السارقة الجزء 48

من تأليف الكونتيسة
2018

محتوى القصة


رواية السارقة كاملة بدون تحميل

برغم أن كل حاجة كانت مزلزلة بداخل كل بطل من أبطالنا إلا أن الحياة تستمر ..
ونمشيو لفيلا وليد فين كانت تحضيرات حفل زفاف هيلين اللي إيلا متبعين معايا قالت قبلا أنه غايكون بسيط ومحدود واللي تاضح من بعد أنها ناوية تديرو محيح وتسرب صور ليهم وذلك كان مبعد متولات الصحافة فحفلة التأسيس أخبارها وتكلمو عليها وطرحو تساؤلات عن تواجد طليقة المستر وليد و كيفية موافقتها على الإرتباط ديالو بناديا وكيفاش تاسمحت بذلك خصوصا وأنه كاينة بيناتهم بنت .. المهم خذاوها عنوان رئيسي وموضوع شائك لعدة أيام مبعد الحفلة فكان لابد ماتشعر بالحنق والغضب وخصها ترد عليهم وحست باليمن أن الأمور كلها تحت يديها وهيا قادرة على التحكم فيها وتحت أي ظرف كان ، وبالفعل بدات بذلك مين خبرتهم صبيحة داك اليوم برغبتها فدعوة عدة صحفيين لتغطية الحفلة إلى جانب تصوير مجرياتها باش كلشي يكون على مرأى العامة .. طبعا جاد مكانش عندو أدنى اعتراض محيت مشافش شي غرابة مالأمر المهم عندو يتزوجها والسلام عكس وليد اللي اعترض بداية وشاف أن الموضوع كلو دعاية واهية لشيء غادي يتعرف بشكل أو بآخر لكن إصرار هيلين وتشبتها بفكرتها ورغبتها مخلاولو مايقول لذلك خلاها على هواها وهنى راسو كاع .. كان باقي يومين على الحفلة والتجهيزات فالفيلا قايمة عليهم المشرفة هيلين اللي ولا شغلها الشاغل حفلة تكون بورفيكت وعلى مستوى حتى أنها مهتمتش ترد على تهديدات أبوها طوماس مين سمع بالخبر وحجبت اتصالاتو من هاتفها باش تخرج من باب واسع وتخليه يترفكع ، و زيادةعلى ذلك رفضت ترافق وليد لمدرسة سارة الجديدة واللي حست بالحزن من ذلك نظرا لانشغالات ماماها وطبعا لأنه عندنا بطلة حنونة بزاف وبرغبة بسيطة من وليد وافقت تمشي معاهم لهاد المشوار المنتظر وغيرت مود ساريتا من سيء لجيد وهاوما دبا فسيارتهم متجهين نحو المدرسة الموعودة 
سارة(كالسة فالخلف وشابكة يديها بتوتر):- يا إلهي أشعر أن قلبي سيتوقف
وليد(بقلق ممزوج بلمحة مرح):- بيبي متخافيش غادي تتعودي على الأمر
سارة(لتخت راسها على الكرسي طلبا في الراحة):- يس دادي عارفة لكن يبقى اليوم الأول مربك بعض الشيء
ناديا(التفتت عندها من بلاصتها بابتسامة):- أول يوم غادي نكونو معاك فيه لذلك علاش القلق؟
سارة(بلمعة فرح):- ناديا انا جدا سعيدة لأنك وافقتي تجي معانا طبعا بحكم أنك غادي تكوني زوجة بابا إذن أنتي في مقام ماما الثانية وهادا اللي يخولني نكون ممتنة ليك 
ناديا(بحب وتعجب من نضج ديك الطفلة):- صدقيني إلى قتلك أنني بنفس السعادة 
وليد(شاف فيهم بلمحة خاطفة وتابع القيادة):- هففف الله يعطينا شوية من الحب اللي مدفق بيناتكم
ناديا(التفت بلاصتها وبابتسامة):- نتا ما خصك غير تهتم بالقيادة ديالك وتوصلنا بأمان 
سارة(هززت راسها):-هههههه أنا أوافق رأي ناديا 
وليد(بتذمر مرح):- الحلف النسوي يا ويلي هههه
مشاو ضاحكين تاوصلو لديك المدرسة الراقية ونزلو منها كانت ساريتا لابسة فستان بنوتي رقيق فاللون بني غامق وفيه كارويات فنفس اللون لكن بدرجة باردة وتحت منو جوارب بيضاء وحذاء أرضي فالأسود وشعرها كان مفرود وشاداه بمسيسكات وحاملة معاها حقيبة ظهر بسيطة..أما ناديا كانت بطقم نسائي كيشير بكل المؤشرات الطبيعية على أنها أمها لا من خلال الشبه والشعر ولا من خلال الحميمية اللي كانت بيناتهم محيت كانت كلاسيكية بزاف فاللون الأزرق غامق عبارة عن فيست تحت منها قميص أبيض وجيب قصيرة وكعب أسود عالي وحقيبة يد مناسبة للطقم أما شعرها فدارتلو تسريحة خلفية وشداتو بمساك صغير وخلات خصلاتها الأمامية على راحتها تداعبها الرياح .. أما وليد فكان فطقم رمادي غامق عاطيه هيبة وسلطة ومكانة لدى المدراء اللي ستقبلوه بحفاوة فمكتبهم ..
المديرة:- سعيدة جدا بتشريفك لينا مستر وليد 
وليد(بكل هيبة داير رجل على رجل):- أتمنى يكون الجو بمدرستكم ملائم لبنتي لأنني أوضحتلكم تدريسها كيفاش كان لهيه وهنا خصنا نعتامدو على بزاف الأطر باش نخليوها تتأقلم معا منهجية التدريس عندكم
المديرة:- فعلا أنا بمجرد ما وصلتني موافقتك عطيت ملفها لعدة مدرسين واللي قررو المساهمة بشكل كبير فالأمر لذلك مكان علاش تتقلق كل الأمور غاتكون بخير
نائب المديرة:- فهاد الكتيب غادي تلقا كاع المناهج اللي غادي نستخدموها بدئا من اليوم ويمكنلك المتابعة 
وليد(استالمه منو):- جيد جدا كنت غادي نطالب بيه وأكيد غادي نطلع عليه 
المديرة:- كن على يقين سارة مغاديش تلقى شي إشكال معانا 
سارة(حاطة يدها على كرشها وكالسة فالردهة نتاع المدرسة معا ناديا في انتظار أمر الدخول للمكتب):- أوووف حاسة بمغص معوي 
ناديا(ابتسمت وطاطات راسها عندها):- تتت متوتريش وكوني طبيعية وكلشي غايكون هوا هاداك
سارة(شافت فيها بترجي):- ياريتني بتفاؤلك همممم
المديرة(فتحت الباب ديال مكتبها):- سارة شاركينا نتي وماماك الإجتماع تفضلوو 
سارة(شافت فناديا اللي غمزتلها وبابتسامة دخلو):- حاضر
ناديا(شافت فنظرة إعجاب وليد بيها وتاخذت مكانها بجنبو):- وضحتلك المديرة الأمور 
وليد:- امممم أكيد و عندي يقين غادي تتوفق فمهمتها
المديرة:- لابأس فقلقك مدام كاع الأمهات كيكون عندهم توجس على وليداتهم لكن غادي تكون عندنا متابعة دائمة واتصال مباشر مابيناتنا باش نحيدو كاع العراقيل ونخليو سارة تتأقلم معا أبناء جيلها 
ناديا(جات تنطق وتصحح المعلومة بأنها ماشي أمها لكن وليد نقبها):- حنا متأكدين من ذلك ودبا غادي نستأذنو منك .. بيبي سارة استمتعي بأول يوم ليك فالمدرسة نشوفوك مسائا
المديرة(وقفت وحاوطت ظهر سارة):- غادي فور خروجكم نصطحبها لصفها باش تتعرف على القسم ديالها
ناديا(وقفت وربتت على راس سارة بحب):- نشوفك عشية حبيبتي 
سارة(بنظرة قلق عضت على شفتيها وهيا كتشوفهم غاديين وبخفوت مخيف):- سلام 
مشاو وخلاوها معا المديرة اللي صطاحبتها معاها لقسمها وبمجرد مدخلتها حست بالإرتباك والتوتر وخلاها معلمها تاخذ مقعد بجنب أحد الزملاء وتكلس وطبعا كأي يوم أول لكل واحد فينا فالدراسة كيكون الخجل واخذ محلو لذلك كانت تتهرب من نظرات التلاميذ اللي كانو كيتهافتو عليها ويتكلمو معا بعضياتهم ..
ناديا(ركبت حداه وحطت يدها على قلبها):- كنضن سارة دبا مكرهتش لوكان هربت وتبعتنا
وليد(دار حزام السلامة):- ههههه أنا متأكد من هادشي لكن ضروري مغادي تتوالف
ناديا(شافت فيه):- هممم فين ماشيين دبا ؟؟
وليد(غمزلها):- باغي ناخذ رأيك فحاجة مهمة
ناديا(باستغراب):- شنو هيا؟
وليد(بغموض):-خلينا نوصلو وغادي تعرفي
ناديا(تنهدت ببسمة):- كلي فضول تفضل 
ساق السيارة بيها وهي معارفاش لفين باغي ياخدها هاد المجنون تا وقف بيها عند محل موبيليا وآلات موسيقية وغيرو ونزلو وسد اللوطو وقرب عندها وهو فاهم ملامحها المستغربة وحط يدو على ذراعها
وليد(بهمس):- عيد ميلاد ساريتا آخر الشهر وبغيت نجيبلها حاجة مميزة وبعد ذوقك مكاينش اختيار 
ناديا(ابتسمت وشافت فالمحل):- واووو أكيد غانكون مساهمة فالموضوع
وليد مدلها يدو باش تشدها وهي جمعت ابتسامتها وبخفقة فقلبها نزلت عينيها وهو حس بيها وقبل ميجمع يدو حطت يدها وانتفض قلبه بابتسامة ودخلو للمحل .. استقبلهم مول المحل ببهجة وخلاهم يشوفو الحوايج اللي تما كل واحد فيهم وفين غطس ومشا من ناحية ، وهيا كانت من جيهة الآلات الموسيقية وبقات تتأملهم بشرود خصوصا مين شافت بيانو تما حست بحنين خانق لروحها وشدت على عنقها بحركة باغية تبعد ديك الغصة من تفكيرها ، قربت منو وهي خفقاتها زايدين وكيزيدو تا كلست على كرسيه كتشوف فيه ببؤس وذكرى الماضي كتلاحقها بشراسة لامست بأصابعها سطح البيانو وهي كتزفر شهقة حارقة من صدرها ودموعها شارفو على السقوط لولا أنه حط يدو على كتفها وخلاها تفيق من شرودها ..
وليد(بقلق):- نتي مزيانة ؟
ناديا(بابتسامة طمأنة وقفت):- آه آه بخير ..أ لقيت شي حاجة ؟؟
وليد(مط شفتيه):- اممممم مبانلي والو هنا يقدر يعجب ساريتا 
ناديا(خفضت عينيها مور كتفه وشافت بتمعن فديك الآلة المعلقة خلفه وشافت فيه بإشارة ليها):- كنضن هاديك غادي تنفعنا أو لا ؟؟
وليد(التفت شاف فالآلة وشاف فناديا بعنين محمسين):- امممم مثير للإهتمام شفتي قتلك عندك نظرة ثاقبة
ناديا(بخجل):-ههههه لكن غادي نواجهو مشكلة 
وليد(سرح بخياله لإزعاج ساريتا بديك الآلة اللي مكتعرفلهاش):- أوبس نلقاولها حل ع الأغلب وإلا هيلين غادي تقتلنا معاها هههههههه
ناديا:- تمام إذن خلينا ناخدوه
وليد(تقدمها):- يالاه
ناديا التفتت بنظرة شريدة تائهة للبيانو وتبعاته وخداو ديك الآلة معاهم واللي كانت عبارة عن كمان ..

علاء:- بابا إمتا توصل طيارتكم ؟؟
أنور بَّاه:- غدا بالليل 
علاء(بتوتر فالتليفون):- بابا واش مهدت الموضوع لماما ؟؟
أنور(بعد من الصالون اللي كانت كالسة فيه خديجة أم علاء):- طبعا مقدرتش نحكيلها المعلومات اللي أفدتني بيهم حضرتك وخليتلك ليك مهمة المواجهة 
علاء(غمض عينيه بيأس):- من صدقك أبابا خليتلي الأمر المستحيل وفنظرك علاش ستنجدت بيك ؟
أنور:-لوكان قتلها الأخبار السعيدة ديالك كانت رفضت تجي معايا لذلك خلي تانجيو ونخبروها الأمر بجوجنا 
علاء(لقا تفكير أنور منطقي):- عندك الحق وزعما مغاديش دير شي عراقيل ياك ؟
أنور(بضحكة ساخرة):- ههههه والله أولدي أنا شام ريحة المصايب قريبة بزاف غير الله يستر وصافي
علاء(ابتلع ريقه بقلق):- أففف باغيك تدعمني ماشي تزيد توترني عموما نستناكم غدا فالمطار ولكل حادث حديث
أنور(شافها قربت منو وبدل الكلام):- أوكي أولدي نشوفوك غدا أمك كتسلم عليك .. باي 
خديجة:- علامن كتتفق نتا وولدك ؟
أنور(حط تليفونو فجيبه):- علامن غادي نكونو نتافقو حديث أب وابنه والولد غير كان يطمن على موعد وصولنا ، صافي وصلك التقرير كيف باغية ؟؟
خديجة(كمشت عينيها فيه وبنظرة لئيمة):- عموما دبا يبان اللي كتخبيوه عليا منهار خبرنا بزواجه المزعوم يكون فعلمكم إلى معجبتنيش البنت مكاين زواج اللهم إني بلغت 
أنور(شافها غادية لبيتها وتمتم بصوت خافت):- أما لوكان تعرفي باللي مطلقة وعندها 3 ولاد شنو غادي ديري ..آآآخ منك أعلاء ناوي تجيبلنا صداع الراس وحنا مقلنا باش تفكينا منو هففف 
خديجة كانت فعقدها الرابع مزال شادة راسها وزوينة ومثال للسيدة العريقة ذات شعر أحمر أكاجو قصير حد العنق و بشرتها بيضاء إضافة لعملها كطبيبة نسائية فديك المدينة أما أنور كان رجل عادي في عقده الرابع تاهو يكون 48 تقريبا و كان شعرو عاطي لمسة بيضاء من الشيب وعاطيه وقار فعيادتو اللي كايديرها إذ تاهوا كان اختصاصه الطب .. نقدرو نقولو عليهم أسرة طبية بالمعقول نحيدو غير نوفل وختو أمنية اللي كان ميولو غريب عنهم وتمثل فدراسة الهندسة وكان عمره 24 سنة وكان فآخر سنة ليه فالمجال الهندسي ، أما أمنية فكانت مولات 20 سنة وكانت فثاني جامعي تخصص قانوني .. خديجة كانت دايما تحاول تخلي أسرتها أسرة مثالية لا فأكلهم ولا فشربهم ولا حتى فانتقاء أصدقائهم وتسيير حياتهم الشخصية والعملية بحيث كانت تدرس معاهم كل حيثية تخص دراساتهم وبمشقة الأنفس باش وافقت ياخد كل من نوفل وأمنية تخصص غيرهم والوحيد اللي كان كيشارك واليديه فعشق التطبيب هو علاء وبرغم مرضه المزمن مخلاش هاد العقبة تعتارض طريقه وقرر يقرا ويشقا باش يوصل لما وصل له حاليا ودبا برغم أنه مستقر فمدينة تانية غيرهم إلا أنه باقي عندو توجس من سيطرة أمه واللي هاد المرة غادي يدخل معاها فمعركة حربية شرسة مقابل حب حياته .. توتر علاء كان واضح مباغيش يكون عنيف معا أمه ومباغيش يخسر ليلى ومصطفى هنا كان غير مراقبه بصمت وكيشوفو كيتنهت وكاع ممركزش فالخدمة 
مصطفى(شاف فيه بتمعن):- علاء علاش متاخدش بقية اليوم راحة كتبالي مراكش مليح ؟؟
علاء(حيد الليكويات):- عندك الحق راسي مشتت وتفكيري ضايع المهم فالليل فوت عندي للدار ضروري منتكلمو شوية
مصطفى:- صافي ولا عليك غادي نجي ومتقلقش أصاحبي كلشي بالمكتاب 
علاء(مقادرش يخفي توترو):- تيق بيا إلى قتلك مقادرش على مفاجآت غير الله يستر 
مصطفى(حس بيه ومعرف ميديرله):- المهم دبا سير رتاح وفالليل نتكلمو فالموضوع
علاء:- أوك مصطفى نشوفك سلملي على مالين الدار
مصطفى:- يوصل الزين

عزيزة(كتشرب أتاي وتضحك معا سعيدة جارتهم اللي جاتها زيارة):- هيا قوليلي أخيرا نويتو والله يكمل بالخير ويجعلو نهار مبارك ومسعود
سعيدة(كتحط كاس أتاي):- أمين أختي عزيزة ويجعل سعدهم كاع زين
عزيزة:- والله فرحتيني لبنى وحنان يستاهلو الخير ورضوان وحسن بعدا متافقين تاهوما على نفس النهار ؟
سعيدة:- شوفي هو فاللول فكرو فيها البنات وقالك بلاش نديرو كل وحدة عرسها بوحدو نجمعوهم فليلة وحدة ومين شاورو الولاد مكان عندهم تا اعتراض وعلى داكشي اتافقو فالربيع يكون العرس إن شاء الله
عزيزة:- وباقي خير ربي وقت باش يوجدو راسهم بشوية عليهم
سعيدة:- وراه تا على حساب ديك القاعة اللي كيعدلو فيها قالك فالربيع تكمل ويفتاتحوها بعرسهم ههههه
عزيزة:- فيها خير أختي الله يسخر
سعيدة(بدات التبرقيص):- هيييه ولايني هيا بيني وبينك البنات قالولي خبر دندرني ومفهمتش شرقي من غربي وقلت والو عزيزة ختي هيا تفهمني شنو واقع 
عزيزة(فهمتها وحطت كاس أتاي على الطابلة):- عارفة علامن باغية تسولي على بنتي ناديا وياسر 
سعيدة(بلهفة):- كتفهميني بعدا .. أمدرا واش بصح تطلقو وهيا غادي تزوج راجل آخور ؟؟
عزيزة:- وسمعي يختي سعيدة أنا غادي نقولك غير اللي عارفينو نتي ماشي بغريبة علينا وراكي فقيمة خالة البنات 
سعيدة(بحماس التبركيك):- الله ياودي راهم بناتي زعما وقوليلي آش كاين ؟؟
عزيزة(حطت يدها على يد سعيدة وبدات سرد سرد):- واسمعي ياخيتي  ….
مريم(لفوق معا ليلى فالبيت):- هههههه والله نتي مفهمتلكش زعما كتموتي على التشاؤم بنعمي ويااااه شوفي قالك تفائلو بالخير تجدوووووووووووووهو 
ليلى(كتمشط شعرها بشرود أمام المرآة ومريم خلفها فالسرير):- وفهميني يا مريم حرام عليك أنا خايفة كنترعد خايفة نفرح ويخرجلي كلشي مجرد أحلام ونمرض من تاني والله قلبي ولا أضعف من اللول ويلا تعرضت لشي أزمة نفسية تانية غادي ننهار وهاد المرة بشكل أسوأ
مريم(وقفت عندها وتكات على المنضدة بجنبها):- دبا شنو اللي مخوفك أن والديه ميقبلوش بيك ولا أنه يوافقهم الرأي ويتخلى عليك ؟
ليلى(بنظرة خوف شافت فيها):- نكدب عليك إيلا مقتلكش بجوجهم مخوفيني بل راعبيني أنا خايفة يحطوه أمام خيار صعب بيني وبينهم وانا مستحيل نوافق نكون عارض بين أسرة مباغيانيش ونفرقهم 
مريم(بدات تتقلق):- طيب خلينا منستابقوش الأمور ونخليوها فيد الله
ليلى(شافت فالأرض بدموع مكبوتة):- علاء عطاني لمحة على عائلتو كلهم على مستوى وفنظرك غادي يرضاو يزوجو ولدهم لوحدة بحالي لا شواهد ولا دراسة وزايداها مالفوق مطلقة وب 3 ولاد هههه أي واحد عندو العقل مغاديش يقبل 
مريم:- المهم فهاد القضية هو علاء شاريك بيك بماعطاك الله لشخصك نتي ماشي لشي حاجة تانية 
ليلى(بأمل ضئيل):- عموما غدا غادي نكتاشفو 
مريم(بتساؤل):- كيفاش غدا ؟؟
ليلى(بتنهيدة متعبة):- غدا جايين دار علاء من السفر 
مريم(زمت شفتيها):- امممم وعلى ربي يكون كلشي هو هاداك 
ليلى:- أتمنى يا مريم بصح طمنيني كيفك معا خويا السبع همممم ؟
مريم(بخجل حنوكها حمارو):- صحابلك نسيت الزبدة البلدية كاع قلة ما تصيفطوني نجيب ؟
ليلى:- ههههه هادي فكرة مك عزيزة أنا غير طبقت واتافقت 
مريم:- أحياني عليكم بجوج كيتتافقو تخربو العالم 
ليلى:- والمهم نتوما بخير دبا وأموركم على مايرام
مريم:- اممم الحمد لله ياربي فأروع مايكون
ليلى:- وهاداك مبغينا هههه (سمعت غوات) أوووف شنو هادشي مالها خالتي عزيزة كتغوت هاكدة ؟؟؟
مريم(بهلع مفزوعة طارت مجيت الباب نازلة وليلى موراها):- معرفت معرفت ياربي تستر 
ليلى(نزلو وشافو عزيزة وسط الصالون هي وسعيدة مرتبكين):- شنو كاين اخالتي عزيزة ؟؟؟
مريم:- ماما ماما مالكم ؟؟
عزيزة(بتعب وقلق):- جدك عيسى مكاينش فبيته 
مريم(حلت فمها بصدمة):- شنووووووو ؟؟؟
سعيدة:- مك بغات تديله كاس أتاي يشربه وكي حلت الباب لقات غير ربي ورحمته 
ليلى(اندفعت لبيتو مكاينش):- فين يكون مشا هو ميقدرش يبعد بكروسته بلاما نتقلقو راه يكون غير فالجردة اللي مورانا ماتعرفووو 
مريم(بقلق طارت لبست جلابتها):- جدي معمرو خرج بوحدو ديما وحدة فينا كتمشي معاه لكن لكن اليوم معرفت وصافي
ليلى(جبدت جلابتها تاهيا من مور الباب وشالها لواتو على راسها):- خالتي عزيزة معاك محمد أنا غانوصل معا مريم نشوفوه فالجهة ونوليو
عزيزة(كلست بفشل وخوف):- صافي هاحنا هناااا ياربي تستر ياربي تستر
خرجت مريم وليلى وفقلبهم قلق وخوف على عيسى اللي خرج بدون علمهم وبدون ميحسو بيه من الدار ..إيوا فينك أعمي عيسى وفين جبتها ونتا معمرك درتها المهم الدعوة مبقاتش كتعجب اختفاء عيسى لأزيد من 4 ساعات وترهم بزااااف
ابراهيم(فوسط الصالون):- كيفاش تاخرج بلاما تحسوووو بيه ؟؟
مريم(عاد بجلابتها كالسة تبكي):- أنا أنا وليلى كنا لفوق وماما وخالتي سعيدة كانو فالكوزينة يشربو أتاي وكيف العادة صحابلنا راه فبيتوووو تاوقع ما وقع
عزيزة(تاهيا تبكي بالخوف):- والله أولدي هايا خالتك سعيدة تقولك محسينا بوالووو 
سعيدة:- أييه أوليدي مسمعنا تاحاجة ومين مشات تديلو يشرب تاي اكتاشفت أنه مكايناش فالدار كاع
ليلى(بجلابتها عاد تاهيا واقفة):- شنو نديرو أبراهيم عمي عيسى ميقدرش يبقى بوحدو تالهاد الوقت ياكما همل ؟؟؟
ابراهيم(شاد تليفونو):- معرفت أليلى مهم راني وصيت الدراري يقلبو عليه فالمنطقة وراني نستنا شي خبر منهم
مريم(كتبكي بانفعال):- تتتت لوكان غير قالي وانا نديه فين بغاااا ياربي تحفظه
عزيزة:- زعما يكون مشا عند ناديااا ؟؟؟
مريم(حلت فيها عينيها مصدومة):- مستحيل هو فين غادي يعرف فين كاينة ناديا إيلا حنا بذاتنا مكنعرفوش 
عزيزة:- متعرفي صونالها ومشا عندها
ليلى:- مغاديش نتأكدو إيلا مخبرناهاش
ابراهيم(متردد):- غادي غير تخلعوها مستحيل عيسى يكون مشا عندها
مريم:- أنا متافقة معا ابراهيم 
ليلى(شافت فيهم بقلق):- ياودي خليونا نعلموها نتوما عارفينها كيفاش دايرة ويلا وقعت شي حاجة لعمي عيسى لا سمح الله واجا مايسلكنا معاها
عزيزة:- آه آه تانا معا بنتي ليلى
سعيدة:- برا والباس ربي غادي يحفظلنا السي عيسى
ابراهيم(طلع حواجبه لمريم):- اممم ديرو اللي بغيتو غادي نخرج نشوف الدراري ونرجع إيلا وصلكم أي حاجة صونيولي
مريم(هازة تليفونها):- تانتا صونيلنا إيلا عرفت أوك
ابراهيم:- أوك
ليلى:- غادي تصونيلها؟
مريم(غمضت عينيها بتعب ومسحت دموعها):- ضروري …  
وليد كان مزال معا ناديا راجعين للفيلا مبعد متغداو فواحد المطعم قرب المحل اللي خداو منو الكمان وغلفوه وحطوه فالخلف باش كيوصلو يخبيوه تالنهار العيد ميلاد ويقدموه لسارة .. 
ناديا(سرحت رجليها بتعب وألم وبصوت خافت بينها وبين راسها):- هففف قتلني هاد الكعب 
وليد(سمعها):- غادي نوصلو وترتاحي 
ناديا:- امممم .. 
وليد(شاف فيها شردت):- ناديا تليفونك كيصوني 
ناديا(انتبهت):- هاااه … وي أنشوف شكون … اممم مريم غريب كتصونيلي دبا 
وليد:- جاوبيها 
ناديا(ردت بتوجس):- مريم 
مريم(ابتلعت ريقها):- نادياااا حبيبتي مبغيتش نقلقك ولا نخلعك 
ناديا(اختفت بتسامتها وعرفت كاينة شي مصيبة):- شنو كاين ؟
مريم :-جدي عيسى خرج معرفناهش فين مشا ومقبيلة وحنا نقلبو عليه مزال مبانش خصك تجي هنا ضروري .. ناديا كتسمعيني ألو ألوو ..
ناديا(كانت مصعوقة وحالة عينيها كتسمع وأنفاسها بدات تتصاعد بقلق):- أنا جاية 
وليد(شافها تلونت ووقف اللوطو بقلق):- شنو كاين أناديا تكلمي ؟؟؟
ناديا(لفها من يدها عندو وشافت فيه بجمود وصمت كيخلع):- جدي مفقود
وليد(حل فمه ورمش بعينيه وحس بنفس القلق وحك اللوطو عودة من طريق الفيلا اتجاها لدار عيسى):- متقلقيش راه غايكون غير فالنواحي تما معندو فين يبعد خصوصا بوضعه هممم 
ناديا (شاردة وكتشد على صباعها بسكون تام):- :…. لارد
وليد عرفها خرجت عن عالم الإدراك ودخلت فقوقعة الخوف والقلق والتوتر على جدها لكن فعلا لقا أن الأمر غريب وجدا 
وفيه إن وأخواتها لذلك أسرع بسيارتو بأقصى مايمكنه وصولا للدار أخيرا .. نزلت من السيارة ونزل موراها ودخلو
ناديا(بصوت مخنوق):- فينو جدي ؟؟
مريم(طارت عندها عنقتها وناديا غي ساكنة):- ناديا حبيبتي متخافيش ابراهيم راه كيدير أقصى مافجهده
عزيزة(حشمت وعضت على شفتيها):- زيد أولدي تفضل
وليد(يدو فجيوبو):-ربي يخليك لكن واش بلغتو البوليس ؟؟
ليلى:- خويا ابراهيم بلغ صحابو وراهم كيقلبو عليه دباااا 
ناديا(حست بفشل واختل توازنها وشدها وليد بيدو):- هففف
وليد(كلسها على الكرسي):- كلسي ومتقلقيش غادي نتصل بجاد يتصرف هو وبلال متخافيش غادي نلقاوه
ناديا(بدموع):- وخا ..
ليلى(قربت من ناديا مبعد مخرج وليد):- متخافيش أناديا 
ناديا:- واش كان زعفان كيدار تاخرج ومفقتوش بيه نتوما عارفين جدي ميقدر يخطي العتبة بوحدووو 
عزيزة(نفجرت بالبكا):- سمحيلي أبنتي لافوت ديالي أنا اللي منتابهتلوش
مريم:- تانا غالطة 
سعيدة:- كاع محسيناش بيه أبنتي سمحيلنا
ناديا(ابتلعت ريقها):- ع الله يكون غي بخير هاداك مكنتمنا آآآه ياجدي وفين تكون دبا 
قلق وليد كان كبير على جد ناديا اللي معرفوش فين غبر ، اتصل بجاد وخلاه يتكلف بالموضوع وخا هيلين بغات تقجه لأنه غادي يعطل شحال من حاجة هيا معولة عليه فيها ومعارفاهش فين ماشي فتحججلها بشغل طارئ فالشركة عاد باش قدر يفلت وجاب معاه بلال والرجال وبداو البحث على عيسى اللي كان ابراهيم تاهوا قالب عليه الدنيا .. وهوما معارفينش أنه كان محتجز فواحد الكاراج فكروستو وكيشوف فالأرض بصمت حزين وكيستنى .. 

ابراهيم(داخل ملهوف):- للأسف تاشي حد مقدر يعتر فيه من غير السي محمد مول الحانوت قالك شافه الصباح وهو غادي بكروسته سوله فين مجاوبهش تابحرف 
ناديا(بقات تفكر):- كيفاش زعما جدي خرج قاصد شي مكان محدد ياكما وقعتلو شي حاجة ؟؟؟
ليلى(هزت تليفونها):- تهدني أناديا تهدني وانا غادي نبلغ دبا علاء يسولنا فالمشفى عندهم وفبقية المستشفيات 
ابراهيم:- داكشي اللي كنت غادي نقولك أليلى باش ديريه وانا عطيت تعميم بأوصافو على كاع الكوميساريات باش اللي عتر فيه يتصل بيا مباشرة 
ناديا(شافت وليد داخل وحست بالإحتياج ليه):- وليييد
وليد(حركلها راسو بأسف):- تتت مقدرناش نوصلولو 
ابراهيم طلع فيه ونزل وتنهد بعمق توجه للكوزينة بدون ميزيد حرف وتبعاتو مريم وليلى مباشرة دخلت للجردة تكلم علاء أما عزيزة وسعيدة فبقاو فالصالون وناديا وقفت بتعب ودخلت بيت جدها وتبعها وليد ، شافت ببكاء فالبيت الفارغة وحست بوجع فقلبها وخوف كبير على حبيبها جدها والتفتت بعيون تائهة لعند وليد اللي كان جامع شفتيه بحزن عليها وقرب منها عدة خطوات مسحلها على شعرها ومسح خدها بيدو في حين دمعة حارقة نزلت من عينيها 
وليد(وهو قريب من وجهها وبيقين):- غادي نرجعوه كنواعدك
ناديا(شهقت وهي كترتجف):- أنا عندي غير جدي ويلا مشالي معناه مبقالي وجود
وليد:- شتتت متقوليش هاكدة دبااا شوية غاتلقاي راسك فحضنه
ناديا(ببؤس شافت فيه وهززتلو راسها بتمني):- يااارب تحفظولي … اهئ
وليد(مقدرش لدمعها ولف يدو من ظهرها ودفعها لصدرو غي بشوية لربما حست بالأمان):- تهدني أناديا شتت
ناديا(حطت يدها على صدرو وبقات تبكي بتعب وخوف):-بغيت جدي بغيت جدي أهئ 
حاوطها بين يديه باغي يحيد منها داك القلق اللي تسرب لقلبه وحس بالتوجس لاختفاء عيسى المريب ، حتى قاطعهم دخول مريم اللي تصدمت من المنظر وتفعفعت ناديا ومسحت على شعرها وبعدت على وليد
ناديا:- امم كاين شي جديد؟؟
مريم(بلهجة غريبة وقاسية):- لا غي جيت نخبرك أن ابراهيم باغي صورة لجدي عيسى 
ناديا(التفتت لدرج سرير عيسى وجبد منو ألبوم كان فيه صورة ديالو غي هزتها بكات وعطاتها لمريم):- هاكي
مريم(بدمعة حارقة عنقتها):- صافي أحبيبتي هوني عليك راه غايرجعلنا أنا أكيدة 
وليد(تليفونو صونا):- امم عن إذنكم واحد الشوية 
مريم(تنفست بعمق كيشافتو خرج):- نتي عاد فالعدة ديالك ع الاقل وقري شوية الوضع
ناديا(علات حاجبها تشوف فلهجة مريم الشرسة):- ومالك تكلميني بهاد الأسلوب ياكما كتلوميني على اختفاء جدي بحالي بحالك معارفاش فين يكون مشا 
مريم:- مكانلومك ماوالو إنما كنطلب منك توقري شوية وصافي
ناديا(بلؤم):- مامحتاجاش توريني شنو ندير و ..
وليد(دخل بمنظر غريب عندهم وقاطعهم):- ناديااااا 
ناديا(شافت فيه بصدمة وفزع):- شنو كاين لقيتوه ؟
وليد(شاف فمريم ومص شفتيه بسرعة):- أ.. لا غير بغيت نقولك 
ناديا(انتبهت لارتباكو وشافت فمريم):- مريم عفاك خلينا بوحدنا 
مريم(تنهدت بغضب وخرجت):- وخا
ناديا(شافتها تاخرجت وقربت من وليد بتساؤل):- مالك ؟
وليد(شاف فالأرض وشاف فيها وزفر بتعب):- خصني نمشي حالا  
ناديا(ارتجفت شفتها وحدقات عينها بتوتر):- علاش فين غادي ؟؟
وليد(بيأس شد يدها):- غادي نشوف جاد شوية ونرجع متقلقيش مغاديش نتعطل عليك
ناديا:- وليد نتا عارف شي حاجة مباغيش تقولهالي ؟
وليد(تشتت لكنو مقدرش ينطق):- سمعيني أنا متأخر أصلا جيت باش نبلغك وصافي خليك هنا تانرجع وخااا ؟؟
ناديا(طلق يدها وجا ماشي):- ستنا وليد .. وليد ..
مشا وخلاها فحيرة تامة وأثناء خروجو تصادف معا ابراهيم اللي كان برا معا شي صحابو 
ابراهيم(بحنق ولهجة مبطنة):- شايفك ماشي آه أحسن نتا مكاتنتاميش لهاد الجهة أصلا 
وليد(توقف وعدل جاكيطو والتفت عندو بصرامة):- خطيبتي كاينة لداخل أكيد راجع
ابراهيم(تعصب وخلا صحابو وتقدم عنده بغضب):- وجودك ممرغوبش فيه فياريت متمتعناش بوجهك الكريم
وليد(لبس نظاراتو الشمسية بهدوء وعوج شفته بسخرية):- حتى تكون دارك عاد هدر.. باي
خلاه تابخ وكيردح بعصبية ومشا فسيارتو لعند جاد اللي كان يستناه فالمكان اللي حددوه .. غي وصل وليد نزل عندو ولقاه مربع يديه ومتكي على سيارتو كيستنا
وليد(لتخ باب سيارته وحيد نظاظرو ودارهم فجيبه وهو متجه عند جاد):- شنو الشي المهم اللي خلاك تجيبني بسرعة؟
جاد(هز يديه للسما ولتخهم بيأس):- مغاديش تصدق أنا عارف عيسى فين دبااا 
وليد(كمش عينيه وحلهم فيه بصدمة):- فين ؟؟
جاد(باستهزاء متعب):- مغاديش يخطر على بالك بمرة مكان تواجده
وليد(بلهجة تهديدية):- متختابرش صبري وتكلم فينو دبا 
جاد(خدا نفس عميق):- يفضل تغير السؤال 
وليد(بقلق كبير):-كيفاش؟
جاد(دار يدو على جنبو):- للأسف الوضع أكبر مما كنضنو كاملين 
وليد شاف فيه بخوف وهو مقادرش يستوعب مرمى حديث جاد اللي خلاه يتبعه ونطلق بيه تجاه فيلا صفوان..

~قبل ساعات~
البوس(حاط يدو على فكو وفمكتبه):- فيديريكو عندي إحساس باللي جميلة كتدبر من مورايا شي حاجة 
فيديريكو:- حاجة من أي نوع أسيدي وانا نتدخل باللازم .. سيادتك شنو تقترح؟؟
البوس(بتفكير):- معارفش لكن نقدر نعرف .. فيديريكو باغيك تراقبها 24 ساعة على 24 وخا هيا معانا داخل هاد الفيلا لكن كلنا عارفين أنها تربية الكار ديالنا وتقدر دير العجب 
فيديريكو:-  تمام أسيدي كيما تأمر
البوس:- بغيتك تخليها على هواها وتستغفلنا كيف بغات وفالوقت المناسب كينعطيك الإشارة تحرك 
فيديريكو(منسحب من المكتب):- بأمرك أسيدي
جميلة(فغرفتها كتحك فيديها بتوتر وكتستنى):- أوفف مالك تعطلت أجعفر يا الله .. تتتت هفف أخيرا صونيت ألو جعفر فينك كاع هاد الوقت وترتني وانا مناقصنيش
جعفر(فالطرف التاني من التليفون):- يدوب قدرت ندبر الأمور صافي تقدري تنفذي 
جميلة(ابتلعت ريقها):-هففف نشوفك أجعفر
جعفر(كيشوف فديك الدار من داخل سيارته):- كنستناك (غير قطع الاتصال رجع شاف فتليفونه) أوووه ياسر دبا شنو باغي تتت .. ألو ياسر
ياسر:- كيفاش زعما الأمور وصلت هاكدة تخرج بدون ماتعلمني لا أنك خارج ولا فين خارج
جعفر:- هوهوه إلا حاب نذكرك أنا أكبر منك فالعمر وأعقل منك لذلك كنضن هادا كيخولني باش منستاشركش فمواعيدي الخاصة 
ياسر(شافو مرتبك ومعصب زيادة ع اللزوم واستغرب):- هادشي كاع من نقاشنا لبارح كنضن أنني متعديتش حدودي مين قررت نرجع بنت البوشتاوي لدارهم 
جعفر(بعصبية):- لا متعديتهمش وماشي هادي هيا القضية القضية في أنها سمعاتك ونتا كتبلغني بقرارك المفاجئ وهادشي كلو رغبة منك فالهرب الجباااااااان
ياسر(عض شفتيه بعصبية بغا يخرجله من التليفون):- جعفر متستفزنيييييييييش 
جعفر:- هم هممم هممم نتا عارف وانا عارف مناش خايف لكني نحب نطمنك غانكون أسعد منك بعودتها لعند باها 
ياسر:- متخلطش الأمور مشاعري ثابتة فمتخليش خيالك وتعقيدك المشوه من 25 سنة ولا كتر بسبب حببيبتك اللي معارفش تاتبوحلها بمشاعرك كاع هاد السنين يأثر عليك
جعفر(بانفعال متزايد):- هادي هيا ردة الفعل المنتظرة منك يا فاشل شنو غادير كتر ماللي درت البنت بسببك حبست راسها فبيتها وكالسة تبكي وتعاود
ياسر:- هههه قول أنك كتفتقد لطعامها يا لمكراش وزايدون أنا أبديت برأي فقط مقلتش أنني دايها غدا
جعفر(بسخرية):- ههه سمعاتك إذن نفس الشيء أعمو 
ياسر(بقا يسب ويلعن فنفسه وبصعوبة سيطر على غضبه):- عموما هادا ماشي موضوعنا خبرني نتا فين؟
جعفر:- أمور عالقة أنا بوحدي اللي نقدر نديرها فمدخلش راسك فشوبوقات بعيدة عليك وخرج من راسي هاد الساعة
ياسر(بتخمين):- جعفر نتا مكتكونش فهاد الحالة إلا مين … لالالالالالالا ميمكنش
جعفر(حال عينيه):- شنو شنو باغي تقول؟
ياسر(بضحكة):- نتا غادي تشووف جميلة 
جعفر(كشفه):- غبي كتجسس علياااا
ياسر(بعنين لامعة بخبث):- إذن تخميني خرج صح وانا نفهم علاش السيد نازل فيااا تسبيط 
جعفر(بغا يتهرب من شعوره):-أيا كان ممستعدش نسمعلك دبا
ياسر:- امممم مكان مشكل لكن مين غاتجي عندنا حوار طويل
جعفر:- سير صالح ديك البنت اللي كسرت بخاطرها أحسنلك وبعد مني 
ياسر(كيضحك):- ههههه باي يالعاشق
جعفر قفل تليفونه وهو كيلعن وشبح ابتسامة كيتخلل محياه فعلا حب جميلة مدمر قلبه تدمير ومخليه كي الأبله ..زكية فعلا سمعت ياسر وهو يقترح على جعفر يرجعوها لدارهم مبعد مايطلقها وهادا كان فوق احتمالها بمجرد ماسمعاتو طاح من يديها الكاس وشافت فيه بعدم تصديق وطلعت كتجري تبكي .. اللي ألمها ماشي اللي سمعاتو إنما اللي حساتو معاه فداك اليوم اللي خلاهم جعفر بوحدهم فالدار بحيث تقرب ياسر منها وشعورو ديك اللحظة مكان تاشي قوة تقدر تكذبه كانت كتبكي وتشهق بمرارة وفلحظة مسحت دموعها وشردت فداك اليوم اللي معمرها غادي تنساه فحياتها واللي فلحظة بغا يسلبها أجمل ما منحها ..رجعت للذكرى من جديد فاش كان كالس أونفاص ليها وهيا كتوجد فداك الغدا اللي معرفتش تكملو من شدة ماوترها بمراقبته ليها حتى استسلمت أخيرا وبوضوح 
زكية(بخجل):- نقدرو نتغداو برا فالجردة ؟
ياسر(حيد عينيه على الكاس وشاف فيها بتكمشية غريبة):- اممم فكرة أنمشي نوجد الطابلة تكوني كملتي اختراعاتك
زكية(تنفست راحة):- أوكي هفف أخيرا ..
ياسر(كان مشا وولا لقاها تتنهد بلقطة مضحكة أفزعها):- بغيت غير نقولك مديريش بحساب جعفر 
زكية(شادة على قلبها اللي بغا يخرج):- أ..آه راه قالي 
ياسر(بنظرة مريبة):- تمام
طبعا تهنات من وجودو الخانق معاها فنفس المكان لكن نظراتو المريبة كانت كتبعتلها إشارات مكطمنش حاولت تتمالك نفسها وكملت داك الغدا المتعوس ، مبعد محطت كلشي بنظام كلسو أخيرا ياكلو وشحال مدح فأكلها وشطارتها وهادا اللي متعودتش عليه 
زكية:- أول مرة تمدح أكلي بهاد الطريقة
ياسر(كياكل):- باغي نفتح باب للحديث 
زكية:- أو باغي ترد المعروف ديالي 
ياسر:- اممممم زكية ديما كنقول عليك ذكية 
زكية(حطت المعلقة باهتمام شافت فيه):- سي ياسر أنا اللي درتو مباغياش عليه رد جميل لأنه لو تطلب مرة أخرى مني غانديرو مجددا وبدون تردد
ياسر(حط المعلقة):- إذن هادا كرم بالغ منك 
زكية(بتشكيك وانفعال):- علاش باغي تحسسني أننا فجبهة منفصلة كنضن مبعد اللي وقع لبارح كاين شي حواجز تحيدت
ياسر(بتهرب):- وقيلة هاد العصير ديالك كديري فيه شي حاجة مسكرة بديت ندوخ 
زكية(بعصبية حطت السربيتة وناضت):- تت أكيد غادي تتهرب 
ياسر(شدها بقبضة قوية من يديها ووقفها وعلا عينيه شاف فيها):- أنا خارج من أزمة عاطفية أقلو عطيني وقتي باش نستوعب محلي من الإعراب
زكية:- متستناش مني نعطيك وقت لأنني عايشة فجحيم 
ياسر:- خليني نذكرك أنه اختيارك مالأول أنك تزوجتيني بالغصب والحيلة
زكية(شافت فالأرض باهتزاز):- إذن متخلينيش نندم على الحاجة الوحيدة اللي آمنت بيها فحياتي 
ياسر(شاف فيها مليا وطلق يدها):- منواعدكش
زكية(بمرارة ففمها وعيون دامعة):- كنت متوقعة 
مشات وخلاتو كيشوف فالأرض لأول مرة يحس روحو مشتت بديك الطريقة ولديك الدرجة تنهد وعلا راسو شاف فالسما ورجع شاف فالبحر قدامه وبقا يتأمل حياته المشتتة وآخر مكان كيتوقعه أنه يعلق زكية فحباله وبدون مايقصد ..سمعها كتغسل لماعن بعنف وعصبية وزفر بتعب وناض لقاها فحالة نرفزة عنيفة 
ياسر:- دبا هادشي عندو مبرر ؟
زكية(بضحكة ساخرة):-متحاولش 
ياسر:- منحاولش شنو ؟؟
زكية:- متحاولش تتهرب من أحاسيسك أنا عارفة معمرو غادي تبغيني لأن فقلبك امرأة واحدة وللتذكير هيا نفسها اللي خانتك وطعناتك فظهرك ..
ياسر(غمض عينيه وبدا يتغلغل):- معندكش الحق تدخلي فهاد الموضوع 
زكية(حطت الصحن ومسحت يديها بالفوطة):- آه فعلا معنديش الحق تافحاجة 
ياسر(شافها خرجت تجمع الصحون اللي فالجردة وبقا واقف):- صافي هادا مبغيتي غير نرجع لتعاملي المزدري معاك وقيلة كتموتي على التوبيخ والنهر ديالي 
زكية(بمرارة متعبة شافت فيه وفيديها الصحون):- وعلاش غادي تكلف راسك خليك ع الطبيعة
ياسر(تبعها تاني لداخل المطبخ):- لا دبا نتي كتستافزيني وانا مباغيش نجرحك
زكية(حطت الصحون بعصبية والتفتت عنده):- مباغيش تجرحني هههههه مع أنه هادي هيا الحاجة الوحيدة اللي كديرها معايا وكأنك كنتقم مني على أفعال طليقتك المصون 
ياسر(اقترب منها كي النار وبإشارة بصبعو تهديدا فوجهها):- أوياك وتتعداي حدودك 
زكية(قريبة منو شافت فصبعو وشافت فعينيه بتحدي):-أو شنو غادير ؟؟؟
ياسر(كمش عينيه بخبث وشاف فصدرها المنتفض من تنفسها المضطرب وفشفتيها الوردتين وعيونها الحائرة):- ويل إلى كنت غادي نعاقب نفسي فأكيد خصني سبب لذلك آم سوري … 
شدها من مؤخرة راسها وصباع يديه تغللو بين شعرها الصارخ وجبدها لعندو بيدو التانية من خصرها وأسرها فشفتيه بقبلة عنيفة خلاتهم يغمضو عينيهم بجوج فسحر اللحظة لكنو سرعان مبعد عن شفتيها غير شي سنتيميترات وعاد وجهه قريب من وجهها وشدو بكلتا يديه كيشوف فيها برجاء
ياسر(بانكسار):- رجاءا تبعدي مني مباغيش نآذيك صدقا مباغيش 
خلاها واقفة كتبتلع ريقها وتسترجع أنفاسها من الزوبعة اللي ضربت شفتيها للتو وهيا مقادراش تستوعب كلامه كانت مأخوذة بديك القبلة المفاجئة واللي خلات الفرح والسعادة يتسربو لروحها .. شدت على قلبها وصدرها اللاهث وهيا كتشوف فيه هاز جاكيطو وخارج لبرا ، بصعوبة وفشل عشقي فجسمها تبعاتو باش تخبره ان اللوطو خداها جعفر وسمعاتو يهدر معاه ويقولو أنه باغي يرجعها لواليديها وهنا تهرس كلشي فلحظته وشهقت بعنف وهو شافها وعرفها باللي سمعاتو ومن ساعتها وهيا حبيسة غرفتها ..

جعفر(داير كاصكيطة على راسو ونضاضر شمسية ومتكي على سيارتو وكيستنى تاوصلت سيارة أجرة قريب منو ونزلت منها جميلة اللي كانت لافة على راسها شال خفيف زادها جمال ورقة حاسبت مول الطاكسي و حيدت نظاراتها الشمسية كتقلب بعينيها وهو كيشوف فيها جميلتو حبيبة قلبو ، وصفرلها غي شافتو تقدمت بخطى متسارعة لعندو وهي كتلتفت من كل جهة وطريق 
جميلة(وصلت عندو وبابتسامة واسعة):- جعفر أخيرررا شفتك
جعفر(مرتبك كان جاي يسلم عليها لكن محسش براسو إلا وعنقها وبعد):- أنا الأسعد اففف فاتت أيام طويلة بيناتنا
جميلة(مصت شفتيها بحزن):- فات جحيم اجعفر اففف معنديش الوقت بزاف يالاه ساعتين وخصني نرجع قبل ميحسو بيا 
جعفر:- عارف يالاه اتاصلي بعيسى راه يكون يستناك فعلمه اليوم اللقاء المنتظر
جميلة(شدت عليه التليفون وبتلعت ريقها):- دعيلنا 
بعد دقائق بسيطة وفدار عيسى اللي فتح باب غرفته وانتبه أن عزيزة معا سعيدة فالكوزينة الولاد فالمدرسة والبنات لفوق إذن هادي فرصته خرج من بيته وفتح باب الزنقة وخرج وفات على مول الحانوت اللي كلمه لكن مراقبته لديك السيارة السودة الضخمة اللي كانت على طرف الدرب خلاتو يركز معاها أكثر ويتجاهل نداء السيد.. وصل للسيارة اللي دخلت فالدرب باش متبانش ونزل جعفر فتح الباب الخلفي ونزل حديدة لامست الأرض وقدر يطلع كروسة عيسى تما ورجع ركب بلاصتو
جميلة(كانت أونفاص ليه وشافتو وبرهبة):- السلام أعيسى فاتت سنين بين آخر لقاء لينا
عيسى(شاف اللوطو تحركت نزل راسو وشاف فيها):- 23 عام ماشي ساهلة 
جميلة(ابتلعت ريقها):- خصنا نهدرو 
عيسى:- وعلاش فنظرك طلبت لقائك على وجه التحديد
جميلة شافت فجعفر اللي زيد السرعة للسيارة ودخل بيها لواحد الجهة خاوية شوية ووقف
جعفر(التفت عندهم):- من الآخر شنو باغي ؟
عيسى:- نفهم شنو سر وجودك فحياة حفيدتي وبهاد القرب هادا واش هيا عارفة أنك مها ؟؟؟
جميلة:- طبعا لاء لكن أنا رجعت للبلاد ولقيت طريقة ندخل لحياتها ونعاونها باش تقدر تعيش بدون متحتاج لحد طبعا هادشي مين لاحظت مدى عذابها الأزلي منهار دخلت حياتك
جعفر(بلغة مبطنة):- جميلة متكونيش قاسية السي عيسى دار اللي فجهده
عيسى(شاف فيه بقسوة وفيها بشؤم):- أنا ربيتها ولوكان لقيت نعطيها من لحمي ولا نخليها تتمحن 
جميلة(تأثرت وقلبها رأفلو لكن خصها تكون أقوى):- شنو هيا طلباتك باش تخلي الموضوع كما هو عليه ؟
عيسى:- عذرا منك لكن جا الوقت باش تعرف ناديا الحقيقة ديالك متسنايش مني نشارك فهادشي مجددا كاع فاللول وكان فبالي معمرك غادي ترجعي وكنت ممتن للنهار اللي خبرتها أن واليديها ماتو ربيتها وعتابرتها حفيدتي من لحمي ودمي لكن تجي دابا ودخلي فحياتها وبدون متعلميني ولا تخبريها بالحقيقة سمحيلي تالهنا وغادي نقولك سطوب 
جميلة(شافت فجعفر بحنق باش يتدخل):- شنو كتقصد؟؟؟
عيسى:- اللي فهمتيه ناديا اليوم غادي تعرف باللي نتي أمها 
جعفر:- سي عيسى نتا بهاد القرار غادي دمر علاقتك بحفيدتك بشنو غادي تبررلها كذبك عليها طول هاد السنين ؟؟
عيسى(ابتلع ريقه وحس بالحزن لذلك لكن لا مجال للتراجع):- اللي كيهمني دبا أنها تعرف الحقيقة والأمر غايكون فالأخير بين يديها هياااا 
جميلة:- وقيلة مراكش فاهمنا مزيان السي عيسى قتلك ناديا مغادي تعرف بوالو حاليااا ونواعدك فأقرب فرصة غادي نبلغها بالأمر ثق فيا 
عيسى(بعدم تصديق):- علاش باغياني نتيق فيك ونتي معاها طول هاد الفترة قريبة منها ومقايلالهاش حقيقتك بأي حق كطالبيني دبا نتيق فيك واش بحق تركك ليها وهيا مزال مكملت شهر فعمرها ولا بحق ماقلتيلي بلغها باللي واليديها ماتو 
جعفر(شاف جميلة حمارت وبغات تبكي انهيارا):- السي عيسى نتا ماعارف والو على ملابسات اللي وقع فالماضي فميمكنلكش تحكم على حاجة خارج نطاق رعايتك 
عيسى:- أه سمحولي نسيت باللي أنا صيفتي دبا جد ناديا اللي بالمقابل هيا تكون حفيدتي 
جعفر(تنهد بتعب):- حنا متافقين معاك فكل كلمة كتقولها لكن محتاجين شوية وقت للتمهيد ياك أجميلة؟
جميلة(فهماته وهززت راسها تأييدا):- آآآآه أكيد للتمهيد فماشي مبعد هاد المدة نتاع القرب بيني وبينها نجي على غفلة دبا ونقولها أنا مك ضروري منلمحلها ونمهدلها وحسب علمي ناديا كتمر دبا بأزمة نفسية ويلا زدنالها هاد الخبر ماشي بعيد نخسروها فما كتر 
عيسى(شاف فيهم بضياع):- معرفتش إينا نوع من البشر نتوما اللي وقعت راسي فيكم وعرضت حياة ناديا للخطر 
جميلة:- نتا مكبر الموضوع زيادة على حجمو أنا متفهمة قلقك وإخلاصك وصدقا كنقدره بصح أنا باغياك تعطيني شوية وقت ومغاديش تندم 
جعفر(كيحاول يقنعه):- وقت بسيط ويالاه أصاحبي راه فاتت 23 سنة مافيها باس تصبر شوية 
عيسى(بعد تفكير طويل وصمت وترهم وخلاهم يشوفو فبعضياتهم قلقا):- عندكم منا لعيد ميلادها (شاف فجميلة)كنضنه يوم مثالي للإعتراف مدام جميلة ؟
جميلة(بدموع محبوسة):- اتفقنا 
جعفر(شاف فجميلة بعدم تصديق):- عيد ميلادها واش نتي مجنونة حسبي شحال مشهر ويجي ؟؟
جميلة:- أنا عارفة شنو كندير أجعفر رجاءا
عيسى(شاف فيهم ببغض):- نزلوني باغي نمشي فحالي 
جعفر(نزل لاتخ الباب ونزله ووقفه عند راس الشارع):- نتا متأكد مباغيش نوصلك للدار ؟؟
عيسى:- راني قريب وباغي نبقى شوية بوحدي
جعفر(مشا وخلاه):- اللي بغيت سلام 
عيسى(استوقفه):- نتا مول الضو ياك ؟؟ نتا اللي جيت ديك الليلة سولتني على معلومات تخص ناديا ؟؟
جعفر(تكشف):- امممم هاديك كانت ثاني مقابلة لينا … سو إفرح 
عيسى:- إيلا عرضتو ناديا لأي خطر ..
جعفر(رجع عنده وانحنى لوجهه بنظرة خطيرة مهددة):- هممم شنو فإمكان مقعد بحالك مايديرررر ؟؟؟
عيسى(بغضب تنفس):- غادي تتفاجئ لذلك خلينا على وصال أحسن 
جعفر(بعد مخلوع دعابيا):- أوووتش خلعتني 
عيسى(دور كروسته باغي يمشي):- نتمنى متخدلونيش وإلا غادي نغرق السفينة بيها باللي فيها 
عيسى جر كروسته باش ينعطف وهوما يفاجئوهم رجال صفوان وطبعا شدو عيسى بسهولة لكن جعفر طار طيرة وحدة لسيارته وحكها وهنا فيديريكو عطا أمر لسيارة تانية باش تلاحقه وتشدو ، جميلة بقات تترعد ايلا شدوهم مشاو فيها بصح قدر جعفر يراوغهم وفلت منهم 
جميلة(كتمسح دموعها وتشوف موراهم برعب):- الحمد لله أجعفر قدرنا نهربو منهم 
جعفر(كينهت):- نزلي نتي دبا وسيري للفيلا عادي لأنهم شافوني غير أنا 
جميلة(نزلت وشدتلو يدو ومشات):- نشوفك على خير 
جعفر(بتأثر وخوف عليها):- يتولانا الله 

فيديريكو(شاف فعيسى مبعد مرجعو رجالو خايبين):- سيد عيسى خصك تجي معايا 
عيسى حل عينيه فيه مصدوم وشاف موراه رجال هازين طرف جواكطهم ومبينين مسدساتهم وابتلع ريقه عرف أن نهايته على يدين دوك الرجال اللي خداوه لمكان مجهول وخلاوه حبيسهم بدون أدنى حرف ومن وقتها وهو كيستنى … 
أما جعفر بقا كيتنيتر ويزعف فخاطره اللي جميلة حددت المهلة لمعرفة ناديا بالحقيقة وهادا لوحده خلاه يتعصب ويتنرفز ، وطبعا لا هوا ولا جميلة عارفين أن ياسر خبرها بالحقيقة محيت مجمل اللي قالولهم أنه كشفلها على نوايا البوس ليها وخبرها أنها لازم توقف معاهم باش يزجو بيه فالسجن ويتهناو من كابوسه للأبد .. رجعت للفيلا مبعد مامرت من عدة مراحل هروبا من التعقب وهي أساسا معارفاش أنها مراقبة من اللول من اللي عتبت باب الفيلا الخلفي هاربة من الحراسة اللي مشددها عليها البوس واللي كان كيستناها فغرفتها وداير رجل على رجل كيشرب كاسه ببرودة مطلقة وهي داخلة مفعفعة وفرحانة اللي متكشفتش لكن ….
البوس(بابتسامة):- مفاجأة 
جميلة(ارتعبت وشدت على صدرها بشهقة):- ص.. صفوان شنو كدير فبيتي ؟
البوس(حط سيجارو فالطفاية وناض بأناقة مقترب منها):- السؤال الصحيح فين كانت صاحبتها ؟؟
جميلة(تلعثمت):- أ.. كنت خرجت قضيت شي أمور وجيت و
البوس(قبض فكها بعنف):- أمووور أهااااه أمور فيها ريحة جعفر .. جميلة يا جميلة نبهتك مرارا وتكرارا متلعبيش معايا لكنك مكتحشميش لذلك أنا معذور ومغاديش نتحمل الذنب ديال شخص بريئ لأن ذنبه غايكون فرقبتك نتي
جميلة(بعدت وجهها عليه بدموع نازلة):- نتا شنو تقصد ؟؟
البوس(ضحك بسخرية):-أهممم تقدري تعزي ناديا فجدها العزيز عيسى 
جميلة(بعدم تصديق حلت فمها):- شنوووو شنو كتقووول لالالا ميمكنش متقدرش ديرها أصفواااان الرجل هو اللي ربا بنتك كاع هاد السنوااااااات متقدرش تغدر بيه 
البوس(ضحك بخبث):- امممم يؤسفني نقولك أنك حكمتي عليه بالموت لذلك مبعد منكمل الشي اللي فيدي غانرجعلك بيناتنا حساب طوووويل هههههه
خرج وقفل عليها بالساروت ومشا بخطى واثقة وملامح ساخرة لفين كان محبوس عيسى مسكين 
فالوقت الحالي بالضبط فسيارة وليد اللي أوقفها فالفيلا هو وجاد 
وليد(نازل منها ومتوجه عند جاد اللي نزل مسيارته أيضا):- ممكن تفهمني علاش جايين هنا ؟
جاد:- تقدر تسوله بنفسك 
دخل جاد وخلا وليد يتبعه وهو مفاهم تاحاجة ودخلو للقبو ولقاو البوس كالس على واحد الكرسي تما وكيستناهم
البوس:- كنضن باللي عندنا حالة طارئة هناااا وخصنا نتعاملو معاها 
وليد:- جاد شنو واقع هنا ؟
البوس:- أنا خليتو يجيبك لعندي فمتلقيش بحملك عليه وخليني نفسرلك الأمور بطريقتي … فيديريكو 
فيديريكو هز واحد الحجاب وكان موراه عيسى ناعس على كروسته وفحالة متعبة وليد بمجرد مشافه ترعب عليه وبغا يمشي عندو لكن وقفو البوس 
البوس:- خلينا نعقدو اتفاق اللول وموراها تقدر تاخده فين بغيت
وليد(بشراسة):- هادا رجل كبير وماشي حمل هاد المرمدة ع الأقل حتارم سنه 
البوس(بسخرية):- هوووهوو شايفك غادي تعلمني درس فالأخلاق شكرا أنا مستغني عنو 
وليد:- السيد عيسى شنو درتولووو وعلاش جبتوه هنا ؟؟
البوس(شاف موراه بسطحية لعيسى اللي رجع فيديريكو غطا جيهته بالحجاب):- ننن نقدر نقولك تجاوز حدوده وبغا يتدخل فالأقدار اللي أنا كنحددها
وليد:- باغيه دبا يرجع لداره 
البوس(شاف فيه مليا):- عارف أنه مهم بالنسبة لحبيبة القلب لكن إيلا حسيت بخطر كيهدد طاقم العمل ديالي لازم نتدخل 
وليد(مخلوع):- شنو درتوله؟
البوس:- متخافش كنت باغي نصفيه لكن قلت منستعجلش بما أن جميلة مدينة ليه بتربيتو لبنتها فخصني ندير شوية بأصلي ونخلي الكارط ديالو تايحين الوقت ودبا راه غير ناعس كيفيق أنا متأكد غادي تحرص يكون على سريره
وليد(امتص غضبه بسيف باش مينفجرش فوجهه):- باغي دبا تفسرلي شنو كتقصد ؟؟
جاد(شاف حالة وليد):- هدااا أوليد تهدن بلاما تخلي أعصابك تفلت منك
وليد(بعد يدين جاد عليه وشاف بعنف فالبوس):- أنا متهدن وكنستنا رد على سؤالي أبوس 
البوس(كلس على الكرسي من تاني):- بركات المدام جميلة والسي جعفر .. عيسى شافها فالتلفزة فالحفل السنوي ديال الشركة وطلب مقابلتها هددها بأنه غايبلغ ناديا حقيقة أنها مها وهادشي فالوقت الراهن مستحيل نقبل بيه مقلت باش الأمور راها تستقر وتهنينا من غلطة ياسر مباغيش نغامر بيها حاليا 
وليد:- كان ممكن تجبره ميخبرهاش لكن ماشي بهاد الطريقة ديال المجرمين 
البوس:- اوووف وليد وليت ممل بزااااف وكأن هادشي غريب عليك ولا الحب دار شغلو؟
وليد:- لوكان أوكلتلي المهمة كنت غادي نقنعه بطريقتي
البوس:- هني راسك عندك كامل الوقت منا لعيد ميلاد ناديا اللي أطون نحسب منا ل شهرين مكاملينش باش تستخدم اساليبك كلها وترجع تستر الموضوع
وليد(شافو غادي ببساطة وموراه فيديريكو):- وعلاش بيك كاع هاد الأكشن كان ممكن نتعاملو وديا
البوس(خارج ضاحك):- هههههه طقس من طقوووس البوس لأنني منقبلش يتلوى ذراعي ولبنت مخصهاش تعرف أنها بنت جميلة مهما كان الثمن يكون ولذلك باغيك تعطيه قرصة ودن باش ميتماداش هاد العجوز معا رب عمل الإثنتين وتفهمه العاقبة ديالهم بجوج إيلا مشا تاحل فمه 
وليد:- وعلاش ..؟ غادي يجي يوم وتعرف 
البوس:- آه غايجي لكن تانقرر أنا ماشي نتجبر عليه
وليد(بتفكير):- ماربما حتى إيلا عرفت غادي تبقى معانا هيا منا لشهور غاتكون مرتي وساعتها معندهاش مهرب 
البوس:- هههه متتفائلش بزاف الدنيا مليئة بالمفاجآت
وليد:- شنو تقصد ؟
البوس(خارج):- نشوفك مبعد 
وليد(شاد يديه على جنابه وشاف فجاد):- هاد الوضع مبقاش يعجب
جاد:- خلينا نرجعو السيد عيسى وموراها نشوفو
وليد:- جهزلي السيارة غادي نتصل بناديا ونجيبه … تيييت تيييت ألو ناديا اممم غير رتاحي لقيت جدك وانا فطريقي للدار عندكم صافي كينجي نشرحلك باي ..تييت تيت (التفت خلفه) هففف عمي عيسى كنضن القدر مصر باش يجمعنااااا 
عيسى بدا يسترجع وعيه وهو معا وليد فالسيارة وشاف فيه باستغراب كيفاش تاوصل عنده 
عيسى(بغرابة):- نتا الطويل قولي فين أنا وشنو درتولي ؟؟
وليد(شاف فيه مالمرآة الأمامية):- أنا أكيد غادي نلقالك شي تفسير للي وقع لكن باغيك متفقدش أعصابك 
بقا كيشوف فيه عيسى بدون مينبس ببنت شفة وكأنه كان مغيب عن العالم ومعارفش شنو بالضبط وقعله لكن وليد قاله حديث مهم خلاه يسكت رغما عنه حتى لو يسمح فحقه جراء ما داره البوس معاه واللي أرعبه على ناديا وهدده بقتلها إيلا تفوه بحرف من اللي باغي يقولوها وهنا التزم الصمت خوفا عليها مسكين ، ووليد طمنه أنها غادي تعرف كلشي فالوقت المناسب ومكان عليه إلا يتيق فيه وخا مكيحملهش … فور ما وصلو طارت عليه ناديا فالزنقة رفقة الجميع كيستفسرو فين كان وهو غير مدهوش كيشوف فيهم وهنا وليد تدخل
وليد:- بشوية على عمي عيسى راه للأسف لقيتو هامل فواحد الجهة كان باغي يجيب أ.. شي 
عيسى(شاف فيه بتردد ونطق موراه):- جرائد بغيت جرائد و لكني ضيعت طريق الرجوع 
وليد(ابتلسملو حداهم):- آه هادا بالضبط اللي وقع 
عيسى:-باغي نرتاح فبيتي ممكن تخليوني شوية 
ابراهيم(كيشوف بتوجس فوليد):- غادي ناخدك لبيتك
ناديا(شافت الكل نسحب ودخلت تاهيا من برا لكن قبل قالت):- جديا كيفاش نتا وياه على وفاق ؟
وليد:- اممم قولي أنني منقذ ديالو 
ناديا(بأحلى ابتسامة برجوع جدها):- امممم عالم الخوارق
وليد(ابتلسملها أيضا):- ربما ههههه 
ناديا(عضت شفتيها ونطقت):- شكرا ليك أوليد اللي رجعتلي جدي 
وليد:- في أي وقت :)

دخلو كاملين طمنو عليه ودخلت عندو ناديا على انفراد ومكانش قادر يشوف فيها ولا يكلمها مبعد الضغط اللي تعرضله لذلك طردها بالفن باش تمشي وتخليه صريع عذابه اللي كياكل فيه يوم بعد يوم ، وطبعا هيا وافقت تنسحب مبعد مطمنت وصدقت أن مغادرته معندهاش تاشي علاقة بشلة الإجرام اللي جيناتهم كيجريو فدمها ورتاحت لذلك سلمت عليه وعنقاتو ونسحبت ودابا هايا معا وليد راجعين أخيرا للفيلا مبعد مخلاو الأمور على مايرام واستقرت الأوضاع ووقفو البحث اللي نوضه ابراهيم فالكوميساريات وكذلك علاء فالمستشفيات وكلشي رتاح بالو مين لقاو عمي عيسى لكن ابراهيم مكانش قادر يصدق هاد الفيلم كلو لذلك تبع الخيط الوحيد اللي كان فيديه وهو عيسى والضغط عليه مجددا لربما زلق بشي كلمة هاكدة ولا هاكدة خصوصا مين حاول معا وليد قبل مياخد ناديا ووصل معاه لطريق مسدود ولنهاية حوار كانت غادي تشعل فتيل خصام بيناتهم لولا تدخل مريم وناديا وطفاو الفتيل .. ابراهيم اتصل بياسر وبلغه بكاع اللي وقع وهاد الأخير كان شام ريحة غريبة أو مكيدة كتدبر وطبعا جعفر عندو الجواب 
ياسر(دخل عليه لبيته على غفلة ولقاه متكي على سريره وشارد التفكير):- فهمنا أنك شفتها اليوم لكن مفهمناش علاش ؟
جعفر:- ياسر الله يخليك متخليني عليك هاد الساعة مقادر على هدرة 
ياسر(ربع يديه وتكا على حافة الباب):- لهاد الدرجة اللقاء مكانش موفق
جعفر(شاف فيه بعمق وعرف مغاديش يتهنى منو):- مشينا شفنا عيسى
ياسر(مخلوع تقدم عندو كلس على طرف السرير):- عيسى جد ناديا وعلالالاش ؟
جعفر(تكعد وورك على سريرو يكمي سيجارة):- السيد فاق ضميرو وباغي يقول لناديا الحقيقة 
ياسر(ابتلع ريقه):- أهاه وشنو درتو معاه ؟
جعفر:- وصلنا معاه لاتفاق منا لعيد ميلاد ناديا 
ياسر(شرد بابتسامة):- وهو وافق ؟؟
جعفر:- مبعد إلحاح ملح طبعا وافق
ياسر:- وجميلة شنو قالت ؟
جعفر(تأثر):- موجوعة وخايفة من البوس
ياسر:-ومواااال هادا ماشي وقته ناديا أكيد إيلا عرفت غادي تنكسر 
جعفر(لمح الحزن فوجهه):- زيد عليها مشكلتلكم أكيد غادي تموووت ماشي تنكسر 
ياسر(وقف نافض يديه):- تتتت مزية قنعتو عيسى مينطقش ومنا لتما نلقاو حل 
جعفر:- وشا درت معا الأخت زكية ؟؟
ياسر(بارتباك):- مشفتهاش من لبارح 
جعفر:- ياحليلك تا إيلا نتاحرت منجيبو خبر ونتبلاو بيها 
ياسر:- غي بقى بلاصتك راني نسمعها تبكي يعني عاد حية 
جعفر(مصدوم فيه):- منقدلكش أنا بعدا صافي تعرف خرج عليا باغي نرتاح ومبعد نفوت نشوفها غي نتا ديرهم قد راسك وانا نسيمة الحر نفكهوملك 
ياسر(ضحك وهو خارج):- نشوفك 
خرج ياسر وبغا يفوت عندها لبيتها لكن تردد وبقا واقف شوية فالكولوار حتى طرق الباب طرقة خفيفة مسمعش جواب وزاد فحالو باش ينزل تاسمع صوت المفتاح كيدور وولا خطوة ، نزل راسو الأرض ورجع فتح الباب ودخل لقاها مغطية راسها ففراشها ومكايبانش كاع وجهها 
ياسر(تقدم لمجيهتها فالسرير وكلس على الكرسي اللي أونفاص ليها):- زكية 
زكية:- ….. لارد
ياسر(شافها تهزز بالبكا وشفاتو):- زكية نوضي باغي نهدر معاك
زكية(بصوت حزين):- شنو باغي تقول ؟
ياسر(مد يدو يحيد عليها الفراش وبان وجهها المتورم والمحمر بالبكا):- شوفي فيا مين نكلمك
زكية(مسحت دمعها وهيا باقية على وضعها تشوف فيه):- باغيني نجمع حوايجي ياك ؟
ياسر(ابتلع ريقه):- زكية ماللول كان باين مصيرنا بجوج 
زكية(نفضت الغطا وكلست):- ولكن أنا قتلك قابلة نعيش معاك وخا غير نطيبلك وصافي إنما مترجعنيش لعندهم عفاك أياسر عفاك أنا أنا منقدرش نبعد عليك روحي كتمشي مني إيلا غي مرجعتش للدار بكري كنبقا نستناك بلهفة وغي نشوفك خاطري يرتاح وانا نرتاح عارفة باللي مباغيش تسمع مني هاد الكلام بصح إيلا كان وصلك شوية من إحساسي باغياك تخليني معاك وبجنبك ومعمرني نطالب بتاحاجة إيلا .. إيلا مجاتش منك نتا 
ياسر(مسح على وجهه وهو كيسمعلها ومقدرش يتحمل ووقف):-زكية الوضع صعيب 
زكية(ناضت وقفت موراه وهو كيشوف من النافذة ماسحة دموعها):- وانا مغاديش نزعجك كتر 
ياسر(شاف فيها بحرقة وابتلع ريقه):- زكية معايا مغاديش تاخدي حقك اللي تستاهليه منقدرش منقدرش 
زكية(قربت بجرأة وشدتلو يدو وبتسمت):- وانا مطلبت والو وجودي معاك يكفيني 
ياسر(عقد حواجبه كيشوف فيها بتساؤل):- علاش شنو اللي يجبرك على عيشة بحال هادي كلها عذاب ووجع ؟
زكية(تنهدت بعمق):- كاين شي حوايج فالقلب منقدروش نتحكمو بيهم 
ياسر(تنهد تاهوا وابتسم):- تعرفي شنو نساي الموضوع كاع وخلينا نخرجو شنو بانلك ؟
زكية(ممصدقاش نفسها وبقات تشوف فيه بعدم تصديق):- واش بصح نقدرو نمشيو لشي بلاصة ؟
ياسر(مسحلها دمعة من عينيها):- إيلا بغيتي ؟
زكية(هززتلو راسها موافقة بحماس):- أكيييييد
ياسر(دار يدو فجيبو وبعد منها خارج مالبيت):- متعطليش غادي نستناك و بلاما تديري الحس غادي نهربو ساعتين ونرجعوو وخاا ؟؟
زكية(بأجمل ضحكة ليها):- مغاديش نتعطل 
ياسر(هزز راسو وخرج):- طيب 
قدر يصالحها ويراضيها وملقا ميدير فهاد الموقف إيلا ردها لدارهم غاد يظلمها أكثر ، لقا راسو مضطر باش يبقيها معاه لحين غير معروف ، هربو من الدار فعلا بطريقة مضحكة وبا جعفر ناعس فدار غفلون مجايب للدنيا خبار تاسمع صوت محرك السيارة وعقد حواجبه متسائل وناض شاف مالنافذة ولقاهم ماشيين طار هز تليفونه وجاوبه ياسر أنهم غايضربو دورة ويرجعو وطبعا بدا موشح التحذيرات و الذي منو وهنا ياسر أنهى الحديث بقطع المكالمة وريح راسو .. كانت فرحانة بزاااف وهيا بجنبه كتبتسم بحب وعشق وسعادة كانت لابسة فستان أرجواني فيه كارويات كوحل واصل للأسفل وفوق منو جاكيطا دجين وشعرها الأسود شداتو بمقبض خلف راسها وخلات قصتها جنب على راحتها ودارت مايكاب خفيف ، شاف فيها بابتسامة وحس أنه كيدير شي حاجة زوينة تريحها وتعوضها على اللي كتعيشو معاه وخا مابين أفكارو ومابين ابتساماتو وتنهيداتو مكاين غير إسم واحد كيتردد وهو نادياااا ولا أحد غيرها .. وهادي اللي دخلت يالاه ترتاح شوية فبيتها ولكن شكون يخليك دخل وليد موراها مسرع وفيده التليفون 
ناديا(شهقت وشافت فيه):- شنو تاني ؟؟؟
وليد(عقد حواجبه متعجب):- سارة تخاصمت فالمدرسة
ناديا(حلت فمها):- كيفاش ناري عاد اليوم أول يوم ليها تما اوووه
وليد:- بغيتك تجي معايا هيلين مكايناش 
ناديا(تلعثمت):- أوك 5 دقايق تلقاني عندك
وليد(بامتنان):- أنستناك 
ناضت لبست حوايجها من جديد ونفضت شعرها بعشوائية ونزلت عندو مبعد مهزت حقيبتها ونطالقو فطريقهم للمدرسة
ناديا:- مشرحتلك والو المديرة ؟
وليد(كيصوك بسرعة):- مقالتلي والو طلبت حضورنا فورا وقالت سارة تخاصمت معا التلاميذ 
ناديا:- زعما شنو يكون وقع خلاها تخرج على صبرها كاع هاكدة اففف ع الله متكونش آذات شي حد 
وليد:- معرفت لكن هادا تصرف أول مرة يوقع معاها 
ناديا(بقلق):- خلينا نوصلو ونشوفو شنو كاين 
وصلو مبعد مدة لديك المدرسة وتاجهو مباشرة لمكتب المديرة اللي كانت مكلسة سارة و عدة بنات معاها وعائلاتهم اللي جاو ، دخل وليد وناديا وطلبت منهم المديرة باش يكلسو 
وليد(كيشوف فسارة اللي عينيها كانو حومر بالدموع وكانت حزينة):- خير شنو وقع هنا ؟
أم ياسمين:- سول بنتك اللي نزلت شتم وضرب فبنتي ياسمين 
وليد(عقد حواجبه ممصدقش وشاف بتساؤل فسارة اللي نزلت راسها أرضا):- هادشي بصح أسارة ؟؟
المديرة(شافتها منطقتش):- سيد وليد بنتك فالفسحة تخاصمت معا رفيقات قسمها بشكل عنيف وهادشي منسمحش بيه فمدرستي نهائيا
وليد(بسخرية ضحك):- أكيد لوكان مجبروهاش على هاد التصرف مكانتش غادي تخرج عن طوعها
المديرة:- سيد وليد كنضن بكلامك هادا كتشجعها على العنف
وليد:- لا مكانجعهاش ولكن أنا عارف بنتي مستحيل تكون بهاد الشكل إيلا مكانش سبب مقنع 
أم ياسمين:- أشمن سبب مقنع مامقنع بنتك تهجمت على بنتي وانا غادي نطالب بحقوقها وأبسطهم تعتاذر من بنتي أمام زملائها اللي حشمتها حداهم
ناديا(شافت سارة زايدة وكتغمض عينيها بعمق):- لو سمحتم ممكن نتكلم معا سارة على انفراد 
 المديرة(بعد صمت):- تفضلي فالرواق 
وليد:- نجي معاكم 
ناديا(بابتسامة مصطنعة):- خليك هنا شوية ونرجعو
خرجو للرواق وكلست على الكرسي وجبدت يدين سارة لعندها اللي نسابو دمعتين من عيونها
ناديا:- حبيبتي أنا معاك قوليلي شنو وقع تاتصرفتي بهاد الشكل ؟
سارة(شهقت وشافت فيها):- أنا مبغيتش نآذيها لكنها ستافزتني و ضحكت عليا تلاميذ القسم قالت أنا دخيلة ومخصنيش نكون معاهم وبعدت عليها متجاهلة لكنها تمادات بزااااف 
ناديا(ضحكت فخاطرها لكن ثبتت):- حتى لو أسارة مكانش خصك توصلي معاها لهاد النقطة هادي شوفي دبا الحق عندمن ولا عندها مع أنك نتي المظلومة لذلك كان عليك تشتكي عليها للمديرة وهيا تتصرف
سارة(بمرارة):- أنا ماشي جبانة وتصرفت 
ناديا(بخفوت):- ساريتا ضروري متسمعي الكلمة إيلا بغيتي تكوني مرتاحة فمدرستك ماشي من أول يوم مشكل 
سامر(تلميذ معا سارة كان واقف بعيد فالممر وكيستنا لكن كيشافهم خرجو تقدم بتردد كيحك فراسه):- عفوا سيدتي لكن سارة مضلمتش ياسمين هيا اللي أجبرتها تتصرف معاها بعنف
سارة(دورت وجهها تشوف فناديا ونطقت):- سامر مطلبتش منك تدخل تقدر تكمل ضحكك معاهم 
سامر(شاف فسارة ودار يدو فجيوبو بعفوية نافض شعرو المنساب على عينيه):- لعلمك أنا مضحكتش معاهم ومستحيل نكون سطحي باش نشاركهم فمهزلة ختارعتها ياسمين لأنها ..
سارة(التفتت شافت فيه):- لأنها شنو ؟؟
سامر(بغرور):- كتغير من أي وحدة تكلس حدايا 
ناديا(شهقت وحلت عينيها فيهم وكأنهم نساو وجودها كاع):- هئئئ
سارة(شافت فيه مطولا وسكتت):- ناديا خلينا نرجعو لداخل 
سامر(ضرب برجله فالخوا بعنفوان):- نصيحة تجاهليها وانا نقدر ندخل عند المديرة ونقولها اللي صرا 
سارة(بغضب كتنفثو من نيفها):- لا داعي
ناديا(شادة ضحكتها بسيف كحت وتدخلت):- مدام السيد سامر باغي يشهد معاك 
سارة(تنفست بصعوبة ونزلت راسها ورجعت شافت فيه وهو ماشي وشافت فناديا):- اممممم
ناديا:- سامر احم تفضل معانا لداخل وطبعا إيلا مكانش هادشي غايسببلك مشكل
سامر(رافع راسو بجدية):- نننن على الرحب والسعة وسارة متستحقش 
سارة(شافت فيه وتقدمت للمكتب):- هفففف
ناديا(بسيف باش تمالكت نفسها من الضحك على داك المنظر):- عفوا سيادة المديرة معانا تلميذ شاف شنو وقع مالبداية 
ياسمين(بعينين نارية شافت فيه وفسارة بغات تقتلهم):- طبعا غادي يكدب
وليد(شاف فديك ياسمين وجناته):- خلينا نسمعو شنو يقول
المديرة:- سامر عز الدين تافهادي غادي تدخل يا الله ؟؟
سامر(بحال كونان هههه):- أكيد خصني نشهد بالحق والتلميذة الجديدة ما أذنبت فحق تاشي حد لو ما استفزتهاش ياسمين كانت فحالها 
وليد(عقد حواجبه كيشوف فيه وهو نازل دفاع على بنتو وكيشوف فيها):- ذكرني شكون تكون ؟؟؟
سامر(شاف فوليد وباحترام):- سامر عز الدين زميل سارة فالقسم وفالمقعد أيضا 
وليد(هز شنافة مستغرب وممرتاحش):- آه زميل امممم
المديرة:- ياسمين الكلام اللي كيقوله سامر حقيقي ؟؟
ياسمين(بدموع حقد):- طبعا لاء هيا اللي تهجمت عليا وسولي فاتن و آية يقولولك
فاتن(هززت راسها مدافعة على صاحبتها):- آه آه سارة هيا اللي تعدات 
آية:- صحيح داكشي 
المديرة:- سكوووت سارة عتادري من ياسمين على اللي درتيه ونفضيو المشكل
سامر (بعدم تصديق مباغيش عليها):- لكن أنا قتلك اللي وقع 
المديرة:- سامر متدخلش سارة ضربت ياسمين وخصها تعتذر
وليد(مبغاش على بنتو):- مشايفاش فالموضوع تظلم لبنتي سارة ؟؟
أم ياسمين:- وضربها لبنتي شنو تسميه 
وليد(غمض عينيه بغا ينوض يقجها"):- الصبر يارب
ناديا(نزلت لعند سارة وهمستلها):- حبيبتي أنهي المشكل حالا
سارة(شافت فناديا وفسامر اللي كان متعجب وشافت فياسمين وصحاباتها اللي كانو مشرارين ونزلت راسها الأرض):- أنا آسفة اللي ضربتك 
المديرة:- أم ياسمين كنضن حقك وصلك دبا تقدري تتفضلي ونتوما البنات رجعو لقسمكم حالا ..
خرجو وهوما كيتهامسو ويضحكو على سارة اللي حست بالمرارة والغضب 
المديرة(شافت فسامر اللي كان جامع قبضة يديه وباقي فمحله كيشوف فسارة):- سامر سمعتني ؟؟
سامر(شاف فسارة وانسحب):- عن إذنكم
وليد(متبع حركات هاد الولد اللي منزلوش مالخاطر):- نقدرو نمشيو ونديو معانا سارة ؟
المديرة:- تانا كنت غادي نطلب منكم تديوها ترتاح ورجاءا الشي اللي وقع ميتكررش مرة تانية 
ناديا:- نتمنى التنبيه يوصل تالبنات اللي كانو هنا لأن سارة مكاتتعداش على شي حد مآذاهاش 
المديرة:- اعتني ببنتك وانا بطريقتي غادي ننبههم فرصة سعيدة نشوفكم على خير
وليد(شد يد سارة وانسحب بيها للخارج وموراهم ناديا):- بيبي متزعفيش بحال هاد المشاكل كيوقعو 
سارة(بحزن):- بابا مباغياش نرجع لهاد المدرسة 
ناديا(شافت فوليد بألم عليها):- خلينا نمشيو نرتاحو احبيبتي ومبعد نتكلمو فالموضوع 
وليد ربتلها على يدها ومشاو للفيلا لقاو هيلين عاد جات من شي حاجة خاصة بالحفلة وغي شافتهم استغربت
هيلين:- موعد دوام سارة الدراسي مزال عليه باش تخرج شنو كاين ؟؟
سارة(انسحبت طالعة لبيتها):- … لارد
ناديا(حطت حقيبتها وكلست على الكنبة):- كنا فمدرسة سارة 
هيلين(بحنق):- سولت وليد
وليد(كيحيد جاكيط كوستيمه):- متبديش لأن سلوكك هادا هوا اللي مأثر على البنت تاخلاها تضرب زميلتها فالقسم
هيلين(مخلوعة):- شنووو سارة ضربت بنت ميمكنش عمرها مكانت عنيفة بهاد الشكل ودايما كتسيطر على أعصابها
وليد(كيكب فكاسه باش يشرب):- سولي راسك هاد السؤال
هيلين(شافت فناديا بشر):- ونتي علاش تمشي لمدرسة بنتي ؟
وليد(ضحك بسخرية وفيده الكاس):- مخلية مشكلة بنتك وكتسولي علاش مشات معانا ناديا لأنه لوكان كانت أمها مساليالنا كانت غادي ترافقها فأول يوم دراسي ليها 
ناديا(هزت حقيبتها منسحبة منهاد الحوار المربك):- أنا فبيتي 
هيلين(ناضت كيشافتها طلعت وتاجهت عند وليد فالمشرب):- علاش ديما كتحشمني حداها 
وليد(شاف فيها بسطحية):- عندك الزهر زفافك مبعد يومين لكنت تصرفت معاك بشكل آخر وسعيد لأنك غاتسافري معا جاد أقلو نعرف نربي بنتي كما يجب 
هيلين(مخلوعة فيه):- يعني أنا مربيتهاش مليح أوليد ؟؟
وليد(بعدم تصديق ساخر):- ومصدووومة امممم لوكان منعرفكش نقول فعلا بقا فيك الحال 
هيلين(هزت يديها وشافت فتليفونها اللي كيصوني ومشات مبعدة باش تجاوب):- أنا مغاديش نعصب راسي وكنشوف حليت المشكل إذا هنيئا لك … ألووو وي مدام إيناس أهلا بيك و …
وليد شاف فيها ببغض وشرب ديك الجغمة اللي فكاسه وطلع متجه نحو بيت سارة اللي كانت دافنة راسها بين وسايدها وكتبكي مبغاش يضغط عليها إنما خلاها على راحتها .. كيخرج لقا ناديا جاية بدورها تطمن عليها وتلاقاو فالكولوار 
ناديا:- كيداير الوضع ؟
وليد:- كتبكي
ناديا(بحزن عليها):- واش ندخل عندها ؟
وليد:- خليها شوية بوحدها لربما ارتاحت 
ناديا:- أوك 
وليد:- لكن متفهمتليش حاجة داك المسنطح سامر علاش تدخل فالأمر ؟؟
ناديا(غي تفكراتو ضحكت وتمشات بعيد عليه):- ههههه عادي
وليد(تبعها باستفسار):- كيفاش عادي ؟؟
ناديا(وقفت عند باب بيتها):- زميلها ومابغاهاش تنظلم داكشي اللي كاين 
وليد(كمش عينيه):- اممم زعما مكاين والو فالموضوع ؟
ناديا:- شنو غايكون يعني هههه
وليد(حط يدو على جنبو):- معرفت علاش راني نسولك 
ناديا(فتحت باب بيتها تدخلها):- متشغلش بالك الأمر بسيط جدا 
وليد(دفع الباب ودخل موراها):- تشغلنا بزاف وموصلنيش تاشكر بسيط على اللي درته 
ناديا(مستغربة رجعت لعندو لفين كان واقف):- شكر … وعلامن ؟؟
وليد:- مثلا رجعنا عيسى
ناديا:- آآآآه جدي ولكني شكرتك أوليد وتما عاد 
وليد(بخبث):- آه شكرتي وليد وتما عاد بصح أنا باغي شكر مختلف
ناديا(اختفت بتسامتها وبشراسة مضحكة شافت فيه):- شكر مختلف كيفاش زعما ؟؟
وليد(حط يدو على خدو):- مثال بسيط لخد يتيم 
ناديا(ضحكت بسيف عليها):- نتا مجنون 
وليد(كلس على الكنبة ودار رجل على رجل):- وعندي اليوم بطوووولو 
ناديا(حطت يدها على جنبها كتشوف فيه بعصبية مطلقة):- كنتوهم مين نقول أنك عقاليت لأنك بمجرد متلقا الفرصة تنحرف من جديد 
وليد(ضحك بخفوت):- ههههههه 
ناديا(انتابهت لضحكته الرقيقة وجاتهاا زوينة بزاف ونزلت راسها):- همممم
وليد(شاف فيها مليا وناض بقفزة وقف أونفاص ليها):- نشوفك على العشا 
ناديا(شافتو خارج بدون شيء وبعيون تائهة جاوباتو):- طيب
مشا وليد لبيته و جاه اتصال معند جاد اللي كان كيطلب اللطيف وقالو رحمني وعاوني شوية راه هيلين غادي تهبله قبل ميتزوج بيها وطبعا وليد مات عليه بالضحك 
وليد:- هههههههه وشرب مالبحر أوليدي صحابلك الزواج ساهل
جاد(هاز عدة شكاير من التسوق):- وراه هلكتني بغيت غير نحط راسي على الوسادة وننعس مرحمتنيش 
وليد:- معليش دبا مبعد العرس ترتاح وتتبرع كاع 
جاد:- اممممم نحن السابقون وأنتم اللاحقون 
وليد(تشوكا من جملته لكنو ابتسم):- متخممش تابعك تابعك 
جاد:- ويالاه سير تلاح خليني نرجع لجحيمي… 
قطع ورجع لدوامة التسوق اللي هلكاتو بيها هيلين اللي تلاقاتو فالسوق ومخلاتش محل مدخلتلهش مسكين جاد صحابلك الحب ساهل وهاااه جرب .. مبعد مدة مقدرتش ناديا تبقى أكثر فغرفتها بدون متطمن على سارة قلبها كلاها عليها وبغات تدعمها وتحسسها بالإطمئنان وأنها معاها ، خرجت من بيتها وطرقت باب بيت سارة اللي جاوبتها مبعد صمت 
ناديا(دخلت وكلست حداها على السرير):- ساريتا حبيبتي باقية زعفانة من اللي وقع ؟
سارة(كانت حاطة راسها بين رجليها اللي موقفتهم كي المثلث):- لاء
ناديا(قربت منها):- طيب شنو زاعجك لهاد الدرجة؟
سارة(شافت فيها بحزن وأسى):- أول يوم مدرسي ليا وشوفي باش بديته
ناديا:- هاد المشاكل كيوقعو أحبيبتي وطبيعي جدا تتعرضلي لهاد المواقف
سارة(بتساؤل):- امممم فعلا أول يوم كيبشر بسنة دراسية مشرفة
ناديا(شدتلها يدها):- نتي أهم حاجة خصك تديريها وهيا أنك تتجاهلي اللي وقع وبالخصوص داك الثلاثي المقيت ياسمين وفاتن وآية ومخصكش تكوني ضعيفة باش ميطلعوش عليك وفنفس الوقت متكونيش عنيفة باش ميوقعش بحال اليوم
سارة(باستغراب):- وشنو ندير ؟
ناديا:- تصرفي عادي خليها تهدر وتقول اللي عجبها غاتلقا أن كلامها كيصب فنهر لا قرار له بمعنى نتي مداياهاش كاع لكن إيلا شافتك كتحماري وتخضاري ومعاجبكش الحال غادي تتمادى وتاخدها تسلية ليها 
سارة:- طبعا منسمحلهاش تتعدى حدودها معايا أنا قادرة ندافع على راسي
ناديا:- هادشي مافيهش شك لكن الذكي ماشي اللي يتصرف بشجاعة وانفعال الذكي هو اللي يتصرف بحكمة 
سارة:- اوووووف رأسي غادي ينفاجر 
ناديا(بمكر دعابي):- امممم مع أنني مزال مقتنعتش أن المشكلة ناضت مين كلستي حدا سامر 
سارة(شافت فيها وتفكرت):- الأستاذ هو السبب ماشي أنا 
ناديا:- ايوااا ؟؟
سارة:- هيا صيفطتلي ورقة فاللول وقاتلي نوضي من ديك البلاصة وسيري لمقعد تاني طبعا أنا استغربت وكمشت الورقة ورميتها قدامي وهيا كتشوف وغير جات الفسحة بدات المشكل مع أن سامر قالي منديهاش فيها لكن مقدرتش 
ناديا:- أهاه فهمتك دبا لكن باينة فسامر ولد جيد علاش جا واجههم فالإدارة ياكي ؟
سارة(تفكرت شكله):- مستفز وكاب على راسو قرعة ريحة خنقتني طول مانا كالسة معاه ونيفي يحكني أما شعرو مسبسب ورطب بشكل اممممم معرفتش نمثلهلك 
ناديا(حلت فيها عينيها وهيا منفعلة ومقدرتش تسكت ضحكتها):- شعره كحل وزوين وملامحه باين فيهم الذكاء
سارة:- ناديا من دقيقة شفتيه درتيلو تحليل فيزيولوجي قتلك كائن مستفززززززز وانا مغاديش نرجع لديك المدرسة  
ناديا:- خلي تفوت حفلة ماماك وأونكل جاد وموراها يحن الله أوكي رتاحي دبا ونشوفك على العشا 
سارة:- معنديش الخاطر لأي شيء
ناديا(وقفت وشافت فيها):- وقيلة ريحة سامر تبعاتك تالهنا ؟؟
سارة(شهقت بخجل وغضب وحمار وجهها):- نادياااااا خليني 
ناديا خرجت كتضحك على هاد المجنونة الصغيرة ومستغربة من هاد الجيل كلووو ومن تفكيره السابق لأوانه طبعا .. بقية داك اليوم فات عادي ومافيهش شي أحداث خارقة كيما فات فصباحو واليوم التالي نفس الشي لا جديد يذكر من غير الترتيبات للحفلة المنتظرة واللي كانو محركين الدنيا فالفيلا وكيوجدولها توجااااد وكان داك اليوم كذلك مهم عند علاء اللي مشا يستقبل عائلته الصغيرة اللي توحشهم بزااااف وفاتت مدة متلقاوش .. استقبلهم فالمطار وداهم لداره ديريكت باش يستقرو وبدات المشاحنات بين أمنية ونوفل وعلاء
علاء:- امممم شايفك سمانيتي ديري الريجيم شوية راه غاتخلعينا الشبان هاكدة
أمنية(كالسة على كتف الكنبة ديالو):- امممم دعابة مستفزة لأختك الوحيدة 
نوفل:- هههه أكولة هانم على طول شادة سندويش فيديها يعني مصدفليش شي يوم شفت يديها خاويين 
أمنية:- متزيدش فيه ماما قولي شي حاجة دافعي على بنتك ؟؟
خديجة(مبتسمة):- الولاد واش معييتوش من السفر سيرو رتاحو شوية خليونا معا خوكم 
أمنية:- وهاحنا بدينا العنصرية 
نوفل(واقف كيضحك):- نيالك ياخويا الكبير من دابا مكان غير نتا مومو العين
أنور(حط جريدته):- كون تحشم وسيرو رتاحو فبيوتكم  
أمنية(دارتلو إشارة الضباط):- حاضر سيادة الدكتور 
خديجة(شافتهم مشاو وبحماس ناضت كلست حدا علاء):- هممم حكيلي أولدي 
أنور:- رتاحي بعدا والهدرة مبعد
خديجة:- أنور خليني نهدر معا الولد مقادراش نصبر باش نعرف كلشي على العروسة اللي ختارها مبعد سنين الرفض
علاء(ابتلع ريقه وشاف فباه اللي ملقالو جهد):- سميتها ليلى 
خديجة(مبتسمة):- اممم واش خدامة معاكم فالمشفى ؟
علاء(بتردد كيجاوب):- لا 
خديجة(بحماس):- إذن تكون مدرسة ولا خدامة فشي إطار تاني ؟؟
علاء:- لا مخداماش كاع 
خديجة(باستغراب وتفاجئ متذمرة):- كالسة فالداااار ؟؟
أنور(شاف علاء اللي نزل راسه بتعب):- ومالهم اللي كالسين فالدار ماشي نسا ياريتك تولي بحالهم شي يوم وتهتمي بعائلتك كيما اللازم ماشي نقضيوها ديليفيري طول حياتنا
خديجة(كمشت عينيها وشافت فيه):- هادا اللي باغيه نتا نضيع كرير وتعب سنوات باش نكلسلك فالدار نطيبلك ونوجدلك متاكل ونصبنلك ونهتم بيك ونتا داخل خارج تفرس فياااا مستحيل متحلمش نسمح فحقي البشري
أنور:- خلينا فموضوع الولد وبلاما ندخلو لدوامتنا اللي مكاتكملش 
خديجة(هزت نيفها للسما ورجعت دارت عند علاء):- كمل أولدي شحال فعمرها 
  علاء:- أ .. قولي27 عام تقريبا
خديجة(دارت نظرة اللاتصديق):- ماشي كبيرة ؟؟
علاء:- ماما الله يهديك راه بيني وبينها عامين تقريبا 
خديجة:- آه بما يعني أنها كبيرة 
علاء:- كاين شي سؤال آخر ؟
خديجة:- باها ومها فاش خدامين ؟؟
علاء:- متوفيين 
خديجة(مخلوعة):- هئئئ ومعامن عايشة ؟؟
علاء:- عندها خوها بوليسي ويالاه كيتزوج تاهوا 
خديجة(معجبتهاش ودارت شوفة الرفض فأنور اللي حل عينيه مصعوق):- اممم مزيان وشنو آخر ؟
علاء:- سولي نجاوبك
خديجة:- فين تعرفت عليها ؟
علاء:- تقدري تقولي معرفة قديمة بزاف كاع مين كنت نقرا هنا 
خديجة:- اهاااه شوف أولدي نجيك صراحة أنا هاد البنت مريحتنيش وانا مربيتكش وسهرت عليك وعاونتك باش وقفت على رجليك باش فالتالي تتزوج زواج بحال هاكدة أنا مقيدالك بنت صاحبتي غزلان وهاد العام تتخرج من كلية طب الأسنان وعلاش لا متكونش من نصيبك بعدا هادو عائلة وباها عضو فالبرلمان 
علاء(شاف فباه باش يتدخل):- أنا من غير ليلى منتزوجش غير هني راسك وباش نكملك الموضوع كلو ليلى كانت مزوجة وتطلقت مؤخرا وعندها 3 ديال الوليدات وهيا اللي باغي نكمل معاها حياتي 
خديجة(غوتت بعنف ووقفلته):- أشنووووووو واش حمااااااااااقيت ولا ضاربك الضووو باغي تزوج بمطلقة ومعاها 3 ولاد واش هبلت فينووو عقلك فين تربيتي ليك وتعليييييمك هادي آخررررررتها ؟؟
علاء(وقف تاهوا):- ومالها المطلقة ماشي امرأة كيف النسا كاملين ولا هادي نوع آخر جاي مالفضاء
خديجة(بغات ترده لعقله):- علالالالالالاء ولدي ولي لعقلك هاد المرا متليقلكش باينة هادشي ضربة سحوور
علاء:- اففففف شنو هاد العقلية الدونية يا ماما واش دكتورة مهمة فالمجتمع وكتآمني بهاد التخربيق ونهنيك أنا كنبغيها من هادي شحال والأقدار جمعتنا ببعضياتنا ولا يمكن نتخلى عليها
خديجة(شافت فأنور):- نتا نووووض شوف هبال ولدك ولا عاجبك الحال 
أنور(وقف عندهم):- ولدك كبير وراه يعرف صلاحه باركة متدخليلهم فالشاذة والفاذة إيلا مبغيتيش تخسريهم 
خديجة:- نتا كنت عارف بهادشي ماللول ياك ومقتليش ؟
أنور:- آه كنت عارف وموافق ولدي على كاع اللي باغي يديرها وداعمه ومبغيتش نقولك باش مترفضيش تجي لهنا 
خديجة(ممصدقاش وحاطة يدها على فمها):- سمعني نقولك هاد الموضوع نساه أنا مستحيل نزوج ولدي الدكتوور اللي كاع الناس تهدر بيه وتتشرف بنسبه لوحدة معارفة اصلها مفصلها ومطلقة عاد مالفوق شابع فيها راجلها وعالم الله معامن تكون خرجت من موررررررراه وب 3 ديال الولاد مستحيييييييييييييييييييييييييييل نقبل مستحيييييييل
أنور(غوت عليها):- خديجة شوفي شنو راكي تقولي
علاء(بألم):- علاش هاكدة دايرين علالالاش واش اللي تطلقت توصموها بقلة الشرف وانعدام الأخلاق نتي أصلا مسولتينيش تا شنو وقعلها ولا شنو أسباب الطلاق ولا شنو دار راجلها فيها باش تطلقت منو دغيا وصمتيها بالعار وبالسمعة السيئة قبل تا ماتعرفي شكون اللي فيه العيب .. هادي نتي اللي مثقفة وواصل تعليمك لفين كتكلمي بهاد السطحية هادي متوقعتهاش منك بصح اتاضحلي أنني متوهم لأن تفكيركم الجاهل مكيفرق بين مرا قارية أو مقارياش وياريتها كانت رجل وماشي من نفس جنسك كنت نتفهم حقدك عليها لكن نتوما جميع من جنس حواء إيلا كنت كتهاجمو فبعضايتكم هاكدة بسبب وبدون سبب شنو مخليين للعالم الآخر باش يدير . صدمتيني يا أمي والله 
خديجة(تحركو حدقات عينيها لكن متنازلتش):- وفر موشحاتك لحقوق المرأة المطلقة لأن هادشي مغاديش يدخل لعائلتي أنا بنيت هاد الأسرة وشقيت عليها عمري كلو باش نرفع راسي فولادي وفنسبهم ماشي تجي دبا تجيبلي الفضيحة وتدمرلي كياني كلوووو 
علاء(بوجع ومرارة شاف فيها):- باش ترتاحي ليلى أشرف من أي بنت عرفتها فحياتي ولا يمكن نلقا بحالها وغادي نتزوجها سواء برضاك أو من غيرو 
خديجة(شافتو هز جاكيطه خارج):- غادي نشوفو أعلاء 
أنور(شاف فيها بيأس):- عمرك مغادي تفهمي ولادك  
خديجة(شافتو مغادر الصالون):- لوكان متسمملهمش عقلهم ضدي وكان راهم يسمعو كلمتي اووووف وهاداااا صداع تاني جا كب على راسي بصح معليش أنا غادي نتصرف
علاء(كيهدر معا مصطفى فالتلفون وراكب سيارته):- فينك نجي عندك دبا ؟؟
مصطفى:- أنا فالدار رواح حالا 
علاء(بتعب حزين):- أني جاي
نوفل(معا أمنية داير يدو على فكو):- سمعتي شنو وقع برا ؟
أمنية(بعينين مغرغرين على خوها اللي بقا فيها):- آه سمعت شفني علاء ماما مستحيل توافق على هاد الزواج
نوفل(كيفكر مليا):- معرفت وصافي خصنا نهدرو معاه منين يرجع ولا غدا صباح بعيد على ماما ونشوفو كينديرو نقنعوها 
أمنية:- باينة خويا مسكين كيبغي هاد البنت وإلا مكانش وقف فوجه ماما هاكدة 
نوفل(علا حاجب ونزل حاجب):- أهاه الحب علامن طاح
أمنية(كمشت عينيها فيه):-بارد الإحساس سير لبيتك باغية نحفظ متنساش المقرر اللي لحقاتولي ماما تالهنا تقول حرام ناخد عطلة هفففف 
نوفل(فكراته):- امممم علاش تفكريني علاش كنت ناسي 
أمنية(ناضت لبيروها):-ونوض باينة مافيهاش عشا اليوم غي سير شوفلنا مينتكل فديك الثلاجة ديال خوك
نوفل:- غانجيبلك معايا نتي غير نتابهي لدراستك دابا 
أمنية(ابتاسمتلو):- أوك خويا 
مشا نوفل وهي علات عينيها وهزت بورطابلها وطقطقت مساج فالواتساب شوية وجاها رد مكتوب فيه عاوتاني نأجلو الموضوع يا أمنية راحنا فعام دبا وانا صافي مبقيتش قادر نصبر باغيك تلاقيني بخوك علاء فأقرب وقت ، ردت عليه دبا هو عندو مشكل غير نساليوه ووعد نفاتحه فموضوعنا أعثمان ، صيفطلها أيقونة فيها قلوبة وكتب موراها كملي حفاظتك الوردة ديالي كيتسالي نتكلمو شوية ردت عليه بابتسامة و ايقونة فيها توقيت بمعنى بيناتنا موعد وابتسمت وهيا ترجع بورطابلها فجيبها وكملت قرايتها كيف لازم .. 

مصطفى(كيكبلو كاس ما):- كنت متوقع الدكتورة خديجة تتصرف بهاد الشكل هادا
علاء(شد عليه الكاس وهوا مديرونجي):- ماعطاتنيش تافرصة يا صاحبي نعرفها على ليلى دغيا نزلت فيها تهم عاطلة كل هادشي علاش حيت مطلقة وبوليدات بريئين مساكن مزال معارفين والو فهاد الدنيا هادي
مصطفى(كلس أونفاص ليه):- متقهرش روحك إلا ما تقتنع وترجع على هاد الرفض اللي هيا فيه
علاء:- معرفت مندير وبابا واعدني يساندني بمجرد مفتحت الفوهة النارية قرر يتنحى جانبا بيما هدات 
مصطفى:- الدكتور أنور عندو الحق بالسياسة يقدر يجيب موافقتها أما بالصداع مكاين نتيجة 
علاء(شاف فتليفونه):- ليلى كتستنا اتصالي بيها دبا شنو غادي نقولها وبآشمن وجه نكلمها 
مصطفى:- تحججلها بأي حاجة بلاما تخليها تعرف بهاد الشي اللي كيوقع معاكم 
علاء:- دبا نصيفطلها مساج نقولها أنا فالخدمة مبعد نتصل بيك 
مصطفى:- آه هاكدة حسن وشنو نقولك ياصاحبي غير الله يدير تاويل الخير معا الواليدة ديالك ومتزيدش تعقدها أكثر
 علاء:- ع الله أمصطفى مزية جيت عندك فوجت شوية أما كنت مخنوق منقولكش
مصطفى:- دار خوك محلولة وشوف إيلا ستحقيت أي حاجة قولي وانا نتدخل كاع متسولش 
علاء(كمش عينيه فيه):- امممم ومن فوقاش ماشي هادي ليلى نفسها اللي سمعتني عليها ديباجة طويلة عريضة ومنعتني نقرب منهاا ؟؟
مصطفى:- هههه وقلت منخسرش صاحبي محيت عارفك عنيد واللي فبالك فبالك وبانلي ناخدها مالتالي ونجي معاك فالصف يكفيك محاربة جبهة وحدة لاش نزيد تانا همي ههههه
علاء:- عهههه ولايني خطير يالاه أنوض دبا ندي دوك الجوج صعاليك يتعشاو مكان علاش يضيعيو الويكند ديالهم فمشاكلي 
مصطفى:- سلملي عليهم مبعد ونشوفهم 
علاء(خارج):- يوصل أوكي بيناتنا تليفون باي … (خرج واتصل) واشا البوكوص ديال خوك نعستو هههه وغير حط من يدك داك التخربيق و سير عند ديك العصفورة وقولها توجد راسها كينصونيلكم تنزلو عندي غاناخدكم تعشاو فبلاصة تحفة … آه آه محيحة يالمسخوط غير سربيوني وكان ... صافي قلها غير لبابا أوك أنا جاي ..
وصل عندهم ولقاهم متشاحنين عند الباب كيعادتهم وغي شافوه عتادلو وضحكو زمرلهم وطلعو معاه فحالة متعة بلم شملهم من جديد وخداهم لمطعم زوين مطل على البحر وطلبو عشائهم وبقاو مستمتعين بأحاديث مختلفة عن مغامرات كل واحد فيهم ومشاحناتهم للي مكتكملش ..
علاء:- فعلا السكايب وداك التخربيق التيكلونوجي مكايجيش كيما الواحد يتلاقا فالواقع والله
أمنية:- بصح أخويا والله مكنشبعش من شوفتك دوماج جينا بعاد على بعضياتنا 
علاء(تأثر بختو):- لكن قلوبنا قراب متنسايش 
نوفل(كيشرب عصيره):- امم امم البعيد عن العين بعيد عن القلب
علاء(كمش فيه عينيه):- ولايني شرير معا راسك كتخرب اللحظة الأخوية بلعاني
نوفل:- ههههههه لاحقاش نسيتوني
أمنية:- شكون يقدر ينساك ونتا حاشر نيفك مابين المصارن 
نوفل:- آه آه قولي اللي عجبك دبا مين شايفة الدفاع المدني معاك خدي راحتك بصح لينا حساب كينرجعو لهيه
علاء(شاف تليفونه كيصوني وقلبه انتفض):- غاناخذ هاد الاتصال ونرجع بقاو عاقلين
نوفل:- أيوة يا عم ههه
أمنية(ضرباتو فيده):- شتتتت حشم شوية 
نوفل(هززلها يده ضاحك):- مالكي ههههه 
أمنية:- تتت أستغفر الله همممم
علاء(بصوت خافت وقلب ممزق):- روح علاء كيفك اليوم وكيف الولاد ؟
ليلى(كتخطط فواحد الورقة مرتبكة وخايفة):- أنا لاباس سمحلي صونيت وخا قتلي أنك خدام دبا لكن كنت متوترة ومقدرتش منعيطلكش 
علاء:- أ .. أنا بخير 
ليلى(هاربة من السؤال لكن إجباري تسول):- جاو داركم ؟؟
علاء(ابتلع ريقه):- أهاه جاو هاد العشية 
ليلى:- علا سلامتهم
علاء:- الله يسلمك أليلى 
ليلى(عضت شفتيها):- أكيد عتارضو من حالتك دبا وصوتك المنكسر فهمت الموضوع 
علاء(غمض عينيه بحرقة):- هادي غير أول جولة يا ليلاي ونتي غادي تكوني ليا مهما كان
ليلى(طلقت دمعها المكبوت):- لكن أنا منقدرش نوقف معاك ضد عائلتك منقدرش
علاء(بطمأنينة):- ليلى ليلى سمعيني أنا جامي نتخلى عليك مهما يكن لذلك سواء برضاهم أو لاء نتي غادي تكوني مراتي ليلى(بتمني وحلم):- ربي يدير اللي فيها الخير نخليك دبا وخا
علاء:-غدا نعيطلك أحبيبتي ونعسي مزيان ومتفكريش نتي لعلاء وعلاء ليك 
ليلى(مسحت دمعتها مبتسمة):- إن شاء الله
علاْء:- وهاكدة نبغيك مبتسمالي دايمااا 
ليلى:- فين شفتني ابتاسمت هههه
علاء:- حسيت بقلبي
ليلى:- اممم يالاه بون نوي 
علاء:- بون نوي يا أغلى امرأة على قلبي
ليلى عنقت تليفونها وكمشت ديك الورقة وناضت تشوف عيسى شوية اللي مبانش من الصباح 
عزيزة(كانت خارجة مالكوزينة غادية لبيتها تنعس):-نعسو الولاد ؟
ليلى:- آه نعستهم غير دبا شوية جيت نشوف عمي عيسى شوية مالصباح مشفناه 
عزيزة:- دخلت عندو لقيتو ناعس غير خليه راه يكون عيان 
ليلى:- بصح إيوا صافي تالغدا إن شاء الله يالاه أخالتي عزيزة تصبحي على خير
عزيزة:- ونتي من أهلو أبنتي 

طلعت ليلى ودخلت عزيزة لبيتها وهو كان كيمسح دموع عينيه الحارقة على مآل حفيدته مسكينة اللي محال تسامحه على كدوبو عليها وحرقة قلبه كاوياه عليها وخايف لا يتحط فموقف معاها معمرو ضربله حساب ، لذلك باش يرتاح خصو يوصل لياسر باشما كان الثمن لأنه الوحيد اللي غادي يقدر يعاونه فهاد الموضوع نهار يحين الوقت .. تاتهديداتهم ليه مهتمش بيها لأنه مبقا فالعمر قد اللي فات وغادي يستناهم تانهار عيد ميلادها إيلا ماعتارفولهاش هو بنفسه غادي يعتارفلها ويكشف كلشي .. استغرب من وليد اللي بين خوفو عليه واللي مقدرش يستوعب موقفه الطيب معاه مع ذلك مكانش مرتاحله مهما يدير .. بقا هاكدة فكرة تدي وفكرة تجيب . وفمكان آخر كانت محبوسة فبيتها كالسة على الناموسية ديالها وكتبكي علا حياتها اللي دمرت منهار حلت عينيها مفرحت لا ببنتها ولا قدرت تعيش معاها كأي أم طبيعية لا والزينة ولات عايشة فصراع تهديدي في أن ناديا عن قريب غادي تعرف بالحقيقة ووقتها كيغادي دير تتصرف .. بقات صريعة أفكارها المؤلمة تاهيا وفمكان آخر كان تاهوا منزعج من حياتهم اللي لوكان مدخلش فيها البوس كانو غادي كونوو سعداء وربما كانت ناديا بنتهم كاع وعايشين عيشة طبيعية كل ماكايشوفها كيوقعلو هاكدة ويدخل فدوامة عذاب طويلة محسش تا بياسر وزكية نهائي لا واش دارو ولا واش مداروش بقا حبيس غرفته يتحسر على أيامهم اللي ضاعت .. فاليوم التالي اي يوم حفلة زفاف هيلين وجاد كان الجميع كيستعد بطريقته لهاد الحدث اللي حرصت هيلين باش يكون بورفيكت حفلة مدايرهاش الكلام وعرضت عدة أسماء معينة فالبلد ربطت معاهم علاقات مميزة فحفلة الشركة السنوية .. غرفتها كانت كي خلية النحل فيها عدة خادمات كيعاونوها فترتيب حوايجها وفستانها الأبيض المعلق فعلاقتو واللي أصرت باش تلبسه كأنها عروس لأول مرة ، كان مزين الشعر كيعدلها فتسريحة ويقادلها داكشي المتعلق بأي عروسة في حين كانت ناديا رفقة سارة كتصاوبلها لباسها الفوشيا الصغير وعلى ملامحها حزن وبؤس مقدرتش تتخلص منهم حتى فداك اليوم الخاص بأمها وجاد وطبعا يومين ممشاتش تقرا بعدت على تفكيرها هادشي مين ربتت ناديا على كتفها وهيا كتربطلها الفستان مالخلف وتبتسم .. ناديا كانت لابسة فستان بيج قصير حد الركب وجاي فالخصر مقسوم بتنية سوداء مفخفخة أخفات بطنها شوية ولفوق فالصدر جا مطوي ومائل عند اليدين وكيبين كتافها بجوج وأعلى صدرها كان فستان أنيق وشعرها سرحاتولها لين على طبيعتو ودارت قصتها جنب ومايكاب فنفس اللون جاها رقيق بزاف إضافة لكعب مناسب طبعا .. أما العريس فكان متخاصم معا البابيون نتاع العنق ووليد بأناقتو وكوستيمه واجد كيشوف فيه ويضحك 
وليد:- خليني نعاونك فيها ؟
جاد(كيتعرق):- أوووف معرفت مالي
وليد(كيصاوبهالو):- عادي نتا راك تتزوج
جاد(شاد على راسه):- وقيلة تقلنا فسهرة لبارح راسي كيدور ههههه
وليد:- وليه أنا اللي بغيت نودع العزوبية ولا نتا ؟؟
جاد:- كاع داك اللوز تما وباغيني نقاوم مستحيل 
وليد:- هيلين مشات معا البحر 
جاد(شد على قلبه):- هيلين ديما فقلبي عمرها ماتزحزحت
وليد(كملو البابيبون وحط يدو على كتفو):-أخيرا غادي تكون ليك حافظ عليها 
جاد(تنفس بعمق وحس بتأنيب الضمير معا وليد):- علاقتي بهيلين بغيت نعتذر ع…
وليد(سكته):- شتتت اليوم نتا عريس وخصك تفرح بروحك ونسا كلشي فات وخااا ؟؟
جاد:- صافي أسيدي
وليد:- يالاه كمل توجاد نمشي نشوف أميراتي ونشوف أمور الترتيبات لتحت 
جاد(كيصاوب فشعره متوتر):- أوك أوك
وليد(ضحك عليه وخرج):- ههههه
وليد(خرج مبيتو وشاف ناديا جاية مالممر وفيدها سارة اللي هازة بوكيه الورد الخاص بالعروس فيدها):- يا عيني ع الحلوين جيتو تهبلو يا أميراتي الحلوات 
سارة:- بابا وليت متملق بزااااااااف
وليد:- أقلو أبوكي ماشي حد غريب همممم
سارة:- أيا كان باغية نشوف ترتيبات لتحت كيف هيا 
وليد:- أوك بيبي شوية ونزلو عندك 
ناديا(شافتها نازلة وشافت فيه):- امممم كمل جاد ؟؟
وليد:- تقريبا
ناديا:- باقي مجاو الضيوف ياك ؟
وليد(وعينيه عليها آسرينها وموترينها):- شوية ويكونو هنا 
ناديا(كتتهرب من عينيه):- طيب أننزل عند ساريتا وو
وليد(شدلها يدها وباسها بلطف):- كنستنا اليوم ديالنا بلهفة وشوق 
ناديا(ابتلعت ريقها وشافت فيه بعمق):- أ..وليد
وليد(ابتسم وبغا يخليها على راحتها):- أجي نزلو 
ناديا(ابتاسمتلو ونزلت معاه):- أوك 
نزلو ولقاو الخدامة مسطرين كيعدلو فالورود وردو ديك المساحة نتاع الجردة رائعة بزااااف ومزينة كلها بالورد الأبيض والمقاعد البيضاء وكانت راقية وأنيقة بزاف وعلى جنب كرسيين مزيين وواضح أنهما كراسي العرسان ، هيلين حرصت باش يكون زفافها ع الطريقة الغربية وفعلا منقصت تاتفصيلة من التجهيز ، كانت ناديا كتشوف بحب فسارة اللي كانت كدور بين المقاعد والخدامة كيجهزو وهيا كي الفراشة بيناتهم كتحاول تمرح قدر المستطاع فداك اليوم .. حتى قاطعهم صوت نتفضت روح ناديا مين سمعاتو ومقدرتش دور موراها حتى مين حست أن وليد نسحب من جنبها ومشا يستقبلهم .. عينيها تكومو بالدموع بسرعة ووجهها حمار وحست بالإختناق وقلبها كيضرب لكن خصها تكون قوية خصها تجمد راسها كيما هوما قدرو يستغفلوها ويستغباوها كاع هاد الفترة بدم بارد تاهيا خصها دير بحالهم لكن هادي أول مرة تشوفهم مبعد معرفت الحقيقة المرة كاملة من ياسر اللي غير تفكراتو تنهدت تنهيدة مؤلمة وزفرتها ..
البوس:- أميرتنا ناديا  
ناديا(تنفست بعمق وابتسمت ابتسامة مزيفة ملتفتة ليهم):- سيادة البوس منورنا 
البوس(باسلها يدها وشاف فيها):- كل مرة كنشوفك أجمل مالمرة اللي قبلها فعلا أنتي ساحرة 
ناديا(مبتسمة بغيظ):- هذا من ذوقك 
جميلة(بارتباك شافت فيها وتقدمت تسلم عليها):- ناديا كيفك ؟
ناديا(عينيها رمشو وحلقها تزحزح بسرطة من عنقها وشافت مجددا فالشبه بيناتهم اللي منتابهتلوش بمرة كيفاش مقدرتش تحس كاع هاد المدة أنها من نفس دم ديك المرأة كيفاش كان كاين شي رابط خفي بيناتهم لكن توقعاتو مجرد حنان عابر مرة مرة كيجي لكن معمرها توقعت أنها تكون بنتها تفكرت أنها أمامها الآن ورجعت ابتاسمت لأنها تجاوزت هاد الألم فيما سلف ماشي دبا عاد غاتعيشو):- الحمد لله أتمنى نتي تكوني بخير؟
جميلة(مبتلعة ريقها وشافت فالبوس اللي شاف فيها بصمت):- عادي بخير 
وليد:- طيب تفضلو حنا نجيبو العرسان ونجيو عندكم 
البوس(داير يدو على ظهر جميلة):- تمام 
وليد(جبد ناديا من يدها ودخلها للمكتب وقفله):- نتي مزيانة ؟
ناديا(عينيها رتاجفو بالدموع):- اممم بخير علاش ؟
وليد(بتشكيك):- شفتك رتابكتي مين جاو واش ضايقوك بشي حاجة قوليلي نتدخل فورا ؟
ناديا(حطت يدها على كتفو تحيد واحد القشرة نتاع الورد):- تتت أنا مزيانة 
وليد(شاف فيدها ورجع شاف فعينيها القاتلتين):- دبا تطمنت عليك نمشي نشوف جاد واش كمل ديك الروينة ولا باقي ؟
ناديا(ابتاسمتلو):- امممم تفضل أنا نمشي عند سارة 
وليد(تنحى باش يحل باب المكتب):- اتفقنا 
خرج وخلاها فالمكتب وهي حيدت ابتسامتها والتفتت موراها للبيرو ديال وليد ودارت شوفة خطيرة فيه … مبعد مدة كانت واقفة عند مرايتها بفستانها الأبيض اللي كان جاي مسانتري على جسمها المرسوم فيه ولفوق كان جوج حمالات ونازل عند الصدر بفتحة زيكزاكي أنيقة وظهره عاري تماما واصل لحد الخصر بلفة دائرية جامعة الفستان وكانت دايرة تسريحة خلف رأسها جاية زوينة ورقيقة وفالأمام دايرة خصلتين مروليين ومايكاب مناسب وطرحة نازلة خلف الفستان على ظهرها كتطاير بهوى الجو.. كانت شادة داك البوكيه فيدها وسارة بجنبها كتتمشا تالقات وليد وجاد واقفين عند الدرج بأناقتهم كيستناوها وهيا جاية من آخر الرواق فكامل جمالها .. جاد بسيف ابتلع ريقه وقدر يستجمع أنفاسه قدام سالبة أنفاسه الجميلة ديالو قلبو كان كيخفق في انتظارها أجل اليوم غادي تكون مراتو وبسميتو فعلا معمرو توقع هاد الحلم ممكن يتحقق لكن تاحاجة مبعيدة .. أما هيا حاولت ما أمكن متضعفش قدام نظراتو وهيا كتقارن من بعيد بينو وبين وليد اللي تمنات لوكان كان هو عريسها اليوم بصح رجعت شافت فجاد وحست بوجع عليه وابتسمتلو وقررت باش تبعد تفكيرها فطليقها من بالها وترضى بالأمر الواقع أحسن متخرج خاسرة من كل الجوانب .. وصلت لعندو وسلمها وليد ليه وكروشاها جاد ونزلو بجوج ووليد شاد يد ساريتا موراهم وتابعاهم لين وشي خدامات كيصفقولهم وهوما نازلين فايتين على الصالون تاوصلو للجردة وكاع الضيوف اللي كانو تما ناضو صفقولهم ونطلقت موسيقى ترحيبية بيهم وهوما كيحيو الحضور باش يوصلو لمنصة العدول اللي كان كالس كيستناهم تما فبلاصتو وكلست هيلين وجاد مبعد ماسلمو على الحضور ووليد بقا كيقلب بعينيه على ناديا وسط الحضور مبانتلوش واستغرب نسحب خلفيا باش يقلب عليها فبيتها ولقاها موراه مبتسمة متقدمة نحوه مباشرة 
وليد:- تقلقت عليك
ناديا:- كنت فبيتي نجيب لاكارط ديالي ورجعت فيساع شنو بداو المراسم ؟
وليد:- ننن باقي بدون شهود ميمكنش يالاه نمشيو لبلاصتنا حداهم 
كلست هيلين فبلاصة العروس على ديك الطابلة ديال العدول وكلس بجنبها جاد ووليد وناديا كلسو على الجنب والعدول أونفاص ليهم واللي بداو مراسم الزواج .. سول العرسان كما جرت العادة على موافقتهم وطبعا وافقو وخا هيلين كانت تتصنع الابتسامة وخاطرها مطعون لكن تماشات معا اللحظة عكس جاد اللي كان طاير فوق السما بالفرحة وقعو على الوثيقة ووقع وليد وناديا كذلك وباركلهم العدول اللي وقف ووقفو معاه الحضور كيباركولهم بتصفيقات حارة .. كملت أجواء الزواج وناضو وسط الحضور متغلغلين كيهدرو معاهم ويرحبو بيهم وكلشي فرحان وتقديم الطلبات للمعازيم جارية على قدم وساق .. كان واقف جاد رفقة جميلة والبوس أما هيلين كانت واقفة كتضحك معا شي ضيفات وليد كان واقف معا ناديا وشي ضيوف معاهم وساريتا بوحدها كانت واقفة عند واحد الشجرة كتشوف فباقة الورد اللي فيدها بشرود تا هزت راسها بعنف وتشكيك عاقدة حواجبها
سارة(تهدر معا راسها وهيا كتشم نفس العطر):- لايمكن داك العطر يتبعني تالهنا تتتت مستحيل 
سامر(وقف موراها داير يدو فجيوبو بكوستيم صغير جايه رائع وكيوت):- امممم هو نفسه 
سارة(شافت فيه على غفلة ناري سمعها وحشمت ودورت وجهها):- نتا شنو كدير هنا ؟؟
سامر(بابتسامة):- ماما معرفة ماماك لذلك مين عرفت بالحفلة طلبت نرافقها وجيت وبالمناسبة تا بابا من معارف باباك وهو هاداك اللي كيسلم عليه دبا يعني صدقنا معارف
سارة(تنفست بصعوبة مقادراش لهاد الإختناق كلو):- أنا عارفة علاش جيت نتا جيت باش تزعجني وباش تاخذ الأخبار للقسم وتكملو مسخرتكم علياا ياك ؟
سامر(عقد حواجبو كيشوف فيها بغرابة):- نننن أبدا ماشي هاكدة جيت باش نطمن عليك 
سارة(حست روحها انفاعلت زيادة وتهدنت):- شكرا أنا بخير
سامر(شاف فجهة تانية):- لكنك تغيبتي عن الدراسة يومين 
سارة(بسخرية):- أو مغاديش يخرب الكون 
سامر:- توقعتك أقوى من ترهات ياسمين وصديقاتها التافهات 
سارة(اهتزو شفتيها وهيا كتشوف فيه):- كنت عيانة 
سامر(شاف فيها مباشرة):- ودبا بريتي يعني غدا تجي للمدرسة ؟
سارة(بانفعال):- على حسب 
سامر(متحرك باش يمشي):- خلينا أصدقاء و مبروك لأمك 
سارة(بتلعت ريقها):- يبارك فيك 
سامر(مشا خطوة ورجع عندها بعيون متلاعبة وتهزيز صادق):- تسريحة زوينة 
سارة(خربت فشعرها بتلقائية وتوترت):-أ..  شكرا 
سامر(كمش عينيه بابتسامة أنيقة وبعد صمت):- العفو 
سارة(شافت شعره المستفز وحركات الرياح عليه وابتسامتو المستفزة وعيونو المستفزة وحست بأنها متقدرش تتحمل بغات تهرب):- تفضل… خذ راحتك 
سامر(جبد ورقة من جيبه مطوية بعناية):- هادا الفايس ديالي نقدر نصيفطلك الدروس اللي فاتك وتراجعيها قبل 
سارة(حلت شفتيها فيه بارتباك وشدت الورقة بتردد بين يديها):- إن شاء الله 
سامر(تزحزح من جنبها):-غادي نستنا لانفيتاسيون ديالك و … نشوفك 
سارة هززتلو راسها بفشل فكل جسمها وناري كيستفزها لأقصى درجة وبمعنى أصح كيوترها ويخليها ترتبك شافت فديك الورقة بين يديها ودارتها فجيبها وهزت خصلة من شعرها وابتسمت .. 
 فهاد الأثناء كانو جاد وهيلين يأديو رقصة كلاسيكية وسط الناس والجميع مبتسملهم 
جاد(كيهمسلها):- هادا أروع يوم فحياتي نتي ملك يدي ومراتي يااااه يا هيلين حلم وتحقق 
هيلين(بغصة فروحها):- جااااد اللي بيناتنا ماشي ساهل 
جاد(مبتسم):- يا جوهرتي الغالية عمرني نفرط فيك 
هيلين(ابتسمت):- إذن هنيئا لي بيك 
جاد(غمرها فحضنو وهوما كيرقصو):- أنا اللي هنيئا لي بأحلى امرأة فالدنيا 
هيلين حطت بتعب راسها على كتفو وكملت معاه الرقصة على تصفيقات الجميع .. وليد وناديا كانو حدا بعضياتهم وهيا عينيها كانو مركزين فالبوس وجميلة مقادراش تحيدهم مقادراش تبعد فخاطرها مليون سؤال وألف عتاب والكثير الكثير من الغضب باغية تفرغو فيهم لكن متقدرش متقدرش .. شافت فوليد وهمستلو فودنه وانسحبت متحججة أنها متقدرش تكمل مراسيم الحفلة وافقها وخلاها تطلع لبيتها ، في حين كان وصل مصعب أخيرا 
مصعب(بتأفف):- أوووف فوت مراسيم الزفاف دارتها بيا الطريق
وليد:- هههه المهم جيت مالك على هاد الزربة 
مصعب(كيدور بعينيه فكل مكان):- وقلت منتعطلوش على السي جاد لا يزعفلنا تاني 
وليد:- تيق بيا دبا مراهش حاسس تابوجودي هيلين لحستلو المخ
مصعب :- لكن مزال مستغرب هاد العلاقة بيناتهم يعني من فوقاش ؟؟
وليد:- من فترة بسيطة وتوافقو معا بعضياتهم علاش لا ربي يفرحهم 
مصعب(مزال كيفتش):- أمين يارب
وليد(انتابهله وحيد ابتسامته):- كتقلب على شي حد معين ؟
مصعب(بعيون ولهانة):- كنقلب على الغجرية سوداء الشعر اللي شفتها داك النهار فحفلة الشركة 
وليد(عقد حواجبه معاقلش كاع عليها):- شكون هادي ؟
مصعب(شاف فيه بجدية):- اللي رقصت 
وليد(بابتسامة):- آآآآآه ديك البنت معقلتش شنو قاتلي اسمها هممم 
مصعب:- تفكره أوليد ولا غادي نهبل 
وليد:- ومالك مركز معاها لهاد الدرجة؟
مصعب(بتوهان):- سحرتني يا صاحبي من أول نظرة ومكرهتش نرجع نشوفها مرة أخرى 
وليد:- ههههه ناري عليك طيحاتك بنت مجهولة ودبا كيندير نعرفهالك أنا من بين مليون ضيفة وضيفة
مصعب(شدو من ذراعو بحماس):- خصك تعاوني نلقاها أوليد الله يخليك راني مكننعسش من كترة التفكير 
وليد:- وسندريلا هادي مافيهاش ، صافي ولا عليك غادي نكلف السكرتارية يقلبولك عليها وميكون غير خاطرك
مصعب(بامتنان):- ياعيني صافي دبا عاد نرتاح 
وليد :- هههه مجنون 
مصعب:- فين ناديا عروستنا القادمة ؟
وليد(شرد فيها):- طلعت شوية لبيتها ترتاح يالاه ستمتع بوقتك نشوفها ونجيك 
مصعب:- أوك أني هنا نشوف الوردة الصغيرة
وليد(رجع عنده خطوة):- متخربليش أخلاق بنتي داك النهار قالت عليك وسيم هههه
مصعب(مادح فراسه):- ويتك ويتك على بنت أغلى الناس 
وليد(ربتلو فكتفه ومشا):- شوية ونجيك 

كانت محيدة الكعب ديالها وبقات تدلك رجليها بتعب شوية وسمعت طرق على بابها ستغربت توقعت يكون وليد
ناديا:- أنا بخير أوليد شوية ونجي ..
جميلة(فتحت الباب وطلت عليها):- نقدر ندخل 
ناديا(تحبس الهوا فرئتيها وابتلعت ريقها وتلعثمت):- ج .. جميلة تفضلي 
جميلة(دخلت وقفلت موراها الباب وكلست بوهن على الكنبة):- شفتك نساحبتي دغيا من الحفلة ياكما عيانة ؟
ناديا(حطت يديها على حجرها):- لا غير بغيت نرتاح شوية ونرجع 
جميلة:- أكيد البيبي هاد المرحلة كتكون متعبة شوية 
ناديا(بعينين مغرغرين):- ههههه غريب شايفاك كتفهمي فأمور الحمل مع أنه معندكش أولاد 
جميلة(ارتاجفو عينيها وحست بغصة وحواجبها تقوسو):- معلومات عامة والدنيا كتوريك كلشي 
ناديا(شافتها تهربت وهززتلها راسها):- فعلا … اممم كنتي باغية شي حاجة مني ؟
جميلة(وقفت بتردد):- غير بغيت نطمن عليك 
ناديا(أمأمت بنظرة منكسرة ممزوجة بابتسامة مزيفة):- اممم شكرا ليك شوية ونكون معاكم 
جميلة(انساحبت بصعوبة):- وخا 
ناديا بمجرد مبلعت جميلة الباب نفاجرت بالبكا مقدرتش تتحمل هادشي كلووو ومقدرتش تتحمل وجودها معاها ولا شوفتها رمات راسها على سريرها وهي كتتلوى فوقو كاتمة شهقاتها باش ميسمعها حد .. مبعد لحظات سمعت طرقة وليد وانتافضت من سريرها بسرعة دخلت للدوش وقفلاتو عليها مسحت دموعها وعدلت مايكابها من جديد وجاوباتو أنها نازلة لعندهم غير يسبقها وداكشي مدار تارجعت للحفلة من تاني باش تكملها معاهم شعلو أضواء اللي زينو بيها الجردة وكان ضلام الحال وحلو البوفيه وكلاو الناس من حيث يريدون وتا وليد وناديا هزو صحنين عمروهم باللي بغاو وكلسو فطاولة بوحدهم رفقة سارة اللي كانت مبتسمة عكس حالتها صباحا وعينيها فطاولة سامر لاحظتها ناديا وابتاسمت بهدوء
ناديا:- ساريتا حبيبتي على بالك شي نوع معين مالعصير نطلبولك؟
سارة(هززت عينيها):- هاه لالا مبغيتش العصير غادي يديرلي اضطراب معوي فقط 
وليد(شرق بالضحك):- هههههه يا الله هاد المخلوقة صدقا فيها من جنوني الكثير 
ناديا:- هههه فهادي نوافقك وانا مغمضة عينيا
وليد(انتابه لعينين سارة وكمش عينيه وهو كيشوف فناحية الطابلة اللي مسمرة عينيها عليها مالصباح وقشع سامر وهو يطلع معا السخانة وجا ينطق لكن ناديا شدتلو يدو):- هئئ س..
ناديا(ضحكتلو):- تتت وليد هدي أعصابك ماباغيينش فيلم كرتوني هنا 
وليد(شاف فيها وريشلها بعينيه لعنينن سارة اللي كانت غايبة معا سامر اللي كان مسمر عينيه تاهوا عندها):- شنووو شنو باغياني ندير نتفرج فملايكة الحب ونسكت ؟؟
ناديا(قربت من وجهه بهدوء وهمستلو):- البنت متعبة ويكفي أننا شفنا ابتسامتها اليوم
وليد(قرب من ودن ناديا):- ابتسامتها اللي مابتاسمتهاش تاشافت هاد المدَهْوَس
ناديا(ضحكت):- هاد شكووون ؟
وليد(حك فراسو وشاف فيها بلؤم):-مدَهوَس سمعتيها 
ناديا:- ههههه مشكل الهاء مجددا عموما خفف وخليها على راحتها هو زميلها والواضح أمو صديقة هيلين وشفتك قبيلة تسلم على باه راه هو نفسه عز الدين أيوب مدير شركة الأثاث والديكور 
وليد(بحنق اللي عرف العلاقة بين البينين):-هممم ونعم الصحبة بمجرد مترجع من عسلها ولا داكشي نخليها تقطع علاقتها بيها وانا الى جا سلم عليا باه غادي نقصفه برا الفيلا بيه بعائلته مناقصينش مجانين
ناديا(التاقطت بفرشيطتها قطعة صغيرة وقدمتها لفم وليد):- امممم شرير نتا 
وليد شاف فعينيها لقرابين منو وابتسم لمدى قربها منو والتاقط بفمه ديك القطعة وهو عينيه عليها حتى رتابكت وتنحنحت باش مايتماداش .. ورجعت ضحكت لأنه رجع حمر فسارة وسامر اللي الواضح كانو فعالم أنا وأخي شكون يقدر يوقفهم دبا ههههههههه ^^ 
انتهت الحفلة أخيرا والضيوف كلهم مشاو وبقا كالس وليد وناديا وساريتا فالصالون مبعد مآخر الناس مشاو واللي كان البوس وجميلة ، أما هيلين وجاد طلعو يبدلو كسوتهم ويجيبو حقائبهم باش ينطالقو فديك الليلة متجهين لقضاء شهر عسلهم ، نزلت هيلين بأونصونبل بيض وشعرها حلاتو وبقا زوين عاد وموراها عماد هاز حقيبتها وحقيبة جاد اللي بدل تاهوا كوستيمه ولبس كاجوال كعادته ميتغيرش وفيديه تيكيت الطيارة اللي غاديين فيها 
وليد(وقف):- صافي ماشيين ؟
جاد:- اممم غادي تهناو منا أسبوعين بحالهم 
وليد(ريشلو بيديه غي سير):- ههههه والله ايلا 
هيلين(قربت من سارة وباستها):- ببيبي متنسايش دواك وكوني عاقلة تانرجع غادي نتصل بيك كل يوم وخا ؟
سارة(عنقتها):- أوكي مامي 
جاد:- بوسة لأونكل جاد تكون كبييييييييرة 
سارة(باستو بحب):- انتبه لماما 
جاد(عنقها):- ياروح أونكل نتي 
ناديا(وقفت وباركت لهيلين اللي شافت فيها بتعالي مزدري كتخفي ألمها الحقيقي):- مبروك
هيلين(بخبث):- العقبة ليك عما قريب نفرحو بيك تانتي 
ناديا(هززتلها راسها):- أتمنالك السعادة اللي كتحلمي بيها 
هيلين(عضت داخل شفتيها):- شكرا .. جاد خلينا نمشيو 
جاد:- يالاه ألعموم نشوفك بيناتنا اتصال
وليد(سلم عليه):- استمتعوووا
جاد(دار وغمزلو):- تانتوما … سلام
مشاو أخيرا وانسحب وليد داي سارة لبيتها باش تنعس وخرجت ناديا للجردة كلست على واحد الكرسي من كراسي الزفاف كتشوف بشرود وتسترجع أحاسيسها وهيا قرب جميلة اللي حسستها بالألم المرير ولعنت الظروف اللي عذبتها هاد العذاب كلو وخلاتها تتألم بالحقيقة المرة ديال محيطها كلو .. قاطع حبل أفكارها مين نزل فاتح كرافاطتو بعشوائية وداير يد فجيب ويد هاز بيها كاس وجا كلس بقربها على كرسي آخر من كراسي الحفلة ..
وليد:- همممم هدوء رائع جاد وهيلين فعلا كتلة ضجيج 
ناديا:- الموضوع غريب جاد كان سعيد بزاف عكس هيلين اللي طول الوقت كانت شاردة
وليد(شاف فيها):- طبيعي لكن مع الوقت غادي تعرف أن جاد هو المناسب ليها 
ناديا:- حتى لو قلبها معاك ؟
وليد(تهز فكه):- قلبها معايا لأنها وهمت راسها بيا لوكان تعطي فرصة لجاد غادي تلقى الحب الحقيقي اللي كان قدام عينيها وهيا كانت تابعة الأوهام 
ناديا(ابتلعت ريقها وحست أنه كيمعني عليها):- كان يوم طويل خصنا نرتاحو .. ساريتا نعست ؟
وليد:- بمجرد محطت راسها على الوسادة 
ناديا(ابتسمت بخفوت ووقفت):- تانا غاندير بحالها
وليد(شرب كاسه فمرة وحطه على الطاولة ووقف مقابلها):- كنت باغي نسولك تعقلي على ديك البنت المجنونة اللي رقصت فالحفل السنوي ؟
ناديا(حلت فيه عينيها مرتبكة وابتلعت ريقها باش متبينش):- آه وهاديك تتنسى زعما علاش كتسول عليها ؟
وليد:- هههه ماشي أنا باش متضلمينيش هادا مصعب هبلني عليها باغي يتلاقا بيها قالك سحراتو من أول نظرة وهو معارفش تا سميتها بيني وبينك ولا حكاية سندريلا واعدته نخلي مكتب السكريتارية يقلبو عليها مي قلت ايلا كنتي عاقلة على سميتها نوفرو الجهد
ناديا(اهتزو عينيها بشراسة ولؤم كيتفكرت زكية ومابين سنانها هدرت):- لا معقلتش ويفضل يبعد مصعب على ديك النوعية كاع 
وليد(شدلها يدها):- وعلاش تنرفزتي هو حر فاختياراته 
ناديا(عاقدة حواجبها):- لا متنرفزتش غير عييت وبغيت ننعس 
وليد(ربتلها على يدها وطلقها):- طيب ليلة سعيدة 
ناديا(مشات):- ونتا الأسعد 
مجرد فكرة أن مصعب عجباتو زكية خلاتها تجن دخلت لبيتها ورمات كعبها بعنف على الأرض وحيدت إكسسواراتها بعصبية وكلعت داك الفستان بنرفزة وهيا كتهدر تحت فمها وكتلعن النهار اللي عرفتها فيه لا والزينة مصعب تعجبه ، اللي كان مألمها أن احتمال ياسر تعجبه ما مصعب مسكين غير دا المعيوور وهادا اللي كان موجعها فخاطرها خصوصا مبعد محادثتها معا ياسر واللي خلاتها تعصب وتطير للسما وتنزل وتفكرت كلام مريم مين قاتلها تعيش حياتها كيما مكتبها الله مدام هوا بلسانو عايشها معا زكية إذن غادي دير المثل تعبت من هاد الأفكار وناضت لبست لباس نوم وردي ناصع حد الركب وفأعلى الصدر كان فيه وردة بالدونتيل وكلست على منضدتها تحيد الماكياب وشوية شردت فداك اليوم اللي شافت فيه ياسر وزكية حست بالحرارة طالعة معاها وتخنقت وبقات تتنفس بعمق باش توازن أفكارها اللعينة اللي كانت فيها جميلة والبوس كذلك وبمجرد متفكرهم تاهوما تشعل فيها النار.. حست بتعطش لشي حاجة مسكرة معرفتش علاش جاتها فالبال شافت فعينيها اللي حمارو بالعصبية وحكت فجبهتها بتوتر وتنهدت .. نزلت راسها الأرض ووقفت خرجت من بيتها بهدوء تام ونزلت بدون صوت وقفت عند داك المشرب و هزت قرعة من تما وكبت شوية فكاس وهيا كترجف من هاد الخطوة لكن بغات تنسى وترتاح بمرة جبداتو لفمها وشربت جغمة وجاتها قاسحة وشربت تاني بعنف مرة وحدة وكمشت عينيها بتعب ورجعت كبت كاس ثاني و غي جات تشربه شدو عليها وحيدولها بسرعة كينهت
وليد(بصرامة):-ممكن نعرف شنو باغية ديري؟
ناديا(بلؤم):- نشرب 
وليد:- نتي حاملة 
ناديا(شدت على راسها):- وعندي صداع باغي يقتلني وخصني شي حاجة باش ننسى بيها رجاءا متدخلش 
وليد(بغات تخطفلو الكاس لكن بعدو عليها):- طبعا مغاديش نسمحلك 
ناديا(شافت فيه بعصبية والتفتت للمشرب من جديد):- أوكي ديه إيلا بغيت أنا نعمر واحد تاني 
وليد(تقدمها وحط الكاس وشدها من يديها جارها لوسط الصالون):- شنو اللي زاعجك تالهاد الدرجة شنو كاين ؟؟
ناديا(كتنهت بسرعة):- واش منقدرش نبقى لحظة على راحتي 
وليد:- تبقاي على راحتك آه لكن تآذي نفسك لاء
ناديا(ريشت يدها بلا مبالاة وبسخرية):- امممم غادي يبدي يعرض عليا مواعظه اللي مكاتكملش هفففف 
وليد:- دبا شنو هادشي اللي كدييره ؟؟
ناديا(ببلاهة):- باغية نشرب أنا كنتوحم إيلا نسيت 
وليد(ضحك بسخرية):- معمرني سمعت شي وحدة كتوحم على الشراب؟؟
ناديا(بجدية قربت منو):- إيوا سجل عندك أنا أولهن
وليد(شاف فيها عميقا):- ناديا علاش باغية تعذبي راسك ؟
ناديا(شافت فيها بيأس وبدموع نزلو من عينيها حارقين مقدرتش تحبسهم):- لأن حياتي كلها عذاب فعذاب اهئ
وليد(مسحلها دمعتها وبرقة قرب منها شاد وجهها بين يديه):- ناديا صارحيني 
ناديا(شافت فيه بتشتت وتعب وهززت راسها بدموع وحطت راسها على صدرو):- اهئ اهئ
وليد(خداها بكل حب ودفئ فحضنه وهو كيمسح على شعرها باش تهدا):- رتاحي أناديا ومتفكري تافشي حاجة 
ناديا(بدات دوخ من الكاس اللي شرباتو وهزت راسها بتثاقل كتشوف فيه بلمعة فعينيها):- وليد 
وليد(وهو عاد شادها فحضنو وجهه عند وجهها):- نعام أناديا 
ناديا(ابتسمت بثمالة وحطت يديها على صدرو ورجعت هزتهم وحطتهم على وجهه وقربت منو):- علاش نتا وسيم كاع هاكدة همممم ؟
وليد(بضحكة ساخرة):- امممم الكاس اللول دار شغلو يالاه وقت النعاس دبا
ناديا(جا يحيركها باش يمشيو لكن متحركتش وشداتو عاود بلهفة):- عينيك مكنقدرش نقاومهم كنحس بيهم يجبدوني و 
وليد(ابتلع ريقه متابعها وهي كتلعب بصبعها فوجهه):- هممم 
ناديا(حطت صبعها على شفتو وشافت فيه بتعطش):- وليد .. 
وليد(غادي يفقد توازنه حداها):- ناديااااا نتي راكي سكرتي رجاءا فيقي من هاد الجنون ديالك
ناديا(بعيون جليدية):- خليني أنا حرة 
كان مسلوب فيها وهيا متعطشة لشيء غريب احساس بيناتهم كان ميتفسرش غمضت عينيها وتنهدت وفتحتهم مقربة منو وهو مقدرش يقاومها حط يدو خلف رأسها وجبدها لعندو أكثر وغاصو فقبلة شغوفة حارة خلاتها تتمادى أكثر وحيد راسو بسيف من شفتيها الساحرتين وشدلها يديها اللي فتحو زر تاني من قمجته و تعمقو فصدره وبالضبط فشعيراتو الخفيفة 
وليد(جابدها باش تتمشى):- نتي دبا ماشي فوعيك أجي معايا 
ناديا(دايخة):- هوووه كنت خلينا ياك هادا اللي كتستناه مني أو لا ؟؟
وليد(طالع بيها فالدروج وتوقف شاف فيها وكمل طريقه):- كنستناه ونتي واعية ماشي سكرانة 
ناديا(كتضحك بصوت ساخر):- ههههه وشنو تفرق ياك أنا أنا 
وليد(وقفاته فالدروج وحطت يديها على صدرو وهو شاف فالسما ورجع شدلها يدها وكمل الطريق):- تمشاي 
وصلها لبيتها وفتحها ودخلها للدوش مباشرة باش تفيق
وليد:- دبا تغسلي وجهك وديريكت لفراشك مفهوم 
ناديا(عضت على شفتها بإغراء وابتاسمتلو):- خليك معايا 
وليد(مصعوق فيها):- لا نتي سكرتي بالمعقول ناديا رجاءا ديري اللي قتلك 
ناديا(اندفعت عنده من جديد وزادت فتحت زر من أزرار قميصه العلوية وعينيها كيتلهفو فعينيه):- وليد بغيتك تبقا 
وليد(غمض عينيه مقادرش يتحمل هادشي وجودها عطرها سحرها إغرائها لمساتها شفتيها أنفاسها كلهم قاضيين عليه وايلا طلق العنان لمشاعره غادي يغلط ويندم لذلك كان لابد مايتحكم فراسو):- قتلك نعسي 
ناديا(لتخت يديها بعنف وبعدت عليه):- هممم نتا فاشل الفرصة بين يديك 
وليد:- لأنه ماشي هادي هيا البنت اللي بغيتها كيترجعي لوعيك نتفاهمو تصبحي على خير
خرج وخلاها ممهتماش كاع وكلست كتضحك بسكر تام وهو دخل لبيته حيد ديك القمجة ودخل مباشرة للدوش فتح الما البارد ودخل تحته وقلبه كينتفض من سحر ناديا اللي غادي يهبله بجنون .. 

وصلو لديك المدينة السياحية اللي سافرولها واستاقرو فالفندق اللي حجزوه دخلولهم حقائبهم وقفلو الباب ..هيلين حيدت جاكيط الأونصومبل اللي كانت لابسة وكعبها ودخلت للدوش تعمر البانيو بهدوء تام بقات كتعدل حوايجها تما في حين هو حيد جاكيطو وكلس على الكرسي وتفكر الحديث اللي دار بينه وبين وليد هادي شي أسبوعين تقريبا 
~جاد كيتفكر~
وليد(فالمكتب):- جاد باغي نتكلمو أنا وياك بصراحة الأحداث اللي كتوقع فالفيلا بيني وبينك ممريحانيش ومراضيش عليها بتاتا عييت نفوت لكن تالهنا ويكفي 
جاد(ابتلع ريقه وصحابله عاق بعلاقتو بهيلين داخل الفيلا):-شنو قصدك؟
وليد:- قاصد العلاقة اللي بينك وبين هيلين تالفوقاش غادي تبقى هاكدة كي العزول وممتقدمش تاخطوة باش تكسبها ليك
جاد:- وفنظرك أنا مكتمناهاش ليا فاليوم ألف مرة لكن هيا مغاديش تقبل
وليد:- كاع نتا جربت شي مرة ولا غير كتقول هاكدة؟
جاد:- جامي حاولت صراحة
وليد:- إيوا شفت وهيا عاجباها العلاقة حرة راسها دير مابغات وقتما بغات لكن لاء هادشي غلاط وانا مبقيتش قادر نصبر عليه وبلغة أوضح بغيتك ترتاح معاها وتستقر 
جاد:- قل نهنيك منها هادي هيا اللغة الأوضح
وليد(دار رجل على رجل):- وعلاش لا أقلو نخرجو بجوج بينا كسبانين 
جاد(فكر):- هيا فكرة منطقية لكن أنا خايف نخسرها وتحيد عليا تا الشوفة فيها 
وليد(بمكر):- إيلا تبعت راي خوك غادي تكون ليك وفأقرب وقت عاد زيد عليها الضغط اللي جايها مغاديش تتحمل
جاد:- زعما فبالك يجي شي يوم وتكون لي قلبا وقالبا ؟
وليد:- معرفت لكن تاشي مامستحيل 
جاد:- وشنو نصيحتك يا بو العريف؟
وليد:- تركها 
جاد(مخلوع):- كيفاش ؟؟
وليد:- آه تركها وتخلى عليها وخيرها بين تتزوج بيك ولا تبعد على طريقك للأبد وهيا ع الأرجح متقدرش تبعد عليك لذلك غاتختار تستسلملك ومتخرجش خاسرة قدام الكل 
جاد:- الزينة هي نتركها وتمشي يعجبها الحال وتخليني 
وليد:- إيوا يعني نتا مكتشوفش مزيان ولا أوهامها عماولك عينيك .. هيلين فعلا كتميل ليك ومتعلقة بيك فوق القياس لكن وهم ارتباطها بيا عامي عينيها ودبا مبعد كلشي غادي تكشفو الأيام وتشوف علاقتك بيها كيف غاتولي وقول وليد مقالش
جاد(كيفكر بفرح حلمو غايتحقق):- ومين فيك كاع هاد الشطارة والفهامة علاش مقادرش للآن تكسب قلب ناديا ؟؟
وليد(ابتلع ريقه بحزن):- موضوعي أنا وناديا كيختلف
جاد(حط يديه باستفسار على سطح المكتب مقابله):- وفين الإختلاف بالله عليك صفحة ياسر ونقولو طويناها إذن علاش متلحلحش وتسيطر عليها حسب علمي مكانش اللي تقاوم هيمنة مستر وليد وكلشي كيتمناو غير شوفة منك 
وليد:- ياحسراه داكشي مبقاش كيعنيلي تاحاجة مقابل نظرة من عينيها مستعد نرمي الكون كلو مور ظهري لكن للأسف ياسر باقي بيناتنا مهما حاولت ننتزعو انتزاع من قلبها وعقلها 
جاد:- بفمك قلتها تاحاجة ما مستحيلة خصوصا الأمور المتعلقة بالقلب
وليد:- منضنش كاين أمل بيناتنا مي مع ذلك حبي ليها كيزيد ويزيد وغادي نبغيها تالآخر يوم فعمري ونحاول جهدي باش نسعدها ونخليها تكون ليا كيف كنتمناها تانا 
جاد:- هووووف ربي بلانا بهاد العذاب القلبي إمتا غير نملكوهم ونحسو بنشوة الفرح 
وليد:- الحمد لله على كل حال المهم نبديو بيك دير اللي قتلك وغاتشوف النتيجة 
جاد(غمزلو):- باغي نتراهنو ؟
وليد(تفكر أيام زمان وبابتسامة):- سير نتراهنو ؟؟
جاد(بلمعة خبث):- هههههه إيلا مقبلتش بيا ليك عليا فحفل عزوبيتك نجيبلك رقاصة شرقية خصوصي بيني وبينك ديك اللوزة اللي رقصت فحفلتك نوضت فيا الشوق لأيام اللي بالي بالك 
وليد:- ديل وإيلا قبلت غادي تخبرني إمتا أول مرة نعست فيها معا هيلين 
جاد(حل فمو شاهق):- وليد هادا مداخلش فاللعب منقدرش أصاحبي نن
وليد:- جاد فنظرك دبا كيهمني الموضوع أنا حبيبتي معمرة كلشي فيا مي فضووول واش قابل ؟؟
جاد(ميقدرش يقاوم المراهنة):- وخا غادي تقتلني هيلين مي قابل روح
وليد(بفرح):- ههههه مشينا 
فالحفلة بعدا تفكر جاد هاد الحديث بيناتهم وبقا كيضحك من هاد الإتفاق وكيفاش ربحه وليد اللي جا وقف حداه باستفزاز
وليد(بلمحة انتصار بمعنى ربحه):- تزوجتوو امممم 
جاد(شاف هيلين كتهدر معا شي ضيوف ونزل راسو الأرض ورجع شاف فيها):- أسبوع مور زواجكم 
وليد(خفت ابتسامتو وشاف فيه):- كيفاش ؟
جاد(ابتلع ريقه):- نعست معاها مور زواجكم بسيمانة وانا والله مكان فبالي إنما كنت حزين لفراقها وارتباطها بيك وداك النهار كنت سكران ميت وجات عندي كتبكي وقاتلي أنك رافضها مبعد ثاني ليلة ليكم ومعارفاش السبب …لكن مهم دبا واش دانا فالماضي اللي وقع وقع … وليد كتسمعني 
وليد(عاقد حواجبه):- آه كنسمعك كنسمعك … أ جاد أجي معايا لمكتبي نسيت معطيتكش هديتك 
جاد(ضحك):- أشمن هدايا بيناتنا أصاحبي 
وليد(شدو مذراعو):- آلا خصك تاخدها مني أجي أجي … 
خداه للمكتب ودخله ومولاي السلطان صحابلو راه قاضي الشغل دخل ووليد قفل الباب ودار عنده
جاد:- وفين هديتي ؟
وليد(ابتسملو ابتسامة وعطاه بونية للوجه):- هاهيا 
جاد(تضرب على غفلة وجا كالسة على كنبة المكتب مخلوع شاد على حنكه):- واش هبلت مالك على هاد اللعب الثقيل ؟
وليد(كيمسد يده عادي):- هادي هديتي لزفافك وكنت باغي نعطيهالك من هادي سنين مي جات فرصتها اليوم باعترافك الظريف كيفك 
جاد(كيخرب فوجهه بألم):-نتا طلبت نصارحك 
وليد:- آه محيت متوقعتكش تصدمني بهاد الشكل مي عندكم الزهر قلبي مشغول حاليا مالوكان وريتكم النجوم فعز النهار هففف منكم هفف (حل عينيه بصدمة وشاف فيه) جاد يعني …..
جاد(حال فمه وهززلو بيديه):- لالالالالالالا مستحيل مستحيل ميمشيش تفكيرك بعيد سارة بنتك وانا متأكد
وليد(شده من ياقة كوستيمه بجبدة وحدة):- وباش متأكد باش متأكد ونتا كتقولي كانت ففراشك سيمانة مور زواجها مني جاوبني أجاد جاوبني ؟
جاد(منزل راسه):- محيت أجريت تحليل الدي إن إي بمجرد مزادت ساريتا تانا كنت شاكك لكن تأكدت رفقة هيلين باللي بنتك 100 ف 100
وليد(مرتاح ومطمن من هاد المسألة اللي كانت موتراه):- كنت خايف بصراحة نديرو وخا كنت شاكك فالأمر بصح خفت نتصدم وانا مقلت باش لقيت أمل نعيش من أجله آآآآه متصورش شحال ريحتني أجاد بكلامك هادا 
جاد(كيخرب فحنكه):- آه نتا رتاح وانا نتبيس 
وليد:- ياما نصحتك تبعد من طريقها مكنتش كتسمع 
جاد:- كنبغيها وخا تكلس 10 سنين تقنعني نبعد عليها ممبعدش
وليد:- هههه وراك دبست فيها غي شيل الليلة بوحدك والله حد مغادي يدخل
جاد(جبد من ثلاجة وليد المكتبية شوية ثلج وحطو على حنكه):- إيلا حمار حنكي غادي نقاضيك كتسمع 
وليد(متكي على الباب ومربع يديه بضحك من كل قلبو):- هههههه فعلا تستحقها لاعبلي فيها روميو
جاد:- هييييه معليش مقابل الحب نضحيو 
وليد:- مجانين ويالاه نخرجو قبل ميقلبو علينا 
جاد(عبس وحيد الثلج وشاف فيه):- حمارتلي ؟؟؟
وليد(قرب منو):- إيلا بغيت نحمرلك تالحنك الثاني باش يكون تعادل معنديش مانع
جاد(بعد بوجهه):- عمرني ننسا هديتك 
وليد:- عتابرها ضريبة كان خصك تأديها مع أنه كان لازمك كتر راه قتلك بزهركم 
جاد:- خرج خرج وصيفطلي لين حالا قلها تجي وتجيب عدتها باش تسلك ماتسلك مباغيش نعلق معا هيلين
وليد(خارج كيضحك):- قلها ضربك الحيط هههههههه 
جاد(هز شي قابصة تما وضرب بيها جات فالباب مور وليد):-سير الملعوووون هففف
فالوقت الحالي 
كان داير يدو على حنكو ومزية لين تدخلت باللازم قدام الناس مي هيلين لاحظت وقالها غير إصابة بالباب وخافت عليه وشحال دعات ربي حفظه وهو شاف فوليد اللي كان شاد ضحكته بسيف.. هز قرعة شراب كان دومانضاها فالغرفة وكب جوج كيسان وهزهم متجه نحوها 
جاد(بعيون عاشقة):- عروستي فصحتك
هيلين(شداتو عليه بابتسامة وهيا خارجة من الدوش):- فصحتك 
جاد(شربه وحطو على الطابلة وتقدم شدها من يدها):- حبيبتي ممصدقش نفسي أنك وليت مراتي 
هيلين(شربت داك الكاس فمرة وحطاتو على الطابلة):- صدق أجاد حنا تزوجنا فعلا 
جاد(جبدها من خصرها لحضنه):- نواعدك مغاديش تندمي ولا لحظة على زواجك مني فقط عطيني فرصة 
هيلين:- ههه جاد حنا تزوجنا فبالك هادي ماشي فرصة 
جاد(نزل راسو الأرض وشافها تتملص منو):-هيلين نتي تزوجتيني ردا لاعتبارك قدام الصحافة وقدام الناس وبالأخص قدام ناديا ووليد
هيلين(تلعثمت):- طبعا لا هادشي مكاينش 
جاد(شدلها يدها):- هيلين أنا كنبغيك كيفما كنتي بيك بأخطائك مغرم بيك وممستعدش نفرط فيك مبعد ماوليتي ديالي لكن كنطلب منك فرصة ماربما لقيتي اللي كتقلبي عليه هادي سنين فياااا همممم
هيلين(تهزت شفتها وحست بروحها مخنوقة وشفها جاد لكن ماشي بخاطرها):- جاد 
جاد(باسلها خدها بحب):- نتي أحلى حاجة وقعتلي فحياتي كلها 
هيلين(ابتسمت ومتصت كاع دوك الأفكار):- البانيو يكون عمر 
جاد(بخبث):- اممممم سيري 
هيلين(بعدت عليه وهي كتعض على شفتيها):- غادي تجي ؟؟
جاد:- نننن خذي راحتك 
هيلين دخلت مبتسمة وتنفست بهدوء وقررت تعيش لحظتها كما هيا دارت الجيل فالبانيو وحركاتو بيديها وطلق فقاعات صابونية وحيدت كسوتها ولوات على راسها فوطة وعلات شعرها قدام المراية بمقبض وجات تدخل لكن قاطعها دخوله موراها بمنشفة لاويها على خصره ومخلي صدره عاري وبنظرة مغرية شاف فيها ، قرب منها وبدون سابق إنذار باسها فشفتيها ببوسة عنيفة توقفو شوية والتاقطو أنفاسهم ومد صبعه فتحلها قبضة الفوطة اللي طاحت على الأرض ورجعت خلفيا وشفتيه ففمها ويديها على صدره ودخلت للبانيو وهو دخل موراها مبعد مطيح منشفتو وووووووو كملو من خيالكم ههههههه ^^

داك الصباح ناضت بصداع فراسها وكانت كالسة ففراشها حشمانة من الشي اللي دارتو لبارح محيت تفكرت طشاش منو وحست بيه وعضت على شفتيها وهيا كتلعن راسها اللي فكرت تنزل تشرب وها شنو جنات مبعد داك الجنون ، حطت راسها على حيط سريرها وهيا مكمشة ففراشها ويديها مربعاهم كتشهق بتعب لمحت خاتم وليد فيديها وتلمساتو بتمعن وتنهدت ، هزت الغطا وناضت من سريرها فتحت دولابها ونحنت للأسفل فتحت صندوق بمفتاح خاص عندها وجبداتو حطاتو على سريرها كان فيه صورة ليها ولياسر فلقطة مجنونة غير شافتها سترجعت ذكراها وبمرارة رجعتها محلها وهزت السوار ديالها اللي مكتوب فيه ناديا واللي عطاهلها ياسر أيضا وبقات تشوف فيه وتتمعن تفاصيلو ورجعاتو محلو ، وهزت خاتم زواجها من ياسر بين يديها و جمعت قبضة يديها عليه ورجعاتو محله وجبدت الصندوق الموسيقي اللي عطاهلها البوس وفتحاتو وانطلقت موسيقاه الكلاسيكية اللي خلات ناديا تغمض عينها وتغوص معا دوك التفاصيل حطاتو على جنب وشافت فصورة والديها الوهميين وضحكت بمرارة بدمعتين حارقتين محيت هادو هوما الوالدين اللي كبرت على حبهم وتقديرهم وخا مكتعرفهمش وشحال ترحمت عليهم وتفكرت عيسى وشحال كان يحكيلها عليهم سرطت ديك الغبنة وهزت عقد وليد اللي هداهلها سابقا وتلمساتو بين يديها وحطاتو بعيد عليهم وجمعتهم من جديد ورجعتهم لمحلهم فالصندوق وقفلاتو بالمفتاح وهيا كتتنهد وكأنها تخلصت من هاد الذكرى ، شافت فالعقد ولبساتو وفتحت دولابها جبدت ماتلبس ودخلت خدات دوش وعدلت راسها ونزلت .. لقات سارة لابسة كسوة المدرسة وكتفطر وبجنبها وليد كيشرب قهوته وكيقرا فالجريدة أخبار الحفلة ديال البارح ..
ناديا(مقدرتش تشوف فيه):- صباح الخير
سارة(كتقضم بسكويتة):- صباح النور افرحي قررت ّأن أحارب هههههه
ناديا(ابتاسمتلها بتلعثم مقادراش تهز راسها فوليد):- أهااه فرحتيني 
سارة(سمعت بلال يناديها ويخبرها أن باص المدرسة وصل):- اوووه تأخرت يلاه نشوفكم مسائا 
باست ناديا بسرعة وباست باباها وهزت حقيبتها وقابصة أكلها اللي جهزهالها عماد وخرجت كتلبس جاكيطها بروينة وعاونها بلال وقفل الباب موراه … ناديا ابتلعت ريقها و بقات تلف باش تشرب عصير 
وليد(طوا جريدتو وشاف فيها واخفى ابتسامتو مين نتبه لعقدو على عنقها):- صباح الورد مزيانة ؟
ناديا(هززت راسها بدون متشوف فعينيه مباشرة):- أأأه بخير
وليد:- جيد جدا اتصل بيا البوس الصباح 
ناديا(بتوتر خفاتو):- اممم شنو بغا ؟
وليد(شاف فيها):- غادي نمشيو عندهم فالليل 
ناديا(بقلق):- علاش ياك شفناهم غير البارح ؟
وليد(شرب جغمة من فنجانه):- مقال والو غادي كينمشيو نعرفو 
ناديا(لمعو عينيها وشردت):- أوك 
وليد(شاف فتلعثمها وارتباكها وانزعج):- غادي نكمل قهوتي فمكتبي عن إذنك 
ناديا استغربت تصرفه الغريب وبقات كتشوف فيه وهو هاز فنجانه وجريدته ودخل على مرأى من عينيها وهنا طلعتلها السخانة ومعرفت مالو وناضت دافعة جنونها قدامها مطرقت لا باب ولا والو دخلت عليه المكتب 
وليد(شاف فيها باستغراب):- باغية شي حاجة ؟
ناديا(بنرفزة):- واش أنا درت شي غلاط باش تعاملني بهاد الشكل ؟
وليد(بيأس):- لا مدرتي والو 
ناديا(ربطت يديها):- وقيلة من اللي وقع لبارح بغيت نعتذر منك مكنتش فوعيي ومعرفت شنو كنت ندير 
وليد(وقف وجا مقابلها مقادرش ينطق):- شفتي فين كاين المشكلة هانتي كتعتاذري على شعور حسيتي بيه وانا مباغيش هاد الإعتذار باغيك متندميش على أي حركة أو أي تصرف معايا ،، تتت لاحظت ارتباكك صباح مكتشوفيش تافعينيا وكأنك رتاكبتي شي معصية لا تغتفر صحيح اللي درتيه غلاط فحق مجد برغم أنني معارفش سبب انهيارك بداك الشكل لكن ..
ناديا(قربت منو شاردة فيه وهيا كتسمعلو بتمعن):- لكن شنو ؟؟
وليد(عرف أنه لا جدوى مالحديث):- سيري رتاحي أناديا أنا عندي شي شغل نقضيه 
ناديا(نزلت عينيها بوهن وشافت فيه بضعف لكن خرجت):- عن إذنك 
خلاها مشات مشدهاش ولا قدر ينطق بأي حااجة لذلك كان الصمت بيناتهم فديك اللحظة كيف الدوا على الجرح .. 

خديجة(كالسة دايرة نظاظرها فالصالون كتقرا جريدتها وبدون متعلي راسها):- متقولش صباح الخير ؟
علاء(فتح أزرار جاكيط كوستيمه وتقدم عندها بتثاقل):- صباح النور أماما ديزولي مضطر نخرج عندي جدول حافل بالعمليات اليوم ومنقدرش نتعطل عليهم 
خديجة(حيدت نظاظرها وحطتهم فحجرها على الجريدة):- كلس باغية نكلمك 
علاء(عارف غادي تسمملو قلبو بجوج جملات من حديثها الجارح):- عفاك اختاصري أماما 
خديجة(شافتو كلس ومتصت نرفزتها وبصعوبة نطقت):- أنا فكرت مزيان و ديت وجبت من عدة جوانب و تاخذت قراري بخصوص موضوعك اللي فاتحتنا بيه لبارح 
علاء(مبتلع ريقه وتنهد بصعوبة كيشوف فالأرض):- إيوا ؟؟
خديجة(شافت فيه بمكر وبدلت شوفتها لنظرة طيبة):- أنا وافقت نتعرفو على البنت ويلا كانت كيف كتقول خلوقة وتستاهل التضحية فشكون أنا اللي نوقف ضد رغبة ولدي 
علاء(ممصدقش وبقا كيشوف فيها بعدم تصديق):- ماما ماما نتي مكتهدريش من نيتك ماما عفاك الموضوع مأزمني فرجاءا إيلا كتضحكي قوليهالي ؟؟
خديجة(ضرباتو للكتف):- ياك دبا أنا وليت كنضحك عموما قبل منبدل رأيي خبر البنت باش يوجدو راسهم منا لآخر الأسبوع نمشيو عندهم فزيارة تعارفية
علاء(بفرح الدنيا):- ياااااااااه والله أماما فرحتيني بزااااااف لهلا يحرمني منك أكيد ليلى غادي طير بالفرحة وغادي تحبيها أنا وااااااثق 
خديجة(شافتو باسلها يديها وربتت على ظهرو):- يالاه سير قبل متتعطل على خدمتك نستناوك على الغدا ونزفو الخبر جميع لخوتك وباباك 
علاء(كان ماشي وبالفرحة رجع باسلها راسها وخرج كيطير):- كنموووت عليك يا أحلى أم فالدنيا 
خديجة:- الله يرضي عليك أحبيبي
أنور(سمعها وجا عندها):- كيصرالك بدلتي رأيك بين يوم وليلة ؟
خديجة(ركبت نظاظرها وهزت جريدتها بلا مبالاة):- درت بنصيحتك فقط 
أنور(مستغرب وحاس بالخوف والقلق):- مراكيش دبري لشي حاجة أنا معنديش بيها علم ياكي ؟
خديجة(بتلعثم):- آشمن حاجة تانتا واش أنا مصدر مشكلات فهاد الدار اللي درتها كتستغربو منها ؟؟
أنور(كالس أونفاص ليها وكيشوف فيها متوجس):- محيت عارفك مكاترضايش بسهولة وموافقتك على موضوع علاء مبعد مدرتي عوارض رفض كيخليني نشك 
خديجة(شافت فيه من فوق نظاظرها):- هني راسك مكاين والو غير بغيت نفرح ولدي حبيبي بلاما نكون أنا والزمان عليه
أنور(ربع يديه):- وهاد الحنية كلها مين طاحت عليك ؟
خديجة(طوات جريدتها):- لو سمحت باغية نكمل هاد المقال شوف شنو دير 
أنور(ناض):- كنطلب الله متديريش شي مفاجآت اللي يخليوك تخسري كلشي دقة وحدة
 خديجة ريشتلو بيديها باش يمشي وغي شافتو خرج دارت ابتسامة خبيثة وتفكرت حديثها معاه بعدا ليلة أمس مين قالها خصك تكسبي ولادك ماشي تكوني عدوتهم لأبد الدهر وتعلمي تفهميهم ماشي تعارضيهم فكل حاجة وهيا دارت بنصيحتو مع تغيير بسيط فماهية الأمر محيت قررت تجبر ليلى بنفسها تآنيلي هاد المهزلة كلها ومتخسرش ولدها والعيب جا من دار العيب وطبعا هيا بعيدة كل البعد … آه يا خبثك أخديجة وعلاش مساكين غادي تعذبيهم هاكدة علاش هففف على هاد الأمهات مقديتلهمش محيت وحدة شبيهة ليها فعدة أمور كانت محبوسة فبيتها كالسة كتستنا قدرها .. تا سمعت الباب تنفتح بالساروت وبدون نفس شافت فيه وهو داخل عليها وفيده كرطونة مربعة 
البوس(حط الكارطونة على طابلة منضدتها فين كانت كالسة بعدا):- شوفيهم وعطيني رأيك 
جميلة(بكره):- معنديش الكانة لهبالك
البوس(كلس مورها وبنظرة نارية):- شوفيهم 
جميلة(عينيها رتاجفو وشافت فالقابصة بعصبية وفتحتها وجبدت بطاقة دعوة مزينة بالورد ومكتوبة بشكل فني متقن وباللون الذهبي كانت أنيقة بزاف واستغربتها):- شنو هادي بطاقة دعوة لشنو ؟؟
البوس:- قرايها ونتي تعرفي 
جميلة(عاقدة حواجبها):- يسرنا ويسعدنا دعوتكم للإحتفال رفقتنا في حفل الزفاف الأسطوري لوليد الجوهري وناديا معتصم يوم 10 - 6  هئئئ نهار عيد ميلادها باغيهم يتزوجوو مشايفش أنك كتدخل فقرارهم الشخصي ؟؟
البوس :- امممم بورفيكت داي علاش لا ومشايفش تاشي داعي للتأخير 
جميلة:- إيلا ناسي كاينة عدتها 
البوس:- منا لتما تكون كملت راني ضربت الحسبة 
جميلة:- أهاه ؟؟
البوس:- ههههه حملها من وليد جا فالوقت المناسب والراجل من حقو يتزوج بأم إبنه 
جميلة(بمرارة تفكرت الماضي):- تصدق أنا فرحانة لبنتي بعدا ع الأقل غادي تسجله بسمية باه الحقيقي ماشي بسمية شخصيات مجهولة الهوية ومكايقربولهاش تا 
البوس(اختفت ابتسامته):- جميلة صفوان هاد الكيان اللي كتشوفيه حداك صحيح ظالم وقاسي لكن كنفكر وعندي مخ يوزن بلاد وصعب على غبية بحالك تفهم تفكيري وقراراتي اللي كنتاخدها 
جميلة(جمعت القابصة):- صراحة ممستعداش نكتشف يكفي اللي عرفتو منك هادي سنين وتجرعت معاه المرار
البوس(شاف فيها مليا):- ماشي كاع أيامك كانت سودة 
جميلة:- ههههه عفاك باغية نرتاح قبل ميجي الليل ونوجد راسي لاستقبال بنتي العزيزة وصهري المستقبلي
البوس(جر القابصة بين يديه وشاف فيها):- كاسرة المود الجيد هيا نتي أففف رتاحي 
جميلة غي خرج نفجرت بالبكا والقهر والحكرة على كاع اللي فوته عليها هادي سنين وباقي للآن موريها الويل ..تا عيسى مسكين مسلمش منو كيرجع خبرها أنه لو تدخل فالموضوع مجددا غادي يصفيه ويخليها تحمل ذنبو فرقبتها وهاد المرة فاتت لأن وليد تدخل والراجل فعلا خاف على حفيدتو ووافق يسكت وطبعا هوا معارفش أن عيسى اتاخذ قراره اللي غادي ينفذه فعيد ميلاد ناديا إيلا مخبروهاش ووفاو بوعدهم ليه ..

علاء:- أحلى صباح لأحلى ليلى فالدنيا 
ليلى(حست بارتياح):- يامحلاه صباح أعلاء خير مالك على هاد النشاط كلووو ياكما اللي فبالي هو هاداك ؟
علاء:- كلها يامات ونكونو عندكم فالدار أنا وعائلتي اللي وافقو يجيو فزيارة تعارفية إن شاء الله 
ليلى(عينيها تغرغرو بفرح):- واوو على خبر شحال زوين يا الله متعرفش شحال كنت متوترة ليلة كاملة منعستش
علاء(استغل الموقف):- يا إلهي كاع هادا عشق ليا ناري ناري سعداتي
ليلى(حشمانة):- همممم نتا مليح الواحد ميحكيلكش مشاعرو اللحظية 
علاء:- لالا غير كنضحك معاك أحبيبتي علاش باغية تحرميني وانا مقلت باش هداك الله ودرتي عقلك
ليلى:- هيا أنا كنت مجنونة
علاء(بتفكير مضحك):- وا الصراحة وبلا كذوب آآآآه كنتي مجنونة وربي قبل دعواتي معاك
ليلى(مبتسمة):والحمد لله هاداك مبغينا غير تكون راضي علينا 
علاء:- راضي والله وحده اللي عالم أجي طمنيني على عمي عيسى كيفو اليوم ؟
ليلى:- وشا نقولك أعلاء عمي عيسى تبدل ولا كاع وحداخور مبقا لا يكلس معانا ولا يهدر بزاف غير مطرف فبيته واللي مشا عندو كيطرده بأي سبة لقاها ولا ختارعها مهم مفهمنالوش 
علاء:- متنسايش سنو شوية كتخلي تفكيره يتبدل عطيوه شوية وقت وغادي يرجع كيف كان وأحسن
ليلى(بتمني):- ع الله أعلاء وناديا بالها مشغول عليه بزاف وهو كيتحاشاها بالمعقول 
علاء:- ويمكن الشي اللي واقع معاها مأثر على نفسيتو وكيف كنقولك يومين وغادي يرجع لحالتو الطبيعية
ليلى:- إيوا نتمناو يرجع محيت كاع منبغيوش عليه يستاهل غير الخير
علاء(سمع نداء بسميته):- أوك ليلاي أنا غادي نخليك دبا مضطر عندي عملية مستعجلة نرجع نتاصل بيك فالليل حبيبتي
ليلى:- أوكي ربي يعاونك أنستناك..
قطعت عليه وبقات شاردة فالتفكير وابتسمت وهيا تهز تليفونها تزف الخبر لمريم اللي كانت فدوشها ورامية التليفون فالبيت ، مريم كان فيدها اختبار حمل اللي دارتو الصباح و للأسف طلع سلبي مسحت دموعها وخباتو فالقجورة تحت الفوطات وخرجت ترد قبل ميجي ابراهيم يقلب عليه وتتحرج من معرفتو بالموضوع اللي ولا موترها بشكل كبير وواضح ..
مريم(مسحت دموعها وتنفست بعمق عاد ردت بابتسامة):- أمدرا مال الزين مصبح علينا ؟
ليلى:- أشمن مصبح راه العشية هادي مال الوقت عندك تخربق 
مريم:- مديش عليا راني مدوخة هاد النهار غي قبيلة صونيت لماما سولتها على جدي عيسى 
ليلى:- واش مغاديش دوزي هنا العشية نشربو كاس أتاي ؟؟
مريم(بتعب روحي ونفسي):- أ لالا عندي مايدار فالدار تالمبعد ونضرب عليكم دورة 
ليلى:- ونتي وخاطرك أختي أنا كان فبالي نزفلك الخبر مي مين مبغيتش تجي معندك نصيب
مريم:- آشمن خبر اللفعة ؟؟؟
ليلى(لسانها كلاها ومقدرتش تزيد تسكت):- عائلة علاء غايجيو عندنا يزورونا فأقرب وقت متصوريش شحال راني فرحاااانة يامريم زعما أخيرا حلمي غايتحققلي ؟؟
مريم(فرحانة ليها مقلبها):- يتحقق أحبيبتي وعلاش لا نتي تستاهلي كل الخير وعلاء ولد الناس وربي يجمع بيناتكم إن شاء الله ياربي 
ليلى:- أمين يااااربي مهم شوفي غدا خصك تجي ونهدرو فالتفاصيل كلها صافي ؟؟
مريم:- صافي غدا راني عندكم يالاه خليلي الموضوع ساخن تانجي وناكله بلا خبز 
ليلى:- ههههه صافي مشات يلاه حبوبتي سلميلي على خويا العزيز
مريم(ابتلعت ريقها):- يوصل الحبيبة ديالي سلام ..
قطعت ليلى اللي محستش بتاتا بدمعة مريم الحارقة وآهاتها الموجعة كلست على كرسي مرايتها وبقات تشوف فراسها بحزن وهيا مقادراش تبتلع ديك الغصة زعما علاش مصدقش حمل هاد المرة مع أنها حسبت وتأكدت من حدوث العلاقة .. شهقت بعمق ومسحت دموعها كتحمد الله على كلشي مهما كان كيبقى قدر ومكتوب عليها تصبر .. دخل عليها ابراهيم ولقاها حزينة بداك الشكل واستغرب صحابلو كاع آش واقع
ابراهيم(جبدها ميدها وقفها عنده):- روحي مالكي ؟
مريم(كتحاول تصطنع الضحكة):- لاوالو احبيبي غير راني مقلقة على جدي عيسى شي شوية 
ابراهيم(خداها فحضنو):- ياعمري أنا راه غايكون مليح غي خصو يرتاح هادا مكان 
مريم(كتبكي بحرقة لكن كتهدر):- آه إن شاء لله
ابراهيم(حس بيها وشدها مخصرها وهزلها فكها تشوف فيه ولقا دموعها وتوجس):- مريم الموضوع مكيخصش غير عمي عيسى قوليلي أحبيبتي شنو واجعك ؟
مريم(تلعثمت وفمها رتجف):- مكان والو ابراهيم غير هادشي
ابراهيم:- غاتكدبي على برهومتك ؟
مريم(انفجرت بالبكا مسكينة وترمات فحضنو):- اهئ اهئ 
ابراهيم(بقلق فعلي زير عليها وكلس على السرير وكلسها فحجره كيمسحلها دموعها):- حبيبتي صارحيني شنو زاعجك
مريم(بقات مزيرة على عينيها وتشهق بألم متقدرش تقوله هادشي اللي كاويها):- هئ والو أبراهيم والو
ابراهيم(حل شفتيه بترجي وبؤس عليها):- مريم تكلمي 
مريم(شافت فيه برجاء وشهقت مابين دموعها وعينيها فعينيه):- شحال وحنا مزوجين أبراهيم و لدابا موقعش حمل 
ابراهيم(عقد حواجبه قبل مينفجر بضحكة كبيرة):- ههههههههه متقوليليش كتبكي لهاد السبب ودايرة كاع هاد الدراما عليه يا حبوبتي ياانا مالك مقلقة راحنا عاد فبداية زواجنا والعمر قدامنا مزال علاش كتفكري وكأن الحال مشا علينا 
مريم(كتسمعلو بتمعن ونزلت شفتيها بحزن):- بغيت بيبي نهزو فكرشي ونحس بيه كيكبر يوم بعد يوم بغيت بيبي نواعده بحياة رائعة ونديرو فعينيا ونهزو بين يديا بغيت قطعة مني ومنك ثمرة حبنا أبراهيم واش بزاف عليا نحلم بهادشي اللي موقعش للآن وشهر مبعد شهر كنستناه بلهفة وشوق مي للأسف كنتخذل اهئ اهئ
ابراهيم(كيهدهد فيها):- ياروحي كاع هادشي هازاه فقلبك ومتقوليليش مي معرفت شنو مطلوب مني ندير باش نخليك تبتاسميلي من جديد ؟
مريم(ابتلعت ريقها):- نمشيو للطبيب نشوفو سبب التأخير 
ابراهيم:- على بالك الطبيب غادي يضحك علينا يقولك مقلقين هاد الناس هادو 
مريم(بدلع):- ماشي شغلو حنا حرين وانا بغيت نهز ولدك بيني يديا حققلي هاد الحلم أبراهيم متصورش حالتي مين كنشوف غيري هازين بين يديهم وليدات صغار ولا عاد حاملين قلبي كيوجعني ونحس بالخنقة 
ابراهيم(كيمسحلها على شعرها بحب):- صافي نواعدك فأقرب وقت نمشيو للطبيب أنا وياك تانا مكرهتش شي كتكوتة تشبهلك باش كيتزعفيني نمشي عند بنتي حبيبتي 
مريم(بابتسامة وحلم الأمومة كيشعشع من عينيها):- هههههه
ابراهيم(شافها ضحكت وفرح بزاااف):- عمري نتي غير آمري وانا اللي فجهدي نديره باش نوفيلك مكاتمناي ليه شكون عندي أنا من غير دلوعتي 
مريم:-دبا عاد حسيت بالراحة مين شاركتك هاد الحاجة كانت مثقلة على قلبي بزاااف 
ابراهيم(قلبها على السرير وجا ناعس بجنبها ويدها بين يديه):- ماليوم متخبي عليا تاحاجة وخا تكون قد النملة مفهوم ؟
مريم(مسحت وجهه بيديها بحب):- ناري شحال كنمووووت عليك
ابراهيم(قرب وجهه من وجهها يناغشها):- والله والله ؟؟
مريم(قربت بابتسامة):- والله 
ابراهيم(باس جبهتها ونزل لنيفها ونزل لشفتيها ببوسة حنونة):- نتي عمري نتي
مريم(حطت يديها على صدرها):- تسنا قبل متدخلني فدوامة العشق الأحمر بغيت نقولك آخر الأخبار
ابراهيم(باهتمام سارح بيديه على عنقها):- همممم قولي ؟
مريم:- دار علاء غادي يزورنا فأقرب وقت 
ابراهيم(توقف وشاف فيها):- أوااااه دغيا دغيا وليلى باقي تامكملتش عدتها ؟؟
مريم:- وتانتا مالك مدوخ راه عدة الخلع غير على عدة الطلاق الرسمي 
ابراهيم(تكا على يده كيشوف فيها):-وفاش تفرق أجناب المفتية ؟
مريم:- عدة الخلع فيها من شهر لشهرين وذلك حسب التوقيت اللي وقع فيه بمعنى خص تفوت دورة المرأة الخاصة وغير ذلك الطلاق الرسمي راه باين تقريبا 4 اشهر ووفحالة ليلى ختك مين حسبنا وسولنا الفقيه ديال الجامع والمحامي أكدولنا بجوج عدتها شهر واحد وصافي 
ابراهيم:- اممممم وزعما معندي منسالك دبا عاد فهمت وانا نعيييق شفت السيد مقلق قلت مالو على هاد الحالة سعا الناس ضاربين حساباتهم ولا يني مساخييييط
مريم:- ماشي مساخيط إنما باغيين فيساع يلتم شملهم وختك كانت خايفة عائلتو ميوافقوش 
ابراهيم:- ولكن قلتيلي جايين يتعرفو يعني ماشي خطوبة 
مريم:- وهاكا قاتلي ليلى وزيد الناس متحضرين يمكن من عاداتهم هاد الزيارات الأولى 
ابراهيم:- هيا حنا ولاد البارح يالالة بازلكم 
مريم:- أنا كنترجملك غي اللي قالت ليلى بالحرف
ابراهيم:- ومين راكي ترجمي ترجيميلي بعدا شي شعور خارج مالقلب باغي نتغنى بحبيبة قلبي أنا 
مريم(حطت راسها على يدو):- أنا أسعد وحدة اللي تلاقيت بيك أبراهيم
ابراهيم(عنقها بحب):- يخليك ليا أغزالتي 
مريم(شافت فيه بمكر):-إمتا نمشيو الطبيب ؟
ابراهيم:- اممم سناي نشوف غدا إن شاء الله غاناخذ ساعتين من الخدمة ونتلاقاك فالعيادة 
مريم:- أهاه وانا غادي نمشي قبلك بساعة باش نشد التور 
ابراهيم:- إيوا صونيلهم وشديلنا موعد من دبا باش غدا ميعطلوناش
مريم:- شكرا أبراهيم اللي كتساعفني 
ابراهيم(شافها ناضت وضربها لمؤخرتها بدلع):- باش تعاودي تشكريني مرة تانية 
مريم(كتضحك وحاطة يدها متوجعة):- آآآي وخا فيك دبا نرجعلك ألدب 
ابراهيم(تصاوب على السرير متكي كيشوف فيها):- أنا دب أنا دب وخا تاترجعيلي ونتفاهمووو 
مريم(شادة التليفون وكتضحك):- شتتتت خليني نتصل 
ابراهيم عض شفتيه وخلاها تابدات تهدر وناض لعندها فتحلها أزرار القميص وبقا يحيدولها بشغف وهيا كتهدر مرة بيد ومرة تردو لليد التانية ومفعفة وكتدفعو لكن مابغاش يبعد ومقالت باش كملت المكالمة وغير أنهتها قبل متغوت عليه طار على شفتيها بقبلة طوووويلة خلاتها تذوب بين يديه كي الزبدة البلدية ههههههههههههه ^^

زكية:- عفاك أسي ياسر عفاك عمرني مطلبت منك شي طليبة تالهادي 
ياسر(خارج للجردة برفض تام):- ممنوع أزكية وماللول كنت واضح معاك
زكية(تابعاه وكتضرب فصدرها بلهفة وشوق):- والله 5 دقايق منفوتهاش عفااااك أسي ياسر 
ياسر(التفت عندها):- قتلك حيدي ديك سي ياسر كتحسسني بحالي راني فشي مسلسل أسكندراني 
زكية(ابتسمت بخفوت):- ههههه ولكن أنا توالفت دبا نعيطلك بيها 
ياسر:- معليش ريكلي لسانك باش مينطقهاش وترجعي توالفي مجديد
زكية:- وخا وخا لكن فرح قلبي وقولي أنك وافقت والله سي جعفر مغاديش يعرف هاه بيني بينك
ياسر(كمش عينيه وشاف فيها):- متعيايش من الزن يالطيف وكان جيتي نحلة وكان فعستها بين يديا 
زكية:- امممممممممم 
ياسر:- صافي متعوجيش عليا شنايفك و5 دقايق متفوتيهاش شدي التليفون 
زكية(بفرح):- يخليك ليلي أسي ياسر
ياسر(شاف فيها وهزز راسو بيأس):- شدي 
شدت عليه التليفون بلهفة وشوق لسماع صوت مها ربيعة اللي كانت كالسة شاردة فالحوش وحداها عيشة كتنقي العدس 
ربيعة(شافت فعيشة):- وا الطرشة تي حيدي داك العجب مودنيك وروحي جيبيلي البورطابل مالكوزينة راه يصوني
عيشة(حطت الكيتمان):- هاه وشا قلتي ألالة ؟؟؟
ربيعة(بتأفف):- علاي الطرش سيري جيبيلي بورطابلي راه فالكوزينة فيساع 
عيشة(بحالي حلت شي لغز):- أراه يصوني ألالة
ربيعة(باغية تنتفها):- يا فطامتك أختي كيصوني تي سيري لانوض نجمعك بيك بعدسك 
عيشة(طارت تجيبه):- هانا هانا جايباه (مشات وجات) هااااه شدي 
ربيعة(بتفتيفة):- مين يردو وطايلي وهاتيهلي 
عيشة(وطات فالخضرة):- هانتي ردي 
ربيعة:- صافي نهدر ؟؟
عيشة(حطاتولها فودنها):- واه ألالة هدري هدري 
ربيعة:- ألووو ..
زكية(عينيها تغرغرو بالدموع):- مَّا 
ربيعة(قلبها نتفض وقوست حواجبها ببكية شوق وتوحاش):- زكية حبيبتي بنتي عمارة قلبي توحشششششتك أبنتي كيراكي وفين راكي ياكي ياليهودية كاع هاد اليامات تفوت ومتسوليش على مك تا بالتليفون نسيتيني ؟؟
زكية(مسحت دموعها بابتسامة):- لا أمَّا منسيتكش غير مكنتش قادرة نصونيلك ونتي عارفة الظروف مهم خليني مني وطمنيني على صحتك كيراكي ؟
ربيعة:- خليتي بيا يا بنت كرشي أنا راني لاباس بصح حاسة باللي حاجة واقعالك مخوفاني  
زكية(بمرارة كتحاول تخبيها):- مَّا أنا فداري دبا وفرحانة فحياتي وراجلي ههه كيعاملني مزيان و مهنيني فعلاش غادي تحسي بالخوف عليا ؟
ربيعة(مقادراش تخبي شعورها):- معرفت أبنتي كاع مين قلتي كيعاملك مزيان هاداك مبغينا 
زكية(كتلفها):- كيراه بَّا والمسخوطة نتاع عيشة ؟
ربيعة:- بَّاك بَّاك مابيه ماعليه وعيشة راها قدام ودنيا حابسة الهوى عليا باش تصنت 
زكية(ضحكت):- هههه وسلمي عليها وشوفي بلاما تقولي لبَّا راني صونيت راكي عارفة غادي غي يزعف علاش مصونيتلوش صافي أمَّا أنا خصني نمشي دبا تهلاي فصحتك ودرك نعاود نعيطلكم 
ربيعة:- وخا أبنتي وخا أنا غادي نستناك وتهلايلي فراسك وكولي مليح متسمحيش فصحتك 
زكية(بابتسامة حزينة):- تهلاي فراسك أمَّا بسلامة عليكم 
ربيعة:- بسلامة أبنتي بسلامة (باست التليفون وعطاتو لعيشة تطفيه وهيا تبكي)
عيشة(طفات وضحكت):- ودركا مالنا على هاد البكا ياك طمنتي عليها وسمعتي صوتها ؟
ربيعة(كتمسح بمشوارها نيفها ودموعها):- هأهئ بنتي عزيزتي توحشت نشوفها ونشم ريحتها ونمشطلها شعرها آآآه
عيشة:- هاوا شعري مشطيه ويلا على الريحة نلبس كسوة من كسوتها غي نتي ضحكي ألالة ربيعة ولله منبغيك تكوني زعفانة ومكسورة هاكدة 
ربيعة(مسحت على وجه عيشة بحب):- نتي عارفة معزتك فقلبي كيدايرة منهار دخلتي هاد الدار حسبتك كي بنتي الله يبيض سعدك ونفرح بيك تانتي 
عيشة(نزلت راسها بحشمة):- لا ألالة نتوما كيوالديا وبغيت نبقا معاكم منتزوجشش 
ربيعة(عقدت حواجبها):- تي واشا راكي تكولي بغيتي بَّاك سيدك يكطعك ومزيان معندناش حنا البنت تقول منتزوجشش يالاه نوضي بعدسك للكوزينة نقيه وخليني نعقل على صوت بنتي 
عيشة(هازة صينيتها وتبلبلم تحت فمها):- هممممم
ربيعة(حمرت فيها):- ونسمعك حليتي فمك قدام بَّاك سيدك على اتصال زكية نتفاهمو راها قاتلي بلاما يعرف
عيشة(وصلت للكوزينة):- كوني هانية ألالة منهدر ميهدرني هاااااه 
ربيعة(بحلوف شراني):- غادي نشوف العقرب 

ياسر(شافها حاطة التليفون على صدرها ومعنقاه وكتشوف فالبحر):- كلمتيهم ؟
زكية(فاقت من شرودها وشافت فيه):- آه الحمد لله هوما بخير 
ياسر:- طبعا وصيتي ماماك باش متجيب خبر للبوشتاوي ؟
زكية(هززتلو راسها بإيجاب):- أكيد هاديك آخر حاجة قتهالها وعليها قطعت 
ياسر(بملامح مطمأنة):- مزيان 
زكية(شافتو كيشوف فيها وهززتلو حواجبها باستفسار):- شنوو ؟.
ياسر(بابتسامة):- تليفوني محتجز وقيلة 
زكية(مفهمتش كلامو ورجعت تكاكات بضحكة بلهاء):- آآآه آه ديزولي هاك وشكرا بزاف اللي سمحتلي بالإتصال
ياسر(شدو عليها):- على الرحب والسعة 
زكية جات تنحنح باش تمشي من قدامو من جهة اليمين وهو بغا يبعدلها على الطريق ورجعت بغات تجي اليسار وهو جا كذلك يديرلها الطريق تاتوقفو من جديد وضحكو من هاد اللقطة وهو ريشلها بيدو باش تفوت وهي دارت شعرها مور ودنها بخجل وشافت فيه ومبعد نزلت عينيها ومشات من قدامو ..هو تنفس بعمق وصوت خلخالها اللي فرجليها كيرجعو لليلة عمرو مينساها فحياتو وهيا الليلة اللي لبستلو ناديا لباس رقص ودارت خلخال فرجلها علاش مكيقدرش يتحمل داك الصوت من زكية مي فالآونة الأخيرة ولا مؤنس بالنسبة ليه وتوالفه وولا كيلقا راحته مين يسمعه وكأنها أجراس جاية من الزمن الجميل كطمنو أن الجاي أحلى من اللي فات والله كبير ، برغم أن صوتها مزال كيرن فودنه لما اتاصل بيها باش يخبرها عن موضوع عيسى وتهديدهم ليه طبعا مبغاتش على جدها يوقعلو هادشي ولا يدخل فهاد الدوامة وذكرت ياسر بوعده ليها مين طلبت منو يحمي عائلتها من اللي جاي وطبعا اشمئزت لأن وليد مجددا هو اللي كيرجعه لحضنها ماشي ياسر..
~ ياسر كيتفكر المحادثة ~
ياسر(تنهد بعمق):- آه مجددا هو اللي كينقذلك جدك أناديا فرحي عندك خطيب كيطير العقل
ناديا(بتأفف حكت على جبهتها):-ياسر إيلا مملاحظش داكشي اللي كيوقع دايما وليد اللي كنلقاه فأحلك ظروفي ودبا مكان لاش نطرقو لهاد الموضوع اللي بيني وبينك … انتهى بمرة نتا دبا مستقر معا مراتك زززكية وانا كنبني لحياتي معا وليد
ياسر(بسخرية مريرة):- آه صح الله يخليهالي ويخليه ليك 
ناديا(عينيها تكومو بالدموع وحطت يدها على فمها مي قوات راسها):- صيفطلك فالموقع الحوايج اللي لقيت ومعارفاش واش غايفيدوك أو لا ودبا مضطرة نمشي سلام
ياسر(شد قبضة يده مشتااااق بجنون):- سناي نادياااا
ناديا(زفرت بحرقة):- نعم شنو تاني ؟
ياسر:- تهلاي فراسك 
ناديا(شادة التليفون بين يديه ومغمضة عينيها بألم):- رجاءا متدخلش فحياتي نتهلا فراسي منتهلاش فراسي داكشي سوقي فمتدخليش فيه وسير اهتم بمرتك اللي خصها اهتمامك أما أنا فكاين اللي يهتم بيا كما يلزم 
ياسر(بانفعال):- طبعا مستر وليد اللي مسيطر على كلشي 
ناديا:- آه هو والحمد لله بعدا وقتما احتاجيتو كنلقاه بجنبي عكسك أياسر عككككسك 
ياسر:- نتي باقية كتبغيني نتي باقية ليا بوحدي أناديا متضحكيش على راسك لوكان مكتعشقينيش وكان مكتلومينيش تالهاد الدرجة هادي وباقية متألمة لحد الآن نتي ملكي بوووحدي
ناديا(ضحكت):- تصفيقات حارة عندك الخيال شاسع أنا بطلت نفكر فيك حتى ولولا هاد القضية الشائكة بيناتنا مكنتش غادي نتواصل معاك نهائي لأنك آذيتني بأفظع الطرق
ياسر(بعصبية وصوت عالي):- ونتييييييي ونتي اللي كتلوميني مآذيتينيش ونتي معاه فاليخت مآذيتينيش وهو كيقولي عندها خانة فكرشها وكانت ليلة تحفة بيناتناااا بشنو باغياني نحس أناديا حطي راسك محلي
ناديا:- آه حطيت راسي محلك وبالمناسبة عشت اللي حسيتو مين سمعت بخبر زواجك يعني تعادلنا 
ياسر(بتأفف):- واش كتسمعي رااااسك شنو كتقولي 
ناديا(بعصبية مماثلة):- حناااااا تطلقنااااااااا أياسر تطلقنااااا وانتهى كلشي آه اللي بيناتنا كان عظيم بصح عندو وقت انتهاء الصلاحية وانتهى لذلك يفضل متطرقش لهاد النقطة هادي لأنها بالنسبة ليا انتهت وولات مالماضي مفهوووم ؟
ياسر(باغي يقتلها بصح تكون فحضنه):- مفهووم ناديا هانم الله يعاونك
ناديا(بتأفف):- سلالالالالالام
تفكر هاد الذكرى هادي وتذكر عصبيتها وصوتها المرتعش وبقا مرة يبتسم مرة يحزن ومرة يشرد ويحلم بالمستحيل..

~ أحلى من عينيكِ ما رأيت و أشهى من شفتيكِ ما تذوقت و أبهى من نبضاتكِ ما عشقت يا سكرة العمر ~
كتبها فورقة مقطعة على شكل قلب وحطهالها على السرير وخرج برا السويت اللي حاجزينو .. هيا مبعد مدة خرجت من الدوش لاوية على جسمها فوطة وعلى شعرها فوطة أيضا قلبت بعينيها مشافتوش وانتابهت لداك القلب وقربت منو بابتسامة وقرات هاد الكلمات الرقيقة وعضت على شفتيها المتورمتين من داك العشق الجارف اللي وقع بيناتهم فالدوش وهزت تليفونها رنتلو وهيا فيدها ديك الورقة عاد 
هيلين:- فين هربت ؟؟
جاد(فحالة وله جنونية):- سوربرايز 
هيلين(بنظرة مغرية مبتسمة):- امممم كتخبي عليا ؟
جاد:- ومخصكش تعرفي باش تبقا سوربرايز 
هيلين:- طيب تالفوقاش نصبر نتا عارف صبري محدووووووود
جاد:- آه يا عجينة يديا واش عاد غادي تخبريني لذلك لبسي أحلى ما عندك اليوم غايكون سبيسيال 
هيلين(عينيها برقو):- هيا شي سهرة دايزها الكلام 
جاد(كيضحك):- كاع متجبديليش لساني لأنه إلى خرج غادي يطير على شفتيك بشغف وحنا مباغيينش نضيعو المفاجأة
هيلين(ضحكت من دعابتو السافلة):- هههه أوك أوك اتفقنا 
جاد:- ساعتين يقدوك ولا غادي تاخدي كتر ؟؟
هيلين:- امممم غادي نسرع باش يكونو أقل متلهفة للمفاجأة
جاد:- يا خبثك أوكي حبيبتي أنا نسالي شي أمور وندوز عندك 
هيلين:- باي روحي 
جاد:- باي يا روح روحي مواااح 
هيلين(ردت القبلة ع الهاتف):- مواااح
حطت الورقة على قلبها بابتسامة ورجعت شافت فالتليفون ودارت هاد الإتصال
وليد(بدعابة):- الناس علاش كتمشي لشهر العسل باش تنعزل على العالم وتعيش اللحظة معا شريك العمر
هيلين(عارفاه غادي يسمعها الكلام):- آه معك الحق لكن هادشي كيخص الناس اللي معندهمش بنت فسن حرجة وبايدوي مريضة وخصها الإهتمام 
وليد(حافظها):- ههههه  والله توقعتك غادي تحرفي الكلام على ساريتا عموما منكسرلكش المود اللذيذ
هيلين:- لوكان مباغية نطمن على بنتي كاع منسمعكش صوتي أمستر وليد 
وليد:- أوك مقبولة منك وبنتك في الحفظ والصوون نتي مامخلاياهاش فالشارع زعما راها معا أبوها ومرات أبوها المستقبلية همممم
هيلين(عوجت شنايفها):- أبوها مضمون لكن مرات أبوها عفاك متخليها تكون بعيدة عليها
وليد(حاسها باغية تطرطق من سيرة ناديا):- صافي ميكون غي خاطرك .. فينو السبع ياكما طفشتيه ؟
هيلين:- هيهيهي لا غير تهنا من هاد الناحية مطبوع عليه صك ملكيتي فور إيفير 
وليد(بخبث):- آه هادي عارفها ماشي جديدة
هيلين:- بأمارة الضربة اللي كاليها فوجهه ياك ؟
وليد:- هو قالك ؟
هيلين(بمياعة):- ميحتاجشش أنا عارفة أساليبك 
وليد:- هههههه يستاهلها 
هيلين:-المهم فين هيا سارة دبا ؟
وليد:- معا ناديا 
هيلين(حلت عينيها):- هادي اللي نكون على خاطري ونتا مخليها معا ناديا ياك أوليد ؟؟
وليد:- تهدني راهم كيوجدو راسهم للعشا اليوم غاديين عند جميلة وصفوان
هيلين(مستغربة):- وعلاش ياك عاد شفتوهم ؟
وليد(كيصاوب كرافاطته قدام المراية):- ونتي شغلك يالاه طمنتي على سارة كملي انعزالك معا جادك تالمبعد ونخليها تكلمك وتطمني عليها بنفسك
هيلين(بتذمر):- صافي صافي تانا مشغولة جاد موجدلي مفاجأة
وليد(ضحك):- هههه إيوا بالصحة والراحة باي باي 
هيلين:- بااااااي 
رمات التليفون على السرير وناضت كتتنهد بابتسامة راسماها على شفتيها وجبدت من دولابها فستان وسرحاتو على الكنبة باش تلبسه وبدات تجهيز نفسها لمفاجأة جاد اللي مزال مبانتش للآن .. وفين كان صاحب الإتصال الآخر كانت ناديا وساريتا واقفين بجوج عند المراية وسارة كتشوف فحركات ناديا وكتقلدهمش تا ضحكتها 
ناديا:- هههه يا سارة خليني نكمل 
سارة(لوات شنايفها بدلع):- باغية مين نكبر نولي بحالك 
ناديا(كتدير كحل لعينها):- كيفاش زعما ؟
سارة(كلست على المنضدة وبقات تحرك فرجليها):- أنتي راقية وجميلة و كلشي فيك مميز 
ناديا(شافت فيها وكملت العين الثانية):- يا سلام مي أنا غادي نقولك رؤيتي المستقبلية ليك 
سارة(باستغراب ذكي):- رؤية مستقبلية آهاااه شيء مثير للإنتباه واللي هيا ؟؟
ناديا(كملت وبلعت الكحل وشافت فيها وكلست بجنبها على المنضدة ديال المرآة وبقات تمسحلها على شعرها وتهدر):- مثلا غادي تكوني امرأة مستقلة متحررة الطباع ذكية وفاتنة الجمال غادي تكوني ذات مجال عملي دقيق ماربما مهندسة دولة قد الدنيا أو عالمة بكتيريا باقي متكونتش هههههه ماعلينا المهم يا سارة بغيتك تعرفي حاجة وحدة أن كلشي نابع من القلب حياتنا كلها كتدور حول الأحاسيس وفنفس الوقت خص العقل يكون الجبهة الأقوى لذلك أنا مخايفاش عليك محيت غادي تتفوقي على توقعات الكل وتكوني أنثى استثنائية يتخاطفو عليها قلوب الشباب وماربما المستفزين كذلك ههههه
سارة(كانت متبعاها باهتمام وغي دكرت المستفزين فهمتها وحمارت ووقفت متلعثمة):- هوووف يا ناديا أنا قدامي مشوار طوووويل حتى نوصل لتوقعاتك 
ناديا(برغبة في أنها معمرها تترك سارة وتكبر قدام عينيها شدتلها يدها بعيون مغرغرة بالدموع):- تعرفي شنو أمنيتي ؟؟
سارة(باهتمام بقات تشوف فيها وهيا ملاحظة غلالة دموعها):- شنو ؟
ناديا(مسحت على وجه سارة بحب):- نتمنى تكبري تحت أنظاري ونعيش معاك كل لحظة من لحظات حياتك 
سارة(شهقت وعينيها دمعو تاهيا):- نقدر نخبرك بسر ؟؟
ناديا(ضحكت باش تخبي دموعها):- ههه أكيد 
سارة(حطت يديها على وجه ناديا وقربت منها):- تمنيت لوكان كنتي نتي هيا أمي الحقيقية 
ناديا(حلت فيها فمها وعينيها مصعوقة وقلبها كينبض خداتها فحضنها):- ياروح قلبي 
سارة(بغات تخرج وتخرجها من هاد الحالة العاطفية):- هوووه أنقذوني لقد اختنقت 
ناديا(بعدت عليها وهيا كتضحك من دهائها):- ههههههه تعرفي خلينا نكملو توجاد راه باباك غادي يديرلنا محاضرة على هاد الروطار كامل
سارة(قفزت كتعاونها فتحضير الملابس):- هههه لالا مباغيينش حصص مناظرات يكفيني اللي كنعيشو فالمدرسة
ناديا(كتجبد من دولابها شي حوايج):- مخبرتينيش ديك ياسمين مازعجاتك اليوم ؟
سارة(تفكرت نظرات ياسمين ليها وتوعداتها السمية ودعم سامر اللي كان كيحامي عليها):- نننن لا أبدا 
ناديا:- رائع ويلا شفتي أي حاجة خبريني أحبيبتي 
سارة(بخفوت):- أكيد 
وليد كان واقف عند بابهم وكيسمع لحديثهم بمتعة حقيقية وشاف فالساعة ودخل حققلهم أمنيتهم فسماع موشح عن التأخير وبجوج بيهم شافو فبعضياتهم بتذمر أما هو كلس كيضحك عليهم ومن حالتهم المضحكة ، تجهزو أخيرا ومشاو متوجهين لفيلا البوس اللي باقي معارفينش سر استدعائه ليهم بهاد الصورة هادي وصلو وكانت جميلة فاستقبالهم واللي فرحت بوجود ساريتا وكذلك البوس اللي شاف فيها بغرابة لأنها فمقام حفيدته 
البوس:- ساريتا الجميلة .. رائع مين جبتوها معاكم فعلا مفاجأة زوينة 
جميلة(مستغربة حماسته وعاطفته المنعدمة واللي ستفاقت دبا وضحكت بخفوت):- هههه مدهش فعلا
البوس(شاف فيها وفهمها):- امممم طمنوني عن أخباركم 
وليد(شاف فناديا):- حنا بخير
ناديا(كانت كتشوف فيهم باشمئزاز مي مكتبينش وكتقرا ملامحهم المستفزة):-عادي 
البوس(موجه كلامه لسارة):- سارة باغيك تتعرفي على ريكس ورامون هادو ولاد ليندا اللي ولدت لبارح 
سارة(بلمعة فعينيها):- ياااه جروين صغيورين رائع غادي ناخذ طابليتي باش نلتقطلهم صور ياك معليش ؟؟
البوس:- طبعا صغيرتي .. فيديريكو انتبه للآنسة الصغيرة 
فيديريكو(شد يدها):- فعيوني 
وليد(بتنبيه):- متقربيلهمش بزاف أحبيبتي 
سارة(ماشية معا فيديريكو):- حاضر داد 
ناديا(جمعت يديها بتأفف كتشوف مرة فجميلة مرة فالبوس):- امممم مغاديش تخبرونا ولا حتى لمور العشا ههههههه 
البوس(شاف فيها بتساؤل وبعينين ماكرة):- وليتي حافظة السيستيم
ناديا(بتحدي فعينيه مباشرة):- ولووو من عاشر قوما 
البوس(هزز راسه ولمس تحديها وقوتها):- شايفك فحالة جيدة مع أنني توقعتك تكوني منعزلة فغرفة وكتبكي على الأطلال
ناديا(ابتلعت ريقها وهتزو حدقاتها ونزلت راسها):- … لارد
وليد(زفر بعمق):- معندو تاشي داعي هاد الحديث أسيدنا لأن اللي وقع طويناه وصار مالماضي
البوس(شاف فجميلة اللي عقدت حواجبها):-الماضي القريب
وليد(بانفعال):- شنو قصدك بهاد الحوار دبا ؟
البوس(بأرحية وبتسامة ونظرة لناديا):- والو غير مجرد حديث عابر
ناديا(وقفت):-أنمشي للحمام شوية ونرجع 
وليد(وقف ماشي معاها):- أجي 
جميلة(تامشاو):- وقيلة نتجاوزو هاد الأحاديث يكون أحسن بلاما نوترو الجو من أولها
البوس(كيضحك من عينيه وفرحان لاستفزازو):- هههه تانتي كنت باغي نعرف حاجة وعرفتها 
جميلة(بملل):- واللي هيا ؟؟
البوس(قرب من راس جميلة):- البنت بدات تميل لوليد 
جميلة(كمشت عينيها بكره):- يا اكتشافك العظيم
البوس:- مشفتيش نظرتها لوليد وارتباكها من التطرق للموضوع برمته 
جميلة:- طبيعي متبغيش تذكر اللي فات مشايفاش شي حاجة تؤدي لاستنتاجك العبقري 
البوس(باعتراض):- نننن أنا ماللول لمست حاجة بيناتهم خاصة ودبا الأيام تثبتلك صحة كلامي 
جميلة(بصوت خافت):- غير يبعدو منك أكيد غايكونو فأحلى وضع 
البوس ابتسم وهو كيشوف فيها ورجع شاف فجهة الكولوار المؤدي للحمام واللي كان واقف فيه وليد برا كيستنا ناديا اللي كانت حاطة يديها على حافة اللافابو كتشوف راسها فالمرآة وبتعب تنهدت غسلت يديها وخرجت 
وليد(يديه فجيوبو تقدم عندها):- نتي بخير دبا ؟
ناديا(هززتلو راسها):- خلينا نرجعو 
وليد(حط يدو مور ظهرها ممشيها):- طيب تفضلي 
جميلة(كيشافتهم جايين):- زييينب زيييينب 
زينب(جاية موراهم مبعد مكلسو فمواقعهم):- هانا ألالة العشا شوية ويكون على الصفرة ديالكم 
جميلة:- جيبي الصندوق اللي محطوط فمكتب سيدك 
زينب(ماشية بطاعة):- فورا ألالة 
البوس:- أتمنى تعجبكم مفاجأتي 
وليد(بتساؤل):- أشمن مفاجآة ؟؟
البوس(بابتسامة خبيثة):- غاتشوف 
زينب(جابت الصندوق وحطاتو بيناتهم على الطابلة نتاع الصالون):- هاوا 
البوس:- فتحه أوليد 
وليد شاف فناديا اللي شافت فيه باستغراب وجبده لعنده وفتحه وعقد حواجبه مستغرب وجبد بطاقة من الدعوات وبقا يقراها وهيا شافت تعابير وجهه ومدت يدها جبدت وحدة تانية وبقات تقراها وبانفعال مقدرتش تكتمووو 
ناديا(منرفزة):- مشايفش أن هاد الأمر خاص بيني وبين وليد؟
وليد(شاف حالتها وزاد استغرابو):- ناديا تهدني 
ناديا:- لا منتهدنش بأي حق تسمح لنفسك باش تختارلنا يوم زواجنا ؟
البوس(داير رجل على رجله وكيراقب فملامحها باستمتاع):- عادي أنا كبيركم وبانلي اليوم مناسب لذلك قمت باللازم 
ناديا(رماتها فبلاصتها داخل الصندوق):- عذبت نفسك لأن هادشي غايتم باتفاق بيناتنا 
البوس(باستفزاز):- ع أساس كيهمك تناقشي معاه فهاد الأمور 
وليد(رد البطاقة فالصندوق وبلهجة مبطنة تحذيرية):- بوس رجاءا ناديا عندها وجهة نظر وفبالها أن هاد الإختيار حاجة خصوصية خصها تكون بيني وبينها لكن أيضا أناديا البوس دارها مفاجأة وانا بالنسبة لي اليوم مناسب ومافيهش ضرر
ناديا(بانفعال وصدمة فيه):- مناااااسب أوليد هممم أكيد نتا فخبرك ماللول
وليد(متوجع من اتهامها):- لاء بحالي بحالك عاد عرفت
جميلة(باغية تلطف الجو):- عادي أناديا كيختارتوه نتوما كيختاره البوس 
ناديا(بألم شافت فجميلة):- لا ماشي عادي أجميلة هادي كيسميوها دخول الصحة ماشي يفهم موافقتنا على قراراتو العملية غايخوله أنه يتحكم فينا تا فحياتنا الشخصية 
البوس(صفقلها):- واووو ثورية نابضة بالإحتجاج لا وأكثر لامس فلهجتك لغة العصيان ولا غير كيتهيألي ؟
ناديا(بزفرة قوية وغضب):- عصيان ههههه متكونش تراجيدي بزااااف 
وليد:- يكفي أناديا مالك نفاعلتي هاكدة بالنسبة لي اليوم مناسب وخصوصا أنه يوم عيد ميلادك وبدون اقتراح مالبوس أنا كنت مفكر فيه سابقا 
ناديا(وقفت برفض واعتراض):- قتلك نتا فخبرك علاش كتكذب دبا وتبرر 
البوس(شافها ماشية):- وقفي عندك 
وليد(مباغيهش يقرب منها ولا يسيئلها بحرف ووقف مقابله):- خليني نتدبر الأمر 
البوس(شاف فيه ورجع شاف فيها):- اوك 
ناديا(تهززت وكملت طريقها خارج باب الفيلا ووليد موراها ووقفت عند الجردة):- مستحيل تقنعني أنك ممتافقش معاه
وليد(بيأس):- معنديش علم بيه بحالي بحالك عرفت منو الخبر 
ناديا(لمست فعينيه الصدق لكن بقات متذمرة وجاها البكا):- بأي حق يتدخل فهاد الموضوع بالذات مقادراش نقتنع 
وليد(بتأفف):- لوكان اقتارحتو عليك من تلقاء نفسي مكنتيش غادي ديري كاع هادي الحيحاية لكن مين هو مور الفكرة ثرتي وتعصبتي مع أنني ملاقيش سبب لهادشي كلو 
ناديا:- آه محيت جايك عادي يدخل فينا ويتحكم فأمورنا الشخصية كيف بغاااا ؟؟
وليد(قرب منها يهديها ولمسلها شعرها وبعدت لكن قرب وشدلها وجهها بين يديه):- ناديا ناديا سمعيني اللي كيهم أن الزواج هادا يتم فأسرع وقت على قبل مجد شوفي كرشك تالإمتا غاتقدري تخبيها منا لشهرين غاتكون ف  تقريبا 5 اشهر يعني وقتها العمى اللي مغاديش يشوف واش بغيتي عاد نزيدو نأخرو تايبديو التساؤلات ؟؟؟
ناديا(بتفكير منطقي فالأمر لوات شنايفها وشافت فعينيه القريبة منها):- طبعا لاء
وليد(مسحلها خدها بحنان وبابتسامة):- إذن غادي تمسحي هاد الفايس الحزين اللي راسماه ونرجعو لداخل وكأن شيئا لم يكن حركة البوس حاول بيها يساعدنا وخا متافق معاك مخصوش يدخل لكنو دارها دبا معندنا منديرو وزيادة على ذلك نفس الرغبة ديالي فعلاش غادي نأولو مشكلة من والو .. سووو شنو قلتي ؟
ناديا(صاطت بعمق ونزلت راسها الأرض ورجعت شافيت فيه كتهزز كتافها):- ساريتا اختفى صوتها خايفة يكونو كلاوها دوك الكلاب 
وليد(بابتسامة ضحك لأنها ولات لحالتها الطبيعية ونزل يديه من على وجهها):- هههه أجي نمشيو نطمنو عليها ومنها نتعرفو على البيبيز الصغار
ناديا:- ههه بالمرة نهديو لديك النفيسة شي كرامة لا ؟؟
وليد(شاف فيها بحب وشد يدو فيدها وتمشاو فالجردة):- هههههه مجنونة 
مشاو ولقاوها دايرة حالة فالتصاور معاهم وكان منظرهم رائع بزاف وهوما كيلعبو بجنب أمهم اللي كانت ناعسة على الأرض بسكووون ومتبعة حركاتهم وهوما كيتقافزو حواليها وسارة عايشة الدور بحال شي مصورة فجيوغرافيك آنترناشيونال هههههه ، سحبها وليد من ديك البلاصة سحب محيت لصقت ومسخاتش بيهم ودخلها لقا زينب حطت آخر طبق من أطباق المحضرة للعشاء وشاف فالبوس بطمأنة أن الأمور تسوات والبوس هنا شاف فجميلة وهززلها حاجبو بمعنى شوفي اللي قتلك بمجرد مهدر معااها رجعت لطبيعتها وجميلة شافت بتوجس فهاد الحالة اللي وقعت لكن قررت تأجل استفساراتها لمبعد .. خدا كل واحد فيهم موقعه وطبعا ساريتا كانت ملطفة الأجواء بشكل ذكي ومغري للحديث أما ناديا فكانت تتحاشا نظرات البوس المستفزة ليها ومخلية تركيزها فمجد وصافي خصوصا نظرة وليد اللي كان مرة مرة يرمقها بيها أن كلشي غايكون على مايرام طالما هوا معاها ..انتهى داك العشاء أخيرا ودخل وليد رفقة البوس لمكتبو وبداو يتحدثو فامور عادية حتى جبدله البوس موضوع العملية 
البوس:- أنا فحيرة من أمري أوليد خصني ضروري جعفر يستلم العملية 
وليد:- معرفت أبوس لكن مستحيل يوافق ونتا صعب تغامر فيها معا شخص مموثوقش 
البوس(داير يدو على فكو):- صحيح وهادا اللي مأرق تفكيري لأني باغي نرتب الأمور من دبا باش كلشي يكون جاهز
وليد(كيشرب قهوته):- وداك البوشتاوي ميقضيش ؟؟
البوس:- على قولة جميلة منأمنوش تاعلى سيارة يحضيهالي ماشي عاد على عملية غادي تقلب الموازين كلها فالسوق
وليد:- مشكلة فعلا 
البوس:- فنظرك جعفر مقابل شنو يقبل يدخل معايا فهاد العملية ؟؟
وليد(بمكر حل شفتيه):- مقابل شيء ثمين 
البوس:- وشنو هو الشيء الثمين اللي مستعد جعفر يتخلى على كلشي مقابله ؟
وليد(فهمه):- حب حياته جميلة 
البوس(بخبث):- جميييييلة طبعا 
وليد:- امممم فشنو كتفكر ؟؟
البوس:- باغي ندرس هاد الفكرة على مهل ونجيبها من كل جهة باش منتصادفش معا شي مفاجآت لأن الوضع خطير وميقبلش المغامرة يكفي غير فريق المحامين ديالي اللي بصعوبة قدرو يمسحو من ملف القضايا ديال قذارة الماضي 
وليد(شرب جغمة تانية):- امممم وضعك حساس ويلا وصل للبوليس هاد الأمر عتابر نفسك منتهي 
البوس:- عارف راسي تحت عينيهم حاليا لذلك كون هاني غادي نخلي جعفر يهز الليلة كلها وايلا صابت صابت ويلا خابت سي جعفر ينال شرف الحبس 
وليد(ابتلع ريقه مباغيش):- ههههه أكيد 
جميلة(كتشوف فسارة لاهية معا طابليتها وقربت من ناديا):- شايفاك ماشي على بروجك ياكما زاعجك وليد ؟
ناديا(فخاطرها بعدا ماشي كذاب بحالكم):- لا غير راني عيانة شوية وباغية هاد الزيارة السعيدة تكمل فيساع 
جميلة(شدت يد ناديا اللي قفزت وحست بارتعاشة فجسمها):- ناديا باغياك تطمئني أنا غادي نوقف معاك مهما كحالت الظروف ضدك
ناديا(مرتعشة وحيدت يدها من يد جميلة):- هني راسك معايا وليد 
جميلة:- أحسن حاجة هيا أنك تعايشتي معا الواقع حياتك معا ياسر كانت مدمرة وفالظلمة عكس حياتك معا وليد اللي غادي تكون فرصتك باش تنساي الماضي وتعيشي كيف كتستاهلي
ناديا:- عندك الحق الماضي ميستاهلش تانفكر فيه من كثر الأذى اللي جاني منو كرهته ومبقيتش قادرة نفكر فيه لأن فكرة وحدة كتجيني فبالي مين نجبده وهيا الإنتقام بصح للأسف مكايستاهلش 
جميلة(عاقدة حواجبها مفاهماش كلام ناديا المبطن):- ياسر آذاك فعلا ومزية هادا شعورك تجاهه 
ناديا(ضحكت اللي مفهمتهاش):- اممممم فعلا 
جميلة:- حب وليد بلسم استغليه وداوي بيه جراحك 
ناديا(بصدق مطلق):- تتت وليد ميستاهلش مني نستغله لمصالحي الشخصية هو يستاهل نكون صادقة معاه
جميلة:- آه ولكن …
وليد(خارج وموراه البوس):- نمشيو ؟؟؟
ناديا(هزت حقيبتها براحة):- أخيرا يالاه 
البوس(ريش للقابصة):- متنساوش الدعوات ديال عرسكم نبقاو على اتصال 
وليد(هز القابصة وتقدم للخارج في حين بقات ناديا تلبس جاكيطها هيا وسارة):- إن شاء الله 
جميلة(ربتت على راس سارة):- نشوفوك فعيد ميلادك 
سارة(بلمعة فرح):- أكيييد باي خالة 
البوس:- ناديا 
ناديا(نفضت شعرها بيديها فوق الجاكيطا وشافت فيه):- نعم
البوس(قرب منها):- انتبهي لنفسك 
ناديا(رتعش جسمها لكن قوات نفسها):- سلام 
مشاو من الفيلا أخيرا وفالسيارة بمجرد مطلعت سارة تكات فالكرسي الخلفي وغاصت فنوم عميق وفيدها طابليتها الزهري 
ناديا(شافت فسارة والتفتت للأمام):- نعست 
وليد(كيصوك):- عيات اليوم وزدنا عذبناها فالزيارة 
ناديا:- اففف وكان لقيت نوض قبيلة الجو تما خانق خانق 
وليد(مبتسم):- امممم من إمتا ونتي بهاد قلة الصبر؟
ناديا:- من الليلة 
وليد:- أوبس غير خرجيني من دائرة الإختناق وخذي راحتك
ناديا(بضحكة):- لا نتا بعيد عليها لأنك لو كنت فيها كنت هربت من الفيلا هادي شحال 
وليد(بلمعة فعينيه عض شفتو من الداخل عاد هدر):- صحيح هاد السؤال ديما فبالي كان قدامك فرصة الهرب مني هادشي شحال علاش مستغليتيهاش أو بمعنى أصح علاش مهربتيش ؟؟
ناديا(رتجفو عينيها ورتبكت):- وهو نتا كنت مخليلي فرصة نتنفس عاد باش نهرب 
وليد(شافها تماطل):- أخبريني 
ناديا:- شنو نخبرك دبا ركز فطريقك خلينا نوصلو بأمان
وليد(وقف فوسط الطريق بالسيارة ودار عندها):- باغي دبا نعرف
ناديا(ضحكت متهربة):- هههه والله موقت جنونك راه عندنا طفلة فالخلف خصنا نحطوها ففراشها 
وليد(قرب منها بإصرار):- قوليلي 
ناديا(ضحكت وعضت على شفتيها):- لأنك قدري اللي منقدرش نهرب منه
وليد(برقو عينيه بحب وعشق وقرب منها أكثر):-جواب دبلوماسي مانقدرش نشدو مليح 
ناديا(التفتت بوجهها بعيد عليه):- إذن اكتفي بيه
وليد(حط صبعو على فكها ودورها عند عينيه مباشرة):-شهرين وتكوني ليا 
ناديا(قلبها بقا يخفق بقوة وغمضت عينيها على ومضات من حياتها السابقة جتاحو تفكيرها):- وليد خذنا رجاءا
وليد(حس بيها لكن مقدرش يبعد قرب منها أكثر فأكثر):- نادياااااااا 
سارة(علات راسها بهذيان النوم):- واش وصلنا ؟؟
ناديا(ارتاجفو شفتيها اللي كانو شفتين وليد قراب منهم ومجتاحينهم بأنفاسو الملتهبة وأمراتو بعينيها باش يبعد):- بيبي قربنا نوصلووو 
وليد(عض شفته وبعد وشاف فسارة اللي رجعت نعست):- يعني قلة فين تسولي فوقاش نوصلو اخخخخخ
ناديا ضحكت لكن رجعت تنهدت بحسرة وآه على أحاسيسها المبعثرة معا وليد وايضا اللي كتحن لحب اجتاح كيانها بالمجمل 

هيلين(راجعين للسويت ديالهم وهيا كتضحك فحالة سكر):- ههههه جاد شفت هاديك الراقصة اللي تحلها الحزام ديالها واو على لقطة هوليوودية بالمعقول 
جاد(تاهوا كيتمايل):- ههههه لا والزينة مين وقفت ربطاتو من جديد وكملت رقصها فعلا أمر لا يصدق 
هيلين(وقفت بفستانها القصير وكعبها العالي متكية على حيط سويتهم وجاد كيفتحه):- أسسسسرع مقادراش نتحمل
جاد:- هششش لحظة بيبي 
هيلين دخلت للسويت وجاد موراها اللي قفل الباب والتفت عندها وهيا رمات كعبها وقربت منو بشراسة قبلاتو بعنف فشفتيه و هيا كتحيدلو جاكيطو بحرارة 
هيلين(من بين قبلاتها كتهدر):-هادي للمفاجآة ديالك بيبي استمتعت بزاف بالسهرة 
جاد(كيفتحلها سنسلة فستانها وهيا فحضنو بشغف وشوق):-ياروحي نتي ايامك كلها معايا غاتكون بهاد الشكل 
هيلين(وقفت وشافت فيه وهو كينزلها فستانها):- وييييل إذا كانت هاكدة يبقى خسارة العمر اللي فات بدونك
جاد(بشغف شاف فيها وهيا كتحيدلو قمجتو وترميها على الأرض باسها):- يا شعلتي كنموووت عليك
هيلين(عضت شفتيها):- انت نااااري 
جاد(رماها على السرير وانحنى لوجهها):- وانتي لهيبي 
غاصو بجوج بيهم في بحر الهيام والغرام وفهاد الأثناء كان وليد كيحط سارة فسريرها وبجنبه ناديا اللي حطت طابليتها بجنب راسها حدا الأباجورة وتسلبتت باش تخرج قبل منو هربا لبيتها 
وليد(وهو كيقفل بيت سارة استوقفها بنداء قبل متوصل غرفتها):- ناديا دقيقة 
ناديا(تنهدت وشافت فالأرض عاد لتافتت عندو وهو كيتقدم عندها):- نعام أوليد
وليد(قرب منها وقلبو كيخفق بقوة وحك فشعره بارتباك):- بغيت غير ..
ناديا:- أنا بخير 
وليد(جا ينطق لكنو سكت وسد فمه بابتسامة مرتاحة):- تمام تصبحي على خير
ناديا(ابتلعت ريقها وهززت راسها):- ونتا من أهلو 
دخلت لبيتها وهو واقف فمكانه مكرهش يطير عليها ببوسة تنسيها كلشي لكن بقا مبتسم وكيرجع خلفيا ببلاهة وهيا ريشتلو بوداع وقفلت الباب وحطت راسها عليه بتعب تقدمت لسريرها وكلست بشرود كتزفر طاقاتها السلبية اللي حملتهم معاها من ديك الليلة ومن ديك الزيارة البغييضة ، حست بآهات خانقة وهيا كتشوف مرة بعد مرة مدى غبائها اللي ملاحظتش الشبه بينها وبين جميلة طول هاد الفترة رجعت سخرت من البوس اللي بوحدو كيخلع زفرت بعمق وتفكرت الدعوات ديال عرسها وهادا المضحك فالأمر مبعد كلشي عاشته غادي ينقاملها عرس فعلا مهزلة عيات متتهرب منها لكن بسيف عليها وقعت فيها ، تحسرت على وعود ياسر ليها فالماضي اللي واعدها يعوضها على زواجهم بعرس مدايرش لكن للأسف منفذ تاوعد من وعوده بالعكس زاد تكشف على حقيقته وفكرت أنه يكون دبا تاهوا متأقلم معا وضعه وعايش معا زكية فاحلى مايكون ، نفضت شعرها بيديها وحيدت جاكيطها وتنفست الصعداء مبعد ديك الليلة المشحونة ودلكت عنقها بتعب وشردت فذكرى لا يمكن فحياتها تنساها 
~ كتتفكر ~
ناديا:- ههههههه عرفتي كيندير 24 سنة أكيد غادي نكون لقيت فارس أحلامي ونتزوج بيه
مريم(كتضحك):- يا تفائلك يختي وفين حنا وفين 24 سنة راه باقي سنين وبنين
ناديا(كتحك اللافابويات نتاع الحمامات فواحد الفندق معا مريم):- علاش سنين وبنين غمضي عينك تلقايهم جاو
مريم(مسحت العرق على جبهتها):- جيبي كالكيلاتخيس أبنتي واجي نحسبو دبا يالاه عندك 17 لعام وشوفي شحال بينك وبين  24 يالالة 
ناديا(دارت يدها على حنكها):- 8 سنين ههههههههههه
مريم:- وشفتي هيييه عرفتي أنا كينوصل 24 نتوقع نكون تزوجت وعندي شي 4 ولاد وحاملة فشهري السادس وتجي عندي نتي باللوطو كتزوريني زعما باش تعرضيني لعرسك لكن بمجرد متدخلي نبدي نشكي ونبكي عليك من صداع البز وتقوليلي نتي اللي كي القنينة كالسة ولد ولد هههههههههه نتوقع مغاديش تخليني نجي لعرسك غانشد طابلة غير يانا وعائلتي الصغيرة
ناديا(ضحكت من قلبها):- هههههههه آه فعلا نقر عليك وخا حتى فالخيال
رضى(خدام ديال السربيس):- البنات واش ساليتو ولا باقي ؟؟
مريم(حكت فيساع اللافابو وهيا كتصوط عليه بالمنظف):- كملنا كملنا 
رضى:- وسربيو فيساع
ناديا(كتحك حداها بسرعة تاهيا):- وشتي ولادك قبل ميجيو خلاونا نتبهدلو هههههه
مريم:- هيييه والله يوصلنا لداك اليوم ووعد مني كينوصلوله غادي نجي عندك ونفكرك ونقولك هاه شفتي كلامي شحال كان صح ههههههه 
ناديا(دارتلها إشارة بالمنظف نتاع الوعد):- وعد هههههههه 
ناديا فالوقت الحالي مسحت دمعتها وهيا كتضحك من دعابة داك اليوم اللي مستحيل تنساه ومعرفتش واش مريم عاقلة عليه ولا باقي وفضلت تتناساه تايجي يومه وتفكره بيها .. مريم منعستش تقريبا مبعد جولتها الماراطونية معا السي ابراهيم واللي كرشخها بمجرد مرجع من الدوش وهيا بقات تتقلب مقادراش تستنا الصباح وقتاش يجي ويمشيو لعند الطبيب أرق وصداع وتعب وحماس ودعاء فخاطرها وأخييييرا مرت الليلة الطويلة وجا الصباح فاقت هيا اللولا ووجدت لفطور لابراهيم اللي ناض لبس كسوته وفطر معاها ومشا لخدمته وكملت هيا شغلها نتاع الدار وعينيها على الساعة اللي دقائقها بقاو يتمشاو على البيض حتى وصل قريب الوقت وطبعا خرجت قبل الموعد من كترة مستنات ومشات متجهة لعند الطبيب وبلغتهم بموعدها السابق وخلاوها تستنى .. رسلت رسالة لابراهيم بأنها وصلت وكتستناه يجي وهو استأذن من خدمته وجاها غير شافتو ابتاسمت بحب ليه وكلس بجنبها وهيا حست بالراحة خصوصا مبعد مراقبتها لدوك الجوج سيدات وكروشاتهم بارزات قدامهم وباينة عندهم معاينة للحمل شحال تمنات تكون بحالهم وطبعا هوما ماحاسينش بتاتا بعذابها ومعاناتها الصامتة لأن الله سخرلهم وسهل عليهم أما هيا فمزال صابرة وكتستنا الفرج كيما كتستنا دورها معا الطبيب والحمد لله مصبرتش بزاف تاسمعت سميتها هيا وابراهيم اللي شدها من يديها ودخلو بجوج .. رحب بيهم الطبيب ودخلها لغرفة المعاينة وخدالها الدم ديالها وفحص بطنها وعدة أمور ورجع لمكتبه فين كان ابراهيم يستنى و هيا عدلت كسوتها وتبعاتو بلهفة وشوق لسماع مايفرح ..
الطبيب(حيد نظاظره):- اطمنو المدام معندها تاشي عارض يمنعها من الحمل 
مريم(بفرح):- لكن أدكتور مدة هادي وحنا مزوجين وللأسف للآن موقعش حمل 
الطبيب:- طبيعي أمدام بزاف الحالات بمجرد ميتزوجو كيكون الحمل عندهم متأخر ويمشي لسنة وسنتين تالما فوق وداكشي راجع لعدة عوامل 
ابراهيم:- وبالنسبة لحالتنا شنو اللازم أدكتور ؟
الطبيب :-غادي نكتبلكم هنا على عدة تحاليل ليك وليها وباغيكم فأقرب وقت ترجعوهملي وعلى أساسه غادي نتبعو الدوا ويجيب الله التيسير 
مريم(بحماس):- زعما أدكتور كاين أمل ؟.
الطبيب:- أبنتي نتي باقي صغيرة وفمقتبل زواجك يعني فرصك متاحة للحمل والعمر قدامكم إن شاء الله
ابراهيم(ناض وصافحه بامتنان):- طمنتنا أدكتور وعلى الله يكون الخير شكرا ليك بزاف
مريم:- شكرا ليك ونشوفوك عما قريب
الطبيب:- ربي معاكم في الإنتظار 
خرجت مريم من تما وهيا هازة فخاطرها حلم وفرحة واطمئنان وحماس باش يتحقق مرادها فالقريب العاجل كذلك ابراهيم ابتسملها وكان كيشاركها نفس الراحة وباغي يحققلها مكاتتمناه فخاطرها ..

مرت الأيام بشكل اعتيادي هيلين وجاد كانو فآخر يوم من أسبوعي عسلهم راجعين للفيلا و اللي كان فيها تحضيرات مختلفة الشكل والطابع محيت مبعد 3 أيام كان عيد ميلاد ساريتا واللي كانت فمدرستها كتقضي الفسحة ديالها فيدها كتاب كتقراه حتى جات ضربة للكتاب وطاح على الأرض وعلات راسها لقات ياسمين متوسطة آية وفاتن وعيونهم كتلفظ شرر .. تنهدت بعمق ونزلت يدها تهز الكتاب لكن ياسمين وطات عليه برجلها وهيا دايرة يديها على جنابها كتهزز باستفزاز .. زادت تنهدت سارة ووقفت فوجهها مربعة يديها 
سارة:- مغاديش توقفي على حركاتك الطفولية 
ياسمين(بعيون ماكرة):- حتى تنفذي اللي مطلوب منك عاد نحبسهم 
سارة:- شنو مشكلتك معايا بالضبط ؟
ياسمين(بعصبية):- أنتي كلك على بعضك مشكلة وانا محاملاكش تبقاي كالسة حدا سامر طوال الحصص نبهتك ماللول لكنك مسمعتيش كلامي 
سارة(بتحدي):- ونتي عارفة أنني ماشي أنا اللي ختاريت المكان الأستاذ اللي ختارهلي وغادي نبقى فيه شئتي أم أبيتي
ياسمين(بسخرية):- سمعتك دايرة حفلة تنكرية بمناسبة عيد ميلادك واش حنا ممعروضينش ؟
سارة(نزلت راسها التقطت كتابها):- الباب مفتوح للجميع وكلشي مدعو
ياسمين:- أكيد جاييين 
سارة تعداتهم وفاتت بلامبالاة وهنا ياسمين شافت فيها بشراسة وتأففت 
فاتن:- كيفاش بغيتينا نمشيو لحفلتها ؟؟
ياسمين(بخبث):- فراسي مخطط البنات دبرولنا مانلبسو ضروري منكونو وخصني نتأكد أن سامر جاي تاهوا
آية(بمكر):- اممممم وانا نفهم 
ياسمين غمزتلها وعضت على شفتيها بتحدي وعيون كتتلاعب بالشر ، وحضي راسك أساريتا مهاد السليعفانة معاجبانيش بعدا هههههههه ^^
هيلين(داخلة بفرح للفيلا اللي كانت مقلوبة لداخل من التحضيرات ديال العمال):- نحن في البيييييييت 
وليد(حط ملفه اللي فيده وتقدم عندهم):- ويلكوم باك نورتو 
جاد(حط الحقائب وسلم عليه):- توحشتك يا الغول 
وليد:- امممم شايفك عسل 
جاد:- واش اللي يبقى معا النحلة ميتعسلش 
هيلين(تقدمت تشوف فالتحضيرات):- شنو كتقولو بجوجكم وفين ساريتا حبيبة ماما ؟؟
وليد:- مزال فمدرستها شوية وتجي 
هيلين:- اففف باغية ناخد حمام ساخن نرتاح من تعب السفر نشوفكم ..
وليد:- أ هيلين في غيابكم خليتهم ياخذو حوايجك الشخصية لبيت جاد اللي تقلبت وولات غرفة مشتركة بيناتكم طبعا تغيير الديكور اللي فيها هديتي ليكم أتمنى تعجبكم 
جاد(بامتنان):- علاش عذبت راسك أوليد
وليد(شاف فحنكه وغمزله):- لا عذاب ولا تاشي حاجة تستاهلو مكتر
جاد(ختفت بتسامتو بمرح وبعد وجهه):- خيرك سابق ههههههه
هيلين(بامتنان تاهيا جارة حقيبتها):- ثانكيو وليد 
طلعت وحطت حقيبتها أعلى الدرج وبقات كتجرها تاسمعت صوت باب تقفل ولتافتت شافتها جاية ابتاسمتلها ناديا بهدوء أما هيا علات حواجبها وشنايفها ووقفت 
ناديا:- وليتو أهلا وسهلا 
هيلين:- امممم ولينا 
ناديا:-افتقدناكم الصراحة
هيلين:- ياسلام القلوب عند بعضيها 
ناديا(متجاوزاها باش تنزل):-نشوفك 
هيلين لتخت كعبها معا الأرض وحيداتو جارة حقيبتها بعنفوان لبيت جاد اللي تقلبت 180 درجة وولات أروع مما كانت ،كان كل أثاثها فاللون البنفسجي غامق الممزوج بالأبيض وعلى جدران الحائط نفس الألوان عجبتها بل سحرتها وحطت راسها على السرير وهيا مبتسمة ..

فدار عزيزة
مريم(كتمسح الديكورات اللي فالصالون):- شحال فيك أليلى قتلك راه وصيت ابراهيم يجيبهم معاه من المخبزة اللي حدانا غير كوني هانية تاحاجة مغادي تنقص اليوم
ليلى(متوترة لأقصى درجة):- معرفتش مي قلبي مقبوووض وخايفة لا يوقع شي خطأ حدا الناس 
مريم(التافتت عندها):- مغادي يكون تاشي خطأ وكلشي غايكون هو هاداك غير خففي توترك اللي ملوش لازمة
ليلى(شادة على قلبها):- علاء قالي 7 يكونو هنا افففف مباقيش بزاف الوقت 
مريم(شدتلها يدها):- سيري رتاحي فالبيت شوية وريحي أعصابك وخا
ليلى:- كيفاش نرتاح وباقي مليون ألف حاجة خصها تندار لا منقدرش 
مريم:- ماهو بتوترك هادا تاحاجة مغادي ديريها لذلك سمعي الكلام رتاحي شوية ومبعد رجعي أقلو تريحي شوية وجهك المتوتر ماشي مزيان يشوفوك شاحبة بهاد الشكل هادا همممم
ليلى(شافت وجهها فالمراية نتاع البهو):- راني شاحبة نااااري ونمشي نريح كيف قلتي هاااه
مريم هززت راسها كتضحك عليها وبقات تكمل شغلها في حين عزيزة كانت فالكوزينة كتوجد فالشهيوات اللي غايحطو للناس أما عيسى فكان فبيته كيسبح وكيتأمل بصمت صورة ناديا فاش كانت صغيرة وابتسامة على وجهه مالية الكون .. 
كأي وحدة فمحل ليلى كانت متوترة فوق اللازم خوفا من ردة فعل عائلة علاء مين يشوفوها لأول مرة . كانت كالسة وكترجف ومعارفة شنو دير باش تحيد هاد التوتر حتى نهار تخطبت لجواد مشعرتش بهاد الشعور غير تفكراتو ضربها الضو وشمئزت من السيرة هو اللي دمرلها حياتها ياريتها لا عرفاتو ولا جا مجيتها لكن لا ينفع الندم حين تقع الفأس في الرأس نفضت هاد الأفكار التشائمية ودخلت للدوش باش تسترخي شي ساعة لربما استرجعت شوية من حيويتها ومشالها هاد القلق كلووو والخوف من عائلة علاء اللي كانو بدورهم منقسمين لجبهتين .. 
أمنية(كتحط الفساتين فوق السرير باش تختار اللي تلبس وكتهدر فالتليفون):- عموما غير نفضيو هاد الليلة الخاصة بعلاء ووعد مني أعثمان غدا نفاتحه فموضوعنا 
عثمان:- أمنية عرفتي إيلا مصارحتيهش غانشد طيارة ونجي لعندو ونحكيله بنفسي خته شنو دايرة فقلبي الشريد
أمنية(مبتسمة بخجل):- وصافي أعثمان كلمة الرجال 
عثمان:- آه دبا قلبي رتاح لوكان قلتي كلمة النسا نديرها ونجي محيت غاتخذليني ههههه
أمنية:-امممم يالاه دبا غانخليك خصني نوجد راسي مبقاش بزاف ويوصلني نداء عائلي
عثمان:- أوك شيغي تهلاي فروحك والله يسهل الأمور نستناك مين ترجعي تطمنيني على الأخبار
أمنية:- وخا ضروري باي .. 
هزت جوج فساتين ودارتهم على جسمها كتشوف فالمراية أنو فيهم الأحلى باش تلبسه ، في حين كان نوفل فبيته كيحدد قمجته وداير كيتمان على ودنيه تادخل عليه علاء فجأة
علاء:- نوفل أنقذنيييييي
نوفل(حيد الكيت):- هااااه شنو مالك ؟
علاء:- قتلك أنقذنيييي نسيت حاجة مهمة مجبتهاش معايا وانا براااا 
نوفل(بفزع حط الحديد بعيد وقرب منه):- شنو نسيت ؟؟
علاء(عاقد حواجبه ببؤس):- الكرافاطة يا نوفل نسيت الكرافاطة وانا مستحيل نمشي بدونها 
نوفل(حط يدو على قلبي):- هفففف صحابلي كاع نسيت شي وحدة كنت معاها وحامل بابنك وتجي تنزعلنا الليلة ههههه
علاء(هز شنايفه):- ناري على مخيلة مريضة عندك دبا هادا فال تفولو على خوك 
نوفل(حط يده على كتفه بضحك):- ههههه صافي صافي ديزولي أسيدي نرجعو للمعضلة الكونية الكرافاطة
علاء:- واه أصاحبي كيغادي ندير ؟؟
نوفل:- عادي جيب شي وحدة من دياولك مافيها باس
علاء:- لا مستحيل ميمكنش بغيت اليوم كلشي يكون جديد وبورفيكت بغيت ليلى اليوم تفتخر بياااا هممم رجاءا أنوفل أنقذني عفااااك
نوفل(بتثاقل دعابي كيتجبد عليه زعما):- باقيلي نحدد قاميجتي وسروالي وبزاف المشاغل
علاء:- تقبل الرشوة ؟؟
نوفل(هز عينيه بلمعة):- كااااش 
علاء(جبد محفظته):- ملعووون نتا واستغلالي فأهم يوم فحياة خووووك مي معليش اللي بغا العسل
نوفل:- يصبر لابتزاز نوفل ههههههههههههههههههه
علاء:- ههههههههههه مسخوووط 
نوفل:- أحط فجيبك راني غير نضحك معاك عيب أصاحبي نشد رشوة من خويا عزيزي عندك الزهر رابطة الدم بيناتنا 
علاء:- ههههههههههه يا الله عليك العفريت مين كتجيب هاد الهدرة
نوفل(بتلاعب جدي):- غوغل دوت كوم 
علاء:- ويالاه سير عتق الموقف وجيبهالي تكون كحلة صافي عندي الطقم رمادي بارد وتحت منو قمجة بيضة 
نوفل:- صافي وصل يامعلم نص ساعة تلقاني هنا لكن بمعيتك كملي تحداد هاد القاميجة راك عارف نستغلو الوقت
علاء:- فففف مصلحجي كبيررر وتقولي منشدش رشوة وسير سير وكان 
نوفل(هز تليفونه وسوارت اللوطو):- طيااااارة 
خديجة فبيتها كالسة حدا منضدتها كتجهز نفسها وموراها أنور كيقرا فالجرائد
خديجة:- مغاديش توجد راسك ؟
أنور:- باقي الحال 
خديجة(كتشوف فيه من مرايتها):- فين مشا الحماس ديالك ياك نتا اللي باغينا نأيدو ولادنا فاختياراتهم ولا مجرد شعارات واهية تحمسهم وتبعد لهيه وتخليني أنا فوجه المدفع
أنور(نزل الجريدة وشاف فيها):- لوكان تحيدي من راسك هاد الوساوس ديال حب السيطرة غاتكوني واووو 
خديجة(عوجت شنايفها سخرية منه):- نكون واووو ياسيدي انا هاكدة ما أحلاني 
أنور(طوا الجريدة ووقف):- نتمنى عند الناس متديريش شي حاجة تخذل ولدك
خديجة(بابتسامة خبيثة فيها مكر):- كون هاني 
أنور(هاز طقمه وخارج بيه):- أنا متأكد مور ابتسامتك هادي شي مصيبة غير الله يحفظ وصافي 
خديجة:- دكتور أنور كون مطمن قررت نمشي معاهم فنفس الطريق بلاما نخلقو دروبة مبلعين بيناتنا 
أنور(بتمني حقيقي):- ع الله 
خديجة(مبعد مخرج):- ههههه غير تسناو عليا 

ساريتا(وصلت عاد):- ماااااااامي 
هيلين(فتحتلها يديها):- ياروح مامي توحشتك سويهارت كيفك ؟
سارة :- بخير ماما تانا توحشتك 
هيلين:- كيف المدرسة ؟
سارة:- عادية .. فينو أونكل جاد ؟
هيلين:- معا باباك فالمكتب 
سارة:- ماما أنا جاااااااااااااائعة بغيت ناكل هامبرغر 
هيلين:- هامبرغر أسارة ياكما كنتي تاكليه فغيابي عارفة مكانش اللي يهتم بأكلك قدي
سارة:- نو مامي ناديا كانت تطيبلي أكلي بنفسها واهتمت بيا بزاااف
هيلين:- اممممم شكون شكرك العروس 
سارة:- يو وااااط مامي وليتي تهدري بحال عمي عماد هههههه
هيلين(ضحكت من سخرية القدر):- إيه ضروري ميأثرو عليا بأحاديثهم الغريبة 
سارة:- هههههههه
هيلين(باستها):- أنمشي نشوفلك شنو تاكلي ونتي سيري شوفي عمك جاد وباباك
سارة:- حااالا ففننننننن (دقت فالباب وعاد دخلت)أنا جيييييييت 
جاد(وقف وهزها بين يديه):- يا هلا ومية غلا بالأميرة ساريتا 
سارة(شدت حنوكو بدعابة):- توحشتك 
جاد(دخل وجهه فعنقها وبقا يدغدغها):- وانا توحشتك يا كوكيزتي اللذيذة
سارة(كتضحك):- هههههههه يكفي أونكل 
جاد(حطها وباسها فخدها):- كيفك معا القراية مزيان ؟؟
سارة(تقدمت مجيت باباها):- رائعة .. دادي آي ميس يو 
وليد(هزها وحطها على حجره فوق المكتب):-ميس يو تو هاني 
سارة:- داد أين وصلت ترتيبات حفلتي ؟؟
وليد:- امممم في أوجها صغيرتي لكن العمد على أصدقائك واش كملتي دعوتهم ولا باقي ؟؟
سارة(شردت لأنها معرضتش سامر):- امممم تقريبا
وليد:- تقريباااا هاااه وسيري كمليلي القائمة باش نعطيها لعماد يدير بحسابو أوك بيبي ؟
سارة(نزلت مودعتهم):- حاااااااضر 
جاد(مبعد مخرجت):- وليد جاتني فبالي فكرة بما أننا اليوم خميس وعيد ميلاد ساريتا يوم الأحد شنو بانلك نمشيو هاد اليومين للمزرعة ؟؟
وليد(عقد حواجبه متسائل ومستغرب وتفكر المزرعة اللي كان ناسي أمرها تماما):- المزرعة واش فكرك بيها دبا ؟؟
جاد:- بغيت نستغل آخر يومين ليا فأجازتي اللي ديتها محيت عارف مبعد هاد الأسبوعين عمرني ماندي نهاااار 
وليد:- ههههه عموما الوقت ممناسيش وخصنا استعدادات بزاف عاد لحفلة سارة معرفت
جاد(وقف):- متجادلنيش غادي نقتارحو الأمر على النساء وهوما يحكمو تفاهمنا ؟؟
وليد(هز يديه):- أوك غانشوفووو 
جاد خرج لقا هيلين معا سارة اللي كانت كتاكل وجبتها ابتاسملها وطلع يرتاح شوية من تعب السفر .. مبعد ماكلات طلعت لبيتها وحطت حقيبتها المدرسية على جنب وكلست فبيروها وفتحت لابتوبها ،حكت فراسها محرجة وابتلعت ريقها وفتحت الفايسبوك ديالها لقاتو مفاتحش وتنفست براحة محيت غادي تخليلو رسالة وتخرج بلاما يشدها فأحاديث متقدرش تتهرب منهم .. المهم يالاه كتبت سامر وهو يخرج أون ليني خلعها تاقفزت وعضت شفتيها كتلعن 
سامر(كتب):- كنت نستناك 
سارة(كتبت):- شفتك ممتصلش
سامر:- كنت قافل الدردشة مباغيش الإزعاج
سارة:- وعلاش داير الأصدقاء مين مباغيش الإزعاج ؟
سامر:- بعض المرات كنبغي نخلي وقتي خاص 
سارة(ياغرورك):- آه عموما كنت بغيت 
سامر:- شنو ؟
سارة(بطات عاد كتبت):- عيد ميلادي يوم الأحد يعني تبغي ..
سامر(بغرور قاطعها):- عارضة عليا أكيد نجي
سارة(بتأفف):- جيد 
سامر:- سمعت بأنها حفلة تنكرية 
سارة:- إذن عارف بالموضوع وكتستنطقني
سامر:- تحريات (فايس مبتسم)
سارة(باستفزاز ليها):- آه خصك تجي بزي تنكري 
سامر:- أحلى ما أجيد هو هاد النوع مالحفلات
سارة(بغات تنهي الحديث):- أوك نشوفك الأحد
سامر(حك فراسه):- شفتك معا ياسمين وصحاباتها 
سارة:- صحيح مكتملش ياسمين من أداء دور الشريرة
سامر:- إيلا ضايقاتك بلغيني
سارة:- وشنو غادير ؟
سامر:- فقط خبريني وتشوفي 
سارة:- لا تهتم أنا بخير .. سأخرج الآن باي
سامر:-باي (صيفطلها باقة ورد)
سارة غي شافتها قالت معا راسها شحال مستفز ومغرور وهزت شفتيها بتعالي لكن ابتاسمت أنه غادي يجي للحفلة ديالها .. راجعت شوية دروسها وسمعتهم كيعيطولها وخرجت لقات ناديا نازلة قبل منها وركضت لمجيهتها
سارة:- ما الأمر ؟؟
ناديا(شدتلها يدها):- جاد منوض القيامة خلينا نشوفو شنو مور هاد النداء الجمهوري 
سارة:- امممم متحمسة 
جاد(كيغوت من وسط الصالون):- هيييييييليناااا نزلي ساااااااااارة نزليييي ناديييا نزليييي وليييييييييد تعااااااال 
وليد(خارج من مكتبه):- يامجنون مالك على هاد الحالة؟؟
هيلين(نازلة مور ناديا وسارة اللي ستاقرو حداه):- أوووف يا جاد شنو كاين ؟
جاد:- عائلتي العزيزة عندي اقتراح للويكند لكن وليد معترض وبشدة 
سارة:- كييييييف وعيد ميلادي ؟؟؟
جاد:- هاني عيد ميلادك الأحد وحنا غانرجعو السبت بالليل 
ناديا(بتساؤل):- نرجعو من فين بالضبط ؟؟
جاد(شاف فوليد اللي هزز راسو بدون فايدة):- قتارحت نقضيو الويكيند فالمزرعة 
هيلين(بلمعة فعينيها):- يسسسسسسس فين كاين الأحصنة واوووو 
سارة(بفرح):- يس يس يس أنا موووووافقة 
ناديا(شافت فوليد):- لكن خصنا بزاف الأمور نقادوها هنا فالفيلا للحفلة ومكانش الوقت 
جاد:- نسيبتي المستقبلية خليك كارط أخضر إيلا رفضتي نتي الشاف غادي يآنيلي الرحلة كليا 
وليد:- متزيدش فيه أجاد
جاد:- مالني كدبت؟؟
سارة:- بلييييز دادي خلينا نمشيو هاد اليومين بلييييز ؟
هيلين:- امممم فخاطري هاد الرحلة من زمااااان 
سارة:- يس داد واعدتني برحلة برية ومن وقتها وانا كنستنا ودبا الفرصة 
وليد(شاف فناديا):- طيب شكون يهتم بالترتيبات اللي باقية ؟
جاد:- حنا فعالم التكلونوجيا وكاين عماد وكاينة دنيا وكاينة لين اللي يقدرو يدبرو الأمور 
ناديا:- لين مولعة بهادشي أكيد مترفضش
وليد(بقلة حيلة):- طيب أمري لله موافق جهزو راسكم غدا الصباح مقلعين 
سارة(نقزت وطارت عندو بتعنيقة):- ياااااااااااااي أنا سعيدة جدا جدا جدا
جاد(قرب وحاوط هيلين بيديه وباسها فخدها):- شفتي ها اليومين ديالنا مغايمشيوش خسارة
هيلين(شافت فيه بابتسامة):- مجنون
وليد(قرب من ناديا):- تقدري تمشي ياك ؟؟
ناديا(همستلو):- ونفوت هاد العرض المجاني مستحيل
وليد(فهمها مين شافت فهيلين وجاد وابتسم):- عندك الحق عرض لا يفوت ههههههه

مريم(لابسة فستان بلونكاصي طويل وبيديه حتى المرفقين ورابطة شعرها بذيل حصان دخلت على ليلى اللي كانت لابسة فستان وردي بارد طويل ودايرة شال وردي ومايكاب خفيف جات مزينتها):- تبارك الله تبارك الله على ليلى الغزالة
ليلى(متوترة):- شوفيلي الماكياج واش مناسب واش نخفف ولا نمسح ؟
مريم:- متمسحي ماوالو راه خفيف وجايك زوين معا اللباس اللي لبستي
ليلى:- والولاد واجدين وصيتيهم ميدخلوش على الناس تانعيطلهم ؟؟
مريم:- أكيد غادي نهتم بيهم بنفسي كوني هانية 
ليلى:- جدي عيسى لبس وخالتي عزيزة فين ؟
مريم:- تهدني أليلى كلشي راهم مستعدين وكيستناو 
ليلى(بقلق كترجف):- وابراهيم ابراهيم فيراااااه ؟؟
مريم(كتحاول طمنها):- لتحت فالصالون
ليلى(وقفت كتترعد):- الصوووونيت ديال البااااااااب مريم قلبي غادي يخرج أختي خايفة بزااااف
مريم(قربت وشدتلها يديها):- ولن يكون لنا إلا ما كتبه الله لنا تفائلي خيراااا والكمال على رب العالمين ..يلاه نزلو
دخل علاء وفيده باقة ورد زوينة وعلبة شوكولا أنيقة وكان خجول بزاف واستقبلتهم عزيزة وابراهيم برحابة صدر واستقبلوهم فالصالة كان تما عيسى بكروسته اللي حياوه تاهوا وتاخد كل واحد مكان وكلس .. أمنية بجنب نوفل علاء بجنب عيسى أنور بجنب خديجة وابراهيم قدام عزيزة ومبعد التحية والسلام دخلت مريم وليلى سلمو عليهم وكلسو بخجل .. ليلى مقدرتش تهز عينيها تشوف فعلاء اللي كان حال فمو فيها وفجمالها قشعتهم خديجة وفهمت أن هاديك هيا ليلى وهيا تشوف فمريم وتوجهلها الحديث
خديجة(بمكر):- تبارك الله عليك أليلى زوينة كيف قال عليك ولدي علاء 
مريم(حمارت وتلعثمت وشافت فليلى اللي خفتت ابتسامتها):- أ..
علاء(ابتلع حديث أمه اللي عرفو متعمد):- هادي تكون مريم مرت ابراهيم خو ليلى 
خديجة(زعما تكاكات بتلاعب فعينيها وبابتسامة صفرا):- آآآه ديزولي صحابلي هيا ليلى متشرفين 
ليلى(بصوت مخنوق):- نورتينا أمدام 
نوفل(بهمس لأمنية):- وهاقد بدأ الجو المشحون والكرة الآن في ملعب المهاجمة خديجة 
أمنية(ضحكت شوية بصوت عالي وحشمت):- كخممم 
علاء(شاف فيهم وتنفس الصعداء):- حبيت نجيب عائلتي باش تتعرفو عليهم ويتعرفو عليكم ويارب تكون معرفة الخير
ابراهيم:- نورتونا هادا نهار كبير هادا
أنور:- الشرف لينا سيد ابراهيم خبرني علاء بعملك فمجال الشرطة ربي يكون معاكم
ابراهيم:- ومعاكم أدكتور تانتوما مجالكم ماشي ساهل 
خديجة(نطقت بيناتهم):-كل واحد فينا وعندو تخصص بنتي أمنية هادا عامها الثاني فكلية الحقوق وولدي نوفل هادا عامو التالي ويتخرج من الهندسة وكيما كتعرفو ولدي علاء هو الكبير فيهم وشرب مني ومن باباه حب التطبيب لذلك شاركنا فيه
أنور(بغا يلطف الجو عرفها بدات تلعب ملتحت للتحت):-الحياة هيا هادي أرزاق 
عيسى:- فعلا أولدي المكاتيب ديالنا مكتوبة فالسما قبل منزيدو 
عزيزة(ناضت):- نوجدولكم شي حاجة تشربوها مريم ليلى أجيو معايا ..
ليلى(بحرج):- عن إذنكم 
خديجة(لوزت فيها عينيها بابتسامة متحدية خلات ليلى ترجف):- إذنك معاك
دخلت ليلى ووجهها حمر للكوزينة وحست بالخنقة شربت كاس ما ومقدرتش تتحمل
مريم:- دبا مالك تعصبتي يا صاحبتي هدري بشوية راهم يسمعوك ؟؟
ليلى:- مشفتيهاش كي كاتتعمد تحط من قيمتي قدامهم معرفت بصح قلبي ممطمنيش 
مريم:- هششش مزالنا فأول الكلسة تهدني الله يخليك وصبري من أجل علاء أليلى 
ليلى:- اوووف واش انا نصيبي ديما خارج عوج هاكدة منلقاها تامجيهة
عزيزة:- البنات سربيو يديكم خلينا نحطو الحوايج للناس راه تعطلنا 
مريم شافت فليلى اللي بقات تكمل حطان فالصواني وهيا حاسة بكل مكتحس ليلى وعندها الحق مي بغات تكدب الأمر باش تخلي الليلة تفوت على خير ، دخلو الصواني وحطولهم الماكلة وكل واحد تناول صحنه وبقاو ياكلو تا سمعو صوت بكاء محمد من الغرفة التانية وقفزت ليلى شافت مباشرة فخديجة اللي عوجت شنايفها معاجبهاش الحال واستئذنت خرجت من الصالون وهيا مبتلعة ديك الغصة اللي جاتها من خديجة .. هزت محمد بشرود وهيا كتهدهده باش يسكت وعطاتو رضاعتو اللي فيها الحليب وبقات كالسة بيه فالبيت تاسمعت طرق على الباب وكانت أمنية ليلى مقدرتش تنوض 
أمنية(بابتسامة طيبة):- غير خليك على راحتك هادا ولدك الصغير محمد ياكي ؟؟
ليلى(حست بشوية راحة لأنها عارفاهم):- آه والتانيين راهم يتفرجو فالبيت لوخرا وصيتهم باش ميديروش صداع يعني 
أمنية(كلست بجنبها كتمسح بحب على شعر محمد):- امممم تبارك الله عليه شحال زوين 
ليلى(محرجة):- ربي يخليك 
علاء(دخل عليهم):- أمنية نتي هنا 
أمنية:- آه جيت نشوف الكتكوت الصغير كيشبه فماماه بزاااف 
علاء(بنظرة حب لمحمد اللي كان يرضع ببراءة):- وبزااف عاد 
أمنية(ناضت):- أنسبقكم للصالون جيبيهم معاك باش نتعرفو عليهم 
ليلى(شافت بتساؤل فعلاء باش ينجدها من الموقف):- أ..
علاء(بتهزيز لراسو لأمنية اللي خرجت):- طيب 
ليلى(بنظرة حنونة):- ختك ضريفة بزاااف
علاء:- آهاااه هيا ونوفل بحالي فالكاراكطير جينا نشبهو لبابا مزال تعرفي عليهم عن قرب وتحبيهم 
ليلى(مبتلعة ريقها بخجل وألم):- آه لكن وقيلة ماماك معاجبهاش الحال حسيت بيها مراضياش على الوضع ؟؟
علاء(انحنى لمستواها):- جيتي تهبلي يا حبيبة قلبي يخليك ليا ولا يحرمنيش منك
ليلى(عرفاتو تلف وشافت محمد رجع نعس وهو كيرضع وحيدتلو القرعة وحطاتو بلاصتو ينعس):- غادي نجيب زياد ورياض ونجي تفضل أعلاء
علاء(وقفها قبل متخرج وجبدها لعندو بشوية):- نتي غادي تكوني ليااااا متفكري تافحاجة اللي واقع فالصالة مجرد بروتوكولات اعتيادية إنما مكانش تاشي قوة تمنعني عليك ولا تمنعك عليا تفاهمنا 
ليلى هززتلو راسها وتنهدت بعمق ومشاو رجع هو للصالة وهيا جابت رياض وزياد معاها مبعد موصياتهم ميديروش بسالة طبعا بحالي كتوصي البرد دخلو العفاريت وسلمو عليهم فاللول بهدوء ومبعد كلسو كيتلاوزو على قابصة الشوكولا اللي جابها علاء اللي فهمهم وناض حطهالهم قدامهم وكلس بيناتهم 
خديجة(بمكر):- موالفينك الوليدات أعلاء ؟
علاء:- أكيد هادو صحابي 
نوفل:- وغادي نبدي نغييير تانا خصني يكونو صحابي راني دبا بحال عمهم الكبير هههه
أمنية:- طبعا وانا عمتهم ياكو الولاد
زياد ورياض (حشمانين):- ههههه 
خديجة(تأففت من حديث ولادها وقلبها طلع كاع):- امممم عالم الله كيفاش غادي دير مبعد الزواج تسخى بيهم مين يمشيو زيارة لعند باهم الحقيقي 
ابراهيم(مقدرش يتحمل استفزازها أكثر):- باهم فالحبس ومنا لعمر طويل عاد إيلا خرج
خديجة(مفزوعة وشرقت من الشاي اللي كتشرب):- هئئئئ فالحبس 
أنور(شاف فيها وشاف فيهم مين ارتابكو):- فيها باس فيها باس 
نوفل(نزل لمستوى أمنية وهمسلها):- والتعادل مابين فريق خديجة وفريق ليلى نقطة رجوع إلى السطر
أمنية(بخفوت):- شتتتت أنوفل ماشي وقته 
مريم(شدت يدين رياض وزياد):- عن إذنكم 
عيسى(جر كروسته خارج):- نصلي العشا ونولي 
عزيزة(كتوجب):- زيدو أولادي مرحبا بيكم 
أمنية:- لهلا يخطيك أخالتي
خديجة(همست لأنور):- راجلها السابق فالحبس أو ولدك فين غادي تصيفطه للمقبرة لالا أنا هادشي معاجبنيش ؟
أنور(كيضحك باش ميبينش):- الله يخليك متفوتي هاد الليلة على خير
علاء(شاف فليلى اللي حشمت وقلبها بغا يخرج من الرجيف والتوتر):- باش ندخلو فصلب الموضوع أنا وليلى قررنا نتزوجو وهادي ماهيا إلا زيارة تعارفية بين العائلتين
أنور:- غادي نكونو جد سعداء بنسبكم 
خديجة(كحت ومقدرتش تصبر):- نورمالمون نسولو على العائلة اللي غادي نتاسبو معاها اللول وو تاهوما يسولو علينا ولالا هاكدة الأصووول ؟؟
علاء(شاف ابراهيم كيردح):- ميحتاجش نسولو عليهم ولا يسولو علينا لأنني معتابرهم عائلتي الثانية وهوما دايريني كي ولدهم أماما 
ليلى(جاها البكا من الإحراج وشافت فعزيزة اللي شفقت عليها):- ….. لارد
أنور:- طبعا علاء أولدي مدامك معاشرهم حنا ماعندنا مانقولو 
خديجة:- وبأي تهمة دخل راجلك للحبس ياكما قتل شي حد ؟؟؟
ليلى(هنا وصلت معاها للتالي):- عفوا منك ولكن …
علاء:- ماما شنو الداعي لهاد الحديث دباااا ؟؟
خديجة:- طبيعي نسول
ابراهيم(متوتر):- نضرب دورة ونرجع شوية ليلى خالتي عزيزة سمعت مريم كتيعطلكم 
علاء(غمض عينيه مبتلع ريقه وبعصبية تاشافهم خرجو):- نتي شنو كتحاولي ديري ماللي دخلتي ونتي حاطة منها العين وكتحرجيها بأسئلتك ؟
خديجة(بتمسكين):- أناااا ؟؟؟ طبعا هادشي مكاينش واش ممحقيش نسول على عروسة ولدي
علاء(حل مكرافاطته منزعج):- تسولي عليها ماشي تخلقي الفرص باش تطنزي عليها صدمتيني فيك أماما مبعد متوقعتك جاية معايا برضى سعا نتي جاية تحطي من قدر البنت وهيا متستاهلش منك نهائيا هاد التصرف
خديجة(حمارت ووقفت):- إذن من جبتها مالآخر أنا ميشرفنيش نتناسب معا هاد الناس لذلك أنا غادية فحالي
أنور(شاف فعلاء اللي تصدم فيها وتألم):- كلسي بلاصتك
خديجة(بانفعال ممصدقاش كلام أنور):- عاود شنو قلت ؟
أنور(بحزم):- قتلك كلسي بلاصتك وسكتي متدخلي تافشي حرف مفهوم 
خديجة(ضحكت بسخرية ممصدقاش):- ههههه لانتا وقيلة تاكبرت وهبلت شوف شنو راك تقول؟؟
أنور(شاف فولاده اللي تشوكاو ورجع شاف فيها):- أنا محترم المكان اللي حنا فيه فرجاء خلي الساعة الجاية تكمل بما تحمد عقباه أحسن ميجي كلشي فوق راسك 
علاء:- صافي ألواليد إيلا بغات تمشي خليها تمشي للأسف مبقا تاشي معنى لهاد الكلسة ديالنا 
خرج علاء مالصالة ولقاهم كالسين فالكوزينة وليلى كتبكي بصمت غير شافتو طارت من بيناتهم وطلعت فالدروج قدام عينيه وهو مبغاش عليها 
علاء(معتذر):- سمحولي بزاااف مبغيتش توصل الأمور لهاد المواصيل 
خديجة(خرجت من الصالون):- الله يعاونكم وشكرا على الاستضافة 
عزيزة(توجهت عندها ولقاتها طارت وعاد خارج أنور):- سمحولنا أسيدي 
أنور(متأسف):- سمحولنا نتوما نشوفوكم مرة تانية إن شاء الله 
ابراهيم(جا يودعهم تاهوا):- شرفتونا
نوفل وأمنية(بأسف):- بسلامة عليكم 
مريم:- الله يعاون 
علاء(رما لنوفل سوارت اللوطو):- ديهم أنوفل نشوفك فالليل 
نوفل:- وخا تهلاو 
مشاو كاملين وبقا الجو المشحون الصامت مخيم على الدار تامقدرش يتحمل
علاء:- ابراهيم ممكن تعيطلي على ليلى باغي نقولها جوج كلمات ونمشي 
ابراهيم(مبغاش يكفي الجرح اللي جاها منهم):- علاء الله يخليك خليها على راحتها دبا ومبعد ويكون الخير
مريم(تنهدت وشافت فنظرات علاء المنكسرة):- أ.. أنا غادي نكلمهالك 
ابراهيم(شاف فيها):- أنا داخل عند الولاد شوية 
عزيزة انساحبت للكوزينة في حين علاء توجه للصالة وبقا واقف بشرود وانكسار من الشي اللي وقع 
مريم:- نزلي شوفيه أليلى مديريش فراسك هادشي 
ليلى(كتبكي بحرقة):- خليني أمريم مباغياش نشوووفو مباغيااااش 
مريم:- علاء معندو تاشي ذنب فالشي اللي دارته أمه مسكين تاهوا مكسور بحالك بحاله
ليلى:- اهئ اهئ أنا معندي زهر معندي زهر 
مريم:- مسحي وجهك ونوضي عند الراجل هو شاريك وباغيك وهادشي مأثرش فغايته صحيح وجعه لكن مغاديش يتخلى عليك أليلى
ليلى(ناضت عندها تشوف فيها):- واش كاين شي حد يكسر كلمة أمه على ود مرة تانية فين عمرك شفتيها هادي .
مريم:- هففف وغي نوضي شوفيه آش بغا وموراها نوحي كيبغيتي
ليلى(بعصبية لتخت الفراش وناضت):- أنا غانوض وخا سناي هانا نازلة وتسمعي اللي باغية تسمعيه
نزلت ليلى بعصبية وموراها مريم كتحاول تهديها لكن كانت كي الإعصار المزمجر
ليلى(غي دخلت للصالة وشافتو ضعفت من تاني بصح مسحت دموعها وتقدمت):- علاش باقي هنا ؟؟
علاء(التفت عندها باستغراب):- ليلى اللي وقع ..
ليلى(قاطعاته):- اللي وقع طبيعي يوقع وكنت متوقعاه نتا اللي كنت معيش راسك فالأوهام ومعيشني معاك أصلا فين كاينة هاد العائلة الخرافية اللي تقبل بامرأة مطلقة وب3 ولاد وراجلها متختخ فالحباسات وزايداها مالفوق متقدرش ترجع تولد هفففف أي منطق يقبل بهادشي أعلاء غير فمخيلتك فقط اللي هاد المعادلة ممكنة 
علاء(اهتزو شفتيه وقرب منها بشفقة):- ليلى ليلى متيأسيش عفاك ماشي مبعد اللي تخطيناه والظروف اللي تحديناها ووقفنا فوجهها تجي دبا تستسلمي 
ليلى(بصداع فراسها شدت على جبهتها):- هادي أمك أعلاء حاجة ماشي ساهلة
علاء(قرب منها وشدلها يدها بعذاب وحسرة على وضعهم):- ومصيرها تقتنع أنا مقلت باش لقيتك مقلت باش تحققت المعجزة وتطلقتي من جواد نجي تالدابا ونفرط فيك ؟؟
ليلى(بتعب شافت فيه وبتمني):- علاء أنا والله مبقالي جهد باش نحارب ولا باش نقاوم اللي وقعلي قبل دمر كلشي فيا حتى الصبر تقاضالي ويلا مشيت معاك فالهوى فراه رغما عني قلبي يميل ليك بصح تالهنا وصافي هادي حربك بوحدك وانا معليا إلا نستناك 
علاء(شافها بعدت يديها):- وهادا مبغيت حتى أنا مغاديش نطلب منك حاجة فوق جهدك عارف اللي فات عليك مساهلش ونتي مزال مخرجتيش منو بصفة نهائية ولكن معايا غادي تنساي كاع آلامك كنواعدك أليلى
ليلى(مقدرتش متصدقهش وبكات):- قتلك أنا ديما كينفرح شوية كتنقلب فرحتي لأحزان متكملش 
علاء(قرب ومسحلها دمعتها وعينيه فعينها):- شتتت متبكيش أليلى كاع هادشي غايولي مالماضي وعد مني هاد الفترة غاتفوت وغادي يتحقق حلمنا أحبيبتي 
ليلى(بتلعت ريقها وشافت فيه بحب):- على الله أنا مباغياش نكون سبب مشكل بينك وبين عائلتك ويلا محليتش الموضوع معاهم وديا سمحلي منقدرش نكون عزول بيناتكم ونفرقكم لأنهم أولى بيك مني 
علاء(فتخر بيها وكبرت فعينو):- يا الله طبيعي يخرج منك هاد الكلام محيت أصيلة وقلبك كبير لكن تيقي بيا كلشي غادي يتحل بعون الله عتاذريلي بزاف من عائلتك مرة أخرى أنا خصني نمشي دبا وغانعيطلك وخا ؟؟
ليلى(هززتلو راسها برقة):- وخا 
علاء(فوت صبعه على خدها برعشة خفيفة):- يا أجمل خلق الله نشوفك على خير
ليلى(ابتسمت بألم وحشمت):- ربي معاك 
مشا وخلاها كلست فبلاصتها كتشوف فحالها وكتدعي الله يكمل فرحتهم على خير ويهدي عائلته أو بالأحرى أمه اللي كانت واقفة على رجل ومنوضة الحيحة فالدار وكتشالي ومتقول شاليت 
خديجة(بغرور وعنفوان مكلسة ولادها وأنور فالصالون وواقفة كتشالي):- أنااااااا أنا الدكتورة خديجة بنت الحسب والنسب و الإسم اللي كلشي كيتمناو يناسبوه مرات الدكتوووور أنور وماين الدكتور علاء اللي صيطو واصل لبقاع المغرب كلهاااا نزوووووووووووجه لمطلقة راجلها فالحباسات ومجرجرة ب3 ولاد والله لا كانت ولا غادي تكوووون 
أنور(بتعب):- ولدك كبير ومراهش صغير باش تجي نتي توريه الصح مالغلط
خديجة:- مكانش اللي مخرجهم على طوعي مغير فشوشك ومبادئك الواهية لوكان متدخلتش فتربيتي ليهم وكان راهم يتمشاو كي المسطرة مكانش اللي ينقنق
نوفل(بتأفف):- ماما راه جوج سوايع ماللي رجعنا واش مزال مغاديش ترحمينا من هاد الأسطوانة 
أمنية(عيات تاهيا):- آه أماما عيينا ماللي جينا ونتي حاجزانا هنا 
خديجة(حالة فيهم عينيها كتخوف):- ياكووو هادشي مين خايفة على مستقبلكم وإسم عائلتكم نتاااا غدا مغدا كيتفتح المكتب ديال الهندسة ديالك وتبغي تمشي تتزوج طبيعي تدي معاك خوك إيوا ومين يعرفو ماضي مراته المطلقة قبلا وباللي هادوك ماشي ولاده شنو غادي ديرررر آآآه ونتي شكون هادا اللي غادي يرضى يتناسب معاك وماضي مرات خوك يليق فبرنامج قصة الناس وجاوبووووني جاوبوني لا عندي شي غلط ؟؟
أنور(وقف بتأفف):- نتي مانعرفتلك وصافي الله يهديك
خديجة(عوجت فيه شنايفها وعينيها):- يهدييييييييني يهديييني غير بعد من الموضوع كلو غادي السما تنفتحلي 
علاء(جا داخل ووقف أنور):- بابا دقيقة قبل متدخل باغي نقولكم جوج كلمات
خديجة(ريشتلو بصبعها بتهديد):- لا كلمة لا جوج إيلا جبدتلي موضوع هاديك المعيوبة لا نتا ولدي ولانا مك 
علاء(تنهد بتعب كيشاف خوته وقفو موراه وأنور قرب منو):- مخليتيلي تاخيار الواليدة الحاجة الوحيدة اللي تمنيتك توافقي عليها واللي حلمت بيها حياتي كاملة ببساطة وبدون متعرفي تا أبعاد القصة حكمتي على ليلى بالعيب والعار مع أنها أطيب خلق الله وأشرفهم للأسف أماما أنا مغاديش نتخلى على ليلى وغادي نخطبها رسمي ونتزوج بيها 
خديجة(عينيها ردحو):- إيوا شبع بيها 
دخلت لبيتها هزت فاليزتها وبدات تحط فيها كسوتها بانفعال تام وبدون ميرمشلها جفن
أنور(شافها ودار عند علاء اللي كلس بتعب):- ولدي علاء غادي نكون بجنبك دير اللي يريحك وعيش حياتك كيف بغيت الدنيا مجرد قرارات كنتاخدوهم باش نكملو الدرب ديالنا مرة تصيب ومرة تخيب وتبقى تجربة فالعمر منها نتعلمو من قرارتنا 
علاء(وقف بمرارة وعنقه):- نتا اللي كتفهمني أبابا لهلا يخطيك عليا
نوفل(ربت على كتف علاء):- وحنا معاك أكيد 
أمنية(تاهيا قربت منهم):- مدام نتا متمسك بليلى تالهاد الدرجة فهيا كتستاهلك وأكيد غادي نوقفو معاك 
علاء(حس بالفرح شوية):- ربي يخليكم ليا 
خديجة(خرجت جارة حقيبتها وشافتهم):- أنا راجعة لداري ونتوما غدا فالليل باغياكم تكونو فالدار ونتا دبا تندم على عصيانك لأمك 
علاء(جا يقرب منها ويعتذر لكنها وقفاتو كي المسمار):- ماما أن..
خديجة(مدت يدها قريب لوجهه بصرامة):-لسانك ميخاطبش لساني ليوم الدين 
خرجت ولتخت موراها الباب وهو نزل راسه الأرض بتعب ودار عندهم وأنور بيأس هز جاكيطه وخرج برا في حين نوفل وأمنية دخلو لبيتهم وخلاو خوهم يعيش مأساتو الممزوجة بفرح .. مبعد مدة دخل أنور هززلو راسو بمعنى مقدرش يقنعها تولي عن قرارها وعلاء ابتسم بحزن وناض خرج من الدار اتجه لصديق دربه مصطفى اللي غير شاف وجهه فهم اللي فيها بدون ميحتاج يسوله 
مصطفى:- دخل أصاحبي
علاء(رما جاكيطو على الكنبة وتكا بثقل الدنيا كلها على كتفه):- وقفتلي كي الشوكة فالحلق أمصطفى مسمعتنيش حتى 
مصطفى:- طبيعي الدكتوررررة خديجة مادير هاكدة ياصاحبي وليه شنو متوقع 
علاء:- والحل أنا دبا منقدرش نتخلى على ليلى ومنقدرش نعصى أمي اللي حطتني فموقف لا أحسد عليه 
مصطفى:- معرفت منقولك والسي أنور مدار والوو ؟
علاء:- بابا حاول معاها لكن كالعادة حكمت قرارها ومشات 
مصطفى:- إيوا وشنو ناوي دير ؟
علاء(حك على راسو بتعب وتكا):- منعرف أمصطفى منعرف
مصطفى:- افففف مشكلة هادي والله 
علاء:- راها يقولي واحد الراس نتزوجها ونحط الواليدة تحت الأمر الواقع لكن مقدرتش 
مصطفى:- تاهادي فكرة بصح تخاف مك تاخذها تحدي ليها وديرها بصح تغضب عليك 
علاء:- ياودي واش حنا فالعصر الجاهلي باش تتعامل معايا بهاد الطريقة وتخيرني بينها وبين ليلى بحالي راني مراهق معارفش شنو كيدير اففف فوقاش غاتفهم أننا كبرنا وولينا قادرين نتاخذو قراراتنا بوحدنا 
مصطفى:- نتا عارف أنها مستحيل تقتنع
علاء(لمعو عينيه):- إذن ماخلاتلي تاشي حل 
مصطفى(عقد حواجبه مفاهمش شنو كيقصد):- كيفاش زعما ؟؟
علاء:- مستحيل نفرط فحلم حياتي انا قررت نتزوج بليلى 
مصطفى:- و السيدة خديجة ؟؟
علاء:- غادي تقتنع مصيرها تقتنع بيها لأنها مغاديش تضغط عليا بهاد الحركات فعلا أنا كبرت ومبقاتش ضغوطاتها كيمشيو معايا .. مهم خليت خوتي معا الواليد فالدار خصني غدا نضرب الحديد محدو سخون ونتا غادي تجي معانا للخطوبة تفاهمناااا ؟؟
مصطفى(مصدوم فيه):- نتا عارفني معاك فالسراء والضراء
علاء(بابتسامة):- ههههه نتا مرتي اللولا نسيت حقا
مصطفى:- الله يعطيك متاكل باغيني نجيبلك رحاب يمكن 
علاء:- لالا المدام باغيها تنتقم مني وانا باقي محتاجها 
مصطفى:- واهاكدك أجي فين غادي ؟؟
علاء:- غادي فحالي 
مصطفى:- أكلس تتعشى معانا 
رحاب(خارجة مالكوزينة):- علاء بقا راه العشا واجد أخويا مرحبا بيك
علاء:- بارك الله فيك أختي رحاب بصح مرة أخرى وشوفي غدا نعول عليك فكري هاد الكسول 
رحاب:- خير إن شاء الله ؟
مصطفى:- امممم علاء غدا غايخطب ليلى رسمي 
رحاب(بلمعة فرح):-بصح بصح وهادا نهار مبرووك الله يكمل عليك بالخير 
علاء(خارج مودعهم):- نستناكم غدا الله يعاون 
علاء خرج من عندهم حامل فخاطره حلم العمر صونا مباشرة لابراهيم اللي حس بيه شوية متردد لكن قنعه باللي كاين وابراهيم تفهم الأمر وخبر مريم اللي تحمست وفرحتلهم كذلك ليلى بلغها علاء اللي حست شوية بالخوف لكن الحياة مغامرة خصها تغامر فيها وحتى لفوقاش غادي تعيش فالضيم تاهيا كتبغيه متقدرش تبعد عليه محيت ولا ساكنلها فالدم ومكتستغناش عليه لذلك بكل حماس بلغت عزيزة وعيسى اللي نشطو شوية وتحمسو للأمر بحالها وحطو الباقي فيد الله..

هيلين(نزلت من الدروج كتلوي فعنقها):- هففف عييت يلاه خلصت جميع الكسوة ديال ساريتا
جاد(شد يدها وكلسها حداه على الكنبة):- بيبي هيا رحلة يومين ماشي شهر
هيلين:- وماربما يكون الجو تما بارد خصني ندير احتياطاتي 
وليد(كالس وحداه ناديا):- همممم الوقت تأخر يفضل كل واحد يطلع يرتاح ويوجد حوايجه باش غدا الصباح ننطالقو راني بلغت عماد اللي تاصل بعاملي المزرعة باش يوجدو كلشي لرحلتنا 
ناديا(ابتاسمتلو):- رائع متشوقة كتر من ساريتا نشوفها 
وليد(بحب):- غادي تعجبك أكيد 
هيلين(وقفت وشدت يد جاد):-يلاه تصبحو على خير
جاد:- بون نوي 
وليد(غمزلو صون فرشة):- ليلة سعيدة
ناديا(مبعد مشافتهم مشاو رخات راسها بتعب وحطت يدها على كرشها بتنهيدة وارتياح):- هممم
وليد(قشعها ونزل راسو الأرض):- طلعي تانتي أناديا ترتاحي 
ناديا(كتلوي فيدها بصح قلبها كينتفض بغرابة شافت فيه):- آه غادي نطلع 
وليد وقف ومشا مجيهت المشرب وهيا وقفت بتلقائية وجات متجهة نحو الدرج بتثاقل وهيا متبعة حركاته وعاقدة حواجبها تنهدت بعمق وشافت فالأرض بفم منفوخ تذمرا وهو شرب ديك الجغمة والتفتت لقاها فمكانها جامدة كتصارع شي حاجة داخلها شنو هيا معرفش وباستفسار حط الكاس وتقدم عندها على بعد خطوات
وليد:- خصك شي حاجة أناديا ؟
ناديا(فيقها من شرودها):- أنا لا لا أ.. يالاه تصبح على خير 
وليد(بابتسامة عادية):- ونتي من اهلو
زادت حيرتها فيه واستغربت تصرفاتو اللي كانت عادية مي هيا وصلتها بشكل غريب طلعت بتوجس كتلتفت موراها لقاتو رجع بدون مبالاة لمحله وزادت غيظا كتنفض فشعرها بحركة جنونية ودخلت بيتها جبدت حقيبة صغيرة وحطت فيها شحال من كسوة ومتعلقاتها الشخصية وحطتها على الكنبة واستلقات على سريرها تنعس .. قلبها بقا ينبض بسرعة المليون وحست باختناق وارتعاشة فجسمها مالية كيانها غمضت عينيها باش تنعس لكن فينو النعاس بقات تتقلب على السرير ورجعت زفرت بعمق وحطت راسها على الوسادة ونعست لكن ما إن غفات عينيها حتى حلمت أنهم دايينلها مجد رضيع وكيبكي بدون توقف وهيا كتغوت عليهم باش يرجعولها ولدها وشي يدين مغمسين بالدم دايينو بعيد عليهااا .. حلت عينيها كتغوت وكتنهت ولقات راسها عرقانة بزااااف وكتتنفس بقوة قلبها غادي يسكت بالخلعة وتحسست بطنها بتلقائية شافت حواليها لقات راسها بوحدها وجاها البكا والرعب من ديك المنامة ويديها على كرشها وقفت بتوجس كتشوف حواليها وكأنها ملبوسة بالخوف من حقيقة اللي حلماتو وبقات تمسح بيديها دموعها وتتمسك ببطنها المنتفخة بقات راجعة خلفيا وكتشوف فبيتها وصولا إلى باب الغرفة اللي مدت يدها تفتحها تالقات ياسر واقف أونفاص ليها وعلالها يديه فوجهها وكانو عامرين بالدم وغوتت بعمق تافاقت على محاولات وليد باش تفيق
وليد(بخوف عليها):- ناديااااا ناديااا فيقي فيقي نتي راكي غير تحلمي 
ناديا(مفزوعة كتشهق وتبكي ويدها على كرشها بحال فالحلم):- وليد ولييييد حلمتهم باغيين ياخدوولي ولدي مجد مجد اهئ اهئ ولييييد
وليد(مسحلها على شعرها بسكون وخلاها تتكا على كتفو):- مجرد كابوس أناديا نتي هنا ماعليك والووو انساي ونوضي خذي دوش راه عماد وجد الفطور وكيستناونا لتحت 
ناديا(شافت حواليها ولقات أشعة الشمس والصباح وعقدت حواجبها باستغراب):- كيفاااش حنا فالصباح لكن ..
وليد(تنهد وشاف فيها):- آه حنا فالصباح ويالاه نوضي يالخوافة غانستناك لتحت 
ناديا اطمئنت أن ديك الحلمة مجرد كابوس ولقات راسها رتاحت ورجعت لرشدها ناضت ودوشت ولبست فستان طويل مزركش باللونين الأزرق بارد والوردي والأبيض وفيه غير سباتي الفوق بالحديد وفوق منو تريكو شفاف فالأبيض مبلعاتوش ودارت على راسها قبعة شمسية بيضا وهزت حقيبة يدها وحقيبة السفر اللي جهزتها ونزلت .. 
سارة(بنفس اللوك تقريبا وبقبعة الشمس):- وأخيرا اكتملنااااا جات ناديا
جاد(بسخرية مازحة):- تقلنا فالنوووم صباح الخير
ناديا:- صباح النور ديزولي محسيتش براسي
هيلين:- المهم فقتي باش منضيعوش الوقت 
وليد:- فطري أناديا نكونو حنا كملنا توجاااد 
هيلين:- جاد جيب حقائبنا مالفوق باش نديروهم فاللوطو ساريتا هاني واش هزيتي طابليتك ولا نسيتيه ؟
سارة(شهقت):- ياإلهي وانا كنقول شنو ناسية مستحيل نمشي بدونه ناوية نلتقط صور فالمزرعة كتجننننن
هيلين(شدت يدها):- أجي نطلعو نجيبوه 
وليد(شافهم كاع طلعو وبلال بقا كيخرج الحقيبة ديال وليد وناديا ومعدات عماد اللي جهزهم):-لين انتابهي معاك للأمور غادي يكون بيناتنا اتصال نتي عارفة المهمة كلها ولات على عاتقك
لين:- مستر وليد ما تعتل هم كلشي بدو يكون جاهز ع الموعد بس انبسطو 
وليد(شاف فناديا بنص عين ولقاها مسمرة عينيها كتشوف فيه وتابع):- تمام لين تفضلي 
مرجعش للطابلة بل اتجه لمكتبه وخلاها مستغربة تصرفاتو الغريبة اللي معندها تاشي ترجمة حطت الفرشيطة وحطت يديها على راسها كتحك جبهتها بتساؤل مفاهمة الذي بعث ، أما هو بتثاقل دخل ببرودة وبقا كيجمع طابليتو وشي حوايج خاصة بيه فحقيبتو الصغيرة وبعد مدة خرج رما عينو ملقاهاش كاينة وانتبه لباب الجردة مفتوح شافها تما وكلمها مالداخل قالها باش تدخل غادي يمشيو التافتت عندو باش تجاوبو لقاتو مستناهاش خرج لبرا تنهدت بعدم فهم وخرجت لحقت بيه .. مشاو كاملين فسيارتين هيلين وسارة معا جاد ووليد وناديا بوحدهم .. بقات تشوف فيه مرة مرة وتتسائل فنفسها أنه على غير طبيعته محيت مستحيل يسكت دقيقة وهو معاها ودبا الصباح كلو كيتصرف تصرفات على غير العادة هو الفتت عندها ورجع شاف فالطريق مد يدو اللي لامست هوائيا ركبتها وفتح قجر السيارة وجبد منو سي دي بدون ميطلع عينو فيها قفله وركبه ورجع ساق عادي وهيا غير كتابع كل حركة بفضول كبير وحيرة أكبر ، انطلقت أغنية أحبيتي بلا عقد ديال كاظم الساهر ونتفض قلبها وكأن الكلمات كتحكي عليه هو واياها وكان متقصد يوصللها المساج من خلالها خصوصا مين كان يدندن مرة مرة ويعاود للمقطع أحبيني أحبيني أحبييني وهو عينو على الطريق وكأنه بوحده فديك السيارة هيا صافي مقدرتش تتحمل وكحت بتلعثم 
ناديا:- نتا مزيان ؟
وليد(دار راسو عاد نتابهلها):- آآآه شنو ؟
ناديا(بارتباك):- معرفت راني نسولك 
وليد:- وعلاش السؤال كاينة شي حاجة ؟
ناديا:- يعني .. شفتك مم م تتت والو
وليد(بدون اهتمام):- هههه طيب 
عقدت حواجبها والتفتت للنافذة كتشوف فالطريق وتتأمل دوك المناظر الخضراء الشاسعة اللي كانت على طرفي الطريق وبقات كتسترق النظر ليه وتنفعل وترجع تتنهد وتشوف بعيد عليه .. المزرعة كانت بعيدة على المدينة بشي ساعتين تقريبا وصلو أخيرا ولقاو عاملي المزرعة فانتظارهم واللي كانو عبارة عن السي حمزة رجل كبير شوية فالسن وهو اللي مهتم بالجرادي ديال المزرعة وبأمورها يعني كبيرهم ومرته السيدة حبيبة وشي خدامات تانيين تحت أمرهم .. المهم استقبلو الجميع بحفاوة ودخل بلال والرجال الحقائب معاهم باش يستكشفو المكان ويأمنولو الحماية اللازمة في حين استقرت هيلين وجاد فغرفة وسارة فغرفة وكانت باقية غرفة ههههههههه طبعا فهمتوني ^^ كيكتاشفت هاد الموضوع جن جنونها وشافت فيه وهو مبتسم عاجبو الحال 
ناديا:- أنا غادي نبقى معا ساريتا فغرفتها 
وليد(مسح الابتسامة ودار باش يمشي عليها):- وأنا نفس الشي كنت غادي نقترحه عليك لكن بشكل مختلف ارتاحي نتي فالغرفة وانا وساريتا نتقاسمو البيت التانية المهم تكوني راضية .. نشوفك على الغدا 
نزل مباشرة واتجه للمطبخ ولقا تما الطناجر كيطيبو وعجباتو الريحة بزاف حسساتو بالإنتماء في حين كانت هيلين كدوش وجاد كيبدل حوايجه وساريتا برا فالجردة كتلتقط الصور لكل ماهو عجيب وملفت للأنظار التقى الجميع على فقرة الغذاء البلدي واللي تفننت السيدة حبيبة فتقديمه إضافة لأكلات من المحيط ديال المزرعة وجدتهم ، 
حبيبة (فيدها سربيتة):- بالصحة والراحة ويلا بغيتو أي حاجة غير عيطولي
وليد(بنظرة امتنان):- ربي يخليك أحبيبة أكل كيشهي الصراحة
حبيبة:- إيوا بصحتك أولدي والله حنا وكاع الجهة فرحنا بيك وبمجيتك عندنا ودايما كنتابعو أخبارك فالتلفزة وكندعيولك ربي يسهل عليك ويبعد عليك ولاد الحرام 
وليد(ابتلع ريقه بإحراج مبتسم):- ربي يخليكم نتوما أهلي وتستاهلو كل الخير
حبيبة:- لا أولدي وقوفك بجنبنا وبجنب صحاب الدوار كبير بزاف راه بيك باش قدرنا نعلمو ولادنا ونقريوهم لولا الثانوية اللي بيناتهالهم مكناش غادي نقدرو نوفرولهم هاد الشي وزيادة على الطوبيسات الخاصة بنقل الأطفال من ديورهم للمدرسة زعما خيرك مهما حاولنا نرجعوهلك راه منقدوش بلا الأنترنيت اللي حضرتك ساهمت فيه وبصراحة مين عرفو صحاب الدوار أنك جاي قررو يديرو احتفال صغير ليك فالبادية نتا وجميع اللي معاك مرحب بيكم ونتمنى اولدي وليد متخذلهمش راهم فرحانين بيك فوق متصور 
وليد(كان كيسمعلها بارتياح كبير وعلى وجهه ترسمت ابتسامة رائعة):- أكيد مغاديش نرفضها شنو بانلكم ؟؟
سارة(نطقت اللولا):- يس يس أي شيء نعيشه هنا يعتبر مغامرة 
هيلين:- اممممم علاش لا ياك أجاد ؟
جاد(مقدرش يقاوم الغدا وطول الحديث وهو ياكل):- آه آه نمشيو 
ناديا(حالة فمها مدهوشة من الشي اللي حكاته حبيبة على إنجازات وليد وتسلل لقلبها شعور بالفخر والإعجاب تاقاطعها مرة تانية بسؤالها المباشر ليها وانتبهت أن عينيه مسمرين عليها كيستناو الجواب): - أ.. طبعا يسرني نكون معاكم
حبيبة(ربتت على كتف ناديا):- مبروك عليكم والله يسخر ولدي وليد خير الرجال ونتي محظوظة اللي غادي تكوني مرته لاحقاش قلبه كبير وكيدير الخير بزاف لذلك ربي جازاه بيك محيت باينة فيك تانتي بنت الناس وطيبة 
ناديا(ابتلعت ريقها شافت فيه باش ينقذ الموقف):- بارك الله فيك 
هيلين(عقدت حواجبها وتأففت فداخلها لكن ما إن شافت فجاد بتاسمت كان غارق فطبسيه):- بشوية راه غاتكملنا كاع الأكل هاكدة
جاد:- اعذريني مقادرش نقاوم 
حبيبة(مشات):- بالصحة مرة تانية 
وليد(هز فرشيطه يشوف مين يبدي):- الله يسلمك
ناديا كانت كتاكل وهيا مراقبها حركات وليد التقاطو المتفنن لكل قطعة وأكلو ليها اعجابو اللي بادي على ملامح وجهه اللي كانو ساكنين وكلهم كيعكسو عينيه الرمادية المبتسمة بشكل ملحوظ نزلت بعينيها لقميصه البني اللي كان باليدين وجاي فالكول الفوق ب 3 قفافل كانت فاتح جوج ومخلي وحدة مبلعة وشعره اللي كان داير فوليم كيهبل لاحظت أنه مقصهش من فترة طويلة رجعت تاكل وهيا كتلاحظ شفتيه وهوما كيستقبلو كل قطعة وكأنها هدية موهوبة ليه ابتاسمت فداخلها وتذكرت أن أكله مختلف تماما عن أكل ياسر ونتابهت أنها رجعت للمقارنة بيناتهم وتنهدت بعمق مهتمة هاد المرة بصحنها فقط ..
مر الوقت بسرعة وديك العشية قضاوها فاستكشاف للجردة وللمزرعة ومشاو لجهة الخيول اللي نباهرو بيهم وكانو كيشوقو الإنسان لشي ركبة الجميع أعجب بهم وخلاو سارة تركب على مهر ودارو بيها تما شي دورات ، أما وليد استقر عند واحد الحصان لونو بني ناصح وكان قريب منو وكيمسدله على شعره بتركيز تام وتبين أنه حصانه الخاص ، شافتو بالأصح كانت مراقباتو بدون متشعر فين يمشي وشنو كيدير ولاحظت أنه استقر عند هاداك الحصان بالخصوص وكان بينو وبينه حديث صامت وشرود تام عن الواقع المعاش حتى قربت منو سارة اللي نزلت من دورتها فوق المهر عاد فاق من شروده وهزها باش تلتقطلو صور ..شوية وجا عندهم حمزة وخبرهم بموعد زيارة البادية دخلو كاملين باش يبدلو ثيابهم بما يليق ولبست ناديا فستان فاللون ابيض وفيه كرات صغار كوحل واصل حد الركب معا حذاء أرضي فالأسود وفالخصر مشدود بحزام جلدي أحمر وفوق فالصدر مقفول بقفالات حومر وجاي داير على عنقها بياقتين بشكل طفولي وشعرها رولاته وخلاتو مفرود على راحته ومايكاب خفيف تعطرت وهزت حقيبتها ونزلت .. لقات هيلين بفستان أصفر بارد واصل حد الفخاذ وجاي شوية مزير عليها ولفوق كان بلا يدين أما وليد وجاد كانو رائعين بستايلات شبابية يعني بدون كرافاطات وكاجوال وساريتا بلباس أزرق جايها مناسب ومعلقة على خصرها طابليتها الزهري باش تحمل معاها أحلى ذكريات مشاو جميع واصطاحبو معاهم حبيبة و وصلو لمقر الإحتفال وكان فالهواء الطلق وسط البادية معدلين كلسة بالأضواء المزخرفة والزواوق والناس دايرين فطوابلهم كالسين وفواحد المنصة مطرب شعبي ديالهم محيحها وغير وصلو الضيوف كلشي وقفو كيصفقو ويحييو بحرارة ونطالقت الدقة والفولكور الشعبي باش يستقبلوهم بأهازيج متنوعة تحت تحيات كبار البادية اللي جاو يسلمو عليهم ويستقبلوهم بحفاوة خلاوهم يكلسو فواحد الطابلة خصصوهالهم واستقرو عليها جميع تحت نظرات الناس المعجبة بيهم واللي كانو متايقينش راسهم أنه كيشوفوهم بصح .. ابتسامتهم مختفتش لأن الجو أصلا كان ساحر محيت بداو الموسيقى والناس فرحانين كيشطحو وكيقدمو التهاني والتحيات لوليد و جاد بشكل مستمر ، تسحرو بالأجواء اللي كانت زايدة وكتزيد تسخن بمعنى الحيوح هههههه ، نوضو جاد وهيلين باش يرقصو على موسيقى شعبية أصيلة وطبعا هيلين بعيدة على هاد اللون مي شدها جاد وبقا كيشطحها وهيا ميتة بالضحك ومتحمسة بشكل كبير و طبعا سارة ووليد نسخة طبق الأصل كالسين مربعين يديهم وهيلين كتريشلهم باش ينوضو لكن مناضوش
ناديا(لسارة وبصوت عالي باش تسمعها):- ساريتا نوضي عند ماماك لعبي شوية 
سارة(بخجل):- ننن لا أريد
وليد:- خليها على راحتها 
ناديا:- خليها تنوض تستمتع ماشي نتا كالس تكلسها معاك
وليد:- ههههه علاش باغية تنوضي؟
ناديا:- هاوا غادي يحرف الحديث عليا أنا ياودي كنهدر على سارة
وليد:- إيلا نضتي نتي هيا تنوض
سارة:- اتفاقية تناسب مملكتي هههههههه
ناديا(شافت فيهم بجوج ضربو فيدين بعضياتهم بانتصار):- اللي عجبكم 
رجعت هيلين وجاد كيضحكو من قلبهم على دوك الحركات اللي كانو يديرو .. مبعد شوية حطولهم العشا المتنوع وكملوها بشوا ديال الذبايح اللي ذبحوها استقبالا لوليد وطبعا أبطالنا مقاوموش لذة البراري وكلاو تاماقدو هيلين بقات شادة على كرشها محيت مشا الريجيم ياحسراه وسارة نفس الشي غير ناديا اللي كانت عادية محيت مكلاتش بزاف عكس جاد اللي بقا يتهزز بثقل ووليد كيشاركه نفس الحالة شي شوية ،، وطلقو مجددا أغنية شعبية وشافو كلشي ناض عليها وبقاو مبهوضين فيهم وجا كبير البادية وشد يد وليد ويد ناديا ونوضهم وحبيبة جات نوضت هيلين وجاد وساريتا ودخلوهم وسطهم ومشاو كاملين فسطر واحد وكانو دايرين الصف معا ناس آخرين ومرة هاد الصف كيتقدم مرة الصف التاني وكانت هاد اللقطة غريبة بحد ذاتها ليهم كاملين مي استمتعو بيها .. نظرات مرح جاد اللي كيشوفو فهيلين المبتسمة واللي بادلاتو بنفس النظرة بأنها مستمتعة بجنون كانو كيريحو القلب .. ووليد كان ملاحق ملامح ناديا بدون متشعر بيه مراقبها عن كثب وكانت حاسة بالجنون تاهيا مي عاجبها الحال ومبتسمة بشكل بريئ وطفولي وهادا اللي خلاه يبتسم برقة ويتابع رقصته معاهم ..عياااو وودعو الأسر اللي كانو فخورين بيهم ورجعو تجاه مزرعتهم حبيبة دخلت ديريكت تنعس وسارة وصلتها هيلين لغرفتها في حين جاد مشا شرب كاس لربما بعد عليه هاد التخمة في حين وليد كان باقي فالجردة كيشعل شي أغصان مداورين بحجر 
ناديا(بغرابة):- شنو كدير ؟
وليد:- إيلا جيتي لمزرعة ومدرتيش هاد الجلسة هادي عتابري نفسك مدرتي والو 
ناديا:- اممممم عاد فهمتك 
وليد(غمزلها ودخل لداخل):- جيبي شي حاجة لويها على كتافك الجو بارد برا وحنا تما سهرتنا 
ناديا(تابعاه باش تتوجه لفوق وهو نعطف تجاه الكوزينة):- ونتا شنو غاتجيب ؟؟
وليد:- غادي نشويلكم قطع كبدة بطريقتي 
ناديا:- هاااو وشكون غادي ياكل راحنا مبلعين من العشا لهيه هههه
وليد(دخل كيهدر):-لن تقاوميها أنا متأكد 
طلعت وهيا كتهزز راسها باش تجيب شي حاجة تلويها على كتافها ولقات هيلين نازلة بدورها وخبرتها أن سارة نعست وتوجهت عند جاد للمشرب وشدت عليه كاس وشربت تاهيا مبعد مدة بسيطة كانو ب 4 بيهم ملتفين حول ديك النار ووليد حاط 4 سفافد كبدة كيقلب فيهم بشوية عليه .. الجو كان ساحر وصوت الحشرات الليلية محاوط بيهم والنجوم صافية فالسما و الأشجار من كل جانب فعلا جو طبيعي ساحر ..
جاد(بحماس):- إذن هادي جلسة الأسرار كيقولولها غادي كل واحد فينا يكشف عن سر ليه محتفظ بيه فنفسه
وليد(شاف فناديا):- جاد خلينا مستمتعين 
هيلين:- واي نووووت وليد راحنا غير كنضحكو وصافي 
جاد(صفق بحرارة):- أوك أنا غادي نبدي هههههه 
وليد(قلب دوك السفافد):- بعد غير مجيهتي وعتارف باشما بغيت هههههه
جاد:- والله تافاهمني 
ناديا(بابتسامة):- طيب شنو السر أجاد ؟؟
جاد:- امممممم امممممممممم
هيلين:- ودبا علاش حركة الخوف اعترف شنو الحاجة اللي دارهالك وليد وحنا مفخبرناش ؟
جاد(شاف فوليد بحماس وحط يده على حنكه وشاف فهيلين وناديا):- هاد الضربة اللي راها فآثارها الأخيرة من صنع يد الحبيب وليد 
ناديا(شهقت):- هئئئئئ وليد ضربك ياك قتلنا تضربت بالباب ؟؟
جاد:- آه باش نغطي على فعايله ههههههه
هيلين:- هههههه كنت متأكدة 
وليد(بحنق):- ههههههه نتا درت علاش وايلا زدت فالهدرة غادي نزينلك الحنك التاني 
جاد(كيتحسس بألم مصطنع حنوكه):- له له ممستغنيش عن وسامتي 
هيلين(بغمزة مثيرة):- صراحة كانت مخلياك سيكسي بشكل جذاب
ناديا(كحت بخجل وشافت فوليد اللي هزز راسو مبتسم):- أكح ههههه
هيلين(بغرور مبتسمة):- شنو هادا هوا سري أنا هههههههه
جاد:- يا استغلالية صافي مين هاكدة غادي نكلف وليد بالأمر 
هيلين:- ياعيني طيب ونتي أناديا شنو سرك؟؟ 
ناديا(شهقت وشافت فيهم بتهرب):- خليوني التالية .. وليد ؟؟
وليد(شاف فيها بعمق ورجع شاف فيهم):- امممم سري أنا هو 
جاد(بحماس كيستناه ينطق):- ربي ربي على التشويق
هيلين:- نطق أوليد
وليد(مبتسم بشر وشاف فناديا):- أنا داير ليستة بالأيام وكلما كيفوت يوم كنضرب عليه وكنستنا اللي بعده يفوت بسرعة باش يجي اليوم اللي غادي نتزوجو فيه أنا وناديا 
جاد(شهق):- سادي معا راسك 
هيلين(باستغراب):- أوبس أبعد حاجة كنت نتوقعها
ناديا(حمارت بالخجل وشافت فيه بضياع وهو رجع يقلب السفافد):- أهاه 
هيلين(بمكر):- إيوا بقيتي نتي أناديا شنو سرك دبا ؟
ناديا(ابتالعت ريقها وشافت فيه وهو كان منزل راسو الأرض كيستنا شنو تقول):- فاللول مكنتش نبغي نكلس معاكم لكن دبا كنقلب غير على الفرص اللي يخليوني قريبة منكم و من وليد 
وليد هز عينيه مصدوم شاف فيها بتشتت ممتيقش شنو كتقول وجاد غمز لهيلين بمكر وهيلين ابتاسمت وبقات تشوف فالسفافد اللي كانو بداو يتحرقو 
هيلين:- وليد وليد الكبدة 
وليد(حيد عينيه بسيف من عينين ناديا اللي كانت كتشوف فيه بلقطة صامتة بيناتهم):- هاااه وي وي نسيتهم هاكو تفضلو وخليوهم يبردو راهم سخونين 
جاد:- امممم وخا كليت نص حولي فالحفلة لكن كبدة وليد لا تقاوم
هيلين(شدت السفود اللي كان حامي):- ففف فففف حامي 
ناديا(مدلها وليد سفودها وشداتو عليه وعينيها فعينيه فحديث غريب):- شكرا ليك 
وليد(بهمسة):- العفو 
كلاو ديك الكبدة بجو ضاحك وساخر وكملها جاد مين دخل جاب غيتارة معلقة فالبهو وجا يكيترلهم وهيلين وقفت تشطح وهو كيعزفلها وكيغني وناديا ووليد كيصفقو بشرود مرة كيشوفو فيهم مرة فبعضياتهم وكيتلاقاو عيونهم كيتلفو وبيناتهم منظر النيران زايد من دفء الجلسة ، فاتت سهرة ممتعة وطلع جاد رفقة هيلين مبعد متمناولهم ليلة سعيدة وبقا وليد كيحرك بعمود ديك النار باش تطفى وهيا كالسة فمكانها 
ناديا(بتفعيعة):- أ.. ندخلو ياك ؟؟
وليد(حط العمود وشاف النار بدات تخمد ومسح يديه ووقف):- واه يالاه 
مدلها يديه ووقفت طاحلها داك الشال وانحنى مدولها وهيا رجعت لواتو على كتافها وتمشات بشرود فديك الجردة وهو موراها كانت حاسة بحاجة غريبة وقلبها كان كيرتعش بشكل ملحوظ ، حطت خصلات من شعرها خلف ودنيها وشافت فيه غير شوية لقاتو كيشوف فالأرض وكيتمشا بجنبها ووقفت مقادراش 
ناديا:- أ .. شفتك معلقتش على الكلام اللي قلتو ولا أبديت برأيك ياكما غلطت فشي حاجة ؟؟
وليد(تنهد بعمق):- لا طبعا سعيد بيه 
ناديا(بتشكيك عقدت حواجبها):- صافي هادا مكان ؟؟
وليد(بعدم فهم):- مفهمتش 
ناديا(انفعلت شوية):- صافي والو انسى الموضوع 
جات تدخل بخطى متسارعة بعيدة عليه وهو لحقها شدها من يدها ولفها عنده بدفعة جات فصدره كترتعش وترتجف من قربو منها وقربها منو وأنفاسهم ختالطت وكل واحد مشتت فعينين الثاني وضااااايع بالمعقول 
وليد(همس بصعوبة):- طبعا كلامك أثر فيا وفرحت بيه بزاف من كترة مستصعبتو مقدرتش نصدقه لكنو محفور فذاكرتي ومخليني متحمس للقادم 
ناديا(تلعثمت وحست باختناق مقادراش تتحمل داك القرب اللي كيخليها ترتجف):- اممم هادا جواب شافي 
وليد(مسح بظاهر يديه برقة على خدها):- أجي نوصلك لبيتك 
ناديا(بعدت بصعوبة عليه):- طيب 
شدها من يدها وبقا مكاودها وقفل باب الزنقة وطلعو كانت البيت اللولا شادها جاد وهيلين اللي كان معنقها فحضنه وهيا بقميص نوم بنفسجي وكيلعبلها فشعرها وشفتيه فشفتيها بهدوء رائع .. والبيت الثانية كانت فيها سارة جا يفتحها وليد ولقاها مبلعة بالساروت 
وليد:- لا ميمكنش ديريها بيا اسارة يااااااا الله 
ناديا(رجعت من طريقها باستغراب):- شنوو كاين ؟
وليد(كيهمس بصوت خافت):- المجنونة بلعت الباب طبعا أكيد فاقت ملقات حد وخافت وبلعتها 
ناديا(ابتلعت ريقها وشافت حواليها كلشي مكشوف لتحت مكان تاشي بيت يقدر ينعس فيها وحكت جبهتها):- طيب محلولة بلاما نزعجوها وتفيقها من نعاسها أجي معايا 
وليد(بمكر تبعها داخلين لديك البيت اللي كان فيها سرير وكنبة):- يا سلام طبعا الأميرة غاتنعس فسريرها معززة مكرمة 
ناديا(حطت شالها وهزت وسادة من السرير وحطتها على الكنبة باهتمام):- ونتا هابلاصتك 
وليد(حك فراسه كيحيد جاكيطو الخفيفة وبقا بقميص أبيض ديميمونش):- امممم احنا ولاد الشعب 
ناديا(ضحكت بخفوت وهيا مركزة باش يكون المكان مريح وهزت غطا):- يالاه نعس 
وليد(استلقا على الكنبة كيشوف فيها بحنان وهيا حطت الغطا عليه وبدات تغطيه وكأنها كتغطي شي طفل):- وخا أماما 
ناديا(ضربت يده بشوية):- مباغياش نسمع صوت مفهوم ويلا نطقت حرف أوليد غادي نعسك عند حبيبة وحمزة 
وليد(ضحك مقلبه وهو كيشوف ملامحها الجدية):- يالطيف صافي نسكت غير خليني معاك 
ناديا شردت فكلمة معاك وابتاسمت وناضت من انحنائها متوجهة لسريرها ولكنو شدلها يدها وهو كيشوف فيها بعيون صارخة بالحب والعشق 
وليد:- تصبحي على خير 
ناديا(مقادراش على هاد الحركات اللي خطفو روحها منها):- و .. إنتا من أهلو 
وليد حيد يده وحطها على صدره وعدل من نعاسه وغمض عينيه في حين هيا شافت فحركاتو ومسحت على وجهها بتعب ودخلت للدوش غسلت وجهها وهيا كتتنهد بتعب ولبست فستان نومها السامبل ومشطت شعرها ورجعت شافت فيه كان ساكن الملامح وكأنه غط فنوم عميق من الوهلة الأولى واتاجهت لسريرها وطفات إضاءة الغرفة وبقاو غير الأباجورات الصغار اللي فكل مكان ودخلت فالفراش متكية على جنب كتشوف فيه وبابتسامة غمضت عينيها وهو بدوره فتحهم وبقا مراقبها وهيا ملتفة نحوه ومبتسم لهاد القرب بيناتهم ورجع غمض عينيه براحة وغاص في بحر الأحلام .. 

فالصباح الباكر فتح عينيه وكانت الشمس عاد كتشرق وملقاش ناديا فمكانها نتفض من محله ونتابه للباس نومها محطوط على السرير وعرف أنها ناضت وخرجت وقف وقلب فالدوش مكايناش تنهد وغسل وجهه باش يفيق ويخرج يقلب عليها وخرج فعلا من البيت وهو كيلبس جاكيطو الخفيفة متوجه للأسفل مبانتلوش وهز واحد الكاشني خفيف لواه على عنقه بشكل واسع زاده وسامة على وسامة وخرج برا الجردة كيشوف فكل محل مبايناش .. ومشا ديريكت لعند حمزة اللي صبح عليه وكان كيسقي الجردة وقالو الآنسة خرجت قبيلة شوية تشم الهوا هاكدة قاتلو ووليد توجه بسرعة للإصطبل وخرج حصانه البني وركب فوقه بدقة وروعة وياما قلبي الصغير لا يتحمل تخيلوه معايا فوق الحصان خارج بيه كيجري وكأنه فارس من أيام زمان .. خرج برا المزرعة وبقا بشرود وعيون مشتتة كيجري بالحصان وكيقلب بعينيه على ملاكو الرقيق خايف عليها من نسمة الهواء ، كانت هيا واقفة على سفح هضبة تما وكتطل على القرية والأراضي مالفوق وعلى المساحات الخضراء المتنوعة من محلها وشروق الشمس مزال مستقرش فصدر السماء ، كان منظر صباحي كيخلي النفس ترتاح وتشتاق للحظة هدوء وهادا اللي كانت محتاجاه تصفي بالها وذهنها من كل ماوقع معاها مؤخرا من آلام وأحزان وغير ذلك شعورها اللي ولا غالب عليها وعلى تصرفاتها واللي معرفتش تميزه ولا تفسره كانت فاتحة يديها على مصراعيها مخلية نسمات الهوا تتخلل جسمها والشمس ضاربة فيها ومستعدة تستقبل يوم جديد حتى ارتعش قلبها وسمعت صوت حصان كيصهل من بعيد والتافتت بسرعة نارية وشافتو جاي على عوده كيشالي يالاللة ديزولي جاتني معا الأغنية احم هههههههه المهم التافتت وكان جاي فوق الحصان بمنظر آسر وبنظرات رجولية توحي بأنه فارس همام كيتهز فوق الحصان وكيرجع يستقر وداك الكاشني الرجالي اللي دايره زاده جنتلمانية خلاتها تشهق وترتجف عجبها بزااااف بديك الهيبة كلها وهيئتو اللي خلاتها تراقبه بلاما تقدر تقاوم مشاعرها ، بقا كيقترب منها تا وقف ونزل من حصانه بتفنن ورما الحبل فوق واحد الحجرة على الأرض وتقدم عندها
وليد(كيشالي):- زعما مصرة تنوضيلي السكر بالخلايع ديالك 
ناديا(تلعثمت):- بغيت نشوف هاد المنظر الساحر و ونتا كنت ناعس مبغيتش نفيقك
وليد(حط يدو على جنبه كيشوف فيها وكيشوف فالمنظر):- امممم فعلا منظر لا يفوت مي هدا ممسموحش نتي مكتعرفيش الجهة هناااا 
ناديا(بابتسامة):- مغامرة مغرية صراحة مقدرتش نقاوم المنظر من نافذة الغرفة وخرجت لقيت راسي وصلت هنا 
وليد(تقدم قبلها وبقا يشوف من أعلى الهضبة داك المنظر):- أهاه هادي أساسا بلاصتي ديما فوقما كنجي للمزرعة كنجيلها رفقة صريح 
ناديا(قربت منو متسائلة):- شكون صريح ؟؟
وليد(ابتسم وريشلها للحصان):- حصاني سميتو صريح 
ناديا(ضحكت تا دمعو عينيها):- آسفة منك لكن ملقيت تاشي سمية من غير صريح تسميهالو مسكين ؟؟
وليد(مبتسم لضحكها وقرب منها وهو كيشوف فيه):- محيت هو الوحيد اللي معمرو كدب عليا 
ناديا(جمعت ابتسامتها بتنهيدة وتأثر كتشوف فصريح فعلا):- آه بعد المرات كتلقا الإخلاص متجلي فحيوان 
وليد:-فعلا وصريح من النوع المخلص جدا لصاحبه مكايقبلش شي حد تاني يركب عليه من غيري 
ناديا(بتذمر وعيون لامعة):- وانا اللي كان فخاطري نركب عليه تعرف جامي جربته
وليد(مدلها يدو):- كتيقي فيا ؟؟
ناديا(عطاتو يدها بتلعثم مفاهماش):- آه مي علاش ؟؟
وليد(بحماس):-أجي معايا 
ناديا(كتمشا موراه بارتباك):- لالالا نتا يالاه دبا قتلي صريح مكيقبلش غيرك يركب عليه 
وليد(وقف فجأة وهيا صطدمت بيه بتشتت):- وهنا كاين الفرق محيت أنا ونتي واحد ويلا مقبلكش صريح معناه كاينة شي حاجة غلاط هههه
ناديا(مصدومة):- ونعم التجربة صراحة يعني تغامر بيا باش سي صريح يقبل بيا ولا ميقبلش
وليد(قرب من ودنها بخفوت متوجهين نحو صريح):- عندو الودنين كيسمعو 10 ميط وكيفهم لذلك قوليها زينة 
ناديا(ابتلعت ريقها بخوف وهمست):- يا إلهي 
وليد(وصل عند صريح وطلق يدها وحط يدو على وجه الحصان وبقا يمسدلو وجاب يدها برقة وحطها على شعر صريح وبقات كتمسدلو بحنان وابتاسمت لأنها لقاتو شعور زوييييييين بزاف بزاف وحست بالحماسة ووليد حط يدو على يدها وبحركة وحدة هيا وياه كانو يمسحو على وجه صريح وشعره والتفت عندها رما عينو لبطنها وعض شفتيه
وليد:- صريح عندي ليك ضيفين ناديا ومجد وباغيك متحشمنيش وخااااا ؟؟
ناديا(حلت فيه عينيها):- شنو باغي دير يا مجنون
وليد بدون ميجاوبها هزها من فخادها وحطها على ظهر صريح وجات جنب كالسة فوقه ورجليها مجموعين على جهة وحدة وبقات كترتجف بيهم جايين قراب لخصر وليد اللي حط رجله فالسرج وطلع موراها على صريح وشدها من خصرها ودفعها لصدره بحركة قاتلة كتهبل وهيا انتافضت أحاسيسها وتقريبا قلبه خلف قلبها وراسها جاي بجنب راسه اللي جا مجيت كتفها وفوت يديه من جانبي خصرها وشد لجام صريح وكان بحالي معنقها خلفيا أنفاسو كتداعب حنكها وخصلات شعرها وشافت فيه بصعوبة وهو ابتسملها وحرك لجام صريح اللي تحرك بشوية وبقا يتمشى بيهم وهيا مغمضة عينيها خايفة لا طيح حست بالسرعة كتزيد وحلت عينيها كانت وكأنها كتطييير شعووور كيجنن كيهبل قلبها بغا يخرج من محله وهو كان فوق الشعور بكثير لأنه كان حاسس بيها فحضنه قريبة منه شهية بشكل مربك وحنونة ودافية ودوخاتو بعطرها وخصلاتها اللي كيداعبو وجهه ، طلق لجام صريح بيد وشد يدها وحطها على اللجام ورجع حط يدها الثانية على اللجام من الجهة الثانية ودار يديه فوق يدها وولات هيا المتحكمة بصريح وبنفضة وحدة حرك اللجام وصريح انطلق بأسرع مافيه … لقطة معمرو تنساها ناديا خفف من السرعة شوية بشوية حتى وقفه بجبدة وحدة وصهل .. نزل من عليه وشدها من خصرها ونزلها واستقرت على الأرض وهيا دايخة باقية فحضنه كتشوف فيه بدون إدراك وهو بلاما يستنى أي حاجة نزل بشفتيه وباسها وهيا خلات يديها مستقرين على صدرو بتلقائية وبادلاتو القبلة وكأنها مسلوبة بيه وهو حس بيها مصهورة بداخله وكتتجاوب معاه وهادا اللي جننه وخلاه يضغط على راسها بقوة جادبها لعنده بقبلة كتذوب الحجر تاقاطعهم التليفون اللي كيصوني فجيب وليد وبعدت عليه هيا اللولا حشمانة ومتلعثمة وعاقدة حواجبها من اللي وقع شدت على قلبها وبصعوبة نطقت وقاتلو يجاوب 
وليد(بنفس الحالة ديالها غمض عينيه وثبت راسه و رد):- وي جاد راحنا جايين أوك وخا  … وجدو الفطور يلاه 
ناديا تمشات بجنبه وهو جار بيد لجام صريح اللي كيتمشا بجنبهم وحسها ممتوازناش شاردة ومتوترة ومرتبكة ويديها قريبة ليديه وبدون ميشوف فيها حط يدو فيدها وهيا نتافضت وبدون متشوف فيه كاوداتو وهو زير على يدها وكأنه كيقولها أنتي مكانك معايا مهما كان مقدرتش تخبي اطمئنانها وراحتها وهيا معاه وكأنه كيوفرلها الحماية اللي هيا محتاجاها أما هو مكانش مصدق اللي وقع معاهم وقبلتها اللي أول مرة تبادلو حرارتها ويحس بشعورها متجاوب معا شعوره فعلا لقطة كانت لا تنسى وساحرة بكل المقاييس .. وصلو للمزرعة وحمزة شد عليه صريح ودخلو صبحو على هيلين وجاد وساريتا اللي كانو يستناوهم على الفطور وحبيبة كتحط آخر الأطباق دخلو غسلو يديهم بابتسامة ورجعو تناولو الفطور متبادلين أطراف الدعابات معاهم وبين عيونهم ابتسامة ولمعة متتفسرش ، كملو اليوم بلعب ورق وبرقص ومرح ونطالقو راجعين للفيلا ديالهم من جديد مخليين أحلى ذكريات ليهم فديك المزرعة وكنحدد بالخصوص ناديا ووليد ..

ديك الليلة فدار عيسى اللي كانت عامرة كان حاضر فيها مصطفى ومرتو رحاب ووليداتو اللي تصاحبو معا ولاد ليلى مباشرة وخرجو يلعبو فالجردة وكان ابراهيم ومريم وليلى وعزيزة وعيسى معاهم فالصالة وكذلك أنور ونوفل وأمنية ومبعد متبادلو أطراف الحديث الرسمي تم قراءة الفاتحة ديال ليلى وعلاء وخا كان مخيم شوية بؤس مين محضرتش خديجة لكن كلو معا الوقت ليه حل وعلاء كان مستحيل يخلي ليلى تفلت منو ولا هيا كانت قادرة تقاومه لذلك قررت تكون أنانية هاد المرة وتقلب على سعادتها بيديها .. 
أنور:- إيوا الله يجعل كلشي مبارك ومسعود وربي يجيب اللي فيها الخير
عيسى:- اللهم آمين 
مصطفى:- وا دبا خصكم تافقو على وقت العرس 
علاء(بمزح):- مكرهتوش يكون غدا ههههه
ابراهيم(شاف فليلى اللي حشمت):- ووخلينا شوية وقت بعدا غي نوجدو راسنا 
علاء:- ليلى شنو بانلك ؟
ليلى(بخجل):- اللي عجبك 
علاء(تنهد بعمق لأن عدتها كملت هادي أيام ودبا هيا حرة نفسها):- منا لسيمانة يناسبك
مريم:- ههههه سيمانة شنو توجد فيها يا السي علاء 
رحاب:- آه فعلا قليلة بزاااف
علاء(بتأفف شاف فيهم):- همممم صافي نزيدلها يومين 10 يام كنضن وقت مناسب
أمنية:- خويا وانا عارفاه غير قبلي أختي ليلى راه مغاديش يزيد كتر هههههه
نوفل:- ههههههه مقلق الأخ 
علاء:- طبعا راني كنت جدي مين قلت مكرهتش يكون غدا
أنور:- وخلي ليلى تختار ماربما عندها راي آخر 
ليلى(شافت فعلاء بحب ونزلت راسها):- ابراهيم احم ؟؟
ابراهيم:- وانتي مولات الشوار أنا خاطيني 
عزيزة:- هاه أليلى
ليلى:- صافي موافقة منا ل 10 ايام العرس
علاء(بأقوى فرحة فحياتو):- الله يسخرلنا 
ليلى(شافت فيه بتلعثم):- أمين 
عزيزة وطلقتلكم واحد سيدي تزغريتة تاعلة فاركة ولحقتها مريم بأقوى منها وقراو الفاتحة وتافقو باش منا ل 10 ايام يديرو حفلة بزواجهم لأن ليلى رفضت تكون حفلة كبيرة نظرا لوضعها وعلاء قتنع بفكرتها وبغا يديرلها خاطرها لذلك اقتصر على حفلة ضيقة بيناتهم يعرضو فيها الأقربون منهم لكنو متنازلش على فستان أبيض خلاها تواعده باش يتلاقاو هو واياها ويشريوه معا الخواتم ، فرحتها ديك الليلة مكانتش سايعاها حست وكأن الدنيا ضحكتلها من جديد مبعد مذلتها وآلمتها فقلبها نعست وهيا على وجهها أحلى ابتسامة وفودنها صوته الدافي وهو كيواعدها بأحلى حياة غايعيشوها بجوج قطع معاها مبعد متمنالها ليلة سعيدة وتنهد بعمق مين تفكر دارهم اللي وصلهم للمطار وخلاهم يوعدوه يحاولو معا خديجة توافق تحضر للعرس وتجي معاهم الأسبوع الجاي وعليه أوكلهم المهمة المستحيلة وخلاهم يتكلفو ..طبعا خديجة كيوصلو عندها كانت واقفة كي الصنم كتستناهم طول سوايع الرحلة ديالهم عائدين للديار وغير دخلو خبرها أنور بالموضوع وطيحت الفاز عمدا وعيونها تلفظ الشرر ودخلت لبيتها بعنف في حين كل واحد فالولاد توجه لبيته متوقعين هاد النتيجة .. دخل عندها أنور ولقاها كتبكي بصمت وغير شافتو مسحت عينيها بصلابة وقوة 
خديجة:- غادي نعس غدا عندي عمليات خصني نوضلهم بكري
أنور(جا موراها وبغا يربتلها على كتفها لكن رفضت):- خديجة تقبلي الأمر علاء خطب البنت رسمي ومنا ل 10 ايام عرسهم هو باغيك تحضري معاه 
خديجة(وقفت متمردة):- مستحيل مستحيل نحضرلهم ولا تجي عيني فعينه هوا ختار ديك المعيوبة إذن ينساني 
أنور:- نتي حكمتي عليها تاقبل متعرفيها شنو ذنبها أنها ضحية ل..
خديجة:- ههههههه واش قنعك بهاد الخوا الخاوي قتلك أنا مستحيل نوافق غير نهي الموضوع ومتجبدوليش يكون أحسن وياريت تاخذ فراشك وتمشي لبيت الضيوف باغية نبقى الليلة بوحدي
أنور(بتأفف خارج):- الله يهديك هادا منقول 
خديجة بمرارة بقات تشوف فالباب اللي لتخها موراه وحست بالخسارة والفشل ونزلت راسها أرضا ورجعت تبكي ..
عثمان(كيشاطي معاها بار مساج):- واعدتيني وأخلفتي بوعدك 
أمنية(كتبتلو):- فالعرس ديال علاء غادي نقولو كلشي 
عثمان:- صافي أأمنية وقيلة نتي مابغياش وكتماطلي
أمنية:- حشومة عليك أعثمان نتا عارفني كنتمناك كتر منك مي الظروف صعيبة عندي 
عثمان:- وانا متفهمك وديزولي كنفعل مرة مرة مي هادا لخوفي أنني نخسرك شيغي 
أمنية:- غير تهنا أنا معمرني نكون لشي حد مغيرك وغي خلي أمور عندي تتحسن شوية وبراسي غادي نفاتح علاء 
عثمان:- طيب أحبيبة نشوفك غدا غانفوت عندك كيتخرجي مالكلية 
أمنية:- أوك عثمان (بعتتلو قلب)
عثمان:- بون نوي (بعثلها قلب)

فالحبس تحلو بيبان الحديد وتقدم بوليسي وفتح باب الزنزانة ديالو ودخل 
جواد:- أخيررررا تفكرتني من فوقاش صيفطلك باش تجي أصاحبي؟
سعيد(صاحبه قذر بحاله):- عاد قدرت ندبر هاد الزيارة باش ميعيقوش بينا 
جواد(شد عليه قابصة الدخان):- مهم درت اللي وصيتك عليه ؟؟
سعيد(غمزله):- عيب خليت رجالنا يتمرمدو عليها والمعلوم وصل 
جواد(بسخرية):- خليها تتربى باش متعاودش تلعب معا سيادها 
سعيد(كيحكيلو اللي وقع):- قطعة تستاهل القسمة هههههههه 
~ سعيد كيتفكر ~
فاتي(دقو عليها):- شكووون ؟؟
سعيد:- سيدة فاتي معايا أمر من النيابة باش توقعي عليه
فاتي(مخلوعة فتحت الباب تشوف):- أمر آشمن أمر آآآآآآآه (غوتت)
سعيد دخل رفقة 4 ديال الرجال بلعلها فمها وهوما بلعو الباب وبلعو السراجم وداوها لبيت النعاس وهيا كتتنتر من بين يديهم وكتغوت وسعيد حل حزامته ونقض عليها هو اللول والتانيين شاديلها يديها ورجليها متتحركش وكلهم تعداو عليها بالدور خلاوها فحالة مقطعة مسكينة فاقدة وعيها جمعو حوايجهم وخرجو مخلينها على سريرها بكسوتها الممزقة وبحالة يرثى لها 
جواد(كيكمي ويضحك):- ههههههه ياك بعدا بنينة ؟؟
سعيد(عض شفتيه):- عسل 
جواد:- إيوا جيني للمهم ماهادي دوصيها تقفل بالنسبة ليا باغيك تهربني أسعيد نتا واعدتني ماللي دخلت ولحد الآن مكاين والو أصاحبي 
سعيد:- آشمن مكاين والو راني خدام فالموضوع صحابلك غير اجي وهرب عميد شرطة متهم بعدة جنايات خصني ترتيبات والحبة راك عارف
جواد:- قتلك طلب اللي بغيت وانا حاضر غير خرجني راني غادي نهبل هنايا 
سعيد:- عطيني سيمانة تكون برااا 
جواد(ضربلو فكتفه):- هدرة الرجال ؟؟
سعيد:- وايلي أصاحبي كلمة وحدة
جواد(فرح):- العز الخوادري 
فرح جواد بهربه من السجن واللي غادي يخوله باش ينفذ المخطط الانتقامي اللي فراسه وياحليلو ياحليلو مين يعرف بزواج ليلى وعلاء اللي مبعد سيمانة تاهوا المهم قلبي ممرتاحش غير الله يخرج العاقبة على خير ..

فصباح اليوم التالي
زكية(كتسمع أغنية نتاع سيرين عبد النور وكتغني معاها):- لو بص فعيني مرة بس حيحس أوام بشوقي ليه لو قالي تعالي قلب دق أنا روحلو أوام مقلش لاء .. لالا لا همممم آآآه تيريري اااه 
ياسر(بسخرية داخل للكوزينة):- مازيكا زووم راها هنا  ؟
زكية(بتلعثم):- ماشي كنت ناعس ؟
ياسر:- وجاني صداع فراسي من غناك 
زكية(كتعصر البرتقال):- امممم 
ياسر(كيقلب على السوارت):- كيفيق جعفر قولو غادي نضرب دورة ونرجع 
زكية:- السي جعفر خرج قبل متفيق بشوية وقالي خرج يضرب دورة 
ياسر(بعصبية):- شنو هادا اففف انا خصني نخرج دبا حالا كيغادي ندير 
زكية:- ستناه تايرجع
ياسر(شد تليفونو):- الفهامات تعطيهم حكة تتت … ألو جعفر فينك واه .. إيوا وفوقاش ترجع ؟؟ انا خصني حل دبرلي على لوطو تانية منبقاش انا محصور معاك صافي تاهادا حل جيبلي موطوري مالحومة القديمة وهنيني وصافي صافي راني غير نقول مالك شتني غادي نجيبه اوك متعطلش 
زكية(بلمعة فرح):- خليني نوجدلك الفطور فالجردة 
ياسر(كمش فيها عينيه وخرج وهيا بتاسمت):- …. لارد
حطتلو الفطور وكلست أونفاص ليه أمام منظر البحر وبدات تاكل وهو شد فنجان قهوته وبقا يشرب بسكون تام وهيا كتراقب حركاته بشغف وابتسامتها مرسومة على وجهها .. جمعت الطابلة وشوية ورجعت فيدها قابصة لعبة دومينو حطتهالو وشافت فيه بلمحة مرح
ياسر(باستفسار):- شنو هادي ؟
زكية(فتحتها وبقات تعدلها وتجهزها للعب):- دومينو كيما كتشوف
ياسر:- نتي مسالية ؟
زكية(هزت فيه حاجبها):- شايفاك نتا اللي مشغول طول الوقت وزايدون مغاديش تتهرب من اللعب سوى الى كنت خايف نربحك ههههه
ياسر(بتحدي):- تربحيني فأحلامك طبعا 
زكية(شافتو عدل كلسته وشرب جغمة من قهوته وحطها وبقا كيصاوب معاها):- دبا نشوفو واللي ربح يحكم على التاني 
ياسر:- اتفقنا سيري 
زكية(بلمعة فرح):- هانااااا غادية دقيقة نعدل هنا أوووك ساليت شكون يبدي ؟؟
ياسر(بغرور):- ليفام دابوووغ 
زكية(بتحدي حركت الدومينو):- على عيني 
بقاو كيلعبو واللعبة زايدة وكتعقد وفمرحلة كانو التعادل وفمرحلة تانية كان هو غادي يربح لكن هيا بحركة وحدة نتاصرت عليه وناضت بقات تنقز بفرح وكأنها دارت شي انجاز عظيم وهو قلب وجهه
ياسر:- راه غير انا خليتك تربحيني باش يكون فعلمك
زكية:- هههههه قل ربحتك اعترف اعترف 
ياسر(ضرب سطح الطابلة):- هممممم مربحتينيش أنا تساهلت 
زكية:- اممممم لاء انا ربحتك ربحتك ربحتك
ياسر(وقف وتقدم عندها):- في أحلامك 
زكية(قربت منو باستفزاز):- اعتاااااارف انني ربحتك ههههههه 
ياسر(شدلها يدها بنرفزة):- لاء مربحتينيش انا خليتك تربحي
زكية(زادت قربت منو مستفزاه اكثر وكتلاعب بشفتيها وعينيها):- غادي نحكم علييييييك 
ياسر:- لا راه متتحسبش لأنني خليتك بلعاني تربحيني
زكية:- ولووو المهم انا ربحت ونتا خصك تنفذ جانبك من الإتفاق
ياسر(بتأفف):- هففف ضربة وحدة كنت غادي ندمرك
زكية(كتتمايع):-ودقة وحدة دمرت أحلامك هيهيهيه
ياسر(شعلو عينيه بالجنون وشدها من يديها ونفضها لعنده):- كتتوهمي راني شرحلتك اللي وقع
زكية(كتلوى بين يديه بسخرية):- خصك تسمع حكمي 
ياسر(قربها منو أكثر):- اللي هوا ؟
زكية(غمضت عينيها وحركت شفتيها بتلاعب):- بما أنني فالأوراق الرسمية زوجتك ونتا زوجي حلالي بلالي فباغية منك حاجة وفقط
ياسر(كمش عينيه فيها):- علاش حاسس أن طلبك غادي يكون سافل أزكية ؟؟
زكية(ضحكت بعمق):- ههههههههههههه نتا مضطر تنفذهلي ماشي شغلي فيك انا الفائزة
ياسر(كيلعن حظه):- طيب نطقي طلقينيييييي شنو هو ؟؟
زكية(مدت صبعها لخدها):- همممممم 
ياسر(ضحك ونزل راسو الأرض من هاد المجنونة اللي بلاه بيها الله):- هادا مكان ؟
زكية:- آه غير هادا
ياسر(بابتسامة):- مجنونة على بالك
زكية(بغمزة فعينيه مباشرة):- على بالي 
ياسر شدها من يديها وحط يدو على خصرها وانحنى بهدوء باس خدها فقبلة ساكنة حرقت وجنتيها وخلاتها ترتعش منو وبعد عليها ووجهه عاد قريب من وجهها وعينيهم فعينين بعض وحط صبعه على خصلة بجنب عينيها بعدها عليها بسكون تام سحرها بملامحه ، حط صبعه تحت فكها وشدو برقة وغمض عينيه كيستنشق عطرها وفتحهم بإعجاب لقاها مغمضة عينيها وانتبه لسحر ملامحها الساكنة وهيا ببساطتها هادئة فكلشي وبعد عليها ..
ياسر(تنهد):- وصلك التنفيذ إذن نتهينا
زكية(فيقها من دوامة المشاعر وتلعثمت لكن ثبتت راسها):- العقبة للمرة الجاية 
ياسر:- ههههه يا غرورك 
كلست فمكانها وبقات تبتسمله وهو شارد بعينيه فملامحها البعيدة كل البعد عن شقرائه اللي ميقدرش يتنفس من غيرها ..

لين:- يا الله يا دنيا هو انا بحكي تركي يعني بقولك اتصلي بالفرقة الموسيقية ودققي معون الموعد الله يخليكي ركزي معي
دنيا:- ففف طيب ألين طيب 
وليد نازل من الدروج ولقا الفيلا كلها فيها تماثيل لمشاهير كرتونيين ومجهزة بالبالونات السوداء والبنفسجية غامقة وغيرو من التجهيزات اللي توحي بحفل جنوني غايكون تما جهزو تا الطوابل تما وعدلو المسائل ومابقا إلا وصول الفرقة باش يستقرو فوقعهم اللي كان بجنب الحائط السمكي ، دخل للمطبخ يطمن على سير الحلويات والأكلات الخفيفة اللي غايقدموهم ولقا عماد مترأس التنفيذ وطمنه أن كل شيء غايكون هو هاداك .. وجا طالع من جديد لعند سارة هاد المرة واللي كانت حاطة زيها على السرير وكتعدل شعرها باهتمام وتلعثم
وليد:- بيبي كملتي ؟؟
سارة:- مزال أبابا راني نستنا لين تجي تهز معايا 
وليد:- اهااااه طيب غادي نعيطلها باش تجيك فوراااا 
سارة:- ثانكيو دادي 
خرج لقا لين جاية بعدا عندها ووصاها بيها وتوجه نحو قلبه وطرق الباب ردت عليه وكانت بجنب مرايتها كتعدل راسها
وليد:- ناديا كملتي ؟؟
ناديا:- نص ساعة نكون واجدة
وليد:- طيب 
دخل لبيته ولبس طقم أسود جاكيطو طويلة واصلة مالخلف حد الركب وكانت جاية حسب ستيل الأرستقراطيين القدامى ودار بابيون فعنقه و شعره دارلو جيل بكثرة ومشطه على جنب واحد وعطاتو هيبة نتاع مصاصي الدماء هههههههه في حين ناديا لبست فستان أسود مالفوق جاي على شكل في مخلي صدرها المكتنز يعلو ويترسم بشكل عاكس بياضها ودارت قلادة سوداء ولبست ليكويات كوحل حتى للكوعين وفوق منهم لبست خاتمها و اللباس كان واصل تاللأسفل بفوليم مناسب وشعرها علاتو فتسريحة لفوق جات كي ملكة الظلام ههههه خصوصا بالمايكاب الثقيل اللي دارتو على وجهها كانت مبهرة حقا ، أما هيلين فكان زيها قططي عبارة على سروال جلدي أسود وفوق منو قميص جلدي معلق بسناسل وجاي بلا يدين وعنقه مفتوح كان بحال لباس الكاطومين وزادت فوق شعرها اللي طلقاتو بونضو جلدي طالعين منو ودنين قططية ولبست ليكويات خارجين منهم ضفار اصطناعيين فاللون الفضي ودارت مايكاب تاهيا ثقيل وجاها رائع ، جاد المغبون واختيارو السيء ههههه اختار زي أسد الغابة ولبسه وتخيلوه معايا جا سمييين وبقا هاز راس الأسد فيده كيف شي كاصك نتاع دراجة نارية ، سارة كانت عدلتلها لين مايكاب خفيف يناسب عمرها وصاوبتلها شعرها اللي حطت فوقو بونضو طالعين منو ودنين أرنبة ولبستلها قميص أرنب واصل حد الفخذين وخارج منهم فالخلف ذيل قطني أبيض ولتحت لبست جوارب شفافة فاللون الأسود جات زوينة بيه.. قبل ميبديو الحضور بالقدوم وصلت جميلة والبوس عادي وقدمو هديتهم لسارة واللي كانو رامون وريكس اللي فرحت بيهم بزاف وخلات عماد يتكلف بيهم ويحطهم فالجردة بعيد ونساحبو من الحفلة لأن الأجواء متناسبهمش ووليد تفهم وطلع خبر ناديا اللي كانت باقي موجدتش واللي حست بالإطمئنان اللي متمتعتش بشوفتهم الكريم ومبعد مدة..  حان وقت الإحتفال بداو الوافدين بالحضور تاعمرت القاعة وكانت سارة سعيدة جدا بداك الحضور وهيا وهيلين وجاد كيستقبلو الناس ووليد تاهوا اللي بقا كيقلب على أميرتو التائهة وسط الحضور وهيا بدورها كانت كتقلب عليه مابين الوجوه وهوما فهاد البحث هادا تلاقات عينو بعينها وابتسمو وتوجه لعندها 
وليد(شاف فيها ورجع يشوف فالحضور):- أميرة الظلام
ناديا(شافت فيه وبدعابة):- الدوق وليد 
وليد:- هههه إذن تجي عليك الكونتيسة ناديا 
ناديا(شدت كاس عصير من النادل):- هههههه اهااااه علاش متجيش عليا 
وليد(شد كاس بعصير أخضر):- مغروورة 
سارة بقات كتبتسم معا الحضور ومعا أصدقائها اللي جاو يحضرو معاها حفلة عيد ميلادها تحت أصوات الفرقة الموسيقية اللي كانت منشطة الجو وبقات مرة مرة كتشوف بعينيها فالباب .. نزلت راسها بيأس والتفتت تكلم صديقة مالمدرسة تاسمعت صوتو خلفها والتافتت عندو بابتسامة كان لابس زي زورو وداير ماسك على نص عينيه الفوق ولابس ديك القبعة ولابس سلهام أسود فوق سروالو البني وقميصو الأسود ولقاتو بدوره كيشوف فيها
سامر(بمكر):- أرنبة ؟؟؟
سارة(بشراسة):- زووورو ؟؟
سامر:- ههههه تشرفنا هابي بورذ داي سارة 
سارة(شدت عليه ديك القابصة نتاع الهدية بشرود):- ثانكيو سامر 
سامر(بابتسامة مغرورة):- يو ويلكوم
سارة(ابتاسمت وفيدها الهدية محاوطاها بحرص):- كيناسبك الزي بزاف 
سامر:- وانتي 
سارة:- شكرا .. ماماك مجاتش ؟
سامر:- هههه كيتشوفي زوجة أب فلة كدور هنايا عرفيها أمي 
سارة:- هههههه واووو شايفة أن الفكرة ممتعة للكبار كتر منا حنا 
سامر(كيشوف حواليه):- كل الشخصيات هنا تا كونان حاضر 
سارة(شافت واحد لابس زي كونان وبتاسمت):- طبعااا وسبونجبوب مستحيل ميجيش 
سامر(انتبه لبسيط كذلك وتعرف على هاد جوج ولاد):- ههههه طبيعي 
ياسمين(خلطت عليهم كي الرعد بزي الجاسوسات هيا وآية وفاتن):- عيد ميلاد سعيد 
سارة(ابتلعت ريقها وشافت فيهم وهوما متوسطين سامر):- شكرا ليك
آية وفاتن(حطولها صنادق الهدايا المغلفة فيدها):- نتمناوو تقبلي بهدايانا 
سارة(حاسة بثقلهم وهززت راسها):- أكيد وشكرا ليكم مرة تانية أ.. غادي نحطهم لهيه ونرجع 
سامر(تقاسم معاها القوابص):- غادي نعاونك تفضلي 
ياسمين(بمكر):- اممم الحفلة مابيهاش بصح خصها شوية أكشن 
فاتن:- أكشنها مع الجاااااسوسااااااات 
آية(ضربت فيدهم تاهيا):- يسسس 
تقدم مبعد مدة وليد للمكيروفون وتكلم 
وليد:- أهلا بالجميع وهابي بورذ داي بيبي ساريتا وكل عام ونتي بخير وبهاد المناسبة حابب نسمع منك أغنية ريمي وتحت تصفيقات الجمييييييييع طبعاااا 
الكل صفق وتقدمت سارة بخجل من المنصة وطلعت وابتاسمولها أفراد الفرقة الموسيقة وتنهدت بعمق وهيا كتشوف الجميع كيشوف فيها ملتحت وكيستناوها ونتابهت لسامر اللي كان جامع يديه باهتمام كيستنى ، تنهدت بعمق وغمضت عينيها وبدات تغني بصوت عذب ورقيق جدا وحنون جابتها رااااائعة وماجات تكملها حتى تقطع صوت المكروفون وولا صوتها ضئيل وسكتت محرجة ونزلت مالمنصة وصفقلها سامر بحرارة وتبعوه البقية كيصفوقلها كاملين وهيا انتابهت لابتسامة ياسمين الماكرة من وسط الحضور وعرفتها هيا مور هاد الإحراج زفرت بعمق وجات هيلين جارة كعكة الميلاد الضخمة واللي كان عليها صورة سارة وعدة شموع وجتامعو الكل حواليها وهيا كتصوط فالشمع وصفقولها ، تمنالها وليد عيد ميلاد سعيد كذلك هيلين وجاد وناديا واصدقائها اكيد .. بداو العمال ديال التقديم كيقطعو فالكعكة وكيفرقو على الحضور فجو مرح لكن ليس لوقت طويل ياسمين عطات أمر لفاتن اللي تسللت لجهة الهدايا وهزت قابصتها اللي جابتها وفتحتها وخرجو منها 4 ديال الفيران والله الله تقلب الجو من حفلة عيد ميلاد لحلبة مصارعة كلشي كيغوت وكلشي هارب وسارة بقات مدهوشة بحزن حيدت بونضو الأرنبة ورماتو على الأرض وخرجت للجردة هاربة كتبكي .. في حين الحضور كلهم خرجو هاربين بمن فيهم ياسمين واية وفاتن وطلعت هيلين فوق الطابلة خايفة وناديا من الدروج وبقا عماد ووليد وجاد وبلال كيحاولو يشدو دوك الفيران 
جاد(شادو من الذيل ديالو ميت):- اففففف هادا آخر واحد 
وليد(كيزعف):- شكون هاد الحقير اللي دار هاد الفعلة هادي؟؟
ناديا(بقات تقلب بعينيها ولقات كلشي دمر وتحول لحطام الطابلات والبواقات و الكعكة اللي ولات ع الأرض المهم روينة كحلة):- يا الله كلشي تقلب رأسا على عقب
هيلين(عاد واقفة كي المسمار فوق الطابلة):- ياربي المكان كلو تدمر الحفلة ضاعت 
جاد(ضرب الراس نتاع زيه جابو فالحيط بركلة):- اللعنة 
سارة(كانت كتبكي قدام واحد الشجرة وهو تقدم عندها بأسف وحيد القناع نتاع زورو من وجهه):- أنا آسف من أجل الحفلة سارة
سارة(عطاتو بالضهر وبقات تمسح دموعها):- علاش ممشيتش ؟
سامر(بأسف):- اللي وقع من تحت راس ياسمين 
سارة(بانفعال):- إذن ياسمين وصلت للي بغاتو وخلات عيد ميلادي أفظع حفلة فحياتي 
سامر:- متعصبيش وانا غادي ..
سارة:- تعرف شنو ياسمين ماشي غير وصلت للي بغاتو غادي تحقق تاللي كتتمناه غادي نطلب من بابا يبدلني لقسم آخر ونخلي ياسمين تشبع باللي بغات وياريت تانتا تبتعد عن طريقي 
سامر(شافها غادية):- جبانة كتهربي 
سارة(وقفت بعنفوان كتشهق بالبكا):- حفلتي دمررررت 
سامر(فهم حزنها ومبغاش عليها):- عادي يا سارة هادشي كيوقع وبالعكس أنا استمتعت مزال تشوفي الفيديو اللي صورته والناس كتهرب كانت أمتع لحظة عشتها فحياتي 
سارة(بعدم تصديق):- هادي حفلة عيد ميلادي اللي تخربت ونتا تقولي مستمتع
سامر:- ههههه آه محيت مكانش شي حاجة تخليني نزعج نفسي حفلة تخربت عادي علاش غادي نحرق اعصابي
سارة:- نتا سطحي التفكير وعديم الاحساس ايضا
سامر(بغرور):- لكن مرتاح البال 
سارة(بتذمر):- هممممممم 
سامر(قرب منها غير خطوتين وبقا يشوف فيها معوج راسه وهيا منزلة راسها الارض):- نتي قوية سارة واللي وقع مغاديش يهزمك لكن مخصوش يمر مرور الكرام
سارة:- شنو تقصد؟
سامر(هزلها حاجبو بذكاء):- عطييني الضو الاخضر وانا نشرحلك 
سارة(بابتسامة خافتة):- تتت اوك 
أعجبت سارة بفكرة سامر اللي ودعها بابتسامة ومشا وهيا رجعت لداخل الفيلا لقات العاملين كينضفو ويعدلو وحاولو كلهم يطيبو خاطرها لكن كانت اصلا مبتسمة ومداياهاش وهادا اللي ستغربوه ، قدرت تنقذ هداياها و تطلعهم لغرفتها رفقة لين وبقات تفتحهم هدية هدية ووصلت لهدية سامر اللي كانت عبارة عن كتاب من الطراز العربي القديم منقوش على ظهره بكتابات عريقة ذهبية وفيه محبرة كذلك عتيقة وعليهم ورقة مكتوب فيها "اكتبي كلما تشعرين به سيأتي يوم وتحتاجين لأن تعودي كما كنتِ سامر" .. ابتسمت وفتحت هدية ناديا ووليد واللي كانت عبارة عن كمان مصحوب بكتيب عن طريقة الاستعمال وابتاسمت للهدية ايضا وفتحت هدية جاد وهيلين اللي كانت عبارة عن ساعة رملية كتحدد الزمن بشكل عكسي ولأنهم عارفينها شغوفة بالأشياء القديمة والعتيقة عجبتهم هادي رفقة علبة مايكاب بنوتية مكتوب عليها أونكل جاد سخرت منها لأن هادي حركاته وبقات مبتسمة رفقة هداياها ، وخا لتحت كاينة مأساة تنظيفية وفظرف ساعات قدر الطاقم العامل باش يرجع الفيلا ملداخل كيف كانت سابقا وتم تنظيفها بشكل كلي .. سخرية ياسمين وآية وفاتن اللي ماتو بالضحك من الشي اللي وقع كانت مخلياهم ديك الليلة فوق السلك مستمتعين بانتصارهم ومعارفينش شنو كيستناهم يوم غد اللي فاقت فيه سارة بشكل عادي ولبست طقمها المدرسي وحملت حقيبتها ومشات مبعد مفطرت وصلت لمدرستها والكل بقاو كيتهامسو ويضحكو عليها لأنه ففيلتهم كاين فيران وأغلبهم معارفينش أن ياسمين مور هاد المقلب .. تحملتهم بصمت وبغضب ومشات استقرت فقمعدها تحت نظرات ياسمين الجاحظة واللي توقعتها غادي تحزن وتترك القسم بما فيه لكن هاهيا جات اليوم وكأن شيئا لم يكن
ياسمين(ناضت عندها بعصبية قبل دخول الأستاذ):- نتي واش جابك ؟؟؟
سارة(كتحط أدواتها بهدوء):- جاية نقرا 
ياسمين(ضربتلها الأدوات معا الأرض):- كنت واضحة معاك سوى إيلا مبغيتيش تحشمي 
سارة(شافت فأدواتها ع الأرض):- وانا قتلك جاية نقرا ماجاياش ندابز 
ياسمين(بسخرية):- البنات هادي كتقلب عليا 
آية:- نتي مكتعرفيناش مزيان 
فاتن:- راه والله تاندمرووك 
سارة(شافت فيهم ببرودة):- أوك 
ياسمين(استفزتها ع الأخير):- غادي نوريك مين منفعوكش الفيران اللي هديتهملك لبارح إذن خليني ندير شغلي 
فاتن:- مفهمتكش دمرنالك الحفلة تدمير وجاية عاد بوجهك حمر تتحداينا 
آية:- إيوا نتي جنيتي على راسك حنا اللي يوقف فوجهنا كيندم
سارة:- كملتو العرض ديالكم إذن لمقاعدكم عفاكم باغية نقرا 
ياسمين(لتخت رجليها ومشات من قدامها وهيا كتردح):- دبا تشوفي اللعينة 
سامر(جا داخل بتعالي كعادته وشاف فسارة مباشرة وابتسم):- صباح السكر 
سارة(شافتو انحنى وبقا يلتقط معاها أقلامها):- أهلا سامر 
سامر(مبتسملها بحركة رقيقة):- أحلى صباح كيف شعورك واليوم أول يوم فسنة جديدة ليك؟؟
سارة(كلست بمتعة):- راااائع بزاااف 
سامر(حط حقيبتو وكلس بجنبها بمتعة أيضا):- حاسس بيك 
ياسمين(حالة فيهم عينيها وباغية تاكلهم وفاتن كتشد فيها):- هممممم هادووو شوفي كيف كيديرو فالقسم 
فاتن:- خليهم دبا فالفسحة نجبدولها ودنيها 
آية:- آه غير خليها تبرع دبا 
دخل الأستاذ وفاتت الحصص وياسمين مسمرة عينيها عليهم مكرهتش تنتفهم تنتيف واخيرا جات الفسحة ولكن سارة متوجهتش ليها إنما تمشات لمكتب المرشدة واللي كتهدر دايما فالبوق وتنضملهم أمورهم وبعد المرات تطلب حضور شي طالب من تما المهم البوق كيسمع للمدرسة كلها وفكل ركن .. استأذنتها سارة متحججة بشي حاجة وخرجت ديك المرشدة وبقات سارة كتسناها تما تادخلو عليها ياسمين وآية وفاتن والشر كيتطاير منهم
ياسمين(دفعت سارة لكتفها):- نتي مبغيتيش تحشمي كاع كالسة كتنهنهي معااااه ولا دايرالي اعتبار
سارة(رجعت خلفيا وضغطت على زر البوق):- وعلاش بيك كاع هادشي شنو حكايتك معاه 
آية(دفعتها):- ونتي شغلك 
ياسمين:- هو ديالي أنا كنبغيه من العام اللي فات متجيش نتي بنت اليوم وتخطفيه مني 
سارة:- لكنو مشايفكش حتى 
ياسمين:- سااااامر كيمووت عليا وديما لاحقني فكل بلاصة نتي اللي مدخلة روحك بيناتنا
سارة(بابتسامة):- شنو باغية مني علاش كتغيري ؟؟
ياسمين(دفعتها):- نغيييير منك نتييييي هههههه ضحكتيني 
سارة:- عنداك يصحابلك تخريبك للحفلة ديال عيد ميلادي البارح غادي تهزميني متحلميش 
ياسمين:- هاد المرة حطيتلك فيران وخربتها عليك والمرة الجاية غادي تكون أقوى وأشد باش نحطمك بمرة 
فاتن:- متصوريش شحال استمتعنا مين حليت صندوق الفيران وطارو على الناس أروع هدية وصلاتك قولي الحق 
آية:- ههههه هادا متستاهلي 
سارة:- هادشي اللي درتوه مغاديش يفوت بدون عقاب
ياسمين(قربت منها بشر):- وشكون اللي غادي يعاقبنا؟
سامر(جا داخل وموراه المرشدة والمديرة):- حنا 
المديرة:- كلكم تبعوني للإدارة فورا 
خرجت ياسمين وآية وفاتن بحرج قدام التلاميذ اللي كلشي سمعوه بقاو كيغوتو عليهم بصوت موحد ويدعويلهم بالطرد من المدرسة وحسو البنات باللي نهايتهم قربت وبقاو يترعدو فملابسهم في حين سارة وسامر تمشاو بثقة وراحة وابتسامة بيناتهم أنه ربحو هاد الحركة هادي .. مبعد ما أجبرت المديرة كلا من ياسمين وفاتن وآية باش يعتاذرو من سارة وطبعا بعد رفضهم القاطع اضطرت لنقلهم لسلك دراسي تاني باش تبعدهم تماما عن سارة وسامر اللي كانو طايرين بالفرحة مبعد هاد القرار وطبعا ياسمين توعدتهم بالإنتقام ولكن شكون سمعلهم مبعد متفضحو فالمدرسة وولا شكلهم زباااالة ..

ناديا(فالتليفون كتهدر):- إيوا وشنو داروو ؟
مريم:- وجدي روحك منا ل 10 ايام عندنا عريسة هههههههه
ناديا(بفرح):- الله خبر شحال زوين 
مريم(كتعدل روحها باش تخرج وهيا كتهدر):- بصح مو وتقولي تنازلت يالطيف منعرف كاع مالها على داك التكبر والنفاخة آه آه شحال شايفة روحها 
ناديا:- المهم ليلى فرحانة هيا وعلاء ومبعد مو تقتنع بيها ليلى مسكينة تستاهل تفرح وانا متأكدة كيغادي تتعرف عليها غادي تبغيها اكثر من بنتها
مريم:- ع الله اختي بصح راها رفضت دير عرس وغادي نديرو حفلة على الضيق اليوم فالعشية غادي تنزل معا علاء للسوق يجيبو فستان والخواتم 
ناديا:- آه مليح المهم هي الفرحة اما المظاهر مكيهمش 
مريم:- عندك الحق والمهم راني قتلك الجديد باش إيلا بانتلك ضربي دورة عندناا قبل العرس 
ناديا:- منعرف نشوف وقتي 
مريم:- أوك حبيبتي أنا غادي نمشي دبا لدارنا نشد الولاد معا ماما بيما رجعت ليلى مالسوق 
ناديا:- وخا سلمي كاع عليهم وعلى جدي 
مريم:- يوصل الزينة راه جا ابراهيم اوك سلام 
ابراهيم(جا داخل من برا):- مريم مريم
مريم:- هاني واجدة كنت نستناك باش نحطلك تغدى ونمشي لدارنا 
ابراهيم(بملامح ممفهوماش):- مريم عندي خبر سيء بزااااف 
مريم(مخلوعة):- ياك لاباس أبراهيم؟
ابراهيم(زفر بتعب وحزن):- فاتي الرقاصة لقاوها فدارها ميتة وفوضع مخزي للغاية مغتاصبينها شي وحوش بشريين البارح وهادا أدى لسكتة قلبية تعرضتلها مسكينة 
مريم(بفزع):- لا إله إلا الله مسكينة متستاهلش مبعد اللي دارتو معانا 
ابراهيم:- راهم كيقلبو على شكون مورا هاد الفعلة وغير يطيحو بين يديا نحبسهم كااملين 
مريم(حطت يدها على صدره وعنقاتو):- متعصبش أحبيبي هادا قضاء وقدر 
ابراهيم(عنقها بحزن):- يالاه نوصلك لداركم مافيا اللي ياكل خصني نرجع للكوميسرية نشوفو فين وصلت القضية
مريم(بلمحة شك):- زعما ميكونش جواد ..؟؟؟
ابراهيم:- منعرف بصح منضنش يكون موراها راه صعيب عليه 
مريم:- صعيب آه بصح ماشي مستحيل 
ابراهيم(والشك ساوره):- زيدي أمريم وخلي هادشي مبعد آه بلاما تخبري ليلى دبا خليها تاترجع وبلغيها
مريم(هازة حقيبتها):- واه أحا بلاما توصييني
داها لدارهم وتوجه مباشرة للسجن عطاهم ورقة بالسماح بالمرور ودخل لبلاصة الزيارات تاجا داخل عليه بوجهه الشرير
جواد(هاز يديه):- ماي براذر وكان فبالي راك جاي وكان حسنت اللحية ههههههه
ابراهيم(بدون نفس رمالو صور جثة فاتي وهيا على داك الوضع):- عشيقتك ماتت 
جواد(حط يدو بتحسر على قلبه):- أوووبس مسكينة متستاهلش هاد الموتة 
ابراهيم:- هههه شايفك ممتفاجئش 
جواد:- وعلاش غانتفاجئ فاتي مجرد بياعة بيني وبينك بغيتهالها لاحقاش غدرتني 
ابراهيم:- ونتاقمت منها 
جواد:- عندك شي إثبات هههه معندكش إذن بلاما تعذب نفسك
ابراهيم(باشمئزاز):- عييت نشوف على عقلية عندك مقدرتش فين كنت مخبي هاد الشر كلو أجوااااد ؟؟
جواد(دار رجل على رجل وقفل ملف فاتي بيديه):- والله أنا أنا نتوما اللي تبدلتو لكن ربي غادي ينتاقم منكم وبدا ب415 وصلوني الأخبار ناديا تطلقت منو وغادي تزوج مستر وليد والله هيا اللي عبرت ضربت كلشي للتوش وغاتعيش منغنغة بلا حب بلا وجع قلب هههههههههههههه
ابراهيم:- متهدرش على ياسر بهاد الشكل أقلو مخرجش قذر بحالك 
جواد(بشر):- وكيراها واحد الخاينة ديال ختك سمعت من مور طلاقي راها خارجتلها ؟
ابراهيم(ضرب على الطابلة بعصبية):- بلع فمك ولا غادي نهرسولك النذل
جواد(كيضحك باستفزاز):- ههههههه خليني تانخرجلها مبعد متسقط التهم ونرجعو الذي مضى
ابراهيم:- هههههه كتحلم نتا غادي تتعفن فالحبس تاتطلع ريحتك وختي شافت حياتها بعيد عليك وقريبة تزوج باللي يستاهلها ماشي بحالك نتا 
جواد(بنظرة شرسة شافه واقف):- على جثتي سمعت على جثتي ونسمحلها تتزوج داك سوليكا
ابراهيم(مجيت الباب وبنظرة انتصار):- كنت باغي نعرضك لكن دوماج نتا محبوووس ههههههه 
جواد:- معمرها غادي تكون ليه سمعتني وانا غادي نحرص باش ندمرها هيا وياه 
ابراهيم:- وغي خرج غاتلقاها تزوجت بيه عرسهم السيمانة الجاية .. سي يو ههههه براذر 
جواد بقا مسمر عينيه على الباب الحديدية اللي تقفلت وفراسه جملة كتتكرر عرسهم السيمانة الجاية عرسهم السيمانة الجاية وابتسم بألم وقرر باش ينتقم منهم شر انتقام وفرح أن سعيد غاديرلو فطريقة للهرب واللي جات فالوقت المناسب ليلى مستحيل تكون لغيره يا هوا يا ماكانش … 

ابراهيم(بمجرد مخرج هز تليفونه واتصل):- خصني نشوفك دبا أوك مجيت الجرف فين تلاقينا آخر مرة متعطلش 
ياسر(واقف فالجردة):- صافي مسافة الطريق نكون تما باي …(رجع صونا لرقم جعفر)تيييت تيييت جعفر وي شوف راني غادي نقضي واحد الغراض راه جابولي الصباح واحد اللوطو واه قالهالك جوليو صافي سلملي عليه اشوف حاول ترجع للدار واحد الشوية زكية غادي تبقى بوحدها اوك صافي .. سلام
خرج من الجردة والتاقطت جاكيطه لبسها وهز سوارت اللوطو وجا خارج وهيا نازلة 
زكية:- ياسر غادي تخرج ؟
ياسر(شاف فيها):- عندي واحد الغرض مغاديش نتعطل عليك أزكية 
زكية(شافت فزوايا الدار ونزلت راسها):- آه
ياسر(رجع لعندها ووقف مقابلها):- متخافيش ديري تلفزيون وتفرجي أنا منتعطلش وجعفر راني كلمته شوية ويكون هنا
زكية:- صافي وخا معليش
ياسر(خاطره منبأه باللي شي حاجة غادي توقع):- زكية 
زكية(علات عينيها وشافت فيه):- نعم 
ياسر(بابتسامة ودية):- شنو باغية نجيبلك معايا ؟
زكية(ابتاسمت):- أي حاجة منك غاتجيني زينة 
ياسر:- تمام نشوفك إذن
زكية:- الله يلقيلك الربح
ياسر(حط يدو على خدها بحركة طيبة وخرج):- سلام
رجعت حطت يدها على خدها بحب وكلست تايهة في عالم تاني من مور ديك اللمسة الحبيبة على قلبها … ومبعد مدة كان وصل ياسر عند ابراهيم للجرف ونزل من السيارة متوجه عنده
ياسر:- ابراهيم
ابراهيم(عنقه):- ياسر كيراك اصاحبي 
ياسر:- نسلكو طمني نتا عليك كيرا مريم وليلى والولاد ؟
ابراهيم:- بخير الحمد لله ليلى غادي تزوج علاء السيمانة الجاية 
ياسر:- اهااااه خبر زوين هادا ايوا الله يسخر بصح مالك مغوبش ؟
ابراهيم(بتأفف):- عاد جيت من الحبس شفت داك الحمار ديال جواد فورلي دمي 
ياسر:- وعلاش تمشي عندو تانتا خليه عليااا 
ابراهيم:- الرقاصة اللي باعتو صبناها اليوم ميتة ومغتاصبينها بوحشية واكيد هوا عندو يد فالموضوع ومشيت نستفسر بصح خرجت بوالو 
ياسر(بأسف):- للأسف كنا عايشين معا حقير مبان على حقيقتو تافات الفوت 
ابراهيم:- تتتت المهم خلينا مهاد الهدرة جيت باش نقولك راه الإدارة كطالبك بإنهاء القضية فأسرع وقت حددولك المهلة ويلا منجزتهاش خصك ترجع لهويتك الحقيقية 
ياسر(عاقد حواجبو):- شنو كتقول ؟؟
ابراهيم(عطاه ورقة القرار):- ماشي انا اللي كنقول هوما هاك شوف 
ياسر(قراها بيأس):- تاقربنا نوصلو عاد بانلهم هاد الأمر عموما بلغهم إتمامي للمهمة فالوقت المناسب غادي يتم
ابراهيم(شد عليه الورقة):- يوصل
ياسر(بتشتت):- و .. ناديا عندك عليها شي خبر ؟؟
ابراهيم:- أمورها عادية مكان جديد
ياسر(بتلعثم):- شفتها ؟
ابراهيم(بكره لرؤيته لوليد):- آه طبعا 
ياسر:- وكيبانتلك ؟
ابراهيم:- فرحانة وعايشة حياتها وتانتا عيش حياتك ونساها عليا 
ياسر(كاره طريقة ابراهيم وشاف تليفونو):- خصني نرجع دبا جعفر كيصونيلي يالاه ايلا كاين شي حاجة تانية صيفطهالي فالموقع نشوفك مبعد 
ابراهيم(متجه نحو سيارته تاهوا):- وخا تهلا
مشا ياسر راجع للدار مبعد مخبره جعفر أنه ملقاش زكية وهاد الأخير حك النااااار متوجه لعندهم وصل ودخل كيجري لقا جعفر واقف جامع يديه بحيرة تامة
ياسر(بعدم تصديق بقا كيشوف فالدار):- فين زكية ؟؟
جعفر:- توقعتها فالجردة وقلبت عليها كاع الجهة ملقيتهاش و لقيت هاد الرسالة فوق الطابلة
ياسر(بعينين ممصدقينش):- هااااات شنوووو هادي أجعفر ؟؟
جعفر(بأسف وحسرة كلس على الكنبة بتعب):- للأسف زكية مخطوفة
ياسر حل فيه عينيه مصدوووم ومقادرش يصدق اللي وقع شد على راسو بحيرة وتعب والدنيا دارت بيه من كل جهة وطريق

علاش تخطفت وكيفاش وقع داكشي تابعو معايا الفصل الجاي وغاتعرفو أحبائي الحلوين …



يتبع ..

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.