الساقطة و الملتزم الجزء 25

من تأليف لؤلؤة ذهبية وFati ica
2018

محتوى القصة



رواية الساقطة والملتزم

علااء:(من بعد عدة ساعات فيقوه باش يتغذا ناض غسل وجهو وتوضا صلا هو لول عاد هبط تغدا واخا غير كان كاينقب ولكن واليديه بززو عليه بقا كاياكل حتا شبع وناض رجع لبيت الضيااف متكي مدة وهو كايفكر فأسييل دازت تقريبا 6 شهور كيفاش غاتكون دبا كيفاش غاتبان وهي حااملة كيفاش قدرات تعيش بلا بيه هاد المدة بطبيعة الحال اتكون كاتكرهو دبا كيفاش غايدير إوااجهها وااش غايقدر يواجها بعدا باش من وجه غادي يشوف فيها ويگول ليها غلطت فحقك سمحيليا وهو براسو ماقادرش يسمح راسو غمض عينيه بحرقة وهو كايفكر شنو غايدير من هنا القداام تفكر هضرتها ملي گالتليه من الاحسن ماتجيش تقلب عليا ملي گالتليه غاتندم بزاف ديال الحوايج بقا كايفكر فكرة ديه وفكرة تجيبو حتا 💡 تفكر واحد الحاجة بلا مايحس ناااض وقف ومشا جبد حوايجو من داك الشاكوش لبسهوم دوز يدو على لحيتو وخرج هبط لقا الام ديالو گالسة كاتخمم هو يمشي گلس حداها) الواليدة *باس على يديها* شنو كاديري
عائشة:والو اولدي كانفكر فهادشي لي كايوقع أسسل غير خرجات من الدار تبدلتي تقلبتي كاملك مابقيتيش بحال لول ولكن الباارح صدمتيني شنوو وااقع اولدي شنو هادشي لي خلاك توصل لدك الحالة الباارح 
علاء:الواليدة ماعندك منااش تخاافي داكشي لي درت البارح كان بدون وعي مني اما بالنسبة لأسيل راها غير حاملة داكشي علاش كانت محتاجة باش تخرج وتبعد 
عائشة:ولكن بلاااتي بلاتي كيييفااش حاااملة اويلي
علاء:(جاتو اللقوة نساا بلي ماگال ليها والو وماعاود ليها والو) 😨 غيير
عائشة:وااش كنتي مخبيي عليااا كنتي مخبيي عليا بلي رااها حااااملة يااك اولدي هادي تربيتي فك
علاء:(حس بالادريناالين كايتدفق فالجسم ديالو بقا كايدور عينيه حتا نطق) الوااليدة سمعييني نتي عارفة أسييل راه انا ويااها مدة طوييلة باش مخاسمين راه تا انا بحااالك عرفت غير بالصدفة وزيد ملي سااافرتي راه ماهضرناش بزاااف داكشي علاش ماگلت لك والو وأسيل تا هي راه ماعرفات تا لهاد الاوااخر حيت گالتليا الاعراض ماجاوهاش نهائيااا وكون ما بززات عليها بسمة تمشي دوز راه گاع ماغادي نعرفو حيت كرشها نهائيا واش بانت فيها مالاحظات تا فرق (بقا علاء كايكدب يدخل ويخرج فالهضرة حتا قنع الام دياالو وأخيرا وتيقااتو ماعرفش كيفاش حتا زلقات له وفنفس الوقت كانت أحسن زلة لسان حيت كون گلس من بعد وعرفات الام ديالو شراها عندها استأذن منها وگاليها غايمشي يخرج يقضي شي غرض واخا عيات معاه مايخرجش حيت عاد خرج من المستشفى وخااصو يرتااح كيفما وصاه الطبيييب ولكن لا حياة لمن تناادي راسو قااسح وكايدير غير لي گاليه راسو وگاليها ماغايتعطلش خرج علاء ومشا ركب فلوطو ديالو والوجهة ديالو الپرطمة ديال أسييل من بعد عدة دقائق وصل علاء قدام العمارة بقا كايشوف فالعمارة مدة عاد تحرك مشا عند العساس وشد عندو الساروت الاحتياطي حيت كايعرفو مزيان خدا السوارت من بعد ما دور معاه ومشا طلع فالمصعد وصل للطبقة التالت وقف قدام الباب حل الباب غير بغا يدخل هو يشم واحد الريحة خايبة

بزاف سد نيفو ودخل ومشا دخل للكوزينة يشوف مصدر دك الريحة عرفها من لاپووبيل حل الشرجم ورجع حل لاپووبيل وشااف النفااخات والشرائط الملونة وداك الفانيد لي تايكون فوق الحلوة ااما الحلوة تآكلات وتعفنات وعطات ريحتها حيت الحاادگة أسيل نساااتها تما سد لاپووبيل وشد نيفو هزها بغا يمشي يرمي داكشي باش ماتبقاش الريحة وبااصدفة غير حركها طاحت واحد الورقة صغيرة مكمشة هزها وخباها فجيبو ومشا دا لاپووبيل حطها برا وعيط على العساس وطلب منو يرمي الزبل وداكشي لي دار رجع للدار ورش معطر الجو لي كان فالحمام على حساب الريحة دور وجهو بانت له البيت ديال خالتو شداتو رهبة فششكل خان الامانة وماوفاش بيها واخا وصاتو خالتو وكولشي ولكن غلط وماوفاش بيها حدر عينيه وهو كايحس بالندم كاياكل فييه مشا للصالة گلس شد راسو وعرف بلي أسييل بقاات هنا دك المدة قبل ماتمشي لبلاصة مجهولة ماعارفهاش كيفما كانت گالت ليه تفكر الورقة لي فجيبو هزها حلها هو يلقاها رسالة وبدا كايقراها *عقلتو الرساالة لي كانت كتبات أسييل لعلاء باش تعتااارف له بحبهااا* علاء كايقراا وهو مصدووم وعينيه خارجين مامتيقش رااسو قراها جوج مرات عاد تيق أسييل بصاح كاتبغيييه وعايقة به كايبغييها وكانت باغة تعتااارف له هادشي علاش كاينين دوك الشرائطة الملونة والفانيد والنفااخاات عرف بلي هادشي لي كانت كاتهضر عله ختوووو ولكن هو شنو دار هو تااهمها وطعنها فشرفهاا غمض عيينيه بحرقة وشد راااسو حس بالغللط دياالو وعرف شنووو دار وبلي ماشي من الساهل تسمح ليه واصلا هو ماعندوش الوجه لي مشي طلب منها السمااحة وماعارفاااش حتا فيين كاينة) اااخ منك ا علاء شنووو درتي غلطيي بزااف غلطيي بزاااف وااش كاتستاااحق تسمح لييك واش نتاا غاتسمح لرااسك بعدااا حمااار ا علاء حمااار الغييرة والشك عمااو لك عينيك أسيييل دبااا عمرها تسمح ليااا عمري نساا نظراتها ليااا نظرات حقد وكره عمرها ماغادي تسمح ليا اناا عااارف ومانستااهلش شنوو غااندير فيين غانلقااااهاااا حتا لابغيت نطلب منها السمااحة فينك ا أسييل فييينك ولكن هانا گااع لقييتها واخا ماعرفت شنو نگول ماغاديش تسمح لياا شنووو غادي نديير واش نخاي الاوضااع هكا ولكنن ولديي؟؟ هه ولدك علاء كادوي وكاتگوول ولدك نهار گاالتهاا لييك وشكيتي فييها وتاهمتيها وطعنتيها فشرفهاا مامانش ولدك دبا عاد ولا ولددك فااات الفوووت ا علاء فااات لااا ماافااتش وماغايفوووتش غاانلقاااك ا أسييل كانواااعدك غانلقااك قبل ماتكملي 9 شهوور وكانوااعدك غادي نعوضك وانا مستااعد نبووس لك رجلييك باش تسمحي لياا وترجعي ليااا واخا نعرف نبقاا لاصق فك حيااتك كااملهااا باش تسمحي ليااا غاالقاك ا أسييل غاالقاااك💔

علاء:(بقا مخشي فالدار كايقرا ويعاود فدك الورقة فالاخير حطها فجيبو ودااها معااه وخرج وعطا العسااس رزمة ديال الفلووس باش الا جاب الله صونات أسييل وسولاتو ولا شيحاجة مايگووليه والو ويلا هضرات معاه يگوولها له مشا للجامع هو لول توضا وصلا العصر وكان كايهضر مع الام دياالو فالتيليفون كايگووليها راه غايجي واحد الشوية بغا غير يرتااح غايمشي للبحر داز من حدا الكوميساارية تمااا تفكرر واحد الحاااجة وعرف منيين غايجبد رااس الخيييط 💡 قلب الضووورة بالجراا ومشا غادي والوجهة دياالو......)
♡عند البطلة دياالنا ♡
أسيل:(فاقت بالصباح كاتفوه قاست كرشها لي كانت منفوووخة وبحال الكرة واخا هي فشهرها السادس ولكن كرشها كبر منهاا كاتبان بحالا فشهرها التااسع حطات يدها على كرشها وهي كاضحك ناضتت من بلاصتها غا بزز باش كاتحرك دايرة كيف الكورة ناضتت خرجات من بيتها وهي كاتشمشم فالرائحة الزكية ديال الفطوور لي كاتقااد رقية شهوة منو فطور بلدي على حقو وطريقو رقية رجعات كاتحكم فيديها بجوج كاتحمد الله وكاتشكرو داكشي من عند الله جاها على غفلة ومشا على غفلة ورجعات كادير الروتين دياالها المعتااد صاوبات الفطور شهوة منو العسل الحر والزبدة البلدية والبيض البلدي هادو كاملين ممن المميزات ديال هاد المهنة لي كادير رقية فهاد القرية النااس بسطاء وخدامين بزاف على الزراعة وتربية الماشية وملب كابجي عندها شي حد كايجيب ليها البيض ولا العسل ولا الحليب ولا اللبن داكشي طبيعي 100% وهادشي لي خلا أسيل تعلق بهاد المنطقة بزاف دغيا دخلات الخاطر ديال النااس هنايا كاتعااما معااهم كتر من مزيان وتلعب مع الدراري وتصاايب الحلوة وتفرقها عليهم بزاف ديال الحوايج خلاو أسيل ماتبغييش مزال تمشي من هاد البلاصة واخا هي وشحال من واحد لاحظها فيها كترة الشروود ديااالهاا واخا دك الحيوية ديالها والضحكة لي ماكاتفاارقش وجها ولكن حزن دفييين مخبي ورا دك الضحكة وهادشي شحال من واحد لاحضوو واخا كاتحاول تخبي ولكن ماكاتقدرش ورقية ديما كاتنصحهاا وتگوليها تهضر مع راجلها وأسيل رافضة الفكرة تماما واخا هي متيقنة بلي غايجي النهار ويعرف علاء الحقيقة ويقلب عليها ومايلقاهاش الولد كايبقا ولدو وعمرها ماغاتنكر هاد الحقيقة ولا تبدلها حيت هي كبرات يتيمة مابغاتش ولدها ولا بنتها يجرب

📚نفس الاحساس داكشي علاش تعمدات تخلي أمينة وعبد الهادي عارفين حيت غايجي النهار لي غادي يقلب عليها علاء وهادو هوما لي غايكونو الورقة الرابحة ديالها وهوما لي غايوريه الطريق كيفاش يوصل ليها وخلات الوقت هو لي يحكم بيناتهم حيت دعوة الظاالم كاتوصل كاتوصل وغايعرف الحقيقة ويلا كان نكرها هو الله ياخد فه الحق ولكن واخا هكاك متيقة بلي ماعاقلش ردة الفعل ديالو كانت مختلفة داوي من نيتو مابايناش فه ناوي شيحاجة خرا وداكشي لي عرفات عله فهاد المدة لي تعاشرات معاه كذلك خلاها تيق بلي ماعارفش ولا ماعاقلش كيفاش وعلاش الله وعلم ولكن الوقت هو لي غايحكم بيناتهم ومن دبا كاتوجد له العقااب دياااالو لي غايكون عسيييير حيت حاقدة عله ديال بصاح وفنفس الوقت كاتحااول تنسااه واخااا عارفة هادشي صعييب وشبه مستحيل ولكن الا تعطل بزااف ماغاتبقااش عندو بلاصة فقلبها عطاتو مهلة 9 شهور حتا تولد الا ماجاش عمرها ماغادي ترجع معاه مزال عند بالها هوما طلقو دبا وكاتمنا يرجع قبل ماتكمل العدة ديالها مابقاش بزاف مشات أسيل دخلات الحمام وعقلها فداك الفطور دغيا غسلات وجها وقضات حاجتها غي بسيييف شادة كرشها بجوج يدين حيت الطواليط تقليدية كاتعدبها طرفات حالتها وخرجات مشات تكوانات فدك الصالة گالسة قدام الطبلة والريووگ كايسيلو جابت رقية براد ديال أتاي مشحر بالنعناع لي زارعة فالبحيرة ديالها وحطاتو وبدات كاتكب فالكيسان اما أسيل ماعارفاش منين تبدا ها الجبن ها العسل البيض الزيت البدلية المسمن والبطبووط معمر غير عطاتها رقية الكاس جغمات منو كايحمقها أتاي ديالها بدات كاتاكل من هنا ومن لهيه ورقية كاضحك عليها كلات تا شبعات وناضتت كاتجمع الماعن واخا رقية مابغاتش تخليها مشات أسيل للبيت لي گالسة فه جبدات واحد الكسوة طوييلة وواااسعة مزيرة من جيهة الصدر وواسعة من التحت لبساتها ولبسات ملابسها الداخلية من غير السوتيامات حيت صدرها بدا كايضرها كاتللبس غير ديال التوب لبسات كسوتها ولاحت من فوقها واحد الكااپ طويل تا هو جمعات شعرها سفنجة ولبسات شال فلون الكسوة اااه أسيل رجعات كادير الحجاب من نهار حلمات بواحد الملاك جاها فمنامها جاتها بحال الام ديالها ديالها واخا ماشافتش وجها حلمات بيها من قبل وهي كاتگووليها كولشي غايكون بيخير وكاتفكر هضرتها هي وياها كاتگووليها طهلاي فولادك وماتخليهمش يتحرمو من بااهم وكاتگووليها رااه الطريق قدامك غاترجع منورة خاصها تكمل فطريق الهداية لي تبعات بداتو مع علاء وكملاتو بوحدهااا وفرحانة واخا فلول كايعنكشها ولكن من بعد ولفاتو دارتو شي شهرين هادي لبسات سبرديلة ومشات سلمات على رقية وغسلات سنانها وخرجات كاتمشا غادة نيشان لدك البحيرة ديال رقية شدات بلاصتها المعتادة تما ولفات كاتجي ليها ديمت كاتشم الهوا النقي وريحة النعناع دوزات وقتها كامل تقريبا هنايا حتا قرب الغدا ورجعات للدار عاونات رقية حتا قادو الغدا ودن الضهر صلاو بجوجات وتغداو غسلات اسيل المااعن مشات تكات شوية وناضتت لبسات حوايجها وسمعات الدقان وبدات الرووتين ديالها اليومي كولا نهار كايجي عندها شي واحد الا مرض ولا شيحاجة وهي معاوناها قرايتها وكاتفكر فالمستقبل تفتح عيادة ديالها وتقسمها على جوج تكون عيادة ديال الطب العاام ودير فالنص لاخور الطب البديل هاكا دوزات هاد الاشهر كااملين كولا نهار كايجي عندها واحد ولا جوج ولا تلاتة من بعد مادوزات ليزيگزام ديالها ماعمرها عتباات قنيطرة مزال خدها كاتمشي لمكناس كاتقضا راسها وللدار لقات راحتها هنايا نخليو أسيل تكمل نهارهاا.....) 

علاء:(واااقف حدا مكتب الاستقبال فالبيرو ديال المحامي لي خدات أسييل على حساب القضية ديالها كان مضططر باش يتسنا حيت عندو شي واحد فالبيرو وهاديك لي فالاستقبال مابغاتش تخليه يدخل بقا كيتسنا حتا بان ليه واحد الشخص خرج من البيرو ومشا هو بلا مايتسوق لهاديك لي كاتغوت من موراه ودخل لعندو هاداك غير هز راسو هو يتصدم أكييد عاااقل علييه وعاااقل مزياان على شنوو دار فمراتو بدا كايصفاار وبلا ماايحس نطق) 
المحامي:ماادرت وااالو😨 سمحليياااا ماقصتش نااخد فلووسها غير الطمع غرني الطمع سمحليااا والله غانرد ليكم فلووسكم....
علاء:(فهم القالب وعرف بلي دار شيحاجة مع أسيل وخدا ليها فلوسها بااطل وكذب عليها) غررك الطمعععع هضرتيي معااهاا شنوو گلتيي ليييهااا 
المحامي:والله غير الطمع.... 
علاء:وااش هي عاارفة بلي ماابغيتش نطلق منهاااا😡 وااش عاارفة بلي ماطلقنااش ولا لاا
المحامي:لاا لا ماعارفاش اصحابها دبا طلقتو كنت خديت من عندها شي فلوس والله غير غرني الطمع وصااافي حيت ملي عطيتيني نتا طمعت كتر وكدبت عليها وهاد الشهر لي فات مابقيتش كانجاوبها
علاء:(كان باغ ينوض له يفرشخو ولكن ماقدرش حيت علاء هو لي بدا وعطااه الفرصة كيفاااش ولكن ماتحكمش فاللعصااب ديالو ومشا شنق عله) وااش جات لعندددك هناايا
المحامي:لاا غير سيفطااتهم ليا وصاافي
علاء:فيين سيفطاتهم لك من اشمن بلاصة (شنق علااء على المحامي وهاداك بدا كايسرسب له وعرف بلي سيفطات أسيل الفلوس من مكنااس خرج من عند داك المحامي من بعد ماعطاه واحد التصرفييقة فاعلة تاركة وخرج مشا ركب فلوطو ديالو وبقا كايفكر) أسييل مكناااس شنو كااديري فمكناااس عند من مشااات واش كاتعرف شي واحد تماا اوووف دبا بحالا كانقلب على إبرة وسط كومة قش اوووف (مشا علااء رجع للڤيلا هكا دوز واحد اليووماين سااكت ماكايهضرش حيت عارف الا بغا يمشي لشي بلاصة ماغايخليوهش غير دازو دوك اليوماين قنعهوم علاء واخا الام ديالو مابغاتش ولكن أصر عليها وگاليها راه ولا بيخير وجد راسو والغد له شد الطريق لمكنااس وصل بالعشية مشا شد غرفة فواحد الاوطيل وخرج بالليل كايدور صلا فالجامع ورجع لوطيل والغدليه غير فطر خرج كايقلب عليها هكا داازت 15 يوووم على علاء ماخلا فين قلب فمكناااس وبعض المرات كايسول حتا العيالات وداكشي واش عمرهوم شافوها مشا البووسطة فين حولات الفلوس المحامي وماعطااوهش راس الخيط حيت ماعندهوم تا شي معلومة بقا علاء غادي كاتسركل عيا وگلس فواحد القهوة وشد عصير حيت الجو سخون سمع تيليفونو كايصوني هز التيليفون هو يلقاها نمرة أماني) الوو السلام عليكم 
أماني:وعليكم السلام علاء لاباس علك بيخير
علاء:وي حمد الله ونتي لاباس علك عبد الهادي ويعقوب
أماني:حمد الله سول فك الخير خويا علاء بغيت نسولك أيييل هضرتي معاها ليوم كانصوني عليها ماكاتجاوبش بغيت غير نگوليها.... 
علاء:بلاتي بلاتي كيفاش ليوم واش كاتهضري معاها
أماني:ههه ااه بطبيعة الحال كيفاش مافهمتش
علاء:لا لا والو 
أماني:ااه كنت غير بغيت نگووليها راه عبد الهادي غايجي لغد له يطل على الواليدة دياالو 
علاء:وااش أسيل كاينة عند الام ديال عبد الهادي
أماني:بلاتي كيفاش ياك عارف علاء شنو كاتگول
علاء:(شرح لأماني بلي أسيل شحال هادي ماهضر معاها بسباب واحد المشكل مادخلش فالتفاصيل عرفات أماني بلي أسيل قاولباتها وضحكات من قلبها ومن بعد عطات لعلاء المعلومات ووراتو بلاصتها زعما ترد ليها الصرف واخا كانت گالت ليه يصبر حتا يجي عبد الهادي ولكن ماقدرش طلب منها تنعت ليه عطاتو عبد الهادي لي عطاه النعت بالتفااصيل علاء رجع الاوطيل بالجرا خلص حسابو وجمع حوايجو وخرج باش يشد الطريق وفلدااخل ديالو حاس بلي غايشوفها ليوم غادي بالجرا وتابع النعت ديال عبد الهادي حتا قرب لدك القرية هو يشوف واحد المرا حاملة وكشرها كبيرة لابسة زيف وسروال دجين وقاميجة من فوقو واسعة كاتبين كرشها كان باغي يوقف حيت كاتشبه لأسيل بزاف نفس الطولة نفس الفورمة ولكن الكرش كبيرة بزاف على العمر ديال البيبي ولابسة الفولار كان غاديي حتا شافها داارت هي نفس الملامح هي وقف علاء بالجرا وهابط كايحس برعشة سارت فالجسد ديالو كامل وخطواتو بطيئة حتا وصل حداها اما هي كانت كاتشرب واحد العصير فيدهاا ماشافتوش وماعرفاتش كيفاش حتا زلق الكاس وتشخشخ فلارض دارت كاتعاير فخاطرها هي تصدم صدمة العمر ملي لقاتو وراها) 

‎أسيل:😱
‎علاء:أسيييل
‎أسييل:شكادير هناا
‎علاء:أسييل بغييت نهضر معااك شحاال وانا نقلبب علييك
‎أسيل:(قلبات سيفتها من الصدمة الى الغضب) پفف وانا نعيييق مال النهار هكا منحوووس لاش جااي لاااش غادي غير تنكد عليا حياااتي تاني اووف نهار منحووس ياربي السلاااامة وجايب نحسك تا لعندي تاني عاد كنت عايشة بيخير النهاار بااين من لول دبالو كيدااير ييخ (قلبات وجها وبغات تمشي حتا حسات به شدها من يدها هي دور بالجرا نطرات يدها منو) ماااتقيييسننييييش بااش من حق تقيييسني ماااكاتجيني والو مااتقييسنييش😡حراااام فهمتي حراام تقييسني اسي الملتزم هاادشي خااصك تكوون عارفو
‎علاء:أسييل عافاك سمعيني انا ويااك راه مامطلقينش راكي حلال عليا
‎أسيل:😳كييفااش ماايمكنش مااالك كدااااب😡
‎علاء:عاارف عطيتي الفلوس المحامي وداكشي ولكن انا راه عطيتهوم له قبل منك عطيتو الفلوس باش يسد القضية راه هاد القضية عمرها وصلات المحكمة
‎أسيل:كيييفااش زعما كلاني ففلوووووسيي؟؟؟؟
‎علاء:ااااه انا غانرجعهوم لك 
‎أسيل:ونتاا سوووقك ماالك عالاقل هو كلاني غا ففلوسي مااشي بحااالك سيير رجع منين جيتي ونسا واش كاتعرف شي وحدة سميتها أسيييل والطلاااق هو لي غايكووون ياك گلتي براتك غاتوصلك ماشفت والو انا فيينها داكشي علاااش انا لي غانگووولها للييك سير راك مطلق براتك غاتوصلك

‎علاء:أسييل عااافاااك سمعيينييي 5 دقاايق لي بغيت من وقتك ومن بعد تقدري تحكمي لا ماكانتش على قبلي على قبل ولدنا عالاقل
‎أسيل:(عرفاااتو بلي عرف بالحقييقة ولا عتاارف بالحقيقة دبااا ولكن...) وللددك فيين عندك شيي ولددد نتااااا علاه عمرك قستيني ياك گلتي انا ماشي بنت ملي تجوجت بييك عطييني بالتيييسااع كرهتك وكرهت حتا الشووفة فك ييخ وجهك كايقطع الرزق دباا عاد رجع ولدك داك النهااار مااكانش (تنهدااات كاتحاول تحكم فراسها وفالعصبية ديالها) على أي انا ماغانكوونش ضااالمة بحااالك ومااغانخلييش وولدي ولا بنتي يكون يتييم الاب ولدك هادا ولا بنتك مهم من بعد مايتزاد ان شاء الله ونهضرو ايمتا تقدر تجي تشوفو وايمتا لا مهم داكشي من بعد تايتزااد ونهضرو دبا مابقا عندنا فاش نهضرو صافي (دارت باش تمشي هي تسمع كلمة خلاتها تحبس بلاصتها) 
‎علاء:أسييل سمحيييليااااا سمحيييليييا كنت حمااار انا عاارف 15 يوم هازي ولا كتر واما كانقلب علك مااخليت قنط فمكنااااس ملي عرفتك نتي كنتي تماا غير بالصدفة عرفتك كااينة هناااياا عاافاك سمحيليا عارف رااسي غلط فحقك بزاااااف ونستااهل اي حاااجة ديريها فيا ولكن سمحيليا عالأقل غير عطيني فرصة نشرح لك وصاافي وديكساعات حكمي
‎أسيل:(دارت عندو بالعرض البطيئ ونطقات كادوي ببرود) شنوووو غانفهم شنوو غاتشرح نكرتي ولدنا هادي لولة تاهمتيني وشكيتي فيا هادي التانية طعنتيني فشرفي هنتيني ومرمدتي بيا الارض جرحتي كرامتي وكبريائي شنووو غاتشرح مزاال
‎علاء:(شدها من يدها)عاافاك گلسي وسمعيني غانشرح لك كولشي
‎أسيل:(نطرات يدها وغوبشات وگلسات مطلعة شوكتها اما علاء قرض قدامها وبدا كايهضر)
‎علاء:أسيل انا والله كون كنت عاقل على ديك الليلة عمري ماكنت غانگولك دك النضرة لعكس غانكون أسعد إنسان فهاد الدنيا ضلمتك وماسمعتش منك عارف انا عرفت يوسف شكون وعرفت بلي كنت اكبر حمااار ولكن خاصك تعرفي بلي داك النهار ماكنتش فوعيي (عاود ليها علاء من لول تا لخر وداكشي لي گاليه علي)هادشي لي وقع انا ماكنتش فوعيي
‎أسيل:(كاتفكر فدك الليلة وكاتفكر تصرفاتو لي زادو أكدو ليها هادشي لي كايگول بقات كاتفكر وكاتشوف فيه وكاتشوف فكرشها ماتنكرش بلي فرحات وبلي الحدس ديالها طلع صحيح وعلاء ماشي دنبو ولكن..) احم ااه ومن بعد هادشي لي گلتي دبا بنضاارك اقدر إصحح هاد الاشهر كااملة عرفتي شحاال من مرة فقت انا بالليل بسبااب الوحم عرفتي شحال من مرة كانتشها الحاجة وماكالقاهاش وكانبقا نبكي الليل كاملو غير يطلع الصبااح نخرج نجري نجييبها عرفتي شناهيا تحس بلي راك غير ضيف عند شي وااحد ماكاينش فداارك وماتقدرش ترجع تحس بلي متقل عله واش عمرك حسيتي بالوحدة كاتقتلك بزااف ا علاء وهاد الكلمة وهاد التبرير لي گلتي شنوو بدل واالو حيد هاد 6 شهور من حياااتيي لا نهائياا كول ما كانتفكر هضرتك كانتقطع من الداخل راك دبحتيني ا علاء دبحتيني وانا حية خرجتي عليا وخرجتي علك حيت ماكاتصبرش ومتسرع مهم الهضرة كتيرة وانا ماعنديش ليها الوقت انا ماغانديرش بحالك وغاندير داكشي لي وصانا عله الله والرسول صلى الله عليه وسلم ولدك ماغانحرمكش منو وماغاديش نطلق منك على قبل ولدناا صاافي 
‎علاء:ونتيي!!!
‎أسيل:انا نساااني كيفما ماكنتش فحياتك هاد 6 شهوور كمل بلا بيا لي بقاا
‎علاء:ماانقدرش أسييل اناااا
‎أسيل:شنوو
‎علاء:اناا كانبغييك ا أسييل عمري حسييت بشيحاجة بحال هادي دخلتي لقلبي بلا مانحس كانبغييك من شحال هادي وعمري تجرأت نعتااارف لك ولكن كانبغيك بصاح الغيااب ديالك كان كايقتلني واخا كنت راسم فبالي حاجة ولكن توحشتك بزااااااف توحشت نبقا نشوف فك ونتي كاتفنني فإراائي وانا نفيق فالصباح نجري باش ندوش توحت نشم ريحتك حداايا توحشت نشوفك كادوري وتهضري ودخلي وتخرجي فالهضرة توحشت نعس وانا مقابل معااك توحشتك ا أسييل انا بصااح كاانبغيك وفت الحب لديك الجيييييهة كاانبغيك ا أسييييل وكاانموووت علك ماتخليينيييش
‎أسيل:انا لااا ونزيدك نتا لي خليتيني ماشي اانا (ناضتت أسيل عطاتو بالضهر وهي لداخل كاتنقز فرحانة وكاتبتااسم بشر حتا سمعاتو كايقرا عليها راساالتها لي كانت بغات تعتارف له فيها وهي تعض على شناايفها بالفقصة ودارت عندو) 
‎علاء:(سالا وجمع الورقة) نتي ماكاتبغينيش؟؟
‎أسيل:كناا وكنتو صرناا وصرتووو
‎علاء:أسييل...
‎أسيل:بعدد منيي ييييخ(مشات أسيل غادة وكاتزرب فالمشية وشادة كرشها بيدها خايفاها طيح ههه وعلاء ماعرف مايدير تبعها ولكن الطونوبيل مشا جاب الطوونوبيل بالجرا لقاها طاارت غبراااات بقا كايتفقص ومتوتر حتا حس بشي حد كايدق عله من الجاج)

علاء:(شاف فالزاج هو يلقا واحد الدري صغير كايدق عله هبط الزاج وشاف فه)
الدري:عمي عمي 
علااء:نعام اولدي
الدري:گالتلك خالتي أسيل تبعها
علاء:😳كاتعرفهاا فين كااينة
الدري:راااها فالدار ديال خااالتي رقية
علاء:خالتك رقية اجي ديني لعندها راني ماعرفتش فيينها طلع ركب
الدري:واخا (ركب الدري حدا علاء وكاينعت له حتا وصلو حدا واحد مول الحانوت تما مجموعين عله قشلة ديال البراهش الصغار علاء مافهم والو) غانديك ولكن حتااا تشري ليا انا وصحاابي الحلوة 
علاء:؟؟؟
الدري:خالتي أسيل گالتليا انا وصاحبي نجمعو الدراري حدا الحانوت وانا نجي نعت لك فين كاينة وقبل ماتوصل خاصك تشري لينا الحولة وبيمو
علاء:(شاف فالحانوت لقاها عامرة بالبرااهش ومع هي صغييورة كملات بدا علاء كايضحك بالفقصة عرف راسو قفرها عندهاا وهادشي شوية من بزاف لي جاي سكت الطونوبيل وهبط كايحل فپزطامو والدراري كايغوتو فرحانين تنهد علااء ومشا دخل عند مول الحانوت والداري كايغوتو حداه هادا لا هادا تنهد وخدا ليهم بزااف جمعو فميكة هو وداانون هز الميكة عطاها ليهم شدوها الدراري فرحانين عاجبهوم الحال شدوها وقسمو داكشي بيناتهم وعلاء كايتقلا بغا غير ايمتا ينعت له الولد جا عندو داك الدري الصغير تاني كايعض فبيمو وگااليه راه الدار كاييينة لهييه خلاوها للفوق نعت له البلاصة بالضبط حتا عرف فين ومشا)
علاء:الداار كاينة لهييه وجابني لهنااااايااا اوف اعوذ بالله من الشيطان الرجيم الصبر يا الله الصبر
أسيل:(ضربات فعلاء وزادت من بعد ماقشعات لوطو ديالو شافتو غادي جيهتها كايجري هي تخبا ورا واحد الحيط جاو واحد جوج دراري صغار كاتعرفهوم وعيطات عليهم) ممم شوووفو بغييتو تاكلو الحلوة ودانون
الدراري:اااه😍
أسيل:اوا صافي وااحد فييككم غايمشي عند هاداك الرااجل لهييه داك المعقد لي عاقد حجبااانوو ياك وغايگوله گالتليك خالتي أسييل تبعها ولاخور غايمشي يجري للحانوت يجمع الدراري لاخرين غايشري لييكم بزاف ديال الحلوة صاافي 
الدراري:ااه واخا اخالتي
أسيل:من بعد ماتركب معاه اولدي بقا تنعت ليه حتا توصلو عند الحانوت صافي ومن بعد مايشري ليكم عاد نعت له الدار ديال خالتي رقية فين كاينة صاافي
الدري:واخا اخالتي 
أسيل:(كاتشوف بشر فالدري لي مشاا كايجري لعند علاء اما هي شدات كرشها لي بحال الكورة وكاتمشا بشوية عليها حيت عارفة الحانوت بعييدة على الدار خدات راحتها كاتمشا من بعد ما كسيرا علاء وهي بقات غادة بشوية عليها حتا وصلات للدار دخلات سلمات على خالتها وبدات تجمع فحوايجهاا حتا سالات هي تمشي للكوزينة عند رقية) خالتي بغيت نهضر معاك عافاك 
رقية:الله يسمعنا خبار الخير
أسيل:خالتي راجلي جاا يقلب عليا 
رقية:داكشي علاش جاية فرحاانة ههه باينة وجهك منور
أسيل:ههه خالتي غابخصني نمشي معاه 
رقية:عارفة لي كاين ابنتي عبد الهادي غايجي غدا سيري ابنتي عيشي حياتك وكوني متيقنة بلي راجلك كون ماكانش كايبغيك مايجيش اقلب علك 
أسيل:ان شاء الله اخابتي مااخاافيش عليا (خرجات أسيل للصالة بشوية عليها وكاتبتاااسم بشر صاافي غاتبداا العقاااب ديالها)😈قفرتبيها اوليدي ا علاء طحتي مع جلاخة كنت كانجمع ليك من شحااال هااادي گااليك توحشني توحشك جنية دبا تشوف لا ماديتك تا للبحر ورجعتك عطشان مانتسمااش انا أسييل (گلسات أسيل كاتبلاني مع راسها كيفاش غاتنتاااقم منوو باش غاتبدا وداكشي حتا سمعات الدقان تمشات بشوية عليها طلات من الشرجم هي تلقا علاء كايشوف فيها) 
علاء:(من بعد ماتبع النعت ديال الدري تلف وسول واحد الراجل لي نعت ليه بالتفصيل وصل قدام الدار وقف الطونوبيل وخرج كايدق فالباب وبقا كايشوف فالشرجم حتا طلات عليه أسيل)
أسيل:احم نعاام اسييدي شنووو بغييتي كاتقلب على شي واحد
علاء:أسييل باراكة من هاادشي هبطي غير نهضر معاك
أسيل:سيير اسيدي الله يسهل علييك راه حتاا عيالات وحداانيات ماكانهضروش مع البرااني 
علاء:(ماكرهش اطير عندها يقجها حيت عارفها غير كاتستاافزو بقا كايتنهد وكايحاول يبرد) أسييل شوووفي غير حلي ياااك نهضرو وديكساعات لديري لي بغيتي
أسيل:واش ماكاتسمعش اوييلي انا راني مرت الرااجل سير بعد مني
علاء:😈ممم يعني باقي معتاابراني رااجلك
أسيل:(تشوكات وخرجات عينيها فه مخنزرة كاتقلب على الجواب فدماغها باش تحرگو كيفما حرگها) احم شكوون گاليك نتا هو داك الرااجل 
علاء:💣أسيييل حليييي هااد البااااب
أسيل:(الله بغات تهضر تزيد تفقصو حتا سمعات الباب لتحت تحل هي تصدم ورجعات اللور لقات الكووزينة خاوية عرفاتها رقية لي مشات حلات ليه گلسات فالصاالة مربعة يديها مخنزرة حيت خسرات ليها خالتها بلانها) 
علاء:(سمع الباب تحل هو يلقا مرا كبيرة فالعمر باين عليها الطيييبة بزاف وكادخل للخاطر غا من الشوووفة)
رقية:نتا هو علاء اولدي ياك
علاء:ااه 
رقية:دخل اولدي مراتك راها الفووق راها كاتسنااك عزيتي عليا مابغيتش نخليك كاتقلا فهاد الشمش دخل اولدي تغدا
علاء:(باس ليها فوق راسها) الله يكتر خيرك اخالتي وسمحيليا جيت بيديا خاويين راكي عارفة وخايف دبا نمشي للحانوت ونصدق ماعنديش الزهر بحال هاد المرة وماتخلينيش مزال ندخل
رقية:هههه غير دخل اولدي ماتحتاااجش دخل دخل

علاء:(دخل وهو حشمان الصواب زعما سدات رقية الباب وگالتليه يطلع طلعات هي سبقاتو وهو موراها حتا طلع لدك الصالة فين گالسة أسيل وكايشوف فيها بنظرة إنتصار زعما هاني غلبتك)
رقية:گلس اولدي خود راحتك الدار داارك
أسيل:(بقات كاتنگر بوحدها مفقووصة عاد كانت كاضحك ساعة طلع ربعات يديها قالبة وجها وهو گالس بعيد عليها حتا سمعات) 
رقية:نووضي ابنتي جيبي لراجلك شيحاجة يشربها راه باينة فه مسكين مالقا الدار حتا شحف والشمش حارة
أسيل:😳😑 (ناضتت بلا ماتجاوبها مفقووصة مشات للكوزينة) 
رقية:رتاح اولدي ديرني بحال الواليدة ديالك الله يخليها لك
علاء:شكرا اخالتي ربي يخليك (بقا علاء كايدور فعينيه حتا نطق) خالتي انا بغيت نگوولك الله يكتر خيرك وبغيت نشركرك حيت دخلتي أسييل لدارك والله قلال الناس لي بحالك
رقية:ماشي مشكل اولدي اسيل بحال بنتي ونتا راك بحال ولدي ولكن اولدي لي درتيه راه ماشي فعايل الرجال هاادوك مراتك وولدك خاصك تكون قاد بيهم وبمسؤووليتهم 
علااء:(حدر راسو حشمان)
رقية:مراتك اولدي 6 شهور وهي برا دارها وبرا مدينتهاا بسباابك انا عااارفة بلي ماخرجات تا كان شي مشكل كبير نيت وأسيل هادشي لي دوزت معاها خلاني نعرفها مزيان مرا ديال الدار ونتا باينة فك ولد النااس ماتخلييوش المشااكل تغلبكووم راه الزوااج هو هادا الزواج اولدي ماشي لعب والاهم الولااد نتا دبا قريب يتزااد عندكوم ولد ولا بنت خاصو ملي اجي لهاد الدنيا يلقا واليديه مصاالحين ويلقا بيئة يعيش فيها لي تكون زوينة ونتوما زعما راكم مامدوزينش القليل باش ملي وصلتو للمعقول عاد تبداو تلعبو سمعني اولدي أسييل بنت لي قلبها كبيير صااافي انا عاارفة بلي دبا غايكون صعيييب علك تخليها تسمح لك ولكن خاصك تحاول وماتستسلمش هي بنت لي قلبها كبير ولكن تجرحات منك بلا قياااس شحال من ليلة سمعتها كاتبكي ولغد ليه عينيها يصبحو منفووخين وتبقا ضحك بحالا ماوقع والو جرحهاا لدااخل نتا اولدي لي جرحتيها ونتا الوحيد لي تقدر داويها الله يكمل عليكم بالخير اوليداتي ولكن خاصك دير عقلك راه التييقة والاحترام هوما من الحوايج الضروريين لي خاص يتبنا عليهم الزوااج عاد تجي المحبة فهمتيني أسييل ديرها فعينيك وماعمرك تجرحها مزال حيت هاد المرة ماغانخلييكش ترجع تديها ملي اتناادم معاك الحال
علاء:(باس ليها على يدها كايشكرها وهو حشماان)
أسيل:(جايبة كاس ديال الما فيديها وبغات تدخل حتا سمعاتهم كايهضرو وبقات كاتسنط عليهم عجبها الحال حساات بحالا شي واحد واقف معاها وهي بقات وحيدة لا أم لا أب ولكن الهضرة ديال رقية خلاتها تحس بلي كاين معاها شي واحد لي غايوقف معاها تنهدات ودخلات مغوبشة كاتخنزر عطاتو كاس ديال العصير ورجعات للكوزينة كاتقاد الغدا تبعاتها رقية قادو الغداا وأسيل دارت شلاضة قادو كولشي وحطو الغدا وگلسو كايتغداو من بعد ما سالاو مشات أسيل غسلات الماعن وتوضات وصلات وعلاء كذلك اما رقية ديجا كانت صلات من بعد دارت أسيل القهوة وجات حطاتها فالصاالة تا شربوها مجموعين من بعد ستأذنات منهوم رقية باش تخلييهم يهضرو فرااحتهم اما أسيل بقات شادة الكاس ديال القهوة فيديها كادور فه وهي سااهية) 
علااء:(كايشوف فأسيل وكايحاول يقرا أفكاارها بغا يعرف فاش كاتفكر وشنو باغة دير) أسييل!!!
أسيل:شوو خليني نفكر مم دباا العيد الكبيير بقات ليه سيمانة يااك
علاء:😳ااه
أسيل:ممم انگووليك شنو غايوقع دبا انا غانمشي معاك وغارجعو للڤييلا غاندوزو معاهم العيد ومورا العيد سيمانة وغانمشيو لأپاارطوووموو مهم غانمشيو لديالي
علاء:لا نمشيو لديالي انا
أسيل:ماكايهمنيش لمهم غانمشيو من بعد انا وياك غانكونو بحال الغرباء ماكاتعرفني ماكانعرفك لمهم هو تكلف بيا وبمصروفي ولا خصاتني شيحاجة انجي نگوولها ليك ولا مساج صافي نخرج وقتما بغيت ندخل وقتما بغيت شغلي هاداك مابقاش شغلك نتاا فهمتي
علاء:ولكن....
أسيل:انا هضرت وونتا ليك الحرية تقرر شنو بغيتي دير 
علاء:امري لله واخا لي بغيتي شيحاجة خرا
أسيل:اااه مع خالتي والحاج ضبر راسك كيفاش تشرح ليهم قضية الحمل ديالي وعلاش كنا مخبيينو گووليا شنو خاصنا نگوول ليهم من دبا باش مانباانوش كانكدبو 
علاء:فخباارهوم گلت ليهم ماكنتيش عارفة تا لهاد الاواخر ولكن بان ليا غاتبان دك الكدبة حيت گلتليهم مابانش الحجم ديال كرشك
أسيل:(شافت فكرشها) وي عندك الحق كرشي كبيرة صعييب يتيقو هاد الكدبة ممم بديتي كاتعلم ولكن ماشي مشكل مهم ضبر راااسك شوف كيدير ولقا الحل 
علاء:😕وخا صاافي ولكن من بعد مانرجعو انمشيو اول حاجة عند شي طبيبة نسائية ضروري 
أسيل:اوكي 
علاء:عمرك مشيتي 
أسيل:نوو نهائيا كانساا

♡عند أسيل و علاء ♡
أسيبل : نو كنسا نهااائيا عمري مشيت لعند شي طبيبة ...
علاء: (عقد حجباانو )كيفاش كتنسااي هادشي فيه نسيان😑..
أسيل: نوض ضربني نتا حسن هادشي باش كتعرف تهضر ...كنسا هي انا باغا نساااا ..كيفاش بغيتيني نمشي عند طبيبة و نشوف عيالات جايبين رجالتهوم معاهوم ..و انا غادة بوحدي بحال لجايبااه من زنقة ..هضر😑
علاء: لا رد ..
أسيل: و جاوب مالك سكتي و لا معندك جواب حادك غير في تعصاااب و ضرب 😤
علاء: أسيل صاااافي سكتي 😑
أسيل: ماسكتاااش ..تا تسكت نتا ...
علاء: هانا سااكت ..نوضي جمعي حوايجك باش نشدو طريق ..
أسيل: انمشيو دبا ؟
علاء: ليبغيتي 😊
أسيل: اووك ..انا انوض نجمع حوايجي..
علاء: نعاونك ؟؟
أسيل: مكاين لاش (ناضت ) ..مشات أسيل كملات جميع حوايجها جمعاتهم كاملين دارتهوم في لفاليز ديالها ..علاء بقا كالس في صالون تا دخلات عندو رقية ببراد اتاي و كلسات مجمعة معاه كتوصي فيه على أسيل و تعاود ..تا خرجات أسيل لابسة كسوة طويلة و فيست ديال تجين و صباط بلا و دايرة شال على طريق شدة تركية جاتها غزالة و عطاتها جمالية أكثر دارت ميكاب خفيف مع ليكخو ديال شمس شوية ماسكرا و كلوز خفيف عاطي شفايفها لمعان ..غير شافها علاء و حل عينيه على وسعهووم من شاف حجاب ..معرف واش يضحك و لا شنو ..عرفها دارت حجاب ..نوضاتو من سهوتو غير اسيل كتعيط ليه..
اسيل: بسبس...وا شريف نوض هز باليزات نهزهوم انا و لا شنو ..
علاء..ا ا ..وخاا (ناض علاء شد من عندها باليزات ديالها داهوم لطونوبيل حل كوفر و خشاهوم و رجع عندها)
اسيل بقات مدة كتشوف في رقية ..مشات عندها بصمت و عنقتهااا ..حنات على ركابيها قدام رقية و هازات يديها كتبوس فيهوم ..
اسيل: عمري نسااا ليك هاذ الخير في حياتي بصح واليديا ماتو و مابقا عندي تا حد و لكن في هاذ مدة كنتي كثر من مي ..الله يطوليك في العمر يااارب😢تهلاي في راسك و انا كل ماتاحت ليا فرصة غادي نجي عندك..و من نولد انجي انا ولددي و لا بنت عندك ..
رقية:(دموعها نازلبين) ولفتك ابنتي بزااف بلا قيااس بلاصتك اتتخليها خاوية ..نتي في مقام بنتي و ربي لعالم..نوصيك وصية تهلاي في راسك و في راجلك باين ولد ناس و كيبغيك صبري ابنتي صبر را زوين و في زواج خاص شوية تنازل ..الله يرضي عليكوم ..
أسيل: (عاودات باست ليها يديها) تهلاي في رااسك وخا😢
رقية: تا نتي تهلاي في راسك..يا الله ابنتي منخليوش سيد يتسنا ..
اسيل:(مع راسها..ممم يتسناو عليه ان شاء الله) ممم يا الله..
خرجات أسيل مع رقية معناقاها بجنب تا باب دار كان علاء في باب ..باس رقية يديها و شكرها بزااف ..اسيل عاودات سلمات عليها و مشات ركبات قدام و قادات سمطة اما علاء جبد جوا فيه فلوس و مدهوم رقية رفضات و لكن اسر عليهاا تشدهوم غير باش تعاون وقت سلم عليها و ضات عليه و عاودات وصاتو على أسيل و مشا ركب و ديمارا لوطو و زاد ..أسيل غير عاقدة غوباشتها و كتخمم و تفصل و تخيط شنو خاصها دير ليه ..علاء طلق قرآن في طونوبيل و حل زاج و طلق كليمة ..و غادي بشوية على حساب أسيل و كل ساعة يدور يشوف فيها كيلقاها مربعة يديها و مغوبشة بحال شي درية صغار شداتو ضحكة و عارفاها دبا ناوية على خزيت مرتو و حافضاها و عارف راسو كيتسناه هجوم قوي من عندها ..هكا شخصية أسيل وخا قلبها بيض و كذا و لكن كتشد في خاطرها بزاافبقاو غادين تا دخلو مكناس و دخلو في لوتورت ..علاء ساكت و أسيل تا هي ...تا زعم علاء
علاء: أسيل خاصك شي حاجة .فيك جوع؟؟تشربي؟
اسيل: خاصني سكوتك وخاا😇
علاء: ياا ربي صبر يا ربي..
أسيل:(😈غوتات ) وووووووووووووقف ...
علاء: (حبس لوطو بجهد و مع لوتورت معندوش حق يوقف )😨😨😨😨😨مااااالك..
أسيل: والو غير رشقات لياا نغوت😌😌
علاء: (تعصب) أسيل اش هاذ لعب ..واش باغا طيريها مني و لا شنو ؟؟
اسيل: اتزيد و لا نهبط 😑
علاء: اووووف اوووف (ديماراا) صبر يا موولانا صبر ..
أسيل: ايوااا احح...😈 طلع زاج 
علاء: علاش 😮
أسيل: زاج ديال لوطو مكيبينش ياك؟؟
علاء: اه ..
أسيل: وطلعو جاني صعد و بغيت نتعرااا ..
علاء: كيفاااش😮
اسيل: مالك عصبتيني 😠(مدات يديها من حداها و هو سايك و حاضي معاها اش كدير تا كتبان ليه حطات يديها على بوطون و طلعات زاج) ايوا دبا مزيان...(حيدات شال و تطلقها شعرها لزاد طوال و رطب مسرسب ..حيدات جاكيط دياة تجين و بقات غير بكسوة حدا ذراعها وعلاء غير كيتنهد و كيشووف فيها و هو عارفها كدير هكاك غير جكارة فيه و باش تعصبو ..كيحاول يتمالك اعصابو حيث عارف باقي شحال كيتسناه لهم غير يصبر دبا ..دازت ساعتين و نص وصلو ..دخلو قنيطرة 
اسيل: انمشيو فيلا ؟؟
علاء: انمشيو ابارطومو قادي حوايجك و غذا نمشيو طبيبة صباح و عاد نمشيو فيلا ..
أسيل: مزيان اوكي😈
شد علاء طريق تا عمااارة وصلو هبط طونوبيل لاكاف و بلاصاها و نزلو أسيل لبسات عليها فيست و لاحت شال على راسها ..علاء نزل حل كوفر و جبد باليزات ديال أسيل و سد لوطو ركبو في سانديك و طلعو طاج ديالهوم و اسيل كضزر في عينيها👀 تفكرااات ديك ليلة و هي تزير ..حس بيها علاء و بقا كيشوف فيها بألم جبد سوارت من جيبو و حل بارطمة جار باليزات و أسيل موراه كتشوف في ابارطمو دا باليزات بيت نعاس و اسيل متبعة ليه عين و غير دخلات و هي تصدم ..😨

♡عند الأبطال ديالنا♡ ..
غيد دخلات أسيل من موراه البيت و هي تصدم😱..
علاء: تفضلي ..
أسيل: واش بدلتي ديكور ديال بيت 😮
علاء: وي ..
أسيل:👀👀اممم ..مزيان مكاين لاش ..زعما لابدلتي ديكور غادي نسا ديك ليلة ..عمرني مانسا وخا تبدل دار كلها ..
علاء: اسيل اناا..(قاطعاتو)
اسيل: قوة بلا بلا معنديش معاها خرج نبدل حوايجي ..
علاء:(بقا مدة كيشوف فيها شوفة كلها انكساار ) وخا ليبغيتي ..خاصك شي حاجة؟
اسيل: (قتلها بديك شوفة باين حزن على وجهو و ارهاق باين عليه ) ..امم جيب لينا غير عشااء و بغيت شوارما ديال دجاج و جيب ليا شكلاط و كلاص فانيلا و بيسطاج و كاوكاو ..صافي ..وشيبس 
علاء: وخا انا غادي نخرج نجيب ليك ليبغيتي مغاديش نتعطل ..
اسيل: اوكي..(مشا علاء خرج هز سوارتو و خرج هبط باش يمشي يجيب ليها داكشي لبغات)
أسيل غير خرج علاء مشات كتشوف دار و كتساارا حمقتها برطمة كبيرة بيوووت كبار ..و صالة في وسط صالون مفرشة تقليدي عصري في نفس وقت ..كوزينة كبيرة فيها صالة مونجي و لاطيغاس كبار ..دخلات بيت لفي جنب لقاتو فيه جوج ناموسيات و كوافوزة كبيرة في وسط و زربية صغيرة و طبلة دايرة ..و عاد بلاكار بست فيلون ابيض و موف ..عرفاتو ديال ضيااف ..و دازت بيت اخر لقاتو مفرش بفوطيات كبار في لون اسود وابيض و ديال كوير و تلفازة بلازمة كبيرة ..و عاد بغات تمشي بيت لاخور تحلو و لقاتو مسدود مبغاش يتحل و استغربات علاش مسدود ...و صافي قلبات دور لقات جوج حمامات كبار في جنب لحدا كوزينة و عاد في كل قنت كاين لافابو ..دار عصرية بامتياز ..عاد صالة كبيرة مفرشة ببلدي و قدام صالون صغير عصري و بلازما خرا كبيرة في حيط و عاد طبيلة صغيرة تحت منها محطوط عليها ديكورات زوينين و قران كبير و ديكور على شكل تساابيح عجبتها دار بزااف ..رجعات بيت وهزات باليزة حطاتها فوق ناموسية و حلاتها جبدات دوبيااس في ابيض و بنوار قصير في حمر و فوطة ديال حمام و حلات باليز صغيرة لوخرا جبدات لبرودوي ديالها و لكريم و دخلات شعلات دوش عمرات بنوار و تخشات فيه و دربتها بتدويشة نيت كانت محتاجاهوم ..غسلات و ناضت لوات عليها فوطة و كريشة خارجة كتحسس بيديها عليها و ضحك شافت راسها في مراية كيفاش غلاضات و زادت زيانات و لحمها بيض و تا زغبة مافيها مهلية في راسها و شعرها خلاتو طوال ...و مع حمل زاد نزل عليها سر ..خرجات من حمام من بعد كا توضات و مسحات لحمها و ذهناتو بكريم بنكهة لوز و لبسات دوبياس و دارت ستيك ديال عرق في بيطانها ..لاحت عليها عباية و صلاة صلوات لفاتوها ..و قرات شوية قران و عاد ناضت حيدات عباية و لبسات عليها بنوار و دارت حزام و مسداتوش مزيان خلاتو مرخوف وكريشة بيضة كتبان خلات شعرها فازك مطلوق ذهناتو بسيروم و مشات قدام مراية و كلسات جبدات لاتروس ديالها و جبدات عكر حمر ماط دارتو و كحلات عينيها و دارت ليها ماسكاارا شفارها طالعين و زادت طلعاتهوم ..هزات ريحتها رشات رشة تحت وذن و رشة تحت وذن لوخرا و رشة بين صدرها و في يديها(هادشي كامل كدير غير باش تجهل علاء ) ..شافت ساعة لقات باقي حال و مشات كتستكف حوايجها في ماريو لقات تا بعض حوايج علاء و مستلزاماتو .😮

.جبدات ميكاب ديالها قاداتو في كوافوز و روايح و كريمات اما شي لاخور ديال استحمام خلاتو في حمام .. جبدات كتب ديالها ديال قراية دارتهوم فيمجورة و واحد كتب ديال حوامل دارتهوم فوق كوافوز ..هزات واحد خلخال دارتو في رجليها بانو ليها خاويين و خرجات من بيت كتعوج مشات كوزينة كتقلب في بلاكارات و هي تلقا بريكة ديال شعيب هزاتها و ضربات طليبلة في ثلاجة لقاتها خاوية و هي تمشي صالة بانت ليها تلفازة ركبات بريز و شعلاتها شافت ديفيدي و هي ترجع بيت جبدات واحد سيدي ديال يوكااا و رجعات صالة بانو ليها شي شموع ديال روائح محطوطين على شكل ديكور و مشات شعلتهوم كاملين ..بانت ليها مخدة كبيرة في حمر ديال الأرض مشات هزاتها و حطاتها اونفاص مع تلفازة و مشات ركبات سيدي و شعلاتها و مشات ربعات رجيلتها بيضين و خدمتها و كلسات كدير في يوكا و كتسنا غير وقت فوقاش يجي ..أما علاء خرج من عندها و شد طريق نيشان مرجان و تقدا كلشي جميع ليخصو في دار حوت مقاد و مصايب و لحم و دجاج...صوصيص كفتة ..خبز خضر..فواكه ..حليب(الجودة ماشي سونطرال را مقاطعها علاء😂😂) دانون (جودة😂) ومشا كيهز ليها في شكلاط بجميع انواعو وفواكه جافى و لشيبس و كاع سقاطة و هو اي حاجة غادي يحتاجوها في دارهوم و هو فرحان حيث بهاذ طريقة يقدر يتقرب من اسيل و يربح قلبها من جديد اهم عندو تكون قريبة ليها هي وولدهوم و لا بنتهوم ..بقا كيضور من هنا هنا تا بانو ليه حويجات ديال دراري صغار و مشا هز صولبيط في غوز وواحد في شيبي و واحد صبيبطات بانو ليه صغار عجبو داكشي و بقا غير كيهز بلا شعور تا عمر شاريو ..عاد مشا لاكيس خلص و خرج داكشي في شاريو تا لبرا حدا لوطو و حل كوفر و خشا داكشي فيه بزاف ديال بلاستيكات ..رد شاريو بلاصتو و مشا ركب في لوطو ديالو و مشا نيشان ميني وورد خذا ليها شوارما و ليه دجاج و تا بيتزا بكروفيت عارفاها كتعجبها و رجع ركب بحالو و كسيرا ماوقف تا وصل عمارة نزل و بدا كيزل بشوية بشوية و كيوصل سانديك تا سالا و سد لوطو وطلع وصل طاج ديالهوم و غير حل باب دخل داكشي كولوار و عاد سد باب كتنفس حيث عياااء جا يحط سوارت فوق صور لحداه ديال صالة و هي تبان ليه لالة بنات مدورة شمع و معرية خدامة كدير يوكا😈
علاء:😮

♡عند طوم وجيري ديالنا ♡
علاء غير دخل و حط داكشي و ضرب ضورة شافها و هي تجيه لقوة في بلاصة حس بعرقة طلعات معاااه بقا غير كيشوف فيها من راسها تا رجليها و فخاذها و صدرها و كرشها كلشي كيبان بحال معرية و كيشوف ليهونش لزادت ربات و بيااض و عاد تعكيرة لضااربة و روايح عاكيين و مع شموع و كلسة لدايرة بحال شي كلسة رومانسية 100% هو في بلاصة حس بديالو وقف و هي قدامو مكرهش يتلاح عليها في ديك لحضة حيث وخا يكون ميت احساس و لكن غير يشوفها بديك طريقة ايولي عندو احساس من درجة عالية😂 ..
علاء: احم احم ..
اسيل:(كانت مغمضة عينيها و مربعة و هازة يديها..حلات عين وحدة) على سلامة مشيتي انشاااطين و لا مشيتي تقاادا؟
علاء: شنووو؟؟
أسيل: والو جبتي ليا داكشي لكتليك ؟
علاء : كلشي هنا ..اندخل كوزينة هادشي ..ام ونتي نوضي لبسي عليك و اجي نتعشااو بيمن غسلت .
أسيل: (كتبوهل ) علاش انلبس حوايجي؟
علاء:..ااممم ايضربك برد ..
أسيل:نو باليا كاين صهد 😇
علاء: انشعل ليك لاكليم غير لبسي حوايجك😑
أسيل: و انا مابغيتش واش بزز؟
علاء: صافي غير سكتي على خاطرك خاصك غير علاياش تشعلي ..
أسيل : ايواا هي لا سكتي نتا و دخلتي سوق راسك😌
علاء: أسييييل😑
أسيل: اوكي باي(ناضت اسيل وقفاات غير بزز بغا يمشي يعاونها توقف و لكن حنا راسو على بلاستيكات و مشا هز ميكات و بدا كيدخلهوم كوزينة اما هي طفات تلفازة و مشات بيت و سدات عليها و تجبدات في ناموسية و سرحات رجليها و هزات تيليفونها و دوزات نمرة ديال بسمة و صونات هضرات معاها و عاودات ليها كلشي و بسمة عيات معاها دير عقلها و تشكر في علاء و لكن اسيل غير كتعوج في فمها 😂 ..قطعات معاها وصونات اماني و موراها امينة و كاتليها غذا ايجيو و كذا ..و هي دير موسيقى خفيفة و حطات تيلفون على كرشها و غمضت غينيها اما علاء مشا كوزينة و دخل داكشي لكيدار في ثلاجة دارو و لفي بلاكار دارو ..خشا شوارما في ميكرواند و مشعلش عليها تا يدوش...و مشا هز داك بوشيطات لفيهوم حوايج ديال دراري صغار خباهوم في بلاكار لفي بيت ضياف مبغاش اسيل تشوفوهم مشا بيت باش يهز حوايجو ..عيا ميدق على أسيل و لكن سمع موسيقى و هي مكتجاوبش حل باب بشوية و كيطل كيبان ليه غير ضوء خفيف في بيت زعما و دخل لقاها سادة غينيها واديرة تيلوفون و موسيقر خفيفة فوق كرشها و بنوار تحل كلو بقات غير بدوبياااس و كلشي باين جميه تضاريسها كيبانو تنهد و هز يدو دوزها على جبهتو و مسح عرق و مشا بشوية جيهتها كيصحاب ليها ناعسة و هز لبيزار بشوية و غطاهااا ..و عاد مشا ماريو جبد حوايجو و مستلزاماتوو و خرج غير سد باب و هي تفتح عينها و دارت ضحكة جانبية وشوفتها ديما بشر😈 و هي تجمع وقفة و ناضت كتمشى على صباع رجليها بشوية تا حلات باب و سمعات صوت دوش في حمام لاخور عرفاتو هو لدخل يدوش و هي تمشي لبوطى في كوزينة ديال داك شوفوو و سداتها ومشا ماء سخون ...أما علاء دخل دوش و دخل حوايجو و حل رشاشة و تخشا تحت منها داير شومبوان في شعرو كيدوش تا شوية تحول الماء من ماء دافي لبااارد و هي يقفز بقا كيدور في روبينات ووالو صافي دار في بالو بوطة سالات معندو تا حل كمل تدواش بماء بارد و هو كيترعد بستة و ستين كشيفة دغيااا شللل و هو كل كيقفق و مسح و لبس حوايجو و توضا و مشط شعرو لور و دار ستيك ديالة و خرج نيفو حمر و عينيه تاهما حمرين بحال لكان كيعوم في بحر ..خرج من حمام هاز فوطة كيمسح شعرو تا كيسمع حس في كوزينة مشا يطل و هي تبان ليها اسيل كالسة في طبلة ديال مونجي و هازة قرعة نوتيلا و كتلحس في شكلاط جخلطات وجهها كامل ..شافتو جاي و نيفو حمر و حبسات ضحكة غير بزز امت هو غير كيشوف فيهة قالبة وجهها و اول حاجة مشا تفقد بوطة و بانت ليه مزيرة عرفها أسيل لسداتها دار عاقد حواجبو ..
علاء: هاذي نتي 😑
أسيل: (هزات راسها )نعااام 😤
علاء: علاش سديتي عليا ماء سخون ؟؟؟
أسيل: بغيت😋...(ناضت ) وجد العشاااء انغسل و نجي ناكل فيا جوع انا و ولدك ..(مشات كتعوج قدامو و خلخال كيقرقب و هو غير كيطلع فيها و يهبط و صدرو كيطاع و ينزل ) ..
مشا علاء تا هو بيت اول حاجة صلا صلاتو و عاد رجع كوزينة و كلس كيسخن ليها و يحط في طبلة و حط عصير و كيسان فوق طبلة ..و هي مشات حمام دايرة ضحكة انتصار غسلات ومسحات وجهها و مشات عاودات تعكيرة عاد خرجات عندو لقاتو حط كلشي في طبلة و كالس كيتسانها جاية كتعوج كلسات قبلاتو و كب ليها عصير و عطاها شوارما ديالها من بعد سخنها ليها كلاتها و هي كتبنن و توحوح و كلات تا بيتزااا و شربات جوج كيسان عصير خوخ و علاء غير كينقب في دجاج و كيشووف فيها و يتنهد اش في جهدو ميدير مخليها على خاطرها و مخلي لوقت هو لغادي يوريهوم ..سالات و عمرات كرشها رجعات تكات على كرسي لور..و يديها على كرشها ..
أسيل: فين كلاص ديالي ؟؟
علاء: اتخلطي ااسيل اتمرضي😑
أسيل:سووووقك...و لا مجبتيهاش و داير بسبة بانك خايف عليا😠
علاء: يا ربي سلامة عفو معاك اهاذ بنت عفو (ناض ثلاجة و جاب ليها كلاص ديالها و حطو قدامها ) هاهو الالة كوليها غير زوينة 😕
أسيل: ميجيش معاك زوين نتا (هزات كلاص بنفخة و جمعات وقفة و مشات بيتها و سدات علبيها باب خوفا من شي هجوم )

🌞اصبحنا و اصبح الملك 🌞 "صباح جديد"
ضربات شميسة على الأبطال ديالنا طبعا من بعد ماناضو بجوج في الفجر و كل واحد صلا في بيتو و رجعو نعسو ..من بعد علاء دار ساعة في 8 صونات و ناض دار روتينو يومي و مشا كوزينة جبد حليب و دارو في كاسرونة كيفيض و جبد بيض و كشير و فورماج ..و جبد جبانيات صغار وحدة دار فيها زيت وحدة زيتون وحدة زبدة و حدة كوفيتير و قاد بلاطو فيه كيسان و شكلاط غبرة تا هو و قرعة نيسكاافي ..و تا قرعة نوتيلا حطها ...طفا على حليب و مشا حل الباب بشوية طل على أسيل لقاها باقا ملوية في ليزار و ناعسة على جنبها رد عليها باب و هز بزاطامو و لبس عليها و خرج مشا مخبزة شرا كراوصة و شنيك و كومير ديال زرع و لاخور عادي و رجع لقاها باقا ناعسة مابغاش يفيقها مخليها على خاطرها ثلاثة مرات كيسخن حليب و يبرد و يعاود يسخنو تا حبس تا تفيق و يسخن ..اما اسيل ضربات 9 و ضرباتها الفيقة و بدات كتحل عينيها و كتكسل دخلات حمام ودارت روتينها يومي و مشات ماريو حلات و جبدات كسوة طويلة و بوليرو ديالها و شال خفيف لبساتهوم لبسات صندالة ديال الصبع مستيلية و قادات ميكاب خفيف ديالها و دارت ساعتها في يد و ريحتها و عاد خرجات سمعات تقرقيب في كوزينة عرفاتو علاء دخلات و هو يبان ليها واقف كيصيب اومليط شافها طلعها و هبطها و هي بكريشة زادت هبلاتوو..
علاء : صباح نووور 😊
أسيل: صباااح الخير ...بغيت نفطر فيا جوع ..
علاء: غير كلسي انا انحط ليك كلشي ..
أسيل :سربي باش نمشيو طبيبة ..
علاء: عارفة شي طبيبة؟؟
أسيل: عارفة غير طبيب 😋
علاء: (دخان خرج من وذنيه) أسيييييل😠
أسيل : صاااافي انمشيو عند طبيبة لكانت متبعة عندها بسمة ..
علاء: وخاا صافي يا الله هاكي ها الفطور ..(حط ليها اوميليط في طبسيل بفرماج و دار ليها كاس حليب بشكلاط و كلس قبالتها كيفطر تا هو ) ..بقاو كيفطرو في هدوء تا سالاو و ناض علاء جمع طبلة و حط ماعن في بوطاجي و مشا بدل عليه دغيا و أسيل مبدلة دخلات هزات غير صاكها و هبطو من بعد ماسد علاء دار هبطو في سانديك تا لاكاف و ركبو بجوج ركبات حداه و دارت سمطة نعتات ليه بلاصة ديال طبيبة فين كانت و شدو طريق عندها تا وصلو و هبطات أسيل و علاء موراها شدو نوبة ديالهوم و كلسو كيتسناو تا وصلات نوبتهوم و دخلات اسيل و معاها علاء ..طبيبة غير شافتها و عرفاتها..
أسيل و علاء: سلام عليكوم..
طبيبة : و عليكوم سلام و رحمة الله وبركاته تفضلو ..
أسيل: شكرا😊
علاء: جيناا نفحصو حالة ديال أسيل والجنين ..
طبيبة : أسيل واقيلة عرفتك فايت جيتي عندي ؟؟
اسيل: اه كنت كنجي مع ختي من كانت حاملة ..
طبيبة : اه عقلت عليك ..ايوا أسيل عمرك دوزتي ..
أسيل: لا عمرني ؟
طبيبة : شحال من شهر عندك؟
أسيل: تقريبا 7 شهووور ...6 شهور و نص على حساب لشادة انا ..
طبيبة :اممم وخا اجي معايا ندوزو على كريشة حيث بانت لياا كبيرة شوية على حجمها طبيعي ..
علاء:(بخوف) واش شاكة في شي حاجة ؟
طبيبة : احنا دبا انعرفو اجي ابنتي ...
ناضت اسيل و مشات بيااص لكيدوزز فيه و تكات و هزات صولبيط و هبطات شوية في كولون و دارت ليها ايكو و غي دوزات فزق كرشها و هو يبانو جوج لبيبي ملاصقين مع بعضياتهوم ..
طبيبة : وينووو كريشة فيهاا جوج😍
علاء : جوج 😮
أسيل:(عينيها دمعو و هي كتشوف فيهوم) عندنا توينز 😍
طبيبة : وي تبارك الله على داكشي علاش كرشك كبيرة ..
علاء: (تا هو محسش بدمعة تا هبطات من عينو مسحها بصبعو) احح حمد الله يا سيدي ربي شكرتك و حمدتك ..😍
أسيل: (كتشوف فيه كيفاش مأثر ..فرحات ..ضارت شافت في طبيبة ) وخا نعرفو جنس ديالهوم ؟
طبيبة : طبعااا ..بلاتي نشوفووو..امم عندكوم ماشاء الله ولد و بنت😊
علاء: الله ياااربي حمدتك و شكرتك 😍
أسيل: وينوووو دبا انا انجيب بنت وولد 😍
طبيبةة: ان شااء الله(مدات ليها منديل) هاكي ابنتي مسحي كرشك و تبعيني ..
أسيل: وخا (مسحات كرشها و عاونها علاء تا قادات حوايجها و هي بفرحة خلاتو يعاونها نسات كلشي ) مشاو كلسو قبالة الطبيبة في المكتب ..
الطبيبة : كلشي هو هذاك صحتك و صحة ديال لبيبي مزيانة خاصك دبا غير شوية رياضة و نضام غذائي منضم و انا غادي نقدم ليك شي فيتامينات خوذيهوم و ميكون غير خير ..
أسيل: وخا ان شاء للله ..
علاء: سمحي ليا نكوليك ..هي كتخلط شوية في ماكلة ماشي مشكل ..كلاص و بيتزا و عصير و شوارما كلشي دقة وحدة مكاين لا تأثير لا والو ..
أسيل:😑😑😑
طبيبة: لا غير خليها تاكل في خاطرها مهم تاكل حاجة مهمة ...خاصها تبعد غير على توتر و على اي حاجة تقدر تعصبها ..
أسيل: سمعتي😤
علاء(شاف فيها) وي ..يا الله نوضي ..
أسيل:شكرااا بزااف 😊
طبيبة : هذا واجب😊مرحبا ..(مدات ورقة علاء شدهل خشاها في جيبو )
خرج علاء خلص و اسيل سابقاه ركبو في لوطو و دازو خذاو ديسير من مارشي و شدو طريق لفيلا نيشان غادين في سكات تا وصلو فيلا بلاصة علاء طونوبيل و نزلو ..عائشة كانت كالسة تا سمعات صوت لوطو عرفات أسيل و علاء لجاوب عيكات على امينة لجابت بلاطو ديال حليب و تمر باش تستقبلوهوم هبط علاء هاز بلاستيكات و أسيل تا هي هابطة شادةة في رجليها غادة بشوية كتمشى تا خرجات عائشة و حلات عينيها على وسعهوم😨

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.