الساقطة و الملتزم الجزء السادس

رواية الساقطة و الملتزم

بسمة: شي شارف هذا 😆
اسيل: تي را أنا لشارفة احح يا ربي اش غادي نكوليك تيتيز ولد الحرام ...
بسمة: ههههه طحتي اشعيبية صافي طحتي 😂
أسيل: ههههه بنتي ليا مريضة شوية فراسك نوضي تنعسي انا كنكوليك زوين اييه و لكن را اسيل صعيب طيح و خصوصا كنكره الجنس الخشن
بسمة:هههه صاافي رولاكس ماگلتليك والو اختي
أسيل:اوا سيري تنعسي
بسمة:ونتي ماغاتمشيش راه قاريين غدا
أسيل:عارفة غير يجيني النعاس نتبعك
بسمة:نتي تعرفي اختي
أسيل:(بقات كاتفرج سالا الفيلم ديالها وناضتت جمعات الطبلة وجمعات الكوزينة ومشات لبيتها طفات الضو تكات وبقات كاتقلب فبلاصتها حلف النعاس لاجاها ناضتت شعلات الضو ومشات لداك الكوفر ديالها وهزات الفلوس بقات كاتحسبهوم وكاتفصل وكاتخطط بوحدها وبقات داوية مع راسها) دبا خاصني نضرب غير ضربات خفاف وصاافي حتا تجي شي همزة مطرطقة وديكساعات نخرج فمرة باش نمشي للحج انا وماما وبسمة باش اغفر لينا الله هاد الدنوب لي كانديرو وحتا بسمة تخرج من دك الخدمة وماما كدلك المهم صافي هكا غاندير يااربي تنقص ليا شوية ديال الدنوب ملي عاونت هاداك ديال قبيلة تا هو سميتو علي ناااري زهري غير فيهم يييخ عنداك غير داك الزبل تا هو تكون سميتو علي هههه ولد الحراام😑 الاشفتو والله تان.... اووف اشفجهدي ماندير هو ماهز فيا تا العين ييخ كون كنت كانشوفك ديما نخليك دي الدنوب عاجبو راسو هاد خينة تفو اشبغيتو ندي دنوبو ماكانحملش الراجل يكون متكبر ودافع كبير بوحدي انا لي نكون دافعة كبير وبوحدي انا لي نتكبر وهوما يبقاو تابعيني حتا نخورهوم فلخر اااع ماكرهتش نجمع الرجال كاملين فبلاصة وحدة ونشعل فيهم العافية ونبدا بهاد خينة هادا ييخ (بقات أسيل هكاك كاتعاير وكاتسب حتا عيات ومشات شعلات تيليفونها شادة الويفي ماكاين معامن تكونيكطا كولشي ناعس شدات فيلم مورا فيلم عندهوم الويفي فالدار داكشي علاش خدات راحتها بقات هكاك حتا وصلات 6:45 وهي باقي مانعسات ناضتت وبدات توجد فحوايجها مشات غسلات وجها ودارت كريم ايدغاطو ديالها ومن بعد ليكغو ومشات قدام المراية بقات كاتقاد الميكاپ ديالها سالات وهي تخرج لقات ماماها دخلات باستها ومشات فيقات بسمة ومن بعد رجعات لبيتها بدلات حوايجها لبسات تريكو حد المرفق فالبيض وصاية قصيرة فالكحل وليبة موس صباط فالكحل عالي مشطات شعرها وسرحاتو ودارت له بوكلي من التحت قادات صاكها رشات پارفان ديالها ومشات خرجات لقات ماماها صايبات ليهم الفطور قبل ماتمشي تنعس اما بسمة تا هي سالات ولبسات حوايجها وخرجو فطرو بجوج ومشاو خرجو هزو السوارت ومشاو بقاو كايتسناو حتا جا الطاكسي ركبو ومشا وصل بسمة هي لولة عاد مشا يوصل أسيل حيت هي بعيدة ملي وصلات خلصاتو ومشات خرجات دخلات للمدرسة ديالها دخلات للحصة ديالهاا بقاو هكاك حتا وصلات 12 خرجات وبقات كاتسنا الطاكسي ملي مالقاتهاش مشات على رجليها بانت ليها واحد المكتبة كبييرة تفكرات بلي خاصها واحد الكتاب دخلات وبقات واقفة كاتسنا نوبتها وكاتشوف فالمكتبة وكادور عينيها كانت كبيرة وواسعة وصلات نوبتها عطاتهم السمية ديال الكتاب بقات كاتسنااهوم 
حتا عطااوه ليها خلصات داكشي ومشات خرجات عاد شدات طاكسي ومشات للعمارة)
#عند_البطل_ديااالنا
علاء:(فاق فالصباح دوش بالخف لبس حوايجو ورش پارفان ديالو هبط لتحت لقا واليديه وخوتو فايقين سلم عليهم وگلسو كايفطرو في جو لا يخلو من المرح ولكن في حدود سالاو فطورهوم وناض علاء هضر مع ختو) امينة الا ساليتي نوضي بااش نوصلك
أمينة:ااه اخويا انا ساليت يالاه 
علاء:واخا الواليدة الواليد هاحنا خارجين (مشا علاء هز الكونطاك ديالو ومشا خرج لوطو ديالو من الگاراج ركب وركبات ختوو داها نيشان للمدرسة هبطات ومشا للخدمة ديالو هو بقا حتا وصلات وقيتة الغدااا مشا خرج صونات عله ختو گالتله اجي باش اوصلها للدار مشا وقف قدام المدرسة كايتسنا بختو شاف فالمراية هو يشووف..... شاف أسييل طبعا لي كانت كاتسنا بالطااكسي بقا متبع ليها العين كايشوف فيها وفراسو الف سؤال وسؤال هو متيقن بلي هي نفس الملامح نفس الوقفة نفس الفورمة غير لبارح كانت دايرة ميكاپ صارخ ودبا غير شوية بقا حاضيها حتا شافها تحركات ومشات قدامو هي تخرج ختو بقا مايشوف فيها لقاها قطعات الشانطي ركبات أمينة وهو بقا غادي بشوية گاليها راه كايتسنا بشي واحد بقا غادي بشوية تابع أسيل حتا شافها دخلات المكتبة ديالهوم وقف وختو مافاهمة والو واصلا ماداتهاش فه گاع بقا هكاك حتا خرجات شافها هازة كتاب وعرفوو حيت ختو عندها بحالها شافها تا ركبات فطاكسي عاد تحرك هو ومشا للڤيلا ديالهوم وهو كايفكر فأسيل ملي وصل مشا توضا وصلا في خشوع تام كايتسنا اعيطو عله باش اتغدا اما هو بقا ساهي كايفكر) انا متيقن بلي هي هاديك ديال البارح بالليل كادير حاجة وبالنهار كاتقرا زعما كادير هادشي على قبل قرايتها ولكن تا وحدة ماعندها عدر دير هادشي هاد البنت كاتبااان بريئة ماشي ديال هادشي نهائيا ولكن هي لي ختارتها رااسها😕

¤¤عند البطلة ديالنا أسيل¤¤
وصلات العمارة طلعات فالسانديك تا للطاج لفيه برطمة ديالهوم حلات الباب و دخلات لقات بسمة و ماماها في كوزينة كيوجدو..بسمة كانت وصلات قبل منها ..دخلات بدلات حوايجها و مشات عاوناتهوم حطات الغذاء فوق الطبلة فالكوزينة صال مونجي و كلسو كيكالو و يتعاودو تا سالاو و ناضت أسيل هي لجمعات كوزينة دارت الماعن يتغسلو فالماكينة ديالهوم و جمعات كوزينة و دارت جفاف خفيف بسانيكروا و حلات باب لاطيغاس و شرجم وخلات كوزينة تهوا دارت قهوة كحلة كطبخ وجدات وحطاتها في بلاطو هي و كيسان بطباسلهوم و مشات كلسات حدا بسمة و خديجة كيتفرجو تا ضربات 3 و ناضو ثاني كيوجدو راسهوم باش يمشيو بيرمي لبسو حوايجهوم و دارو الماكياج ديالهوم و قادو حالتهوم و هبطو ثاني شدو طاكسي تا لمدرسة السياقة دوزو الحصة ديالهوم عادي و علموهوم بالامتحان السيمانة الجاية و خاص ابداو اوجدو راسهم ...خرجو مع 6 و اصرات أسيل على بسمة يمشيو يدورو شوية ..تا بان لأسيل محل ديال الدراري الصغار يشوفو حويجات ..
بسمة: أسيل يهديك الله تا نعرفو بعدا شنو الجنس ديالو عاد نجيو لهنا ...
أسيل: لا اندخلو و نشريو لوان بجوج😍و لجا مرحبا بيه ..
بسمة: وا أسيل ...
اسيل:(جراتها ) زيدي باركة من نكير ناااري شحال فك ...دخلو البنات واحد مكازة ديال دراري صغار و أسيل حالة فومها و كيفاش متحلش فومها و حوايج الدراري الصغار كيحمقو الكبير و الصغير و بسمة تا هي ...دخلو جيهة الملابس ديال الزيادة و لي كيكون على الاغلب في الابيض و بدات اسيل تهز و تمد لبسمة اي حاجة عجباتها كاتهزها ...عاد دخلو جيهة صوليبيطات و شراو جوج جوج وحدين في غوز و وحدين في شيبي و مشات أسيل جيهة سبابط ديالهوم باليها سبيبيط صغير في شيبي هزاتو حمقهااا و هي غادة تا كدخل في واحد بوسيط ديال الدراري صغار ....مرأة جارة ولادها و مع اسيل حالة فمها ماشفاتهاش هزات أسيل عينيها في مراة كانت محجبة لابسة الحجاب الشرعي ..النور كيخرج من وجهها ...البرائة في وجهها حمقات أسيل بقات غير حالة فومها...
.......: سمحيلي مشفتكش ياكما قصحتك؟؟
أسيل: ا لا لا نتي لي سميحيلي انا لكنت حالة فمي ...
.......: ههه ماشي مشكل كنعتذر مرة خرى ...《بدا الدري كيبكي》 شووو ادام حبيبة ..
أسيل:(حنات عندو) وينوووو شحال غزاال😍😍😍 شووو احبيبة 《كدوز ليه اسيل على وجهو بحنان و كتمسح ليه دموعو و بدات كضحك معاه دغيا تطلق معاها و بدا كيضحك و كيبين جوج سنينات أسيل حمقهااا ...غليوض و شهب و عينيه خضرين بحال ماماه ..فمو صغير و غوز كيحمق كيوت (طبعا عرفتوها شكون مرات خو علاء الدين البطل ديالنا😉)
اسيل: وينووو يا ختي الله يخليه ليك غزال ماشاء الله ...شنو سميتو؟؟
إسراء: ربي خليك احبيبة سميتو ادام 😊في هاذ اللحضة جات بسمة كانت كتقلب عليها ...
بسمة: اووف و اخيرا لقيتك فين كنتي ؟؟
أسيل: انا غير هنا شوفي شحال زوين ..
بسمة: سلام 😊 وينوو (هبطات باستو ) غزال ماشاء الله ...😍
إسراء: شكرا ربي خليك سمحولي انمشي راجلي و بنتي ايكونو كيتسناوني برا ...
أسيل: اه وخااا مهم سميتي أسيل و هادي ختي و صاحبتي بسمة ...😊
إسراء: مشرفين أنا إسراء 😊 ...شتكوم في محل الدراري الصغار عندكوم وليدات 
اسيل: لا بسمة لحاملة اما ختك بايرة😆
إسراء: دبا يجي رزقك ان شاء الله بسمة الله يفك وحايلك على خير احبيبة 😍
بسمة: أمين اختي ...
إسراء : يا الله سمحولي بسلامة ...
بسمة و اسيل: بسلامة (كيديرو لآدام باي باي بيديهوم و هو كيضحك) مشات إسراء خرجات لقات اسماعيل كيتسناها و مركب شهد اللور جا هز آدم دارو في الكرسي ديالو اللور و هز بوسيط طواها و دارها في كوفر و هز بوشيطات والحوايج لشرات تا هما دارهوم في الكوفر ..ركبات إسراء حدا ولادها اللور و ركب اسماعيل و شدو طريقهوم ..أسيل و بسمة بقاو كيدورو لا عجباتهوم شي حاجة كياخوها ..سالاو و عياو عاد مشاو خلصات اسيل بكارط و خرجو شدو طاكسي🚖 رجعو للدار ..لقاو خديجة حاطة كاسكروط وبدات توجد العشا وراوها داكشي لشراو و عجبوها ..دات بسمة داكشي لبيتها و حطاتو كتشوف فيهوم وتفكر الايام لدوزات مع يوسف محساتش تا نزلات دمعة على عينيها سخونة ...جات اسيل طل عليها لقاتها كالسة فوق الناموسية و كاع داكشي لشرات حاطاها و كتشوف فيهم و عينيها مغرغين ..مشات اسيل كلسات حداها و شدات في يديها ..
اسيل: بسمة مالك؟؟
بسمة: والو 
أسيل: ياك انا ختك كوليلي مالك كتبكي ؟؟واش خاصك شي حاجة 
بسمة:انا مخاصني والو و لكن ولدي ولا بنتي من غيتزاد ايخصوه شلا حوايج 😕
أسيل: دبا علاش كتكولي هاذ الهضرة تا حاجة مغادي تخصو و هذا وعد مني كلشي غادي يتوفر ليه متبقايش تفكري بحال هكا غادي نتقلق...
بسمة: اسيل مكنهضرش على الحوايج و لا فلوس عارفاك قد كلمتك لعطيتيني نهار لول راك وفيتي بيها و هانتي عايشين دبا مزيان و كلشي موفر و لكن ايكون عندو نقص من غادي يكبر و يمشي المدرسة و يشوف الوليدات عندهوم باواتهوم و هو لا ..و من يسولني عليه اش غادي نكوليه را هادشي كيقتلني كل ليلة من كنفكر فيه ...
أسيل: بسمة انا عارفاك باش كتحسي و لكن صبري و كلشي غادي يكون مزيان ان شاء الله و من تما لتما يحن الله و نحاولو ما امكن نوفرو ليه كلشي
بسمة: كنتمنى ...
أسيل: و نوضي تهزي مسحي خناينك ووجدي راسك تمشي لخدمتك انا شوية انهبط عند مدام عيشة و نجي مع حمد و شوفي ليا شي ضحية ليوم . .

¤¤ عند البطل ديالنا ¤¤
وصلات وقيتة الغذا طلعات امينة عيطات عليه هبط تغذا في جو عائلي و في هدوء كلشي ساكت كالعادة سالاو الغذاء ديالهوم و طلع علاء غسل سنانو و يديه بصابون و لبس حوايجو و دار ساعتو في يدو و مشط شعرو لور رش بارفان ديالو بريحة المسك و هبط ركب فلوطو ديالو و مشا لخدمتو ...تا عيط ليه علي صاحبو ...
علاء: على السلامة عاد فقتي ...؟؟
علي: كول غير السلام اصاحبي ...مبقا فيك صواب..
علاء: اممم شكون كيدوي على الصواب ..ايوا السلام عليكوم و رحمة الله و بركاته ...
علي: اييه مزيان..
علاء: واش نتا معندك ميدار سير قضي ليك شي حاجة ...لاش مبرزطني انا عندي الخدمة ..
علي: وصافي اصاحبي بغيت غير نسولك ؟
علاء: الله يسمعنا خبار الخير ثاني اش كاين؟؟
علي: مكاين غير الخير ..بغيت غير نعرف باش عرفيتيني فين كاين و شكون لهضر مع الواليدة كالها ليها ...
علاء: شي وحدة تما ملي سخفتي صونات على خالتي نعيمة ...
علي: ايييه وباشمن حق ...شكون هذي بغيتك توريها ليا ..
علاء: تسطيتي لا نتا واقيلة باقي شاد فيك الشراب اش بغيتيها ..
علي: نتصور معاها😌
علاء: انقطع الطنز ديالك مامساليش ليه دبا ..
علي: صافي صافي بغيت غير نعرفها و صافي نشكرها مسكينة
علاء: نوض نوض دوش ليك ثاني و سير دير شي حاجة تنفعك را عندك 30 عام باقي مبغيتي دير عقلك ..
علي: و ناري اخويا شحال فيك فلسفة دبا بغيتك غير تقولي شكون ...
علاء: وباش انعرف شكون كنتي معاها ..
علي: صافي قطع تلاح ليوم انمشي و غادي نعرف بطريقتي تلاح (قطع طيط طيط)
علاء: هذا تسطى مافيهاش ...اووف منك ا علي اووف الله يهديك ...بقا علاء فالمكتبة ديالهوم تا وصل العشاء و ناض سدو و مشا للجامع توضا و صلا العشاء و الشفع و الوتر و رجع للدار...طلع لبيتو نيشان دوش🚿 و لبس سروال كيطمة و قبية و هز قران كايقرا و هو يتفكر هضرة علي خاف لايمشي ثاني ليوم يدير شي فضيحة و ناض على سعدو ووعدو لبس حوايجو و هبط تعشا معاهوم و كاليهوم ايخرج يشوف علي و مشا ركب نيشان للبار كيصوني على علي فالتيلفون والو طافي ...
¤¤عند اسيل¤¤
...تعشاو ومن بعد خرجات خديجة ملي لبسات حوايجها و مشات لخدمتها وصات اسيل تسد الباب موراها و باستهوم و خرجات ...اما بسمة تا هي لبسات حوايجها و دارت ميكاب ديالها و قادات شعرها رشات پارفان ديالها ..دارت اكسسوارات ديالها و هزات صاكها و باست اسيل و خرجات ...وصلها حمد للبار و رجع عند اسيل كيتسناها وجدات تا هي الحوايج لغادي تلبس دارتهوم في بوشيط هزات تيلفونها ...حيدات بريزات و زيرات البوطة و خرجات سدات الباب مزيان هبطاات ركبات مع حمد وصلها هاذ المرة عند مدام عيشة ..دخلات لقاتها كتسناها كالعادة هي لتكلفات بيها دارت ليها ماكياج مثير و صيبات ليها شعر بوكلي لبسات كسوة في حمر فوق ركبة و سماطي كتافها عريانين و في فتيحة صغيرة جيهة صدر مزيرة عليها بينات فورمتها مزيان ..لبسات صباط عالي في كحل و هزات بوشيط فالكحل دارت فيها تيلفون و عكر حمر ...حوايج لحيدات رداتهوم في بوشيط ..مشات خلصات في لاكيس لاحت عليها كاب في كحل فوق كتافها و من بعد خرجات لقات حمد كيتسناها دارت ديك بوشيط في كوفر و مشات ركبات لور ماهي الا نص ساعة وصلها قدام البار دخلات كعادتها لاحت سلام لكارد لفي باب و دخلات كتعوج و هازة خنافرها سماء مشات من واحد جيهة خرا و كلسات قبالت بسمة طلبات كولا كالعادة ...هزات تيلفونها لقات بسمة لاحت ليها معلومات و شكل الضحية الجديدة ...جابت ليها عصير و عطاتها كينة في 100 درهم كالعادة ... عاودات تعكيرة و قادات راسها و ناضت جمعات الوقفة غادة في جيهتو تا كيوقف عليها علي ...
علي: سلام زوينة 
أسيل: هذااا نتا ؟ ثاني اش باغي ؟
علي: باغي نبوسك😆
أسيل: لا حول ..واش خارج ليا في عودي البارح سكران و ليوم جاي كطنز على الوقت ...
علي: بغيت غير 5 دقايق من وقتك نهضر معاك ..
اسيل: يييه هضر اش باغي؟؟
علي: ماشي هنا طبعا صداع يا الله برا ..
اسيل: اووف اش هاد زهر زيد يالله نشوف اش خاصك ..غمزات اسيل لبسمة وكاتليها بعينيها هاهي راجعة خرجات تابعة علي شافتو عطا 200 درهم لكارد لي برا و كاليه شكرا ...
أسيل: وقف نهضرو هنا بعد باش عرفتيني و نتا البارح كنتي شبه ميت ...
علي: معاك علي اكبر مخابر و سكايري في بلاد كيفاش ميعرفكش😉😉
اسيل: اييه مخابرات كاااع ...
علي: وي مهم نتي لهضرتي مع الواليدة بارح ياك و من بعد جا علاء صاحبي ...
اسيل: اه داك المتكبر من بعد؟؟
علي: هههه متكبر ناري ويسمعك
اسيل:و تا كمل اش باغي؟؟
علي: ايوا جيت سولت عليك هذاك شتيه (شير بيديه لعبد السلام ) و هو لنعتك ليا ..
اسيل: زنقة انا باش ينعتني ليك ...هذاك زا*** اهاه ومن هادشي كامل اش باغي؟؟
علي: بغيت غير نكوليك شكرا 😊صافي
اسيل: على واجب ...ماشي مشكل سمحيلي اندخل دبا...
علي: و اجي نتعارفو بعدا انا علي ..ونتي؟؟
أسيل: أسيل 😊
علي:عارف سميتك زوينة بحالك
أسيل: وي عارفة ...
و هما كيهضرو ما حسو تا وقف عليهوم علاء..
اسيل:😮😮😮

علاء:علي نتااا بيخير شكاادير هنااياا
علي:اوووه جيتي 
أسيل:(كادور فعينيها) 
علاء:علي زيد نمشييو للدار
علي:وااغي صبر اصاحابي راني كاندوي مع أسيل 
أسيل:لاا صاافي غير سير انا غانرجع ندخل 
علي:ولكن....
علاء:صاافي هي راه عندها مايداار راك ماخليتيهاش دير داكشي لي بغات صاافي اصااحبي
أسيل:(ماعجبهاش الحال حيت بحالا كاينعتها بالعاهرة وكايحشي ليها الهضرة) لاا صاافي مازربااناااش😇
علاء:(ماكايشووفش فيها سمع داكشي عصباتو) علي خلينا نمشيييو 
علي:صاااحبي مالك على حاالتك
أسيل:(كاتشوف فعلاء بنص عين وردات البال بلي ماحاشاهاش ليها نهائيا هي تبدا تسوط عصبها بهاد البرود ديالو هي زوينة علاش زعما مابغاش يشوفيها حتا الشوفة جمعات الوقفة) علي تشرفت بالمعرفة ديالك واخا ماتعرفناش بزاف ولكن مرة خرا طهلا فراسك وماتبقاش تسكر بزاف نهار تبغي تهضر معايا راك عارف فين تلقاني (هي تزيد مع الطريق دخلات للبار) 
علاء:😏(بقا كايدوي مع علي وكايحاول اقنعو باش يرجعو للدار وهو مرة مرة كايخطف الشوفة فأسيل بنص عين حتا غبرات من قدامو ودخلات اما هو أخيرا قدر يقنع علي باش يرجعو للدار وداكشي لي كان ركب علي فلوطو ديالو وعلاء كدلك ومشاو وعلاء مشا مع علي للڤيلا ديالهوم وصلو هو يهبط علي وتبعو علاء لي دارها بلعاني باش يشد صاحبو بالهضرة ومايرجعش للبار)
علي:ماتخاافش راني ماغانمشيش ليوم راشقة ليا مشيت غير على قبل أسيل
علاء:واش مريض فرااسك ماباراكاش علك الشراب باغي تزيد حتا.... اوف استغفر الله 
علي:وايلي اصااحبي مشيتي بعيد انا بغيت غير نشكرها وصاافي
علاء:اواا ماالك باقي كادكرهاااا ياك صافي شكرتيهاا اوا باراكة عافاك اصاحبي باراكة من هاادشي الله يهديك على رااسك انا غانمشي ماترجعش لتما
علي:انا هضرت معاك ماتخاافش كلمة الرجال😇
علاء:واخاا لمهم طهلا فراسك انا غانمشي للواليدة غاتكون كاتسناني 
علي:واخا اصاحبي سلم عليها
علاء:ان شاء الله (مشا علاء ركب فلوطو ديالو وديمارا وهو باغي يمشي للڤيلا ديالهم غادي فالطريق وهو كايتفكر أسيل خصوصا عينيهاا والطريقة باش كاتعصب ودغيا كاطلع وكاتعقد حجبانها علاء واخا ماحققش فيها ولكن عندو دقة الملاحظة ساس راسو من هاد الافكار ولكن الاسئلة ديالو ماسالاوش بقا كايفكر حتا وصل للڤيلا ديالهم لقا ماماه كالعادة كاتسنا فه ملي جا گالتله يمشي يبدل حوايجو ويهبط يتعشا بيما سخنات العشا وداكشي لي دار علاء طلع فالدروج ودخل لبيتو بدل حوايجو ولبس الحوايج ديال الدار غسل يديه بالصابون ومسح بفوطتو وهبط فالدروج گلس فوق الطبلة والواليدة ديالو حطات له يتعشا وهي مجمعة معاه سالا عشاه وباس راس الوااليدة ديالو وطلع لبيتو وتكا نعس) 
💢💢عند البطلة ديالنا أسيل💢💢
أسيل:(دخلات أسيل للبار معصبة شافت فبسمة طمناتها سيفطات ليها مساج گالتليها غانديرو داكشي لي گلتليك حققات أسيل فالڤيكتيم ديالها وبدات كاتفكر فشي حيلة جديدة حيت عارفة بلي القضية لولا مابقاتش مسلكاها خصوصا ولاو كايحققو فالكاميرات دباا سيفطات لبسمة ميساج گالتليها تاخد الكاس لي فه الفانيدة لهاداك وهي غادير الخطوة التانية من بعد) 
بسمة:(قرات مساج وهزات كاتقااد المشروب لاحت فه دك الفانيدة دغيا وتسنات شوية وهي دوب حطات الكاس وجا واحد كايسربي معاها عطاتو الكاس بحجة غاتسربي ناس خرين وداكشي لي دار هي تبعاتو من اللور كاتسوبي الناس لي حداه وداك السرباي دا الكاس لهاداك)
السرباي:(حط الكاس قدام داك الراجل) 
......:شكراا شحال من كاس غانشرب باش مانتشوهش معاكم حيت اول مرة 
السرباي:ههه باينة فك مهم هادا ويسكي غير ماتكترش وممااتخاف من والو
بسمة:(لايحة ودنيها كاتسنط ليهم هي تكتب ميساج لأسيل لي كانت واقفة بعيد)
أسيل:(قرات المساج وعرفات بلي خاصها غير تعرف شنو دير ويلا صرعاتها راه غاضرب ضربتها تسنات واحد نص ساعة وهي تسيفط لبسمة ميساج گالتليها {دي له كاس آخور وگولي له راه مني وحاولي ماتعيقيش}
بسمة:(قرات المساج وعرفات بلي أسيل كاتفكر فشي حاجة جديدة مشات جابت كاس آخور وداتو له) مووسيوو هاد الكاس من ديك السيدة لهيه لي لابسة الحمر گالتلك بصحتك
......:(شد الكاس وشاف فأسيل لي كانت عاضة على شنايفها وگالسة گلسة مثيرة حاطة رجل فوق رجل وكاتشرب من كاس الكولا ديالها غمزاتو وبتااسماات اما هو عجبو الحال زرب على داك الكاس وناض غادي جيهتها) 
أسيل:(شافتو جاي جيهتها هي تنوض وقفات شافت فه بنص عين لقاتو وقف متبع ليها العين اما هي دارت عندو وضحكات له وعاود غمزاتو وشيرات له باش يتبعها اما هو بحالا شعلتي له الضو الخضر تبعها بلا عقل اما أسيل مشات وغادة جيهة الطواليطات اما هو بقا تابعها بلا عقل شافها دخلات للطواليط ديال البنات حشم فلول ولكن من بعد ماتسوقش ودخل كايقلب عليها بعينيه) 

.....:كاين شي واحد هناا👀ختي
أسيل:(خرجات عندو) كاتقلب عليااا 
.....:آآ اااه للاسف ماقدرتش نتعرف علك 
أسيل:سميتي لمياء
.....:انا سميتي نور الدين
أسيل: متشرفين ا نور الدين للاسف اللقاء ديالنا داز فالطواليط دييزولي ههه
نور الدين:لا لا ماشي مشكل انا نيت ماعنديش مع الزحام وهادي اول مرة نجي لهناا
أسيل:ههه غاتكون مميزة ماغاتقدرش تنسااها😉
نور الدين:(كايحك يديه مع بعضياتهم) آآ ممم
أسيل:اشباالك نمشييو لشي بلاصة (وقفات قدامو وكاتقاد له له فالقاميجة ديالو) تكوون خصووصية كتر نبقاو غير بجوج ومانكونوش كانشمو هاد الريحة الزوينة آشگلتي
نور الدين:(عينيه حوالو بغا يقيسها هو يهبط يدو بالجرا ودار يديه مورا ضهرو حيد الخاتم ديال المارياج ودارو فجيبو) 
أسيل:(ردات البال لداكشي لي دار عرفاتو مجوج بدلات سيفتها بالجرا عرفاتو كايخون مراتو واخا اول مرة يجي لهنا ولكن حلفات تا تندمو هو لول) 
نور الدين:(لاحض بلي بدلات سيفتها) لمياااء ماالك
أسيل:آآ لاا واللو غير تعطلتي عليا فالجواب گلت واقيلة ماعجبتكش انا غانمشي
نور الدين:(شدها) لا عاافااك راه غير لساني تبلووكا واقيلة هادا هو الحب من اول نضرة ااه نمشييو واحد صاحبي خلا ليا السوارت ديال دارو راها خاوية نمشيو ليها اشباالك
أسيل:(تمشات قدامو وهي كاتلوز بالمؤخرة ديالها) ممم عرض مغري ولكن خاصك تعرف بلي انا ماكانمشيش فاابور
نور الدين:شحاال ببغييتي نعطيك لي بغيتي لمهم ندوزو وقيت زويين (دار يدو يجبد الفلوس) 
أسيل:انا ماكانهبطش على 5000 درهم وهادشي غير حيت مابغيتش نعيق علك وصافي
نور الدين:تستااهلي كل خير انا نعطيك 6000 ولا كتر گااع
أسيل:ههه ممم باينة فك خدام شي خدمة زوينة 
نور الدين:شوية ههه مهم بيخير 
أسيل:اوا سمحليا خاصك تعطيني فلوسي دباا الپاطرون ديالي غايتقلق مني 
نور الدين:ااه واخا بلاتي ماعرفتش واش غايمونو عندي دبا الا ماكانوش نمشيو نخرجهوم من الگيشي ونعطيهم لك
أسيل:حسن گاع واخا دبا نقدرو نمشيو لمهم سبقني نتا انمشي نتفااهم مع الپاطرون ديالي عطيني الماتريكول ديالك باش نجي لپارك ونركب ونمشيو نيشان 
نور الدين:واخا هو *******
أسيل:واخا انا خارجة (مشا نوور الدين خرج اما أسيل رجعات للداخل شافت فبسمة وخرجات بلا حس هزات المونطو ديالها وخرجات وسلمات على عبد السلام گالتله راها غاتمشي ومشات للپارك كاتقلب حتا شافتو كايشير ليها ومشات ركبات معاه) ياكما تعطلت علك
نور الدين:لا خوودي رااحتك 
أسيل:دباا خاصنا نخرجو الفلو هو لول
نور الدين:ااه 
أسيل:واخا (مشا تحرك وأسيل حاضية مع الوقت عارفة بلي مابقاش بزاف باش إبدا التأثير ديال الفانيدة وقفو قدام واحد الگيشي وخرج نور الدين حتا خرج الفلوس ورجع عند أسيل حطهوم كانت 6500 درهم وتعمدات تحسبهوم بشوية عليها ولاحضاتو هو بدا كايضرو راسو) ماالك
نور الدين:لااااا غير كايضرني رااسي ماعرفت علاش
أسيل:اوووه علااااش بلاتي ندير لك مسااج لرااسك (بقات أسيل كادير له مسااج حتا طااح كااو وهي بدات كاتبتااسم سيفطات مساج لحمد لي جا فالبلاصة وقف عليها كان تابعها وقف حداا لوطو ديال نور الدين وأسيل هزات الفلوس حيدات واحد 200 درهم وهزات واحد الستيلو لقاتو تما وبدات كاتكتب {ملي غاتفيق غاتكون عرفتي بلي انا مشيت وديت لك فلووسك بلا مادير والو لمهم بلا ماتحاول تعيط على البوليس ولا شيحاجة حيت درت داكشي لي بغيت وخديت شي تصصورات غايدخلو الحبس بتهمة الخيانة الزوجية لي نصحك هو بلا ماتحاول تقلب عليا حيت غير نتا لي غاتخسر ولمهم عتابرها بحال شي تصرفيقة تفيقك مراتك كاتسنااك ونتا جاي كادور بالقااصرات ااه هادي تهمة خرا بعدا لمهم ديها فمراتك وهاد الفلوس كون عطيتيهم لمراتك ولولادك كون كنتي دبا هاني ولكن ماشي مشكل كيفما گلتليك عتابرها تصرفيقة باش تفيقك من هاد الغفلة لي نتا فيها قبل ماتغرق فمرة طهلا فرااسك وماتسنااش هادشي لي گلتليك غير نتا لي غاتخسر} قلبات جيابو وهزات الخاتم وحطات 200 فوق حجرو والخاتم لبساتو له فصبعو عاد مشات خرجات هازة الفلوس ومشات دخلات للطاكسي ركبات) يالاه احمد دغياا
حمد:وااخاا ا أسييل ههه ضربتي ضربتك تاني
أسيل:ااه وخليت له مسااج مشحر باش يفهم راسو😅
حمد:ههه خطييرة نتي
أسيل:(تكات على الشرجم وهي كاتفكر فهادشي لي كادير عارفة راسها كادي دنوب عباد الله ولكن شغادير بغات تخرج من الفقر وتخرج ماماها وتعيش بسمة وولدها حياة كريمة وباقي كاتفكر طاح علاء فراسها وهي كاتفكر وبدات كاضحك وداوية مع راسها) علاااء سمية زوينة ولكن متكبر وداافع كبيير يااه لواحد الدرجة بااز واش ماعلموهش بلي التكبر راه مامزياانش وراه مكروه پفف بحال هاد النوع كايحلل لي بغا ويحرم لي بغا باينة مزبلها ولكن واخا هكاك ماشاف فيا تا الشوفة پفف باينة غانشوفو مزال بسباب داك علي تاا انا غانتكبر عله ااح كانتسناا تجي هاد الفرصة😋 بفارغ الصبر ااح دبا نرد لك الصرف دياالك غي بشوية علك اسي علاء والله تا ردها لك😈

بقات اسيل متكية على الزاج .. غمضات أسيل عينيها وهي راسمة على فمها إبتسامة شريرة وصلها حمد وهي طلعات لپرطمة ديالهم بدلات حوايجها حيدات الميكاپ ديالها وخبعات الفلوس تاني غير سالات بقات كاتسناا حتا سمعات الباب تحل ودخلات بسمة...
بسمة: واحد سلام عليكوم ..
أسيل: اهلا اهلا على سلامة ..
بسمة:(كلسات في جنب حدا أسيل فوق سداري و كتحيد طالون ) اووف عييت يا ختي😣
أسيل: قريب احبيبة قريب اتهناي من هادشي كامل ...
بسمة: على الله اختي ...اش درتي نتي ؟؟
أسيل: ضربت تاني ضربتي 😂
بسمة: ويلي شحال خديتي ؟؟
أسيل: 6000 درهم صافي😕
بسمة: ناري يا ختي عينيك شحال كبيرة و باركة عليك ...
أسيل: نتي ماغاديش تفهميني و الله را خاص كلشي يتوفر لينا ...و مصاريف اتزاد شي نهار اتسالي لينا فلوس فهمتي ...
بسمة: سمعيني ا أسيل راكي كتلعبي في نار سمعتي را ايجي نهار اتحصلي ...ها 50 مليون في يدنا هاذي مغاديش تقدك ..
اسيل: بسمة را 7 سنين باقا ليا ديال قراية ...
بسمة : علاش بسلامة 7 سنين؟؟
اسيل: هاذيك را مدرسة طب باش ناخذ دكتوراه ديالي خاص 7 سنين عام على خوه و كل عام خاصني نضرب فيه معدل و كتوبة نتي عارفاهوم شحال غاليين و خاصني نمشي نكمل دكتورا ديالي في أوروبا و نتي عارفة هادشي مزيان ...
بسمة: دبا نتي اتكلسي تا ديري 25 عام و نتي في هاذ ميدان ...
اسيل: طبعا لا ...و لكن تا نعرف انك نتي و ولدك عايشين بخير و ماما كذلك و انا نوفر ليا كلشي و ديك ساعة ايجي نهار لغادي نخرج من تما و لكن مزال داك نهار بعيد ...
بسمة: اسيل نسولك؟؟
أسيل: وي
بسمة: نتي دبا كتفكري غير فهاذ شي مكتافكريش ديري تا نتي شي نهار دارك و وليداتك و تستاقري 
اسيل:هااااهااا ضحكتيني و حق الله ا بسمة شنو زعما اسيل تزوج 😆😆
بسمة:و علاش مالك متعرفي يجي شي فارس الأحلام شي بووكوس و تبغيه ..
أسيل: فخبارك في القاموس ديالي مكاينش شي حاجة سميتها الحب نهائيا ..
بسمة: غايجي نهار لغادي تبغي فيه شي حد و غادي تعرفي معنى الحب ...
أسيل: داك نهار عمرو ماغادي يجي غير تهناي حيث قلبي انا حجر و انا مكرهتش رجالة كاملين يموتو😑
بسمة: ماشي كلشي بحال بحال ا أسيل
أسيل: بالنسبة ليا كلشي بحال بحال ..
بسمة: وخا وخاا نتي عارفاك راسك قاصح اختي كثر من حجرة نوضي نعسو عييت ..
اسيل: مغاديش تاكلي ...
بسمة: لا مافياش الجوع ...
أسيل: بسمة غذا انمشيو عند شي طبيبة تبعي معاها ضروري را دبا البيبي بدا يكبر و خاصك العناية ...و شوفي بقا ليك شهر واحد و غادي تكلسي من ديك الخدمة نهائيا ..
بسمة: ان شاء الله و لاش نمشيو عند طبيبة ...نمشيو عند طبيب😋
أسيل: وعلاش؟؟
بسمة: متعرفي يكون شي تيتيز و يتزعط فيا و نتزوجو احح😍😍
أسيل:(هزات مخدة شيرات عليها) نووووضي نوووضي بديتي تخرفي راكاع اطباء كيكونو شارفين يخخخ تشوفي كاع هاذوك لكيقريوني و سلامة تا واحد مافيه ضو ...
بسمة: ويععع😂😂 لا حنا كاين واحد تيتيز و لكن مخنث...أصلا كنفكر نخرج ناخذ شي خاتم ماغياج غذا في عشية كرشي غاتبدا تبان 😢 و انا مبغيت تا حد ياخذ عليا نضرة خايبة اللهم يكولو را براجلها و تا لاسولوني عليه نكول راه مسافر ولا شي حاجة ...باش تا ولدي مينعتوهش بولد الحرام ..
أسيل:(ناضت عنقتها) تا حد مغادي ينعتو بشي حاجة ماحدي باقا حية كوني هانية احبيبة ..
بسمة: يا الله نوضي نعسو را 3 ليل دبا ..
أسيل: يا الله ...ناضو البنات غسلو سنانهوم و بسمة بدلات حوايجها و مشات بيتها تخشات في بلاصتها و نعسات و تا أسيل كذلك تخشات في بلاصتها و هي كتفكر تا طاح ثاني في بالها علاء و بدات كتفكر فيه و كذكر ملامح ديالو ..
اسيل: زوين ولد حرام اييه و طبعة الصلاة فجبهتو باينة من دوك الفقهاء ...لاش دبا انا كنفكر في داك المتكبر نعس حسن ليا ..هزات الغطاء لاحتو عليها و نعسات😴
🌔اصبحنا و اصبح الملك 🌔
..جات خديجة كعادتها مع 7 صباح تكات شوية و ناضت كتوجد الفطور البنات ...كلشي محطوط فوق طبلة الخير موجود ...خلاتهوم ناعسين و نصبات الغذاء رداتو كيطيب اما الخبز و لاو كيشريوه من مخبزة قليل فين كيعجنو ...جمعات الدار و دوزات جفاف للدار كاملة و مسحات الغبرة ...عاد ناضو البنات غسلو حالتهوم و وجههوم و مشاو فطرو و جمعو الماعن غسلوهوم عاد مشاو لبسو تاني حوايجهوم و دارو ميكاب خفيف و جمعو شعرهوم كوتشوفال ..هزات اسيل الفلوس دارتوهوم في صاكها وخرجو ..
خديجة: فين غاديين ابنياتي ؟؟
اسيل: ماما انمشيو بسمة اتمشي عند طبيبة تبع معاها ...
خديجة: ولكن 11 دبا اتكون باقا شي طبيبة ..
أسيل: اه را كتبقى تا لوحدة ها هي حدانا غير في دوك عمارات لفي جيهة خرا عندها عيادة ديالها ..
خديجة: اه و بلاتي نجيب ليكوم فلوس
بسمة: ماما خديجة را عدنا بلا متحتاجي غير خبي فلوسك ...
خديجة: ولكن ابنتي...《قاطعتها اسيل》
اسيل: صافي اماما را عدنا ..
خديجة: وخا الله يعاونكوم...باسوها البنات و خرجو شدو طاكسي 🚖 دغيا وصلو ...
بسمة: كتعرفي هاذ الطبيبة؟؟
أسيل: اه سولت عليها مدام الطاهري اختصاصية في توليد و النساء كوني هانية را مخيرة و خديت رونديفو ..
بسمة: لهلا يخطيك عليا نتي بصح ملاك نزل عليا من السماء و الله . .
أسيل: و تا نتي احسن حاجة وقعات ليا في حياتي 😍

♡♡عند البطل ديالنا♡♡
..فاق علاء فالصباح بكري .. غسل و بدل حوايجو و قاد حالتو و هبط لقا الفطور فوق الطبلة و العائلة مجتمعة و كعادتهوم كلشي مجموع فالطبلة وخا الصباح بكري كلشي كينوض ..فطر علاء و هو ساهي باقي صورة اسيل فبالو و الف سؤال كيضرب في راسو ..سالا فطورو و ناض تا كان خارج و رجع سول امينة ..
علاء: امينة ماقارياش ..
امينة: لا اخويا هاذ النهار كتكون عندي ساعتين في عشية من 2 ل4 
علاء: اه وخا العشية نوصلك ...
امينة : ان شاء الله اخويا ..خرج علاء دوز صباح ديالو عادي في خدمة ..وصل الضهر و مشا الجامع صلا و عاد رجع للدار باش يتغذا ...
¤عند اسيل و بسمة¤
دخلو البنات لقاو غير شوية ديال الناس ..و هما اصلا ديجا شادين رونديفو غير وصلو دخلتهوم فرملية دخلات أسيل مع بسمة ..تكات بسمة في باياص و بدات كدوز ليها داكشي على كرشها سالات ليها و ناضت لبسات حوايجها و كلسات حدا بسمة في مكتب ديال الطبيبة ..
اسيل: كلشي مزيان ا دكتورة ..
دكتورة: حمد الله صحة الأم و صحة الجنين مخيرة ...عندك دبا 12 اسبوع تبارك الله الجنين في نمو..انقيد ليك شي فيتامينات و بقاي تاخذيهوم ايساعدوك شوية في هاذ الفترة كتكون صعيبة ..
بسمة: حمد الله انا الوحم ماشي صعيب زعما مرة مرة فاش كنرد و لا كندوخ..
دكتورة: و الحمد الله هادشي لبغينا ..ها واحد التحليلة ديال فقر الدم ديريها ليا ..
بسمة: كاينة شي حاجة خطيرة 
دكتورة : لا لا غير نشوف واش عندك شي نقص باش تا لاكان الله يحفض ناخذو احتياط ...
بسمة: ان شاء الله بالنسبة الجنس ديال الجنين مزال ميبان
دكتورة: الشهر جاي ان شاء الله تكملي 16 اسبوع و نعرفو اش عندك..
بسمة و اسيل : ان شاء الله😍
دكتورة: هاكي هاذ الفيتامينات خوذيهوم ..
اسيل:(شدات الورقة من عندها ) شكرا ادكتورة الله يعاون 
بسمة : شكرا😊
دكتورة : على واجب...
خرجو البنات و خلصو بنت في استقبال 250 درهم ديال التدويزة و خرجو كيتمشاو على رجليهوم لفرمسيان ..خداو كاع داكشي لكالت ليهوم طبيبة و مشاو مخبزة خذاو الخبز و دازو الحانوت خذاو قرعة ديال مونادا و رجعو للدار غير على رجليهوم فرحانين كيضحكو ..وصلو للدار لقاو خديجة كتوجد الطبلة ..طمانوها على صحة الجنين و تا صحة بسمة و مشاو غسلو و بقاو بحوايجهوم حيت 1 و هما 2 قاريين تغذاو بالزربة و ناضو غسلو سنانهوم و قادو ميكاب ديالهوم من جديد وخرجو ..شدو طاكسي حط بسمة حدا مدرستها هي لولة و عاد دا أسيل لمدرستها خلصات و هبطات هازة صاكها و ليزيات في وذنيها و دخلات ..
¤عند علاء دين ¤
رجع لدار و تغذا و خرج هو و امينة ركب في لوطو ديالو وركبات حداه أمينة وصلها لمدرسة سلمات عليه و عطاها 100 درهم و كاليها ايدوز ليها مع 4 تسناه و هبطات بقا حاضيها تا دخلات و كيدور عينيه👀 تا قشع أسيل هابطة من الطاكسي و هازة صاكها و دايرة ليزيات و واحد كتاب هازاه في يديها تبع ليها العين تا دخلات عاد ديمارا و رجع لخدمتو و هو كيفكر فهاد البنت كيفاش بالنهار كتقرا و بالليل كتولي من بنات الليل ..مافهم والو ..وصلات 3 ونص و اذن العصر مشا للجامع صلاه و رجع للمدرسة كيتسنا امينة تخرج خرجات امينة ركبات حداه و دارت السمطة و هو بقا حاضي باش يقشع اسيل 
امينة: خويا ماغاديش نمشيو؟؟
علاء: احنا انتحركو ...الله ايديماري و هو يقشع اسيل خرجات شدات طاكسي و هو حلف تا يتبعها و يشوفها فين كتسكن بقا تابع الطاكسي من اللور و غادي في طريق خرى تا قشعات امينة بلي غاديين فطريق آخرة...
امينة: خويا ماغادينيش للدار ؟؟
علاء: لا عندي شي خدمة واش باغا ترجعي للدار؟؟
امينة: وي خاصني نخدم شي تمارين ..
علاء: تقدري تهبطي وتاخذي طاكسي انا معطل شوية
امينة: اه اخويا معنديش مشكل ..
علاء: عندك فلوس؟؟
امينة: اه خويا عندي😊
علاء:من توصلي سيفطي ليا مساج ..
امينة: وخا اخويا ...هبطات امينة في سطوب دغيا و مشات كتسنى الطاكسي ...اما علاء واقف في سطوب من مور الطاكسي لفيه اسيل ..
¤عند اسيل¤(اسيل كتهضر فتلفون)
اسيل: الو بسمة انا فالطاكسي دبا سطوب عامر شوية و نكون عندك...صافي 10 دقايق و انا معاك ..يا الله باي ..مشات اسيل عند بسمة لمدرسة لقاتها كتسناها دغيا ركبات بسمة حدا أسيل لور ...علاء باقي تابعهوم ..شدو الطريق هاذ المرة جيهة الملاح (بلاصة في قنيطرة كيكونو فيها حوانت ديال الذهب ) وصلو و هبطو 
بسمة: لاش جايين هنا؟؟
اسيل: ياك باغا تاخذي خاتم ديال الزواج و زيدي ..
بسمة: تي درتيها بصح 😮
اسيل: اويلي و على نتي كنتي تاتفلاي ..
بسمة: و شنو اختي باغا تهربي ليا رزقي يمشي شي بوكوس يتزعط فيا و في لخر يلقاني مربوطة بالخوا 😋
اسيل:(طلعات حاجب و هبطات لاخور) من نيتك 😑
بسمة: غا ضاحكة والله بلا متخنزري😆😆 و لكن لاش الذهب غير النقرة ..
اسيل: ناخذو ذهب حسن نيت نخبيو فيه واحد 60 الف..
بسمة: يا الله زيدي ...دخلو البنات و ختارو خاتم زوين سامبل من ذهب صفر و الابيض و خلصوه و خرجو ثاني كيتسناو في طاطسي ...شيرو لواحد الطاكسي و ركبو معاه راجعين لدار وصلهوم حدا عمارة هبطو خلصوه و طلعو نيشان لبرطمة ...اما علاء بقا تابعهوم تا عرف فين كتسكن هز عينيه بانت ليه عمارة شيك و كلاس ..
علاء: و الله هادشي مابغا يدخل ليا راسي لباس عليها و كتقرا في ايكول ميدسين و كتمشي مع رجالة عا****لا حول ولا قوة الا بالله

علاء:هادي باينة باغة طير مع الطيور هوما أصلا باينة من حالتهوم ميسورين ماديا ولكن هادشي لي كادير شنووو علاش كاتمشي لدوك البلايص واش هادي كاملة مراهقة واش ماعندهاش باها لي نصحهاا خووهااا مهاا ولا تاهوما باغيين هادشي باينة يكون الطمع لي دارها بيهم😏لا حول ولا قوة الا بالله كاتبيع راسها على قبل الفلوس (دار ومشا فحالو وفالطريق بقا كايتخبط وسط أفكاره مامقتاانعش بلي هاد البنت أسيل لي من نهار سمع سميتها مابغات تحيد من بالو نقدرو نگولو الفضول قتلو وضرو رتسو بغا يعرف سر هاد البنت عينيها مخبيين واحد البراءة فشكل ماعمرو غاينسا النظرات ديالها نهار هز فيها عينيه وشاف فيها نيشان كان كايهضر ولكن فالداخل ديالو كايدير التحليل نظراتها حادة وملامحها نوعا ما مصطنعة بسبب دك الزينة كاملة لي كاتحط فوجها ولكن نظراتها عمرهوم يتبدلو فيها واحد البراءة خااصة وكذلك حزن دفين مخبياه وراء التسلط ولسانها االطويل هاد الحوار الطويل لي دار فراسو قبل ماينطق بواحد الكلمة خرجات بلا هواه ماقدرش يحبسهاا)غاانعرف (رد البال لراسو هو يبتااسم وبدا تتايستغفر الله فخاطرو وهو متيقن بلي أسيل ولات بحال شي لغز بالنسبة له بحال شي كتاب خاصو يتعدب نيت عاد باش يوصل له ويستكشف الاسرار ديالو هضر مع راسو كآخر محاولة باش ابعد أسيل من دمااغو ولكن هاد المحاولة باءت بالفشل وأصر باش يعرف كولشي على هاد البنت شكون هي هاد أسيل شناهوما الاسباب لي تخليها تبيع راسها وجسدها مدام ماخاصاها تا حاجة أسئلة بزاف ولكن مالقاش ليهم جواب تنهد وتمتم ببعض الايات القرآنية حتا وصل للمكتبة ديالهم) 
💢عند بطلتنا أسيل💢
أسيل:(گالسة مع بسمة وشادين بةوج بيهم كتوبة ديال تعليم السياقة ملبقا ليهم والو باش ادوزو داكشي علاش خاصهوم اركزو هاد ليامات)بسسمة دبا فهميني شكون فيهم لي ممنوع الوقوف ولي ممنوع التوقف ولي بجوج
بسمة:ياك ديما كانگوولها لك شحال من مرة دبا عاوتها😑
أسيل:وااعاافاك شرحي ليا عاوتاني
بسمة:(قرضات قدام أسيل وبدات تشرح ليها وتفهمها وترسم ليها بيديها وأسيل متبعة معاها حتا فهمات) ودبا فهمتي شحفتيني اختي
أسيل:ااه ولكن... 
بسمة:😡
أسيل:ههه صافي صافي انا فهمت غي كانضحك معاك (رجعو كايراجعو تاني حتا أسيل ضرها راسها وناضتت خرجات من البيت ومشات طلات على ماماها لقاتها نعساات ورجعات لبيتها سدات عليهم الباب ومشات للكوفر هزات دوك الفلوس ورجعات تحسبهوم وبسمة هزات راسها شافت بيها وهي تشد راسها) 
بسمة:شي نهار غادي تشيري نتي بسباب هاد الفلوس اويلي
أسيل:شووو غاتلفيني بغيت نحسبهوم باش نحطهوم فالبنكة شحال قدهوم يبقاو فالدار طبعا ماشي كاملين غايشكو فيا غانهز غي النص واخا
بسمة:واخاا فهمت ايمتا غاتمشي
أسيل:غانمشي دبا ماما نااعسة غانمشي بالجرا اصلا نتي عارفة البنكة قريبة غانمشي نضربها بجرية ونجي
بسمة:ويلي امسخوطة ماخفتيش
أسيل:راه گلتليك ماغايوقع ليا والو الا فاقت ماما گولي ليها مشات للمخبزة تجيب كرواصة ولا لي كآن واخا (ناضتت بالجرا هزات صاكها وبدات تخشي فالرزمات ديال الفلوس حتا جمعات داكشي لي بغات وحطات شي كتوبة من الفوق لبسات حوايجها وسبرديلتها وناضتت بالجرا هزات شي صرف ومشات خرجات بلا حس باش ماتفيقش ماماها سدات الباب ديال الپرطمة من بعد ما خدات الساروت ومشات هبطات فالمصعد غير خرجات تنهدات وشدات فصاكها بيديها مزيان ومشات خرجات وكاتمشا بالزربة وغادة وفيما يبان ليها شي خيال قريب منها تبقا تمشا بالزربة ماوصلات للبنكة حتا حسات بروحها غاتخرج واخا قريبة دخلات بالزربة وماحسات حتا دخلات فشي حد بلا ماتهز راسها بدات تعتادر) سمحليا ماشفتكش (هزات راسها شافتو هي تبلع ريقها وحدرات راسها بالجرا باش مايقشعهاش)سمحليا
علاء:(كايشوف فيها وهو عرفها وقشعهاا شكون وتايشوف فيها كاتحاول زعما تحدر راسها وتخبي وجها بشعرها باش مايعرفهاش) ماشي مشكل
أسيل:(غير سمعات دك الكلمة مشات دغيا وخلاتو قضات الغاراض ديالها حطات الفلوس ديالها فالببنك غير سالات خرجات بالزربة وهي كاتنهد بإرتياح خرجات وبقات غادة بشوية عليها حتا وصلات للمخبزة مشات جابت كرواسة وحلوة ديال لاكربم ومشات رجعات للعمارة بشوية عليها دخلات ومشات) 
علاء:(من بعد ما مشيت للخدمة بقيت گالس شوية حتا تفكرت بلب خاصني نمشي للبنك خاصني نكمل شي حوايج تما وداكشي لي رت دخلت كملت الاستعلامات ديالي المالية عاد كنت باغي نخرج وماحسيت حتا دخل فيا شي حد او بالاحرى شي وحدة كانت صغيرة مقارنة مع الجسد ديالي تزعزعات وبدات تعتاادر ليا بغيت نهضر هي تهز راسها وانا نقشعها أسييل واخا حاولات تخبي وجها بشعرها هي تايصحابليها كانشوفها غير فالليل ملي كاتكون مبدلة مافراسهاش بلي انا وليت نعرفها مزيان كررات الاعتذار ديالها ورديت علها ومشات اما انا خرجت وبقيت كاندور حدا البنكة تما شوية غير سالات ومشيت دخلت من بعدها وقصدت واحد صاحبي خدام تم هضرت معاه وبقيت كانسولو بقيت عله حتا جاوبني وگاليا راه حطات 20 مليون عندهوم شي أملاك وبداو كايقسموها *أسيل فنانة في الكذب والاقناع لدرجة لي سمعها غايتيقها فالبلاصة وخصوصا هنايا ماشي شغلهوم المهم يديرو خدمتهوم 

......كمل علااء الهضرة مع صاحبو ومشا خرج تبع أسيل مشا فطريق العمارة ديالهم حتا شافها خرجات من المخبزة تخبا باش ماتشوفوش وتگول راه كايتبعها ماتهنا حتا شافها دخلات للعمارة عاد رجع فحالو)
أسيل:(طلعات فالمصعد ومشات دخلات لقات ماماها عاد فاقت مشات أسيل بدلات حوايجها وطمنات بسمة خرجات بسمة كاتعاون خديجة حطو كاسكروط وگلسو مع بعضياتهم دارو ماسكروط وهوما مجمعين وكايضحكو سالاو البنات غسلو الماعن ومشاو كولا وحدة شدات سداري البنات مكونيكطيين وخديجة كاتفرج فالافلام ديالها وصلات 8 ناضو البنات دارو سپاغيتي طابت وحطوها تعشاو ومشات خديجة بدلات حوايجها وقادات داكشي ديالها هزات الساروت وبدات توصي فالبنات ومن بعد مشات خرجات لخدمتها اما بسمة فهي كذلك مشات جبدات داكشي لي غادي تلبس ومشات بدات كادير ميكاپ ديالهاا سالات ومشات لبسات حوايجها گلسات واحد ربع ساعة وجا حمد اما أسيل فمابغاتش تمشي للبار ليوم إحتيااط وصافي وداكشي لي كان مشات بسمة وأسيل بقات سدات الباب ومشات بدات كاتفرج حتا طاح عليها الموقف ديالها قبيلة مع علاء) واااو فشكل اصحابني غانبقا نشوفو غا بالليل ساعة شفتو دبا حتا بالنهار ههه ياربي مايكونش عرفني اصلا ردة الفعل ديالو ماكان كايبان عله لا صدمة لا دهشة لا والو باينة ماغايعرفنيش مزياان نيت حسن😋 (بقات أسيل كاتكونيكطا حتا عيات وناضتت مشات راجعات شوية ومن بعد مشات ضرباتتها بنعسة اما بسمة من بعد ما سالات خدمتها وتيقنات بلي أسيل ضربات ضربتها وعرفات كيفاش تلعبها حيت ماكاين لي سول بقات كاضحك فخاطرها جا حمد ركبات بسمة ومشات للدار وهي مجمعة مع حمد لي گاليها راه بنتو غاتجي لغد له وگالتله بسمة يجيبها عندهوم حيت توحشاتها وصلات بسمة سلمات على حمد ومشات طلعات دخلات لقات أسيل ناعسة بدلات حوايجها وغسلات وجها ومشات تا هي تلاحت نعسات وهكا دازو الايااام دازت سيمانة أسيل هاد السيمانة كاملة ماعتبات البار حيت مامسالياش قراب عندها الامتحانات فمدرسة الطب داكشي علاش كانت كاتبقا باش تحفض ليوم كان الامتحان ديال الپيرمي عند البنات دوزو كاملين الكود نجحو فه بجوجات مزيان ومشاو للسوگان كذلك رجعو بالعشية فرحانين وأخيرا تهناو وبداو كايضحكو وأسيل كاتهضر) عرفتي خاصنا نبداو نجربو نخرجوو بطونوبيلاتتناا باش نتعلموو
بسمة:اويلي ولكن مزال ماتعلمنا راه دبا عاد شديناه
أسيل:ومالك اتبقاي غير حاطاه انا بعدا غانگولها لحمد نخرجو طونوبيل ونمشيو لشي بلاصة ويعلمني
بسمة:ههه بااز لك اختي
أسيل:ياختي بغيت تا انا نصوگ الحلم ديالي
بسمة:ماتخاافيش الحلم ديالك قرب يتحقق ههه (حسات بشي يد تحطات على كتفها دارت بالعرض البطيئ وهي تصدم صدمة العمر...)
💢عند البطل ديالنا💢
علاء:(من بعد داك النهار لي شافها فالبنك تيقن بلي موراها شي سر هي بالنسبة له لغز خاصو يكتااشفو وتيقن بلي كاتكدب ماكاين لا املاك لا والو هاد ليامات علي الاوضاع عندو مهدنة داكشي علاش ماعمرو مشا للبار مزال يعني علاء كدلك اصلا ولا كايشوف أسيل تقريبا بشكل يومي حيت كايدي ختو وبعض المرات كايجيبها وكايبقا يشوف أسيل كايرااقبها من بعيد قرر يدير خطوة البداية ومشا عند المديير ديال المدرسة حيت عندو معاه معرفة من خلال المكتبة ديالهم مشا عندو وبقا كاياكل له دماغو وقدر بكل سهولة يعرف المعلومات لي بغا على أسيل او بالاحرى لي قدر المدير اعطي له اما أسيل باقة مخبية شحال من حاجة سول العساس ديال العمارة من بعد ما عطاه شوية ديال الفلوس رشوة يعني عطاه العساس شوية ديال المعلومات لي عندو ساكنين بتلاتة مرا كبيرة فالسن ومن بعد وحدة عاد باش أسيل عرف علاء بلي كايديو مع بسمة حيت كايشوفها معاها بزاف ولكن لي صدمو هو العساس لي گاليه بهاد المعنى الحرفي *واقيلة المراا وبناتها خدامين فنفس الحرفة كولشي كايخدمو غا بالليل* علاء واخا عارف ولكن جاتو فشكل تصدم وكرهوم وكره خديجة مامات أسيل حيت عندو هي السباب وهي لي خلات بناتها امشيو فهاد الطريق وهي كادير داكشي ماعرفش بلي خديجة أشرف من الشرف هاد الفضول ديالو خلاه ادير شحال من حاجة ولكن هنا وصل به الامر للحد عافهاا وعاف البيئة ديالهم ومن داك النهار مابقا تبعهوم طلب من الله اسمح ليه على داكشي لي كان كايدير هاد ليامات)
💢عند بطلتنا💢
أسيل:(كانت كاتهضر وغادة كاتمشا حتا لاحضات بلي داوية بوحدها شافت فجنابها مالقاتش بسمة دارت موراها هي تلقا بسمة واقفة وواحد شادها من يدها وبسمة كاتبان عليها گاع اشكال الصدمة مشات بالجرا رجعات عندهوم وجرات يد بسمة منو وبدات كاتغوت عله وعلى بسمة لي بدات تبكي بهستيرية) شكووون نتتااا شنوو درتي ليهاا بسمة حبييبة شنو دار لك واش گااالك شيحاجة شكوون نتااا😡علاااش شديتيها واش ماكاتحشمش تفوو علييك ماكاتشوووفش حالتها المرا مجوجة وبراجلها ونتا شاد فيها

¤¤عند البنات ¤¤
اسيل :بسمة مالك شكون هذا؟؟
بسمة:(كاتشهق) اهئ اهئ أسييييل هاااداا هاادااا هووو...... 
أسيل:😳
بسمة: اش بغيتي لاش راجع طلقني طلقني اهئ😢
أسيل:(هزات عينيها مخنزرة فيه بالجهد شدات يدو و حيدتها على يد بسمة ) طلق منهاااااااا باشمن حق تشدها ...
.......: ونتي سوووقك اش دخلك بيني و بينها ...
أسيل:(هزات صبعها ) شووووف انكوليك جوج كلمات سير كلب بساعة خرا حسن ليك ...
.......: و لا مامشتيش اش غادي ديري ؟؟
اسيل: اندير صبعي في وذني و نجمع عليك امة سيدنا محمد و نشوهك ..
.......: خلعتني شكون نتي بعدااا باش تهضري؟
بسمة : أسيل صاافي سكتي.. يوووسف اش بغيتي؟؟
يوسف: بغيت نهضر معاااك ضروري ؟واش تزوجتي ؟
بسمة:(تصدمات من السؤال ديالو مقدراتش تجاوب)لا رد
يوسف: جاوبنيي عاااافاك اش داك الخاتم في يديك ..واش تزوجتي صافي😮
أسيل : (كتشوف في بسمة لحابسة دموعها و ماقادراش تجاوب) بسمة صاافي يا الله للدار راكي عيانة و شمس زيدي ..
يوسف: بسمة جاوبيني عافاك..
اسيل:(بغات تعتق موقف) شووف الله يرحم ليك باااك عطيها تيقااار هي ماشي مجبورة تجاوبك كيف عشتي حياتك تا هي عايشة حياتها فقلب 6 9 حسن ليك..
يوسف: بسمةة جاوبيني بسمة عاافاك كوليلي هادشي كذووب ..
اسيل:(جرات بسمة من يديها)زيدي بنادم مكيفهمش ...جرات أسيل بسمة و غير ضارو بسمة بداو كيهبطو دموعها بحال الشلال ...اسيل مزيرة على يديها حيث عارفها جرح ديالها تفتح ثاني خلاو موراهوم يوووسف حالتو لا تسوء على بسمة لدرجة دمعة سخونة هبطات من عينيه ...وتصدم من شاف الخاتم في يديها و زيد سكوتها و أسيل و الطريقة باش جاوبتو ...رجع ركب في لوطو ديالو و مشا بحالو ..اما البنات رجعو نيشان طلعو لبرطمة غير دخلو مشات بسمة كتجري لبيتها و سدات الباب عليها خلات اسيل موراها غير كتشوف سدات أسيل باب ديال برطمة و مشات كدق عليها ...
أسيل: (مخلوعة)بسمة فتحي لاش سااااادة عليك دبا فتحي....
بسمة :(كتبكي) اهئ اهئ اسيل صافي سيري بغيت نبقى بوووووحدي عاافاك😢😢😭
أسيل:بسمة كوتليك فتحي الباب علاش دبا كتبكي فتتتتحي متعصبينيش ..
بسمة: بغيت نبقى بووووووحدي او مابغيتش نهضر 😢
أسيل: وخا وخااا الالة و كلسي بكي تما بكي تا تفركعي لاش انفرع مخي معاااااك ...(زدحات الباب برجليها تا قفزات بسمة )تفووو على نهار غادة لبيتها تا كتخرج خديجة من الحمام كانت كتوضا باش تصلي ..
خديجة: ماالك صوتك واصل تا لاخر زنقة ...
أسيل: واللللو ماماليش..
خديجة : فين هي ختك ..
أسيل: منعرف منعرف سيري شوفي انا اندخل نتكا راسي كيضرني ..ضربات فيها اسيل و مشات دخلات بيتها و زدحات الباب ..
خديجة: الله يا ربي على مسعورة و مجنونة عطاني الله نمشي نشوف لاخرة على الله نفهم منها شي حاجة مشات خديجة كدق على بسمة..مسحات دموعها بسمة و حلات ليها الباب و طماناتها كاتليها مواقع والو ...غير اسيل معصبة شوية ..وصافي بقات اسيل متكية كتفكر كالعادة ديالهاااا شوية و هي ضرها ضرسة العقل الله كتنوض ناضت الحمام مشات فارماسي عبارة على بلاكار بيض معلق في حمام جيهة الباب من لور جبدات دوليبران و مشات كوزينة شرباتها و رجعات لقات ماماها ناعسة و مشات ثاني عند بسمة هاذ المرة لقات الباب محلول و دخلات لقاتها متكية و كتشوف في سقف ...سدات الباب عليهوم و مشات كلسات في جنبها حدا الناموسية ..بسمة حسات بيها و دارت للجيهة لوخرا ..
اسيل: بسمة ضوري عندي هنا نهضر معاك ...علاش كتهربي يا الله ضوري و الله غنوض نخرج و ديك ساعة من تجي تهضريني تكون هضرة خرا ..
بسمة:(ضارت عندها بعينين مدمعين) هانا اش بغيتي ؟؟
أسيل: علاش دبا كتبكي ..واش خايفة من شي حاجة ..باقا كتبغيه ؟؟
بسمة: لا غير من شتو ..تفكرت نهار كان هو وصاحبتي فوق عمارية تفكرت نهار عطيتو شرفي تفكرت شحال من حاجة ا أسيل جرجي تفتح من اول وجديد 😢
أسيل: (هزات يديها كدوزها على حنك بسمة) شوووفي فيااا لابغيتي تعيشي خاصك تنساي شي حاجة سميتها الماضي نهائيا سمعتي ...
بسمة: را كنحاول و لكن دبا عاوتاني من بان في حياتي تخربقت والله معرفت مندير
أسيل: اش كتفكري دبا ديري...
بسمة: لعارفة دبا هي خاصني نقلل من الخروج ديالي بالنهار و مخاصش يعرف فين كنخدم و لا حاملة و لا كذا ...و من الاحسن يبعد مني و مزيان من صحابليه انني متزوجة و خاصني نأكد ليه هاذ الفكرة ..
أسيل: واش معمرو غادي يعرف بلي عندو ولد ..
بسمة: لا ابداااا...عمرو غادي يعرف و دبا خاصني كيف قلتي نسا الماضي و نبدا صفحة جديدة فيها غير أنا وولدي ..
أسيل: ايوا اش غادي نكوليك الله يدير لفيها الخير انا معاك ...و نتي عارفة هادشي
بسمة:(ناضت عنقتها) عارفة لكاين سمحيلي احبيبة قبلية عصبتك ..
أسيل: واييه و زادت كملات عليا ضرسة العقل يخخ..
بسمة: ناس و ضرسة العقل و على الله ديري شي عقل بعدا😂😂😂
أسيل: مالي بنت ليك حمقة و لا كنقطع حوايجي في زنقة 😑
بسمة: لاواه مكلناش هكا نتي الالة بعقلك الله يا ودي...
أسيل: و هكاك😌
....ناضو البنات كيضحكو دغيا نساو مشاو الكوزينة وجدو كاسكروط و فيقو ماماهوم كلاو و ناضت كل وحدة و شنو كدير بحال كاع الايام لفاتو و هاكا دازت شهر في رمشة العين شنو وقع في هاذ شهر...؟؟
#يتبع....

أجزاء القصة
كايتنشرو القصص و الاجزاء كل يوم ابتداءا من 8 دالعشية بتوقيت المغرب
9isas maghribiya bdarija قصص مغربية بالدارجة قصص و روايات بالدارجة المغربية
DMCA.com Protection Status رخصة المشاع الابداعي