عروس الملك السابعة الجزء 28

من تأليف Ghazal trust
2018

محتوى القصة


رواية عروس الملك السابعة , زوجة الملك السابعة

كلشي جمع الوقفة قدامو وتخلع .. تقدم جيهتهم كيخزر فيهم بثلاتة وشاف حتى فروح الندى اللي ناعسة وراكبيها عريانين . شار براسو كيخزر فمو وهي تخرج الشريفة والحكيمة كيجريو مرعودين وبقات لاللة ياقوت واقفة قدامو . تكلم كيزفر من خنافرو بحال التور وقال 
- رجعات كلمتي بكلمتك؟ وليتي ديري اللي عجبك ... حكمي نتي فبلاصتي حسن اشنو قلتي؟ 
بلعات ريقها وقالت : حاشا واش نحكم فبلاصتك ... الى صبرتي غير شوية غادي تفهمني وتعذرني 
هز راسو وقال : عمرك هرستي كلمتي ... ولا تجرأتي وتدخلتي فحكامي ... الى نسيتي شكون نكون .. غانسا شكون تكوني 
هزات راسها وقالت : مانسيتش شكون تكون ... وحاشا وتش نهرس كلمتك ولا نتدخل فحكامك . وعمرني خلطت بين العلاقة ديال ام و ولدها .. وبين ملك واللي ولداتو ... عارفة شنو كندير وعارفة الحكام مكيعرفش هادشي
سيد الملك : ومللي عارفة هادشي علاش دخلتي راسك ؟ علاش مابقيتيش بعيدة على حكامي وخليتي نفسك عزيزة نحسبك مي اللي والداني . عارفة مزيان باللي فالحكام مكنرحمش.. واخا تكوني نتي 
لاللة ياقوت : سمعني وغتعذرني
هز راسو وربع يديه : كنسمع .
تنهدات وقالت: قلتي الخاتم تهز من جناحك ... الخاتم لقيناه فالفرج ديال هاد البنت ... قلتي ماتموتش حتى تجبد الخاتم و عاد يديرو معاها اللازم . ماقلتيش فين ياخدوها وفين يحطوها . 
عقد حواجبو وقال حاصني نعطي التفاصيل باش ديرو داكشي اللي باغي ؟ كتلعبو معايا دابا؟
لاللة ياقوت : حاشا ... غير انا شفت البنت مخرجينها بدماياتها .. وسولت وقالو بي شنو كاين .. قلت حنا نسا كنفهمو فهادشي ... حسن مانضلمو شي حد بحكامنا .. وهاد البنت بالدات عليها الغلط بزاف ... كان يحسابنا ماتت وطلعات عايشة .. مافهمتش شنو كدير عندك فجناحك ؟ 
هز حاجبو فيها وهي ترجع قالت
- زعما بغيت نقول ... احم.. نتا حر دير اللي بغيتي ماتفهمنيش غلط .. انا غير قلت وصافي حيت ..حيت يحسابنا ماتت وفاللخر حية .
افأف هاز راسو كيشوف فيها وهي ماعارفة ماتقول وحتى باش تسولو على شنو كيدير وشنو كانت كدير عندو مقادراش .. ماقدراش تفوت حدودها معاه بشي سؤال اللي تندم عليه ولا يحشمها بشي دورة .. تبغي تخلي لراسها قيمة حسن ما يطيح منها وهادشي مامزيانش كاع فحقها .
شافت جيهت روح الندى وقالت : الخاتم لقيناه .. و..والبنت دابا شنو غدير فيها ؟ 
تلفتات عندو لقانو مزال كيشوف فيها .. هز حواجبو بجوج وقال
- غنقول كلمة وحدة ... وحححدة مانزيدش عليها ... وحيت عمرك غلطتي من نهار رجعتي ... غادي نسمح ليك وندوزها ليك ... ولاااكن ... تعاودي تدخلي فحكامي غاندير معاك اللازم . تفاهمنا؟
تنهدات وحركات راسها : تفاهمنا ... عندي طلب واحد وصافي .... نبغي نديرها وحدة من وصيفاتي الخاصين بيا .. اشنو قلتي ؟ 
قال بدم بارد : لا
حارت لاللة ياقوت وقالت معاه .. اول مرة يقصح فكلامو معاها واول مرة يوصل معاها لهاد الحد . . مولف يحتارمها وعمرو هز خنافرو عليها .. وههما واقفين كيهضرو حلات روح الندى عينيها وبدات تأنأن ... هزات راسها بشوية وهي تشوفهم واقفين قدامها .. خرجو عينيها وبدات تقاد فالجلسة مخلوعة .. تمنا ت كن بقات سخفانة .. كن متفاقتش كااع بالمرة 
تلفت جيهتها عاقدهم وتلفتات حتى لاللة ياقوت اللي عاطياها بالضهر .. مشات جلسات حداها وهزات راسها كتسولها وسيد الملك واقف قدامها مربع يديه فاتح رجليه كيشوف فيهم بجوج 
. تكلمات لاللة ياقوت وقالت 
- اش كيدير عندك الخاتم ؟ وكفاش حتى وصل لتما ؟
شافت فيها روح الندى وجهها صفر وفكها كيترعد .. وتلفتات حداها لقات توب ابيض محطوط فوقو الخاتم عاد فهمات باللي جرى وصار فغياب عقلها معاهم . رجعات شافت فلاللة ياقوت وحولات نضرها لسيد الملك ورجعات تاني لاللة ياقوت بحال الى كتطلبها تعفيها من الجواب 
زفرات لاللة ياقوت وشافت فسيد الملك وهي كتجمع قوتها قدامو وعاودات قالت وهي كتشوف فروح الندى
غير تكلمي... عليك الامان غير هضري 
تزيرو عينين روح الندى وحتى حرف ماقدر يخرج مع فمها .. تكمشات وقالت كترجف
- و..و..وحل ليا اهىء اهىء اهىء ... والله ماسرقتو واحق ربي ماسرقتو... داك دداك داك الخاتم المدور اللي 
اللييين..(بلعات ريقها وشافت فسيد الملك ) اللي دار ددار ليا ... حيدتو وتلف ليا ماعرفتو فين زهق ... خفت يسولني ولا يقول ليا جبديه .. قلت غير خاتم وصافي وهزيت .. دداك داك الخاتم درتو بلاصت لاخووووور اهىء اهىذ اهىذ 
.. وهوا يزهق وحل ليا اهىء اهىء .
حمار وجه لاللة ياقوت وندمات كاع علاش سولاتها .. وحتى سيد الملك بدا يرمش ويشوف فجنابو .. فضحاتو قدام مو وضربات ليه الطر بخراششو .. حطاتو بوجهو وهوا اللي عمرو دخل على شي وحدة من نهار رجع ملك .. مل وعيا ومابقا باغي تا عزبة دخل عندو .. ونهار دارها حطاتو بوجهو .. هز خنافرو وقال 
سيد الملك : خليها وصيفة عندك ... ولا ديري بيها اللي عجبك . 
تلفت وخرج مراضيش ودار براسو ماعندو غراض فيها وماعندو بيها سوق تبقا مع الحريم ديالو .. وبهادشي اللي دار زعما حيد عليه الشكوك بالمرة قدام لاللة ياقوت .. وحيت الوصيفات مكيدخلوش عندو وخاصين فالاميرات .. لاحها لمو باش يمحي كاع الشكوك اللي عندها فراسها ويخرج من باب واسع

خرج خلاها بوحدها مع روح الندى .. وقفات هازة راسها وقالت 
لاللة ياقوت : ونتي كي درتي دخلتي عندو ؟ جاوبيني؟
عينين روح الندى دخلو بالخلعة .. سنانها بداو يتقرقبو وقالت
- كتاب لي عمر جديد الاللة .. رماني فالمطمورة وبقيت نحفر حتى خرجت فالكشينة .. (هزات صبعها وحلات عينيها) ماعاااوني حد ما عرفني حد ... زعما لاتقولو عاوني شي حد ! بوووحدي درت شوية دالفاخر مع القهوى وطليت لحمي .. دخلت وسط العبيد وتسخرت عند سيدي لبيتو .. ساعة تفضحت تما ... بغيت غير نلقا حية ميعرفني حد شكون انا وصااافي اهىء اهىء (كتبوحط) حيت لا عرفوني يقتلوني الاللة .
شداتها الضحكة لاللة ياقوت وقالت : نوضي لحقي على خواتاتك .. من اليوم نتي وصيفتي ومنبغيش ندور ومانلقاكش حدايا . ونقصي من الهضرة يالاه نوضي 
ناضت روح الندى وقفات حانية راسها .. عاد رتاحت وهنا بالها وحمدات الله على السلكة اللي سلكات.. ولايني بسبع رواح هاد الجنية! 
دخلات الوصيفة الكبيرة فوصيفات لاللة ياقوت وحنات راسها 
لاللة ياقوت : غتديها وتعلميها وتقريها .. من اليوم وصيفة من وصيفاتي . 
الوصيفة : واخا لاللة 
جرات روح الندى من دراعها وخرجاتها مطبعة بالدمايات .. بقات لاللة ياقوت هازة راسها كضحك بوحدها وقالت 
- احيااني عليك اشنيولة ... مزالة نتي هي نتي .. عندك 14 لعام و وصلتي لسن الزواج ومزال ماتبدلتي . بوحاطية ههه
واقفة روح الندى فبيت صغير ... لابسة قفطان مزير شوية وطويل فالازرق باليدين فيه جوج فتحات فالجناب حتى للركبة ..مطروز كامل نقي وزوين ودايرة حزام بالمجدور مذهب نازل من القدام . شعرها مدفور بالسبولة على طولو ودايرة عندها فرقة الوسط ودايز وسطها خيط الريح رقيق فيه لوزة فجبهتها زرقاء ، فرجليها شربيل ديال الصم مذهب وقدامها حومر ورجليها كيشعلو باينين من فرقة القفطان . محكلة عينيها واللي شافها يحلف عليها اميرة .. خدودها موردين وحواجبها مربعين عاليين .. عويناتها مشفرين كتفتن بالزين . صدرها مهزوز وعنقو واسع كيبان فيه النص .
واقفة مقادة موراها المراية وكتسمع لكلام كبيرة الوصيفة الخاصة بلاللة ياقوت " الزاهية " مرة كبيرة حتى هي سمراء وغليضة لابسة مزيان وفيديها دبليج دالنقرا غليض . دتيرة زيف جامعة بيه شعرها 
الزاهية : عاقلة دابا علا شنو قلت ليك وشنو علمت ليك .. ماتنعسي حتى تنعس لاللة ياقوت .. ماتاكلي حتى تاكل ... وماتحركيش من حداها وماتخالفيش كلامها ... والى غلطتي انا اللي غنتكلف بيك وجهدي نخرجو فيك هانا فين علمت ليك ... يالااه زيييدي قدامي . 
حركات روح الندى راسها كتقاد قفطانها فرحاانة .. شوف فين كانت وفين ولات .. حتى قالت صافي بسلامة يا دنيا وهي ترجع تاني دور فبلاصتها . 
بقات حانية راسها كتمس بشوية على توبها وتشم ريحة زوينة فراسها ودوز يديها على ودنها وشعرها فرحانة حتى قفزاتها الزاهية اللي مشات ورجعات مخرجة عينيها 
الزاهية : زيييدي قدامي 
تبعاتها روح الندى بالزربة مبسمة وفكل مشية كيخرجو رجليها من جناب القفطان .. وهما ماشيين فدروب القصر وزناقيه حتى كيخرجو فالامير قاسم وهي توقف بالزربة هي والزاهية . الزاهية حنات ليه الراس وروح الندى بقات مبرقة فيه عينيها ومعبسة حتى نخزاتها الزاهية عاد هبطات عينيها الارض .. لاكن حلفات لاحنات ليه الراس . اما هوا هاز خنافرو وكيشوف فيها وماعلابالوش كاع بشنو وقع معاها ومع لاللة شامة .. لا واش ماتت ولا حياة .. من نهار حرقاتو بأتاي مابقا سمع عليها شي خبار... ولاكن دتبا عقلها وبقا حاط عينو عليها كيطلعها من راسها لرجليها ، يديه بجوج موراه ولابس الاحمر .. طويل حتى هوا وعامر واخا عندو حقو من الزين ولاكن باين عليه قبيح بحالو بحال تريكتو كاملة 
زادت روح الندى والزاهية كملو طريقهم وتلفت هوا هاو راسو وكيشوف فيهم من اللور .. حاضي روح الندى وسالفها اللي كيشطح موراها ويتلوى ويحك فلحيتو ساهي فيها
ملاحضة : غتسمعو 14 سنة غتقولو صغييييرة بزااف . لا سن الزواج عندهم هوا البلوغ .. فاش تبلغ كتولي قابلة للزواج . و14 سنة قديما راه كتكون البنت وافية وعاطية للعين ومكتاملة بحال بنت 25 سنة فالهيءة الجسمانية ديالها .. ماشي 14 لعام ديال دابا . 14 لعام قديما راها مزوجة وولادها كيلعبو معاها . من غير العقل اللي كيبقا صغير وكيكبر مع الزمان وحسب الوضعية اللي عايشة فيها البنت .

دخلات هي والزاهية لجناح لاللة ياقوت فين جالسين معاها لقاو لاللة ياقوت متكية ففراشها . الفجر داز والليل كامل مانعس فيهم شي حد .. اما سيد الملك جوج ليلات متابعين ماغمض ليه جفن ... لاللة ياقوت متكية حداها وصيفة كتدلك يديها . وقفات حداها روح الندى وجمعات يديها حانية راسها مبسمة 
. شافت فيها لاللة ياقوت وبدات طلع وتهبط فيها من راسها لرجليها بعينيها المبسمين ، اما الوصيفات غير كيشوفو فيها بنص عين حاسدينها على زينها وطول شعرها . تنهدات لاللة ياقوت وجمعات يديها 
لاللة ياقوت : طفيو النوار ... والوصيفة الجديدة تبات هنا بلاصت الزاهية . والزاهية تمشي لبيت الوصيفات 
حناو راسهم وخرجو كاملات .. وبقات روح الندى جالسة على سرير صغير فالطرف بجنب سرير لاللة ياقوت . ترخات الاميرة وسلمات للنوم .. وبقات عاسة روح الندى حتى تيقنات من نومها وهي تسلم للنعاس وترخات .
صبح الحال وصبحو الوصيفات عند راس روح الندى اللي مزال ناعسة على جنبها متحركاتش . حلات عينيها مفزوعة عاد تفكرات فين هي وهي تنوض جمعات النوضة كتقاد فراسها وشعرها وترجعو كيكان . دارو بلاللة ياقوت بحال كل صباح .. حمموها وغسلوها وروح الندى كدير يدهم بيديها . تسخر و تمد ليهم وبعيدة على الماء حاضيا غير قفطانها وجلايلها . وحتى لاللة ياقوت ماحكراتش عليها واخا كاتشوفها غير غادية جاية هازة فجلايلعا وتزطم على صباع رجليها بعيدة من الماء . 
سلاو ليها وخرجوها لبسوها وعطروها وزينوها ودارو ليها التاج على راسها ، وقفات وقالت 
لاللة ياقوت : سلهامي 
هزاتو وحدة من الوصيفات دارتو ليها على كتافها ومشات لاللة ياقوت قدامهم وقالت
- عطيني الزهر ديالي .
نخزات بالجهد وحدة من الوصيفات روح الندى وقالت بشوية مخرجة عينيها 
- هزي الزهر
شافت روح الندى السم فعينيهم ومشات كتقلب بعينيها معارفة الزهر فين هوا . هزانتو وحدة اخرى سمراء شوية ودازت فيها حتى كانت غطيح ومشات عطاتو لاللة ياقوت . عبسات روح الندى ماعجبهاش الحال ..

مالهم على هاد السم .. وحدة دوز فيها و وحدة تخرج فيها عينيها .. مشات حدا لاللة ياقوت ووقفات بجنبها ناويين يخرجو . يلاها وقفات وهما يدحسوها بكتفهم بعدوها للطرف . سخطات وهي توقف عاقدة حجبانها .
خرجو معاها ربعة دالوصيفات وحدة كبيرة على الاخرى و تمو غاديين دايرين بيها . تكلمات لاللة ياقوت هازة راسها وقالت 
- جيبو ليا الماء غلاي الماء فيدي .. غنهبط للجردة 
نخزات وحدة سمراء وطويلة كتر على روح الندى وقالت بشوية مطرطقة عينيها 
- سيري جيبي الغلاي .. همم (شارت براسها بالجهد )
زفرات روح الندى من مناخرها ويلاه بغات تمشي وهي توقفها لاللة ياقوت 
- بقاي نتي ... سيري يا يزة جيبيه نتي 
هزات روح الندى راسها كتشفى فيهم مبسمة ودورات وجهها ولسقات بجنب لاللة ياقوت . 
خرجو للجردة الموردة والخصاصي العامرة بالماء . الطيور بصوتها كتغرد والمياهات فالخصاص كتمايل فالهوى . الجو زوين ودافي .. الورود مفتحة اشكال والوان .. كتبان وسط تلجردة روح الى بحال الوردة مفتحة . بدات لاللة ياقوت تسقي الورد بيديها وتنزه .. والوصيفات موراها كيقلبو لروح الندى على السبة وكل شوية يدحسوها .. بقاو غادين منزهين فصباح مشمس حتى وصلو لجردة سيد الملك اللي مولف يجلس فيها ، ومع لاللة ياقون عارفها كل صباح كيبغي يجلس يشرب اتاي تما .. بلعاني دازت من ديك البلاصة وكل شوية تلفت جيهت روح الندى 
لاللة ياقوت : قادي خيط الروح اللي على شعرك عواج 
بالزربة دارت روح الندى يدها على شعرها كتقاد وتملس فشعرها الرطب وتقاد فتوبها وحناكها . 
دخلات لاللة ياقوت وطلعات جوج درجات مع الجردة ، وداكشي نيت اللي بغاتو لقاتو .. لقات سيد الملك جالس بوحدو قدامو صينية ديال اتاي بجبادور زرق مفتوح من العنق كيبان صدرو من لداخل .

متكي على ضهرو ومسرح يديه تحت سقيفة من عواد الخشب مبنية . قربات منو لاللة ياقوت مبسمة ووصيفاتها كينفضو فجلاليهم حشمانين .. اما روح الندى حمتر وجهها وكمشات فمها كي النقطة وهبطات راسها بالجنب وبدات تشوف فيه بنص عين كتعطل فالمشية وترجع مور الوصيفات اللي حتى وحدة فيهم مابغات تجي قدامها شي وحدة .. تبسم فوجه لاللة ياقوت ومدات ليه يدها بجوج سلمان عليه .. باسهم ليها وخي تفرح 
لاللة ياقوت : الله يرضي عليك .. ويغطيك ويفرشك بالرضا يا ولدي .
جلسات بجنبو ووصيفاتها بربعة مستفين موراها بينهم وبينها صور قصير من عواد الخشب مسطر عليهم مخاد متكية عليهم لاللة ياقوت .. هز عينو نبشان فروح الندى وهي تهبط عينيها كترمش تالفة .. دور وجههو للجهة الاخرى مسرح عينيه كيجاوب قالب وجههو 
لاللة ياقوت : كي صبحتي؟ ... نعستي شوية؟ غدا صايمين رمضان ان شاء الله 
حرك راسو وقال : مزيان ... ان شاء الله 
لاللة ياقوت : مرتاح ؟ حسيت بيك غتكون هنا .. شحال هادي متجمعتي معانا فالفطور 
قال مدور وجههو : كتر الشغل هاد ليام ... داكشي علاش 
تلفتات لاللة ياقوت لوصيفاتها وقالت : روح الندى... كبي ليا كويس ديال اتاي .
تحركات روح الندى بالزربة ودارت حانية راسها مكتهزش العين جيهت سيد الملك . تحنات جامعة رجليها على الطبلة .. بانو رجليها ودارت الدفيرة للجنب وحتى من الشقة دصدرها باينة . هزات البراد وهوا كيمشي ويجي تقيل فيديها متبتة معاه كتعمر فالكاس بشوية وسيد الملك قالب وجههو وكيشوق فيه ويوزنها بنص عين ، ومن جهة كتشوف فيه لاللة ياقوت مبسمة بنص عين وتشوف فروح الندى . 
حطات البراد بشوية ويالاه جات تهز الكاس وهوا يقول قالب وجهو 
- وجدو ليا عروسة هاد الليلة مع العشاء نبغيها فجناحي . 
سمعانو روح الندى وهوا يمشي الكاس فيدها وجا تخوا منو شوية على صبعانها وحطاتو بالزربة كتنش بيديها وتشير فالسماء نسات راسها قدامن هي 
روح الندى : ااحححح .اييي حرقني .. اححح سخون..افففففف ففففف ااااح فففف ف ف ف

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.