كيبقى حسن من والديا ديال بصح قلت ليه مالك شنو ضارك؟ قاليا كلشي هادي لخرى ليا.. قال ليهم خرجو خليوني غير أنا و ولدي ديك ولدي ديالو مسمعتها مني كانت لواليدة عايشا بقى تيقوليا غلطت فيك بزااف وإلا مسمحتيليش مغاديش نرتاح.. بقيت تنقوليه بلي مكين والو وبالعكس هو لي كبرني وعلمني حرفة وكدا لمهم يرتاح حيت داك سيد لي تيدوي معايا ديك ساعة معمري شفتو عرفت بلي كينا شي حاجة سيد فساعتو واقيلا بقيت تنعاود ليه بلي خدام مزيان وقريب غادي نحل لمحل ديالي معندو مناش يخاف عليا وهو يقوليا راه ديجا عندي محال سولتو كيفاش؟ قاليا بلي لواليدة خلاتو يكتبلي دار ولمحل فاش كانت عايشا عرفتي ديك ساعة بحالا صرفتيني صدمني دبصح بقى غير كيحلف ليا وأنا كنقوليه غير كتضحك وهو ينعتلي لوراق جبدتهم كون مشفتهمش بعينيا معمري نتيقو رجعتهم لبلاصتهم قاليا لا خليهم عندك باش نرتاح.. بقيت بارك حداه وتنفكر دبا هاد لوقت كامل كنت خدام وكنتكرفص فلمحل ودار ديالي وهادي هيا القمة ديال لعبثية فهاد لحياة.. بقيت بارك حداه دخلات مراتو وخوه بات سناء قاليهم شنو كين مراتو كانت غتجيها سكتة قلبية وخا مشبعها فلوس وذهب زعما سيدة كانت ضاربا حساب هاد نهار من ساعة لولا فاش تزوجاتو لمهم خارج نجيب ليه واحد دوى باش طلعت طوموبيل كنضرب على سناء خارجا وقاصداني واااحد شعور فشكل معرفتش كيفاش نوصفو خليتها تا قربات لعندي وتحركت زعما مشفتهاش جبتليه داك دوى باش وصلت سديت طوموبيل تنسمع لبكا عرفت مول الأمانة داها كان كيتسناني غير ندوي معاه مقديتش نطلع معنديش مع داك لجو ديال لبكى لوحيدة لي بكيت عليها فحياتي هيا لوالدة من غيرها مكيناش كي حاجة غتخليني ندمع دعيت معاه برحمة وكلشي ومازال ندعي معاه عيطت على سيد لي خدام معاه علمتو بلي منقدرش نجي إلا بغى طوموبيل ديالو خاصو يجي ليها قاليا أصلا انا جاي لعندك بلا طوموبيل غير خليها عندك وبصح ديك ليلة جا لعندي باركين فوق واحد لكراسي قدام دار لي كيدوز كيوقف عليا أنا ولد خال باك واش عرفتيني؟ كيمشي هدا كتجي وحدا موراه أنا بنت عم باك من عمو لي شقيق باه عرفتيني؟ هاد ناس دلعائلة لي منيتهم كيتسناوك تعرف سمياتهم ونتا أول مرة تشوفهم خاصنا نحاربوهم إنفوابورتوت ويتحرقو ويتلاحو فشي كوكب أخر باش ميتكاتروش هنا..
لمهم بقيت بارك أنا وخونا قدام لباب وبنادم كتر عليا سلام ولهضرة غيرتها معاه لطوموبيل ديالو جبدتليه لوراق يشوفهم شرحت ليه لبلان خونا حسيت بيه مبغانيش نمشي لمحل أخر زعما خايفني نحيد من تحت عينيه وندوي مالني حمار راه وليت بحالي بحالو فداكشي لي دار.. لمهم قاليا هادشي مزيان ولبلاصة مزيانة وبقينا داوين نسينا واش لواليد هداك لي مات لمهم خونا بغى يمشي حلف ما ياخد طوموبيل ديالو قاليا نتا غادي تحتاجها مشا مع واحد فدراري لي خدامين معانا جا يعزيني.. بقيت بارك فوق واحد لكرسي برى وهو يجي واحد من خوتي من والديا دبصح يمكن دبا خاص نبقى نقول غير والديا حيت غي هوما لي بقاو علاش لموت كتدي غير ناس زوينين لي بغيناهم يبقاو.. لمهم بارك مع خويا من لحمي ودمي ومكين تا شي إحساس والله لا هو لا خوتو وحتى والديا زعما معمري دويت معاهم وصراحة معمري نفكر ندوي معاهم مكيستاهلوش.. بقى بارك حدايا مدويناش من غير ديك لبركة فراسك ممشى معاك باس هدا غيكون صغر مني بشي عام ونص هو لكبير فخوتو واااحد لوقيتة وهو يبغي يشري معايا لهضرة قاليا شفتك مسولتيني على دار كيدايرين لا والو قلت ليه راه لواليد ديالي مات دبا واقيلا.. أه عارف ولكن نتا عمرك سولتي فينا أه عندك مشاكل مع لواليد ولواليد شحال هادي غير سول فينا حنا بعدا خوتك شنو درنا ليك.. بقيت غير ساكت لولد موحال واش عارف تا والديه شنو دايرين موحال واش قالو ليه بعدا قلت ليه وخا سمع بعدا لواليد ديالك تعرف على مك فشي عرس ولا قصارة معرفتش.. باعوني ب 5 الاف درهم. باقي تندوي معاه وهيا توقف علينا سناء بقيت داوي معاه تنقوليه راه نتا خويا بغيتي تشوفني مرحبا نمرتي نعطيها ليك دورها لخوتك عادي قلت ليه هكداك غير باش ميتعقدش وصافي وقدام ديك بنت ناس مبقيتش عارف شنو كنقول عطيتو نمرتي تاهوا وهو يتحرك خلاني راس فراس معاها بارك تنشوف بين رجليا وهيا كتشوف فيا شي ربع ساعة والله ما تحركنا هيا معارفاش باش تبدا وأنا معندي منقول وهيا تقول ليا داك نهار مشيتي لعند لعدول؟ بقيت كنشووف فيها باش نعرف واش كتضحك ولا داويا من نيتها مضحكاتش قلت ليها أه مشيت من 9 حتى قربات 3 علاش؟ كيفاش علاش واش مبغيتيش تدوي معايا وتعرف علاش مجيتش؟ عرفتي فاش كتكون كتوجد لشي واحد لهضرة لي غتقول ليه كتفكر فديك العضرة كل نهار كل نهار وفاش تيكون قدامك مكتعقلش على كلمة من داكشي هكا وقعلي ولكن وخا هكداك صدمتني واحد لحضة تطلق ليا لسان بديتها بديك شنو غادي تقولي تاني تخطبتي؟ تزوجتي؟ ولا غير تنادم معاك لحال ولا مقديتيش تديريها على ود داركم حيت هادشي كامل قلتو ليك فلول وزواج كان لفكرة ديالك وخا كنت يلاه خارج من دار ومعنديش فلوس درت لي فجهدي دار زوينة خدمة دبصح كنت باغي نبدل بزااف دلحوايج على ودك ولكن نتي طلعتي برهوشة وكبر مني يا حصرى زعما نتي لي خاص تديريلي عقلي أه وكنتي غير ديري ليا قيمة بعدا خسري ليا أبيل ولا مساج نحس براسي بنادم مصيفطالي برى مع صاحبتك سميتي عبد الحليم أنا.. واش كيحساب ليكم قلت هادشي هكدا نننن ماشي مع لمغاربة أبا كل كلمة ولا زوج كتقطعني بديك وعااا خليني نشرحلك قلت ليها صافي دبا لي وقع وقع مكيناش شي لعبة غادي تخليها تعاود ترجع لبلاصتها فعيني بقات كتدوييي ودنيا سخنو ديك ليلة مبقاتش دبا خايفا من باها يشوفها معايا واحد ساعة وأنا نقوليها راه طوموبيل ديالي غا ديال سيد لي خدام معاه غير رتاحي تا يرجع ومنك ليك.. ديك لهضرا تاني ديال لا وأنا ماشي بنت دهادشي ونتا عارفني ساليتها معاها بلي كنعرفها أنا مكانتش غادي تخليني منشور نهار قدام لبيرو دلعدول, ودخلت لدار قالو ليا بلي صافي غسلوه قلت ليهم تصبحو على خير غنمشي لداري تال غدا بقاو عليا لا بات هنا راه غدا غندفنوه بكري قلت ليهم منقدرش وبصح راه فلوس فدار كيبقى ضارني راسي من جهتهم خاصني نديهم لشي بنك.. نازل مع دروج ومرات لمرحوم تابعاني نزلت وقفت عرفتها باغيا تدوي معايا سلمت عليها تاني قالت ليا بات هنا علاش اتعدب راسك قلت ليها مكين لا عداب لا والو راه قريب لهنا عرفتها كانت باغيا تقول شي حاجة ومزعماتش حيت راه ديجا قالو ليا ديك بات هنا فاش كنت معاهم لفوق قلت ليها راه غادي تبقاي فدار إلا بغيتي أنا عاجباني دار لي ساكن فيها دبا ونتي إلا مكنتيش باغيا تمشي عند والديك بقاي فدار شحال ما بغيتي قالت ليا صافي لله يحفظك وطلعات هادشي لي كانت باغيا تدوي معايا فيه يمكن.. رجعت لدار طحت معقلتش على راسي ناااري على نهار كيفاش داير معمرو يتنسالي مبغاش يسالي لغد ليه ضرباتني لفيقة حتال 7 ونص وأنا عارفهم غيمشو بكري لقيتهم كاملين معيطيلي تا من سناء لقاتها سبة ومعرفتش مالها أصلا بدلات نمرة وبعداات عليا تا رشقاتلها عليا فاش شافتني وي بصح زيانيت😇 ولكن ماشي لديك درجة تاني وموحال واش على ود فلوس حيت أنا عارف بلي تقدر تزوج بما حسن مني ومعرفتش تاني الله اعلم.. لبست حوايجي هزيت فلوس وخرجت بزربا لعندهم لقيتهم كيتسنااو فيا قالك خاصني انا نهزو معاهم فاش نوصلو لمقبرة ركبات معايا مراتو وخوه بات سناء وحتى هيا عرفتي واحد جلابا فلغوز فاتح لون بارد وزيف فالبيض وبنت ناس وجها ملائكي ميكن لا ماكياج لا صباغة شنو زعما إلا كانت زوينة وجلابة قتلاتها غادي نسمح ليها بزوج كلمات واابلاما تدوي كاع أنا مسامح ليها أصلا أنا لي لعيب مني مشيت قبل من لوقت.. ولكن دبصح بلان ديال ليهود هاز لواليد زعما فوق كتفي مع رجال وعيني كتقلب على ختنى مبانتش ليا واقفين بعيد يمكن.. زعما مقطع لجهنم(VIP) حدا زعماء قريش و توت عنخ أمون سالينا بقى بنادم تيعنق فيا تاني وا بغيت غير شي دمعة تخرج والله ما بغات واش لعيب مني أنا مريض ولا هوما قصحو لقلب بكاع هادشي لي دوزوه عليا فصغر معرفتش لمهم ماشي لخاطري رجعنا لدار صافي غادي تجي لعندي ديك بنت ناس تاني والله ما غادي نعطلها نقدر نلبس لخواتم ديك ساعة مكينش مشكل لي فات مات معرفتش واش هيا زوينة ولا أنا مزال كنحس من جيهتها بشي حاجة هيا لي مأترا عليا.. واقف معاهم تيوقفو فواحد لقاعة قدام دار تما سولتهم بشحال كراوها قاليا 30 الف جبدت فلوس لي جايب معايا مديت لسيد مولاها فلوسو مشا عاونتهم وقفوها قادو لكراسي شديت واحد لكرسي وبركت نسمع لعضامي شويا نفكر واش نبقى خدام فين كنت ولا فلمحل ديال لواليد مكينش شي فرق كبير بيناتهم وبالعكس فلمحل لي خدام فيه دبا مكنفكر لا فضو لا ما لا والو كنخدم خدمتي وكناخد فلوسي وكنمشي نعس فدار وبالي مرتاح ماشي بحال خدام فشي حاجة ديالي.. تنخماام وهيا تجي تبرك حدايا بعدا بدلات لموضوع كتسولني على لخدمة و واش شفت لواليدة قالتلي بلي كينا تما لواليدة لي ولداتني وكتسول عليا قلت ليها مزيان ملي قلتيها ليا رجعت لقنة لدااخل فديك لقاعة وبركت وخا من شحال مشفتها مبغيتش نشوفها بركات حدايا تاني كتقوليا خرج شوفها لي فات مات راك كتشوف لموت غير قريبة.. خيتي بحالا بغات تعاود تبني لعلاقة من لول وجديد تاني مع لعلم أنا راه طاايح فيها لودنيا غتقوليا نتلاقاو غدا عند لعدول انقوليها علاش غدا ليوووم خير البر عاجله.. وفهاد لحضة يطل القمر لمرا لي ولداتني كتوقف علينا من حيث لا أدري أخر انسان باغي نشوفو فهاد دنيا..
قصة اسم على مسمى
محتوى القصة
التنقل بين الأجزاء